{"collection":"Bible & Christianity","html_url":"https://unchartedknowledge.5gfusion.net/browse/bib/wb/xho/psa.htm","path":"bib/wb/xho/psa.htm","source_url":"https://sacred-texts.com/bib/wb/xho/psa.htm","text":"1:1 Hayi, uyolo lomntu ongahambiyo ngecebo labangendawo, Ongemiyo endleleni yaboni, Ongahlaliyo embuthweni yabagxeki!\n1:2 Yena unonelela umyalelo kaYehova; Ucamanga ngomyalelo wakhe imini nobusuku:\n1:3 Unjengomthi omiliselwe phezu kwemijelo yamanzi, Onika isiqhamo sawo ngexesha lawo, Ogqabi lawo lingabuniyo; Konke akwenzayo kophumelela.\n1:4 Abanjalo abangendawo; Bona banjengomququ ophetshethwa ngumoya.\n1:5 Ngenxa yoko abangendawo abanakuma emgwebeni, Naboni ebandleni lamalungisa.\n1:6 Ngokuba uYehova uyayazi indlela yamalungisa; Ke yona indlela yabangendawo iya kudaka.\n2:1 Yini na ukuba iintlanga zenze imbuthumbuthu, Izizwe zicamange into engeyakonto?\n2:2 Ookumkani behlabathi bazimisile, Izidwangube zabhunga NgoYehova nangoMthanjiswa wakhe;\n2:3 Besithi, Masiziqhawule iimbophelelo zabo, Sizilahle izintya zabo kuthi.\n2:4 Ohleli emazulwini uyahleka, INkosi iyabagculela.\n2:5 Iya kwandula ithethe kubo ngomsindo wayo, Ibakhwankqise ngokuvutha kwayo.\n2:6 Ithi, Mna ke ndimmisile ukumkani wam Phezu kweZiyon, intaba yam engcwele.\n2:7 Athi yena, Ndiya kuwuvakalisa ummiselo: UYehova uthe kum, UnguNyana wam wena; Mna namhla ndikuzele.\n2:8 Cela kum, ndikunike iintlanga zibe lilifa lakho, Iziphelo zehlabathi zibe zezakho.\n2:9 Uya kuzivikiva ngentonga yentsimbi, Uzihlekeze, zinge zizitya zodongwe.\n2:10 Ngoko ke, nina bokumkani, qiqani; Bagwebi basehlabathini, yalekani.\n2:11 Mkhonzeni uYehova nisoyika, Gcobani nithuthumela.\n2:12 Mangeni uNyana, hleze aqumbe, nitshabalale endleleni, Ngokuba ungahle uvuthe umsindo wakhe. Hayi, uyolo lwabo bonke abazimela ngaye!\n3:1 Umhobe kaDavide, ekubalekeni kwakhe kuAbhisalom unyana wakhe. Yehova, hayi, ukuba baninzi kwabandibandezelayo! Baninzi abasukela phezulu kum.\n3:2 Baninzi abathi kumphefumlo wam, Akunalusindiso kuThixo. (Phakamisani.)\n3:3 Ke wena, Yehova, uyingweletshetshe kum, Uluzuko lwam, umphakamisi wentloko yam.\n3:4 Ndidanduluka kuYehova ngezwi lam, Andiphendule entabeni yakhe engcwele. (Phakamisani.)\n3:5 Ndalala phantsi, ndalala ubuthongo; Ndavuka, ngokuba uYehova endixhasa.\n3:6 Andizoyiki izigidi zabantu Abakhe uluhlu lokulwa ngeenxa zonke kum.\n3:7 Khawusuk\u2019 ume, Yehova; ndisindise, Thixo wam; Ngokuba uzibetha zonke iintshaba zam emhlathini; Amazinyo abangendawo uyawaphula.\n3:8 Usindiso lolukaYehova: Mayibe phezu kwabantu bakho intsikelelo yakho. (Phakamisani.)\n4:1 Kumongameli wokubethelwa izinto ezineentambo. Umhobe kaDavide. Ekudandulukeni kwam ndiphendule, Thixo wobulungisa bam; Embandezelweni yam wandenzela indawo ebanzi; Ndibabale, uwuve umthandazo wam.\n4:2 Nina, nyana babantu, kunini na uzuko lwam niluhlazisa, Ningxamele into engeyakonto, nithanda amanga? (Phakamisani.)\n4:3 Yazini ke ukuba uYehova uzibalulele owenceba; UYehova uyaphulaphula ndakudanduluka kuye.\n4:4 Qumbani, ningoni; Thethani neentliziyo zenu ezinkukweni zenu, nithi cwaka. (Phakamisani.)\n4:5 Bingelelani imibingelelo yobulungisa, Nikholose ngoYehova.\n4:6 Baninzi abathi, Ngubani na owosibonisa okulungileyo? Siphakamisele ukukhanya kobuso bakho, Yehova.\n4:7 Uyivuyisile intliziyo yam, Kunexesha lobuninzi bengqolowa yabo, newayini yabo entsha.\n4:8 Ndiya kulala phantsi, ndilale ubuthongo kwangoku, ndixolile, Ngokuba wena, Yehova, undihlalisa ndikholosile, noko ndindedwa.\n5:1 Kumongameli: ngogwali. Umhobe kaDavide. Wabekele indlebe amazwi am, Yehova, Kuqonde ukucamanga kwam.\n5:2 Libazele indlebe izwi lokuzibika kwam, Kumkani wam, Thixo wam; Ngokuba ndithandaza kuwe.\n5:3 Yehova, uya kuliva izwi lam kwakusasa, Kwakusasa ndiya kuwusingisa kuwe umthandazo wam, ndibonisele.\n5:4 Ngokuba wena akunguThixo onanze okungendawo, Akanakuphambukela kuwe onobubi.\n5:5 Abanakuma abaqhayisi phambi kwamehlo akho; Uyabathiya bonke abasebenzi bobutshinga.\n5:6 Uyabatshabalalisa abathetha amanga; Indoda enegazi nenkohliso ilisikizi kuYehova.\n5:7 Ke mna, ndinokungena endlwini yakho ngenceba yakho eninzi, Ndiqubude, ndibhekise etempileni yakho engcwele ngokukoyika.\n5:8 Yehova, ndikhaphe ngobulungisa bakho ngenxa yabandilaleleyo; Yilungelelanise indlela yakho phambi kwam.\n5:9 Ngokuba emlonyeni wabo akukho nto imiyo, Umbilini wabo ngumeyeliselo; Lingcwaba elivuliweyo umqala wabo; Bathetha okugudileyo ngolwimi lwabo.\n5:10 Bathwalise ityala, Thixo; Makatshitshe amaqhinga abo; Elukreqweni lwabo oluninzi batyhale, Ngokuba bakuphikisile.\n5:11 Mabavuye bonke abazimela ngawe, Bamemelele ngonaphakade, ubakhusele; Badlamke ngawe abalithandayo igama lakho.\n5:12 Ngokuba wena uyalisikelela ilungisa, Yehova, Ulihlanganisele ngenkoliseko njengekhaka.\n6:1 Kumongameli wokubethelwa izinto ezineentambo: ngelamadoda ilizwi. Umhobe kaDavide. Yehova, musa ukundohlwaya unomsindo, Ungandithethisi unobushushu.\n6:2 Ndibabale, Yehova, ngokuba ndintshwenyile; Ndiphilise, Yehova, ngokuba ekhwankqisiwe amathambo am.\n6:3 Umphefumlo wam ukhwankqiswe kakhulu; Ke wena, Yehova, koda kube nini na?\n6:4 Buya, Yehova, uwuhlangule umphefumlo wam; Ndisindise ngenxa yenceba yakho.\n6:5 Ngokuba ekufeni akusekho kukukhumbula; Kwelabafileyo ngubani na osenokubulela kuwe?\n6:6 Ndidiniwe kukugcuma kwam; Ndiludadisa ubusuku bonke ukhuko lwam, Ndiwenza manzi umandlalo wam ngeenyembezi zam.\n6:7 Lonakele kukukhathazeka iliso lam; Laluphele ngenxa yababandezeli bam bonke.\n6:8 Sukani kum, nina nonke basebenzi bobutshinga; Ngokuba uYehova ulivile ilizwi lokulila kwam.\n6:9 Ukuvile uYehova ukutarhuzisa kwam; UYehova umthandazo wam uyawamkela.\n6:10 Ziya kudana, zikhwankqe kakhulu, zonke iintshaba zam; Ziya kubuyiswa zidanile ngephanyazo.\n7:1 Ishigayon kaDavide, awayivumayo kuYehova ngenxa yamazwi kaKushi, umBhenjamin. Yehova, Thixo wam, ndizimela ngawe; Ndisindise kubo bonke abandisukelayo, undihlangule,\n7:2 Hleze bawuqwenge njengengonyama umphefumlo wam, Bawudlavule, kungekho mhlanguli.\n7:3 Yehova, Thixo wam, ukuba ndithe ndenza oku, Ukuba kukho ubugqwetha ezandleni zam,\n7:4 Ukuba ndimphethe kakubi obexolelene nam, Ndambhunyula ondibandezele kungekho sizathu:\n7:5 Maluwusukele utshaba umphefumlo wam, luwufumane, Lubunyashele phantsi ubomi bam, Uzuko lwam lululalise eluthulini. (Phakamisani.)\n7:6 Khawusuk\u2019 ume, Yehova, unomsindo, Kuphakamele ukuphuphuma komsindo wabandibandezelayo; Uvuke, undikhawulele; wena umise umgwebo.\n7:7 Ibandla lezizwe malikungqonge; Ubuyele phezulu phezu kwalo.\n7:8 UYehova uya kugweba phakathi kwezizwe. Lithethe ityala lam, Yehova, ngobulungisa bam, nangokugqibelela kwam okukum.\n7:9 Mabuphele ububi babangendawo, ulizimase ilungisa; Ungumcikidi weentliziyo nezintso, Thixo wobulungisa.\n7:10 Ingweletshetshe yam inoThixo, Umsindisi wabantliziyo zithe tye.\n7:11 UThixo ngumgwebi olilungisa; UnguThixo obhavuma yonke imihla.\n7:12 Ukuba ongendawo uthe akabuya, ulilolile ikrele lakhe; Usityedile isaphetha sakhe, wasilungisa.\n7:13 Uzibhekise kuye izixhobo zokufa, Uzenze zanomlilo iintolo zakhe.\n7:14 Yabona, yena unenimba yobutshinga; Ukhawule ububi, wazala ubuxoki;\n7:15 Umbe umhadi, wawugomba; Weyela esihogweni awasisebenzayo.\n7:16 Ububi bakhe bobuyela entlokweni yakhe, Naselukakayini lwakhe kufike ukugonyamela kwakhe.\n7:17 Ndiya kubulela kuYehova ngokobulungisa bakhe, Ndivume ngendumiso kwigama likaYehova ophezu konke.\n8:1 Kumongameli: ngolwaseGati. Umhobe kaDavide. Yehova, Nkosi yethu, Hayi, ubungangamsha begama lakho ehlabathini lonke! Wena uwambathise amazulu ngendili yakho.\n8:2 Emlonyeni wabantwana nabanyayo useke amandla, Ngenxa yababandezeli bakho, Ukuze udambise utshaba nophindezelayo.\n8:3 Xa ndilikhangelayo izulu lakho, umsebenzi weminwe yakho, Inyanga neenkwenkwezi ozimisileyo:\n8:4 Uyintoni na umntu lo, le nto umkhumbulelayo? Unyana womntu, le nto umvelelayo?\n8:5 Umsilelise kancinane ebuThixweni, Wamthi jize ngobuqaqawuli nangobungangamela.\n8:6 Umphathise ubukhosi phezu kwemisebenzi yezandla zakho, Zonke izinto uzibeke phantsi kweenyawo zakhe:\n8:7 Impahla emfutshane, neenkomo zonke ziphelele, Kwaneenyamakazi zonke;\n8:8 Iintaka zezulu, neentlanzi zolwandle, Into ehamba ngeendlela zolwandle.\n8:9 Yehova, Nkosi yethu, Hayi, ubungangamsha begama lakho ehlabathini lonke!\n9:1 Kumongameli: ngemute-labhen, Umhobe kaDavide. Ndiya kubulela kuYehova ngentliziyo yam yonke; Ndiya kuyibalisa yonke imisebenzi yakho ebalulekileyo.\n9:2 Ndiya kuvuya ndidlamke ngawe; Ndiya kulibethela uhadi igama lakho, Wena usenyangweni.\n9:3 Ekubuyeni kweentshaba zam umva, Ziyawa, zibhubhe ebusweni bakho.\n9:4 Ngokuba ulifezile ityala lam nebango lam: Uhleli etroneni ungumgwebi olilungisa.\n9:5 Uzikhalimele iintlanga, wabatshabalalisa abangendawo; Igama lazo ulicimile ngonaphakade kanaphakade.\n9:6 Iintshaba zona zigqibele, yangamanxuwa kwaphela; Imizi uyinyothule, Yadaka inkumbulo yayo yona.\n9:7 Ke yena uYehova uhleli ngonaphakade, Uyizinzisele ugwebo itrone yakhe.\n9:8 Uya kugweba yena kwelimiweyo ngobulungisa, Agwebe phakathi kwezizwe ngokuthe tye.\n9:9 UYehova makabe yingxonde kotyunyuziweyo, Ingxonde ngamaxesha engxingongo;\n9:10 Bakholose ngawe abalaziyo igama lakho; Ngokuba akubashiyanga abakuquqelayo wena, Yehova.\n9:11 Vumani ngendumiso kuYehova ohlala eZiyon; Xelani ezizweni izenzo zakhe ezincamisileyo;\n9:12 Ukuba umphindezeli wamagazi ubakhumbule, Akakulibalanga ukukhala kwabalulamileyo.\n9:13 Ndibabale, Yehova; Zibone iintsizi zam ezikhoyo ngabandithiyayo, Mphakamisi wam emasangweni okufa;\n9:14 Ukuze ndibalise yonke indumiso yakho, Emasangweni entombi uZiyon, Ndigcobe ngosindiso lwakho.\n9:15 Iintlanga zitshone esihogweni ezasenzayo, Emnatheni ezawugqumelayo kubanjiswe kwaolwazo unyawo.\n9:16 Uzazisile uYehova; wenza umgwebo, Emthiyela ngomsebenzi wezandla zakhe ongendawo. (Bethani uhadi ngofefe. Phakamisani.)\n9:17 Baya kubuyela kwelabafileyo abangendawo, Kwaiintlanga zonke ezimlibalayo uThixo;\n9:18 Ngokuba aliyi kuhlala lilityalwa ihlwempu, Ithemba leentsizana aliyi kudaka ngonaphakade.\n9:19 Khawusuk\u2019 ume, Yehova; malungangcwangushi uluntu, Mazigwetywe iintlanga phambi kwakho,\n9:20 Zimisele ukoyika, Yehova, Zazi iintlanga ukuba ziluluntu kuphela. (Phakamisani.)\n10:1 Yini na ukuba umele mgama, Yehova, Uzifihle ngamaxesha engxingongo?\n10:2 Ngokukratsha kwabangendawo bayatsha abaziintsizana; Babanjiswa ngamayelenqe abawacingileyo.\n10:3 Ngokuba ongendawo uyaqhayisa ngeminqweno yomphefumlo wakhe. Nolibawa wahlukene noYehova, wamgiba.\n10:4 Ongendawo ngobuchi bakhe uthi, Akasayi kubuza. Yonke iminkqangiyelo yakhe ithi, Akukho Thixo.\n10:5 Ziqinile iindlela zakhe ngamaxesha onke; Ziphakamile izigwebo zakho, zikude kuye; Bonke ababandezeli bakhe uyabafuthela.\n10:6 Uthi entliziyweni yakhe, Andisayi kushukunyiswa; Izizukulwana ngezizukulwana, ndingongayi kuba sebubini.\n10:7 Umlomo wakhe uzele kukushwabula nokukhohlisa nokuxinezela. Ngaphantsi kolwimi lwakhe bububi nobutshinga.\n10:8 Uhlala emilaleleni yeengqili, Agwinte omsulwa entsithelweni; Amehlo akhe azonda oludwayi.\n10:9 Ulalela entsithelweni njengengonyama eludadeni wayo; Ulalela ukuba axwile emke nosizana; Uxwila emke nolusizana, elutsala ngomnatha wakhe.\n10:10 Uyabuthuma, uyabunguzela, Bawele ezinzitsheni zakhe abaziindwayi.\n10:11 Uthi entliziyweni yakhe, UThixo ulibele, Ubusithelisile ubuso bakhe, akabonanga nento.\n10:12 Khawusuk\u2019 ume, Yehova, phakamisa isandla sakho, Thixo. Musa ukubalibala abalulamileyo.\n10:13 Kungenxa yani na ukuba ongendawo amgibe uThixo, Athi entliziyweni yakhe, Akuyi kubuza?\n10:14 Ubonile wena; ngokuba uyabubona ububi nenkathazo, ububeke esandleni sakho; Uzinikela kuwe oludwayi; Ungumncedi weenkedama wena.\n10:15 Yaphula ingalo yongendawo; Onobubi, mbuze okungendawo kwakhe, kungasali nento.\n10:16 UYehova nguKumkani ngonaphakade kanaphakade; Zitshabalele iintlanga, azabakho ehlabathini lakhe.\n10:17 Umnqweno wabalulamileyo uwuvile, Yehova; Wazizimasa iintliziyo zabo, wayibaza indlebe yakho,\n10:18 Ukuba ugwebe ityala lenkedama noxinzelelweyo, Angabi sabangcangcazelisa umntu wasehlabathini.\n11:1 Kumongameli. EkaDavide. Ndizimela ngoYehova; Ningathini na ukuthi kumphefumlo wam, Balekela entabeni yakho njengentaka?\n11:2 Ngokuba nabo abangendawo begoba isaphetha, Bezilungisile iintolo zabo entanjeni, Ukuba batole besithele kwabantliziyo zithe tye.\n11:3 Xa iziseko zithe zagungxulwa, Ilungisa linokuthini na?\n11:4 UYehova, ulotempile yakhe iyingcwele, UYehova, ulotrone yakhe isemazulwini, Amehlo akhe ayababona, iinkophe zakhe ziyabacikida oonyana babantu.\n11:5 UYehova uyalicikida ilungisa; Ke yena ongendawo nothanda ukugonyamela, umthiyile umphefumlo wakhe.\n11:6 Uya kubanisela abangendawo imigibe; Umlilo, nesulfure, nomoya olulophu, yindebe yabo abayabelweyo;\n11:7 Ngokuba lilungisa uYehova; uthanda imisebenzi yobulungisa; Othe tye uya kububona ubuso bakhe.\n12:1 Kumongameli: ngelamadoda ilizwi. Umhobe kaDavide. Sindisa, Yehova, ngokuba uphelile owenceba, Ngokuba bathe shwaka abanyanisileyo koonyana babantu.\n12:2 Bathetha inkohlakalo omnye nomnye; Bathetha ngomlomo ogudileyo, nangentliziyo embaxa.\n12:3 Ngamana uYehova angayinqumla yonke imilebe yomlomo ogudileyo, Ulwimi oluthetha izinto ezinkulu;\n12:4 Abathe, Ulwimi lwethu siyalupheza; Imilomo yethu yeyethu; ngubani na oyinkosi kuthi?\n12:5 Ngenxa yokubhuqwa kweentsizana, ngenxa yokuncwina kwamahlwempu, Ndiya kusuka ndime ngoku, utsho uYehova; Ndiya kumbeka elusindisweni lowo ululangazelelayo.\n12:6 Amazwi kaYehova ngamazwi acocekileyo, Yisilivere enyibilikiselwe eziko, yela emhlabeni, Ehluzwe kasixhenxe.\n12:7 Wena, Yehova, uya kubagcina, Uya kubalondoloza kwesi sizukulwana ngonaphakade.\n12:8 Abangendawo bahambahamba ngeenxa zonke, Xa kuphakanyiswe abangeni phakathi koonyana babantu.\n13:1 Kumongameli. Umhobe kaDavide. Kunini na, Yehova, undilibele kwaphela? Kunini na ubusithelisa ubuso bakho kum?\n13:2 Kunini na ndicebacebisana nomphefumlo wam, Ndinesingqala entliziyweni yam imini le? Kunini na lundiphakamele utshaba lwam?\n13:3 Bheka undiphendule, Yehova, Thixo wam; Khanyisa amehlo am, hleze ndilale ukufa;\n13:4 Hleze utshaba lwam luthi, Ndimeyisile; Bagcobe abandibandezelayo, xa ndithe ndashukunyiswa.\n13:5 Mna ndikholose ngenceba yakho, Mayigcobe intliziyo yam ngosindiso lwakho.\n13:6 Ndiya kuvuma kuYehova, Ngokuba endiphethe kakuhle.\n14:1 Kumongameli. EkaDavide. Sithi isidenge entliziyweni yaso, Akukho Thixo. Bonakalisile, balisikizi ngeentlondi zabo; Akukho wenza okulungileyo.\n14:2 UYehova esemazulwini uqondele koonyana babantu, Ukubona ukuba ukho na oqiqayo, Oquqela kuThixo.\n14:3 Bonke batyekile, bayimbozisa bephelele; Akukho wenza okulungileyo, Akukho nokuba abe mnye.\n14:4 Abanakwazi na bonke abasebenzi bobutshinga, Abathi, bebadla abantu bam, bathi badla isonka, Bangamnquli uYehova?\n14:5 Apho bankwantya benkwantyile; Ngokuba uThixo usesizukulwaneni samalungisa.\n14:6 Icebo losizana ningalidanisa, Kodwa uYehova ulihlathi lalo.\n14:7 Akwaba bekuvela eZiyon ukusindiswa kwamaSirayeli! Ekubabuyiseni kukaYehova abantu bakhe ekuthinjweni, Wogcoba uYakobi, avuye uSirayeli.\n15:1 Umhobe kaDavide. Yehova, ngubani na owophambukela ententeni yakho? Ngubani na owohlala entabeni yakho engcwele?\n15:2 Ngohamba ngokugqibeleleyo, esenza ubulungisa, Othetha inyaniso ngentliziyo yakhe.\n15:3 Ngongahlebiyo ngolwimi lwakhe, Ongamenziyo into embi uwabo, Ongamngcikiviyo ummelwane wakhe;\n15:4 Odelekileyo, ecekiseka, kwawakhe amehlo, Obazukisayo ke bona abamoyikayo uYehova; Ofunga, angajiki, nokuba kubi kuye,\n15:5 Ongayinikeliyo imali yakhe ukuba adle abantu ngayo, Ongenakugaqelwa ngaye omsulwa. Okwenzayo oko akayi kuza ashukunyiswe naphakade.\n16:1 Eyona iligugu likaDavide. Ndigcine, Thixo, ngokuba ndizimela ngawe.\n16:2 Ndithe kuYehova, UyiNkosi yam, Andinanto indilungeleyo ngaphezu kwakho.\n16:3 Ndithe kwabangcwele abasehlabathini, Bona bazizinhanha apho, kukhona konke endikunanzileyo.\n16:4 Ziya kwanda iimbulaleko zabo bamananisa ngathixo wumbi uYehova. Andiyi kuyithulula iminikelo yabo ethululwayo yegazi; Andiyi kuwaphatha amagama abo ngomlomo wam.\n16:5 NguYehova isahlulo endasabelwayo, nendebe endayabelwayo; Ulenze banzi ilifa lam.\n16:6 Amacandelo andiwele ezindaweni ezimnandi; Hee! Ndide ndaba nelifa elihle.\n16:7 Ndiya kumbonga uYehova ondinike icebo; Nasebusuku ziyandithethisa izintso zam.\n16:8 Ndimmisile uYehova phambi kwam amaxesha onke; Ngokuba esekunene kum nje, andiyi kushukunyiswa.\n16:9 Ngako oko iyavuya intliziyo yam, luyagcoba uzuko lwam: Nenyama yam iya kuhlala ikholosile.\n16:10 Ngokuba akuyi kuwushiya umphefumlo wam kwelabafileyo; Akuyi kumyekela owakho wenceba ukuba abonane nesihogo.\n16:11 Uya kundazisa umendo wobomi; Ebusweni bakho yinzaliseko yemivuyo; Ekunene kwakho yimihlali ngonaphakade.\n17:1 Umthandazo kaDavide. Buve, Yehova, ubulungisa; kubazele indlebe ukuhlahlamba kwam; Wubekele indlebe umthandazo wam, ongengamlomo ukhohlisayo.\n17:2 Ibango lam malivele ebusweni bakho, Amehlo akho akhangele ngokuthe tye.\n17:3 Uyicikidile intliziyo yam; undivelele ebusuku; Undinyibilikisile, akwafumana nto; Ndiyinkqangiyele into embi, ayiyi kuwugqitha umlomo wam.\n17:4 Malunga nemisebenzi yabantu, ngelizwi lomlomo wakho, Mna ndizigcinile, andangena kwiindlela zamanyangaza.\n17:5 Imikhondo yam ibambe iindlela zakho, Azashukuma iinyawo zam.\n17:6 Mna ndinqula wena, ngokuba undiphendula, Thixo; Ndithobele indlebe yakho, kuve ukuthetha kwam.\n17:7 Zibalule iinceba zakho, wena wabasindisayo abazimela ngawe, Ngesandla sakho sokunene, ngenxa yabasukela phezulu kubo.\n17:8 Ndigcine njengeliso, njengokhozo lwalo, Ndisithelise ngesithunzi samaphiko akho,\n17:9 Phambi kwabangendawo abandibhuqayo, Phambi kweentshaba zam ngokwasemphefumlweni ezindingungelayo.\n17:10 Zithe fithi kukutyeba; Ngomlomo wazo zithetha ngekratshi.\n17:11 Zindijikelezile ngoku ekuhambeni kwam; Amehlo azo ziwamisele ukundinqumela emhlabeni.\n17:12 Ukufana kwazo kunjengengonyama engxamele ukuqwenga, Kunjengengonyama entsha ihleli entsithelweni.\n17:13 Khawusuk\u2019 ume, Yehova, Uyihlangabeze, uyiwise yona; Wusindise umphefumlo wam kongendawo ngekrele lakho;\n17:14 Kubafo, ngesandla sakho, Yehova, Kubafo beli phakade, abasahlulo sikobu bomi; Osizalisileyo isisu sabo ngeengqwebo zakho; Bakholisile ngoonyana, Ukuphuphuma kwabo bakushiya neentsapho zabo.\n17:15 Mna ndiya kububona ubuso bakho ndisebulungiseni; Ndiya kwaneliswa sisithomo sakho ekuvukeni kwam.\n18:1 Kumongameli. Eyomkhonzi kaYehova. EkaDavide, owawathethayo kuYehova amazwi ale ngoma, mhlenikweni uYehova wamhlangulayo esandleni seentshaba zakhe zonke nasesandleni sikaSawule; wathi: Ndikuthanda ngembilini yam, Yehova, lomelelo lwam.\n18:2 Yehova, ngxondorha yam, mboniselo yam, msindisi wam, Thixo wam, liwa lam endizimela ngalo, Ngweletshetshe yam, luphondo losindiso lwam, ngxonde yam!\n18:3 Ndinqula uYehova ongowokudunyiswa, Ndiyasindiswa ezintshabeni zam.\n18:4 Izintya zokufa zandijikela; Imilambo yobutshijolo yandidandathekisa.\n18:5 Izintya zelabafileyo zandibhijela; Izirhintyelo zokufa zabetha kum.\n18:6 Ekubandezelekeni kwam ndanqula uYehova, Ndazibika kuThixo wam; Waliva etempileni yakhe izwi lam, Ukuzibika kwam kwafika phambi kwakhe ezindlebeni zakhe.\n18:7 Lahexa ke lanyikima ihlabathi, Iziseko zeentaba zagungqa, Zahexa, ngokuba enomsindo.\n18:8 Kwathi thaphu umsi emathatheni akhe, Wadla umlilo, uphuma emlonyeni wakhe, Kwavutha amalahle ephuma kuwo.\n18:9 Wawathoba amazulu, wehla, Yangamafu amnyama phantsi kweenyawo zakhe.\n18:10 Wakhwela ekerubhini, waphaphazela, Wee tshwebelele ngamaphiko omoya.\n18:11 Wamisa ubumnyama baba lisithe lakhe, umnquba wakhe ngeenxa zonke kuye; Ubumnyama bamanzi, iingqimba zamafu.\n18:12 Ekukhanyeni okuphambi kwakhe, kwatyhoboza emafini akhe Isiphango samatye, namalahle omlilo.\n18:13 Wadudumisa ezulwini uYehova, Ophezu konke walikhupha ilizwi lakhe. Yasisiphango samatye namalahle omlilo.\n18:14 Wathuma iintolo zakhe, wabaphangalalisa; Yamininzi imibane, wabadubaduba.\n18:15 Imiphantsi yamanzi yabonakala, Kwatyhileka iziseko zelimiweyo Ngokukhalima kwakho, Yehova, Ngokufutha komoya womsindo wakho.\n18:16 Wolula isandla ephezulu, wandibamba, Wandirhola emanzini amaninzi.\n18:17 Wandihlangula elutshabeni lwam olunamandla, Kwabandithiyileyo, ngokuba bebomelele kunam.\n18:18 Bandifikela ngemini yokusindeka kwam, UYehova wandixhasa.\n18:19 Wandikhuphela endaweni ebanzi, Wandihlangula, ngokuba endithandile.\n18:20 UYehova wandiphatha kakuhle ngokobulungisa bam, Wandibuyisela ngokobunyulu bezandla zam.\n18:21 Ngokuba ndizigcina iindlela zikaYehova, Andemka ngokungendawo kuThixo wam.\n18:22 Ngokuba onke amasiko akhe aphambi kwam, Nemimiselo yakhe andiyisusi kum;\n18:23 Ndaye ndingogqibeleleyo kuye, Ndazigcina, andaba nabugwenxa,\n18:24 Wandibuyisela ke uYehova ngokobulungisa bam, Ngokobunyulu bezandla zam phambi kwamehlo akhe.\n18:25 Kowenceba uzenza owenceba, Kwigorha eligqibeleleyo uzenza ogqibeleleyo;\n18:26 Kozenze nyulu uzenza onyulu, Kojibilizayo uzenza onobuqhokolo.\n18:27 Ngokuba wena uyabasindisa abantu ababandezelekileyo, Uwathobe amehlo aqwayingileyo.\n18:28 Ngokuba uyasilumeka isibane sam wena; UYehova uThixo wam uyabukhanyisela ubumnyama bam.\n18:29 Ngokuba ngawe ndigila amajarha, NgoThixo wam ndiqabela ezindongeni.\n18:30 UThixo yena, igqibelele indlela yakhe; Ilizwi likaYehova linyibilikisiwe, Uyingweletshetshe kubo bonke abazimela ngaye.\n18:31 Ngokuba ngubani na onguThixo, ingenguye uYehova? Ngubani na oliliwa, ingenguThixo wethu?\n18:32 UloThixo undibhinqise ubukroti, Uyigqibelelisileyo indlela yam;\n18:33 Uzifanisayo iinyawo zam nezamaxhamakazi, Undimisayo emimangweni yam:\n18:34 Uzifundisayo ukulwa izandla zam, Zityede isaphetha sobhedu iingalo zam.\n18:35 Undinikileyo ingweletshetshe yosindiso lwakho: Sandixhasa isandla sakho sokunene; Ululamo lwakho lwandikhulisa.\n18:36 Wawenzela indawo ebanzi amanyathela am phantsi kwam, Amaxhwele am akahexa.\n18:37 Ndazisukela iintshaba zam, ndazifumana; Andabuya zada zaphela.\n18:38 Ndaziqoba; azaba nakuvuka, Zawa phantsi kweenyawo zam.\n18:39 Wandibhinqisa ubukroti ekulweni, Wabaguqisa phantsi kwam abasukela phezulu kum;\n18:40 Wandinika ikhosi leentshaba zam, Abandithiyayo ndababhangisa.\n18:41 Bazibika, akwabakho msindisi; Bazibika kuYehova, akabaphendula.\n18:42 Ndabacola, banjengothuli phambi komoya, Ndabaphalaza njengodaka lwezitrato.\n18:43 Wandisiza ekubambaneni kwabantu, Wandimisa ndayintloko yeentlanga; Abantu ebe ndingabazi bandikhonza.\n18:44 Besave ngeendlebe, bandithobela, Oonyana bolunye uhlanga bahanahanisa kum;\n18:45 Oonyana bolunye uhlanga bantshwenya, Baphuma bengcangcazela ekuvingcelweni kwabo.\n18:46 UYehova uhleli; lelokubongwa iliwa lam, Aphakanyiswe uThixo ondisindisayo.\n18:47 UloThixo wandinika impindezelo, Uzikhandaniselayo izizwe phantsi kwam;\n18:48 Undisiza ezintshabeni zam; Ewe, wena undiphakamisayo kwabasukela phezulu kum, Undihlangule kumfo ogonyamelayo.\n18:49 Ngenxa yoko ndiya kubulela kuwe, Yehova, phakathi kweentlanga, Ndivume kwigama lakho.\n18:50 Ulokhulisa iintsindiso zokumkani wakhe: Wenzayo inceba kumthanjiswa wakhe, KuDavide, nakwimbewu yakhe kude kuse ephakadeni.\n19:1 Kumongameli. Umhobe kaDavide. Izulu libalisa uzuko lukaThixo, Saye isibhakabhaka sixela umsebenzi wezandla zakhe.\n19:2 Imini impompozelela imini intetho, Ubusuku buxelela ubusuku ukwazi.\n19:3 Akukho ntetho, akukho mazwi, Apho singavakaliyo isandi sawo.\n19:4 Intambo yawo yokulinganisa iphume yaya ehlabathini lonke, Kwaba seziphelweni zelimiweyo ukukhuluma kwawo. Ilanga ulimisele intente kuwo,\n19:5 Lona linjengomyeni ke ephuma egumbini lakhe; Linemihlali njengegorha, ukugidima ngomendo walo.\n19:6 Kusesiphelweni sezulu ukuphuma kwalo, Ukujikeleza kwalo kusa eziphelweni zalo; Akukho nto inokusithela ebushushwini balo.\n19:7 Umyalelo kaYehova ugqibelele, ubuyisa umphefumlo; Isingqino sikaYehova sinyanisekile, sinika isiyatha ubulumko.\n19:8 Izimiselo zikaYehova zithe tye, zivuyisa intliziyo; Umthetho kaYehova unyulu, ukhanyisela amehlo.\n19:9 Ukoyika uYehova kucocekile, kumi ngonaphakade; Izigwebo zikaYehova ziyinyaniso, zibubulungisa kwaphela.\n19:10 Zinokunqweneleka kunegolide zona, nakunengcwengiweyo eninzi; Zimnandi kunobusi, kunencindi yobusi.\n19:11 Zikwamkhanyisela umkhonzi wakho; Ekuzigcineni mkhulu umvuzo.\n19:12 Ukulahleka, ngubani na okuqondayo? Ndenze msulwa kokusitheleyo.\n19:13 Kwanasekukhukhumaleni mnqande umkhonzi wakho; Makungandilawuli; ukuze ndandule ukuba ngogqibeleleyo, Ndibe msulwa ekukreqeni okukhulu.\n19:14 Makakholeke amazwi omlomo wam, nezicamango zentliziyo yam, Phambi kwakho, Yehova, liwa lam, mkhululi wam.\n20:1 Kumongameli. Umhobe kaDavide. Ngamana wakuphendula uYehova ngemini yembandezelo, Ngamana lakusa engxondeni igama likaThixo kaYakobi!\n20:2 Wakuthumela uncedo lwasengcweleni, Wakuxhasa eseZiyon!\n20:3 Wayikhumbula yonke iminikelo yakho yokudla, Wawafumana etyebile amadini akho anyukayo! (Phakamisani.)\n20:4 Wakunika ngokwentliziyo yakho, Walizalisa lonke icebo lakho!\n20:5 Singamemelela ngosindiso lwakho, Siphakamise iibhanile zethu egameni loThixo wethu; Azizalise uYehova zonke izicelo zakho.\n20:6 Ndiyazi ngoku ukuba uYehova ngumsindisi womthanjiswa wakhe; Uya kumphendula emazulwini akhe angcwele Ngobugorha obusindisayo besandla sakhe sokunene.\n20:7 Abanye bakhankanya iinqwelo zokulwa, abanye bakhankanye amahashe, Ke thina sikhankanya igama likaYehova uThixo wethu.\n20:8 Bona baguqile bawa; Thina siphakamile sema.\n20:9 Yehova, sindisa; Ukumkani asiphendule ngemini yokubiza kwethu.\n21:1 Kumongameli. Umhobe kaDavide. Yehova, uvuyile ngamandla akho ukumkani, Asikuko nokuba uyagcoba ngosindiso lwakho!\n21:2 Umnike umnqweno wentliziyo yakhe Akwasilandula isicelo somlomo wakhe. (Phakamisani.)\n21:3 Ngokuba umkhawulela ngeentsikelelo zokulungileyo, Umthwesa isithsaba segolide engcwengekileyo.\n21:4 Wacela ubomi kuwe, wampha, Wamnika imihla emide ngonaphakade kanaphakade.\n21:5 Lukhulu uzuko lwakhe ngosindiso lwakho; Ubeka phezu kwakhe indili nobungangamela.\n21:6 Ngokuba umenze waba yintsikelelo ngonaphakade, Umvuyisa ngovuyo ebusweni bakho.\n21:7 Ngokuba ukumkani ukholose ngoYehova, Ngenceba yOsenyangweni akayi kushukunyiswa.\n21:8 Isandla sakho siya kuzifumana zonke iintshaba zakho, Esokunene sakho siya kubafumana abakuthiyayo.\n21:9 Uya kubenza babe njengeziko lomlilo, wakubonakala. UYehova uya kubaginya ngomsindo wakhe, Nomlilo ubadle.\n21:10 Uya kusitshabalalisa isiqhamo sabo emhlabeni, Imbewu yabo koonyana babantu.\n21:11 Ngokuba bakuthobela ububi, Bacinga iyelenqe; abayi kufeza nto.\n21:12 Ngokuba uya kubenza bakunikele umhlana; Ngesaphetha sakho uya kuxuna iintolo zakho ebusweni babo.\n21:13 Phakama, Yehova, ngamandla akho; Siya kuvuma sibethe uhadi ngobugorha bakho.\n22:1 Kumongameli: ngeyelexhama lesifingo. Umhobe kaDavide. Thixo wam, Thixo wam, undilahleleni na? Ukude ngani na ekusindisweni kwam, nasemazwini okubonga kwam?\n22:2 Thixo wam, ndiyabiza emini, ungaphenduli; Nasebusuku ndiyabiza, andithozanyiswa noko.\n22:3 Ungcwele ke wena, Ungulohlala ezindumisweni zakwaSirayeli.\n22:4 Oobawo bakholosa ngawe, Bakholosa, wabasiza;\n22:5 Bakhala kuwe, basinda; Bakholosa ngawe, abadana.\n22:6 Ke mna ndingumbungu, andimntu; Ndisisingcikivo soluntu, into edelekileyo ebantwini.\n22:7 Bonke abandibonayo bayandigculela; Bayasineka, bahlunguzela intloko;\n22:8 Bathi, Makazilahlele kuYehova, amsize, Amhlangule kaloku, ngokuba emthandile.\n22:9 Ewe, nguwe umtyhobozisi wam esizalweni, Inkolosisi yam ndisemabeleni kama.\n22:10 Ndalahlelwa kuwe kwasesizalweni; Kwasembilinini kama ubunguThixo wam.\n22:11 Musa ukuba kude nam, ngokuba isondele imbandezelo, Ngokuba akukho mncedi.\n22:12 Ndingqongwe ziinkunzi ezininzi, Ndihlanganyelwe zeziziimbalasane zaseBhashan.\n22:13 Zindakhamele umlomo wazo, Njengengonyama eqwengayo, egqumayo.\n22:14 Ndiphalele njengamanzi, Ahlukene onke amathambo am; Yanjengomthwebeba intliziyo yam, Inyibilikile phakathi kwezibilini zam.\n22:15 Omile njengegophe amandla am, Ulwimi lwam lunamathele ekhuhlangubeni lam; Undibeka eluthulini lokufa.\n22:16 Ngokuba izinja zindirhawule, Ibandla labenzi bokubi lindingungele; Bagqobhoza izandla zam neenyawo zam.\n22:17 Ndinokuwabala onke amathambo am; Bona bayandijonga, bayandibonela,\n22:18 Babelana ngeengubo zam, Isambatho sam basenzela amaqashiso.\n22:19 Ke wena, Yehova, musa ukuba kude; Mandla am, khawuleza undincede.\n22:20 Wuhlangule ekreleni umphefumlo wam, Okuphela kwawo, ethupheni lenja.\n22:21 Ndisindise emlonyeni wengonyama, Nasezimpondweni zenqu uya kundiphendula.\n22:22 Ndiya kulazisa igama lakho kubazalwana bam, Ndikudumise phakathi kwebandla, ndithi,\n22:23 Nina nimoyikayo uYehova, mdumiseni; Nonke, mbewu kaYakobi, mzukiseni, Nimhlonele nina, mbewu yonke kaSirayeli.\n22:24 Kuba azidelekanga, azibanga nazothe kuye iintsizi zolusizana; Akabusithelisanga ubuso bakhe kuye; Ekuzibikeni kwakhe kuye waphulaphula.\n22:25 Ivela kuwe indumiso yam ebandleni elikhulu; Nezibhambathiso zam ndiya kuzizalisa phambi kwabamoyikayo.\n22:26 Baya kudla abalulamileyo, bahluthe; Baya kudumisa uYehova abamngxamelayo. Ngamana yaphila intliziyo yenu ngonaphakade!\n22:27 Ziya kukhumbula zibuyele kuYehova zonke iziphelo zehlabathi, Iqubude phambi kwakhe yonke imizalwane yeentlanga:\n22:28 Ngokuba bobukaYehova ubukumkani, Nguye umlawuli ezintlangeni.\n22:29 Baya kudla, baqubude, bonke abatyebileyo behlabathi; Baya kuguqa phambi kwakhe bonke abatshona eluthulini, Abangawugciniyo umphefumlo wabo.\n22:30 Imbewu iya kumkhonza; Kuya kubaliselwa isizukulwana ngayo iNkosi.\n22:31 Baya kuza baxele ubulungisa bayo Kubantu abaza kuzalwa, ukuba oko ukwenzile.\n23:1 Umhobe kaDavide. UYehova ngumalusi wam, andisweli lutho.\n23:2 Wenza ukuba mandibuthe emakriweni aluhlaza; Undithundezela emanzini angawokuphumla.\n23:3 Uyawubuyisa umphefumlo wam; Undikhaphela ezindleleni zobulungisa ngenxa yegama lakhe.\n23:4 Nokuba ndihamba emfuleni wethunzi lokufa, Andiyi koyika bubi, ngokuba unam wena; Intonga yakho, umsimelelo wakho, uyandithuthuzela.\n23:5 Undilungisela isithebe phambi kwababandezeli bam, Uyithambisa ngeoli intloko yam, Indebe yam iyaphalala.\n23:6 Inene, ndiya kulandelwa kokulungileyo nenceba Yonke imihla yobomi bam, Ndihlale endlwini kaYehova Imihla emide.\n24:1 Umhobe kaDavide. LelikaYehova ihlabathi nenzaliseko yalo, Elimiweyo, nabahleli kulo;\n24:2 Ngokuba yena waliseka phezu kweelwandle, Walizinzisa phezu kwemilambo.\n24:3 Ngubani na onokunyuka aye entabeni kaYehova? Ngubani na onokuma endaweni yakhe engcwele?\n24:4 Ngozandla zimsulwa, ontliziyo inyulu, Ongawuphakamiseli kwinkohlakalo umphefumlo wakhe, Ongafungiyo ngenkohliso.\n24:5 Uya kwamkela intsikelelo kuYehova, Nobulungisa kuThixo ongumsindisi wakhe.\n24:6 Siso eso isizukulwana sabamngxameleyo, Sababufunayo ubuso bakho, Thixo kaYakobi.(phakamisani.)\n24:7 Phakamisani iintloko zenu, masango; Niziphakamise, minyango yaphakade, Angene uKumkani wozuko.\n24:8 Ngubani na ke lo Kumkani wozuko? NguYehova onamandla, oligorha; NguYehova, igorha emfazweni.\n24:9 Phakamisani iintloko zenu, masango, Niziphakamise, minyango yaphakade, Angene lo Kumkani wozuko.\n24:10 Ngubani na ke yena uKumkani wozuko? NguYehova wemikhosi, Nguye lo Kumkani wozuko. (Phakamisani.)\n25:1 EkaDavide. Ndiwuphakamisela kuwe, Yehova, umphefumlo wam.\n25:2 Thixo wam, ndikholose ngawe, Mandingadani; Mazingandivuyeleli iintshaba zam.\n25:3 Ewe, bonke abo bakuthembayo abayi kudana; Kuya kudana abo banginiza ngelize.\n25:4 Ndazise iindlela zakho, Yehova, Ndifundise umendo wakho.\n25:5 Ndinyathelise enyanisweni yakho, undifundise; Ngokuba unguThixo ongumsindisi wam; Ndithembe wena yonke imihla.\n25:6 Khumbula iimfesane zakho, Yehova, neenceba zakho; Ngokuba kususela kwaphakade zikho.\n25:7 Musa ukuzikhumbula izono zobutsha bam, nokreqo lwam; Ndikhumbule ngokwenceba yakho wena, Ngenxa yokulunga kwakho, Yehova.\n25:8 Ulungile, uthe tye uYehova; Ngenxa yoko uyabayalela indlela aboni.\n25:9 Uyabanyathelisa abalulamileyo emasikweni akhe, Abafundise abalulamileyo indlela yakhe.\n25:10 Zonke iindlela zikaYehova ziyinceba nenyaniso, Kwabagcina umnqophiso wakhe nezingqino zakhe.\n25:11 Ngenxa yegama lakho, Yehova, xolela ubugwenxa bam, Ngokuba bukhulu bona.\n25:12 Ngubani na ke umntu omoyikayo uYehova? Womyalela indlela aya kuyinyula.\n25:13 Umphefumlo wakhe wohlala wonwabile, Imbewu yakhe ilidle ilifa ilizwe.\n25:14 Ukucweya kukaYehova kunabamoyikayo; Ubazisa umnqophiso wakhe.\n25:15 Amehlo am ahlala emi kuYehova, Ngokuba nguye ozirholayo eluthanjeni iinyawo zam.\n25:16 Ndibheke, undibabale, Ngokuba ndindodwa, ndibandezelekile.\n25:17 Iimbandezelo zentliziyo yam ziphangalalisiwe; Ndikhuphe ekucuthekeni kwam.\n25:18 Khangela ukucinezeleka kwam nokwaphuka kwam, Uxolele zonke izono zam.\n25:19 Zikhangele iintshaba zam, ngokuba zininzi; Zindithiye ngentiyo egonyamelayo.\n25:20 Wugcine umphefumlo wam, undihlangule; Mandingadani, ngokuba ndizimela ngawe.\n25:21 Ukugqibelela nokuthi tye makundilondoloze, Ngokuba ndithembele kuwe.\n25:22 Khulula uSirayeli, Thixo, Ezimbandezelweni zakhe zonke.\n26:1 EkaDavide. Lithethe ityala lam, Yehova, ngokuba mna ndihambe engqibelelweni yam, Ndakholosa ngoYehova, andahexa.\n26:2 Ndicikide, Yehova, undilinge; Nyibilikisa izintso zam nentliziyo yam.\n26:3 Ngokuba inceba yakho iphambi kwamehlo am, Ndihamba enyanisweni yakho.\n26:4 Andihlali namadoda akhohlakeleyo, Andihambi nabanyhwalazi.\n26:5 Ndilithiyile ibandla labenzi bobubi, Andihlali nabangendawo.\n26:6 Ndizihlamba kokumsulwa izandla zam, Ndisiphahle isibingelelo sakho, Yehova,\n26:7 Ukuba ndivakalise izwi lokubulela, Ndibalise ngayo yonke imisebenzi yakho ebalulekileyo.\n26:8 Yehova, ndiyalithanda ikhaya eliyindlu yakho, Nendawo yokuhlala kozuko lwakho.\n26:9 Musa ukuwubuthela umphefumlo wam ndawonye naboni, Ubomi bam ndawonye namadoda anamagazi;\n26:10 Wona azandla zinamanyala, Wona ezokunene zawo zizeleyo zizicengo.\n26:11 Mna ke okwam ndihamba engqibelelweni yam; Ndikhulule, undibabale.\n26:12 Unyawo lwam lumi endaweni ebanzi; Ndimbonga uYehova ndisemabandleni.\n27:1 EkaDavide. NguYehova umkhanyiseli wam nomsindisi wam, ndiya koyika bani na? NguYehova inqaba yobomi bam, ndiya kunkwantya ngabani na?\n27:2 Bakusondela kum abenzi bobubi ukuba badle inyama yam, Bakuza ababandezeli bam neentshaba zam kum, bakhubeka bawa bona.\n27:3 Bendingafanelana ndirhawulwe ngumkhosi isuka ingoyiki intliziyo yam; Bendingafanelana ndiphakanyelwe yimfazwe, ndisuka ndithembe noko.\n27:4 Ndicele nto-nye kuYehova, ndifuna yona: Ukuba ndihlale endlwini kaYehova yonke imihla yobomi bam, Ndibone ubuhle bukaYehova, ndiphicothe etempileni yakhe.\n27:5 Ngokuba undigusha emnqubeni wakhe ngemini yobubi, Undisithelisa esitheni lentente yakhe, Undimisa eweni.\n27:6 Ngoku ke iya kuphakama intloko yam phezu kweentshaba zam ezindijikelezayo, Ndibingelele ententeni yakhe imibingelelo yokuduma, Ndivume, ndibethe uhadi kuYehova.\n27:7 Yiva, Yehova, ndakubiza ngezwi lam; Ndibabale, undiphendule.\n27:8 Intliziyo yam ithi kuwe, kweli uthi, Funani ubuso bam, Ubuso bakho, Yehova, ndiya kubufuna.\n27:9 Musa ukubusithelisa ubuso bakho kum; Musa ukumgila umkhonzi wakho ngomsindo; Uluncedo lwam, musa ukundilahla; Musa ukundishiya, Thixo ondisindisayo.\n27:10 Ngokuba ubawo noma bandishiyile, Wesuka uYehova wandichola.\n27:11 Ndiyalele, Yehova, indlela yakho, Ndikhaphe emendweni othe tye, ngenxa yabandilaleleyo.\n27:12 Musa ukundinikela elitheni labandibandezelayo, Ngokuba ndiphakanyelwe ngamangqina axokayo, nabafutha ukugonyamela.\n27:13 Ndinge ndiphelelwe, koko bendikholwa kukuba ndokubona ukulunga kukaYehova Ezweni lobu bomi.\n27:14 Thembela kuYehova; Yomelela, ikhaliphe intliziyo yakho, Uthembele kuYehova.\n28:1 EkaDavide. Ndidanduluka kuwe, Yehova; Liwa lam, musa ukuzenza isithulu; Hleze, wakuthi cwaka kum, Ndifane nabahla baye emhadini.\n28:2 Yiva izwi lokukhunga kwam ekuzibikeni kwam kuwe, Ekuziphakamiseleni kwam izandla zam kwingcwele kangcwele.\n28:3 Musa ukundiqweqwedisa nabangendawo, Nabenzi bobutshinga; Abathetha uxolo kummelwane wabo, Benobubi ezintliziyweni zabo.\n28:4 Banike ngokwemisebenzi yabo, ngokobubi beentlondi zabo; Banike ngokwezenzo zezandla zabo; Babuyisele ngokwempatho yabo.\n28:5 Ekubeni bengayiqondi imisebenzi kaYehova, Nezenzo zezandla zakhe, Uya kubagungxula, angabakhi.\n28:6 Makabongwe uYehova, Kuba elivile ilizwi lokukhunga kwam.\n28:7 NguYehova amandla am nengweletshetshe yam; Yakholosa ngaye intliziyo yam, ndancedeka. Iyadlamka ke intliziyo yam, Ndiyamdumisa ngengoma yam.\n28:8 UYehova ungamandla kubo; Uligwiba losindiso kumthanjiswa wakhe yena.\n28:9 Sindisa abantu bakho, Usikelele ilifa lakho, Ubaluse, ubathwale kude kuse ephakadeni.\n29:1 Umhobe kaDavide. Mnikeni uYehova, nina nyana bakaThixo, Mnikeni uYehova uzuko namandla.\n29:2 Mnikeni uYehova uzuko lwegama lakhe; Qubudani kuYehova nivethe ezingcwele.\n29:3 Izwi likaYehova liphezu kwamanzi; UThixo wozuko uyadudumisa, KwauYehova phezu kwamanzi amaninzi.\n29:4 Izwi likaYehova linamandla, Izwi likaYehova linobungangamela;\n29:5 Izwi likaYehova laphula imisedare, UYehova waphula imisedare yaseLebhanon.\n29:6 Uyidlobisa njengenkonyana, ILebhanon neSiriyon njengethole lenqu.\n29:7 Izwi likaYehova lilenyise okwamalangatye omlilo,\n29:8 Izwi likaYehova liyenza isaqhwithi intlango, UYehova uyenza isaqhwithi intlango yaseKadeshe.\n29:9 Izwi likaYehova lizuzisa amaxhamakazi, Lihlube amahlathi; Etempileni yakhe into yonke iphela ithi, Luzuko!\n29:10 UYehova wahlala kunogumbe, UYehova uhleli enguKumkani ngonaphakade.\n29:11 UYehova uya kubanika abantu bakhe amandla; UYehova uya kubasikelela abantu bakhe ngoxolo.\n30:1 Umhobe: ingoma yokusungulwa kwayo indlu. EkaDavide. Ndiya kukuphakamisa, Yehova, kuba undirholile wandinyusa, Akwazivuyisa iintshaba zam ngam.\n30:2 Yehova, Thixo wam, Ndazibika kuwe, wandiphilisa;\n30:3 Yehova, uwunyusile kwelabafileyo umphefumlo wam, Wandidlisa ubomi, ukuba ndingehli ndiye emhadini.\n30:4 Mbetheleni uhadi uYehova, nina bakhe benceba, Nibulele isikhumbuzo sakhe esingcwele,\n30:5 Ngokuba yinto yephanyazo umsindo wakhe, Itarhu lakhe liyinto yobomi; Ngokuhlwa kulalisa ukulila, Kusasa kubakho ukumemelela.\n30:6 Ke mna ndathi ebunqobeni bam, Andiyi kushukunyiswa naphakade.\n30:7 Yehova, enkolosekweni yakho ubuyiqinisile intaba yam; Ubusithelisile ubuso bakho, ndakhwankqiswa.\n30:8 Ndadanduluka kuwe, Yehova, Ndakhunga kuYehova:\n30:9 Ndathi, Kukho nzuzo yani na egazini lam, ekuhleni kwam ndiye esihogweni? Lokudumisa na uthuli? loyixela na inyaniso yakho?\n30:10 Yiva, Yehova, undibabale; Yehova, yiba ngumncedi wam.\n30:11 Wakuguqula ukulila kwam, kwaba kukuqamba; Wandikhulula ezirhwexayo, wandibhinqisa uvuyo,\n30:12 Ukuze uzuko lwam luvume ngawe, lungathi cwaka. Yehova, Thixo wam, ndiya kubulela kuwe ngonaphakade.\n31:1 Kumongameli. Umhobe kaDavide. Ndizimela ngawe, Yehova, mandingaze ndidaniswe; Ndisize ngobulungisa bakho.\n31:2 Ndithobele indlebe yakho, ungxame undihlangule; Yiba liliwa eliligwiba kum, Indlu yemboniselo yokundisindisa.\n31:3 Ngokuba ingxondorha yam nemboniselo yam nguwe; Ngenxa yegama lakho uya kundikhapha undithundeze.\n31:4 Uya kundirhola esibatheni ababesigqumele mna, Ngokuba uyinqaba yam.\n31:5 Ndiwuyaleza umoya wam esandleni sakho; Uyandikhulula, Yehova, Thixo wenyaniso.\n31:6 Ndibathiyile abagcine amampunge angento yanto. Ndikholose ngoYehova mna.\n31:7 Ndiya kugcoba ndivuye ngenceba yakho, Ngenxa enokuba uzibonile iintsizi zam, Wazazi iingxingongo zomphefumlo wam;\n31:8 Akwandivingcela ngesandla seentshaba, Wazimisa endaweni ebanzi iinyawo zam.\n31:9 Ndibabale, Yehova, ngokuba ndibandezelekile; Lonakele kukukhathazeka iliso lam, nomphefumlo wam, nesisu sam;\n31:10 Ngokuba buphelile sisingqala ubomi bam, Neminyaka yam kukuncwina; Ayagexa amandla am ngobugwenxa bam, Namathambo am aluphele.\n31:11 Ngenxa yababandezeli bam bonke ndaba sisingcikivo, Ngokukodwa kubamelwane bam; ndaba yinto yokunkwantyisa kwabandaziyo; Abandibonayo ngaphandle baya ndibaleka.\n31:12 Ndilityelwe njengomfi ongasakhunjulwayo; Ndinjengesitya esiza kulahlwa.\n31:13 Ngokuba ndive intlebendwane yabaninzi, Ukunxunguphala ngeenxa zonke. Ekugquguleni kwabo ngam, Bankqangiyela ukuthabatha umphefumlo wam.\n31:14 Ke mna ndikholose ngawe, Yehova; Ndithi, UnguThixo wam wena.\n31:15 Asesandleni sakho amaxesha am; Ndihlangule esandleni seentshaba zam nakwabandisukelayo.\n31:16 Khanyisa ubuso bakho phezu komkhonzi wakho; Ndisindise ngenceba yakho.\n31:17 Yehova, andiyi kudana, ngokuba ndinqula wena; Makudane abangendawo, bathi cwaka kwelabafileyo.\n31:18 Mawubotshwe umlomo wobuxoki, Othetha ngelungisa ngokusa, Unekratshi, udela.\n31:19 Hayi, ubukhulu bokulunga kwakho, obuqwebele abakoyikayo, Obenzela abazimela ngawe, ebusweni boonyana babantu!\n31:20 Ubasithelisa esitheni lobuso bakho kumayelenqe abantu; Uyabagusha emnqubeni ekubambaneni kweelwimi.\n31:21 Makabongwe uYehova, Ngokuba endenzele inceba ebalulekileyo emzini onqabileyo.\n31:22 Ke mna ndathi ekuphakuzeleni kwam, Ndinqanyulwe andabakho emehlweni akho. Waliva noko izwi lokukhunga kwam ekuzibikeni kwam kuwe.\n31:23 Thandani uYehova, nonke nina bakhe benceba; NguYehova umlondolozi wabanyanisileyo, Umphindezeli ngokukhulu kowenza ngekratshi.\n31:24 Yomelelani, ikhaliphe intliziyo yenu Nonke nina nithembele kuYehova.\n32:1 EkaDavide. Eyokuqiqa. Hayi, uyolo lwakhe olukreqo luxolelweyo, osono siselelweyo!\n32:2 Hayi, uyolo lomntu angabubaleliyo uYehova kuye ubugwenxa, Ekungekho kukhohlisa emoyeni wakhe!\n32:3 Ndithi ndakuthi cwaka, aluphale amathambo am Ngokubhonga kwam imihla yonke.\n32:4 Ngokuba imini nobusuku, besinzima phezu kwam isandla sakho, Baguquka ubumanzi bam, baba kukubalela kwasehlotyeni. (Phakamisani.)\n32:5 Ndikwazisile isono sam, ubugwenxa bam andabugquma; Ndathi, Ndoluvuma ukreqo lwam kuYehova; Wabuxolela ke wena ubugwenxa besono sam. (Phakamisani.)\n32:6 Ngenxa yoko mabathandaze kuwe bonke abenceba ngexesha lokukufumana; Inene, ekukhukuleni kwamanzi amaninzi Akayi kufika kubo.\n32:7 Wena uyindawo yokuzimela kwam; uyandilondoloza embandezelweni, Undingqonge ngomemelelo lokusiza. (Phakamisani.)\n32:8 Ndiya kukuqiqisa ndikuyalele indlela owohamba ngayo: Ndiya kukucebisa, iliso lam likuwe.\n32:9 Musani ukuba njengamahashe, njengoondlebende, ukungabi nangqondo; Abazivatho zingumkhala, neentambo zokubabopha umlomo; Bengenazo abasayi kusondela kuwe.\n32:10 Mkhulu umvandedwa wongendawo; Ke okholosa ngoYehova, yena uya kumjikela ngenceba.\n32:11 Vuyani kuYehova, nigcobe, nina malungisa, Nimemelele, nina nonke bantliziyo zithe tye.\n33:1 Memelelani kuYehova, nina malungisa; Ibafanele abathe tye indumiso.\n33:2 Bulelani kuYehova ngohadi, Mbetheleni umrhubhe ontambo zilishumi.\n33:3 Mvumeleni ingoma entsha, Nilungise ukubetha ngelokuduma;\n33:4 Nokuba lithe tye ilizwi likaYehova, Konke akwenzayo kuthembekile.\n33:5 Ngumthandi wobulungisa nokusesikweni, Lizele ihlabathi yinceba kaYehova.\n33:6 Lenzeka ngelizwi likaYehova izulu, Umkhosi walo lonke ngomoya womlomo wakhe.\n33:7 Ulobutha njengemfumba amanzi olwandle, Ulobeka koovimba amanzi enzonzobila.\n33:8 Malimoyike uYehova lonke ihlabathi, Bamhlonele bonke abemi belimiweyo;\n33:9 Ngokuba wathetha, kwabakho; Wawisa umthetho yena, kwema.\n33:10 UYehova ulitshitshisile icebo leentlanga; Uzalele iingcinga zezizwe.\n33:11 Icebo likaYehova limi ngonaphakade, Iingcinga zentliziyo yakhe kwizizukulwana ngezizukulwana.\n33:12 Hayi, uyolo lohlanga oluThixo walo unguYehova; Lwabantu abanyulileyo, baba lilifa kuye.\n33:13 Uqondele esemazulwini uYehova; Uyababona bonke oonyana babantu;\n33:14 Esendaweni yakhe yokuhlala, wondele Kubemi bonke behlabathi:\n33:15 Ulobumba ngakunye intliziyo yabo, Uloqonda zonke izenzo zabo.\n33:16 Akukho kumkani osindiswa yimpi enkulu; Igorha alihlangulwa ngamandla alo amakhulu.\n33:17 Liyaxoka ihashe ukuba lingasindisa, Nangamandla alo amakhulu alinakusiza.\n33:18 Yabona, iliso likaYehova likubo abamoyikayo, Abalindele inceba yakhe,\n33:19 Ukuba awuhlangule ekufeni umphefumlo wabo, Abagcine ngexesha lendlala.\n33:20 Umphefumlo wethu ulindele kuYehova; Nguye uncedo lwethu, nengweletshetshe yethu.\n33:21 Ngokuba iya kuvuya ngaye intliziyo yethu, Sikholosile nje ngegama lakhe elingcwele.\n33:22 Inceba yakho mayibe phezu kwethu, Yehova, Njengoko sikulindeleyo kuwe.\n34:1 EkaDavide; oko wazenza ophambene ingqondo phambi koAbhimeleki, waza yena wamgxotha, wahamba. Ndiya kumbonga uYehova ngamaxesha onke, Ihlale isemlonyeni wam indumiso yakhe.\n34:2 Uya kuqhayisa umphefumlo wam ngoYehova; Bova abalulamileyo, bavuye.\n34:3 Menzeni mkhulu kunye nam uYehova, Siliphakamise kunye igama lakhe.\n34:4 Ndamfuna uYehova, wandiphendula; Wandihlangula kwiinto zonke endinxunguphala zizo.\n34:5 Babheka kuye, bakhazimla; Ubuso babo ababa nazintloni.\n34:6 Usizana lwadanduluka, weva uYehova, Walusindisa ezimbandezelweni zalo zonke.\n34:7 Isithunywa sikaYehova sibangqinga ngeenxa zonke abamoyikayo, Sibahlangule.\n34:8 Yivani, nibone ukuba ulungile uYehova. Hayi, uyolo lomfo ozimela ngaye!\n34:9 Moyikeni uYehova, nina bangcwele bakhe, Ngokuba abanakuswela abamoyikayo.\n34:10 Iingonyama ezintsha ziyaswela, zilambe; Ke bona abamfunayo uYehova abasweli nanye into elungileyo.\n34:11 Yizani, bonyana, phulaphulani kum; Ndonifundisa ukoyika uYehova.\n34:12 Ngubani na umntu obungxameleyo ubomi, Othanda imihla yokubona okulungileyo?\n34:13 Gcina ulwimi lwakho ebubini, Umlomo wakho ungathethi nkohliso.\n34:14 Suka ebubini, wenze okulungileyo; Funa uxolo, uluphuthume.\n34:15 Amehlo kaYehova akumalungisa, Iindlebe zakhe zisekuzibikeni kwawo.\n34:16 Ubuso bukaYehova bujonge abenzi bokubi, Ukuba akunqumle ehlabathini ukukhunjulwa kwabo.\n34:17 Akhala, weva uYehova; Wawahlangula ezimbandezelweni zawo zonke.\n34:18 Usondele uYehova kwabantliziyo zaphukileyo, Abasindise abamoya utyumkileyo.\n34:19 Buninzi ububi obulihlelayo ilungisa, Ke uYehova ulihlangula kubo bonke.\n34:20 Uyawagcina onke amathambo alo, Akwaphuki nalinye kuwo.\n34:21 Ububi buyambulala ongendawo; Abathiyi belungisa bayalithwala ityala.\n34:22 UYehova uyawukhulula umphefumlo wabakhonzi bakhe, Bangathwali tyala bonke abazimela ngaye.\n35:1 EkaDavide. Bambana, Yehova, nababambana nam. Yilwa nabalwa nam.\n35:2 Qubula ikhaka nengweletshetshe, Usuk\u2019ume undincede.\n35:3 Rhola umkhonto, uvingce indlela yabandisukelayo; Yithi kumphefumlo wam, Ndilusindiso lwakho.\n35:4 Mabadane, bahlazeke, abazungula umphefumlo wam; Mababuye umva babe neentloni abacinga ububi ngam.\n35:5 Mababe njengomququ phambi komoya, Sibatyhale isithunywa sikaYehova, bawe.\n35:6 Indlela yabo mayibe mnyama, ibe buthelezi, Sibasukele isithunywa sikaYehova.\n35:7 Ngokuba basigqumele mna isibatha sabo ngelize; Bawumbela isihogo umphefumlo wam ngelize.\n35:8 Mayimfikele intshabalalo engazi; Sibambise yena isibatha sakhe awasigqumayo, Eyele kuso ngesithonga.\n35:9 Wogcoba ke umphefumlo wam kuYehova, Ube nemihlali ngosindiso lwakhe.\n35:10 Onke amathambo am aya kuthi, Yehova, ngubani na onjengawe, Mhlanguli wosizana kowomeleleyo kunalo, Kwausizana nehlwempu kumxhakamfuli walo?\n35:11 Kusuke kwema amangqina angenakulungisa, Andibuza into endingayaziyo,\n35:12 Bandibuyekeza ngobubi esikhundleni sokulungileyo; Uxhwalekile umphefumlo wam.\n35:13 Ke mna, xa babesifa, iingubo zam bezizezirhwexayo; Ndawucinezela umphefumlo wam ngokuzila ukudla; Umthandazo wam wabuyela esifubeni sam.\n35:14 Ndaziphatha njengokungathi unguwethu, njengokungathi ungumzalwana kum, ukuhamba-hamba kwam; Ndanga ndingombambazelela unina, ukuthobeka kwam, ndinezimnyama zokuzila.\n35:15 Ke ekuqhwaleleni kwam avuya, ahlangana, Ahlangana ngam amagxidolo, nendingabaziyo, Bandihlalela ngentlamba, abayeka.\n35:16 Ngokweentshembenxa ezizihiba ngenxa yesonka, Banditshixizela amazinyo.\n35:17 Nkosi, kunini na ubonela? Buyisa umphefumlo wam kwiintshabalaliso zabo, Okuphela kwawo ezingonyameni.\n35:18 Ndiya kubulela kuwe ebandleni elikhulu, Ebantwini abaninzi ndiya kukudumisa.\n35:19 Mazingandivuyeleli iintshaba zam ngobuxoki, Bangatyandelani ngoshiyi abandithiyayo ngelize:\n35:20 Ngokuba abathethi luxolo; Bacinga amazwi enkohliso ngabanyhamnyhekileyo belizwe.\n35:21 Bayandisinekela, Bathi, Tshotsho! Tshotsho! Abonile amehlo ethu.\n35:22 Ubonile, Yehova; musa ukuba sisithulu; Nkosi, musa ukuba kude kum.\n35:23 Zivuse, uphaphe ngenxa yebango lam, Thixo wam, Nkosi yam, ngenxa yento esibambene ngayo.\n35:24 Lithethe ityala lam ngokobulungisa bakho, Yehova Thixo wam; Mabangandivuyeleli;\n35:25 Mabangathi entliziyweni yabo, Tshotsho! Nantso into ebe siyfuna! Mabangathi, Simginyile.\n35:26 Mabadane, babe neentloni kunye Abavuyela ububi bam; Bambathe ukudana nehlazo Abazikhulisayo kunam.\n35:27 Mabamemelele, bavuye, abananze ubulungisa bam, Bahlale besithi, Makabe mkhulu uYehova, Ulonanze uxolo lomkhonzi wakhe.\n35:28 Ulwimi lwam luya kuxela ubulungisa bakho Nendumiso yakho, imihla yonke.\n36:1 Kumongameli. Eyomkhonzi kaYehova. EkaDavide. Ongendawo unezihlabo zokreqo entliziyweni yakhe ngaphakathi, ezithi, Akukho koyika Thixo emehlweni akhe,\n36:2 Ngokuba zithetha kuye ngokugudileyo emehlweni akhe, Zide zimfumanise ubugwenxa bakhe, zimthiye.\n36:3 Amazwi omlomo wakhe abubutshinga nenkohliso; Uyekile ukwenza ngokuqiqa nangokulungisa.\n36:4 Ucinga ubutshinga elukhukweni lwakhe; Uzimisa endleleni engalungileyo; Akabucekisi ububi.\n36:5 Yehova, inceba yakho ifikelela ezulwini, Ukuthembeka kwakho esibhakabhakeni.\n36:6 Ubulungisa bakho bunjengeentaba zikaThixo; Izigwebo zakho zingamanzi enzonzobila; Usindisa umntu neenkomo, Yehova.\n36:7 Hayi, ixabiso lenceba yakho, Thixo! Oonyana babantu bazimela ngethunzi lamaphiko akho.\n36:8 Bayahluthiswa kukutyeba kwendlu yakho; Ubaseza emlanjeni weziyolo zakho.\n36:9 Ngokuba likuwe ithende lobomi; Ekukhanyeni kwakho sibona ukukhanya.\n36:10 Bolulele inceba yakho abakwaziyo, Ubolulele ubulungisa bakho abantliziyo zithe tye.\n36:11 Malungandinyatheli unyawo lonekratshi. Singandiphekuzi isandla sabangendawo.\n36:12 Nabo bewile abasebenzi bobutshinga; Batyhalwe bawa, ababa nakuvuka.\n37:1 EkaDavide. Musa ukuzivuthisa ngomsindo ngabenzi bobubi; Musa ukubamonela abenzi bobugqwetha.\n37:2 Ngokuba baya kusikwa kamsinyane njengengca, Babune njengohlaza oluphumayo.\n37:3 Kholosa ngoYehova, wenze okulungileyo; Lime ilizwe, ulandelane nokuthembeka.\n37:4 Ziyolise ngoYehova; Wokunika okunqwenelwa yintliziyo yakho.\n37:5 Yiyekele kuYehova indlela yakho, Ukholose ngaye; wokwenzela,\n37:6 Abuvelise njengokukhanya ubulungisa bakho, Nebango lakho njengemini enkulu.\n37:7 Yithi cwaka kuYehova, ulindele kuye; Musa ukuzivuthisa ngomsindo ngonempumelelo ngendlela yakhe, Ngomntu ofeza amayelenqe.\n37:8 Lahla umsindo, ushiye ubushushu; Musa ukuzivuthisa ngomsindo, kuba oko kusingisa ekwenzeni ububi kuphela.\n37:9 Ngokuba abenzi bobubi baya kunqunyulwa; Ke bona abamthembayo uYehova, baya kulidla ilifa ilizwe.\n37:10 Kusaya kuba mzuzwana, angabikho ongendawo; Uthi wakuyikhangela indawo yakhe, angabikho.\n37:11 Ke bona abalulamileyo baya kulidla ilifa ilizwe, Baziyolise ngobuninzi boxolo.\n37:12 Ongendawo ulenzela amayelenqe ilungisa, Ulitshixizela amazinyo akhe.\n37:13 INkosi iyamhleka, Ngokuba ibona ukuba iyeza imini yakhe.\n37:14 Barhole ikrele abangendawo, bagobe isaphetha sabo, Ukuba bawise usizana nehlwempu, Basike abandlela zithe tye.\n37:15 Ikrele labo liya kungena kwakweyabo intliziyo, Zaphuke izaphetha zabo.\n37:16 Ilungile intwana elinayo ilungisa, Kunentabalala abanayo abangendawo abaninzi:\n37:17 Ngokuba iingalo zabangendawo ziya kwaphulwa; NguYehova umxhasi wamalungisa.\n37:18 NguYehova umazi wemihla yabagqibeleleyo, Nelifa labo liya kuba ngunaphakade.\n37:19 Abayi kudana ngexesha lobubi; Baya kuhlutha ngeemini zendlala:\n37:20 Ngokuba abangendawo bayatshabalala; Iintshaba zikaYehova zinjengobuhle bamadlelo; Ziya kuphela njengomsi, ziphele.\n37:21 Uyaboleka ongendawo, angabuyisi; Ke lona ilungisa liyababala, liphe.\n37:22 Ngokuba abasikelelweyo nguye baya kulidla ilifa ilizwe, Banqanyulwe abatshabhisiweyo nguye.\n37:23 Amanyathela omfo aqiniswa nguYehova, Ayithande indlela yakhe.\n37:24 Ewile, akayi kuqungquluza, Ngokuba nguYehova umxhasi wesandla sakhe.\n37:25 Ndaka ndamtsha, kungokunje ndimdala; Ukanti andizanga ndilibone ilungisa lishiywa, Nembewu yalo ivukela ukutya.\n37:26 Imihla yonke liyababala, liboleke abanye; Nembewu yalo iyintsikelelo.\n37:27 Suka ebubini, wenze okulungileyo, Uhlale ngonaphakade.\n37:28 Ngokuba uYehova uthanda okusesikweni, Angabashiyi abenceba bakhe; Bagciniwe ngonaphakade: Ke yona imbewu yongendawo iyanqanyulwa.\n37:29 Amalungisa aya kulidla ilifa ilizwe, Ahlale kulo ngonaphakade.\n37:30 Umlomo welungisa uxela ubulumko, Nolwimi lwalo luthetha okusesikweni.\n37:31 Umyalelo woThixo walo usentliziyweni yalo; Akayi kuhexa amanyathela alo.\n37:32 Ongendawo uyalilalela ilungisa, Ufuna ukulibulala.\n37:33 UYehova akalinikeli esandleni sakhe, Angaligwebi ekuthethweni kwetyala lalo.\n37:34 Thembela kuYehova, ugcine indlela yakhe; Wokuphakamisa, ulidle ilifa ilizwe; Ekunqanyulweni kongendawo wobonela.\n37:35 Ndimbonile ongendawo, oyingqwangangqwili, Exanda njengomthi omilileyo, uluhlaza;\n37:36 Kwadlula umntu, nanko engasekho; Ndamfuna, akafumaneka.\n37:37 Gcina ogqibeleleyo, ukhangele othe tye; Ngokuba izivela-mva zezomntu woxolo.\n37:38 Ke bona abangendawo batshatyalaliswa kuphele; Izivela-mva zongendawo ziyanqanyulwa.\n37:39 Usindiso lwamalungisa luphuma kuYehova; Uligwiba lawo ngexesha lembandezelo.\n37:40 UYehova uyawanceda, awasindise, Awasindise kongendawo, awasindise, Ngokuba azimela ngaye.\n38:1 Umhobe kaDavide: eyokukhumbuza. Yehova, musa ukundohlwaya unoburhalarhume, Ungandithethisi unobushushu:\n38:2 Ngokuba iintolo zakho zitshone kum, Sehla kanzima kum isandla sakho.\n38:3 Akukho ndawo iphilileyo enyameni yam, ngenxa yokubhavuma kwakho; Akukho kuphila emathanjeni am, ngenxa yezono zam.\n38:4 Ngokuba ubugwenxa bam bugqithile entlokweni yam, Bundisinda njengomthwalo onzima.\n38:5 Iyanuka, iyabhiqiza imivumbo yam, Ngenxa yokumatha kwam.\n38:6 Ndiyapenapena, ndisibekeke kakhulu; Yonke imini ndihamba-hamba ngezimnyama zokuzila.\n38:7 Ngokuba kuyatshisa emihlubulweni yam, Akukho ndawo iphilileyo enyameni yam.\n38:8 Ndiqobekile, ndityumkile kakhulu; Ndibhongiswa kukugcuma kwentliziyo yam.\n38:9 Nkosi yam, uphambi kwakho wonke umnqweno wam, Nokuncwina kwam akusithele kuwe.\n38:10 Iphaphu lam liyabetha, ndiphelelwe ngamandla; Ukukhanya kwamehlo am, nako oko, akukho kum.\n38:11 Abandithandayo nowethu bamele mgama ekubethweni kwam, Nezalamane zam zimi kude.\n38:12 Bandithiyele abafuna umphefumlo wam; Abangxamele ukuba ndihlelwe bububi bathetha izinto zokweyelisela, Bacamanga inkohliso imini yonke.\n38:13 Ke mna ndinjengesithulu, andiva; Njengesidenge esingawuvuliyo umlomo waso.\n38:14 Ndinjengomntu ongeva nto, Omlomo ungenakuthethisa.\n38:15 Ngokuba ndilindele kuwe, Yehova; Kuya kuphendula wena, Nkosi yam, Thixo wam,\n38:16 Ngokuba ndithi, Hleze bandivuyelele Bona abo bangazikhulisayo kum ekutyibilikeni konyawo lwam.\n38:17 Ngokuba ndihlalele ukujingxela, Umvandedwa wam uphambi kwam amaxesha onke.\n38:18 Ngokuba ndiya kubuxela ubugwenxa bam; Ndinesithukuthezi ngenxa yesono sam.\n38:19 Ke zona iintshaba zam ziphilile, ziziimfidi; Baninzi abandithiyileyo bexoka;\n38:20 Abandibuyekeza ngobubi esikhundleni sokulungileyo Bayandichasa, ngenxa yokuphuthuma kwam okulungileyo.\n38:21 Musa ukundishiya, Yehova; Thixo wam, musa ukuba kude nam.\n38:22 Khawuleza undincede, Nkosi yam, Msindisi wam.\n39:1 Kumongameli, kuYedutun. Umhobe kaDavide. Ndathi, Ndiya kuzigcina iindlela zam, Ndingoni ngolwimi lwam; Ndiya kuwugcina ngokuwubopha umlomo wam, Xa ongendawo asephambi kwam.\n39:2 Ndaba sisidenge, ndathozama, Ndazisulungisa nakokulungileyo; Wagxobha-gxobheka umvandedwa wam.\n39:3 Yaba nobushushu intliziyo yam phakathi kwam, Ekucamangeni kwam wavutha umlilo. Ndathetha ke ngolwimi lwam,\n39:4 Ndathi, Ndazise, Yehova, isiphelo sam, Nomlinganiso wemihla yam, into oyiyo; Mandikwazi ukunqamka kwam, into okuyiyo.\n39:5 Yabona, uyenze imihla yam yangangobubanzi besandla; Nobomi bam bunjengento engento phambi kwakho; Ngumphunga nje bonke abantu, nakuba bemi. (Phakamisani.)\n39:6 Uhamba-hamba umntu enjengesithunzi nje kodwa; Baxokozela ngomphunga nje kodwa; Bafumba, bengazi ukuba ngubani na oya kukuhlanganisa.\n39:7 Ngoku ndiya kuthembela kwintoni na, Nkosi yam? Ukulinda kwam kukuwe.\n39:8 Ndihlangule elukreqweni lwam lonke; Musa ukundimisela ingcikivo yesidenge.\n39:9 Ndisisidenge, umlomo wam andiwuvuli, Ngokuba oko kwenziwe nguwe.\n39:10 Sisuse kum isibetho sakho; Mna ndiyaphela kukutyundyutha kwesandla sakho.\n39:11 Wakumthethisa umntu ngezohlwayo ngenxa yobugwenxa, Uyasonakalisa njengenundu isoya sakhe; Bangumphunga nje kodwa bonke abantu. (Phakamisani.)\n39:12 Yiva umthandazo wam, Yehova, Kubekele indlebe ukuzibika kwam. Musa ukuthi tu ezinyembezini zam; Ngokuba ndingumphambukeli kuwe, Undwendwe, njengoobawo bonke.\n39:13 Bheka phaya, ungandikhangeli, khendincumeze, Ndingekemki ndingabi sabakho.\n40:1 Kumongameli. Umhobe kaDavide. Ndathembela, ndithembele kuYehova, Wathoba, wakuva ukuzibika kwam.\n40:2 Wandirhola emhadini wentshabalalo, naseludakeni lomgxobhozo, Wazimisa eliweni iinyawo zam, wakuqinisa ukunyathela kwam.\n40:3 Wabeka emlonyeni wam ingoma entsha, indumiso kuThixo wethu; Abaninzi bayabona, boyike, Bakholose ngoYehova.\n40:4 Hayi, uyolo lwendoda emenze uYehova inkoloseko yayo, Ingabheki kwabagwagwisayo, nakubanxaxhi abanamanga!\n40:5 Yehova, Thixo wam, wena wenze okuninzi ngemisebenzi yakho ebalulekileyo, Nangeengcinga zakho kuthi; Akukho nto inokulinganiswa nawe; Okanye bendiya kuyixela, ndithethe ngayo; Ke ziyinkohla engenakubalwa.\n40:6 Akunanze mbingelelo namnikelo wakudla; Iindlebe zam uzivulile; Akubizi dini linyukayo nadini lasono.\n40:7 Ndaza ndathi, Yabona, Ndiyeza; encwadini esongwayo kubhaliwe ngam.\n40:8 Ukwenza okulikholo kuwe, Thixo wam, ndikunanzile; Nomyalelo wakho usezibilinini zam ngaphakathi.\n40:9 Ndashumayela iindaba ezilungileyo zobulungisa ebandleni elikhulu; Yabona, andiwuthintelanga umlomo wam; Yehova, wena uyazi.\n40:10 Ubulungisa bakho andibugqumanga phakathi kwentliziyo yam; Ndakukhankanya ukuthembeka kwakho nosindiso lwakho; Andiyikhanyelanga inceba yakho nenyaniso yakho ebandleni elikhulu.\n40:11 Wena, Yehova, akuyi kuzithintela iimfesane zakho kum; Inceba yakho nenyaniso yakho iya kuhlala indilondoloza.\n40:12 Ngokuba zindijikele izinto ezimbi, ezide azaba nakubalwa; Bundifikele ubugwenxa bam, andinakubukhangela; Buninzi kuneenwele zentloko yam; Ndimkelwe yintliziyo.\n40:13 Ngamana, Yehova, wandihlangula; Yehova, wakhawuleza wandinceda!\n40:14 Mabadane babe neentloni kuphele Abazungula umphefumlo wam ukuze bawuphephethe; Mababuye muva bahlazeke\n40:15 Mabamangaliswe ngumvuzo wehlazo labo Abathi kum, Tshotsho! Tshotsho!\n40:16 Mababe nemihlali bavuye ngawe bonke abakufunayo, Abaluthandayo usindiso lwakho bahlale besithi, Makenziwe mkhulu uYehova.\n40:17 Mna ke ndilusizana, ndilihlwempu; INkosi iya kundikhumbulela. Umncedi wam nomsindisi wam nguwe; Thixo wam, musa ukulibala.\n41:1 Kumongameli. Umhobe kaDavide. Hayi, uyolo lwalowo unyamekela ihlwempu! Ngomhla wobubi uYehova uya kumhlangula.\n41:2 UYehova uya kumlondoloza amgcine, aphile. Kuya kuthiwa unoyolo yena ehlabathini; Ungamnikeli elitheni leentshaba zakhe.\n41:3 UYehova uya kumxhasa elukhukweni lobulwelwe; Uya kuluguqula ukhuko lwakhe lonke esifeni sakhe.\n41:4 Ndithi mna, Yehova, tarhu; Philisa umphefumlo wam, ngokuba ndonile kuwe.\n41:5 Iintshaba zam zithetha kakubi ngam; Zithi, Uya kufa nini na, lidake igama lakhe?\n41:6 Nothe weza kundilunguza, uthetha into ekhohlakeleyo; Intliziyo yakhe ibutha ubutshinga; Uphuma phandle, abuthethe.\n41:7 Basebezelana ngam bonke abandithiyayo; Bacinga ububi ngam.\n41:8 Bathi, Unanyekwe bubutshijolo, Engoleleyo nje, akayi kubuya avuke.\n41:9 Kwanendoda ebixolelene nam, ebe ndikholose ngayo, Ebisidla isonka sam, indiphakamisele isithende sayo.\n41:10 Wena Yehova, ndibabale, undiphakamise, Ndibabuyekeze.\n41:11 Ndazi ngale nto, ukuba undinonelele, Yokokuba lungenakundidumela utshaba lwam.\n41:12 Mna ekugqibeleleni kwam uyandixhasa, Undimisa phambi kwakho ngonaphakade.\n41:13 Makabongwe uYehova, uThixo kaSirayeli, kususela kwaphakade kude kuse ephakadeni. Amen, amen.\n42:1 Kumongameli: eyokuqiqa; eyoonyana bakaKora. Njengexhama elitsalela emifuleni yamanzi, Wenjenjalo ukutsalela kuwe, Thixo, umphefumlo wam.\n42:2 Umphefumlo wam unxanela uThixo, uThixo ophilileyo; Ndiya kufika nini na, ndibonakale ebusweni bukaThixo?\n42:3 Iinyembezi zam zaba kukudla kwam imini nobusuku, Bakuthi kum imihla yonke, Uphi na uThixo wakho?\n42:4 Ndikhumbula oku, ndiwuphalazela kum umphefumlo wam, Ukuhamba kwam nezihlwele ndisiya endlwini kaThixo, Sinezwi lokumemelela nokubulela, siyingxokolo evuyayo.\n42:5 Kungani na ukuba usibekeke, mphefumlo wam; Kungani na ukuba ugule ngaphakathi kwam? Lindela kuThixo, ngokuba ndisaya kubuya ndibulele kuye, Olusindiso lobuso bam, noThixo wam.\n42:6 Thixo wam, umphefumlo wam usibekekile kum; ngenxa yoko ndikhumbula wena Ezweni laseYordan, nakweleHermon, entabeni yeMitsare.\n42:7 Amanzi anzongonzongo abiza amanzi anzongonzongo ngesandi seengxangxasi zakho; Onke amaza akho alwayo, amaza akho agugumayo, adlule phezu kwam.\n42:8 Emini uYehova uya kuyiwisela umthetho inceba yakhe, Nasebusuku ukuvuma ngaye kunam, Ukuthandaza kuThixo wobomi bam.\n42:9 Ndithi ke kuThixo oyingxondorha yam, Undilibele ngani na? Ndihambelani na ngezimnyama zokuzila ngokuxina kotshaba?\n42:10 Ngento ephehlayo emathanjeni am, bayandingcikiva abandibandezelayo, Ngokuthi kwabo kum imihla yonke, Uphi na uThixo wakho?\n42:11 Kungani na ukuba usibekeke, mphefumlo wam; Kungani na ukuba ugule ngaphakathi kwam? Lindela kuThixo, ngokuba ndisaya kubuya ndibulele kuye, Olusindiso lobuso bam, noThixo wam.\n43:1 Lithethe ityala lam, Thixo, ubambane ngenxa yam nohlanga olungenanceba; Ndisindise endodeni ekhohlisayo, enobugqwetha.\n43:2 Ngokuba unguThixo oyinqaba yam; undihlambelani na? Ndihambelani na ngezimnyama zokuzila, ngokuxina kotshaba?\n43:3 Thuma ukukhanya kwakho nenyaniso yakho, zindikhaphe, Zindise entabeni yakho engcwele, Naseminqubeni yakho.\n43:4 Ndoya ke esibingelelweni sikaThixo, KuThixo wovuyo lwam olugcobayo, Ndibulele kuwe ngohadi, Thixo onguThixo wam.\n43:5 Kungani na ukuba usibekeke, mphefumlo wam? Kungani na ukuba ugule ngaphakathi kwam? Lindela kuThixo, ngokuba ndisaya kubuya ndibulele kuye, Olusindiso lobuso bam, noThixo wam.\n44:1 Kumongameli: eyoonyana bakaKora: eyokuqiqa. Thixo, sivile ngeendlebe zethu, oobawo basibalisela, Ngomsebenzi owawenza ngemihla yabo, ngemihla yamandulo:\n44:2 Okokuba isandla sakho sagqogqa iintlanga, sabatyala bona; Saviva izizwe, sabanabisa bona.\n44:3 Ngokuba abalihluthanga ilizwe ngekrele labo, Abazisindisanga ngengalo yabo; Sisandla sakho sokunene, nengalo yakho, nokukhanya kobuso bakho; Ngokuba wawunesisa kubo.\n44:4 Wena unguKumkani wam, Thixo; Yitsho lubekho usindiso kuYakobi.\n44:5 Ngawe sobangqula abasibandezelayo; Egameni lakho sobagqusha abasukela phezulu kuthi.\n44:6 Ngokuba andikholose ngasaphetha sam; Andisindiswa ngakrele lam.\n44:7 Hayi! Nguwe osisindisayo kwabasibandezelayo, Ubadanise abasithiyileyo.\n44:8 NgoThixo sidumisa imihla yonke, Sibulele kwigama lakho ngonaphakade. (Phakamisani.)\n44:9 Noko ke usihlambile, usihlazile, Akwaphuma nemikhosi yethu.\n44:10 Usibuyise umva phambi kombandezeli; Abasithiyileyo basiphangile okwabo.\n44:11 Wasinikela njengeegusha ezidliwayo; Wasichitha-chitha ezintlangeni;\n44:12 Wathengisa ngabantu bakho, akwazuza, Akwalinyusa ixabiso labo.\n44:13 Wasenza isingcikivo kubamelwane bethu, Isigculelo nesicukucezo kwabasijikelezileyo.\n44:14 Wasenza umzekelo ezintlangeni, Abokuhlunguzelelwa intloko ezizweni.\n44:15 Yonke imihla ihlazo lam liphambi kwam, Nokudana kobuso bam kundigubungele,\n44:16 Ngenxa yezwi lomngcikivi nomnyelisi, Ngenxa yokukhangela kotshaba nomphindezeli.\n44:17 Oko konke kusifikele, asikulibalanga wena, Asixokanga emnqophisweni wakho;\n44:18 Ayibuyanga umva intliziyo yethu, Ukunyathela kwethu akuthanga gu bucala emendweni wakho;\n44:19 Ukuba usityumze endaweni yeempungutye, Usigubungele ngethunzi lokufa.\n44:20 Ukuba besililibele igama loThixo wethu, Sazolulela kuthixo wasemzini izandla zethu,\n44:21 Ubengayi kuyigoca-goca na uThixo loo nto, Ngokuba ezazi iindawo ezifihlakeleyo zentliziyo?\n44:22 Hayi, Ngenxa yakho sibulawa imihla yonke; Kuthiwa siziigusha zokuxhelwa.\n44:23 Vuka, ulaleleni na, Nkosi yam? Qabuka, ungasihlambi kuphele.\n44:24 Ubusitheliselani na ubuso bakho, Ukulibale ukucinezelwa kwethu, nokuxinwa kwethu?\n44:25 Ngokuba usibekeke eluthulini umphefumlo wethu, Sanamathela emhlabeni isisu sethu.\n44:26 Khawusuk\u2019 ume usincede, Usikhulule ngenxa yenceba yakho.\n45:1 Kumongameli: ngeyeenyibiba. Eyoonyana bakaKora; eyokuqiqa. Ingoma yeentanda. Intliziyo yam iphuphuma ilizwi elihle, Ndisithi, Into endiyenzayo isingise kukumkani; Ulwimi lwam lusiba lombhali okhawulezayo.\n45:2 Umhle wamhle ngaphezu koonyana babantu; Kugalelwe ubumnandi emlonyeni wakho; Ngenxa yoko ukusikelele uThixo wakho ngonaphakade.\n45:3 Bhinqa ikrele lakho ethangeni, gorha, Bhinqa indili yakho nobungangamela bakho.\n45:4 Tyhudisa, ukhwele uhambe, unobungangamela bakho, Ngenxa yenyaniso, nolulamo olunobulungisa. Sikuyale ngezinto ezoyikekayo isandla sakho sokunene.\n45:5 Iintolo zakho zitsolile; Kuya kuwa izizwe phantsi kwakho; Zitsolile entliziyweni yeentshaba zokumkani.\n45:6 Itrone yakho, itrone kaThixo, ingunaphakade kanaphakade; Yintonga ethe tye intonga yobukumkani bakho.\n45:7 Uthanda ubulungisa, uthiye okungendawo; Ngenxa yoko ukuthambisile uThixo, uThixo wakho, Ngeoli yemihlali ngaphezu kwabalingane bakho.\n45:8 Ziyimore nehaloti nekasiya iingubo zakho zonke; Emabhotweni eempondo zeendlovu uhadi lukuvuyisile.\n45:9 Kukho iintombi zokumkani phakathi kwabathandekayo bakho; Ukumkanikazi umi ngasekunene kwakho, Enxibe igolide ecikizekileyo yakwaOfire.\n45:10 Yiva, ntombi, ubone, uthobe indlebe yakho, Ubalibale abantu bakowenu, nendlu kayihlo;\n45:11 Akubunqwenela ubunzwakazi bakho ukumkani, Woqubuda kuye, ngokuba eyinkosi yakho.\n45:12 Intombi enguTire, izityebi zabantu, Ziya kukuncekelela ngomnikelo.\n45:13 Bubuyokoyoko bodwa intombi yokumkani kweliphakathi igumbi. Isambatho sayo sesilukwe igolide.\n45:14 Isiwa kukumkani ineengubo ezimfakamfele; Ziyilandela iintombi ezingowayo, Zisiwa kuwe,\n45:15 Zisiwa ngovuyo nangomgcobo, Zingene ebhotweni lokumkani.\n45:16 Endaweni yooyihlo iya kuba ngoonyana bakho; Uya kubamisa babe ngabathetheli ehlabathini lonke.\n45:17 Ndiya kulikhankanya igama lakho kwizizukulwana ngezizukulwana zonke; Ngenxa yoko izizwe ziya kubulela kuwe ngonaphakade kanaphakade.\n46:1 Kumongameli: eyoonyana bakaKora; ngeyeentombi. Ingoma. UThixo ulihlathi, uligwiba kuthi; Ezimbandezelweni ufumaneke eluncedo kunene.\n46:2 Ngenxa yoko asoyiki ekuphendukeni kwehlabathi, Ekudilikeleni kweentaba esazulwini solwandle.\n46:3 Makagqume alephuze amanzi alo, Iintaba zinyikime ngokukratsha kwalo. (Phakamisani.)\n46:4 Kukho umlambo ozibhaxa zivuyisa umzi kaThixo, Ingcwele yeminquba yOsenyangweni.\n46:5 UThixo uphakathi kwawo, awushukunyiswa; UThixo uyawunceda kwasekuzeni kokusa.\n46:6 Ziyaxokozela iintlanga, ziyashukuma izikumkani: Ukhupha izwi lakhe, linyibilike ihlabathi.\n46:7 UYehova wemikhosi unathi, Ingxonde yethu nguThixo kaYakobi. (Phakamisani.)\n46:8 Yizani nikhangele imisebenzi kaYehova: Owenze iziphanziso ehlabathini;\n46:9 Ulophelisa iimfazwe kude kuse eziphelweni zehlabathi; Waphula isaphetha, angqumze umkhonto, Atshise iinqwelo zokulwa ngomlilo.\n46:10 Yekani, nazi ukuba ndinguThixo mna. Ndiya kuphakanyiswa ezintlangeni, ndiya kuphakanyiswa ehlabathini.\n46:11 UYehova wemikhosi unathi, Ingxonde yethu nguThixo kaYakobi. (Phakamisani.)\n47:1 Kumongameli; eyoonyana bakaKora. Umhobe. Nonke zizwe, bethani izandla, Dumani kuThixo ngezwi lokumemelela.\n47:2 Ngokuba uYehova Osenyangweni uyoyikeka; Ngukumkani omkhulu ehlabathini lonke.\n47:3 Uzikhandanisela phantsi kwethu izizwe, Izizwe phantsi kweenyawo zethu.\n47:4 Usinyulela ilifa lethu, Iqhayiya likaYakobi awamthandayo. (Phakamisani.)\n47:5 UThixo unyukile, kudunywa; Unyukile uYehova, kuhlokoma isigodlo.\n47:6 Mbetheleni uhadi uThixo, mbetheleni, Mbetheleni uhadi uKumkani wethu, mbetheleni!\n47:7 Ngokuba uKumkani wehlabathi lonke nguThixo; Mbetheleni ngeyokuqiqa.\n47:8 UThixo nguKumkani weentlanga; UThixo uhleli etroneni yakhe engcwele.\n47:9 Amanene ezizwe ahlanganisene, Abantu boThixo ka-Abraham; Ngokuba iingweletshetshe zehlabathi zezikaThixo; Unyusiwe kakhulu yena.\n48:1 Ingoma. Umhobe. Eyoonyana babaKora. Mkhulu uYehova, engowokudunyiswa kunene Emzini kaThixo wethu, entabeni yakhe engcwele.\n48:2 Intle ukuphakama kwayo, yimihlali yehla bathi lonke Intaba yaseZiyon, intlomo yasentla, Umzi woKumkani omkhulu.\n48:3 UThixo, ezingxandeni zawo ezinde, Wazelwa ukuba yingxonde.\n48:4 Kuba nabo ookumkani babenqophisene, Bawela beza kunye;\n48:5 Bakuthi ukubona, abakhuluma; Bakhwankqa, babaleka buphuthuphuthu;\n48:6 Babanjwa khona kukuthuthumela, Kukuzibhijabhija njengozalayo.\n48:7 Ngomoya wasempumalanga Uyazivitha iinqanawa zaseTarshishe.\n48:8 Njengoko sikuvileyo, sibone kunjalo Emzini kaYehova wemikhosi, emzini kaThixo wethu: UThixo uyawuzinzisa ngonaphakade. (Phakamisani.)\n48:9 Sayikhumbula, Thixo, inceba yakho Phakathi kwetempile yakho.\n48:10 Njengoko linjalo igama lakho, Thixo, Lunjalo udumiso lwakho, Kwesa eziphelweni zehlabathi; Isandla sakho sokunene sizele bubulungisa.\n48:11 Mayivuye intaba yaseZiyon, Agcobe amagxamesi akwaYuda, Ngenxa yezigwebo zakho.\n48:12 Yijikelezeni iZiyon, niyizunguleze; Zibaleni iinqaba zayo ezinde.\n48:13 Gqalani ungqameko lomsele wayo; Candani ezingxandeni zayo ezinde; Ukuze nibalisele isizukulwana esizayo,\n48:14 Ukuba lo Thixo nguThixo wethu ngonaphakade kanaphakade, Yena uya kusikhapha kude kuse ekufeni.\n49:1 Kumongameli: eyoonyana bakaKora. Umhobe. Yivani oku, nina nonke zizwe; Bekani indlebe, nina nonke, bemi beli phakade,\n49:2 Nina nyana boluntu, nani nyana bamadoda, Nina zityebi, nani mahlwempu kunye.\n49:3 Umlomo wam uza kuthetha ubulumko; Nokucamanga kwentliziyo yam kukuqonda.\n49:4 Ndiya kuyithobela emzekelisweni indlebe yam, Ndiya kuyivulela ngohadi intsonkotha yam.\n49:5 Ndoyikelani na emihleni yobubi, Xa ubugwenxa babandibambisayo bundijikelayo?\n49:6 Abo bakholose ngemfuyo yabo, Baqhayisa ngobuninzi bobutyebi babo.\n49:7 Akukho bani unokukhulula umzalwana; Akanakumnika uThixo isicamagusho ngaye\n49:8 (Sinqabile isikhululo somphefumlo wabo, Masincanywe ngonaphakade),\n49:9 Sokuba ahlale esidla ubomi ngamaxesha onke, Angasiboni isihogo.\n49:10 Ngokuba ubona izilumko zibhubha, Bedaka kunye abanyabileyo nezityhakala, Bayishiye nabanye imfuyo yabo.\n49:11 Imbilini yabo ithi izindlu zabo zingunaphakade. Iminquba yabo ikwizizukulwana ngezizukulwana; Bayithiya imihlaba yabo ngamagama abo.\n49:12 Ke umntu enobuhandiba akanakuhlala, Ufana neenkomo ezi zitshabalalayo.\n49:13 Yiyo le indlela yabanyabileyo, Neyabo babalandelayo, bekholiswa ngumlomo wabo. (Phakamisani.)\n49:14 Babuthe ngokweegusha kwelabafileyo; Ukufa kuyabalusa; Abathe tye bayabanyathela kwakusa; Isithomo sabo abo siyonakala kwelabafileyo, singabi nandawo yakuhlala.\n49:15 Kodwa uThixo uya kuwukhulula umphefumlo wam esandleni selabafileyo, Ngokuba eya kundithabatha. (Phakamisani.)\n49:16 Musa ukoyika, yakuba sisityebi indoda, Bakwanda ubuqaqawuli bendlu yayo:\n49:17 Ngokuba ekufeni kwayo ayiyi kuthabatha nento, Aluyi kuhla emva kwayo uzuko lwayo.\n49:18 Nakuba umntu ekudleni kwakhe ubomi ebewusikelela umphefumlo wakhe, Bekudumisa ngokuzichwayithisa kwakho,\n49:19 Uya kuya noko esizukulwaneni sooyise; Abayikukubona ukukhanya naphakade.\n49:20 Ke umntu onobuhandiba, abe engaqondi, Ufana neenkomo ezi zitshabalalayo.\n50:1 Umhobe ka-Asafu. UThixo, uThixo uYehova uyathetha; Uyalibiza ihlabathi, ethabathela ekuphumeni kwelanga esisa ekutshoneni kwalo.\n50:2 EZiyon, ukuphela kweenzwana, Uyakhazimla uThixo.\n50:3 Uyeza uThixo wethu, akayi kuthi cwaka. Kudla umlilo phambi kwakhe, Ngeenxa zonke kuye sisaqhwithi esikhulu.\n50:4 Ubiza izulu phezulu, Nehlabathi, ukuba agwebe phakathi kwabantu bakhe.\n50:5 Uthi, Bahlanganiseleni kum abam benceba, Abenze umnqophiso nam ngombingelelo.\n50:6 Izulu lixela ubulungisa bakhe, Ngokuba uThixo eza kugweba yena. (Phakamisani.)\n50:7 Yivani, bantu bam, ndithethe; Sirayeli, ndiqononondise kuwe; NdinguThixo, uThixo wakho.\n50:8 Andikohlwayi ngenxa yemibingelelo yakho, Namadini akho anyukayo aphambi kwam amaxesha onke.\n50:9 Andiyi kuthabatha zinkunzi zankomo endlwini yakho, Nazinkunzi zabhokhwe esibayeni sakho.\n50:10 Ngokuba zezam zonke iinyamakazi zehlathi, Neenkomo ezisezintabeni eziliwaka.\n50:11 Iintaka zonke zasezintabeni ndiyazazi, Nento edakasa endle inam.\n50:12 Ukuba bendilambile, ndibe ndingayi kukuxelela; Ngokuba lelam elimiweyo nenzaliseko yalo.\n50:13 Ndidle inyama yeenkunzi eziziimbalasane na? Ndisele igazi leenkunzi zeebhokhwe na?\n50:14 Bingelela kuYehova umbulelo, Uzizalise kOsenyangweni izibhambathiso zakho;\n50:15 Ubize mna ngemini yembandezelo, Ndikuhlangule, undizukise.\n50:16 Ke kongendawo uthi uThixo, Useke phi na wena ukuxela ummiselo wam, Uwuphathe ngomlomo wakho umnqophiso wam,\n50:17 Uyithiyile nje intethiso wena, Uwaphose nje amazwi am emva kwakho?\n50:18 Xa ubona isela, ukholana nalo, Wabelane nabakrexezi.\n50:19 Umlomo wakho uwuyekela ebubini; Ulwimi lwakho luthungela inkohliso;\n50:20 Uthi uhlale uthethe ngomzalwana wakho, Uhlaze umntwana kanyoko.\n50:21 Uzenzile ezo nto, ndathi tu, Waba ndinjengawe. Ndiya kukohlwaya ndizicwangcise emehlweni akho.\n50:22 Khaniqonde ke oko, nina bamlibalayo uThixo, Hleze ndiqwenge, kungabikho uhlangulayo.\n50:23 Obingelela umbulelo uyandizukisa, Alungise indlela, Endombonisa kuyo usindiso lukaThixo.\n51:1 Kumongameli. Umhobe kaDavide: ekuzeni kukaNatan umprofeti kuye, emveni kokuba ebengene uBhatshebha. Tarhu, Thixo, ngokwenceba yakho! Ngokobuninzi benceba yakho, cima ukreqo lwam!\n51:2 Nd\u2019ixovule kunene, busuke ubugwenxa bam, Undihlambulule esonweni sam.\n51:3 Ngokuba ndiyalwazi mna ukreqo lwam, Nesono sam siphambi kwam ngamaxesha onke.\n51:4 Ndonile kuwe, kuwe wedwa, Ndenza okubi emehlweni akho; Ukuze ube lilungisa ekuthetheni kwakho, Ucace ekugwebeni kwakho.\n51:5 Uyabona, ndizalelwe ebugwenxeni, Ndakhawulwa nguma esonweni.\n51:6 Uyabona, ufuna inyaniso ezintsweni, Esitheni undazisa ubulumko.\n51:7 Ndihlambulule isono ngehisope, ndihlambuluke; Ndixovule, ndibe mhlophe kunekhephu;\n51:8 Ndivise imihlali nemivuyo, Agcobe amathambo owacolileyo.\n51:9 Sithelisa ubuso bakho ezonweni zam, Ubucime bonke ubugwenxa bam.\n51:10 Dala phakathi kwam, Thixo, intliziyo ehlambulukileyo, Uhlaziye umoya oqinisekileyo phakathi kwam.\n51:11 Musa ukundilahla ebusweni bakho, UMoya wakho oyiNgcwele ungamsusi kum.\n51:12 Buyisela kum imihlali yosindiso lwakho, Undixhase ngomoya wentumekelelo.\n51:13 Ndobafundisa abangendawo iindlela zakho, Babuyele kuwe aboni.\n51:14 Ndihlangule emagazini, Thixo, Thixo ondisindisayo; Lomemelela ngobulungisa bakho ulwimi lwam.\n51:15 Nkosi yam, vula imilebe yomlomo wam, Uyixele indumiso yakho umlomo wam.\n51:16 Ngokuba akunanze mibingelelo, bendiya kukunika; Akalikholo kuwe amadini anyukayo.\n51:17 Imibingelelo kaThixo ngumoya owaphukileyo, Intliziyo eyaphukileyo, etyumkileyo, Thixo, akuyi kuyidela.\n51:18 Yenzele okulungileyo iZiyon ngokukholekileyo kuwe; Yakha iindonga zeYerusalem.\n51:19 Kuya kwandula ukuba mnandi kuwe imibingelelo yobulungisa, amadini apheleleyo; Ziya kwandula ukunyuswa iinkunzi ezintsha zeenkomo esibingelelweni sakho.\n52:1 Kumongameli. Eyokuqiqa: ekaDavide: oko uDowegi umEdom waya waxelela uSawule, wathi kuye, UDavide ungene endlwini ka-Ahimeleki. Uqhayiselani na ngobubi, wena gorha? Inceba kaThixo ikho imihla yonke.\n52:2 Ulwimi lwakho lucinga ukweyelisela, Njengesitshetshe sokuguya iindevu esiloliweyo, wena mkhohlisi.\n52:3 Uthanda okubi kunokulungileyo; Ubuxoki, kunokuthetha ubulungisa. (Phakamisani.)\n52:4 Uthanda onke amazwi aginyayo, Lulwimindini lukhohlisayo.\n52:5 Naye uThixo uya kukudiliza kuphele; Uva kukuxwila, akuncothule ententeni, Akudonyule ezweni labaphilileyo. (Phakamisani.)\n52:6 Obona amalungisa, oyike, Amhleke, athi,\n52:7 Nanko umfo ongamenzanga igwiba lakhe uThixo, Owakholosa ngobuninzi bobutyebi bakhe, Waba nengcwangu ekweyeliseleni kwakhe.\n52:8 Ke mna ndinjengomnquma oluhlaza endlwini kaThixo; Ndikholose ngenceba kaThixo ngonaphakade kanaphakade.\n52:9 Ndiya kubulela kuwe ngonaphakade, kuba ukwenzile oku; Ndiya kuthemba igama lakho, ngokuba lilungile, phambi kwabenceba bakho.\n53:1 Kumongameli: ngeyokhuzo. Eyokuqiqa; ekaDavide. Sithi isidenge entliziyweni yaso, Akukho Thixo. Bonakalisile, balisikizi ngobugqwetha babo; Akukho wenza okulungileyo.\n53:2 UThixo esemazulwini uqondele koonyana babantu, Ukubona ukuba ukho na oqiqayo, Ofuna uThixo.\n53:3 Bonke babuye umva, bayimbozisa bephelele; Akukho wenza okulungileyo, Akukho nokuba abe mnye.\n53:4 Abanakwazi na abasebenzi bobutshinga, Abathi, bebadla abantu bam, bathi badla isonka, Bangamnquli uThixo?\n53:5 Apho bankwantya benkwantyile, phofu kungekho nto inkwantyisayo; Ngokuba uThixo wawathi saa amathambo omngqingi wakho; Wabadanisa, ngokuba uThixo ebebacekisile.\n53:6 Akwaba bekuvela eZiyon ukusindiswa kwamaSirayeli! Ekubuyiseni kukaThixo abantu bakhe ekuthinjweni, Wogcoba uYakobi, avuye uSirayeli.\n54:1 Eyokubethelwa ngezinto ezineentambo. Kumongameli. Eyokuqiqa. EkaDavide: ekufikeni kwabaseZifi, bathi kuSawule, UDavide akazimele phakathi kwethu na? Thixo, ndisindise ngegama lakho, Uligwebe ityala lam ngobugorha bakho.\n54:2 Thixo, yiva umthandazo wam; Wabekele indlebe amazwi omlomo wam.\n54:3 Ngokuba abasemzini basukela phezulu kum, Nabanobungqwangangqwili bafuna umphefumlo wam; Abammisi uThixo phambi kwabo. (Phakamisani.)\n54:4 Yabona, uThixo ngumncedi wam; INkosi yam ikwabasekela umphefumlo wam.\n54:5 Uya kubuyisela ububi kwabandilalelayo; Ngenyaniso yakho babhangise.\n54:6 Ndiya kubingelela kuwe ngokuqhutywa yintliziyo; Ndiya kubulela kwigama lakho, Yehova, kuba lilungile.\n54:7 Ngokuba lindihlangule embandezelweni yonke; Iliso lam libonela iintshaba zam.\n55:1 Kumongameli. Eyokubethelwa ngezinto ezineentambo. Eyokuqiqa: ekaDavide. Wubekele indlebe umthandazo wam, Thixo, Musa ukuzifihla esikhungweni sam.\n55:2 Ndibazele indlebe undiphendule. Ndiyaphaphatheka ekucamngceni kwam, ndincwine,\n55:3 Ngenxa yelizwi lotshaba, Ngenxa yokuxinzelelwa phantsi ngabangendawo; Ngokuba zindiqengqela ubutshinga, Ziyandisukela ngomsindo.\n55:4 Intliziyo yam iyazibhija-bhija phakathi kwam; Izothuso zokufa zindiwele.\n55:5 Ukoyika nokuthuthumela kundingene; Ndigutyungelwe kukududuzela.\n55:6 Ndathi, Andaba bendinamaphiko njengehobe! Bendiya kubaleka ndiye ndihlale!\n55:7 Nanko ndibalekela kude, Ndilalise entlango. (Phakamisani.)\n55:8 Bendiya kukhawuleza, ndisinde Emoyeni ovuthuzayo naseluqhwitheleni.\n55:9 Tshabalalisa, Nkosi yam, yahlula ulwimi lwazo; Ngokuba ndibone ukugonyamela nokubambana phakathi komzi.\n55:10 Imini nobusuku bajikeleza ezindongeni zawo; Ubutshinga nokwaphula kuphakathi kwawo;\n55:11 Ukweyelisela kuphakathi kwawo; Endaweni yembutho yawo akusuki ukuxinezela nokukhohlisa.\n55:12 Ngokuba asilutshaba olu lundingcikivayo; Bendiya kukuthwala oko. Asingondithiyileyo lo uzikhulisayo kum; Bendiya kusithela kuye.\n55:13 Nguwe, mntu ubungumlingane wam, Ikholwane lam endazana nalo,\n55:14 Ebesicweya kamnandi, Siye endlwini kaThixo silihlokondiba eligcobayo.\n55:15 Ukufa makubaqubule, Mabehle baye kwelabafileyo besaphilile; Ngokuba ububi busemizini yabo phakathi kwabo.\n55:16 Mna ndinqula uThixo; UYehova uya kundisindisa.\n55:17 Ngokuhlwa, nakusasa, nasemini enkulu ndiya kucamngca, ndincwine; Uya kuliva izwi lam.\n55:18 Uwukhulula umphefumlo wam unoxolo, ukuze bangasondeli kum, Ngokuba baninzi abandichasayo.\n55:19 UThixo uya kuva, abaphendule, Uselokwamandulo ehleli, (Phakamisani.) Abo bangenanguquko, Bangamoyikiyo uThixo.\n55:20 Babasa isandla abaxolelene nabo; Bahlambela umnqophiso wabo;\n55:21 Ubuthelezi njengamasi umlomo wabo, Ke yimfazwe intliziyo yabo. Athambile amazwi abongaphezu kweoli, Kanti aziintlangothi zekrele.\n55:22 Umthwalo wakho wulahlele kuYehova; yena wokuzimasa; Akayi kuliyekela ilungisa lishukunyiswe naphakade.\n55:23 Wena ke, Thixo, uya kubahlisela emngxunyeni wesihogo. Abantu bamagazi nenkohliso abayi kuyiqingathisa imihla yabo; Ke mna ndikholose ngawe.\n56:1 Kumongameli; ngeyehobe elithe cwaka phakathi kwabakude. EkaDavide. Eliligugu. Ukubanjwa kwakhe ngamaFilisti eGati. Ndibabale, Thixo, ngokuba abantu bendizonda; Bandixinile, besilwa yonke imini;\n56:2 Abandilalelayo bandizonda yonke imini, Ngokuba baninzi abalwa nam beziphakamisile.\n56:3 Mhlana ndinxunguphalayo mna, Ndokholosa ngawe.\n56:4 Ndiya kulidumisa ngoThixo ilizwi lakhe, Ndikholose ngoThixo, ndingoyiki; Inokundenza ntoni na inyama?\n56:5 Yonke imini bayawaphambanisa amazwi am; Zingam zonke iingcinga zabo zobubi.\n56:6 Baqukene, babonisele, Bona bagcine izithende zam, Ngokokuba belinde umphefumlo wam.\n56:7 Bengamatshinga nje, bosinda na? Zihlise ngomsindo izizwe, Thixo.\n56:8 Ukuphalaphala kwam ukubhalile wena; Yitha iinyembezi zam entsubeni yakho; Azisencwadini yakho na?\n56:9 Ziya kubuya umva ke iintshaba zam, mhlana ndibizayo; Ndiyakwazi oku, ukuba uThixo unam.\n56:10 Ndilidumisa ngoThixo ilizwi, Ndilidumisa ngoYehova ilizwi.\n56:11 Ndikholose ngoThixo, ndingoyiki; Unokundenza ntoni na umntu?\n56:12 Ziphezu kwam, Thixo, izibhambathiso zakho; Ndiya kuyizalisa kuwe imibingelelo yombulelo.\n56:13 Ngokuba uwuhlangule ekufeni umphefumlo wam, Iinyawo zam ekukhubekeni, Ukuba ndihambe phambi koThixo Ekukhanyeni kobomi.\n57:1 Kumongameli; ngethi, Ungonakalisi. EkaDavide. Eliligugu: ekumbalekeni kwakhe uSawule emqolombeni. Ndibabale, Thixo, ndibabale; Ngokuba uzimela ngawe umphefumlo wam; Ndizimela esithunzini samaphiko akho, Kude kudlule inkxwaleko.\n57:2 Ndinqula uThixo Osenyangweni, UThixo ondifezelayo.\n57:3 Uya kuthuma esemazulwini andisindise, Emngcikiva nje ondizondayo; (Phakamisani.) UThixo uya kuthuma inceba yakhe nenyaniso yakhe.\n57:4 Umphefumlo wam uphakathi kweengonyama; Ndiya kulala phantsi nabafutha umlilo, Oonyana babantu abamazinyo aziintshuntshe neentolo, Ulwimi lwabo lulikrele elibukhali.\n57:5 Ziphakamisele ngaphezu kwamazulu, Thixo, Lube phezu kwehlabathi lonke uzuko lwakho.\n57:6 Isibatha basilungisele iinyawo zam; Bawugobile umphefumlo wam; Bandimbela isihogo, Beyela kuso ngokwabo. (Phakamisani.)\n57:7 Izimasekile intliziyo yam, Thixo, izimasekile intliziyo yam; Ndiya kuvuma, ndiya kubetha uhadi.\n57:8 Vuka, luzuko lwam! Vukani, mrhubhe nohadi! Ndiya kusiphangela isifingo.\n57:9 Ndiya kubulela kuwe phakathi kwezizwe, Nkosi yam; Ndiya kukubethela uhadi phakathi kwezizwe.\n57:10 Ngokuba inkulu, yada yaya ezulwini, inceba yakho; Yada yesa esibhakabhakeni inyaniso yakho.\n57:11 Ziphakamisele ngaphezu kwezulu, Thixo, Lube phezu kwehlabathi lonke uzuko lwakho.\n58:1 Kumongameli; ngethi, Ungonakalisi. EkaDavide. Eliligugu. Yinene na kodwa ukuba nithetha ubulungisa, nina bothixo? Nigweba oonyana babantu ngokuthe tye?\n58:2 Hayi, entliziyweni nenza ngobugqwetha; Ezweni nilinganisela ukugonyamela kwezandla zenu.\n58:3 Abangendawo baphambukile kwasesizalweni; Bandwendwile kwasesiswini abathethi bamanga.\n58:4 Banobuhlungu obunjengobuhlungu benyoka, Njengephimpi elizenza isithulu, elivingca indlebe yalo;\n58:5 Ukuze lingaliva izwi labanyangi, Lababopha ngomabophe, beziingcibi.\n58:6 Thixo, yaphula amazinyo abo emlonyeni wabo; Amabamba eengonyama ezintsha wavithe, Yehova.\n58:7 Mabaphalale njengamanzi equkuqela; Akuxuna iintolo zakhe, mazinge zicutshiwe.\n58:8 Mababe njengenkumba ehamba inyibilika, Njengemva-mbilini yomfazi, engalibonanga ilanga.\n58:9 Zingekaziva iintsasa iimbiza zenu, Nokuba ikrwada inyama, nokuba iza kuvuthwa, uyayiqweqwedisa.\n58:10 Liya kuvuya ilungisa, lakuyibona impindezelo; Liya kuzihlamba iinyawo zalo egazini longendawo,\n58:11 Athi umntu, Inene, ilungisa linesiqhamo; Inene, ukho uThixo ogwebayo ehlabathini.\n59:1 Kumongameli; ngethi, Ungonakalisi. EkaDavide. Eliligugu: ekuthumeleni kukaSawule, bayilinda indlu ukuba bambulale. Ndihlangule ezintshabeni zam, Thixo wam, Ndise engxondeni kwabasukela phezulu kum.\n59:2 Ndihlangule kubasebenzi bobutshinga; Ndisindise ebantwini abanamagazi.\n59:3 Ngokuba nabo bewulalela umphefumlo wam; Baqukana ngam abanamandla, Kungekho lukreqo kum, kungekho sono kum, Yehova.\n59:4 Ndingenabugwenxa nje, bagidime baxhoba. Vuka, undikhawulele, ubone.\n59:5 Wena Yehova, Thixo wemikhosi, Thixo kaSirayeli, Phapha, uzivelele zonke iintlanga; Musa ukubayeka bonke abanginizayo bengabagqithi. (Phakamisani.)\n59:6 Bayabuya ngokuhlwa, bayavungama njengezinja, Bawuhamba-hambe umzi.\n59:7 Nabo belephuza amagwebu ngomlomo; Ngamakrele emlonyeni wabo; Ngokuba bathi, Kuva bani na?\n59:8 Wena, Yehova, uyabahleka, Uyazigculela zonke iintlanga.\n59:9 Mandla am, ndiva kulindela kuwe; Ngokuba uThixo uyingxonde yam.\n59:10 UThixo wam uya kundikhawulela ngenceba yakhe; UThixo uya kundibonisa abandilaleleyo.\n59:11 Musa ukubabulala, hleze balibale abantu bakowethu; Babhadulise ngamandla akho, ubawise, Ngweletshetshe yethu, Nkosi yethu.\n59:12 Isono somlomo wabo lilizwi lemilebe yomlomo wabo; Mababanjiswe likratshi labo, Nangenxa yokushwabula nokuhanahanisa abakuthethayo.\n59:13 Bagqibe ngobushushu; gqiba, bangabi sabakho; Baqonde ukuba uThixo ngumlawuli kwaYakobi, Wesa eziphelweni zehlabathi. (Phakamisani.)\n59:14 Bayabuya ngokuhlwa, bayavungama njengezinja, Bawuhamba-hambe umzi.\n59:15 Bona babhadulela ukudla; Ukuba bathe abahlutha, balala apho.\n59:16 Ke mna, ndiya kuvuma ngamandla akho, Ndimemelele kwakusasa ngenceba yakho, Kuba ubuyingxonde kum, Nendawo endisabela kuyo ngemini yokubandezelwa kwam.\n59:17 Mandla am, ndiya kukubethela uhadi; Ngokuba uThixo yingxonde yam, nguThixo wam onenceba.\n60:1 Kumongameli; ngeyenyibiba yesingqino. Eliligugu. EkaDavide. Eyokufundisa: ekulweni kwakhe nama-Aram phakathi kweMilambo nama-Aram aseTsobha; wabuya uYowabhi, wawabulala amaEdom emfuleni wetyuwa, amawaka alishumi elinamabini. Thixo, usihlambile, wasichitha, Waqumba; ngamana wasibuyisa.\n60:2 Ulinyikimisile ilizwe, ulikrazule; Philisa iintanda zalo ngokuba lishukuma.\n60:3 Ubabonisile abantu bakho into elukhuni, Usiseze iwayini ehexisayo.\n60:4 Ubanike ibhanile abakoyikayo, Ukuba bayiphakamise ngenxa yenyaniso. (Phakamisani.)\n60:5 Ukuze zihlangulwe iintanda zakho, Sindisa ngesandla sakho sokunene, undiphendule.\n60:6 UThixo uthethe engcwele: mandivuyelele, Ndimabe uShekem, ndiyilinganisele intili yaseSukoti.\n60:7 Ngowam uGiliyadi, ngowam uManase, UEfrayim sisigcina-ntloko sam, UYuda yintonga yam yommiselo;\n60:8 UMowabhi sisitya sam sokuhlambela, Ndiyiphosa kuEdom imbadada yam; Filisti, nkqangaza wena ngam.\n60:9 Ngubani na owondisa emzini wamandla? Ngubani na owondikhaphela kwaEdom?\n60:10 Asinguwe na, kwawena Thixo, osihlambileyo? Akwaphuma, Thixo, nemikhosi yethu.\n60:11 Sincede kumbandezeli wethu; Alunto yanto usindiso lomntu.\n60:12 NgoThixo siya kweyisa, Wobagqusha yena ababandezeli bethu.\n61:1 Kumongameli; eyokubethelwa ngezinto ezineentambo. EkaDavide. Kuve, Thixo, ukuhlahlamba kwam; Wubazele indlebe umthandazo wam.\n61:2 Ndidanduluka kuwe ndisesiphelweni sehlabathi, ekutyhafeni kwentliziyo yam; Ndikhaphele eweni elisemalengalengeni kum.\n61:3 Ngokuba ulihlathi lam, Uyinqaba ende eliqele phambi kotshaba.\n61:4 Ndiya kuphambukela ententeni yakho ngonaphakade, Ndiya kuzimela ngesithe lamaphiko akho. (Phakamisani.)\n61:5 Ngokuba wena, Thixo, uzivile izibhambathiso zam; Ubanike ilifa abaloyikayo igama lakho.\n61:6 Uya kongeza imihla emihleni yokumkani; Iminyaka yakhe iya kuba njengezizukulwana ngezizukulwana;\n61:7 Uya kuhlala ngonaphakade phambi koThixo; Mmisele inceba nenyaniso, ukuba zimlondoloze.\n61:8 Kukhona ndiya kulibethela uhadi igama lakho ngonaphakade, Ndizizalise izibhambathiso zam imihla ngemihla.\n62:1 Kumongameli. KuYedutun. Umhobe kaDavide. Uthozamele kuThixo kwaphela umphefumlo wam; Kuvela kuye ukusindiswa kwam.\n62:2 Nguye kwaphela iliwa lam, umsindisi wam, Ingxonde yam; andiyi kushukunyiswa kakhulu.\n62:3 Kunini na nisuka indulumbane emntwini? Kunini na nimncinitha nonke niphela, enjengodonga oluzimkayo, enjengothango oluwayo?\n62:4 Bagqibe kwelokuba bamtyhale bamsuse ekuphakameni kwakhe kuphele; Bakholene namanga; Basikelela elowo ngomlomo, embilinini yabo bayatshabhisa. (Phakamisani.)\n62:5 Thozamela kuThixo yedwa, mphefumlo wam, Ngokuba livela kuye ithemba lam.\n62:6 Nguye kwaphela iliwa lam, umsindisi wam, Ingxonde yam; andiyi kushukunyiswa.\n62:7 KunoThixo ukusindiswa kwam nozuko lwam; Iliwa lokunqaba kwam nehlathi lam likuThixo.\n62:8 Kholosani ngaye ngamaxesha onke, nina bantu; Phalazani intliziyo yenu phambi kwakhe. UThixo ulihlathi kuthi. (Phakamisani.)\n62:9 Bangumphunga kwaphela onyana boluntu, ngamanga oonyana bamadoda; Esikalini bangenyuka, Bangumphunga bephelele.\n62:10 Musani ukukholosa ngokudla abantu, Ningazenzi into engeyanto ngento exhakamfuliweyo. Yakwanda imfuyo, musani ukuyinyamekela.\n62:11 Uthethe nto-nye uThixo, Ezi zinto zimbini ndizivile: Ukuba amandla ngakaThixo,\n62:12 Nenceba yeyakho, Nkosi yam; Ngokuba uyababuyekeza, elowo ngokwezenzo zakhe.\n63:1 Umhobe kaDavide: oko ebesentlango yakwaYuda. Thixo, unguThixo wam, ndiya kukuquqela kwakusasa, Umphefumlo wam unxanele wena; inyama yam iyakulangazelela Ezweni elingumqwebedu, elibharhileyo, eligenamanzi.\n63:2 Ndenjenjalo ukukhangela kuwe engcweleni, Ukuba ndibone amandla akho nobuqaqawuli bakho.\n63:3 Ngokuba inceba yakho ilungile ngaphezu kobomi, Umlomo wam uya kukuncoma.\n63:4 Ndiya kwenjenjalo ukukubonga lo gama ndihleliyo, Ndiphakamise izandla zam egameni lakho.\n63:5 Umphefumlo wam uhluthi umongo namanqatha; Ngemilebe yomlomo wam omemelelayo uya kukudumisa umlomo wam,\n63:6 Ndakukukhumbula emandlalweni wam, Emilindweni yobusuku ndicamanga ngawe.\n63:7 Ngokuba uluncedo kum, Ndinokumemelela esithunzini samaphiko akho.\n63:8 Umphefumlo wam uthene mbende nawe; Isandla sakho sokunene sindibambile.\n63:9 Ke bona bafuna umphefumlo wam ukuze batshabalale, Baya kutshona kwezisezantsi iindawo zehlabathi.\n63:10 Baphalazelwa emandleni ekrele; Baba sisabelo seempungutye.\n63:11 Ke yena ukumkani uya kuvuya ngoThixo; Baya kuqhayisa abo bonke bafunga yena; Ngokuba uya kuvingcwa umlomo wabathetha ubuxoki.\n64:1 Kumongameli. Umhobe kaDavide. Live, Thixo, izwi lam ekukhalazeni kwam; Ekunkwantyiseni kotshaba bulondoloze ubomi bam.\n64:2 Ndisithelise egquguleni labanobubi, Ehlokondibeni labasebenzi bobutshinga;\n64:3 Abalulola njengekrele ulwimi lwabo, Abaxuna iintolo zabo, amazwi akrakra,\n64:4 Bamtole ogqibeleleyo besentsithelweni; Bamtola ngesiquphe, bangoyiki.\n64:5 Bazomelezela ilizwi elibi, Bagqiba kwelokuba bafihle izirhintyelo, Bathi, Singabonwa ngubani na?\n64:6 Baceba ubugqwetha; Baligqibile icebo abalicebileyo; Imbilini yendoda nentliziyo yayo yinzulu.\n64:7 Ke uThixo uyabatola ngotolo; Amanxeba abo abakho ngesiquphe.\n64:8 Baya kukhutyekiswa, lufikele kwabona ulwimi lwabo; Bayahlunguzela intloko bonke abababonayo.\n64:9 Basuka boyike bonke abantu, Bawuxele umsebenzi kaThixo, Basiqiqe isenzo sakhe.\n64:10 Liya kuvuya ilungisa ngoYehova, lizimele ngaye, Baqhayise bonke abantliziyo zithe tye.\n65:1 Kumongameli. Umhobe kaDavide. Ingoma. Ukuthozama kuyindumiso kuwe, Thixo, eZiyon; Sizaliswa kuwe isibhambathiso.\n65:2 Wena mphulaphuli wemithandazo, Iza kuwe inyama yonke.\n65:3 Zindoyisile nje iindawo zobugwenxa, Ukreqo lwethu uyaluxolela wena ngocamagushelo.\n65:4 Hayi, uyolo lomnyulayo, umsondeze Ukuba ahlale ezintendelezweni zakho! Siya kuzihluthisa ngokulunga kwendlu yakho, Kwetempile yakho engcwele.\n65:5 Usiphendula ngezenzo ezoyikekayo zobulungisa, Thixo osisindisayo; Nkoloseko yeziphelo zonke zehlabathi, neyolwandle olukude;\n65:6 Ulozinzisa iintaba ngamandla akhe, Ebhinqe ubugorha;\n65:7 Ulodambisa ukugquma kweelwandle, ukugquma kwamaza azo, Nokuxokozela kwezizwe.\n65:8 Bayayoyika imiqondiso yakho abemi beziphelo zehlabathi. Umemelelisa ukuvela kokusa nokuhlwa.\n65:9 Uwuvelele umhlaba, wawunyela, Wawutyebisa kakhulu. Umjelo kaThixo uzele ngamanzi: Walungisa ingqolowa yabo, ngokuba uwenjenje ukuwulungisa.\n65:10 Useza ihluthe imisele yawo; Unyakamisa imiqela yawo. Uthambisa ngeziphango; Usikelela izilimo zawo.\n65:11 Uwuthwesile umnyaka wokulunga kwakho, Imikhondo yakho itsitsa ukutyeba.\n65:12 Ayatsitsa amakriwa entlango, Iinduli zizibhinqise umgcobo.\n65:13 Amadlelo anxibe imihlambi yeenkomo; Iintili zambethe ingqolowa. Yonke into iyaduma, yonke into iyavuma.\n66:1 Kumongameli. Ingoma. Umhobe. Dumani kuThixo, nonke hlabathi,\n66:2 Lubetheleni uhadi uzuko lwegama lakhe, Mzukiseni, mdumiseni.\n66:3 Yithini kuThixo, Hayi, ukoyikeka kwemisebenzi yakho! Ngenxa yobuninzi bamandla akho ziya kuhanahanisa kuwe iintshaba zakho.\n66:4 Lonke ihlabathi liya kukunqula, Bakubethele uhadi; Balibethele uhadi igama lakho. (Phakamisani.)\n66:5 Yizani, nibone imisebenzi emikhulu kaThixo, Engowoyikekayo ekwenzeni kwakhe koonyana babantu.\n66:6 Waluguqula ulwandle lwayinto eyomileyo; Bawuwela umlambo ngeenyawo; Apho savuya ngaye.\n66:7 Ulolawula ngobugorha bakhe ngonaphakade; Amehlo akhe ayabonisela ezintlangeni; Abaziinjubaqa mabangaziphakamisi. (Phakamisani.)\n66:8 Mbongeni, zizwe, uThixo wethu, Nivakalise ilizwi lendumiso yakhe.\n66:9 Ulomisa umphefumlo wethu ebomini, Akalunikela unyawo lwethu ekutyibilikeni.\n66:10 Ngokuba usicikidile, Thixo; Usinyibilikisile njengokunyibilikiswa kwesilivere;\n66:11 Usingenise emboniselweni; Ubeke uxinzelelo esinqeni sethu;\n66:12 Ukhwelise abantu entlokweni yethu; Singene emlilweni nasemanzini; Waza wasikhuphela endaweni enendyebo.\n66:13 Ndiya kungena endlwini yakho ndinamadini anyukayo; Ndiya kuzizalisa kuwe izibhambathiso zam,\n66:14 Eyazivulelayo imilebe yomlomo wam, Owazithethayo umlomo wam ekubandezelweni kwam.\n66:15 Ndiya kunyusela kuwe amadini anyukayo eemvana ezityebileyo, Ndawonye nesiqhumiso seenkunzi zeegusha; Ndiya kwenza aweenkomo ndawonye naweenkunzi zeebhokhwe. (Phakamisani.)\n66:16 Yizani, nive, ndinixelele, nonke nina bamoyikayo uThixo, Oko akwenzele umphefumlo wam.\n66:17 Ndadanduluka kuye ngomlomo wam; Kwaye ukubonga kuphantsi kolwimi lwam.\n66:18 Ukuba bendisekeleze ubutshinga ngentliziyo yam, INkosi yam ibingayi kuphulaphula.\n66:19 Hayi ke, uThixo uphulaphule, Ulibazele indlebe ilizwi lomthandazo wam.\n66:20 Makabongwe uThixo, Yena ungawugxothanga umthandazo wam, Nobubele bakhe kum.\n67:1 Kumongameli; eyokubethelwa ngezinto ezineentambo. Umhobe. Ingoma. Ngamana uThixo wasibabala, wasisikelela, Wabukhanyisa ubuso bakhe kuthi; (Phakamisani.)\n67:2 Ukuze yaziwe ehlabathini indlela yakho, Usindiso lwakho ezintlangeni zonke.\n67:3 Ngamana zabulela izizwe kuwe, Thixo, Zabulela izizwe kuwe zonke ziphela;\n67:4 Zavuya zamemelela izizwe: Ngokuba uya kugweba phakathi kwezizwe ngokuthe tye, Uzikhaphe izizwe ehlabathini. (Phakamisani.)\n67:5 Ngamana zabulela izizwe kuwe, Thixo, Zabulela izizwe kuwe zonke ziphela.\n67:6 Umhlaba uyivelisile indyebo yawo; Uya kusisikelela uThixo, uThixo wethu;\n67:7 Uya kusisikelela uThixo, Zimoyike zonke iziphelo zehlabathi.\n68:1 Kumongameli; ekaDavide. Umhobe. Ingoma. Makasuk\u2019 eme uThixo, zibe ziintsali iintshaba zakhe, Basabe ebusweni bakhe abamthiyayo.\n68:2 Njengokuphetshethwa komsi, baphephethe; Njengokunyibilika komthwebeba phambi komlilo, Mabadake ngokunjalo abangendawo ebusweni bukaThixo.\n68:3 Ke wona amalungisa makavuye, adlamke phambi koThixo, Abe nemihlali, enemivuyo.\n68:4 Vumani kuThixo, libetheleni uhadi igama lakhe; Menzeleni umendo ophakamileyo, ulokhwela ecanda ezinkqantosini, Ogama lakhe linguYehova; nidlamke phambi kwakhe.\n68:5 Uyise weenkedama, umthetheleli wabahlolokazi, NguThixo ekhayeni lakhe elingcwele.\n68:6 UThixo nguhlalisa endlwini ababebodwa, Ngukhuphela enywebeni ababanjiweyo; Ngabaziinjubaqa bodwa abahlala kwelibalelelweyo.\n68:7 Thixo, ekuphumeni kwakho uphambi kwabantu bakho, Ekunyatheleni kwakho enkangala, (Phakamisani.)\n68:8 Lanyikima ihlabathi, Lavuza izulu ebusweni bukaThixo, ISinayi leya ebusweni bukaThixo, uThixo kaSirayeli.\n68:9 Walitshiza ngemvula eninzi yesisa sakho, Thixo, ilifa lakho; Lakubharha, walizimasa wena.\n68:10 Wahlala khona umhlambi wakho, Wamlungisela olusizana ngokulunga kwakho, Thixo.\n68:11 INkosi iya kukhupha izwi elinamandla, Ube mkhulu umkhosi weentokazi ezishumayela iindaba ezilungileyo.\n68:12 Ookumkani bemikhosi baya kusaba besabile; Intokazi esele ekhaya iya kuwaba amaxhoba.\n68:13 Nakulala phantsi phakathi kweentlanti, Noxelisa amaphiko evukuthu alekwe ngesilivere, Neentsiba zalo ezalekwe ngegolide ebengezelayo.\n68:14 Ekubadubadubeni kukaSomandla ookumkani kulo, Koba mhlophe ngowekhephu eTsalimon.\n68:15 Yintaba kaThixo intaba yaseBhashan, Yintaba encopho zininzi intaba yaseBhashan.\n68:16 Niyigxeleshelani na, zintaba zincopho zininzi, Intaba ayinqweneleyo uThixo ukuba ahlale kuyo? Ewe, uYehova uya kuhlala kuyo ngonaphakade.\n68:17 Iinqwelo zokulwa zikaThixo zizigidi, ngamawaka-waka; INkosi ikuzo; yiSinayi ebungcweleni,\n68:18 Unyuke waya phezulu, uthimbe abathinjwa, Uthabathe izipho phakathi kwabantu, Naphakathi kwabaziinjubaqa, ukuba ahlale uYehova uThixo khona.\n68:19 Mayibongwe iNkosi; Ithwala imithwalo yethu imihla ngemihla; NguThixo umsindisi wethu. (Phakamisani.\n68:20 Yena uThixo kuthi nguThixo wosindiso, KokukaYehova, iNkosi yethu, ukukhupha ekufeni.\n68:21 Kodwa uThixo uya kuyiphalusa intloko yeentshaba zakhe, Nentloko enesihlwitha yohambayo kwizigqitho zakhe.\n68:22 Yathi iNkosi, Ndiya kuzibuyisa eBhashan, Ndiya kuzibuyisa iintshaba zakho ezinzulwini zolwandle;\n68:23 Ukuze uziphaluse, unyawo lwakho lusegazini, Nolwimi lwezinja zakho lube nesabelo salo ezintshabeni.\n68:24 Bakubona ukunyathela kwakho, Thixo, Ukunyathela koThixo wam, koKumkani wam, esebungcweleni.\n68:25 Phambili ziimvumi, ngasemva ngababethi bohadi, Emacaleni ziintombi ezibetha iingqongqo.\n68:26 Emabandleni bongani uThixo, INkosi, nina basemthonjeni wakwaSirayeli.\n68:27 Balapho ooBhenjamin, inci yabo, umphathi wabo, Abathetheli bakwaYuda, ihlokondiba labo; Abathetheli bakwaZebhulon, abathetheli bakwaNafetali.\n68:28 UThixo wakho wakuwisela umthetho wokuba uqine; Kuqinise, Thixo, oko usenzeleyo.\n68:29 Bevela etempileni yakho eyongamele iYerusalem, Ookumkani mabeze nezithabathaba kuwe.\n68:30 Khalimela amarhamncwa asengcongolweni, Umhlambi weenkunzi eziziimbalasane, kunye namathole ezizwe, Ukuze baziwise benezijungqe zesilivere. Wazibhangisa izizwe eziyithandayo imfazwe.\n68:31 Kovela amanono eYiputa; UKushi wozolulela msinya izandla zakhe kuThixo.\n68:32 Zikumkani zehlabathi, vumani kuThixo, Niyibethele uhadi iNkosi; (Phakamisani.)\n68:33 Ekhwela ecanda emazulwini awo amazulu amandulo; Nanko elikhupha ilizwi lakhe, ilizwi elinamandla.\n68:34 Mnikeni amandla uThixo; Buphezu koSirayeli ubungangamsha bakhe; Asesibhakabhakeni amandla akhe.\n68:35 UloThixo woyikekayo ezingcweleni zakho. UloThixo kaSirayeli, ubanikayo amandla nokomelela abantu. Makabongwe uThixo.\n69:1 Kumongameli; ngeyeenyibiba. EkaDavide. Ndisindise, Thixo; Ngokuba amanzi andifikele, ada eza emphefumlweni.\n69:2 Nditshonile eludakeni olunzulu, akukho kuma; Ndingene emmbithini onamanzi, umsinga uyandintywilisela.\n69:3 Ndidiniwe kukudanduluka; womile umqala wam; Aphelile amehlo am; mna ndilindele kuThixo.\n69:4 Abandithiyayo ngelize baninzi ngaphezu kweenwele zentloko yam; Baninzi abandibangisayo, abaziintshaba zam bexoka; Into endingayiphanganga bathi mandiyibuyise.\n69:5 Thixo, wena uyakwazi ukumatha kwam; Namatyala am akanakugushwa kuwe.\n69:6 Mabangadani ngam abakuthembayo, Nkosi yam, Yehova wemikhosi; Mabangangcikivwa ngam abakufunayo, Thixo kaSirayeli.\n69:7 Ngokuba ndithwele ingcikivo ngenxa yakho; Ihlazo libugqubuthele ubuso bam;\n69:8 Ndingowasemzini kubazalwana bam; Ndingowolunye uhlanga kubantwana bakama:\n69:9 Ngokuba lindidlile ikhwele ngenxa yendlu yakho: Iingcikivo zabakungcikivayo ziwe phezu kwam.\n69:10 Mna, umphefumlo wam walila, uzila ukudla; Oko kwaba yingcikivo kum.\n69:11 Iingubo zam zaba zezirhwexayo, Ndaba yinto yokuzekelisa kubo.\n69:12 Bathetha ngam abahleli esangweni; Ndiyingoma yamanxila.\n69:13 Ke mna ndithandaza kuwe, Yehova, ngexesha elikholekileyo: Thixo, ngobuninzi benceba yakho, Ndiphendule ngenyaniso yosindiso lwakho.\n69:14 Ndihlangule eludakeni, ndingatshoni; Mandihlangulwe kwabandithiyayo nasemimbithini enamanzi.\n69:15 Mawungandintywiliseli umsinga wamanzi; Ingandiginyi inzulu; Iqula malingandivingceli ngomlomo walo\n69:16 Ndiphendule, Yehova, ngokuba ilungile inceba yakho, Ngangobuninzi bemfesane yakho ndibheke.\n69:17 Musa ukubusithelisa ubuso bakho kumkhonzi wakho, Ngokuba ndibandezelekile; khawuleza undiphendule.\n69:18 Sondela emphefumlweni wam, uwukhulule; Ngenxa yeentshaba zam ndikhulule.\n69:19 Wena uyakwazi ukungcikivwa kwam, nokudaniswa kwam, nokuhlazwa kwam; Baphambi kwakho bonke abandibandezelayo.\n69:20 Ingcikivo yaphula intliziyo yam, ndaphantsa ukufa; Ndathemba ukukhuzwa, akwabakho; Nokuthuthuzelwa, andakufumana.\n69:21 Ukudla bandinika inyongo; Ekunxanweni kwam bandiseza iviniga.\n69:22 Isithebe sabo phambi kwabo masibe ngumgibe; Sibe sisirhintyelo kwabanemasi.\n69:23 Makabe mnyama amehlo abo, bangaboni, Usigxadazelise isinqe sabo amaxesha onke.\n69:24 Baphalazele ngobhavumo lwakho, Kubafikele ukuvutha komsindo wakho.\n69:25 Ingqili yabo mayibe senkangala, Ezintenteni zabo kungahlali mntu;\n69:26 Ngokuba bayamsukela obethwe nguwe, Bancokole ngomvandedwa wobahlabileyo wena.\n69:27 Yongeza ubugwenxa ebugwenxeni babo, Bangangeni ebulungi senibakho.\n69:28 Mabacinywe encwadini yobomi, Bangabhalwa namalungisa.\n69:29 Ke mna ndilusizana, ndinomvandedwa; Usindiso lwakho, Thixo, malundise engxondeni.\n69:30 Ndiya kulidumisa igama likaThixo ngokuvuma, Ndilenze likhulu ngokubulela.\n69:31 Oko kuya kukholeka kuYehova ngaphezu kweenkunzi ezintsha, Ezineempondo neempuphu.\n69:32 Bebona abalulamileyo, bovuya; Nina bamquqelayo uThixo, intliziyo yenu mayiphile.\n69:33 Ngokuba uYehova uyaweva amahlwempu, Akabadeli ababanjiweyo bakhe.\n69:34 Malimdumise izulu nomhlaba, Ulwandle nento yonke enambuzelayo kulo.\n69:35 Ngokuba uThixo uya kuyisindisa iZiyon, ayakhe imizi yakwaYuda, Bahlale khona, bayime;\n69:36 Ilidle ilifa imbewu yabakhonzi bakhe; Bahlale kuyo abalithandayo igama lakhe.\n70:1 Kumongameli; ekaDavide; eyokukhumbuza. Thixo, khawuleza undihlangule; Yehova, khawuleza undincede.\n70:2 Mabadane babe neentloni abawufunayo umphefumlo wam; Mababuye umva bahlazeke abananze ukuba ndihlelwe bububi;\n70:3 Mababuye ngenxa yomvuzo wedano labo Abathi, Tshotsho! Tshotsho!\n70:4 Mababe nemihlali bavuye ngawe bonke abakuquqelayo; Abaluthandayo usindiso lwakho Mabahlale besithi, Makenziwe mkhulu uThixo.\n70:5 Ke mna ndilusizana, ndilihlwempu; Thixo, khawuleza uze kum. Umncedi wam nomsindisi wam nguwe; Yehova, musa ukulibala.\n71:1 Ndizimela ngawe, Yehova, Mandingaze ndidane naphakade:\n71:2 Ngobulungisa bakho ndihlangule, ndisize; Ndithobele indlebe yakho, undisindise.\n71:3 Yiba liliwa elilikhaya kum, ndize kulo ngamaxesha onke. Uwise umthetho wokuba ndisindiswe, Ngokuba ingxondorha yam nemboniselo yam nguwe.\n71:4 Thixo wam, ndisize esandleni songendawo, Esandleni sogqwethayo nosisibhovubhovu.\n71:5 Ngokuba ulithemba lam, Nkosi yam, Yehova, Inkoloseko yam kwasebuncinaneni bam.\n71:6 Ndixhaswe nguwe kwasesizalweni; Nguwe owandityhobozisayo ezibilinini zikama. Indumiso yam ingawe ngamaxesha onke.\n71:7 Ndinjengesimanga kwabaninzi; Ke wena ulihlathi lam elinqabileyo.\n71:8 Umlomo wam uya kuzala yindumiso yakho, Sisihombo sakho imini yonke.\n71:9 Musa ukundilahla ngexesha lobuxhego; Musa ukundishiya akuphela amandla am.\n71:10 Ngokuba zithetha ngam iintshaba zam; Abawulindayo umphefumlo wam bayacebisana,\n71:11 Besithi, UThixo umlahlile; Msukeleni nimbambe, ngokuba akukho mhlanguli.\n71:12 Thixo, musa ukuba kude kum; Thixo wam, khawuleza undincede.\n71:13 Mabadane, bagqitywe, abawuchasayo umphefumlo wam, Bathiwe wambu yingcikivo nehlazo abafuna ukuba ndihlelwe bububi.\n71:14 Ke mna ndiya kuhlala ndilindile, Ndongeze endumisweni yakho yonke.\n71:15 Umlomo wam uya kubalisa ngemisebenzi yobulungisa bakho, Neyosindiso lwakho imini yonke, ngokuba ndingawazi amanani ayo.\n71:16 Ndiya kuza nemisebenzi yobugorha beNkosi uYehova; Ndiya kukhankanya ubulungisa bakho, bakho wedwa.\n71:17 Thixo, undifundisile kwasebuncinaneni bam; Unangoku ndiyayixela imisebenzi yakho ebalulekileyo.\n71:18 Thixo, musa ukundishiya kude kuye ebuxhegweni nasezimvini; Ndide ndiyixele ingalo yakho kwisizukulwana esitsha, Nobugorha bakho kubo bonke abaya kuza.\n71:19 Thixo, ubulungisa bakho buye bafika phezulu; Wena uzenzayo izinto ezinkulu, Thixo, ngubani na onjengawe?\n71:20 Wena, usibonisileyo iimbandezelo ezininzi ezinobubi, Uya kubuya usiphilise, Ubuye usirhole ezinzonzobileni zamanzi ehlabathi;\n71:21 Uya kubandisa ubukhulu bam, Ubuye wena undithuthuzele.\n71:22 Ndiya kuyibulela nokuyibulela kuwe ngomrhubhe Inyaniso yakho, Thixo wam; Ndiya kukubethela uhadi, Ngcwele kaSirayeli.\n71:23 Uya kumemelela umlomo wam, ndakukubethela uhadi, Nomphefumlo wam owukhululeyo;\n71:24 Nolwimi lwam luya kuxela ubulungisa bakho imini yonke, Ngokuba bedanile beneentloni abafuna ukuba ndihlelwe bububi.\n72:1 EkaSolomon. Thixo, mnike ukumkani imigwebo yakho, Mnike unyana wokumkani ubulungisa bakho.\n72:2 Makagwebe ebantwini bakho ngobulungisa, Nakwabaziintsizana zakho ngokwesiko.\n72:3 Iintaba mazibathwalele uxolo abantu, Kwaneenduli zibathwalele ebulungiseni.\n72:4 Makagwebe ityala labaziintsizana ebantwini, Asindise oonyana bamahlwempu, Abatyumze abacudisi.\n72:5 Mabakoyike, ukuhlala elihleliyo ilanga Kwanenyanga, izizukulwana ngezizukulwana.\n72:6 Makehle njengemvula ehla phezu kotyani obusikwayo, Njengeziphango, njengemvula emathontsi makhulu, emhlabeni.\n72:7 Malityatyambe ngemihla yakhe ilungisa, Nobuninzi boxolo, ide ingabi sabakho inyanga.\n72:8 Makaphathe ubukhosi ethabathela elwandle ase elwandle, Ethabathela kuwo uMlambo ase eziphelweni zehlabathi.\n72:9 Baya kuguqa phambi kwakhe abemi bomqwebedu, Zikhothe uthuli iintshaba zakhe.\n72:10 Ookumkani baseTarshishe nabeziqithi baya kunika iminikelo; Ookumkani bakwaShebha nabakwaSebha baya kusondeza isithabathaba;\n72:11 Baqubude kuye bonke ookumkani, Zimkhonze sonke iintlanga.\n72:12 Ngokuba uya kulihlangula ihlwempu elizibikayo, Nabaziintsizana abangenaluncedo;\n72:13 Abenzele inceba abasweleyo nabangamahlwempu; Asindise imiphefumlo yamahlwempu;\n72:14 Akhulule imiphefumlo yawo ekuxinezelweni nasekugonyamelweni; Linqabile emehlweni akhe igazi lawo.\n72:15 Uya kuphila anikwe igolide yakwaShebha, Bahlale bemthandazela, Bamsikelele imini yonke.\n72:16 Makubekho intabalala yengqolowa ezweni, ise encotsheni yeentaba; Ukuqhama kwayo makurhashaze njengeLebhanon; Mabatyatyambe emizini yabo njengemifuno yomhlaba.\n72:17 Malibe ngunaphakade igama lakhe; Malivelise amagatya igama lakhe phambi kwelanga, Bazisikelele ngaye; Mazithi zonke iintlanga ungonoyolo.\n72:18 Makabongwe uYehova uThixo, uThixo kaSirayeli. Ulomenzi wemisebenzi ebalulekileyo yena yedwa.\n72:19 Malisikelelwe igama lakhe elizukileyo ngonaphakade, Lizale lonke ihlabathi luzuko lwakhe. Amen, amen.\n72:20 Iphelile imithandazo kaDavide unyana kaYese.\n73:1 Umhobe ka-Asafu. Ulungile kwaphela uThixo kuSirayeli, Kwabantliziyo zinyulu.\n73:2 Ke mna, beziphantse ukumka iinyawo zam; Gcwizi ukutyibilika ukunyathela kwam;\n73:3 Ngokuba bendibamonela abaqhayisayo, Ndakukubona ukuphumelela kwabangendawo.\n73:4 Ngokuba abanazintlungu ekufeni kwabo; Baphilile, batyebile umzimba wabo;\n73:5 Ebubini babantu abakho bona; Abakhathazwa njengabanye abantu.\n73:6 Ngako oko intamo yabo inxitywe ikratshi; Ukugonyamela kubathe wambu ngokwengubo.\n73:7 Amehlo abo avelile kukutyeba; Amabhongo eentliziyo zabo aphumela phandle.\n73:8 Bahlalela ngentlamba, bathetha ngokubandezela, benobubi; Bathetha iindumbisa zamazwi.\n73:9 Bawubeka ezulwini umlomo wabo, Ulwimi lwabo luhamba emhlabeni wonke.\n73:10 Ngako oko abantu babo babuyela apha; Bafinca amanzi amaninzi.\n73:11 Bathi, Unokuthini na ukwazi uThixo? Kukho ukwazi na kOsenyangweni?\n73:12 Yabona abangendawo abaya Banokuchulumacha ngonaphakade, bandile ngokutyeba.\n73:13 Sifumane sayiqaqambisa intliziyo yethu kanti, Sazihlamba izandla zethu ngokuba msulwa;\n73:14 Ndakhathazeka imini yonke, Ukohlwaywa kwethu kwaba kokwemiso yonke.\n73:15 Ukuba bendithe, Ndiya kwenjenjalo ukuthetha, Yabona, ngendinginizile kwisizukulwana soonyana bakho.\n73:16 Ndathi ke ndakucinga ukuba ndikwazi oko, Kwayinkohla emehlweni am;\n73:17 Ndada ndaya kungena ezingcweleni zikaThixo, Ndakugqala ke ukuphela kwabo.\n73:18 Inene, ubamise ezindaweni ezibuthelezi, Wabawisa baba yintshabalala.\n73:19 Hayi, ukuphanziswa kwabo ngephanyazo; Baphelile, bagqityiwe kukukhwankqa.\n73:20 Njengephupha ekuqabukeni komntu, Ekuvukeni kwakho, Nkosi, wowudela umfanekiso wabo.\n73:21 Ukuba ndithe ndabindeka intliziyo, Ndahlabeka ezintsweni,\n73:22 Ndoba ke ndisisityhakala, ndingenakwazi; Ndoba ke ndisisilo kuwe.\n73:23 Mna ke ndihlala ndinawe; Undibambile ngesandla sam sokunene;\n73:24 Uya kundikhapha ngecebo lakho. Undithabathe emveni koku, ndibe nozuko.\n73:25 Ndinabani na emazulwini? Ukuba wena ungowam, andilinanze nganto ihlabathi.\n73:26 Ingaphela inyama yam nentliziyo yam: Iliwa lentliziyo yam, nesabelo sam, nguThixo ngonaphakade.\n73:27 Ngokuba, yabona, abanyawukileyo kuwe baya kudaka; Uyababhangisa bonke abahenyuzayo, bemke kuwe.\n73:28 Mna ke, ukusondela kuThixo kulungile kum, Ndiyenza ihlathi lam iNkosi uYehova, Ukuze ndiyibalise yonke imisebenzi yakhe.\n74:1 Eyokuqiqa; eka-Asafu. Yini na Thixo, ukuba uhlale usihlambile, Uqhume umsindo wakho kwizimvu zedlelo lakho?\n74:2 Likhumbule ibandla lakho olithengileyo kwakudala, Olikhululeyo, laba sisizwe selifa lakho; Intaba yaseZiyon, ohleli kuyo.\n74:3 Phakamisa ukunyathela kwakho, ukuya kumanxuwa ahlala ehleli: Utshaba luvive into yonke engcweleni.\n74:4 Babharhula ababandezeli bakho endaweni yokuhlangana phakathi; Bamisa eyabo imiqondiso, yaba yiyo eyimiqondiso.\n74:5 Kwanga kungenelwe Intshinyela yemithi ngezixengxe.\n74:6 Kungoku, uqoqo lwayo lonke Balucanda ngamazembe neengxobonga.\n74:7 Bayifaka umlilo ingcwele yakho; Bawuhlambela ngokuwuwisela emhlabeni umnquba wegama lakho.\n74:8 Bathi ezintliziyweni zabo, Siya kubanyanzelela phantsi kuphele; Bazitshisile zonke iindawo zikaThixo zokuhlangana ezweni apha.\n74:9 Imiqondiso yethu asiyiboni, Akusekho mprofeti; Kuthi akukho waziyo ukuba koda kuse phi na kunjalo.\n74:10 Kunini na, Thixo, umbandezeli engcikiva? Utshaba luhleli luligiba igama lakho?\n74:11 Usifinyezeleni na isandla sakho, nesokunene sakho? Sirhole esifubeni sakho, ulugqibe.\n74:12 Ke uThixo nguKumkani wam kwakumandulo, Ulosebenza usindiso phakathi kwehlabathi lonke.\n74:13 Nguwe owahlula ulwandle ngamandla akho, Owaphula iintloko zeengwenya emanzini.\n74:14 Nguwe owaxhaxha iintloko zeleviyatan, Wazinika zakukudla kubantu, kubemi bomqwebedu.\n74:15 Nguwe owagqobhoza yayimithombo, yayimilanjana; Nguwe owomisa imilambo engomiyo.\n74:16 Yeyakho imini, bobakho nobusuku; Nguwe owalungisa ukukhanya nelanga.\n74:17 Nguwe owamisa yonke imida yehlabathi; Ihlobo, nobusika, nguwe owazibumbayo ezo zinto.\n74:18 Khumbula oku; utshaba lungcikiva uYehova, Abantu abanobudenge baligibile igama lakho.\n74:19 Musa ukuwunikela erhamncweni umphefumlo wehobe lakho; Ungahlali uwulibele umhlambi wakho oziintsizana.\n74:20 Bheka emnqophisweni, Ngokuba iindawo ezimnyama zelizwe zizele zizindlu zogonyamelo.\n74:21 Makangabuyi otyumkileyo ehlazisiwe; Makalidumise igama lakho olusizana nolihlwempu.\n74:22 Khawusuk\u2019 ume, Thixo, ubambane nababambene nawe; Khumbula ukukungcikiva kwesidenge yonke imini.\n74:23 Musa ukulilibala izwi lababandezeli bakho, Ukungxola kwabasukela phezulu kuwe, okuhlala kunyuka.\n75:1 Kumongameli; ngethi, Ungonakalisi. Umhobe ka-Asafu. Ingoma. Siyabulela kuwe, Thixo, siyabulela; Lisondele igama lakho; Babalisa imisebenzi yakho ebalulekileyo.\n75:2 Ngokuba uthi, Ndiya kwenza ngexesha elimisiweyo, Mna ndiya kugweba ngokuthe tye.\n75:3 Liyetha amandla ihlabathi, nabemi balo; Ke mna, ndizizinzisile iintsika zalo. (Phakamisani.)\n75:4 Ndithi kubaqhayisi, Musani ukuqhayisa; Nakwabangendawo, Musani ukuphakamisa uphondo;\n75:5 Musani ukuluphakamisela phezulu uphondo lwenu, Ningathethi ngokusa, nolule intamo.\n75:6 Ngokuba ugwebo aluveli empumalanga nasentshonalanga, Nasentlango yeentaba.\n75:7 Hayi, nguThixo ogwebayo; Uyamthoba lo, amphakamise lowa.\n75:8 Ngokuba indebe isesandleni sikaYehova, Iphuphuma igwebu lewayini, izele yephithikeziweyo. Uthulula kuyo; ewe, iintlenga zayo Ziya kuselwa zifincwe ngabangendawo bonke behlabathi.\n75:9 Ke mna ndiya kushumayela ngonaphakade, Ndiya kuvuma kuThixo kaYakobi;\n75:10 Zonke iimpondo zabangendawo ndiya kuzixakaxa, Iimpondo zelungisa ziya kuphakanyiswa.\n76:1 Kumongameli; eyokubethelwa ngezinto ezineentambo. Umhobe ka-Asafu. Ingoma. Waziwa kwaYuda uThixo, Likhulu kwaSirayeli igama lakhe.\n76:2 Umnquba wakhe waba seSalem, Nekhaya lakhe eZiyon.\n76:3 Wayaphula apho imibane yesaphetha, Ingweletshetshe, nekrele, nezixhobo zemfazwe. (Phakamisani.)\n76:4 Ukhanyile, uyingangamsha ngaphezu kweentaba zokuqwenga.\n76:5 Babhunyulwe abantliziyo iyimbalasane, Balala umlala kanye, Akazifumana izandla zawo onke amakroti.\n76:6 Ekukhalimeni kwakho, Thixo kaYakobi, Kwasindwa bubuthongo iinqwelo zokulwa namahashe.\n76:7 Unguwena wena woyikekayo; Ngubani na onokuma phambi kwakho, wakuba nomsindo?\n76:8 Emazulwini usivakalisile isigwebo; Loyika ihlabathi, lazola,\n76:9 Ekusukeni kukaThixo ukuba agwebe, Abasindise bonke abalulamileyo behlabathi. (Phakamisani.)\n76:10 Ngokuba ubushushu bomntu buya kuba ngumbulelo kuwe; Uya kuwabhinqa amasalela obushushu.\n76:11 Bhambathisani, nisizalise isibhambathiso kuYehova uThixo wenu; Bonke abamngqongileyo mabeze nezithabathaba kofanele kukoyikwa.\n76:12 Uya kunqumla ukufutha kweenganga, Uyoyikeka kookumkani behlabathi.\n77:1 Kumongameli. KuYedutun. Eka-Asafu. Umhobe. Izwi lam lisingisa kuThixo, ndikhala; Izwi lam lisingisa kuThixo, ukuba andibekele indlebe.\n77:2 Ngemini yokubandezelwa kwam ndiquqela eNkosini yam; Isandla sam solukile ebusuku, asaqoba; Awavuma ukuthuthuzeleka umphefumlo wam.\n77:3 Ndikhumbula uThixo, ndincwine; Ndithelekelele, utyhafe umoya wam. (Phakamisani.)\n77:4 Uzibambile iinkophe zamehlo am, Ndikhandiwe, andaba nakuthetha.\n77:5 Ndicinga ngemihla yamandulo, Iminyaka yasephakadeni;\n77:6 Ndiya kukhumbula ebusuku ukubetha kwam uhadi; Ndithetha nentliziyo yam, uphengulula umoya wam.\n77:7 Ndithi, Iya kundihlamba ngonaphakade na iNkosi yam, Ingabi saphinda iphathe ngetarhu na?\n77:8 Iphele yaphela na inceba yayo? Sigqibele na isithembiso sayo kwisizukulwana ngesizukulwana?\n77:9 UThixo ukulibele na ukubabala? Uyivingcele ngomsindo kusini na imfesane yakhe? (Phakamisani.)\n77:10 Ndide ndithi ke, Sisifo sam esi; Yiminyaka yesandla sokunene sOsenyangweni.\n77:11 Ndikhankanya izenzo ezincamisayo zikaYehova; Ngokuba ndikhumbula imisebenzi yakho ebalulekileyo yamandulo.\n77:12 Ndicamanga ngako konke ukusebenza kwakho, Ndithelekelele ngezenzo zakho zonke ezincamisayo.\n77:13 Thixo, isebungcweleni indlela yakho; Ngubani na onguthixo omkhulu njengoThixo wethu?\n77:14 UnguloThixo, wenza ngokubalulekileyo; Wawazisa amandla akho ezizweni,\n77:15 Wabakhulula ngengalo abantu bakho, Oonyana bakaYakobi noYosefu. (Phakamisani.)\n77:16 Akubona amanzi, Thixo, Akubona amanzi, azibhija-bhija, Ewe, agungqa amanzi enzonzobila;\n77:17 Amafu engqingqwa aphalaza amanzi, Isibhakabhaka savakalisa isandi; Ewe, iintolo zakho zahamba-hamba.\n77:18 Izwi lendudumo yakho laba sesaqhwithini, Imibane yalikhanyisa elimiweyo, Lagungqa lanyikima ihlabathi.\n77:19 Yaba selwandle indlela yakho, Nomendo wakho waba semanzini amaninzi; Awaziwa umkhondo wakho.\n77:20 Wabakhokela njengezimvu abantu bakho, Ngesandla sooMoses noAron.\n78:1 Eyokuqiqa ka-Asafu. Wubekeleni indlebe umyalelo wam, bantu bakowethu, Wathobeleni indlebe amazwi omlomo wam.\n78:2 Ndiya kuwuvula umlomo wam ngomzekeliso; Ndiya kumpompozisa iintsonkotha zamandulo;\n78:3 Esakuvayo sakwazi, Abasibaliselayo oobawo.\n78:4 Asiyi kukugusha koonyana babo; Sobalisela isizukulwana esizayo iindumiso zikaYehova, Namandla akhe, nemisebenzi yakhe ebalulekileyo awayenzayo.\n78:5 Wamisa isingqiniso kwaYakobi, Wabeka umyalelo kwaSirayeli, Awawumisela oobawo, Ukuba bawazise oonyana babo;\n78:6 Ukuze siwazi isizukulwana esizayo, oonyana abaza kuzalwa, Basuke babalisele ababo oonyana;\n78:7 Bayame ngoThixo, Bangazilibali izenzo ezincamisayo zikaThixo, Bayilondoloze imithetho yakhe:\n78:8 Bangabi njengooyise, Isizukulwana esiyinjubaqa, esineenkani, Isizukulwana esingayilungisanga intliziyo yaso, Esimoya unganyanisanga kuThixo.\n78:9 Oonyana bakaEfrayim, bexhobile, beziintoli ezinezaphetha, Bajika ngemini yemfazwe.\n78:10 Abawugcinanga umnqophiso kaThixo, Abavumanga ukuhamba ngomyalelo wakhe;\n78:11 Bazilibala izenzo zakhe ezincamisayo, Nezibalulekileyo zakhe awababonisayo.\n78:12 Phambi kooyise wenza ngokubalulekileyo Ezweni lamaYiputa, emhlabeni waseTsohan.\n78:13 Waludabula ulwandle, wabaweza, Wawamisa amanzi njengemfumba.\n78:14 Wabakhapha ngelifu emini, Ngokukhanya komlilo ubusuku bonke,\n78:15 Walicanda iliwa entlango, Wabaseza amanzi anzongonzongo kakhulu;\n78:16 Wavelisa imiqukuqela yamanzi engxondorheni, Wahlisa amanzi njengemilambo.\n78:17 Baqokela noko ukona kuye, Nokumphikisa Osenyangweni emqwebedwini.\n78:18 Bamlinga uThixo ngentliziyo yabo, Ngokuwubizela umphefumlo wabo ukudla.\n78:19 Bathetha ngoThixo, bathi, Unako na uThixo ukulungisa isithebe entlango?\n78:20 Yabona, walibetha iliwa, abaleka amanzi, Yakhukula nemilanjana; Woba nako na nokubanika ukutya, Nokubalungiselela inyama abantu bakhe?\n78:21 Weva ke uThixo, waphuphuma umsindo wakhe, Watsha umlilo kwaYakobi, Kwenyuka kwaya umsindo kwaSirayeli;\n78:22 Ngokuba bengakholwanga kuThixo, Bengakholosanga ngosindiso lwakhe.\n78:23 Waziwisela ke umthetho iingqimba zamafu ngaphezulu, Wazivula iingcango zezulu;\n78:24 Wabanisela ngemana ukuze badle, Wabanika ingqolowa yasezulwini.\n78:25 Umntu wadla isonka sOnamandla; Wabathumela umphako bada badikwa.\n78:26 Wandulula umoya wasempumalanga ezulwini, Wawuqhuba ngamandla akhe umoya wasezantsi;\n78:27 Wabanisela inyama njengothuli, Neentaka ezinamaphiko njengentlabathi yolwandle;\n78:28 Yawa phakathi kweminquba yabo, Ngeenxa zonke emakhayeni abo.\n78:29 Badla, bahlutha kakhulu, Wabazisela ke inkanuko yabo.\n78:30 Bengekashenxi enkanukweni yabo, Kusekho ukudla kwabo emlonyeni wabo:\n78:31 Kwenyuka umsindo kaThixo waya kubo, Wabulala phakathi kwabatyebileyo babo, Wawawisa amadodana akwaSirayeli.\n78:32 Kuyo yonke loo nto bahambisa ngokona, Abakholwa yimisebenzi yakhe ebalulekileyo.\n78:33 Wayiphelisa ke imihla yabo njengomphunga, Neminyaka yabo ngokukhwankqisa.\n78:34 Xa wathi wababulala, bamquqela; Babuya bamquqela uThixo ngenyameko,\n78:35 Bakhumbula ukuba uThixo uliliwa labo, UThixo Osenyangweni ungumkhululi wabo.\n78:36 Ke bamthomalalisa ngomlomo wabo, Bamxokisa ngolwimi lwabo;\n78:37 Intliziyo yabo ayaqina kuye, Abanyaniseka emnqophisweni wakhe.\n78:38 Ke yena unemfesane, Uxolela ubugwenxa ngocamagushelo, akonakalisi; Wawubuyisa futhi umsindo wakhe, Akabuxhoxha bonke ubushushu bakhe.\n78:39 Wakhumbula ukuba bayinyama, Bangumoya omkayo, ongabuyiyo.\n78:40 Kukangaphi bemphikisa entlango, Bemenza buhlungu enkangala!\n78:41 Babuya bamlinga uThixo, Bamenzakalisa oyiNgcwele wakwaSirayeli.\n78:42 Abasikhumbula isandla sakhe, Imini awabakhulula ngayo embandezelweni;\n78:43 Awamisa ngayo imiqondiso yakhe eYiputa, Nezimanga zakhe emhlabeni waseTsohan.\n78:44 Wayiguqula imijelo yabo, yaba ligazi, Ababa nakuyisela imiqukuqela yabo yamanzi.\n78:45 Wathumela kubo iingcongconi, zabadla; Namasele, abatshabalalisa.\n78:46 Izilimo zabo wazinika iinkumbi ezinqunquthayo, Ukuxelenga kwabo wakunika iinkumbi ezandayo.\n78:47 Wawubulala ngesichotho umdiliya wabo, Nemithombe yabo ngomkhenkce.\n78:48 Wayinikela kwisichotho imfuyo yabo, Nemihlambi yabo ngemibane.\n78:49 Wathumela kubo ukuvutha komsindo wakhe, Ukuphuphuma kwawo, nokubhavuma, nembandezelo, Ibutho lezithunywa zobubi.\n78:50 Wawulungelelanisela umendo umsindo wakhe, Akawunqanda ekufeni umphefumlo wabo, Wabunikela ubomi babo kwindyikitya yokufa.\n78:51 Wababulala bonke abamazibulo eYiputa, Iintlahlela zamandla obudoda ezintenteni zakwaHam.\n78:52 Abantu bakhe wabafudusa njengezimvu, Wabaqhuba njengomhlambi entlango;\n78:53 Wabakhapha bekholosile, bengankwantyi; Ke zona iintshaba zabo lwazigubungela ulwandle\n78:54 Wabazisa emdeni wakhe ongcwele, Kule ntaba sayizuzayo isandla sakhe sokunene.\n78:55 Wagxotha iintlanga ebusweni babo, Wazenzela amaqashiso zalilifa elicandiweyo; Izizwe zakwaSirayeli wazihlalisa ezintenteni zazo.\n78:56 Kodwa bamlinga, bamphikisa uThixo Osenyangweni, Abazigcina izingqiniso zakhe,\n78:57 Babuya unuva, banginiza njengooyise. Bajika njengesaphetha esikhohlisayo.\n78:58 Bamqumbisa ngeziganga zabo, Bamkhweletisa ngemifanekiso yabo eqingqiweyo.\n78:59 Weva uThixo, waphuphuma umsindo, Wawacekisa kakhulu amaSirayeli;\n78:60 Wawulahla umnquba waseShilo, Intente abeyimise esintwini;\n78:61 Wawanikela ekuthinjweni amandla akhe, Isihombo sakhe esandleni sombandezeli.\n78:62 Wabanikela abantu bakhe kwikrele, Umsindo wakhe waphuphumela ilifa lakhe.\n78:63 Amadodana abo adliwa ngumlilo, Iintombi zabo azagcotyelwa.\n78:64 Ababingeleli babo bawa likrele, Abahlolokazi babo abalila.\n78:65 Yaza yavuka njengobelele iNkosi, Njengegorha elimemeleliswa yiwayini.\n78:66 Yababetha ngasemva ababandezeli bayo, Yabenza ingcikivo engunaphakade.\n78:67 Yayicekisa intente yakwaYosefu, Ayasinyula isizwe sakwaEfrayim.\n78:68 Yanyula isizwe sakwaYuda, Intaba yaseZiyon eyayithandayo.\n78:69 Yayakha njengokuphakama kwezulu ingcwele yakhe, Njengomhlaba lo awusekileyo ngonaphakade.\n78:70 Yanyula uDavide umkhonzi wayo, Yamthabatha ezibayeni zezimvu;\n78:71 Yamthabatha elandela izimvu ezanyisayo, Yamzisa ukuba aluse kwaYakobi abantu bayo, KwaSirayeli ilifa layo.\n78:72 Wabalusa ke ngengqibelelo yentliziyo yakhe, Wabakhapha ngokwazi kwezandla zakhe.\n79:1 Umhobe ka-Asafu. Thixo, iintlanga zingene elifeni lakho, Ziyenze inqambi itempile yakho engcwele; Ziyenze yayimiwewe iYerusalem.\n79:2 Izidumbu zabakhonzi bakho zizinike iintaka zezulu ukuba zizidle, Nenyama yabakho benceba ziyinike amarhamncwa elizwe.\n79:3 Ziliphalazile igazi labo njengamanzi ngeenxa zonke eYerusalem; Akwabakho mngcwabi.\n79:4 Senziwe ingcikivo kubamelwane bethu, Isigculelo nesicukucezo kwabasingqongileyo.\n79:5 Kunini na, Yehova, uhleli uqumbile? Liya kuvutha njengomlilo na ikhwele lakho?\n79:6 Phalaza ubushushu bakho ezintlangeni ezingakwaziyo, Ezikumkanini ezingalinquliyo igama lakho.\n79:7 Ngokuba zimdlile uYakobi, Zalenza inxuwa ikhaya lakhe.\n79:8 Musa ukubukhumbula kuthi ubugwenxa bamanyange ethu, Mayingxame isikhawulele imfesane yakho: Ngokuba siswele kakhulu.\n79:9 Sincede, Thixo ongumsindisi wethu, ngenxa yozuko lwegama lakho, Usihlangule, uzixolele ngocamagushelo izono zethu ngenxa yegama lakho.\n79:10 Yini na ukuba iintlanga zithi kuthi, Uphi na uThixo wabo? Makwazeke ezintlangeni, emehlweni ethu, Ukuphindezelwa kwegazi labakhonzi bakho eliphalaziweyo.\n79:11 Makuze phambi kwakho ukugcuma kwamakhonkxwa; Ngokobukhulu bengalo yakho basalise oonyana bokufa.\n79:12 Yibuyisele kubamelwane bethu kasixhenxe esondweni lengubo yabo Ingcikivo yabo, abakungcikive ngayo, Nkosi.\n79:13 Ke thina bantu bakho, zimvu zaluswa nguwe, Siya kubulela kuwe ngonaphakade, Sibalise ngendumiso yakho kwizizukulwana ngezizukulwana.\n80:1 Kumongameli; ngeyeenyibiba ezingqinisayo. Ka-Asafu. Umhobe. Ulomalusi kaSirayeli, beka indlebe! Uloqhuba uYosefu njengezimvu, Ulohlala ezikerubhini, bengezela!\n80:2 Phambi koEfrayim noBhenjamin noManase, Vusa ubugorha bakho, Uze kusisindisa.\n80:3 Thixo, sibuyise, Ukhanyise ubuso bakho, sisindiswe.\n80:4 Yehova, Thixo wemikhosi, Kunini na uqhuma umsindo wakho ekuthandazeni kwabantu bakho?\n80:5 Ubadlisa isonka seenyembezi, Wabaseza iinyembezi ngemilinganiso.\n80:6 Usenze into abaxabana ngayo abamelwane bethu; Iintshaba zethu ziyasigculela.\n80:7 Thixo wemikhosi, sibuyise, Ukhanyise ubuso bakho, sisindiswe.\n80:8 Wanyothula umdiliya eYiputa, Wagxotha iintlanga, wawutyala;\n80:9 Wahlahla phambi kwawo, Wendelisa iingcambu, wazalisa ilizwe.\n80:10 Zagutyungelwa iintaba ngumthunzi wawo, Nemisedare kaThixo ngamasebe awo.\n80:11 Wasa amasebe awo elwandle, Namagatya awo kuwo uMlambo.\n80:12 Uzityhobozeleni na iintango zawo, Ukuze bawukhe bonke abadlula ngendlela?\n80:13 Ingulube yasehlathini iyawubhuqa, Nento edakasa endle iyawudla.\n80:14 Thixo wemikhosi, khawubuye, Uqondele usemazulwini, ubone, Uwuvelele lo mdiliya.\n80:15 Yikhusele into esiyityeleyo isandla sakho sokunene, Unyana lo uzizimaseleyo ngokwakho.\n80:16 Utshisiwe ngumlilo, uhlahliwe; Bayadaka ngokusongela kobuso bakho.\n80:17 Isandla sakho masibe phezu komfo wesandla sakho sokunene, Phezu koonyana babantu, ozizimaseleyo ngokwakho.\n80:18 Asiyi kumka kuwe; Siphilise, silinqule igama lakho.\n80:19 Yehova, Thixo wemikhosi, sibuyise, Ukhanyise ubuso bakho, sisindiswe.\n81:1 Kumongameli; ngolwaseGati. Ka-Asafu. Memelelani kuThixo, igwiba lethu, Dumani kuThixo kaYakobi.\n81:2 Hlabani ingoma, nibethe ingqongqo, Uhadi olumnandi, kunye nomrhubhe.\n81:3 Vuthelani isigodlo ukuthwasa kwenyanga, Nokuhlangana kwenyanga, ngemini yomthendeleko wethu.\n81:4 Ngokuba ngummiselo lowo kuSirayeli, Lisiko likaThixo kaYakobi.\n81:5 Sisingqiniso awasimisayo kwaYosefu, Ekucandeni kwakhe ezweni laseYiputa; Ndeva intetho endingayaziyo.\n81:6 Ndawususa umthwalo egxalabeni lakhe; Izandla zakhe zasuka ezingobozini zokuthwala.\n81:7 Embandezelweni wadanduluka wena, ndakuhlangula; Ndakuphendula esitheni leendudumo, Ndakuvavanya emanzini aseMeribha. (Phakamisani.)\n81:8 Ndathi, Yivani, bantu bam, ndiqononondise kuni; Sirayeli, ukuba unokuphulaphula kum!\n81:9 Makungabikho thixo wasemzini kuwe; Unganquli thixo wolunye uhlanga.\n81:10 Ndim uYehova uThixo wakho, Okunyusileyo elizweni laseYiputa. Yakhamisa, ndiwuzalise umlomo wakho.\n81:11 Ke abantu bam abaliva izwi lam, USirayeli akandivumanga.\n81:12 Ndabanikela ebungqoleni beentliziyo zabo; Bahamba ngawabo amaqhinga.\n81:13 Akwaba abantu bam bebendiva, Akwaba uSirayeli ubehamba ngendlela yam!\n81:14 Bendiya kuzithoba kamsinya iintshaba zabo, Ndisibuyisele phezu kwababandezeli babo isandla sam.\n81:15 Abamthiyayo uYehova bebeya kuhanahanisa kuye, Libe ngunaphakade ixesha labo.\n81:16 Bendiya kubadlisa ingqolowa etyebileyo, Ndibahluthise ngobusi etsilini.\n82:1 Umhobe ka-Asafu. UThixo umi ebandleni likaThixo, Ugweba phakathi koothixo; uthi,\n82:2 Kunini na nigweba ngobugqwetha, Nibanonelela abangendawo? (Phakamisani.)\n82:3 Thethani ityala losweleyo nelenkedama, Gwebelani olusizana nolihlwempu.\n82:4 Sizani osweleyo nolihlwempu, Bahlanguleni esandleni sabangendawo.\n82:5 Abazi, abaqondi, Bahamba-hamba emnyameni; Ziyashukuma zonke iziseko zehlabathi.\n82:6 Ndithe mna, Ningoothixo, Ningoonyana bOsenyangweni nonke niphela.\n82:7 Noko niya kufa njengomntu, Niwe njengomnye kubathetheli.\n82:8 Khawusuk\u2019 ume, Thixo, gweba ehlabathini; Ngokuba uya kuzidla ilifa wena zonke iintlanga.\n83:1 Ingoma. Umhobe ka-Asafu. Thixo, musa ukuthi cwaka, Musa ukuthi tu, musa ukuzola, Thixo.\n83:2 Ngokuba nanzo iintshaba zakho zixokozela; Abakuthiyayo baphakamisa intloko.\n83:3 Bagqugula igqugula elinobuqhophololo ngabantu bakho, Bacebisane ngabagushiweyo nguwe.\n83:4 Bathi, Yizani sibethe bee shwaka, bangabi luhlanga, Lingabi sakhunjulwa igama likaSirayeli.\n83:5 Ngokuba bacebisana ngantliziyo-nye, Benza umnqophiso ngawe:\n83:6 Iintente zakwaEdom nezakwaIshmayeli, AmaMowabhi namaHagari,\n83:7 AmaGebhali nama-Amon nama-Amaleki, AmaFilisti kunye nabemi baseTire;\n83:8 Nama-Asiriya athelele kubo, Baba yingalo koonyana bakaLote. (Phakamisani.)\n83:9 Yenza kubo njengoko wenza ngako kumaMidiyan, NakuSisera, nakuYabhin esihlanjeni seKishon.\n83:10 Batshabalala e-Endore, Baba ngumgquba wokugalelwa emhlabeni.\n83:11 Benze bona, amanene abo ke, babe njengo-Orebhe nanjengoZebhe; Zonke iinkosi zabo zibe njengoZebha nanjengoTsalimuna;\n83:12 Bona bathi, Masiwahluthe abe ngawethu amakhaya kaThixo.\n83:13 Thixo wam, benze babe njengesaqhwithi, Njengomququ phambi komoya.\n83:14 Njengomlilo odla ihlathi, Njengedangatye lilenya intaba,\n83:15 Yenjenjalo ukubasukela ngoqhwithela lwakho, Ubakhwankqise ngomoya wakho ovuthuzayo.\n83:16 Buzalise ubuso babo ngehlazo, Balifune igama lakho, Yehova.\n83:17 Mabadane bakhwankqiswe ngonaphakade, Babe neentloni, badake;\n83:18 Bazi ukuba wena, ugama linguYehova, unguwe wedwa Osenyangweni phezu kwehlabathi lonke.\n84:1 Kumongameli; ngolwaseGati. Eyoonyana bakaKora. Umhobe. Hayi, ukuthandeka kweminquba yakho, Yehova wemikhosi!\n84:2 Umphefumlo wam ulangazelela, uyaphela kukuzilangazelela, iintendelezo zikaYehova; Intliziyo yam nenyama yam imemelela kuThixo ophilileyo.\n84:3 Intakana le ifumene ikhaya; Inkonjane izifumanele indlu, Apho izalela khona amathole ayo: Izibingelelo zakho, Yehova wemikhosi, Kumkani wam, Thixo wam.\n84:4 Hayi, uyolo lwabahlala endlwini yakho! Basaya kukudumisa. (Phakamisani.)\n84:5 Hayi, uyolo lwabantu abamandla akuwe, Abakhumbula umendo oya eZiyon!\n84:6 Bephumela entilini yemithi yeBhaka, Bayenza ibe nemithombo; Ewe, imvula iyithi wambu ngentsikelelo.\n84:7 Baya besomelela ngokomelela; Babonakala phambi koThixo eZiyon, bathi,\n84:8 Yehova, Thixo wemikhosi, Wuve umthandazo wam, Wubekele indlebe, Thixo kaYakobi. (Phakamisani.)\n84:9 Khangela, Thixo, ngweletshetshe yethu, Ubukhangele ubuso bomthanjiswa wakho.\n84:10 Ngokuba imini enye ezintendelezweni zakho ilungile kunewaka; Ndinyule ukuba semnyango endlwini kaThixo wam, Kunokuhlala ngaphakathi kweentente zokungendawo.\n84:11 Ngokuba ulilanga, uyingweletshetshe uYehova uThixo, UYehova uyababala azukise; Abahamba ngokugqibeleleyo akabavimbi nto ilungileyo.\n84:12 Yehova wemikhosi, Hayi, uyolo lomntu okholose ngawe!\n85:1 Kumongameli; eyoonyana bakaKora. Umhobe. Yehova, wabe unetarhu kwilizwe lakho. Ububabuyisa abathinjwa bakaYakobi;\n85:2 Ububuxolela ubugwenxa babantu bakho, Ubuziselela zonke izono zabo. (Phakamisani.)\n85:3 Ubuwufinyeza umsindo wakho ophuphumayo, Ububuya ekuvutheni komsindo wakho.\n85:4 Sibuyise, Thixo ongumsindisi wethu, Uyisuse ingqumbo yakho kuthi.\n85:5 Uya kusiqumbela ngonaphakade na? Umsindo wakho uya kuwolulela kwizizukulwana ngezizukulwana na?\n85:6 Akuyi kubuya usiphilise na, Abantu bakho bavuye ngawe?\n85:7 Sibonise inceba yakho, Yehova, Siphe usindiso lwakho.\n85:8 Mandive oko aya kukuthetha uThixo, uYehova; Hayi, uthetha uxolo kubantu bakhe nakwabakhe benceba; Mabangabuyeli ke ekunyabeni kwabo.\n85:9 Inene, usindiso lwakhe lusondele kwabamoyikayo, Ukuze luhlale uzuko ezweni lakowethu.\n85:10 Kuya kuqubisana inceba nenyaniso, Kuya kwangana ubulungisa noxolo.\n85:11 Inyaniso iya kuntshula emhlabeni, Ubulungisa buqondele busemazulwini.\n85:12 Kananjalo uYehova uya kusinika okulungileyo, Ilizwe lethu lisinike indyebo yalo.\n85:13 Ubulungisa buya kuhamba phambi kwakhe, Buyigqale ngentliziyo indlela yokunyathela kwakhe.\n86:1 Umthandazo kaDavide. Thoba indlebe yakho, Yehova, ndiphendule, Ngokuba ndilusizana, ndilihlwempu.\n86:2 Wugcine umphefumlo wam, ngokuba ndingowenceba; Msindise, wena Thixo wam, umkhonzi wakho, Lo ukholose ngawe.\n86:3 Ndibabale, Nkosi yam, Ngokuba ndidanduluka kuwe yonke imini.\n86:4 Wuvuyise umphefumlo womkhonzi wakho, Ngokuba umphefumlo wam ndiwuphakamisela kuwe, Nkosi yam;\n86:5 Ngokuba ulungile wena, Nkosi yam, uxolela; Umkhulu ngenceba kubo bonke abakunqulayo.\n86:6 Wubekele indlebe umthandazo wam, Yehova, Ulibazele indlebe izwi lokutarhuzisa kwam.\n86:7 Ngemini yokubandezelwa kwam ndinqula wena, Ngokuba uya kundiphendula.\n86:8 Akukho unjengawe, Nkosi yam, phakathi koothixo; Akukho zenzo zinjengezakho.\n86:9 Zonke iintlanga owazenzayo ziya kuza ziqubude phambi kwakho, Nkosi yam, Zizukise igama lakho.\n86:10 Ngokuba umkhulu, wenza imisebenzi ebalulekileyo, UnguThixo wena wedwa.\n86:11 Ndiyalele, Yehova, indlela yakho, Ndihambe ngenyaniso yakho; Yibandakanye intliziyo yam ukuba ndiloyike igama lakho.\n86:12 Ndiya kubulela kuwe, Nkosi yam, Thixo wam, ngentliziyo yonke, Ndilizukise igama lakho ngonaphakade:\n86:13 Ngokuba inceba yakho ibe inkulu kum; Wawuhlangula umphefumlo wam kwelingaphantsi labafileyo.\n86:14 Thixo, abakhukhumali basukele phezulu kum; Ibandla labanobungqwangangqwili lifuna umphefumlo wam; Abakumisi wena phambi kwabo.\n86:15 Ke wena, Nkosi yam, unguThixo onemfesane, onobabalo, Ozeka kade umsindo, omkhulu ngenceba nenyaniso.\n86:16 Ndibheke, undibabale; Mphe amandla akho umkhonzi wakho, Umsindise unyana womkhonzazana wakho.\n86:17 Ndenzele umqondiso wokulungileyo, Bawubone abandithiyayo, badane, Kuba wena, Yehova, undincedile, wandithuthuzela.\n87:1 Eyoonyana bakaKora. Umhobe. Ingoma. Useko alusekileyo lusezintabeni ezingcwele;\n87:2 Amasango eZiyon uYehova uwathanda Ngaphezu kweminquba yonke kaYakobi.\n87:3 Kuthethwa iinto ezizukileyo ngawe, Mzi kaThixo. (Phakamisani.)\n87:4 ORahabhi noBhabheli ndiya kubakhankanyela kwabandaziyo; Nalo elamaFilisti nelaseTire, kunye nelakwaKushi, Aba bazalelwe khona.\n87:5 Ngokusingisele kwiZiyon, kuya kuthiwa, Lo, nalo, uzalelwe kuyo, Abe yena Osenyangweni eyizinzisa.\n87:6 UYehova uya kubala, ekuzibhaleni izizwi, athi, Abaya bazalelwe khona: (Phakamisani.)\n87:7 Baze, bevuma beqamba, bathi, Yonke imithombo yam ikuwe.\n88:1 Ingoma; umhobe woonyana bakaKora; kumongameli; ngosizi, ngelidambileyo. Owokuqiqa kaHeman umEzra. Yehova, Thixo ongumsindisi wam, Mhlenikweni ndikhalayo ebusuku phambi kwakho,\n88:2 Mawuze phambi kwakho umthandazo wam; Thoba indlebe yakho ekuhlahlambeni kwam.\n88:3 Ngokuba umphefumlo wam uhluthi zizinto ezimbi, Ubomi bam bufike kwelabafileyo.\n88:4 Ndibalelwe kwabahla baye emhadini, Ndisuke ndanjengomfo ongenamandla\n88:5 Ndingumkhululwa phakathi kwabafileyo, Njengababuleweyo, belele engcwabeni, Ongasabakhumbuliyo; Bona banqunyulweyo esandleni sakho.\n88:6 Undibeke emhadini ongaphantsi, Ezindaweni ezimnyama, ezinzulwini.\n88:7 Ubushushu bakho bundishicilele, Undithobele onke amaza akho alwayo. (Phakamisani.)\n88:8 Ubashenxisele kude kum abo ndazana nabo, Undenze isikizi kubo; Ndivalelwe, andinakuphuma.\n88:9 Iliso lam liyaphela yingcinezelo. Ndidanduluka kuwe, Yehova, yonke imini, Ndizolulela kuwe izandla zam.\n88:10 Uya kuyenzela abafileyo na imisebenzi ebalulekileyo? Kuya kuvuka abangasekhoyo, kusini na, babulele kuwe? (Phakamisani.)\n88:11 Ibaliswa engcwabeni na inceba yakho? Enzonzobileni na, ukunyanisa kwakho?\n88:12 Yaziswa emnyameni na imisebenzi yakho ebalulekileyo? Baziswa ezweni lokulibala na ubulungisa bakho?\n88:13 Ke mna, Yehova, ndizibika kuwe, Kwakusasa umthandazo wam wokuhlangabeza.\n88:14 Uwuhlambelani na, Yehova, umphefumlo wam? Ubusitheliselani na ubuso bakho kum?\n88:15 Ndilusizana, ndiyinto efayo kwasebuncinaneni bam, Ndithwele izothuso zakho, lindikhohlile.\n88:16 Kugqithe phezu kwamukuvutha kwakho, Izidandathekiso zakho zindibhangisile;\n88:17 Zindijikelezile njengamanzi imini yonke, Zindizungulezile kwaphela.\n88:18 Umsusile kum ondithandayo nonguwethu; Abo ndazana nabo babubumnyama.\n89:1 Eyokuqiqa kaEtan, umEzra. Iinceba zikaYehova ndiya kuvuma ngazo ngonaphakade, Kwizizukulwana ngezizukulwana ndiya kwazisa ukuthembeka kwakho ngomlomo wam.\n89:2 Ngokuba ndithi, Yakheka ngonaphakade inceba; Amazulu, uya kukuzinzisa kuwo ukuthembeka kwakho.\n89:3 Wathi, Ndenze umnqophiso nomnyulwa wam, Ndifungile kuDavide umkhonzi wam:\n89:4 Ndiya kuyizimasa ngonaphakade imbewu yakho, Ndiyakhe itrone yakho kwisizukulwana ngesizukulwana. (Phakamisani.)\n89:5 Amazulu abulela imisebenzi yakho ebalulekileyo, Yehova, Nokuthembeka kwakho ebandleni labangcwele.\n89:6 Ngokuba ngubani na esibhakabhakeni olingana noYehova? Ngubani na ofana noYehova phakathi koonyana bakaThixo.\n89:7 UThixo ongowokungcangcazelelwa ebhungeni elikhulu labangcwele, Ongofanelwe kukoyikwa ngaphezu kwabo bonke abamngqongileyo?\n89:8 Yehova, Thixo wemikhosi, Ngubani na onjengawe, oluqilima, Yehova? Ukuthembeka kwakho kukungqongile.\n89:9 Nguwena mlawuli wekratshi lolwandle; Ekuphakameni kwamaza alo uyawadambisa.\n89:10 Nguwena mtyumzi kaRahabhi njengongxwelerhiweyo, Wazithi saa iintshaba zakho ngengalo yakho eqinileyo.\n89:11 Lelakho izulu, likwalelakho ihlabathi; Elimiweyo nenzaliseko yalo lasekwa nguwe.\n89:12 Umntla nomzantsi wadalwa nguwe; ITabhore neHermon zimemelela ngegama lakho.\n89:13 Yeyakho ingalo enobugorha; Sithe nkqi isandla sakho, siphakamile esokunene sakho.\n89:14 Ummiso wetrone yakho bubulungisa nokusesikweni; Inceba nenyaniso ilungiselela phambi kwakho.\n89:15 Hayi, uyolo lwabantu abakwaziyo ukuduma! Baya kuhamba ekukhanyeni kobuso bakho, Yehova.\n89:16 Baya kugcoba egameni lakho imini yonke, Baphakame ngobulungisa bakho.\n89:17 Ngokuba isihombo samandla abo nguwe; Ekuthandeni kwakho, uphondo lwethu luphakamile.\n89:18 Ngokuba ikuYehova ingweletshetshe yethu, UkoyiNgcwele kaSirayeli ukumkani wethu.\n89:19 Wakha wathetha ngombono kowenceba wakho, wathi, Ndibeke uncedo egorheni, Ndiphakamise indodana ebantwini.\n89:20 Ndifumene uDavide umkhonzi wam; Ndimthambisile ngeoli yam engcwele,\n89:21 Esiya kuqinisela kuye isandla sam, Nengalo yam imkhaliphise.\n89:22 Utshaba aluyi kumqubula; Nonyana wobugqwetha akayi kumcinezela.\n89:23 Ndiya kubaqoba phambi kwakhe ababandezeli bakhe, Ndibaxabele abamthiyayo.\n89:24 Inyaniso yam nenceba yam inaye; Luya kuphakama uphondo lwakhe egameni lam.\n89:25 Ndiya kusisa elwandle isandla sakhe, EMilanjeni esokunene sakhe.\n89:26 Yena ukundibiza wothi, UnguBawo, UnguThixo wam, neliwa lokundisindisa.\n89:27 Kananjalo mna ndiya kumenza owamazibulo, Osenyangweni kookumkani behlabathi.\n89:28 Ndiya kumgcinela inceba yam ngonaphakade, Umnqophiso wam unyanise kuye;\n89:29 Ndiyimise ngonaphakade imbewu yakhe, Netrone yakhe ibe njengemihla yamazulu.\n89:30 Ukuba bathe oonyana bakhe bawulahla umyalelo wam, Abahamba ngamasiko am;\n89:31 Ukuba bathe bayihlambela imimiselo yam, Abayigcina imithetho yam:\n89:32 Ndoluvelela ukreqo lwabo ngentonga, Nobugwenxa babo ngemivumbo.\n89:33 Ke yona inceba yam andiyi kuyaphula kuye, Ndingaxoki ekuthembekeni kwam.\n89:34 Andiyi kuwuhlambela umnqophiso wam, Ndiyijike into ephume emlonyeni wam.\n89:35 Ndibufunge kwakanye ubungcwele bam, ndathi, Inene, andiyi kumxokisa uDavide;\n89:36 Imbewu yakhe iya kubakho ngonaphakade, Netrone yakhe njengelanga phambi kwam.\n89:37 Iya kuqiniseka njengenyanga ngonaphakade; Ingqina lasesibhakabhakeni lithembekile. (Phakamisani.)\n89:38 Kwawena umhlambile, umcekisile, Umphuphumele ngomsindo umthanjiswa wakho;\n89:39 Uthe nethe ngumnqophiso womkhonzi wakho; Usidyobhile emhlabeni isithsaba sakhe.\n89:40 Uzityhobozile zonke iintango zakhe, Uzenze inxuwa iinqaba zakhe.\n89:41 Bayamphanga bonke abadlula ngendlela, Waba yingcikivo kubamelwane bakhe.\n89:42 Usiphakamisile isandla sokunene sabambandezelayo, Uzivuyisile zonke iintshaba zakhe.\n89:43 Wabuyisa nokubuyisa uhlangothi lwekrele lakhe, Akwammisa emfazweni.\n89:44 Umsusile enkazimlweni yakhe, Uyikhahlele emhlabeni itrone yakhe,\n89:45 Uyinqumle imihla yobutsha bakhe, Wamthi wambu ngokudana. (Phakamisani.)\n89:46 Kunini na, Yehova, uhleli uzisithelisile, Busitsha njengomlilo ubushushu bakho?\n89:47 Khumbula ukunqamka kwam, into okuyiyo! Ubadaleleni na, baba yinto engento bonke oonyana babantu?\n89:48 Yiyiphi na indoda ehleliyo, engayi kukubona ukufa, Enokuwusindisa umphefumlo wayo esandleni selabafileyo? (Phakamisani.)\n89:49 Ziphi na iinceba zakho zangaphambili, Nkosi yam, Owamfungela zona uDavide ngokuthembeka kwakho?\n89:50 Khumbula, Nkosi yam, ukungcikiveka kwabakhonzi bakho; Ndithwele esifubeni sam zonke izizwe ezininzi,\n89:51 Ezingcikivayo, ziziintshaba zakho, Yehova; Ezingcikiva amanyathela omthanjiswa wakho.\n89:52 Makabongwe uYehova ngonaphakade. Amen, amen.\n90:1 Umthandazo kaMoses, umfo wakwaThixo. Nkosi yam, ulikhaya wena kuthi, Isizukulwana ngesizukulwana.\n90:2 Kungekazalwa zintaba, Ungekavelisi mhlaba, nazwe limiweyo, Kususela kwaphakade kude kuse ephakadeni, wena unguThixo.\n90:3 Umbuyisela umntu eluthulini, Uthi, Buyani, nyana babantu.\n90:4 Ngokuba iwaka leminyaka emehlweni akho Linjengemini yezolo, xa idluleyo, Linjengomlindo wasebusuku.\n90:5 Uyabakhukulisa, balale; Ngengomso babuya bahlume njengotyani.\n90:6 Ngomso butyatyamba, bubuye buhlume; Ngokuhlwa buyasikwa bome.\n90:7 Ngokuba siyaphela ngumsindo wakho, Sikhwankqiswe bubushushu bakho.\n90:8 Ububeke ubugwenxa bethu phambi kwakho, Nesibufihlileyo ububeka ekukhanyiseleni kobuso bakho.\n90:9 Ngokuba yonke imihla yethu isangene ngokuphuphuma komsindo wakho, Siyiphelisile iminyaka yethu njengentsebezo.\n90:10 Imihla yeminyaka yethu iseminyakeni engamashumi asixhenxe; Ukuba ithe yaba mininzi kakhulu, iba yiminyaka emashumi asibhozo, Libe ke iqhayiya layo likukwaphuka nokungabi nto yanto, Ngokuba ithe phe yakhawuleza, saphaphazela semka.\n90:11 Ngubani na owaziyo amandla omsindo wakho, Nokuphuphuma kwawo, ngoko ufanele ukoyikwa ngako?\n90:12 Sazise kanye ukuyibala imihla yethu, Ukuze sizuze intliziyo elumkileyo.\n90:13 Buya, Yehova, kunini na? Uzohlwaye ngenxa yabakhonzi bakho.\n90:14 Sihluthise kwakusasa ngenceba yakho, Simemelele, sivuye yonke imihla yethu.\n90:15 Sivuyise ngangemihla owasicinezela ngayo. Ngangeminyaka esabona ububi ngayo.\n90:16 Mayibonakale kubakhonzi bakho imisebenzi yakho, Nobungangamela bakho koonyana babo.\n90:17 Ubumnandi bukaYehova mabube phezu kwethu. Zimasa isenzo sezandla zethu phezu kwethu, Isenzo sezandla zethu usizimase sona.\n91:1 Ohleli esitheni lOsenyangweni, Azilalise emthunzini kaSomandla,\n91:2 Uthi kuYehova, Hlathi lam, Mboniselo yam, Thixo wam, endikholose ngaye!\n91:3 Ngokuba ngokwakhe uya kukuhlangula emgibeni womthiyeli, Endyikityeni yokufa eyeyelisayo.\n91:4 Wokugubungela ngeentsiba zakhe, Uzimele phantsi kwamaphiko akhe. Likhaka, yingweletshetshe inyaniso yakhe.\n91:5 Akuyi koyikiswa zizothuso ebusuku, Nalutolo lubaleka emini;\n91:6 Nandyikitya yakufa ihamba esithokothokweni, Nasifo sibhubhisayo, sibhuqa emini enkulu.\n91:7 Kungawa iwaka ecaleni kwakho, Isigidi ngasekunene kwakho, Kodwa kungasondeli nto kuwe.\n91:8 Wokhangela ngamehlo akho odwa, Ukubonele ukubuyekezwa kwabangendawo.\n91:9 Ngokuba nguwe, Yehova, ihlathi lam. Umenze Osenyangweni ikhaya lakho.\n91:10 Akuyi kuqubisana bubi nawe. Kungafiki sibetho ententeni yakho.\n91:11 Ngokuba izithunywa zakhe uziwisele umthetho ngawe, Ukuba zikugcine ezindleleni zakho zonke.\n91:12 Zokuthwala wena ngezandla zozibini, Hleze ubetheke ngonyawo lwakho etyeni.\n91:13 Wonyathela phezu kwengonyama nephimpi, Uyinyashe ingonyama entsha nenamba ngeenyawo.\n91:14 Ngokuba enamathele kum, ndomsiza; Ndimse engxondeni, ngokuba elazi igama lam.\n91:15 Wondibiza, ndiphendule, Ndoba naye embandezelweni; Ndomhlangula, ndimzukise;\n91:16 Ndimanelise ngemihla emide, Ndimbonise ukusindisa kwam.\n92:1 Umhobe; ingoma, ngemini yesabatha. Kulungile ukubulela kuYehova, Nokulibethela uhadi igama lakho, Wena usenyangweni;\n92:2 Ukuyixela kwakusasa inceba yakho, Nokunyanisa kwakho ebusuku,\n92:3 Ngoweentambo ezilishumi nangomrhubhe, Ngokulubetha uhadi ngofefe.\n92:4 Ngokuba uyandivuyisa, Yehova, ngomsebenzi wakho, Ngezenzo zezandla zakho ndinokumemelela.\n92:5 Azizikhulu izenzo zakho, Yehova! Zinzulu kakhulu iingcinga zakho.\n92:6 Isityhakala asinakwazi; Isinyabi asikuqondi oko.\n92:7 Ekudubuleni kongendawo njengomfuno, Ekutyatyambeni kwabasebenzi bonke bobutshinga, Kukuze batshabalale ngonaphakade.\n92:8 Ke wena, Yehova, ungophezulu ngonaphakade.\n92:9 Ngokuba uyabona, iintshaba zakho, Yehova, Ngokuba uyabona, iintshaba zakho ziva kutshabalala; Baya kuchithwa-chithwa bonke abasebenzi bobutshinga.\n92:10 Uyaluphakamisa uphondo lwam njengolwenqu; Ndigalelwe ioli entsha.\n92:11 Iliso lam liyababonela abandilalelayo, Indlebe yam iyabeva abasukela phezulu kum benobubi.\n92:12 Amalungisa aya kudubula njengesundu, Aya kukhula njengomsedare weLebhanon.\n92:13 Etyelwe nje endlwini kaYehova, Aya kutyatyamba ezintendelezweni zoThixo wethu.\n92:14 Aya kuhluma eselenezimvi, Aya kuba etyebile, eluhlaza;\n92:15 Ukuze axele ukuba uthe tye uYehova, Uliwa lam, kungekho bugqwetha kuye.\n93:1 UYehova ungukumkani, uzambathise ubungangamsha; UYehova uzambathise, ubhinqe, amandla; Lizinzile ke elimiweyo, alinakushukunyiswa.\n93:2 Kususela koko, izinzile itrone yakho; Kususela kwaphakade, ukho wena.\n93:3 Imilambo iphakamisile, Yehova, Imilambo iphakamise isandi sayo, Imilambo iphakamise ingxolo yayo.\n93:4 Ngaphezu kwezandi zamanzi amaninzi Angangamsha, ngaphezu kwamaza alwayo olwandle, Unobungangamsha phezulu uYehova.\n93:5 Izingqiniso zakho zinyanise kunene, Ubungcwele buyifanele indlu yakho, Yehova, imihla emide.\n94:1 Thixo wempindezelo, Yehova, Thixo wempindezelo, bengezela!\n94:2 Phakama, Mgwebi wehlabathi! Babuyisele impatho yabo abanekratshi.\n94:3 Kunini na abangendawo, Yehova, Kunini na abangendawo bevuyelela?\n94:4 Balephuza amagwebu, bathetha ngokusa, Bayandolosa bonke abasebenzi bobutshinga.\n94:5 Batyumza abantu bakho, Yehova, Bacinezela ilifa lakho.\n94:6 Babulala umhlolokazi nowasemzini, Bancinitha inkedama.\n94:7 Bathi ke, Akaboni uYehova, Akagqali uThixo kaYakobi.\n94:8 Qondani, nina bazizityhakala ebantwini; Nina zinyabi, niya kuqiqa nini na?\n94:9 Omilisele indlebe, akayi kuva na? Obumbe iliso, akayi kukhangela na?\n94:10 Umthethisi weentlanga akayi kohlwaya na, Ulofundisa abantu ukwazi?\n94:11 UYehova ngumazi weengcinga zabantu, Ukuba zingumphunga.\n94:12 Hayi, uyolo lwendoda oyithethisayo, Yehova, Oyifundisayo ngomyalelo wakho;\n94:13 Ukuba uyizolise eziminini zobubi, Ade ambelwe isihogo ongendawo.\n94:14 Ngokuba uYehova akabalahli abantu bakhe, Akalishiyi ilifa lakhe.\n94:15 Ngokuba isiko liya kubuyela ebulungiseni, Balilandele bonke abantliziyo zithe tye.\n94:16 Ngubani na oya kusukela phezulu kubo abanobubi, ngenxa yam? Ngubani na oya kumelana nabasebenzi bobutshinga, ngenxa yam?\n94:17 Koko uYehova abe luncedo lwam, Umphefumlo wam unge uhle msinya, waya apho kuthiwa cwaka khona.\n94:18 Ukuba ndithi, Lwatyibilika unyawo lwam, Isuka inceba yakho, Yehova, indixhase.\n94:19 Ebuninzini beengcinga-ngcinga zam ngaphakathi kwam, Iintuthuzelo zakho ziyawuyolisa umphefumlo wam.\n94:20 Ingaqhelana nawe na itrone yolweyeliselo, Ebumba ububi ngommiselo?\n94:21 Bahlanganyela umphefumlo welungisa, Baligwebe igazi elimsulwa.\n94:22 Kanti ke uYehova uyingxonde kum, UThixo wam liliwa endizimela ngalo.\n94:23 Ububuyisela phezu kwabo ubutshinga babo, Uba bhangisa ngobubi babo; Uya kubabhangisa uYehova, uThixo wethu.\n95:1 Yizani simemelele kuYehova, Sidume kwiliwa lokusindiswa kwethu.\n95:2 Masize phambi kobuso bakhe sinombulelo, Masidume kuye ngeengoma.\n95:3 Ngokuba uThixo omkhulu nguYehova, NguKumkani omkhulu ngaphezu koothixo bonke.\n95:4 Uzisesandleni sakhe iingontsingontsi zehlabathi, Neencopho zeentaba zezakhe.\n95:5 Ulolwakhe ulwandle, nguyena walwenzayo; Nomhlaba owomileyo zawubumba izandla zakhe.\n95:6 Yizani, masiqubude, siguqe, Sithobe phambi koYehova umenzi wethu.\n95:7 Ngokuba nguThixo wethu yena, Thina ke singabantu bokwaluswa nguye, nezimvu zesandla sakhe. Namhla, ukuba ninokuliva izwi lakhe,\n95:8 Musani ukuyenza lukhuni intliziyo yenu, njengaseMeribha, Njengemini yaseMasa entlango;\n95:9 Oko bandilingayo ooyihlo. Bandicikida, bewubona umsebenzi wam.\n95:10 Iminyaka yaba ngamashumi amane ndikruqukile sesi sizukulwana, Ndathi, Ngabantu abantliziyo zindwendwayo, Abazazi iindlela zam bona;\n95:11 Endada ndafunga ndinomsindo, ukuthi, Inene, abasayi kungena ekuphumleni kwam.\n96:1 Vumani kuYehova ingoma entsha, Vumani kuYehova, nonke hlabathi.\n96:2 Vumani kuYehova, bongani igama lakhe, Shumayelani iimini ngeemini iindaba ezilungileyo zosindiso lwakhe.\n96:3 Balisani ezintlangeni uzuko lwakhe, Balisani ezizweni zonke imisebenzi yakhe ebalulekileyo;\n96:4 Ngokuba mkhulu uYehova, engowokudunyiswa kunene; Uyoyikeka yena ngaphezu koothixo bonke.\n96:5 Ngokuba bonke oothixo bezizwe abanto zanto; UYehova yena wenza amazulu.\n96:6 Yindili nobungangamela phambi kwakhe, Ngamandla nokuhomba engcweleni yakhe.\n96:7 Mnikeni uYehova, nina mizalwane yezizwe, Mnikeni uYehova uzuko namandla;\n96:8 Mnikeni uYehova uzuko lwegama lakhe; Thwalani umnikelo, nize ezintendelezweni zakhe.\n96:9 Mnquleni uYehova, nivethe ezingcwele, Thuthumelani phambi kwakhe, nonke hlabathi.\n96:10 Yithini ezintlangeni, UYehova ngukumkani, Liya kuzinza ngoko elimiweyo, lingashukumi, Uya kugweba phakathi kwezizwe ngokuthe tye.\n96:11 Liya kuvuya izulu, Ligcobe ihlabathi; Luya kugquma ulwandle, nenzaliseko yalo.\n96:12 Liya kudlamka ilizwe, nento yonke ekulo, Ize imemelele yonke imithi yehlathi\n96:13 Phambi koYehova, ngokuba esiza, Ngokuba esiza kugweba ihlabathi. Uya kuligweba elimiweyo ngobulungisa, Nezizwe ngokunyanisa kwakhe.\n97:1 UYehova ngukumkani; liyagcoba ihlabathi, Ziyavuya iziqithi ezininzi.\n97:2 Ngamafu nesithokothoko ngeenxa zonke kuye, Bubulungisa nokusesikweni ummiso wetrone yakhe.\n97:3 Kuhamba umlilo phambi kwakhe; Ulenya ababandezeli bakhe ngeenxa zonke.\n97:4 Ikhanyisa elimiweyo imibane yakhe; Uyabona umhlaba, uzibhija-bhije.\n97:5 Iintaba zinyibilika njengomthwebeba phambi koYehova, Phambi kweNkosi yehlabathi lonke.\n97:6 Izulu lixela ubulungisa bakhe, Zilubone uzuko lwakhe zonke izizwe.\n97:7 Badanile bonke abakhonza umfanekiso oqingqiweyo, Abaqhayisa ngeento ezingento; Bayamnqula bonke oothixo.\n97:8 Iyeva, iyavuya iZiyon, Ziyagcoba iintombi zakwaYuda, Ngenxa yemigwebo yakho, Yehova.\n97:9 Ngokuba nguwe, Yehova, Osenyangweni phezu kwehlabathi lonke; Unyukile kunene ngaphezu koothixo bonke.\n97:10 Bathandi bakaYehova, kuthiyeni okubi. Umgcini wemiphefumlo yabenceba bakhe Uya kubahlangula esandleni sabangendawo.\n97:11 Ukukhanya likuhlwayelelwe ilungisa, Novuyo baluhlwayelelwe abantliziyo zithe tye.\n97:12 Vuyani ngoYehova, malungisa, Nibulele isikhumbuzo sakhe esingcwele.\n98:1 Umhobe. Vumani kuYehova ingoma entsha, Ngokuba wenze imisebenzi ebalulekileyo; Simzuzele uloyiso isandla sakhe sokunene, nengalo yakhe engcwele.\n98:2 Ulwazisile uYehova usindiso lwakhe, Ubutyhilile emehlweni eentlanga ubulungisa bakhe.\n98:3 Ukhumbule inceba yakhe nokunyanisa kwakhe kwindlu kaSirayeli; Zilubonile zonke iziphelo zehlabathi usindiso loThixo wethu.\n98:4 Dumani kuYehova, nonke hlabathi, Gqobhokelani ekumemeleleni, nibethe uhadi.\n98:5 Mbetheleni uhadi uYehova, Uhadi nelizwi lengoma;\n98:6 Ngamaxilongo nezwi lesigodlo Dumani phambi koKumkani uYehova.\n98:7 Malugqume ulwandle nenzaliseko yalo, Elimiweyo nabemi balo.\n98:8 Imilambo mayibethe izandla, Zimemelele kunye iintaba\n98:9 Phambi koYehova, ngokuba esiza kugweba ihlabathi. Uya kuligweba elimiweyo ngobulungisa, Izizwe ngokuthe tye.\n99:1 UYehova nguKumkani, ziyagungqa izizwe; Ulohlala ekerubhini, liyashukuma ihlabathi.\n99:2 UYehova mkhulu eZiyon; Uphakamile ngaphezu kwezizwe zonke.\n99:3 Baya kulibulela igama lakho elikhulu eloyikekayo; Ngokuba ungcwele yena.\n99:4 Amandla okumkani athanda okusesikweni; Uwazimasile wena ngokuthe tye; Wenze okusesikweni nobulungisa kwaYakobi wena.\n99:5 Mphakamiseni uYehova, uThixo wethu, Niqubude esitulweni seenyawo zakhe; Ngokuba ungcwele yena.\n99:6 OoMoses noAron phakathi kwababingeleli bakhe, NoSamuweli phakathi kwabalinqulayo igama lakhe, Baye bebiza kuYehova, wabaphendula yena.\n99:7 Wathetha kubo esemqulwini welifu; Bazigcina izingqino zakhe, Nommiselo awabanika wona.\n99:8 Yehova, Thixo wethu, wabaphendula wena, Waba nguThixo oxolelayo kubo, Ongoziphindezelayo iintlondi zabo.\n99:9 Mphakamiseni uYehova, uThixo wethu, Niqubude entabeni yakhe engcwele; Ngokuba ungcwele uYehova uThixo wethu.\n100:1 Umhobe wombingelelo wokubulela. Dumani kuYehova, nonke hlabathi.\n100:2 Mkhonzeni uYehova nivuya; Yizani phambi kwakhe nimemelela.\n100:3 Yazini ukuba uYehova nguThixo yena; Wasenza yena, asisithi; Singabantu bakhe nezimvu ezaluswa nguye.\n100:4 Ngenani emasangweni akhe nibulela, Ezintendelezweni zakhe nidumisa; Bulelani kuye, bongani igama lakhe.\n100:5 Ngokuba uYehova ulungile, Inceba yakhe ingunaphakade, Ukunyaniseka kwakhe kukwizizukulwana ngezizukulwana.\n101:1 EkaDavide. Umhobe. Ndiya kuvuma ngenceba nangomgwebo; Ndiya kukubethela uhadi, Yehova.\n101:2 Ndiya kuqiqa indlela yengqibelelo; Uya kuza nini na kum? Ndiya kuhamba ngengqibelelo yentliziyo yam Phakathi kwendlu yam.\n101:3 Andiyi kubeka phambi kwamehlo am Nto inobutshijolo. Ukwenza ngokunxaxha ndikuthiyile, Akuyi kunamathela kum.\n101:4 Intliziyo ejibilizayo iya kukhwelela kude kum; Into embi andiyi kuyazi.\n101:5 Omhlebayo ummelwane wakhe ngasese, Lowo ndiya kumbhangisa. Omehlo aqwayingileyo, ontliziyo igungubeleyo, Lowo andinakumthwala.\n101:6 Amehlo am akwabanyanisayo ezweni, Ukuba bandiphahle; Ohamba ngendlela yengqibelelo, Lowo makandilungiselele.\n101:7 Akayi kuhlala phakathi kwendlu yam Owenza inkohliso; Othetha ubuxoki akayi kuqina Phambi kwamehlo am.\n101:8 Imiso ngemiso, ndiya kubabhangisa Bonke abangendawo belizwe, Ukuze ndibanqumle emzini kaYehova Bonke abasebenzi bobutshinga.\n102:1 Umthandazo wolusizana xa atyhafileyo, ephalaza iinkalazo zakhe phambi koYehova. Yehova, wuve umthandazo wam, Kufike kuwe ukuzibika kwam.\n102:2 Musa ukubusithelisa ubuso bakho kum ngemini yokubandezelwa kwam, Ndithobele indlebe yakho; Ngemini endidanduluka ngayo khawuleza undiphendule.\n102:3 Ngokuba iyaphela imihla yam njengomsi; Amathambo am avutha njengeziko.\n102:4 Ibethwe yoma njengomfuno intliziyo yam, Ngokuba ndilibele nokudla ukudla kwam.\n102:5 Ngenxa yezwi lokugcuma kwam Amathambo am atshele enyameni yam.\n102:6 Ndifana nengcwangube yentlango, Ndinjengesikhova sasemanxoweni.\n102:7 Andilali; Ndinjengentaka eyodwa phezu kwendlu.\n102:8 Imini yonke ziyandingcikiva iintshaba zam, Abandigezelayo bathuka ngam.\n102:9 Ngokuba ndidle uthuthu njengesonka, Into endiyiselayo ndiyiphithikeze nezililo,\n102:10 Ngenxa yokubhabhama kwakho noburhalarhume bakho; Ngokuba undifunqule wandilahla.\n102:11 Imihla yam injengokoluka kwamathunzi; Mna ndomile njengomfuno.\n102:12 Ke wena, Yehova, uhleli ngonaphakade, Inkumbuzo yakho ikwizizukulwana ngezizukulwana.\n102:13 Uya kusuk\u2019 ume, uyiphathe iZiyon ngemfesane; Ngokuba lixesha lokuyibabala eli, ngokuba lifikile ixesha elimisiweyo.\n102:14 Ngokuba abakhonzi bakho bakholiswe ngamatye ayo, Uthuli lwayo banofefe ngalo.\n102:15 Ziya kuloyika iintlanga igama likaYehova, Nookumkani bonke behlabathi ubuqaqawuli bakho;\n102:16 Ngokuba eyakhile iZiyon uYehova, Wabonakala ebuqaqawulini bakhe.\n102:17 Uwubhekile umthandazo wabachushuluzayo, Akawudela umthandazo wabo.\n102:18 Oko kuya kubhalelwa isizukulwana esizayo, Abantu abaza kudalwa badumise uYehova.\n102:19 Ngokuba uqondele, esendaweni yakhe ephezulu engcwele; Wondela ehlabathini esemazulwini uYehova,\n102:20 Ukuba akuve ukugcuma kwabakhonkxiweyo, Abakhulule oonyana bokufa;\n102:21 Bancokole eZiyon ngegama likaYehova, Ngendumiso yakhe eYerusalem;\n102:22 Ekubuthelaneni kwezizwe ndawonye, Nezikumkani, ukuba zikhonze uYehova.\n102:23 Uwathobile endleleni amandla am, Uyinqamle imihla yam.\n102:24 Ndithi, Thixo wam, musa ukundisusa phakathi kwemihla yam. Ikwizizukulwana ngezizukulwana iminyaka yakho.\n102:25 Waliseka kudala ihlabathi; Lisisenzo sezandla zakho izulu.\n102:26 Ezo zinto ziya kudaka, wena ke ume; Zona zonke ziya konakala njengengubo, Wozigugisa njengesambatho, ziguge;\n102:27 Ke wena uhleli unguwe, Iminyaka yakho ayinakuphela.\n102:28 Oonyana babakhonzi bakho baya kuhlala, Imbewu yabo izimaseke phambi kwakho.\n103:1 EkaDavide. Mbonge uYehova, mphefumlo wam, Ilibonge igama lakhe elingcwele into yonke engaphakathi kwam.\n103:2 Mbonge uYehova, mphefumlo wam, Ungayilibali yonke impatho yakhe entle:\n103:3 Uloxolela bonke ubugwenxa bakho; Ulophilisa zonke izifo zakho;\n103:4 Ulokhulula ubomi bakho esihogweni, Akuthi jize ngenceba nemfesane;\n103:5 Lo uwuzalisayo umlomo wakho ngento elungileyo, Buhlaziyeke ubutsha bakho njengobokhozi.\n103:6 NguYehova umenzi wemisebenzi yobulungisa, Nezigwebo ngenxa yabacudisiweyo bonke;\n103:7 Umazisi weendlela zakhe kuMoses, Wezenzo zakhe ezincamisayo koonyana bakaSirayeli.\n103:8 Unemfesane enobabalo uYehova, Uzeka kade umsindo, mkhulu ngenceba.\n103:9 Akaphiki kuphele, Akawugcini umsindo ngonaphakade.\n103:10 Akenzi kuthi ngokwezono zethu, Akasiphathi ngokobugwenxa bethu;\n103:11 Ngokuba injengokuphakama kwezulu phezu komhlaba, Ukuba namandla, inceba yakhe kwabamoyikayo;\n103:12 Kunjengokuba kude kwempumalanga entshonalanga, Ukulukhwelelisa kwakhe kuthi ukreqo lwethu;\n103:13 Kunjengokusikwa yimfesane koyise kubantwana, Ukusikwa yimfesane kukaYehova kwabamoyikayo.\n103:14 Ngokuba uyakwazi yena ukubunjwa kwethu, Ekhumbula ukuba siluthuli.\n103:15 Hayi, umntu! Injengotyani imihla yakhe; Njengentyantyambo yasendle, kunjalo ukutyatyamba kwakhe.\n103:16 Xa uthe umoya wadlula kuyo, ayibikho, Ingabi sazana nayo indawo yayo.\n103:17 Ke yona inceba kaYehova ikwabamoyikayo, kususela kwaphakade kude kuse ephakadeni, Nobulungisa bakhe bukoonyana boonyana;\n103:18 Kwabawugcinileyo umnqophiso wakhe, Kwabazikhumbulayo iziyalezo zakhe ukuba bazenze.\n103:19 UYehova uyizinzisile emazulwini itrone yakhe, Ubukumkani bakhe bulawula into yonke.\n103:20 Mbongeni uYehova, nina zithunywa zakhe, Magorha omeleleyo, alenzayo ilizwi lakhe, Ephulaphula isandi selizwi lakhe.\n103:21 Mbongeni uYehova, nonke mikhosi yakhe, Balungiseleli bakhe, benzi bokuthanda kwakhe.\n103:22 Mbongeni uYehova, nonke zenzo zakhe, Ezindaweni zonke zobukumkani bakhe. Mbonge uYehova, mphefumlo wam.\n104:1 Mbonge uYehova, mphefumlo wam. Yehova, Thixo wam, umkhulu kakhulu; Wambethe indili nobungangamela.\n104:2 Ulothi wambu ukukhanya njengengubo. Ulolaneka izulu njengelengalenga lentente;\n104:3 Ulohlanganisa emanzini imiqadi yamagumbi akhe aphezulu; Ulowenza amafu inqwelo yakhe, Ulohamba ngamaphiko omoya;\n104:4 Ulowenza izithunywa zakhe imimoya, Abalungiseleli bakhe umlilo olenyayo.\n104:5 Waliseka ihlabathi phezu kwemimiso yalo, Ukuba lingashukunyiswa naphakade kanaphakade.\n104:6 Waligubungela ngamanzi anzongonzongo njengesambatho, Ema amanzi phezu kweentaba.\n104:7 Ekukhalimeni kwakho asaba, Ezwini lendudumo yakho abaleka buphuthuphuthu;\n104:8 Kwenyuka iintaba, kwehla izihlambo, Aya kuloo ndawo ubuwasekele yona.\n104:9 Wamisa umda ukuba angegqithi, Angabuye awugubungele umhlaba.\n104:10 Ulothuma imithombo iye ezihlanjeni; Ihamba phakathi kweentaba;\n104:11 Iseza zonke iinyamakazi zasendle; Amaesile asendle aqabula inxano lawo.\n104:12 Kuhlala phezu kwayo iintaka zezulu, Zitsholoza phakathi kwamasebe;\n104:13 Uloseza iintaba kumagumbi akhe aphezulu; Uyahlutha umhlaba ziziqhamo zezenzo zakho.\n104:14 Ulontshulisela iinkomo utyani, Nomfuno wokunceda umntu; Ukuze kuphume isonka emhlabeni.\n104:15 Iwayini iyivuyise intliziyo yomntu; Bukhazimle ubuso ngeoli, Isonka siyixhase intliziyo yomntu.\n104:16 Iyahlutha imithi kaYehova, Imisedare yaseLebhanon awayityalayo,\n104:17 Apho zakhela khona iintaka; Ingwamza, isemisipresini indlu yayo.\n104:18 Iintaba zona ezo ziphakamileyo zezamagogo, Amawa azimela iimbila.\n104:19 Inyanga wayenzela amaxesha ayo, Ilanga liyakwazi ukutshona kwalo.\n104:20 Wenza ubumnyama wena, kube sebusuku, Ashukume ngabo onke amarhamncwa ehlathi.\n104:21 Iingonyama ezintsha zigqumela ukuqwenga, Zifuna ukudla kwazo kuThixo.\n104:22 Lakuthi chapha ilanga, ziyahlanganisana, Zibuthume ezikhundleni zazo.\n104:23 Uyaphuma umntu aye emsebenzini wakhe Nasenkonzweni yakhe, ahlwise.\n104:24 Hayi, ukuba zininzi izenzo zakho, Yehova! Zonke ziphela uzenze ngobululumko; Uzele umhlaba zizidalwa zakho.\n104:25 Nalo ulwandle lulukhulu, lubanzi ngeenxa zombini; Kulapho kuzinambuzane zingenakubalwa, Ezincinane kwanezikhulu izinto eziphilileyo.\n104:26 Kulapho kuhamba iinqanawa; Nango umnenga owawubumbela ukudlala kulo.\n104:27 Zonke ezo nto ziphela zikhangele kuwe, Ukuba uzinike ukudla kwazo ngexesha elililo.\n104:28 Uyazinika, ziyachola; Uyasivula isandla sakho, ziyahlutha kokulungileyo.\n104:29 Uyabusithelisa ubuso bakho, ziyakhwankqiswa; Uyawuhlanganisa umoya wazo, ziphume umphefumlo, Zibuyele eluthulini lwazo.\n104:30 Uthuma umoya wakho, ziyadalwa, Ubuhlaziye ubuso bomhlaba.\n104:31 Ubuqaqawuli bukaYehova mabube ngunaphakade; UYehova makavuye ngezenzo zakhe;\n104:32 Ulobheka emhlabeni, uzamazame; Uchukumisa iintaba, ziqhume.\n104:33 Ndiya kuvuma kuYehova lo gama ndidla ubomi, Ndiya kumbethela uhadi uThixo wam ekubeni ndingokhoyo.\n104:34 Makube nencasa kuye ukucamngca kwam; Mna ndiya kuvuya ngoYehova.\n104:35 Mabagqitywe ehlabathini aboni, Bangabi sabakho abangendawo. Mbonge uYehova, mphefumlo wam, Haleluya!\n105:1 Bulelani kuYehova, nqulani igama lakhe; Yazisani ezizweni izenzo zakhe ezincamisileyo.\n105:2 Vumani kuye, mbetheleni uhadi; Xoxani ngemisebenzi yakhe yonke ebalulekileyo.\n105:3 Qhayisani ngegama lakhe elingcwele; Mayivuye intliziyo yabamquqelayo uYehova.\n105:4 Ngxamelani uYehova namandla akhe; Funani ubuso bakhe ngamaxesha onke.\n105:5 Khumbulani imisebenzi yakhe ebalulekileyo awayenzayo, Izimanga zakhe, nezigwebo zomlomo wakhe,\n105:6 Mbewu ka-Abraham, yomkhonzi wakhe, Nyana bakaYakobi, banyulwa bakhe.\n105:7 NguYehova uThixo wethu yena; Zisehlabathini lonke izigwebo zakhe.\n105:8 Uwukhumbula ngonaphakade umnqophiso wakhe, Ilizwi awalimisela iwaka lezizukulwana;\n105:9 Awanqophisana ngalo noAbraham, Awalifungela uIsake;\n105:10 Awalimisayo ukuba libe ngummiselo kuYakobi, Libe ngumnqophiso ongunaphakade kuSirayeli;\n105:11 Esithi, Ndikunika ilizwe lakwaKanan, Libe licandelo lelifa lenu;\n105:12 Besengamadoda ambalwa, Bebancinane, bengabaphambukeli kulo.\n105:13 Babehamba besuka kolunye uhlanga, baye kolunye uhlanga, Besuka kobunye ubukumkani, baye kwabanye abantu.\n105:14 Akavumelanga mntu ukuba abacudise, Wohlwaya ookumkani ngenxa yabo;\n105:15 Esithi, Musani ukubachukumisa abathanjiswa bam, Musani ukubaphatha kakubi abaprofeti bam.\n105:16 Wabiza indlala, yeza phezu kwelizwe, Wawaphula wonke umsimelelo osisonka.\n105:17 Wathuma indoda phambi kwabo; Kwathengiswa ngoYosefu, waba likhoboka.\n105:18 Bazicinezela iinyawo zakhe ngamakhamandela, Wafika umphefumlo wakhe esinyithini;\n105:19 Kwada kwalixesha lokufika kwelizwi lakhe, Intetho kaYehova yamnyibilikisa.\n105:20 Ukumkani wathuma, wamkhulula, Umlawuli wezizwe wamvulela;\n105:21 Wamenza inkosi yendlu yakhe, Umlawuli wemfuyo yakhe yonke,\n105:22 Ukuba abakhonkxe abathetheli bakhe ngokuzithandela kwakhe, Amadoda akhe amakhulu awafundise ubulumko.\n105:23 Waza uSirayeli waya eYiputa, UYakobi waphambukela ezweni lakwaHam.\n105:24 Wabaqhamisa kakhulu abantu bakhe, Wabomeleza ngaphezu kwababandezeli babo.\n105:25 Wazijika iintliziyo zabo, ukuba babathiye abantu bakhe, Babaqhathanisele abakhonzi bakhe.\n105:26 Wathuma uMoses, umkhonzi wakhe, NoAron awamnyulayo.\n105:27 Bazenza kubo iindawo zemiqondiso yakhe, Nezimanga zakhe ezweni lakwaHam.\n105:28 Wathumela ubumnyama, kwaba mnyama; Ababa nakuwaphikisa amazwi akhe.\n105:29 Wawaguqula amanzi abo, aba ligazi, Wazibulala iintlanzi zabo.\n105:30 Ilizwe labo lanyakazela amasele Ezingontsini zookumkani babo.\n105:31 Wathetha, zafika izibawu, Iingcongconi, emideni yabo yonke.\n105:32 Wabanika isichotho, saba yimvula; Umlilo walenya ezweni labo.\n105:33 Wayibetha imidiliya yabo nemikhiwane yabo, Wayishwaqa imithi yemida yabo.\n105:34 Wathetha, kwafika iinkumbi ezandayo, Nezikhothululayo, into engenakubalwa;\n105:35 Zayidla imifuno yonke ezweni labo, Zazidla iziqhamo zomhlaba wabo.\n105:36 Waza wababulala bonke abamazibulo ezweni labo, Intlahlela yamandla abo onke.\n105:37 Wabakhupha ke abakhe benesilivere negolide, Akwabakho ukhubekayo ezizweni zakhe.\n105:38 Lavuya iYiputa ekuphumeni kwabo, Ngokuba lifikelwe kukunkwantyisa kwabo.\n105:39 Waneka ilifu lokubasitha, Nomlilo wokukhanyisa ebusuku.\n105:40 Babiza, wazisa izagwityi, Wabahluthisa nangesonka sasezulwini.\n105:41 Wavula iliwa, abaleka amanzi, Ahamba engumlambo emqwebedwini.\n105:42 Ngokuba wakhumbula ilizwi lakhe elingcwele, Wakhumbula uAbraham umkhonzi wakhe.\n105:43 Wabakhupha abantu bakhe benemihlali, Abanyulwa bakhe bememelela.\n105:44 Wabanika amazwe eentlanga, Bayihlutha inzuzo yokwaphuka kwezizwe,\n105:45 Ukuze bayigcine imimiselo yakhe, Bayibambe imiyalelo yakhe. Haleluya!\n106:1 Haleluya! Bulelani kuYehova, ngokuba elungile, Ngokuba ingunaphakade inceba yakhe.\n106:2 Ngubani na onokuzixela izenzo zobugorha bukaYehova, Onokuyivakalisa yonke indumiso yakhe?\n106:3 Hayi, uyolo lwabaligcinayo isiko, Lwabenza ubulungisa ngamaxesha onke!\n106:4 Ndikhumbule, Yehova, ekwenzeni kwakho isisa kubantu bakho; Ndiyelele ngosindiso lwakho,\n106:5 Ukuze ndibone inyhweba yabanyulwa bakho, Ndivuye ekuvuyeni kohlanga lwakho, Ndiqhayise kunye nelifa lakho.\n106:6 Sonile, thina noobawo; Senze ubugwenxa, senze okungendawo.\n106:7 Oobawo abayiqiqanga eYiputa imisebenzi yakho ebalulekileyo; Ababukhumbulanga ubuninzi beenceba zakho; Baphika elwandle, eLwandle oluBomvu.\n106:8 Wabasindisa ngenxa yegama lakhe, Ukuze abazise ubugorha bakhe.\n106:9 Walukhalimela uLwandle oluBomvu, loma, Wabahambisa emanzini anzongonzongo kwanga kusentlango.\n106:10 Wabasindisa esandleni sobathiyayo, Wabakhulula esandleni sotshaba.\n106:11 Amanzi abagubungela ababandezeli babo, Akwasala namnye kubo.\n106:12 Bakholwa ke ngamazwi akhe, Bayivuma indumiso yakhe.\n106:13 Kanti bahle bazilibala izenzo zakhe, Abalilinda icebo lakhe.\n106:14 Bakhanukile entlango, Bamlinga uThixo enkangala.\n106:15 Wabanika abakubizayo; Wathumela ukungcumbeka emphefumlweni wabo.\n106:16 Bamenzela umona uMoses eminqubeni, NoAron ongcwele kaYehova.\n106:17 Wavuleka umhlaba, wamginya uDatan, Waliselela ibandla lika-Abhiram;\n106:18 Umlilo walitshisa ibandla labo, Amalangatye abalenya abangendawo.\n106:19 Benza ithole eHorebhe, Baqubuda emfanekisweni otyhidiweyo.\n106:20 Balwananisa uzuko lwabo Ngento emilise okwenkomo edla utyani.\n106:21 Bamlibala uThixo, umsindisi wabo, Owenza imisebenzi emikhulu eYiputa;\n106:22 Imisebenzi ebalulekileyo ezweni lakwaHam, Imisebenzi eyoyikekayo eLwandle oluBomvu.\n106:23 Wathi uya kubatshabalalisa, Koko wesukayo uMoses, umnyulwa wakhe, Wema ethubeni phambi kwakhe, Ebuyisa ubushushu bakhe, ukuba angatshabalalisi.\n106:24 Balicekisa ilizwe elinqwenelekayo, Abakholwa lilizwi lakhe,\n106:25 Bakrokra ezintenteni zabo, Abaliphulaphula izwi likaYehova.\n106:26 Wabaphakamisela isandla sakhe, Wafungela ukuba abawise entlango;\n106:27 Ayiwise imbewu yabo phakathi kweentlanga, Abachithachithe emazweni.\n106:28 Bazibandakanya noBhahali-pehore, Badla imibingelelo yabafileyo,\n106:29 Bamqumbisa ngeentlondi zabo; Sagaleleka phakathi kwabo isibetho.\n106:30 Wesuka wema uPinehasi, walamla; Sathintelwa isibetho.\n106:31 Oko kwabalelwa kuye ekuthini bubulungisa Izizukulwana ngezizukulwana kude kuse ephakadeni.\n106:32 Bamqumbisa emanzini aseMeribha, Kwehla ububi kuMoses ngenxa yabo;\n106:33 Ngokuba bawuphikisa umoya wakhe, Waphololoza ke ngomlomo wakhe.\n106:34 Abazitshabalalisa izizwe, Awayethethe ngazo kubo uYehova;\n106:35 Baxubana neentlanga ezo, Bafunda izenzo zazo;\n106:36 Bakhonza izithixo zazo, Yaba sisirhintyelo kubo.\n106:37 Babingelela ngoonyana babo nangeentombi zabo kwiidemon;\n106:38 Baphalaza igazi elimsulwa, Igazi loonyana babo neleentombi zabo, Ababingelela ngabo kwizithixo zakwaKanan; Lahlanjelwa ilizwe ngamagazi.\n106:39 Baba ziinqambi ngezenzo zabo, Bahenyuza ngeentlondi zabo.\n106:40 Wavutha ke umsindo kaYehova kubantu bakhe, Laba lisikizi kuye ilifa lakhe.\n106:41 Wabanikela ezandleni zeentlanga, Balawulwa ngababathiyileyo.\n106:42 Zabaxina iintshaba zabo, Bathotyelwa phantsi kwezandla zazo.\n106:43 Zibe zininzi izihlandlo ebahlangula; Ke bona bamphikisa ngamaqhinga abo, Bonakala bubugwenxa babo.\n106:44 Noko ke wakunonelela ukubandezelwa kwabo, Akuva ukuhlahlamba kwabo.\n106:45 Wawukhumbula ngenxa yabo umnqophiso wakhe, Wazohlwaya ngenxa yobuninzi beenceba zakhe.\n106:46 Wabafumanisa imfesane Phambi kwabo bonke abaye bebathimbile.\n106:47 Sisindise, Yehova, Thixo wethu, Sibuthe ezintlangeni, Ukuze sibulele kwigama lakho elingcwele, Sizingce ngendumiso yakho.\n106:48 Makabongwe uYehova, uThixo kaSirayeli, Kususela kwaphakade kude kuse ephakadeni. Mabathi bonke abantu, Amen. Haleluya!\n107:1 Bulelani kuYehova, ngokuba elungile, Ngokuba ingunaphakade inceba yakhe.\n107:2 Mabatsho abakhululwa bakaYehova, Awabakhululayo esandleni sombandezeli;\n107:3 Wababutha emazweni, Empumalanga nasentshonalanga, Entla naselwandle.\n107:4 Badinga entlango, endleleni esenkanga, la, Abafumana mzi wakuhlala.\n107:5 Belambile, benxaniwe, Watyhafa phakathi kwabo umphefumlo wabo.\n107:6 Bakhala ke kuYehova embandezelweni yabo, Wabahlangula ekucuthekeni kwabo;\n107:7 Wabanyathelisa endleleni ethe tye, Ukuba baye kumzi wokuhlala.\n107:8 Mabayibulele kuYehova inceba yakhe, Nemisebenzi yakhe ebalulekileyo koonyana babantu!\n107:9 Kuba ewuhluthisile umphefumlo otshobayo, Wawuzalisa ngokulungileyo umphefumlo olambileyo.\n107:10 Behleli emnyameni nasethunzini lokufa, Bekhonkxwe yimbandezelo nasisinyithi,\n107:11 Ngokuba bephikise amazwi kaThixo, Belitshitshisa icebo lOsenyangweni:\n107:12 Wayithoba intliziyo yabo ngokubasebenzisa kanzima; Bakhubeka, akwabakho mncedi.\n107:13 Bakhala ke kuYehova embandezelweni yabo; Wabasindisa ekucuthekeni kwabo.\n107:14 Wabakhupha emnyameni nasethunzini lokufa, Waziqhawula iimbophelelo zabo.\n107:15 Mabayibulele kuYehova inceba yakhe, Nemisebenzi yakhe ebalulekileyo koonyana babantu!\n107:16 Kuba ezaphule iingcango zobhedu, Wayixakaxa imivalo yesinyithi.\n107:17 Abamathileyo, ngenxa yendlela yokukreqa kwabo, Nangenxa yobugwenxa babo, bacinezelwa;\n107:18 Konke ukudla kwaba lisikizi kumphefumlo wabo, Bafika emasangweni okufa.\n107:19 Bakhala ke kuYehova embandezelweni yabo, Wabasindisa ekucuthekeni kwabo.\n107:20 Wathumela ilizwi lakhe, wabaphilisa, Wabasiza ezihogweni zabo.\n107:21 Mabayibulele kuYehova inceba yakhe, Nemisebenzi yakhe ebalulekileyo koonyana babantu!\n107:22 Mababingelele imibingelelo yombulelo, Bancokole ngezenzo zakhe bememelela.\n107:23 Abaya elwandle ngeenqanawa, Benze ishishini emanzini amaninzi,\n107:24 Bazibona bona izenzo zikaYehova, Nemisebenzi yakhe ebalulekileyo enzulwini.\n107:25 Watsho, wavusa umoya ovuthuzayo, Waphakamisa amaza ayo.\n107:26 Banyuka basinga ezulwini, behla basinga emanzini enzonzobila; Umphefumlo wabo uthe amandla bububi.\n107:27 Bathendeleka, bahexa njengenxila, Butshone bonke ubulumko babo.\n107:28 Bakhala ke kuYehova embandezelweni yabo Wabakhupha ekucuthekeni kwabo.\n107:29 Ukumisile ukuvuthuza, kwathi cwaka, Amaza ayo azola;\n107:30 Bavuya ke, kuba edambile; Wabafikisa echwebeni abalilangazelelayo.\n107:31 Mabayibulele kuYehova inceba yakhe, Nemisebenzi yakhe ebalulekileyo koonyana babantu!\n107:32 Mabamphakamise ebandleni labantu, Bamdumise embuthweni yamadoda amakhulu.\n107:33 Uyenze imilambo yaba yintlango, Namathende amanzi aba ngumhlaba onxaniweyo;\n107:34 Ilizwe elineziqhamo laba leletyuwa, Ngenxa yezinto ezimbi zabemi balo.\n107:35 Uyenze intlango yaba lidike elinamanzi, Ilizwe elingumqwebedu laba ngamathende amanzi.\n107:36 Wabahlalisa khona abalambileyo, Bamisa umzi wokuhlala.\n107:37 Bahlwayela amasimi, batyala izidiliya, Bavelisa iziqhamo, baba nongeniselo.\n107:38 Wabasikelela, banda kunene, Iinkomo zabo akazinciphisa.\n107:39 Bancipha, basibekeka Ngokukhanyangwa bububi nesingqala.\n107:40 Uwagalele ngendelo amanene, Wawadingisa enyanyeni, kungekho ndlela.\n107:41 Walisa engxondeni ihlwempu, kude nengcinezelo, Walenzela imizalwana yanjengomhlambi.\n107:42 Baya kubona abathe tye, bavuye, Bonke ubugqwetha buvale umlomo.\n107:43 Lowo ulumkileyo makazigcine ezi ndawo, Azigqale iinceba zikaYehova.\n108:1 Ingoma. Umhobe kaDavide. Izimasekile intliziyo yam, Thixo, Ndiya kuvuma, ndibethe uhadi, Kwanozuko lwam.\n108:2 Vukani, mrhubhe nohadi; Ndiya kusiphangela isifingo.\n108:3 Ndiya kubulela kuwe phakathi kwezizwe, Yehova, Ndikubethele uhadi phakathi kwezizwe.\n108:4 Ngokuba inkulu ngaphezu kwezulu inceba yakho, Yada yesa esibhakabhakeni inyaniso yakho.\n108:5 Ziphakamise ngaphezu kwezulu, Thixo, Bube phezu kwehlabathi lonke ubuqaqawuli bakho.\n108:6 Ukuze zihlangulwe iintanda zakho, Sindisa ngesandla sakho sokunene, undiphendule.\n108:7 UThixo uthethe engcwele; mandivuyelele, Ndimabe uShekem, ndiyilinganisele intili yaseSukoti.\n108:8 Ngowam uGiliyadi, ngowam uManase, UEfrayim sisigcina-ntloko sam, UYuda yintonga yam yommiselo;\n108:9 UMowabhi sisitya sam sokuhlambela, Ndiyiphosa kuEdom imbadada yam; Ndiduma ngelamaFilisti.\n108:10 Ngubani na owondisa emzini onqatyisiweyo, Ngubani na owondikhaphela kwaEdom?\n108:11 Asinguwe na, Thixo, lo usihlambileyo? Akwaphuma, Thixo, nemikhosi yethu.\n108:12 Sincede kumbandezeli wethu; Alunto yanto usindiso lomntu.\n108:13 NgoThixo siya kweyisa, Abagqushe yena ababandezeli bethu.\n109:1 Kumongameli; ekaDavide. Umhobe. Thixo wendumiso yam, musa ukuthi tu;\n109:2 Ngokuba bandakhamisele umlomo ongendawo, nomlomo onenkohliso; Bathetha ngam ngolwimi lobuxoki.\n109:3 Bandijikele ngeentetho zentiyo; Balwa nam ngelize.\n109:4 Ekubeni mna ndibathanda, bona bayandichasa, Ndibe mna ndithandaza.\n109:5 Endaweni yobulungisa bandibuyekeza ngobubi; Ekubeni mna ndibathanda, bona bayandithiya.\n109:6 Misa ongendawo, abe ngumveleli wakhe, Eme uSathana ngasekunene kwakhe.\n109:7 Ekuthethweni kwetyala makaphume engongendawo, Nomthandazo wakhe ube sisono.\n109:8 Imihla yakhe mayibe mbalwa, Mabuthatyathwe ngomnye ubuveleli bakhe.\n109:9 Oonyana bakhe mababe ziinkedama, Nomkakhe abe ngumhlolokazi;\n109:10 Babhadule bebhadula oonyana bakhe, becela, Bengqiba, bekude namanxuwa akowabo.\n109:11 Umboleki-mali makakushwankathele konke anako, Abasemzini baphange ukuxelenga kwakhe.\n109:12 Makungabikho wolulela nceba kuye, Kungabikho uzibabalayo iinkedama zakhe.\n109:13 Izivela-mva zakhe mazibe zezokunqunyulwa, Igama lazo licinywe esizukulwaneni esizayo.\n109:14 Mabukhunjulwe nguYehova ubugwenxa booyise, Singacinywa isono sonina.\n109:15 Masibe phambi koYehova ngamaxesha onke, Akunqumle ehlabathini ukukhunjulwa kwabo;\n109:16 Ngenxa enokuba engakukhumbulanga ukwenza inceba, Etshutshise indoda elusizana, Elihlwempu, enentliziyo eyothukileyo, ukuba ayibulale.\n109:17 Ewe, wathanda ukuqalekisa, kwamfikela; Akakufuna ukusikelela, kwakhwelela kude kuye.\n109:18 Wambatha ukuqalekisa kwanga yingubo yakhe, Kwangena embilinini wakhe njengamanzi, Nanjengeoli emathanjeni akhe.\n109:19 Makube njengengubo kuye, azithe wambu ngayo, Kube luqhwemesha, alunxibe amaxesha onke.\n109:20 Nguwo lowo umvuzo wabandichasayo, ophuma kuYehova, Wabathetha okubi ngomphefumlo wam.\n109:21 Ke wena Yehova, Nkosi, ndenzele ngenxa yegama lakho; Ngokokuba ilungile inceba yakho; ndihlangule.\n109:22 Ngokuba ndilusizana, ndilihlwempu, Intliziyo yam ihlatyiwe phakathi kwam.\n109:23 Ndinjengethunzi xa lolukayo, ndiyemka; Ndiphetshethwa njengenkumbi.\n109:24 Amadolo am ayagexa kukuzila ukudla, Nenyama yam ibhityile, tu ukutyeba.\n109:25 Ndithe ndasisingcikivo kubo; Bendibona, bahlunguzela intloko.\n109:26 Ndincede, Yehova, Thixo wam, Ndisindise ngokwenceba yakho;\n109:27 Bazi ukuba sisandla sakho eso, Ukuba kukwenza kwakho, Yehova.\n109:28 Bayaqalekisa aba, uyasikelela wena; Besukile bema, baya kudana; uya kubuya yena umkhonzi wakho.\n109:29 Abandichasayo baya kwambatha ihlazo, Bazithi wambu ukudana njengengubo yokwaleka.\n109:30 Ndiya kubulela kakhulu kuYehova ngomlomo wam, Ndimdumise phakathi kwabaninzi;\n109:31 Kuba emi ekunene kolihlwempu, Ukuba amsindise kwabawugwebayo umphefumlo wakhe.\n110:1 EkaDavide. Umhobe. Utsho uYehova eNkosini yam ukuthi, Hlala ngasekunene kwam, Ndide iintshaba zakho ndizenze Isitulo seenyawo zakho.\n110:2 Intonga yamandla akho uya kuyithumela uYehova, ivela eZiyon, esithi, Yiba nobukhosi phakathi kweentshaba zakho.\n110:3 Abantu bakho baya kuzinikela ngeentliziyo, ngemini yakho yokuphuma umkhosi; Bebethe ezingcwele, ekuphumeni kwesifingo, Uza kuwe umbethe womlisela wakho.\n110:4 Ufungile uYehova, akayi kuzohlwaya; uthe, Ungumbingeleli ngonaphakade wena Ngokohlobo lukaMelkitsedeke.\n110:5 INkosi ngasekunene kwakho Iya kuphalusa ookumkani ngemini yomsindo wayo.\n110:6 Iya kugweba phakathi kweentlanga, kuzale zizidumbu; Iphaluse intloko ezweni elibanzi.\n110:7 Endleleni iya kusela emlanjaneni; Ngenxa yoko iya kuphakamisa intloko.\n111:1 Haleluya! Ndiya kubulela kuYehova ngentliziyo yonke, Elucweyweni lwabathe tye nasebandleni.\n111:2 Zikhulu izenzo zikaYehova, Zezokungxokwa iintsingiselo zazo zonke.\n111:3 Unendili nobungangamela umsebenzi wakhe, Ubulungisa bakhe bumi ngonaphakade.\n111:4 Uyenzele ukuze ikhunjulwe imisebenzi yakhe ebalulekileyo; Unobabalo nemfesane uYehova.\n111:5 Ubaphe ukudla abamoyikayo; Uwukhumbule ngonaphakade umnqophiso wakhe.\n111:6 Ubabonise abantu bakhe amandla ezenzo zakhe, Ebanika ilifa leentlanga.\n111:7 Izenzo zezandla zakhe ziyinyaniso nesiko; Zithembekile zonke iziyalezo zakhe.\n111:8 Zizimasekile nanini nangonaphakade; Zenziwe ngenyaniso, zithe tye.\n111:9 Ubathumele abantu bakhe inkululeko; Uwumisele ngonaphakade umnqophiso wakhe; Lingcwele, liyoyikeka, igama lakhe.\n111:10 Ingqalo yobulumko kukoyika uYehova, Banengqiqo elungileyo bonke abenza ngako; Indumiso yakhe ihlala imi.\n112:1 Haleluya! Hayi, uyolo lomntu omoyikayo uYehova, Oyinoneleleyo kunene imithetho yakhe!\n112:2 Iya kuba nobugorha ehlabathini imbewu yakhe; Isizukulwana sabathe tye sisikelelwe.\n112:3 Bubuncwane nobutyebi endlwini yakhe; Ubulungisa bakhe buhlala bumi.\n112:4 Baphunyelwa kukukhanya ebumnyameni abathe tye, Benobabalo, nemfesane, nobulungisa.\n112:5 Unoyolo umntu obabalayo, aboleke; Uya kuyimisa intetho yakhe ematyaleni.\n112:6 Ngokuba akayi kushukunyiswa naphakade; Uya kuba lilungisa elikhunjulwa ngonaphakade.\n112:7 Akoyikiswa ziindaba ezimbi; Iqinisekile intliziyo yakhe, ikholose ngoYehova.\n112:8 Izimasekile intliziyo yakhe, akoyiki; Uya kuda ababonele ababandezeli bakhe.\n112:9 Uyahlakaza, upha amahlwempu; Ubulungisa bakhe buhlala bumi, Uphondo lwakhe luphakamile, lunozuko.\n112:10 Ongendawo yena uya kukubona, aqumbe, Atshixize amazinyo, anyibilike; Umnqweno wongendawo uyadaka.\n113:1 Haleluya! Dumisani, bakhonzi bakaYehova, Dumisani igama likaYehova.\n113:2 Malibongwe igama likaYehova, Kususela ngokunje, kude kuse ephakadeni.\n113:3 Kwasekuphumeni kwelanga kuse ekutshoneni kwalo, Malidunyiswe igama likaYehova.\n113:4 Uphakamile ngaphezu kweentlanga zonke uYehova, Bungaphezulu kwamazulu ubuqaqawuli bakhe.\n113:5 Ngubani na onjengoYehova, uThixo wethu? Ulohlala phezulu;\n113:6 Uloqondela phantsi; Ezulwini nasemhlabeni?\n113:7 Ulomvusa eluthulini osweleyo, Ulomphakamisa ezaleni olihlwempu,\n113:8 Ukuba amhlalise namanene, Amanene abantu bakhe;\n113:9 Ulohlalisa endlwini umfazi ongazaliyo, Abe ngunobantwana ovuyayo. Haleluya!\n114:1 Ekuphumeni kukaSirayeli eYiputa, Kwendlu kaYakobi ebantwini abantetho ingaziwayo,\n114:2 UYuda waba yingcwele yakhe, USirayeli waba sisikumkani sakhe.\n114:3 Ulwandle lwabona, lwasaba, IYordan yabuya umva.\n114:4 Iintaba zadloba njengeenkunzi zeegusha; Iinduli, njengamatakane omhlambi.\n114:5 Ubunani na, lulwandlendini, ukuba usabe? Wena Yordan, ukuba ubuye umva?\n114:6 Nina zintaba, ukuba nidlobe njengeenkunzi zeegusha? Nina zinduli, njengamatakane omhlambi?\n114:7 Wena hlabathi, zibhijabhije ebusweni beNkosi, Ebusweni boThixo kaYakobi;\n114:8 Uloguqula iliwa libe lidike lamanzi, Iqhwitha libe yimithombo yamanzi.\n115:1 Ungazukisi thina, Yehova, ungazukisi thina; Zukisa igama lakho, Ngenxa yenceba yakho, ngenxa yenyaniso yakho.\n115:2 Yini na ukuba zithi iintlanga, Uphi na kaloku uThixo wabo?\n115:3 UThixo wethu ke usemazulwini, Konke akuthandileyo uyakwenza.\n115:4 Izithixo zazo yisilivere negolide, Zizenzo zezandla zabantu.\n115:5 Zinomlomo nje, azithethi; Zinamehlo nje aziboni;\n115:6 Zineendlebe nje, aziva; Zineempumlo nje, azisezeli.\n115:7 Izandla zazo aziphathi, Iinyawo zazo azihambi; Azidumzeli ngomqala wazo.\n115:8 Boba njengazo abenzi bazo, Bonke abasukuba bekholose ngazo.\n115:9 Wena Sirayeli, kholosa ngoYehova; Uncedo lwabo nengweletshetshe yabo nguye.\n115:10 Nani bendlu ka-Aron, kholosani ngoYehova; Uncedo lwabo nengweletshetshe yabo nguye.\n115:11 Nina boyiki bakaYehova, kholosani ngoYehova; Uncedo lwabo nengweletshetshe yabo nguye.\n115:12 UYehova usikhumbule, wosisikelela; Woyisikelela indlu kaSirayeli, Woyisikelela indlu ka-Aron;\n115:13 Wobasikelela aboyiki bakaYehova, Abancinane kwanabakhulu.\n115:14 UYehova wonandisa nina ngakumbi nangakumbi, Abandise oonyana benu.\n115:15 Nisikelelekile kuYehova, UMenzi wamazulu nowehlabathi.\n115:16 Amazulu ngamazulu kaYehova, Ihlabathi ulinike oonyana babantu.\n115:17 Asingabafileyo abamdumisayo uYehova, Asingabo bonke abehlayo baye kwelokuzola.\n115:18 Thina ke siya kumbonga uYehova, Kususela koku kude kuse ephakadeni. Haleluya!\n116:1 Ndiyamthanda, ngokuba uYehova eliva Ilizwi lam, ukutarhuzisa kwam.\n116:2 Ngokuba endithobele indlebe yakhe, Ndiya kumnqula ngemihla yam yonke.\n116:3 Izintya zokufa zandijikela, Iingxingongo zelabafileyo zandifumana, Ndafunyanwa ziimbandezelo nesingqa la.\n116:4 Ndanqula ke igama likaYehova, ndathi, Yehova, ndiya kukhunga, siza umphefumlo wam.\n116:5 UYehova unobabalo, ulilungisa, UThixo wethu unemfesane.\n116:6 Ngumgcini wabazizidenge uYehova; Ndandiswele, wandisindisa.\n116:7 Buyela ekuphumleni kwakho, mphefumlo wam, Ngokuba uYehova ukuphatha kakuhle;\n116:8 Ngokuba ewuhlangule umphefumlo wam ekufeni, Iliso lam ezinyembezini, Unyawo lwam ekungqulekeni.\n116:9 Ndiya kuhamba-hamba phambi koYehova Emazweni abaphilileyo.\n116:10 Ndiyakholwa, xa ndithethayo; Mna ndicinezelekile kunene.\n116:11 Ndathi mna ekuphakuzeleni kwam, Bonke abantu ngamaxoki.\n116:12 Ndingambuyisela ngantoni na uYehova Konke ukundiphatha kwakhe kakuhle?\n116:13 Ndophakamisa indebe yosindiso, Ndinqule igama likaYehova.\n116:14 Ewe, ndozizalisa izibhambathiso zam kuYehova, Phambi kwabantu bakhe bonke kalokunje.\n116:15 Kunqabile emehlweni kaYehova Ukufa kwakhakhe benceba.\n116:16 Okunene, Yehova, ndingumkhonzi wakho, Ndingumkhonzi wakho, unyana womkhonzazana wakho; Uzicombulule iimbophelelo zam.\n116:17 Ndiya kubingelela kuwe umbingelelo wombulelo, Ndinqule igama likaYehova.\n116:18 Ewe, ndiya kuzizalisa izibhambathiso zam kuYehova, Phambi kwabantu bakhe bonke,\n116:19 Ezintendelezweni zendlu kaYehova, Esazulwini sakho, Yerusalem. Haleluya!\n117:1 Mdumiseni uYehova, nonke zintlanga, Mncomeni, nonke zizwe.\n117:2 Ngokuba inamandla kuthi inceba yakhe, Inyaniso kaYehova ingunaphakade. Haleluya!\n118:1 Bulelani kuYehova, ngokuba elungile, Ngokuba ingunaphakade inceba yakhe.\n118:2 Makathi uSirayeli, Ingunaphakade inceba yakhe.\n118:3 Mayithi indlu ka-Aron, Ingunaphakade inceba yakhe.\n118:4 Mabathi abamoyikayo uYehova, Ingunaphakade inceba yakhe.\n118:5 Ndabiza uYehova ndisengxingongweni; Wandiphendula uYehova, wandibeka endaweni ebanzi.\n118:6 UYehova ungakum, andoyiki; Angandenza ntoni na umntu?\n118:7 UYehova ungakum ngokundinceda; Ndiya kubona mna kwabandithiyayo.\n118:8 Kulungile ukuzimela ngoYehova, Ngaphezu kokukholosa ngomntu.\n118:9 Kulungile ukuzimela ngoYehova Ngaphezu kokukholosa ngamanene.\n118:10 Zingafanelana zonke iintlanga zindirhawule: Egameni likaYehova inene ndozinqumla.\n118:11 Zingafanelana zindirhawule zandirhawula: Egameni likaYehova inene ndozinqumla.\n118:12 Zingafanelana zindirhawule njengeenyosi: Zocinywa njengomlilo weentsasa; Egameni likaYehova inene ndozinqumla.\n118:13 Undityhale ngamandla wena ukuba ndiwe; Kodwa uYehova wandinceda.\n118:14 Iqhayiya lam nengoma yam nguYehova, Waba lusindiso kum.\n118:15 Izwi lokumemelela nelosindiso lisezintenteni zamalungisa, lisithi, Isandla sokunene sikaYehova siyeyisa;\n118:16 Isandla sokunene sikaYehova siphakamile; Isandla sokunene sikaYehova siyeyisa.\n118:17 Andiyi kufa, ndiya kudla ubomi, Ndibalise ngezenzo zikaYehova.\n118:18 UYehova undithethise kakhulu, Ke akandinikela ekufeni.\n118:19 Ndivuleleni amasango obulungisa; Ndiya kungena ngawo, ndiya kubulela kuYehova.\n118:20 Nali isango likaYehova, Amalungisa angena ngalo.\n118:21 Ndiyabulela kuwe kuba undiphendule, Waba lusindiso kum.\n118:22 Ilitye abalilahlayo abakhi Laba yintloko yembombo.\n118:23 Kuvele kuYehova oku, Kungumsebenzi obalulekileyo emehlweni ethu.\n118:24 Le yimini ayenzileyo uYehova, Masigcobe sivuye ngayo.\n118:25 Yehova, camagu, khawusindise, Yehova, camagu, khawuhlangule.\n118:26 Makabongwe lo uzayo esegameni likaYehova, Siyanisikelela nina basendlwini kaYehova.\n118:27 UYehova nguThixo, usikhanyisela; Bophelelani umbingelelo womthendeleko ngeentambo, Kude kuye ezimpondweni zesibingelelo.\n118:28 UnguThixo wam, ndiya kubulela kuwe; UnguThixo wam, ndiya kukuphakamisa.\n118:29 Bulelani kuYehova, ngokuba elungile, Ngokuba ingunaphakade inceba yakhe.\n119:1 Hayi, uyolo lwabandlela igqibeleleyo, Bona bahambayo ngomyalelo kaYehova!\n119:2 Hayi, uyolo lwababambe izingqiniso zakhe, Abamquqelayo ngentliziyo epheleleyo!\n119:3 Abasebenzi nokusebenza bugqwetha, Bayahamba ngeendlela zakhe.\n119:4 Uzimisile iziyalezo zakho, Ukuba zigcinwe kunene.\n119:5 Azaba iindlela zam bezibhekiselwe Ukugcina imimiselo yakho!\n119:6 Bendingayi kudana ke Ekubhekeni kwam kwimithetho yakho yonke.\n119:7 Ndiya kubulela kuwe ngentliziyo ethe tye, Ekuzifundeni kwam izigwebo zobulungisa bakho.\n119:8 Ndiya kuyigcina imimiselo yakho, Musa ukundishiya kuphele.\n119:9 Umfana uya kuwuqaqambisa ngantoni na umendo wakhe? Ngokuzigcina ngokwelizwi lakho.\n119:10 Ndiya kuquqela kuwe ngentliziyo yam yonke; Musa ukundilahlekanisa nemithetho yakho.\n119:11 Ndiyibeke intetho yakho entliziyweni yam, Ukuze ndingoni kuwe.\n119:12 Ungowokubongwa, Yehova; Ndifundise imimiselo yakho.\n119:13 Ndiyawabalisa ngemilebe yomlomo wam Onke amasiko omlomo wakho.\n119:14 Ndinemihlali endleleni yezingqiniso zakho, Ngathi kusebuncwaneni bonke.\n119:15 Ndiya kucamngca ngeziyalezo zakho, Ndibheke kumendo wakho.\n119:16 Ndiyaziyolisa ngemimiselo yakho; Andiyi kulilibala ilizwi lakho.\n119:17 Mphathe kakuhle umkhonzi wakho, ndidle ubomi, Ndigcine ilizwi lakho.\n119:18 Vula amehlo am, ukuba ndiyibone Imisebenzi ebalulekileyo yasemyalelweni wakho.\n119:19 Ndingumphambukeli ehlabathini, Musa ukuyisithelisa kum imithetho yakho.\n119:20 Umphefumlo wam ucumkile ngokulangazelela Amasiko akho ngamaxesha onke.\n119:21 Ubakhalimele abakhukhumali, Abaqalekiswa abo, balahlekeneyo nemithetho yakho.\n119:22 Shenxisa imke kum ingcikivo nendelo, Ngokuba ndizibambile izingqiniso zakho.\n119:23 Nangona abathetheli behlala bathethe ngam, Umkhonzi wakho yena ucamngca ngemimiselo yakho.\n119:24 Izingqiniso zakho ziziyoliso zam noko, Zingamaphakathi am.\n119:25 Umphefumlo wam unamathele eluthulini: Ndiphilise ngokwelizwi lakho.\n119:26 Ndizicacisile iindlela zam, wandiphendula; Ndifundise imimisela yakho.\n119:27 Ndiqondise iindlela zeziyalezo zakho, Ndicamngce ngemisebenzi yakho ebalulekileyo.\n119:28 Umphefumlo wam uvuza iinyembezi sisingqala, Ndimise ngokwelizwi lakho.\n119:29 Indlela yobuxoki yisuse kum; Ndibabale umyalelo wakho.\n119:30 Ndiyinyule indlela yokuthembeka; Amasiko akho ndijolise kuwo.\n119:31 Ndinamathele ezingqinisweni zakho; Musa ukundidanisa, Yehova.\n119:32 Ndigidima ngendlela yemithetho yakho, Ngokuba uyenze banzi intliziyo yam.\n119:33 Ndiyalele, Yehova, indlela yemimiselo yakho, Ndiyibambe kuphele.\n119:34 Ndiqondise, ndibambe umyalelo wakho, Ndiwugcine ngentliziyo yonke.\n119:35 Ndinyathelise endleleni yemithetho yakho, Ngokuba ndiyithandile.\n119:36 Intliziyo yam yithobele ezingqinisweni zakho, Ungayithobeli ekubaweni.\n119:37 Dlulisa amehlo am angakhangeli inkohlakalo, Ndiphilise ngeendlela zakho.\n119:38 Zalisa kumkhonzi wakho intetho yakho, Eyokuba bakoyike.\n119:39 Yidlulise ingcikivo yam endinxunguphala yiyo, Ngokuba amasiko akho alungile.\n119:40 Nanku ndilangazelela iziyalezo zakho, Ndiphilise ngobulungisa bakho.\n119:41 Mazize kum iinceba zakho, Yehova, Nosindiso lwakho ngokwentetho yakho;\n119:42 Ndimphendule ngelizwi ondingcikivayo, Ngokuba ndikholose ngelizwi lakho.\n119:43 Musa ukuda ulihluthe emlonyeni wam ilizwi lenyaniso, Ngokuba ndilindele izigwebo zakho;\n119:44 Ndowugcina umyalelo wakho ngamaxesha onke, Ngonaphakade kanaphakade;\n119:45 Ndihamba-hambe endaweni ebanzi, Ngokuba ndifuna iziyalezo zakho.\n119:46 Ndothetha ngezingqiniso zakho phambi kokumkani, Ndingabi nakudana.\n119:47 Ndoziyolisa ngemithetho yakho Endiyithandayo;\n119:48 Ndiziphakamise izandla zam emithethweni yakho endiyithandayo, Ndicamngce ngemimiselo yakho.\n119:49 Khumbula ilizwi lakho kumkhonzi wakho, Ngenxa enokuba undithembise lona.\n119:50 Yiyo le intuthuzelo yam ekucinezelekeni kwam, Yokuba intetho yakho indiphilisile.\n119:51 Abakhukhumali bada bandigxeka kakhulu; Kanti andithi gu bucala emyalelweni wakho.\n119:52 Ndawakhumbula amasiko akho kususela kwanaphakade, Yehova, Ndathuthuzeleka.\n119:53 Ndingenwe ngumsindo oshushu, Ndisenziwa ngabangendawo abalahla umyalelo wakho.\n119:54 Iziingoma kum imimiselo yakho, Endlwini yokuphambukela kwam.\n119:55 Ndilikhumbule ebusuku igama lakho, Yehova, Ndawugcina umyalelo wakho.\n119:56 Ndinikwe oku, Ukuba ndibambe iziyalezo zakho.\n119:57 Isabelo sam, Yehova, ndithi, Sesokuba ndigcine amazwi akho.\n119:58 Ndiya kubongoza ngentliziyo yonke, Ndibabale ngokwentetho yakho.\n119:59 Ndazicingela iindlela zam, Ndazibuyisela iinyawo zam ezingqinisweni zakho.\n119:60 Ndikhawulezile andazila-zila Ukugcina imithetho yakho.\n119:61 Izintya zabangendawo zindithandele, Andiwulibele umyalelo wakhe noko.\n119:62 Ndivuka phakathi kobusuku, ndibulele kuwe, Ngenxa yezigwebo zobulungisa bakho.\n119:63 Ndilidlelane labo bonke abakoyikayo, Nelabazigcinayo iziyalezo zakho.\n119:64 Inceba yakho, Yehova, izalise ihlabathi; Ndifundise imimiselo yakho.\n119:65 Umenzele okulungileyo umkhonzi wakho, Yehova, ngokwelizwi lakho.\n119:66 Ndifundise, ndibe nemvo nokwazi okulungileyo, Ngokuba ndikholwa yimithetho yakho.\n119:67 Ndingekacinezelwa, ndaye ndilahleka; Kungoku ndiyigcinile intetho yakho.\n119:68 Ulungile wena, ulungisa; Ndifundise imimiselo yakho.\n119:69 Abakhukhumali bathungele ubuxoki ngam; Mna ndizibamba ngentliziyo yonke iziyalezo zakho.\n119:70 Ithe fithi kukutyeba intliziyo yabo; Ke mna ndiziyolisa ngomyalelo wakho.\n119:71 Kundilungele okokuba ndacinezelwayo, Ukuze ndiyifunde imimiselo yakho.\n119:72 Ulungile kum umyalelo womlomo wakho, Ngaphezu kwamawaka egolide nesilivere.\n119:73 Izandla zakho zindenzile, zandilungisa; Ndiqondise, ndifunde imithetho yakho.\n119:74 Abakoyikayo bondibona, bavuye, Ngokuba ndilindele elizwini lakho.\n119:75 Ndiyazi, Yehova, ukuba zinobulungisa izigwebo zakho; Undicinezele, phofu uthembekile.\n119:76 Ngamana inceba yakho yaba yeyokundithuthuzela, Njengokwentetho yakho kumkhonzi wakho.\n119:77 Mazize kum iimfesane zakho, ndiphile, Ngokuba umyalelo wakho undiyolisa.\n119:78 Mabadane abakhukhumali, ngokuba bendigobele phantsi ngobuxoki, Mna ndicamngca ngeziyalezo zakho.\n119:79 Mabandibuyele abakoyikayo, Nabazaziyo izingqiniso zakho.\n119:80 Mayigqibelele intliziyo yam emimiselweni yakho, Ukuze ndingadani.\n119:81 Umphefumlo wam uyaphela kukululangazelela usindiso lwakho, Ndilindele elizwini lakho.\n119:82 Amehlo am ayaphela kukulangazelela intetho yakho, Ndisithi, Uya kundithuthuzela nini na?\n119:83 Noko ndithe ndaba njengentsuba emsini; Andiyilibali imimiselo yakho.\n119:84 Zingaphi na iintsuku zomkhonzi wakho? Uya kuda ubagwebe nini na abandisukelayo?\n119:85 Abakhukhumali bandimbele izihogo, Abangenamyalelo wakho.\n119:86 Yonke imithetho yakho ithembekile: Bandisukela ngobuxoki; ndincede.\n119:87 Baphantse ukundigqibela emhlabeni, Ke mna andizilahli iziyalezo zakho.\n119:88 Ndiphilise ngokwenceba yakho, Ndizigcine izingqiniso zomlomo wakho.\n119:89 Lingunaphakade, Yehova, Limi emazulwini ilizwi lakho.\n119:90 Ukuthembeka kwakho kukwizizukulwana ngezizukulwana; Ulizinzisile ihlabathi, lema.\n119:91 Ezo zinto zimele izigwebo zakho nanamhla, Ngokuba iinto zonke zingabakhonzi bakho.\n119:92 Koko umyalelo wakho wandiyolisayo, Ndinge ndaphelayo ekucinezelekeni kwam.\n119:93 Andiyi kuzilibala naphakade iziyalezo zakho, Ngokuba undiphilisile ngazo.\n119:94 Ndingowakho mna, ndisindise, Kuba ndicamanga ngeziyalezo zakho.\n119:95 Abangendawo bandilindile ukuze banditshabalalise; Mna ndigqale izingqiniso zakho.\n119:96 Yonke inzaliseko ndiyibonile apho iphela khona; Ke wona umthetho wakho ngumphangalala omkhulu.\n119:97 Hayi, ukuwuthanda kwam umyalelo wakho! Imini le yonke ndiyacamngca ngawo.\n119:98 Indifundisa ubulumko ngaphezu kweentshaba zam imithetho yakho, Ngokuba yeyam ngonaphakade.\n119:99 Ndinokuqiqa ngaphezu kwabafundisi bam bonke, Ngokuba ngezingqiniso zakho ndiyacamngca.\n119:100 Ndinokuqonda ngaphezu kwamadoda amakhulu, Ngokuba ndizibamba iziyalezo zakho.\n119:101 Ndizinqandile iinyawo zam kwiindlela zonke ezimbi, Ukuze ndiligcine ilizwi lakho.\n119:102 Andisuki emasikweni akho, Ngokuba undiyalile wena.\n119:103 Hayi, ukuba mnandi kwentetho yakho ekhuhlangubeni lam! Igqithe nobusi emlonyeni wam.\n119:104 Ngeziyalezo zakho ndinokuqonda, Ngenxa yoko ndiwuthiyile wonke umendo wobuxoki.\n119:105 Lisisibane seenyawo zam ilizwi lakho, Likukukhanya emendweni wam.\n119:106 Ndikufungele, ndikumisile, Ukuzigcina izigwebo zobulungisa bakho.\n119:107 Ndide ndacinezeleka kakhulu; Yehova, ndiphilise ngokwelizwi lakho.\n119:108 Ngamana wakholeka kuwe, Yehova, umbingelelo wesisa womlomo wam; Ndifundise amasiko akho.\n119:109 Umphefumlo wam uhlala usesandleni sam, Ndingawulibali umyalelo wakho.\n119:110 Abangendawo bandenzele umgibe, Andiphambukanga eziyalezweni zakho.\n119:111 Ndizidle ilifa izingqiniso zakho ngonaphakade, Ngokuba ziyimihlali yentliziyo yam;\n119:112 Intliziyo yam ndiyithobele ekwenzeni imimiselo yakho Ngonaphakade, kuphele.\n119:113 Abambaxa ndiyabathiya, Wona umyalelo wakho ndiyawuthanda.\n119:114 Isithe lam nengweletshetshe yam nguwe, Ndilindele elizwini lakho.\n119:115 Sukani kum, nina benzi beento ezimbi, Ndibambe imithetho yoThixo wam.\n119:116 Ndizimase ngokwelizwi lakho, ndiphile, Ungandidanisi ekulindeni kwam.\n119:117 Ndixhase ndisinde, Ndihlale ndibheke emimiselweni yakho.\n119:118 Ubacukucezile bonke abalahlekana nemimiselo yakho, Ngokuba inkohliso yabo ibubuxoki.\n119:119 Wena ususa bonke abangendawo behlabathi njengentlenga, Ngoko ndiyazithanda izingqiniso zakho.\n119:120 Inyama yam isuka ihambe kukunkwantyiswa nguwe, Ndizoyike izigwebo zakho.\n119:121 Ndenza ngesiko nangobulungisa, Ungandinikeli kwabandicudisayo.\n119:122 Mmele umkhonzi wakho, kulunge; Mabangandicudisi abakhukhumali.\n119:123 Amehlo am ayaphela kukululangazelela usindiso lwakho, Nentetho yobulungisa bakho.\n119:124 Umkhonzi wakho menzele ngokwenceba yakho Undifundise imimiselo yakho.\n119:125 Ndingumkhonzi wakho, ndiqondise, Ndizazi izingqiniso zakho.\n119:126 Lilixa lokuba uYehova enze, Kuba bawaphule umyalelo wakho.\n119:127 Ngenxa yoko ndiyithanda imithetho yakho Ngaphezu kwegolide, nakwengcwengiweyo.\n119:128 Ngenxa yoko ndithi, Zonke iziyalezo zakho zithe tye ngezinto zonke; Wonke umendo wobuxoki ndiwuthiyile.\n119:129 Ziyimisebenzi ebalulekileyo izingqiniso zakho, Ngenxa yoko uzibambile umphefumlo wam.\n119:130 Ukutyhila kwamazwi akho kuyakhanyisa, Kuqondisa abazizidenge.\n119:131 Ndakhamisa umlomo wam, ndakhefuza, Ngokuba ndiyilangazelela imithetho yakho.\n119:132 Ndibheke, undibabale, Ngokwesiko lakho kubathandi begama lakho.\n119:133 Qinisa ukunyathela kwam ngentetho yakho, Mabungabi nagunya kum ubutshinga, nabuphi na.\n119:134 Ndikhulule ekucudiseni komntu, Ndizigcine iziyalezo zakho.\n119:135 Khanyisa ubuso bakho kumkhonzi wakho, Undifundise imimiselo yakho.\n119:136 Ahla imijelo yamanzi amehlo am, Ngenxa yokuba bengawugcini umyalelo wakho.\n119:137 Ulilungisa wena, Yehova, Zithe tye izigwebo zakho.\n119:138 Uzimisile izingqiniso zakho, zanobulungisa, Zaba nokuthembeka kakhulu.\n119:139 Ikhwele lam lindibhangisile, Ngokuba abandibandezelayo bewalibele amazwi akho.\n119:140 Ilizwi lakho linyibilikisiwe njengegolide kunene, Umkhonzi wakho uyalithanda.\n119:141 Ndimncinane, ndideliwe, Noko andizilibali iziyalezo zakho.\n119:142 Ubulungisa bakho bubulungisa obungunaphakade, Umyalelo wakho uyinyaniso.\n119:143 Imbandezelo nengcutheko indifumene, Imithetho yakho iyandiyolisa.\n119:144 Zinobulungisa ngonaphakade izingqiniso zakho, Ndiqondise, ndiphile.\n119:145 Ndikhala ngentliziyo yonke, ndiphendule; Yehova, imimiselo yakho ndiya kuyibamba.\n119:146 Ndikhala kuwe, ndisindise, Ndigcine izingqiniso zakho.\n119:147 Ndakuphangela ukusa, ndazibika, Ndalindela emazwini akho.\n119:148 Amehlo am aphengela imilindo yasebusuku, Ukuze ndicamngce ngentetho yakho.\n119:149 Live ilizwi lam ngokwenceba yakho, Yehova, ndiphilise ngokwamasiko akho.\n119:150 Bayasondela abaphuthuma amanyala, Banyawuka emyalelweni wakho;\n119:151 Usondele wena, Yehova, Yonke imithetho yakho iyinyaniso.\n119:152 Kudala ndisazi ngokwezingqiniso zakho, Ukuba uzisekile ngonaphakade.\n119:153 Khangela ukucinezeleka kwam, undihlangule, Ngokuba ndingawulibali umyalelo wakho.\n119:154 Bambana nobambene nam, undikhulule, Ndiphilise ngokwelizwi lakho.\n119:155 Lunyawukile kwabangendawo usindiso, Ngokuba abayifuni imimiselo yakho.\n119:156 Iimfesane zakho zininzi, Yehova; Ndiphilise ngokwamasiko akho.\n119:157 Baninzi abandisukelayo nabandibandezelayo; Andithi gu bucala ezingqinisweni zakho.\n119:158 Ndababona abatshinizi, ndakruquka, Abo bangayigciniyo intetho yakho.\n119:159 Bona ukuthanda kwam iziyalezo zakho, Yehova, ndiphilise ngokwenceba yakho.\n119:160 Isimbuku selizwi lakho siyinyaniso iphela, Zingunaphakade zonke izigwebo zobulungisa bakho.\n119:161 Abathetheli bandisukela ngelize, Intliziyo yam iyankwantyiswa ngamazwi akho.\n119:162 Ndinemihlali ngentetho yakho, Njengofumene ixhoba elininzi.\n119:163 Ndikuthiyile ukuxoka, lisikizi kum; Ndiyawuthanda umyalelo wakho.\n119:164 Ndikudumisa kasixhenxe ngemini, Ngenxa yezigwebo zobulungisa bakho.\n119:165 Banoxolo olukhulu abawuthandayo umyalelo wakho; Akukho sikhubekiso kubo.\n119:166 Ndikhangela usindiso lwakho, Yehova; Ndenza imithetho yakho.\n119:167 Umphefumlo wam uyazigcina izingqiniso zakho, Ndizithanda kunene.\n119:168 Ndiyazigcina iziyalezo zakho nezingqiniso zakho, Ngokuba zonke iindlela zam ziphambi kwakho.\n119:169 Makusondele phambi kwakho ukuhlahlamba kwam; Yehova, ndiqondise ngokwelizwi lakho.\n119:170 Masifike isikhungo sam phambi kwakho; Ndihlangule ngokwentetho yakho.\n119:171 Umlomo wam mawumpompoze indumiso, Kuba undifundisile imimiselo yakho.\n119:172 Ulwimi lwam luya kuyiphendula intetho yakho, Ngokuba yonke imithetho yakho inobulungisa.\n119:173 Isandla sakho masibe sesokundinceda, Ngokuba ndizinyulele iziyalezo zakho.\n119:174 Ndilangazelela usindiso lwakho, Yehova; Umyalelo wakho uyandiyolisa.\n119:175 Mawuphile umphefumlo wam, ukudumise, Andincede amasiko akho.\n119:176 Ndiya ndimka njengemvu elahlekileyo; mfune umkhonzi wakho, Ngokuba andiyilibali imithetho yakho.\n120:1 Ingoma yezinyuko. Engxingongweni yam ndakhala kuYehova, Wandiphendula.\n120:2 Ndathi, Wuhlangule, Yehova, umphefumlo wam emlonyeni oxokayo, Elulwimini olunenkohliso.\n120:3 Makakunike ntoni na, akongeze ntoni na, Lulwimindini lunenkohliso?\n120:4 Iintolo zegorha ezitsolo, Kunye namalahle avuthayo onwele.\n120:5 Athi ke mna! Kuba ndingumphambukeli kwaMesheki, Ndihleli ngasezintenteni zakwaKedare.\n120:6 Umphefumlo wam kade uhleli Nabaluthiyileyo uxolo.\n120:7 Mna ndingowoxolo; Ke ndithi ndakuthetha, bona babe yimfazwe.\n121:1 Ingoma yezinyuko. Ndiwaphakamisele ezintabeni na amehlo am? Luya kuvela phi na uncedo lwam?\n121:2 Uncedo lwam luvela kuYehova, UMenzi wezulu nehlabathi.\n121:3 Akayi kukha alunikele unyawo lwakho ekutyibilikeni; Akayi kukha ozele umgcini wakho.\n121:4 Uyabona, akozeli, akalali, UMgcini kaSirayeli.\n121:5 NguYehova umgcini wakho, NguYehova umthunzi wakho ekunene kwakho.\n121:6 Emini ilanga aliyi kukwenzakalisa, Nenyanga ebusuku.\n121:7 UYehova uya kukugcina ebubini bonke, Uya kuwugcina umphefumlo wakho.\n121:8 UYehova uya kukugcina ukuphuma kwakho nokungena kwakho, Kususela ngoku kude kuse ephakadeni.\n122:1 Ingoma yezinyuko. KaDavide. Ndavuya bakuthi kum, Masiye endlwini kaYehova.\n122:2 Iinyawo zethu zifike zema Emasangweni akho, Yerusalem;\n122:3 Yerusalem, wena wakhiweyo Ngokomzi ohlangeneyo wamnye;\n122:4 Apho zinyuka ziye khona izizwe, Izizwe zikaYehova; Ibubungqina ke loo nto kwaSirayeli, Ukuba kubulelwe kwigama likaYehova.\n122:5 Kuba khona apho kumiswe iitrone zokugweba, Iitrone zendlu kaDavide.\n122:6 Celelani iYerusalem uxolo; Mababe nokuchulumacha abakuthandayo,\n122:7 Malube luxolo eludongeni lwakho olurhaqileyo, Nokuchulumacha ezingxandeni zakho ezinde.\n122:8 Ngenxa yabazalwana bam nowethu, Makhe ndithethe uxolo ngawe.\n122:9 Ngenxa yendlu kaYehova, uThixo wethu, Ndiya kufuna okukulungeleyo.\n123:1 Ingoma yezinyuko. Ulohlala emazulwini, Ndiwaphakamisela kuwe amehlo am.\n123:2 Uyabona, njengokuba amehlo abakhonzi Emi kwisandla seenkosi zabo; Njengokuba amehlo omkhonzazana Emi kwisandla senkosikazi yakhe: Ngokunjalo amehlo ethu akuYehova, uThixo wethu, Ade asibabale.\n123:3 Sibabale, Yehova, sibabale, Ngokuba sanele kakhulu kukudelwa.\n123:4 Umphefumlo wethu wanele kakhulu Kukugculela kwabangakhathalele bani, Nokudela kwabanekratshi.\n124:1 Ingoma yezinyuko. KaDavide. Koko uYehova ebengakuthi, Makatsho uSirayeli,\n124:2 Koko uYehova ebengakuthi Ekusukeleni kwabantu phezulu kuthi,\n124:3 Bange beba basiginya sihleli, Ekuvutheni komsindo wabo kuthi;\n124:4 Ange esintywilisele amanzi, Wadlula phezu komphefumlo wethu umsinga;\n124:5 Ange edlule phezu komphefumlo wethu Amanzi akhukumeleyo.\n124:6 Ungowokubongwa uYehova, Ongasinikelanga emazinyweni abo, ukuba siqwengwe.\n124:7 Umphefumlo wethu usindile, njengentaka emgibeni wababambisi; Umgibe uqhawukile, sasinda ke thina.\n124:8 Uncedo lwethu lusegameni likaYehova, UMenzi wezulu nehlabathi.\n125:1 Ingoma yezinyuko. Abo bakholosa ngoYehova banjengentaba yaseZiyon: Ayishukumi, ihleli ngonaphakade.\n125:2 IYerusalem ijikelezwe ziintaba; Ke uYehova ubajikelezile naye abantu bakhe, Kususela ngoku kude kuse ephakadeni.\n125:3 Ngokuba ayiyi kuhlala intonga yokungendawo elifeni lamalungisa, Ukuze amalungisa angazisi ebugqwetheni izandla zawo.\n125:4 Yehova, yenza okulungileyo kwabalungileyo, Kwabathe tye ezintliziyweni zabo.\n125:5 Ke bona abathi gu bucala ngeendlela zabo ezimagoso-goso, UYehova makabemkise, kunye nabasebenzi bobutshinga. Malube luxolo kuSirayeli.\n126:1 Ingoma yezinyuko. Ekubabuyiseni kukaYehova ababuyayo baseZiyon, Saba njengabaphuphayo;\n126:2 Waza wazala kukuhleka umlomo wethu, Lwazala kukumemelela ulwimi lwethu. Baza bathi phakathi kweentlanga, UYehova ubenzele izinto ezinkulu aba.\n126:3 UYehova usenzele izinto ezinkulu, Saba ngabavuyayo.\n126:4 Buyisa, Yehova, abathinjiweyo bakuthi, Njengemilambo yamanzi yelasezantsi.\n126:5 Abahlwayelayo beneenyembezi Baya kuvuna benokumemelela.\n126:6 Ohamba ahambe elila, Ephethe intlwayelelo, Uyabuya eze ememelela, Ethwele izithungu zakhe.\n127:1 Ingoma yezinyuko. KaSolomon. Ukuba akayakhi uYehova indlu, Bafumana besaphuka yiyo abakhi bayo. Ukuba umzi akawugcini uYehova, Ufumana ephaphama owugcinayo.\n127:2 Nifumana nivuka kusasa, Nihlale nisebenza kude kube sebusuku, Nikudla ukudla kokubulaleka; Uyipha intanda yakhe, ilele ubuthongo.\n127:3 Uyabona, ilifa likaYehova ngoonyana, Umvuzo sisiqhamo sesizalo.\n127:4 Njengeentolo esandleni segorha, Banjalo oonyana bobutsha.\n127:5 Hayi, uyolo lomfo ozalise umphongolo wakhe ngabo! Abayi kudana, Xa bathetha neentshaba esangweni.\n128:1 Ingoma yezinyuko. Hayi, uyolo lwabantu bonke abamoyikayo uYehova, Abahamba ngeendlela zakhe!\n128:2 Ukuxelenga kwezandla zakho inene uya kukudla, Uya kuba noyolo wena, kulunge kuwe.\n128:3 Umkakho woba njengomdiliya oqhamayo Endlwini yakho ngaphakathi; Oonyana bakho babe njengezithole zomnquma Ngeenxa zonke esithebeni sakho.\n128:4 Yabona, unjalo ukusikelelwa umfo Omoyikayo uYehova.\n128:5 Makakusikelele uYehova eZiyon. Uyibone iYerusalem inenyhweba Yonke imihla yobomi bakho;\n128:6 Ubone abantwana babantwana bakho. Malube luxolo kuSirayeli.\n129:1 Ingoma yezinyuko. Kukaninzi bendibandezela kwasebuncinaneni bam, Makatsho uSirayeli;\n129:2 Kukaninzi bendibandezela kwasebuncinaneni bam: Ababanga nakundithini noko.\n129:3 Abalimi balima emhlana kum, Bayolula indima yabo.\n129:4 UYehova ulilungisa, Uzinqumle izintya zabangendawo.\n129:5 Mabadane babuye umva Bonke abayithiyayo iZiyon.\n129:6 Mababe njengengca ephuma phezu kwezindlu, Eyomayo ingekahlumi,\n129:7 Engekasizalisi nesandla sakhe umvuni, Engekalizalisi nesondo lengubo yakhe umbophi wezithungu;\n129:8 Bengekathi nabadlulayo, Intsikelelo kaYehova mayibe kuni; Siyanisikelela egameni likaYehova.\n130:1 Ingoma yezinyuko. Ezinzulwini ndinqula wena, Yehova,\n130:2 Nkosi, yiva ilizwi lam. Iindlebe zakho mazilibazele Ilizwi lokutarhuzisa kwam.\n130:3 Ukuba uthe wabunqala ubugwenxa, Yehova, Ngubani na ongaba nokuma, Nkosi?\n130:4 Ngokuba kunawe ukuxolela, Ukuze woyikwe.\n130:5 Ndithembele kuYehova, uthembile umphefumlo wam; Ndilinde ilizwi lakhe.\n130:6 Umphefumlo wam ulindele eNkosini Ngaphezu kwabalinde ukusa, Ewe, abalinde ukusa.\n130:7 Lindela kuYehova, Sirayeli, Ngokuba inceba ikuYehova; Ikuye inkululeko eninzi.\n130:8 Yena ke wowakhulula amaSirayeli Ebugwenxeni bawo bonke.\n131:1 Ingoma yezinyuko; kaDavide. Yehova, intliziyo yam ayiphakamile, amehlo am akaqwayingile; Andihambi ezintweni ezinkulu, Eziyimisebenzi ebalulekileyo kum.\n131:2 Inene, ndiwuzolise ndawuthozamisa umphefumlo wam; Unjengomntwana olunyulweyo, ehleli kunina; Unjengomntwana olunyulweyo umphefumlo wam kum.\n131:3 Wena Sirayeli, lindela kuYehova Kususela ngoku kude kuse ephakadeni.\n132:1 Ingoma yezinyuko. Yehova, mkhumbulele uDavide Ukucinezeleka kwakhe konke;\n132:2 Yena wamfungelayo uYehova, Wabhambathisa kwimbalasane enguThixo kaYakobi,\n132:3 Esithi, Andiyi kungena ententeni eyindlu yam, Andiyi kunyuka ndiye esililini, emandlalweni wam;\n132:4 Andiyi kuwanika amehlo am ubuthongo, Neenkophe zam ukozela:\n132:5 Ndide ndimfumanele indawo uYehova, Ndiyifumanele umnquba imbalasane kaYakobi.\n132:6 Khangela, sawuva e-Efrata, Sawufumana ezintilini zaseKiriyati-yeharim.\n132:7 Masingene emnqubeni wakhe, Siqubude esihlalweni seenyawo zakhe.\n132:8 Khawusuk\u2019 ume, Yehova, uze ekuphumleni kwakho, Wena netyeya yamandla akho.\n132:9 Ababingeleli bakho mabambathe ubulungisa, Bamemelele abakho benceba.\n132:10 Ngenxa kaDavide umkhonzi wakho, Musa ukubutyhala ubuso bomthanjiswa wakho.\n132:11 UYehova wamfungela uDavide; Inyaniso, akayi kubuya kuloo nto, Esithi, Esiqhameni sezibilini zakho Ndimisa oya kuba setroneni yakho.\n132:12 Ukuba bathe oonyana bakho bawugcina umnqophiso wam, Nesingqiniso sam endibafundisayo: Oonyana babo bothi nabo bahlale Etroneni yakho nanini.\n132:13 Ngokuba uYehova uyinyule iZiyon, Uyinqwenele ukuba ibe likhaya lakhe;\n132:14 Esithi, Nantsi indawo yam yokuphumla kwam nanini; Ndiya kuhlala apha, ngokuba oko ndikunqwenele.\n132:15 Umphako wayo ndiya kuwusikelela kunene; Amahlwempu ayo ndiya kuwahluthisa ngesonka,\n132:16 Ndibambathise ngosindiso ababingeleli bayo, Abenceba bayo bamemelele bememelela.\n132:17 Apho ndiya kumhlumisela uphondo uDavide, Ndiya kumlungisela isibane umthanjiswa wam.\n132:18 Iintshaba zakhe ndiya kuzambathisa udano; Ke phezu kwakhe yena siya kutyatyamba isithsaba sakhe.\n133:1 Ingoma yezinyuko; kaDavide. Yabonani, ukuba kuhle, ukuba mnandi, Ukuthi abazalwana bahlale bemxhelo mnye!\n133:2 Kunjengeoli elungileyo entloko, Isihla ezindevini, Ezindevini zika-Aron, Isihla iye emqukumbelweni weengubo zakhe.\n133:3 Kunjengombethe waseHermon, Ohla phezu kweentaba zaseZiyon; Ngokuba uYehova wayimisela khona apho intsikelelo, Ubomi, kude kuse ephakadeni.\n134:1 Ingoma yezinyuko. Yabonani, mbongeni uYehova, nonke bakhonzi bakaYehova, Nimiyo endlwini kaYehova ebusuku.\n134:2 Phakamiselani engcweleni izandla zenu, Nimbonge uYehova.\n134:3 Makakusikelele eZiyon uYehova, UMenzi wezulu nehlabathi.\n135:1 Haleluya. Dumisani igama likaYehova; Dumisani, nina bakhonzi bakaYehova,\n135:2 Nimiyo endlwini kaYehova, Ezintendelezweni zendlu yoThixo wethu.\n135:3 Dumisani uYehova, ngokuba elungile uYehova; Libetheleni uhadi igama lakhe, ngokuba kumnandi.\n135:4 Ngokuba uYehova unyule uYakobi ukuba abe ngowakhe, Wanyula uSirayeli ukuba abe yinqobo kuye.\n135:5 Ngokuba ndiyazi mna ukuba mkhulu uYehova, INkosi yethu ingaphezu koothixo bonke.\n135:6 Konke akuthandileyo uYehova uya kwenza, Ezulwini nasemhlabeni, Ezilwandle nasemanzini onke enzonzobila.\n135:7 Ulonyusa amafu eziphelweni zehlabathi, Imvula wayenzela imibane; Ulorhola umoya koovimba bakhe.\n135:8 Owawabulalayo amazibulo aseYiputa, Ethabathele ebantwini wesa ezinkomeni;\n135:9 Wathumela imiqondiso nezimanga Phakathi kwakho, Yiputa, KuFaro nakubakhonzi bakhe bonke;\n135:10 Owabulala iintlanga ezinkulu, Wabulala ookumkani abanamandla;\n135:11 OoSihon, ukumkani wama-Amori, No-Ogi, ukumkani waseBhashan, Nezikumkani zonke zakwaKanan;\n135:12 Walinikela ilizwe labo lalilifa, Lalilifa kumaSirayeli, abantu bakhe,\n135:13 Yehova, igama lakho lingunaphakade, Inkumbuzo yakho, Yehova, ikwizizukulwana ngezizukulwana.\n135:14 Ngokuba uYehova uya kugweba phakathi kwabantu bakhe, Azohlwaye ngenxa yabakhonzi bakhe.\n135:15 Izithixo zeentlanga yisilivere negolide, Umsebenzi wezandla zabantu.\n135:16 Zinomlomo nje, azithethi; Zinamehlo nje, aziboni;\n135:17 Zineendlebe nje, aziva; Akukho nento engumoya emlonyeni wazo.\n135:18 Baya kuba njengazo abenzi bazo, Bonke abasukuba bekholose ngazo.\n135:19 Nina ndlu kaSirayeli, bongani uYehova; Nani ndlu ka-Aron, bongani uYehova.\n135:20 Nina ndlu kaLevi, bongani uYehova; Nani boyika uYehova, bongani uYehova.\n135:21 Ngowokubongwa uYehova eZiyon, Ulohlala eYerusalem. Haleluya!\n136:1 Bulelani kuYehova, ngokuba elungile: Ngokuba ingunaphakade inceba yakhe.\n136:2 Bulelani kuThixo woothixo: Ngokuba ingunaphakade inceba yakhe.\n136:3 Bulelani kuNkosi kankosi: Ngokuba ingunaphakade inceba yakhe.\n136:4 KuloMenzi wemisebenzi ebalulekileyo emikhulu yedwa: Ngokuba ingunaphakade inceba yakhe.\n136:5 KuloMenzi wezulu ngengqondo: Ngokuba ingunaphakade inceba yakhe.\n136:6 KuloMtwabululi wehlabathi phezu kwamanzi: Ngokuba ingunaphakade inceba yakhe.\n136:7 KuloMenzi wezikhanyiso ezikhulu: Ngokuba ingunaphakade inceba yakhe;\n136:8 Ilanga lilawule emini: Ngokuba ingunaphakade inceba yakhe;\n136:9 Inyanga neenkwenkwezi zilawule ebusuku: Ngokuba ingunaphakade inceba yakhe.\n136:10 Kulowabulala amaYiputa kumazibulo awo: Ngokuba ingunaphakade inceba yakhe.\n136:11 Wawakhupha amaSirayeli phakathi kwawo: Ngokuba ingunaphakade inceba yakhe.\n136:12 Ngesandla esithe nkqi, nangengalo eyolukileyo: Ngokuba ingunaphakade inceba yakhe.\n136:13 KuloMgabuli woLwandle oluBomvu, lwagabuka: Ngokuba ingunaphakade inceba yakhe.\n136:14 Wawaweza amaSirayeli esazulwini salo: Ngokuba ingunaphakade inceba yakhe.\n136:15 Wamvuthululela uFaro nempi yakhe eLwandle oluBomvu: Ngokuba ingunaphakade inceba yakhe.\n136:16 Kulohambisa abantu bakhe entlango: Ngokuba ingunaphakade inceba yakhe.\n136:17 Kulowaxabela ookumkani abakhulu: Ngokuba ingunaphakade inceba yakhe.\n136:18 Wabulala ookumkani abaziingangamsha: Ngokuba ingunaphakade inceba yakhe;\n136:19 USihon, ukumkani wama-Amori: Ngokuba ingunaphakade inceba yakhe;\n136:20 No-Ogi, ukumkani waseBhashan: Ngokuba ingunaphakade inceba yakhe.\n136:21 Walinikela ilizwe labo laba lilifa: Ngokuba ingunaphakade inceba yakhe,\n136:22 Laba lilifa kuSirayeli umkhonzi wakhe: Ngokuba ingunaphakade inceba yakhe.\n136:23 Owasikhumbulayo ebuphantsini bethu: Ngokuba ingunaphakade inceba yakhe.\n136:24 Wasihlangula kwabasibandezelayo: Ngokuba ingunaphakade inceba yakhe.\n136:25 Ulonika into yonke ephilileyo ukudla: Ngokuba ingunaphakade inceba yakhe.\n136:26 Bulelani kuThixo wamazulu: Ngokuba ingunaphakade inceba yakhe.\n137:1 NgaseMilanjeni yaseBhabheli Sahlala phantsi khona, salila, Sakuyikhumbula iZiyon.\n137:2 Emingculubeni phakathi kwayo Sazixhoma khona iihadi zethu.\n137:3 Ngokuba khona apho abathimbi bethu basibiza Izango zengoma; Abathuthumbisi bethu basibiza uvuyo, Besithi, Sivumeleni ingoma yaseZiyon.\n137:4 Singathini na ukuvuma ingoma kaYehova Emhlabeni wolunye uhlanga?\n137:5 Ukuba ndithe ndakulibala, Yerusalem, Masinyele isandla sam sokunene.\n137:6 Ulwimi lwam malunamathele ekhuhlangubeni lam, Ukuba andithanga ndikukhumbule; Ukuba andithanga ndiyinyuse iYerusalem Ngaphezu kwemivuyo yam yonke.\n137:7 Bakhumbule, Yehova, oonyana bakaEdom, Umhla weYerusalem, Abo bathi, Yidilizeni, yidilizeni Kuse elusekweni lwayo.\n137:8 Ntombi inguBhabheli, wena unyashiweyo; Hayi, uyolo lwalowo ukubuyekezayo ukuphatha kwakho Osiphethe ngako!\n137:9 Hayi, uyolo lwalowo ubabambayo abahlekeze abantwana bakho Engxondorheni!\n138:1 EkaDavide. Ndiya kubulela kuwe ngentliziyo yam yonke; Phambi koothixo ndiya kukubethela uhadi.\n138:2 Ndiya kuqubuda ndibhekise etempileni yakho engcwele, Ndibulele kwigama lakho, ngenxa yenceba yakho, nangenxa yenyaniso yakho; Kuba ulikhulisile ilizwi lakho ngaphezu kwegama lakho lonke.\n138:3 Ngomhla wokubiza kwam wandiphendula, Wandikhaliphisa, yangamandla emphefumlweni wam.\n138:4 Baya kubulela kuwe, Yehova, bonke ookumkani behlabathi, Bakuweva amazwi omlomo wakho;\n138:5 Bavume ngeendlela zikaYehova, Ukuba lukhulu uzuko lukaYehova:\n138:6 Ngokuba noko uYehova aphakamileyo, uyambona othobekileyo; Ke yena oziphakamisayo umazi nakude.\n138:7 Ukuba ndithe ndahamba-hamba phakathi kweembandezelo, uyandiphilisa; Wosolulela emsindweni weentshaba zam isandla sakho, Sindisindise isandla sakho sokunene.\n138:8 UYehova uya kundifezela. Yehova, inceba yakho ingunaphakade, Izenzo zezandla zakho musa ukuziyekela.\n139:1 Kumongameli; ekaDavide. Umhobe. Yehova, undigocagocile, wandazi.\n139:2 Wena uyakwazi ukuhlala kwam nokusuka kwam; Uyaziqonda izicamango zam nakude.\n139:3 Ukuhamba kwam nokulala kwam, uyakwela; Uqhelene neendlela zam zonke.\n139:4 Ngokuba akukho lizwi elulwimini lwam Ongalaziyo ke, Yehova, kanye.\n139:5 Ngasemva nangaphambili undingqingile, Wasibeka phezu kwam isandla sakho.\n139:6 Kubalulekile kum oko kwazi, Kuphezulu, kundinqabele.\n139:7 Ndingahambela phi na ukumka emoyeni wakho? Ndingabalekela phi na ukumka ebusweni bakho?\n139:8 Ukuba ndithe ndenyuka ndaya emazulwini, ulapho wena; Ukuba ndithe ndazandlalela kwelabafileyo, nanko ukho.\n139:9 Ukuba ndithe ndaphakamisa amaphiko esifingo, Ndaya ndahlala ekupheleni kolwandle,\n139:10 Besingandikhaphayo kwanalapho isandla sakho, Sindibambe isandla sakho sokunene.\n139:11 Ukuba ndithe, Mabundisongele ubumnyama bona bodwa, Nokukhanya kube bubusuku ngeenxa zonke kum:\n139:12 Kwanobumnyama obo abungebi bubumnyama kuwe; Ubusuku bungaba mhlophe njengemini, Ubumnyama bungaba njengokukhanya\n139:13 Ngokuba wena wazibumba izintso zam, Wandibiyela esizalweni sikama.\n139:14 Ndiyabulela kuwe ngenxa enokuba ndenziwe ngokoyikekayo, ngokubalulekileyo; Zibalulekile izenzo zakho, Umphefumlo wam uyazi kakuhle.\n139:15 Ayengagushekile kuwe amathambo am, Mna ndenzelwayo entsithelweni, Ndalukwa ndayimfakamfele ezinzulwini zomhlaba.\n139:16 Amehlo akho andibona ndiseyimbumba, Zazibhalwe encwadini yakho iimini zonke ziphela; Ziyiliwe ngenxa engaphambili, Kungekabikho ke nanye kuzo.\n139:17 Kum ke zinjani na ukunqaba izicamango zakho, Thixo! Asingangani isimbuku sazo!\n139:18 Zingathi, ndizibalile, zibe ninzi ngaphezu kwentlabathi; Ndakuvuka ndoba ndisenawe.\n139:19 Ngamana wambulala ongendawo, Thixo! Nina madoda amagazi, sukani kum.\n139:20 Abo bakukhankanyela amayelenqe, Balibizela inkohlakalo igama lakho abazondi bakho.\n139:21 Andinakubathiya na abakuthiyayo, Yehova, Ndikruquke ngabasukela phezulu kuwe?\n139:22 Ndibathiya ngentiyo ephelelisileyo, Kum mna baziintshaba.\n139:23 Ndigocagoce, Thixo, uyazi intliziyo yam; Ndicikide, uzazi iingcinga-ngcinga zam;\n139:24 Ubone ukuba kukho ndlela yobubi na kum, Undikhaphele kwindlela engunaphakade.\n140:1 Kumongameli. Umhobe kaDavide. Ndihlangule, Yehova, esintwini esinobubi, Ndilondoloze emntwini ogonyamelayo,\n140:2 Abacinga okubi entliziyweni. Imihla yonke baxhaya imfazwe.\n140:3 Balola ulwimi lwabo njengenyoka; Ubuhlungu berhamba busemlonyeni wabo (Phakamisani.)\n140:4 Ndigcine, Yehova, ezandleni zongendawo, Ndilondoloze emntwini ogonyamelayo, Abacinga ukuzikhubekisa iinyawo zam.\n140:5 Abanekratshi bandiqhushekele isibatha nezintya, Baneke umnatha ecaleni kwendlela, Bandithiyele ngemigibe. (Phakamisani.)\n140:6 Ndithi kuYehova, UnguThixo wam; Beka indlebe, Yehova, elizwini lesikhungo sam.\n140:7 Yehova, Nkosi yam, nqaba endisindisayo, Uyigqubuthele intloko yam ngemini yeduli.\n140:8 Musa ukumnika, Yehova, ongendawo iminqweno yakhe; Musa ukuwuphumelelisa umnkqangiyelo wakhe, Hleze aziphakamise. (Phakamisani.)\n140:9 Yona intloko yabandingqingayo, Ububi bomlomo wabo mabubagubungele.\n140:10 Mabathotyelwe amalahle avuthayo; Makabawise emlilweni, emimbithini, bangabi saphuma.\n140:11 Indoda enolwimi mayingazinzi ehlabathini; Indoda enokugonyamela, ububi mabuyizingele ngembembetshane.\n140:12 Ndiyazi ukuba uYehova uya kulifeza Ityala losizana, ibango lamahlwempu.\n140:13 Inene, amalungisa aya kubulela kwigama lakho; Baya kuhlala ebusweni bakho abathe tye.\n141:1 Umhobe kaDavide. Yehova, ndiyakunqula, khawuleza uze kum; Libekele indlebe izwi lam ekudandulukeni kwam kuwe.\n141:2 Umthandazo wam mawuhlale uhleli phambi kwakho usisiqhumiso, Nokuphakamisa kwam izandla kube ngumnikelo wangokuhlwa.\n141:3 Umlomo wam wumisele umlindi, Yehova; Misa umgcini emnyango womlomo wam.\n141:4 Intliziyo yam musa ukuyithobela entweni embi, Ukuba isebenze intlondi yokungendawo Namadoda asebenza ubutshinga; Mandingazidli izimnandi zawo.\n141:5 Malindibethe ilungisa linenceba, lindohlwaye; Ioli enjalo yentloko ayingeyali intloko yam: Ngokuba usekho nomthandazo wam ebubini bawo.\n141:6 Bakhahlelwa emacaleni engxondorha abagwebi bawo, Beve amazwi am ukuba amnandi.\n141:7 Njengolimayo enqika umhlaba, Anjalo ukuthi saa amathambo ethu emlonyeni wengcwaba.\n141:8 Ngokuba akuwe, Yehova, Nkosi yam, amehlo am; Ndizimela ngawe; musa ukuwuphalaza umphefumlo wam.\n141:9 Ndigcine esangweni lomgibe wabandithiyelayo, Nasezirhintyelweni zabasebenza ubutshinga.\n141:10 Mabeyele ezintanjeni zabo abangendawo, Ndide ndidlule mna okukanye.\n142:1 Eyokuqiqa kaDavide; oko ebesemqolombeni. Umthandazo. Ndikhala kuYehova ngezwi lam, Ndikhunga uYehova ngezwi lam,\n142:2 Ndiphalaza inkalazo yam phambi kwakhe, Ndixela imbandezelo yam phambi kwakhe.\n142:3 Ekutyhafeni komoya phakathi kwam, Uyayazi wena ingqushu yam. Emendweni endihamba ngawo Bandiqhushekela isibatha.\n142:4 Bheka ngasekunene ubone, Akukho undibukayo; Andinandawo ndingasabela kuyo, Akukho uwukhathaleleyo umphefumlo wam.\n142:5 Ndikhala kuwe, Yehova, Ndithi, Nguwe ihlathi lam, Isabelo sam ezweni labahleliyo.\n142:6 Kubazele indlebe ukuhlahlamba kwam, Ngokuba ndiswele kakhulu: Ndihlangule kwabandisukelayo, Ngokuba bomelele kunam.\n142:7 Wukhuphe entolongweni umphefumlo wam, Ndibulele kwigama lakho. Amalungisa aya kuzithi jize ngesithsaba ngenxa yam, Ngokuba undiphethe kakuhle.\n143:1 Umhobe kaDavide. Yehova, yiva umthandazo wam, kubekele indlebe ukutarhuzisa kwam; Ndiphendule ngokunyaniseka kwakho, ngobulungisa bakho.\n143:2 Musa ukumsa ematyaleni umkhonzi wakho: Ngokuba phambi kwakho akukho namnye uhleliyo olilungisa.\n143:3 Ngokuba utshaba luwusukele umphefumlo wam, Lubutyumzele emhlabeni ubomi bam; Lundihlalise ezindaweni ezimnyama, njengabafe ngonaphakade.\n143:4 Utyhafile phakathi kwam umoya wam; Imangalisiwe phakathi kwam intliziyo yam.\n143:5 Ndikhumbula imihla yamandulo; Ndicamngca ngemisebenzi yakho yonke, Ndicamngca ngesenzo sezandla zakho.\n143:6 Ndizolulela kuwe izandla zam, Umphefumlo wam ukungxamele njengelizwe elibharhileyo. (Phakamisani.)\n143:7 Khawuleza undiphendule, Yehova; uyaphela umoya wam. Musa ukubusithelisa kum ubuso bakho, Ndifane nabahla baye emhadini.\n143:8 Ndivise kwakusasa inceba yakho, Ngokuba ndikholose ngawe. Ndazise indlela endiya kuhamba ngayo: Ngokuba ndiwuphakamisela kuwe umphefumlo wam.\n143:9 Ndihlangule ezintshabeni zam, Yehova. Ndizimela ngawe.\n143:10 Ndifundise ukwenza ikholo lakho, ngokuba unguThixo wam. UMoya wakho olungileyo makandikhaphele ezweni elisithabazi.\n143:11 Ngenxa yegama lakho, Yehova, ndiphilise; Wukhuphe embandezelweni umphefumlo wam ngobulungisa bakho.\n143:12 Ngenceba yakho zibhangise iintshaba zam, Ubatshabalalise bonke abawubandezelayo umphefumlo wam, Ngokuba ndingumkhonzi wakho.\n144:1 EkaDavide. Makabongwe uYehova, uliwa lam, Ulofundisa izandla zam ukulwa, Iminwe yam imfazwe.\n144:2 Unceba yam, umboniselo yam, Ungxonde yam, umsindisi wam, mna lo; Ungweletshetshe yam, undizimela ngaye; Ulonyathelela abantu bam phantsi kwam.\n144:3 Yehova, uyintoni na umntu, le nto umaziyo? Unyana womfo, le nto umnyamekelayo?\n144:4 Umntu lo ufana nomphunga, Imihla yakhe injengethunzi elidlulayo.\n144:5 Yehova, thoba amazulu akho, uhle; Phatha ezintabeni, ziqhume.\n144:6 Banekisa imibane, uziphangalalise; Thuma iintolo zakho, uziduba-dube.\n144:7 Thuma izandla zakho, zivele phezulu; Ndirhole, ndihlangule emanzini amakhulu. Esandleni soonyana bolunye uhlanga;\n144:8 Abamlomo uthetha inkohlakalo, Abasandla sokunene sisesokunene sobuxoki.\n144:9 Thixo, ndokuvumela ingoma entsha, Ndikubethele umrhubhe ontambo zilishumi;\n144:10 Ulonika ookumkani usindiso, Ulohlangula uDavide umkhonzi wakhe ekreleni elinobubi.\n144:11 Ndirhole, ndihlangule esandleni soonyana bolunye uhlanga, Abamlomo uthetha inkohlakalo, Abasandla sokunene sisesokunene sobuxoki;\n144:12 Baze oonyana bethu babe njengezityalo ezikhulileyo ebutsheni babo; Iintombi zethu zibe njengeembombo ezivathisiweyo ngeemfakamfele ngokokwakhiwa kwebhotwe;\n144:13 Oovimba bethu bazale, bavelise iintlobo ngeentlobo; Iigusha zethu zizale amawaka, zande ngezigidi emaphandleni ethu;\n144:14 Iinkomo zethu zizale, Kungabikho kungenelwa, kungabikho kuthinjwa, Kungabikho kuhlahlamba ezitratweni zethu.\n144:15 Hayi, uyolo lwabantu ekunjalo kubo! Hayi, uyolo lwabantu abaThixo unguYehova!\n145:1 Eyokudumisa kaDavide. Ndiya kukuphakamisa, Thixo wam, wena Kumkani, Ndilibonge igama lakho ngonaphakade kanaphakade.\n145:2 Imihla yonke ndiya kukubonga, Ndilidumise igama lakho ngonaphakade kanaphakade.\n145:3 Mkhulu uYehova, ngowokudunyiswa kakhulu; Ubukhulu bakhe abunakugocwagocwa.\n145:4 Izizukulwana ngezizukulwana, kunconywa izenzo zakho, Kuxelwe ubugorha bakho.\n145:5 Bunobungangamela ubuqaqawuli bendili yakho; Ngeendawo zakho ezibalulekileyo ndiya kucamngca.\n145:6 Bothetha ngamandla ezenzo zakho ezoyikekayo, Ndibalise ngobukhulu bakho.\n145:7 Bompompoza isikhumbuzo sokulunga kwakho okukhulu, Bamemelele ngobulungisa bakho.\n145:8 Unobabalo nemfesane uYehova, Uzeka kade umsindo, mkhulu ngenceba.\n145:9 Ulungile uYehova kubo bonke, Imfesane yakhe ikuzo zonke izenzo zakhe.\n145:10 Ziyabulela kuwe, Yehova, zonke izenzo zakho, Bakubonge abakho benceba;\n145:11 Uzuko lobukumkani bakho balutsho, Bathethe ngobugorha bakho.\n145:12 Ukuba babazise oonyana babantu ubugorha bakhe, Ubuqaqawuli obuhle bobukumkani bakhe.\n145:13 Ubukumkani bakho bubukumkani bamaphakade onke, Nolawulo lwakho lukwizizukulwana ngezizukulwana.\n145:14 UYehova ungumxhasi wabo bonke abawayo, Ngumphakamisi wabo bonke abagobileyo.\n145:15 Amehlo eento zonke akhangele kuwe, Wena ke uzinika ukudla kwazo ngexesha elililo;\n145:16 Uyasivula isandla sakho, Uzihluthise iinto zonke eziphilileyo ngeento ezikholekileyo.\n145:17 Ulilungisa uYehova ngeendlela zakhe zonke, Unenceba ngezenzo zakhe zonke.\n145:18 Usondele uYehova kubo bonke abamnqulayo, Kubo bonke abamnqulayo ngenyaniso.\n145:19 Uyayenza into ekholekileyo kwabamoyikayo, Akuve ukuzibika kwabo, abasindise.\n145:20 UYehova ungumgcini wabo bonke abamthandayo, Abatshabalalise bonke abangendawo.\n145:21 Umlomo wam mawuthethe indumiso kaYehova, Inyama yonke ilibonge igama lakhe elingcwele ngonaphakade kanaphakade.\n146:1 Haleluya! Mdumise uYehova, mphefumlo wam.\n146:2 Ndiya kumdumisa uYehova lo gama ndidla ubomi; Ndiya kumbethela uhadi uThixo wam ekubeni ndingosekhoyo.\n146:3 Musani ukukholosa ngamanene, Ngonyana womntu, yena ungenalo usindiso.\n146:4 Uyaphuma umoya wakhe, abuyele yena emhlabeni wakhe; Ngaloo mini ayatshitsha amabhongo akhe.\n146:5 Hayi, uyolo lwalowo uluncedo lunguThixo kaYakobi, Lwalowo ulinde kuYehova uThixo wakhe:\n146:6 KuMenzi wezulu nomhlaba, Nolwandle neento zonke ezikulo; Kulogcina inyaniso ngonaphakade;\n146:7 Kogweba ityala labacudiswayo; Kopha abalambileyo ukudla; KuYehova okhulula ababanjwa;\n146:8 KuYehova ovula amehlo eemfama; KuYehova ophakamisa abagobileyo; KuYehova othanda amalungisa;\n146:9 KuYehova ogcina abaphambukeli; Kulophakamisa inkedama nomhlolokazi, Ayiphethule indlela yabangendawo.\n146:10 UYehova ungukumkani ngonaphakade, UThixo wakho, Ziyon, kwizizukulwana ngezizukulwana. Haleluya!\n147:1 Haleluya! Ngokuba kulungile ukuvuma ngoThixo wethu; Ngokuba kumnandi, ifanelekile indumiso.\n147:2 Umakhi weYerusalem nguYehova; Abagxothwa bakwaSirayeli ubabuthela khona.\n147:3 Ulophilisa abaphuke intliziyo, Abophe amanxeba abo;\n147:4 Ulobala inani leenkwenkwezi, Ezibiza zonke ngamagama.\n147:5 Inkulu iNkosi yethu, inamandla amakhulu; Ingqondo yayo ayiphele ndawo.\n147:6 Ulophakamisa abalulamileyo nguYehova, Uthobela abangendawo emhlabeni.\n147:7 Hlabelani kuYehova eyokubulela, Mbetheleni uhadi uThixo wethu.\n147:8 Ulosibekelisa izulu ngamafu, Ulolungisela umhlaba imvula; Ulontshulisa utyani ezintabeni;\n147:9 Ulonika inkomo ukudla, Namathole ehlungulu alilayo.\n147:10 Akabunanze nganto ubugorha behashe, Akakholiswa zizitho zendoda;\n147:11 UYehova ukholiswa ngabamoyikayo, Abalinde inceba yakhe.\n147:12 Mncome uYehova, Yerusalem. Mdumise uThixo wakho, Ziyon:\n147:13 Ngokuba eyomelezile imivalo yamasango akho, Ebasikelele abantwana bakho phakathi kwakho.\n147:14 Ngulomisa uxolo emideni yakho, Wakuhluthisa ngengqolowa etyebileyo.\n147:15 Ulothumela intetho yakhe ehlabathini, Ilizwi lakhe ligidima ngokukhawuleza;\n147:16 Ulonika ikhephu njengoboya bezimvu, Ugcwayela iqabaka njengothuthu,\n147:17 Ephosa umkhenkce wakhe njengamaqhekeza; Ngubani na onokuma phambi kwengqele yakhe?\n147:18 Uthumela ilizwi lakhe, ezo nto azinyibilikise; Uvuthuzisa umoya wakhe, aqukuqele amanzi.\n147:19 Uloxelela uYakobi ilizwi lakhe, USirayeli imimiselo yakhe namasiko akhe.\n147:20 Akenjanga ngalo kolunye uhlanga, Namasiko aluwazi. Haleluya!\n148:1 Haleluya! Dumisani uYehova emazulwini; Mdumiseni ezindaweni eziphezulu.\n148:2 Mdumiseni, nonke zithunywa zakhe; Mdumiseni, nonke mikhosi yakhe;\n148:3 Mdumiseni, wena langa, nawe nyanga; Mdumiseni, nonke zinkwenkwezi zinokukhanya;\n148:4 Mdumiseni, mazulu awo amazulu, Nani, manzi angaphezu kwezulu.\n148:5 Mazilidumise ezo nto igama likaYehova; Ngokuba wawisa umthetho, zadalwa.\n148:6 Wazimisa ngonaphakade kanaphakade, Wazimisela ummiselo ezingayi kuwugqitha.\n148:7 Dumisani uYehova ehlabathini, Nina bominenga, nani nonke, manzi enzonzobila:\n148:8 Wena mlilo, nawe sichotho; wena khephu, nawe msi; Moya uvuthuzayo, ulenzayo ilizwi lakhe;\n148:9 Nina zintaba, nani zinduli nonke, Nina mithi eneziqhamo, nani misedare nonke;\n148:10 Nina marhamncwa, nani zinkomo nonke, Nina zinambuzane, nani zintaka zinamaphiko;\n148:11 Ookumkani behlabathi, nezizwe zonke, Abathetheli nabagwebi behlabathi lonke;\n148:12 Umlisela kwanomthinjana, Amadoda amakhulu kunye nabafana:\n148:13 Mabalidumise igama likaYehova, Ngokuba liyingxonde igama lakhe yena yedwa; Indili yakhe ingaphezu komhlaba nezulu.\n148:14 Wabaphakamisela abantu bakhe uphondo, Lwayindumiso kwabakhe benceba bonke, Koonyana bakaSirayeli, abantu abasondeleyo kuye. Haleluya!\n149:1 Haleluya! Mvumeleni uYehova ingoma entsha, Indumiso yakhe ebandleni labenceba.\n149:2 USirayeli makavuye ngoMenzi wakhe; Usapho lwaseZiyon malugcobe ngoKumkani walo.\n149:3 Mabalidumise igama lakhe beqamba, Bembethela ingqongqo nohadi.\n149:4 Ngokuba uYehova uyakholiswa ngabantu bakhe, Uyabahombisa abalulamileyo ngoloyiso.\n149:5 Mabadlamke benozuko abenceba, Mabamemelele besezililini zabo.\n149:6 Yimibongo kaThixo emqaleni wabo, Likrele elintlangothi mbini esandleni sabo;\n149:7 Ukuze benze impindezelo ezintlangeni, Izohlwayo ezizweni;\n149:8 Bakhonkxe ookumkani bazo ngemixokelelwane, Nabazukileyo kuzo ngamakhamandela esinyithi;\n149:9 Benze kubo isiko elibhaliweyo. Luzuko olo lwabakhe benceba bonke. Haleluya!\n150:1 Haleluya! Dumisani uThixo engcweleni yakhe, Mdumiseni esibhakabhakeni samandla akhe.\n150:2 Mdumiseni ngenxa yobugorha bakhe, Mdumiseni ngokobuninzi bobukhulu bakhe.\n150:3 Mdumiseni ngokuvuthela isigodlo, Mdumiseni ngomrhubhe nohadi.\n150:4 Mdumiseni ngengqongqo nengqungqo, Mdumiseni ngeento ezineentambo nogwali.\n150:5 Mdumiseni ngamacangci akhenkcezayo, Mdumiseni ngamacangci adumayo.\n150:6 Yonke into ephefumlayo mayimdumise uYehova. Haleluya!","title":"Xhosa Bible: Psalms","type":"page"}