{"collection":"Bible & Christianity","html_url":"https://unchartedknowledge.5gfusion.net/browse/bib/wb/rmi/plm.htm","path":"bib/wb/rmi/plm.htm","source_url":"https://sacred-texts.com/bib/wb/rmi/plm.htm","text":"1:1 Katar o Pavlo, kai si phanglo le Jesus Kristoske, ai katar amaro phral o Timote. Tuke Philemon, amaro kuchi vortako, ai kai keres buchi amensa, ai kai khangeri kai chidelpe ande cho kher,\n1:2 ai amare pheiake e Apphia, ai ka Archippus kai marelpe amensa ando pachamos:\n1:3 O Del amaro Dat ai le Devles Jesus Kristo te del tume o lashimos ai e pacha.\n1:4 Swako data kai rhugiv ma, murho kuchi Philemon, da ma goji tute, ai naisiv murhe Devleske.\n1:5 Ke ashunav e dragostia kai si tu sa le Devleske narodoske, ai o pachamos kai si tu ando Jesus Kristo.\n1:6 Ai mangav katar O Del o traio kai inkerel tu amensa katar o pachamos te kerel te zhanas mai mishto sa le mishtimata kai si ame ande amaro traio le Kristosa.\n1:7 Chiri dragostia, murho phral, dia man but raduimos ai zor! Ke raduisardian o ilo le Devlesko narodoske.\n1:8 Anda kodia, marka, pala Kristo me sim ivia te mothav tuke so trobul te keres.\n1:9 Numa ke mange drago tuke, mangav vari so tutar. Sar sim me o Pavlo, iek manush phuro, ai katse ande temnitsa, ai akana ek manush phanglo le Jesus Kristoske.\n1:10 Me mangav tutar vari so le Onesimeske, ke wo si murho shav ando Jesus Kristo; ke me kerdilem lesko dat ando Del katse ande temnitsa.\n1:11 Mai anglal wo chi trobulas tu, numa akana trobul ame, vi tut ai vi man.\n1:12 Ai tradav les tute akana, premin les, sar te avilino iek kotor anda mande.\n1:13 Me manglemas te inkerav les pasha mande, zhi kai sim ande temnitsa ai te zhutil ma ande cho than.\n1:14 Numa chi manglem te kerav kanchi bi te phushav tutar, chi mangav te thav tu pe zor te keres mange mishtimos, ke mange mai drago te keres tu anda tute.\n1:15 Amborim o Onesimus sas lino tutar pe xantsi vriama, saxke te avel tusa porme sagda;\n1:16 ke akana wo ma nai ferdi iek prosto sluga, numa mai but lo de sar iek sluga: wo si akana iek kuchi phral, ai mange defial drago lo, numa tuke trobul te avel mai but vi sar sluga, ai vi sar phral ando Kristo.\n1:17 Te jinesa man sar cho vortako, premisar les sar te premisardianas man.\n1:18 Ai te shubisailo vari so karing tute, vai te kamela tuke vari so, tu jin pa mande.\n1:19 Me, murhe vastesa tradav tuke kado divano. Me, o Pavlo, pochinava tuke palpale, ai chi trobul te dav tu goji ke tu kames mange cho traio.\n1:20 E, phrala, mangav ma tutar, ker mange kado mishtimos ande dragostia le Kristoski. Raduisar murho ilo, sar iek phral ando Jesus Kristo!\n1:21 Ke me pachav ma, ke ande kado lil kai ramov tuke, akana te keresa so mangav tutar, ai vi zhanav ke keresa mai but.\n1:22 Ai ande kodia lashar i mange iek soba ke pachav ma ke O Del ashunela tumare rhugimata, ai dela te avav pale tumensa.\n1:23 O Epaphras, kai si mansa ande temnitsa le Jesus Kristoske tradel tuke but bax, zor ai sastimos.\n1:24 Ai vi o Marko, o Aristarchus, o Demas, ai o Luk, murhe vortacha kai keren mansa buchi.\n1:25 O mishtimos amaro Devlesko Jesus Kristo te avel tumensa. Amen.","title":"Romani Bible (NT): Philemon","type":"page"}