{"collection":"Bible & Christianity","html_url":"https://unchartedknowledge.5gfusion.net/browse/bib/wb/kab/pe2.htm","path":"bib/wb/kab/pe2.htm","source_url":"https://sacred-texts.com/bib/wb/kab/pe2.htm","text":"1:1 Nekk Sem\u025bun Bu\u1e6drus, d aqeddac, d amcegge\u025b n \u0190isa Lmasi\u1e25, i wid akk yes\u025ban liman am nukni, s l\u1e25eqq n Sidi \u1e5aebbi Illu-nne\u0263 akk-d umsellek nne\u0263 \u0190isa Lmasi\u1e25.\n1:2 \u1e5a\u1e5be\u1e25ma \u021b-\u021balwit a wen-d te\u021b\u021bunefkent s tuge\u021b, s tmusni n Sidi \u1e5aebbi akk-d Ssid-nne\u0263 \u0190isa.\n1:3 Tazmert n Sidi \u1e5aebbi tefka ya\u0263-ed ayen akk ilaqen i tudert d \u1e6d\u1e6da\u025ba ; yis i \u0263-d-isbeggen win akken i \u0263-ixta\u1e5ben s \u1e5b\u1e5be\u1e25ma-s \u021b-\u021bmanegt-is.\n1:4 Yis-sent da\u0263en i \u0263-d-te\u021b\u021bunefkent lem\u025bahdat yes\u025ban azal d ameqqran, iwakken s tmanegt-agi-ines akk-d \u1e5b\u1e5be\u1e25ma-s, a\u021b-\u021bekkim di lec\u0263al n Sidi \u1e5aebbi, a\u021b-\u021bbe\u025bdem \u0263ef \u1e6d\u1e6dme\u025b i\u021b\u021bawin \u0263er lefsad n ddunit.\n1:5 \u0194ef ayagi, \u01e7ehdet, \u1e93ew\u1e5bet iwakken a\u021b-\u021bernum i liman-nwen tikli ye\u1e63fan, i tikli ye\u1e63fan tamusni ;\n1:6 i tmusni rnut \u1e25ekmet deg yiman nwen, \u1e63eb\u1e5bet, i \u1e63\u1e63be\u1e5b rnut \u1e6d\u1e6da\u025ba,\n1:7 i \u1e6d\u1e6da\u025ba tagma\u021b, i tegma\u021b le\u1e25mala.\n1:8 Ma yella wannect-agi deg-wen s tuge\u021b, ur te\u021b\u021bilim ara d ime\u025bdazen, yerna ur te\u021b\u0263imim ara mbla tamusni n Ssid-nne\u0263 \u0190isa Lmasi\u1e25.\n1:9 Ma d win ixu\u1e63\u1e63en deg wannect-agi, am uder\u0263al isferfuden, ur i\u021bwali ara, i\u021b\u021bu akk ddnubat-is i\u025beddan i s-isemme\u1e25 Sidi \u1e5aebbi.\n1:10 Ay atmaten, \u1e93ew\u1e5bet, s\u01e7ehdet iman-nwen deg wannect-agi imi d Sidi \u1e5aebbi i wen-d-issawlen, d ne\u021b\u021ba i kkun-ixta\u1e5ben. Ma txedmem ayagi, ur t\u0263ellim ara.\n1:11 S wakka da\u0263en ara wen-teldi tewwurt iwakken a\u021b-\u021bkecmem \u0263er tgeldit i\u021bdumun n Ssid-nne\u0263 \u0190isa Lmasi\u1e25, amsellek-nne\u0263.\n1:12 A wen-d-\u021b\u025bawade\u0263 dayem annect-agi me\u1e5b\u1e5ba \u0263as akken tesnem tide\u021b-agi yerna te\u1e6d\u1e6dfem deg-s.\n1:13 Skud mazal-iyi ddre\u0263, ilaq-iyi a kkun-nhu\u0263 iwakken ur t\u0263eflem ara.\n1:14 Axa\u1e6der \u1e93ri\u0263 belli q\u1e5bib ad \u1e5bu\u1e25e\u0263 si ddunit-agi, am akken i yi-d-ixebbe\u1e5b Ssid-nne\u0263 \u0190isa Lmasi\u1e25 ;\n1:15 daymi i xeddme\u0263 ayen iwumi zemre\u0263 iwakken \u0263as mmute\u0263, a d-temmektim ayen akk i wen slemde\u0263.\n1:16 Ma\u010d\u010di \u021b-\u021bimucuha i wen-d newwi mi i wen-d-ne\u1e25ka \u0263ef tezmert n Ssid-nne\u0263 \u0190isa Lmasi\u1e25 \u021b-\u021bu\u0263alin-is, me\u025bna s wallen-nne\u0263 i nwala tamanegt-is.\n1:17 Nella yid-es asm' akken i s-d isbeggen Baba \u1e5aebbi ccan \u021b-\u021bezmert, asm' akken i d-in\u1e6deq Bab n tmanegt s imeslayen-agi : Wagi d Mmi e\u025bzizen deg-s i gella lfe\u1e5b\u1e25-iw.\n1:18 S\u1e63ut-agi i d-ikkan seg igenni, nesla-yas s yiman-nne\u0263 mi nella yid-es deg udrar iqedsen,\n1:19 yerna numen s wayen i \u0263-d xebb\u1e5ben lenbiya di tira iqedsen belli \u021b-\u021bide\u021b ; nenha-kkun a\u021b-\u021berrem ddehn nwen \u0263u\u1e5b-sent, axa\u1e6der \u021b-\u021baftilt ice\u025blen di \u1e6d\u1e6dlam alamma yuli wass, alamma ife\u01e7\u01e7e\u01e7 yitri n \u1e63\u1e63be\u1e25 deg ulawen nwen.\n1:20 Uqbel kullec, \u1e93ret belli imeslayen akk i d-nnan lenbiya, yuran di tektabt iqedsen, ur d-kkin ara s \u0263u\u1e5b-sen ;\n1:21 axa\u1e6de\u1e5b ulac ayen i d-xebb\u1e5ben s tmusni-nsen nutni, me\u025bna s tezmert n \u1e5a\u1e5bu\u1e25 iqedsen i d-nnan imeslayen i d-ikkan s \u0263u\u1e5b Sidi \u1e5aebbi.\n2:1 Si zik llan lenbiya n lekdeb ger l\u0263aci, akken da\u0263en ara d-kkren gar-awen wid ara kkun-i\u0263u\u1e5b\u1e5ben s uselmed-nsen. A d-skecmen tamusni-nsen n lekdeb d usex\u1e5beb, ad nek\u1e5ben ula d amsellek i ten-id-icuf\u025ben ; s wakka ara d-sse\u0263lin \u0263ef yiman-nsen tawa\u0263it ur bnin fell-as.\n2:2 \u0194as akken ff\u0263en i webrid, a\u1e6das ara ten-i\u1e0def\u1e5ben, \u0263ef ddemma-nsen ara i\u021bwargem webrid n tide\u021b ;\n2:3 a ten-yawi \u1e6d\u1e6dme\u025b, a wen kellxen s imeslayen n lekdeb ; me\u025bna nnger-nsen ur i\u021b\u025be\u1e6d\u1e6dil ara, tawa\u0263it te\u021b\u1e5ba\u01e7u-ten.\n2:4 Te\u1e93ram belli Sidi \u1e5aebbi ur i\u1e25unn ara \u0263ef lmalayekkat yeff\u0263en i webrid, me\u025bna i\u1e0degge\u1e5b-iten \u0263er tesraft lqayen n \u1e6d\u1e6dlam anda \u021bwaqnent, \u021b\u1e5ba\u01e7unt l\u1e25isab.\n2:5 Ur i\u1e25unn ara da\u0263en \u0263ef yemdanen n zzman aqdim asm' akken i sen-d icegge\u025b l\u1e25emla n waman i l\u0263aci amcum ; issemne\u025b seg-sen anagar Sidna Nu\u1e25 i\u021bbecci\u1e5ben l\u1e25eqq n Sidi \u1e5aebbi, akk-d seb\u025ba n yemdanen yid-es.\n2:6 I\u025buqeb timdinin n Sudum d Gumu\u1e5b, issenger-itent, isxe\u1e0d-itent s tmes, yerra-tent d i\u0263ed ; ifka-d ayagi d lemtel i yemcumen iwakken ad \u1e93ren d acu i ten-i\u021b\u1e5ba\u01e7un.\n2:7 Issemne\u025b anagar Lu\u1e6d yellan d a\u1e25eqqi, yemmu\u0263bnen \u0263ef yir lec\u0263al n l\u0263aci amcum yellan di zzman-is.\n2:8 Argaz-agi a\u1e25eqqi i\u021b\u025bicin gar-asen, ite\u021b\u021b-it wul-is \u0263ef ayen i gsell d wayen \u021bwalint wallen-is yal ass, \u0263ef yir tikli nsen d yir lec\u0263al-nsen.\n2:9 S wakka Sidi \u1e5aebbi ye\u1e93ra amek ara isellek di teswi\u025bin iwe\u025b\u1e5ben imdanen i g\u021beklen fell-as ; ma d imcumen a ten-yerr \u0263er rrif i l\u025biqab i d-iteddun ass n l\u1e25isab.\n2:10 Ad i\u025baqeb widak-nni i gxeddmen lefsad, i\u021bnadin anagar leb\u0263i n tnefsit-nsen, imi ur \u021b\u021baken ara lqima i lhiba n Sidi \u1e5aebbi. Ur \u021bqada\u1e5ben ara, qebb\u1e25en, ur uggaden ara ad regmen ula d lmalayekkat.\n2:11 Ma d lmalayekkat yes\u025ban lqe\u1e0dra \u021b-\u021bezmert sennig wid yesselmaden lekdeb, ur sen-\u021barrant ara rregmat zdat Sidi \u1e5aebbi.\n2:12 Me\u025bna imdanen-agi \u021b\u025bicin am lmal n lexla, lhan kan i \u1e63\u1e63yada, ur \u021bxemmimen ara, reggmen ayen ur ssinen ; ad \u0263lin di tesraft n ddnubat nsen, ad mmu\u1e5bdsen akken i\u021bmu\u1e5bdus lmal.\n2:13 D lba\u1e6del zer\u025ben ara d-megren, \u021b\u021bafen lfe\u1e5b\u1e25-nsen mi xeddmen \u025binani leb\u0263i n tnefsit-nsen. S\u010du\u1e5ben d l\u025bib akk-d l\u1e25ecma, yerna m' ara qqimen yid-wen \u0263er lmakla, ur \u021bset\u1e25in ara s lehdu\u1e5b-nsen d ukellex-nsen.\n2:14 S\u1e6dama\u025ben anagar yir tilawin iwakken ad znun yid-sent ; ur \u025beggun ara di ddnubat i xeddmen, \u021b\u0263u\u1e5b\u1e5bun imdanen ur ne\u01e7hid ara di liman, \u010d\u010du\u1e5ben d \u1e6d\u1e6dme\u025b, \u021b-\u021barwa n de\u025bwessu.\n2:15 S\u01e7an abrid n lewqam, \u025be\u1e5bqen mi teb\u025ben abrid i gewwi Bel\u025bam mmi-s n Bi\u025bu\u1e5b i g\u1e25emmlen ad yerbe\u1e25 idrimen s lexde\u025b.\n2:16 Lame\u025bna i\u1e25eccem-it Sidi \u1e5aebbi, mi d-issen\u1e6deq \u0263u\u1e5b-es ta\u0263yult tagugamt s \u1e63\u1e63ut n wemdan ; s wakka i t-i\u1e25bes, iwakken ur i\u021bkemmil ara di yir cc\u0263el-is.\n2:17 Imdanen-agi am tliwa iqqu\u1e5ben, am usigna y\n2:21 Axi\u1e5b-asen i yemdanen-agi lemmer ur ssinen ara abrid n l\u1e25eqq, wala imi i t-ssnen u\u0263alen \u1e6d\u1e6dax\u1e5ben i lame\u1e5b iqedsen i sen-d-i\u021b\u021buceg\u025ben s \u0263u\u1e5b Sidi \u1e5aebbi.\n2:22 Yed\u1e5ba yid-sen am akken yella di lemtul : I\u021b\u021bu\u0263al weqjun \u0263er iriran-is ; qqa\u1e5ben da\u0263en : Ilef iwumi ssarden, yu\u0263al imiren kan ad ixnunes deg walu\u1e0d.\n3:1 Ay i\u1e25biben, a\u021bah teb\u1e5ba\u021b-iw tis snat i wen-d-uri\u0263. Di snat yid-sent nuda\u0263 amek ara d-ssaki\u0263 di le\u025bqel nwen ixemmimen i\u1e63fan s uselmed-agi i wen-d-smekta\u0263.\n3:2 B\u0263i\u0263 a d temmektim imeslayen i d-nnan lenbiya iqedsen akk-d lame\u1e5b n Ssid-nne\u0263 \u0190isa Lmasi\u1e25 amsellek nne\u0263, i wen-slemden yakan imcegg\u025ben n Sidi \u1e5aebbi.\n3:3 Tazwara, ilaq a\u021b-\u021be\u1e93rem belli deg ussan ineggura a d-kkren yemdanen ara i\u025bicen s leb\u0263i n tnefsit-nsen, yerna ad tmesxi\u1e5ben fell-awen ;\n3:4 a wen-d-qqa\u1e5ben : ana\u0263 yenna-yawen a d-u\u0263ale\u0263, ihi anda yella tura ? Lejdud-nne\u0263 \u025beddan mmuten, ulac ayen i gbeddlen seg wasmi i d-texleq ddunit.\n3:5 \u021a\u021bun belli di zzman aqdim asmi i d-ixleq Sidi \u1e5aebbi igenwan d lqa\u025ba ; s wawal-is i d-issufe\u0263 lqa\u025ba seg waman ;\n3:6 S wawal-is da\u0263en i gessenger ddunit s l\u1e25emla n waman.\n3:7 Ula d igenwan d lqa\u025ba n tura s wawal-is da\u0263en i ten-ihegga iwakken a ten-issenger s tmes ass n l\u1e25isab asm' ara i\u025baqeb wid ur n\u1e0du\u025b ara Sidi \u1e5aebbi.\n3:8 Ay i\u025bzizen ! \u0194u\u1e5b-wat a\u021b-\u021be\u021b\u021bum ayagi : \u0263er Sidi \u1e5aebbi alef n iseggasen am yiwen wass, yiwen wass am alef n iseggasen.\n3:9 Sidi \u1e5aebbi ur i\u021b\u025be\u1e6d\u1e6dil ara ad ixdem ayen i d-yenna ; \u0263as akken kra n yemdanen \u0263ilen i\u025be\u1e6d\u1e6del ; me\u025bna ne\u021b\u021ba d \u1e63\u1e63be\u1e5b i wen-i\u1e63ebbe\u1e5b iwakken ur inegger ula yiwen deg-wen, yeb\u0263a a d-tu\u0263alem akk \u0263er ubrid-is.\n3:10 Ass n Sidi \u1e5aebbi a d-yas akken i d-i\u021b\u021bas umakar. Igenwan ad negren s yiwen zzhir d ameqqran, ayen yellan deg igenwan a t-te\u010d\u010d tmes, lqa\u025ba d wayen i \u021b-i\u025bemm\u1e5ben ad fnun.\n3:11 Imi ayagi me\u1e5b\u1e5ba ad ifnu, ac\u1e25al i wen-ilaq a\u021b-\u021b\u1e0du\u025bem Sidi \u1e5aebbi, a\u021b-\u021be\u1e63fum di tikli-nwen !\n3:12 A\u1e5b\u01e7ut, xedmet lme\u01e7hud-nwen iwakken a d-ye\u025bjel wass n Sidi \u1e5aebbi. Ass-nni i deg ara tekker tmes deg igenwan, i deg ara yefsi kra n wayen yellan deg-sen.\n3:13 Me\u025bna ne\u021b\u1e5ba\u01e7u am akken i \u0263-t-id-i\u025buhed Sidi \u1e5aebbi : Igenwan d lqa\u025ba imaynuten ( ijdiden ), i deg ara izde\u0263 l\u1e25eqq.\n3:14 Daymi ay i\u025bzizen, deg u\u1e5ba\u01e7u-agi te\u021b\u1e5ba\u01e7um \u1e25e\u1e5bset iman-nwen iwakken a kkun-id-yaf di lehna, zeddigit, mbla l\u025bib.\n3:15 \u1e24\u1e63ut belli \u1e63\u1e63be\u1e5b ameqqran n Sidi \u1e5aebbi, d leslak-nwen ! Am akken i wen-t-id-yura gma-tne\u0263 e\u025bzizen Bulus s tmusni i s-d-i\u021b\u021bunefken.\n3:16 D ayen i wen-d-iqqa\u1e5b da\u0263en di mkul tab\u1e5ba\u021b i deg i d-immeslay \u0263ef temsalin-agi. Llan deg-sent imeslayen iwe\u025b\u1e5ben i lefhama, daymi imdanen ur ne\u01e7hid ara di liman, ixu\u1e63\u1e63en di lefhama, sse\u025bwajen lme\u025bna-nsen akken i sse\u025bwajen ula \u021b-\u021bira nni\u1e0den, ayagi xeddmen-t i nnger-nsen.\n3:17 A wid e\u025bzizen, kunwi yeslan s wannect-agi me\u1e5b\u1e5ba, \u1e25adret \u0263ef yiman-nwen, \u0263u\u1e5b-wat a kkun-\u0263u\u1e5b\u1e5ben yemcumen ur numin ara s Sidi \u1e5aebbi, a kkun-sbe\u025bden \u0263ef ubrid-is i deg te\u1e6d\u1e6dfem.\n3:18 Lame\u025bna nnernit di tmusni d \u1e5b\u1e5be\u1e25ma n Ssid-nne\u0263 \u0190isa Lmasi\u1e25, Amsellek-nne\u0263. I ne\u021b\u021ba tamanegt am ass-a am ussan i d-iteddun i dayem. Amin !","title":"Kabyle Bible (NT): 2 Peter","type":"page"}