{"collection":"Bible & Christianity","html_url":"https://unchartedknowledge.5gfusion.net/browse/bib/wb/kab/th1.htm","path":"bib/wb/kab/th1.htm","source_url":"https://sacred-texts.com/bib/wb/kab/th1.htm","text":"1:1 Nekk Bulus, Silwan akk-d Timuti, i tejma\u025bt n watmaten yellan di temdint n Ti\u1e63alunik yumnen s Sidi \u1e5aebbi baba-tne\u0263 akk-d Ssid-nne\u0263 \u0190isa lmasi\u1e25. \u1e5a\u1e5be\u1e25ma \u021b-\u021balwit a d-ersent fell-awen.\n1:2 Yal ass ne\u021b\u1e25emmid Sidi \u1e5aebbi fell-awen ; mkul m'ara ned\u025bu \u0263u\u1e5b-es, ne\u021b\u021bader-ikkun-id di t\u1e93allit-nne\u0263.\n1:3 Ne\u021bmektay-ikkun-id zdat Sidi \u1e5aebbi baba-tne\u0263, \u0263ef wayen akk txeddmem seg wasmi tumnem s Ssid-nne\u0263 \u0190isa Lmasi\u1e25 ; tqeblem a\u021b-\u021benne\u025btabem \u0263ef ddemma n yisem-is imi t\u1e25emmlem-t yerna le\u021bkal-nwen fell-as d ameqqran.\n1:4 Ay atmaten e\u025bzizen \u0263er Sidi \u1e5aebbi, ne\u1e93ra belli d ne\u021b\u021ba i kkun-id ixta\u1e5ben.\n1:5 Lexbe\u1e5b-agi n lxi\u1e5b i wen-d newwi ma\u010d\u010di d imeslayen kan, lame\u025bna s \u021b\u021be\u1e25qiq i wen-d-nbecce\u1e5b lexba\u1e5b-agi n tide\u021b, s tezmert n \u1e5a\u1e5bu\u1e25 iqedsen. Te\u1e93ram amek i nedda gar-awen, asm'akken i nella \u0263u\u1e5b-wen ; nexdem ayagi iwakken a kkun-n\u025biwen di tikli-nwen.\n1:6 Ula d kunwi tu\u0263alem te\u021b\u021beddum am nukni deg webrid n Ssid-nne\u0263, imi di teswi\u025bt iwe\u025b\u1e5ben i tqeblem awal-is s lfe\u1e5b\u1e25 i d-i\u021b\u021bak \u1e5a\u1e5bu\u1e25 iqedsen.\n1:7 S wakka tu\u0263alem d lemtel i wid akk yumnen, i gellan di tmura n Masidunya akk-d Akaya.\n1:8 Axa\u1e6der s \u0263u\u1e5b-wen, lexba\u1e5b n lxi\u1e5b iwwe\u1e0d ma\u010d\u010di kan \u0263er tmura-agi, me\u025bna slan s liman-nwen di Sidi \u1e5aebbi di mkul amkan. Daymi fi\u1e25el a d-nemmeslay fell-awen.\n1:9 Imdanen me\u1e5b\u1e5ba \u1e25ekkun amek i tes\u1e6der\u1e25bem yis-nne\u0263, amek i d-tu\u0263alem \u0263er webrid n Sidi \u1e5aebbi, te\u01e7\u01e7am a\u025bbad n ssada\u021b, iwakken a\u021b-\u021b\u1e0du\u025bem Sidi \u1e5aebbi n tide\u021b, Sidi \u1e5aebbi yeddren.\n1:10 Yerna te\u021b\u1e5ba\u01e7um a d-yu\u0263al Ssid nne\u0263 \u0190isa seg igenwan, Mmi-s-nni i d-isse\u1e25ya si ger lmegtin ; d ne\u021b\u021ba ara \u0263-isellken ass n l\u1e25isab.\n2:1 Ay atmaten, kunwi s yiman-nwen te\u1e93ram ma\u010d\u010di mbla lme\u025bna i d-nusa \u0263u\u1e5b-wen.\n2:2 Te\u1e93ram da\u0263en nenne\u025btab, ne\u021bwargem di temdint n Filibus, me\u025bna ne\u1e6d\u1e6def di liman-nne\u0263 di Sidi \u1e5aebbi, nkemmel abecce\u1e5b n wawal-is gar-awen \u0263as akken ne\u021bwaqehhe\u1e5b.\n2:3 Lexbe\u1e5b-agi n lxi\u1e5b i wen-d newwi ur ibni ara \u0263ef lekdeb ne\u0263 \u0263ef t\u1e25ila d lexde\u025b.\n2:4 Sidi \u1e5aebbi i\u021bkel fell-a\u0263, daymi i \u0263-icegge\u025b iwakken a nbecce\u1e5b awal-is. Axa\u1e6der i\u1e93ra ne\u021bmeslay ma\u010d\u010di iwakken a ne\u025b\u01e7eb i yemdanen, me\u025bna iwakken a s-ne\u025b\u01e7eb i ne\u021b\u021ba yessnen ulawen-nne\u0263.\n2:5 Te\u1e93ram belli le\u025bme\u1e5b ur nemmeslay s usqizzeb ne\u0263 ne\u1e0dme\u025b kra deg yiwen, atan Sidi \u1e5aebbi d inigi !\n2:6 Le\u025bme\u1e5b ur nqelleb ad yali ccan-nne\u0263 ama \u0263u\u1e5b-wen ama \u0263er wiya\u1e0d ; yerna lemmer neb\u0263i, nezmer a n\u1e25ettem iman-nne\u0263 fell-awen imi d imcegg\u025ben n Lmasi\u1e25 i nella !\n2:7 Me\u025bna asmi nella gar-awen, ne\u010d\u010du\u1e5b d le\u1e25nana am tyemma\u021b i\u021b\u1e25adaren \u0263ef warraw-is.\n2:8 Imi tellam deg wulawen-nne\u0263, ma\u010d\u010di kan d lexba\u1e5b n lxi\u1e5b n Sidi \u1e5aebbi i neb\u0263a a wen-nbecce\u1e5b, me\u025bna nezmer a nsebbel ula \u021b-\u021bi\u1e5bwi\u1e25in-nne\u0263 fell-awen, axa\u1e6der te\u025bzizem fell-a\u0263 a\u1e6das.\n2:9 Ma tecfam ay atmaten \u0263ef wussan nni mi i wen-d-newwi lexba\u1e5b n lxi\u1e5b, nenne\u025btab, nxeddem i\u1e0d d wass akken ur ne\u021b\u021bili \u021b-\u021ba\u025bkumt ula i yiwen deg-wen.\n2:10 \u1e5aebbi ye\u1e93ra, kunwi te\u1e93ram belli tikli-nne\u0263 te\u1e63fa, nedda s l\u1e25eqq, yiwen ur a\u0263-d-issukkes l\u025bib gar-awen kunwi s wid yumnen.\n2:11 Te\u1e93ram da\u0263en nella i mkul yiwen deg-wen am ubabat \u0263er warraw-is.\n2:12 Nenha-kkun, nesse\u01e7hed-ikkun, n\u1e25ellel-ikkun iwakken a\u021b-\u021beddum akken yeb\u0263a Sidi \u1e5aebbi i wen-d issawlen \u0263er tgeldit-is d l\u025ba\u1e0dima-s.\n2:13 S wakka ne\u021b\u1e25emmid dayem Sidi \u1e5aebbi imi tqeblem awal-is i wen-d newwi. Tqeblem-t ma\u010d\u010di am akken d awal n wemdan, me\u025bna tqeblem-t imi d awal n Sidi \u1e5aebbi. D awal-agi i gxeddmen deg-wen tura, kunwi s wid yumnen.\n2:14 Ay atmaten, ted\u1e5ba yid-wen am tejmuya\u025b n imasi\u1e25iyen yellan di tmurt n Yahuda : akken i kkun-qeh\u1e5ben warraw n tmurt-nwen akken da\u0263en i ten-qeh\u1e5ben wudayen.\n2:15 D udayen-agi i gen\u0263an Ssid nne\u0263 \u0190isa Lmasi\u1e25 akk-d lenbiya, d nutni da\u0263en i \u0263-iqeh\u1e5ben. \u0190u\u1e63an Sidi \u1e5aebbi yerna d i\u025bdawen n yemdanen.\n2:16 Rnan kemmlen di ddnubat-nsen, axa\u1e6der ur \u0263-\u01e7\u01e7in ara a nbecce\u1e5b leslak n Sidi \u1e5aebbi i le\u01e7nas nni\u1e0den ur nelli ara n wat Is\u1e5bail. S wakka i d-ye\u0263li l\u025biqab n Sidi \u1e5aebbi fell-asen.\n2:17 Ma d nukni ay atmaten seg wasmi i d-n\u1e5bu\u1e25 s \u0263u\u1e5b-wen, \u0263as akken ur kkun-\u1e93errent ara wallen, tellam deg wulawen-nne\u0263 ; nxaq fell-awen a\u1e6das, daymi i ne\u025b\u1e5be\u1e0d a d-nas iwakken a kkun-n\u1e93er.\n2:18 Ac\u1e25al n tikkal i neb\u0263a a nu\u0263al \u0263u\u1e5b-wen, nekk s yiman-iw, yiwet ne\u0263 snat n tikkal i \u025ber\u1e0de\u0263 a n-ru\u1e25e\u0263, me\u025bna Cci\u1e6dan ur a\u0263 ye\u01e7\u01e7i ara, iq\u1e0de\u025b-a\u0263 abrid.\n2:19 D kunwi i d sebba n usirem d lfe\u1e5b\u1e25-nne\u0263 \u0263er Sidi \u1e5aebbi, yis-wen ara nzuxx zdat Ssid-nne\u0263 \u0190isa asm'ara d-yu\u0263al.\n2:20 \u021a-\u021bide\u021b, d kunwi i d can nne\u0263 i d lfe\u1e5b\u1e25-nne\u0263.\n3:1 Imi ur nezmir ara a ne\u1e63be\u1e5b fell-awen nnig wannect-a, nufa-d yiwen \u1e5b\u1e5bay : nukni a neqqim di temdint n Atinya,\n3:2 ma d gma-tne\u0263 Timuti, aqeddac n Sidi \u1e5aebbi, i\u021bbecci\u1e5ben lexba\u1e5b n lxi\u1e5b n Lmasi\u1e25, a wen-t-in-ncegge\u025b a kkun isse\u01e7hed yerna a kkun-inhu di liman nwen,\n3:3 iwakken yiwen ur ife\u010d\u010del di teswi\u025bt-agi n uqehhe\u1e5b. Te\u1e93ram belli ayagi d ayen i \u0263-i\u021b\u1e5ba\u01e7un.\n3:4 Asmi nella yid-wen nenna-yawen yakan belli a d-yas wass i deg ara ne\u021bwaqehhe\u1e5b. Atan tura twalam belli d ayen ide\u1e5b\u1e5bun.\n3:5 Imi xaqe\u0263 fell-awen, ur zmire\u0263 ara ad \u1e63eb\u1e5be\u0263, cegg\u025be\u0263-awen gma tne\u0263 Timuti iwakken a yi-d-yawi lexba\u1e5b ma mazal te\u1e6d\u1e6dfem di liman nwen ; axa\u1e6der uggade\u0263 a kkun i\u0263u\u1e5b\u1e5b Cci\u1e6dan, a\u021b-\u021be\u021b\u021bum ayen akk i wen-nesselmed, uggade\u0263 lxedma nne\u0263 a\u021b-\u021bu\u0263al d ulac.\n3:6 Mi d-yu\u0263al Timuti s \u0263u\u1e5b-wen, yewwi-ya\u0263-d lexba\u1e5b yelhan fell-awen : i\u1e25ka-ya\u0263-d amek t\u1e0du\u025bem Sidi \u1e5aebbi, d le\u1e25mala yellan wway gar-awen ; yenna-ya\u0263-d da\u0263en amek i \u0263-d \u021bmektayem, ur a\u0263-te\u021b\u021bum ara, t\u1e25arem melmi ara \u0263-te\u1e93rem am akken i nxaq fell-awen ula d nukni.\n3:7 Ay atmaten, \u0263as akka nella di lme\u1e25na d i\u0263eblan, theddnen wulawen nne\u0263 \u0263ef wayen ye\u025bnan liman-nwen.\n3:8 Tura yu\u0263al-a\u0263-d \u1e5b\u1e5bu\u1e25 imi ne\u1e93ra te\u1e6d\u1e6dfem di Ssid-nne\u0263 \u0190isa Lmasi\u1e25.\n3:9 Lfe\u1e5b\u1e25-nne\u0263 d ameqqran zdat Sidi \u1e5aebbi \u0263ef ddemma-nwen. Akken neb\u0263u ne\u1e25med-it fell-awen drus.\n3:10 Ne\u021b\u1e25ellil Sidi \u1e5aebbi am i\u1e0d am ass, a \u0263-d-yefk tagni\u021b i deg ara kkun-n\u1e93er, iwakken a wen-nkemmel aselmed n wayen i kkun-ixu\u1e63\u1e63en di liman-nwen.\n3:11 Nessutur Sidi \u1e5aebbi baba-tne\u0263 d Ssid-nne\u0263 \u0190isa a \u0263-d-ldin iberdan iwakken a n-nas \u0263u\u1e5b-wen.\n3:12 Ad isnerni \u1e5aebbi le\u1e25mala i tes\u025bam wway gar-awen, a\u021b-\u021b\u1e25emmlem da\u0263en imdanen me\u1e5b\u1e5ba am akken i kkun n\u1e25emmel nukni.\n3:13 Ad isse\u01e7hed \u1e5aebbi ulawen nwen, iwakken a\u021b-\u021be\u1e63fum, a\u021b-\u021bilim mbla l\u025bib zdat Sidi \u1e5aebbi baba-tne\u0263 i wass i deg ara d-yu\u0263al Ssid-nne\u0263 \u0190isa Lmasi\u1e25 ne\u021b\u021ba d lmalayekkat.\n4:1 Ay atmaten, tlemdem s \u0263u\u1e5b-nne\u0263 amek ara teddum iwakken a\u021b-\u021b\u025be\u01e7bem i Sidi \u1e5aebbi ; a kkun nenhu s yisem n Sidna \u0190isa Lmasi\u1e25 kemmlet \u0263er zdat iwakken a\u021b \u021bim\u0263u\u1e5bem.\n4:2 Ay atmaten te\u1e93ram belli lew\u1e63ayat i wen-nesselmed, kkant-ed s \u0263u\u1e5b Sidna \u0190isa Lmasi\u1e25.\n4:3 D \u1e63\u1e63fa n wulawen-nwen i geb\u0263a Sidi \u1e5aebbi ; yeb\u0263a a\u021b-\u021b\u1e25adrem iman nwen si lefsad,\n4:4 yal yiwen deg-wen ur i\u021b\u021bak ara leb\u0263i i tnefsit-is deg wayen icemten ; ad iddu s \u1e63\u1e63fa d l\u1e25e\u1e5bma,\n4:5 ur i\u021bmenni ara ayen icemten am akken xeddmen imejhal ur nessin ara Sidi \u1e5aebbi.\n4:6 Deg wannect-agi ilaq yiwen ur i\u021bkellix gma-s di tlufa ye\u025bnan idrimen. Ac\u1e25al n tikkal i kkun-nwe\u1e63\u1e63a iwakken a\u021b-\u021b\u1e25adrem iman-nwen axa\u1e6der Sidi \u1e5aebbi ad yerr \u021b\u021bar akken i wen-t-id-nenna !\n4:7 Sidi \u1e5aebbi ur a\u0263-d-inni ara a neddu di lefsad me\u025bna iwe\u1e63\u1e63a-ya\u0263-d a neddu s \u1e63\u1e63fa.\n4:8 S wakka win ur neqbil ara lew\u1e63ayat-agi, ma\u010d\u010di d amdan i g\u025bu\u1e63a, me\u025bna i\u025bu\u1e63a Sidi \u1e5aebbi i wen-d-i\u021b\u021baken \u1e5a\u1e5bu\u1e25-is iqedsen.\n4:9 \u0194ef wayen ye\u025bnan tagma\u021b, fi\u1e25el ma nemmeslay-awen-d fell-as, imi temye\u1e25malem wway gar-awen akken i tlemdem s \u0263u\u1e5b Sidi \u1e5aebbi.\n4:10 Akken da\u0263en i t\u1e25emmlem atmaten yellan di tmurt n Masidunya me\u1e5b\u1e5ba. Di le\u025bnaya nwen ay atmaten, kemmlet deg webrid-agi.\n4:11 Nadit a\u021b-\u021b\u025bicem di talwit, ur \u021b\u025bassat ara d acu i xeddmen wiya\u1e0d. Xedmet s ifassen-nwen, ur \u1e6d\u1e6dama\u025bet ara a\u0263\u1e5bum-nwen deg wiya\u1e0d, akken i kkun-nwe\u1e63\u1e63a yakan\n4:12 iwakken a kkun-qad\u1e5ben medden \u0263ef ddemma n tikli nwen ye\u1e63fan, yerna ur te\u021b\u021bilim \u021b-\u021ba\u025bkumt ula i yiwen.\n4:13 Ay atmaten, ur neb\u0263i ara a kkun-ne\u01e7\u01e7 di ccekk \u0263ef wayen ye\u025bnan wid yemmuten, iwakken ur te\u021b\u021bilim ara di le\u1e25zen am wid ur nes\u025bi ara asirem n leslak n Sidna \u0190isa.\n4:14 Axa\u1e6der akken numen belli Sidna \u0190isa yemmut yu\u0263al ye\u1e25ya-d, numen da\u0263en belli Sidi \u1e5aebbi a d-isse\u1e25yu wid yemmuten, imi umnen s Sidna \u0190isa.\n4:15 Atah wayen ara wen-d-nini akken i t-id-isselmed Ssid-nne\u0263 : ma yella mazal-a\u0263 nedder asm'ara d-yu\u0263al, ur ne\u021b\u021bili ara d imezwura \u0263ef wid yemmuten.\n4:16 Axa\u1e6der m'ara d-iffe\u0263 lame\u1e5b, m'ara d-ten\u1e6deq ta\u0263ect n lmelk akk-d \u1e63\u1e63ut n lbuq n Sidi \u1e5aebbi, Sidna \u0190isa s yiman-is a d-i\u1e63ubb seg igenni, imiren widak-nni yemmuten, llan umnen yis, a d-\u1e25yun d imezwura si ger lmegtin.\n4:17 Ma d nukni ma yella mazal-a\u0263 nedder, a ne\u021bwarfed yid-sen \u0263ef wusigna, a nemmager Sidna \u0190isa deg igenwan, iwakken a nili yid-es i dayem.\n4:18 Ihi mse\u01e7hadet, m\u1e63ebba\u1e5bet wway gar-awen s yimeslayen-agi.\n5:1 \u0194ef wayen ye\u025bnan ussan akk d lweqt, fi\u1e25el ma nura-yawen fell-asen.\n5:2 Te\u1e93ram s yiman-nwen belli ass-nni, Sidna \u0190isa a d-yu\u0263al am umakar deg i\u1e0d.\n5:3 M'ara yinin yemdanen : \u00ab aql-a\u0263 di lehna \u021b-\u021balwit, \u00bb ass-nni ur \u021bfiqen ara alamma ye\u0263li-d fell-asen nnger, am lewja\u025b m'ara \u1e6d\u1e6dfen tame\u1e6d\u1e6dut yellan s tadist, yernu yiwen ur imenne\u025b.\n5:4 Ma d kunwi ay atmaten, ur tellim ara di \u1e6d\u1e6dlam iwakken a d-i\u0263li wass-nni fell-awen am umakar ;\n5:5 axa\u1e6der kunwi d arraw n tafat, te\u021b\u021beddum deg wass ; nukni ur nelli ara d arraw n \u1e6d\u1e6dlam iteddun deg yi\u1e0d.\n5:6 Ihi ur ilaq ara a ne\u0263fel am wiya\u1e0d, me\u025bna ilaq a n\u025bass iman-nne\u0263 yerna a n\u025biwez.\n5:7 Wid yegganen gganen deg yi\u1e0d, wid i\u1e63ekkren \u021b\u1e63ekkiren deg yi\u1e0d.\n5:8 Ma d nukni yellan d arraw n tafat, a n\u025bass \u0263ef yiman-nne\u0263 : a nes\u025bu liman d le\u1e25mala am llebsa n wuzzal i\u021blusu u\u025besk\u1e5bi, a nes\u025bu asirem n leslak, am tcacit n wuzzal \u0263ef wuqe\u1e5b\u1e5buy.\n5:9 Axa\u1e6der Sidi \u1e5aebbi ur a\u0263-ixta\u1e5b ara iwakken a ne\u021bwa\u025baqeb, me\u025bna yeb\u0263a a nes\u025bu leslak s Ssid-nne\u0263 \u0190isa Lmasi\u1e25\n5:10 i gemmuten fell-a\u0263, iwakken ama nedder ama nemmut a nili yid-es.\n5:11 S wakka ihi, \u021bemse\u01e7hadet, \u021bem\u1e63ebba\u1e5bet wway gar-awen akken i txeddmem yakan.\n5:12 Di le\u025bnaya-nwen ay atmaten, qad\u1e5bet wid iqeddcen gar-awen, axa\u1e6der s yisem n Sidna \u0190isa Lmasi\u1e25 i kkun nehhun, i kkun-sselmaden.\n5:13 \u0190uzzet \u021ben t\u1e25emmlem-ten \u0263ef ddemma n lxedma-nsen, \u025bicet di lehna wway gar-awen.\n5:14 Di le\u025bnaya-nwen ay atmaten : nhut wid iteddun s yir tikli, \u1e63ebb\u1e5bet wid iwumi \u0263lin ifadden, refdet wid ifeclen, swes\u025bet ulawen-nwen \u0263u\u1e5b-sen me\u1e5b\u1e5ba.\n5:15 \u1e24adret iman-nwen ur \u021b\u021barat ara \u021b\u021ba\u1e5b, qellbet \u0263ef wayen yelhan ama gar-awen ama \u0263er imdanen me\u1e5b\u1e5ba.\n5:16 Ilit dayem di lfe\u1e5b\u1e25,\n5:17 yal ass de\u025b\u025but \u0263er Sidi \u1e5aebbi,\n5:18 \u1e25emmdet-e\u021b \u0263ef kullec. D ayagi i ge\u021b\u1e5ba\u01e7u Sidi \u1e5aebbi deg-wen, di tikli-nwen akk-d \u0190isa Lmasi\u1e25.\n5:19 Ur snusut ara tafat n \u1e5a\u1e5bu\u1e25 iqedsen ;\n5:20 ur \u1e25eqq\u1e5bet ara ayen i d-i\u021bwe\u1e25\u1e25i \u1e5a\u1e5bu\u1e25 iqedsen i yemdanen.\n5:21 Me\u025bna meyzet, qeblet ayen yelhan,\n5:22 \u1e25adret iman-nwen \u0263ef wayen n diri.\n5:23 Sidi \u1e5aebbi bab n talwit, ad i\u1e63effi \u1e5b\u1e5bu\u1e25-nwen, l\u01e7e\u021b\u021bat nwen \u021b-\u021be\u1e5bwi\u1e25in-nwen, iwakken a\u021b \u021beqqimem d izedganen i wass i deg ara d-yu\u0263al Ssid-nne\u0263 \u0190isa Lmasi\u1e25.\n5:24 Win i kkun-ixta\u1e5ben, deg-s laman, d ne\u021b\u021ba ara kkun-i\u1e63\u1e63iwden \u0263er wannect agi.\n5:25 Ay atmaten, de\u025b\u025but \u0263er Sidi \u1e5aebbi fell-ane\u0263.\n5:26 S\u1e63iw\u1e0det sslam-iw i watmaten me\u1e5b\u1e5ba.\n5:27 Di le\u025bnaya-nwen, s yisem n Ssid-nne\u0263, sse\u0263\u1e5bet tab\u1e5ba\u021b-agi i watmaten me\u1e5b\u1e5ba.\n5:28 \u1e5a\u1e5be\u1e25ma n Ssid-nne\u0263 a d-ters fell-awen.","title":"Kabyle Bible (NT): 1 Thessalonians","type":"page"}