{"collection":"Bible & Christianity","html_url":"https://unchartedknowledge.5gfusion.net/browse/bib/wb/kab/plm.htm","path":"bib/wb/kab/plm.htm","source_url":"https://sacred-texts.com/bib/wb/kab/plm.htm","text":"1:1 Nekk, Bulus yellan di l\u1e25ebs \u0263ef ddemma n \u0190isa Lmasi\u1e25, akk-d d gma-tne\u0263 Timuti, i ke\u010d\u010d a Filimun e\u025bzizen, amdakkel-nne\u0263 di leqdic,\n1:2 i weltma-tne\u0263 Abya, i Arxibus a\u1e5bfiq-nne\u0263 di lec\u0263al n Lmasi\u1e25 akk-d tejma\u025bt i ge\u021b\u021bilin deg wexxam-ik ;\n1:3 \u1e5b\u1e5be\u1e25ma \u021b-\u021balwit a wen-d-te\u021b\u021bunefkent s \u0263u\u1e5b Sidi \u1e5aebbi baba-tne\u0263 akk-d Ssid-nne\u0263 \u0190isa Lmasi\u1e25.\n1:4 Mkul m'ara d\u025bu\u0263 \u0263er \u1e5aebbi \u021bmektaye\u0263-k-id, \u021b\u1e25emmide\u0263 Sidi \u1e5aebbi fell-ak ;\n1:5 axa\u1e6der sli\u0263 \u0263ef liman-ik meq\u1e5ben di Sidna \u0190isa Lmasi\u1e25 akk-d le\u1e25mala i tes\u025bi\u1e0d \u0263er yemqedsen me\u1e5b\u1e5ba.\n1:6 Ssuture\u0263 di \u1e5aebbi iwakken a d tesbeggne\u1e0d liman-inek di Lmasi\u1e25 s lec\u0263al yelhan, yerna a\u021b-\u021b\u025beqle\u1e0d ayen me\u1e5b\u1e5ba i \u0263-yelhan i nukni deg webrid n Lmasi\u1e25.\n1:7 Fe\u1e5b\u1e25e\u0263, yethedden wul-iw \u0263ef ddemma n le\u1e25mala-inek axa\u1e6der yis-ek a gma theddnen wulawen n yemqedsen.\n1:8 ?as Lmasi\u1e25 iserre\u1e25-iyi iwakken ad \u1e0debb\u1e5be\u0263 fell-ak \u0263ef wayen i glaq a\u021b-\u021bxedme\u1e0d,\n1:9 b\u0263i\u0263 axi\u1e5b a k-ssutre\u0263 s le\u1e25mala imi nekk Bulus yellan d am\u0263a\u1e5b yerna tura d ame\u1e25bus \u0263ef ddemma n \u0190isa Lmasi\u1e25,\n1:10 A k-\u1e25ellele\u0263 \u0263ef ddemma n gma-tne\u0263 Unizim, i gu\u0263alen d mmi axa\u1e6der wwi\u0263-t-id \u0263er webrid n Lmasi\u1e25 dagi di l\u1e25ebs.\n1:11 Zik ur k-yenfi\u025b ara, me\u025bna tura infe\u025b-a\u0263 di sin am ke\u010d\u010d am nekk.\n1:12 Ne\u021b\u021ba ye\u025bzizen \u0263u\u1e5b-i a\u1e6das, atan a k-t-in-erre\u0263 ihi.\n1:13 Ac\u1e25al b\u0263i\u0263 ad iqqim dagi \u0263u\u1e5b-i iwakken ad iyi-iqdec deg umkan-ik, m'akka \u021bwa\u1e25ebse\u0263 \u0263ef ddemma n lexba\u1e5b n lxi\u1e5b.\n1:14 Me\u025bna ur b\u0263i\u0263 ara ad xedme\u0263 ayagi mbla \u1e5b\u1e5bay-ik, iwakken ayen ara yi-txedme\u1e0d n wayen yelhan ur t-txeddme\u1e0d ara s u\u1e25ettem, lame\u025bna a t-txedme\u1e0d s wul-ik d leb\u0263i-k.\n1:15 Anwi ye\u1e93ran ? Ahat yemfa\u1e5baq yid-ek i kra n lweqt kan iwakken asm'ara temlilem ur te\u021b\u021bu\u0263alem ara a\u021b-\u021bemfa\u1e5baqem,\n1:16 imiren ur ye\u021b\u021bili ara d akli me\u025bna axi\u1e5b n wakli imi gu\u0263al d yiwen seg watmaten e\u025bzizen, abe\u025bda \u0263u\u1e5b-i, ilaq ad yi\u025bziz fell-ak akte\u1e5b imi tura ma\u010d\u010di d aqeddac-ik kan i gella, me\u025bna d gma-tne\u0263 di Lmasi\u1e25.\n1:17 Ma yella \u021b-\u021bidet t\u1e25esbe\u1e0d-iyi d a\u1e25bib-ik t\u1e25emmle\u1e0d-iyi, s\u1e6der\u1e25eb yis am akken ara tes\u1e6der\u1e25be\u1e0d yis-i.\n1:18 Ma yella i\u1e0dlem-ik ne\u0263 te\u021b\u021balase\u1e0d-as l\u1e25a\u01e7a, \u1e25aseb-iyi-d nekkini.\n1:19 Uri\u0263-ak-n ayagi s ufus-iw : \u00ab d nekk Bulus ara k-ixell\u1e63en deg wayen i s-te\u021b\u021balase\u1e0d \u00bb yerna mbla ma smekta\u0263-k-id belli d nekk i k-id yewwin \u0263er webrid n leslak.\n1:20 A gma, xdem-iyi lemziya-agi \u0263ef ddemma n Ssid-nne\u0263 \u0190isa Lmasi\u1e25 akken ad yethedden wul-iw di Lmasi\u1e25.\n1:21 Uri\u0263-ak-n tab\u1e5ba\u021b-agi imi \u021bekle\u0263 ad iyi-ta\u0263e\u1e0d awal, yerna \u1e93ri\u0263 a\u021b-\u021bxedme\u1e0d nnig wayen i k-n-ssutre\u0263.\n1:22 Heggit-iyi taxxamt, axa\u1e6der ssarame\u0263 \u0263er Sidi \u1e5aebbi q\u1e5bib a-yi-n yerr \u0263u\u1e5b-wen akken i s- tessuturem kull-as di t\u1e93allit-nwen.\n1:23 Gma-tne\u0263 Ibafras, ye\u021b\u021bu\u1e25ebsen yid-i \u0263ef ddemma n Lmasi\u1e25 ye\u021bsellim fell-ak a\u1e6das.\n1:24 ?sellimen-d da\u0263en fell-ak atmaten ixeddmen yid-i : Ma\u1e5bqus, Aris\u1e6dark, Dimas akk-d Luqa.\n1:25 \u1e5a\u1e5be\u1e25ma n Ssid-nne\u0263 \u0190isa Lmasi\u1e25 a\u021b-\u021bili fell-awen.","title":"Kabyle Bible (NT): Philemon","type":"page"}