{"collection":"Bible & Christianity","html_url":"https://unchartedknowledge.5gfusion.net/browse/bib/wb/kab/ti1.htm","path":"bib/wb/kab/ti1.htm","source_url":"https://sacred-texts.com/bib/wb/kab/ti1.htm","text":"1:1 Nekk Bulus amcegge\u025b n \u0190isa Lmasi\u1e25, s leb\u0263i n Sidi \u1e5aebbi amsellek-nne\u0263 akk-d leb\u0263i n \u0190isa Lmasi\u1e25 i deg yella usirem-nne\u0263,\n1:2 i gma-tne\u0263 Timuti f+ i d-\u1e5bebba\u0263 di liman am mmi n tide\u021b, lba\u1e5baka, \u1e5b\u1e5be\u1e25ma \u021b-\u021balwit a k-d-\u021b\u021bunefkent s \u0263u\u1e5b Sidi \u1e5aebbi Baba-tne\u0263 akk-d \u0190isa Lmasi\u1e25 Ssid-nne\u0263.\n1:3 Akken i k-nhi\u0263 uqbel ad \u1e5bu\u1e25e\u0263 \u0263er tmurt n Masidunya qqim di temdint n Ifasus f+ iwakken ur te\u021b\u021ba\u01e7\u01e7a\u1e0d ara kra n yemdanen ad slemden ayen i gxulfen tikli di liman,\n1:4 ini-asen ad x\u1e0dun i tmucuha f+ d umeslay n zzux \u0263ef yizu\u1e5ban n tjaddit ur ne\u021bfaka, ayagi ye\u021b\u021bawi-d lehdu\u1e5b ur nes\u025bi lfayda i \u0263-isseb\u025baden \u0263ef liman d leb\u0263i n Sidi \u1e5aebbi.\n1:5 A sen-tini\u1e0d annect-agi iwakken a d-tessaki\u1e0d deg wulawen-nsen le\u1e25mala ye\u1e63fan, ad ithedden lxa\u1e6der-nsen yerna ad s\u025bun liman n tide\u021b \u0263er Sidi \u1e5aebbi.\n1:6 Llan kra n yemdanen ff\u0263en i webrid, \u021bmeslayen kan \u0263ef wayen ur nes\u025bi lme\u025bna.\n1:7 B\u0263an ad slemden i wiya\u1e0d ccari\u025ba n Sidi \u1e5aebbi, nutni s yiman-nsen ur fhimen d acu i d qqa\u1e5ben ur fhimen ayen i sselmaden.\n1:8 Ne\u1e93ra belli ccari\u025ba n Sidi \u1e5aebbi d ayen yelhan ma yella netbe\u025b-i\u021b akken ilaq,\n1:9 me\u025bna ilaq da\u0263en a n\u1e93er belli ccari\u025ba n Sidi \u1e5aebbi ur d-te\u021b\u021bunefk ara \u0263ef ddemma n i\u1e25eqqiyen me\u025bna te\u021b\u021bunefk-ed \u0263ef ddemma n yemcumen, i wid i\u025bu\u1e63an \u1e5aebbi, i imejhal, i imednuben akk-d wid ur ne\u021b\u021bak ara lqima i wayen iqedsen, wid ur ne\u021bqada\u1e5b ara \u1e5aebbi, wid ineqqen imawlan-nsen akk-d iqettalen,\n1:10 i wid yeff\u0263en i webrid, i wat l\u025ba\u1e5b, i wid itja\u1e5ben deg waklan akk-d i ikeddaben, i wid ur ne\u021b\u021ba\u1e6d\u1e6daf ara deg wawal-nsen ne\u0263 wid ye\u021bxalafen aselmed n tide\u021b i wen-d ye\u021b\u021bunefken.\n1:11 Akka i gella di lexba\u1e5b n lxi\u1e5b i yi-d-i\u021b\u021bunefken, i d-isbegginen tamanegt n Sidi \u1e5aebbi ame\u0263lal.\n1:12 Ad \u1e25emde\u0263 \u0190isa Lmasi\u1e25 Ssid-nne\u0263 i yi-is\u01e7ehden, i yi-fkan laman iwakken ad ili\u0263 d aqeddac-is, yexta\u1e5b-iyi-d ad ili\u0263 d aqeddac-is\n1:13 \u0263as akken zik regme\u0263-t yerna qeh\u1e5be\u0263 wid yumnen yis. Me\u025bna i\u025bfa-yi axa\u1e6der imiren ur \u1e93ri\u0263 ara d acu xeddme\u0263 imi mazal ur s\u025bi\u0263 ara liman deg ul-iw.\n1:14 Tura \u1e5b\u1e5be\u1e25ma-s tameqqrant ters-ed fell-i s liman d le\u1e25mala yellan deg-s.\n1:15 Awal-agi d awal n tide\u021b yuklalen ad i\u021bwaqbel s lekmal-is : \u00ab \u0190isa Lmasi\u1e25 yusa-d \u0263er ddunit iwakken ad isellek imednuben \u00bb.\n1:16 I\u1e25unn-ed fell-i nekk yellan d amednub ameqqran iwakken a d-isbeggen \u1e5b\u1e5be\u1e25ma-s yerna ad ili\u0263 d lemtel sya \u0263er zdat i wid ara yamnen yis ad s\u025bun tudert n dayem.\n1:17 I ugellid n dayem, ame\u0263lal ur \u021bwalint wallen, win yellan d yiwen, i ne\u021b\u021ba tamanegt d l\u025bezz si l\u01e7il \u0263er l\u01e7il ! Amin !\n1:18 A Timuti a mmi, a k-we\u1e63\u1e63i\u0263 \u0263ef wayen i d-caren fell-ak s \u0263u\u1e5b \u1e5aebbi si zik. E\u1e6d\u1e6def deg imeslayen-nni, sse\u01e7hed iman-ik di liman s wul ye\u1e63fan teddu\u1e0d akken ilaq,\n1:19 axa\u1e6der kra n yemdanen nni\u1e0den wexx\u1e5ben i tikli ye\u1e63fan armi i s\u1e5bu\u1e25en liman-nsen.\n1:20 Llan gar-asen ?imni d Alixandru f+ sellme\u0263-ten i Cci\u1e6dan iwakken ad \u1e93ren amek i tde\u1e5b\u1e5bu d wid ireggmen Sidi \u1e5aebbi.\n2:1 Ayen i \u0263ef ara kkun-we\u1e63\u1e63i\u0263 di tazwara, \u1e25emmdet cekk\u1e5bet Sidi \u1e5aebbi, ssuturet di t\u1e93allit, de\u025b\u025but \u0263u\u1e5b-es \u0263ef yemdanen me\u1e5b\u1e5ba.\n2:2 De\u025b\u025but \u0263ef yigelliden d wid akk ye\u1e6d\u1e6dfen imukan n l\u1e25ekma iwakken a n\u025bic di lisser \u021b-\u021balwit, a n\u1e0du\u025b Sidi \u1e5aebbi s l\u1e25e\u1e5bma d leqde\u1e5b.\n2:3 Ayagi d ayen yelhan, d ayen i\u025be\u01e7ben i Sidi \u1e5aebbi amsellek-nne\u0263,\n2:4 axa\u1e6der yeb\u0263a imdanen me\u1e5b\u1e5ba ad issinen tide\u021b yerna ad \u021b\u021buselken.\n2:5 Yiwen n \u1e5aebbi i gellan, yiwen umcafe\u025b da\u0263en i gellan ger yemdanen d \u1e5aebbi ; amcafe\u025b-agi, d \u0190isa Lmasi\u1e25\n2:6 i gefkan iman-is d asfel i leslak n yemdanen me\u1e5b\u1e5ba. D wagi i d \u021b\u021bbut i d-yefka Sidi \u1e5aebbi di lweqt-is ;\n2:7 daymi i d-\u021b\u021bucegg\u025be\u0263 iwakken ad becc\u1e5be\u0263, ad slemde\u0263 i le\u01e7nas ibe\u1e5b\u1e5baniyen ayen ye\u025bnan liman \u021b-\u021bide\u021b. Ayen akka i d-qqa\u1e5be\u0263 \u021b-\u021bide\u021b ma\u010d\u010di d lekdeb.\n2:8 B\u0263i\u0263 ihi ad ilin di mkul amkan yergazen ireffden ifassen \u0263er \u1e5aebbi s wul ye\u1e63fan, mbla l\u0263ecc d yir axemmem.\n2:9 Akken da\u0263en i glaq ad xedment tilawin, ad ilint s llebsa isse\u1e6dren, ad s\u025bunt l\u1e25e\u1e5bma d neyya, ur \u021bzewwiqent acebbub-nsent, ur \u021bcebbi\u1e25ent iman-nsent s ddheb, s t\u025beqcin akk-d llebsa ifazen,\n2:10 me\u025bna ad cebb\u1e25ent iman-nsent s lec\u0263al yelhan, akken ilaq ad xedment tilawin ye\u021b\u1e0du\u025bun Sidi \u1e5aebbi.\n2:11 Ilaq-as i tme\u1e6d\u1e6dut a\u021b-\u021b\u1e25esses i uselmed s tsusmi d wannuz.\n2:12 Ur qebble\u0263 ara a\u021b-\u021besselmed tme\u1e6d\u1e6dut ne\u0263 a\u021b-\u021bdebbe\u1e5b \u0263ef wergaz me\u025bna a\u021b-\u021be\u021bsusum ( ur d-teggar ara iman-is ).\n2:13 Axa\u1e6der d Adem i d-ye\u021bwaxelqen d amezwaru d wamek i d-terna ?ewwa ; f+\n2:14 ma\u010d\u010di d Adem i ge\u0263wa Cci\u1e6dan me\u025bna d ?ewwa i wumi ikellex f+ armi i t\u025bu\u1e63\u1e63a Sidi \u1e5aebbi,\n2:15 lame\u025bna a\u021b-\u021be\u021b\u021busellek s tarwa-s f+ ma te\u021b\u021beddu s \u1e63\u1e63fa d neyya di liman d le\u1e25mala.\n3:1 ?-\u021bide\u021b mi qqa\u1e5ben : \u00ab ma yella win yeb\u0263an ad yu\u0263al d amdebbe\u1e5b di tejma\u025bt d ayen yelhan i ge\u021bmenni \u00bb.\n3:2 Lame\u025bna amdebbe\u1e5b di tejma\u025bt ur ilaq ara ad afen deg-s l\u0263aci wayen ara s-d-ssukksen, ilaq ad yes\u025bu yiwet n tme\u1e6d\u1e6dut kan, ad yili d win i\u1e25ekkmen deg iman-is, d a\u025beqli, d win iteddun s \u1e63\u1e63wab. Ilaq ad yili d win yes\u1e6der\u1e25iben deg wexxam-is, d win izemren ad isselmed awal n \u1e5aebbi ;\n3:3 ur ye\u021b\u021bili ara d asek\u1e5ban ne\u0263 d am\u010daqlal me\u025bna ad yili d a\u1e25nin d imhenni. Ur ilaq ara ad i\u1e25emmel idrimen ;\n3:4 ilaq da\u0263en ad yissin amek ara idebbe\u1e5b \u0263ef wexxam-is, arraw-is ad ilin d wid ye\u021b\u021ba\u0263en awal yerna a t-\u021bqada\u1e5ben.\n3:5 Axa\u1e6der ma yella waleb\u025ba\u1e0d ur yezmir ara ad idebbe\u1e5b \u0263ef wexxam is, amek ara idebbe\u1e5b di tejma\u025bt n Sidi \u1e5aebbi ?\n3:6 Amdebbe\u1e5b di tejma\u025bt ur ilaq ara ad yili d ajdid di liman di \u0190isa Lmasi\u1e25, m'ulac a t-yekcem zzux, a\u021b-\u021bed\u1e5bu yid-es akken ted\u1e5ba d Cci\u1e6dan. f+\n3:7 Ilaq ula d wid ur numin ara s \u0190isa Lmasi\u1e25 a d-cehden fell-as s lxi\u1e5b ur \u021b\u021bafen ara deg-s wayen ara s-d ssukksen, iwakken ur i\u0263elli ara di tec\u1e5bektin n Cci\u1e6dan.\n3:8 Iqeddacen n tejma\u025bt da\u0263en ilaq ad s\u025bun leqde\u1e5b, ad ilin d irgazen ite\u1e6d\u1e6dfen deg awal-nsen, ad x\u1e0dun i tissit n cc\u1e5bab akk-d rrbe\u1e25 n lexde\u025b.\n3:9 Ilaq ad \u1e25erzen s wul ye\u1e63fan lba\u1e0dna n liman i d-ye\u021bwakecfen.\n3:10 Ilaq ula d nutni ad \u021bwaje\u1e5bben di leqdic-nsen, m'ur ufin ara ayen ara sen-d-ssukksen imiren zemren ad qedcen di tejma\u025bt.\n3:11 Ula \u021b-\u021biqeddacin n tejma\u025bt ilaq ad s\u025bunt l\u1e25e\u1e5bma, ur \u021bmeslayent ara cce\u1e5b \u0263ef wiya\u1e0d, ad ilint \u021b-\u021bi\u025beqliyin, \u021b-\u021bid i \u0263ef yella le\u021bkal \u0263ef kullec.\n3:12 Iqeddacen n tejma\u025bt ilaq ad s\u025bun yiwet n tme\u1e6d\u1e6dut kan yerna ad \u1e0debb\u1e5ben \u0263ef yexxamen-nsen d warraw-nsen akken ilaq.\n3:13 Axa\u1e6der wid iqeddcen \u0263ef tejma\u025bt akken ilaq, ad yali leqde\u1e5b-nsen ad nnernin di liman yerna ad s\u025bun le\u021bkal d ameqqran di \u0190isa Lmasi\u1e25.\n3:14 Uri\u0263-ak-n me\u1e5b\u1e5ba annect-agi \u0263as akken ssarame\u0263 a n-ase\u0263 \u0263u\u1e5b-ek,\n3:15 iwakken ma \u025be\u1e6d\u1e6dle\u0263 ur n-usi\u0263 ara a\u021b-\u021bissine\u1e0d amek i glaq a\u021b-\u021beddu\u1e0d deg wexxam n Sidi \u1e5aebbi i gellan \u021b-\u021bajma\u025bt n \u1e5aebbi yeddren. Tajma\u025bt-agi, \u021b-\u021bigejdit i \u0263ef ters tide\u021b.\n3:16 S tide\u021b ac\u1e25al meqq\u1e5bet lba\u1e0dna n Lmasi\u1e25 yellan d sebba n liman-nne\u0263 : win akken i d-yusan s \u1e63\u1e63ifa n wemdan, i \u0263ef d-icehhed \u1e5a\u1e5bu\u1e25 iqedsen, t\u025be\u01e7\u01e7bent deg-s lmalayekkat, ye\u021bwabecce\u1e5b i le\u01e7nas, umnen yis di ddunit me\u1e5b\u1e5ba, ye\u021bwarfed s tmanegt tameqqrant \u0263er igenwan.\n4:1 \u1e5a\u1e5bu\u1e25 iqedsen ixebbe\u1e5b-ed \u025binani belli deg ussan ineggura, a\u1e6das ara iwexx\u1e5ben \u0263ef liman di Lmasi\u1e25, ad teb\u025ben wid i ten-i\u021b\u0263u\u1e5b\u1e5bun s uselmed i d-ye\u021b\u021basen s \u0263u\u1e5b le\u01e7nun.\n4:2 A ten-\u0263u\u1e5b\u1e5ben wat sin wudmawen ye\u021bbecci\u1e5ben lekdeb, wid iwumi yemmut wul am akken ye\u021bwaqqed s useffud.\n4:3 Imdanen-agi b\u0263an ad \u1e25e\u1e5b\u1e5bmen zzwa\u01e7 akk-d kra n le\u1e63naf n lmakla, lame\u025bna Sidi \u1e5aebbi ixleq-ed kullec iwakken wid yumnen yis yessnen tide\u021b, a t-\u1e25emden a t-cekk\u1e5ben.\n4:4 Ayen akk i d-ixleq Sidi \u1e5aebbi yelha, ur ilaq ara a nerr kra di rrif, acu kan ilaq a t-ncekke\u1e5b \u0263ef wayen i \u0263-d-i\u021b\u021bak,\n4:5 axa\u1e6der ayen akk i d ye\u021bwaxelqen i\u1e63effu-t wawal n \u1e5aebbi akk-d \u021b\u1e93allit.\n4:6 Ssefhem-asen ayagi i watmaten iwakken a\u021b-\u021bili\u1e0d d aqeddac yelhan n \u0190isa Lmasi\u1e25, sse\u01e7hed iman-ik di liman s wawal n Sidi \u1e5aebbi d uselmed n tide\u021b i tteb\u025be\u1e0d s wul ye\u1e63fan.\n4:7 Ma \u021b-\u021bimucuha n tem\u0263a\u1e5bin ur nes\u025bi ara lme\u025bna i gxulfen liman, \u1e0degge\u1e5b-itent akkin fell-ak. Issin amek ara tel\u1e25u\u1e0d deg ubrid n Sidi \u1e5aebbi .\n4:8 Tazzla deg wannar d ayen yelhan me\u025bna tenfe\u025b i l\u01e7e\u021b\u021ba kan, ma \u1e6d\u1e6da\u025ba n Sidi \u1e5aebbi tenfe\u025b i kullec axa\u1e6der deg-s i tella tudert n tura akk-d \u021b-\u021bin i d-iteddun i \u0263-iw\u025bed Sidi \u1e5aebbi.\n4:9 Awal-agi d awal n tide\u021b yuklalen ad i\u021bwaqbel \u0263er yemdanen me\u1e5b\u1e5ba.\n4:10 Ma d nukni ne\u021b\u025be\u021b\u021bib iman-nne\u0263 iwakken a ne\u01e7hed di liman, imi ne\u021bkel \u0263ef Sidi \u1e5aebbi Illu-nne\u0263 yeddren yellan d amsellek n yemdanen me\u1e5b\u1e5ba abe\u025bda wid yumnen yis.\n4:11 Atan wayen i \u0263ef ara twe\u1e63\u1e63i\u1e0d imdanen d wayen ara sen-teslem\u1e0de\u1e0d.\n4:12 ?u\u1e5b-ek a k-i\u1e25qe\u1e5b yiwen imi me\u1e93\u1e93iye\u1e0d di le\u025bme\u1e5b, me\u025bna ili-k d lemtel ger wid yumnen s yimeslayen-ik, s tikli-inek, s le\u1e25mala-inek, s liman-inek \u021b-\u021bezdeg n wul-ik.\n4:13 S\u025bedday lweqt-ik di leq\u1e5baya d ubecce\u1e5b d uselmed n wawal n \u1e5aebbi i wiya\u1e0d, alamma usi\u0263-en.\n4:14 Ur \u021b\u021ba\u01e7a ara di rrif tikci i k-d-i\u021b\u021bunefken s \u1e5b\u1e5be\u1e25ma n Sidi \u1e5aebbi d yimeslayen s wayes i d-caren fell-ak di tejma\u025bt mi ssersen ifassen-nsen fell-ak imeqqranen n tejma\u025bt.\n4:15 Err ddehn-ik \u0263er wayagi txedme\u1e0d-t akken ilaq, iwakken imdanen me\u1e5b\u1e5ba ad walin amek i te\u021bnerni\u1e0d di tikli-inek di Lmasi\u1e25.\n4:16 ?ader \u0263ef yiman-ik d wayen i tesselmade\u1e0d i wiya\u1e0d, ma tkemmle\u1e0d akken, d leslak ara d-tawi\u1e0d i ke\u010d\u010dini akk-d wid i k-yesme\u1e25sisen.\n5:1 Ur \u021blummu ara \u0263ef wem\u0263a\u1e5b s le\u025bya\u1e0d, me\u025bna nhu-t am akken d baba-k ; enhu da\u0263en ilme\u1e93yen am akken d atmaten-ik,\n5:2 tam\u0263a\u1e5bt am yemma-k, tilme\u1e93yin am yessetma-k, s wul ye\u1e63fan.\n5:3 Qade\u1e5b tu\u01e7\u01e7al f+ telhu\u1e0d \u021b-\u021bid ye\u1e25wa\u01e7en lem\u025bawna.\n5:4 Ma \u021b-\u021bid yes\u025ban dderya ne\u0263 dderya n warraw-nsent, ilaq d nutni ara d-yelhun yid-sent, akka ara d-sbeggnen \u1e6d\u1e6da\u025ba-nsen \u0263er Sidi \u1e5aebbi m'ara rren lxi\u1e5b i imawlan-nsen, ayagi d ayen i g\u025be\u01e7ben i Sidi \u1e5aebbi.\n5:5 Ta\u01e7\u01e7alt i gellan we\u1e25d-es ur nes\u025bi win ara \u021b-\u021birefden te\u021bkel \u0263ef Sidi \u1e5aebbi tde\u025b\u025bu \u0263u\u1e5b-es te\u021b\u1e25ellil-it am yi\u1e0d am ass.\n5:6 Ma \u021b-\u021ba\u01e7\u01e7alt ye\u1e6d\u1e6dafa\u1e5ben zzhu n ddunit, tinna temmut \u0263as mazal-i\u021b tedder.\n5:7 Atah wayen i \u0263ef ara twe\u1e63\u1e63i\u1e0d tu\u01e7\u01e7al iwakken ur d-ye\u021b\u021bili ara wayen ara sent-d-ssukksen.\n5:8 Ma yella win ur n\u025bawen ara at wexxam-is abe\u025bda imawlan-is, atan ye\u01e7\u01e7a liman, yu\u0263al akte\u1e5b n win ijehlen.\n5:9 Ta\u01e7\u01e7alt ilaq a\u021b-\u021bes\u025bu se\u021b\u021bin n iseggasen di le\u025bme\u1e5b-is iwakken a \u021b-t\u025bawen tejma\u025bt, ilaq a\u021b-\u021bili tezwe\u01e7 yiwet n tikkelt kan.\n5:10 Ilaq a\u021b-\u021bili te\u021bwassen s lec\u0263al-is yelhan, \u021b-\u021bin i\u1e5bebban arraw-is akken ilaq, is\u1e6der\u1e25iben deg wexxam-is, issarden i\u1e0da\u1e5b\u1e5ben n iqeddacen n Sidi \u1e5aebbi ; treffed ime\u0263ban, txeddem lxi\u1e5b.\n5:11 Me\u025bna ur qebbel ara i tejma\u025bt a\u021b-\u021b\u025bawen tu\u01e7\u01e7al me\u1e93\u1e93iyen di le\u025bme\u1e5b, axa\u1e6der m'ara b\u0263unt ad \u025bawdent zzwa\u01e7 zemrent ad \u01e7\u01e7ent abrid n Lmasi\u1e25 ;\n5:12 s wakka ad xed\u025bent l\u025bahed-nni i fkant i Sidi \u1e5aebbi.\n5:13 Yerna m'ur s\u025bint ara ayen ara xedment, ad \u021bcalint seg wexxam \u0263er waye\u1e0d ma\u010d\u010di kan imi ur s\u025bint ara cc\u0263el, me\u025bna ad kett\u1e5bent deg yimeslayen ur nes\u025bi lme\u025bna, ad ggarent iman-nsent deg wayen i tent-yex\u1e0dan.\n5:14 Ihi b\u0263i\u0263 ad nhu\u0263 tu\u01e7\u01e7al me\u1e93\u1e93iyen di le\u025bme\u1e5b ad \u025bawdent zzwa\u01e7, ad s\u025bunt dderya, ad lhint d yexxam-nsent iwakken i\u025bdawen ur \u021b\u021bafen ara ayen n diri ara hed\u1e5ben fell-asent.\n5:15 Axa\u1e6der llant seg-sent tid i geff\u0263en i webrid n \u1e5aebbi teb\u025bent abrid n Cci\u1e6dan.\n5:16 Ma tella tin yumnen tes\u025ba tu\u01e7\u01e7al i s-ye\u021b\u021bilin, d ne\u021b\u021bat i glaq a tent t\u025biwen iwakken ur \u021b\u021bilint ara \u021b \u021ba\u025bkumt i tejma\u025bt, akken da\u0263en tajma\u025bt a\u021b-\u021bizmir a\u021b-\u021b\u025biwen tid ur nes\u025bi ara win ara tent-irefden.\n5:17 Imdebb\u1e5ben n tejma\u025bt ixeddmen cc\u0263el-nsen akken ilaq uklalen ad \u021bwaxel\u1e63en s zzyada abe\u025bda wid yenne\u025btaben deg ubecce\u1e5b d uselmed.\n5:18 Axa\u1e6der tira iqedsen nnant-ed : Ur \u021b\u021bara ara takmamt i wezger yesserwaten, f+ yura da\u0263en : Axeddam yuklal lexla\u1e63-is. f+\n5:19 Ur qebbel ara win ara iccetkin \u0263ef wemdebbe\u1e5b n tejma\u025bt anagar ma \u1e25ed\u1e5ben sin ne\u0263 tlata inagan ara d-icehden fell-as.\n5:20 Ma d wid idenben, lumm-iten zdat medden me\u1e5b\u1e5ba iwakken ula d wiya\u1e0d ad aggaden.\n5:21 Di le\u025bnaya-k \u0263ef wudem n \u1e5aebbi d Sid-nne\u0263 \u0190isa Lmasi\u1e25 akk-d lmalayekkat ye\u021bwaxta\u1e5ben, deg wannect-agi me\u1e5b\u1e5ba ur xeddem ara lxilaf ger yemdanen.\n5:22 Ur \u021b\u0263awal ara a\u021b-\u021besserse\u1e0d ifassen \u0263ef yiwen, ur \u021bekki ara di ddnubat n wiya\u1e0d ; \u1e25ader iman-ik, qqim d azedgan.\n5:23 ?ef ddemma n weq\u1e5ba\u1e25 n t\u025bebbu\u1e6d-ik i k-issefcalen, ur tess ara kan aman lame\u025bna sew ci\u1e6d\u1e6du\u1e25 n cc\u1e5bab.\n5:24 Llan kra n yemdanen ddnubat-nsen \u021bbanen-d uqbel ad \u021b\u021bu\u1e25asben, llan wiya\u1e0d ddnubat-nsen ur d-\u021bbanen ara imiren kan.\n5:25 Akken da\u0263en i d-\u021bbanen lec\u0263al l\u025bali, ma d lec\u0263al n diri ur zmiren ara ad qqimen ffren.\n6:1 Wid yellan d aklan yumnen s Lmasi\u1e25 ilaq ad \u1e93ren belli im\u025bellmen-nsen uklalen leqde\u1e5b, iwakken ur i\u021bwargam f+ ara yisem n Sidi \u1e5aebbi, ur kkaten ara medden deg wayen i nesselmad.\n6:2 Wid yes\u025ban im\u025bellmen i ge\u021b\u021bamnen s Lmasi\u1e25 ur ilaq ara ad kksen fell-asen leqde\u1e5b imi d atmaten-nsen i llan, lame\u025bna ad qedcen fell-asen seg ul imi d wid yumnen s Lmasi\u1e25, d wid e\u025bzizen ara yesfayden si leqdic-nsen. Atah wayen ara twe\u1e63\u1e63i\u1e0d d wayen ara teslemde\u1e0d :\n6:3 win ara yeslemden ayen ixulfen liman-nne\u0263, ur neqbil ara awal imqeddes n Ssid-nne\u0263 \u0190isa Lmasi\u1e25,\n6:4 ye\u010d\u010du\u1e5b d zzux ur yessin kra ; i\u1e25emmel ad ike\u021b\u021be\u1e5b awal, ye\u021bna\u0263 \u0263ef ddemma n yimeslayen. Seg wannect-agi i d-itekk umennu\u0263, tismin, lekfe\u1e5b d ccekk,\n6:5 imeslayen nsen ur \u021bfakan ara axa\u1e6der \u010d\u010du\u1e5ben s yir ixemmimen te\u025b\u1e5beq-asen tide\u021b, \u0263ilen s \u1e6d\u1e6da\u025ba n Sidi \u1e5aebbi ara u\u0263alen d ime\u1e5bkantiyen.\n6:6 ?-\u021bide\u021b abrid n Sidi \u1e5aebbi ye\u021b\u021bawi-d rrbe\u1e25 ameqqran, me\u025bna ma yella nesteqni\u025b s wayen nes\u025ba.\n6:7 Axa\u1e6der ur d-newwi yid-nne\u0263 acemma \u0263er ddunit, akken da\u0263en ur nezmir a nawi acemma yid-nne\u0263 m'ara nemmet.\n6:8 Ihi ma yella nes\u025ba ayen ara ne\u010d\u010d d wayen ara nels, ilaq a nesteqne\u025b.\n6:9 Ma d wid yettaba\u025ben cci n ddunit \u0263ellin deg uje\u1e5b\u1e5beb akk-d tfextin n yir ccehwat n tnefsit-nsen, i ge\u021b\u021bawin imdanen \u0263er txe\u1e63\u1e63art akk-d nnger.\n6:10 Axa\u1e6der \u1e6d\u1e6dme\u025b n idrimen d sebba n kra n wayen yellan diri-t. Llan kra i gteb\u025ben cci-yagi n ddunit, ff\u0263en i webrid n Lmasi\u1e25, \u1e0du\u1e5b\u1e5ben ti\u1e5bwi\u1e25in nsen, sse\u0263lin-d lhemm \u0263ef yiman nsen.\n6:11 Ma d ke\u010d\u010d ay aqeddac n Sidi \u1e5aebbi sseb\u025bed iman-ik \u0263ef wannect agi me\u1e5b\u1e5ba, nadi \u0263ef l\u1e25eqq d \u1e6d\u1e6da\u025ba, liman, lma\u1e25ibba, \u1e63\u1e63be\u1e5b d wannuz.\n6:12 Sse\u01e7hed iman-ik deg umen\u0263i \u0263ef liman, e\u1e6d\u1e6def di tudert n dayem i \u0263er k-d-issawel Sidi \u1e5aebbi, asm'akken i d-cehde\u1e0d s wayen tumne\u1e0d zdat yemdanen me\u1e5b\u1e5ba.\n6:13 A k-we\u1e63\u1e63i\u0263 zdat Sidi \u1e5aebbi i d-ye\u021b\u021baken tudert, zdat \u0190isa Lmasi\u1e25 i gcehden \u0263ef liman akken ilaq zdat Bun\u1e6dus Bila\u1e6dus.\n6:14 Tbe\u025b lew\u1e63ayat-agi, iwakken a\u021b-\u021beqqime\u1e0d d azedgan, ur a k-d-issukus yiwen kra alamma d ass n Ssid-nne\u0263 \u0190isa Lmasi\u1e25\n6:15 ara d-yu\u0263alen di lweqt i d-ihegga Sidi \u1e5aebbi aw\u1e25id Bab n tezmert, Agellid n igelliden d Ssid n ssyadi,\n6:16 win yeddren i dayem, i gellan di tafat ur yezmir yiwen a\u021b-\u021byawe\u1e0d, ulac win i t-iwalan ne\u0263 i gzemren a t-iwali. I ne\u021b\u021ba tamanegt \u021b-\u021bezmert i dayem ! Amin.\n6:17 We\u1e63\u1e63i ime\u1e5bkantiyen n ddunit-agi iwakken ur ssem\u0263a\u1e5ben ara iman-nsen, ur \u021bkalayen ara \u0263ef cci n ddunit ur nes\u025bi laman, me\u025bna ad \u021beklen \u0263ef Sidi \u1e5aebbi i \u0263-d-i\u021b\u021baken lxi\u1e5b s tuge\u021b iwakken a nili di lfe\u1e5b\u1e25.\n6:18 We\u1e63\u1e63i-ten ad xeddmen lxi\u1e5b, ad ilin d ime\u1e5bkantiyen s lec\u0263al l\u025bali, ad \u021bseddiqen mbla cce\u1e25\u1e25a, ad b\u1e0dun d wiya\u1e0d ayen s\u025ban.\n6:19 S wakka, ad jem\u025ben i yiman-nsen agerruj yelhan i wussan i d-iteddun iwakken ad s\u025bun tudert n tide\u021b.\n6:20 A Timuti e\u025bzizen, e\u1e25rez ayen i tlemde\u1e0d, sseb\u025bed iman-ik \u0263ef yimeslayen ur nes\u025bi lme\u025bna, \u0263ef yimennu\u0263en ye\u025bnan tamusni n lekdeb.\n6:21 Wid i gteb\u025ben tamusni-agi, s\u1e5bu\u1e25en liman-nni i s\u025ban di Lmasi\u1e25. \u1e5a\u1e5be\u1e25ma n Sidi \u1e5aebbi a\u021b-\u021bili yid-wen !","title":"Kabyle Bible (NT): 1 Timothy","type":"page"}