{"collection":"Bible & Christianity","html_url":"https://unchartedknowledge.5gfusion.net/browse/bib/wb/kab/ti2.htm","path":"bib/wb/kab/ti2.htm","source_url":"https://sacred-texts.com/bib/wb/kab/ti2.htm","text":"1:1 Nekk Bulus aqeddac n \u0190isa Lmasi\u1e25 s leb\u0263i n Sidi \u1e5aebbi, \u021bwacegg\u025be\u0263 ad becc\u1e5be\u0263 tudert i \u0263-iw\u025bed Sidi \u1e5aebbi di \u0190isa Lmasi\u1e25.\n1:2 A Timuti a mmi e\u025bzizen : le\u025bfu, \u1e5b\u1e5be\u1e25ma \u021b-\u021balwit a k-d-\u021b\u021bunefkent s \u0263u\u1e5b Sidi \u1e5aebbi baba-tne\u0263 akk-d \u0190isa Lmasi\u1e25 Ssid-nne\u0263.\n1:3 ?\u1e25emmide\u0263 Sidi \u1e5aebbi i \u0263ef qeddce\u0263 s wul ye\u1e63fan akken qedcen fell-as lejdud-iw, de\u025b\u025bu\u0263 fell-ak am yi\u1e0d am ass ;\n1:4 m'ara d-mmekti\u0263 ime\u1e6d\u1e6dawen-ik, \u021b\u1e25iri\u0263 melmi ara k-\u1e93re\u0263 iwakken ad ili\u0263 di lfe\u1e5b\u1e25.\n1:5 ?mektaye\u0263-ed neyya-nni i tes\u025bi\u1e0d di liman, akken i \u021b-tes\u025ba se\u021b\u021bi-k Luiza akk-d yemma-k Anisa ; t\u1e25eqqeqe\u0263 belli ar ass-a mazal-i\u021b deg wul-ik.\n1:6 Daymi b\u0263i\u0263 a k-we\u1e63\u1e63i\u0263 a d tessaki\u1e0d tikci-nni i k-d-ye\u021b\u021bunefken s \u0263u\u1e5b \u1e5aebbi asm'akken i sserse\u0263 ifassen-iw fell-ak.\n1:7 Axa\u1e6der ma\u010d\u010di d \u1e5a\u1e5bu\u1e25 n ukukru i \u0263-d-yefka Sidi \u1e5aebbi me\u025bna d \u1e5a\u1e5bu\u1e25 ye\u010d\u010du\u1e5ben \u021b-\u021bazmert d le\u1e25mala akk-d le\u025bqel.\n1:8 Ihi ur \u021bset\u1e25i ara a\u021b-\u021bcehde\u1e0d \u0263ef Ssid-nne\u0263, ur \u021bset\u1e25i ara da\u0263en yis-i nekk yellan d ame\u1e25bus \u0263ef ddemma-s. Me\u025bna eqbel le\u025btab yid-i \u0263ef ddemma n lexba\u1e5b n lxi\u1e5b, \u021bkel \u0263ef tezmert i d-ye\u021b\u021bak Sidi \u1e5aebbi.\n1:9 D ne\u021b\u021ba i \u0263-isellken, i \u0263-d-issawlen \u0263er tudert iqedsen, ayagi ma\u010d\u010di \u0263ef ddemma n lec\u0263al-nne\u0263 me\u025bna d ne\u021b\u021ba i geb\u0263an s \u1e5b\u1e5be\u1e25ma-ines i \u0263-d ye\u021b\u021bunefken s \u0190isa Lmasi\u1e25 uqbel a d-texleq ddunit.\n1:10 \u1e5a\u1e5be\u1e25ma-agi tban-ed tura s tisin n wemsellek-nne\u0263 \u0190isa Lmasi\u1e25, i g\u0263elben lmut, ibeggen-ed tafat n tudert ur ne\u021bfaka s lexba\u1e5b n lxi\u1e5b.\n1:11 ?ef ddemma n lexba\u1e5b-agi n lxi\u1e5b i d-\u021b\u021buceg\u025be\u0263 d \u1e5b\u1e5basul iwakken ad becc\u1e5be\u0263, ad slemde\u0263.\n1:12 Daymi i \u021ben\u025be\u021b\u021babe\u0263 tura, me\u025bna ur sset\u1e25a\u0263 ara axa\u1e6der \u1e93ri\u0263 anwa s wayes umne\u0263, yerna \u021bekle\u0263 fell-as yes\u025ba tazmert ad ye\u1e25rez ayen akken i \u0263ef iyi-iwekkel alamma d ass n tu\u0263alin-is.\n1:13 ?rez imeslayen iqedsen i tlemde\u1e0d s \u0263u\u1e5b-i, eddu yis-sen s liman d le\u1e25mala i nes\u025ba di \u0190isa Lmasi\u1e25.\n1:14 ?rez mli\u1e25 deg ul-ik ayen akken i tlem\u1e0de\u1e0d, s tezmert n \u1e5a\u1e5bu\u1e25 iqedsen i gzed\u0263en deg-nne\u0263.\n1:15 Te\u1e93ri\u1e0d belli wid akk yellan yid-i di tmurt n Asya \u01e7\u01e7an-iyi we\u1e25d-i, llan gar-asen Figilus d ?irmujinus.\n1:16 Ad ibarek Sidi \u1e5aebbi axxam n gma-tne\u0263 Unisifur axa\u1e6der daymen ye\u021b\u1e63ebbi\u1e5b-iyi, ur yesset\u1e25a ara yis-i imi di l\u1e25ebs i lli\u0263 ;\n1:17 lame\u025bna akken kan i d-yusa \u0263er temdint n \u1e5auma inuda fell-i armi i yi-yufa.\n1:18 Te\u1e93ri\u1e0d ac\u1e25al i yi-i\u025bawen asmi lli\u0263 di temdint n Ifasus. A d-yessers \u1e5aebbi fell-as \u1e5b\u1e5be\u1e25ma-s deg ass n tu\u0263alin n \u0190isa Lmasi\u1e25.\n2:1 Ihi ke\u010d\u010d a mmi, sse\u01e7hed iman-ik s \u1e5b\u1e5be\u1e25ma i gellan di \u0190isa Lmasi\u1e25.\n2:2 Ayen tesli\u1e0d s \u0263u\u1e5b-i zdat wa\u1e6das inigan, sse\u1e25fe\u1e0d-it i wid ye\u1e6d\u1e6dfen di liman di \u0190isa Lmasi\u1e25 iwakken nutni da\u0263en ad izmiren a t-slemden i wiya\u1e0d.\n2:3 Awi amur-ik n le\u025btab am u\u025bsek\u1e5bi n Lmasi\u1e25.\n2:4 A\u025bsek\u1e5bi i geb\u0263an ad ye\u025b\u01e7eb i lqeb\u1e6dan-is ur ilaq ara ad ixemmem \u0263ef lec\u0263al n ddunit.\n2:5 Ulac da\u0263en win ara ireb\u1e25en timzizla ma yella ur yuzzil ara akken i d-yenna lqanun.\n2:6 Afella\u1e25 i\u021ben\u025be\u021b\u021baben, d ne\u021b\u021ba i gezwar l\u1e25al ad i\u0263ellet.\n2:7 Efhem ayen akka i k-d-nni\u0263 axa\u1e6der d Sidi \u1e5aebbi ara k-i\u025bawnen a\u021b-\u021bfehme\u1e0d kullec.\n2:8 Mmekti-d \u0190isa Lmasi\u1e25 i d-i\u1e25yan si ger lmegtin, win akken i d-iff\u0263en seg u\u1e93a\u1e5b n Sidna Dawed akken i t-id-yenna lexba\u1e5b n lxi\u1e5b n Lmasi\u1e25 i \u0263 \u0263 ecci\u1e5be\u0263 ;\n2:9 lexba\u1e5b-agi i \u0263ef nne\u025btabe\u0263 armi \u021bwarze\u0263 s snasel am akken d amcum i lli\u0263, me\u025bna awal n Sidi \u1e5aebbi ur ye\u021bwacekkal ara.\n2:10 Daymi \u1e63eb\u1e5be\u0263 i kullec \u0263ef ddemma n wid ye\u021bwaxta\u1e5ben iwakken ula d nutni ad s\u025bun leslak i gellan di \u0190isa Lmasi\u1e25 akk-d \u021bmanegt n dayem.\n2:11 Atah wayen yuklalen le\u021bkal : ma nemmut yid-es, a nidir da\u0263en yid-es ;\n2:12 ma yella ne\u1e6d\u1e6def di liman, a ne\u1e25kem yid-es ; ma yella nenkke\u1e5b-it ula d ne\u021b\u021ba a \u0263-yenke\u1e5b ;\n2:13 ma yella nexde\u025b-it, ne\u021b\u021ba ur a \u0263-ixedde\u025b ara axa\u1e6der ur yezmir ara ad yenke\u1e5b ayen i d-yenna.\n2:14 Atah wayen ara sen-d-smekti\u1e0d : nhu-ten zdat \u1e5aebbi ur \u021bem\u010deqlalen ara \u0263ef yimeslayen ur nes\u025bi lme\u025bna, yessufu\u0263en i webrid wid i sen isme\u1e25sisen.\n2:15 Exdem lme\u01e7hud-ik zdat n \u1e5aebbi, a\u021b-\u021bili\u1e0d d aqeddac ibedden \u0263er cc\u0263el-is, ur ne\u021bset\u1e25i ara deg wayen i gxeddem, i ge\u021bbecci\u1e5ben awal n Sidi \u1e5aebbi s l\u1e25eqq.\n2:16 X\u1e0du i yimeslayen ur nes\u025bi lme\u025bna i gxulfen liman axa\u1e6der wid i ten iteb\u025ben simmal \u021bzaden teff\u0263en i webrid n \u1e5aebbi.\n2:17 Imeslayen-nsen am lehlak i teddun di l\u01e7e\u021b\u021ba armi ye\u010d\u010da-\u021b me\u1e5b\u1e5ba. Llan gar-asen ?imnayus d Filitus\n2:18 i gwexx\u1e5ben \u0263ef webrid n tide\u021b, qqa\u1e5ben belli \u1e25eggu n lmegtin dayen yed\u1e5ba-d, s wakka ssufu\u0263en a\u1e6das n yemdanen seg webrid n liman.\n2:19 Lame\u025bna d lsas i gessers Sidi \u1e5aebbi ara idumen : Ssid-nne\u0263 ye\u1e93ra wid yellan d ayla-s ; f+ yura da\u0263en win ara yinin nekk d ayla-s, ilaq ad yex\u1e0du i wayen n diri. f+\n2:20 Deg wexxam n ime\u1e5bkantiyen ma\u010d\u010di d iqbucen n ddheb ne\u0263 n lfe\u1e6d\u1e6da kan i gellan me\u025bna llan da\u0263en wid n wes\u0263a\u1e5b d wid n wakal ; wid n ddheb d lfe\u1e6d\u1e6da \u021b\u021ba\u01e7an-ten i leqdic n wussan n tme\u0263\u1e5ba ma d wiya\u1e0d i leqdic n mkul ass.\n2:21 Win ara yessizdgen iman-is yex\u1e0da i lec\u0263al-agi n diri, ad yili am weqbuc-nni n ddheb ne\u0263 n lfe\u1e6d\u1e6da i sseqdacen deg wass n tme\u0263\u1e5ba, yewjed ad yenfe\u025b i wass m'ara t-ye\u1e25wi\u01e7 um\u025bellem-is.\n2:22 Ex\u1e0du i ccehwat n tem\u1e93i i ge\u021b\u0263u\u1e5b\u1e5bun, ke\u010d\u010d akk-d wid ide\u025b\u025bun \u0263er Sidi \u1e5aebbi s wul ye\u1e63fan, nadi \u0263ef l\u1e25eqq, liman, le\u1e25mala \u021b-\u021balwit,.\n2:23 Ur ggar ara iman-ik di lket\u1e5ba n leh\u1e0dur ife\u1e5b\u0263en ur nes\u025bi lme\u025bna, x\u1e0du-k seg-sen ; te\u1e93ri\u1e0d belli \u021b\u021bawin-d anagar amennu\u0263.\n2:24 Ur s-ilaq ara i uqeddac n Sidi \u1e5aebbi ad i\u021bna\u0263. Ilaq ad yili d a\u1e25nin \u0263er medden, ad isselmed s \u1e63\u1e63wab yerna ad is\u025bu \u1e63\u1e63be\u1e5b ;\n2:25 ilaq ad issefhem s le\u025bqel wid i t-ye\u021bxalafen, ahat Sidi \u1e5aebbi a ten-id-yerr \u0263er webrid iwakken ad issinen tide\u021b,\n2:26 a d-ldint wallen-nsen a d-snesren iman-nsen si tifextin n Cci\u1e6dan i ten-ye\u1e6d\u1e6dfen ad xedmen leb\u0263i-s.\n3:1 Ilaq a\u021b-\u021be\u1e93red belli \u0263er taggara n ddunit a d-asen wussan iwe\u025b\u1e5ben.\n3:2 Imdanen ad \u021bxemmimen \u0263ef yiman-nsen kan, ad \u1e6d\u1e6dama\u025ben deg idrimen, ad ssem\u0263u\u1e5ben iman-nsen, ad \u021bzuxxun, ad reggmen di \u1e5aebbi, ad \u021b\u025ba\u1e63in imawlan-nsen, ad nekk\u1e5ben lxi\u1e5b, ad tekksen sser \u0263ef wayen yes\u025ban l\u1e25e\u1e5bma,\n3:3 ur se\u025b\u025bun \u1e5b\u1e5be\u1e25ma ur se\u025b\u025bun le\u1e25nana deg ulawen-nsen, ad skiddiben \u0263ef wiya\u1e0d, ur zemmren ara ad \u1e25ekmen deg iman-nsen, ulawen nsen qqu\u1e5ben, d i\u025bdawen n lxi\u1e5b,\n3:4 d ixedda\u025ben, a ten-isder\u0263el zzux, ad \u1e25emmlen leb\u0263i n tnefsit-nsen wala leb\u0263i n Sidi \u1e5aebbi ;\n3:5 ad teb\u025ben abrid n Sidi \u1e5aebbi s wawal kan me\u025bna ad nekk\u1e5ben tazmert yellan deg-s. Ihi x\u1e0du-k i yemdanen am wigi.\n3:6 Kra seg-sen ke\u010d\u010dmen \u0263er kra n yexxamen, \u021bkellixen tilawin ur nes\u025bi ara l\u1e25e\u1e5bma i ge\u021b\u021bawi zzhu n ddunit ;\n3:7 \u021bqellibent daymen ad fehment, lame\u025bna le\u025bme\u1e5b \u021b\u021baw\u1e0dent \u0263er tmusni n tide\u021b.\n3:8 Am akken i xulfen Yanes d Yambris Sidna Musa, f+ akken da\u0263en ara xalfen tide\u021b yemdanen-agi, a\u021b-\u021be\u025bwej lefhama-nsen, ad ff\u0263en i webrid n liman.\n3:9 Me\u025bna ur \u021b\u021baw\u1e0den \u0263er wacemma axa\u1e6der imdanen me\u1e5b\u1e5ba a ten-\u025beqlen belli ff\u0263en i webrid am akken ted\u1e5ba d Yanes d Yambris.\n3:10 Ma d ke\u010d\u010d tetteb\u025be\u1e0d akken ilaq ayen i k-slemde\u0263, tikli-inu, ixemmimen-iw, liman-iw, \u1e63\u1e63be\u1e5b-iw, le\u1e25mala-inu d \u1e93\u1e93wara-inu,\n3:11 leqhe\u1e5b i \u021bwaqeh\u1e5be\u0263 akk-d le\u025btab-iw. Te\u1e93ri\u1e0d lem\u1e25ayen i g\u025beddan fell-i di temdinin n Antyuc, n Ikunyum d Listra ? Anwa leqhe\u1e5b iwumi ur \u1e63bi\u1e5be\u0263 ara ? Me\u025bna Sidi \u1e5aebbi isellek-iyi seg-sen me\u1e5b\u1e5ba.\n3:12 Kra n win yeb\u0263an ad iddu di liman n \u0190isa Lmasi\u1e25 ad i\u021b\u021buqehhe\u1e5b.\n3:13 Ma d imcumen ixedda\u025ben, ad \u021bkemmilen dayem di cce\u1e5b-nsen, ad \u0263u\u1e5b\u1e5ben wiya\u1e0d, ad rnun iman-nsen.\n3:14 Ma d ke\u010d\u010d e\u1e25rez ayen i tlemde\u1e0d s wayes i tesqen\u025be\u1e0d ; te\u1e93ri\u1e0d anwa i k-islemden.\n3:15 Seg asmi telli\u1e0d d ame\u1e93yan i tessne\u1e0d tira iqedsen ; yis-sent ara tes\u025bu\u1e0d lefhama ye\u021b\u021bawin \u0263er leslak s liman di \u0190isa Lmasi\u1e25.\n3:16 Yal tira iqedsen s \u0263u\u1e5b \u1e5aebbi i d-tekka yerna twulem i uselmed, i usefhem, i nehhu akk-d \u021b\u1e5bebga deg webrid n l\u1e25eqq,\n3:17 iwakken yal aqeddac n Sidi \u1e5aebbi ad yili d amdan ikemlen i gwulmen i yal cc\u0263el yelhan.\n4:1 A k-n-ssutre\u0263 \u0263ef wudem n \u1e5aebbi d \u0190isa Lmasi\u1e25 ara i\u1e25asben wid yeddren d wid yemmuten, i lmend n wass n tu\u0263alin-is \u021b-\u021bgeldit-is.\n4:2 Becce\u1e5b awal n Sidi \u1e5aebbi ama di teswi\u025bt yelhan ama di teswi\u025bt iwe\u025b\u1e5ben, ssefhem, lumm, enhu, sselmed s \u1e63\u1e63be\u1e5b d le\u025bqel.\n4:3 Axa\u1e6der a d-yawe\u1e0d lweqt anda kra n yemdanen ur zemmren ara ad slen i uselmed n tide\u021b, lame\u025bna ad teb\u025ben leb\u0263i n tnefsit-nsen, a d-sbedden lecyux ara sen-d-ihed\u1e5ben ayen kan i sen-i\u025be\u01e7ben ;\n4:4 ad s\u025bu\u1e93\u1e93gen iman nsen \u0263ef tide\u021b, ad rren ddehn-nsen \u0263er tmucuha.\n4:5 Ma d ke\u010d\u010d \u1e25ekkem deg iman-ik di kullec, \u1e63\u1e63be\u1e5b i cedda d le\u025btab, becce\u1e5b lexba\u1e5b n lxi\u1e5b , txedme\u1e0d lwa\u01e7eb-ik n uqeddac n Sidi \u1e5aebbi akken ilaq.\n4:6 Ma d nekk yewwe\u1e0d-ed lweqt i deg ilaq ad sebble\u0263 iman-iw, yewwe\u1e0d-ed lweqt i deg ara \u1e5bu\u1e25e\u0263.\n4:7 Kfi\u0263 cc\u0263el-iw yerna \u1e6d\u1e6dfe\u0263 di liman ar tura, nnu\u0263e\u0263 imen\u0263i n tide\u021b armi \u021b-\u021baggara.\n4:8 Tura ye\u021b\u1e5ba\u01e7u-yi l\u1e25eqq n lxedma-w ara yi-d-yefk Bab n l\u1e25eqq deg ass n l\u1e25isab, yerna ma\u010d\u010di i nekk kan, lame\u025bna i wid me\u1e5b\u1e5ba i t-i\u1e25emmlen ye\u021b\u1e5ba\u01e7un ass n tu\u0263alin-is.\n4:9 Exdem lme\u01e7hud-ik iwakken ur te\u021b\u025be\u1e6d\u1e6dile\u1e0d ara a d-tase\u1e0d \u0263u\u1e5b-i.\n4:10 Gma-tne\u0263 Dimas ye\u01e7\u01e7a-yi, yewwi-t zzhu n ddunit, i\u1e5bu\u1e25 \u0263er temdint n Tisalunik. Gma-tne\u0263 Krisis i\u1e5bu\u1e25 \u0263er tmurt n Galasya, ma d gma-tne\u0263 Tit i\u1e5bu\u1e25 \u0263er tmurt n Dalmasya.\n4:11 Anagar gma-tne\u0263 Luqa i geqqimen yid-i. Awi-d yid-ek gma tne\u0263 Ma\u1e5bqus iwakken ad iyi-i\u025bawen di lxedma-w.\n4:12 Ma d gma-tne\u0263 Ticik atan cegg\u025be\u0263-t \u0263er temdint n Ifasus.\n4:13 M'ara d-tase\u1e0d, awi-d yid-ek abe\u1e5bnus-nni i \u01e7\u01e7i\u0263 deg wexxam n Karbus di temdint n Truwas, awi-d yid-ek da\u0263en idlisen, abe\u025bda wid ye\u021bwaxedmen s weglim.\n4:14 Alixandru a\u1e25eddad i\u1e0du\u1e5b\u1e5b-iyi, ixdem-iyi a\u1e6das n cce\u1e5b me\u025bna ayen yexdem a t-yaf \u0263er Sidi \u1e5aebbi.\n4:15 Ula d ke\u010d\u010d \u1e25ader iman-ik seg-s, axa\u1e6der ye\u021bxa\u1e63am-a\u0263-d daymen deg wayen i ne\u021bbecci\u1e5b.\n4:16 Ass amezwaru i deg d-bedde\u0263 \u0263er cc\u1e5be\u025b ur ufi\u0263 ula d yiwen \u0263er tama-w, \u01e7\u01e7an-iyi akk ; lame\u025bna a wer ten-i\u1e25aseb \u1e5aebbi \u0263ef wayagi !\n4:17 D Sidi \u1e5aebbi i yi-i\u025bawnen, i yi-is\u01e7ehden, iwakken lexba\u1e5b n lxi\u1e5b ad i\u021b\u021bubecce\u1e5b s lekmal-is i le\u01e7nas nni\u1e0den me\u1e5b\u1e5ba yerna isellek-iyi-d seg imi n yizmawen.\n4:18 Sidi \u1e5aebbi mazal a yi-i\u1e25ader \u0263ef wayen akk n diri yerna ad iyi-isellek iwakken ad kecme\u0263 tagelda-ines yellan deg igenwan. I ne\u021b\u021ba tamanegt si l\u01e7il \u0263er l\u01e7il ! Amin !\n4:19 Sellem \u0263ef Briska d Akilas akk-d \u021bwacult n Unisifur.\n4:20 Gma-tne\u0263 Irast yeqqim di temdint n Kurintus, ma d Trufim \u01e7\u01e7i\u0263-t di temdint n Milet mazal-it yehlek.\n4:21 Exdem lme\u01e7hud-ik iwakken a d tase\u1e0d uqbel ccetwa. Bulus, Buden, Linus, Kludya d watmaten akk nni\u1e0den \u021bsellimen-d fell-ak.\n4:22 Sidi \u1e5aebbi ad yili yid-ek ! \u1e5a\u1e5be\u1e25ma-s a d-ters fell-awen ! Amin.","title":"Kabyle Bible (NT): 2 Timothy","type":"page"}