{"collection":"Hinduism","html_url":"https://unchartedknowledge.5gfusion.net/browse/hin/rvsan/rv03066.htm","path":"hin/rvsan/rv03066.htm","source_url":"https://sacred-texts.com/hin/rvsan/rv03066.htm","text":"Sacred Texts\u00a0\nHinduism\u00a0\nIndex\u00a0\nRig Veda Book 3 Index\u00a0\nPrevious\u00a0\nNext\u00a0\nRig Veda Book 3 Hymn 66\niheha vo manasA bandhutA nara ushijo jagmurabhi tAni vedasA \nyAbhirmAyAbhiH pratijUtivarpasaH saudhanvanA yaj\u00f1iyaM bhAgamAnasha \nyAbhiH shacIbhishcamasAnapiMshata yayA dhiyA gAmariNIta carmaNaH \nyena harI manasA niratakSata tena devatvaM RbhavaH samAnasha \nindrasya sakhyaM RbhavaH samAnashurmanornapAto apaso dadhanvire \nsaudhanvanAso amRtatvamerire viSTvI shamIbhiH sukRtaH sukRtyayA \nindreNa yAtha sarathaM sute sacAnatho vashAnAM bhavathAsaha shriyA \nna vaH pratimai sukRtAni vAghataH saudhanvanA Rbhavo vIryANi ca \nindra RbhubhirvAjavadbhiH samukSitaM sutaM somamA vRSasvA gabhastyoH \ndhiyeSito maghavan dAshuSo gRhe saudhanvanebhiH saha matsvA nRbhiH \nindra RbhumAn vAjavAn matsveha no.asmin savane shacyA puruSTuta \nimAni tubhyaM svasarANi yemire vratA devAnAM manuSashca dharmabhiH \nindra RbhubhirvAjibhirvAjayanniha stomaM jariturupa yAhi yaj\u00f1iyam \nshataM ketebhiriSirebhirAyave sahasraNIthoadhvarasya homani \nNext: Hymn 67","title":"The Rig Veda in Sanskrit: Rig Veda Book 3: Hymn 66","type":"page"}