{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a01_04.htm","path":"neu/ascp/a01_04.htm","source_url":"https://sacred-texts.com/neu/ascp/a01_04.htm","text":"\u00fe\u00e6t wear\u00f0 underne eor\u00f0buendum,\n\u00fe\u00e6t meotod h\u00e6fde miht and streng\u00f0o\n\u00f0a he gefestnade foldan sceatas.\nSeolfa he gesette sunnan and monan,\n5\nstanas and eor\u00f0an, stream ut on s\u00e6,\nw\u00e6ter and wolcn, \u00f0urh his wundra miht.\nDeopne ymblyt clene ymbhalde\u00f0\nmeotod on mihtum, and alne middangeard.\nHe selfa m\u00e6g s\u00e6 geondwlitan,\n10\ngrundas in geofene, godes agen bearn,\nand he ariman m\u00e6g r\u00e6gnas scuran,\ndropena gehwelcne. Daga enderim\nseolua he gesette \u00feurh his so\u00f0an miht.\nSwa se wyrhta \u00feurh his wuldres gast\n15\nserede and sette on six dagum\neor\u00f0an d\u00e6les, up on heofonum, and heanne holm. Hwa is \u00fe\u00e6t \u00f0e cunne\nor\u00f0onc clene nym\u00f0e ece god?\nDreamas he gedelde, dugu\u00f0e and ge\u00feeode,\n20\nAdam \u00e6rest, and \u00fe\u00e6t \u00e6\u00f0ele cyn,\nengla ordfruman, \u00fe\u00e6t \u00fee eft forwar\u00f0.\n\u00f0uhte him on mode \u00fe\u00e6t hit mihte swa,\n\u00fe\u00e6t hie weron seolfe swegles brytan,\nwuldres waldend. Him \u00f0\u00e6r wirse gelamp,\n25\n\u00f0a heo in helle ham sta\u00f0eledon,\nan \u00e6fter o\u00f0rum, in \u00fe\u00e6t atole scref,\n\u00fe\u00e6r heo brynewelme bidan sceolden\nsaran sorge, nales swegles leoht\nhabban in heofnum heahgetimbrad,\n30\nac gedufan sceolun in \u00f0one deopan w\u00e6lm\nni\u00f0\u00e6r under nessas in \u00f0one neowlan grund,\ngredige and gifre. God ana wat\nhu he \u00fe\u00e6t scyldige werud forscrifen hefde! Cleopa\u00f0 \u00f0onne se alda ut of helle,\n35\nwrice\u00f0 wordcwedas weregan reorde,\neisegan stefne: \"Hw\u00e6r com engla \u00f0rym, \u00fee we on heofnum habban sceoldan?\n\u00feis is \u00f0eostr\u00e6 ham, \u00f0earle gebunden\nf\u00e6stum fyrclommum; flor is on welme\n40\nattre on\u00e6led. Nis nu ende feor\n\u00fe\u00e6t we sceolun \u00e6tsomne susel \u00ferowian,\nwean and wergu, nalles wuldres bl\u00e6d\nhabban in heofnum, hehselda wyn.\nHw\u00e6t, we for dryhtene iu dreamas hefdon,\n45\nsong on swegle selrum tidum,\n\u00fe\u00e6r nu ymb \u00f0one \u00e6can \u00e6\u00f0ele stonda\u00f0,\nhele\u00f0 ymb hehseld, heriga\u00f0 drihten wordum and wercum, and ic in wite sceal\nbidan in bendum, and me b\u00e6ttran ham\n50\nfor oferhygdum \u00e6fre ne wene.\"\n\u00f0a him andsweradan atole gastas,\nswarte and synfulle, susle begnornende:\n\"\u00feu us gel\u00e6rd\u00e6st \u00f0urh lyge \u00f0inne\n\u00fe\u00e6t we helende heran ne scealdon.\n55\n\u00f0uhte \u00fee anum \u00fe\u00e6t \u00f0u ahtest alles gewald,\nheofnes and eor\u00fean, w\u00e6re halig god,\nscypend seolfa. Nu earttu scea\u00f0ana sum,\nin fyrlocan feste gebunden.\nWendes \u00f0u \u00f0urh wuldor \u00f0\u00e6t \u00feu woruld ahtest,\n60\nalra onwald, and we englas mid \u00f0ec.\nAtol is \u00fein onseon! Habba\u00f0 we alle swa\nfor \u00f0inum leasungum ly\u00f0re gefered.\nSegdest us to so\u00f0e \u00fe\u00e6t \u00f0in sunu w\u00e6re\nmeotod moncynnes; hafustu nu mare susel!\"\n65\nSwa firenfulle facnum wordum\nheora aldor\u00f0\u00e6gn on reordadon,\non cearum cwidum. Crist heo afirde,\ndreamum bedelde. H\u00e6fdan dryhtnes liht\nfor oferhygdum ufan forleton,\n70\nh\u00e6fdon hym to hyhte helle floras,\nbeornende bealo. Blace hworfon\nscinnan forscepene, scea\u00f0an hwearfedon,\nearme \u00e6glecan, geond \u00fe\u00e6t atole scref,\nfor \u00f0am anmedlan \u00fee hie \u00e6r drugon.\n75\nEft reordade o\u00f0re si\u00f0e\nfeonda aldor. W\u00e6s \u00fea forht agen,\nseo\u00f0\u00f0an he \u00f0es wites worn gefelde.\nHe spearcade, \u00f0onne he spreocan ongan\nfyre and atre; ne bi\u00f0 swelc f\u00e6ger dream\n80\n\u00f0onne he in witum wordum indraf:\n\"Ic w\u00e6s iu in heofnum halig \u00e6ngel,\ndryhtene deore; hefde me dream mid gode,\nmicelne for meotode, and \u00f0eos menego swa some.\n\u00fea ic in mode minum hogade\n85\n\u00fe\u00e6t ic wolde towerpan wuldres leoman,\nbearn helendes, agan me burga gewald\neall to \u00e6hte, and \u00f0eos earme heap\n\u00fee ic hebbe to helle ham geledde.\nWene \u00fe\u00e6t tacen sutol \u00fea ic aseald wes on w\u00e6rg\u00f0u,\n90\nni\u00f0er under nessas in \u00f0one neowlan grund.\nNu ic eow hebbe to h\u00e6ftum ham gef\u00e6rde\nalle of earde. Nis her eadiges tir,\nwloncra winsele, ne worulde dream,\nne \u00e6ngla \u00f0reat, ne we upheofon\n95\nagan moten. Is \u00f0es atola ham\nfyre on\u00e6led. Ic eom fah wi\u00f0 god.\n\u00e6ce \u00e6t helle duru dracan eardiga\u00f0,\nhate on re\u00f0re; heo us helpan ne magon.\nIs \u00f0\u00e6s walica ham wites afylled;\n100\nnagan we \u00f0\u00e6s heolstres \u00fe\u00e6t we us gehydan m\u00e6gon\nin \u00f0issum neowlan genipe. H\u00e6r is nedran sw\u00e6g,\nwyrmas gewunade. Is \u00f0is wites clom\nfeste gebunden. Feond seondon re\u00f0e,\ndimme and deorce. Ne her d\u00e6g lyhte\u00f0\n105\nfor scedes sciman, sceppendes leoht. Iu ahte ic gewald ealles wuldres, \u00e6r ic moste in \u00f0eossum atolan \u00e6\u00f0ele gebidan\nhw\u00e6t me drihten god deman wille,\nfagum on flora. Nu ic feran com\n110\ndeofla menego to \u00f0issum dimman ham.\nAc ic sceal on flyge and on flyhte \u00f0ragum\nearda neosan, and eower ma,\n\u00fee \u00f0es oferhydes ord onstaldon.\nNe \u00f0urfon we \u00f0es wenan, \u00fe\u00e6t us wuldorcyning\n115\n\u00e6fre wille eard alefan,\n\u00e6\u00f0el to \u00e6hte, swa he \u00e6r dyde,\necne onwald; ah him alles gewald,\nwuldres and wita, waldendes sunu.\nFor\u00f0on ic sceal hean and earm hweorfan \u00f0y widor,\n120\nwadan wr\u00e6clastas, wuldre benemed,\ndugu\u00f0um bedeled, n\u00e6nigne dream agan\nuppe mid \u00e6nglum, \u00fees \u00f0e ic \u00e6r gecw\u00e6\u00f0\n\u00fe\u00e6t ic w\u00e6re seolfa sw\u00e6gles brytta, wihta wealdend. Ac hit me wyrse gelomp!\"\n125\nSwa se werega gast wordum s\u00e6de\nhis earfo\u00f0o ealle \u00e6tsomne,\nfah in fyrnum, (fyrleoma stod\ngeond \u00fe\u00e6t atole scr\u00e6f attre geblonden):\n\"Ic eom limw\u00e6stmum \u00fe\u00e6t ic gelutian ne m\u00e6g\n130\non \u00feyssum sidan sele, synnum forwundod.\nHw\u00e6t, her hat and ceald hwilum mencga\u00f0;\nhwilum ic gehere hellescealcas,\ngnornende cynn, grundas m\u00e6nan,\nni\u00f0er under n\u00e6ssum; hwilum nacode men\n135\nwinna\u00f0 ymb wyrmas. Is \u00fees windiga sele\neall inneweard atole gefylled.\nNe mot ic hihtlicran hames brucan,\nburga ne bolda, ne on \u00fea beorhtan gesc\u00e6ft\nne mot ic \u00e6fre ma eagum starian.\n140\nIs me nu wyrsa \u00fe\u00e6t ic wuldres leoht\nuppe mid englum \u00e6fre cu\u00f0e,\nsong on swegle, \u00fe\u00e6r sunu meotodes\nhabba\u00f0 eadige bearn ealle ymbfangen\nseolfa mid sange. Ne ic \u00feam sawlum ne mot\n145\n\u00e6nigum sce\u00f0\u00f0an,\nbutan \u00feam anum \u00fee he agan nyle;\n\u00fea ic mot to h\u00e6ftum ham geferian,\nbringan to bolde in \u00feone biteran grund.\nEalle we syndon ungelice\n150\n\u00feonne \u00fee we iu in heofonum h\u00e6fdon \u00e6rror\nwlite and weor\u00f0mynt. Ful oft wuldres sweg\nbrohton to bearme bearn h\u00e6lendes,\n\u00fe\u00e6r we ymb hine utan ealle hofan,\nleomu ymb leofne, lofsonga word,\n155\ndrihtne s\u00e6don. Nu ic eom d\u00e6dum fah,\ngewundod mid wommum; sceal nu \u00feysne wites clom\nbeoran beornende in b\u00e6ce minum,\nhat on helle, hyhtwillan leas.\"\n\u00fea gyt feola cwi\u00f0de firna herde,\n160\natol \u00e6gl\u00e6ca, ut of helle,\nwitum werig. Word spearcum fleah\nattre gelicost, \u00feonne he ut \u00feorhdraf:\n\"Eala drihtenes \u00ferym! Eala dugu\u00f0a helm!\nEala meotodes miht! Eala middaneard!\n165\nEala d\u00e6g leohta! Eala dream godes!\nEala engla \u00fereat! Eala upheofen!\nEala \u00fe\u00e6t ic eam ealles leas ecan dreames,\n\u00fe\u00e6t ic mid handum ne m\u00e6g heofon ger\u00e6can,\nne mid eagum ne mot up locian,\n170\nne huru mid earum ne sceal \u00e6fre geheran\n\u00fe\u00e6re byrhtestan beman stefne!\n\u00f0\u00e6s ic wolde of selde sunu meotodes,\ndrihten adrifan, and agan me \u00fe\u00e6s dreames gewald,\nwuldres and wynne, me \u00fe\u00e6r wyrse gelamp\n175\n\u00feonne ic to hihte agan moste.\nNu ic eom asceaden fram \u00fe\u00e6re sciran driht,\nal\u00e6ded fram leohte in \u00feone la\u00f0an ham.\nNe m\u00e6g ic \u00fe\u00e6t gehicgan hu ic in \u00f0\u00e6m becwom,\nin \u00feis neowle genip, ni\u00f0synnum fah,\n180\naworpen of worulde. Wat ic nu \u00fea\n\u00fe\u00e6t bi\u00f0 alles leas ecan dreamas\nse \u00f0e heofencyninge heran ne \u00feence\u00f0,\nmeotode cweman. Ic \u00fe\u00e6t mor\u00f0er sceal,\nwean and witu and wrace dreogan,\n185\ngoda bed\u00e6led, iud\u00e6dum fah,\n\u00fe\u00e6s \u00f0e ic ge\u00feohte adrifan drihten of selde,\nweoroda waldend; sceal nu wreclastas\nsettan sorhgcearig, si\u00f0as wide.\"\nHwearf \u00fea to helle \u00fea he gehened w\u00e6s,\n190\ngodes andsaca; dydon his gingran swa,\ngifre and gr\u00e6dige, \u00fea hig god bedraf\nin \u00fe\u00e6t hate hof \u00feam is hel nama.\nFor\u00fean sceal gehycgan h\u00e6le\u00f0a \u00e6ghwylc\n\u00fe\u00e6t he ne ab\u00e6lige bearn waldendes.\n195\nL\u00e6te him to bysne hu \u00fea blacan feond\nfor oferhygdum ealle forwurdon.\nNeoman us to wynne weoroda drihten, uppe ecne gefean, engla waldend.\nHe \u00fe\u00e6t gecydde \u00fe\u00e6t he m\u00e6gencr\u00e6ft h\u00e6fde,\n200\nmihta miccle, \u00fea he \u00fea m\u00e6nego adraf,\nh\u00e6ftas of \u00f0\u00e6m hean selde. Gemunan we \u00feone halgan drihten,\necne in wuldre mid alra gescefta ealdre;\nceosan us eard in wuldre mid ealra cyninga cyninge,\nse is Crist genemned;\n205\nbeoran on breostum bli\u00f0e ge\u00feohtas,\nsibbe and snytero; gemunan so\u00f0 and riht,\n\u00feonne we to hehselde hnigan \u00feenca\u00f0,\nand \u00feone anwaldan ara biddan.\n\u00feonne behofa\u00f0 se \u00f0e her wuna\u00f0\n210\nweorulde wynnum \u00fe\u00e6t him wlite scine\n\u00feonne he o\u00f0er lif eft gesece\u00f0, f\u00e6gere land \u00feonne \u00feeos folde seo;\nis \u00fe\u00e6r wlitig and wynsum, w\u00e6stmas scina\u00f0,\nbeorhte ofer burgum. \u00fe\u00e6r is brade lond,\n215\nhyhtlicra ham in heofonrice,\nCriste gecwemra. Uta cerran \u00feider\n\u00fe\u00e6r he sylfa sit, sigora waldend,\ndrihten h\u00e6lend, in \u00f0\u00e6m deoran ham,\nand ymb \u00fe\u00e6t hehsetl hwite standa\u00f0\n220\nengla fe\u00f0an and eadigra,\nhalige heofen\u00fereatas heriga\u00f0 drihten\nwordum and weorcum. Heora wlite scine\u00f0\ngeond ealra worulda woruld mid wuldorcyninge.\n\u00f0a get ic fur\u00f0or gefregen feond ondetan;\n225\nw\u00e6s him eall ful strang wom and witu; h\u00e6fdon wuldorcyning\nfor oferhigdum anforl\u00e6ten;\ncw\u00e6don eft hra\u00f0e o\u00f0re worde:\n\"Nu is gesene \u00fe\u00e6t we syngodon\nuppe on earde. Sceolon nu \u00e6fre \u00fe\u00e6s\n230\ndreogan domlease gewinn drihtnes mihtum.\nHw\u00e6t, we in wuldres wlite wunian moston\n\u00fe\u00e6r we halgan gode heran woldon,\nand him sang ymb seld secgan sceoldon\n\u00feusendm\u00e6lum. \u00fea we \u00fe\u00e6r w\u00e6ron,\n235\nwunodon on wynnum, geherdon wuldres sweg,\nbeman stefne. Byrhtword aras\nengla ordfruma, and to \u00fe\u00e6m \u00e6\u00feelan\nhnigan him sanctas; sigetorht aras\nece drihten, ofer us gestod\n240\nand gebletsode bilewitne heap\ndogra gehwilcne, and his se deora sunu,\ngasta scyppend. God seolfa w\u00e6s\neallum andfeng \u00fee \u00f0\u00e6r up becom,\nand hine on eor\u00f0an \u00e6r gelefde.\n245\n\u00fea \u00f0\u00e6s of\u00feuhte \u00fe\u00e6t se \u00feeoden w\u00e6s\nstrang and sti\u00f0mod. Ongan ic \u00fea steppan for\u00f0\nana wi\u00f0 englum, and to him eallum spr\u00e6c:\n'Ic can eow l\u00e6ran langsumne r\u00e6d,\ngif ge willa\u00f0 minre mihte gelefan.\n250\nUta oferhycgan helm \u00feone micclan,\nweroda waldend, agan us \u00feis wuldres leoht,\neall to \u00e6hte. \u00feis is idel gylp\n\u00fe\u00e6t we \u00e6r drugon ealle hwile.'\n\u00f0a gewear\u00f0 usic \u00fe\u00e6t we woldon swa\n255\ndrihten adrifan of \u00feam deoran ham,\ncyning of cestre. Cu\u00f0 is wide\n\u00fe\u00e6t wreclastas wunian moton,\ngrimme grundas. God seolfa him\nrice halde\u00f0. He is ana cyning,\n260\n\u00fee us eorre gewear\u00f0, ece drihten,\nmeotod mihtum swi\u00f0. Sceal nu \u00feeos menego her\nlicgan on leahtrum, sume on lyft scacan,\nfleogan ofer foldan; fyr bi\u00f0 ymbutan\non \u00e6ghwylcum, \u00fe\u00e6h he uppe seo.\n265\nNe mot he \u00feam sawlum \u00fee \u00f0\u00e6r seca\u00f0 up,\neadige of eor\u00fean \u00e6fre gehrinan,\nah ic be hondum mot h\u00e6\u00feenre sceale\ngripan to grunde, godes andsacan.\nSume sceolon hweorfan geond h\u00e6le\u00f0a land\n270\nand unsibbe oft onstyrian\nmonna m\u00e6g\u00f0um geond middaneard.\nIc her ge\u00feolian sceal \u00feinga \u00e6ghwylces,\nbitres ni\u00f0\u00e6s beala gnornian,\nsic and sorhful, \u00fe\u00e6s ic seolfa weold,\n275\n\u00feonne ic on heofonum ham sta\u00f0elode,\nhw\u00e6\u00f0er us se eca \u00e6fre wille\non heofona rice ham alefan, e\u00f0el to \u00e6hte, swa he \u00e6r dyde.\"\nSwa gnornedon godes andsacan,\n280\nhate on helle. Him w\u00e6s h\u00e6lend god\nwra\u00f0 geworden for womcwidum.\nFor\u00feon m\u00e6g gehycgan, se \u00f0e his heorte deah,\n\u00fe\u00e6t he him afirre frecne ge\u00feohtas,\nla\u00f0e leahtras, lifigendra gehwylc.\n285\nGemunan symle on mode meotodes streng\u00f0o;\ngearwian us togenes grene str\u00e6te\nup to englum, \u00fe\u00e6r is se \u00e6lmihtiga god.\nAnd us bef\u00e6\u00f0man wile freobearn godes,\ngif we \u00fe\u00e6t on eor\u00f0an \u00e6r ge\u00feenca\u00f0,\n290\nand us to \u00feam halgan helpe gelefa\u00f0.\n\u00feonne he us no forl\u00e6te\u00f0, ah lif syle\u00f0\nuppe mid englum, eadigne dream.\nT\u00e6ce\u00f0 us se torhta trumlicne ham,\nbeorhte burhweallas. Beorhte scina\u00f0\n295\nges\u00e6lige sawle, sorgum bed\u00e6lde,\n\u00fe\u00e6r heo \u00e6fre for\u00f0 wunian moten\ncestre and cynestol. Uton cy\u00fean \u00fe\u00e6t!\nDeman we on eor\u00f0an, \u00e6rror lifigend,\nonlucan mid listum locen waldendes,\n300\nongeotan gastlice! Us ongean cuma\u00f0\n\u00feusend engla, gif \u00feider moton,\nand \u00fe\u00e6t on eor\u00f0an \u00e6r gewyrca\u00f0.\nFor\u00feon se bi\u00f0 eadig se \u00f0e \u00e6fre wile\nman oferhycgen, meotode cweman,\n305\nsynne adw\u00e6scan. Swa he sylfa cw\u00e6\u00f0:\n\"So\u00f0f\u00e6ste men, sunnan gelice,\nf\u00e6gre gefr\u00e6tewod in heora f\u00e6der rice\nscina\u00f0 in sceldbyrig.\" \u00fe\u00e6r heo sceppend seolf fri\u00f0e bef\u00e6\u00f0me\u00f0, f\u00e6der mancynnes,\n310\nahefe\u00f0 holdlice in heofones leoht,\n\u00fe\u00e6r heo mid wuldorcyninge wunian moton\nawa to aldre,\nagan dreama dream mid drihtne gode,\na to worulde a buton ende.\n315\nEala hw\u00e6t! Se awyrgda wra\u00f0e ge\u00feohte\n\u00fe\u00e6t he heofencyninge heran ne wolde,\nf\u00e6der frefergendum. Flor attre weol,\nhat under h\u00e6ftum; hreopan deofla,\nwide geond windsele wean cwanedon,\n320\nman and mor\u00f0ur. W\u00e6s seo menego \u00fe\u00e6r\nswylce on\u00e6led; w\u00e6s \u00fe\u00e6t eall full strong,\n\u00feonne w\u00e6s heora aldor, \u00fee \u00f0\u00e6r \u00e6rest com\nfor\u00f0 on fe\u00fean, f\u00e6ste gebunden\nfyre and lige. \u00fe\u00e6t w\u00e6s f\u00e6stlic \u00fereat;\n325\nec sceoldon his \u00feegnas \u00fe\u00e6r gewunian\natolan e\u00f0les, nalles up \u00feanon\ngeheran in heofonum haligne dream,\n\u00fe\u00e6r heo oft f\u00e6gerne folga\u00f0 h\u00e6fdon\nuppe mid englum. W\u00e6ron \u00fea alles \u00fe\u00e6s\n330\ngoda lease, ah nym\u00fee gryndes ad\nwunian ne moten and \u00feone werigan sele\n\u00fe\u00e6r is wom and wop wide gehered,\nand gristbitungc and gnornungc mecga.\nNabba\u00f0 he to hyhte nym\u00fee cyle and fyr,\n335\nwean and witu and wyrma \u00fereat,\ndracan and n\u00e6ddran and \u00feone dimman ham.\nFor\u00f0on mihte geheran, se \u00f0e \u00e6t hylle w\u00e6s\ntwelf milum neh, \u00fe\u00e6t \u00f0\u00e6r w\u00e6s to\u00f0a geheaw,\nhlude and geomre. Godes andsacan\n340\nhweorfan geond helle hate on\u00e6led\nufan and utan (him w\u00e6s \u00e6ghw\u00e6r wa),\nwitum werige, wuldres bescyrede,\ndreamum bed\u00e6lde. Heofon deop gehygd,\n\u00fea heo on heofonum ham sta\u00f0elodon,\n345\n\u00fe\u00e6t hie woldon ben\u00e6man nergendne Crist\nrodera rices, ah he on riht geheold\nhired heofona and \u00fe\u00e6t halige seld.\nNis n\u00e6nig swa snotor ne swa cr\u00e6ftig,\nne \u00fe\u00e6s swa gleaw, nym\u00fee god seolfa,\n350\n\u00fe\u00e6t asecgan m\u00e6ge swegles leoman,\nhu scima \u00fe\u00e6r scine\u00f0 ymbutan\nmeotodes mihte, geond \u00fe\u00e6t m\u00e6re cynn,\n\u00fe\u00e6r habba\u00f0 englas eadigne dream,\nsanctas singa\u00f0 (\u00fe\u00e6t is se seolfa) for god.\n355\n\u00feonne beo\u00f0 \u00fea eadigan \u00fee of eor\u00f0an cuma\u00f0,\nbringa\u00f0 to bearme blostman stences,\nwyrte wynsume (\u00fe\u00e6t synd word godes),\n\u00feonne hie bef\u00e6\u00f0me\u00f0 f\u00e6der mancynnes,\nand hie gesegna\u00f0 mid his swi\u00f0ran hond,\n360\nl\u00e6de\u00f0 to lihte, \u00fe\u00e6r hi lif agon\na to aldre, uplicne ham,\nbyrhtne burhstyde. Bl\u00e6d bi\u00f0 \u00e6ghw\u00e6m\n\u00fe\u00e6m \u00f0e h\u00e6lende heran \u00feence\u00f0,\nand wel is \u00feam \u00f0e \u00fe\u00e6t wyrcan mot.\n365\nW\u00e6s \u00fe\u00e6t encgelcyn \u00e6r genemned,\nLucifer haten, leohtberende,\non geardagum in godes rice.\n\u00fea he in wuldre wrohte onstalde\n\u00fe\u00e6t he oferhyda agan wolde.\n370\n\u00fea Satanus swearte ge\u00feohte\n\u00fe\u00e6t he wolde on heofonum hehseld wyrcan\nuppe mid \u00feam ecan. \u00fe\u00e6t w\u00e6s ealdor heora,\nyfeles ordfruma. Him \u00fe\u00e6t eft gehreaw,\n\u00fea he to helle hnigan sceolde,\n375\nand his hired mid hine, in hyn\u00f0o geglidan,\nnergendes ni\u00f0, and no seo\u00f0\u00f0an\n\u00fe\u00e6t hi mosten in \u00feone ecan andwlitan seon\nbuton ende. \u00fea him egsa becom,\ndyne for deman, \u00fea he duru in helle\n380\nbr\u00e6c and begde. Blis wear\u00f0 monnum\n\u00fea hi h\u00e6lendes heafod gesawon.\n\u00feonne w\u00e6s \u00feam atolan \u00fee we \u00e6r nemdon\n\u00fea w\u00e6ron mid egsan ealle afyrhte,\nwide geond windsele wordum m\u00e6ndon:\n385\n\"\u00feis is stronglic, nu \u00fees storm becom,\n\u00feegen mid \u00fereate, \u00feeoden engla.\nHim beforan fere\u00f0 f\u00e6gere leoht\n\u00feonne we \u00e6fre \u00e6r eagum gesawon,\nbuton \u00fea we mid englum uppe w\u00e6ron.\n390\nWile nu ure witu \u00feurh his wuldres cr\u00e6ft\neall toweorpan. Nu \u00f0es egsa com,\ndyne for drihtne, sceal \u00fees dreorga heap\nungeara nu atol \u00ferowian.\nHit is se seolfa sunu waldendes,\n395\nengla drihten. Wile uppe heonan\nsawla l\u00e6dan, and we seo\u00f0\u00f0an a\n\u00fe\u00e6s yrreweorces hen\u00f0o ge\u00feolia\u00f0.\"\nHwearf \u00fea to helle h\u00e6le\u00f0a bearnum,\nmeotod \u00feurh mihte; wolde manna rim,\n400\nfela \u00feusenda, for\u00f0 gel\u00e6dan\nup to e\u00f0le. \u00fea com engla sweg,\ndyne on d\u00e6gred; h\u00e6fde drihten seolf\nfeond oferfohten. W\u00e6s seo f\u00e6h\u00f0e \u00fea gyt\nopen on uhtan, \u00fea se egsa becom.\n405\nLet \u00fea up faran eadige sawle,\nAdames cyn, ac ne moste Efe \u00fea gyt\nwlitan in wuldre \u00e6r heo wordum cw\u00e6\u00f0:\n\"Ic \u00fee \u00e6ne abealh, ece drihten,\n\u00fea wit Adam twa eaples \u00feigdon\n410\n\u00feurh n\u00e6ddran ni\u00f0, swa wit na ne sceoldon.\nGel\u00e6rde unc se atola, se \u00f0e \u00e6fre nu\nbeorne\u00f0 on bendum, \u00fe\u00e6t wit bl\u00e6d ahton,\nhaligne ham, heofon to gewalde.\n\u00fea wit \u00f0\u00e6s aw\u00e6rgdan wordum gelyfdon,\n415\nnamon mid handum on \u00feam halgan treo\nbeorhte bl\u00e6da; unc \u00fe\u00e6s bitere forgeald\n\u00fea wit in \u00feis hate scr\u00e6f hweorfan sceoldon,\nand wintra rim wunian seo\u00f0\u00f0an,\n\u00feusenda feolo, \u00feearle on\u00e6led.\n420\nNu ic \u00fee halsige, heofenrices weard,\nfor \u00fean hirede \u00fee \u00f0u hider l\u00e6ddest,\nengla \u00fereatas, \u00fe\u00e6t ic up heonon\nm\u00e6ge and mote mid minre m\u00e6g\u00f0e.\nAnd ymb \u00fereo niht com \u00feegen h\u00e6lendes\n425\nham to helle; is nu h\u00e6ftum strong,\nwitum werig, swylce him wuldorcyning\nfor onm\u00e6dlan eorre geworden.\nSegdest us to so\u00f0e \u00fe\u00e6tte seolfa god\nwolde helwarum ham gelihtan.\n430\nAras \u00fea anra gehwylc, and wi\u00f0 earm ges\u00e6t,\nhleonade wi\u00f0 handa. \u00feeah hylle gryre\negeslic \u00feuhte, w\u00e6ron ealle \u00fe\u00e6s\nf\u00e6gen in firnum \u00fe\u00e6t freodrihten\nwolde him to helpe helle gesecan.\"\n435\nR\u00e6hte \u00fea mid handum to heofencyninge,\nb\u00e6d meotod miltse \u00feurh Marian had:\n\"Hw\u00e6t, \u00feu fram minre dohtor, drihten, onwoce\nin middangeard mannum to helpe.\nNu is gesene \u00fe\u00e6t \u00f0u eart sylfa god\n440\nand ece ordfruma ealra gesceafta.\"\nLet \u00fea up faran ece drihten;\nwuldre h\u00e6fde wites clomma\nfeondum o\u00f0f\u00e6sted, and heo fur\u00f0or sceaf\nin \u00fe\u00e6t neowle genip, nearwe gebeged,\n445\n\u00fe\u00e6r nu Satanus swearte \u00feinga\u00f0,\nearm agl\u00e6ca, and \u00fea atolan mid him,\nwitum werige. Nalles wuldres leoht\nhabban moton, ah in helle grund,\nne hi edcerres \u00e6fre moton\n450\nwenan seo\u00f0\u00f0an. Him w\u00e6s drihten god\nwra\u00f0 geworden, sealde him wites clom,\natole to \u00e6hte, and egsan gryre, dimne and deorcne dea\u00f0es scuwan,\nhatne helle grund, hinsi\u00f0gryre.\n455\n\u00fe\u00e6t, la, w\u00e6s f\u00e6ger, \u00fe\u00e6t se fe\u00f0a com\nup to earde, and se eca mid him,\nmeotod mancynnes in \u00fea m\u00e6ran burh!\nHofon hine mid him handum halige\nwitigan up to e\u00f0le, Abrahames cynn.\n460\nH\u00e6fde \u00fea drihten seolf dea\u00f0 oferwunnen,\nfeond geflemed; \u00fe\u00e6t in fyrndagum\nwitegan s\u00e6don \u00fe\u00e6t he swa wolde.\n\u00feis w\u00e6s on uhtan eall geworden,\n\u00e6r d\u00e6grede, \u00fe\u00e6t se dyne becom,\n465\nhlud of heofonum, \u00fea he helle duru\nforbr\u00e6c and forbegde; ban weornodon\n\u00fea hie swa leohtne leoman gesawon.\nGes\u00e6t \u00fea mid \u00fe\u00e6re fyrde frumbearn godes,\ns\u00e6de so\u00f0cwidum: \"Snotre gastas,\n470\nic eow \u00feurh mine mihte geworhte,\nAdam \u00e6rest and \u00fe\u00e6t \u00e6\u00f0ele wif.\n\u00fea hie begeton on godes willan\nfeowertig bearna, \u00fe\u00e6t for\u00f0 \u00feonon on middangeard menio onwocon,\n475\nand wintra feola wunian moston,\neorlas on e\u00f0le, o\u00f0\u00f0\u00e6t eft gelamp\n\u00fe\u00e6t hieafyrde eft feond in firenum;\nfah is \u00e6ghw\u00e6r.\nIc on neorxnawonge niwe asette\n480\ntreow mid telgum, \u00fe\u00e6t \u00f0a tanas up\n\u00e6pla b\u00e6ron, and git \u00e6ton \u00fea\nbeorhtan bl\u00e6da, swa inc se balewa het,\nhand\u00feegen helle. H\u00e6fdon for\u00feon hatne grund,\n\u00fe\u00e6s git ofergymdon h\u00e6lendes word,\n485\n\u00e6ten \u00fea egsan. W\u00e6s se atola beforan,\nse inc bam forgeaf balewe ge\u00feohtas.\n\u00fea me gereaw \u00fe\u00e6t min handgeweorc \u00fe\u00e6s carcernes clom \u00f0rowade.\nN\u00e6s \u00f0a monna gemet, ne m\u00e6gen engla,\n490\nne witegena weorc, ne wera snytero,\n\u00fe\u00e6t eow mihte helpan, nim\u00f0e h\u00e6lend god,\nse \u00fe\u00e6t wite \u00e6r to wrece gesette.\nFerde to foldan \u00feurh f\u00e6mnan had\nufan from e\u00f0le, and on eor\u00fean gebad\n495\ntintregan felaand teonan micelne.\nMe seredon ymb secgas monige\nd\u00e6ges and nihtes, hu heo me dea\u00f0es cwealm,\nrices r\u00e6dboran, hrefnan mihten.\n\u00fea w\u00e6s \u00fe\u00e6s m\u00e6les mearc agangen\n500\n\u00fe\u00e6t on worulde w\u00e6s wintra gerimes\n\u00fereo and \u00feritig geara \u00e6r ic \u00ferowode.\nGemunde ic \u00f0\u00e6s m\u00e6nego on\u00feam minnan ham\nlange \u00fe\u00e6s \u00f0e ic of h\u00e6ftum ham gel\u00e6dde\nup to earde, \u00fe\u00e6t heo agan sceolon\n505\ndrihtnes domas and dugu\u00f0e \u00ferym;\nwunia\u00f0 in wynnum, habba\u00f0 wuldres bl\u00e6d\n\u00feusendm\u00e6lum. Ic eow \u00feingade\n\u00fea me on beame beornas sticedon,\ngarum on galgum. Heow se giunga \u00fe\u00e6r,\n510\nand ic eft up becom ece dreamas\nto haligum drihtne.\"\nSwa wuldres weard wordum s\u00e6de,\nmeotod moncynnes \u00e6r on morgen\n\u00fe\u00e6s \u00fee drihten god of dea\u00f0e aras.\n515\nN\u00e6s nan \u00fe\u00e6s stronglic stan gef\u00e6stnod,\n\u00feeah he w\u00e6re mid irne eall ymbfangen,\n\u00fe\u00e6t mihte \u00feam miclan m\u00e6gne wi\u00f0habban,\nah he ut eode, engla drihten,\non \u00fe\u00e6m f\u00e6stenne, and gefatian het\n520\nenglas eallbeorhte andleofan gingran, and huru secgan het Simon Petre\n\u00fe\u00e6t he moste in Galileam god sceawian,\necne and trumne, swa he \u00e6r dyde.\n\u00fea ic gongan gefregn gingran \u00e6tsomne\n525\nealle to Galileam; h\u00e6fdon gastes bled, ongeton haligne godes sunu\nswa heo gesegon hw\u00e6r sunu meotodes \u00fea on upp gestod, ece drihten,\ngod in Galileam. To \u00f0\u00e6s gingran \u00feider\n530\nealle urnon, \u00fe\u00e6r se eca w\u00e6s.\nFeollon on foldan, and to fotum hnigon;\n\u00feanceden \u00feeodne \u00fe\u00e6t hit \u00feus gelomp\n\u00fe\u00e6t hi sceawodon scyppend engla.\n\u00fea sona spr\u00e6c Simon Petrus:\n535\n\"Eart \u00feu \u00feis, drihten, dome gewur\u00f0ad?\nWe \u00f0e gesawon \u00e6t sumum cyrre,\n\u00feec gelegdon on la\u00f0ne bend h\u00e6\u00feene mid hondum; him \u00fe\u00e6t gehreowan m\u00e6g\n\u00feonne heo endest\u00e6f eft gesceawia\u00f0.\"\n540\nSume hie ne mihton mode oncnawan\n\u00fe\u00e6t w\u00e6s se deora (Didimus w\u00e6s haten)\n\u00e6r he mid hondum h\u00e6lend genom\nsylfne be sidan \u00fe\u00e6r he his swat forlet;\nfeollon to foldan fulwihtes b\u00e6\u00f0e.\n545\nF\u00e6ger w\u00e6s \u00fe\u00e6t ongin \u00fe\u00e6t freodrihten\nge\u00ferowode, \u00feeoden ure.\nHe on beame astah and his blod ageat,\ngod on galgan, \u00feurh his gastes m\u00e6gen.\nFor\u00feon men sceolon m\u00e6la gehwylce\n550\nsecgan drihtne \u00feanc d\u00e6dum and weorcum,\n\u00fe\u00e6s \u00f0e he us of h\u00e6ftum ham gel\u00e6dde\nup to e\u00f0le, \u00fe\u00e6r we agan sceolon\ndrihtnes domas,\nand we in wynnum wunian moton.\n555\nUs is wuldres leoht\ntorht ontyned, \u00feam \u00f0e teala \u00feence\u00f0.\n\u00fea w\u00e6s on eor\u00f0an ece drihten\nfeowertig daga folgad folcum,\ngecy\u00f0ed mancynne, \u00e6r he in \u00fea m\u00e6ran gesceaft,\n560\nburhleoda fruma, bringan wolde\nhaligne gast to heofonrice.\nAstah up on heofonum engla scyppend,\nweoroda waldend. \u00fea com wolcna sweg,\nhalig of heofonum. Mid w\u00e6s hond godes,\n565\nonfeng freodrihten, and hine for\u00f0 l\u00e6dde\nto \u00feam halgan ham heofna ealdor.\nHim ymbflugon engla \u00fereatas\n\u00feusendm\u00e6lum. \u00fea hit \u00feus gelomp,\n\u00fea gyt nergende Crist gecw\u00e6\u00f0 \u00fe\u00e6t he \u00fe\u00e6s\n570\nymb tene niht twelf apostolas\nmid his gastes gife, gingran geswi\u00f0de.\nH\u00e6fde \u00fea gesette sawla unrim\ngod lifigende. \u00fea w\u00e6s Iudas of,\nse \u00f0e \u00e6r on tifre torhtne gesalde,\n575\ndrihten h\u00e6lend; him seo d\u00e6d ne ge\u00feeah,\n\u00fe\u00e6s he bebohte bearn wealdendes\non seolfres sinc; him \u00fe\u00e6t swearte forgeald\nearm \u00e6gl\u00e6ca innon helle.\nSite\u00f0 nu on \u00fea swi\u00f0ran hond sunu his f\u00e6deres;\n580\nd\u00e6le\u00f0 dogra gehw\u00e6m drihten weoroda\nhelp and h\u00e6lo h\u00e6le\u00fea bearnum\ngeond middangeard. \u00fe\u00e6t is monegum cu\u00f0\n\u00fe\u00e6t he ana is ealra gescefta\nwyrhta and waldend \u00feurh his wuldres cr\u00e6ft.\n585\nSite\u00f0 him on heofnum halig encgel,\nwaldend mid witegum. Hafa\u00f0 wuldres bearn\nhis seolfes seld swegl betolden.\nLea\u00f0a\u00f0 us \u00feider to leohte \u00feurh his l\u00e6cedom,\n\u00fe\u00e6r we moton seolfe sittan mid drihtne,\n590\nuppe mid englum, habban \u00fe\u00e6t ilce leoht,\n\u00fe\u00e6r his hired nu halig earda\u00f0,\nwuna\u00f0 in wynnum, \u00fe\u00e6r is wuldres bled\ntorht ontyned. Uton teala hycgan\n\u00fe\u00e6t we h\u00e6lende heran georne,\n595\nCriste cweman. \u00fe\u00e6r is cu\u00f0re lif\n\u00feonne we on eor\u00f0an m\u00e6gen \u00e6fre gestreonan.\nHafa\u00f0 nu ge\u00feingod to us \u00feeoden m\u00e6ra,\n\u00e6lmihtig god,\non domd\u00e6ge drihten seolfa.\n600\nHate\u00f0 hehenglas hluddre stefne\nbeman blawan ofer burga geseotu\ngeond foldan sceatas.\n\u00feonne of \u00feisse moldan men onwecna\u00f0;\ndeade of duste arisa\u00f0 \u00feurh drihtnes miht.\n605\n\u00fe\u00e6t bi\u00f0 daga lengust, and dinna m\u00e6st\nhlud gehered, \u00feonne h\u00e6lend cyme\u00f0,\nwaldend mid wolcnum in \u00feas woruld f\u00e6re\u00f0.\nWile \u00feonne gesceadan wlitige and uncl\u00e6ne\non twa healfe, tile and yfle.\n610\nHim \u00fea so\u00f0f\u00e6stan on \u00fea swi\u00f0ran hond\nmid rodera weard reste gestiga\u00f0.\n\u00feonne beo\u00f0 bli\u00f0e \u00fea in burh moton\ngongan in godes rice,\nand heo gesena\u00f0 mid his swi\u00f0ran hond\n615\ncynincg alwihta, cleopa\u00f0 ofer ealle:\n\"Ge sind wilcuman! Ga\u00f0 in wuldres leoht\nto heofona rice, \u00fe\u00e6r ge habba\u00f0\na to aldre ece reste.\"\n\u00feonne stonda\u00f0 \u00fea forworhtan, \u00fea \u00f0e firnedon;\n620\nbeo\u00f0 beofigende hwonne him bearn godes\ndeman wille \u00feurh his d\u00e6da sped.\nWena\u00f0 \u00fe\u00e6t heo moten to \u00fe\u00e6re m\u00e6ran byrig\nup to englum swa o\u00f0re dydon,\nac him bi\u00f0 reordende\n625\nece drihten, ofer ealle gecw\u00e6\u00f0:\n\"Astiga\u00f0 nu, awyrgde, in \u00fe\u00e6t witehus\nofostum miclum. Nu ic eow ne con.\"\nSona \u00e6fter \u00fe\u00e6m wordum werige gastas,\nhelle h\u00e6ftas, hwyrftum scri\u00fea\u00f0\n630\n\u00feusendm\u00e6lum, and \u00feider lea\u00f0a\u00f0\nin \u00fe\u00e6t scea\u00f0ena scr\u00e6f, scufa\u00f0 to grunde\nin \u00fe\u00e6t nearwe ni\u00f0, and no seo\u00f0\u00f0an\n\u00fe\u00e6t hie up \u00feonan \u00e6fre moton,\nah \u00fe\u00e6r ge\u00feolian sceolon earmlic wite,\n635\nclom and carcern, and \u00feone caldan grund\ndeopne adreogan and deofles spellunge,\nhu hie him on edwit oft asetta\u00f0\nswarte suslbonan, st\u00e6le\u00f0 feondas\nf\u00e6h\u00f0e and firne, \u00fe\u00e6r \u00f0e hie freodrihten,\n640\necne anwaldan, oft forgeaton,\n\u00feone \u00fee hie him to hihte habban sceoldon.\nUton, la, ge\u00feencan geond \u00feas worulde,\n\u00fe\u00e6t we h\u00e6lende heran onginnen!\nGeorne \u00feurh godes gife gemunan gastes bled,\n645\nhu eadige \u00fe\u00e6r uppe sitta\u00f0\nselfe mid swegle, sunu h\u00e6lendes!\n\u00fe\u00e6r is geat gylden gimmum gefr\u00e6tewod,\nwynnum bewunden, \u00fe\u00e6m \u00fee in wuldres leoht\ngongan moten to godes rice,\n650\nand ymb \u00fea weallas wlitige scina\u00f0\nengla gastas and eadige sawla,\n\u00fea \u00f0e heonon fera\u00f0.\n\u00fe\u00e6r martiras meotode cwema\u00f0,\nand heriga\u00f0 hehf\u00e6der halgum stefnum,\n655\ncyning in cestre. Cwe\u00fea\u00f0 ealle \u00feus:\n\"\u00feu eart h\u00e6le\u00f0a helm and heofendema,\nengla ordfruma, and eor\u00f0an tudor upgel\u00e6ddest to \u00feissum eadigan ham.\"\nSwa wuldres weard wordum heriga\u00f0\n660\n\u00feegnas ymb \u00feeoden, \u00fe\u00e6r is \u00ferym micel,\nsang \u00e6t selde, is sylf cyning,\nealra aldor, in \u00f0\u00e6re ecan gesceft.\n\u00fe\u00e6t is se drihten, se\u00f0e dea\u00f0 for us\nge\u00ferowode, \u00feeoden engla.\n665\nSwylce he f\u00e6ste feowertig daga,\nmetod mancynnes, \u00feurh his mildsa sped.\n\u00fea gewear\u00f0 \u00feone weregan, \u00fee \u00e6r aworpen w\u00e6s\nof heofonum \u00fe\u00e6t he in helle gedeaf,\n\u00fea costode cyning alwihta.\n670\nBrohte him to bearme brade stanas,\nb\u00e6d him for hungre hlafas wyrcan--\n\"gif \u00feu swa micle mihte h\u00e6bbe.\"\n\u00fea him andswarode ece drihten:\n\"Wendest \u00feu, awyrgda, \u00fe\u00e6t awriten n\u00e6re,\n675\nnym\u00fee me \u00e6nne\nac geseted hafast, sigores agend,\nlifigendum liht, lean butan ende,\non heofenrice, halige dreamas.\"\n\u00fea he mid hondum genom\n680\natol \u00feurh edwit, and on esle ahof,\nherm bealowes gast, and on beorh astah,\nasette on dune drihten h\u00e6lend:\n\"Loca nu ful wide ofer londbuende.\nIc \u00fee geselle on \u00feines seolfesdom\n685\nfolc and foldan. Foh hider to me\nburh and breotone bold to gewealde,\nrodora rices, gif \u00feu seo riht cyning\nengla and monna, swa \u00f0u \u00e6r myntest.\"\n\u00fea him andswarode ece drihten:\n690\n\"Gewit \u00feu, awyrgda, in \u00fe\u00e6t witescr\u00e6f,\nSatanus seolf; \u00fee is susl weotod\ngearo togegnes, nalles godes rice.\nAh ic \u00fee hate \u00feurh \u00fea hehstan miht\n\u00fe\u00e6t \u00f0u hellwarum hyht ne abeode,\n695\nah \u00feu him secgan miht sorga m\u00e6ste,\n\u00fe\u00e6t \u00f0u gemettes meotod alwihta,\ncyning moncynnes. Cer \u00f0e on b\u00e6cling!\nWite \u00feu eac, awyrgda, hu wid and sid\nhelheo\u00f0o dreorig, and mid hondum amet.\n700\nGrip wi\u00f0 \u00fe\u00e6s grundes; gang \u00feonne swa\no\u00f0\u00f0\u00e6t \u00feu \u00feone ymbhwyrft alne cunne,\nand \u00e6rest amet ufan to grunde,\nand hu sid seo se swarta e\u00f0m.\nWast \u00feu \u00feonne \u00fee geornor \u00fe\u00e6t \u00feu wi\u00f0 god wunne,\n705\nseo\u00f0\u00f0an \u00feu \u00feonne hafast handum ametene\nhu heh and deop hell inneweard seo,\ngrim gr\u00e6fhus. Gong ricene to,\n\u00e6r twa seondon tida agongene,\n\u00fe\u00e6t \u00f0u merced hus ameten h\u00e6bbe.\"\n710\n\u00fea \u00feam werigan wear\u00f0 wracu getenge.\nSatan seolua ran and on susle gefeol,\nearm \u00e6glece. Hwilum mid folmum m\u00e6t\nwean and witu. Hwilum se wonna l\u00e6g\nl\u00e6hte wi\u00f0 \u00fees la\u00fean. Hwilum he licgan geseah\n715\nh\u00e6ftas in hylle. Hwilum hream astag,\n\u00f0onne he on \u00feone atolan eagum gesawun.\nH\u00e6fdon gewunnon godes andsacan\nblac bealowes gast, \u00fe\u00e6t he on botme stod.\n\u00fea him \u00feuhte \u00fe\u00e6t \u00feanon w\u00e6re\n720\nto helleduru hund \u00feusenda\nmila gemearcodes, swa hine se mihtiga het\n\u00fe\u00e6t \u00feurh sinne cr\u00e6ft susle am\u00e6te. \u00f0a he gemunde \u00fe\u00e6t he on grunde stod.\nLocade leas wiht geond \u00fe\u00e6t la\u00f0e scr\u00e6f,\n725\natol mid egum, o\u00f0\u00f0\u00e6t egsan gryre\ndeofla m\u00e6nego \u00feonne up astag.\nWordum in witum ongunnon \u00fea werigan gastas\nreordian and cwe\u00f0an:\n\"La, \u00feus beo nu on yfele! Nold\u00e6s \u00e6r teala!\"","title":"Christ and Satan","type":"page"}