{"collection":"Classics","html_url":"https://unchartedknowledge.5gfusion.net/browse/cla/ovid/lboo/lbool13.htm","path":"cla/ovid/lboo/lbool13.htm","source_url":"https://sacred-texts.com/cla/ovid/lboo/lbool13.htm","text":"Adde manus in vincla meas--meruere catenas--\n\u00a0\u00a0\u00a0\u00a0dum furor omnis abit, siquis amicus ades! \nnam furor in dominam temeraria bracchia movit;\n\u00a0\u00a0\u00a0\u00a0flet mea vaesana laesa puella manu.\n5 tunc ego vel caros potui violare parentes\n\u00a0\u00a0\u00a0\u00a0saeva vel in sanctos verbera ferre deos!\nQuid? non et clipei dominus septemplicis Aiax\n\u00a0\u00a0\u00a0\u00a0stravit deprensos lata per arva greges,\net, vindex in matre patris, malus ultor, Orestes\n10 \u00a0\u00a0\u00a0\u00a0ausus in arcanas poscere tela deas?\nergo ego digestos potui laniare capillos?\n\u00a0\u00a0\u00a0\u00a0nec dominam motae dedecuere comae.\nsic formosa fuit. talem Schoeneida dicam\n\u00a0\u00a0\u00a0\u00a0Maenalias arcu sollicitasse feras;\n15 talis periuri promissaque velaque Thesei\n\u00a0\u00a0\u00a0\u00a0flevit praecipites Cressa tulisse Notos;\nsic, nisi vittatis quod erat Cassandra capillis,\n\u00a0\u00a0\u00a0\u00a0procubuit templo, casta Minerva, tuo.\nQuis mihi non 'demens!' quis non mihi 'barbare!' dixit?\n20 \u00a0\u00a0\u00a0\u00a0ipsa nihil; pavido est lingua retenta metu.\nsed taciti fecere tamen convicia vultus;\n\u00a0\u00a0\u00a0\u00a0egit me lacrimis ore silente reum.\nante meos umeris vellem cecidisse lacertos;\n\u00a0\u00a0\u00a0\u00a0utiliter potui parte carere mei.\n25 in mea vaesanas habui dispendia vires\n\u00a0\u00a0\u00a0\u00a0et valui poenam fortis in ipse meam.\nquid mihi vobiscum, caedis scelerumque ministrae?\n\u00a0\u00a0\u00a0\u00a0debita sacrilegae vincla subite manus!\nan, si pulsassem minimum de plebe Quiritem,\n30 \u00a0\u00a0\u00a0\u00a0plecterer--in dominam ius mihi maius erit? \npessima Tydides scelerum monimenta reliquit.\n\u00a0\u00a0\u00a0\u00a0ille deam primus perculit--alter ego!\net minus ille nocens. mihi, quam profitebar amare\n\u00a0\u00a0\u00a0\u00a0laesa est; Tydides saevus in hoste fuit.\n35 I nunc, magnificos victor molire triumphos,\n\u00a0\u00a0\u00a0\u00a0cinge comam lauro votaque redde Iovi,\nquaeque tuos currus comitantum turba sequetur,\n\u00a0\u00a0\u00a0\u00a0clamet 'io! forti victa puella viro est!'\nante eat effuso tristis captiva capillo,\n40 \u00a0\u00a0\u00a0\u00a0si sinerent laesae, candida tota, genae.\naptius impressis fuerat livere labellis\n\u00a0\u00a0\u00a0\u00a0et collum blandi dentis habere notam.\ndenique, si tumidi ritu torrentis agebar,\n\u00a0\u00a0\u00a0\u00a0caecaque me praedam fecerat ira suam,\n45 nonne satis fuerat timidae inclamasse puellae,\n\u00a0\u00a0\u00a0\u00a0nec nimium rigidas intonuisse minas,\naut tunicam a summa diducere turpiter ora\n\u00a0\u00a0\u00a0\u00a0ad mediam?--mediae zona tulisset opem.\nAt nunc sustinui raptis a fronte capillis\n50 \u00a0\u00a0\u00a0\u00a0ferreus ingenuas ungue notare genas.\nadstitit illa amens albo et sine sanguine vultu,\n\u00a0\u00a0\u00a0\u00a0caeduntur Pariis qualia saxa iugis.\nexanimis artus et membra trementia vidi--\n\u00a0\u00a0\u00a0\u00a0ut cum populeas ventilat aura comas,\n55 ut leni Zephyro gracilis vibratur harundo,\n\u00a0\u00a0\u00a0\u00a0summave cum tepido stringitur unda Noto;\nsuspensaeque diu lacrimae fluxere per ora,\n\u00a0\u00a0\u00a0\u00a0qualiter abiecta de nive manat aqua. \ntunc ego me primum coepi sentire nocentem--\n60 \u00a0\u00a0\u00a0\u00a0sanguis erant lacrimae, quas dabat illa, meus.\nter tamen ante pedes volui procumbere supplex;\n\u00a0\u00a0\u00a0\u00a0ter formidatas reppulit illa manus.\nAt tu ne dubita--minuet vindicta dolorem--\n\u00a0\u00a0\u00a0\u00a0protinus in vultus unguibus ire meos.\n65 nec nostris oculis nec nostris parce capillis:\n\u00a0\u00a0\u00a0\u00a0quamlibet infirmas adiuvat ira manus;\nneve mei sceleris tam tristia signa supersint,\n\u00a0\u00a0\u00a0\u00a0pone recompositas in statione comas!","title":"The Love Books of Ovid: ELEGY VII: He Curses Himself For Having Maltreated His Mistress.","type":"page"}