{"collection":"Bible & Christianity","html_url":"https://unchartedknowledge.5gfusion.net/browse/bib/wb/kab/tit.htm","path":"bib/wb/kab/tit.htm","source_url":"https://sacred-texts.com/bib/wb/kab/tit.htm","text":"1:1 Nekk Bulus aqeddac n Sidi \u1e5aebbi, i d-icegge\u025b \u0190isa Lmasi\u1e25 iwakken ad ssiwle\u0263 i wid akk yexta\u1e5b Sidi \u1e5aebbi a d-u\u0263alen \u0263er webrid-is yerna ad issinen tide\u021b,\n1:2 akken ad \u021beklen belli s\u025ban tudert n dayem, tudert i gew\u025bed Sidi \u1e5aebbi uqbel a d-te\u021bwaxleq ddunit ne\u021b\u021ba ur neskiddib ara.\n1:3 Yefka-d awal-is di lweqt ilaqen, ibeggen-it-id di lexba\u1e5b i yi-d ye\u021b\u021bunefken s lame\u1e5b n Sidi \u1e5aebbi amsellek-nne\u0263.\n1:4 Uri\u0263-ed tab\u1e5ba\u021b-agi i ke\u010d\u010d, a Tit a mmi n tide\u021b di liman i \u0263-yesdukklen : \u1e5b\u1e5be\u1e25ma \u021b-\u021balwit a k-d-\u021b\u021bunefkent s \u0263u\u1e5b Sidi \u1e5aebbi akk-d \u0190isa Lmasi\u1e25 amsellek-nne\u0263 !\n1:5 ?\u01e7i\u0263-k di tegzirt n Kritus iwakken a\u021b-\u021bkemmle\u1e0d cc\u0263el-nni ur nfuk ara, yerna a\u021b-\u021besbedde\u1e0d di yal tamdint imeqqranen n tejmuya\u025b n imasi\u1e25iyen akken i k-n-um\u1e5be\u0263.\n1:6 Yal yiwen deg-sen ilaq ad yili d amdan iwumi ur d-ssukksen acemma, ad yes\u025bu yiwet tme\u1e6d\u1e6dut kan, arraw-is ad ilin d wid i\u1e0du\u025ben Sidi \u1e5aebbi, ad s\u025bun tikli yelhan, ad \u021b\u021ba\u0263en awal iwakken ur sen-d-ssukkusen ara wiya\u1e0d kra n diri.\n1:7 Ilaq ameqqran n tejma\u025bt ad yili ye\u1e63fa di tikli-ines, imi d ne\u021b\u021ba i ge\u1e6d\u1e6dfen lec\u0263al n Sidi \u1e5aebbi, ur ilaq ad yili d win yessim\u0263u\u1e5ben iman-is, ur ilaq ad ireffu, ur ilaq ad yili d asek\u1e5ban, ur ilaq ad yeskker ccwal, ur ilaq da\u0263en a t-\u0263wun yedrimen n le\u1e25\u1e5bam.\n1:8 Lame\u025bna ilaq-as ad yili d win ye\u021bqabalen s wudem l\u025bali, d bab lxi\u1e5b, d a\u025beqli, d a\u1e25eqqi, d win ye\u021b\u1e0du\u025bun Sidi \u1e5aebbi, d win i\u1e25ekkmen deg iman-is ;\n1:9 ilaq ad ye\u1e6d\u1e6def deg awal n Sidi \u1e5aebbi yellan \u021b-\u021bide\u021b akken i t-yelmed, iwakken ad yizmir ad isselmed, ad inhu wiya\u1e0d yerna a d-isbeggen i wid i d-yekkaten deg awal-agi, belli \u0263el\u1e6den.\n1:10 A\u1e6das seg wat Is\u1e5bail i g\u025bu\u1e63an Sidi \u1e5aebbi yerna \u021bkellixen medden s imeslayen-nsen,\n1:11 ilaq a sen-terrem tikmamin i yimawen-nsen. Skarayen lhul deg yexxamen m'ara sselmaden ayen ur nlaq ara, iwakken ad reb\u1e25en le\u1e25\u1e5bam.\n1:12 Yiwen seg-sen i \u1e25esben d nnbi, yenna-d : \u00ab at \u021begzirt n Kritus si zik-nsen d imeskaddaben, d lew\u1e25uc iwe\u025b\u1e5ben, d ifenyanen ye\u021bxemmimen kan ad \u010d\u010den ' ' ;\n1:13 ayagi i d-yenna \u021b-\u021bide\u021b. Daymi, ilaq a ten-tenhu\u1e0d s lew\u025ba\u1e5ba, iwakken ad s\u025bun liman ise\u1e25\u1e25an ;\n1:14 ur ilaq ara ad \u021b\u1e25essisen i tmucuha n wudayen akk-d lew\u1e63ayat n yemdanen ur neqbil ara tide\u021b.\n1:15 Kullec zeddig i wid zeddigen, me\u025bna ulac ayen zeddigen i wid ur nzeddig ara, ur ne\u021b\u021bamen ara s \u1e5aebbi ; imi xemmimen-nsen d wulawen-nsen ne\u01e7sen yerna ur \u021bendemmayen ara.\n1:16 Imdanen-agi qqa\u1e5ben nessen \u1e5aebbi, me\u025bna cce\u1e5b i xeddmen yesbeggin-ed belli ur t-ssinen ara, \u025bu\u1e63an Sidi \u1e5aebbi xeddmen anagar wayen yek\u1e5beh, ur zmiren ara ad xedmen ayen yelhan.\n2:1 Ma d ke\u010d\u010d sselmed ayen yellan \u021b-\u021bide\u021b n Sidi \u1e5aebbi.\n2:2 Ini i yem\u0263a\u1e5ben ad setqen\u025ben, ad fken leqde\u1e5b i yiman-nsen, ad s\u025bun le\u025bqel, ad amnen s Sidi \u1e5aebbi s tide\u021b, ad \u1e25emmlen wiya\u1e0d seg wul, ad \u1e63eb\u1e5ben i le\u025btab.\n2:3 Ini da\u0263en i tem\u0263arin ad s\u025bunt tikli ye\u1e63fan, ur ilaq ara ad ilint \u021b-\u021biqe\u1e5b\u1e5ba\u1e0din, ur ilaq ara ad \u021b\u1e25awalent tissit n cc\u1e5bab me\u025bna ilaq ad nehhunt \u0263er wayen yelhan,\n2:4 ad \u021bwe\u1e63\u1e63int tilawin ad \u1e25emmlent irgazen-nsent d warraw nsent,\n2:5 ad ilint \u021b-\u021bi\u025beqliyin, ad ddunt s \u1e63\u1e63fa, ad lhint d lec\u0263al n wexxam, ad lhunt, ad \u021b\u021ba\u0263ent awal i yergazen-nsent iwakken awal n Sidi \u1e5aebbi ur ye\u021bwargam ara.\n2:6 Nhu da\u0263en ilme\u1e93yen ad s\u025bun le\u025bqel ;\n2:7 ke\u010d\u010d s yiman-ik ilaq a\u021b-\u021bili\u1e0d d lemtel s lec\u0263al-ik yelhan, sselmad seg wul akk-d \u021bide\u021b,\n2:8 s imeslayen i\u1e63e\u1e25\u1e25an i deg ur yezmir yiwen a d iwwet, iwakken ix\u1e63imen-ik ur \u021b\u021bafen ara ayen n diri ara hed\u1e5ben fell-ane\u0263 yerna ad nne\u1e25camen.\n2:9 Iqeddacen da\u0263en ilaq-asen ad \u021b\u021ba\u0263en awal yerna ad \u025be\u01e7ben bab-nsen, ur sen-\u021beddun ara di nneqma,\n2:10 ilaq ur ten-\u021b\u021bakren ara me\u025bna ad ilin d wid ime\u025bnen i deg yella laman, iwakken aselmed n Sidi \u1e5aebbi amsellek-nne\u0263 ad yes\u025bu ccan.\n2:11 Sidi \u1e5aebbi isbeggen-ed \u1e5b\u1e5be\u1e25ma-s i d-yewwin leslak i yemdanen me\u1e5b\u1e5ba.\n2:12 \u1e5a\u1e5be\u1e25ma n Sidi \u1e5aebbi tesselmad-a\u0263 a ne\u1e6d\u1e6dixe\u1e5b \u0263ef lec\u0263al-nne\u0263 ur nelhi d wayen akk n diri yellan di ddunit, a n\u025bic di ddunit-a s \u1e63\u1e63wab, s l\u1e25eqq d \u1e6d\u1e6da\u025ba n Sidi \u1e5aebbi ;\n2:13 akka ihi ara ne\u1e5b\u01e7u lfe\u1e5b\u1e25 n wass i nessaram i deg ara d-tban tmanegt n Yillu-nne\u0263 ameqqran, amsellek nne\u0263 \u0190isa Lmasi\u1e25.\n2:14 Yefka iman-is fell-ane\u0263 iwakken a \u0263-isellek si ddnub yerna a \u0263-yerr d agdud-is ye\u1e63fan, iwejden i lec\u0263al yelhan.\n2:15 Akka i glaq a\u021b-\u021be\u021bmeslaye\u1e0d, a\u021b-\u021bnehhu\u1e0d, a\u021b-\u021be\u021bwe\u1e63\u1e63i\u1e0d s lew\u025ba\u1e5ba, ur \u021b\u021ba\u01e7a yiwen a k-ye\u1e25qe\u1e5b.\n3:1 Smekti-ten-id ad qad\u1e5ben wid i\u1e25ekkmen, ad \u021b\u021ba\u0263en awal, ad ilin wejden ad xedmen lec\u0263al yelhan :\n3:2 ur kkaten deg yiwen, ad ilin d imhenniyen d imawlan n tifrat, ye\u010d\u010du\u1e5ben d le\u1e25nana \u0263er yemdanen me\u1e5b\u1e5ba.\n3:3 Axa\u1e6der ula d nukni zik txu\u1e63\u1e63-a\u0263 tmusni, ur ne\u021b\u021ba\u0263 ara awal ; nella n\u1e0da\u025b, nella d aklan n zzhu d wayen akk s wayes i \u0263-tesse\u1e0dme\u025b ddunit, nella d imcumen, n\u025bac di tismin, nek\u1e5beh wiya\u1e0d, wiya\u1e0d ke\u1e5bhen-a\u0263.\n3:4 Me\u025bna asmi i d-ibeggen Sidi \u1e5aebbi le\u1e25nana-s d le\u1e25mala-s i yemdanen,\n3:5 isellek-a\u0263 ma\u010d\u010di axa\u1e6der d i\u1e25eqqiyen i nella me\u025bna isellek-a\u0263 s \u1e5b\u1e5be\u1e25ma-s tameqqrant ; yessared-a\u0263 si ddnub-nne\u0263 s tezmert n \u1e5a\u1e5bu\u1e25 iqedsen iwakken a d-nlal d ijdiden ;\n3:6 Sidi \u1e5aebbi ye\u010d\u010du\u1e5b-a\u0263 s \u1e5a\u1e5bu\u1e25 iqedsen s \u0190isa Lmasi\u1e25 amsellek-nne\u0263,\n3:7 iwakken s \u1e5b\u1e5be\u1e25ma-ines a nu\u0263al d i\u1e25eqqiyen zdat Sidi \u1e5aebbi, a \u0263-d te\u021b\u021bunefk tudert n dayem i ne\u021b\u1e5ba\u01e7u.\n3:8 Awal-agi \u021b-\u021bide\u021b yerna b\u0263i\u0263 a d tesmektaye\u1e0d ayagi kull-as iwakken wid yumnen s \u1e5aebbi, ad xeddmen anagar ayen yelhan, d ayagi kan i gelhan yerna ye\u1e63le\u1e25 i yemdanen !\n3:9 Ur s\u1e6duqqutet ara awal mbla lme\u025bna \u0263ef wayen ye\u025bnan izu\u1e5ban n lejdud ne\u0263 \u010daqlalat d umen\u0263i \u0263ef ddemma n ccari\u025ba, axa\u1e6der d ayen ur nes\u025bi azal, ur ne\u1e63li\u1e25.\n3:10 Ma yella tenhi\u1e0d tikkelt ne\u0263 snat win i d-yeskaren ccwal, ur k-d-isme\u1e25ses ara, sseb\u025bed-it fell-ak ;\n3:11 amdan am wagi ye\u1e6d\u1e6daxe\u1e5b i webrid n tide\u021b, ddnub i yiri-s.\n3:12 M'ara k-n-cegg\u025be\u0263 gma-tne\u0263 Artimas ne\u0263 Tucik, ilaq-ak a d-\u1e5bu\u1e25e\u1e0d a nemlil di temdint n Nikubulis, dinna ara s\u025beddi\u0263 ccetwa.\n3:13 E\u025b\u1e5be\u1e0d a\u021b-\u021b\u025biwne\u1e0d Zennac yellan d abuga\u1e6du yesnen ccari\u025ba akk-d Abulus m'ara \u1e5bu\u1e25en ad saf\u1e5ben, tefke\u1e0d-asen ayen ara \u1e25wi\u01e7en.\n3:14 Axa\u1e6der ilaq da\u0263en atmaten-nne\u0263 ad lemden ad xedmen i wiya\u1e0d lec\u0263al yelhan, iwakken ad s\u025bun ayen ara \u1e25wi\u01e7en, ur \u021b\u021bilin ara mbla lfayda.\n3:15 Wid akk yellan yid-i \u021bsellimen-d fell-ak. Sellem \u0263ef wid i \u0263-ihemmlen i g\u1e0du\u025ben Sidi \u1e5aebbi. \u1e5a\u1e5be\u1e25ma n Sidi \u1e5aebbi a d-ters fell-awen !","title":"Kabyle Bible (NT): Titus","type":"page"}