{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a01_01.htm","path":"neu/ascp/a01_01.htm","source_url":"https://sacred-texts.com/neu/ascp/a01_01.htm","text":"Us is riht micel \u00f0\u00e6t we rodera weard,\nwereda wuldorcining, wordum herigen,\nmodum lufien! He is m\u00e6gna sped,\nheafod ealra heahgesceafta,\n5\nfrea \u00e6lmihtig. N\u00e6s him fruma \u00e6fre,\nor geworden, ne nu ende cym\u00fe\necean drihtnes, ac he bi\u00f0 a rice\nofer heofenstolas. Heagum \u00ferymmum\nso\u00f0f\u00e6st and swi\u00f0feorm sweglbosmas heold,\n10\n\u00fea w\u00e6ron gesette wide and side\n\u00feurh geweald godes wuldres bearnum,\ngasta weardum. H\u00e6fdon gleam and dream,\nand heora ordfruman, engla \u00fereatas,\nbeorhte blisse. W\u00e6s heora bl\u00e6d micel!\n15\n\u00feegnas \u00ferymf\u00e6ste \u00feeoden heredon,\ns\u00e6gdon lustum lof, heora liffrean\ndemdon, drihtenes duge\u00feum w\u00e6ron\nswi\u00f0e ges\u00e6lige. Synna ne cu\u00feon,\nfirena fremman, ac hie on fri\u00f0e lifdon,\n20\nece mid heora aldor. Elles ne ongunnon\nr\u00e6ran on roderum nym\u00fee riht and so\u00fe,\n\u00e6r\u00f0on engla weard for oferhygde dw\u00e6l on gedwilde. Noldan dreogan leng\nheora selfra r\u00e6d, ac hie of siblufan\n25\ngodes ahwurfon. H\u00e6fdon gielp micel\n\u00fe\u00e6t hie wi\u00f0 drihtne d\u00e6lan meahton\nwuldorf\u00e6stan wic werodes \u00ferymme,\nsid and swegltorht. Him \u00fe\u00e6r sar gelamp,\n\u00e6fst and oferhygd, and \u00fe\u00e6s engles mod\n30\n\u00fee \u00feone unr\u00e6d ongan \u00e6rest fremman,\nwefan and weccean, \u00fea he worde cw\u00e6\u00f0,\nni\u00fees of\u00feyrsted, \u00fe\u00e6t he on nor\u00f0d\u00e6le\nham and heahsetl heofena rices\nagan wolde. \u00fea wear\u00f0 yrre god\n35\nand \u00feam werode wra\u00f0 \u00fee he \u00e6r wur\u00f0ode\nwlite and wuldre. Sceop \u00feam werlogan\nwr\u00e6clicne ham weorce to leane,\nhelleheafas, hearde ni\u00f0as.\nHeht \u00fe\u00e6t witehus wr\u00e6cna bidan,\n40\ndeop, dreama leas, drihten ure,\ngasta weardas, \u00fea he hit geare wiste,\nsynnihte beseald, susle geinnod,\ngeondfolen fyre and f\u00e6rcyle,\nrece and reade lege. Heht \u00fea geond \u00fe\u00e6t r\u00e6dlease hof\n45\nweaxan witebrogan. H\u00e6fdon hie wrohtgeteme\ngrimme wi\u00f0 god gesomnod; him \u00fe\u00e6s grim lean becom!\nCw\u00e6don \u00fe\u00e6t heo rice, re\u00f0emode,\nagan woldan, and swa ea\u00f0e meahtan.\nHim seo wen geleah, si\u00f0\u00f0an waldend his,\n50\nheofona heahcining, honda ar\u00e6rde,\nhehste wi\u00f0 \u00feam herge. Ne mihton hygelease,\nm\u00e6ne wi\u00f0 metode, m\u00e6gyn bryttigan,\nac him se m\u00e6ra mod getw\u00e6fde,\nb\u00e6lc forbigde. \u00fea he gebolgen wear\u00f0,\n55\nbesloh synscea\u00fean sigore and gewealde,\ndome and duge\u00f0e, and dreame benam\nhis feond, fri\u00f0o and gefean ealle,\ntorhte tire, and his torn gewr\u00e6c\non gesacum swi\u00f0e selfes mihtum\n60\nstrengum stiepe. H\u00e6fde styrne mod,\ngegremed grymme, grap on wra\u00f0e\nfaum folmum, and him on f\u00e6\u00f0m gebr\u00e6c yrre on mode; \u00e6\u00f0ele bescyrede\nhis wi\u00f0erbrecan wuldorgestealdum.\n65\nSceof \u00fea and scyrede scyppend ure\noferhidig cyn engla of heofnum,\nw\u00e6rleas werod. Waldend sende\nla\u00f0wendne here on langne si\u00f0,\ngeomre gastas; w\u00e6s him gylp forod,\n70\nbeot forborsten, and forbiged \u00ferym,\nwlite gewemmed. Heo on wrace sy\u00f0\u00f0an\nseomodon swearte, si\u00f0e ne \u00feorfton\nhlude hlihhan, ac heo helltregum\nwerige wunodon and wean cu\u00f0on,\n75\nsar and sorge, susl \u00ferowedon\n\u00feystrum be\u00feeahte, \u00feearl \u00e6fterlean\n\u00fe\u00e6s \u00fee heo ongunnon wi\u00f0 gode winnan.\n\u00fea w\u00e6s so\u00f0 swa \u00e6r sibb on heofnum,\nf\u00e6gre freo\u00feo\u00feeawas, frea eallum leof,\nsi\u00f0\u00f0an herewosan heofon ofg\u00e6fon,\nleohte belorene. Him on laste setl,\nwuldorspedum welig, wide stodan\ngifum growende on godes rice,\nbeorht and gebl\u00e6df\u00e6st, buendra leas,\n90\nsi\u00f0\u00f0an wr\u00e6cstowe werige gastas\nunder hearmlocan heane geforan.\n\u00fea \u00feeahtode \u00feeoden ure\nmodge\u00feonce, hu he \u00fea m\u00e6ran gesceaft,\ne\u00f0elsta\u00f0olas eft gesette,\n95\nswegltorhtan seld, selran werode,\n\u00fea hie gielpscea\u00fean ofgifen h\u00e6fdon,\nheah on heofenum. For\u00feam halig god\nunder roderas feng, ricum mihtum,\nwolde \u00fe\u00e6t him eor\u00f0e and uproder\n100\nand sid w\u00e6ter geseted wurde\nworuldgesceafte on wra\u00f0ra gield,\n\u00feara \u00fee forhealdene of hleo sende.\nNe w\u00e6s her \u00fea giet nym\u00fee heolstersceado\nwiht geworden, ac \u00fees wida grund\n105\nstod deop and dim, drihtne fremde,\nidel and unnyt. On \u00feone eagum wlat\nsti\u00f0frih\u00fe cining, and \u00fea stowe beheold,\ndreama lease, geseah deorc gesweorc\nsemian sinnihte sweart under roderum,\n110\nwonn and weste, o\u00f0\u00fe\u00e6t \u00feeos woruldgesceaft\n\u00feurh word gewear\u00f0 wuldorcyninges.\nHer \u00e6rest gesceop ece drihten,\nhelm eallwihta, heofon and eor\u00f0an,\nrodor ar\u00e6rde, and \u00feis rume land\n\u00fea seo tid gewat ofer timber sceacan\nmiddangeardes, metod \u00e6fter sceaf\nscirum sciman, scippend ure,\n\u00e6fen \u00e6rest. Him arn on last,\n\u00ferang \u00feystre genip, \u00feam \u00fee se \u00feeoden self\n140\nsceop nihte naman. Nergend ure\nhie gesundrode; si\u00f0\u00f0an \u00e6fre\ndrugon and dydon drihtnes willan,\nece ofer eor\u00f0an. \u00f0a com o\u00f0er d\u00e6g,\nleoht \u00e6fter \u00feeostrum. Heht \u00fea lifes weard\n145\non mereflode middum weor\u00f0an\nhyhtlic heofontimber. Holmas d\u00e6lde\nwaldend ure and geworhte \u00fea\nroderas f\u00e6sten; \u00fe\u00e6t se rica ahof\nup from eor\u00f0an \u00feurh his agen word,\n150\nfrea \u00e6lmihtig. Flod w\u00e6s ad\u00e6led\nunder heahrodore halgum mihtum,\nw\u00e6ter of w\u00e6trum, \u00feam \u00fee wunia\u00f0 gyt\nunder f\u00e6stenne folca hrofes.\n\u00fea com ofer foldan fus si\u00f0ian\n155\nm\u00e6re mergen \u00feridda. N\u00e6ron metode \u00f0a gyta\nwidlond ne wegas nytte, ac stod bewrigen f\u00e6ste\nfolde mid flode. Frea engla heht\n\u00feurh his word wesan w\u00e6ter gem\u00e6ne,\n\u00fea nu under roderum heora ryne healda\u00f0,\n160\nstowe gestefnde. \u00f0a stod hra\u00f0e\nholm under heofonum, swa se halga bebead,\nsid \u00e6tsomne, \u00f0a gesundrod w\u00e6s\nlago wi\u00f0 lande. Geseah \u00fea lifes weard\ndrige stowe, dugo\u00f0a hyrde,\n165\nwide \u00e6teowde, \u00fea se wuldorcyning\neor\u00f0an nemde. Gesette y\u00f0um heora\nonrihtne ryne, rumum flode,\nand gefetero...\nNe \u00feuhte \u00fea gerysne rodora wearde,\n170\n\u00fe\u00e6t Adam leng ana w\u00e6re\nneorxnawonges, niwre gesceafte,\nhyrde and healdend. For\u00feon him heahcyning,\nfrea \u00e6lmihtig fultum tiode;\nwif aweahte and \u00fea wra\u00f0e sealde,\n175\nlifes leohtfruma, leofum rince.\nHe \u00fe\u00e6t andweorc of Adames\nlice aleo\u00f0ode, and him listum ateah\nrib of sidan. He w\u00e6s reste f\u00e6st,\nand softe sw\u00e6f, sar ne wiste,\n180\nearfo\u00f0a d\u00e6l, ne \u00fe\u00e6r \u00e6nig com\nblod of benne, ac him brego engla\nof lice ateah liodende ban,\nwer unwundod, of \u00feam worhte god freolice f\u00e6mnan. Feorh in gedyde,\n185\nece saula. Heo w\u00e6ron englum gelice,\n\u00fea w\u00e6s Eue, Adames bryd,\ngaste gegearwod. Hie on geogo\u00f0e bu\nwlitebeorht w\u00e6ron on woruld cenned\nmeotodes mihtum. Man ne cu\u00f0on\n190\ndon ne dreogan, ac him drihtnes w\u00e6s\nbam on breostum byrnende lufu.\n\u00fea gebletsode bli\u00f0heort cyning,\nmetod alwihta, monna cynnes\n\u00f0a forman twa, f\u00e6der and moder,\n195\nwif and w\u00e6pned. He \u00fea worde cw\u00e6\u00f0:\n\"Tema\u00f0 nu and wexa\u00f0, tudre fylla\u00f0\neor\u00f0an \u00e6lgrene, incre cynne,\nsunum and dohtrum. Inc sceal sealt w\u00e6ter\nwunian on gewealde and eall worulde gesceaft.\n200\nBruca\u00f0 bl\u00e6ddaga and brimhl\u00e6ste\nand heofonfugla. Inc is halig feoh\nand wilde deor on geweald geseald,\nand lifigende, \u00f0a \u00f0e land treda\u00f0,\nfeorheaceno cynn, \u00f0a \u00f0e flod wecce\u00f0\n205\ngeond hronrade. Inc hyra\u00f0 eall.\"\n\u00fea sceawode scyppend ure\nhis weorca wlite and his w\u00e6stma bl\u00e6d,\nniwra gesceafta. Neorxnawong stod\ngod and gastlic, gifena gefylled\n210\nfremum for\u00f0weardum. F\u00e6gere leohte\n\u00fe\u00e6t li\u00f0e land lago yrnende,\nwylleburne. Nalles wolcnu \u00f0a giet\nofer rumne grund regnas b\u00e6ron,\nwann mid winde, hw\u00e6\u00f0re w\u00e6stmum stod\n215\nfolde gefr\u00e6twod. Heoldon for\u00f0ryne\neastreamas heora \u00e6\u00f0ele feower\nof \u00feam niwan neorxnawonge.\n\u00fea w\u00e6ron ad\u00e6lede drihtnes mihtum\nealle of anum, \u00fea he \u00feas eor\u00f0an gesceop,\n220\nw\u00e6tre wlitebeorhtum, and on woruld sende. \u00fe\u00e6raanne hata\u00f0 ylde, eor\u00f0buende,\nFison folcweras; se foldan d\u00e6l\nbrade bebuge\u00f0 beorhtum streamum\nHebeleac utan. On \u00fe\u00e6re e\u00f0yltyrf\n225\nni\u00f0\u00f0as finda\u00f0 nean and feorran\ngold and gymcynn, gum\u00feeoda bearn,\n\u00f0a selestan, \u00fe\u00e6s \u00fee us secga\u00f0 bec.\n\u00feonne seo \u00e6ftre Ethiopia\nland and liodgeard belige\u00f0 uton,\n230\nginne rice, \u00fe\u00e6re is Geon noma.\n\u00feridda is Tigris, seo wi\u00f0 \u00feeodscipe,\nea inflede, Assirie beli\u00f0.\nSwilce is seo feor\u00f0e, \u00fea nu geond folc monig\nweras Eufraten wide nemna\u00f0.\n235\n\"ac niota\u00f0 inc \u00fe\u00e6s o\u00f0res ealles, forl\u00e6ta\u00f0 \u00feone \u00e6nne beam,\nwaria\u00f0 inc wi\u00f0 \u00feone w\u00e6stm. Ne wyr\u00f0 inc wilna g\u00e6d.\"\nHnigon \u00fea mid heafdum heofoncyninge\ngeorne togenes and s\u00e6don ealles \u00feanc,\nlista and \u00feara lara. He let heo \u00fe\u00e6t land buan,\n240\nhw\u00e6rf him \u00fea to heofenum halig drihten,\nsti\u00f0ferh\u00f0 cyning. Stod his handgeweorc\nsomod on sande, nyston sorga wiht\nto begrornianne, butan heo godes willan\nlengest l\u00e6sten. Heo w\u00e6ron leof gode\n245\n\u00f0enden heo his halige word healdan woldon.\nH\u00e6fde se alwalda engelcynna\n\u00feurh handm\u00e6gen, halig drihten,\ntene getrimede, \u00fe\u00e6m he getruwode wel\n\u00fe\u00e6t hie his giongorscipe fyligan wolden,\n250\nwyrcean his willan, for\u00feon he him gewit forgeaf\nand mid his handum gesceop, halig drihten.\nGesett h\u00e6fde he hie swa ges\u00e6liglice, \u00e6nne h\u00e6fde he swa swi\u00f0ne geworhtne,\nswa mihtigne on his modge\u00feohte, he let hine swa micles wealdan,\nhehstne to him on heofona rice, h\u00e6fde he hine swa hwitne geworhtne,\n255\nswa wynlic w\u00e6s his w\u00e6stm on heofonum \u00fe\u00e6t him com from weroda drihtne,\ngelic w\u00e6s he \u00feam leohtum steorrum. Lof sceolde he drihtnes wyrcean,\ndyran sceolde he his dreamas on heofonum, and sceolde his drihtne \u00feancian\n\u00fe\u00e6s leanes \u00fee he him on \u00feam leohte gescerede \u00feonne l\u00e6te he his hine lange wealdan.\nAc he awende hit him to wyrsan \u00feinge, ongan him winn up ahebban\n260\nwi\u00f0 \u00feone hehstan heofnes waldend, \u00fee site\u00f0 on \u00feam halgan stole.\nDeore w\u00e6s he drihtne urum; ne mihte him bedyrned weor\u00f0an\n\u00fe\u00e6t his engyl ongan ofermod wesan,\nahof hine wi\u00f0 his hearran, sohte hetespr\u00e6ce,\ngylpword ongean, nolde gode \u00feeowian,\n265\ncw\u00e6\u00f0 \u00fe\u00e6t his lic w\u00e6re leoht and scene,\nhwit and hiowbeorht. Ne meahte he \u00e6t his hige findan\n\u00fe\u00e6t he gode wolde geongerdome,\n\u00feeodne \u00feeowian. \u00feuhte him sylfum\n\u00fe\u00e6t he m\u00e6gyn and cr\u00e6ft maran h\u00e6fde\n270\n\u00feonne se halga god habban mihte\nfolcgest\u00e6lna. Feala worda gesp\u00e6c\nse engel ofermodes. \u00feohte \u00feurh his anes cr\u00e6ft\nhu he him strenglicran stol geworhte,\nheahran on heofonum; cw\u00e6\u00f0 \u00fe\u00e6t hine his hige speone\n275\n\u00fe\u00e6t he west and nor\u00f0 wyrcean ongunne,\ntrymede getimbro; cw\u00e6\u00f0 him tweo \u00feuhte\n\u00fe\u00e6t he gode wolde geongra weor\u00f0an.\n\"Hw\u00e6t sceal ic winnan?\" cw\u00e6\u00f0 he. \"Nis me wiht\u00e6 \u00feearf\nhearran to habbanne. Ic m\u00e6g mid handum swa fela\n280\nwundra gewyrcean. Ic h\u00e6bbe geweald micel\nto gyrwanne godlecran stol,\nhearran on heofne. Hwy sceal ic \u00e6fter his hyldo \u00f0eowian,\nbugan him swilces geongordomes? Ic m\u00e6g wesan god swa he.\nBigstanda\u00f0 me strange geneatas, \u00fea ne willa\u00f0 me \u00e6t \u00feam stri\u00f0e geswican,\n285\nh\u00e6le\u00feas heardmode. Hie habba\u00f0 me to hearran gecorene,\nrofe rincas; mid swilcum m\u00e6g man r\u00e6d ge\u00feencean,\nfon mid swilcum folcgesteallan. Frynd synd hie mine georne,\nholde on hyra hygesceaftum. Ic m\u00e6g hyra hearra wesan,\nr\u00e6dan on \u00feis rice. Swa me \u00fe\u00e6t riht ne \u00feince\u00f0,\n290\n\u00fe\u00e6t ic oleccan awiht \u00feurfe\ngode \u00e6fter gode \u00e6negum. Ne wille ic leng his geongra wur\u00fean.\"\n\u00fea hit se allwalda eall gehyrde,\n\u00fe\u00e6t his engyl ongan ofermede micel\nahebban wi\u00f0 his hearran and spr\u00e6c healic word\n295\ndollice wi\u00f0 drihten sinne, sceolde he \u00fea d\u00e6d ongyldan,\nworc \u00fe\u00e6s gewinnes ged\u00e6lan, and sceolde his wite habban,\nealra mor\u00f0ra m\u00e6st. Swa de\u00f0 monna gehwilc\n\u00fee wi\u00f0 his waldend winnan ongynne\u00f0\nmid mane wi\u00f0 \u00feone m\u00e6ran drihten. \u00fea wear\u00f0 se mihtiga gebolgen,\n300\nhehsta heofones waldend, wearp hine of \u00fean hean stole.\nHete h\u00e6fde he \u00e6t his hearran gewunnen, hyldo h\u00e6fde his ferlorene,\ngram wear\u00f0 him se goda on his mode. For\u00feon he sceolde grund gesecean\nheardes hellewites, \u00fe\u00e6s \u00fee he wann wi\u00f0 heofnes waldend.\nAcw\u00e6\u00f0 hine \u00fea fram his hyldo and hine on helle wearp,\n305\non \u00fea deopan dala, \u00fe\u00e6r he to deofle wear\u00f0,\nse feond mid his geferum eallum. Feollon \u00fea ufon of heofnum\n\u00feurhlonge swa \u00fereo niht and dagas,\n\u00fea englas of heofnum on helle, and heo ealle forsceop\ndrihten to deoflum. For\u00feon heo his d\u00e6d and word\n310\nnoldon weor\u00f0ian, for\u00feon he heo on wyrse leoht\nunder eor\u00f0an neo\u00f0an, \u00e6llmihtig god,\nsette sigelease on \u00fea sweartan helle.\n\u00fe\u00e6r h\u00e6bba\u00f0 heo on \u00e6fyn ungemet lange,\nealra feonda gehwilc, fyr edneowe,\n315\n\u00feonne cym\u00f0 on uhtan easterne wind,\nforst fyrnum cald. Symble fyr o\u00f0\u00f0e gar,\nsum heard geswinc habban sceoldon.\nWorhte man hit him to wite, (hyra woruld w\u00e6s gehwyrfed),\nforman si\u00f0e, fylde helle\nbrand and brade ligas, swilce eac \u00fea biteran recas,\n\u00ferosm and \u00feystro, for\u00feon hie \u00feegnscipe\ngodes forgymdon. Hie hyra gal beswac,\nengles oferhygd, noldon alwaldan\nword weor\u00feian, h\u00e6fdon wite micel,\n330\nw\u00e6ron \u00fea befeallene fyre to botme\non \u00fea hatan hell \u00feurh hygeleaste\nand \u00feurh ofermetto, sohton o\u00feer land,\n\u00fe\u00e6t w\u00e6s leohtes leas and w\u00e6s liges full,\nfyres f\u00e6r micel. Fynd ongeaton\n335\n\u00fe\u00e6t hie h\u00e6fdon gewrixled wita unrim\n\u00feurh heora miclan mod and \u00feurh miht godes\nand \u00feurh ofermetto ealra swi\u00f0ost.\n\u00fea spr\u00e6c se ofermoda cyning, \u00fee \u00e6r w\u00e6s engla scynost,\nhwitost on heofne and his hearran leof,\n340\ndrihtne dyre, o\u00f0 hie to dole wurdon,\n\u00fe\u00e6t him for galscipe god sylfa wear\u00f0\nmihtig on mode yrre. Wearp hine on \u00fe\u00e6t mor\u00f0er innan,\nni\u00f0er on \u00fe\u00e6t niobedd, and sceop him naman si\u00f0\u00f0an, cw\u00e6\u00f0 se hehsta hatan sceolde\n345\nSatan si\u00f0\u00f0an, het hine \u00fe\u00e6re sweartan helle\ngrundes gyman, nalles wi\u00f0 god winnan.\nSatan ma\u00f0elode, sorgiende spr\u00e6c,\nse \u00f0e helle for\u00f0 healdan sceolde,\ngieman \u00fe\u00e6s grundes. W\u00e6s \u00e6r godes engel,\n350\nhwit on heofne, o\u00f0 hine his hyge forspeon\nand his ofermetto ealra swi\u00f0ost,\n\u00fe\u00e6t he ne wolde wereda drihtnes\nword wur\u00f0ian. Weoll him on innan\nhyge ymb his heortan, hat w\u00e6s him utan\n355\nwra\u00f0lic wite. He \u00fea worde cw\u00e6\u00f0:\n\"Is \u00fe\u00e6s \u00e6nga styde ungelic swi\u00f0e\n\u00feam o\u00f0rum ham \u00fee we \u00e6r cu\u00f0on,\nhean on heofonrice, \u00fee me min hearra onlag,\n\u00feeah we hine for \u00feam alwaldan agan ne moston,\n360\nromigan ures rices. N\u00e6f\u00f0 he \u00feeah riht gedon\n\u00fe\u00e6t he us h\u00e6f\u00f0 bef\u00e6lled fyre to botme,\nhelle \u00fe\u00e6re hatan, heofonrice benumen;\nhafa\u00f0 hit gemearcod mid moncynne\nto gesettanne. \u00fe\u00e6t me is sorga m\u00e6st,\n365\n\u00fe\u00e6t Adam sceal, \u00fee w\u00e6s of eor\u00f0an geworht,\nminne stronglican stol behealdan,\nwesan him on wynne, and we \u00feis wite \u00feolien,\nhearm on \u00feisse helle. Wa la, ahte ic minra handa geweald\nand moste ane tid ute weor\u00f0an,\n370\nwesan ane winterstunde, \u00feonne ic mid \u00feys werode--\nAc licga\u00f0 me ymbe irenbenda,\nride\u00f0 racentan sal. Ic eom rices leas;\nhabba\u00f0 me swa hearde helle clommas\nf\u00e6ste befangen. Her is fyr micel,\n375\nufan and neo\u00f0one. Ic a ne geseah\nla\u00f0ran landscipe. Lig ne aswama\u00f0,\nhat ofer helle. Me habba\u00f0 hringa gespong,\nsli\u00f0hearda sal si\u00f0es amyrred,\nafyrred me min fe\u00f0e; fet synt gebundene,\n380\nhanda geh\u00e6fte. Synt \u00feissa heldora\nwegas forworhte, swa ic mid wihte ne m\u00e6g\nof \u00feissum lio\u00f0obendum. Licga\u00f0 me ymbe\nheardes irenes hate gesl\u00e6gene\ngrindlas greate. Mid \u00fey me god hafa\u00f0\n385\ngeh\u00e6fted be \u00feam healse, swa ic wat he minne hige cu\u00f0e;\nand \u00fe\u00e6t wiste eac weroda drihten,\n\u00fe\u00e6t sceolde unc Adame yfele gewur\u00f0an\nymb \u00fe\u00e6t heofonrice, \u00fe\u00e6r ic ahte minra handa geweald.\nAc \u00f0olia\u00fe we nu \u00ferea on helle, (\u00fe\u00e6t syndon \u00feystro and h\u00e6to),\n390\ngrimme, grundlease. Hafa\u00f0 us god sylfa\nforswapen on \u00feas sweartan mistas; swa he us ne m\u00e6g \u00e6nige synne gest\u00e6lan,\n\u00fe\u00e6t we him on \u00feam lande la\u00f0 gefremedon, he h\u00e6f\u00f0 us \u00feeah \u00fe\u00e6s leohtes bescyrede,\nbeworpen on ealra wita m\u00e6ste. Ne magon we \u00fe\u00e6s wrace gefremman,\ngeleanian him mid la\u00f0es wihte \u00fe\u00e6t he us hafa\u00f0 \u00fe\u00e6s leohtes bescyrede.\n395\nHe h\u00e6f\u00f0 nu gemearcod anne middangeard, \u00fe\u00e6r he h\u00e6f\u00f0 mon geworhtne\n\u00e6fter his onlicnesse. Mid \u00feam he wile eft gesettan\nheofona rice mid hluttrum saulum. We \u00fe\u00e6s sculon hycgan georne,\n\u00fe\u00e6t we on Adame, gif we \u00e6fre m\u00e6gen,\nand on his eafrum swa some, andan gebetan,\n400\nonwendan him \u00fe\u00e6r willan sines, gif we hit m\u00e6gen wihte a\u00feencan.\nNe gelyfe ic me nu \u00fe\u00e6s leohtes fur\u00f0or \u00fe\u00e6s \u00fee he him \u00feence\u00f0 lange niotan,\n\u00fe\u00e6s eades mid his engla cr\u00e6fte. Ne magon we \u00fe\u00e6t on aldre gewinnan,\n\u00fe\u00e6t we mihtiges godes mod onw\u00e6cen. Uton o\u00f0wendan hit nu monna bearnum,\n\u00fe\u00e6t heofonrice, nu we hit habban ne moton, gedon \u00fe\u00e6t hie his hyldo forl\u00e6ten,\n405\n\u00fe\u00e6t hie \u00fe\u00e6t onwendon \u00fe\u00e6t he mid his worde bebead. \u00feonne weor\u00f0 he him wra\u00f0 on mode,\nahwet hie from his hyldo. \u00feonne sculon hie \u00feas helle secan\nand \u00feas grimman grundas. \u00feonne moton we hie us to giongrum habban,\nfira bearn on \u00feissum f\u00e6stum clomme. Onginna\u00f0 nu ymb \u00fea fyrde \u00feencean!\nGif ic \u00e6negum \u00fe\u00e6gne \u00feeodenmadmas\n410\ngeara forgeafe, \u00feenden we on \u00fean godan rice\nges\u00e6lige s\u00e6ton and h\u00e6fdon ure setla geweald,\n\u00feonne he me na on leofran tid leanum ne meahte\nmine gife gyldan, gif his gien wolde\nminra \u00feegna hwilc ge\u00feafa wur\u00f0an,\n415\n\u00fe\u00e6t he up heonon ute mihte\ncuman \u00feurh \u00feas clustro, and h\u00e6fde cr\u00e6ft mid him\n\u00fe\u00e6t he mid fe\u00f0erhoman fleogan meahte,\nwindan on wolcne, \u00fe\u00e6r geworht stonda\u00f0\nAdam and Eue on eor\u00f0rice\n420\nmid welan bewunden, and we synd aworpene hider\non \u00feas deopan dalo. Nu hie drihtne synt\nwur\u00f0ran micle, and moton him \u00feone welan agan\n\u00fee we on heofonrice habban sceoldon,\nrice mid rihte; is se r\u00e6d gescyred\n425\nmonna cynne. \u00fe\u00e6t me is on minum mode swa sar,\non minum hyge hreowe\u00f0, \u00fe\u00e6t hie heofonrice\nagan to aldre. Gif hit eower \u00e6nig m\u00e6ge\ngewendan mid wihte \u00fe\u00e6t hie word godes\nlare forl\u00e6ten, sona hie him \u00fee la\u00f0ran beo\u00f0.\n430\nGif hie breca\u00f0 his gebodscipe, \u00feonne he him abolgen wur\u00f0e\u00fe;\nsi\u00f0\u00f0an bi\u00f0 him se wela onwended and wyr\u00f0 him wite gegarwod,\nsum heard hearmscearu. Hycga\u00f0 his ealle,\nhu ge hi beswicen! Si\u00f0\u00f0an ic me sefte m\u00e6g\nrestan on \u00feyssum racentum, gif him \u00fe\u00e6t rice losa\u00f0.\n435\nSe \u00fee \u00fe\u00e6t gel\u00e6ste\u00f0, him bi\u00f0 lean gearo\n\u00e6fter to aldre, \u00fe\u00e6s we her inne magon\non \u00feyssum fyre for\u00f0 fremena gewinnan.\nSittan l\u00e6te ic hine wi\u00f0 me sylfne, swa hwa swa \u00fe\u00e6t secgan cyme\u00f0\non \u00feas hatan helle, \u00fe\u00e6t hie heofoncyninges\n440\nunwur\u00f0lice wordum and d\u00e6dum\nlare\"\nAngan hine \u00fea gyrwan godes andsaca,\nfus on fr\u00e6twum, (h\u00e6fde f\u00e6cne hyge),\nh\u00e6le\u00f0helm on heafod asette and \u00feone full hearde geband,\n445\nspenn mid spangum; wiste him spr\u00e6ca fela,\nwora worda. Wand him up \u00feanon,\nhwearf him \u00feurh \u00fea helldora, (h\u00e6fde hyge strangne),\nleolc on lyfte la\u00fewendemod,\nswang \u00fe\u00e6t fyr on twa feondes cr\u00e6fte;\n450\nwolde dearnunga drihtnes geongran,\nmid mand\u00e6dum men beswican,\nforl\u00e6dan and forl\u00e6ran, \u00fe\u00e6t hie wurdon la\u00f0 gode.\nHe \u00fea geferde \u00feurh feondes cr\u00e6ft\no\u00f0\u00f0\u00e6t he Adam on eor\u00f0rice,\n455\ngodes handgesceaft, gearone funde,\nwislice geworht, and his wif somed,\nfreo f\u00e6groste, swa hie fela cu\u00f0on\ngodes gegearwigean, \u00fea him to gingran self metod mancynnes mearcode selfa.\n460\nAnd him bi twegin beamas stodon\n\u00fea w\u00e6ron utan of\u00e6tes gehl\u00e6dene,\ngewered mid w\u00e6stme, swa hie waldend god,\nheah heofoncyning handum gesette,\n\u00fe\u00e6t \u00fe\u00e6r yldo bearn moste on ceosan\n465\ngodes and yfeles, gumena \u00e6ghwilc,\nwelan and wawan. N\u00e6s se w\u00e6stm gelic!\nO\u00f0er w\u00e6s swa wynlic, wlitig and scene,\nli\u00f0e and lofsum, \u00fe\u00e6t w\u00e6s lifes beam;\nmoste on ecnisse \u00e6fter lybban,\n470\nwesan on worulde, se \u00fe\u00e6s w\u00e6stmes onbat,\nswa him \u00e6fter \u00fey yldo ne derede,\nne suht sware, ac moste symle wesan\nlungre on lustum and his lif agan,\nhyldo heofoncyninges her on worulde,\n475\nhabban him to w\u00e6ron witode ge\u00feing\u00feo\non \u00feone hean heofon, \u00feonne he heonon wende.\n\u00feonne w\u00e6s se o\u00f0er eallenga sweart,\ndim and \u00feystre; \u00fe\u00e6t w\u00e6s dea\u00f0es beam,\nse b\u00e6r bitres fela. Sceolde bu witan\n480\nylda \u00e6ghwilc yfles and godes\ngewand on \u00feisse worulde. Sceolde on wite a\nmid swate and mid sorgum si\u00f0\u00f0an libban,\nswa hwa swa gebyrgde \u00fe\u00e6s on \u00feam beame geweox.\nSceolde hine yldo beniman ellend\u00e6da,\n485\ndreamas and drihtscipes, and him beon dea\u00f0 scyred.\nLytle hwile sceolde he his lifes niotan,\nsecan \u00feonne landa sweartost on fyre.\nSceolde feondum \u00feeowian, \u00fe\u00e6r is ealra frecna m\u00e6ste\nleodum to langre hwile. \u00fe\u00e6t wiste se la\u00f0a georne,\n490\ndyrne deofles boda \u00fee wi\u00f0 drihten wann.\nWearp hine \u00fea on wyrmes lic and wand him \u00fea ymbutan\n\u00feone dea\u00f0es beam \u00feurh deofles cr\u00e6ft,\ngenam \u00fe\u00e6r \u00fe\u00e6s of\u00e6tes and wende hine eft \u00feanon\n\u00fe\u00e6r he wiste handgeweorc heofoncyninges.\n495\nOngon hine \u00fea frinan forman worde\nse la\u00f0a mid ligenum: \"Langa\u00f0 \u00fee awuht,\nAdam, up to gode? Ic eom on his \u00e6rende hider\nfeorran gefered, ne \u00fe\u00e6t nu fyrn ne w\u00e6s\n\u00fe\u00e6t ic wi\u00f0 hine sylfne s\u00e6t. \u00fea het he me on \u00feysne si\u00f0 faran,\n500\nhet \u00fe\u00e6t \u00feu \u00feisses of\u00e6tes \u00e6te, cw\u00e6\u00f0 \u00fe\u00e6t \u00fein abal and cr\u00e6ft\nand \u00fein modsefa mara wurde,\nand \u00fein lichoma leohtra micle,\n\u00fein gesceapu scenran, cw\u00e6\u00f0 \u00fe\u00e6t \u00fee \u00e6niges sceattes \u00f0earf\nne wurde on worulde. Nu \u00feu willan h\u00e6fst,\n505\nhyldo geworhte heofoncyninges,\nto \u00feance ge\u00feenod \u00feinum hearran,\nh\u00e6fst \u00fee wi\u00f0 drihten dyrne geworhtne. Ic gehyrde hine \u00feine d\u00e6d and word\nlofian on his leohte and ymb \u00fein lif sprecan.\nSwa \u00feu l\u00e6stan scealt \u00fe\u00e6t on \u00feis land hider\n510\nhis bodan bringa\u00f0. Brade synd on worulde\ngrene geardas, and god site\u00f0\non \u00feam hehstan heofna rice,\nufan alwalda. Nele \u00fea earfe\u00f0u\nsylfa habban \u00fe\u00e6t he on \u00feysne si\u00f0 fare,\n515\ngumena drihten, ac he his gingran sent\nto \u00feinre spr\u00e6ce. Nu he \u00fee mid spellum het\nlistas l\u00e6ran. L\u00e6ste \u00feu georne\nhis ambyhto, nim \u00fee \u00feis of\u00e6t on hand,\nbit his and byrige. \u00fee weor\u00f0 on \u00feinum breostum rum,\n520\nw\u00e6stm \u00fey wlitegra. \u00fee sende waldend god,\n\u00fein hearra \u00feas helpe of heofonrice.\"\nAdam ma\u00f0elode \u00fe\u00e6r he on eor\u00f0an stod,\nselfsceafte guma: \"\u00feonne ic sigedrihten,\nmihtigne god, m\u00e6\u00f0lan gehyrde\n525\nstrangre stemne, and me her stondan het,\nhis bebodu healdan, and me \u00feas bryd forgeaf,\nwlitesciene wif, and me warnian het\n\u00fe\u00e6t ic on \u00feone dea\u00f0es beam bedroren ne wurde,\nbeswicen to swi\u00f0e, he cw\u00e6\u00f0 \u00fe\u00e6t \u00fea sweartan helle\n530\nhealdan sceolde se \u00f0e bi his heortan wuht\nla\u00f0es gel\u00e6de. Nat \u00feeah \u00feu mid ligenum fare\n\u00feurh dyrne ge\u00feanc \u00fee \u00feu drihtnes eart\nboda of heofnum. Hw\u00e6t, ic \u00feinra bysna ne m\u00e6g,\nworda ne wisna wuht oncnawan,\n535\nsi\u00f0es ne sagona. Ic wat hw\u00e6t he me self bebead,\nnergend user, \u00fea ic hine nehst geseah;\nhe het me his word weor\u00f0ian and wel healdan,\nl\u00e6stan his lare. \u00feu gelic ne bist\n\u00e6negum his engla \u00fee ic \u00e6r geseah,\n540\nne \u00feu me o\u00f0iewdest \u00e6nig tacen\n\u00fee he me \u00feurh treowe to onsende,\nmin hearra \u00feurh hyldo. \u00fey ic \u00fee hyran ne cann,\nac \u00feu meaht \u00fee for\u00f0 faran. Ic h\u00e6bbe me f\u00e6stne geleafan\nup to \u00feam \u00e6lmihtegan gode \u00fee me mid his earmum worhte,\n545\nher mid handum sinum. He m\u00e6g me of his hean rice\ngeofian mid goda gehwilcum, \u00feeah he his gingran ne sende.\"\nWende hine wra\u00f0mod \u00fe\u00e6r he \u00fe\u00e6t wif geseah\non eor\u00f0rice Euan stondan,\nsceone gesceapene, cw\u00e6\u00f0 \u00fe\u00e6t scea\u00f0ena m\u00e6st\n550\neallum heora eaforum \u00e6fter si\u00f0\u00f0an\nwurde on worulde: \"Ic wat, inc waldend god\nabolgen wyr\u00f0, swa ic him \u00feisne bodscipe\nselfa secge, \u00feonne ic of \u00feys si\u00f0e cume\nofer langne weg, \u00fe\u00e6t git ne l\u00e6stan wel\n555\nhwilc \u00e6rende swa he easten hider\non \u00feysne si\u00f0 sende\u00f0. Nu sceal he sylf faran\nto incre andsware; ne m\u00e6g his \u00e6rende\nhis boda beodan; \u00fey ic wat \u00fe\u00e6t he inc abolgen wyr\u00f0,\nmihtig on mode. Gif \u00feu \u00feeah minum wilt,\n\u00fe\u00e6t \u00feu meaht swa wide ofer woruld ealle\ngeseon si\u00f0\u00f0an, and selfes stol\nherran \u00feines, and habban his hyldo for\u00f0.\nMeaht \u00feu Adame eft gestyran,\ngif \u00feu his willan h\u00e6fst and he \u00feinum wordum getryw\u00f0.\n570\nGif \u00feu him to so\u00f0e s\u00e6gst hwylce \u00feu selfa h\u00e6fst\nbisne on breostum, \u00fe\u00e6s \u00feu gebod godes\nlare l\u00e6stes, he \u00feone la\u00f0an stri\u00f0,\nyfel andwyrde an forl\u00e6te\u00f0\non breostcofan, swa wit him bu tu\n575\nan sped spreca\u00f0. Span \u00feu hine georne\n\u00fe\u00e6t he \u00feine lare l\u00e6ste, \u00fey l\u00e6s gyt la\u00f0 gode,\nincrum waldende, weor\u00f0an \u00feyrfen.\nGif \u00feu \u00fe\u00e6t angin fremest, idesa seo betste,\nforhele ic incrum herran \u00fe\u00e6t me hearmes swa fela\n580\nAdam gespr\u00e6c, eargra worda.\nTyh\u00f0 me untryow\u00f0a, cwy\u00f0 \u00fe\u00e6t ic seo teonum georn,\ngramum ambyhtsecg, nales godes engel.\nAc ic cann ealle swa geare engla gebyrdo,\nheah heofona gehlidu; w\u00e6s seo hwil \u00fe\u00e6s lang\n585\n\u00fe\u00e6t ic geornlice gode \u00feegnode\n\u00feurh holdne hyge, herran minum,\ndrihtne selfum; ne eom ic deofle gelic.\"\nL\u00e6dde hie swa mid ligenum and mid listum speon\nidese on \u00fe\u00e6t unriht, o\u00f0\u00fe\u00e6t hire on innan ongan\n590\nweallan wyrmes ge\u00feeaht, (h\u00e6fde hire wacran hige\nmetod gemearcod), \u00fe\u00e6t heo hire mod ongan\nl\u00e6tan \u00e6fter \u00feam larum; for\u00feon heo \u00e6t \u00feam la\u00f0an onfeng\nofer drihtnes word dea\u00f0es beames\nweorcsumne w\u00e6stm. Ne wear\u00f0 wyrse d\u00e6d\n595\nmonnum gemearcod! \u00fe\u00e6t is micel wundor\n\u00fe\u00e6t hit ece god \u00e6fre wolde\n\u00feeoden \u00feolian, \u00fe\u00e6t wurde \u00feegn swa monig\nforl\u00e6dd be \u00feam lygenum \u00fee for \u00feam larum com.\nHeo \u00fea \u00fe\u00e6s of\u00e6tes \u00e6t, alwaldan br\u00e6c\n600\nword and willan. \u00fea meahte heo wide geseon\n\u00feurh \u00fe\u00e6s la\u00f0an l\u00e6n \u00fee hie mid ligenum beswac,\ndearnenga bedrog, \u00fee hire for his d\u00e6dum com,\n\u00fe\u00e6t hire \u00feuhte hwitre heofon and eor\u00f0e,\nand eall \u00feeos woruld wlitigre, and geweorc godes\n605\nmicel and mihtig, \u00feeah heo hit \u00feurh monnes ge\u00feeaht\nne sceawode; ac se scea\u00f0a georne\nswicode ymb \u00fea sawle \u00fee hire \u00e6r \u00fea siene onlah,\n\u00fe\u00e6t heo swa wide wlitan meahte\nofer heofonrice. \u00fea se forhatena spr\u00e6c\n610\n\u00feurh feondscipe (nalles he hie freme l\u00e6rde):\n\"\u00feu meaht nu \u00fee self geseon, swa ic hit \u00fee secgan ne \u00feearf,\nEue seo gode, \u00fe\u00e6t \u00fee is ungelic\nwlite and w\u00e6stmas, si\u00f0\u00f0an \u00feu minum wordum getruwodest,\nl\u00e6stes mine lare. Nu scine\u00f0 \u00fee leoht fore\n615\ngl\u00e6dlic ongean \u00fe\u00e6t ic from gode brohte\nhwit of heofonum; nu \u00feu his hrinan meaht.\nS\u00e6ge Adame hwilce \u00feu gesih\u00f0e h\u00e6fst\n\u00feurh minne cime cr\u00e6fta. Gif giet \u00feurh cuscne siodo\nl\u00e6st mina lara, \u00feonne gife ic him \u00fe\u00e6s leohtes genog\n620\n\u00fe\u00e6s ic \u00fee swa godes gegired h\u00e6bbe.\nNe wite ic him \u00fea womcwidas, \u00feeah he his wyr\u00f0e ne sie\nto al\u00e6tanne; \u00fe\u00e6s fela he me la\u00f0es spr\u00e6c.\"\nSwa hire eaforan sculon \u00e6fter lybban:\n\u00feonne hie la\u00f0 gedo\u00f0, hie sculon lufe wyrcean,\n625\nbetan heora hearran hearmcwyde ond habban his hyldo for\u00f0.\n\u00fea gieng to Adame idesa scenost,\nwifa wlitegost \u00fee on woruld come,\nfor\u00feon heo w\u00e6s handgeweorc heofoncyninges,\n\u00feeah heo \u00fea dearnenga fordon wurde,\n630\nforl\u00e6d mid ligenum, \u00fe\u00e6t hie la\u00f0 gode\n\u00feurh \u00fe\u00e6s wra\u00f0an ge\u00feanc weor\u00f0an sceolden,\n\u00feurh \u00fe\u00e6s deofles searo dom forl\u00e6tan,\nhierran hyldo, hefonrices \u00feolian\nmonige hwile. Bi\u00f0 \u00feam men full wa\n635\n\u00fee hine ne warna\u00f0 \u00feonne he his geweald hafa\u00f0!\nSum heo hire on handum b\u00e6r, sum hire \u00e6t heortan l\u00e6g,\n\u00e6ppel uns\u00e6lga, \u00feone hire \u00e6r forbead\ndrihtna drihten, dea\u00f0beames ofet,\nand \u00fe\u00e6t word acw\u00e6\u00f0 wuldres aldor,\n640\n\u00fe\u00e6t \u00fe\u00e6t micle mor\u00f0 menn ne \u00feorfton\n\u00feegnas \u00feolian, ac he \u00feeoda gehwam\nhefonrice forgeaf, halig drihten,\nwidbradne welan, gif hie \u00feone w\u00e6stm an\nl\u00e6tan wolden \u00fee \u00fe\u00e6t la\u00f0e treow\n645\non his bogum b\u00e6r, bitre gefylled;\n\u00fe\u00e6t w\u00e6s dea\u00f0es beam \u00fee him drihten forbead.\nForlec hie \u00fea mid ligenum se w\u00e6s la\u00f0 gode,\non hete heofoncyninges, and hyge Euan,\nwifes wac ge\u00feoht, \u00fe\u00e6t heo ongan his wordum truwian,\n650\nl\u00e6stan his lare, and geleafan nom\n\u00fe\u00e6t he \u00fea bysene from gode brungen h\u00e6fde\n\u00fee he hire swa w\u00e6rlice wordum s\u00e6gde,\niewde hire tacen and treowa gehet,\nhis holdne hyge. \u00fea heo to hire hearran spr\u00e6c:\n655\n\"Adam, frea min, \u00feis ofet is swa swete, bli\u00f0e on breostum, and \u00fees boda sciene,\ngodes engel god, ic on his gearwan geseo\n\u00fe\u00e6t he is \u00e6rendsecg uncres hearran,\nhefoncyninges. His hyldo is unc betere\n660\nto gewinnanne \u00feonne his wi\u00f0ermedo.\nGif \u00feu him heod\u00e6g wuht hearmes gesprece,\nhe forgif\u00f0 hit \u00feeah, gif wit him geongordom\nl\u00e6stan willa\u00f0. Hw\u00e6t scal \u00fee swa la\u00f0lic stri\u00f0\nwi\u00f0 \u00feines hearran bodan? Unc is his hyldo \u00feearf;\n665\nhe m\u00e6g unc \u00e6rendian to \u00feam alwaldan,\nheofoncyninge. Ic m\u00e6g heonon geseon\nhw\u00e6r he sylf site\u00f0, (\u00fe\u00e6t is su\u00f0 and east),\nwelan bewunden, se \u00f0as woruld gesceop;\ngeseo ic him his englas ymbe hweorfan\n670\nmid fe\u00f0erhaman, ealra folca m\u00e6st,\nwereda wynsumast. Hwa meahte me swelc gewit gifan,\ngif hit gegnunga god ne onsende,\nheofones waldend? Gehyran m\u00e6g ic rume\nand swa wide geseon on woruld ealle\n675\nofer \u00feas sidan gesceaft, ic m\u00e6g swegles gamen\ngehyran on heofnum. Wear\u00f0 me on hige leohte\nutan and innan, si\u00f0\u00fean ic \u00fe\u00e6s of\u00e6tes onbat.\nNu h\u00e6bbe ic his her on handa, herra se goda;\ngife ic hit \u00fee georne. Ic gelyfe \u00fe\u00e6t hit from gode come,\n680\nbroht from his bysene, \u00fe\u00e6s me \u00fees boda s\u00e6gde\nw\u00e6rum wordum. Hit nis wuhte gelic\nelles on eor\u00f0an, buton swa \u00fees ar s\u00e6ge\u00f0,\n\u00fe\u00e6t hit gegnunga from gode come.\"\nHio spr\u00e6c him \u00feicce to and speon hine ealne d\u00e6g\n685\non \u00fea dimman d\u00e6d \u00fe\u00e6t hie drihtnes heora\nwillan br\u00e6con. Stod se wra\u00f0a boda,\nlegde him lustas on and mid listum speon,\nfylgde him frecne; w\u00e6s se feond full neah\n\u00fee on \u00fea frecnan fyrd gefaren h\u00e6fde\n690\nofer langne weg; leode hogode\non \u00fe\u00e6t micle mor\u00f0 men forweorpan,\nforl\u00e6ran and forl\u00e6dan, \u00fe\u00e6t hie l\u00e6n godes,\n\u00e6lmihtiges gife an forleten,\nheofenrices geweald. Hw\u00e6t, se hellscea\u00f0a\n695\ngearwe wiste \u00fe\u00e6t hie godes yrre\nhabban sceoldon and hellge\u00fewing,\n\u00feone nearwan ni\u00f0 niede onfon,\nsi\u00f0\u00f0an hie gebod godes forbrocen h\u00e6fdon,\n\u00fea he forl\u00e6rde mid ligenwordum\n700\nto \u00feam unr\u00e6de idese sciene,\nwifa wlitegost, \u00fe\u00e6t heo on his willan spr\u00e6c,\nw\u00e6s him on helpe handweorc godes\nto forl\u00e6ranne.\nHeo spr\u00e6c \u00f0a to Adame idesa sceonost\n705\nful \u00feiclice, o\u00f0 \u00feam \u00feegne ongan\nhis hige hweorfan, \u00fe\u00e6t he \u00feam gehate getruwode\n\u00fee him \u00fe\u00e6t wif wordum s\u00e6gde.\nHeo dyde hit \u00feeah \u00feurh holdne hyge, nyste \u00fe\u00e6t \u00fe\u00e6r hearma swa fela,\nfyrenearfe\u00f0a, fylgean sceolde\n710\nmonna cynne, \u00fe\u00e6s heo on mod genam\n\u00fe\u00e6t heo \u00fe\u00e6s la\u00f0an bodan larum hyrde,\nac wende \u00fe\u00e6t heo hyldo heofoncyninges\nworhte mid \u00feam wordum \u00fee heo \u00feam were swelce\ntacen o\u00f0iewde and treowe gehet,\n715\no\u00f0\u00fe\u00e6t Adame innan breostum\nhis hyge hwyrfde and his heorte ongann\nwendan to hire willan. He \u00e6t \u00feam wife onfeng\nhelle and hinnsi\u00f0, \u00feeah hit n\u00e6re haten swa,\nac hit ofetes noman agan sceolde;\n720\nhit w\u00e6s \u00feeah dea\u00f0es swefn and deofles gespon,\nhell and hinnsi\u00f0 and h\u00e6le\u00f0a forlor,\nmenniscra mor\u00f0, \u00fe\u00e6t hie to mete d\u00e6don,\nofet unf\u00e6le. Swa hit him on innan com,\nhran \u00e6t heortan, hloh \u00fea and plegode\n725\nboda bitre gehugod, s\u00e6gde begra \u00feanc\nhearran sinum: \"Nu h\u00e6bbe ic \u00feine hyldo me\nwitode geworhte, and \u00feinne willan gel\u00e6st\nto ful monegum d\u00e6ge. Men synt forl\u00e6dde,\nAdam and Eue. Him is unhyldo\n730\nwaldendes witod, nu hie wordcwyde his,\nlare forleton. For\u00feon hie leng ne magon\nhealdan heofonrice, ac hie to helle sculon\non \u00feone sweartan si\u00f0. Swa \u00feu his sorge ne \u00feearft\nberan on \u00feinum breostum, \u00fe\u00e6r \u00feu gebunden ligst,\n735\nmurnan on mode, \u00fe\u00e6t her men bun\n\u00feone hean heofon, \u00feeah wit hearmas nu,\n\u00fereaweorc \u00feolia\u00f0, and \u00feystre land,\nand \u00feurh \u00fein micle mod monig forleton\non heofonrice heahgetimbro,\n740\ngodlice geardas. Unc wear\u00f0 god yrre\nfor\u00feon wit him noldon on heofonrice\nhnigan mid heafdum halgum drihtne\n\u00feurh geongordom; ac unc gegenge ne w\u00e6s\n\u00fe\u00e6t wit him on \u00feegnscipe \u00feeowian wolden.\n745\nFor\u00feon unc waldend wear\u00f0 wra\u00f0 on mode,\non hyge hearde, and us on helle bedraf,\non \u00fe\u00e6t fyr fylde folca m\u00e6ste,\nand mid handum his eft on heofonrice\nrihte rodorstolas and \u00fe\u00e6t rice forgeaf\n750\nmonna cynne. M\u00e6g \u00fein mod wesan\nbli\u00f0e on breostum, for\u00feon her synt bu tu gedon:\nge \u00fe\u00e6t h\u00e6le\u00f0a bearn heofonrice sculon\nleode forl\u00e6tan and on \u00fe\u00e6t lig to \u00fee\nhate hweorfan, eac is hearm gode,\n755\nmodsorg gemacod. Swa hw\u00e6t swa wit her mor\u00f0res \u00feolia\u00f0,\nhit is nu Adame eall forgolden\nmid hearran hete and mid h\u00e6le\u00f0a forlore,\nmonnum mid mor\u00f0es cwealme. For\u00feon is min mod geh\u00e6led,\nhyge ymb heortan gerume, ealle synt uncre hearmas gewrecene\n760\nla\u00f0es \u00fe\u00e6t wit lange \u00feoledon. Nu wille ic eft \u00feam lige near,\nSatan ic \u00fe\u00e6r secan wille; he is on \u00fe\u00e6re sweartan helle\nh\u00e6ft mid hringa gesponne.\" Hwearf him eft ni\u00f0er\nboda bitresta; sceolde he \u00fea bradan ligas\nsecan helle gehli\u00f0o, \u00fe\u00e6r his hearra l\u00e6g\n765\nsimon ges\u00e6led. Sorgedon ba twa,\nAdam and Eue, and him oft betuh\ngnornword gengdon; godes him ondredon,\nheora herran hete, heofoncyninges ni\u00f0\nswi\u00f0e ons\u00e6ton; selfe forstodon\n770\nhis word onwended. \u00fe\u00e6t wif gnornode,\nhof hreowigmod, (h\u00e6fde hyldo godes,\nlare forl\u00e6ten), \u00fea heo \u00fe\u00e6t leoht geseah\nellor scri\u00f0an \u00fe\u00e6t hire \u00feurh untreowa\ntacen iewde se him \u00feone teonan ger\u00e6d,\n775\n\u00fe\u00e6t hie helle ni\u00f0 habban sceoldon,\nhyn\u00f0a unrim; for\u00feam him higesorga\nburnon on breostum. Hwilum to gebede feollon\nsinhiwan somed, and sigedrihten\ngodne gretton and god nemdon,\n780\nheofones waldend, and hine b\u00e6don\n\u00fe\u00e6t hie his hearmsceare habban mosten,\ngeorne fulgangan, \u00fea hie godes h\u00e6fdon\nbodscipe abrocen. Bare hie gesawon\nheora lichaman; n\u00e6fdon on \u00feam lande \u00fea giet\n785\ns\u00e6l\u00f0a gesetena, ne hie sorge wiht\nweorces wiston, ac hie wel meahton\nlibban on \u00feam lande, gif hie wolden lare godes\nforweard fremman. \u00fea hie fela spr\u00e6con\nsorhworda somed, sinhiwan twa.\n790\nAdam gem\u00e6lde and to Euan spr\u00e6c:\n\"Hw\u00e6t, \u00feu Eue, h\u00e6fst yfele gemearcod\nuncer sylfra si\u00f0. Gesyhst \u00feu nu \u00fea sweartan helle\ngr\u00e6dige and gifre. Nu \u00feu hie grimman meaht\nheonane gehyran. Nis heofonrice\n795\ngelic \u00feam lige, ac \u00feis is landa betst,\n\u00fe\u00e6t wit \u00feurh uncres hearran \u00feanc habban moston,\n\u00fe\u00e6r \u00feu \u00feam ne hierde \u00fee unc \u00feisne hearm ger\u00e6d,\n\u00fe\u00e6t wit waldendes word forbr\u00e6con,\nheofoncyninges. Nu wit hreowige magon\n800\nsorgian for \u00feis si\u00f0e. For\u00feon he unc self bebead\n\u00fe\u00e6t wit unc wite warian sceolden,\nhearma m\u00e6stne. Nu slit me hunger and \u00feurst\nbitre on breostum, \u00fe\u00e6s wit begra \u00e6r\nw\u00e6ron orsorge on ealle tid.\n805\nHu sculon wit nu libban o\u00f0\u00f0e on \u00feys lande wesan,\ngif her wind cym\u00f0, westan o\u00f0\u00f0e eastan,\nsu\u00f0an o\u00f0\u00f0e nor\u00f0an? Gesweorc up f\u00e6re\u00f0,\ncyme\u00f0 h\u00e6gles scur hefone getenge,\nf\u00e6re\u00f0 forst on gemang, se by\u00f0 fyrnum ceald.\n810\nHwilum of heofnum hate scine\u00f0,\nblic\u00f0 \u00feeos beorhte sunne, and wit her baru standa\u00f0,\nunwered w\u00e6do. Nys unc wuht beforan\nto scursceade, ne sceattes wiht\nto mete gemearcod, ac unc is mihtig god,\n815\nwaldend wra\u00f0mod. To hwon sculon wit weor\u00f0an nu?\nNu me m\u00e6g hreowan \u00fe\u00e6t ic b\u00e6d heofnes god,\nwaldend \u00feone godan, \u00fe\u00e6t he \u00fee her worhte to me\nof li\u00f0um minum, nu \u00feu me forl\u00e6red h\u00e6fst\non mines herran hete. Swa me nu hreowan m\u00e6g\n820\n\u00e6fre to aldre \u00fe\u00e6t ic \u00fee minum eagum geseah.\"\n\u00f0a spr\u00e6c Eue eft, idesa scienost,\nwifa wlitegost; hie w\u00e6s geweorc godes,\n\u00feeah heo \u00fea on deofles cr\u00e6ft bedroren wurde:\n\"\u00feu meaht hit me witan, wine min Adam,\n825\nwordum \u00feinum; hit \u00fee \u00feeah wyrs ne m\u00e6g\non \u00feinum hyge hreowan \u00feonne hit me \u00e6t heortan de\u00f0.\"\nHire \u00fea Adam andswarode:\n\"Gif ic waldendes willan cu\u00f0e,\nhw\u00e6t ic his to hearmsceare habban sceolde,\n830\nne gesawe \u00feu no sniomor, \u00feeah me on s\u00e6 wadan\nhete heofones god heonone nu \u00fea,\non flod faran, n\u00e6re he firnum \u00fe\u00e6s deop,\nmerestream \u00fe\u00e6s micel, \u00fe\u00e6t his o min mod getweode,\nac ic to \u00feam grunde genge, gif ic godes meahte\n835\nwillan gewyrcean. Nis me on worulde niod\n\u00e6niges \u00feegnscipes, nu ic mines \u00feeodnes hafa\nhyldo forworhte, \u00fe\u00e6t ic hie habban ne m\u00e6g.\nAc wit \u00feus baru ne magon bu tu \u00e6tsomne\nwesan to wuhte. Uton gan on \u00feysne weald innan,\n840\non \u00feisses holtes hleo.\" Hwurfon hie ba twa,\ntogengdon gnorngende on \u00feone grenan weald,\ns\u00e6ton onsundran, bidan selfes gesceapu\nheofoncyninges, \u00fea hie \u00fea habban ne moston\n\u00fee him \u00e6r forgeaf \u00e6lmihtig god.\n845\n\u00fea hie heora lichoman leafum be\u00feeahton,\nweredon mid \u00f0y wealde, w\u00e6da ne h\u00e6fdon;\nac hie on gebed feollon bu tu \u00e6tsomne\nmorgena gehwilce, b\u00e6don mihtigne\n\u00fe\u00e6t hie ne forgeate god \u00e6lmihtig,\n850\nand him gewisade waldend se goda,\nhu hie on \u00feam leohte for\u00f0 libban sceolden.\n\u00fea com feran frea \u00e6lmihtig\nofer midne d\u00e6g, m\u00e6re \u00feeoden,\non neorxnawang neode sine;\n855\nwolde neosian nergend usser,\nbilwit f\u00e6der, hw\u00e6t his bearn dyde;\nwiste forworhte \u00feam he \u00e6r wlite sealde.\nGewitan him \u00fea gangan geomermode\nunder beamsceade bl\u00e6de bereafod,\n860\nhyddon hie on heolstre, \u00fea hie halig word\ndrihtnes gehyrdon, and ondredon him.\n\u00fea sona ongann swegles aldor\nweard ahsian woruldgesceafta,\nhet him recene to rice \u00feeoden\n865\nhis sunu gangan. Him \u00fea sylfa oncw\u00e6\u00f0,\nhean hleo\u00f0rade hr\u00e6gles \u00feearfa:\n\"Ic wreo me her w\u00e6da leasne,\nliffrea min, leafum \u00feecce.\nScyldfull mine scea\u00f0en is me sare,\n870\nfrecne on ferh\u00f0e; ne dear nu for\u00f0 gan\nfor \u00f0e andweardne. Ic eom eall eall nacod.\"\nHim \u00f0a \u00e6dre god andswarede:\n\"Saga me \u00fe\u00e6t, sunu min, for hwon secest \u00f0u\nsceade sceomiende? \u00feu sceonde \u00e6t me\n875\nfur\u00f0um ne anfenge, ac gefean eallum.\nFor hwon wast \u00feu wean and wrihst sceome,\ngesyhst sorge, and \u00fein sylf \u00feecest\nlic mid leafum, sagast lifceare\nhean hygegeomor, \u00fe\u00e6t \u00fee sie hr\u00e6gles \u00feearf,\n880\nnym\u00fee \u00f0u \u00e6ppel \u00e6nne byrgde\nof \u00f0am wudubeame \u00fee ic \u00fee wordum forbead?\"\nHim \u00fea Adam eft andswarode:\n\"Me \u00f0a bl\u00e6da on hand bryd gesealde,\nfreolucu f\u00e6mne, freadrihten min,\n885\n\u00f0e ic \u00fee on teonan ge\u00feah. Nu ic \u00fe\u00e6s tacen wege\nsweotol on me selfum. Wat ic sorga \u00f0y ma.\"\n\u00f0a \u00f0\u00e6s Euan fr\u00e6gn \u00e6lmihtig god:\n\"Hw\u00e6t druge \u00feu, dohtor, duge\u00fea genohra,\nniwra gesceafta neorxnawanges,\n890\ngrowendra gifa, \u00fea \u00feu gitsiende\non beam gripe, bl\u00e6da name\non treowes telgum, and me on teonan\n\u00e6te \u00fea unfreme, Adame sealdest\nw\u00e6stme \u00fea inc w\u00e6ron wordum minum\n895\nf\u00e6ste forbodene?\" Him \u00fea freolecu m\u00e6g,\nides \u00e6wiscmod andswarode:\n\"Me n\u00e6dre beswac and me neodlice\nto forsceape scyhte and to scyldfrece,\nfah wyrm \u00feurh f\u00e6gir word, o\u00f0\u00fe\u00e6t ic fraco\u00f0lice\n900\nfeondr\u00e6s gefremede, f\u00e6h\u00f0e geworhte,\nand \u00fea reafode, swa hit riht ne w\u00e6s,\nbeam on bearwe and \u00fea bl\u00e6da \u00e6t.\"\n\u00fea n\u00e6dran sceop nergend usser,\nfrea \u00e6lmihtig fagum wyrme\nincrum orlegni\u00f0 a \u00feenden stande\u00f0\nworuld under wolcnum. Nu \u00feu wast and canst,\nla\u00f0 leodscea\u00f0a, hu \u00feu lifian scealt.\"\n\u00f0a to Euan god yrringa spr\u00e6c:\n\"Wend \u00fee from wynne! \u00feu scealt w\u00e6pnedmen\n920\nwesan on gewealde, mid weres egsan\nhearde genearwad, hean \u00ferowian\n\u00feinra d\u00e6da gedwild, dea\u00f0es bidan,\nand \u00feurh wop and heaf on woruld cennan\n\u00feurh sar micel sunu and dohtor.\"\nduge\u00f0um bed\u00e6led; \u00fee is gedal witod\nlices and sawle. Hw\u00e6t, \u00feu la\u00f0lice\nwrohte onstealdest; for\u00feon \u00feu winnan scealt\nand on eor\u00f0an \u00fee \u00feine andlifne\nselfa ger\u00e6can, wegan swatig hleor,\n935\n\u00feinne hlaf etan, \u00feenden \u00feu her leofast,\no\u00f0\u00fe\u00e6t \u00fee to heortan hearde gripe\u00f0\nadl unli\u00f0e \u00fee \u00feu on \u00e6ple \u00e6r\nselfa forswulge; for\u00feon \u00feu sweltan scealt.\"\nHw\u00e6t, we nu gehyra\u00f0 hw\u00e6r us hearmstafas\n940\nwra\u00f0e onwocan and woruldyrm\u00f0o.\nHie \u00fea wuldres weard w\u00e6dum gyrede,\nscyppend usser; het heora sceome \u00feeccan\nfrea frumhr\u00e6gle; het hie from hweorfan\nneorxnawange on nearore lif.\n945\nHim on laste beleac li\u00f0sa and wynna\nhihtfulne ham halig engel\nbe frean h\u00e6se fyrene sweorde;\nne m\u00e6g \u00fe\u00e6r inwitfull \u00e6nig geferan\nwomscyldig mon, ac se weard hafa\u00f0\n950\nmiht and streng\u00f0o, se \u00fe\u00e6t m\u00e6re lif\nduge\u00f0um deore drihtne healde\u00f0.\nNo hw\u00e6\u00f0re \u00e6lmihtig ealra wolde\nAdame and Euan arna ofteon,\nf\u00e6der \u00e6t frym\u00f0e, \u00feeah \u00fee hie him from swice,\n955\nac he him to frofre let hw\u00e6\u00f0ere for\u00f0 wesan\nhyrstedne hrof halgum tunglum\nand him grundwelan ginne sealde;\nhet \u00feam sinhiwum s\u00e6s and eor\u00f0an\ntuddorteondra teohha gehwilcre\n960\nto woruldnytte w\u00e6stmas fedan.\nGes\u00e6ton \u00fea \u00e6fter synne sorgfulre land,\neard and e\u00f0yl unspedigran\nfremena gehwilcre \u00feonne se frumstol w\u00e6s\n\u00fee hie \u00e6fter d\u00e6de of adrifen wurdon.\n965\nOngunnon hie \u00fea be godes h\u00e6se\nbearn astrienan, swa him metod bebead.\nAdames and Euan aforan w\u00e6ron\nfreolicu twa frumbearn cenned,\nCain and Abel. Us cy\u00f0a\u00f0 bec,\n970\nhu \u00fea d\u00e6dfruman duge\u00fea stryndon,\nwelan and wiste, willgebro\u00f0or.\nO\u00f0er his to eor\u00f0an elnes tilode,\nse w\u00e6s \u00e6rboren; o\u00f0er \u00e6hte heold\nf\u00e6der on fultum, o\u00f0\u00fe\u00e6t for\u00f0 gewat\n975\nd\u00e6grimes worn. Hie \u00fea drihtne lac\nbegen brohton. Brego engla beseah\non Abeles gield eagum sinum,\ncyning eallwihta, Caines ne wolde\ntiber sceawian. \u00fe\u00e6t w\u00e6s torn were\n980\nhefig \u00e6t heortan. Hygew\u00e6lm asteah\nbeorne on breostum, blatende ni\u00f0,\nyrre for \u00e6fstum. He \u00fea unr\u00e6den\nfolmum gefremede, freom\u00e6g ofsloh,\nbro\u00f0or sinne, and his blod ageat,\nre\u00f0e w\u00e6stme. R\u00e6hton wide\ngeond wer\u00feeoda wrohtes telgan,\nhrinon hearmtanas hearde and sare\ndrihta bearnum, (do\u00f0 gieta swa),\nof \u00feam brad blado bealwa gehwilces\n995\nsprytan ongunnon. We \u00fe\u00e6t spell magon,\nw\u00e6lgrimme wyrd, wope cwi\u00f0an,\nnales holunge; ac us hearde sceod\nfreolecu f\u00e6mne \u00feurh forman gylt\n\u00fee wi\u00f0 metod \u00e6fre men gefremeden,\n1000\neor\u00f0buende, si\u00f0\u00f0an Adam wear\u00f0\nof godes mu\u00f0e gaste eacen.\n\u00f0a worde fr\u00e6gn wuldres aldor\nCain, hw\u00e6r Abel eor\u00f0an w\u00e6re.\nHim \u00f0a se cystleasa cwealmes wyrhta\n1005\n\u00e6dre \u00e6fter \u00feon andswarode:\n\"Ne can ic Abeles or ne fore,\nhleom\u00e6ges si\u00f0, ne ic hyrde w\u00e6s\nbro\u00f0er mines.\" Him \u00fea brego engla,\ngodspedig gast gean \u00feingade:\n1010\n\"Hw\u00e6t, befealdest \u00feu folmum \u00feinum\nwra\u00f0um on w\u00e6lbedd w\u00e6rf\u00e6stne rinc,\nbro\u00f0or \u00feinne, and his blod to me\ncleopa\u00f0 and cige\u00f0. \u00feu \u00fe\u00e6s cwealmes scealt\nwite winnan and on wr\u00e6c hweorfan,\n1015\nawyrged to widan aldre. Ne sele\u00f0 \u00fee w\u00e6stmas eor\u00f0e\nwlitige to woruldnytte, ac heo w\u00e6ldreore swealh\nhalge of handum \u00feinum; for\u00feon heo \u00fee hro\u00f0ra oftih\u00f0,\ngl\u00e6mes grene folde. \u00feu scealt geomor hweorfan,\narleas of earde \u00feinum, swa \u00feu Abele wurde\n1020\nto feorhbanan; for\u00feon \u00feu flema scealt\nwidlast wrecan, winemagum la\u00f0.\"\nHim \u00fea \u00e6dre Cain andswarode:\n\"Ne \u00feearf ic \u00e6nigre are wenan\non woruldrice, ac ic forworht h\u00e6bbe,\n1025\nheofona heahcyning, hyldo \u00feine,\nlufan and freode; for\u00feon ic lastas sceal\nwean on wenum wide lecgan,\nhwonne me gemitte manscyldigne,\nse me feor o\u00f0\u00f0e neah f\u00e6h\u00f0e gemonige,\n1030\nbro\u00f0orcwealmes. Ic his blod ageat,\ndreor on eor\u00f0an. \u00feu to d\u00e6ge \u00feissum\nademest me fram dugu\u00f0e and adrifest from\nearde minum. Me to aldorbanan\nweor\u00f0e\u00f0 wra\u00f0ra sum. Ic awyrged sceal,\n1035\n\u00feeoden, of gesyh\u00f0e \u00feinre hweorfan.\"\nHim \u00fea selfa oncw\u00e6\u00f0 sigora drihten:\n\"Ne \u00feearft \u00f0u \u00fee ondr\u00e6dan dea\u00f0es brogan,\nfeorhcwealm nu giet, \u00feeah \u00feu from scyle\nfreomagum feor fah gewitan.\nfreo\u00f0obeacen frea, \u00fey l\u00e6s hine feonda hwilc\nmid gu\u00f0\u00fer\u00e6ce gretan dorste\nfeorran o\u00f0\u00f0e nean. Heht \u00fea from hweorfan\nmeder and magum manscyldigne,\ncnosle sinum. Him \u00fea Cain gewat\n1050\ngongan geomormod gode of gesyh\u00f0e,\nwineleas wrecca, and him \u00fea wic geceas\neastlandum on, e\u00f0elstowe\nf\u00e6dergeardum feor, \u00fe\u00e6r him freolecu m\u00e6g,\nides \u00e6fter \u00e6\u00f0elum eaforan fedde.\nbotlgestreonum. Him bryda twa,\nidesa on e\u00f0le eaforan feddon,\nAda and Sella; \u00feara anum w\u00e6s\nIabal noma, se \u00feurh gleawne ge\u00feanc\nherbuendra hearpan \u00e6rest\n1080\nhandum sinum hlyn awehte,\nswinsigende sweg, sunu Lamehes.\nSwylce on \u00f0\u00e6re m\u00e6g\u00f0e maga w\u00e6s haten\non \u00fea ilcan tid Tubalcain,\nse \u00feurh snytro sped smi\u00f0cr\u00e6ftega w\u00e6s,\n1085\nand \u00feurh modes gemynd monna \u00e6rest,\nsunu Lamehes, sulhgeweorces\nfruma w\u00e6s ofer foldan, si\u00f0\u00f0an folca bearn \u00e6res cu\u00f0on and isernes,\nburhsittende, brucan wide.\n1090\n\u00fea his wifum tw\u00e6m wordum s\u00e6gde\nLameh seolfa, leofum gebeddum,\nAdan and Sellan unarlic spel:\n\"Ic on mor\u00f0or ofsloh minra sumne\nhyldemaga; honda gewemde\n1095\non Caines cwealme mine,\nfylde mid folmum f\u00e6der Enoses,\nordbanan Abeles, eor\u00f0an sealde\nw\u00e6ldreor weres. Wat ic gearwe\n\u00fe\u00e6t \u00feam lichryre on last cyme\u00f0\n1100\nso\u00f0cyninges seofonfeald wracu,\nmicel \u00e6fter mane. Min sceal swi\u00f0or\nmid grimme gryre golden wur\u00f0an\nfyll and feorhcwealm, \u00feonne ic for\u00f0 scio.\"\n\u00fea wear\u00f0 Adame on Abeles gyld\n1105\neafora on e\u00f0le o\u00feer feded,\nso\u00f0f\u00e6st sunu, \u00feam w\u00e6s Seth noma.\nSe w\u00e6s eadig and his yldrum \u00f0ah\nfreolic to frofre, f\u00e6der and meder,\nAdames and Euan, w\u00e6s Abeles gield\n1110\non woruldrice. \u00fea word acw\u00e6\u00f0\nord moncynnes: \"Me ece sunu sealde selfa sigora waldend,\nlifes aldor on leofes st\u00e6l,\n\u00fe\u00e6s \u00fee Cain ofsloh, and me cearsorge\n1115\nmid \u00feys magotimbre of mode asceaf\n\u00feeoden usser. Him \u00fe\u00e6s \u00feanc sie!\"\nAdam h\u00e6fde, \u00fea he eft ongan\nhim to e\u00f0elst\u00e6fe o\u00f0res strienan\nbearnes be bryde, beorn ellenrof,\n1120\nXXXandC \u00feisses lifes,\nwintra on worulde. Us gewritu secga\u00f0\n\u00fe\u00e6t her eahtahund iecte si\u00f0\u00f0an\nm\u00e6g\u00f0um and m\u00e6cgum m\u00e6gburg sine\nAdam on eor\u00f0an; ealra h\u00e6fde\n1125\nnigenhund wintra\nand XXX eac, \u00fea he \u00feas woruld\n\u00feurh gastgedal ofgyfan sceolde.\nHim on laste Seth leod weardode,\neafora \u00e6fter yldrum; e\u00feelstol heold\n1130\nand wif begeat. Wintra h\u00e6fde\nfif and hundteontig \u00fea he fur\u00f0um ongan\nhis m\u00e6gburge men geicean\nsunum and dohtrum. Sethes eafora\nse yldesta w\u00e6s Enos haten;\n1135\nse nemde god ni\u00f0\u00fea bearna\n\u00e6rest ealra, si\u00f0\u00f0an Adam stop\non grene gr\u00e6s gaste geweor\u00f0ad.\nSeth w\u00e6s ges\u00e6lig; si\u00f0\u00f0an strynde\nseofon winter her suna and dohtra\n1140\nond eahtahund. Ealra h\u00e6fde XII and nigonhund, \u00fea seo tid gewear\u00f0\n\u00fe\u00e6t he fri\u00f0gedal fremman sceolde.\nHim \u00e6fter heold, \u00fea he of worulde gewat,\nEnos yrfe, si\u00f0\u00f0an eor\u00f0e swealh\n1145\ns\u00e6dberendes Sethes lice.\nHe w\u00e6s leof gode and lifde her\nwintra hundnigontig \u00e6r he be wife her \u00feurh gebedscipe bearn astrynde;\nhim \u00fea cenned wear\u00f0 Cainan \u00e6rest\n1150\neafora on e\u00f0le. Si\u00f0\u00f0an eahtahund\nand fiftyno on fri\u00f0o drihtnes\ngleawferh\u00f0 h\u00e6le\u00f0 geogo\u00f0e strynde,\nsuna and dohtra; swealt, \u00fea he h\u00e6fde,\nfrod fyrnwita, V and nigonhund.\n1155\n\u00fe\u00e6re cneorisse w\u00e6s Cainan si\u00f0\u00f0an\n\u00e6fter Enose aldordema,\nweard and wisa. Wintra h\u00e6fde\nefne hundseofontig \u00e6r him sunu woce.\n\u00fea wear\u00f0 on e\u00f0le eafora feded,\n1160\nmago Cainanes, Malalehel w\u00e6s haten.\nSi\u00f0\u00f0an eahtahund \u00e6\u00f0elinga rim\nand feowertig eac feorum geicte\nEnoses sunu. Ealra nigonhund\nwintra h\u00e6fde \u00fea he woruld ofgeaf\n1165\nand tyne eac, \u00fea his tidd\u00e6ge\nunder rodera rum rim w\u00e6s gefylled.\nHim on laste heold land and yrfe\nMalalehel si\u00f0\u00f0an missera worn.\nSe frumgara fif and sixtig\n1170\nwintra h\u00e6fde \u00fea he be wife ongann\nbearna strynan. Him bryd sunu\nmeowle to monnum brohte. Se maga w\u00e6s\non his m\u00e6g\u00f0e, mine gefr\u00e6ge,\nguma on geogo\u00f0e, Iared haten.\n1175\nLifde si\u00f0\u00f0an and lissa breac\nMalalehel lange, mondreama her,\nworuldgestreona. Wintra h\u00e6fde\nfif and hundnigontig, \u00fea he for\u00f0 gewat,\nand eahtahund; eaforan l\u00e6fde\n1180\nland and leodweard. Longe si\u00f0\u00f0an\nGeared gumum gold brittade.\nSe eorl w\u00e6s \u00e6\u00f0ele, \u00e6f\u00e6st h\u00e6le\u00f0,\nand se frumgar his freomagum leof.\nFif and hundteontig on fyore lifde\n1185\nwintra gebidenra on woruldrice\nand syxtig eac \u00fea seo s\u00e6l gewear\u00f0\n\u00fe\u00e6t his wif sunu on woruld brohte;\nse eafora w\u00e6s Enoc haten,\nfreolic frumbearn. F\u00e6der her \u00fea gyt\n1190\nhis cynnes for\u00f0 cneorim icte, eaforan eahtahund; ealra h\u00e6fde V and syxtig, \u00fea he for\u00f0 gewat,\nand nigonhund eac nihtgerimes,\nwine frod wintres, \u00fea he \u00feas woruld ofgeaf\n1195\nond Geared \u00fea gleawum l\u00e6fde\nland and leodweard, leofum rince.\nEnoch si\u00f0\u00f0an ealdordom ahof,\nfreo\u00f0osped folces wisa, nalles feallan let\ndom and drihtscipe,\n1200\n\u00feenden he hyrde w\u00e6s heafodmaga.\nBreac bl\u00e6ddaga, bearna strynde\n\u00fereohund wintra. Him w\u00e6s \u00feeoden hold,\nrodera waldend. Se rinc heonon\non lichoman lisse sohte,\n1205\ndrihtnes dugu\u00f0e, nales dea\u00f0e swealt\nmiddangeardes, swa her men do\u00fe,\ngeonge and ealde, \u00feonne him god heora\n\u00e6hta and \u00e6twist eor\u00f0an gestreona\non genime\u00f0 and heora aldor somed,\n1210\nac he cwic gewat mid cyning engla\nof \u00feyssum l\u00e6nan life feran\non \u00feam gearwum \u00fee his gast onfeng\n\u00e6r hine to monnum modor brohte.\nHe \u00feam yldestan eaforan l\u00e6fde\n1215\nfolc, frumbearne; V and syxtig\nwintra h\u00e6fde \u00fea he woruld ofgeaf,\nand eac III hund. \u00ferage si\u00f0\u00f0an\nMathusal heold maga yrfe,\nse on lichoman lengest \u00feissa\n1220\nworulddreama breac. Worn gestrynde\n\u00e6r his swyltd\u00e6ge suna and dohtra;\nh\u00e6fde frod h\u00e6le, \u00fea he from sceolde\nni\u00fe\u00feum hweorfan, nigonhund wintra\nand hundseofontig to. Sunu \u00e6fter heold,\n1225\nLamech leodgeard, lange si\u00f0\u00f0an\nworuld bryttade. Wintra h\u00e6fde\ntwa and hundteontig \u00fea seo tid gewear\u00f0\n\u00fe\u00e6t se eorl ongan \u00e6\u00f0ele cennan,\nsunu and dohtor. Si\u00f0\u00f0an lifde\n1230\nfif and hundnigontig, frea moniges breac\nwintra under wolcnum, werodes aldor, andV hund eac; heold \u00fe\u00e6t folc teala,\nbearna strynde, him byras wocan, eaforan and idesa. He \u00feone yldestan\n1235\nNoe nemde, se ni\u00f0\u00f0um \u00e6r\nland bryttade si\u00f0\u00f0an Lamech gewat.\nH\u00e6fde \u00e6\u00f0elinga aldorwisa\nV hund wintra \u00fea he fur\u00f0um ongan\nbearna strynan, \u00fe\u00e6s \u00fee bec cwe\u00f0a\u00fe.\n1240\nSem w\u00e6s haten sunu Noes,\nse yldesta, o\u00f0er Cham,\n\u00feridda Iafeth. \u00feeoda tymdon\nrume under roderum, rim miclade\nmonna m\u00e6g\u00f0e geond middangeard\n1245\nsunum and dohtrum. \u00f0a giet w\u00e6s Sethes cynn,\nleofes leodfruman on lufan swi\u00f0e\ndrihtne dyre and domeadig,\no\u00f0\u00fe\u00e6t bearn godes bryda ongunnon\non Caines cynne secan,\n1250\nwergum folce, and him \u00fe\u00e6r wif curon\nofer metodes est monna eaforan,\nscyldfulra m\u00e6g\u00f0 scyne and f\u00e6gere.\n\u00fea reordade rodora waldend\nwra\u00f0 moncynne and \u00fea worde cw\u00e6\u00f0:\n1255\n\"Ne syndon me on ferh\u00f0e freo from gewitene\ncneorisn Caines, ac me \u00fe\u00e6t cynn hafa\u00f0\nsare abolgen. Nu me Sethes bearn\ntorn niwia\u00f0 and him to nima\u00f0\nm\u00e6ge\u00f0 to gem\u00e6ccum minra feonda;\n1260\n\u00fe\u00e6r wifa wlite onwod grome,\nidesa ansien, and ece feond\nfolcdriht wera, \u00fea \u00e6r on fri\u00f0e w\u00e6ron.\"\nSi\u00f0\u00f0an hundtwelftig geteled rime\nwintra on worulde wr\u00e6ce bisgodon\n1265\nf\u00e6ge \u00feeoda, hwonne frea wolde\non w\u00e6rlogan wite settan\nand on dea\u00f0 slean d\u00e6dum scyldige\ngigantm\u00e6cgas, gode unleofe,\nmicle manscea\u00f0an, metode la\u00f0e.\n1270\n\u00fea geseah selfa sigoro waldend\nhw\u00e6t w\u00e6s monna manes on eor\u00f0an\nand \u00fe\u00e6t hie w\u00e6ron womma \u00f0riste,\ninwitfulle. He \u00fe\u00e6t unf\u00e6gere\nwera cneorissum gewrecan \u00feohte,\n1275\nforgripan gumcynne grimme and sare,\nheardum mihtum. Hreaw hine swi\u00f0e\n\u00fe\u00e6t he folcm\u00e6g\u00fea fruman aweahte,\n\u00e6\u00f0elinga ord, \u00fea he Adam sceop,\ncw\u00e6\u00f0 \u00fe\u00e6t he wolde for wera synnum\n1280\neall a\u00e6\u00f0an \u00fe\u00e6t on eor\u00f0an w\u00e6s,\nforleosan lica gehwilc \u00feara \u00fee lifes gast\nf\u00e6\u00f0mum \u00feeahte. Eall \u00fe\u00e6t frea wolde\non \u00f0\u00e6re toweardan tide acwellan\n\u00fee \u00fea neal\u00e6hte ni\u00f0\u00f0a bearnum.\n1285\nNoe w\u00e6s god, nergende leof,\nswi\u00f0e ges\u00e6lig, sunu Lameches,\ndomf\u00e6st and gedefe. Drihten wiste\n\u00fe\u00e6t \u00fe\u00e6s \u00e6\u00f0elinges ellen dohte\nbreostgehygdum; for\u00f0on him brego s\u00e6gde,\nnergend usser, and to Noe cw\u00e6\u00f0:\n\"Ic wille mid flode folc acwellan\nand cynna gehwilc cucra wuhta,\n\u00feara \u00fee lyft and flod l\u00e6da\u00f0 and feda\u00f0,\nfeoh and fuglas. \u00feu scealt fri\u00f0 habban\n1300\nmid sunum \u00feinum, \u00f0onne sweart w\u00e6ter,\nwonne w\u00e6lstreamas werodum swelga\u00f0,\nscea\u00f0um scyldfullum. Ongyn \u00fee scip wyrcan,\nmerehus micel. On \u00feam \u00feu monegum scealt\nreste geryman, and rihte setl\n1305\n\u00e6lcum \u00e6fter agenum eor\u00f0an tudre.\nGescype scylfan on scipes bosme.\n\u00feu \u00fe\u00e6t f\u00e6r gewyrc fiftiges wid,\n\u00f0rittiges heah and \u00fereohund lang\nelngemeta, and wi\u00f0 y\u00f0a gewyrc\n1310\ngefeg f\u00e6ste. \u00fe\u00e6r sceal f\u00e6sl wesan\ncwiclifigendra cynna gehwilces\non \u00fe\u00e6t wuduf\u00e6sten wocor gel\u00e6ded\neor\u00f0an tudres; earc sceal \u00fey mare.\"\nNoe fremede swa hine nergend heht,\nGeseah \u00fea ymb wintra worn w\u00e6rf\u00e6st metod\ngeofonhusa m\u00e6st gearo hlifigean,\ninnan and utan eor\u00f0an lime\ngef\u00e6stnod wi\u00f0 flode, f\u00e6r Noes,\n\u00fey selestan. \u00fe\u00e6t is syndrig cynn;\n1325\nsymle bi\u00f0 \u00fey heardra \u00fee hit hreoh w\u00e6ter,\nswearte s\u00e6streamas swi\u00f0or beata\u00f0.\n\u00f0a to Noe cw\u00e6\u00f0 nergend usser:\n\"Ic \u00fee \u00fe\u00e6s mine, monna leofost,\nw\u00e6re gesylle, \u00fe\u00e6t \u00feu weg nimest\n1330\nand feora f\u00e6sl \u00fee \u00feu ferian scealt\ngeond deop w\u00e6ter d\u00e6grimes worn\non lides bosme. L\u00e6d, swa ic \u00fee hate,\nunder earce bord eaforan \u00feine,\nfrumgaran \u00fery, and eower feower wif.\n1335\nOnd \u00feu seofone genim on \u00fe\u00e6t sundreced\ntudra gehwilces geteled rimes,\n\u00feara \u00fee to mete mannum lifige,\nand \u00feara o\u00f0erra \u00e6lces twa.\nSwilce \u00feu of eallum eor\u00f0an w\u00e6stmum\n1340\nwiste under w\u00e6gbord werodum gel\u00e6de,\n\u00feam \u00fee mid sceolon mereflod nesan.\nFed freolice feora wocre\no\u00f0 ic \u00fe\u00e6re lafe lagosi\u00f0a eft\nreorde under roderum ryman wille.\n1345\nGewit \u00feu nu mid hiwum on \u00fe\u00e6t hof gangan,\ngasta werode. Ic \u00fee godne wat,\nf\u00e6sthydigne; \u00feu eart freo\u00f0o wyr\u00f0e,\nara mid eaforum. Ic on andwlitan\nnu ofor seofon niht sigan l\u00e6te\n1350\nw\u00e6llregn ufan widre eor\u00f0an.\nFeowertig daga f\u00e6h\u00f0e ic wille\non weras st\u00e6lan and mid w\u00e6g\u00fereate\n\u00e6hta and agend eall acwellan\n\u00fea beutan beo\u00f0 earce bordum\n1355\n\u00feonne sweart racu stigan onginne\u00f0.\"\nHim \u00fea Noe gewat, swa hine nergend het,\nunder earce bord eaforan l\u00e6dan,\nweras on w\u00e6g\u00fe\u00e6l and heora wif somed;\nand eall \u00fe\u00e6t to f\u00e6sle frea \u00e6lmihtig\n1360\nhabban wolde under hrof gefor\nto heora \u00e6tgifan, swa him \u00e6lmihtig\nweroda drihten \u00feurh his word abead.\nHim on hoh beleac heofonrices weard\nmerehuses mu\u00f0 mundum sinum,\n1365\nsigora waldend, and segnade\nearce innan agenum spedum\nnergend usser. Noe h\u00e6fde,\nsunu Lameches, syxhund wintra\n\u00fea he mid bearnum under bord gestah,\n1370\ngleaw mid geogo\u00f0e, be godes h\u00e6se,\nduge\u00f0um dyrum. Drihten sende\nregn from roderum and eac rume let\nwilleburnan on woruld \u00feringan\nof \u00e6dra gehw\u00e6re, egorstreamas\n1375\nswearte swogan. S\u00e6s up stigon\nofer st\u00e6\u00f0weallas. Strang w\u00e6s and re\u00f0e\nse \u00f0e w\u00e6trum weold; wreah and \u00feeahte\nmanf\u00e6h\u00f0u bearn middangeardes\nwonnan w\u00e6ge, wera e\u00f0elland;\n1380\nhof hergode, hygeteonan wr\u00e6c\nmetod on monnum. Mere swi\u00f0e grap\non f\u00e6ge folc feowertig daga,\nnihta o\u00f0er swilc. Ni\u00f0 w\u00e6s re\u00f0e,\nw\u00e6llgrim werum; wuldorcyninges\n1385\ny\u00f0a wr\u00e6con arleasra feorh\nof fl\u00e6schoman. Flod ealle wreah,\nhreoh under heofonum hea beorgas\ngeond sidne grund and on sund ahof\nearce from eor\u00f0an and \u00fea \u00e6\u00f0elo mid,\n1390\n\u00fea segnade selfa drihten,\nscyppend usser, \u00fea he \u00fe\u00e6t scip beleac.\nSi\u00f0\u00f0an wide rad wolcnum under\nofer holmes hrincg hof seleste,\nfor mid fearme. F\u00e6re ne moston\n1395\nw\u00e6gli\u00f0endum w\u00e6tres brogan\nh\u00e6ste hrinon, ac hie halig god\nferede and nerede. Fiftena stod\ndeop ofer dunum se drenceflod\nmonnes elna; \u00fe\u00e6t is m\u00e6ro wyrd!\n1400\n\u00feam \u00e6t niehstan w\u00e6s nan to gedale,\nnym\u00fee heof w\u00e6s ahafen on \u00fea hean lyft,\n\u00fea se egorhere eor\u00f0an tuddor\neall acwealde, buton \u00fe\u00e6t earce bord\nheold heofona frea, \u00fea hine halig god\n1405\nece upp forlet edmodneflod\nstreamum stigan, sti\u00f0ferh\u00f0 cyning.\n\u00fea gemunde god mereli\u00f0ende,\nsigora waldend sunu Lameches\nand ealle \u00fea wocre \u00fee he wi\u00f0 w\u00e6tre beleac,\n1410\nlifes leohtfruma, on lides bosme.\nGel\u00e6dde \u00fea wigend weroda drihten\nworde ofer widland. Willflod ongan\nlytligan eft. Lago ebbade,\nsweart under swegle. H\u00e6fde so\u00f0 metod\n1415\neaforum egstream eft gecyrred, torhtne ryne, regn gestilled.\nFor famig scip L and C\nnihta under roderum, si\u00f0\u00f0an n\u00e6gledbord,\nf\u00e6r seleste, flod up ahof,\n1420\no\u00f0\u00fe\u00e6t rimget\u00e6l re\u00f0re \u00ferage\ndaga for\u00f0 gewat. \u00f0a on dunum ges\u00e6t\nheah mid hl\u00e6ste holm\u00e6rna m\u00e6st,\nearc Noes, \u00fee Armenia\nhatene syndon. \u00fe\u00e6r se halga bad,\n1425\nsunu Lameches, so\u00f0ra gehata\nlange \u00ferage, hwonne him lifes weard\nfrea \u00e6lmihtig frecenra si\u00f0a\nreste ageafe, \u00fe\u00e6ra he rume dreah\n\u00fea hine on sunde geond sidne grund\nand of enge ut \u00e6hta l\u00e6dan.\n\u00fea fandode for\u00f0weard scipes,\nhw\u00e6\u00f0er sincende s\u00e6flod \u00fea gyt\nw\u00e6re under wolcnum. Let \u00fea ymb worn daga\n\u00fe\u00e6s \u00fee heah hlio\u00f0o horde onfengon\n1440\nand \u00e6\u00f0elum eac eor\u00f0an tudres\nsunu Lameches sweartne fleogan\nhrefn ofer heahflod of huse ut.\nNoe tealde \u00fe\u00e6t he on neod hine,\ngif he on \u00fe\u00e6re lade land ne funde,\n1445\nofer sid w\u00e6ter secan wolde\non w\u00e6g\u00feele. Eft him seo wen geleah,\nac se feonde gespearn fleotende hreaw;\nsalwigfe\u00f0era secan nolde.\nHe \u00fea ymb seofon niht sweartum hrefne\nHeo wide hire willan sohte\nand rume fleah. Nohwe\u00f0ere reste fand,\n\u00fe\u00e6t heo for flode fotum ne meahte\nland gespornan ne on leaf treowes\nsteppan for streamum, ac w\u00e6ron steap hleo\u00f0o\n1460\nbewrigen mid w\u00e6trum. Gewat se wilda fugel\non \u00e6fenne earce secan\nofer wonne w\u00e6g, werig sigan,\nhungri to handa halgum rince.\n\u00f0a w\u00e6s culufre eft of cofan sended\n1465\nymb wucan wilde. Seo wide fleah\no\u00f0\u00fe\u00e6t heo rumgal restestowe\nf\u00e6gere funde and \u00fea fotum stop\non beam hyre; gefeah bli\u00f0emod\n\u00fe\u00e6s \u00fee heo gesittan swi\u00f0e werig\n1470\non treowes telgum torhtum moste.\nHeo fe\u00f0era onsceoc, gewat fleogan eft\nmid lacum hire, li\u00f0end brohte\nelebeames twig an to handa,\ngrene bl\u00e6d\u00e6. \u00fea ongeat hra\u00f0e\n1475\nflotmonna frea \u00fe\u00e6t w\u00e6s frofor cumen,\nearfo\u00f0si\u00f0a bot. \u00fea gyt se eadega wer\nymb wucan \u00feriddan wilde culufran\nane sende. Seo eft ne com\nto lide fleogan, ac heo land begeat,\n1480\ngrene bearwas; nolde gladu \u00e6fre\nunder salwed bord sy\u00f0\u00f0an \u00e6tywan\non \u00feellf\u00e6stenne, \u00fea hire \u00feearf ne w\u00e6s.\n\u00fea to Noe spr\u00e6c nergend usser,\nheofonrices weard, halgan reorde:\n1485\n\"\u00fee is e\u00f0elstol eft gerymed,\nlisse on lande, lagosi\u00f0a rest\nf\u00e6ger on foldan. Gewit on fre\u00f0o gangan\nut of earce, and on eor\u00f0an bearm\nof \u00feam hean hofe hiwan l\u00e6d \u00feu\n1490\nand ealle \u00fea wocre \u00fee ic w\u00e6g\u00ferea on li\u00f0e nerede \u00feenden lago h\u00e6fde\n\u00ferymme ge\u00feeahtne\u00feriddan e\u00f0yl.\"\nHe fremede swa and frean hyrde,\nstah ofer streamweall, swa him seo stefn bebead,\n1495\nlustum miclum, and al\u00e6dde \u00fea\nof w\u00e6g\u00feele wra\u00f0ra lafe.\n\u00fea Noe ongan nergende lac\nr\u00e6df\u00e6st re\u00f0ran, and recene genam\non eallum d\u00e6l \u00e6htum sinum,\n1500\n\u00f0am \u00f0e him to duge\u00f0um drihten sealde,\ngleaw to \u00feam gielde, and \u00fea gode selfum\ntorhtmod h\u00e6le tiber ons\u00e6gde,\ncyninge engla. Huru cu\u00f0 dyde\nnergend usser, \u00fea he Noe\n1505\ngebletsade and his bearn somed,\n\u00fe\u00e6t he \u00fe\u00e6t gyld on \u00feanc agifen h\u00e6fde\nand on geogo\u00f0hade godum d\u00e6dum\n\u00e6r geearnod \u00fe\u00e6t him ealra w\u00e6s\nara este \u00e6lmihtig god,\n1510\ndomf\u00e6st duge\u00fea. \u00fea gyt drihten cw\u00e6\u00f0,\nwuldris aldor word to Noe:\n\"Tyma\u00f0 nu and tiedra\u00f0, tires bruca\u00f0,\nmid gefean fry\u00f0o; fylla\u00f0 eor\u00f0an,\neall geicea\u00f0. Eow is e\u00f0elstol\n1515\nand holmes hl\u00e6st and heofonfuglas\nand wildu deor on geweald geseald,\neor\u00f0e \u00e6lgrene and eacen feoh.\nN\u00e6fre ge mid blode beodgereordu\nunarlice eowre \u00feicgea\u00f0,\n1520\nbesmiten mid synne sawldreore.\n\u00e6lc hine selfa \u00e6rest begrinde\u00f0\ngastes duge\u00f0um \u00fe\u00e6ra \u00fee mid gares orde\no\u00f0rum aldor o\u00f0\u00feringe\u00f0. Ne \u00f0earf he \u00fey edleane gefeon\nmodge\u00feance, ac ic monnes feorh\n1525\nto slagan sece swi\u00f0or micle,\nand to bro\u00f0or banan, \u00fe\u00e6s \u00fee blodgyte,\nw\u00e6llfyll weres w\u00e6pnum gespede\u00f0,\nmor\u00f0 mid mundum. Monn w\u00e6s to godes\nanlicnesse \u00e6rest gesceapen.\n1530\n\u00e6lc hafa\u00f0 magwlite metodes and engla\n\u00feara \u00fee healdan wile halige \u00feeawas.\nWeaxa\u00f0 and wrida\u00f0, wilna bruca\u00f0,\nara on eor\u00f0an; \u00e6\u00f0elum fylla\u00f0\neowre fromcynne foldan sceatas,\n1535\nteamum and tudre. Ic eow treowa \u00fe\u00e6s\nmine selle, \u00fe\u00e6t ic on middangeard\nn\u00e6fre egorhere eft gel\u00e6de,\nw\u00e6ter ofer widland. Ge on wolcnum \u00fe\u00e6s\noft and gelome andgiettacen\n1540\nmagon sceawigan, \u00feonne ic scurbogan\nminne iewe, \u00fe\u00e6t ic monnum \u00feas\nw\u00e6re gel\u00e6ste, \u00feenden woruld stande\u00f0.\"\n\u00f0a w\u00e6s se snotra sunu Lamehes\nof fere acumen flode on laste\n1545\nmid his eaforum \u00ferim, yrfes hyrde\n(and heora feower wif;\nnemde w\u00e6ron Percoba, Olla,\nOlliua, Olliuani),\nw\u00e6rf\u00e6st metode, w\u00e6tra lafe.\n1550\nH\u00e6le\u00f0 hygerofe hatene w\u00e6ron,\nsuna Noes Sem and Cham,\nIafe\u00f0 \u00feridda. From \u00feam gumrincum\nfolc geludon and gefylled wear\u00f0\neall \u00fees middangeard monna bearnum.\n1555\n\u00f0a Noe ongan niwan stefne\nmid hleomagum ham sta\u00f0elian\nand to eor\u00f0an him \u00e6tes tilian;\nwon and worhte, wingeard sette,\nseow s\u00e6da fela, sohte georne\n1560\n\u00fea him wlitebeorhte w\u00e6stmas brohte,\ngeartorhte gife, grene folde.\n\u00f0a \u00fe\u00e6t geeode, \u00fe\u00e6t se eadega wer\non his wicum wear\u00f0 wine druncen,\nsw\u00e6f symbelwerig, and him selfa sceaf\n1565\nreaf of lice. Swa gerysne ne w\u00e6s,\nl\u00e6g \u00fea limnacod. He lyt ongeat\n\u00fe\u00e6t him on his inne swa earme gelamp,\n\u00fea him on hre\u00f0re heafodswima\non \u00fe\u00e6s halgan hofe heortan clypte.\n1570\nSwi\u00f0e on sl\u00e6pe sefa nearwode\n\u00fe\u00e6t he ne mihte on gemynd drepen\nhine handum self mid hr\u00e6gle wryon\nand sceome \u00feeccan, swa gesceapu w\u00e6ron\nwerum and wifum, si\u00f0\u00f0an wuldres \u00feegn\n1575\nussum f\u00e6der and meder fyrene sweorde\non laste beleac lifes e\u00f0el.\n\u00fea com \u00e6rest Cam in si\u00f0ian,\neafora Noes, \u00fe\u00e6r his aldor l\u00e6g,\nferh\u00f0e forstolen. \u00fe\u00e6r he freondlice\n1580\non his agenum f\u00e6der are ne wolde\ngesceawian, ne \u00fea sceonde huru\nhleomagum helan, ac he hlihende\nbro\u00f0rum s\u00e6gde, hu se beorn hine\nreste on recede. Hie \u00fea ra\u00f0e stopon,\n1585\nheora andwlitan in bewrigenum\nunder lo\u00f0um listum, \u00fe\u00e6t hie leofum men\ngeoce gefremede; gode w\u00e6ron begen,\nSem and Iafe\u00f0. \u00f0a of sl\u00e6pe onbr\u00e6gd\nsunu Lamehes, and \u00fea sona ongeat\n1590\n\u00fe\u00e6t him cynegodum Cham ne wolde,\n\u00fea him w\u00e6s are \u00feearf, \u00e6nige cy\u00f0an\nhyldo and treowa. \u00fe\u00e6t \u00feam halgan w\u00e6s\nsar on mode, ongan \u00fea his selfes bearn\nwordum wyrgean, cw\u00e6\u00f0, he wesan sceolde\n1595\nhean under heofnum, hleomaga \u00feeow,\nCham on eor\u00fean; him \u00fea cwyde sy\u00f0\u00f0an\nand his fromcynne frecne scodon.\n\u00fea nyttade Noe si\u00f0\u00f0an\nmid sunum sinum sidan rices\n1600\n\u00f0reohund wintra \u00feisses lifes,\nfreomen \u00e6fter flode, and fiftig eac, \u00fea he for\u00f0 gewat.\nSi\u00f0\u00f0an his eaforan ead bryttedon,\nbearna stryndon; him w\u00e6s beorht wela.\n\u00fea wear\u00f0 Iafe\u00f0e geogo\u00f0 afeded,\n1605\nhyhtlic heor\u00f0werod heafodmaga,\nsunu and dohtra. He w\u00e6s selfa til,\nheold a rice, e\u00f0eldreamas,\nbl\u00e6d mid bearnum, o\u00f0\u00fe\u00e6t breosta hord,\ngast ellorfus gangan sceolde\n1610\nto godes dome. Geomor si\u00f0\u00f0an\nf\u00e6der flettgesteald freondum d\u00e6lde,\nsw\u00e6sum and gesibbum, sunu Iafe\u00f0es;\n\u00fe\u00e6s teames w\u00e6s tuddor gefylled\nunlytel d\u00e6l eor\u00f0an gesceafta.\nwilna brytta and woruldduge\u00f0a\nbro\u00f0rum sinum, botlgestreona,\nf\u00e6der on laste, si\u00f0\u00f0an for\u00f0 gewat\nCham of lice, \u00fea him cwealm gesceod.\nSe magor\u00e6swa m\u00e6g\u00f0e sinre\n1625\ndomas s\u00e6gde, o\u00f0\u00fe\u00e6t his dogora w\u00e6s\nrim aurnen. \u00fea se rinc ageaf\neor\u00f0cunde ead, sohte o\u00f0er lif,\nf\u00e6der Nebro\u00f0es. Frumbearn si\u00f0\u00f0an\neafora Chuses yrfestole weold,\n1630\nwidm\u00e6re wer, swa us gewritu secgea\u00f0,\n\u00fe\u00e6t he moncynnes m\u00e6ste h\u00e6fde\non \u00feam m\u00e6ldagum m\u00e6gen and strengo.\nSe w\u00e6s Babylones bregorices fruma,\n\u00e6rest \u00e6\u00f0elinga; e\u00f0el\u00f0rym onhof,\n1635\nrymde and r\u00e6rde. Reord w\u00e6s \u00fea gieta\neor\u00f0buendum an gem\u00e6ne. Swilce of Cames cneorisse woc\nwerm\u00e6g\u00f0a fela; of \u00feam widfolce\ncneorim micel cenned w\u00e6ron.\n1640\n\u00fea wear\u00f0 Seme suna and dohtra\non woruldrice worn afeded,\nfreora bearna, \u00e6r \u00f0on frod cure\nwintrum w\u00e6lreste werodes aldor.\nOn \u00fe\u00e6re m\u00e6g\u00f0e w\u00e6ron men tile,\n1645\n\u00feara an w\u00e6s Eber haten,\neafora Semes; of \u00feam eorle woc\nunrim \u00feeoda, \u00fea nu \u00e6\u00f0elingas,\nealle eor\u00f0buend, Ebrei hata\u00f0.\nGewiton him \u00fea eastan \u00e6hta l\u00e6dan,\n1650\nfeoh and feorme. Folc w\u00e6s anmod;\nrofe rincas sohton rumre land,\no\u00f0\u00fe\u00e6t hie becomon cor\u00f0rum miclum,\nfolc ferende, \u00fe\u00e6r hie f\u00e6stlice\n\u00e6\u00f0elinga bearn, eard genamon.\n1655\nGesetton \u00fea Sennar sidne and widne\nleoda r\u00e6swan; leofum mannum\nheora geardagum grene wongas,\nf\u00e6gre foldan, him for\u00f0wearde\non \u00f0\u00e6re d\u00e6gtide dugu\u00f0e w\u00e6ron,\n1660\nwilna gehwilces weaxende sped.\n\u00f0a \u00fe\u00e6r mon m\u00e6nig be his m\u00e6gwine,\n\u00e6\u00f0eling anmod, o\u00f0erne b\u00e6d\n\u00fe\u00e6s hie him to m\u00e6r\u00f0e, \u00e6r seo mengeo eft\ngeond foldan bearm tofaran sceolde,\n1665\nleoda m\u00e6g\u00f0e on landsocne\nburh geworhte and to beacne torr\nup ar\u00e6rde to rodortunglum.\n\u00fe\u00e6s \u00fee hie gesohton Sennera feld,\nswa \u00fea foremeahtige folces r\u00e6swan,\n1670\n\u00fea yldestan oft and gelome\nli\u00f0sum gewunedon; larum sohton\nweras to weorce and to wrohtscipe,\no\u00f0\u00fe\u00e6t for wlence and for wonhygdum\ncy\u00f0don cr\u00e6ft heora, ceastre worhton\n1675\nand to heofnum up hl\u00e6dr\u00e6 r\u00e6rdon,\nstrengum stepton st\u00e6nenne weall\nofer monna gemet, m\u00e6r\u00f0a georne,\nh\u00e6le\u00f0 mid honda. \u00fea com halig god\nwera cneorissa weorc sceawigan,\n1680\nbeorna burhf\u00e6sten, and \u00fe\u00e6t beacen somed,\n\u00fee to roderum up r\u00e6ran ongunnon\nAdames eaforan, and \u00fe\u00e6s unr\u00e6des\nsti\u00f0ferh\u00f0 cyning steore gefremede,\n\u00fea he re\u00f0emod reorde gesette\n1685\neor\u00f0buendum ungelice,\n\u00fe\u00e6t hie \u00fe\u00e6re sp\u00e6ce sped ne ahton.\n\u00fea hie gemitton mihtum spedge,\nteoche \u00e6t torre, getalum myclum,\nweorces wisan, ne \u00fe\u00e6r werm\u00e6g\u00f0a\n1690\n\u00e6nig wiste hw\u00e6t o\u00f0er cw\u00e6\u00f0.\nNe meahte hie gewur\u00f0an weall st\u00e6nenne\nup for\u00f0 timbran, ac hie earmlice\nheapum tohlocon, hleo\u00f0rum ged\u00e6lde;\nw\u00e6s o\u00f0erre \u00e6ghwilc worden\n1695\nm\u00e6gburh fremde, si\u00f0\u00f0an metod tobr\u00e6d\n\u00feurh his mihta sped monna spr\u00e6ce.\nToforan \u00fea on feower wegas\n\u00e6\u00f0elinga bearn unge\u00feeode\non landsocne. Him on laste bu\n1700\nsti\u00f0lic stantorr and seo steape burh\nsamod samworht on Sennar stod.\nWeox \u00fea under wolcnum and wri\u00f0ade\nm\u00e6gburh Semes, o\u00f0\u00fe\u00e6t mon awoc\non \u00fe\u00e6re cneorisse, cynebearna rim,\nAbraham and Aaron; \u00feam eorlum w\u00e6s\nfrea engla bam freond and aldor.\n\u00f0a wear\u00f0 Aarone eafora feded,\nleoflic on life, \u00f0am w\u00e6s Loth noma.\n\u00f0a magorincas metode ge\u00feungon,\n1715\nAbraham and Loth, unforcu\u00f0lice,\nswa him from yldrum \u00e6\u00f0elu w\u00e6ron\non woruldrice; for\u00f0on hie wide nu\nduge\u00f0um dema\u00f0 drihtfolcabearn.\n\u00fea \u00fe\u00e6s m\u00e6les w\u00e6s mearc agongen\n1720\n\u00fe\u00e6t him Abraham idese brohte,\nwif to hame, \u00fe\u00e6r he wic ahte,\nf\u00e6ger and freolic. Seo f\u00e6mne w\u00e6s\nSarra haten, \u00fe\u00e6s \u00fee us secgea\u00f0 bec.\nHie \u00fea wintra fela woruld bryttedon,\n1725\nsinc \u00e6tsomne, sibbe heoldon\ngeara mengeo. Nohw\u00e6\u00f0re gife\u00f0e wear\u00f0\nAbrahame \u00fea gyt \u00fe\u00e6t him yrfeweard\nwlitebeorht ides on woruld brohte,\nSarra Abrahame, suna and dohtra.\nof \u00fe\u00e6re e\u00f0eltyrf, Abraham and Loth.\nHim \u00fea cynegode on Carran\n\u00e6\u00f0elinga bearn eard genamon,\nweras mid wifum. On \u00feam wicum his\nf\u00e6der Abrahames feorh gesealde,\n1740\nw\u00e6rf\u00e6st h\u00e6le; wintra h\u00e6fde\ntwa hundteontig, geteled rime,\nand fife eac, \u00fea he for\u00f0 gewat\nmisserum frod metodsceaft seon.\n\u00f0a se halga spr\u00e6c, heofonrices weard,\n1745\nto Abrahame, ece drihten:\n\"Gewit \u00feu nu feran and \u00feine fare l\u00e6dan,\nceapas to cnosle. Carran ofgif,\nf\u00e6der e\u00f0elstol. Far, swa ic \u00fee hate,\nmonna leofost, and \u00feu minum wel\n1750\nlarum hyre, and \u00fe\u00e6t land gesec\n\u00fee ic \u00fee \u00e6lgrene ywan wille,\nbrade foldan. \u00feu gebletsad scealt\non mundbyrde minre lifigan.\nGif \u00f0e \u00e6nig eor\u00f0buendra\n1755\nmid wean grete\u00f0, ic hine werg\u00f0o on\nmine sette and modhete,\nlongsumne ni\u00f0; lisse selle,\nwilna w\u00e6stme \u00feam \u00fee wur\u00f0ia\u00f0.\n\u00feurh \u00fee eor\u00f0buende ealle onfo\u00f0,\n1760\nfolcbearn freo\u00f0o and freondscipe,\nblisse minre and bletsunge\non woruldrice. Wri\u00f0ende sceal\nm\u00e6g\u00f0e \u00feinre monrim wesan\nswi\u00f0e under swegle sunum and dohtrum,\n1765\no\u00f0\u00fe\u00e6t fromcyme folde weor\u00f0e\u00f0,\n\u00feeodlond monig \u00feine gefylled.\"\nHim \u00fea Abraham gewat \u00e6hte l\u00e6dan\nof Egipta e\u00f0elmearce,\ngumcystum god, golde and seolfre\n1770\nswi\u00f0feorm and ges\u00e6lig, swa him sigora weard,\nwaldend usser \u00feurh his word abead,\nceapas from Carran; sohton Cananea\nlond and leodgeard. \u00fea com leof gode\non \u00fea e\u00f0elturf idesa l\u00e6dan,\n1775\nsw\u00e6se gebeddan and his suhtrian\nwif on willan. Wintra h\u00e6fde\nfif and hundseofontig \u00f0a he faran sceolde,\nCarran ofgifan and cneowmagas.\nHim \u00fea feran gewat f\u00e6der \u00e6lmihtiges\n1780\nlare gemyndig land sceawian\ngeond \u00fea folcsceare be frean h\u00e6se\nAbraham wide, o\u00f0\u00fe\u00e6t ellenrof\nto Sicem com si\u00f0e spedig,\ncynne Cananeis. \u00fea hine cyning engla\n1785\nAbrahame iewde selfa,\ndomf\u00e6st wereda and drihten cw\u00e6\u00f0:\n\"\u00feis is seo eor\u00f0e \u00fee ic \u00e6lgrene\ntudre \u00feinum torhte wille\nw\u00e6stmum gewlo on geweald don,\n1790\nrume rice.\" \u00fea se rinc gode\nwibed worhte and \u00fea waldende\nlifes leohtfruman lac ons\u00e6gde\ngasta helme. Him \u00fea gyt gewat\nAbraham eastan eagum wlitan\n1795\non landa cyst, (lisse gemunde\nheofonweardes gehat, \u00fea him \u00feurh halig word\nsigora selfcyning so\u00f0 gecy\u00f0de),\no\u00f0\u00fe\u00e6t drihtweras dugu\u00feum geforan\n\u00fe\u00e6r is botlwela Bethlem haten.\n1800\nBeorn bli\u00f0emod and his bro\u00f0or sunu\nfor\u00f0 oferforan folcm\u00e6ro land\neastan mid \u00e6htum, \u00e6f\u00e6ste men\nweallsteapan hleo\u00f0u, and him \u00fea wic curon\n\u00fe\u00e6r him wlitebeorhte wongas ge\u00feuhton.\n1805\nAbraham \u00fea o\u00f0ere si\u00f0e\nwibed worhte. He \u00fe\u00e6r wordum god\ntorhtum cigde, tiber ons\u00e6gde\nhis liffrean, (him \u00fe\u00e6s lean ageaf\nnalles hneawlice \u00feurh his hand metend),\nhunger se hearda, hamsittendum,\nw\u00e6lgrim werum. Him \u00fea wishydig\nAbraham gewat on Egypte,\ndrihtne gecoren, drohta\u00f0 secan,\nfleah w\u00e6rf\u00e6st wean; w\u00e6s \u00fe\u00e6t wite to strang.\n1820\nAbraham ma\u00f0elode, geseah Egypta\nhornsele hwite and hea byrig\nbeorhte blican; ongan \u00fea his bryd frea,\nwishydig wer, wordum l\u00e6ran:\n\"Si\u00f0\u00f0an Egypte eagum moton\n1825\non \u00feinne wlite wlitan wlance monige,\n\u00feonne \u00e6\u00f0elinga eorlas wena\u00f0,\nm\u00e6g \u00e6lfscieno, \u00fe\u00e6t \u00feu min sie\nbeorht gebedda, \u00fee wile beorna sum\nhim geagnian. Ic me onegan m\u00e6g\n1830\n\u00fe\u00e6t me wra\u00f0ra sum w\u00e6pnes ecge\nfor freondmynde feore beneote.\nSaga \u00feu, Sarra, \u00fe\u00e6t \u00feu sie sweostor min,\nlices m\u00e6ge, \u00feonne \u00fee leodweras\nfremde fricgen hw\u00e6t sie freondlufu\n1835\nell\u00f0eodigra uncer twega,\nfeorren cumenra. \u00feu him f\u00e6ste hel\nso\u00f0an spr\u00e6ce; swa \u00feu minum scealt\nfeore gebeorgan, gif me freo\u00f0o drihten\non woruldrice, waldend usser,\n1840\nan \u00e6lmihtig, swa he \u00e6r dyde,\nlengran lifes. Se us \u00feas lade sceop,\n\u00fe\u00e6t we on Egiptum are sceolde\nfremena friclan and us fremu secan.\"\n\u00fea com ellenrof eorl si\u00f0ian,\n1845\nAbraham mid \u00e6htum on Egypte,\n\u00fe\u00e6r him folcweras fremde w\u00e6ron,\nwine uncu\u00f0e. Wordum spr\u00e6con\nymb \u00fe\u00e6s wifes wlite wlonce monige,\nduge\u00f0um dealle; him drihtlicu m\u00e6g,\n1850\non wlite modgum m\u00e6negum \u00f0uhte,\ncyninges \u00feegnum. Hie \u00fe\u00e6t cu\u00f0 dydon\nheora folcfrean \u00fe\u00e6t f\u00e6gerro lyt\nfor \u00e6\u00f0elinge idesa sunnon,\nac hie Sarran swi\u00f0or micle,\n1855\nwynsumne wlite wordum heredon,\no\u00f0\u00fe\u00e6t he l\u00e6dan heht leoflic wif to\nhis selfes sele. Sinces brytta,\n\u00e6\u00f0elinga helm heht Abrahame\ndugu\u00f0um stepan. Hw\u00e6\u00f0ere drihten wear\u00f0,\n1860\nfrea Faraone fah and yrre\nfor wifmyne; \u00fe\u00e6s wra\u00f0e ongeald\nhearde mid hiwum h\u00e6gstealdra wyn.\nOng\u00e6t hw\u00e6\u00f0ere gumena aldor\nhw\u00e6t him waldend wr\u00e6c witeswingum;\n1865\nheht him Abraham to egesum ge\u00f0readne\nbrego Egipto, and his bryd ageaf,\nwif to gewealde; heht him wine ceosan,\nellor \u00e6\u00f0elingas, o\u00f0re duge\u00f0e.\nAbead \u00fea \u00feeodcyning \u00feegnum sinum,\n1870\nombihtscealcum, \u00fe\u00e6t hie hine arlice\nealles onsundne eft gebrohten\nof \u00fe\u00e6re folcsceare, \u00fe\u00e6t he on fri\u00f0e w\u00e6re.\n\u00f0a Abraham \u00e6hte l\u00e6dde\nof Egypta e\u00f0elmearce;\n1875\nhie ellenrofe idese feredon,\nbryd and begas, \u00fe\u00e6t hie to Bethlem\non cu\u00f0e wic ceapas l\u00e6ddon,\neadge eor\u00f0welan o\u00f0re si\u00f0e,\nwif on willan and heora woruldgestreon.\n1880\nOngunnon him \u00fea bytlian and heora burh r\u00e6ran,\nand sele settan, salo niwian.\nWeras on wonge wibed setton\nneah \u00feam \u00fee Abraham \u00e6ror r\u00e6rde\nhis waldende \u00fea westan com.\n1885\n\u00fe\u00e6r se eadga eft ecan drihtnes\nniwan stefne noman weor\u00f0ade;\ntilmodig eorl tiber ons\u00e6gde\n\u00feeodne engla, \u00feancode swi\u00f0e\nlifes leohtfruman lisse and ara.\n1890\nWunedon on \u00feam wicum, h\u00e6fdon wilna geniht\nAbraham and Loth. Ead bryttedon,\no\u00f0\u00fe\u00e6t hie on \u00feam lande ne meahton leng somed\nbl\u00e6des brucan and heora begra \u00fe\u00e6r\n\u00e6hte habban, ac sceoldon arf\u00e6ste,\n1895\n\u00fea rincas \u00fey rumor secan\nellor e\u00f0elseld. Oft w\u00e6ron teonan\nw\u00e6rf\u00e6stra wera weredum gem\u00e6ne,\nheardum hearmplega. \u00fea se halga ongan\nara gemyndig Abraham sprecan\n1900\nf\u00e6gre to Lothe: \"Ic eom f\u00e6dera \u00fein\nsibgebyrdum, \u00feu min suhterga.\nNe sceolon unc betweonan teonan weaxan,\nwroht wri\u00f0ian-- ne \u00fe\u00e6t wille god!\nAc wit synt gemagas; unc gem\u00e6ne ne sceal\n1905\nelles awiht, nym\u00fee eall tela\nlufu langsumu. Nu \u00feu, Loth, ge\u00feenc,\n\u00fe\u00e6t unc modige ymb mearce sitta\u00f0,\n\u00feeoda \u00ferymf\u00e6ste \u00feegnum and gesi\u00f0\u00f0um,\nfolc Cananea and Feretia,\n1910\nrofum rincum. Ne willa\u00f0 rumor unc\nlandriht heora; for\u00f0on wit l\u00e6dan sculon, teon of \u00feisse stowe, and unc sta\u00f0olwangas\nrumor secan. Ic r\u00e6d sprece,\nbearn Arones, begra uncer,\n1915\nso\u00f0ne secge. Ic \u00fee selfes dom\nlife, leofa. Leorna \u00fee seolfa\nand ge\u00feancmeta \u00feine mode\non hwilce healfe \u00feu wille hwyrft don,\ncyrran mid ceape, nu ic \u00fee cyst abead.\"\n1920\nHim \u00fea Loth gewat land sceawigan\nbe Iordane, grene eor\u00f0an.\nSeo w\u00e6s w\u00e6trum weaht and w\u00e6stmum \u00feeaht,\nlagostreamum leoht, and gelic godes neorxnawange,o\u00f0\u00fe\u00e6t nergend god\n1925\nfor wera synnum wylme gesealde\nSodoman and Gomorran, sweartan lige.\nHim \u00fea eard geceas and e\u00f0elsetl\nsunu Arones on Sodoma byrig;\n\u00e6hte sine eallel\u00e6dde,\n1930\nbeagas from Bethlem and botlgestreon,\nwelan, wunden gold. Wunode si\u00f0\u00f0an\nbe Iordane geara m\u00e6nego.\n\u00fe\u00e6r folcstede f\u00e6gre w\u00e6ron,\nmen arlease, metode la\u00f0e.\n1935\nW\u00e6ron Sodomisc cynn synnum \u00feriste,\nd\u00e6dum gedwolene; drugon heora selfra\necne unr\u00e6d. \u00e6fre ne wolde\n\u00feam leod\u00feeawum Loth onfon,\nac he \u00fe\u00e6re m\u00e6g\u00f0e monwisan fleah,\n1940\n\u00feeah \u00fee he on \u00feam lande lifian sceolde,\nfacen and fyrene, and hine f\u00e6gre heold,\n\u00feeawf\u00e6st and ge\u00feyldig on \u00feam \u00feeodscipe,\nemne \u00feon gelicost, lara gemyndig,\n\u00fee he ne cu\u00f0e hw\u00e6t \u00fea cynn dydon.\n1945\nAbraham wunode e\u00f0eleardum\nCananea for\u00f0. Hine cyning engla,\nmetod moncynnes mundbyrde heold,\nwilna w\u00e6stmum and woruldduge\u00f0um,\nlufum and lissum; for\u00feon his lof secga\u00f0\n1950\nwide under wolcnum wera cneorisse, foldwonga bearn. He frean hyrde\nestum on e\u00f0le, \u00f0enden he eardes breac,\nhalig and higefrod; n\u00e6fre hleowlora\n\u00e6t edwihtan \u00e6fre weor\u00f0e\u00f0\n1955\nfeorhberendra forht and acol,\nmon for metode, \u00fee him \u00e6fter a\n\u00feurh gemynda sped mode and d\u00e6dum,\nworde and gewitte, wise \u00feance,\no\u00f0 his ealdorgedal oleccan wile.\n1960\n\u00f0a ic aldor gefr\u00e6gn Elamitarna\nfromne folctogan, fyrd gebeodan,\nOrlahomar; him Ambrafel\nof Sennar side worulde\nfor on fultum. Gewiton hie feower \u00fea\n1965\n\u00feeodcyningas \u00ferymme micle\nsecan su\u00f0 \u00f0anon Sodoman and Gomorran.\n\u00fea w\u00e6s gu\u00f0hergum be Iordane\nwera e\u00f0elland wide geondsended,\nfolde feondum. Sceolde forht monig\n1970\nblachleor ides bifiende gan\non fremdes f\u00e6\u00f0m; feollon wergend\nbryda and beaga, bennum seoce.\nHim \u00fea togeanes mid gu\u00f0\u00fer\u00e6ce\nfife foran folccyningas\n1975\nsweotum su\u00f0on, woldon Sodome burh\nwra\u00f0um werian; \u00fea wintra XII\nnor\u00f0monnum \u00e6r niede sceoldon\ngombon gieldan and gafol sellan,\no\u00f0\u00fe\u00e6t \u00fea leode leng ne woldon\n1980\nElamitarna aldor swi\u00f0an\nfolcgestreonum, ac him from swicon.\nForon \u00fea tosomne (francan w\u00e6ron hlude),\nwra\u00f0e w\u00e6lherigas. Sang se wanna fugel\nunder deore\u00f0sceaftum, deawigfe\u00f0era,\n1985\nhr\u00e6s on wenan. H\u00e6le\u00f0 onetton\non m\u00e6gencor\u00f0rum, modum \u00fery\u00f0ge,\no\u00f0\u00fe\u00e6t folcgetrume gefaren h\u00e6fdon\nsid tosomne su\u00f0an and nor\u00f0an,\nhelmum \u00feeahte. \u00fe\u00e6r w\u00e6s heard plega,\n1990\nw\u00e6lgara wrixl, wigcyrm micel,\nhlud hildesweg. Handum brugdon\nh\u00e6le\u00f0 of sc\u00e6\u00f0um hringm\u00e6led sweord,\necgum dihtig. \u00fe\u00e6r w\u00e6s ea\u00f0fynde\neorle orlegceap, se \u00f0e \u00e6r ne w\u00e6s\nfram \u00feam folcstyde fleame nergan,\nsecgum ofslegene; him on swa\u00f0e feollon\n\u00e6\u00f0elinga bearn, ecgum of\u00feegde,\nwillgesi\u00f0\u00f0as. H\u00e6fde wigsigor\nElamitarna ordes wisa,\n2005\nweold w\u00e6lstowe. Gewat seo w\u00e6pna laf\nf\u00e6sten secan. Fynd gold strudon, ahy\u00f0dan \u00fea mid herge hordburh wera,\nSodoman and Gomorran, \u00fea s\u00e6l ageald,\nm\u00e6re ceastra. M\u00e6g\u00f0 si\u00f0edon,\n2010\nf\u00e6mnan and wuduwan, freondum besl\u00e6gene,\nfrom hleowstole. Hettend l\u00e6ddon\nut mid \u00e6htum Abrahames m\u00e6g\nof Sodoma byrig. We \u00fe\u00e6t so\u00f0 magon\nsecgan fur\u00f0ur, hwelc si\u00f0\u00f0an wear\u00f0\n2015\n\u00e6fter \u00fe\u00e6m gehn\u00e6ste herewulfa si\u00f0,\n\u00feara \u00fee l\u00e6ddon Loth and leoda god,\nsu\u00f0monna sinc, sigore gulpon.\nHim \u00fea secg hra\u00f0e gewat si\u00f0ian,\nan gara laf, se \u00f0a gu\u00f0e gen\u00e6s,\n2020\nAbraham secan. Se \u00fe\u00e6t orlegweorc\n\u00feam Ebriscan eorle gecy\u00f0de,\nforslegen swi\u00f0e Sodoma folc,\nleoda dugu\u00f0e and Lothes si\u00f0.\n\u00fea \u00fe\u00e6t inwitspell Abraham s\u00e6gde\n2025\nfreondum sinum; b\u00e6d him fultumes\nw\u00e6rf\u00e6st h\u00e6le\u00f0 willge\u00f0oftan,\nAner and Manre, Escol \u00feriddan,\ncw\u00e6\u00f0 \u00fe\u00e6t him w\u00e6re weorce on mode,\nsorga sarost, \u00fe\u00e6t his suhtriga\n2030\n\u00feeownyd \u00feolode; b\u00e6d him \u00fer\u00e6crofe\n\u00fea rincas \u00fe\u00e6s r\u00e6d ahicgan,\n\u00fe\u00e6t his hyldem\u00e6g ahreded wurde,\nbeorn mid bryde. Him \u00fea bro\u00f0or \u00fery\n\u00e6t spr\u00e6ce \u00fe\u00e6re spedum miclum\n2035\nh\u00e6ldon hygesorge heardum wordum,\nellenrofe, and Abrahame\ntreowa sealdon, \u00fe\u00e6t hie his torn mid him\ngewr\u00e6con on wra\u00f0um, o\u00f0\u00f0e on w\u00e6l feollan.\n\u00fea se halga heht his heor\u00f0werod\n2040\nw\u00e6pna onfon. He \u00fe\u00e6r wigena fand,\n\u00e6scberendra, XVIII\nand CCC eac \u00feeodenholdra,\n\u00feara \u00fee he wiste \u00fe\u00e6t meahte wel \u00e6ghwylc\non fyrd wegan fealwe linde.\n2045\nHim \u00fea Abraham gewat and \u00fea eorlas \u00fery\n\u00fee him \u00e6r treowe sealdon mid heora folcgetrume;\nwolde his m\u00e6g huru,\nLoth alynnan of la\u00f0scipe.\nRincas w\u00e6ron rofe, randas w\u00e6gon\n2050\nfor\u00f0 fromlice on foldwege.\nHildewulfas herewicum neh\ngefaren h\u00e6fdon. \u00fea he his frumgaran,\nwishydig wer, wordum s\u00e6gde,\n\u00feares afera, him w\u00e6s \u00feearf micel\n2055\n\u00fe\u00e6t hie on twa healfe\ngrimme gu\u00f0gemot gystum eowdon\nheardne handplegan; cw\u00e6\u00f0 \u00fe\u00e6t him se halga,\nece drihten, ea\u00f0e mihte\n\u00e6t \u00feam spereni\u00f0e spede l\u00e6nan.\n2060\n\u00fea ic ne\u00f0an gefr\u00e6gn under nihtscuwan\nh\u00e6le\u00f0 to hilde. Hlyn wear\u00f0 on wicum\nscylda and sceafta, sceotendra fyll,\ngu\u00f0flana gegrind; gripon unf\u00e6gre\nunder sceat werum scearpe garas,\n2065\nand feonda feorh feollon \u00f0icce,\n\u00fe\u00e6r hlihende hu\u00f0e feredon\nsecgas and gesi\u00f0\u00f0as. Sigor eft ahwearf\nof nor\u00f0monna ni\u00f0geteone,\n\u00e6sctir wera. Abraham sealde\n2070\nwig to wedde, nalles wunden gold,\nfor his suhtrigan, sloh and fylde\nfeond on fitte. Him on fultum grap\nheofonrices weard. Hergas wurdon\nfeower on fleame, folccyningas,\n2075\nleode r\u00e6swan. Him on laste stod\nhihtlic heor\u00f0werod, and h\u00e6le\u00f0 lagon,\non swa\u00f0e s\u00e6ton, \u00fea \u00fee Sodoma\nand Gomorra golde berofan,\nbestrudon stigwitum. Him \u00fe\u00e6t sti\u00f0e geald\n2080\nf\u00e6dera Lothes. Fleonde w\u00e6ron\nElamitarna aldordugu\u00f0e\ndome bedrorene, o\u00f0\u00fe\u00e6t hie Domasco\nunfeor w\u00e6ron. Gewat him Abraham \u00f0a\non \u00fea wigrode wi\u00f0ertrod seon\n2085\nla\u00f0ra monna. Loth w\u00e6s ahreded,\neorl mid \u00e6htum, idesa hwurfon,\nwif on willan. Wide gesawon\nfreora feorhbanan fuglas slitan\non ecgwale. Abraham ferede\nfreonda feasceaft. Him ferede mid\nSolomia sinces hyrde;\n\u00fe\u00e6t w\u00e6s se m\u00e6ra Melchisedec,\nleoda bisceop. Se mid lacum com\nfyrdrinca fruman f\u00e6gre gretan,\n2105\nAbraham arlice, and him on sette\ngodes bletsunge, and swa gyddode: \"W\u00e6s \u00f0u gewur\u00f0od on wera rime\nfor \u00fe\u00e6s eagum \u00fee \u00f0e \u00e6sca tir\n\u00e6t gu\u00f0e forgeaf! \u00fe\u00e6t is god selfa,\n2110\nse \u00f0e hettendra herga \u00ferymmas\non geweald gebr\u00e6c, and \u00fee w\u00e6pnum l\u00e6t\nrancstr\u00e6te for\u00f0 rume wyrcan,\nhu\u00f0e ahreddan and h\u00e6le\u00f0 fyllan.\nOn swa\u00f0e s\u00e6ton; ne meahton si\u00f0werod\n2115\ngu\u00f0e spowan, ac hie god flymde,\nse \u00f0e \u00e6t feohtan mid frumgarum\nwi\u00f0 oferm\u00e6gnes egsan sceolde\nhandum sinum, and halegu treow,\nseo \u00feu wi\u00f0 rodora weard rihte healdest.\"\n2120\nHim \u00fea se beorn bletsunga lean\n\u00feurh hand ageaf, and \u00fe\u00e6s hereteames\nealles teo\u00f0an sceat Abraham sealde\ngodes bisceope. \u00fea spr\u00e6c gu\u00f0cyning,\nSodoma aldor, secgum befylled,\n2125\nto Abrahame (him w\u00e6s ara \u00feearf).\n\"Forgif me mennen minra leoda,\n\u00fee \u00feu ahreddest herges cr\u00e6ftum\nwera w\u00e6lclommum! Hafa \u00fee wunden gold\n\u00fe\u00e6t \u00e6r agen w\u00e6s ussum folce,\n2130\nfeoh and fr\u00e6twa! L\u00e6t me freo l\u00e6dan\neft on e\u00f0el \u00e6\u00f0elinga bearn,\non weste wic wif and cnihtas,\nearme wydewan! Eaforan syndon deade,\nfolcgesi\u00f0as, nym\u00f0e fea ane,\n2135\n\u00fee me mid sceoldon mearce healdan.\"\nHim \u00fea Abraham andswarode\n\u00e6dre for eorlum, elne gewur\u00f0od,\ndome and sigore, drihtlice spr\u00e6c:\n\"Ic \u00fee gehate, h\u00e6le\u00f0a waldend,\n2140\nfor \u00feam halgan, \u00fee heofona is and \u00feisse eor\u00f0an agendfrea,\nwordum minum, nis woruldfeoh,\n\u00fee ic me agan wille,\nsceat ne scilling, \u00fe\u00e6s ic on sceotendum,\n2145\n\u00feeoden m\u00e6ra, \u00feines ahredde,\n\u00e6\u00f0elinga helm, \u00fey l\u00e6s \u00feu eft cwe\u00f0e\n\u00fe\u00e6t ic wurde, willgesteallum,\neadig on eor\u00f0an \u00e6rgestreonum\nSodoma rices; ac \u00feu selfa most heonon\n2150\nhu\u00f0e l\u00e6dan, \u00fee ic \u00fee \u00e6t hilde gesloh,\nealle buton d\u00e6le \u00feissa drihtwera,\nAneres and Mamres and Escoles.\nNelle ic \u00fea rincas rihte ben\u00e6man,\nac hie me fulleodon \u00e6t \u00e6sc\u00fer\u00e6ce,\n2155\nfuhton \u00fee \u00e6fter frofre. Gewit \u00feu ferian nu\nham hyrsted gold and healsm\u00e6ge\u00f0,\nleoda idesa. \u00feu \u00fee la\u00f0ra ne \u00feearft\nh\u00e6le\u00f0a hild\u00fer\u00e6ce hwile onsittan,\nnor\u00f0manna wig; ac nefuglas\n2160\nunder beorhhleo\u00feum blodige sitta\u00f0,\n\u00feeodherga w\u00e6le \u00feicce gefylled.\"\nGewat him \u00fea se healdend ham si\u00f0ian\nmid \u00fey hereteame \u00fee him se halga forgeaf,\nEbrea leod arna gemyndig.\n2165\n\u00fea gen Abrahame eowde selfa\nheofona heahcyning halige spr\u00e6ce,\ntrymede tilmodigne and him to reordode:\n\"Meda syndon micla \u00feina! Ne l\u00e6t \u00feu \u00fee \u00fein mod asealcan,\nw\u00e6rf\u00e6st willan mines! Ne \u00feearft \u00feu \u00fee wiht ondr\u00e6dan,\n2170\n\u00feenden \u00feu mine lare l\u00e6stest, ac ic \u00fee lifigende her\nwi\u00f0 weana gehwam wreo and scylde\nfolmum minum; ne \u00feearft \u00feu forht wesan.\"\nAbraham \u00fea andswarode,\nd\u00e6drof drihtne sinum, fr\u00e6gn hine d\u00e6grime frod:\n2175\n\"Hw\u00e6t gifest \u00feu me, gasta waldend,\nfreomanna to frofre, nu ic \u00feus feasceaft eom?\nNe \u00feearf ic yrfestol eaforan bytlian\n\u00e6negum minra, ac me \u00e6fter sculon\nmine woruldmagas welan bryttian.\n2180\nNe sealdest \u00feu me sunu; for\u00f0on mec sorg drece\u00f0\non sefan swi\u00f0e. Ic sylf ne m\u00e6g\nr\u00e6d ahycgan. G\u00e6\u00f0 gerefa min\nf\u00e6gen freobearnum; f\u00e6ste mynte\u00f0\ninge\u00feancum \u00fe\u00e6t me \u00e6fter sie\n2185\neaforan sine yrfeweardas.\nGeseo\u00f0 \u00fe\u00e6t me of bryde bearn ne wocon.\"\nHim \u00fea \u00e6dre god andswarode:\n\"N\u00e6fre gerefan r\u00e6da\u00f0 \u00feine\neafora yrfe, ac \u00fein agen bearn\nSwilc bi\u00f0 m\u00e6gburge menigo \u00feinre\nfolcbearnum frome. Ne l\u00e6t \u00feu \u00fein ferh\u00f0 wesan\nsorgum as\u00e6led. Gien \u00fee sunu weor\u00f0e\u00f0,\nbearn of bryde \u00feurh gebyrd cumen,\nse \u00f0e \u00e6fter bi\u00f0 yrfes hyrde,\n2200\ngode m\u00e6re. Ne geomra \u00feu!\nIc eom se waldend se \u00fee for wintra fela\nof Caldea ceastre al\u00e6dde,\nfeowera sumne, gehet \u00fee folcstede\nwide to gewealde. Ic \u00fee w\u00e6re nu,\n2205\nmago Ebrea, mine selle,\n\u00fe\u00e6t sceal fromcynne folde \u00feine,\nsidland manig, geseted wur\u00f0an,\neor\u00f0an sceatas o\u00f0 Eufraten,\nand from Egypta e\u00f0elmearce\nfamige flodas folcm\u00e6g\u00f0a byht.\"\n\u00fea w\u00e6s Sarran sar on mode,\n\u00fe\u00e6t him Abrahame \u00e6nig ne wear\u00f0\n\u00feurh gebedscipe bearn gem\u00e6ne,\nfreolic to frofre. Ongann \u00fea ferh\u00f0cearig\n2220\nto were sinum wordum m\u00e6\u00f0lan:\n\"Me \u00fe\u00e6s forwyrnde waldend heofona,\n\u00fe\u00e6t ic m\u00e6gburge moste \u00feinre\nrim miclian roderum under\neaforum \u00feinum. Nu ic eom orwena\n2225\n\u00fe\u00e6t unc see\u00f0ylst\u00e6f \u00e6fre weor\u00f0e\ngife\u00f0e \u00e6tg\u00e6dere. Ic eom geomorfrod!\nDrihten min, do swa ic \u00fee bidde!\nHer is f\u00e6mne, freolecu m\u00e6g,\nides Egyptisc, an on gewealde.\n2230\nHat \u00fee \u00fea recene reste gestigan,\nand afanda hw\u00e6\u00f0er frea wille\n\u00e6nigne \u00fee yrfewearda\non woruld l\u00e6tan \u00feurh \u00fe\u00e6t wif cuman.\"\n\u00fea se eadega wer idese larum\n2235\nge\u00f0afode, heht him \u00feeowmennen\non bedd gan bryde larum.\nHire mod astah \u00fea heo w\u00e6s magotimbre\nbe Abrahame eacen worden.\nOngan \u00e6f\u00feancum agendfrean\n2240\nhalsf\u00e6st herian, hige\u00fery\u00f0e w\u00e6g,\nw\u00e6s la\u00f0wendo, lustum ne wolde\n\u00feeowdom \u00feolian, ac heo \u00feriste ongan\nwi\u00f0 Sarran swi\u00f0e winnan.\n\u00fea ic \u00fe\u00e6t wif gefr\u00e6gn wordum cy\u00f0an\n2245\nhire mandrihtne modes sorge,\nsarferh\u00f0 s\u00e6gde and swi\u00f0e cw\u00e6\u00f0:\n\"Ne fremest \u00feu gerysnu and riht wi\u00f0 me.\n\u00feafodest \u00feu gena \u00fe\u00e6t me \u00feeowmennen,\nsi\u00f0\u00f0an Agar \u00f0e, idese laste,\n2250\nbeddreste gestah, swa ic bena w\u00e6s, drehte dogora gehwam d\u00e6dum and wordum\nunarlice. \u00fe\u00e6t Agar sceal ongieldan,\ngif ic mot for \u00fee mine wealdan,\nAbraham leofa. \u00fe\u00e6s sie \u00e6lmihtig,\n2255\ndrihtna drihten, dema mid unc twih.\"\nHire \u00fea \u00e6dre andswarode\nwishidig wer wordum sinum:\n\"Ne forl\u00e6te ic \u00fee, \u00feenden wit lifia\u00f0 bu,\narna lease, ac \u00feu \u00fein agen most\n2260\nmennen ateon, swa \u00fein mod freo\u00f0.\"\n\u00f0a wear\u00f0 unbli\u00f0e Abrahames cwen,\nhire worc\u00feeowe wra\u00f0 on mode,\nheard and hre\u00f0e, higeteonan spr\u00e6c\nfr\u00e6cne on f\u00e6mnan. Heo \u00fea fleon gewat\n2265\n\u00ferea and \u00feeowdom; \u00feolian ne wolde\nyfel and ondlean, \u00fe\u00e6s \u00f0e \u00e6r dyde\nto Sarran, ac heo on si\u00f0 gewat\nwesten secan. \u00fe\u00e6r hie wuldres \u00feegn,\nengel drihtnes an gemitte\n2270\ngeomormode, se hie georne fr\u00e6gn:\n\"Hwider fundast \u00feu, feasceaft ides,\nsi\u00f0as dreogan? \u00feec Sarre ah.\"\nHeo him \u00e6dre andswarode:\n\"Ic fleah wean, wana wilna gehwilces,\n2275\nhl\u00e6fdigan hete, hean of wicum,\ntregan and teonan. Nu sceal tearighleor\non westenne witodes bidan,\nhwonne of heortan hunger o\u00f0\u00f0e wulf\nsawle and sorge somed abregde.\"\n2280\nHire \u00fea se engel andswarode:\n\"Ne ceara \u00feu feor heonon fleame d\u00e6lan\nsomwist incre, ac \u00feu sece eft,\nearna \u00fee ara, ea\u00f0mod ongin\ndreogan \u00e6fter duge\u00f0um, wes drihtenhold.\n2285\n\u00feu scealt, Agar, Abrahame sunu\non woruld bringan. Ic \u00fee wordum nu\nminum secge, \u00fe\u00e6t se magorinc sceal\nmid yldum wesan Ismahel haten.\nSe bi\u00f0 unhyre, orl\u00e6ggifre,\n2290\nand wi\u00f0erbreca wera cneorissum,\nmagum sinum; hine monige on\nwra\u00f0e winna\u00f0 mid w\u00e6pen\u00fer\u00e6ce.\nOf \u00feam frumgaran folc aw\u00e6cnia\u00f0,\n\u00feeod unm\u00e6te. Gewit \u00feu \u00feinne eft\nefne \u00fea he on worulde wintra h\u00e6fde VI and LXXX. Sunu weox and \u00f0ah,\nswa se engel \u00e6r \u00feurh his agen word,\nf\u00e6le freo\u00f0oscealc, f\u00e6mnan s\u00e6gde.\n\u00fea se \u00f0eoden ymb XIII gear,\n2305\nece drihten, wi\u00f0 Abrahame spr\u00e6c:\n\"Leofa, swa ic \u00fee l\u00e6re, l\u00e6st uncre wel\ntreowr\u00e6denne! Ic \u00fee on tida gehwone\ndugu\u00f0um stepe. Wes \u00feu d\u00e6dum from\nwillan mines! Ic \u00fea w\u00e6re for\u00f0\n2310\nso\u00f0e gel\u00e6ste, \u00fee ic \u00fee sealde geo\nfrofre to wedde, \u00fe\u00e6s \u00fein ferh\u00f0 bemearn.\n\u00feu scealt halgian hired \u00feinne.\nSete sigores tacn so\u00f0 on gehwilcne\nw\u00e6pnedcynnes, gif \u00feu wille on me\n2315\nhlaford habban o\u00f0\u00f0e holdne freond\n\u00feinum fromcynne. Ic \u00fe\u00e6s folces beo\nhyrde and healdend, gif ge hyra\u00f0 me\nbreostgehygdum and bebodu willa\u00f0\nmin fullian. Sceal monna gehwilc\nadrifen from dugu\u00f0um. Do\u00f0 swa ic hate!\nIc eow treowige, gif ge \u00fe\u00e6t tacen gega\u00fe\nso\u00f0geleafan. \u00feu scealt sunu agan,\nbearn be bryde \u00feinre, \u00feone sculon burhsittende\nealle Isaac hatan. Ne \u00feearf \u00fee \u00fe\u00e6s eaforan sceomigan,\n2330\nac ic \u00feam magorince mine sylle\ngodcunde gife gastes mihtum,\nfreondsped fremum. He onfon sceal\nblisse minre and bletsunge,\nlufan and lisse. Of \u00feam leodfruman\n2335\nbrad folc cuma\u00f0, bregowearda fela\nrofe arisa\u00f0, rices hyrdas,\nworuldcyningas wide m\u00e6re.\"\nAbraham \u00f0a ofestum legde\nhleor on eor\u00f0an, and mid hucse bewand\n2340\n\u00fea hleo\u00f0orcwydas on hige sinum,\nmodge\u00f0ance. He \u00fe\u00e6s m\u00e6ld\u00e6ges\nself ne wende \u00fe\u00e6t him Sarra,\nbryd blondenfeax bringan meahte\non woruld sunu; wiste gearwe\n2345\n\u00fe\u00e6t \u00fe\u00e6t wif huru wintra h\u00e6fde\nefne C, geteled rimes.\nHe \u00fea metode oncw\u00e6\u00f0 missarum frod:\n\"Lifge Ismael larum swilce,\n\u00feeoden, \u00feinum, and \u00fee \u00feanc wege,\n2350\nheardr\u00e6dne hyge, heortan strange,\nto dreoganne d\u00e6ges and nihtes\nwordum and d\u00e6dum willan \u00feinne.\"\nHim \u00fea f\u00e6gere frea \u00e6lmihtig,\nece drihten, andswarode:\n2355\n\"\u00fee sceal wintrum frod on woruld bringan\nSarra sunu, so\u00f0 for\u00f0 gan\nwyrd \u00e6fter \u00feissum wordgemearcum.\nIc Ismael estum wille\nbletsian nu, swa \u00feu bena eart\n2360\n\u00feinum frumbearne, \u00fe\u00e6t feorhdaga\non woruldrice worn gebide,\ntanum tudre. \u00feu \u00fe\u00e6s ti\u00f0a beo!\nHw\u00e6\u00f0re ic Isace, eaforan \u00feinum,\ngeongum bearne, \u00feam \u00fee gen nis\n2365\non woruld cumen, willa spedum\nduge\u00f0a gehwilcre on dagum wille\nswi\u00f0or stepan and him so\u00f0e to\nmodes w\u00e6re mine gel\u00e6stan,\nhalige higetreowa, and him hold wesan.\"\n2370\nAbraham fremede swa him se eca bebead,\nsette fri\u00f0otacen be frean h\u00e6se\non his selfes sunu, heht \u00fe\u00e6t segn wegan\nheah gehwilcne, \u00fee his hina w\u00e6s\nw\u00e6pnedcynnes, w\u00e6re gemyndig,\n2375\ngleaw on mode, \u00f0a him god sealde\nso\u00f0e treowa, and \u00fea seolf onfeng\ntorhtum tacne. A his tir metod,\ndomf\u00e6st cyning, duge\u00f0um iecte\non woruldrice; he him \u00fe\u00e6s worhte to,\n2380\nsi\u00f0\u00f0an he on f\u00e6re fur\u00f0um meahte\nhis waldendes willan fremman.\n\u00fea \u00fe\u00e6t wif ahloh wereda drihtnes\nnalles gl\u00e6dlice, ac heo gearum frod\n\u00feone hleo\u00f0orcwyde husce belegde\n2385\non sefan swi\u00f0e. So\u00f0 ne gelyfde,\n\u00fe\u00e6t \u00fe\u00e6re spr\u00e6ce sped folgode.\n\u00fea \u00fe\u00e6t gehyrde heofona waldend,\n\u00fe\u00e6t on bure ahof bryd Abrahames\nhihtleasne hleahtor, \u00fea cw\u00e6\u00f0 halig god:\n2390\n\"Ne wile Sarran so\u00f0 gelyfan\nwordum minum. Sceal seo wyrd swa \u00feeah\nfor\u00f0 steallian swa ic \u00fee \u00e6t frym\u00f0e gehet.\nSo\u00f0 ic \u00fee secge, on \u00feas sylfan tid\nof idese bi\u00f0 eafora w\u00e6cned.\n2395\n\u00feonne ic \u00feas ilcan o\u00f0re si\u00f0e\nwic gesece, \u00fee beo\u00f0 wordgehat\nmin gel\u00e6sted. \u00feu on magan wlitest,\n\u00fein agen bearn, Abraham leofa!\"\nGewiton him \u00fea \u00e6dre ellorfuse\n2400\n\u00e6fter \u00fe\u00e6re spr\u00e6ce spedum feran\nof \u00feam hleo\u00f0orstede, halige gastas,\nlastas legdon, (him w\u00e6s Lothes m\u00e6g\nsylfa on gesi\u00f0\u00f0e), o\u00f0\u00fe\u00e6t hie on Sodoman,\nweallsteape burg, wlitan meahton.\n2405\nGesawon ofer since salo hlifian,\nreced ofer readum golde. Ongan \u00fea rodera waldend,\narf\u00e6st wi\u00f0 Abraham sprecan, s\u00e6gde him unlytel spell:\n\"Ic on \u00feisse byrig bearhtm gehyre,\nsynnigra cyrm swi\u00f0e hludne,\n2410\nealogalra gylp, yfele spr\u00e6ce\nwerod under weallum habban; for\u00feon w\u00e6rlogona sint, folces firena hefige. Ic wille fandigan nu,\nmago Ebrea, hw\u00e6t \u00fea men don,\ngif hie swa swi\u00f0e synna fremma\u00f0\n2415\n\u00feeawum and ge\u00feancum, swa hie on \u00feweorh spreca\u00f0\nfacen and inwit; \u00fe\u00e6t sceal fyr wrecan,\nswefyl and sweart lig sare and grimme,\nhat and h\u00e6ste h\u00e6\u00f0num folce.\"\nWeras basnedon witelaces,\n2420\nwean under weallum, and heora wif somed.\nDugu\u00f0um wlance drihtne guldon\ngod mid gnyrne, o\u00f0\u00fe\u00e6t gasta helm,\nlifes leohtfruma leng ne wolde\ntorn \u00ferowigean, ac him to sende\n2425\nsti\u00f0mod cyning strange twegen\naras sine, \u00fea on \u00e6fentid\nsi\u00f0e gesohton Sodoma ceastre.\nHie \u00fea \u00e6t burhgeate beorn gemitton\nsylfne sittan sunu Arones,\n2430\n\u00fe\u00e6t \u00feam gleawan were geonge \u00feuhton\nmen for his eagum. Aras \u00fea metodes \u00feeow\ngastum togeanes, gretan eode\ncuman cu\u00f0lice, cynna gemunde\nriht and gerisno, and \u00feam rincum bead\n2435\nnihtfeormunge. Him \u00fea nergendes\n\u00e6\u00f0ele \u00e6rendracan andswarodon:\n\"Hafa arna \u00feanc, \u00feara \u00fee \u00feu unc bude!\nWit be \u00feisse str\u00e6te stille \u00feenca\u00f0\ns\u00e6les bidan, si\u00f0\u00f0an sunnan eft\n2440\nfor\u00f0 to morgen metod up forl\u00e6t.\"\n\u00fea to fotum Loth\n\u00feam giestum hnah, and him georne bead\nreste and gereorda and his recedes hleow\nand \u00feegnunge. Hie on \u00feanc curon\n2445\n\u00e6\u00f0elinges est, eodon sona,\nswa him se Ebrisca eorl wisade,\nin undor edoras. \u00fe\u00e6r him se \u00e6\u00f0ela geaf,\ngleawferh\u00f0 h\u00e6le, giestli\u00f0nysse\nf\u00e6gre on flette, o\u00f0\u00fe\u00e6t for\u00f0 gewat\n2450\n\u00e6fenscima. \u00fea com \u00e6fter niht\non last d\u00e6ge. Lagustreamas wreah,\n\u00ferym mid \u00feystro \u00feisses lifes,\ns\u00e6s and sidland. Comon Sodomware,\ngeonge and ealde, gode unleofe\n2455\ncor\u00f0rum miclum cuman acsian,\n\u00fe\u00e6t hie beh\u00e6fdon herges m\u00e6gne\nLoth mid giestum. Heton l\u00e6dan ut\nof \u00feam hean hofe halige aras,\nweras to gewealde, wordum cw\u00e6don\n2460\n\u00fe\u00e6t mid \u00feam h\u00e6le\u00f0um h\u00e6man wolden\nunscomlice, arna ne gymden.\n\u00fea aras hra\u00f0e, se \u00f0e oft r\u00e6d ongeat,\nLoth on recede, eode lungre ut,\nspr\u00e6c \u00fea ofer ealle \u00e6\u00f0elinga gedriht\n2465\nsunu Arones, snytra gemyndig:\n\"Her syndon inne unwemme twa\ndohtor mine. Do\u00f0, swa ic eow bidde\n(ne can \u00feara idesa ow\u00f0er gieta\n\u00feurh gebedscipe beorna neawest)\n2470\nand geswica\u00f0 \u00fe\u00e6re synne. Ic eow sylle \u00fea,\n\u00e6r ge sceonde wi\u00f0 gesceapu fremmen,\nungifre yfel ylda bearnum.\nOnfo\u00f0 \u00fe\u00e6m f\u00e6mnum, l\u00e6ta\u00f0 fri\u00f0 agon\ngistas mine, \u00fea ic for gode wille\n2475\ngemundbyrdan, gif ic mot, for eow.\"\nHim \u00fea seo m\u00e6nigeo \u00feurh gem\u00e6ne word,\narlease cyn, andswarode:\n\"\u00feis \u00feince\u00f0 gerisne and riht micel,\n\u00fe\u00e6t \u00feu \u00f0e aferige of \u00feisse folcsceare.\n2480\n\u00feu \u00feas wer\u00f0eode wr\u00e6ccan laste\nfreonda feasceaft feorran gesohtest, wine\u00feearfende. Wilt \u00f0u, gif \u00feu most,\nwesan usser her aldordema,\nleodum lareow?\" \u00fea ic on Lothe gefr\u00e6gn\n2485\nh\u00e6\u00f0ne herem\u00e6cgas handum gripan,\nfaum folmum. Him fylston wel\ngystas sine, and hine of gromra \u00fea,\ncuman arf\u00e6ste, clommum abrugdon\nin under edoras, and \u00fea ofstlice\n2490\nanra gehwilcum ymbstandendra\nfolces Sodoma f\u00e6ste fors\u00e6ton\nheafodsiena. Wear\u00f0 eal here sona\nburhwarena blind. Abrecan ne meahton\nre\u00f0emode reced \u00e6fter gistum,\n2495\nswa hie fundedon, ac \u00fe\u00e6r frome w\u00e6ron\ngodes spellbodan. H\u00e6fde gistm\u00e6gen\nsti\u00f0e strengeo, styrnde swi\u00f0e\nwerode mid wite. Spr\u00e6con wordum \u00fea\nf\u00e6le freo\u00f0oscealcas f\u00e6gre to Lothe:\n2500\n\"Gif \u00feu sunu age o\u00f0\u00f0e sw\u00e6sne m\u00e6g,\no\u00f0\u00f0e on \u00feissum folcum freond \u00e6nigne\neac \u00feissum idesum \u00fee we her on wlita\u00f0,\nal\u00e6de of \u00feysse leodbyrig, \u00fea \u00f0e leofe sien,\nofestum miclum, and \u00fein ealdor nere,\n2505\n\u00fey l\u00e6s \u00feu forweor\u00f0e mid \u00feyssum w\u00e6rlogan.\nUnc hit waldend heht for wera synnum\nSodoma and Gomorra sweartan lige,\nfyre gesyllan and \u00feas folc slean,\ncynn on ceastrum mid cwealm\u00ferea\n2510\nand his torn wrecan. \u00fe\u00e6re tide is\nneah ge\u00ferungen. Gewit \u00feu nergean \u00fein\nfeorh foldwege. \u00fee is frea milde.\"\nHim \u00fea \u00e6dre Loth andswarode:\n\"Ne m\u00e6g ic mid idesum aldornere mine\n2515\nswa feor heonon fe\u00f0egange\nsi\u00f0e gesecan. Git me sibblufan\nand freondscipe f\u00e6gre cy\u00f0a\u00f0,\ntreowe and hyldo ti\u00f0ia\u00f0 me.\nIc wat hea burh her ane neah,\n2520\nlytle ceastre. Lyfa\u00f0 me \u00fe\u00e6r\nare and reste, \u00fe\u00e6t we aldornere\non Sigor up secan moten.\nGif git \u00fe\u00e6t f\u00e6sten fyre willa\u00f0\nsteape forstandan, on \u00fe\u00e6re stowe we\n2525\ngesunde magon s\u00e6les bidan,\nfeorh generigan.\" Him \u00fea freondlice\nenglas arf\u00e6ste andswaredon:\n\"\u00feu scealt \u00fe\u00e6re bene, nu \u00feu ymb \u00fea burh sprycest,\nti\u00f0a weor\u00f0an. Teng recene to\n2530\n\u00feam f\u00e6stenne; wit \u00fee fri\u00f0e healda\u00f0\nand mundbyrde. Ne moton wyt\non w\u00e6rlogum wrecan torn godes,\nswebban synnig cynn, \u00e6r \u00f0on \u00feu on S\u00e6gor \u00fein\nbearn gel\u00e6de and bryd somed.\"\n2535\n\u00fea onette Abrahames m\u00e6g\nto \u00feam f\u00e6stenne. Fe\u00f0e ne sparode\neorl mid idesum, ac he ofstum for\u00f0\nlastas legde, o\u00f0\u00fe\u00e6t he gel\u00e6dde\nbryd mid bearnum under burhlocan\n2540\nin S\u00e6gor his. \u00fea sunne up,\nfolca fri\u00f0candel, fur\u00f0um eode,\n\u00fea ic sendan gefr\u00e6gn swegles aldor\nswefl of heofnum and sweartne lig\nwerum to wite, weallende fyr,\n2545\n\u00fe\u00e6s hie on \u00e6rdagum drihten tyndon\nlange \u00ferage. Him \u00fe\u00e6s lean forgeald\ngasta waldend! Grap heah\u00ferea\non h\u00e6\u00f0encynn. Hlynn wear\u00f0 on ceastrum,\ncirm arleasra cwealmes on ore,\n2550\nla\u00f0an cynnes. Lig eall fornam\n\u00fe\u00e6t he grenes fond goldburgum in,\nswylce \u00fe\u00e6r ymbutan unlytel d\u00e6l\nsidre foldan geondsended w\u00e6s\nbryne and brogan. Bearwas wurdon\n2555\nto axan and to yslan, eor\u00f0an w\u00e6stma,\nefne swa wide swa \u00f0a witelac\nre\u00f0e ger\u00e6hton rum land wera.\nStrudende fyr steapes and geapes,\nswogende leg, forswealh eall geador\n2560\n\u00fe\u00e6t on Sodoma byrig secgas ahton\nand on Gomorra. Eall \u00fe\u00e6t god spilde,\nfrea mid \u00fey folce. \u00fea \u00fe\u00e6t fyrgebr\u00e6c,\nleoda lifgedal, Lothes gehyrde\nbryd on burgum, under b\u00e6c beseah\n2565\nwi\u00f0 \u00fe\u00e6s w\u00e6lfylles. Us gewritu secga\u00f0\n\u00fe\u00e6t heo on sealtstanes sona wurde\nanlicnesse. \u00e6fre si\u00f0\u00f0an\nse monlica (\u00fe\u00e6t is m\u00e6re spell)\nstille wunode, \u00fe\u00e6r hie strang begeat\n2570\nwite, \u00fe\u00e6s heo wordum wuldres \u00feegna\nhyran ne wolde. Nu sceal heard and steap\non \u00feam wicum wyrde bidan,\ndrihtnes domes, hwonne dogora rim,\nworuld gewite. \u00fe\u00e6t is wundra sum,\n2575\n\u00feara \u00f0e geworhte wuldres aldor.\nHim \u00fea Abraham gewat ana gangan\nmid \u00e6rd\u00e6ge \u00fe\u00e6t he eft gestod\n\u00fe\u00e6r wordum \u00e6r wi\u00f0 his waldend spr\u00e6c\nfrod frumgara. He geseah from foldan up\n2580\nwide fleogan w\u00e6lgrimne rec.\nHie \u00fe\u00e6s wlenco onwod and wingedrync\n\u00fe\u00e6t hie firend\u00e6da to frece wurdon,\nsynna \u00feriste, so\u00f0 ofergeaton,\ndrihtnes domas, and hwa him duge\u00f0a forgeaf,\n2585\nbl\u00e6d on burgum. For\u00feon him brego engla\nwylmhatne lig to wr\u00e6ce sende.\nWaldend usser gemunde w\u00e6rf\u00e6st \u00fea\nAbraham arlice, swa he oft dyde\nleofne mannan. Loth generede,\n2590\nm\u00e6g \u00fe\u00e6s o\u00f0res, \u00fea seo m\u00e6negeo forwear\u00f0.\nNe dorste \u00fea d\u00e6drof h\u00e6le\nfor frean egesan on \u00feam f\u00e6stenne\nleng eardigean, ac him Loth gewat\nof byrig gangan and his bearn somed\n2595\nw\u00e6lstowe fyrr wic sceawian,\no\u00f0\u00fe\u00e6t hie be hli\u00f0e heare dune\neor\u00f0scr\u00e6f fundon. \u00fe\u00e6r se eadega Loth\nw\u00e6rf\u00e6st wunode, waldende leof,\nd\u00e6grimes worn and his dohtor twa.\n2600\nHie dydon swa; druncnum eode\nseo yldre to \u00e6r on reste\nheora bega f\u00e6der. Ne wiste blondenfeax\nhwonne him f\u00e6mnan to bryde him bu w\u00e6ron,\non ferh\u00f0cofan f\u00e6ste genearwod\n2605\nmode and gemynde, \u00fe\u00e6t he m\u00e6g\u00f0a si\u00f0\nwine druncen gewitan ne meahte.\nIdesa wurdon eacne, eaforan brohtan\nwillgesweostor on woruld sunu\nheora ealdan f\u00e6der. \u00feara \u00e6\u00f0elinga\n2610\nmodor o\u00f0erne Moab nemde,\nLothes dohter, seo on life w\u00e6s\nwintrum yldre. Us gewritu secgea\u00f0,\ngodcunde bec, \u00fe\u00e6t seo gingre\nhire agen bearn Ammon hete.\n\u00e6\u00f0elinga bearn, Ammonitare.\nGewat him \u00fea mid bryde bro\u00f0or Arones\nunder Abimelech \u00e6hte l\u00e6dan\nmid his hiwum. H\u00e6le\u00f0um s\u00e6gde\n\u00fe\u00e6t Sarra his sweostor w\u00e6re,\n2625\nAbraham wordum (bearh his aldre),\n\u00fey he wiste gearwe \u00fe\u00e6t he winemaga,\non folce lyt freonda h\u00e6fde.\n\u00fea se \u00feeoden his \u00feegnas sende,\nheht hie bringan to him selfum.\n2630\n\u00fea w\u00e6s ell\u00feeodig o\u00f0re si\u00f0e\nwif Abrahames from were l\u00e6ded\non fremdes f\u00e6\u00f0m. Him \u00fe\u00e6r fylste \u00fea\nece drihten, swa he oft dyde,\nnergend usser. Com nihtes self,\n2635\n\u00fe\u00e6r se waldend l\u00e6g wine druncen.\nOngan \u00fea so\u00f0cyning \u00feurh swefn sprecan\nto \u00feam \u00e6\u00f0elinge and him yrre hweop:\n\"\u00feu Abrahames idese gename,\nbryde \u00e6t beorne. \u00fee abregdan sceal\n2640\nfor \u00fe\u00e6re d\u00e6de dea\u00f0 of breostum\nsawle \u00feine.\" Him symbelwerig sinces brytta \u00feurh sl\u00e6p oncw\u00e6\u00f0:\n\"Hw\u00e6t, \u00feu \u00e6fre, engla \u00feeoden,\n\u00feurh \u00fein yrre wilt aldre l\u00e6tan,\n2645\nheah beheowan,\u00fe\u00e6ne \u00fee her leofa\u00f0\nrihtum \u00feeawum, bi\u00f0 on r\u00e6de f\u00e6st,\nmodge\u00feance, and him miltse\nto \u00fee sece\u00f0? Me s\u00e6gde \u00e6r\n\u00fe\u00e6t wif hire wordum selfa\n\"Agif Abrahame idese sine,\nwif to gewealde, gif \u00feu on worulde leng,\n\u00e6\u00f0elinga helm, aldres recce.\nHe is god and gleaw, m\u00e6g self wi\u00f0god sprecan,\ngeseon sweglcyning. \u00feu sweltan scealt\n2660\nmid feo and mid feorme, gif \u00f0u \u00feam frumgaran\nbryde wyrnest. He abiddan m\u00e6g,\ngif he ofstum me \u00e6rendu wile\n\u00feeawf\u00e6st and ge\u00feyldig \u00fein abeodan,\n\u00fe\u00e6t ic \u00fee lissa lifigendum giet\n2665\non dagum l\u00e6te dugu\u00fea brucan\nsinces gesundne.\" \u00fea sl\u00e6pe tobr\u00e6gd\nforht folces weard. Heht him fetigean to gesprecan sine, spedum s\u00e6gde\neorlum Abimeleh, egesan ge\u00f0read,\n2670\nwaldendes word. Weras him ondredon\nfor \u00fe\u00e6re d\u00e6de drihtnes handa\nsweng \u00e6fter swefne. Heht sylf cyning\nhim \u00fea Abraham to ofstum miclum.\n\u00fea reordode rice \u00feeoden:\n2675\n\"Mago Ebrea, \u00fe\u00e6s \u00feu me wylle\nwordum secgean, hu geworhte ic \u00fe\u00e6t,\nsi\u00f0\u00f0an \u00feu usic under, Abraham, \u00feine\non \u00feas e\u00f0elturf \u00e6hta l\u00e6ddest,\n\u00fe\u00e6t \u00feu me \u00feus swi\u00f0e searo renodest?\n\u00feurh \u00fe\u00e6t wif on me wrohte alecgean,\norm\u00e6te yfel. We \u00fee arlice\ngefeormedon, and \u00fee freondlice\non \u00feisse wer\u00feeode wic get\u00e6hton,\nland to lissum. \u00feu us leanast nu,\n2690\nunfreondlice fremena \u00feancast!\"\nAbraham \u00fea andswarode:\n\"Ne dyde ic for facne ne for feondscipe\nne for wihte \u00fe\u00e6s ic \u00fee wean u\u00f0e.\nAc ic me, gumena baldor, gu\u00f0bordes sweng\n2695\nleodmagum feor lare gebearh,\nsi\u00f0\u00f0an me se halga of hyrde frean,\nmines f\u00e6der fyrn al\u00e6dde.\nIc fela si\u00f0\u00f0an folca gesohte,\nwina uncu\u00f0ra, and \u00feis wif mid me,\n2700\nfreonda feasceaft. Ic \u00fe\u00e6s f\u00e6res a\non wenum s\u00e6t hwonne me wra\u00f0ra sum\nell\u00feeodigne aldre beheowe,\nse \u00f0e him \u00feas idese eft agan wolde.\nFor\u00f0on ic wigsmi\u00f0um wordum s\u00e6gde\n2705\n\u00fe\u00e6t Sarra min sweostor w\u00e6re\n\u00e6ghw\u00e6r eor\u00f0an \u00fe\u00e6r wit earda leas\nmid wealandum winnan sceoldon.\nIc \u00fe\u00e6t ilce dreah on \u00feisse e\u00f0yltyrf,\nsi\u00f0\u00f0an ic \u00feina, \u00feeoden m\u00e6ra,\n2710\nmundbyrde geceas. Ne w\u00e6s me on mode cu\u00f0,\nhw\u00e6\u00f0er on \u00feyssum folce frean \u00e6lmihtiges\negesa w\u00e6re, \u00fea ic her \u00e6rest com.\nFor\u00feon ic \u00feegnum \u00feinum dyrnde\nand sylfum \u00fee swi\u00f0ost micle\n2715\nso\u00f0an spr\u00e6ce, \u00fe\u00e6t me Sarra\nbryde laste beddreste gestah.\"\n\u00fea ongan Abim\u00e6leh Abraham swi\u00f0an\nworuldgestreonum and him his wif ageaf.\nSealde him to bote, \u00fe\u00e6s \u00fee he his bryd genam,\n2720\ngangende feoh and gl\u00e6d seolfor\nand weorc\u00feeos.Spr\u00e6c \u00fea wordum eac\nto Abrahame \u00e6\u00f0elinga helm:\n\"wuna mid usic and \u00fee wic geceos\non \u00feissum lande \u00fe\u00e6r \u00fee leofost sie,\n2725\ne\u00f0elstowe, \u00fee ic agan sceal.\nWes us f\u00e6le freond, we \u00f0e feoh sylla\u00f0!\"\nCw\u00e6\u00f0 \u00fea eft ra\u00f0e o\u00f0re worde\nto Sarran sinces brytta:\n\"Ne \u00feearf \u00f0e on edwit Abraham settan,\n2730\n\u00f0in freadrihten, \u00fe\u00e6t \u00feu flettpa\u00f0as,\nm\u00e6g \u00e6lfscieno, mine tr\u00e6de,\nac him hygeteonan hwitan seolfre\ndeope bete. Ne ceara incit dugu\u00f0a\nof \u00f0isse e\u00f0yltyrf ellor secan,\n2735\nwinas uncu\u00f0e, ac wunia\u00f0 her.\"\nAbraham fremede swa hine his aldor heht,\nonfeng freondscipe be frean h\u00e6se,\nlufum and lissum. He w\u00e6s leof gode.\nFor\u00f0on he sibbe ges\u00e6lig dreah\n2740\nand his scippende under sceade gefor,\nhleowfe\u00f0rum \u00feeaht, her \u00feenden lifde.\n\u00fea gien w\u00e6s yrre god Abimelehe\nfor \u00fe\u00e6re synne \u00fee he wi\u00f0 Sarrai\nand wi\u00f0 Abrahame \u00e6r gefremede,\n2745\n\u00fea he ged\u00e6lde him deore twa,\nwif and w\u00e6pned. He \u00fe\u00e6s weorc gehleat,\nfrecne wite. Ne meahton freo ne \u00feeowe\nheora bregoweardas bearnum ecan\nmonrim m\u00e6ge\u00f0, ac him \u00fe\u00e6t metod forstod,\n2750\no\u00f0\u00fe\u00e6t se halga his hlaforde\nAbraham ongan arna biddan\necne drihten. Him engla helm\ngetig\u00f0ode, tuddorsped onleac\nfolccyninge freora and \u00feeowra,\n2755\nwera and wifa; let weaxan eft\nheora rimgetel rodora waldend,\nead and \u00e6hta. \u00e6lmihtig wear\u00f0\nmilde on mode, moncynnes weard,\nAbimeleche, swa hine Abraham b\u00e6d.\n2760\n\u00fea com feran frea \u00e6lmihtig\nto Sarrai, swa he self gecw\u00e6\u00f0,\nwaldend usser, h\u00e6fde wordbeot\nleofum gel\u00e6sted, lifes aldor\neaforan and idese. Abrahame woc\n2765\nbearn of bryde, \u00feone brego engla,\n\u00e6r \u00f0y magotudre modor w\u00e6re\neacen be eorle, Isaac nemde.\nHine Abraham on mid his agene hand\nbeacen sette, swa him bebead metod,\n2770\nwuldortorht ymb wucan, \u00fe\u00e6s \u00fee hine on woruld\nto moncynne modor brohte.\nCniht weox and \u00feag, swa him cynde w\u00e6ron\n\u00e6\u00f0ele from yldrum. Abraham h\u00e6fde\nwintra hundteontig \u00fea him wif sunu\n2775\non \u00feanc geb\u00e6r. He \u00fe\u00e6s \u00f0rage bad,\nsi\u00f0\u00f0an him \u00e6rest \u00feurh his agen word\n\u00feone d\u00e6gwillan drihten bodode.\n\u00fea seo wyrd gewear\u00f0 \u00fe\u00e6t \u00fe\u00e6t wif geseah\nfor Abrahame Ismael plegan,\n2780\n\u00f0\u00e6r hie \u00e6t sw\u00e6sendum s\u00e6ton bu tu,\nhalig on hige, and heora hiwan eall,\ndruncon and drymdon. \u00fea cw\u00e6\u00f0 drihtlecu m\u00e6g,\nbryd to beorne: \"Forgif me, beaga weard,\nmin sw\u00e6s frea, hat si\u00f0ian\n2785\nAgar ellor and Ismael\nl\u00e6dan mid hie! Ne beo\u00f0 we leng somed\nwillum minum, gif ic wealdan mot.\nN\u00e6fre Ismael wi\u00f0 Isace,\nwi\u00f0 min agen bearn yrfe d\u00e6le\u00f0\n2790\non laste \u00fee, \u00feonne \u00feu of lice\naldor asendest.\" \u00fea w\u00e6s Abrahame\nweorce on mode \u00fe\u00e6t he on wr\u00e6c drife\nhis selfes sunu, \u00fea com so\u00f0 metod\nfreom on fultum, wiste ferh\u00f0 guman\n2795\ncearum on clommum. Cyning engla spr\u00e6c\nto Abrahame, ece drihten:\n\"L\u00e6t \u00fee aslupan sorge of breostum,\nmodgewinnan, and m\u00e6ge\u00f0 hire,\nbryde \u00feinre! Hat bu tu aweg\n2800\nAgar feran and Ismael,\ncniht of cy\u00f0\u00f0e! Ic his cynn gedo\nbrad and bresne bearna tudre,\nw\u00e6stmum spedig, swa ic \u00fee wordum gehet.\"\n\u00fea se wer hyrde his waldende,\n2805\ndraf of wicum dreorigmod tu,\nidese of earde and his agen bearn.\n\"Sweotol is and gesene \u00fe\u00e6t \u00fee so\u00f0 metod\non gesi\u00f0\u00f0e is, swegles aldor,\nse \u00f0e sigor sele\u00f0 snytru mihtum\n2810\nand \u00fein mod tryme\u00f0,\ngodcundum gifum. For\u00f0on \u00f0e giena speow,\n\u00fe\u00e6s \u00feu wi\u00f0 freond o\u00f0\u00f0e feond fremman ongunne\nwordum o\u00f0\u00f0e d\u00e6dum. Waldend scufe\u00f0,\nfrea on for\u00f0wegas folmum sinum\n2815\nwillan \u00feinne. \u00fe\u00e6t is wide cu\u00f0\nburhsittendum. Ic \u00fee bidde nu,\nwine Ebrea, wordum minum,\n\u00fe\u00e6t \u00feu tilmodig treowa selle,\nw\u00e6ra \u00feina, \u00fe\u00e6t \u00feu wille me\n2820\nwesan f\u00e6le freond fremena to leane,\n\u00feara \u00fee ic to dugu\u00f0um \u00f0e gedon h\u00e6bbe,\nsi\u00f0\u00f0an \u00f0u feasceaft feorran come\non \u00feas wer\u00feeode wr\u00e6ccan laste.\nGyld me mid hyldo, \u00fe\u00e6t ic \u00fee hneaw ne w\u00e6s\n2825\nlandes and lissa. Wes \u00feissum leodum nu\nand m\u00e6gburge minre arf\u00e6st,\ngif \u00fee alwalda, ure drihten,\nscirian wille, se \u00f0e gesceapu healde\u00f0,\n\u00fe\u00e6t \u00feu randwigum rumor mote\n2830\non \u00f0isse folcsceare fr\u00e6twa d\u00e6lan,\nmodigra gestreon, mearce settan.\"\n\u00f0a Abraham Abimelehe\nw\u00e6re sealde \u00fe\u00e6t he wolde swa.\nSi\u00f0\u00f0an w\u00e6s se eadega eafora \u00feares\n2835\nin Filistea folce eardf\u00e6st,\nleod Ebrea lange \u00ferage,\nfeasceaft mid fremdum. Him frea engla\nwic get\u00e6hte \u00fe\u00e6t weras hata\u00f0\nburhsittende Bersabea lond.\n2840\n\u00f0\u00e6r se halga heahsteap reced,\nburh timbrede and bearo sette,\nweobedd worhte, and his waldende\non \u00feam gl\u00e6dstede gild ons\u00e6gde,\nlac geneahe, \u00feam \u00fee lif forgeaf,\n2845\nges\u00e6liglic swegle under.\n\u00fea \u00fe\u00e6s rinces se rica ongan\ncyning costigan, cunnode georne\nhwilc \u00fe\u00e6s \u00e6\u00f0elinges ellen w\u00e6re,\nsti\u00f0um wordum spr\u00e6c him stefne to:\n2850\n\"Gewit \u00feu ofestlice, Abraham, feran,\nlastas lecgan and \u00fee l\u00e6de mid\n\u00fein agen bearn. \u00feu scealt Isaac me\nonsecgan, sunu \u00f0inne, sylf to tibre.\nSi\u00f0\u00f0an \u00feu gestigest steape dune,\n2855\nhrincg \u00fe\u00e6s hean landes, \u00fee ic \u00fee heonon get\u00e6ce,\nup \u00feinum agnum fotum, \u00fe\u00e6r \u00feu scealt ad geg\u00e6rwan,\nb\u00e6lfyr bearne \u00feinum, and blotan sylf\nsunu mid sweordes ecge, and \u00feonne sweartan lige\nleofes lic forb\u00e6rnan and me lac bebeodan.\"\n2860\nNe fors\u00e6t he \u00fey si\u00f0e, ac sona ongann\nfysan to fore. Him w\u00e6s frean engla\nword ondrysne and his waldend leof.\n\u00fea se eadga Abraham sine\nnihtreste ofgeaf. Nalles nergendes\n2865\nh\u00e6se wi\u00f0hogode, ac hine se halga wer\ngyrde gr\u00e6gan sweorde, cy\u00f0de \u00fe\u00e6t him gasta weardes\negesa on breostum wunode. Ongan \u00fea his esolas b\u00e6tan\ngamolferh\u00f0 goldes brytta, heht hine geonge twegen\nmen mid si\u00f0ian. M\u00e6g w\u00e6s his agen \u00feridda\n2870\nand he feor\u00f0a sylf. \u00fea he fus gewat\nfrom his agenum hofe Isaac l\u00e6dan,\nbearn unweaxen, swa him bebead metod.\nEfste \u00fea swi\u00f0e and onette\nfor\u00f0 foldwege, swa him frea t\u00e6hte\n2875\nwegas ofer westen, o\u00f0\u00fe\u00e6t wuldortorht,\nd\u00e6ges \u00feriddan up ofer deop w\u00e6ter\nord ar\u00e6mde. \u00fea se eadega wer\ngeseah hlifigan hea dune\nswa him s\u00e6gde \u00e6r swegles aldor.\n2880\n\u00f0a Abraham spr\u00e6c to his ombihtum:\n\"Rincas mine, resta\u00f0 incit\nher on \u00feissum wicum. Wit eft cuma\u00f0,\nsi\u00f0\u00f0an wit \u00e6rende uncer twega\ngastcyninge agifen habba\u00f0.\"\n2885\nGewat him \u00fea se \u00e6\u00f0eling and his agen sunu\nto \u00fe\u00e6s gemearces \u00fee him metod t\u00e6hte,\nwadan ofer wealdas. Wudu b\u00e6r sunu,\nf\u00e6der fyr and sweord. \u00f0a \u00fe\u00e6s fricgean ongann\nwer wintrum geong wordum Abraham:\n2890\n\"Wit her fyr and sweord, frea min, habba\u00f0;\nhw\u00e6r is \u00fe\u00e6t tiber, \u00fe\u00e6t \u00feu torht gode\nto \u00feam brynegielde bringan \u00feencest?\"\nAbraham ma\u00f0elode (h\u00e6fde on an gehogod\n\u00fe\u00e6t he ged\u00e6de swa hine drihten het):\n2895\n\"Him \u00fe\u00e6t so\u00f0cyning sylfa finde\u00f0,\nmoncynnes weard, swa him gemet \u00feince\u00f0.\"\nGestah \u00fea sti\u00f0hydig steape dune\nup mid his eaforan, swa him se eca bebead,\n\u00fe\u00e6t he on hrofe gestod hean landes\n2900\non \u00fe\u00e6re stowe \u00fee him se stranga to,\nw\u00e6rf\u00e6st metod wordum t\u00e6hte.\nOngan \u00fea ad hladan, \u00e6led weccan,\nand gefeterode fet and honda\nbearne sinum and \u00fea on b\u00e6l ahof\n2905\nIsaac geongne, and \u00fea \u00e6dre gegrap\nsweord be gehiltum, wolde his sunu cwellan\nfolmum sinum, fyre scencan\nm\u00e6ges dreore. \u00fea metodes \u00f0egn,\nufan engla sum, Abraham hlude\n2910\nstefne cygde. He stille gebad\nares spr\u00e6ce and \u00feam engle oncw\u00e6\u00f0.\nHim \u00fea ofstum to ufan of roderum\nwuldorgast godes wordum m\u00e6lde:\n\"Abraham leofa, ne sleah \u00fein agen bearn,\n2915\nac \u00feu cwicne abregd cniht of ade,\neaforan \u00feinne! Him an wuldres god!\nMago Ebrea, \u00feu medum scealt\n\u00feurh \u00fe\u00e6s halgan hand, heofoncyninges,\nso\u00f0um sigorleanum selfa onfon,\n2920\nginf\u00e6stum gifum. \u00fee wile gasta weard\nlissum gyldan \u00fe\u00e6t \u00fee w\u00e6s leofre his\nsibb and hyldo \u00feonne \u00fein sylfes bearn.\"\nAd stod on\u00e6led. H\u00e6fde Abrahame\nmetod moncynnes, m\u00e6ge Lothes,\n2925\nbreost geblissad, \u00fea he him his bearn forgeaf,\nIsaac cwicne. \u00f0a se eadega bewlat,\nrinc ofer exle, and him \u00fe\u00e6r rom geseah\nunfeor \u00feanon \u00e6nne standan,\nbro\u00f0or Arones, brembrum f\u00e6stne.\n2930\n\u00feone Abraham genam and hine on ad ahof\nofestum miclum for his agen bearn.\nAbr\u00e6gd \u00fea mid \u00fey bille, brynegield onhread,\nreccendne weg rommes blode,\nonbleot \u00fe\u00e6t lac gode, s\u00e6gde leana \u00feanc\n2935\nand ealra \u00feara s\u00e6l\u00f0a \u00fee he him si\u00f0 and \u00e6r,\ngifena drihten, forgifen h\u00e6fde.","title":"Genesis A, B","type":"page"}