{"collection":"Classics","html_url":"https://unchartedknowledge.5gfusion.net/browse/cla/ovid/lboo/lbool58.htm","path":"cla/ovid/lboo/lbool58.htm","source_url":"https://sacred-texts.com/cla/ovid/lboo/lbool58.htm","text":"Siquis in hoc artem populo non novit amandi,\n\u00a0\u00a0\u00a0\u00a0Hoc legat et lecto carmine doctus amet.\nArte citae veloque rates remoque moventur,\n\u00a0\u00a0\u00a0\u00a0Arte leves currus: arte regendus amor.\nCurribus Automedon lentisque erat aptus habenis,\n\u00a0\u00a0\u00a0\u00a0Tiphys in Haemonia puppe magister erat:\nMe Venus artificem tenero praefecit Amori;\n\u00a0\u00a0\u00a0\u00a0Tiphys et Automedon dicar Amoris ego.\nIlle quidem ferus est et qui mihi saepe repugnet:\n\u00a0\u00a0\u00a0\u00a0Sed puer est, aetas mollis et apta regi.\nPhillyrides puerum cithara perfecit Achillem,\n\u00a0\u00a0\u00a0\u00a0Atque animos placida contudit arte feros.\nQui totiens socios, totiens exterruit hostes,\n\u00a0\u00a0\u00a0\u00a0Creditur annosum pertimuisse senem.\nQuas Hector sensurus erat, poscente magistro\n\u00a0\u00a0\u00a0\u00a0Verberibus iussas praebuit ille manus.\nAeacidae Chiron, ego sum praeceptor Amoris:\n\u00a0\u00a0\u00a0\u00a0Saevus uterque puer, natus uterque dea.\nSed tamen et tauri cervix oneratur aratro,\n\u00a0\u00a0\u00a0\u00a0Frenaque magnanimi dente teruntur equi;\nEt mihi cedet Amor, quamvis mea vulneret arcu\n\u00a0\u00a0\u00a0\u00a0Pectora, iactatas excutiatque faces.\nQuo me fixit Amor, quo me violentius ussit,\n\u00a0\u00a0\u00a0\u00a0Hoc melior facti vulneris ultor ero: \nNon ego, Phoebe, datas a te mihi mentiar artes,\n\u00a0\u00a0\u00a0\u00a0Nec nos aeriae voce monemur avis,\nNec mihi sunt visae Clio Cliusque sorores\n\u00a0\u00a0\u00a0\u00a0Servanti pecudes vallibus, Ascra, tuis:\nUsus opus movet hoc: vati parete perito;\n\u00a0\u00a0\u00a0\u00a0Vera canam: coeptis, mater Amoris, ades!\nEste procul, vittae tenues, insigne pudoris,\n\u00a0\u00a0\u00a0\u00a0Quaeque tegis medios, instita longa, pedes.\nNos venerem tutam concessaque furta canemus,\n\u00a0\u00a0\u00a0\u00a0Inque meo nullum carmine crimen erit.\nPrincipio, quod amare velis, reperire labora,\n\u00a0\u00a0\u00a0\u00a0Qui nova nunc primum miles in arma venis.\nProximus huic labor est placitam exorare puellam:\n\u00a0\u00a0\u00a0\u00a0Tertius, ut longo tempore duret amor.\nHic modus, haec nostro signabitur area curru:\n\u00a0\u00a0\u00a0\u00a0Haec erit admissa meta terenda rota.\nDum licet, et loris passim potes ire solutis,\n\u00a0\u00a0\u00a0\u00a0Elige cui dicas 'tu mihi sola places.'\nHaec tibi non tenues veniet delapsa per auras:\n\u00a0\u00a0\u00a0\u00a0Quaerenda est oculis apta puella tuis.\nScit bene venator, cervis ubi retia tendat,\n\u00a0\u00a0\u00a0\u00a0Scit bene, qua frendens valle moretur aper;\nAucupibus noti frutices; qui sustinet hamos,\n\u00a0\u00a0\u00a0\u00a0Novit quae multo pisce natentur aquae:\nTu quoque, materiam longo qui quaeris amori,\n\u00a0\u00a0\u00a0\u00a0Ante frequens quo sit disce puella loco.\nNon ego quaerentem vento dare vela iubebo,\n\u00a0\u00a0\u00a0\u00a0Nec tibi, ut invenias, longa terenda via est. \nAndromedan Perseus nigris portarit ab Indis,\n\u00a0\u00a0\u00a0\u00a0 Raptaque sit Phrygio Graia puella viro,\nTot tibi tamque dabit formosas Roma puellas,\n\u00a0\u00a0\u00a0\u00a0'Haec habet' ut dicas 'quicquid in orbe fuit.'\nGargara quot segetes, quot habet Methymna racemos,\n\u00a0\u00a0\u00a0\u00a0Aequore quot pisces, fronde teguntur aves,\nQuot caelum stellas, tot habet tua Roma puellas:\n\u00a0\u00a0\u00a0\u00a0Mater in Aeneae constitit urbe sui.\nSeu caperis primis et adhuc crescentibus annis,\n\u00a0\u00a0\u00a0\u00a0Ante oculos veniet vera puella tuos:\nSive cupis iuvenem, iuvenes tibi mille placebunt.\n\u00a0\u00a0\u00a0\u00a0Cogeris voti nescius esse tui:\nSeu te forte iuvat sera et sapientior aetas,\n\u00a0\u00a0\u00a0\u00a0Hoc quoque, crede mihi, plenius agmen erit.\nTu modo Pompeia lentus spatiare sub umbra,\n\u00a0\u00a0\u00a0\u00a0Cum sol Herculei terga leonis adit:\nAut ubi muneribus nati sua munera mater\n\u00a0\u00a0\u00a0\u00a0Addidit, externo marmore dives opus.\nNec tibi vitetur quae, priscis sparsa tabellis,\n\u00a0\u00a0\u00a0\u00a0Porticus auctoris Livia nomen habet:\nQuaque parare necem miseris patruelibus ausae\n\u00a0\u00a0\u00a0\u00a0Belides et stricto stat ferus ense pater.\nNec te praetereat Veneri ploratus Adonis,\n\u00a0\u00a0\u00a0\u00a0Cultaque Iudaeo septima sacra Syro. \nNec fuge linigerae Memphitica templa iuvencae:\n\u00a0\u00a0\u00a0\u00a0Multas illa facit, quod fuit ipsa Iovi.\nEt fora conveniunt (quis credere possit?) amori:\n\u00a0\u00a0\u00a0\u00a0Flammaque in arguto saepe reperta foro:\nSubdita qua Veneris facto de marmore templo\n\u00a0\u00a0\u00a0\u00a0Appias expressis aera pulsat aquis,\nIllo saepe loco capitur consultus Amori,\n\u00a0\u00a0\u00a0\u00a0Quique aliis cavit, non cavet ipse sibi:\nIllo saepe loco desunt sua verba diserto,\n\u00a0\u00a0\u00a0\u00a0Resque novae veniunt, causaque agenda sua est.\nHunc Venus e templis, quae sunt confinia, ridet:\n\u00a0\u00a0\u00a0\u00a0Qui modo patronus, nunc cupit esse cliens.\nSed tu praecipue curvis venare theatris:\n\u00a0\u00a0\u00a0\u00a0Haec loca sunt voto fertiliora tuo.\nIllic invenies quod ames, quod ludere possis,\n\u00a0\u00a0\u00a0\u00a0Quodque semel tangas, quodque tenere velis.\nUt redit itque frequens longum formica per agmen,\n\u00a0\u00a0\u00a0\u00a0Granifero solitum cum vehit ore cibum,\nAut ut apes saltusque suos et olentia nactae\n\u00a0\u00a0\u00a0\u00a0Pascua per flores et thyma summa volant,\nSic ruit ad celebres cultissima femina ludos:\n\u00a0\u00a0\u00a0\u00a0Copia iudicium saepe morata meum est.\nSpectatum veniunt, veniunt spectentur ut ipsae:\n\u00a0\u00a0\u00a0\u00a0Ille locus casti damna pudoris habet.\nPrimus sollicitos fecisti, Romule, ludos,\n\u00a0\u00a0\u00a0\u00a0Cum iuvit viduos rapta Sabina viros. \nTunc neque marmoreo pendebant vela theatro,\n\u00a0\u00a0\u00a0\u00a0Nec fuerant liquido pulpita rubra croco;\nIllic quas tulerant nemorosa Palatia, frondes\n\u00a0\u00a0\u00a0\u00a0Simpliciter positae, scena sine arte fuit;\nIn gradibus sedit populus de caespite factis,\n\u00a0\u00a0\u00a0\u00a0Qualibet hirsutas fronde tegente comas.\nRespiciunt, oculisque notant sibi quisque puellam\n\u00a0\u00a0\u00a0\u00a0Quam velit, et tacito pectore multa movent.\nDumque, rudem praebente modum tibicine Tusco,\n\u00a0\u00a0\u00a0\u00a0Ludius aequatam ter pede pulsat humum,\nIn medio plausu (plausus tunc arte carebant)\n\u00a0\u00a0\u00a0\u00a0Rex populo praedae signa petita dedit.\nProtinus exiliunt, animum clamore fatentes,\n\u00a0\u00a0\u00a0\u00a0Virginibus cupidas iniciuntque manus.\nUt fugiunt aquilas, timidissima turba, columbae,\n\u00a0\u00a0\u00a0\u00a0Ut fugit invisos agna novella lupos:\nSic illae timuere viros sine more ruentes;\n\u00a0\u00a0\u00a0\u00a0Constitit in nulla qui fuit ante color.\nNam timor unus erat, facies non una timoris:\n\u00a0\u00a0\u00a0\u00a0Pars laniat crines, pars sine mente sedet;\nAltera maesta silet, frustra vocat altera matrem:\n\u00a0\u00a0\u00a0\u00a0Haec queritur, stupet haec; haec manet, illa fugit;\nDucuntur raptae, genialis praeda, puellae,\n\u00a0\u00a0\u00a0\u00a0Et potuit multas ipse decere timor.\nSiqua repugnarat nimium comitemque negabat,\n\u00a0\u00a0\u00a0\u00a0Sublatam cupido vir tulit ipse sinu,\nAtque ita 'quid teneros lacrimis corrumpis ocellos?\n\u00a0\u00a0\u00a0\u00a0Quod matri pater est, hoc tibi' dixit 'ero.'\nRomule, militibus scisti dare commoda solus:\n\u00a0\u00a0\u00a0\u00a0Haec mihi si dederis commoda, miles ero.\nScilicet ex illo sollemnia more theatra\n\u00a0\u00a0\u00a0\u00a0Nunc quoque formosis insidiosa manent. \nNec te nobilium fugiat certamen equorum;\n\u00a0\u00a0\u00a0\u00a0Multa capax populi commoda Circus habet.\nNil opus est digitis, per quos arcana loquaris,\n\u00a0\u00a0\u00a0\u00a0Nec tibi per nutus accipienda nota est:\nProximus a domina, nullo prohibente, sedeto,\n\u00a0\u00a0\u00a0\u00a0Iunge tuum lateri qua potes usque latus;\nEt bene, quod cogit, si nolis, linea iungi,\n\u00a0\u00a0\u00a0\u00a0Quod tibi tangenda est lege puella loci.\nHic tibi quaeratur socii sermonis origo,\n\u00a0\u00a0\u00a0\u00a0Et moveant primos publica verba sonos.\nCuius equi veniant, facito, studiose, requiras:\n\u00a0\u00a0\u00a0\u00a0Nec mora, quisquis erit, cui favet illa, fave.\nAt cum pompa frequens caelestibus ibit eburnis,\n\u00a0\u00a0\u00a0\u00a0Tu Veneri dominae plaude favente manu;\nUtque fit, in gremium pulvis si forte puellae\n\u00a0\u00a0\u00a0\u00a0Deciderit, digitis excutiendus erit:\nEtsi nullus erit pulvis, tamen excute nullum:\n\u00a0\u00a0\u00a0\u00a0Quaelibet officio causa sit apta tuo.\nPallia si terra nimium demissa iacebunt,\n\u00a0\u00a0\u00a0\u00a0Collige, et inmunda sedulus effer humo;\nProtinus, officii pretium, patiente puella\n\u00a0\u00a0\u00a0\u00a0Contingent oculis crura videnda tuis.\nRespice praeterea, post vos quicumque sedebit,\n\u00a0\u00a0\u00a0\u00a0Ne premat opposito mollia terga genu.\nParva leves capiunt animos: fuit utile multis\n\u00a0\u00a0\u00a0\u00a0Pulvinum facili composuisse manu.\nProfuit et tenui ventos movisse tabella,\n\u00a0\u00a0\u00a0\u00a0Et cava sub tenerum scamna dedisse pedem.\nHos aditus Circusque novo praebebit amori,\n\u00a0\u00a0\u00a0\u00a0 Sparsaque sollicito tristis harena foro. \nIlla saepe puer Veneris pugnavit harena,\n\u00a0\u00a0\u00a0\u00a0Et qui spectavit vulnera, vulnus habet.\nDum loquitur tangitque manum poscitque libellum\n\u00a0\u00a0\u00a0\u00a0Et quaerit posito pignore, vincat uter,\nSaucius ingemuit telumque volatile sensit,\n\u00a0\u00a0\u00a0\u00a0Et pars spectati muneris ipse fuit.\nQuid, modo cum belli navalis imagine Caesar\n\u00a0\u00a0\u00a0\u00a0Persidas induxit Cecropiasque rates?\nNempe ab utroque mari iuvenes, ab utroque puellae\n\u00a0\u00a0\u00a0\u00a0Venere, atque ingens orbis in Urbe fuit.\nQuis non invenit turba, quod amaret, in illa?\n\u00a0\u00a0\u00a0\u00a0Eheu, quam multos advena torsit amor!\nEcce, parat Caesar domito quod defuit orbi\n\u00a0\u00a0\u00a0\u00a0Addere: nunc, oriens ultime, noster eris.\nParthe, dabis poenas: Crassi gaudete sepulti,\n\u00a0\u00a0\u00a0\u00a0Signaque barbaricas non bene passa manus.\nUltor adest, primisque ducem profitetur in annis,\n\u00a0\u00a0\u00a0\u00a0Bellaque non puero tractat agenda puer.\nParcite natales timidi numerare deorum:\n\u00a0\u00a0\u00a0\u00a0Caesaribus virtus contigit ante diem.\nIngenium caeleste suis velocius annis\n\u00a0\u00a0\u00a0\u00a0Surgit, et ignavae fert male damna morae.\nParvus erat, manibusque duos Tirynthius angues\n\u00a0\u00a0\u00a0\u00a0Pressit, et in cunis iam Iove dignus erat. \nNunc quoque qui puer es, quantus tum, Bacche, fuisti,\n\u00a0\u00a0\u00a0\u00a0Cum timuit thyrsos India victa tuos?\nAuspiciis annisque patris, puer, arma movebis,\n\u00a0\u00a0\u00a0\u00a0Et vinces annis auspiciisque patris:\nTale rudimentum tanto sub nomine debes,\n\u00a0\u00a0\u00a0\u00a0Nunc iuvenum princeps, deinde future senum;\nCum tibi sint fratres, fratres ulciscere laesos:\n\u00a0\u00a0\u00a0\u00a0Cumque pater tibi sit, iura tuere patris.\nInduit arma tibi genitor patriaeque tuusque:\n\u00a0\u00a0\u00a0\u00a0Hostis ab invito regna parente rapit;\nTu pia tela feres, sceleratas ille sagittas:\n\u00a0\u00a0\u00a0\u00a0Stabit pro signis iusque piumque tuis.\nVincuntur causa Parthi: vincantur et armis;\n\u00a0\u00a0\u00a0\u00a0Eoas Latio dux meus addat opes.\nMarsque pater Caesarque pater, date numen eunti:\n\u00a0\u00a0\u00a0\u00a0Nam deus e vobis alter es, alter eris.\nAuguror, en, vinces; votivaque carmina reddam,\n\u00a0\u00a0\u00a0\u00a0Et magno nobis ore sonandus eris.\nConsistes, aciemque meis hortabere verbis;\n\u00a0\u00a0\u00a0\u00a0O desint animis ne mea verba tuis!\nTergaque Parthorum Romanaque pectora dicam,\n\u00a0\u00a0\u00a0\u00a0Telaque, ab averso quae iacit hostis equo.\nQui fugis ut vincas, quid victo, Parthe, relinquis?\n\u00a0\u00a0\u00a0\u00a0Parthe, malum iam nunc Mars tuus omen habet.\nErgo erit illa dies, qua tu, pulcherrime rerum,\n\u00a0\u00a0\u00a0\u00a0Quattuor in niveis aureus ibis equis. \nIbunt ante duces onerati colla catenis,\n\u00a0\u00a0\u00a0\u00a0Ne possint tuti, qua prius, esse fuga.\nSpectabunt laeti iuvenes mixtaeque puellae,\n\u00a0\u00a0\u00a0\u00a0Diffundetque animos omnibus ista dies.\nAtque aliqua ex illis cum regum nomina quaeret,\n\u00a0\u00a0\u00a0\u00a0Quae loca, qui montes, quaeve ferantur aquae,\nOmnia responde, nec tantum siqua rogabit;\n\u00a0\u00a0\u00a0\u00a0Et quae nescieris, ut bene nota refer.\nHic est Euphrates, praecinctus harundine frontem:\n\u00a0\u00a0\u00a0\u00a0Cui coma dependet caerula, Tigris erit.\nHos facito Armenios; haec est Danaeia Persis:\n\u00a0\u00a0\u00a0\u00a0Urbs in Achaemeniis vallibus ista fuit.\nIlle vel ille, duces; et erunt quae nomina dicas,\n\u00a0\u00a0\u00a0\u00a0Si poteris, vere, si minus, apta tamen.\nDant etiam positis aditum convivia mensis:\n\u00a0\u00a0\u00a0\u00a0Est aliquid praeter vina, quod inde petas.\nSaepe illic positi teneris adducta lacertis\n\u00a0\u00a0\u00a0\u00a0Purpureus Bacchi cornua pressit Amor:\nVinaque cum bibulas sparsere Cupidinis alas,\n\u00a0\u00a0\u00a0\u00a0Permanet et capto stat gravis ille loco.\nIlle quidem pennas velociter excutit udas:\n\u00a0\u00a0\u00a0\u00a0Sed tamen et spargi pectus amore nocet.\nVina parant animos faciuntque caloribus aptos:\n\u00a0\u00a0\u00a0\u00a0Cura fugit multo diluiturque mero.\nTunc veniunt risus, tum pauper cornua sumit,\n\u00a0\u00a0\u00a0\u00a0Tum dolor et curae rugaque frontis abit.\nTunc aperit mentes aevo rarissima nostro\n\u00a0\u00a0\u00a0\u00a0Simplicitas, artes excutiente deo.\nIllic saepe animos iuvenum rapuere puellae,\n\u00a0\u00a0\u00a0\u00a0Et Venus in vinis ignis in igne fuit. \nHic tu fallaci nimium ne crede lucernae:\n\u00a0\u00a0\u00a0\u00a0Iudicio formae noxque merumque nocent.\nLuce deas caeloque Paris spectavit aperto,\n\u00a0\u00a0\u00a0\u00a0Cum dixit Veneri 'vincis utramque, Venus.'\nNocte latent mendae, vitioque ignoscitur omni,\n\u00a0\u00a0\u00a0\u00a0Horaque formosam quamlibet illa facit.\nConsule de gemmis, de tincta murice lana,\n\u00a0\u00a0\u00a0\u00a0Consule de facie corporibusque diem.\nQuid tibi femineos coetus venatibus aptos\n\u00a0\u00a0\u00a0\u00a0Enumerem? numero cedet harena meo.\nQuid referam Baias, praetextaque litora velis,\n\u00a0\u00a0\u00a0\u00a0Et quae de calido sulpure fumat aqua?\nHinc aliquis vulnus referens in pectore dixit\n\u00a0\u00a0\u00a0\u00a0'Non haec, ut fama est, unda salubris erat.'\nEcce suburbanae templum nemorale Dianae\n\u00a0\u00a0\u00a0\u00a0Partaque per gladios regna nocente manu:\nIlla, quod est virgo, quod tela Cupidinis odit,\n\u00a0\u00a0\u00a0\u00a0Multa dedit populo vulnera, multa dabit.\nHactenus, unde legas quod ames, ubi retia ponas,\n\u00a0\u00a0\u00a0\u00a0Praecipit imparibus vecta Thalea rotis.\nNunc tibi, quae placuit, quas sit capienda per artes,\n\u00a0\u00a0\u00a0\u00a0Dicere praecipuae molior artis opus.\nQuisquis ubique, viri, dociles advertite mentes,\n\u00a0\u00a0\u00a0\u00a0Pollicitisque favens, vulgus, adeste meis.\nPrima tuae menti veniat fiducia, cunctas\n\u00a0\u00a0\u00a0\u00a0Posse capi; capies, tu modo tende plagas.\nVere prius volucres taceant, aestate cicadae,\n\u00a0\u00a0\u00a0\u00a0Maenalius lepori det sua terga canis, \nFemina quam iuveni blande temptata repugnet:\n\u00a0\u00a0\u00a0\u00a0 Haec quoque, quam poteris credere nolle, volet.\nUtque viro furtiva venus, sic grata puellae:\n\u00a0\u00a0\u00a0\u00a0Vir male dissimulat: tectius illa cupit.\nConveniat maribus, nequam nos ante rogemus,\n\u00a0\u00a0\u00a0\u00a0Femina iam partes victa rogantis agat.\nMollibus in pratis admugit femina tauro:\n\u00a0\u00a0\u00a0\u00a0Femina cornipedi semper adhinnit equo.\nParcior in nobis nec tam furiosa libido:\n\u00a0\u00a0\u00a0\u00a0Legitimum finem flamma virilis habet.\nByblida quid referam, vetito quae fratris amore\n\u00a0\u00a0\u00a0\u00a0Arsit et est laqueo fortiter ulta nefas?\nMyrrha patrem, sed non qua filia debet, amavit,\n\u00a0\u00a0\u00a0\u00a0Et nunc obducto cortice pressa latet:\nIllius lacrimis, quas arbore fundit odora,\n\u00a0\u00a0\u00a0\u00a0Unguimur, et dominae nomina gutta tenet.\nForte sub umbrosis nemorosae vallibus Idae\n\u00a0\u00a0\u00a0\u00a0Candidus, armenti gloria, taurus erat,\nSignatus tenui media inter cornua nigro:\n\u00a0\u00a0\u00a0\u00a0Una fuit labes, cetera lactis erant.\nIllum Cnosiadesque Cydoneaeque iuvencae\n\u00a0\u00a0\u00a0\u00a0Optarunt tergo sustinuisse suo.\nPasiphae fieri gaudebat adultera tauri;\n\u00a0\u00a0\u00a0\u00a0Invida formosas oderat illa boves.\nNota cano: non hoc, centum quae sustinet urbes,\n\u00a0\u00a0\u00a0\u00a0Quamvis sit mendax, Creta negare potest.\nIpsa novas frondes et prata tenerrima tauro\n\u00a0\u00a0\u00a0\u00a0Fertur inadsueta subsecuisse manu.\nIt comes armentis, nec ituram cura moratur\n\u00a0\u00a0\u00a0\u00a0Coniugis, et Minos a bove victus erat. \nQuo tibi, Pasiphae, pretiosas sumere vestes?\n\u00a0\u00a0\u00a0\u00a0Ille tuus nullas sentit adulter opes.\nQuid tibi cum speculo, montana armenta petenti?\n\u00a0\u00a0\u00a0\u00a0Quid totiens positas fingis, inepta, comas?\nCrede tamen speculo, quod te negat esse iuvencam.\n\u00a0\u00a0\u00a0\u00a0Quam cuperes fronti cornua nata tuae!\nSive placet Minos, nullus quaeratur adulter:\n\u00a0\u00a0\u00a0\u00a0Sive virum mavis fallere, falle viro!\nIn nemus et saltus thalamo regina relicto\n\u00a0\u00a0\u00a0\u00a0Fertur, ut Aonio concita Baccha deo.\nA, quotiens vaccam vultu spectavit iniquo,\n\u00a0\u00a0\u00a0\u00a0Et dixit 'domino cur placet ista meo?\nAspice, ut ante ipsum teneris exultet in herbis:\n\u00a0\u00a0\u00a0\u00a0Nec dubito, quin se stulta decere putet.'\nDixit, et ingenti iamdudum de grege duci\n\u00a0\u00a0\u00a0\u00a0Iussit et inmeritam sub iuga curva trahi,\nAut cadere ante aras commentaque sacra coegit,\n\u00a0\u00a0\u00a0\u00a0Et tenuit laeta paelicis exta manu.\nPaelicibus quotiens placavit numina caesis,\n\u00a0\u00a0\u00a0\u00a0Atque ait, exta tenens 'ite, placete meo!'\nEt modo se Europen fieri, modo postulat Io,\n\u00a0\u00a0\u00a0\u00a0Altera quod bos est, altera vecta bove.\nHanc tamen implevit, vacca deceptus acerna,\n\u00a0\u00a0\u00a0\u00a0Dux gregis, et partu proditus auctor erat.\nCressa Thyesteo si se abstinuisset amore\n\u00a0\u00a0\u00a0\u00a0(Et quantum est uno posse carere viro?),\nNon medium rupisset iter, curruque retorto\n\u00a0\u00a0\u00a0\u00a0Auroram versis Phoebus adisset equis.\nFilia purpureos Niso furata capillos\n\u00a0\u00a0\u00a0\u00a0Pube premit rabidos inguinibusque canes. \nQui Martem terra, Neptunum effugit in undis,\n\u00a0\u00a0\u00a0\u00a0Coniugis Atrides victima dira fuit.\nCui non defleta est Ephyraeae flamma Creusae,\n\u00a0\u00a0\u00a0\u00a0Et nece natorum sanguinolenta parens?\nFlevit Amyntorides per inania lumina Phoenix:\n\u00a0\u00a0\u00a0\u00a0Hippolytum pavidi diripuistis equi.\nQuid fodis inmeritis, Phineu, sua lumina natis?\n\u00a0\u00a0\u00a0\u00a0Poena reversura est in caput ista tuum.\nOmnia feminea sunt ista libidine mota;\n\u00a0\u00a0\u00a0\u00a0Acrior est nostra, plusque furoris habet.\nErgo age, ne dubita cunctas sperare puellas;\n\u00a0\u00a0\u00a0\u00a0Vix erit e multis, quae neget, una, tibi.\nQuae dant quaeque negant, gaudent tamen esse rogatae:\n\u00a0\u00a0\u00a0\u00a0Ut iam fallaris, tuta repulsa tua est.\nSed cur fallaris, cum sit nova grata voluptas\n\u00a0\u00a0\u00a0\u00a0Et capiant animos plus aliena suis?\nFertilior seges est alienis semper in agris,\n\u00a0\u00a0\u00a0\u00a0Vicinumque pecus grandius uber habet.\nSed prius ancillam captandae nosse puellae\n\u00a0\u00a0\u00a0\u00a0Cura sit: accessus molliet illa tuos.\nProxima consiliis dominae sit ut illa, videto,\n\u00a0\u00a0\u00a0\u00a0Neve parum tacitis conscia fida iocis.\nHanc tu pollicitis, hanc tu corrumpe rogando:\n\u00a0\u00a0\u00a0\u00a0Quod petis, ex facili, si volet illa, feres.\nIlla leget tempus (medici quoque tempora servant)\n\u00a0\u00a0\u00a0\u00a0Quo facilis dominae mens sit et apta capi.\nMens erit apta capi tum, cum laetissima rerum\n\u00a0\u00a0\u00a0\u00a0Ut seges in pingui luxuriabit humo.\nPectora dum gaudent nec sunt adstricta dolore,\n\u00a0\u00a0\u00a0\u00a0Ipsa patent, blanda tum subit arte Venus. \nTum, cum tristis erat, defensa est Ilios armis:\n\u00a0\u00a0\u00a0\u00a0Militibus gravidum laeta recepit equum.\nTum quoque temptanda est, cum paelice laesa dolebit:\n\u00a0\u00a0\u00a0\u00a0Tum facies opera, ne sit inulta, tua.\nHanc matutinos pectens ancilla capillos\n\u00a0\u00a0\u00a0\u00a0Incitet, et velo remigis addat opem,\nEt secum tenui suspirans murmure dicat\n\u00a0\u00a0\u00a0\u00a0'At, puto, non poteras ipsa referre vicem.'\nTum de te narret, tum persuadentia verba\n\u00a0\u00a0\u00a0\u00a0Addat, et insano iuret amore mori.\nSed propera, ne vela cadant auraeque residant:\n\u00a0\u00a0\u00a0\u00a0Ut fragilis glacies, interit ira mora.\nQuaeris, an hanc ipsam prosit violare ministram?\n\u00a0\u00a0\u00a0\u00a0Talibus admissis alea grandis inest.\nHaec a concubitu fit sedula, tardior illa,\n\u00a0\u00a0\u00a0\u00a0Haec dominae munus te parat, illa sibi.\nCasus in eventu est: licet hic indulgeat ausis,\n\u00a0\u00a0\u00a0\u00a0Consilium tamen est abstinuisse meum.\nNon ego per praeceps et acuta cacumina vadam,\n\u00a0\u00a0\u00a0\u00a0Nec iuvenum quisquam me duce captus erit.\nSi tamen illa tibi, dum dat recipitque tabellas,\n\u00a0\u00a0\u00a0\u00a0 Corpore, non tantum sedulitate placet,\nFac domina potiare prius, comes illa sequatur:\n\u00a0\u00a0\u00a0\u00a0Non tibi ab ancilla est incipienda venus.\nHoc unum moneo, siquid modo creditur arti,\n\u00a0\u00a0\u00a0\u00a0Nec mea dicta rapax per mare ventus agit:\nAut non rem temptes aut perfice; tollitur index,\n\u00a0\u00a0\u00a0\u00a0Cum semel in partem criminis ipsa venit.\nNon avis utiliter viscatis effugit alis;\n\u00a0\u00a0\u00a0\u00a0Non bene de laxis cassibus exit aper. \nSaucius arrepto piscis teneatur ab hamo:\n\u00a0\u00a0\u00a0\u00a0Perprime temptatam, nec nisi victor abi.\nTunc neque te prodet communi noxia culpa,\n\u00a0\u00a0\u00a0\u00a0Factaque erunt dominae dictaque nota tibi.\nSed bene celetur: bene si celabitur index,\n\u00a0\u00a0\u00a0\u00a0Notitiae suberit semper amica tuae.\nTempora qui solis operosa colentibus arva,\n\u00a0\u00a0\u00a0\u00a0Fallitur, et nautis aspicienda putat;\nNec semper credenda ceres fallacibus arvis,\n\u00a0\u00a0\u00a0\u00a0Nec semper viridi concava puppis aquae,\nNec teneras semper tutum captare puellas:\n\u00a0\u00a0\u00a0\u00a0Saepe dato melius tempore fiet idem.\nSive dies suberit natalis, sive Kalendae,\n\u00a0\u00a0\u00a0\u00a0Quas Venerem Marti continuasse iuvat,\nSive erit ornatus non ut fuit ante sigillis,\n\u00a0\u00a0\u00a0\u00a0Sed regum positas Circus habebit opes,\nDiffer opus: tunc tristis hiems, tunc Pliades instant,\n\u00a0\u00a0\u00a0\u00a0Tunc tener aequorea mergitur Haedus aqua;\nTunc bene desinitur: tunc siquis creditur alto,\n\u00a0\u00a0\u00a0\u00a0Vix tenuit lacerae naufraga membra ratis.\nTu licet incipias qua flebilis Allia luce\n\u00a0\u00a0\u00a0\u00a0Vulneribus Latiis sanguinolenta fluit,\nQuaque die redeunt, rebus minus apta gerendis,\n\u00a0\u00a0\u00a0\u00a0Culta Palaestino septima festa Syro.\nMagna superstitio tibi sit natalis amicae:\n\u00a0\u00a0\u00a0\u00a0Quaque aliquid dandum est, illa sit atra dies. \nCum bene vitaris, tamen auferet; invenit artem\n\u00a0\u00a0\u00a0\u00a0Femina, qua cupidi carpat amantis opes.\nInstitor ad dominam veniet discinctus emacem,\n\u00a0\u00a0\u00a0\u00a0Expediet merces teque sedente suas:\nQuas illa, inspicias, sapere ut videare, rogabit:\n\u00a0\u00a0\u00a0\u00a0Oscula deinde dabit; deinde rogabit, emas.\nHoc fore contentam multos iurabit in annos,\n\u00a0\u00a0\u00a0\u00a0Nunc opus esse sibi, nunc bene dicet emi.\nSi non esse domi, quos des, causabere nummos,\n\u00a0\u00a0\u00a0\u00a0Littera posceturne didicisse iuvet.\nQuid, quasi natali cum poscit munera libo,\n\u00a0\u00a0\u00a0\u00a0Et, quotiens opus est, nascitur illa, sibi?\nQuid, cum mendaci damno maestissima plorat,\n\u00a0\u00a0\u00a0\u00a0Elapsusque cava fingitur aure lapis?\nMulta rogant utenda dari, data reddere nolunt:\n\u00a0\u00a0\u00a0\u00a0Perdis, et in damno gratia nulla tuo.\nNon mihi, sacrilegas meretricum ut persequar artes,\n\u00a0\u00a0\u00a0\u00a0Cum totidem linguis sint satis ora decem.\nCera vadum temptet, rasis infusa tabellis:\n\u00a0\u00a0\u00a0\u00a0Cera tuae primum conscia mentis eat.\nBlanditias ferat illa tuas imitataque amantem 430\n\u00a0\u00a0\u00a0\u00a0Verba; nec exiguas, quisquis es, adde preces.\nHectora donavit Priamo prece motus Achilles;\n\u00a0\u00a0\u00a0\u00a0Flectitur iratus voce rogante deus.\nPromittas facito: quid enim promittere laedit?\n\u00a0\u00a0\u00a0\u00a0Pollicitis dives quilibet esse potest.\nSpes tenet in tempus, semel est si credita, longum:\n\u00a0\u00a0\u00a0\u00a0Illa quidem fallax, sed tamen apta dea est.\nSi dederis aliquid, poteris ratione relinqui:\n\u00a0\u00a0\u00a0\u00a0Praeteritum tulerit, perdideritque nihil. \nAt quod non dederis, semper videare daturus:\n\u00a0\u00a0\u00a0\u00a0Sic dominum sterilis saepe fefellit ager:\nSic, ne perdiderit, non cessat perdere lusor,\n\u00a0\u00a0\u00a0\u00a0Et revocat cupidas alea saepe manus.\nHoc opus, hic labor est, primo sine munere iungi;\n\u00a0\u00a0\u00a0\u00a0Ne dederit gratis quae dedit, usque dabit.\nErgo eat et blandis peraretur littera verbis,\n\u00a0\u00a0\u00a0\u00a0Exploretque animos, primaque temptet iter.\nLittera Cydippen pomo perlata fefellit,\n\u00a0\u00a0\u00a0\u00a0Insciaque est verbis capta puella suis.\nDisce bonas artes, moneo, Romana iuventus,\n\u00a0\u00a0\u00a0\u00a0Non tantum trepidos ut tueare reos;\nQuam populus iudexque gravis lectusque senatus,\n\u00a0\u00a0\u00a0\u00a0Tam dabit eloquio victa puella manus.\nSed lateant vires, nec sis in fronte disertus;\n\u00a0\u00a0\u00a0\u00a0Effugiant voces verba molesta tuae.\nQuis, nisi mentis inops, tenerae declamat amicae?\n\u00a0\u00a0\u00a0\u00a0Saepe valens odii littera causa fuit.\nSit tibi credibilis sermo consuetaque verba,\n\u00a0\u00a0\u00a0\u00a0Blanda tamen, praesens ut videare loqui.\nSi non accipiet scriptum, inlectumque remittet,\n\u00a0\u00a0\u00a0\u00a0Lecturam spera, propositumque tene.\nTempore difficiles veniunt ad aratra iuvenci,\n\u00a0\u00a0\u00a0\u00a0Tempore lenta pati frena docentur equi:\nFerreus adsiduo consumitur anulus usu,\n\u00a0\u00a0\u00a0\u00a0Interit adsidua vomer aduncus humo.\nQuid magis est saxo durum, quid mollius unda?\n\u00a0\u00a0\u00a0\u00a0Dura tamen molli saxa cavantur aqua.\nPenelopen ipsam, persta modo, tempore vinces:\n\u00a0\u00a0\u00a0\u00a0Capta vides sero Pergama, capta tamen. \nLegerit, et nolit rescribere? cogere noli:\n\u00a0\u00a0\u00a0\u00a0Tu modo blanditias fac legat usque tuas.\nQuae voluit legisse, volet rescribere lectis:\n\u00a0\u00a0\u00a0\u00a0Per numeros venient ista gradusque suos.\nForsitan et primo veniet tibi littera tristis,\n\u00a0\u00a0\u00a0\u00a0Quaeque roget, ne se sollicitare velis.\nQuod rogat illa, timet; quod non rogat, optat, ut instes;\n\u00a0\u00a0\u00a0\u00a0Insequere, et voti postmodo compos eris.\nInterea, sive illa toro resupina feretur,\n\u00a0\u00a0\u00a0\u00a0Lecticam dominae dissimulanter adi,\nNeve aliquis verbis odiosas offerat auris,\n\u00a0\u00a0\u00a0\u00a0Qua potes ambiguis callidus abde notis.\nSeu pedibus vacuis illi spatiosa teretur\n\u00a0\u00a0\u00a0\u00a0Porticus, hic socias tu quoque iunge moras:\nEt modo praecedas facito, modo terga sequaris,\n\u00a0\u00a0\u00a0\u00a0 Et modo festines, et modo lentus eas:\nNec tibi de mediis aliquot transire columnas\n\u00a0\u00a0\u00a0\u00a0Sit pudor, aut lateri continuasse latus;\nNec sine te curvo sedeat speciosa theatro:\n\u00a0\u00a0\u00a0\u00a0Quod spectes, umeris adferet illa suis.\nIllam respicias, illam mirere licebit:\n\u00a0\u00a0\u00a0\u00a0Multa supercilio, multa loquare notis.\nEt plaudas, aliquam mimo saltante puellam:\n\u00a0\u00a0\u00a0\u00a0Et faveas illi, quisquis agatur amans.\nCum surgit, surges; donec sedet illa, sedebis;\n\u00a0\u00a0\u00a0\u00a0Arbitrio dominae tempora perde tuae.\nSed tibi nec ferro placeat torquere capillos,\n\u00a0\u00a0\u00a0\u00a0Nec tua mordaci pumice crura teras.\nIsta iube faciant, quorum Cybeleia mater\n\u00a0\u00a0\u00a0\u00a0Concinitur Phrygiis exululata modis.\nForma viros neglecta decet; Minoida Theseus\n\u00a0\u00a0\u00a0\u00a0Abstulit, a nulla tempora comptus acu. \nHippolytum Phaedra, nec erat bene cultus, amavit;\n\u00a0\u00a0\u00a0\u00a0Cura deae silvis aptus Adonis erat.\nMunditie placeant, fuscentur corpora Campo:\n\u00a0\u00a0\u00a0\u00a0Sit bene conveniens et sine labe toga:\nLingula ne rigeat, careant rubigine dentes,\n\u00a0\u00a0\u00a0\u00a0Nec vagus in laxa pes tibi pelle natet:\nNec male deformet rigidos tonsura capillos:\n\u00a0\u00a0\u00a0\u00a0Sit coma, sit trita barba resecta manu.\nEt nihil emineant, et sint sine sordibus ungues:\n\u00a0\u00a0\u00a0\u00a0Inque cava nullus stet tibi nare pilus.\nNec male odorati sit tristis anhelitus oris:\n\u00a0\u00a0\u00a0\u00a0Nec laedat naris virque paterque gregis.\nCetera lascivae faciant, concede, puellae,\n\u00a0\u00a0\u00a0\u00a0Et siquis male vir quaerit habere virum.\nEcce, suum vatem Liber vocat; hic quoque amantes\n\u00a0\u00a0\u00a0\u00a0Adiuvat, et flammae, qua calet ipse, favet.\nCnosis in ignotis amens errabat harenis,\n\u00a0\u00a0\u00a0\u00a0Qua brevis aequoreis Dia feritur aquis.\nUtque erat e somno tunica velata recincta,\n\u00a0\u00a0\u00a0\u00a0Nuda pedem, croceas inreligata comas,\nThesea crudelem surdas clamabat ad undas,\n\u00a0\u00a0\u00a0\u00a0Indigno teneras imbre rigante genas.\nClamabat, flebatque simul, sed utrumque decebat;\n\u00a0\u00a0\u00a0\u00a0Non facta est lacrimis turpior illa suis.\nIamque iterum tundens mollissima pectora palmis\n\u00a0\u00a0\u00a0\u00a0'Perfidus ille abiit; quid mihi fiet?' ait.\n'Quid mihi fiet?' ait: sonuerunt cymbala toto\n\u00a0\u00a0\u00a0\u00a0Litore, et adtonita tympana pulsa manu. \nExcidit illa metu, rupitque novissima verba;\n\u00a0\u00a0\u00a0\u00a0Nullus in exanimi corpore sanguis erat.\nEcce Mimallonides sparsis in terga capillis:\n\u00a0\u00a0\u00a0\u00a0Ecce leves satyri, praevia turba dei:\nEbrius, ecce, senex pando Silenus asello\n\u00a0\u00a0\u00a0\u00a0Vix sedet, et pressas continet ante iubas.\nDum sequitur Bacchas, Bacchae fugiuntque petuntque\n\u00a0\u00a0\u00a0\u00a0Quadrupedem ferula dum malus urget eques,\nIn caput aurito cecidit delapsus asello:\n\u00a0\u00a0\u00a0\u00a0Clamarunt satyri 'surge age, surge, pater.'\nIam deus in curru, quem summum texerat uvis,\n\u00a0\u00a0\u00a0\u00a0Tigribus adiunctis aurea lora dabat:\nEt color et Theseus et vox abiere puellae:\n\u00a0\u00a0\u00a0\u00a0Terque fugam petiit, terque retenta metu est.\nHorruit, ut graciles, agitat quas ventus, aristae,\n\u00a0\u00a0\u00a0\u00a0Ut levis in madida canna palude tremit.\nCui deus 'en, adsum tibi cura fidelior' inquit:\n\u00a0\u00a0\u00a0\u00a0'Pone metum: Bacchi, Cnosias, uxor eris.\nMunus habe caelum; caelo spectabere sidus;\n\u00a0\u00a0\u00a0\u00a0Saepe reges dubiam Cressa Corona ratem.'\nDixit, et e curru, ne tigres illa timeret,\n\u00a0\u00a0\u00a0\u00a0Desilit; inposito cessit harena pede:\nImplicitamque sinu (neque enim pugnare valebat)\n\u00a0\u00a0\u00a0\u00a0Abstulit; in facili est omnia posse deo.\nPars 'Hymenaee' canunt, pars clamant 'Euhion, euhoe!'\n\u00a0\u00a0\u00a0\u00a0Sic coeunt sacro nupta deusque toro.\nErgo ubi contigerint positi tibi munera Bacchi,\n\u00a0\u00a0\u00a0\u00a0Atque erit in socii femina parte tori,\nNycteliumque patrem nocturnaque sacra precare,\n\u00a0\u00a0\u00a0\u00a0Ne iubeant capiti vina nocere tuo. \nHic tibi multa licet sermone latentia tecto\n\u00a0\u00a0\u00a0\u00a0Dicere, quae dici sentiat illa sibi:\nBlanditiasque leves tenui perscribere vino,\n\u00a0\u00a0\u00a0\u00a0Ut dominam in mensa se legat illa tuam:\nAtque oculos oculis spectare fatentibus ignem:\n\u00a0\u00a0\u00a0\u00a0Saepe tacens vocem verbaque vultus habet.\nFac primus rapias illius tacta labellis\n\u00a0\u00a0\u00a0\u00a0Pocula, quaque bibet parte puella, bibas:\nEt quemcumque cibum digitis libaverit illa,\n\u00a0\u00a0\u00a0\u00a0Tu pete, dumque petis, sit tibi tacta manus.\nSint etiam tua vota, viro placuisse puellae:\n\u00a0\u00a0\u00a0\u00a0Utilior vobis factus amicus erit.\nHuic, si sorte bibes, sortem concede priorem:\n\u00a0\u00a0\u00a0\u00a0Huic detur capiti missa corona tuo.\nSive erit inferior, seu par, prior omnia sumat:\n\u00a0\u00a0\u00a0\u00a0Nec dubites illi verba secunda loqui.\nTuta frequensque via est, per amici fallere nomen:\n\u00a0\u00a0\u00a0\u00a0Tuta frequensque licet sit via, crimen habet.\nInde procurator nimium quoque multa procurat,\n\u00a0\u00a0\u00a0\u00a0Et sibi mandatis plura videnda putat.\nCerta tibi a nobis dabitur mensura bibendi:\n\u00a0\u00a0\u00a0\u00a0Officium praestent mensque pedesque suum.\nIurgia praecipue vino stimulata caveto,\n\u00a0\u00a0\u00a0\u00a0Et nimium faciles ad fera bella manus.\nOccidit Eurytion stulte data vina bibendo;\n\u00a0\u00a0\u00a0\u00a0Aptior est dulci mensa merumque ioco. \nSi vox est, canta: si mollia brachia, salta:\n\u00a0\u00a0\u00a0\u00a0Et quacumque potes dote placere, place.\nEbrietas ut vera nocet, sic ficta iuvabit:\n\u00a0\u00a0\u00a0\u00a0Fac titubet blaeso subdola lingua sono,\nUt, quicquid facias dicasve protervius aequo,\n\u00a0\u00a0\u00a0\u00a0Credatur nimium causa fuisse merum.\nEt bene dic dominae, bene, cum quo dormiat illa;\n\u00a0\u00a0\u00a0\u00a0Sed, male sit, tacita mente precare, viro.\nAt cum discedet mensa conviva remota,\n\u00a0\u00a0\u00a0\u00a0 Ipsa tibi accessus turba locumque dabit.\nInsere te turbae, leviterque admotus eunti\n\u00a0\u00a0\u00a0\u00a0Velle latus digitis, et pede tange pedem.\nConloquii iam tempus adest; fuge rustice longe\n\u00a0\u00a0\u00a0\u00a0Hinc pudor; audentem Forsque Venusque iuvat.\nNon tua sub nostras veniat facundia leges:\n\u00a0\u00a0\u00a0\u00a0Fac tantum cupias, sponte disertus eris.\nEst tibi agendus amans, imitandaque vulnera verbis;\n\u00a0\u00a0\u00a0\u00a0Haec tibi quaeratur qualibet arte fides.\nNec credi labor est: sibi quaeque videtur amanda;\n\u00a0\u00a0\u00a0\u00a0Pessima sit, nulli non sua forma placet.\nSaepe tamen vere coepit simulator amare,\n\u00a0\u00a0\u00a0\u00a0Saepe, quod incipiens finxerat esse, fuit.\nQuo magis, o, faciles imitantibus este, puellae:\n\u00a0\u00a0\u00a0\u00a0Fiet amor verus, qui modo falsus erat.\nBlanditiis animum furtim deprendere nunc sit,\n\u00a0\u00a0\u00a0\u00a0Ut pendens liquida ripa subestur aqua.\nNec faciem, nec te pigeat laudare capillos\n\u00a0\u00a0\u00a0\u00a0Et teretes digitos exiguumque pedem:\nDelectant etiam castas praeconia formae;\n\u00a0\u00a0\u00a0\u00a0Virginibus curae grataque forma sua est.\nNam cur in Phrygiis Iunonem et Pallada silvis\n\u00a0\u00a0\u00a0\u00a0Nunc quoque iudicium non tenuisse pudet? \nLaudatas ostendit avis Iunonia pinnas:\n\u00a0\u00a0\u00a0\u00a0Si tacitus spectes, illa recondit opes.\nQuadrupedes inter rapidi certamina cursus\n\u00a0\u00a0\u00a0\u00a0Depexaeque iubae plausaque colla iuvant.\nNec timide promitte: trahunt promissa puellas;\n\u00a0\u00a0\u00a0\u00a0Pollicito testes quoslibet adde deos.\nIuppiter ex alto periuria ridet amantum,\n\u00a0\u00a0\u00a0\u00a0Et iubet Aeolios inrita ferre notos.\nPer Styga Iunoni falsum iurare solebat\n\u00a0\u00a0\u00a0\u00a0Iuppiter; exemplo nunc favet ipse suo.\nExpedit esse deos, et, ut expedit, esse putemus;\n\u00a0\u00a0\u00a0\u00a0Dentur in antiquos tura merumque focos;\nNec secura quies illos similisque sopori\n\u00a0\u00a0\u00a0\u00a0Detinet; innocue vivite: numen adest;\nReddite depositum; pietas sua foedera servet:\n\u00a0\u00a0\u00a0\u00a0Fraus absit; vacuas caedis habete manus.\nLudite, si sapitis, solas impune puellas:\n\u00a0\u00a0\u00a0\u00a0Hac minus est una fraude tuenda fides.\nFallite fallentes: ex magna parte profanum\n\u00a0\u00a0\u00a0\u00a0Sunt genus: in laqueos quos posuere, cadant.\nDicitur Aegyptos caruisse iuvantibus arva\n\u00a0\u00a0\u00a0\u00a0Imbribus, atque annos sicca fuisse novem,\nCum Thrasius Busirin adit, monstratque piari\n\u00a0\u00a0\u00a0\u00a0Hospitis adfuso sanguine posse Iovem.\nIlli Busiris 'fies Iovis hostia primus,'\n\u00a0\u00a0\u00a0\u00a0Inquit 'et Aegypto tu dabis hospes aquam.'\nEt Phalaris tauro violenti membra Perilli\n\u00a0\u00a0\u00a0\u00a0Torruit: infelix inbuit auctor opus.\nIustus uterque fuit: neque enim lex aequior ulla est,\n\u00a0\u00a0\u00a0\u00a0Quam necis artifices arte perire sua.\nErgo ut periuras merito periuria fallant,\n\u00a0\u00a0\u00a0\u00a0Exemplo doleat femina laesa suo. \nEt lacrimae prosunt: lacrimis adamanta movebis:\n\u00a0\u00a0\u00a0\u00a0Fac madidas videat, si potes, illa genas.\nSi lacrimae (neque enim veniunt in tempore semper)\n\u00a0\u00a0\u00a0\u00a0Deficient, uda lumina tange manu.\nQuis sapiens blandis non misceat oscula verbis?\n\u00a0\u00a0\u00a0\u00a0Illa licet non det, non data sume tamen.\nPugnabit primo fortassis, et 'improbe' dicet:\n\u00a0\u00a0\u00a0\u00a0Pugnando vinci se tamen illa volet.\nTantum ne noceant teneris male rapta labellis,\n\u00a0\u00a0\u00a0\u00a0Neve queri possit dura fuisse, cave.\nOscula qui sumpsit, si non et cetera sumet,\n\u00a0\u00a0\u00a0\u00a0Haec quoque, quae data sunt, perdere dignus erit.\nQuantum defuerat pleno post oscula voto?\n\u00a0\u00a0\u00a0\u00a0Ei mihi, rusticitas, non pudor ille fuit.\nVim licet appelles: grata est vis ista puellis:\n\u00a0\u00a0\u00a0\u00a0Quod iuvat, invitae saepe dedisse volunt.\nQuaecumque est veneris subita violata rapina,\n\u00a0\u00a0\u00a0\u00a0Gaudet, et inprobitas muneris instar habet.\nAt quae cum posset cogi, non tacta recessit,\n\u00a0\u00a0\u00a0\u00a0Ut simulet vultu gaudia, tristis erit.\nVim passa est Phoebe: vis est allata sorori;\n\u00a0\u00a0\u00a0\u00a0Et gratus raptae raptor uterque fuit.\nFabula nota quidem, sed non indigna referri,\n\u00a0\u00a0\u00a0\u00a0Scyrias Haemonio iuncta puella viro.\nIam dea laudatae dederat mala praemia formae\n\u00a0\u00a0\u00a0\u00a0Colle sub Idaeo vincere digna duas:\nIam nurus ad Priamum diverso venerat orbe,\n\u00a0\u00a0\u00a0\u00a0Graiaque in Iliacis moenibus uxor erat:\nIurabant omnes in laesi verba mariti:\n\u00a0\u00a0\u00a0\u00a0Nam dolor unius publica causa fuit. \nTurpe, nisi hoc matris precibus tribuisset, Achilles\n\u00a0\u00a0\u00a0\u00a0Veste virum longa dissimulatus erat.\nQuid facis, Aeacide? non sunt tua munera lanae;\n\u00a0\u00a0\u00a0\u00a0Tu titulos alia Palladis arte petas.\nQuid tibi cum calathis? clipeo manus apta ferendo est:\n\u00a0\u00a0\u00a0\u00a0Pensa quid in dextra, qua cadet Hector, habes?\nReice succinctos operoso stamine fusos!\n\u00a0\u00a0\u00a0\u00a0Quassanda est ista Pelias hasta manu.\nForte erat in thalamo virgo regalis eodem;\n\u00a0\u00a0\u00a0\u00a0Haec illum stupro comperit esse virum.\nViribus illa quidem victa est, ita credere oportet:\n\u00a0\u00a0\u00a0\u00a0Sed voluit vinci viribus illa tamen.\nSaepe 'mane!' dixit, cum iam properaret Achilles;\n\u00a0\u00a0\u00a0\u00a0Fortia nam posita sumpserat arma colo.\nVis ubi nunc illa est? Quid blanda voce moraris\n\u00a0\u00a0\u00a0\u00a0Auctorem stupri, Deidamia, tui?\nScilicet ut pudor est quaedam coepisse priorem,\n\u00a0\u00a0\u00a0\u00a0Sic alio gratum est incipiente pati.\nA! nimia est iuveni propriae fiducia formae,\n\u00a0\u00a0\u00a0\u00a0Expectat siquis, dum prior illa roget.\nVir prior accedat, vir verba precantia dicat:\n\u00a0\u00a0\u00a0\u00a0Excipiet blandas comiter illa preces.\nUt potiare, roga: tantum cupit illa rogari;\n\u00a0\u00a0\u00a0\u00a0Da causam voti principiumque tui.\nIuppiter ad veteres supplex heroidas ibat:\n\u00a0\u00a0\u00a0\u00a0 Corrupit magnum nulla puella Iovem.\nSi tamen a precibus tumidos accedere fastus\n\u00a0\u00a0\u00a0\u00a0Senseris, incepto parce referque pedem.\nQuod refugit, multae cupiunt: odere quod instat;\n\u00a0\u00a0\u00a0\u00a0Lenius instando taedia tolle tui.\nNec semper veneris spes est profitenda roganti:\n\u00a0\u00a0\u00a0\u00a0Intret amicitiae nomine tectus amor. \nHoc aditu vidi tetricae data verba puellae:\n\u00a0\u00a0\u00a0\u00a0Qui fuerat cultor, factus amator erat.\nCandidus in nauta turpis color, aequoris unda\n\u00a0\u00a0\u00a0\u00a0Debet et a radiis sideris esse niger:\nTurpis et agricolae, qui vomere semper adunco\n\u00a0\u00a0\u00a0\u00a0Et gravibus rastris sub Iove versat humum.\nEt tibi, Palladiae petitur cui fama coronae,\n\u00a0\u00a0\u00a0\u00a0Candida si fuerint corpora, turpis eris.\nPalleat omnis amans: hic est color aptus amanti;\n\u00a0\u00a0\u00a0\u00a0Hoc decet, hoc stulti non valuisse putant.\nPallidus in Side silvis errabat Orion,\n\u00a0\u00a0\u00a0\u00a0Pallidus in lenta naide Daphnis erat.\nArguat et macies animum: nec turpe putaris\n\u00a0\u00a0\u00a0\u00a0Palliolum nitidis inposuisse comis.\nAttenuant iuvenum vigilatae corpora noctes\n\u00a0\u00a0\u00a0\u00a0Curaque et in magno qui fit amore dolor.\nUt voto potiare tuo, miserabilis esto,\n\u00a0\u00a0\u00a0\u00a0Ut qui te videat, dicere possit 'amas.'\nConquerar, an moneam mixtum fas omne nefasque?\n\u00a0\u00a0\u00a0\u00a0Nomen amicitia est, nomen inane fides.\nEi mihi, non tutum est, quod ames, laudare sodali;\n\u00a0\u00a0\u00a0\u00a0Cum tibi laudanti credidit, ipse subit.\nAt non Actorides lectum temeravit Achillis:\n\u00a0\u00a0\u00a0\u00a0Quantum ad Pirithoum, Phaedra pudica fuit.\nHermionam Pylades quo Pallada Phoebus, amabat,\n\u00a0\u00a0\u00a0\u00a0Quodque tibi geminus, Tyndari, Castor, erat.\nSiquis idem sperat, laturas poma myricas\n\u00a0\u00a0\u00a0\u00a0Speret, et e medio flumine mella petat. \nNil nisi turpe iuvat: curae sua cuique voluptas:\n\u00a0\u00a0\u00a0\u00a0Haec quoque ab alterius grata dolore venit.\nHeu facinus! non est hostis metuendus amanti;\n\u00a0\u00a0\u00a0\u00a0Quos credis fidos, effuge, tutus eris.\nCognatum fratremque cave carumque sodalem:\n\u00a0\u00a0\u00a0\u00a0Praebebit veros haec tibi turba metus.\nFiniturus eram, sed sunt diversa puellis\n\u00a0\u00a0\u00a0\u00a0Pectora: mille animos excipe mille modis.\nNec tellus eadem parit omnia; vitibus illa\n\u00a0\u00a0\u00a0\u00a0Convenit, haec oleis; hac bene farra virent.\nPectoribus mores tot sunt, quot in ore figurae;\n\u00a0\u00a0\u00a0\u00a0Qui sapit, innumeris moribus aptus erit,\nUtque leves Proteus modo se tenuabit in undas,\n\u00a0\u00a0\u00a0\u00a0Nunc leo, nunc arbor, nunc erit hirtus aper.\nHi iaculo pisces, illi capiuntur ab hamis:\n\u00a0\u00a0\u00a0\u00a0Hos cava contento retia fune trahunt.\nNec tibi conveniet cunctos modus unus ad annos:\n\u00a0\u00a0\u00a0\u00a0Longius insidias cerva videbit anus.\nSi doctus videare rudi, petulansve pudenti,\n\u00a0\u00a0\u00a0\u00a0Diffidet miserae protinus illa sibi.\nInde fit, ut quae se timuit committere honesto,\n\u00a0\u00a0\u00a0\u00a0Vilis ad amplexus inferioris eat.\nPars superat coepti, pars est exhausta laboris.\n\u00a0\u00a0\u00a0\u00a0Hic teneat nostras ancora iacta rates.","title":"The Love Books of Ovid: THE ART OF LOVE: Book I","type":"page"}