{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a01_03.htm","path":"neu/ascp/a01_03.htm","source_url":"https://sacred-texts.com/neu/ascp/a01_03.htm","text":"Gefr\u00e6gn ic Hebreos eadge lifgean\nin Hierusalem, goldhord d\u00e6lan,\ncyningdom habban, swa him gecynde w\u00e6s,\nsi\u00f0\u00f0an \u00feurh metodes m\u00e6gen on Moyses hand\n5\nwear\u00f0 wig gifen, wigena m\u00e6nieo,\nand hie of Egyptum ut aforon,\nm\u00e6gene micle. \u00fe\u00e6t w\u00e6s modig cyn!\n\u00feenden hie \u00fey rice r\u00e6dan moston,\nburgum wealdan, w\u00e6s him beorht wela.\n10\n\u00feenden \u00fe\u00e6t folc mid him hiera f\u00e6der w\u00e6re\nhealdan woldon, w\u00e6s him hyrde god,\nheofonrices weard, halig drihten,\nwuldres waldend. Se \u00f0am werude geaf\nmod and mihte, metod alwihta,\n15\n\u00fe\u00e6t hie oft fela folca feore gesceodon,\nheriges helmum, \u00feara \u00fee him hold ne w\u00e6s,\no\u00f0\u00fe\u00e6t hie wlenco anwod \u00e6t win\u00feege\ndeofold\u00e6dum, druncne ge\u00f0ohtas.\n\u00fea hie \u00e6cr\u00e6ftas ane forleton,\n20\nmetodes m\u00e6genscipe, swa no man scyle\nhis gastes lufan wi\u00f0 gode d\u00e6lan.\n\u00fea geseah ic \u00fea gedriht in gedwolan hweorfan,\nIsrahela cyn unriht don,\nwommas wyrcean. \u00fe\u00e6t w\u00e6s weorc gode!\n25\nOft he \u00feam leodum to lare sende,\nheofonrices weard, halige gastas,\n\u00fea \u00feam werude wisdom budon.\nHie \u00fe\u00e6re snytro so\u00f0 gelyfdon\nlytle hwile, o\u00f0\u00fe\u00e6t hie langung beswac\nWisde him \u00e6t frym\u00f0e, \u00f0a \u00f0e on fruman \u00e6r \u00f0on\nw\u00e6ron mancynnes metode dyrust,\ndugo\u00f0a dyrust, drihtne leofost; herepa\u00f0t\u00e6hte to \u00fe\u00e6re hean byrig,\neorlum el\u00f0eodigum, on e\u00f0elland\n40\n\u00fe\u00e6r Salem stod searwum af\u00e6stnod,\nweallum geweor\u00f0od. To \u00fe\u00e6s witgan foron,\nCaldea cyn, to ceastre for\u00f0,\n\u00fe\u00e6r Israela \u00e6hta w\u00e6ron,\nbewrigene mid weorcum; to \u00feam \u00fe\u00e6t werod gefor,\n45\nm\u00e6gen\u00fereat m\u00e6re, manbealwes georn.\nAwehte \u00feone w\u00e6lni\u00f0 wera aldorfrea,\nBabilones brego, on his burhstede,\nNabochodonossor, \u00feurh ni\u00f0hete,\n\u00fe\u00e6t he secan ongan sefan gehygdum\n50\nhu he Israelum ea\u00f0ost meahte\n\u00feurh gromra gang guman o\u00f0\u00feringan.\nGesamnode \u00fea su\u00f0an and nor\u00f0an\nw\u00e6lhreow werod, and west foran\nherige h\u00e6\u00f0encyninga to \u00fe\u00e6re hean byrig.\n55\nIsraela e\u00f0elweardas h\u00e6fdon lufan, lifwelan, \u00feenden hie let metod.\n\u00fea ic e\u00f0an gefr\u00e6gn ealdfeonda cyn\nwinburh wera. \u00fea wigan ne gelyfdon,\nbereafodon \u00fea receda wuldor readan golde,\n60\nsince and seolfre, Salomones templ.\nGestrudan gestreona under stanhli\u00f0um,\nswilc eall swa \u00fea eorlas agan sceoldon,\no\u00f0\u00fe\u00e6t hie burga gehwone abrocen h\u00e6fdon,\n\u00feara \u00fee \u00feam folce to fri\u00f0e stodon.\n65\nGehlodon him to hu\u00f0e hordwearda gestreon, feoh and fr\u00e6twa, swilc \u00fe\u00e6r funden w\u00e6s,\nand \u00fea mid \u00feam \u00e6htum eft si\u00f0edon,\nand gel\u00e6ddon eac on langne si\u00f0\nIsraela cyn, on eastwegas\n70\nto Babilonia, beorna unrim,\nunder hand h\u00e6le\u00f0 h\u00e6\u00f0enum deman.\nNabochodonossor him on nyd dyde\nIsraela bearn ofer ealle lufen,\nw\u00e6pna lafe to weorc\u00feeowum.\n75\nOnsende \u00fea sinra \u00feegna\nworn \u00fe\u00e6s werudes west toferan,\n\u00fe\u00e6t him \u00feara leoda land geheolde,\ne\u00f0ne e\u00f0el, \u00e6fter Ebreum.\nHet \u00fea secan sine gerefan\n80\ngeond Israela earme lafe,\nhwilc \u00fe\u00e6re geogo\u00f0e gleawost w\u00e6re\nboca bebodes, \u00fee \u00fe\u00e6r brungen w\u00e6s.\nWolde \u00fe\u00e6t \u00fea cnihtas cr\u00e6ft leornedon,\n\u00fe\u00e6t him snytro on sefan secgan mihte,\n85\nnales \u00f0y \u00fee he \u00fe\u00e6t moste o\u00f0\u00f0e gemunan wolde\n\u00fe\u00e6t he \u00feara gifena gode \u00feancode\n\u00fee him \u00fe\u00e6r to dugu\u00f0e drihten scyrede.\n\u00fea hie \u00fe\u00e6r fundon \u00fery freagleawe\n\u00e6\u00f0ele cnihtas and \u00e6f\u00e6ste,\n90\nginge and gode in gods\u00e6de;\nan w\u00e6s Annanias, o\u00f0er Azarias,\n\u00feridda Misael, metode gecorene.\n\u00fea \u00fery comon to \u00feeodne foran,\nhearde and hige\u00feancle, \u00fe\u00e6r se h\u00e6\u00f0ena s\u00e6t,\n95\ncyning cor\u00f0res georn, in Caldea byrig.\n\u00fea hie \u00feam wlancan wisdom sceoldon,\nweras Ebrea, wordum cy\u00f0an,\nhigecr\u00e6ft heane, \u00feurh halig mod,\n\u00fea se beorn bebead, Babilone weard,\n100\nswi\u00f0mod cyning, sinum \u00feegnum,\n\u00fe\u00e6t \u00fea frumgaras be feore d\u00e6de,\n\u00fe\u00e6t \u00feam gengum \u00ferym gad ne w\u00e6re\nwiste ne w\u00e6de in woruldlife.\n\u00fea w\u00e6s breme Babilone weard,\n105\nm\u00e6re and modig ofer middangeard,\negesful ylda bearnum. No he \u00e6 fremede,\nac in oferhygde \u00e6ghw\u00e6s lifde.\n\u00fea \u00feam folctogan on frumsl\u00e6pe,\nsi\u00f0\u00f0an to reste gehwearf rice \u00feeoden,\n110\ncom on sefan hwurfan swefnes woma,\nhu woruld w\u00e6re wundrum geteod,\nungelic yldum o\u00f0 edsceafte.\nWear\u00f0 him on sl\u00e6pe so\u00f0 gecy\u00f0ed,\n\u00fe\u00e6tte rices gehw\u00e6s re\u00f0e sceolde gelimpan,\n115\neor\u00f0an dreamas, ende wur\u00f0an.\n\u00fea onwoc wulfheort, se \u00e6r wingal sw\u00e6f,\nBabilone weard. N\u00e6s him bli\u00f0e hige,\nac him sorh astah, swefnes woma.\nNo he gemunde \u00fe\u00e6t him meted w\u00e6s.\n120\nHet \u00fea tosomne sinra leoda\n\u00fea wiccungdom widost b\u00e6ron,\nfr\u00e6gn \u00fea \u00f0a m\u00e6nigeo hw\u00e6t hine gem\u00e6tte,\n\u00feenden reordberend reste wunode.\nWear\u00f0 he on \u00feam egesan acol worden,\n125\n\u00fea he ne wisse word ne angin\nswefnes sines; het him secgan \u00feeah.\n\u00fea him unbli\u00f0e andswaredon\ndeofolwitgan (n\u00e6s him dom gearu\nto asecganne swefen cyninge):\n130\n\"Hu magon we swa dygle, drihten, ahicgan\non sefan \u00feinne, hu \u00f0e swefnede,\no\u00f0\u00f0e wyrda gesceaft wisdom bude,\ngif \u00feu his \u00e6rest ne meaht or areccan?\"\n\u00fea him unbli\u00f0e andswarode\n135\nwulfheort cyning, witgum sinum:\n\"N\u00e6ron ge swa eacne ofer ealle men\nmodge\u00feances swa ge me s\u00e6gdon,\nand \u00fe\u00e6t gecw\u00e6don, \u00fe\u00e6t ge cu\u00f0on\nmine aldorlege, swa me \u00e6fter wear\u00f0,\n140\no\u00f0\u00f0e ic fur\u00f0or findan sceolde. Nu ge m\u00e6tinge mine ne cunnon,\n\u00fea \u00fee me for werode wisdom bera\u00f0.\nGe swelta\u00f0 dea\u00f0e, nym\u00fee ic dom wite\nso\u00f0an swefnes, \u00fe\u00e6s min sefa myndga\u00f0.\"\n145\nNe meahte \u00fea seo m\u00e6nigeo on \u00feam me\u00f0elstede\n\u00feurh witigdom wihte a\u00feencean\nne ahicgan, \u00fea hit forh\u00e6fed gewear\u00f0\n\u00fe\u00e6tte hie s\u00e6don swefn cyninge,\nwyrda gerynu, o\u00f0\u00fe\u00e6t witga cwom,\n150\nDaniel to dome, se w\u00e6s drihtne gecoren,\nsnotor and so\u00f0f\u00e6st, in \u00fe\u00e6t seld gangan.\nSe w\u00e6s ordfruma earmre lafe\n\u00fe\u00e6re \u00fee \u00feam h\u00e6\u00f0enan hyran sceolde.\nHim god sealde gife of heofnum\n155\n\u00feurh hleo\u00f0orcwyde haliges gastes,\n\u00fe\u00e6t him engel godes eall as\u00e6gde\nswa his mandrihten gem\u00e6ted wear\u00f0.\n\u00f0a eode Daniel, \u00fea d\u00e6g lyhte,\nswefen reccan sinum frean,\n160\ns\u00e6gde him wislice wereda gesceafte,\n\u00fe\u00e6tte sona ongeat swi\u00f0mod cyning\nord and ende \u00fe\u00e6s \u00fee him ywed w\u00e6s.\n\u00f0a h\u00e6fde Daniel dom micelne,\nbl\u00e6d in Babilonia mid bocerum,\n165\nsi\u00f0\u00f0an he ges\u00e6de swefen cyninge,\n\u00fe\u00e6t he \u00e6r for fyrenum onfon ne meahte,\nBabilonie weard, in his breostlocan.\nNo hw\u00e6\u00f0ere \u00fe\u00e6t Daniel gedon mihte\n\u00fe\u00e6t he wolde metodes mihte gelyfan,\n170\nac he wyrcan ongan weoh on felda\n\u00feam \u00fee deormode Diran heton,\nse w\u00e6s on \u00f0\u00e6re \u00f0eode \u00f0e swa hatte,\nbresne Babilonige. \u00fe\u00e6re burge weard\nanne manlican ofer metodes est,\n175\ngyld of golde, gumum ar\u00e6rde,\nfor \u00feam \u00fee gleaw ne w\u00e6s, gumrices weard,\nre\u00f0e and r\u00e6dleas, riht ......\n\u00fea wear\u00f0 h\u00e6le\u00f0a hlyst \u00fea hleo\u00f0or cwom\nbyman stefne ofer burhware.\n180\n\u00fea hie for \u00feam cumble on cneowum s\u00e6ton,\nonhnigon to \u00feam herige h\u00e6\u00f0ne \u00feeode,\nwur\u00f0edon wihgyld, ne wiston wr\u00e6stran r\u00e6d,\nefndon unrihtdom, swa hyra aldor dyde,\nmane gemenged, mode gefrecnod.\n185\nFremde folcm\u00e6gen, swa hyra frea \u00e6rest,\nunr\u00e6d efnde, (him \u00fe\u00e6s \u00e6fter becwom\nyfel endelean), unriht dyde.\n\u00fe\u00e6r \u00fery w\u00e6ron on \u00fe\u00e6s \u00feeodnes byrig,\neorlas Israela, \u00fe\u00e6t hie a noldon\n190\nhyra \u00feeodnes dom \u00feafigan onginnan,\n\u00fe\u00e6t hie to \u00feam beacne gebedu r\u00e6rde,\n\u00f0eah \u00f0e \u00f0\u00e6r on herige byman sungon.\n\u00f0a w\u00e6ron \u00e6\u00f0elum god Abrahames bearn,\nw\u00e6ron w\u00e6rf\u00e6ste, wiston drihten\n195\necne uppe, \u00e6lmihtigne.\nCnihtas cynegode cu\u00f0 gedydon,\n\u00fe\u00e6t hie him \u00fe\u00e6t gold to gode noldon\nhabban ne healdan, ac \u00feone hean cyning,\ngasta hyrde, \u00f0e him gife sealde.\n200\nOft hie to bote balde gecw\u00e6don\n\u00fe\u00e6t hie \u00fe\u00e6s wiges wihte ne rohton,\nne hie to \u00feam gebede mihte geb\u00e6don\nh\u00e6\u00f0en heriges wisa, \u00fe\u00e6t hie \u00feider hweorfan wolden,\nguman to \u00feam gyldnan gylde, \u00fee he him to gode geteode.\n205\n\u00feegnas \u00feeodne s\u00e6gdon \u00fe\u00e6t hie \u00fe\u00e6re ge\u00feeahte w\u00e6ron,\nh\u00e6ftas hearan, in \u00feisse hean byrig,\n\u00fea \u00feis hegan ne willa\u00f0, ne \u00feysne wig wur\u00f0igean,\n\u00fee \u00f0u \u00fee to wuldre wundrum teodest.\n\u00f0a him bolgenmod Babilone weard\n210\nyrre andswarode, eorlum onm\u00e6lde\ngrimme \u00feam gingum, and geocre oncw\u00e6\u00f0,\n\u00fe\u00e6t hie gegnunga gyldan sceolde\no\u00f0\u00f0e \u00ferowigean \u00fereanied micel,\nfrecne fyres wylm, nym\u00f0e hie fri\u00f0es wolde\n215\nwilnian to \u00feam wyrrestan, weras Ebrea,\nguman to \u00feam golde, \u00fee he him to gode teode.\nNoldon \u00feeah \u00fea hyssas hyran larum\nin hige h\u00e6\u00f0num. Hogedon georne\n\u00fe\u00e6t \u00e6 godes ealle gel\u00e6ste,\n220\nand ne awacodon wereda drihtne,\nne \u00fean m\u00e6 gehwurfe in h\u00e6\u00f0endom,\nne hie to facne freo\u00f0o wilnedan,\n\u00feeah \u00fee him se bitera dea\u00f0 geboden w\u00e6re.\n\u00fea wear\u00f0 yrre anmod cyning, het he ofn onh\u00e6tan\n225\nto cwale cnihta feorum for\u00f0am \u00fee hie his cr\u00e6ftas onsocon.\n\u00fea he w\u00e6s gegleded, swa he grimmost mihte,\nfrecne fyres lige, \u00fea he \u00feyder folc samnode,\nand gebindan het, Babilone weard,\ngrim and gealhmod, godes spelbodan.\n230\nHet \u00fea his scealcas scufan \u00fea hyssas\nin b\u00e6lblyse, beornas geonge.\nGearo w\u00e6s se him geoce gefremede; \u00feeah \u00fee hie swa grome nydde\nin f\u00e6\u00f0m fyres lige, hw\u00e6\u00f0ere heora feorh generede\nmihtig metodes weard. Swa \u00fe\u00e6t m\u00e6nige gefrunon,\n235\nhalige him \u00fe\u00e6r help geteode, sende him of hean rodore\ngod, gumena weard, gast \u00feone halgan.\nEngel in \u00feone ofn innan becwom \u00fe\u00e6r hie \u00fe\u00e6t aglac drugon,\nfreobearn f\u00e6\u00f0mum be\u00feeahte under \u00feam fyrenan hrofe.\nNe mihte \u00feeah heora wlite gewemman owiht\n240\nwylm \u00fe\u00e6s w\u00e6fran liges, \u00fea hie se waldend nerede.\nHreohmod w\u00e6s se h\u00e6\u00f0ena \u00feeoden, het hie hra\u00f0e b\u00e6rnan.\n\u00e6led w\u00e6s ungescead micel. \u00fea w\u00e6s se ofen onh\u00e6ted,\nisen eall \u00f0urhgleded. Hine \u00f0\u00e6r esnas m\u00e6nige\nwurpon wudu on innan, swa him w\u00e6s on wordum gedemed;\n245\nb\u00e6ron brandas on bryne blacan fyres,\n(wolde wulfheort cyning wall onsteallan,\niserne ymb \u00e6f\u00e6ste), o\u00f0\u00fe\u00e6t up gewat\nlig ofer leofum and \u00feurh lust gesloh\nmicle mare \u00feonne gemet w\u00e6re.\n250\n\u00f0a se lig gewand on la\u00f0e men,\nh\u00e6\u00f0ne of halgum. Hyssas w\u00e6ron\nbli\u00f0emode, burnon scealcas\nymb ofn utan, alet gehwearf\nteonfullum on teso. \u00f0\u00e6r to geseah\n255\nBabilone brego. Bli\u00f0e w\u00e6ron\neorlas Ebrea, ofestum heredon\ndrihten on dreame, dydon swa hie cu\u00f0on\nofne on innan, aldre generede.\nGuman gl\u00e6dmode god wur\u00f0edon,\n260\nunder \u00fe\u00e6s f\u00e6\u00f0me \u00fee geflymed wear\u00f0\nfrecne fyres h\u00e6to. Freobearn wurdon\nal\u00e6ten liges gange, ne hie him \u00fe\u00e6r la\u00f0 gedydon.\nN\u00e6s him se sweg to sorge \u00f0on ma \u00fee sunnan scima,\nne se bryne beot m\u00e6cgum \u00fee in \u00feam beote w\u00e6ron,\n265\nac \u00fe\u00e6t fyr fyr scyde to \u00f0am \u00fee \u00f0a scylde worhton, hwearf on \u00fea h\u00e6\u00f0enan h\u00e6ftas fram \u00feam halgan cnihton,\nwerigra wlite minsode, \u00fea \u00f0e \u00f0y worce gef\u00e6gon.\nGeseah \u00f0a swi\u00f0mod cyning, \u00f0a he his sefan ontreowde,\nwundor on wite agangen; him \u00fe\u00e6t wr\u00e6clic \u00feuhte.\n270\nHyssas hale hwurfon in \u00feam hatan ofne,\nealle \u00e6f\u00e6ste \u00f0ry; him eac \u00fe\u00e6r w\u00e6s\nan on gesyh\u00f0e, engel \u00e6lmihtiges.\nHim \u00fe\u00e6r onofne owiht ne derede,\nac w\u00e6s \u00fe\u00e6r inne ealles gelicost\n275\nefne \u00feonne on sumera sunne scine\u00f0,\nand deaw dryge on d\u00e6ge weor\u00f0e\u00f0,\nwinde geondsawen. \u00fe\u00e6t w\u00e6s wuldres god\n\u00fee hie generede wi\u00f0 \u00feam ni\u00f0hete.\n\u00f0a Azarias inge\u00feancum\n280\nhleo\u00f0rade halig \u00feurh hatne lig, dreag d\u00e6da georn, drihten herede,\nwer womma leas, and \u00fea word acw\u00e6\u00f0:\n\"Metod alwihta, hw\u00e6t! \u00feu eart mihtum swi\u00f0\nni\u00f0as to nergenne. Is \u00fein nama m\u00e6re,\n285\nwlitig and wuldorf\u00e6st ofer wer\u00f0eode.\nSiendon \u00feine domas in daga gehwam\nso\u00f0e and geswi\u00f0de and gesigef\u00e6ste,\nswa \u00feu eac sylfa eart.\nSyndon \u00feine willan on woruldspedum\n290\nrihte and gerume, rodora waldend.\nGeoca user georne nu, gasta scyppend,\nand \u00feurh hyldo help, halig drihten,\nnu we \u00feec for \u00fereaum and for \u00f0eonydum\nand for ea\u00f0medum arna bidda\u00f0,\n295\nlige belegde. We \u00f0\u00e6s lifgende\nworhton on worulde, eac \u00f0on wom dyde\nuser yldran; for oferhygdum\nbr\u00e6con bebodo burhsittende,\nhad oferhogedon halgan lifes.\n300\nSiendon we towrecene geond widne grund,\nheapum tohworfene, hyldelease;\nis user lif geond landa fela\nfraco\u00f0 and gefr\u00e6ge folca manegum,\n\u00fea usic bewr\u00e6con to \u00fe\u00e6s wyrrestan\n305\neor\u00f0cyninga \u00e6hta gewealde,\non h\u00e6ft heorugrimra, and we nu h\u00e6\u00f0enra\n\u00feeowned \u00feolia\u00f0. \u00fe\u00e6s \u00fee \u00feanc sie,\nwereda wuldorcyning, \u00fe\u00e6t \u00feu us \u00feas wrace teodest.\nNe forlet \u00feu usic ane, ece drihten,\n310\nfor \u00f0am miltsum \u00f0e \u00f0ec men hliga\u00f0,\nand for \u00f0am treowum \u00fee \u00feu, tirum f\u00e6st,\nni\u00f0a nergend, genumen h\u00e6fdest\nto Abrahame and to Isaace\nand to Iacobe, gasta scyppend.\n315\n\u00feu him \u00fe\u00e6t gehete \u00feurh hleo\u00f0orcwyde,\n\u00fe\u00e6t \u00feu hyra frumcyn in fyrndagum\nican wolde, \u00fe\u00e6tte \u00e6fter him\non cneorissum cenned wurde,\nand seo m\u00e6nigeo m\u00e6re w\u00e6re,\n320\nhad to hebbanne swa heofonsteorran\nbebuga\u00f0 bradne hwyrft, o\u00f0\u00f0ebrimfaro\u00fees,\ns\u00e6faro\u00f0a sand, geond sealtne w\u00e6g ineare grynde\u00f0, \u00fe\u00e6t his unrim a\nin wintra worn wur\u00f0an sceolde.\n325\nFyl nu frumspr\u00e6ce, \u00f0eah heora fea lifigen!\nWlitiga \u00feinne wordcwyde and \u00fein wuldor on us!\nGecy\u00f0 cr\u00e6ft and miht \u00fe\u00e6t \u00fea Caldeas\nand folca fela gefrigen habba\u00f0,\n\u00f0a \u00fee under heofenum h\u00e6\u00f0ene lifigea\u00f0,\n330\nand \u00fe\u00e6t \u00feu ana eart ece drihten,\nweroda waldend, woruldgesceafta,\nsigora settend, so\u00f0f\u00e6st metod!\"\nSwa se halga wer hergende w\u00e6s\nmetodes miltse and his mihta sped\n335\nrehte \u00feurh reorde. \u00f0a of roderum w\u00e6s\nengel \u00e6lbeorht ufan onsended,\nwlitescyne wer on his wuldorhaman,\nse him cwom to frofre and to feorhnere\nmid lufan and mid lisse. Se \u00f0one lig tosceaf,\n340\nhalig and heofonbeorht, hatan fyres,\ntosweop hine and toswende \u00feurh \u00fea swi\u00f0an miht,\nligges leoman, \u00fe\u00e6t hyra lice ne w\u00e6s\nowiht geegled, ac he on andan sloh\nfyr on feondas for fyrend\u00e6dum.\n345\n\u00fea w\u00e6s on \u00feam ofne, \u00fe\u00e6r se engel becwom,\nwindig and wynsum, wedere gelicost\n\u00feonne hit on sumeres tid sended weor\u00f0e\u00f0\ndropena drearung on d\u00e6ges hwile,\nwearmlic wolcna scur. Swylc bi\u00f0 wedera cyst,\n350\nswylc w\u00e6s on \u00feam fyre frean mihtum\nhalgum to helpe. Wear\u00f0 se hata lig\ntodrifen and todw\u00e6sced \u00fe\u00e6r \u00fea d\u00e6dhwatan\ngeond \u00feone ofen eodon, and se engel mid,\nfeorh nerigende, se \u00f0\u00e6r feor\u00f0a w\u00e6s,\n355\nAnnanias and Azarias\nand Misael. \u00fe\u00e6r \u00fea modhwatan\n\u00fery on ge\u00f0ancum \u00f0eoden heredon,\nb\u00e6don bletsian bearn Israela\neall landgesceaft ecne drihten,\n360\n\u00f0eoda waldend. Swa hie \u00fery cw\u00e6don,\nmodum horsce, \u00feurh gem\u00e6ne word:\n\"\u00f0e gebletsige, bylywit f\u00e6der,\nworuldcr\u00e6fta wlite and weorca gehwilc!\nHeofonas and englas, and hluttor w\u00e6ter,\n365\n\u00fea \u00f0e ofer roderum on rihtne gesceaft\nwunia\u00f0 in wuldre, \u00f0a \u00feec wur\u00f0ia\u00f0!\nAnd \u00feec, \u00e6lmihtig, ealle gesceafte,\nrodorbeorhtan tunglu, \u00fea \u00fee ryne healda\u00f0,\nsunna and mona, sundor anra gehwilc\n370\nherige in hade! And heofonsteorran,\ndeaw and deor scur, \u00f0a \u00f0ec domige!\nAnd \u00feec, mihtig god, gastas lofige!\nByrnende fyr and beorht sumor\nnergend herga\u00f0! Niht somod and d\u00e6g,\n375\nand \u00feec landa gehwilc, leoht and \u00feeostro,\nherige on hade, somod hat and ceald!\nAnd \u00feec, frea mihtig, forstas and snawas,\nwinterbiter weder and wolcenfaru,\nlofige on lyfte! And \u00feec ligetu,\n380\nblace, berhtmhwate, \u00fea \u00feec bletsige!\nEall eor\u00f0an grund, ece drihten,\nhyllas and hrusan and hea beorgas,\nsealte s\u00e6w\u00e6gas, so\u00f0f\u00e6st metod,\neastream y\u00f0a and upcyme,\n385\nw\u00e6tersprync wylla, \u00f0a \u00f0ec wur\u00f0ia\u00f0!\nHwalas \u00f0ec heriga\u00f0, and hefonfugolas,\nlyftlacende, \u00fea \u00f0e lagostreamas,\nw\u00e6terscipe wecga\u00f0! And wildu deor\nand neata gehwilc naman bletsie!\n390\nAnd manna bearn modum lufia\u00f0,\nand \u00feec Israela, \u00e6hta scyppend,\nheriga\u00f0 in hade, herran sinne!\nAnd \u00feec haligra heortan cr\u00e6ftas,\nso\u00f0f\u00e6stra gehw\u00e6s sawle and gastas,\n395\nlofia\u00f0 liffrean, lean sellende\neallum eadmodum, ece drihten!\nAnnanias \u00f0ec and Adzarias\nand Misael metod domige\nbreostge\u00f0ancum! We \u00feec bletsia\u00f0,\n400\nfrea folca gehw\u00e6s, f\u00e6der \u00e6lmihtig,\nso\u00f0 sunu metodes, sawla nergend,\nh\u00e6le\u00f0a helpend, and \u00feec, halig gast, wur\u00f0ia\u00f0 in wuldre, witig drihten!\nWe \u00f0ec heriga\u00f0, halig drihten,\nNabochodonossor, wi\u00f0 \u00feam nehstum\nfolcgesi\u00f0um: \"\u00fe\u00e6t eower fela geseah, \u00feeode mine, \u00fe\u00e6t we \u00fery sendon,\ngeboden to b\u00e6le in byrnende\nfyres leoman. Nu ic \u00fe\u00e6r feower men\n415\ngeseo to so\u00f0e, nales me sefa leoge\u00f0.\"\n\u00f0a cw\u00e6\u00f0 se \u00f0e w\u00e6s cyninges r\u00e6swa,\nwis and wordgleaw: \"\u00fe\u00e6t is wundra sum\n\u00fe\u00e6t we \u00f0\u00e6r eagum on locia\u00f0.\nGe\u00f0enc, \u00f0eoden min, \u00feine gerysna!\n420\nOngyt georne hwa \u00fea gyfe sealde\ngingum g\u00e6delingum! Hie god heriga\u00f0,\nanne ecne, and ealles him\nbe naman gehwam on neod spreca\u00f0,\n\u00feancia\u00f0 \u00ferymmes \u00feristum wordum,\n425\ncwe\u00f0a\u00f0 he sie ana \u00e6lmihtig god,\nwitig wuldorcyning, worlde and heofona.\nAban \u00feu \u00fea beornas, brego Caldea,\nut of ofne. Nis hit owihtes god\n\u00fe\u00e6t hie sien on \u00feam la\u00f0e leng \u00feonne \u00feu \u00feurfe.\"\n430\nHet \u00fea se cyning to him cnihtas gangan.\nHyssas hearde hyrdon lare,\ncyrdon cynegode swa hie gecy\u00f0de w\u00e6ron,\nhwurfon h\u00e6le\u00f0 geonge to \u00feam h\u00e6\u00f0enan foran.\nW\u00e6ron \u00fea bende forburnene \u00fee him on banum lagon,\n435\nla\u00f0searo leoda cyninges, and hyra lice geborgen.\nN\u00e6s hyra wlite gewemmed, ne n\u00e6nig wroht on hr\u00e6gle,\nne feax fyre besw\u00e6led, ac hie on fri\u00f0e drihtnes\nof \u00f0am grimman gryre glade treddedon,\ngleawmode guman, on gastes hyld.\n440\n\u00f0a gewat se engel up secan him ece dreamas\non heanne hrof heofona rices,\nheh \u00feegn and hold halgum metode.\nH\u00e6fde on \u00feam wundre gewur\u00f0od \u00f0e \u00fea gewyrhto ahton.\nHyssas heredon drihten for \u00feam h\u00e6\u00f0enan folce,\n445\nsepton hie so\u00f0cwidum and him s\u00e6don fela\nso\u00f0ra tacna, o\u00f0\u00fe\u00e6t he sylfa gelyfde\n\u00fe\u00e6t se w\u00e6re mihta waldend se \u00f0e hie of \u00f0am mirce generede.\nGebead \u00fea se br\u00e6sna Babilone weard\nswi\u00f0mod sinum leodum, \u00fe\u00e6t se w\u00e6re his aldre scyldig,\n450\nse \u00f0\u00e6s onsoce \u00fe\u00e6tte so\u00f0 w\u00e6re\nm\u00e6re mihta waldend, se hie of \u00feam mor\u00f0re alysde.\nAg\u00e6f him \u00fea his leoda lafe \u00fee \u00fe\u00e6r gel\u00e6dde w\u00e6ron on\u00e6ht ealdfeondum, \u00fe\u00e6t hie are h\u00e6fdon.\nW\u00e6s heora bl\u00e6d in Babilone, si\u00f0\u00f0an hie \u00feone bryne fandedon,\n455\ndom wear\u00f0 \u00e6fter dugu\u00f0e gecy\u00f0ed, si\u00f0\u00f0an hie drihtne gehyrdon.\nW\u00e6ron hyra r\u00e6das rice, si\u00f0\u00f0an hie rodera waldend,\nhalig heofonrices weard, wi\u00f0 \u00feone hearm gescylde.\n\u00fea ic secan gefr\u00e6gn so\u00f0um wordum,\nsi\u00f0\u00f0an he wundor onget,\n460\nBabilone weard, \u00feurh fyres bryne,\nhu \u00fea hyssas \u00fery hatan ofnes,\nf\u00e6rgryre fyres, oferfaren h\u00e6fdon.\nWylm \u00feurhwodon, swa him wiht ne sceod\ngrim gleda ni\u00f0, godes spelbodan,\n465\nfrecnan fyres, ac him fri\u00f0 drihtnes\nwi\u00f0 \u00fe\u00e6s egesan gryre aldor gescylde.\n\u00f0a se \u00f0eoden ongan ge\u00f0inges wyrcan;\nhet \u00fea tosomne sine leode,\nand \u00fea on \u00feam me\u00f0le ofer menigo bebead\n470\nwyrd gewordene and wundor godes,\n\u00fe\u00e6tte on \u00feam cnihtum gecy\u00f0ed w\u00e6s:\n\"Onhicga\u00f0 nu halige mihte,\nwise wundor godes! We gesawon\n\u00fe\u00e6t he wi\u00f0 cwealme gebearh cnihtum on ofne,\n475\nlacende lig, \u00feam \u00fee his lof b\u00e6ron;\nfor\u00feam he is ana ece drihten, dema \u00e6lmihtig, se \u00f0e him dom forgeaf,\nspowende sped, \u00feam \u00fee his spel bera\u00f0.\nFor\u00f0on witiga\u00f0 \u00feurh wundor monig\n480\nhalgum gastum \u00fee his hyld curon.\nCu\u00f0 is \u00fe\u00e6t me Daniel dyglan swefnes so\u00f0 ges\u00e6de, \u00fe\u00e6t \u00e6r swi\u00f0e o\u00f0stod\nmanegum on mode minra leoda,\nfor\u00feam \u00e6lmihtig eacenne gast\n485\nin sefan sende, snyttro cr\u00e6ftas.\"\nSwa wordum spr\u00e6c werodes r\u00e6swa,\nBabilone weard, si\u00f0\u00f0an he beacen onget,\nswutol tacen godes. No \u00fey sel dyde,\nac \u00feam \u00e6\u00f0elinge oferhygd gesceod,\n490\nwear\u00f0 him hyrra hyge and on heortan ge\u00f0anc\nmara on modsefan \u00feonne gemet w\u00e6re,\no\u00f0\u00fe\u00e6t hine mid nyde ny\u00f0or asette\nmetod \u00e6lmihtig, swa he manegum de\u00f0\n\u00feara \u00fee \u00feurh oferhyd up astige\u00f0.\n495\n\u00fea him wear\u00f0 on sl\u00e6pe swefen \u00e6tywed,\nNabochodonossor; him \u00fe\u00e6t neh gewear\u00f0.\n\u00feuhte him \u00fe\u00e6t on foldan f\u00e6gre stode\nwudubeam wlitig, se w\u00e6s wyrtum f\u00e6st,\nbeorht on bl\u00e6dum. N\u00e6s he bearwe gelic,\n500\nac he hlifode to heofontunglum,\nswilce he oferf\u00e6\u00f0mde foldan sceatas,\nealne middangeard, o\u00f0 merestreamas,\ntwigum and telgum. \u00f0\u00e6r he to geseah,\n\u00feuhte him \u00fe\u00e6t se wudubeam wilddeor scylde,\n505\nane \u00e6te eallum heolde,\nswylce fuglas eac heora feorhnere\non \u00fe\u00e6s beames bledum name.\n\u00f0uhte him \u00fe\u00e6t engel ufan of roderum\nstigan cwome and stefne abead,\n510\ntorhtan reorde. Het \u00fe\u00e6t treow ceorfan\nand \u00fea wildan deor on weg fleon,\nswylce eac \u00fea fugolas, \u00feonne his fyll come.\nHet \u00feonne besn\u00e6dan seolfes bl\u00e6dum,\ntwigum and telgum, and \u00feeh tacen wesan,\n515\nwunian wyrtruman \u00fe\u00e6s wudubeames\neor\u00f0an f\u00e6stne, o\u00f0\u00fe\u00e6t eft cyme\ngrene bleda, \u00feonne god sylle.\nHet eac gebindan beam \u00feone miclan\n\u00e6renum clammum and isernum,\n520\nand ges\u00e6ledne in susl don,\n\u00fe\u00e6t his mod wite \u00fe\u00e6t migtigra\nwite wealde\u00f0 \u00feonne he him wi\u00f0 m\u00e6ge.\n\u00fea of sl\u00e6pe onwoc, (swefn w\u00e6s \u00e6t ende),\neor\u00f0lic \u00e6\u00f0eling, him \u00fe\u00e6s egesa stod,\n525\ngryre fram \u00f0am gaste \u00f0e \u00feyder god sende.\nHet \u00fea tosomne sine leode,\nfolctogan feran, fr\u00e6gn ofer ealle\nswi\u00f0mod cyning hw\u00e6t \u00fe\u00e6t swefen bude,\nnalles \u00fey he wende \u00fe\u00e6t hie hit wiston,\n530\nac he cunnode hu hie cwe\u00f0an woldon.\n\u00f0a w\u00e6s to \u00f0am dome Daniel haten,\ngodes spelboda. Him w\u00e6s g\u00e6st geseald,\nhalig of heofonum, se his hyge trymede.\nOn \u00feam drihtenweard deopne wisse\n535\nsefan sidne ge\u00feanc and snytro cr\u00e6ft,\nwisne wordcwide. Oft he wundor manig,\nmetodes mihta, for men \u00e6tb\u00e6r.\n\u00fea he secgan ongan swefnes woman,\nheahheort and h\u00e6\u00f0en heriges wisa,\n540\nealne \u00feone egesan \u00fee him eowed w\u00e6s.\nB\u00e6d hine areccan hw\u00e6t seo run bude,\nhofe haligu word and in hige funde\nto gesecganne so\u00f0um wordum\nhw\u00e6t se beam bude \u00fee he blican geseah,\n545\nand him witgode wyrda ge\u00feingu.\nHe \u00f0a swigode, hw\u00e6\u00f0ere so\u00f0 ongeat,\nDaniel \u00e6t \u00feam dome, \u00fe\u00e6t his drihten w\u00e6s,\ngumena aldor, wi\u00f0 god scyldig.\nWandode se wisa, hw\u00e6\u00f0re he worde cw\u00e6\u00f0,\n550\n\u00e6cr\u00e6ftig ar, to \u00feam \u00e6\u00f0elinge:\n\"\u00fe\u00e6t is, weredes weard, wundor unlytel,\n\u00fe\u00e6t \u00feu gesawe \u00feurh swefen cuman,\nheofonheane beam and \u00fea halgan word,\nyrre and egeslicu, \u00fea se engel cw\u00e6\u00f0,\n555\n\u00fe\u00e6t \u00fe\u00e6t treow sceolde, telgum besn\u00e6ded,\nforan afeallan, \u00fe\u00e6t \u00e6r f\u00e6ste stod,\nand \u00feonne mid deorum dreamleas beon,\nwesten wunian, and his wyrtruman\nfoldan befolen, fyrstmearc wesan\n560\nstille on sta\u00f0ole, swa seo stefn gecw\u00e6\u00f0,\nymb seofon tida s\u00e6de eft onfon.\nSwa \u00fein bl\u00e6d li\u00f0. Swa se beam geweox,\nheah to heofonum, swa \u00feu h\u00e6le\u00f0um eart\nana eallum eor\u00f0buendum\n565\nweard and wisa. Nis \u00fee wi\u00f0erbreca,\nman on moldan, nym\u00f0e metod ana.\nSe \u00f0ec aceorfe\u00f0 of cyningdome,\nand \u00f0ec wineleasne on wr\u00e6c sende\u00f0,\nand \u00feonne onhweorfe\u00f0 heortan \u00feine,\n570\n\u00fe\u00e6t \u00feu ne gemyndgast \u00e6fter mandreame,\nne gewittes wast butan wildeora \u00feeaw,\nac \u00feu lifgende lange \u00ferage\nheorta hlypum geond holt wunast.\nNe bi\u00f0 \u00feec m\u00e6lmete nym\u00fee mores gr\u00e6s,\n575\nne rest witod, ac \u00feec regna scur\nwece\u00f0 and wrece\u00f0 swa wildu deor,\no\u00f0\u00fe\u00e6t \u00feu ymb seofon winter so\u00f0 gelyfest,\n\u00fe\u00e6t sie an metod eallum mannum,\nreccend and rice, se on roderum is.\n580\nIs me swa \u00feeah willa \u00fe\u00e6t se wyrtruma\nstille w\u00e6s on sta\u00f0ole, swa seo stefn gecw\u00e6\u00f0,\nand ymbe seofan tide s\u00e6de onfenge.\nSwa \u00fein rice restende bi\u00f0, anwalh for eorlum, o\u00f0\u00fe\u00e6t \u00feu eft cymst.\n585\nGehyge \u00feu, frea min, f\u00e6stlicne r\u00e6d.\nSyle \u00e6lmyssan, wes earmra hleo,\n\u00feinga for \u00f0eodne, \u00e6r \u00f0am seo \u00ferah cyme\n\u00fe\u00e6t he \u00feec aworpe of woruldrice.\nOft metod al\u00e6t monige \u00f0eode\n590\nwyrcan bote, \u00feonne hie woldon sylfe,\nfyrene f\u00e6stan, \u00e6r him f\u00e6r godes\n\u00feurh egesan gryre aldre gesceode.\"\nNo \u00fe\u00e6s fela Daniel to his drihtne gespr\u00e6c\nso\u00f0ra worda \u00feurh snytro cr\u00e6ft,\n595\n\u00fe\u00e6t \u00fe\u00e6s a se rica reccan wolde,\nmiddangeardes weard, ac his mod astah,\nheah fram heortan; he \u00fe\u00e6s hearde ongeald.\nOngan \u00f0a gyddigan \u00feurh gylp micel\nCaldea cyning \u00fea he ceastergeweorc,\n600\nBabilone burh, on his bl\u00e6de geseah,\nSennera feld sidne bewindan,\nheah hlifigan; \u00fe\u00e6t se heretyma\nwerede geworhte \u00feurh wundor micel,\nwear\u00f0 \u00f0a anhydig ofer ealle men,\n605\nswi\u00f0mod in sefan, for \u00f0\u00e6re sundorgife\n\u00fee him god sealde, gumena rice,\nworld to gewealde in wera life:\n\"\u00f0u eart seo micle and min seo m\u00e6re burh\n\u00fee ic geworhte to wur\u00f0myndum,\n610\nrume rice. Ic reste on \u00fee,\neard and e\u00f0el, agan wille.\"\n\u00f0a for \u00f0am gylpe gumena drihten\nforfangen wear\u00f0 and on fleam gewat,\nana on oferhyd ofer ealle men.\n615\nSwa wod wera on gewindagum\ngeocrostne si\u00f0 in godes wite,\n\u00f0ara \u00fee eft lifigende leode begete,\nNabochodonossor, si\u00f0\u00f0an him ni\u00f0 godes,\nhre\u00f0 of heofonum, hete gesceode.\n620\nSeofon winter samod susl \u00ferowode,\nwildeora westen, winburge cyning.\n\u00f0a se earfo\u00f0m\u00e6cg up locode,\nwilddeora gewita, \u00feurh wolcna gang.\nGemunde \u00fea on mode \u00fe\u00e6t metod w\u00e6re,\n625\nheofona heahcyning, h\u00e6le\u00f0a bearnum\nana ece gast. \u00fea he eft onhwearf\nwodan gewittes, \u00fe\u00e6r \u00fee he \u00e6r wide b\u00e6r\nherewosan hige, heortan getenge.\n\u00fea his gast ahwearf in godes gemynd,\n630\nmod to mannum, si\u00f0\u00f0an he metod onget.\nGewat \u00fea earmsceapen eft si\u00f0ian,\nnacod nydgenga, ni\u00f0 ge\u00f0afian,\nwundorlic wr\u00e6cca and w\u00e6da leas,\nm\u00e6tra on modge\u00f0anc, to mancynne,\n635\n\u00f0onne gumena weard in gylpe w\u00e6s.\nStod middangeard \u00e6fter mandrihtne,\neard and e\u00f0el \u00e6fter \u00feam \u00e6\u00f0elinge,\nseofon winter samod, swa no swi\u00f0rode\nrice under roderum o\u00f0\u00fe\u00e6t se r\u00e6swa com.\n640\n\u00fea w\u00e6s eft geseted in aldordom\nBabilone weard, h\u00e6fde beteran \u00f0eaw,\nleohtran geleafan in liffruman,\n\u00fe\u00e6tte god sealde gumena gehwilcum\nwelan swa wite, swa he wolde sylf.\n645\nNe lengde \u00fea leoda aldor\nwitegena wordcwyde, ac he wide bead\nmetodes mihte \u00fe\u00e6r he meld ahte,\nsi\u00f0f\u00e6t s\u00e6gde sinum leodum,\nwide wa\u00f0e \u00fee he mid wilddeorum ateah,\n650\no\u00f0\u00fe\u00e6t him frean godes in gast becwom\nr\u00e6df\u00e6st sefa, \u00f0a he to roderum beseah.\nWyrd w\u00e6s geworden, wundor gecy\u00f0ed,\nswefn gese\u00f0ed, susl awunnen,\ndom gedemed, swa \u00e6r Daniel cw\u00e6\u00f0,\n655\n\u00fe\u00e6t se folctoga findan sceolde\nearfo\u00f0si\u00f0as for his ofermedlan.\nSwa he ofstlice godspellode\nmetodes mihtum for mancynne,\nsi\u00f0\u00f0an in Babilone burhsittendum\n660\nlange hwile lare s\u00e6gde,\nDaniel domas. Si\u00f0\u00f0an deora gesi\u00f0,\nwildra w\u00e6rgenga, of wa\u00f0e cwom,\nNabochodonossor of ni\u00f0wracum,\nsi\u00f0\u00f0an weardode wide rice,\n665\nheold h\u00e6le\u00f0a gestreon and \u00fea hean burh,\nfrod, foremihtig folca r\u00e6swa,\nCaldea cyning, o\u00f0\u00fe\u00e6t him cwelm gesceod,\nswa him ofer eor\u00f0an andsaca ne w\u00e6s\ngumena \u00e6nig o\u00f0\u00fe\u00e6t him god wolde\n670\n\u00feurh hryre hreddan hea rice.\nSi\u00f0\u00f0an \u00fe\u00e6r his aferan ead bryttedon,\nwelan, wunden gold, in \u00fe\u00e6re widan byrig,\nealhstede eorla, unwaclice,\nheah hordm\u00e6gen, \u00fea hyra hlaford l\u00e6g.\n675\n\u00f0a in \u00f0\u00e6re \u00f0eode awoc his \u00fe\u00e6t \u00feridde cneow.\nW\u00e6s Baldazar burga aldor,\nweold wera rices, o\u00f0\u00fe\u00e6t him wlenco gesceod,\noferhyd egle. \u00f0a w\u00e6s ended\u00e6g\n\u00f0\u00e6s \u00f0e Caldeas cyningdom ahton.\n680\n\u00f0a metod onlah Medum and Persum\naldordomes ymb lytel f\u00e6c,\nlet Babilone bl\u00e6d swi\u00f0rian,\n\u00feone \u00fea h\u00e6le\u00f0 healdan sceoldon.\nWiste he ealdormen in unrihtum,\n685\n\u00f0a \u00f0e \u00f0y rice r\u00e6dan sceoldon.\n\u00f0a \u00fe\u00e6t gehogode hamsittende,\nMeda aldor, \u00fe\u00e6t \u00e6r man ne ongan,\n\u00fe\u00e6t he Babilone abrecan wolde,\nalhstede eorla, \u00fe\u00e6r \u00e6\u00f0elingas\n690\nunder wealla hleo welan brytnedon.\n\u00fe\u00e6t w\u00e6s \u00feara f\u00e6stna folcum cu\u00f0ost,\nm\u00e6st and m\u00e6rost \u00feara \u00fee men bun,\nBabilon burga, o\u00f0\u00fe\u00e6t Baldazar\n\u00feurh gylp grome godes frasade.\n695\nS\u00e6ton him \u00e6t wine wealle belocene,\nne onegdon na orlegra ni\u00f0,\n\u00feeah \u00f0e feonda folc feran cwome\nherega ger\u00e6dum to \u00fe\u00e6re heahbyrig\n\u00fe\u00e6t hie Babilone abrecan mihton.\n700\nGes\u00e6t \u00fea to symble si\u00f0estan d\u00e6ge\nCaldea cyning mid cneomagum,\n\u00fe\u00e6r medugal wear\u00f0 m\u00e6genes wisa.\nHet \u00feam \u00e6\u00f0elum beran Israela gestreon,\nhuslfatu halegu, on hand werum,\n705\n\u00fea \u00e6r Caldeas mid cyne\u00f0rymme,\ncempan in ceastre, cl\u00e6ne genamon,\ngold in Gerusalem, \u00f0a hie Iudea\nbl\u00e6d forbr\u00e6con billa ecgum,\nand \u00feurh hleo\u00f0orcyme, herige genamon\n710\nbeorhte fr\u00e6twe. \u00f0a hie tempel strudon,\nSalomanes seld, swi\u00f0e gulpon.\n\u00f0a wear\u00f0 bli\u00f0emod burga aldor,\ngealp gramlice gode on andan,\ncw\u00e6\u00f0 \u00fe\u00e6t his hergas hyrran w\u00e6ron\n715\nand mihtigran mannum to fri\u00f0e\n\u00feonne Israela ece drihten.\nHim \u00fe\u00e6t tacen wear\u00f0 \u00fe\u00e6r he to starude,\negeslic for eorlum innan healle,\n\u00fe\u00e6t he for leodum ligeword gecw\u00e6\u00f0,\n720\n\u00fea \u00fe\u00e6r in egesan engel drihtnes\nlet his hand cuman in \u00fe\u00e6t hea seld,\nwrat \u00fea in wage worda gerynu,\nbaswe bocstafas, burhsittendum.\n\u00f0a wear\u00f0 folctoga forht on mode,\n725\nacul for \u00feam egesan. Geseah he engles hand\nin sele writan Sennera wite.\n\u00fe\u00e6t gyddedon gumena m\u00e6nigeo,\nh\u00e6le\u00f0 in healle, hw\u00e6t seo hand write\nto \u00feam beacne burhsittendum.\n730\nWerede comon on \u00fe\u00e6t wundor seon.\nSohton \u00fea swi\u00f0e in sefan gehydum,\nhw\u00e6t seo hand write haliges gastes.\nNe mihton ar\u00e6dan runcr\u00e6ftige men\nengles \u00e6rendbec, \u00e6\u00f0elinga cyn,\n735\no\u00f0\u00fe\u00e6t Daniel com, drihtne gecoren,\nsnotor and so\u00f0f\u00e6st, in \u00fe\u00e6t seld gangan.\n\u00f0am w\u00e6s on gaste godes cr\u00e6ft micel,\nto \u00feam ic georne gefr\u00e6gn gyfum ceapian\nburhge weardas \u00fe\u00e6t he him bocstafas\n740\nar\u00e6dde and arehte, hw\u00e6t seo run bude.\nHim \u00e6cr\u00e6ftig andswarode,\ngodes spelboda, gleaw ge\u00f0ances:\n\"No ic wi\u00f0 feohsceattum ofer folc bere\ndrihtnes domas, ne \u00f0e duge\u00f0e can,\n745\nac \u00fee unceapunga orl\u00e6g secge,\nworda gerynu, \u00fea \u00feu wendan ne miht.\n\u00feu for anmedlan in \u00e6ht bere\nhuslfatu halegu, on hand werum.\nOn \u00feam ge deoflu drincan ongunnon,\n750\n\u00f0a \u00e6r Israela in \u00e6 h\u00e6fdon\n\u00e6t godes earce, o\u00f0\u00fe\u00e6t hie gylp beswac,\nwindruncen gewit, swa \u00fee wur\u00f0an sceal.\nNo \u00fe\u00e6t \u00fein aldor \u00e6fre wolde\ngodes goldfatu in gylp beran,\n755\nne \u00f0y hra\u00f0or hremde, \u00f0eah \u00f0e here brohte\nIsraela gestreon in his \u00e6hte geweald,\nac \u00fe\u00e6t oftor gecw\u00e6\u00f0 aldor \u00f0eoda\nso\u00f0um wordum ofer sin m\u00e6gen,\nsi\u00f0\u00f0an him wuldres weard wundor gecy\u00f0de,\n760\n\u00fe\u00e6t he w\u00e6re ana ealra gesceafta\ndrihten and waldend, se him dom forgeaf,\nunscyndne bl\u00e6d eor\u00f0an rices,\nand \u00feu lignest nu \u00fe\u00e6t sie lifgende,\nse ofer deoflum duge\u00feum wealde\u00f0.\"","title":"Daniel","type":"page"}