{"collection":"Bible & Christianity","html_url":"https://unchartedknowledge.5gfusion.net/browse/bib/wb/kab/rev.htm","path":"bib/wb/kab/rev.htm","source_url":"https://sacred-texts.com/bib/wb/kab/rev.htm","text":"1:1 Wagi d awe\u1e25\u1e25i n Sidna \u0190isa Lmasi\u1e25, i s-d-ifka \u1e5aebbi iwakken ad ixebbe\u1e5b iqeddacen-is \u0263ef wayen ara d-yed\u1e5bun ; le\u1e25waye\u01e7-agi i d-i\u021beddun ixebbe\u1e5b-itent-id s lmelk i d-icegge\u025b i uqeddac-is Yu\u1e25enna.\n1:2 Yu\u1e25enna ye\u1e25ka-d ayen akk ye\u1e93ra. Iched-ed \u0263ef wawal n tudert akk \u021b-\u021bide\u021b i d-yewwi Sidna \u0190isa Lmasi\u1e25.\n1:3 D ise\u025bdiyen wid ara ye\u0263\u1e5ben, ara yessem\u1e25essen i leh\u1e0du\u1e5b n uwe\u1e25\u1e25i-agi yerna \u1e25erzen-ten, axa\u1e6der lweqt i deg ara yed\u1e5bu wannect-agi iqe\u1e5b\u1e5beb-ed.\n1:4 S \u0263u\u1e5b Yu\u1e25enna, i seb\u025ba tejmuya\u025b yellan di tmurt n Asya : \u1e5b\u1e5be\u1e25ma \u021b-\u021balwit a wen-d-\u021b\u021bunefkent s \u0263u\u1e5b Win yellan si tazwara, yellan ass-a, ara d-yu\u0263alen, s \u0263u\u1e5b seb\u025ba le\u1e5bwa\u1e25 n \u1e5aebbi ye\u021b\u021bilin zdat wemkan n l\u1e25ekma-ines,\n1:5 s \u0263u\u1e5b Sidna \u0190isa Lmasi\u1e25 inigi n \u1e63\u1e63e\u1e25, amezwaru i d-i\u1e25yan si ger lmegtin, agellid n igelliden n ddunit ! Ne\u021b\u021ba i \u0263-i\u1e25emmlen, i \u0263-isellken si ddnubat nne\u0263 s idammen-is yuzzlen fell-ane\u0263,\n1:6 yerra-ya\u0263 d lmuqedmin iqeddcen \u0263ef Sidi \u1e5aebbi, Baba-s. Tamanegt tameqqrant d l\u1e25ekma i Sidna \u0190isa Lmasi\u1e25 i dayem ! Amin !\n1:7 Ataya, iteddu-d \u0263ef wusigna, mkul ti\u1e6d a t-twali, ula d wid i t-ifetken a t-walin ; d\u0263a igduden n ddunit me\u1e5b\u1e5ba ad me\u01e7\u01e7den fell-as. ?-\u021bide\u021b, akka ara ted\u1e5bu !\n1:8 Sidi \u1e5aebbi yenna-d : d nekk i d amezwaru i d aneggaru, d Win yellan si tazwara, yellan ass-a, ara d-yu\u0263alen ; d nekk i d Bab n tezmert. .\n1:9 Nekk Yu\u1e25enna gma-twen, yellan yid-wen ama di lme\u1e25na \u0263ef wayen ye\u025bnan tagelda n Sidi \u1e5aebbi, ama \u0263ef tu\u1e6d\u1e6dfa di liman di Sidna \u0190isa, lli\u0263 di tegzirt n Batmus \u0263ef demma n wawal n Sidi \u1e5aebbi yerna ad cehde\u0263 \u0263ef Sidna \u0190isa.\n1:10 Deg wass n weste\u025bfu iwe\u1e25\u1e25a yi-d \u1e5a\u1e5bu\u1e25 n Sidi \u1e5aebbi, sli\u0263 i yiwet n ta\u0263ect \u025blayen i d-yekkan deffir-i am akken d \u1e63\u1e63ut n lbuq,\n1:11 teqqa\u1e5b-ed : Ayen akka i te\u021bwali\u1e0d aru-t di tektabt tcegg\u025be\u1e0d-\u021b i seb\u025ba tejmuya\u025b agi n watmaten : i tejma\u025bt n Ifasus, n Smirnus, n Bir\u0263amus, n Tyatir, n Sardas, n Filadilfya akk-d \u021bin n Ludikus.\n1:12 Muqle\u0263 \u0263er deffir iwakken ad \u1e93re\u0263 anwa i yi-d-i\u021bmeslayen, wala\u0263 seb\u025ba teftilin n ddheb,\n1:13 di tlemmast nsent yella yiwen lxelq icuban amdan ; yelsa ajellab yerna yebges tabagust n ddheb.\n1:14 Cc\u025be\u1e5b-is d amellal am ta\u1e0du\u1e6d taceb\u1e25ant, am udfel, allen-is ce\u025blent am tmes,\n1:15 i\u1e0da\u1e5b\u1e5ben-is \u021bfe\u01e7\u01e7i\u01e7en am nn\u1e25as yefsin di tmes, \u1e63\u1e63ut-is yecba zzhir n waman ye\u021bseqsiqen deg udrar.\n1:16 Ye\u1e6d\u1e6def seb\u025ba yetran deg ufus-is ayeffus, seg imi-s yeffe\u0263-d ujenwi yes\u025ban sin imawen iqe\u1e0d\u025ben , udem-is ye\u021bfe\u01e7\u01e7i\u01e7 am yi\u1e6dij m'ara d-icce\u025bce\u025b deg uzzal.\n1:17 Mi t-wala\u0263, fecle\u0263, \u0263li\u0263 \u0263er i\u1e0da\u1e5b\u1e5ben-is. Yessers fell-i afus-is ayeffus yenna : Ur \u021b\u021bagad ara ! D nekk i gellan si tazwara alamma \u021b-\u021baggara ,\n1:18 nekk d Win yeddren ; lli\u0263 mmute\u0263, me\u025bna \u1e25yi\u0263-ed si lmut, tura aql-iyi ddre\u0263 i dayem. D nekk i ge\u1e6d\u1e6dfen tisura n lmut akk-d tid n laxe\u1e5bt.\n1:19 Ayen akka i te\u021bwali\u1e0d, \u0263ef wayen ide\u1e5b\u1e5bun tura d wayen i d-iteddun, aru-t di tektabt.\n1:20 ?ef wayen ye\u025bnan lba\u1e0dna n seb\u025ba yitran-agi i twala\u1e0d deg ufus-iw ayeffus, akk-d seb\u025ba teftilin-agi n ddheb : seb\u025ba yitran-agi d lmalayekkat n seb\u025ba tejmuya\u025b n imasi\u1e25iyen, ma d seb\u025ba teftilin-agi, d seb\u025ba-nni tejmuya\u025b.\n2:1 Aru ayagi i lmelk n tejma\u025bt n temdint n Ifasus : atah wayen i d-yeqqa\u1e5b Win ye\u1e6d\u1e6dfen seb\u025ba yetran deg ufus-is ayeffus, Win ye\u021b\u021bilin di tlemmast n seb\u025ba teftilin n ddheb :\n2:2 ssne\u0263 tikli-inek d lec\u0263al-ik, \u1e93ri\u0263 le\u025btab-ik d \u1e63\u1e63be\u1e5b i t\u1e63eb\u1e5be\u1e0d ; \u1e93ri\u0263 ur tezmire\u1e0d ara a\u021b-\u021bawi\u1e0d i yemcumen, tje\u1e5bbe\u1e0d wid i\u021b\u021barran iman-nsen d \u1e5b\u1e5busul ur llin, tkecfe\u1e0d-ten-id belli d ikeddaben i llan.\n2:3 T\u1e63eb\u1e5be\u1e0d, t\u025betbe\u1e0d \u0263ef ddemma n yisem-iw, ur tefcile\u1e0d ara.\n2:4 Lame\u025bna tella yiwet l\u1e25a\u01e7a i \u0263ef ara k-lume\u0263 : le\u1e25mala i tes\u025bi\u1e0d \u0263u\u1e5b-i tura ma\u010d\u010di am le\u1e25mala n wussan imezwura.\n2:5 Mmekti-d seg wansi i d-te\u0263li\u1e0d, endem deg wayen txedme\u1e0d tu\u0263ale\u1e0d \u0263er lec\u0263al-ik imezwura, ma yella ur tendime\u1e0d ara, atan a n-ase\u0263 \u0263u\u1e5b-ek, ad kkse\u0263 taftilt-ik seg umkan-is.\n2:6 Lame\u025bna atan wayen i yi-i\u025be\u01e7ben deg-k : tke\u1e5bhe\u1e0d lec\u0263al n inikulaten, akken i ten-ke\u1e5bhe\u0263 ula d nekk.\n2:7 Win yes\u025ban ime\u1e93\u1e93u\u0263en, ad isme\u1e25ses i wayen i d-iqqa\u1e5b \u1e5a\u1e5bu\u1e25 n \u1e5aebbi i tejmuya\u025b n watmaten : win ara ye\u1e6d\u1e6dfen deg-i alamma \u021b-\u021baggara, a s-fke\u0263 ad ye\u010d\u010d si ttej\u1e5ba n tudert yellan di l\u01e7ennet.\n2:8 Aru ayagi i lmelk n tejma\u025bt n temdint n Smirnus : atah wayen i d-iqqa\u1e5b Win yellan si tazwara alamma \u021baggara, Win yemmuten yu\u0263al-ed \u0263er tudert :\n2:9 ?ri\u0263 lme\u1e25na akk-d le\u0263ben i deg telli\u1e0d, lame\u025bna \u0263er \u1e5aebbi d ame\u1e5bkanti ; \u1e93ri\u0263 cce\u1e5b i hedd\u1e5ben fell-ak wid i\u1e25esben iman-nsen d agdud n \u1e5aebbi ur llin, lame\u025bna nutni si tejma\u025bt n Cci\u1e6dan.\n2:10 Ur \u021b\u021bagad ara le\u025btab i d-i\u021beddun \u0263u\u1e5b-ek. Atan Cci\u1e6dan ad yerr kra deg-wen \u0263er l\u1e25ebs iwakken a\u021b-\u021buje\u1e5bbem, a\u021b-\u021bilim di le\u025btab \u025bec\u1e5ba wussan. E\u1e6d\u1e6def di liman-inek alamma d lmut, a k-d-fke\u0263 ta\u025be\u1e63\u1e63abt n tudert.\n2:11 Win yes\u025ban ime\u1e93\u1e93u\u0263en, ad isme\u1e25ses i wayen i d-yeqqa\u1e5b \u1e5a\u1e5bu\u1e25 n \u1e5aebbi i tejmuya\u025b n watmaten : win ara ye\u1e6d\u1e6dfen deg-i alamma \u021b-\u021baggara, ur t-te\u021b\u021bawi ara lmut tis snat.\n2:12 Aru ayagi i lmelk n tejma\u025bt n temdint n Bir\u0263amus : atah wayen i d-yeqqa\u1e5b Win yes\u025ban ajenwi iqe\u1e0d\u025ben di snat le\u01e7wahi :\n2:13 ?ri\u0263 anda i tzed\u0263e\u1e0d, dinna i gella wemkan n l\u1e25ekma n Cci\u1e6dan. Te\u1e6d\u1e6dfe\u1e0d deg isem-iw, ur tenki\u1e5be\u1e0d ara liman i tes\u025bi\u1e0d deg-i ula deg ussan i deg n\u0263an Antibas, inigi-inu n \u1e63\u1e63e\u1e25, dinna \u0263u\u1e5b-wen anida ye\u1e6d\u1e6def Cci\u1e6dan amkan.\n2:14 Lame\u025bna atan wayen yellan deg-ek ur iyi-ne\u025b\u01e7ib ara : llan \u0263u\u1e5b-ek kra yemdanen mazal-iten \u1e6d\u1e6dfen deg uselmed n Bel\u025bam : isselmad i ugellid Balak ayen ara yilin d sebba n tucc\u1e0da n warraw n wat Is\u1e5bail, isselmad-asen ad \u010d\u010den aksum ye\u021b\u021bunefken d iseflawen i ssada\u021b yerna a ten-tawi ccehwat n tnefsit-nsen.\n2:15 Llan da\u0263en \u0263u\u1e5b-ek kra yemdanen ye\u1e6d\u1e6dfen deg uselmed n inikulaten.\n2:16 Endem ihi ! Ne\u0263 m'ulac ur \u021b\u025be\u1e6d\u1e6dile\u0263 ara a n-ase\u0263 \u0263u\u1e5b-ek, a ten-\u1e25arbe\u0263 s ujenwi n yimi-w.\n2:17 Win yes\u025ban ime\u1e93\u1e93u\u0263en, ad isme\u1e25ses i wayen i d-iqqa\u1e5b \u1e5a\u1e5bu\u1e25 n \u1e5aebbi i tejmuya\u025b n watmaten ! Win ye\u1e6d\u1e6dfen deg-i alamma \u021b \u021baggara, a t-id-\u1e5bezqe\u0263 s tmana-nni ye\u021bwa\u1e25erzen, a s-fke\u0263 da\u0263en abla\u1e0d aceb\u1e25an i \u0263ef yura isem ajdid ur yessin yiwen, anagar win iwumi ara d-ye\u021b\u021bunefk ubla\u1e0d-nni.\n2:18 Aru i lmelk n tejma\u025bt n temdint n Tyatir : atah wayen i d-yeqqa\u1e5b Mmi-s n \u1e5aebbi Win yes\u025ban allen ice\u025b\u025blen am tmes, i\u1e0da\u1e5b\u1e5ben-is \u021bfe\u01e7\u01e7i\u01e7en am nn\u1e25as :\n2:19 ?ri\u0263 lec\u0263al-ik, le\u1e25mala d liman i tes\u025bi\u1e0d akk-d wayen i txeddme\u1e0d s wul ye\u1e63fan d \u1e63\u1e63be\u1e5b. ?ri\u0263 da\u0263en tura txeddme\u1e0d akte\u1e5b n wussan imezwura.\n2:20 Lame\u025bna tella yiwet l\u1e25a\u01e7a ur iyi-ne\u025b\u01e7ib ara deg-k : te\u01e7\u01e7i\u1e0d Yisabil yerran iman-is d nnbi a\u021b-\u021bkellex iqeddacen-iw s uselmed-ines, iwakken ad \u010d\u010den aksum ye\u021b\u021bunefken d iseflawen i ssada\u021b yerna a ten-awint ccehwat n tnefsit-nsen.\n2:21 E\u01e7\u01e7i\u0263-as lweqt \u0263ile\u0263 a\u021b-\u021bendem, lame\u025bna ur teb\u0263i ara a\u021b-\u021berr a\u1e0dar \u0263ef tecmatin i txeddem.\n2:22 Usu-nni i \u0263ef txeddem ticmatin, dinna ara d-sse\u0263li\u0263 fell-as lehlak icemten ne\u021b\u021bat d wid yeznan yid-es anagar ma yella beddlen tikli.\n2:23 A d-cegg\u025be\u0263 lmut i warraw-is ; s wakka tijmuya\u025b n watmaten me\u1e5b\u1e5ba ad set\u025be\u1e5bfen belli \u1e93ri\u0263 ayen yellan deg yixemmimen d wulawen n yemdanen, ad rre\u0263 i mkul yiwen ayen yuklal.\n2:24 Ma d kunwi akk-d wid me\u1e5b\u1e5ba yellan si tejma\u025bt n Tyatir ur neqbil ara aselmed-agi, yugin a\u021b-\u021bkecmem di lba\u1e0dna lqayen ye\u025bni tin n Cci\u1e6dan, a wen-ini\u0263 : ur wen-sbabbaye\u0263 ara ta\u025bkumt nni\u1e0den ;\n2:25 d acu kan, \u1e6d\u1e6dfet di liman i tes\u025bam alamma u\u0263ale\u0263-ed.\n2:26 Wid ye\u1e6d\u1e6dfen deg-i ur fcilen ara, wid \u1e25erzen yerna \u1e0du\u025ben lumu\u1e5bat-iw alamma \u021b-\u021baggara, a sen-fke\u0263 l\u1e25ekma \u0263ef le\u01e7nas.\n2:27 A sen-fke\u0263 l\u1e25ekma i yi-d i\u021b\u021bunefken s \u0263u\u1e5b Baba, ad \u1e25ekmen fell-asen s u\u025bekkaz n wuzzal, a ten \u1e5bzen am akken \u021b\u1e5bu\u1e93un ibuqalen n talaxt. A sen-fke\u0263 tafat n yitri n \u1e63\u1e63be\u1e25.\n2:29 Win yes\u025ban ime\u1e93\u1e93u\u0263en, ad isme\u1e25ses i wayen i d-yeqqa\u1e5b \u1e5a\u1e5bu\u1e25 n \u1e5aebbi i tejmuya\u025b n watmaten.\n3:1 Aru i lmelk n tejma\u025bt n temdint n Sardas : atah wayen i d-yeqqa\u1e5b Win yes\u025ban seb\u025ba le\u1e5bwa\u1e25, ye\u1e6d\u1e6dfen seb\u025ba yitran : ?ri\u0263 lec\u0263al-ik, qqa\u1e5ben belli teddre\u1e0d, lame\u025bna ke\u010d\u010d temmute\u1e0d.\n3:2 Ddekwal-ed, sse\u01e7hed ayen i k-d yeqqimen ne\u0263 m'ulac ad yemmet, axa\u1e6der lec\u0263al-ik xu\u1e63\u1e63en \u0263er \u1e5aebbi.\n3:3 Mmekti-d ihi amek tesli\u1e0d d wamek tqeble\u1e0d awal n \u1e5aebbi, tbe\u025b ayen akka i tlemde\u1e0d, tu\u0263ale\u1e0d-ed \u0263er webrid. Ma t\u0263efle\u1e0d, a n-ase\u0263 \u0263u\u1e5b-ek am umakar, ur te\u1e93\u1e93are\u1e0d ara anta ssa\u025ba i deg ara d-kecme\u0263.\n3:4 Lame\u025bna llan \u0263u\u1e5b-ek kra yemdanen ur sne\u01e7sen ara llebsa-nsen ; ad ilin yid-i s llebsa tamellalt axa\u1e6der uklalen-\u021b.\n3:5 Win ara ye\u1e6d\u1e6dfen deg-i alamma \u021b-\u021baggara, ad yels llebsa tamellalt, d lmu\u1e25al ad m\u1e25u\u0263 isem-is seg udlis n tudert, yerna zdat Baba \u1e5aebbi d lmalayekkat-is, a d-cehde\u0263 belli d ayla-w.\n3:6 Win yes\u025ban ime\u1e93\u1e93u\u0263en, ad isme\u1e25ses i wayen i d-yeqqa\u1e5b \u1e5a\u1e5bu\u1e25 n \u1e5aebbi i tejmuya\u025b n watmaten.\n3:7 Aru ayagi i lmelk n tejma\u025bt n watmaten yellan di temdint n Filadelfya : atah wayen i d-yeqqa\u1e5b Win ye\u1e63fan, yellan \u021b-\u021bide\u021b, Win ye\u1e6d\u1e6dfen tasaru\u021b n Dawed, ayen ara yeldi ur yezmir yiwen a t-i\u0263leq, ayen ara ye\u0263leq ulac win izemren a t-ildi :\n3:8 Ssne\u0263 lec\u0263al-ik, atan ldi\u0263 tawwurt zdat-ek, ulac win izemren a \u021b-\u021bi\u0263leq, axa\u1e6der \u1e93ri\u0263 t\u1e25erze\u1e0d awal-iw ur tenki\u1e5be\u1e0d ara isem-iw, \u0263as akken l\u1e25ekma-inek \u021b-\u021bamec\u1e6du\u1e25t ;\n3:9 atah wayen ara xedme\u0263 i wid yellan si tejma\u025bt n Cci\u1e6dan, ikeddaben-nni ye\u021b\u021baran iman-nsen d agdud n \u1e5aebbi ur llin ; a ten-i-d-awi\u0263 \u0263u\u1e5b-ek ad se\u01e7\u01e7den zdat-ek, ad set\u025be\u1e5bfen belli \u1e25emmle\u0263-k, deg-k i gella lfe\u1e5b\u1e25-iw.\n3:10 Imi te\u1e6d\u1e6dfe\u1e0d deg awal-iw s \u1e63\u1e63be\u1e5b ur tefcile\u1e0d ara, ula d nekk a k-\u1e25adre\u0263 di teswi\u025bt n uje\u1e5b\u1e5beb ara d-yasen \u0263ef ddunit me\u1e5b\u1e5ba iwakken ad \u021b\u021buje\u1e5bben imezda\u0263-is.\n3:11 Q\u1e5bib a d-u\u0263ale\u0263. E\u1e6d\u1e6def di liman i tes\u025bi\u1e0d deg-i iwakken yiwen ur i\u021bizmir a k-yekkes ta\u025be\u1e63\u1e63abt n tudert i k-ye\u021b\u1e5ba\u01e7un.\n3:12 Win ye\u1e6d\u1e6dfen deg-i alamma \u021b-\u021baggara, a t-sbedde\u0263 am tgejdit di l\u01e7ame\u025b n Sidi \u1e5aebbi Illu-yiw, ad yili dinna i dayem. Ad jerde\u0263 fell-as isem n Illu-yiw, isem n temdint n Illu-yiw, win n temdint n Lquds tajdi\u1e6d ara d-i\u1e63ubben seg igenni s \u0263u\u1e5b Sidi \u1e5aebbi, ad aru\u0263 da\u0263en fell-as isem-iw ajdid.\n3:13 Win yes\u025ban ime\u1e93\u1e93u\u0263en, ad isme\u1e25ses i wayen i d-yeqqa\u1e5b \u1e5a\u1e5bu\u1e25 n \u1e5aebbi i tejmuya\u025b n watmaten.\n3:14 Aru ayagi i lmelk n tejma\u025bt n watmaten n temdint n Ludikus : Atah wayen i d-iqqa\u1e5b Win ye\u021b\u021busemman Amin, inigi n \u1e63\u1e63e\u1e25 \u021b-\u021bide\u021b, Win s wayes i d-i\u021bwaxleq kra wayen yellan :\n3:15 Ssne\u0263 lec\u0263al-ik, ur terkime\u1e0d ur t\u1e63em\u1e0de\u1e0d, a wi yufan a\u021b-\u021brekme\u1e0d ne\u0263 a\u021b-\u021bismi\u1e0de\u1e0d !\n3:16 Imi temmuze\u0263le\u1e0d ur te\u1e25mi\u1e0d, ur tsemm\u1e0de\u1e0d, atan a k-id-erre\u0263 seg imi-w ;\n3:17 axa\u1e6der teqqa\u1e5be\u1e0d : sreb\u1e25e\u0263 iman-iw, aql-iyi d ame\u1e5bkanti, ur u\u1e25wa\u01e7e\u0263 ula d acemma, ur d-tewwi\u1e0d ara s lexba\u1e5b belli te\u021b\u0263i\u1e0de\u1e0d am ume\u0263bun, ur tes\u025bi\u1e0d acemma, aqli-k d a\u025beryan, d ader\u0263al.\n3:18 Daymi ad debb\u1e5be\u0263 fell-ak a\u021b-\u021ba\u0263e\u1e0d \u0263u\u1e5b-i ddheb ye\u1e63fan, iwakken a\u021b-\u021bu\u0263ale\u1e0d s tide\u021b d amerkanti, a\u0263 da\u0263en llebsa tamellalt iwakken l\u1e25ecma n \u025berru-inek ur d-te\u021bban ara, ternu\u1e0d lek\u1e25ul s wayes ara teddawi\u1e0d allen-ik iwakken a\u021b-\u021bwali\u1e0d.\n3:19 D wid \u1e25emmle\u0263 i \u021b\u025baqabe\u0263 i \u021b\u1e5bebbi\u0263 . Sendekwal-ed ihi iman-ik ; endem tbeddle\u1e0d tikli !\n3:20 Atan bedde\u0263 \u0263er tewwurt s\u1e6deb\u1e6dbe\u0263, ma yella win i d-yeslan i ta\u0263ect-iw yeldi-yi-d tawwurt, ad kecme\u0263 \u0263u\u1e5b-es, ad \u010d\u010de\u0263 imensi yid-es, ne\u021b\u021ba yid-i.\n3:21 Win ye\u1e6d\u1e6dfen deg-i alamma \u021b-\u021baggara, a t-s\u0263ime\u0263 yid-i deg umkan n l\u1e25ekma-inu, akken i \u1e6d\u1e6dfe\u0263 nekk di Baba \u1e5aebbi alamma \u021b-\u021baggara, tura aql-i qqime\u0263 yid-es deg umkan n l\u1e25ekma-ines.\n3:22 Win yes\u025ban ime\u1e93\u1e93u\u0263en, ad isme\u1e25ses i wayen i d-yeqqa\u1e5b \u1e5a\u1e5bu\u1e25 n \u1e5aebbi i tejmuya\u025b n watmaten !\n4:1 Wala\u0263 da\u0263en deg uwe\u1e25\u1e25i nni\u1e0den tawwurt n igenni teldi. Ta\u0263ect-nni yecban \u1e63\u1e63ut n lbuq iwumi sli\u0263 tikkelt tamezwarut, tenna-yi-d : Ali-d \u0263er dagi a k-d-sekne\u0263 ayen ara ye\u1e0drun sya \u0263er zdat.\n4:2 Imiren kan irfed-iyi \u1e5a\u1e5bu\u1e25 n Sidi \u1e5aebbi. Wala\u0263 yiwen ukersi n l\u1e25ekma deg igenni, Win yeqqimen fell-as, ye\u021bfe\u01e7\u01e7i\u01e7 am i\u025beqcan \u0263layen iwumi qqa\u1e5ben az\u1e5bu n jasb akk-d sardwan. Tislit n wan\u1e93ar tezzi-yas-d i ukersi-nni n l\u1e25ekma te\u021bfe\u01e7\u01e7i\u01e7 am tizegzewt n wez\u1e5bu n zem\u1e5bud.\n4:4 Akersi-nni n l\u1e25ekma, zzin-as-d \u1e5beb\u025ba u\u025becrin ikursiyen nni\u1e0den i \u0263ef qqimen \u1e5beb\u025ba u\u025becrin n lecyux yelsan llebsa tamellalt, s\u025ban \u0263ef yiqe\u1e5b\u1e5bay-nsen ti\u025be\u1e63\u1e63abin n ddheb.\n4:5 Seg ukersi-agi n l\u1e25ekma \u021beff\u0263en-d lebruq, tu\u0263ac akk-d \u1e5b\u1e5b\u025bud. Zdat-es ce\u025blent seb\u025ba teftilin ireqqen yellan d seb\u025ba n Le\u1e5bwa\u1e25 n Sidi \u1e5aebbi.\n4:6 Zdat ukersi-nni, yella da\u0263en am akken d leb\u1e25e\u1e5b n djaj icuban \u0263er wez\u1e5bu n lekristal. Di tlemmast-is akk-d leryuf-ines, bedden \u1e5beb\u025ba lxuluq yeddren \u010d\u010du\u1e5ben d allen \u0263er zdat \u0263er deffir.\n4:7 Lxelq amezwaru i\u021bemcabi \u0263er yizem, lxelq wi sin yecba agenduz, lxelq wis tlata yes\u025ba udem am win n wemdan, lxelq wis \u1e5beb\u025ba icuba \u0263er igider ye\u021bferfiren.\n4:8 \u1e5aeb\u025ba lxuluq-nni mkul yiwen seg-sen yes\u025ba se\u021b\u021ba wafriwen, yerna \u010d\u010du\u1e5ben d allen s wadda s ufella, am yi\u1e0d am ass ur \u021bsusumen ara qqa\u1e5ben : D imqeddes, d imqeddes, d imqeddes i gella Yillu, Sidi \u1e5aebbi Bab n tezmert, Win yellan si tazwara, yellan ass-a, ara d-yasen !\n4:9 Lxuluq-nni, mkul m'ara \u021bcekki\u1e5ben \u021b\u1e25emmiden Win yeqqimen \u0263ef wukersi n l\u1e25ekma, Win yeddren si l\u01e7il \u0263er l\u01e7il,\n4:10 \u1e5beb\u025ba u\u025becrin n lecyux-nni \u021bse\u01e7\u01e7iden da\u0263en zdat-es, srusun ti\u025be\u1e63\u1e63abin-nsen zdat Win yeddren, \u021b\u025bebbiden-t qqa\u1e5ben :\n4:11 Tuklale\u1e0d a Sidi \u1e5aebbi Illu-nne\u0263, tamanegt d ccan akk-d l\u1e25ekma, imi d ke\u010d\u010d i d Bab n txelqit, kra yellan s leb\u0263i-k i d-ye\u021bwaxleq.\n5:1 Imiren, wala\u0263 deg ufus ayeffus n Win yeqqimen \u0263ef wukersi n l\u1e25ekma, yiwen wedlis ye\u021bwakteb si be\u1e5b\u1e5ba si zdaxel, ye\u021bwal\u1e63eq s seb\u025ba \u1e6d\u1e6dwabe\u025b.\n5:2 Wala\u0263 yiwen lmelk yes\u025ban tazmert tameqqrant, yeqqa\u1e5b-ed s \u1e63\u1e63ut \u025blayen : Anwa yuklalen ad yeldi adlis-agi, yerna a d-iqle\u025b \u1e6d\u1e6dwabe\u025b-ines ?\n5:3 Lame\u025bna ur ufin ula d yiwen deg igenni ne\u0263 di lqa\u025ba ne\u0263 ddaw lqa\u025ba i gzemren ad ildi adlis-nni ne\u0263 a t-i\u0263e\u1e5b.\n5:4 D\u0263a \u021bru\u0263 a\u1e6das mi \u1e93ri\u0263 ulac win yuklalen ad ildi adlis-nni ne\u0263 a t-i\u0263e\u1e5b.\n5:5 Yiwen si lecyux-nni yenna yi-d : Ur \u021bru ara, atan Yizem n l\u025be\u1e5bc n Yahuda, si dderya n Dawed, yuklal ad ildi adlis-nni yerna ad iqle\u025b seb\u025ba \u1e6d\u1e6dwabe\u025b-ines, axa\u1e6der d ne\u021b\u021ba i g\u0263elben kullec.\n5:6 Wala\u0263 da\u0263en di tlemmast n ukersi-nni n l\u1e25ekma, ger lxuluq-nni, ger lecyux-nni, yiwen Izimer ibedden, iban-ed am akken yemzel. Yes\u025ba seb\u025ba wacciwen akk-d seb\u025ba wallen yellan d seb\u025ba le\u1e5bwa\u1e25 n \u1e5aebbi ye\u021b\u021bucegg\u025ben i ddunit me\u1e5b\u1e5ba.\n5:7 Izimer-agi iqe\u1e5b\u1e5beb \u0263er Win yeqqimen \u0263ef wukersi n l\u1e25ekma iwakken a d-i\u1e6d\u1e6def seg ufus-is ayeffus adlis-nni.\n5:8 Mi d-i\u1e6d\u1e6def adlis-nni, \u1e5beb\u025ba lxuluq akk-d \u1e5beb\u025ba u\u025becrin n lecyux nni se\u01e7\u01e7den zdat-es, mkul yiwen seg-sen ye\u1e6d\u1e6def snitra d iqbucen n ddheb i\u010d\u010du\u1e5ben d le\u025b\u1e6de\u1e5b i d i\u021bmettilen dde\u025bwat n wegdud n \u1e5aebbi.\n5:9 Cennun yiwen ucewwiq d ajdid qqa\u1e5ben : tuklale\u1e0d a\u021b-\u021bedme\u1e0d adlis, a\u021b-\u021beldi\u1e0d \u1e6dwabe\u025b-ines, axa\u1e6der temmezle\u1e0d, iwakken a\u021b-\u021bcaf\u025be\u1e0d s idammen-ik yuzzlen, imdanen si mkul l\u025be\u1e5bc, si mkul tutlayt, si mkul agdud, si mkul tamurt.\n5:10 Terri\u1e0d-ten am igelliden, d lmuqedmin i Sidi \u1e5aebbi Illu-nne\u0263, ad \u1e25ekmen \u0263ef ddunit.\n5:11 Wala\u0263 da\u0263en, yerna sli\u0263 i \u1e63\u1e63ut n wa\u1e6das n lmalayekkat i d-izzin i ukersi n l\u1e25ekma, i lxuluq akk-d lecyux-nni, le\u1e25sab-nsen d ilulufen, d ayen ur nezmir a ne\u1e25seb.\n5:12 Qqa\u1e5ben s \u1e63\u1e63ut \u025blayen : Izimer yemmezlen yuklal tazmert d lekyasa, lerba\u1e25 d l\u01e7ehd, ccan d l\u025ba\u1e0dima akk-d ucekke\u1e5b.\n5:13 Ayen akk i d-i\u021bwaxelqen deg igenni, di lqa\u025ba, ddaw lqa\u025ba, di leb\u1e25e\u1e5b d wayen akk yellan deg-sen, sli\u0263-asen qqa\u1e5ben : A ne\u1e25med a neckke\u1e5b Win yeqqimen \u0263ef wukersi n l\u1e25ekma akk-d Izimer, i nutni l\u025ba\u1e0dima d l\u1e25ekma si l\u01e7il \u0263er l\u01e7il !\n5:14 \u1e5aeb\u025ba lxuluq-nni qqa\u1e5ben : Amin ! Ma d lecyux-nni \u021bse\u01e7\u01e7iden zdat-sen.\n6:1 Wala\u0263 da\u0263en mi gcerreg Izimer nni \u1e6d\u1e6dabe\u025b amezwaru. Sli\u0263 i ta\u0263ect n yiwen si \u1e5beb\u025ba lxuluq-nni ten\u1e6deq-ed am \u1e5b\u1e5b\u025bud tenna-d : As-ed !\n6:2 Wala\u0263 yiwen u\u025bewdiw d amellal. Win i t-id irekben ye\u1e6d\u1e6def lqus deg ufus-is ; te\u021b\u021bunefk-as t\u025be\u1e63\u1e63abt, i\u1e5bu\u1e25 s tezmert tameqqrant iwakken ad i\u0263leb.\n6:3 Mi gcerreg \u1e6d\u1e6dabe\u025b wis sin, sli\u0263 i lxelq wi sin yenna-d : As-ed !\n6:4 Yeffe\u0263-ed yiwen u\u025bewdiw nni\u1e0den d azegga\u0263 am tmes. Win i t-id-irekben, te\u021b\u021bunefk-as tezmert ad ikkes lehna si ddunit iwakken ad \u021bna\u0263en yemdanen wway gar-asen ; ye\u021b\u021bunefk-as-d yiwen ujenwi d ameqqran.\n6:5 Mi gcerreg Izimer-nni \u1e6d\u1e6dabe\u025b wis tlata, sli\u0263 i lxelq wis tlata yenna-d : As-ed ! Ataya da\u0263en yiwen u\u025bewdiw d aberkan. Win i t-id-irekben ye\u1e6d\u1e6def lmizan deg ufus-is.\n6:6 Imiren kan sli\u0263 i yiwet ta\u0263ect ger \u1e5beb\u025ba lxuluq-nni teqqa\u1e5b : Kilu n yirden d ssuma i ge\u021b\u021ba\u0263 ufella\u1e25 i yiwen wass n lxedma, tlata kilu n tem\u1e93in da\u0263en d ssuma n yiwen wass n lxedma ; ma d zzit akk-d cc\u1e5bab ad qqimen akken llan.\n6:7 Mi gcerreg \u1e6d\u1e6dabe\u025b wis \u1e5beb\u025ba, sli\u0263 i ta\u0263ect n lxelq wis \u1e5beb\u025ba tenna-d : As-ed!\n6:8 Wala\u0263 yiwen u\u025bewdiw d a\u1e25cici. Win i t-id-irekben isem-is lmut, tetbe\u025b-it-id laxe\u1e5bt ; te\u021b\u021bunefk-asen-d tezmert \u0263ef \u1e5b\u1e5bbe\u025b n ddunit, iwakken ad snegren imdanen s ujenwi, s la\u1e93, s lehlak akk-d lew\u1e25uc n lexla.\n6:9 Mi gcerreg \u1e6d\u1e6dabe\u025b wis xemsa, wala\u0263 seddaw n udekkan i deg srusun iseflawen i Sidi \u1e5aebbi, le\u1e5bwa\u1e25 n wid yemmezlen imi ugin ad nek\u1e5ben awal n \u1e5aebbi yerna cehden fell-as.\n6:10 ?\u025beggi\u1e0den s ta\u0263ect \u025blayen, qqa\u1e5ben : A Ssid-nne\u0263 imqeddes, a Bab n tide\u021b, d acu i te\u021b\u1e5ba\u01e7u\u1e0d a\u021b-\u021b\u1e25asbe\u1e0d, a\u021b-\u021berre\u1e0d \u021b\u021ba\u1e5b i imezda\u0263 n ddunit \u0263ef yidammen-nne\u0263 i ssazlen ?\n6:11 Mkul yiwen deg-sen ye\u021b\u021bunefk as uqendu\u1e5b d ammellal ; nnan-asen ad rnun ad \u1e5b\u01e7un kra lweqt alamma rnan-d \u0263u\u1e5b-sen ye\u1e5bfiqen-nsen di leqdic d watmaten-nsen ara n\u0263en am nutni.\n6:12 Wala\u0263 da\u0263en mi gcerreg Izimer nni \u1e6d\u1e6dabe\u025b wis se\u021b\u021ba ; tewwet zzelzla tameqqrant di lqa\u025ba, i\u1e6dij yu\u0263al d aberkan ; agur yu\u0263al am idammen,\n6:13 ma d itran n igenni \u0263ellin-d \u0263er lqa\u025ba am tbexsisin n tenqel\u021b m'ara \u021b-\u021bihuzz wa\u1e0du i\u01e7ehden.\n6:14 Igenni yenne\u1e0d am t\u1e93e\u1e5bbit ye\u021b\u021blen, idurar \u021b-\u021begzirin me\u1e5b\u1e5ba \u1e25errken seg imukan-nsen.\n6:15 Igelliden akk-d imeqqranen n ddunit, wid i\u1e25ekkmen \u0263ef l\u025beske\u1e5b, ime\u1e5bkantiyen, wid yes\u025ban l\u1e25ekma, aklan akk-d i\u1e25u\u1e5b\u1e5biyen, ulin me\u1e5b\u1e5ba \u0263er idurar iwakken ad ffren zdaxel n l\u0263i\u1e5ban d ice\u1e5bfan,\n6:16 qqa\u1e5ben i idurar d ice\u1e5bfan : \u0263lit-ed fell-a\u0263, ffret-a\u0263 zdat wudem n Win yeqqimen \u0263ef wukersi n l\u1e25ekma, zdat wurrif n Izimer ;\n6:17 axa\u1e6der yusa-d wass ameqqran n wurrif-nsen, anwa ara imen\u025ben ?\n7:1 Mbe\u025bd ayagi, wala\u0263 \u1e5beb\u025ba n lmalayekkat beddent di \u1e5beb\u025ba t\u0263emma\u1e5b n ddunit ; s\u1e25ebsent a\u1e0du n \u1e5beb\u025ba t\u0263emma\u1e5b n ddunit iwakken ur d-i\u021b\u1e63u\u1e0du ara wa\u1e0du \u0263ef lqa\u025ba d leb\u1e25ur, ne\u0263 ula \u0263ef yiwet ttej\u1e5ba.\n7:2 Wala\u0263 lmelk nni\u1e0den i d-yulin si l\u01e7iha n cce\u1e5bq, ye\u1e6d\u1e6def deg ufus-is \u1e6d\u1e6dabe\u025b n \u1e5aebbi yeddren ; i\u025begge\u1e0d s \u1e63\u1e63ut \u025blayen \u0263er \u1e5beb\u025ba lmalayekkat-nni iwumi yefka Sidi \u1e5aebbi tazmert iwakken ad \u1e0du\u1e5b\u1e5bent lqa\u025ba d leb\u1e25ur, yenna-yasen :\n7:3 Ur \u021b\u1e0du\u1e5b\u1e5but ara lqa\u025ba d leb\u1e25u\u1e5b ne\u0263 ttju\u1e5b, alamma ne\u1e0dbe\u025b tiwenziwin n iqeddacen n \u1e5aebbi Illu-nne\u0263.\n7:4 Imiren sli\u0263 i le\u1e25sab n wid ye\u021bwa\u1e0deb\u025ben, meyya u\u1e5beb\u025ba u\u1e5beb\u025bin alef si le\u025b\u1e5bac n wat Is\u1e5bail :\n7:5 si l\u025be\u1e5bc n Yahuda \u021bwa\u1e0deb\u025ben tnac n alef ; si l\u025be\u1e5bc n Ruben, \u021bwa\u1e0deb\u025ben \u1e6dnac n alef ; si l\u025be\u1e5bc n Gad, \u1e6dnac n alef ;\n7:6 si l\u025be\u1e5bc n Azer, tnac n alef ; si l\u025be\u1e5bc n Naftali, \u1e6dnac n alef ; si l\u025be\u1e5bc n Manasi, \u1e6dnac n alef ;\n7:7 si l\u025be\u1e5bc n Sem\u025bun, \u1e6dnac n alef ; si l\u025be\u1e5bc n Lewwi, \u1e6dnac n alef ; si l\u025be\u1e5bc n Isaka\u1e5b, \u1e6dnac n alef ;\n7:8 si l\u025be\u1e5bc n Zabulun, \u1e6dnac n alef ; si l\u025be\u1e5bc n Yusef, \u1e6dnac n alef ; si l\u025be\u1e5bc n Benyamin, \u021bwa\u1e0deb\u025ben \u1e6dnac n alef.\n7:9 Mbe\u025bd ayagi, wala\u0263 izumal n l\u0263aci, ur yezmir yiwen a sen-d issufe\u0263 le\u1e25sab, d imdanen n mkul l\u01e7ens, n mkul tamurt, n mkul agdud, n mkul tutlayt. Bedden zdat ukersi n l\u1e25ekma zdat Izimer-nni, lsan llebsa tamellalt, wwin-d tise\u1e0dwa n tezdayin deg ifassen-nsen.\n7:10 ?\u025beggi\u1e0den s ta\u0263ect \u025blayen qqa\u1e5ben : Leslak-nne\u0263 yekka-d s \u0263u\u1e5b Izimer, s \u0263u\u1e5b \u1e5aebbi Illu-nne\u0263 yeqqimen \u0263ef wukersi n l\u1e25ekma.\n7:11 Lmalayekkat me\u1e5b\u1e5ba zzin-t-ed i ukersi-nni n l\u1e25ekma, i lecyux akk-d \u1e5beb\u025ba lxuluq-nni ; u\u0263alent \u0263ef wudem zdat ukersi-nni n l\u1e25ekma \u021b\u025bebbident Sidi \u1e5aebbi,\n7:12 qqa\u1e5bent : s tide\u021b, a ne\u1e25med, a neckke\u1e5b Sidi \u1e5aebbi Illu-nne\u0263, i ne\u021b\u021ba l\u025ba\u1e0dima, lekyasa, ccan d l\u1e25ekma si l\u01e7il \u0263er l\u01e7il ! Amin !\n7:13 Yiwen si lecyux-nni yen\u1e6deq-ed yenna-yi-d : Wid yelsan ijellaben iceb\u1e25anen, anwa-ten ? Ansi i d-usan ?\n7:14 Rri\u0263-as : D ke\u010d\u010d i ge\u1e93ran a Sidi. Yerra-yi-d : Wigi, d wid yes\u025beddan leqhe\u1e5b d ameqqran ; ssarden ijellaben-nsen, ssazdgen-ten deg idammen n Izimer.\n7:15 Daymi i bedden zdat ukersi n l\u1e25ekma n Sidi \u1e5aebbi, \u021b\u025bebbiden-t i\u1e0d d wass deg wexxam-is. Win yeqqimen \u0263ef wukersi n l\u1e25ekma, a ten-i\u1e25ader ;\n7:16 ur \u021b\u021bu\u0263alen ad lla\u1e93en, ur \u021b\u021bu\u0263alen ad ffaden, ur ten-ye\u021b\u1e25az yi\u1e6dij ne\u0263 l e\u1e25mu .\n7:17 Imi Izimer yellan di tlemmast n ukersi n l\u1e25ekma, d ne\u021b\u021ba ara yilin d ameksa-nsen, a ten-yawi \u0263er wanda \u021bazzalen waman n l\u025bin\u1e63er, Sidi \u1e5aebbi a sen-yesfe\u1e0d ime\u1e6d\u1e6dawen seg wallen nsen.\n8:1 Mi gcerreg \u1e6d\u1e6dabe\u025b wis seb\u025ba, ters-ed yiwet tsusmi deg igenni azal wezgen n ssa\u025ba.\n8:2 Wala\u0263 seb\u025ba lmalayekkat beddent zdat Sidi \u1e5aebbi, mkul yiwet deg-sent ye\u021b\u021bunefk-as yiwen lbuq.\n8:3 Yiwen lmelk nni\u1e0den yusa-d, ibedd zdat udekkan n ddheb i deg \u021bqeddimen iseflawen, ye\u1e6d\u1e6def timbexxe\u1e5bt n ddheb ; efkan-as-d a\u1e6das n l\u01e7awi a t-isse\u1e5b\u0263 \u0263ef wudekkan-nni yellan zdat ukersi n l\u1e25ekma iwakken rri\u1e25a-ines a\u021b-\u021bali \u0263er Sidi \u1e5aebbi akk-d dde\u025bwat n yimqedsen me\u1e5b\u1e5ba.\n8:4 Dexxan n lebxu\u1e5b-nni yuli akk-d dde\u025bwat n yimqedsen ye\u1e63fan, seg ufus n lmelk ibedden zdat \u1e5aebbi.\n8:5 Lmelk-nni yeddem-ed timbexxe\u1e5bt nni n ddheb, ye\u010d\u010du\u1e5b-i\u021b-id \u021b-\u021birgin i\u1e5beqqen yellan \u0263ef wudekkan-nni n ddheb, idegge\u1e5b-i\u021b \u0263er ddunit ; teb\u1e5beq, ter\u025be\u1e0d, sli\u0263 i tu\u0263ac, tezlez lqa\u025ba.\n8:6 Seb\u025ba lmalayekkat-nni ye\u1e6d\u1e6dfen seb\u025ba lbuqat, heggant iman-nsent ad wwtent lbuq.\n8:7 Lmelk amezwaru yewwet lbuq, imiren kan ye\u0263li-d \u0263ef lqa\u025ba webruri akk \u021b-\u021bmes ixel\u1e0den d idammen, times nni te\u010d\u010da \u021belt n lqa\u025ba, \u021belt n ttju\u1e5b, d kra wayen yellan d le\u1e25cic azegzaw.\n8:8 Lmelk wis sin yewwet lbuq. Yiwet n l\u1e25a\u01e7a annect-ila\u021b am akken d adrar ameqqran i deg tec\u025bel tmes ye\u021b\u021bu\u1e0degge\u1e5b \u0263er leb\u1e25e\u1e5b, \u021belt n leb\u1e25e\u1e5b yu\u0263al am idammen,\n8:9 \u021belt n wayen ye\u021b\u025bicin di leb\u1e25e\u1e5b yemmut, \u021belt da\u0263en n lbabu\u1e5bat negren.\n8:10 Lmelk wis tlata yewwet lbuq. Ye\u0263li-d seg igenni \u0263er lqa\u025ba yiwen yitri d ameqqran i g\u1e5beqqen am u\u1e25e\u01e7\u01e7a\u01e7u n tmes, itri-nni isem-is : Ter\u1e93eg ; \u021belt n isaffen d le\u025bwanse\u1e5b n waman u\u0263alen d ir\u1e93aganen am ilili, a\u1e6das n yemdanen i gemmuten imi swan seg waman-nni r\u1e93agen.\n8:12 Lmelk wis \u1e5beb\u025ba yewwet lbuq. I\u1e6dij, agur d yetran, tenqe\u1e63 \u021belt n tafat-nsen s wakka tenqe\u1e63 \u021belt n tafat n wass d \u021belt n tafat n yi\u1e0d di ddunit.\n8:13 Wala\u0263 yerna sli\u0263 i yiwen lbaz ye\u021b\u021bafgen di tlemmast n igenni yeqqa\u1e5b s ta\u0263ect \u025blayen : A tawa\u0263it, a tawa\u0263it, a nnger n imezda\u0263 n ddunit, \u0263ef wayen ara yed\u1e5bun m'ara wten lbuq tlata n lmalayekkat tineggura !\n9:1 Lmelk wis xemsa yewwet lbuq. Wala\u0263 yiwen yetri ye\u0263li-d seg igenni \u0263er lqa\u025ba. Te\u021b\u021bunefk-as tsaru\u021b n tesraft lqayen.\n9:2 Yeldi tasraft-nni lqayen, yuli-d seg-s yiwen dexxan d aberkan am win n u\u1e25e\u01e7\u01e7a\u01e7u n tmes, ddunit \u1e5aebbi tu\u0263al akk \u021b-\u021baberkant si dexxan-nni, ula d i\u1e6dij ur d-iban ara.\n9:3 Si dexxan-nni yeffe\u0263-ed wej\u1e5bad \u0263er ddunit, te\u021b\u021bunefk-as tazmert am tezmert s\u025bant t\u0263erdmiwin n lqa\u025ba.\n9:4 Ye\u021b\u021bunefk-asen lame\u1e5b ur \u021b\u1e0du\u1e5b\u1e5bun ara le\u1e25cic, ttju\u1e5b d wayen akk zegzawen di lqa\u025ba, lame\u025bna ad \u1e0du\u1e5b\u1e5ben imdanen ur nes\u025bi ara \u1e6d\u1e6dabe\u025b n \u1e5aebbi \u0263ef twenza-nsen.\n9:5 Te\u021b\u021bunefk-asen tezmert, ma\u010d\u010di iwakken a ten-n\u0263en, lame\u025bna iwakken a ten-qeh\u1e5ben azal n xemsa waguren, leqhe\u1e5b ara d-ye\u0263lin fell-asen, am lqe\u1e5b\u1e25 n wemdan m'ara t-teqqes t\u0263irdemt.\n9:6 Deg ussan-nni imdanen ad nadin \u0263ef lmut ur \u021b-\u021bafen ara, ad b\u0263un ad mmten lame\u025bna lmut a\u021b-\u021berwel fell asen.\n9:7 Aj\u1e5bad-nni yecba i\u025bewdiwen iheggan i umen\u0263i, s\u025ban \u0263ef yiqe\u1e5b\u1e5bay nsen am akken \u021b-\u021bi\u025be\u1e63\u1e63abin n ddheb, udmawen-nsen am wid n yemdanen,\n9:8 acebbub-nsen am win n tilawin, tu\u0263mas-nsen am tid n yizmawen.\n9:9 S\u025ban \u0263ef yidmaren-nsen am tseddariyin n wuzzal, zzhir n iferrawen-nsen am zzhir n ike\u1e5b\u1e5busen zzu\u0263u\u1e5ben wa\u1e6das n i\u025bewdiwen m'ara \u021b\u021bazzalen \u0263er imen\u0263i.\n9:10 S\u025bant tije\u1e25na\u1e0d \u021b-\u021bsuqas am tid n t\u0263erdmiwin ; di tje\u1e25na\u1e0d-agi i tella tezmert ara i\u1e0du\u1e5b\u1e5ben imdanen azal n xemsa wagguren.\n9:11 Agellid-nsen, d lmelk-nni i\u1e25ekkmen \u0263ef tesraft lqayen, ye\u021b\u021busemma s t\u025bib\u1e5banit \u00ab Abadun \u00bb, ma s tyunanit \u00ab Abulyun \u00bb ye\u025bni \u00ab win yessex\u1e5baben \u00bb.\n9:12 Tawa\u0263it tamezwarut t\u025bedda. Mazal snat n twa\u0263yin nni\u1e0den \u021beddunt-ed deffir-es.\n9:13 Lmelk wis se\u021b\u021ba iwwet lbuq. Sli\u0263 i yiwet ta\u0263ect i d-yekkan si \u1e5beb\u025ba wacciwen yellan \u0263ef \u1e5beb\u025ba t\u0263emma\u1e5b n udekkan n ddheb i gellan zdat \u1e5aebbi,\n9:14 ta\u0263ect-agi tenna i lmelk wis se\u021b\u021ba i ge\u1e6d\u1e6dfen lbuq : Efsi-yasen ccedd i \u1e5beb\u025ba lmalayekkat-nni yellan \u0263ef rrif n wasif ameqqran, iwumi qqa\u1e5ben \u00ab Lufrat \u00bb.\n9:15 \u1e5aeb\u025ba lmalayekkat-nni i ge\u021b\u021buheggan i ssa\u025ba-nni, i wass, i wagur d useggas-nni, \u021bwaser\u1e25ent-ed iwakken ad snegrent \u021belt n yemdanen.\n9:16 Sli\u0263 i le\u1e25sab n yemnayen, llan di mitin imelyunen yid-sen.\n9:17 Atan wamek i wala\u0263 deg uwe\u1e25\u1e25i i\u025bewdiwen d wid i ten-irekben : imnayen-nni lsan tiseddariyin n wuzzal \u021b-\u021bizegga\u0263in am tmes, wiya\u1e0d \u021b-\u021bizegzawin am leb\u1e25e\u1e5b, kra nni\u1e0den am ukubri. Iqe\u1e5b\u1e5bay n i\u025bewdiwen-nni am akken d iqe\u1e5b\u1e5bay n izmawen ; seg imawen-nsen te\u021b\u021beffe\u0263-ed tmes, dexxan akk-d ukubri.\n9:18 ?elt n yemdanen mmuten s tlata n twa\u0263yin-agi, s tmes, s dexxan akk-d ukubri-nni i d-i\u021beff\u0263en seg imawen-nsen.\n9:19 Axa\u1e6der tazmert n i\u025bewdiwen-nni tella deg imawen-nsen akk-d ije\u1e25na\u1e0d-nsen ; tije\u1e25na\u1e0d-agi-nsen cubant izerman ; s\u025bant iqe\u1e5b\u1e5bay, yis-sen i \u021b\u1e0du\u1e5b\u1e5bun.\n9:20 Imdanen nni\u1e0den ur nemmut ara s twa\u0263yin-agi, ur ndimen ara seg yir tikli-nsen ; kemmlen \u025bebbden le\u01e7nun \u021b\u1e5bu\u1e25un \u0263er ssada\u021b anda \u025bebbden lme\u1e63nu\u025bat ye\u021bwanej\u1e5ben s ufus n wemdan, s ddheb, s lfe\u1e6d\u1e6da akk-d nn\u1e25as, s wez\u1e5bu akk-d wes\u0263a\u1e5b. ?as akken lme\u1e63nu\u025bat-nni ur \u021bwalin, ur sellen, ur le\u1e25\u1e25un,\n9:21 imdanen-agi ur ndimen ara \u0263ef tmeg\u1e5ba\u1e0d i neqqen, \u0263ef ss\u1e25ur \u0263ef tuke\u1e5bdiwin akk \u021becmatin i xeddmen, lame\u025bna \u021bkemmilen di lec\u0263al-agi.\n10:1 Wala\u0263 da\u0263en yiwen lmelk nni\u1e0den i\u01e7ehden, i\u1e63ubb-ed seg igenni, te\u021b\u021bel-it-id tagut ; tislit n wan\u1e93ar tezzi \u0263ef wuqe\u1e5b\u1e5buy-is, udem-is ye\u021bfe\u01e7\u01e7i\u01e7 am yi\u1e6dij, i\u1e0da\u1e5b\u1e5ben-is am i\u1e25e\u01e7\u01e7u\u01e7a n tmes.\n10:2 Ye\u1e6d\u1e6def deg ufus-is yiwet tektabt tamec\u1e6du\u1e25t yeldin. Yessers a\u1e0dar-is ayeffus \u0263ef leb\u1e25e\u1e5b, ma d a\u1e0dar azelma\u1e0d yessers-it \u0263ef lqa\u025ba,\n10:3 i\u025begge\u1e0d s ta\u0263ect \u025blayen am akken d izem i gesre\u025bre\u025ben. Mi gesre\u025bre\u025b lmelk-nni, nesla i useqseq n tu\u0263ac n seb\u025ba \u1e5b\u1e5b\u025budat.\n10:4 Mi sli\u0263 i tu\u0263ac n seb\u025ba \u1e5b\u025budat nni \u021beddu\u0263 ad aru\u0263 ayen i d-nnan, lame\u025bna sli\u0263 i yiwet ta\u0263ect i d-yekkan seg igenni tenna-yi-d : E\u01e7\u01e7 di lba\u1e0dna ayen akka i d-nnan seb\u025ba \u1e5b\u025budat-agi, ur te\u021b\u021baru ara.\n10:5 Lmelk-nni i wala\u0263 ibedd \u0263ef leb\u1e25e\u1e5b akk-d lqa\u025ba, yerfed afus-is ayeffus \u0263er igenni,\n10:6 yeggul s Win yeddren si l\u01e7il \u0263er l\u01e7il , Win i d-ixelqen igenni, lqa\u025ba d leb\u1e25e\u1e5b d wayen yellan deg-sen, a d-yed\u1e5bu kullec mbla le\u025b\u1e0dil.\n10:7 M'ara d-yawe\u1e0d wass i deg ara nsel i \u1e63\u1e63ut n lbuq n lmelk wis seb\u025ba, imiren kra wayen yellan di lba\u1e0dna n Sidi \u1e5aebbi ad ye\u021bwakemmel akken i t-id yenna i lenbiya.\n10:8 Ta\u0263ect-nni i d-yekkan seg igenni, terna tenna-yi-d : \u1e5au\u1e25, eddem-ed taktabt tamec\u1e6du\u1e25t yeldin deg ufus n lmelk-nni ibedden \u0263ef lqa\u025ba d leb\u1e25e\u1e5b.\n10:9 \u1e5au\u1e25e\u0263 \u0263er lmelk-nni, ssutre\u0263-as a yi-d-yefk taktabt-nni tamec\u1e6du\u1e25t. Yenna-yi-d : Eddem-i\u021b, seble\u025b-i\u021b ; deg imi-k a\u021b-\u021bili \u021b-\u021ba\u1e93idant am tammemt, me\u025bna m'ara tawe\u1e0d \u0263er u\u025bebbu\u1e0d-ik, a\u021b-\u021bu\u0263al \u021b-\u021bar\u1e93agant.\n10:10 Eddme\u0263-d taktabt-nni tamec\u1e6du\u1e25t seg ufus n lmelk iwakken a\u021b-\u021be\u010d\u010de\u0263, mi \u021b-gre\u0263 deg imi-w ufi\u0263-\u021b \u021b-\u021ba\u1e93idant, lame\u025bna mi tewwe\u1e0d \u0263er u\u025bebbu\u1e0d-iw, \u010d\u010du\u1e5ben i\u1e93erman-iw \u021b-\u021be\u1e5bzeg.\n10:11 Nnan-iyi-d : Ilaq a\u021b-\u021bcire\u1e0d da\u0263en \u0263ef wayen twala\u1e0d i wa\u1e6das n yegduden d le\u01e7nas d igelliden n mkul tutlayt.\n11:1 Fkan-iyi-d a\u0263anim s wayes \u021bektilin, nnan-iyi-d : -- Ekker fell-ak, ektil l\u01e7ame\u025b iqedsen n Sidi \u1e5aebbi, ktil da\u0263en adekkan i deg srusun iseflawen, t\u1e25esbe\u1e0d wid ye\u021b\u025bebbiden di l\u01e7ame\u025b-agi.\n11:2 Lame\u025bna afrag n l\u01e7ame\u025b iqedsen, e\u01e7\u01e7-it ur t-\u021bektili ara, axa\u1e6der ye\u021b\u021bunefk i le\u01e7nas ur nelli ara n wat Is\u1e5bail, ara i\u1e5bek\u1e0den tamdint n Lquds azal n tnin u\u1e5beb\u025bin wagguren.\n11:3 Ad cegg\u025be\u0263 sin inigan-iw ad sburren ticekka\u1e5bin, iwakken ad ciren s wawal n \u1e5aebbi azal n tnin u\u1e5beb\u025bin wagguren.\n11:4 Sin inigan-agi d snat n tzemrin akk-d sin n lem\u1e63abe\u1e25 i gbedden zdat Yillu Bab n lqa\u025ba n ddunit.\n11:5 Ma ye\u025b\u1e5be\u1e0d yiwen a ten-i\u1e0du\u1e5b\u1e5b, te\u021b\u021beffe\u0263-ed tmes seg imawen-nsen te\u021b\u021be\u021b i\u025bdawen-nsen, akka ara yemmet kra win ara i\u025ber\u1e0den a ten-i\u1e0du\u1e5b\u1e5b.\n11:6 Sin inigan-agi s\u025ban tazmert ad \u0263elqen tiwwura igenwan iwakken ur d-yekkat ara ugeffur deg ussan i deg ara \u021bcirin awal n \u1e5aebbi ; s\u025ban da\u0263en tazmert ad rren aman d idammen, ad sex\u1e0den lqa\u025ba s mkul lebla mkul tikkelt i deg ara b\u0263un.\n11:7 M'ara faken aciri nsen, llaf\u025ba ara d-yalin si tesraft lqayen, a\u021b-\u021benna\u0263 yid-sen a ten te\u0263leb, yerna a ten-tne\u0263.\n11:8 L\u01e7e\u021b\u021bat-nsen ad qqiment \u1e0delqent deg ub\u1e5ba\u1e25 n temdint tameqqrant, i ge\u021b\u021bumetlen s temdint n Sudum \u021b-\u021bmurt n Ma\u1e63er, tamdint anda ye\u021bwa\u1e63leb Ssid-nsen.\n11:9 L\u0263aci n mkul agdud, n mkul l\u01e7ens, n mkul tutlayt, n mkul tamurt, ad \u021bfe\u1e5b\u1e5bi\u01e7en deg-sen tlata wussan d wezgen, ur qebblen ara ad \u021bwame\u1e0dlen.\n11:10 Imdanen n ddunit me\u1e5b\u1e5ba ad ilin di lfe\u1e5b\u1e25 ameqqran imi mmuten. Ad \u021bemcegga\u025ben tirezfin wway gar-asen, axa\u1e6der sin inigan-agi \u1e0du\u1e5b\u1e5ben-ten a\u1e6das.\n11:11 Mi \u025beddan tlata wussan-nni d wezgen, \u1e5a\u1e5bu\u1e25 n \u1e5aebbi yesse\u1e25ya-d l\u01e7e\u021b\u021bat n lmegtin-nni, bedden \u0263ef yi\u1e0da\u1e5b\u1e5ben-nsen. Kra wid yellan \u021bfe\u1e5b\u1e5bi\u01e7en deg-sen, tekcem-iten lxel\u025ba \u021b-\u021bameqqrant.\n11:12 Yiwet n ta\u0263ect \u025blayen i d-yekkan seg igenni tenna i sin inigan-nni : Alit-ed \u0263er dagi ! Ulin deg usigna \u0263er igenni, i\u025bdawen-nsen \u021bmuqulen deg-sen.\n11:13 Di teswi\u025bt-nni tewwet zzelzla tameqqrant, amur wis \u025bec\u1e5ba n temdint yegrurej, mmuten seb\u025ba alaf yemdanen. Wid i gmen\u025ben si zzelzla-nni tekcem-iten tugdi, imiren set\u025be\u1e5bfen s tezmert n Sidi \u1e5aebbi Bab n igenwan, \u1e25emden-t.\n11:14 Tawa\u0263it tis snat t\u025bedda, ataya te\u021b\u021beddu-d twa\u0263it tis tlata.\n11:15 Lmelk wis seb\u025ba yewwet lbuq. Kra n tu\u0263ac \u025blayen \u021b\u025beggi\u1e0dent deg igenni qqa\u1e5bent-ed : L\u1e25ekma n ddunit tu\u0263al \u0263er ifassen n Sidi \u1e5aebbi akk-d Lmasi\u1e25 ines ; ad ye\u1e25kem si l\u01e7il \u0263er l\u01e7il.\n11:16 \u1e5aeb\u025ba u\u025becrin-nni n lecyux yellan zdat Sidi \u1e5aebbi \u0263ef yimukan nsen n l\u1e25ekma, \u021bse\u01e7\u01e7iden zdat Sidi \u1e5aebbi, \u021b\u025bebbiden-t\n11:17 qqa\u1e5ben : N\u1e25emmed-ik a Sidi \u1e5aebbi, a Bab n tezmert yellan si tazwara, yellan ar ass-a, imi tesxedme\u1e0d tazmert-ik tameqqrant yerna tesbedde\u1e0d l\u1e25ekma-inek.\n11:18 Le\u01e7nas llan kkren-d \u0263u\u1e5b-ek, lame\u025bna tura d urrif-ik i d-yew\u1e0den, yusa-d lweqt i deg ara t\u1e25asbe\u1e0d lmegtin, ass i deg ara tkafi\u1e0d iqeddacen-ik lenbiya, wid texta\u1e5be\u1e0d akk-d wid ye\u021bqada\u1e5ben isem-ik, ama d ime\u1e93yanen ama d imeqqranen s wayen uklalen ; ma d wid yessex\u1e5baben ddunit a ten-tesnegre\u1e0d.\n11:19 L\u01e7ame\u025b iqedsen n Sidi \u1e5aebbi yellan deg igenwan yeldi-d, d\u0263a iban-ed zdaxel-is usenduq n le\u025bqed. Teb\u1e5beq, ter\u025be\u1e0d, nesla i tu\u0263ac, tezlez lqa\u025ba, ye\u0263li-d webruri.\n12:1 Tban-ed lica\u1e5ba \u021b-\u021bameqqrant deg igenni : wala\u0263 yiwet tme\u1e6d\u1e6dut tesburr-ed i\u1e6dij am llebsa, aggur seddaw i\u1e0da\u1e5b\u1e5ben-is, tes\u025ba \u0263ef wuqe\u1e5b\u1e5buy-is ta\u025be\u1e63\u1e63abt n tnac yitran.\n12:2 Tella s tadist, yewwe\u1e0d-ed lweqt i deg ara d-tarew, tebda te\u021b\u025beggi\u1e0d seg weq\u1e5ba\u1e25 n tarrawt.\n12:3 Tban-ed lica\u1e5ba nni\u1e0den deg igenni : wala\u0263 yiwet llaf\u025ba tazegga\u0263t am tmes, tes\u025ba seb\u025ba iqe\u1e5b\u1e5bay akk-d \u025bec\u1e5ba wacciwen, mkul aqe\u1e5b\u1e5buy ters fell-as t\u025be\u1e63\u1e63abt.\n12:4 Ajelkki\u1e0d-is yezzu\u0263e\u1e5b-ed \u021belt n yitran n igenni, idegge\u1e5b-iten-id \u0263er ddunit. Llaf\u025ba-nni tbedd zdat tme\u1e6d\u1e6dut-nni ara d-yarwen, iwakken a\u021b-\u021besseble\u025b l\u1e6dufan-ines akken kan ara d-ilal.\n12:5 Tes\u025ba-d aqcic ara yeksen le\u01e7nas me\u1e5b\u1e5ba s t\u025bekkazt n wuzzal. Aqcic-nni ye\u021bwarfed \u0263er Sidi \u1e5aebbi, \u0263er wemkan n l\u1e25ekma-ines.\n12:6 Tame\u1e6d\u1e6dut-nni terwel \u0263er lexla anda i s-ihegga Sidi \u1e5aebbi amkan iwakken a\u021b-\u021be\u010d\u010d azal n walef umitin use\u021b\u021bin n wussan.\n12:7 Yed\u1e5ba-d umen\u0263i deg igenni, Mixayel akk-d lmalayekkat-is nnu\u0263en akk-d llaf\u025ba-nni. Llaf\u025ba-nni d lmalayekkat-is nnu\u0263en-ten ula d nutni,\n12:8 lame\u025bna ur ten-\u0263liben ara, daymi i sen-ye\u021bwakkes wemkan-nsen deg igenni.\n12:9 Llaf\u025ba-nni tameqqrant te\u021b\u021bu\u1e0degge\u1e5b \u0263er ddunit ne\u021b\u021bat d lmalayekkat-is, tin akken yellan d azrem-nni n zik ye\u021b\u021busemman Iblis, Cci\u1e6dan, tin i gxed\u025ben ddunit me\u1e5b\u1e5ba.\n12:10 Sli\u0263 deg igenni i yiwen \u1e63\u1e63ut \u025blayen yeqqa\u1e5b : tura yewwe\u1e0d-ed leslak, N\u1e25emmed-ik a Sidi \u1e5aebbi, l\u1e25ekma \u021b-\u021bezmert i Sidi \u1e5aebbi Illu-nne\u0263, l\u1e25ekma n ddunit tu\u0263al \u0263er ifassen n Lmasi\u1e25-ines, axa\u1e6der win i gesse\u1e0dlamen atmaten-nne\u0263, win ye\u021bcektayen fell-asen i\u1e0d d wass zdat Sidi \u1e5aebbi Illu-nne\u0263, ye\u021b\u021bu\u1e0degge\u1e5b seg igenni.\n12:11 ?elben-t watmaten-nne\u0263 s idammen n Izimer i ten-id-yefdan akk-d cchada-nsen fell-as yerna ur \u025buzzen ara tudert-nsen lame\u025bna sebblen-\u021b fell-as.\n12:12 ?ef wayagi fe\u1e5b\u1e25et ay igenwan, a wid i gzed\u0263en igenwan ! A nnger-im a lqa\u025ba ! A nnger-ik a leb\u1e25e\u1e5b ! Imi i d-i\u1e63ubb \u0263u\u1e5b-wen Cci\u1e6dan s wurrif ameqqran, axa\u1e6der ye\u1e93ra drus n lweqt i s-d-iqqimen.\n12:13 Llaf\u025ba-nni, mi twala iman-is te\u021bwa\u1e0degge\u1e5b \u0263er lqa\u025ba, tetbe\u025b tame\u1e6d\u1e6dut nni i d-yes\u025ban aqcic.\n12:14 Imiren kan \u021b\u021bunefken-as i tme\u1e6d\u1e6dut-nni sin wafriwen n lbaz ameqqran iwakken a\u021b-\u021bafeg \u0263er unez\u1e5buf anda ara t\u025bic tlata iseggasen d wezgen, meb\u025bid \u0263ef wezrem.\n12:15 Azrem-nni yessufe\u0263-ed seg uqemmuc-is aman, fegg\u1e0den-d am asif deffir n tme\u1e6d\u1e6dut-nni iwakken a\u021b-\u021byawi u\u1e25emmal.\n12:16 Lame\u025bna lqa\u025ba tsellek tame\u1e6d\u1e6dut nni, tesseble\u025b aman-nni i d-ifegg\u1e0den seg uqemmuc n llaf\u025ba-nni.\n12:17 Llaf\u025ba terfa \u0263ef tme\u1e6d\u1e6dut-nni, t\u1e5bu\u1e25 a\u021b-\u021beskker imen\u0263i akk-d wid i d yeqqimen si dderya-s, wid i g\u1e0du\u025ben lumu\u1e5b n Sidi \u1e5aebbi yerna \u1e6d\u1e6dfen di tide\u021b n Sidna \u0190isa.\n12:18 Llaf\u025ba-nni tbedd \u0263ef \u1e5b\u1e5bmel n leb\u1e25e\u1e5b.\n13:1 Wala\u0263 yiwet le\u025bqi\u1e5ba tuli-d si leb\u1e25e\u1e5b, tes\u025ba seb\u025ba iqe\u1e5b\u1e5bay d \u025bec\u1e5ba wacciwen, tes\u025ba \u0263ef wacciwen-is \u025bec\u1e5ba t\u025be\u1e63\u1e63abin, ma \u0263ef yiqe\u1e5b\u1e5bay-ines uran yismawen n rregmat.\n13:2 Le\u025bqi\u1e5ba i wala\u0263 tecba a\u0263ilas, i\u1e0da\u1e5b\u1e5ben-is am wid n wersel, axenfuc is am uxenfuc n yizem. Llaf\u025ba-nni tefka-yas tazmert a\u021b-\u021be\u1e25kem deg umkan-is s l\u1e25ekma tameqqrant.\n13:3 Wala\u0263 yiwen seg iqe\u1e5b\u1e5bay-ines am akken ye\u021bwamzel, lame\u025bna l\u01e7er\u1e25 n tmezliwt-nni ye\u1e25la. Imezda\u0263 n ddunit me\u1e5b\u1e5ba dehcen \u0263ef wannect-agi, d\u0263a teb\u025ben le\u025bqi\u1e5ba-nni.\n13:4 ?se\u01e7\u01e7iden-as i llaf\u025ba-nni, axa\u1e6der tefka l\u1e25ekma-s i le\u025bqi\u1e5ba ; \u021bse\u01e7\u01e7iden da\u0263en zdat le\u025bqi\u1e5ba qqa\u1e5ben : anwa yellan am le\u025bqi\u1e5ba, anwa i gzemren ad yenna\u0263 yid-es ?\n13:5 Ye\u021b\u021bunefk-as uxenfuc i seg i d-\u021beff\u0263en imeslayen iqeb\u1e25en akk-d rregmat \u0263ef Sidi \u1e5aebbi. Te\u021b\u021bunefk-as tezmert a\u021b-\u021be\u1e25kem azal n tnin u\u1e5beb\u025bin n wagguren.\n13:6 Teldi axenfuc-is, te\u021bqaba\u1e25 Sidi \u1e5aebbi, treggem isem-is d wemkan i deg ye\u021b\u021bili akk-d kra wid i gzed\u0263en deg igenni.\n13:7 Serr\u1e25en-as a\u021b-\u021beskker imen\u0263i akk-d wid yexta\u1e5b Sidi \u1e5aebbi yerna a ten-te\u0263leb. Te\u021b\u021bunefk-as l\u1e25ekma \u0263ef mkul l\u025be\u1e5bc, \u0263ef mkul agdud, d mkul l\u01e7ens n mkul tutlayt.\n13:8 Kra win ur ne\u021bwajerred ara di tektabt n tudert yellan seg wasmi tebda ddunit, di tektabt n Izimer immezlen, ad se\u01e7\u01e7den zdat-es.\n13:9 Win yes\u025ban ime\u1e93\u1e93u\u0263en isel-ed !\n13:10 Win i ge\u021b\u1e5ba\u01e7u nnfu, ad ye\u021bwanfu ; ma d win ye\u021b\u1e5ba\u01e7u ujenwi, ad yemmet s ujenwi. Daymi i glaq i wid yexta\u1e5b Sidi \u1e5aebbi ad \u1e6d\u1e6dfen di liman-nsen, ad s\u025bun \u1e63\u1e63be\u1e5b.\n13:11 Wala\u0263 da\u0263en yiwet le\u025bqi\u1e5ba nni\u1e0den teffe\u0263-ed seddaw n tmurt. Tes\u025ba sin wacciwen am wid n izimer, te\u021bmeslay am llaf\u025ba.\n13:12 Tessexdam tazmert n le\u025bqi\u1e5ba tamezwarut \u0263er tama-ines, te\u1e63\u1e63awe\u1e0d armi terra imezda\u0263 n ddunit me\u1e5b\u1e5ba \u021bse\u01e7\u01e7iden zdat le\u025bqi\u1e5ba-nni tamezwarut i ge\u1e25lan si l\u01e7er\u1e25-is.\n13:13 Txeddem lbe\u1e5bhanat imeqqranen zdat yemdanen, tesse\u0263lay-ed times seg igenni \u0263er lqa\u025ba.\n13:14 Te\u021b\u0263u\u1e5b\u1e5bu imezda\u0263 n ddunit s lbe\u1e5bhanat i s-ye\u021b\u021bunefken a ten texdem seddaw l\u1e25ekma n le\u025bqi\u1e5ba-nni tamezwarut, teqqa\u1e5b asen : sbeddet yiwen lme\u1e63nu\u025b \u0263ef \u1e63\u1e63ifa n le\u025bqi\u1e5ba-nni ye\u021b\u021bewten s ujenwi tu\u0263al te\u1e25la.\n13:15 Le\u025bqi\u1e5ba tis snat, te\u021b\u021bunefk-as tezmert a s-tefk \u1e5b\u1e5bu\u1e25 i lme\u1e63nu\u025b n le\u025bqi\u1e5ba-nni tamezwarut, iwakken lme\u1e63nu\u025b-nni ad yizmir a d-yen\u1e6deq, yerna ad ine\u0263 me\u1e5b\u1e5ba wid yugin a t-\u025bebbden.\n13:16 Le\u025bqi\u1e5ba-nni t\u1e25e\u021b\u021bem \u0263ef yemdanen, me\u1e93\u1e93i ne\u0263 meqqe\u1e5b, d igellil ne\u0263 d ame\u1e5bkanti, d akli ne\u0263 d a\u1e25e\u1e5b\u1e5bi, ad wwten tic\u1e5ba\u1e0d deg ufus ayeffus ne\u0263 deg unyir-nsen,\n13:17 yerna ula d yiwen ur izemmer ad ya\u0263 ne\u0263 ad yezzenz, anagar win yes\u025ban tic\u1e5ba\u1e0d-agi n yisem n le\u025bqi\u1e5ba ne\u0263 num\u1e5bu n yisem-is.\n13:18 Win i\u1e25e\u1e5bcen yes\u025ban tamusni d le\u025bqel, a d-yaf lme\u025bna n num\u1e5bu n le\u025bqi\u1e5ba yellan d isem n yiwen wergaz, num\u1e5bu-agi : d se\u021b\u021bemeyya use\u021b\u021ba use\u021b\u021bin.\n14:1 Wala\u0263 Izimer-nni ibedd \u0263ef wedrar n Siyun, llan yid-es meyya u\u1e5beb\u025ba u\u1e5beb\u025bin alef n yemdanen yes\u025ban isem n Izimer-nni akk-d isem n Baba-s \u021bwaketben \u0263ef yinyiren-nsen.\n14:2 Sli\u0263 i \u1e63\u1e63ut n tu\u0263ac i d-yekkan seg igenni, am akken d \u1e63\u1e63ut n leb\u1e25e\u1e5b m'ara yekker, am tiyita n \u1e5b\u1e5b\u025bud ; \u1e63\u1e63ut n tu\u0263ac-nni, yecba \u1e63\u1e63ut i d-i\u021beff\u0263en seg wa\u1e6das n snitrat.\n14:3 ?\u0263ennin yiwen ccna ajdid zdat wemkan n l\u1e25ekma, zdat \u1e5beb\u025ba lexluq zdat lecyux-nni. Yiwen ur izmir ad ye\u1e25fe\u1e0d ccna-nni anagar meyya u\u1e5beb\u025ba u\u1e5beb\u025bin alef-nni i d-ye\u021b\u021buselken si ddunit.\n14:4 Wigi, d wid ur nezni ara, qqimen \u1e63fan ; anda i\u1e5bu\u1e25 Izimer ad ddun yid-es. ?\u021buselken si ger yemdanen iwakken ad \u021b\u021buqeddmen d imezwura i Sidi \u1e5aebbi akk-d Izimer.\n14:5 Ur d-yeffi\u0263 lekdeb seg imawen nsen, ur yelli deg-sen wayen ara sen-d ye\u021bwassukksen.\n14:6 Wala\u0263 yiwen lmelk ye\u021b\u021bafgen deg igenni ; yewwi-d yid-es yiwen lexba\u1e5b n lxi\u1e5b ye\u021bdumun i dayem iwakken a t-ibecce\u1e5b i imezda\u0263 n ddunit, i mkul l\u01e7ens, i mkul tamurt, i mkul agdud n mkul tutlayt.\n14:7 Yeqqa\u1e5b ed s ta\u0263ect \u025blayen : Aggadet \u1e5aebbi, \u1e25emmdet-e\u021b axa\u1e6der yewwe\u1e0d-ed wass n l\u1e25isab. Se\u01e7\u01e7det, \u025bebdet Win i d-ixelqen igenni d lqa\u025ba, leb\u1e25e\u1e5b akk-d le\u025bwanse\u1e5b n waman.\n14:8 Lmelk wis sin yetbe\u025b amezwaru yeqqa\u1e5b : Te\u0263li, te\u0263li temdint-nni n Babilun tameqqrant, tin i gesder\u025ben ( yessen\u1e6d\u1e0den ) i le\u01e7nas me\u1e5b\u1e5ba le\u1e25\u1e5bam ines.\n14:9 Lmelk wis tlata, yetbe\u025b-iten yeqqa\u1e5b s \u1e63\u1e63ut \u025blayen : Win ara ise\u01e7den zdat le\u025bqi\u1e5ba akk-d lme\u1e63nu\u025b-ines yerna yeqbel tic\u1e5be\u1e6d \u0263ef wunyir-is ne\u0263 \u0263ef wufus-is,\n14:10 a d-yemmir fell-as wurrif n Sidi \u1e5aebbi, ad isew lem\u1e5ba\u1e5b, ad in\u025be\u021b\u021bab di tmes d ukubri zdat lmalayekkat iqedsen, zdat Izimer.\n14:11 Dexxan n tmes s wayes ara n\u025be\u021b\u021baben ad yeqqim si l\u01e7il \u0263er l\u01e7il ; wid ye\u021bse\u01e7\u01e7iden zdat le\u025bqi\u1e5ba d lme\u1e63u\u025b ines akk-d kra win iqeblen tic\u1e5be\u1e6d n isem-is, ur ste\u025bfayen ara i\u1e0d d wass.\n14:12 Deg wannect-agi i d-ye\u021bban \u1e63\u1e63be\u1e5b n wid yexta\u1e5b Sidi \u1e5aebbi, wid i g\u1e0du\u025ben lumu\u1e5b-is yerna \u1e6d\u1e6dfen di liman i s\u025ban di Lmasi\u1e25.\n14:13 Sli\u0263 i yiwet ta\u0263ect i d-yekkan seg igenni teqqa\u1e5b : Aru ayagi, d ise\u025bdiyen si tura wid ara yemten yili nutni umnen s Lmasi\u1e25 ! \u1e5a\u1e5bu\u1e25 iqedsen yenna : ?-\u021bide\u021b, tura zemren ad ste\u025bfun si le\u025btab-nsen axa\u1e6der lec\u0263al-nni yelhan i xedmen a ten-afen.\n14:14 Wala\u0263 asigna d amellal, \u0263ef wusigna-nni yeqqim yiwen lxelq i\u021bemcabi i wemdan. Yes\u025ba ta\u025be\u1e63\u1e63abt n ddheb \u0263ef wuqe\u1e5b\u1e5buy-is, ye\u1e6d\u1e6def amger iqe\u1e0d\u025ben deg ufus-is.\n14:15 Yiwen lmelk nni\u1e0den yeffe\u0263-ed si l\u01e7ame\u025b iqedsen, ye\u021b\u025beggi\u1e0d s \u1e63\u1e63ut \u025blayen i win yeqqimen \u0263ef wusigna yeqqa\u1e5b-as : Ssexdem amger-ik tmegre\u1e0d, axa\u1e6der yewwe\u1e0d-ed lweqt n tmegra, imi ddunit tewjed i tmegra.\n14:16 Win akken yeqqimen \u0263ef wusigna yes\u025bedda amger-is \u0263ef ddunit d\u0263a ddunit me\u1e5b\u1e5ba te\u021bwamger.\n14:17 Yeffe\u0263-ed lmelk nni\u1e0den si l\u01e7ame\u025b iqedsen yellan deg igenni ; ula d ne\u021b\u021ba yes\u025ba amger iqe\u1e0d\u025ben.\n14:18 Lmelk nni\u1e0den i\u1e25ekkmen \u0263ef tmes, yeffe\u0263-ed seg wemkan anda yella udekkan n iseflawen, yenna s \u1e63\u1e63ut \u025blayen i lmelk-nni yes\u025ban amger iqe\u1e0d\u025ben : Ssexdem amger-ik tgezme\u1e0d iguza n tfe\u1e5b\u1e5bant n ddunit, axa\u1e6der wwant t\u1e93u\u1e5bin.\n14:19 Lmelk-nni yes\u025bedda amger-is \u0263ef ddunit, igzem iguza n tfe\u1e5b\u1e5bant n ddunit, i\u1e0degge\u1e5b tizu\u1e5bin-nni zdaxel n te\u1e25\u1e0dunt n wurrif n Sidi \u1e5aebbi, wwin-\u021b \u0263er be\u1e5b\u1e5ba n temdint, iwakken ad \u1e5bek\u1e0den tizu\u1e5bin-nni, ff\u0263en-d seg-s idammen, ulin lqedd n lmitra d wezgen, uzzlen d le\u1e25mali azal n telt-meyya n kilumitrat.\n15:1 Wala\u0263 da\u0263en deg igenni lica\u1e5ba nni\u1e0den tameqqrant yeste\u025b\u01e7iben ; seb\u025ba n lmalayekkat \u1e6d\u1e6dfent seb\u025ba n lmu\u1e63ibat tineggura, axa\u1e6der yis-sent ara innekmal wurrif n Sidi \u1e5aebbi.\n15:2 Wala\u0263 am akken d leb\u1e25e\u1e5b n djaj ixel\u1e0den akk-d tmes, wid i\u0263elben le\u025bqi\u1e5ba d lme\u1e63nu\u025b-is akk-d num\u1e5bu n isem-is, bedden \u0263ef leb\u1e25e\u1e5b-nni n djaj. ?\u1e6dfen snitrat i sen-d-yefka Sidi \u1e5aebbi,\n15:3 \u021bcewwiqen acewwiq n Sidna Musa, aqeddac n Sidi \u1e5aebbi akk-d ucewwiq n Izimer, qqa\u1e5ben : Lec\u0263al-ik meqqe\u1e5b-it ste\u025b\u01e7iben a Sidi \u1e5aebbi a Bab n tezmert ! Iberdan-ik, d iberdan n l\u1e25eqq \u021b-\u021bide\u021b ay Agellid n le\u01e7nas.\n15:4 Anwa ur ne\u021b\u021baggad, ur ne\u021b\u1e25emmid isem-ik a Sidi \u1e5aebbi ? Axa\u1e6der d ke\u010d\u010d kan i d imqeddes. Le\u01e7nas me\u1e5b\u1e5ba a d-asen ad se\u01e7\u01e7den zdat-ek, imi t\u1e25ekkme\u1e0d s l\u1e25eqq a Bab n l\u1e25eqq.\n15:5 Deffir wayagi, wala\u0263 l\u01e7ame\u025b iqedsen anda yella uqi\u1e0dun n temlilit yeldi deg igenni.\n15:6 Seb\u025ba n lmalayekkat-nni ye\u1e6d\u1e6dfen seb\u025ba n lmu\u1e63ibat, ff\u0263ent-ed si l\u01e7ame\u025b-nni s llebsa n le\u1e25rir ye\u1e63fan ye\u021bfe\u01e7\u01e7i\u01e7en, beggsent-ed s wagusen n ddheb \u0263ef yidmaren-nsent.\n15:7 Yiwen si \u1e5beb\u025ba lxuluq-nni, yefka i seb\u025ba-nni n lmalayekkat seb\u025ba n teqbucin n ddheb \u010d\u010du\u1e5bent s wurrif n Sidi \u1e5aebbi yeddren si l\u01e7il \u0263er l\u01e7il.\n15:8 L\u025ba\u1e0dima akk-d l\u1e25ekma n Sidi \u1e5aebbi \u010d\u010du\u1e5ben l\u01e7ame\u025b iqedsen s dexxan, yiwen ur izmir ad yekcem \u0263er l\u01e7ame\u025b-nni alamma nnekmalent lmu\u1e63ibat n seb\u025ba lmalayekkat-nni.\n16:1 Sli\u0263 i yiwen \u1e63\u1e63ut \u025blayen i d-yekkan si l\u01e7ame\u025b iqedsen yeqqa\u1e5b i seb\u025ba-nni n lmalayekkat : -- \u1e5au\u1e25emt, smiremt \u0263ef ddunit seb\u025ba teqbucin n wurrif n Sidi \u1e5aebbi !\n16:2 Lmelk amezwaru i\u1e5bu\u1e25, yesmar taqbuct-is \u0263ef ddunit. Yiwen udeddi iwe\u025b\u1e5ben iqerri\u1e25en, yen\u1e6de\u1e0d imdanen me\u1e5b\u1e5ba yes\u025ban tic\u1e5be\u1e6d n le\u025bqi\u1e5ba yerna \u021bse\u01e7\u01e7iden zdat lme\u1e63nu\u025b-ines.\n16:3 Lmelk wis sin yesmar taqbuct-is \u0263er leb\u1e25e\u1e5b, yu\u0263al d idammen am idammen n lmegget, imiren kra wayen ye\u021b\u025bicen di leb\u1e25e\u1e5b yemmut.\n16:4 Lmelk wis tlata yesmar taqbuct-is \u0263ef yisaffen d le\u025bwan\u1e63er n waman, u\u0263alen me\u1e5b\u1e5ba d idammen.\n16:5 Sli\u0263 i lmelk i\u1e25ekkmen \u0263ef waman yeqqa\u1e5b : Ay Imqeddes, a Bab n l\u1e25eqq, ke\u010d\u010d yellan si zik, yellan ass-a, t\u1e25ekkme\u1e0d s l\u1e25eqq.\n16:6 Axa\u1e6der nutni ssazlen idammen n yimqedsen akk-d lenbiya, daymi i sen-tefki\u1e0d ula d ke\u010d\u010d ad swen idammen, axa\u1e6der d ayen uklalen.\n16:7 Sli\u0263 i yiwet ta\u0263ect i d-yekkan seg udekkan n iseflawen teqqa\u1e5b : An\u025bam a Sidi \u1e5aebbi a Bab n tezmert, l\u1e25ekma-inek \u021b-\u021bide\u021b yerna d l\u1e25eqq.\n16:8 Lmelk wis \u1e5beb\u025ba yesmar taqbuct-is \u0263ef yi\u1e6dij, ye\u021b\u021bunefk-as i yi\u1e6dij ad yesse\u1e5b\u0263 imdanen,\n16:9 d\u0263a imdanen me\u1e5b\u1e5ba \u1e5b\u0263an s yi\u1e6dij. Reggmen Sidi \u1e5aebbi i g\u1e25ekmen \u0263ef lmu\u1e63ibat-agi, ugin ad tuben, ad set\u025be\u1e5bfen yis, akken a t-\u1e25emmden.\n16:10 Lmelk wis xemsa yesmar taqbuct-is \u0263ef wukersi n l\u1e25ekma n le\u025bqi\u1e5ba-nni. Ye\u0263li-d \u1e6d\u1e6dlam \u0263ef tgelda-s ; imdanen \u021bkerricen ilsawen-nsen seg weq\u1e5ba\u1e25,\n16:11 reggmen Sidi \u1e5aebbi Bab n igenwan \u0263ef lqe\u1e5b\u1e25 d ideddiyen-nsen, ur b\u0263in ara ad tuben seg yir lec\u0263al-nsen.\n16:12 Lmelk wis se\u021b\u021ba yesmar taqbuct is \u0263ef wasif ameqqran n Lufrat. Yes\u0263e\u1e5b asif-nni iwakken ad iheggi abrid i igelliden i d-i\u021beddun si cce\u1e5bq.\n16:13 Wala\u0263 ff\u0263en-d seg uxenfuc n llaf\u025ba, seg uxenfuc n le\u025bqi\u1e5ba, seg yimi n nnbi n lekdeb, tlata le\u1e5bwa\u1e25 i\u025befnen i g\u021bemcabin \u0263er imqerqa\u1e5b.\n16:14 Widak-nni, d le\u1e5bwa\u1e25 n le\u01e7nun i gxeddmen lica\u1e5bat, \u021b\u1e5bu\u1e25un \u0263er igelliden n ddunit me\u1e5b\u1e5ba, iwakken a ten-id-snejma\u025ben i wumen\u0263i n wass ameqqran n Sidi \u1e5aebbi Bab n tezmert.\n16:15 Aql-in a n-ase\u0263 am umakar. D ase\u025bdi win i\u025bussen \u0263ef yiman-is ur yekkis ara llebsa-ines, iwakken ur i\u021beddu ara \u025beryan, ur i\u021bne\u1e25cam ara m'ara t-id-walin !\n16:16 Le\u1e5bwa\u1e25-nni n le\u01e7nun snejma\u025ben-d igelliden n ddunit deg yiwen wemkan iwumi qqa\u1e5ben s t\u025bib\u1e5banit \u00ab Harmagidun \u00bb.\n16:17 Lmelk wis seb\u025ba yesmar taqbuct is ger igenni d lqa\u025ba. Teffe\u0263-ed si l\u01e7ame\u025b iqedsen yiwet ta\u0263ect \u025blayen, i d-yekkan seg ukersi n l\u1e25ekma teqqa\u1e5b : Dayen kullec ye\u021bwakemmel !\n16:18 Teb\u1e5beq, ter\u025be\u1e0d, nesla i tu\u0263ac, tezlez lqa\u025ba, seg wasmi i d-\u021bwaxelqen imdanen \u0263er ddunit ur d-ted\u1e5bi zzelzla tameqqrant am tagi.\n16:19 Tamdint tameqqrant teb\u1e0da \u0263ef tlata. Timdinin n tmura \u0263lint, Sidi \u1e5aebbi yemmekta-d Babilun tameqqrant iwakken a s-yefk a\u021b-\u021bsew lem\u1e5ba\u1e5b si teqbuct n wurrif-is ameqqran.\n16:20 Tigzirin zedrent me\u1e5b\u1e5ba, ula d idurar ur d-banen ara.\n16:21 Ye\u0263li-d igedrez d ameqqran \u0263ef yemdanen, mkul a\u025beqqa yewzen azal n \u1e5beb\u025bin kilu ; imdanen regmen Sidi \u1e5aebbi \u0263ef lmu\u1e63iba n igedrez-nni, axa\u1e6der tegla-d s wa\u1e6das n lex\u1e63a\u1e5ba.\n17:1 Mbe\u025bd ayagi, yiwen si seb\u025ba lmalayekkat-nni ye\u1e6d\u1e6dfen seb\u025ba teqbucin yusa-d yenna-yi-d : -- As-ed a k-d-sne\u025bte\u0263 amek ara ye\u021bwa\u1e25kem \u0263ef tmen\u025bult tameqqrant i gebnan \u0263ef yisaffen imeqqranen.\n17:2 Yid-es i zennun igelliden n ddunit, \u0263ef ddemma-s i ff\u0263en imezda\u0263 n ddunit seg ubrid n Sidi \u1e5aebbi.\n17:3 Deg uwe\u1e25\u1e25i ufi\u0263-ed iman-iw deg unez\u1e5buf. Wala\u0263 yiwet tme\u1e6d\u1e6dut teqqim \u0263ef yiwen lwe\u1e25c, rric-is d azegga\u0263, \u021bwaketben fell-as yismawen n rregmat, yes\u025ba seb\u025ba iqe\u1e5b\u1e5bay akk-d \u025bec\u1e5ba wacciwen.\n17:4 Tame\u1e6d\u1e6dut-nni telsa llebsa ifazen \u021b\u021bazegga\u0263t, tcebbe\u1e25 iman-is s ddheb d yed\u0263a\u0263en \u0263layen akk-d i\u025beqcan. Te\u1e6d\u1e6def deg ufus-is taqbuct n ddheb ye\u010d\u010du\u1e5ben \u021b-\u021bicmatin, ye\u025bni ayen ine\u01e7sen d wayen i\u025befnen n yir lec\u0263al is.\n17:5 Ye\u021bwakteb \u0263ef wunyir-is yiwen yisem iwumi ye\u021bwaffer lme\u025bna-s : Babilun tucmi\u021b tameqqrant i seg d-kkant tecmatin akk-d le\u1e25\u1e5bamat me\u1e5b\u1e5ba n ddunit.\n17:6 Wala\u0263 tame\u1e6d\u1e6dut-nni teske\u1e5b s idammen n wid yexta\u1e5b Sidi \u1e5aebbi, d idammen n inigan n Lmasi\u1e25. Mi \u021b-wala\u0263, wehme\u0263 deg-s.\n17:7 Yekker lmelk-nni yenna-yi-d : Acu\u0263e\u1e5b i twehme\u1e0d ? Atan a k-d sfehme\u0263 lba\u1e0dna n tme\u1e6d\u1e6dut-agi akk-d lwe\u1e25c i \u021b-ye\u021bbibbin, win akken yes\u025ban seb\u025ba iqe\u1e5b\u1e5bay d \u025bec\u1e5ba wacciwen.\n17:8 Lwe\u1e25c-nni twala\u1e0d, zik yella yedder, tura ulac-it. A d-yali si tesraft lqayen lame\u025bna iwakken ad i\u1e5bu\u1e25 \u0263er nnger. Imezda\u0263 n ddunit iwumi ur ye\u021bwajerred ara yisem-nsen seg wasmi i d-tebda ddunit di tektabt n tudert, ad t\u025be\u01e7\u01e7ben m'ara walin lwe\u1e25c-nni, axa\u1e6der lwe\u1e25c-nni yellan zik yu\u0263al ulac-it, i\u021beddu a d-yu\u0263al.\n17:9 Dagi, tlaq tmusni d lefhama iwakken ad \u021bwafehment lba\u1e0dnat-agi : seb\u025ba iqe\u1e5b\u1e5bay-nni \u021bmettilen-d seb\u025ba idurar i \u0263ef tesbedd l\u1e25ekma-s tme\u1e6d\u1e6dut-nni ; \u021bmettilen-d da\u0263en seb\u025ba igelliden :\n17:10 xemsa deg-sen \u0263lin, yiwen mazal-it, waye\u1e0d ur\u025bad ur d-yusi, yerna asm'ara d-yas ad ye\u1e25kem kra n lweqt kan.\n17:11 Lwe\u1e25c-nni yellan zik yu\u0263al ulac-it, d ne\u021b\u021ba i d agellid wis tmanya, yella da\u0263en d yiwen si seb\u025ba-nni ara i\u1e5bu\u1e25en \u0263er nnger.\n17:12 \u0190ec\u1e5ba wacciwen nni i twala\u1e0d, \u021bmettilen-d \u025bec\u1e5ba igelliden ur\u025bad nes\u025bi l\u1e25ekma, lame\u025bna a d-yas lweqt i deg ara \u1e25ekmen azal n ssa\u025ba akk-d lwe\u1e25c.\n17:13 Msefhamen s yiwen \u1e5b\u1e5bay, ad \u025bawnen lwe\u1e25c s tezmert-nsen akk-d l\u1e25ekma-nsen.\n17:14 Ad sekkren imen\u0263i akk-d Izimer me\u025bna a ten-ye\u0263leb imi d ne\u021b\u021ba i d Ssid n Ssyadi, i d agellid n igelliden ; wid i gexta\u1e5b da\u0263en iwumi i d-yessawel, i t-i\u1e0du\u025ben a ten-\u0263elben ula d nutni.\n17:15 Lmelk yenna-yi-d da\u0263en : Aman-agi n isaffen i twala\u1e0d i \u0263ef tesbedd l\u1e25ekma-s tme\u1e6d\u1e6dut-nni tucmi\u021b, \u021bmettilen-d igduden, l\u0263aci d le\u01e7nas n mkul tutlayt.\n17:16 \u0190ec\u1e5ba wacciwen-nni i twala\u1e0d akk-d lwe\u1e25c, ad u\u0263alen ad ke\u1e5bhen tame\u1e6d\u1e6dut-nni tucmi\u021b, a \u021b-\u025berrin ad \u010d\u010den aksum-is, imiren ad sse\u1e5b\u0263en ayen i d-yeqqimen seg-s.\n17:17 D Sidi \u1e5aebbi i ten-iwellhen akken ad xedmen leb\u0263i-s, ddukklen \u0263ef yiwen \u1e5b\u1e5bay iwakken ad fken l\u1e25ekma i lwe\u1e25c alamma yed\u1e5ba-d leb\u0263i n Sidi \u1e5aebbi.\n17:18 Ma \u021b-\u021bame\u1e6d\u1e6dut-nni tucmi\u021b i twala\u1e0d, te\u021bmettil-ed tamdint tameqqrant i g\u1e25ekmen \u0263ef yigelliden n ddunit.\n18:1 Deffir wayagi wala\u0263 lmelk nni\u1e0den i d-yusan seg igenni, yes\u025ba l\u1e25ekma tameqqrant, ddunit me\u1e5b\u1e5ba tfe\u01e7\u01e7e\u01e7 s tmanegt-is.\n18:2 I\u025begge\u1e0d s \u1e63\u1e63ut \u025blayen yenna : Te\u0263li ! Te\u0263li temdint-nni tameqqrant n Babilun ! Tu\u0263al \u021b-\u021bamezdu\u0263t n ccwa\u1e6den, d amkan anda \u021bnejma\u025ben le\u1e5bwa\u1e25 ime\u025bfan, anda xeddmen le\u025bcuc-nsen le\u1e6dyu\u1e5b i\u025befnen.\n18:3 Axa\u1e6der tewwi le\u01e7nas me\u1e5b\u1e5ba \u0263er le\u01e7hel s yir tikli-ines, igelliden n ddunit jehlen yid-es, wid ye\u021b\u021ba\u0263en znuzun u\u0263alen d ime\u1e5bkantiyen s ssel\u025ba ifazen i s-znuzun.\n18:4 Sli\u0263 i yiwet ta\u0263ect i d-yekkan seg igenni teqqa\u1e5b : Eff\u0263et seg-s ay agdud-iw, iwakken ur t\u0263ellim ara di ddnub-is, iwakken ur kkun-id-\u021baw\u1e0dent ara lmu\u1e63ibat ara d-ye\u0263lin fell-as.\n18:5 Axa\u1e6der ddnubat-is \u025beddan tilas ww\u1e0den \u0263er igenni, amek ara ye\u021b\u021bu Sidi \u1e5aebbi lba\u1e6del i texdem.\n18:6 Xedmet as akken i wen-txeddem, \u025be\u021b\u021bbet-e\u021b akte\u1e5b wayen i kkun-t\u025be\u021b\u021beb, taqbuct nni n lem\u1e5ba\u1e5b i tessew i wiya\u1e0d, \u025bemm\u1e5bet-as-\u021b d lem\u1e5ba\u1e5b yugaren win tessew ne\u021b\u021bat.\n18:7 Akken tefka i yiman-is ccan, t\u025bac di lerba\u1e25, ara s-tesse\u1e5bwum le\u025btab d le\u1e25zen, axa\u1e6der teqqa\u1e5b : Aql-iyi am ugellid, ur lli\u0263 \u021b-\u021ba\u01e7\u01e7alt, ur \u021bissine\u0263 le\u1e25zen.\n18:8 Daymi, deg yiwen wass ara d-\u0263lint fell-as lmu\u1e63ibat : lmut, le\u1e25zen, la\u1e93 akk-d tmes ara \u021b-ye\u010d\u010den. Axa\u1e6der d Sidi \u1e5aebbi Bab n tezmert i \u021b-i\u025buqben.\n18:9 Igelliden n ddunit me\u1e5b\u1e5ba i g\u025bacen deg-s di zzhu d zzna, ad \u021brun, ad me\u01e7den fell-as, m'ara walin dexxan i ge\u021b\u021balin si tmes ice\u025blen deg-s.\n18:10 Imi uggaden a ten-tawe\u1e0d txe\u1e63\u1e63art, bedden meb\u025bid qqa\u1e5ben : A tawa\u0263it-im, a tawa\u0263it-im a tamdint n Babilun, tamdint tameqqrant yes\u025ban tazmert, deg yiwet n ssa\u025ba kan ye\u0263li-d fell-am l\u025biqab.\n18:11 Wid ye\u021b\u021ba\u0263en znuzun ad ilin di le\u1e25zen ameqqran ad \u021brun, axa\u1e6der ulac win ara ya\u0263en ssel\u025ba-nsen,\n18:12 ssel\u025ba-nni n ddheb d lfe\u1e6d\u1e6da, id\u0263a\u0263en \u0263layen d i\u025beqcan, lke\u021b\u021ban n lfina akk-d lke\u021b\u021ban azegga\u0263 d le\u1e25rir, ssel\u025ba n yal as\u0263a\u1e5b i d-ye\u021b\u021baken rri\u1e25a ta\u1e93i\u1e0dant, le\u1e25waye\u01e7 akk ine\u01e7\u1e5ben s wacciwen n lfil, s wes\u0263a\u1e5b \u0263layen d wayen ye\u021bwaxedmen s nn\u1e25as d wuzzal akk-d e\u1e5bxem ;\n18:13 ulac da\u0263en win ara ya\u0263en lqe\u1e5bfa, le\u025bqaqe\u1e5b, le\u025b\u1e6de\u1e5b, lmu\u1e5b, lebxu\u1e5b, cc\u1e5bab, zzit, awren e\u1e5bqiqen akk-d yirden, izgaren, ulli, i\u025bewdiwen, ike\u1e5b\u1e5busen n umen\u0263i akk-d yemdanen i rran d aklan.\n18:14 A tamdint n Babilun, ayen akken te\u021bmenni\u1e0d i\u1e5bu\u1e25-am ib\u025bed fell-am, lerba\u1e25-im d wayen akk muca\u025ben \u0263u\u1e5b-em, \u1e5bu\u1e25en-am ur te\u021b\u021bu\u0263ale\u1e0d ara a ten-tafe\u1e0d.\n18:15 Wid ye\u021b\u021ba\u0263en znuzun le\u1e25waye\u01e7 di temdint-agi yu\u0263alen d ime\u1e5bkantiyen, ad qqimen meb\u025bid ad aggaden a ten-tawe\u1e0d twa\u0263it, ad \u021brun, ad ilin di le\u1e25zen ;\n18:16 ad inin : A tawa\u0263it ! A tawa\u0263it ! Tamdint nni yellan am tme\u1e6d\u1e6dut ye\u021blusun lke\u021b\u021ban e\u1e5bqiqen d llebsa tazegga\u0263t ifazen, ye\u021b\u025belliqen i\u025beqcan \u0263layen, id\u0263a\u0263en n lyaman n mkul \u1e63\u1e63enf akk-d ddheb,\n18:17 deg yiwet n ssa\u025ba kan, kullec yu\u0263al d i\u0263ed ! Lqeb\u1e6danat n lbabu\u1e5bat d ixeddamen nsen, ibe\u1e25\u1e5biyen akk-d wid ye\u021bsafa\u1e5ben di leb\u1e25u\u1e5b \u0263er tmurt-nni qqimen meb\u025bid,\n18:18 \u021b\u025beggi\u1e0den mi walan dexxan n tmes ye\u010d\u010dan tamdint-nni, qqa\u1e5ben : Anta tamdint yecban tamdint agi ?\n18:19 Bdan \u1e6deggi\u1e5ben a\u0263ebba\u1e5b \u0263ef yiqe\u1e5b\u1e5bay-nsen, \u021brun \u021bme\u01e7\u01e7iden, \u021b\u025beggi\u1e0den qqa\u1e5ben : A tawa\u0263it-im ! A tawa\u0263it-im a tamdint tameqqrant, isreb\u1e25en wid akk yes\u025ban lbabu\u1e5bat di leb\u1e25ur, deg yiwet teswi\u025bt kan tnegre\u1e0d tu\u0263ale\u1e0d d i\u0263ed.\n18:20 A wid yexta\u1e5b Sidi \u1e5aebbi, a wid i d-icegge\u025b ad becc\u1e5ben awal-is, a lenbiya, ay igenwan, ilit di lfe\u1e5b\u1e25 \u0263ef wayen yed\u1e5ban yid-es, axa\u1e6der Sidi \u1e5aebbi i\u025buqeb-i\u021b \u0263ef wayen i wen texdem.\n18:21 Imiren yiwen lmelk yes\u025ban tazmert tameqqrant, yeddem-ed tabla\u1e6d annect n u\u0263a\u1e5bef n tsirt, i\u1e0degge\u1e5b-i\u021b \u0263er leb\u1e25e\u1e5b yenna : Akka ara te\u021b\u021bu\u1e0degge\u1e5b temdint tameqqrant n Babilun, ur te\u021b\u021bu\u0263al a d-tban ;\n18:22 ur ne\u021b\u021bu\u0263al a nsel i \u1e63\u1e63ut n wid yekkaten snitra d wid i gcennun akk-d wid yekkaten ajewwaq d lbuq. Ur d-ye\u021b\u0263imi deg-em \u1e63\u1e63ane\u025b, ur ne\u021b\u021b\u0263al a nsel i i\u0263u\u1e5baf n tessirt.\n18:23 Ur te\u021b\u021bu\u0263al a d-tban deg-em tafat, ur ne\u021b\u021bu\u0263al a nsel i ta\u0263ect n yesli \u021b-\u021beslit. A\u021b-\u021bwa\u025baqbe\u1e0d a tamdint n Babilun imi imestuja\u1e5b-im, d nutni i gellan d imeqqranen di ddunit ; le\u01e7nas me\u1e5b\u1e5ba \u021bwaxed\u025ben s ss\u1e25ur i txeddme\u1e0d ;\n18:24 axa\u1e6der deg-em i yuzzlen idammen n lenbiya d wid yexta\u1e5b Sidi \u1e5aebbi akk-d wid me\u1e5b\u1e5ba yemmezlen di ddunit.\n19:1 Imiren sli\u0263 i yiwen \u1e63\u1e63ut e\u025blayen deg igenni, d \u1e63\u1e63ut n luluf n yemdanen, qqa\u1e5ben : Halliluya l\u1e25emd i \u1e5aebbi ! Leslak, tamanegt \u021b-\u021bezmert i Sidi \u1e5aebbi Illu-nne\u0263,\n19:2 axa\u1e6der ye\u1e25kem s l\u1e25eqq \u021b-\u021bide\u021b \u0263ef tucmi\u021b-nni tameqqrant i g\u0263u\u1e5b\u1e5ben imezda\u0263 n ddunit, yerra-d \u021b\u021ba\u1e5b n iqeddacen-is yemmezlen.\n19:3 Nnan da\u0263en : Halliluya !... Times yesse\u1e5b\u0263en tamdint tameqqrant ur txe\u021b\u021bi ara, a\u021b-\u021beqqim i dayem.\n19:4 \u1e5aeb\u025ba u\u025becrin-nni lecyux akk-d \u1e5beb\u025ba lxuluq se\u01e7\u01e7den zdat Sidi \u1e5aebbi i geqqimen \u0263ef wukersi n l\u1e25ekma, \u021bcekki\u1e5ben-t qqa\u1e5ben : Amin ! Halliluya !\n19:5 Yeffe\u0263-ed yiwen \u1e63\u1e63ut seg ukersi nni n l\u1e25ekma, yeqqa\u1e5b-ed : ?emmdet Sidi \u1e5aebbi Illu-nne\u0263, kunwi me\u1e5b\u1e5ba yellan d iqeddacen-is, kunwi i t-i\u021b\u1e0du\u025bun am umeqqran am ume\u1e93yan.\n19:6 Rni\u0263 sli\u0263 i luluf n yemdanen am akken d \u1e63\u1e63ut n leb\u1e25e\u1e5b m'ara yekker, am tiyita n \u1e5b\u1e5b\u025bud, i geqqa\u1e5ben : Halliluya ! Sidi \u1e5aebbi Illu-nne\u0263 Bab n tezmert yesbedd l\u1e25ekma-s.\n19:7 A nezhu, a nef\u1e5be\u1e25, a t-ne\u1e25med axa\u1e6der tewwe\u1e0d-ed tme\u0263\u1e5ba n Izimer, tislit thegga iman-is,\n19:8 ye\u021b\u021bunefk-as a\u021b-\u021bels lke\u021b\u021ban a\u1e5bqaq ye\u021bfe\u01e7\u01e7i\u01e7en. Lke\u021b\u021ban-agi imettel-ed lec\u0263al yelhan n wid yexta\u1e5b Sidi \u1e5aebbi.\n19:9 Lmelk yenna-yi-d : Aru ayagi : d ise\u025bdiyen wid i d-ye\u021bwa\u025ber\u1e0den \u0263er imensi n tme\u0263\u1e5ba n Izimer. Yenna-yi-d da\u0263en : Imeslayen-agi, d imeslayen n tide\u021b n Sidi \u1e5aebbi.\n19:10 D\u0263a \u0263li\u0263 \u0263er i\u1e0da\u1e5b\u1e5ben-is iwakken a t-\u025bebde\u0263, me\u025bna yenna-yi-d : ?ader a d-se\u01e7\u01e7de\u1e0d zdat-i, axa\u1e6der nekk d aqeddac n Sidi \u1e5aebbi am ke\u010d\u010d am atmaten-ik i ge\u1e6d\u1e6dfen di lexba\u1e5b n lxi\u1e5b n \u0190isa Lmasi\u1e25, d Sidi \u1e5aebbi kan ara t\u025bebde\u1e0d. Tide\u021b-agi i d-ibeggen \u0190isa Lmasi\u1e25, \u021b-\u021bin i ge\u021bwellihen lenbiya.\n19:11 Wala\u0263 da\u0263en igenni yeldi, iban-ed yiwen u\u025bewdiw d amellal. Win i t-irekben isem-is \u00ab A\u1e25eqqi \u021b-\u021bide\u021b \u00bb, i\u1e25ekkem s l\u1e25eqq, ye\u021bna\u0263 \u0263ef tide\u021b.\n19:12 Allen-is am u\u1e25e\u01e7\u01e7a\u01e7u n tmes ; yes\u025ba a\u1e6das n t\u025be\u1e63\u1e63abin \u0263ef wuqe\u1e5b\u1e5buy-is. Yes\u025ba yiwen yisem yiwen ur t-yessin anagar ne\u021b\u021ba.\n19:13 Yelsa abe\u1e5bnus ye\u010d\u010du\u1e5b d idammen. Ma d ne\u021b\u021ba isem-is : \u00ab Awal n \u1e5aebbi \u00bb .\n19:14 L\u025beske\u1e5b n igenwan lsan llebsa tamellalt n lfina ye\u021bfe\u01e7\u01e7i\u01e7en yerna ttaba\u025ben-t \u0263ef yi\u025bewdiwen imellalen.\n19:15 Yeffe\u0263-ed seg imi-s yiwen ujenwi qe\u1e6d\u1e6di\u025ben, iwakken ad yewwet le\u01e7nas ; ad ye\u1e25kem fell-asen s t\u025bekkazt n wuzzal. A ten-ye\u1e5bke\u1e0d am akken \u1e5bekk\u1e0den ti\u1e93urin zdaxel n lem\u025bins\u1e5ba, akka ara d-ibeggen urrif n Sidi \u1e5aebbi Bab n tezmert.\n19:16 Yura \u0263ef wube\u1e5bnus-is akk-d ume\u1e63\u1e63a\u1e0d-is : \u00ab Agellid n igelliden, Ssid n Ssyadi. \u00bb\n19:17 Wala\u0263 da\u0263en yiwen lmelk ibedd \u0263ef yi\u1e6dij, yessawel s ta\u0263ect e\u025blayen i le\u1e0dyu\u1e5b me\u1e5b\u1e5ba ye\u021bferfiren deg igenni : Aset-ed, nnejma\u025bet-ed a\u021b \u021be\u010d\u010dem imensi ameqqran i d-ihegga Sidi \u1e5aebbi,\n19:18 iwakken a\u021b-\u021be\u010d\u010dem aksum n igelliden, aksum n l\u025beske\u1e5b d wid i\u1e25ekkmen fell-asen, aksum n i\u025bewdiwen d wid i ten-irekben, aksum n yemdanen, ama d i\u1e25e\u1e5b\u1e5biyen ama d aklan, s umeqqran s ume\u1e93yan.\n19:19 Wala\u0263 le\u025bqi\u1e5ba akk-d igelliden n ddunit snejma\u025ben-d l\u025beske\u1e5b-nsen iwakken ad nna\u0263en d Win irekben \u0263ef wu\u025bewdiw akk-d l\u025beske\u1e5b-is.\n19:20 Le\u025bqi\u1e5ba te\u021bwa\u1e6d\u1e6def ne\u021b\u021bat d nnbi nni n lekdeb i gxeddmen lbe\u1e5bhanat seddaw n l\u1e25ekma-s, s wayes ikellex imdanen me\u1e5b\u1e5ba ye\u021bwa\u1e0deb\u025ben s \u1e6d\u1e6dabe\u025b n le\u025bqi\u1e5ba yerna \u021bse\u01e7\u01e7iden zdat lme\u1e63nu\u025b ines. ?wa\u1e0degg\u1e5ben i sin d imuddiren \u0263er temda tameqqrant n tmes i deg i\u1e5beqq ukubri.\n19:21 Wiya\u1e0d mmuten s ujenwi-nni i d-yeff\u0263en seg yimi n Win irekben a\u025bewdiw, le\u1e0dyu\u1e5b n igenni \u010d\u010dan seg uksum-nsen armi \u1e5bwan.\n20:1 Wala\u0263 da\u0263en yiwen lmelk i\u1e63ubb-ed seg igenni, yewwi-d deg ufus-is tasaru\u021b n tesraft lqayen akk-d yiwet ssnesla tameqqrant.\n20:2 ye\u1e6d\u1e6def-ed llaf\u025ba yellan d azrem nni n zik, yellan d Cci\u1e6dan d Iblis, yeqqen-i\u021b s ssnesla iwakken a t ye\u1e25bes alef iseggasen.\n20:3 I\u1e0degge\u1e5b-it \u0263er tesraft-nni lqayen, yerra-yas a\u0263ummu izemmem-i\u021b iwakken ur i\u021bkellix ara le\u01e7nas alamma \u025beddan walef iseggasen, imiren a d-ye\u021bwaserre\u1e25 i kra n lweqt.\n20:4 Mbe\u025bd ayagi, wala\u0263 ikursiyen n l\u1e25ekma, ye\u021b\u021bunefk i wid yeqqimen fell-asen ad \u1e25asben ; wala\u0263 le\u1e5bwa\u1e25 n wid iwumi \u021bwakksen iqe\u1e5b\u1e5bay \u0263ef ddemma n tide\u021b n \u0190isa Lmasi\u1e25 akk-d wawal n Sidi \u1e5aebbi. Wala\u0263 da\u0263en wid ur neqbil ara ad se\u01e7\u01e7den zdat le\u025bqi\u1e5ba akk-d lme\u1e63nu\u025b-is, wid ur neqbil ara tic\u1e5be\u1e6d-ines \u0263ef wunyir-nsen ne\u0263 \u0263ef yifassen-nsen. U\u0263alen-d \u0263er tudert, ad \u1e25ekmen akk-d Lmasi\u1e25 alef iseggasen.\n20:5 D wagi i d \u1e25eggu amezwaru. Ma d lmegtin nni\u1e0den ur d-\u021bu\u0263alen ara \u0263er tudert alamma \u025beddan walef iseggasen.\n20:6 Amarezg-nsen wid ara d-i\u1e25yun d imezwura ; lmut tis snat ur sen tzemmer ara, ad ilin d lmuqedmin n Sidi \u1e5aebbi akk-d Lmasi\u1e25, ad \u1e25ekmen akk-d Lmasi\u1e25 alef n iseggasen.\n20:7 M'ara \u025beddin walef iseggasen agi, Cci\u1e6dan a d-ye\u021bwaserre\u1e25 si l\u1e25ebs,\n20:8 iwakken ad ikellex le\u01e7nas me\u1e5b\u1e5ba yellan di \u1e5beb\u025ba yixfawen n ddunit, Ha\u01e7u\u01e7 Ma\u01e7u\u01e7 ye\u025bni wid yellan d i\u025bdawen n \u1e5aebbi, a ten-id-ijme\u025b i umen\u0263i \u021b-\u021birebba\u025b ur nezmir a ne\u1e25seb, am \u1e5b\u1e5bmel n leb\u1e25e\u1e5b.\n20:9 Ste\u025bm\u1e5ben akk ddunit, zzin i wegdud n Sidi \u1e5aebbi \u021b-\u021bemdint i g\u1e25emmel. Lame\u025bna ye\u0263li-d fell-asen u\u1e25e\u01e7\u01e7a\u01e7u n tmes seg igenni ye\u010d\u010da ten.\n20:10 Imiren ye\u021bwa\u1e0degge\u1e5b Cci\u1e6dan-nni i ten-i\u0263u\u1e5b\u1e5ben \u0263er daxel n temda-nni n tmes d ukubri anda tella le\u025bqi\u1e5ba d nnbi n lekdeb, ad \u021bwa\u025bedben am yi\u1e0d am wass i dayem.\n20:11 Wala\u0263 da\u0263en yiwen ukersi n l\u1e25ekma \u025blayen d amellal akk-d Win yeqqimen fell-as, igenni d lqa\u025ba rewlen zdat-es ur sen-d-yeqqim ara wemkan.\n20:12 D\u0263a wala\u0263 lmegtin bedden zdat ukersi-nni n l\u1e25ekma am umeqqran am ume\u1e93yan, ldint tektabin, teldi da\u0263en tektabt nni\u1e0den yellan \u021b-\u021baktabt n tudert. Lmegtin \u021b\u021bu\u1e25asben mkul yiwen \u0263ef le\u1e25sab n wayen yexdem d wayen yuran di tektabin-agi.\n20:13 Leb\u1e25e\u1e5b i\u1e0degge\u1e5b-ed akk wid ye\u010d\u010da, lmut d laxe\u1e5bt serr\u1e25ent-ed akk i lmegtin. Mkul yiwen ye\u021b\u021bu\u1e25aseb akken llan lec\u0263al-is.\n20:14 Lmut d laxe\u1e5bt \u021bwa\u1e0degg\u1e5bent \u0263er temda n tmes, \u021bamda-agi n tmes i d lmut tis snat.\n20:15 Kra n win ur ne\u021bwajerred ara di tektabt n tudert ye\u021bwa\u1e0degge\u1e5b \u0263er temda n tmes.\n21:1 Wala\u0263 igenni d lqa\u025ba ijdiden, igenni aqdim d lqa\u025ba taqdimt xfan, leb\u1e25ur ur d-qqimen ara.\n21:2 Wala\u0263 tamdint iqedsen t\u1e63ubb-ed seg igenni tekka-d s \u0263u\u1e5b Sidi \u1e5aebbi, \u021b-\u021bagi i \u021b-\u021bamdint n Lquds tajdi\u1e6d, thegga am teslit icebb\u1e25en iman-is i yesli.\n21:3 Sli\u0263 i yiwet ta\u0263ect ten\u1e6deq-ed s \u1e63\u1e63ut e\u025blayen seg ukersi-nni n l\u1e25ekma tenna-d : Tura Sidi \u1e5aebbi yezde\u0263 ger yemdanen, nutni ad ilin d agdud-is ne\u021b\u021ba s yiman-is ad yili yid-sen.\n21:4 A sen-yesfe\u1e0d ime\u1e6d\u1e6dawen, ur te\u021b\u021bili lmut, ur ye\u021b\u021bili le\u1e25zen, ur ye\u021b\u021bili ume\u01e7\u01e7ed ur ye\u021b\u021bili lqe\u1e5b\u1e25 axa\u1e6der le\u1e25waye\u01e7 timezwura \u025beddant ur \u021b\u025bawadent ara a d-\u021bu\u0263alent.\n21:5 Win akken yeqqimen \u0263ef wukersi n l\u1e25ekma yenna : Tura rri\u0263-ed kullec d ajdid. Yenna da\u0263en : Aru imeslayen-agi, axa\u1e6der imeslayen-iw \u1e63e\u1e25\u1e25an yerna deg-sen le\u021bkal.\n21:6 Yerna yenna-yi-d : Dayen ! Kullec ye\u021bwakemmel ! D nekk i d alfa d nekk i d umiga ye\u025bni d nekk i d l\u1e25e\u1e5bf amezwaru, d nekk i d l\u1e25e\u1e5bf aneggaru. Lli\u0263 si tazwara alamma \u021b-\u021baggara. Win iffuden, a s-d-fke\u0263 aman si l\u025binse\u1e5b n tudert yerna ba\u1e6del.\n21:7 Win ye\u1e6d\u1e6dfen deg-i ur ye\u0263li ara a t-kafi\u0263 s wayen yuklal ; nekk ad ili\u0263 d Illu-ines, ne\u021b\u021ba ad yili d mmi ;\n21:8 ma d ixedda\u025ben, wid ur ne\u021b\u021bamen ara, imejhal akk-d wid ineqqen timeg\u1e5ba\u1e0d, wid ixeddmen ticmatin akk d ise\u1e25\u1e25aren, wid i\u025bebden lme\u1e63nu\u025bat d ssada\u021b, imeskaddaben, wigi me\u1e5b\u1e5ba ad yili umur-nsen di temda n tmes ireqqen d ukebri. ?-\u021bagi i d lmut tis snat.\n21:9 Yiwen si seb\u025ba lmalayekkat-nni ye\u1e6d\u1e6dfen seb\u025ba teqbucin ye\u010d\u010du\u1e5ben d seb\u025ba lmu\u1e63ibat tineggura yusa-d yenna-yi-d : Eyya-d a k-d-sekne\u0263 tislit, tame\u1e6d\u1e6dut n Izimer.\n21:10 Imiren irfed-iyi \u1e5a\u1e5bu\u1e25 n Sidi \u1e5aebbi, ufi\u0263-ed iman-iw \u0263ef yiwen wedrar \u025blayen. Isken-iyi-d tamdint n Lquds te\u021b\u1e63ubbu-d seg igenni s \u0263u\u1e5b Sidi \u1e5aebbi.\n21:11 Tecce\u025bce\u025b am lyaman ye\u1e63fan ye\u021b\u1e5beq\u1e5biqen am djaj, \u021b-\u021bamanegt n Sidi \u1e5aebbi i gersen fell-as.\n21:12 Zzin-as-d leswa\u1e5b \u025blayen yes\u025ban tnac tewwura, mkul yiwet ibedd zdat-es yiwen lmelk, uran \u0263ef tewwura-agi yismawen n tnac le\u025b\u1e5bac n wat Is\u1e5bail.\n21:13 Tlata tewwura wehhant \u0263er cce\u1e5bq, tlata \u0263er l\u0263e\u1e5bb, tlata \u0263er usammer, tlata nni\u1e0den \u0263er umalu.\n21:14 Leswa\u1e5b-nni ersen \u0263ef tnac lsisan i \u0263ef uran tnac yismawen n \u1e5b\u1e5busul n Izimer n \u1e5aebbi.\n21:15 Win akken i yi-d-i\u021bmeslayen ye\u1e6d\u1e6def a\u0263anim n ddheb iwakken ad yektil tamdint, tiwwura-ines d leswa\u1e5b-is.\n21:16 Tu\u0263zi \u021b-\u021behri n le\u1e25yu\u1e0d n temdint-nni \u025bedlen. Yektal tamdint-nni, yufa lqis n tnac alef n wannaren ama di tu\u0263zi-ines, ama di tehri-ines, ama di le\u025bli-ines.\n21:17 Lmelk yektal da\u0263en le\u025bli n leswa\u1e5b n temdint s u\u0263anim-nni, yufa meyya u\u1e5beb\u025ba u\u1e5beb\u025bin alef n i\u0263allen.\n21:18 Leswa\u1e5b-is bnan s lyaman, ma \u021b-\u021bamdint tebna s ddheb i\u1e63fan yecban djaj ye\u021b\u1e5beq\u1e5biqen.\n21:19 Lsisan n leswa\u1e5b-is \u1e5beqqmen s yez\u1e5ba \u0263layen n mkul \u1e63\u1e63enf. Amezwaru s Lyaman n Jasb, wis sin n Safir, wis tlata s lyaman n Agat, wis \u1e5beb\u025ba n ?um\u1e5bud,\n21:20 wis xemsa n Sardwan, wis se\u021b\u021ba n Kurnalin, wis seb\u025ba n Krizulit, wis tmanya n Biril, wis tes\u025ba n Tubaz, wis \u025bec\u1e5ba n Krisubraz, wis \u1e25dac n Turkwaz, wis tnac n Amitist.\n21:21 Tnac n tewwura-nni \u021bwaxedment s t\u025beqcin, mkul tawwurt \u021b-\u021ba\u025beqquct tameqqrant. Ab\u1e5ba\u1e25 n temdint-nni yessa s ddheb ye\u1e63fan am djaj ye\u021b\u1e5beq\u1e5biqen.\n21:22 Ur wala\u0263 ara l\u01e7ame\u025b di temdint-nni axa\u1e6der d Sidi \u1e5aebbi Bab n tezmert s yiman-is akk-d Izimer i d l\u01e7ame\u025b-ines.\n21:23 Tamdint-agi ur te\u1e25wa\u01e7 i\u1e6dij, ur te\u1e25wa\u01e7 agur iwakken a s-d-fken tafat axa\u1e6der \u021b-\u021bamanegt n Sidi \u1e5aebbi i \u021b-i\u021bnewwi\u1e5ben, yerna d Izimer i d lme\u1e63be\u1e25-ines.\n21:24 Le\u01e7nas me\u1e5b\u1e5ba ad l\u1e25un di tafat-is, igelliden n ddunit a d-asen ad se\u01e7\u01e7den, ad anzen zdat-es.\n21:25 Tiwwura-ines ur \u0263elqent ara ma\u1e0di axa\u1e6der dinna ur d-ye\u021b\u021bili ara yi\u1e0d.\n21:26 Le\u01e7nas me\u1e5b\u1e5ba yes\u025ban ccan a d-asen ad se\u01e7\u01e7den zdat-es.\n21:27 Ur ike\u010d\u010dem \u0263u\u1e5b-es wayen ine\u01e7sen, ur ike\u010d\u010dem \u0263u\u1e5b-es win ixeddmen cce\u1e5b ne\u0263 win yeskiddiben ; anagar wid ye\u021b\u021bujerden di tektabt n tudert n Izimer ara ikecmen \u0263er dinna.\n22:1 Lmelk-nni yesken-iyi-d da\u0263en asif anda \u021bazzalen waman n tudert, ye\u1e63fan am djaj ye\u021b\u1e5beq\u1e5biqen, i d-i\u021bfeggi\u1e0den seg ukersi n l\u1e25ekma n Sidi \u1e5aebbi akk-d Izimer.\n22:2 Di tlemmast n ub\u1e5ba\u1e25 n temdint tella ttej\u1e5ba n tudert iwumi d-yezzi wasif te\u021b\u021bak-ed tnac n l\u0263ellat, mkul agur te\u021b\u021bak-ed lfakya. Iferrawen-is d ddwa yesse\u1e25layen le\u01e7nas.\n22:3 Ur te\u021b\u021bu\u0263al ara a d-ili de\u025bwessu, akersi n l\u1e25ekma n Sidi \u1e5aebbi d Izimer ad yili di temdint, iqeddacen-is a t-\u025bebbden,\n22:4 ad walin udem-is, yerna ad s\u025bun isem-is \u0263ef yinyiren-nsen.\n22:5 Ur ye\u021b\u021bu\u0263al a d-yili \u1e6d\u1e6dlam ur \u021be\u1e25wi\u01e7in tafat n teftilt, ur \u021be\u1e25wi\u01e7in tafat n yi\u1e6dij axa\u1e6der d Sidi \u1e5aebbi s yiman-is ara ten-ineww\u1e5ben s tafat-is, yerna ad \u1e25ekmen yid-es i dayem.\n22:6 Lmelk-nni yenna-yi-d : Imeslayen-agi, d imeslayen i\u1e63e\u1e25\u1e25an yerna deg-sen le\u021bkal ; Sidi \u1e5aebbi ye\u021bwellihen lenbiya icegge\u025b-ed lmelk-is iwakken a d-isken i iqeddacen-is ayen ur ne\u021b\u025be\u1e6d\u1e6dil ara a d-yed\u1e5bu.\n22:7 Atan ihi, q\u1e5bib a n-ase\u0263 ! Amarezg n win ara i\u1e25erzen imeslayen i d-ye\u021b\u021buwe\u1e25\u1e25an di tektabt agi.\n22:8 D nekk Yu\u1e25enna i geslan yerna wala\u0263 ayagi me\u1e5b\u1e5ba ; mi sli\u0263 yerna wala\u0263 annect-agi, \u0263li\u0263 \u0263er i\u1e0da\u1e5b\u1e5ben n lmelk i yi-ten-id-yesseknen iwakken a t-\u025bebde\u0263 ;\n22:9 me\u025bna yenna-yi-d : ?ader a\u021b-\u021bse\u01e7de\u1e0d zdat-i axa\u1e6der nekk d aqeddac n Sidi \u1e5aebbi am ke\u010d\u010d am atmaten-ik lenbiya akk-d wid i\u1e25erzen imeslayen n tektabt-agi, d Sidi \u1e5aebbi kan ara t\u025bebde\u1e0d !\n22:10 Yenna-d da\u0263en : Ur \u021beffer ara imeslayen i k-d ye\u021b\u021buwe\u1e25\u1e25an di tektabt-agi, axa\u1e6der lweqt i deg ara d-d\u1e5bun q\u1e5bib a d-yawe\u1e0d.\n22:11 Win ixeddmen lba\u1e6del ad ikemmel di lba\u1e6del-ines, win ine\u01e7sen ad ikemmel di n\u01e7asa-ines, a\u1e25eqqi ad ikemmel ad iteddu s l\u1e25eqq, win iwumi ye\u1e63fa wul ad ikemmel tikli-ines s wul ye\u1e63fan.\n22:12 Atan ihi q\u1e5bib a n-ase\u0263, ad fke\u0263 i mkul yiwen akken yuklal.\n22:13 D nekk i d alfa d nekk i d umiga ye\u025bni d nekk i d l\u1e25e\u1e5bf amezwaru, d nekk i d l\u1e25e\u1e5bf aneggaru, lli\u0263 si tazwara alamma \u021b-\u021baggara.\n22:14 Amarezg n wid yessarden tijellabin-nsen axa\u1e6der a sen-ye\u021b\u021bunefk ad \u010d\u010den si ttej\u1e5ba n tudert yerna ad kecmen si tewwura n temdint ;\n22:15 ma d i\u025bdawen n Sidi \u1e5aebbi, ise\u1e25\u1e25aren, wid ixeddmen cce\u1e5b, wid ineqqen timeg\u1e5ba\u1e0d, wid i\u025bebden lme\u1e63nu\u025bat d ssada\u021b, wid ixeddmen ticmatin d wid yeskiddiben ama s imeslayen nsen ama s lec\u0263al-nsen, ur ke\u010d\u010dmen ara \u0263er temdint.\n22:16 Nekk \u0190isa Lmasi\u1e25 cegg\u025be\u0263-ed lmelk-iw iwakken ad ixebbe\u1e5b tijmuya\u025b n imasi\u1e25iyen s wayagi me\u1e5b\u1e5ba. Nekk seg i\u1e93u\u1e5ban n ugellid Dawed, d axalaf i d-ikkan si l\u01e7edra-ines, d itri ye\u021bfe\u01e7\u01e7i\u01e7en ta\u1e63eb\u1e25it.\n22:17 \u1e5a\u1e5bu\u1e25 iqedsen \u021b-\u021beslit qqa\u1e5ben : As-ed ! Kra n win ara yeslen i yimeslayen agi a d-yini : As-ed ! Win yeffuden a d-yas. Win yeb\u0263an aman yessidiren, ad issew ba\u1e6del !\n22:18 Ad \u025beggne\u0263 i kra win ara d yeslen i yimeslayen i d ye\u021b\u021buwe\u1e25\u1e25an di tektabt-agi, ma yella win i gzegden imeslayen, Sidi \u1e5aebbi a d-yesse\u0263li fell-as tiwa\u0263yin yuran di tektab-agi.\n22:19 Ma yella win i gesneqsen seg wayen i d-ye\u021b\u021buwe\u1e25\u1e25an di tektabt-agi, Sidi \u1e5aebbi a s-ikkes amur-is si ttej\u1e5ba n tudert, ur ike\u010d\u010dem ara \u0263er temdint iqedsen i \u0263ef d-\u021bmeslay tektabt-agi.\n22:20 Win i d-iwe\u1e25\u1e25an annect-agi me\u1e5b\u1e5ba yenna-d : ?-\u021bide\u021b q\u1e5bib a n-ase\u0263 ! As-ed a Ssid-nne\u0263 \u0190isa ! Amin !\n22:21 \u1e5a\u1e5be\u1e25ma n Ssid-nne\u0263 \u0190isa a d ters \u0263ef mkul yiwen.","title":"Kabyle Bible (NT): Revelation","type":"page"}