{"collection":"Bible & Christianity","html_url":"https://unchartedknowledge.5gfusion.net/browse/bib/wb/kab/phi.htm","path":"bib/wb/kab/phi.htm","source_url":"https://sacred-texts.com/bib/wb/kab/phi.htm","text":"1:1 S \u0263u\u1e5b Bulus akk-d Timuti iqeddacen n \u0190isa Lmasi\u1e25, i watmaten yumnen s \u0190isa Lmasi\u1e25, i imeqqranen n tqe\u1e0d\u025bit akk-d wid i ten-i\u021b\u025bassan yellan di temdint n Filibus.\n1:2 \u1e5a\u1e5be\u1e25ma \u021b-\u021balwit a wen-d \u021b\u021bunefkent s \u0263u\u1e5b baba-tne\u0263 \u1e5aebbi akk-d \u0190isa Lmasi\u1e25 Ssid-nne\u0263 !\n1:3 ?\u1e25emmide\u0263 \u021bcekki\u1e5be\u0263 Sidi \u1e5aebbi mkul tikkelt m'ara kkun-id-mmekti\u0263.\n1:4 Yal ass de\u025b\u025bu\u0263 fell-awen s lxi\u1e5b di t\u1e93allit-iw s lfe\u1e5b\u1e25 d ameqqran,\n1:5 \u0263ef ddemma n lexba\u1e5b n lxi\u1e5b i deg te\u021b\u021bekkim seg wass amezwaru armi \u021b-\u021bura.\n1:6 Umne\u0263 s tide\u021b belli win yebdan deg-wen cc\u0263el-agi yelhan, a t-ikemmel alamma d ass n tu\u0263alin n Sidna \u0190isa Lmasi\u1e25.\n1:7 D l\u1e25eqq imi \u021bxemmime\u0263 akkagi fell-awen axa\u1e6der tezgam deg ul-iw yerna te\u021b\u021bekkim irkulli di tejmilt i yi-d-ifka Sidi \u1e5aebbi, ama mi lli\u0263 di l\u1e25ebs ama mi \u021bbecci\u1e5be\u0263 lexba\u1e5b n lxi\u1e5b s tezmert \u021b-\u021bissas.\n1:8 Atan \u1e5aebbi d inigi, ac\u1e25al i kkun ccedha\u0263 axa\u1e6der \u1e25emmle\u0263-kkun s le\u1e25nana n \u0190isa Lmasi\u1e25 ;\n1:9 yerna ayen i ssuture\u0263 di t\u1e93allit-iw d anerni n le\u1e25mala-nwen di tmusni akk-d lefhama.\n1:10 S wakka a\u021b-\u021bissinem amek ara texti\u1e5bem ayen ifazen, iwakken a\u021b-\u021bilim te\u1e63fam, ulac ayen ara wen-ssukksen i wass n tu\u0263alin n Lmasi\u1e25 ;\n1:11 yerna tudert-nwen a\u021b-\u021be\u010d\u010da\u1e5b s wayen yellan d l\u1e25eqq i gxeddem yis-wen \u0190isa Lmasi\u1e25, i tmanegt akk-d l\u1e25emd n Sidi \u1e5aebbi.\n1:12 Ay atmaten, b\u0263i\u0263 a\u021b-\u021be\u1e93rem belli ayen id\u1e5ban yid-i, d ayen i gesnernan abecce\u1e5b n lexba\u1e5b n lxi\u1e5b.\n1:13 Axa\u1e6der deg ufrag n cc\u1e5be\u025b akk-d imukan nni\u1e0den me\u1e5b\u1e5ba, \u1e93ran akk \u0263ef ddemma n Lmasi\u1e25 i \u021bwa\u1e25ebse\u0263.\n1:14 A\u1e6das n watmaten i g\u021beklen \u0263ef Ssid-nne\u0263, yerna \u0263as akken \u1e93ran-iyi \u021bwarze\u0263 s snasel ur kukran ara, \u021bbecci\u1e5ben awal n \u1e5aebbi mbla tugdi.\n1:15 S tide\u021b, llan kra \u021bbecci\u1e5ben Lmasi\u1e25 s \u1e6d\u1e6dme\u025b akk-d zzux ; me\u025bna wiya\u1e0d \u021bbecci\u1e5ben s wul ye\u1e63fan d neyya.\n1:16 Widak-agi xeddmen ayagi s lma\u1e25ibba, imi \u1e93ran \u021bwaxta\u1e5be\u0263 iwakken ad daf\u025be\u0263 \u0263ef lexba\u1e5b n lxi\u1e5b.\n1:17 Ma d wiya\u1e0d, \u021bbecci\u1e5ben Lmasi\u1e25 s wul ye\u010d\u010du\u1e5ben \u021b-\u021bi\u1e25ila ; ixemmimen nsen ur \u1e63fin ara, \u0263ilen s wakka ara rnun lqe\u1e5b\u1e25 i wul-iw m'akka lli\u0263 di l\u1e25ebs.\n1:18 Ur i yi-tewqi\u025b ara, axa\u1e6der akken yeb\u0263u yili l\u1e25al, ama s t\u1e25ila ama s wul ye\u1e63fan Lmasi\u1e25 ye\u021bwabecce\u1e5b ; \u0263ef wayagi fe\u1e5b\u1e25e\u0263 yerna mazal ad fe\u1e5b\u1e25e\u0263,\n1:19 axa\u1e6der \u1e93ri\u0263 ayagi me\u1e5b\u1e5ba i nnfe\u025b inu, s t\u1e93allit-nwen akk-d lem\u025bawna n \u1e5a\u1e5bu\u1e25 n Sidna \u0190isa.\n1:20 B\u0263i\u0263 yerna ssarame\u0263 ur d-ye\u021b\u021bili wacemma s wayes ara sset\u1e25i\u0263 ; me\u025bna am ass-a am uzekka, s le\u021bkal ameqqran, a d-tban deg-i tmanegt n Lmasi\u1e25 ama s tudert-iw ama s lmut-iw ;\n1:21 axa\u1e6der \u0263u\u1e5b-i, Lmasi\u1e25 \u021b-\u021budert-iw ma d lmut d rrbe\u1e25.\n1:22 Me\u025bna ma yella tudert-iw di ddunit, d lfayda \u0263ef ddemma n leqdic-iw \u0263ef lexba\u1e5b n lxi\u1e5b , d acu ara xti\u1e5be\u0263 ? Ur \u1e93ri\u0263 ara !\n1:23 Di snat l\u01e7ihat-agi \u025bewqe\u0263 : deg yiwet n tama, b\u0263i\u0263 ad \u1e5bu\u1e25e\u0263 iwakken ad ili\u0263 akk-d Lmasi\u1e25, axa\u1e6der d ayen ifazen a\u1e6das ,\n1:24 di tama nni\u1e0den, \u0263ef ddemma-nwen yenfe\u025b axi\u1e5b ad idire\u0263 di ddunit ; ayagi t\u1e25eqqeqe\u0263 deg-s.\n1:25 ?ri\u0263 ad idire\u0263 yerna ad qqime\u0263 gar-awen me\u1e5b\u1e5ba, iwakken a\u021b-tennernim yerna a\u021b-\u021bfe\u1e5b\u1e25em di liman.\n1:26 Tu\u0263alin-iw \u0263u\u1e5b-wen, a wen-d-tefk sebba taj\u1e0di\u1e6d, s wayes ara tzuxxem s \u0190isa Lmasi\u1e25 \u0263ef ddemma-inu.\n1:27 Acu kan, ddut s tikli yuklal lexba\u1e5b n lxi\u1e5b n Lmasi\u1e25 iwakken ad sle\u0263 fell-awen, ama usi\u0263-ed a kkun-\u1e93re\u0263 ama \u0263abe\u0263 fell-awen, t\u01e7ehdem, tedduklem s yiwen n \u1e5a\u1e5bu\u1e25, te\u021b\u1e25arabem s yiwen wul \u0263ef liman i d-i\u021b\u021bak lexba\u1e5b n lxi\u1e5b.\n1:28 ?u\u1e5b-wat a\u021b-\u021be\u01e7\u01e7em i\u025bdawen a kkun-ssagden, ayagi ad yili i nutni d \u021bbut n nnger-nsen, i kunwi d \u021bbut n leslak-nwen ; annect-agi s \u0263u\u1e5b \u1e5aebbi i d-yekka ;\n1:29 axa\u1e6der te\u021b\u021bunefk-awen-d \u1e5b\u1e5be\u1e25ma ma\u010d\u010di kan iwakken a\u021b-\u021bamnem s Lmasi\u1e25, me\u025bna iwakken a\u021b-\u021ben\u025be\u021b\u021babem da\u0263en \u0263ef ddemma-ines\n1:30 m'ara te\u021b\u1e25arabem akken twalam \u021b\u1e25arabe\u0263 nekkini, yerna mazal \u021b\u1e25arabe\u0263 ar tura am akken i teslam yis.\n2:1 E\u025bni ur tufim ara \u1e63\u1e63be\u1e5b di Lmasi\u1e25, asse\u01e7hed di le\u1e25mala, tagma\u021b di \u1e5a\u1e5bu\u1e25 iqedsen wway-gar-awen, ur tufim ara le\u1e25nana d \u1e5b\u1e5be\u1e25ma ?\n2:2 Kemmlet ihi lfe\u1e5b\u1e25-iw, s\u025but yiwen uxemmem, s\u025but yiwet n le\u1e25mala, ddukklet s yiwen n \u1e5b\u1e5bu\u1e25, d yiwen uxemmem.\n2:3 Ur xeddmet acemma s um\u1e25izwer ne\u0263 iwakken a\u021b-\u021bes\u025bum ccan ur nes\u025bi lqima, me\u025bna anzet, \u1e25esbet wiya\u1e0d am akken s\u025ban lqima akte\u1e5b-nwen.\n2:4 Ilaq yal yiwen deg-wen ur i\u021bnadi ara kan \u0263ef nnfe\u025b-ines, lame\u025bna ilaq ad inadi \u0263ef nnfe\u025b n wiya\u1e0d.\n2:5 S\u025but deg ulawen nwen ixemmimen yellan di \u0190isa Lmasi\u1e25 :\n2:6 Ne\u021b\u021ba yellan d \u1e63\u1e63ifa n \u1e5aebbi, ur inuda ara ad isse\u025bdel iman-is akk-d \u1e5aebbi.\n2:7 Me\u025bna isellem kullec s yiman-is mi gu\u0263al d aqeddac. Isse\u025bdel iman-is d yemdanen mi d-iban s \u1e63\u1e63ifa n wemdan ;\n2:8 yessanez iman-is mi gedda s \u1e6d\u1e6da\u025ba armi d lmut, lmut \u0263ef wumidag.\n2:9 Daymi Sidi \u1e5aebbi issuli-t sennig n kra wayen yellan yerna ifka-yas isem yellan sennig n yismawen me\u1e5b\u1e5ba,\n2:10 iwakken s yisem n \u0190isa, yal tagecrirt a\u021b-\u021beknu deg igenwan, di lqa\u025ba, ddaw lqa\u025ba,\n2:11 iwakken yal iles a d-icehhed belli \u0190isa Lmasi\u1e25, d ne\u021b\u021ba i gellan sennig kullec i tmanegt n \u1e5aebbi baba-tne\u0263.\n2:12 A wid e\u025bzizen fell-i, yal ass te\u021b\u021ba\u0263em awal ; sbeggnet-ed ihi leslak-nwen s lec\u0263al, s \u1e6d\u1e6da\u025ba d wannuz, ma\u010d\u010di am asm'akken lli\u0263 yid-wen, me\u025bna tura akte\u1e5b imi \u0263abe\u0263 fell-awen.\n2:13 Axa\u1e6de\u1e5b d \u1e5aebbi i wen-d-i\u021b\u021baken leb\u0263i akk-d tezmert s wayes ara txedmem leb\u0263i-s yelhan.\n2:14 Xedmet kullec mbla asmermeg ne\u0263 as\u1e6duqqet n wawal,\n2:15 iwakken yiwen ur kkun-i\u021blumu, a\u021b-\u021bilim te\u1e63fam, d arraw n \u1e5aebbi, ur tse\u025b\u025bum ara l\u025bib ger l\u01e7il-agi n ixedda\u025ben, a\u021b-\u021bfe\u01e7\u01e7e\u01e7em gar-asen am teftilin di ddunit\n2:16 a\u021b-\u021be\u021bbecci\u1e5bem awal n tudert ; s wakka, ass n tu\u0263alin n Lmasi\u1e25, ayagi ad yili d sebba n ccan-iw imi ur uzzile\u0263 ur n\u025be\u021b\u021babe\u0263 ba\u1e6del.\n2:17 ?as akken ad \u021b\u021busebble\u0263 d asfel ara yernun \u0263ef wesfel n liman-nwen ye\u021b\u021bunefken d lwe\u025bda i Sidi \u1e5aebbi, d ayen i yi isfe\u1e5b\u1e25en yerna fe\u1e5b\u1e25e\u0263 yid-wen me\u1e5b\u1e5ba .\n2:18 Ula d kunwi fe\u1e5b\u1e25et am nekk, fe\u1e5b\u1e25et yid-i.\n2:19 S le\u021bkal i s\u025bi\u0263 di Sidna \u0190isa, ssarame\u0263 q\u1e5bib a wen-cegg\u025be\u0263 Timuti iwakken a yi-issef\u1e5be\u1e25 s lexba\u1e5b ara yi-d-yawi s \u0263u\u1e5b-wen.\n2:20 Ur s\u025bi\u0263 ula d yiwen ara yi-i\u025bawnen deg ixemmimen-iw, iwakken ad i\u1e25ebbe\u1e5b fell-awen seg ul ;\n2:21 axa\u1e6der akken ma llan \u021bnadin \u0263ef nnfe\u025b-nsen, ma\u010d\u010di \u0263ef nnfe\u025b n \u0190isa Lmasi\u1e25.\n2:22 Tessnem tikli n Timu\u1e6di, am weqcic \u0263er baba-s, yefka tudert-is yid-i i ubecce\u1e5b n lexba\u1e5b n lxi\u1e5b.\n2:23 Ihi akken kan ara tefru temsalt-iw, a wen-t-in-cegg\u025be\u0263\n2:24 yerna s\u025bi\u0263 le\u021bkal di Ssid-nne\u0263 belli q\u1e5bib a n-ase\u0263 s yiman-iw \u0263u\u1e5b-wen.\n2:25 Wala\u0263 ilaq-iyi a wen-cegg\u025be\u0263 gma-tne\u0263 Ebafrudit, amdakkul-iw di lxedma d u\u1e25areb \u0263ef ddemma n lexba\u1e5b n lxi\u1e5b, win akken i yi-d-tcegg\u025bem yewwi-yi-d s \u0263u\u1e5b-wen ayen akk \u1e25wa\u01e7e\u0263 ;\n2:26 iccedha-kkun me\u1e5b\u1e5ba yerna ye\u1e25zen a\u1e6das imi teslam yis yehlek.\n2:27 ?-\u021bide\u021b ihlek armi yewwe\u1e0d lmut ; me\u025bna i\u0263a\u1e0d Sidi \u1e5aebbi yerna ma\u010d\u010di kan d ne\u021b\u021ba i t-i\u0263a\u1e0den, \u0263a\u1e0de\u0263-t ula d nekk iwakken ur d-i\u0263elli ara fell-i le\u1e25zen \u0263ef waye\u1e0d.\n2:28 Cegg\u025be\u0263-t-in s lem\u0263awla, iwakken a\u021b-\u021bfe\u1e5b\u1e25em m'ara t-twalim yerna ula d nekk le\u1e25zen-iw ad yifsus.\n2:29 S\u1e6der\u1e25bet yis s lfe\u1e5b\u1e25 d ameqqran, s wakken yuklal yal yiwen yellan deg ubrid n Lmasi\u1e25 ; qad\u1e5bet imdanen am wigi\n2:30 axa\u1e6der \u0263ef ddemma n leqdic \u0263ef Lmasi\u1e25 i gewwe\u1e0d \u0263er lmut, mi gsebbel \u1e5b\u1e5bu\u1e25-is iwakken ad ixdem ayen akken ur tezmirem ara a yi-t-txedmem kunwi.\n3:1 Ihi ay atmaten, fe\u1e5b\u1e25et imi tedduklem akk-d Ssid-nne\u0263. Ur \u025beyyu\u0263 ara di tira n wayen i wen-n-uri\u0263 yakan, yerna ayagi a wen-yili d \u1e6d\u1e6dmana i liman-nwen.\n3:2 ?adret iman nwen deg wuccanen, \u1e25adret iman nwen \u0263ef yemcumen-nni i\u1e0deh\u1e5ben s lekdeb.\n3:3 Axa\u1e6de\u1e5b d nukni i ges\u025ban \u1e6d\u1e6dhara n \u1e63\u1e63e\u1e25 imi n\u025bebbed Sidi \u1e5aebbi s \u1e5a\u1e5bu\u1e25-is ; yerna ne\u021bzuxxu s \u0190isa Lmasi\u1e25 ne\u021bkel fell-as, ur ne\u021bkil ara \u0263ef lima\u1e5bat n yemdanen.\n3:4 Ula d nekk zemre\u0263 ad \u021bekle\u0263 \u0263ef lima\u1e5bat n yemdanen. Ma yella win i g\u0263ilen izmer ad i\u021bkel \u0263ef lima\u1e5bat agi, nekk zemre\u0263 ad \u021bekle\u0263 akte\u1e5b !\n3:5 Axa\u1e6der deh\u1e5be\u0263 ass wis tmanya, kki\u0263-ed si ccetla n wat Is\u1e5bail, n wedrum n Benyamin, d a\u025bib\u1e5bani mmi--s n u\u025bib\u1e5bani.\n3:6 ?ef wayen ye\u025bnan ccari\u025ba, d afarizi, ma d zzwa\u1e5ba, d win i\u021bqehhi\u1e5ben tajma\u025bt n imasi\u1e25iyen ; \u0263ef wayen ye\u025bnan lqanun n ccari\u025ba n Sidna Musa, ur yelli wayen i yi-ixu\u1e63\u1e63en.\n3:7 Me\u025bna ayen akken i yi-illan d lfayda, \u1e25esbe\u0263-t tura d lex\u1e63ara \u0263ef ddemma n Lmasi\u1e25.\n3:8 Zemre\u0263 a d ini\u0263 : \u1e25esbe\u0263 kullec d lex\u1e63ara \u0263ef ddemma n wayen ifazen, yellan \u021b-\u021bamusni n \u0190isa Lmasi\u1e25 Ssid-iw. ?ef ddemma-s qeble\u0263 a yi-i\u1e5bu\u1e25 kullec, \u1e25esbe\u0263 kullec d af\u1e5baden, iwakken a d-reb\u1e25e\u0263 Lmasi\u1e25\n3:9 yerna ad s\u025bu\u0263 amkan \u0263u\u1e5b-es, ad u\u0263ale\u0263 d a\u1e25eqqi ma\u010d\u010di mi \u1e0du\u025be\u0263 ccari\u025ba n Sidna Musa, me\u025bna imi u\u0263ale\u0263 d a\u1e25eqqi s liman yellan di Lmasi\u1e25, s l\u1e25eqq-nni i d-ye\u021b\u021bak Sidi \u1e5aebbi i wid yes\u025ban liman deg-s.\n3:10 S wakka ad issine\u0263 Lmasi\u1e25, ad issine\u0263 tazmert n \u1e25eggu-ines, ad \u021bekki\u0263 di le\u025btab-is, ad ili\u0263 am ne\u021b\u021ba di lmut-is iwakken\n3:11 akken yeb\u0263u yili l\u1e25al ad aw\u1e0de\u0263 s wayagi \u0263er \u1e25eggu si ger lmegtin.\n3:12 Ur d-nni\u0263 ara tikli-inu di Lmasi\u1e25 tennekmal ne\u0263 ww\u1e0de\u0263 \u0263er lmeqsud, me\u025bna mazal \u021b\u021bazzale\u0263 iwakken a t-aw\u1e0de\u0263, imi ula d nekk yewwi-yi \u0190isa Lmasi\u1e25.\n3:13 Ay atmaten, ur \u1e25sibe\u0263 ara iman-iw ww\u1e0de\u0263 \u0263er lmeq\u1e63ud-agi ; lame\u025bna tella yiwet l\u1e25a\u01e7a xeddme\u0263-\u021b : te\u021b\u021bu\u0263 ayen i\u025beddan, ssarame\u0263 \u0263er wayen yellan \u0263er zdat,\n3:14 \u021b\u021bazzale\u0263 \u0263er lmeq\u1e63ud-agi iwakken ad aw\u1e0de\u0263 \u0263er wayen i \u0263-ihegga Sidi \u1e5aebbi deg igenwan s \u0190isa Lmasi\u1e25.\n3:15 Nukni yellan d imdanen meqq\u1e5ben di liman ilaq a nes\u025bu akk axemmem-agi ; ma yella tes\u025bam axemmem yemxalafen \u0263ef kra n temsalin, d Sidi \u1e5aebbi ara kkun-d-isfehmen \u0263ef wayagi.\n3:16 S wakka, imi newwe\u1e0d di tudert-nne\u0263 \u0263er tegni\u021b-agi, ilaq a nkemmlet tikli-nne\u0263 s tdukli.\n3:17 \u0190andet-iyi ay atmaten, \u021bmuqulet \u0263er wid i twalam le\u1e25\u1e25un di liman am nukni,\n3:18 axa\u1e6der a\u1e6das i gteddun am i\u025bdawen n umidag n Lmasi\u1e25 ; nni\u0263-awen-t-id ac\u1e25al d abrid, tura da\u0263en a wen-t-id \u025biwde\u0263 s ime\u1e6d\u1e6dawen :\n3:19 Taggara-nsen d nnger ; \u1e5bebbi-nsen d i\u025bebba\u1e0d-nsen, \u021bzuxxun s wayen i glaq ad nne\u1e25camen, \u021bxemmimen anagar \u0263ef le\u1e25waye\u01e7 n ddunit.\n3:20 Ma d nukni tanezdu\u0263t-nne\u0263 deg igenwan, syenna i ne\u021b\u1e5ba\u01e7u s l\u1e25ir amsellek-nne\u0263 Sidna \u0190isa Lmasi\u1e25\n3:21 ara ibeddlen l\u01e7e\u021b\u021bat-nne\u0263 time\u1e25qu\u1e5bin, a tent-yerr am l\u01e7e\u021b\u021ba-s ye\u010d\u010du\u1e5ben d l\u025ba\u1e0dima, s tezmert s wayes i\u021b\u021barra kullec seddaw l\u1e25ekma-s.\n4:1 Daymi, ay atmaten-iw e\u025bzizen fell-i, kunwi i ccedha\u0263 a kkun \u1e93re\u0263, kunwi yellan d lfe\u1e5b\u1e25-iw, d ccan-iw , akka i glaq a\u021b-\u021be\u1e6d\u1e6dfem s l\u01e7ehd di Ssid-nne\u0263, a wid e\u025bzizen fell-i !\n4:2 B\u0263i\u0263 ad we\u1e63\u1e63i\u0263 tiyessetmatin nne\u0263 Iwudya akk-d Sinticya, iwakken ad ddukklent deg yiwen uxemmem di Ssid-nne\u0263.\n4:3 Ula d ke\u010d\u010d a gma Sizugus un\u1e63i\u1e25, \u1e0delbe\u0263-ak a tent-t\u025biwne\u1e0d nutenti i \u1e25urben yid-i \u0263ef ddemma n lexba\u1e5b n lxi\u1e5b, akk-d Klimun d imdukkal-iw nni\u1e0den di leqdic iwumi uran yismawen nsen di tektabt n tudert.\n4:4 Ilit dayem di lfe\u1e5b\u1e25 imi tedduklem akk-d Ssid-nne\u0263 ; a wen-t-id-\u025biwde\u0263 : ilit dayem di lfe\u1e5b\u1e25.\n4:5 Ilaq a\u021b-\u021bi\u1e25ninem \u0263er yemdanen me\u1e5b\u1e5ba, Ssid-nne\u0263 q\u1e5bib a d-yu\u0263al.\n4:6 Ur \u021b\u1e25ebbi\u1e5bet \u0263ef wacemma, me\u025bna di yal l\u1e25a\u01e7a, ssutret ayen te\u1e25wa\u01e7em i Sidi \u1e5aebbi s t\u1e93allit, s u\u1e25ellel akk-d le\u1e25madi ;\n4:7 imiren lehna n Sidi \u1e5aebbi i gugaren yal tamusni, a\u021b-\u021be\u1e25rez ulawen-nwen d ixemmimen nwen di \u0190isa Lmasi\u1e25.\n4:8 Taggara ay atmaten a wen-d ini\u0263 : ayen akk yellan d \u1e63\u1e63e\u1e25, d l\u1e25e\u1e5bma, d l\u1e25eqq, d \u1e63\u1e63fa, ayen akk yuklalen le\u1e25mala d wayen yuklalen leqde\u1e5b akk-d le\u1e25madi, ad ilin d sebba n ixemmimen-nwen.\n4:9 Ayen tlemdem s \u0263u\u1e5b-i yerna tqeblem-t, ayen twalam xeddme\u0263-t d wayen teslam nni\u0263-t-id xedmet-e\u021b ula d kunwi, d\u0263a Sidi \u1e5aebbi Bab n lehna ad yili yid-wen.\n4:10 Fe\u1e5b\u1e25e\u0263 a\u1e6das am akken \u021b-\u021bukci i yi-d-ifka Ssid-nne\u0263 mi wala\u0263 ul-nwen i\u025bawed i\u01e7\u01e7u\u01e7eg-ed \u0263u\u1e5b-i, te\u021b\u1e25ebbi\u1e5bem fell-i ; \u1e93ri\u0263 te\u021b\u1e25ebbi\u1e5bem fell-i , lame\u025bna ur wen-d-te\u0263li ara teswi\u025bt iwakken a yi-t-id-tbeggnem.\n4:11 Ur d-nni\u0263 ara ayagi imi xu\u1e63\u1e63e\u0263, axa\u1e6der lemde\u0263 ad steqni\u025be\u0263 di yal taswi\u025bt i deg lli\u0263.\n4:12 Ssne\u0263 ad \u025bice\u0263 di lex\u1e63a\u1e63, am akken ssne\u0263 ad \u025bice\u0263 di tawant. Di yal amkan, di kullec lemde\u0263 leqna\u025ba d lex\u1e63a\u1e63, lemde\u0263 tawant d la\u1e93.\n4:13 Zemre\u0263 i kullec s win i yi-sse\u01e7haden.\n4:14 Lame\u025bna d ayen ilhan i txedmem imi te\u021b\u021bekkim di le\u025btab-iw.\n4:15 Kunwi te\u1e93ram ay atmaten n temdint n Filibus belli asmi bdi\u0263 abecce\u1e5b n lexba\u1e5b n lxi\u1e5b, mi \u1e5bu\u1e25e\u0263 si tmurt n Masidunya. Ula d yiwet n tejma\u025bt ur tem\u1e25asab yid-i deg wayen i \u021b-id ike\u010d\u010dmen d wayen i te\u021b\u021bak d lem\u025bawna i wiya\u1e0d, anagar tajma\u025bt-nwen ;\n4:16 anagar kunwi i gxedmen ayagi, yerna mi lli\u0263 di temdint n Tisalunikya, snat n tikkal i yi-d-tcegg\u025bem ayen akk \u1e25wa\u01e7e\u0263.\n4:17 Ma\u010d\u010di \u0263ef lwe\u025bda i \u021bnadi\u0263, me\u025bna \u021bnadi\u0263 \u0263ef lfayda tameqqrant ara yilin di nnfe\u025b-nwen.\n4:18 Yewwe\u1e0d-iyi-d kullec, aql-i di tawant, ur iyi-ixu\u1e63\u1e63 wacemma imi i yi-d-iwwe\u1e0d wayen i d-tefkam i gma tne\u0263 Ibafrudit ; ayen i d-yusan s \u0263u\u1e5b-wen am le\u025b\u1e6de\u1e5b n rri\u1e25a yelhan, am wesfel i geqbel Sidi \u1e5aebbi yerna i\u025b\u01e7eb-as.\n4:19 Sidi \u1e5aebbi a wen-d-yefk ayen akk te\u1e25wa\u01e7em s wakken tella l\u025ba\u1e0dima n lba\u1e5bakat-is, di \u0190isa Lmasi\u1e25.\n4:20 Tamanegt i Sidi \u1e5aebbi baba tne\u0263, si l\u01e7il \u0263er l\u01e7il, amin !\n4:21 Sellmet \u0263ef wegdud n Sidi \u1e5aebbi, wid akk yumnen s \u0190isa Lmasi\u1e25.\n4:22 Atmaten akk yellan yid-i \u021bsellimen fell-awen. Wid akk yellan seg ugdud n Sidi \u1e5aebbi \u021bsellimen fell-awen, abe\u025bda wid yellan d iqeddacen n Qay\u1e63er.\n4:23 \u1e5a\u1e5be\u1e25ma n Sidna \u0190isa Lmasi\u1e25 a\u021b-\u021bili yid-wen.","title":"Kabyle Bible (NT): Philippians","type":"page"}