{"collection":"Bible & Christianity","html_url":"https://unchartedknowledge.5gfusion.net/browse/bib/wb/kab/pe1.htm","path":"bib/wb/kab/pe1.htm","source_url":"https://sacred-texts.com/bib/wb/kab/pe1.htm","text":"1:1 Nekk Bu\u1e6drus, amcegge\u025b n \u0190isa Lmasi\u1e25, i ye\u0263\u1e5biben i\u021b\u025bicin di tmurt n Galasya, n Kafadusya, n Asya, n Bitinya akk-d wid yellan di tmurt n tqen\u1e6dert.\n1:2 Akken i t-iqsed Baba \u1e5aebbi, te\u021bwaxta\u1e5bem si tazwara s tezmert n \u1e5a\u1e5bu\u1e25 iqedsen iwakken a\u021b-\u021b\u1e0du\u025bem \u0190isa Lmasi\u1e25, a kkun-i\u1e63fu s idammen-is yuzzlen. \u1e5a\u1e5be\u1e25ma \u021b-\u021balwit a wen-d te\u021b\u021bunefkent s tuge\u021b.\n1:3 Ad i\u021b\u021bubarek \u1e5aebbi, Baba-s n Ssid-nne\u0263 \u0190isa Lmasi\u1e25 i \u0263-d-ifkan s \u1e5b\u1e5be\u1e25ma-ines tudert taj\u1e0di\u1e6d s \u1e25eggu n Ssid-nne\u0263 \u0190isa Lmasi\u1e25 si ger lmegtin, s wakka i nes\u025ba asirem ameqqran,\n1:4 iwakken a new\u1e5bet ayen ur nrekku, ur ne\u021b\u021bames, ur nfennu. D annect-agi i kkun-i\u021b\u1e5ba\u01e7un deg igenwan kunwi yumnen yis.\n1:5 Sidi \u1e5aebbi i\u021b\u1e25adar fell-awen s tezmert-is alamma iban-ed leslak nwen di taggara.\n1:6 D ayagi i kkun-issef\u1e5ba\u1e25en \u0263as akken tura sse\u1e25zanent-kkun teswi\u025bin agi deg ilaq a d-t\u025beddim seg uje\u1e5b\u1e5beb.\n1:7 D uguren-agi ara d-isbeggnen l\u01e7ehd n liman-nwen i ges\u025ban azal akte\u1e5b n ddheb ; \u0263as akken ddheb-agi ifennu, ilaq-as ad i\u025beddi di tmes iwakken ad i\u1e63fu. Akken da\u0263en ula d liman-nwen ilaq ad i\u021b\u021buje\u1e5b\u1e5beb ; s wakka a wen-yili d sebba n ccan, n ucekke\u1e5b, akk-d tmanegt asm'ara d-yu\u0263al \u0190isa Lmasi\u1e25.\n1:8 T\u1e25emmlem-t mbla ma twalam-t, tumnem yis \u0263as akken ar tura ur t-te\u1e93rim ara. Daymi lfe\u1e5b\u1e25-nwen d ameqqran armi ur tezmirem ara a t-id-tesfehmem s imeslayen.\n1:9 Axa\u1e6de\u1e5b lfayda n liman-nwen, d leslak n te\u1e5bwi\u1e25in-nwen.\n1:10 Lenbiya caren-d \u0263ef wayen ye\u025bnan leslak i wen-d-ihegga Sidi \u1e5aebbi. Meyzen, qellben a d-afen lawan d wamek ara d-id\u1e5bu wayen i d-ixebbe\u1e5b \u1e5a\u1e5bu\u1e25 n Lmasi\u1e25 yellan deg-sen ; axa\u1e6der d \u1e5a\u1e5bu\u1e25-agi n Lmasi\u1e25 i d-ixebb\u1e5ben \u0263ef wayen ara inne\u025btab Lmasi\u1e25 akk-d tmanegt ara d-yasen deffir le\u025btab-agi.\n1:12 I\u021b\u021bubeggen-asen-d belli ma\u010d\u010di i nutni, me\u025bna i kunwi i d-xebb\u1e5ben ayagi. D ayen i wen-d-xebb\u1e5ben tura wid i\u021bbecci\u1e5ben lexba\u1e5b n lxi\u1e5b, s tezmert n \u1e5a\u1e5bu\u1e25 iqedsen i d-i\u021b\u021buceg\u025ben seg igenni. Ula d lmalayekkat b\u0263ant ad walint annect-agi.\n1:13 Daymi, s\u01e7ehdet le\u025bqel-nwen, ur \u0263efflet ara, \u025basset iman-nwen, s\u025but asirem i\u1e63e\u1e25\u1e25an di leslak ara wen d-i\u021b\u021bunefken asm' ara d-yu\u0263al \u0190isa Lmasi\u1e25.\n1:14 Ilit am arrac i\u021b\u021ba\u0263en awal, ur xeddmet ara ayen akk i txeddmem asm' akken wer\u025bad i kkun-tekcim tmusni,\n1:15 me\u025bna ilit te\u1e63fam di tikli-nwen am akken i\u1e63fa Sidi \u1e5aebbi i wen-d issawlen.\n1:16 Imi yura : Ilit te\u1e63fam axa\u1e6der nekk \u1e63fi\u0263.\n1:17 Ma tnedhem \u0263er Sidi \u1e5aebbi am akken d Baba-twen, sbeggnet-ed di tudert-nwen belli t\u1e0du\u025bem-t s leqde\u1e5b ameqqran, deg wussan i wen-d iqqimen di ddunit-agi ; ne\u021b\u021ba ur nxeddem lxilaf ger yemdanen, ye\u021b\u1e25asaben yal yiwen s wakken llan lec\u0263al-is.\n1:18 Te\u1e93ram belli ma\u010d\u010di s idrimen ne\u0263 s ddheb ne\u0263 s lfe\u1e6d\u1e6da ur ne\u021bdum ara i te\u021bwacaf\u025bem si yir tikli i wen-d-\u01e7\u01e7an lejdud-nwen,\n1:19 me\u025bna s idammen \u0263layen n Lmasi\u1e25, i gefkan iman-is d asfel am izimer ur nes\u025bi l\u025bib, ur nes\u025bi ccama.\n1:20 Ihegga-t-id Sidi \u1e5aebbi uqbel a d-texleq ddunit, me\u025bna armi d ussan-agi ineggura i t-id-isbeggen \u0263ef ddemma-nwen.\n1:21 Imi yis i tes\u025bam liman \u0263er Sidi \u1e5aebbi i t-id-isse\u1e25yan si ger lmegtin, i s-ifkan tamanegt tameqqrant, iwakken lsas n usirem-nwen akk-d liman-nwen ad ilin di Sidi \u1e5aebbi.\n1:22 Imi tessazdgem ulawen-nwen, teddam di tide\u021b, akken a\u021b-\u021b\u1e25emmlem seg wul atmaten-nwen, mye\u1e25malet ihi wway gar-awen s wul ye\u1e63fan\n1:23 axa\u1e6der t\u025bawdem-d talalit \u0263er tudert taj\u1e0di\u1e6d. Talalit-agi ma\u010d\u010di seg wemdan i\u021bme\u021b\u021baten i d-tekka, me\u025bna seg wawal n tudert i\u021bdumun n Sidi \u1e5aebbi.\n1:24 Akken yella di tira iqedsen : Amdan am le\u1e25cic, + ccan-is me\u1e5b\u1e5ba am uje\u01e7\u01e7ig n lexla,+ le\u1e25cic i\u021b\u0263a\u1e5b, aje\u01e7\u01e7ig i\u0263elli,+\n1:25 ma d awal n Sidi \u1e5aebbi+ i\u021bdumu i dayem+ . Awal-agi, d awal n lexba\u1e5b n lxi\u1e5b i wen-d-i\u021b\u021bubec\u1e5ben.\n2:1 Kkset seg ulawen-nwen cce\u1e5b, ti\u1e25ila, tismin ; ur se\u025b\u025but ara sin wudmawen, ur \u021bmeslayet ara ayen n diri \u0263ef wiya\u1e0d.\n2:2 Am llufan illu\u1e93en ayefki n yemma-s, nadit ula d kunwi a\u021b-\u021be\u1e5bwum awal n Sidi \u1e5aebbi iwakken a\u021b-\u021bim\u0263u\u1e5bem, a\u021b-te\u021b\u021buselkem,\n2:3 ma yella tje\u1e5bbem ac\u1e25al yelha Sidi \u1e5aebbi !\n2:4 Qe\u1e5b\u1e5bbet \u0263u\u1e5b-es ne\u021b\u021ba yellan d-az\u1e5bu nni yeddren i \u1e0degg\u1e5ben yemdanen, me\u025bna Sidi \u1e5aebbi ixta\u1e5b-it, axa\u1e6der azal-is meqqe\u1e5b.\n2:5 Ula d kunwi yellan am iz\u1e5ba yeddren, dduklet iwakken ad ibedd wexxam i deg ara izde\u0263 \u1e5a\u1e5bu\u1e25 n Sidi \u1e5aebbi. A\u021b-\u021bilim \u021b-\u021bajma\u025bt n lmuqedmin ara iqeddmen s yisem n Ssid-nne\u0263 \u0190isa Lmasi\u1e25, iseflawen iqedsen ara i\u025be\u01e7ben i Sidi \u1e5aebbi.\n2:6 Axa\u1e6der atan wayen yuran di tira iqedsen : Xta\u1e5be\u0263-ed az\u1e5bu+ yes\u025ban azal d ameqqran+ , sserse\u0263-t deg udrar n Siyun,+ d ne\u021b\u021ba i ge\u1e6d\u1e6dfen lebni,+ win ara yamnen yis ur ineddem ara.+\n2:7 Amarezg-nwen kunwi yumnen yis. Ma d wid ur numin ara : Ad\u0263a\u0263-nni \u1e0degg\u1e5ben wid ibennun,+ d ne\u021b\u021ba i gu\u0263alen d az\u1e5bu alemmas,+ Win ye\u1e6d\u1e6dfen lebni. +\n2:8 D wagi i d az\u1e5bu + i gu\u0263alen d ugur i yemdanen, + d az\u1e5bu i ten-isse\u0263layen+ . Imi ugin ad amnen s wawal n Sidi \u1e5aebbi, ayen i ten-i\u021b\u1e5ba\u01e7un d ugur-agi ara ten-i\u0263e\u1e0dlen.\n2:9 Kunwi d arraw n la\u1e63el i\u021bwaxta\u1e5ben, d lmuqedmin n ugellid, d l\u01e7ens i\u1e63fan, d agdud i d-i\u021bwacef\u025ben. Te\u021bwaxta\u1e5bem iwakken a\u021b-\u021bbec\u1e5bem lec\u0263al yelhan n Sidi \u1e5aebbi, i kkun-id issuf\u0263en si \u1e6d\u1e6dlam yewwi-kkun-id \u0263er tafat-is iste\u025b\u01e7iben.\n2:10 Zik-nni ur tewwi\u1e0dem ara ula d l\u01e7ens, ma \u021b-\u021bura tu\u0263alem d agdud n Sidi \u1e5aebbi ; tellam zik-nni ur tes\u025bim ara \u1e5b\u1e5be\u1e25ma n Sidi \u1e5aebbi ma \u021b-\u021bura te\u021b\u021bunefk-awen-d.\n2:11 A wid e\u025bzizen ! Kunwi yellan d ibe\u1e5b\u1e5baniyen, d imsebriden di ddunit a kkun-nhu\u0263 a\u021b-\u021bettix\u1e5bem i leb\u0263i n tnefsit i ge\u021bna\u0263en d \u1e5b\u1e5bu\u1e25-nwen.\n2:12 S\u025but tikli ilhan ger wid ur nessin ara Sidi \u1e5aebbi, iwakken \u0263as a d-skidben fell-awen, ne\u0263 xedmen awen cce\u1e5b ; m' ara walin lec\u0263al-nwen ilhan ad \u1e25emden Sidi \u1e5aebbi asm' ara d-yerzu \u0263u\u1e5b-sen.\n2:13 \u0194ef ddemma n Sidi \u1e5aebbi qad\u1e5bet wid i\u1e25ekmen. Qad\u1e5bet agellid imi d ne\u021b\u021ba i g\u1e25ekmen,\n2:14 qad\u1e5bet ine\u0263lafen-is imi d ne\u021b\u021ba i ten-isbedden iwakken ad \u025baqben imcumen, ad cekk\u1e5ben wid i g\u021beddun s l\u1e25eqq.\n2:15 Xedmet ayen yelhan iwakken a\u021b-\u021berrem takmamt i imejhal ur nefhim ; d wagi i d leb\u0263i n Sidi \u1e5aebbi.\n2:16 Ilit d ilelliyen, me\u025bna ur ssexdamet ara tilelli-nwen iwakken a\u021b-\u021b\u0263ummem cce\u1e5b i txeddmem, ilit d iqeddacen n Sidi \u1e5aebbi.\n2:17 Qad\u1e5bet imdanen me\u1e5b\u1e5ba ; \u1e25emmlet atmaten nwen, \u1e0du\u025bet Sidi \u1e5aebbi, qad\u1e5bet agellid.\n2:18 Ay iqeddacen ! Ilaq a\u021b-qad\u1e5bem im\u025bellmen nwen, a\u0263et-asen awal ama i wid ilhan \u1e25ninen, ama i wid iwe\u025b\u1e5ben.\n2:19 D ayen ilhan i win i\u1e63ebb\u1e5ben m' ara i\u025beddi fell-as lba\u1e6del ilmend n \u1e6d\u1e6da\u025ba n Sidi \u1e5aebbi.\n2:20 Ma te\u021bwa\u025baqbem imi txedmem kra n diri, ma t\u1e63eb\u1e5bem i wannect-agi, anwa ara kkun-icekk\u1e5ben ? Me\u025bna ma i\u025bedda fell-awen lba\u1e6del, mi txedmem ayen yelhan, t\u1e63eb\u1e5bem, d ayen yelhan \u0263er Sidi \u1e5aebbi.\n2:21 \u0194er wannect-agi i wen-d-issawel Sidi \u1e5aebbi, axa\u1e6der Lmasi\u1e25 s yiman-is inne\u025btab fell-awen, i\u01e7\u01e7a-yawen-d lemtel iwakken a\u021b \u021beddum di late\u1e5b-is.\n2:22 Ne\u021b\u021ba ur nednib, le\u025bme\u1e5b ur d-iffi\u0263 lekdeb seg imi-s.\n2:23 Ne\u021b\u021ba i\u021bwaregmen ur d-yerri rregmat, qeh\u1e5ben-t ur d-irfid afus-is \u0263er yiwen ; lame\u025bna yerra kullec ger ifassen n win i g\u1e25ekmen s l\u1e25eqq.\n2:24 Ne\u021b\u021ba i g\u025bebban ddnubat-nne\u0263, i\u021bwasemme\u1e5b \u0263ef wumidag iwakken a nili am wid yemmuten \u0263ef wayen ye\u025bnan ddnub axa\u1e6der ddnub ur is\u025bi ara tazmert \u0263ef wid immuten. S wakka, tura ur ne\u021b\u025bici ara di ddnub me\u025bna di l\u1e25eqq, akken yura : Di le\u01e7ru\u1e25-is i tufam \u1e25ellu. +\n2:25 Zik tellam am ulli i\u025be\u1e5bqen, ma \u021b-\u021bura, tu\u0263alem \u0263er umeksa i\u021b\u025bassan \u0263ef te\u1e5bwi\u1e25in-nwen.\n3:1 Kunemti da\u0263en a tilawin \u1e0du\u025bemt irgazen-nkunt, iwakken \u0263as ma llan kra n yergazen ur uminen ara s wawal n Sidi \u1e5aebbi, s tikli ilhan n tilawin-nsen,\n3:2 ad amnen mbla imeslayen m' ara walin tikli-nsent te\u1e63fa, tes\u025ba leqde\u1e5b.\n3:3 Ur \u021bzewwiqemt ara iman-nkunt s ufella kan, ama s ddheb, ne\u0263 s llebsa ifazen, ne\u0263 s wemca\u1e0d n ucekku\u025b nkunt,\n3:4 me\u025bna ccba\u1e25a-nkunt ilaq a\u021b-\u021bili deg wulawen-nkunt ; axa\u1e6der ayen yes\u025ban azal ameqqran \u0263er Sidi \u1e5aebbi : \u021b-\u021bezdeg n wul, lehna d le\u1e25nana, imi ayagi d ayen i\u021bdumun.\n3:5 Akka i \u021bcebbi\u1e25ent iman-nsent tilawin i\u1e0du\u025ben Sidi \u1e5aebbi, ye\u021bqada\u1e5ben irgazen-nsent ;\n3:6 am Sa\u1e5ba i\u1e0du\u025ben argaz-is Ib\u1e5bahim, tessawal-as \u00ab A Sidi. \u00bb A\u021b-\u021bu\u0263alemt d yessi-s ma txeddmemt ayen yelhan mbla tugdi.\n3:7 Ma d kunwi ay irgazen, \u1e25adret tilawin-nwen imi te\u1e93ram ur \u01e7hident ara am kunwi. Ilaq a tent-tqad\u1e5bem axa\u1e6der nutenti da\u0263en ad we\u1e5btent yid-wen \u1e5b\u1e5be\u1e25ma n Sidi \u1e5aebbi ; s wakka ur d-i\u021bili ara \u1e93\u1e93e\u1e5bb i t\u1e93allit-nwen.\n3:8 Ihi s\u025but akk yiwet n l\u025beqliya, mye\u1e25malet wway gar-awen. S\u025but tagma\u021b, i\u1e25ninet, ddut s wannuz.\n3:9 Ur \u021b\u021barat ara \u021b\u021ba\u1e5b, ur \u021barrat ara rregmat i wid i kkun-iregmen ; me\u025bna dd\u025but s lxi\u1e5b i wiya\u1e0d axa\u1e6der d annect-agi i ge\u021b\u1e5ba\u01e7u deg-wen Sidi \u1e5aebbi, iwakken a\u021b-\u021bwe\u1e5btem lba\u1e5baka-ines.\n3:10 Win i\u1e25emmlen tudert, + ib\u0263an ad yili d ase\u025bdi deg ussan-is :+ + + Ad i\u1e25ader iles-is \u0263ef wayen n diri+ d yimi-s seg yimeslayen i\u021b\u0263u\u1e5b\u1e5bun+ .\n3:11 Ad isseb\u025bed iman-is \u0263ef cce\u1e5b, + ad ixeddem ayen yelhan,+ ad i\u021bnadi amek ara yili dayem di talwit,+ +\n3:12 axa\u1e6der Sidi \u1e5aebbi \u1e5be\u1e63\u1e63ant wallen-is \u0263ef yi\u1e25eqqiyen, + + isell-ed i ti\u0263\u1e5bi-nsen ; + me\u025bna i\u021beffer udem-is + \u0263ef wid ixeddmen cce\u1e5b.\n3:13 Anwa ara wen-ib\u0263un cce\u1e5b ma yella t\u1e25emmlem a\u021b-\u021bxedmem anagar ayen yelhan ?\n3:14 Yerna ma yella te\u021bwa\u1e0delmem \u0263ef l\u1e25eqq, fe\u1e5b\u1e25et ! Ur \u021b\u021bagadet ara imdanen, ur t\u1e25eyyi\u1e5bet ara.\n3:15 \u0190uzzet deg ulawen-nwen Lmasi\u1e25 yellan d Ssid-nwen. Ilit dayem twejdem a\u021b-\u021b\u01e7awbem s le\u025bqel d leqde\u1e5b i kra n wid i kkun-id-isteqsan \u0263ef wusirem nwen di Sidi \u1e5aebbi, iwakken ad ithedden wul-nwen ;\n3:16 imiren wid i d-iskiddiben \u0263ef tikli-nwen ilhan deg ubrid n Lmasi\u1e25, ad nne\u1e25camen.\n3:17 Axi\u1e5b a\u021b-\u021ben\u1e6da\u1e5b\u1e5bem ma txedmem ayen yelhan di leb\u0263i n Sidi \u1e5aebbi, wala a\u021b-\u021ben\u1e6da\u1e5b\u1e5bem ma txedmem ayen n diri.\n3:18 Lmasi\u1e25 s yiman-is immut ; s lmut-agi-ines i gefra tamsalt n ddnub n yemdanen. Ne\u021b\u021ba yellan d a\u1e25eqqi, immut \u0263ef ddemma n imednuben me\u1e5b\u1e5ba iwakken a kkun-yawi \u0263er Sidi \u1e5aebbi. N\u0263an lge\u021b\u021ba-s me\u025bna yu\u0263al-ed \u0263er tudert s tezmert n \u1e5a\u1e5bu\u1e25 iqedsen.\n3:19 S tezmert n \u1e5a\u1e5bu\u1e25 iqedsen i g\u1e5bu\u1e25 ad ibecce\u1e5b i le\u1e5bwa\u1e25 i\u021bwa\u1e25ebsen,\n3:20 yugin ad amnen, asm' akken i ten-i\u021b\u1e5ba\u01e7u Sidi \u1e5aebbi s \u1e63\u1e63be\u1e5b akken a d-u\u0263alen \u0263er webrid-is ; asmi i gexdem Sidna Nu\u1e25 lbabu\u1e5b i \u0263er kecmen anagar tmanya yemdanen i gmen\u025ben si l\u1e25emla n waman.\n3:21 Aman-agi, d lemtel n we\u0263\u1e0das i kkun-i\u021bselliken ass-a ula d kunwi. A\u0263\u1e0das-agi n waman ma\u010d\u010di d ayen i gessizdigen l\u01e7e\u021b\u021ba n wemdan, lame\u025bna i\u021bbeggin-ed belli nefka tudert-nne\u0263 i Sidi \u1e5aebbi s wul ye\u1e63fan. Ayagi yezmer a d-yed\u1e5bu i lmend n \u1e25eggu n Sidna \u0190isa Lmasi\u1e25\n3:22 i gulin \u0263er igenni, ye\u1e6d\u1e6def amkan n l\u1e25ekma \u0263er tama tayeffust n Sidi \u1e5aebbi, sennig n lmalayekkat, sennig n tezmar d l\u1e25ekmat me\u1e5b\u1e5ba.\n4:1 Am akken inne\u025btab Lmasi\u1e25 di l\u01e7e\u021b\u021ba-s, kunwi da\u0263en ilaq-awen a\u021b-\u021bheggim iman-nwen ; axa\u1e6der win i genne\u025btaben di l\u01e7e\u021b\u021ba-s i\u1e6d\u1e6daxe\u1e5b \u0263ef ddnub ;\n4:2 iwakken ussan i s-d-iqqimen di tudert-is, ad iddu s leb\u0263i n Sidi \u1e5aebbi, ma\u010d\u010di akken ib\u0263a ne\u021b\u021ba.\n4:3 Be\u1e5bka-kkun tura ! Tellam te\u021b\u021beddum d wid ijehlen, ur nessin Sidi \u1e5aebbi : tellam d isek\u1e5banen, te\u021b\u021beddum deg webrid n lefsad d zzhu, t\u025bebdem lemqamat, ulawen nwen \u010d\u010du\u1e5ben d \u1e6d\u1e6dme\u025b.\n4:4 Tura wehmen imi te\u1e6d\u1e6dax\u1e5bem fell-asen ur te\u021b\u021beddum ara deg webrid nsen i ge\u021b\u021bawin \u0263er nnger, daymi i kkaten deg-wen.\n4:5 Lame\u025bna a ten-i\u1e25aseb Sidi \u1e5aebbi, ne\u021b\u021ba ye\u021b\u1e25asaben wid iddren d wid yemmuten.\n4:6 S wakka, lexba\u1e5b n lxi\u1e5b i\u021b\u021bubecce\u1e5b ula i wid yemmuten iwakken \u0263as \u021b\u021bu\u1e25asben am imdanen n ddunit me\u1e5b\u1e5ba, ad idiren s \u1e5a\u1e5bu\u1e25 iqedsen akken ib\u0263a Sidi \u1e5aebbi.\n4:7 Taggara n ddunit te\u021b\u021beddu-d ! \u0194ef wannect-a, s\u025but le\u025bqel, \u025basset \u0263ef yiman-nwen iwakken a\u021b-\u021bizmirem a\u021b-\u021be\u1e93\u1e93allem.\n4:8 L\u1e25a\u01e7a tamezwarut, mye\u1e25malet wway gar-awen seg wul, axa\u1e6der le\u1e25mala te\u021bsama\u1e25 a\u1e6das n ddnubat.\n4:9 \u021ames\u1e6der\u1e25abet wway gar-awen s wul i\u1e63fan.\n4:10 Mkul yiwen deg-wen d acu n tikci i s-d-ifka Sidi \u1e5aebbi, ihi sxedmet-e\u021b iwakken ad sfaydin wiya\u1e0d seg-s.\n4:11 Win i wumi i d-ye\u021b\u021bunefk ad ih\u1e0de\u1e5b, ilaq ad ih\u1e0de\u1e5b s imeslayen i s-d-i\u021b\u021basen s \u0263u\u1e5b Sidi \u1e5aebbi. Akken da\u0263en ma yella waye\u1e0d i\u021b\u021bunefk-as-ed ad iqdec, ad iqdec \u0263ef wiya\u1e0d s tezmert i s-d-ifka Sidi \u1e5aebbi. Iwakken di yal cc\u0263el, ad i\u021bwa\u1e25med Sidi \u1e5aebbi s yisem n \u0190isa Lmasi\u1e25, bab n tezmert \u021b-\u021bmanegt si l\u01e7il \u0263er l\u01e7il. Amin !\n4:12 A wid e\u025bzizen ! Ur wehhmet ara \u0263ef wuje\u1e5b\u1e5beb i d-i\u0263ellin fell-awen am tmes, ur xell\u025bet ara, axa\u1e6der ayagi ilaq a d-id\u1e5bu.\n4:13 Lame\u025bna fe\u1e5b\u1e25et imi i te\u021b\u021bekkim di le\u025btab n Lmasi\u1e25, axa\u1e6der asm' ara d-tban tmanegt-is, a\u021b-\u021bfe\u1e5b\u1e25em yid-es lfe\u1e5b\u1e25 d ameqqran.\n4:14 Amarezg-nwen ma yella i\u025bedda fell-awen lba\u1e6del imi tumnem s Lmasi\u1e25 ! Axa\u1e6der \u1e5a\u1e5bu\u1e25 iqedsen i\u010d\u010du\u1e5ben \u021b-\u021bamanegt, \u1e5a\u1e5bu\u1e25 n Sidi \u1e5aebbi yella deg-wen !\n4:15 \u1e24adret a d-yili gar-awen win ara i\u021bwaqeh\u1e5ben axa\u1e6der yen\u0263a tamge\u1e5b\u1e6d ne\u0263 yuker, ne\u0263 iger iman-is di lec\u0263al n wiya\u1e0d ;\n4:16 lame\u025bna ma yella i\u021bwaqhe\u1e5b imi yumen s Lmasi\u1e25, ur ilaq ara ad inne\u1e25cam ; ilaq ad i\u1e25med Sidi \u1e5aebbi \u0263ef yisem-agi.\n4:17 Yewwe\u1e0d-ed lweqt n l\u1e25isab n Sidi \u1e5aebbi ; yerna ad ibdu seg wat wexxam-is. Ihi ma yella seg-ne\u0263 ara ibdu l\u1e25isab, amek ara tili taggara n wid ur numin ara s lexba\u1e5b n lxi\u1e5b n Sidi \u1e5aebbi ?\n4:18 Ma yella iw\u025be\u1e5b-as i u\u1e25eqqi iwakken ad i\u021bwasellek, amek ara ted\u1e5bu ihi d wemcum ur numin ara s Sidi \u1e5aebbi ?\n4:19 Ma yella s leb\u0263i n Sidi \u1e5aebbi i genne\u025btab yiwen ; ilaq ad yerr kullec ger ifassen n win i t-id-ixelqen, ad i\u021bkel fell-as, ad ikemmel di lec\u0263al-is ilhan.\n5:1 Ad nhu\u0263 tura imeqqranen di liman yellan gar-awen. Nekk yellan d ameqqran am nutni, nekk i\u1e25ed\u1e5ben i le\u025btab n Lmasi\u1e25, i\u021bekkan di tmanegt-is ara d-ibanen ; a ten we\u1e63\u1e63i\u0263 :\n5:2 \u1e24adret wid i wen-d-iwekkel Sidi \u1e5aebbi akken i\u021b\u1e25adar umeksa \u0263ef qe\u1e0d\u025bit-is ; lhit ihi yid-sen s leb\u0263i-nwen, ma\u010d\u010di sennig n wulawen-nwen, xedmet ayagi \u0263ef wudem n Sidi \u1e5aebbi ma\u010d\u010di s \u1e6d\u1e6dme\u025b.\n5:3 Ur ssim\u0263u\u1e5bet ara iman-nwen \u0263ef wid i wen-d-iwekkel Sidi \u1e5aebbi, me\u025bna ilit d lemtel ara teb\u025ben.\n5:4 Imiren asm' ara d-iban win yellan sennig imeqqranen me\u1e5b\u1e5ba, a wen d-te\u021b\u021bunefk t\u025be\u1e63\u1e63abt n tmanegt ur nfennu.\n5:5 Ula d kunwi da\u0263en ay ilme\u1e93yen, qad\u1e5bet imeqqranen di liman ! Ddut s leqde\u1e5b d wannuz, axa\u1e6der Sidi \u1e5aebbi ur iqebbel ara wid i\u021bzuxxun, me\u025bna i\u021b\u021bak \u1e5b\u1e5be\u1e25ma-s i wid i\u021b\u021banzen.\n5:6 Anzet ihi seddaw ufus i\u01e7ehden n Sidi \u1e5aebbi, iwakken a kkun-irfed di teswi\u025bt ilaqen.\n5:7 Rret akk i\u0263eblan-nwen ger ifassen-is, axa\u1e6der i\u021b\u1e25ebbi\u1e5b fell-awen.\n5:8 \u1e24adret, \u0190asset iman-nwen axa\u1e6der a\u025bdaw-nwen d Cci\u1e6dan, i\u021bezzi i\u1e5be\u025b\u025bed am yizem, i\u021bqellib anwa ara isseble\u025b.\n5:9 Ur s-\u021ba\u01e7\u01e7at ara abrid, s\u025but liman i\u01e7ehden ; axa\u1e6der te\u1e93ram belli atmaten nwen di ddunit me\u1e5b\u1e5ba, akka i tde\u1e5b\u1e5bu yid-sen am kunwi.\n5:10 M'ara tenne\u025btabem kra n wussan, Sidi \u1e5aebbi Bab n mkul \u1e5b\u1e5be\u1e25ma i kkun-ixta\u1e5ben s \u0190isa Lmasi\u1e25 iwakken a\u021b-\u021bilim di tmanegt-is i\u021bdumun, a kkun-iheggi, a kkun iseggem, a kkun-isse\u01e7hed, iwakken ur t\u0263ellim ara.\n5:11 I ne\u021b\u021ba l\u1e25ekma si l\u01e7il \u0263er l\u01e7il. Amin !\n5:12 S ufus n gma-tne\u0263 e\u025bzizen Silwan i \u0263ef ne\u021bkel, i wen-d-uri\u0263 kra n imeslayen-agi iwakken a kkun-nhu\u0263 yerna ad cehde\u0263 belli \u021b-\u021bagi i d \u1e5b\u1e5be\u1e25ma n tide\u021b n Sidi \u1e5aebbi s wayes tumnem.\n5:13 Tajma\u025bt n watmaten yumnen s Lmasi\u1e25, yellan di temdint n Babilun \u021bsellimen-d fell-awen ; ula d mmi Ma\u1e5bqus i\u021bsellim fell-awen.\n5:14 Msalamet wway gar-awen am atmaten ; talwit a d-ters fell-awen kunwi yumnen s Lmasi\u1e25.","title":"Kabyle Bible (NT): 1 Peter","type":"page"}