{"collection":"Bible & Christianity","html_url":"https://unchartedknowledge.5gfusion.net/browse/bib/wb/kab/th2.htm","path":"bib/wb/kab/th2.htm","source_url":"https://sacred-texts.com/bib/wb/kab/th2.htm","text":"1:1 Nekk Bulus, Silwan akk-d Timuti, i tejma\u025bt n watmaten n temdint n Ti\u1e63alunik yumnen s Sidi \u1e5aebbi d Ssid-nne\u0263 \u0190isa Lmasi\u1e25.\n1:2 \u1e5a\u1e5be\u1e25ma \u021b-\u021balwit a wen-d \u021b\u021bunefkent s \u0263u\u1e5b Sidi \u1e5aebbi.\n1:3 Ay atmaten e\u025bzizen, imi liman-nwen simmal ye\u021bnerni, simmal te\u021b\u021bemye\u1e25malem wway gar-awen, e\u025bni ma\u010d\u010di d l\u1e25eqq ma ne\u021b\u1e25emmid Sidi \u1e5aebbi fell-awen am i\u1e0d am ass ?\n1:4 Newwe\u1e0d armi ne\u021bzuxxu yis-wen di yal tajma\u025bt n watmaten, ne\u021b\u021bawi-kkun d lemtel axa\u1e6der \u0263as akken tenne\u025btabem te\u021bwaqeh\u1e5bem, t\u1e63ebrem, te\u1e6d\u1e6dfem di liman-nwen.\n1:5 Sidi \u1e5aebbi d bab n l\u1e25eqq, ma yella i\u025bemmed a\u021b-\u021benne\u025btabem akkagi, yeb\u0263a a kkun-yerr d wid yuklalen tagelda-ines ; \u021b-\u021bagelda-agi i \u0263ef tenne\u025btabem.\n1:6 Axa\u1e6der Sidi \u1e5aebbi yellan d Bab n l\u1e25eqq, a d-yerr leqhe\u1e5b \u0263ef wid i kkun-i\u021bqehhi\u1e5ben,\n1:7 a kkun-i\u1e63ebber yid-nne\u0263, kunwi ye\u021bwaqeh\u1e5ben. Ayagi a d-id\u1e5bu asm'ara d-yu\u0263al Ssid-nne\u0263 \u0190isa Lmasi\u1e25, m'ara d-i\u1e63ubb seg igenwan ne\u021b\u021ba d lmalayekkat-is\n1:8 di tlemmast n u\u1e25e\u01e7\u01e7a\u01e7u n tmes iwakken ad i\u025baqeb wid i\u025bu\u1e63an Sidi \u1e5aebbi, ur neqbil ara lexba\u1e5b n lxi\u1e5b n Sidna \u0190isa.\n1:9 L\u025biqab ara ten-id-yasen, \u021b-\u021bawa\u0263it ur ne\u021bfaka, Sidi \u1e5aebbi a ten-i\u1e25e\u1e5b\u1e5bem \u0263ef udem-is, ur \u021bwalin ara l\u025ba\u1e0dima-s.\n1:10 Ayagi a d-id\u1e5bu asm'ara d-yas Sidna \u0190isa ; ass-nni wid yumnen yis ad t\u025be\u01e7\u01e7ben deg-s, a t-\u1e25emden m'ara t-walin di l\u025ba\u1e0dima-s ! Ula d kunwi a\u021b-\u021bilim gar-asen axa\u1e6der tumnem s lexba\u1e5b n lxi\u1e5b i wen-nbecce\u1e5b.\n1:11 ?ef ayagi i nde\u025b\u025bu \u0263er Sidi \u1e5aebbi fell-awen am i\u1e0d am ass, iwakken a kkun-yerr d wid yuklalen tudert i \u0263er wen-d-issawel. Nessutur-as da\u0263en a wen-d-ifk tazmert, iwakken a\u021b-\u021bxedmem ayen akken tessaramem n wayen yelhan, yerna ad ibarek lec\u0263al txeddmem deg webrid n Sidna \u0190isa.\n1:12 S wakka imdanen ad \u1e25emden isem-is \u0263ef ddemma n tikli-nwen yelhan, kunwi da\u0263en a\u021b-\u021bwa\u025buzzem s \u1e5b\u1e5be\u1e25ma n Sidi \u1e5aebbi akk-d \u1e5b\u1e5be\u1e25ma n Ssid-nne\u0263 \u0190isa Lmasi\u1e25.\n2:1 ?ef wayen ye\u025bnan tu\u0263alin n Ssid nne\u0263 \u0190isa Lmasi\u1e25 \u021b-\u021bemlilit-nne\u0263 yid-es, di le\u025bnaya-nwen ay atmaten :\n2:2 \u1e25adret a kkun-iffe\u0263 le\u025bqel ne\u0263 a wen-ikcem ukukru, ma yella win i wen-d-yennan belli ass n tu\u0263alin n Sidna \u0190isa yewwe\u1e0d-ed ; yezmer l\u1e25al ad yili win i wen-t-id-yennan ne\u0263 win i t-iwalan deg uwe\u1e25\u1e25i, ne\u0263 da\u0263en a wen-arun tab\u1e5ba\u021b am akken d nukni i wen-\u021bin-yuran.\n2:3 Akken yeb\u0263u yili l\u1e25al ur \u021b\u021ba\u01e7at yiwen a kkun-ikellex, axa\u1e6der ass-nni ur d-i\u021bawe\u1e0d ara uqbel ussan n tijehli, uqbel a d-iban wemcum ijehlen i ge\u021b\u1e5ba\u01e7u nnger.\n2:4 Win akken ara yessim\u0263u\u1e5ben iman is sennig wayen me\u1e5b\u1e5ba i\u025bebbden yemdanen, ad yekcem \u0263er l\u01e7ame\u025b iqedsen n \u1e5aebbi ad yerr iman-is deg wemkan n \u1e5aebbi. f+\n2:5 Ur tecfim ara belli xebb\u1e5be\u0263 kkun id yakan \u0263ef ayagi asm'akken lli\u0263 yid-wen ?\n2:6 Te\u1e93ram acu i t-i\u1e6d\u1e6dfen ur d-i\u021bban ara tura alamma yewwe\u1e0d-ed lweqt-is !\n2:7 Tazmert n cce\u1e5b yellan d lba\u1e0dna, tebda cc\u0263el-is, ilaq kan ayen i \u021b-i\u1e6d\u1e6dfen ar tura ad i\u021bwakkes.\n2:8 Imiren amcum-nni amejhul a d- ban, d\u0263a Sidna \u0190isa a t-i\u1e63u\u1e0d s nnefs-is a t-issenger, a t-im\u1e25u s ufe\u01e7\u01e7e\u01e7 n l\u025ba\u1e0dima-s asm'ara d-yu\u0263al.\n2:9 Amcum-agi amejhul a d-yas s tezmert n Cci\u1e6dan, ad ixdem le\u025b\u01e7ubat d lbe\u1e5bhanat s wayes ara ikellex,\n2:10 ad issexdem lekdeb d lba\u1e6del iwakken ad ikellex wid i\u1e0da\u025ben, axa\u1e6der ur qbilen ara le\u1e25mala n tide\u021b s wayes ara \u021bwaselken.\n2:11 Daymi Sidi \u1e5aebbi icegge\u025b-asen-d tazmert n \u1e6d\u1e6dlam a\u021b-\u021bexdem deg-sen, iwakken ad amnen s wayen yellan d lekdeb.\n2:12 S wakka wid akk ur numin ara s tide\u021b, ad \u021b\u021bu\u025baqben imi \u021b\u021bafen lfe\u1e5b\u1e25-nsen anagar di lba\u1e6del.\n2:13 Ay atmaten \u025bzizen \u0263er \u1e5aebbi, ilaq-a\u0263 a ne\u021b\u1e25emmid kull ass Sidi \u1e5aebbi fell-awen, axa\u1e6der ixta\u1e5b-ikkun d imezwura iwakken a\u021b-\u021be\u021b\u021busellkem s \u1e5a\u1e5bu\u1e25 iqedsen i kkun-i\u1e63effan s liman di tide\u021b.\n2:14 Sidi \u1e5aebbi issawel-awen-d a\u021b \u021bekkim di tmanegt n Ssid-nne\u0263 \u0190isa Lmasi\u1e25, s lexba\u1e5b-agi n lxi\u1e5b i wen-d newwi.\n2:15 Ihi ay atmaten \u1e25erzet, \u1e6d\u1e6dfet deg uselmed i wen-d-newwi, ama s yimi nne\u0263 ama s teb\u1e5batin-nne\u0263.\n2:16 Nessutur di Ssid-nne\u0263 \u0190isa Lmasi\u1e25 akk-d baba-tne\u0263 \u1e5aebbi i \u0263-i\u1e25emmlen, i \u0263-d-ifkan s \u1e5b\u1e5be\u1e25ma ines \u1e63\u1e63be\u1e5b d usirem i\u021bdumun,\n2:17 ad \u021b\u021bu\u1e63ebb\u1e5ben wulawen-nwen, a wen-d-te\u021b\u021bunefk tezmert s wayes ara txeddmem anagar ayen yelhan ama di lec\u0263al-nwen ama deg imeslayen-nwen.\n3:1 ?ef wayen nni\u1e0den ay atmaten, d\u025but Sidi \u1e5aebbi fell-ane\u0263 iwakken awal-is ad i\u021b\u021bubecce\u1e5b, ad yawe\u1e0d \u0263er yal amkan, ad i\u021bwa\u025buzz am akken i t-t\u025buzzem kunwi.\n3:2 D\u025but da\u0263en iwakken a \u0263-isellek si ger ifassen n yemcumen i \u0263-ib\u0263an cce\u1e5b, axa\u1e6der llan wid ur ne\u021b\u021bamen ara.\n3:3 Lame\u025bna Sidi \u1e5aebbi d bab n le\u021bkal, a kkun-isse\u01e7hed, a kkun i\u1e25ader \u0263ef wemcum.\n3:4 Nes\u025ba laman \u0263u\u1e5b-es fell-awen belli txeddmem yerna a\u021b-\u021bkemlem a\u021b-\u021bxedmem ayen i \u0263ef i kkun-nwe\u1e63\u1e63a.\n3:5 Nde\u025b\u025bu \u0263er Sidi \u1e5aebbi iwakken ad i\u010d\u010da\u1e5b ulawen-nwen s le\u1e25mala-ines, iwakken a\u021b-\u021bes\u025bum \u1e63\u1e63be\u1e5b n Lmasi\u1e25. f+\n3:6 Ay atmaten a kkun-nenhu s yisem n Sidna \u0190isa Lmasi\u1e25 : sbe\u025bdet iman-nwen \u0263ef atmaten ime\u025bdazen, i\u021b\u025bicin akken b\u0263an, ma\u010d\u010di am akken i wen-t-nesselmed.\n3:7 Te\u1e93ram s yiman nwen amek i glaq a \u0263-t\u025bandem, axa\u1e6der nukni ur n\u025bac ara deg ussex\u1e5beb asmi nella yid-wen.\n3:8 Ur ne\u1e0dmi\u025b ula deg yiwen a\u0263\u1e5bum-nne\u0263, lame\u025bna ne\u021b\u025be\u021b\u021bib iman-nne\u0263 di lxedma i\u1e0d d wass, iwakken ur ne\u021b\u021bili \u021b-\u021ba\u025bekkumt ula i yiwen.\n3:9 Yerna lemmer nessuter-awen a \u0263-t\u025biwnem, d l\u1e25eqq fell-a\u0263 ; me\u025bna nexdem akkenni iwakken a wen-nili d lemtel.\n3:10 Asmi nella gar-awen nwe\u1e63\u1e63a kkun belli \u00ab win ur neb\u0263i ara ad ixdem ur ilaq ara ad ye\u010d\u010d. \u00bb\n3:11 Axa\u1e6der nesla belli llan gar-awen ime\u025bdazen ur neb\u0263i ara ad xedmen me\u025bna ggaren iman-nsen di lec\u0263al i ten-ix\u1e0dan.\n3:12 Imdanen-agi a ten-nwe\u1e63\u1e63i s yisem n Ssid-nne\u0263 \u0190isa Lmasi\u1e25 : ad xedmen akken ilaq iwakken a d-\u1e25e\u1e5b\u1e5ben a\u0263\u1e5bum nsen.\n3:13 Ma d kunwi ay atmaten xedmet lxi\u1e5b, ur \u025beggut ara !\n3:14 Win ur neqbil ara ayen i d-nenna di teb\u1e5ba\u021b-agi, jebdet iman-nwen fell-as, ur \u021beddut ara yid-es iwakken ad inne\u1e25cam, ad isset\u1e25i.\n3:15 Ur t-\u1e25e\u021b\u021bbet ara d a\u025bdaw, me\u025bna nhut-e\u021b am yiwen seg watmaten-nwen.\n3:16 Nessutur di Sidi \u1e5aebbi bab n talwit a wen-d-yefk lehna kull ass, di yal tagni\u021b ! Sidi \u1e5aebbi ad yili yid-wen me\u1e5b\u1e5ba !\n3:17 Nekk Bulus, uri\u0263-awen sslam-agi s ufus-iw, \u021b-\u021bagi i \u021b-\u021bira-inu di yal tab\u1e5ba\u021b i wen-cegg\u025be\u0263.\n3:18 \u1e5a\u1e5be\u1e25ma n Ssid-nne\u0263 \u0190isa Lmasi\u1e25 a d-ters fell-awen me\u1e5b\u1e5ba !","title":"Kabyle Bible (NT): 2 Thessalonians","type":"page"}