{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a02_01.htm","path":"neu/ascp/a02_01.htm","source_url":"https://sacred-texts.com/neu/ascp/a02_01.htm","text":"Hw\u00e6t! We gefrunan on fyrndagum\ntwelfe under tunglum tireadige h\u00e6le\u00f0,\n\u00feeodnes \u00feegnas. No hira \u00ferym al\u00e6g campr\u00e6denne \u00feonne cumbol hneotan,\n5\nsy\u00f0\u00f0an hie ged\u00e6ldon, swa him dryhten sylf,\nheofona heahcyning, hlyt get\u00e6hte.\n\u00fe\u00e6t w\u00e6ron m\u00e6re men ofer eor\u00f0an,\nfrome folctogan ond fyrdhwate,\nrofe rincas, \u00feonne rond ond hand\n10\non herefelda helm ealgodon,\non meotudwange. W\u00e6s hira Matheus sum,\nse mid Iudeum ongan godspell \u00e6rest\nwordum writan wundorcr\u00e6fte.\n\u00feam halig god hlyt geteode\n15\nut on \u00fe\u00e6t igland \u00fe\u00e6r \u00e6nig \u00fea git\nell\u00feeodigra e\u00f0les ne mihte\nbl\u00e6des brucan. Oft him bonena hand\non herefelda hearde gesceode.\nEal w\u00e6s \u00fe\u00e6t mearcland mor\u00f0re bewunden,\n20\nfeondes facne, folcstede gumena,\nh\u00e6le\u00f0a e\u00f0el. N\u00e6s \u00fe\u00e6r hlafes wist\nwerum on \u00feam wonge, ne w\u00e6teres drync\nto bruconne, ah hie blod ond fel,\nfira fl\u00e6schoman, feorrancumenra,\n25\n\u00f0egon geond \u00fea \u00feeode. Swelc w\u00e6s \u00feeaw hira\n\u00fe\u00e6t hie \u00e6ghwylcne ell\u00f0eodigra\ndydan him to mose mete\u00feearfendum,\n\u00feara \u00fee \u00fe\u00e6t ealand utan sohte.\nSwylc w\u00e6s \u00fe\u00e6s folces freo\u00f0oleas tacen,\n30\nunl\u00e6dra eafo\u00f0, \u00fe\u00e6t hie eagena gesih\u00f0, hettend heorogrimme, heafodgimmas agetton gealgmode gara ordum.\nSy\u00f0\u00f0an him geblendan bitere tosomne,\ndryas \u00feurh dwolcr\u00e6ft, drync unheorne,\n35\nse onwende gewit, wera inge\u00feanc,\nheortan on hre\u00f0re, (hyge w\u00e6s oncyrred),\n\u00fe\u00e6t hie ne murndan \u00e6fter mandreame,\nh\u00e6le\u00fe heorogr\u00e6dige, ac hie hig ond g\u00e6rs\nfor meteleaste me\u00f0e gedrehte.\n40\n\u00fea w\u00e6s Matheus to \u00fe\u00e6re m\u00e6ran byrig\ncumen in \u00fea ceastre. \u00fe\u00e6r w\u00e6s cirm micel\ngeond Mermedonia, manfulra hlo\u00f0,\nfordenera gedr\u00e6g, sy\u00fe\u00fean deofles \u00feegnas\ngeascodon \u00e6\u00f0elinges si\u00f0.\n45\nEodon him \u00fea togenes, garum gehyrsted,\nlungre under linde, (nalas late w\u00e6ron),\neorre \u00e6scberend, to \u00feam orlege.\nHie \u00feam halgan \u00fe\u00e6r handa gebundon\nond f\u00e6stnodon feondes cr\u00e6fte,\n50\nh\u00e6le\u00f0 hellfuse, ond his heafdes segl\nabreoton mid billes ecge. Hw\u00e6\u00f0re he in breostum \u00fea git\nherede in heortan heofonrices weard,\n\u00feeah \u00f0e he atres drync atulne onfenge.\nEadig ond onmod, he mid elne for\u00f0\n55\nwyr\u00f0ode wordum wuldres aldor,\nheofonrices weard, halgan stefne,\nof carcerne. Him w\u00e6s Cristes lof\non fyrh\u00f0locan f\u00e6ste bewunden.\nHe \u00fea wepende weregum tearum\n60\nhis sigedryhten sargan reorde\ngrette, gumena brego, geomran stefne,\nweoruda wilgeofan, ond \u00feus wordum cw\u00e6\u00f0:\n\"Hu me el\u00feeodige inwitwrasne\nsearonet seowa\u00f0! A ic symles w\u00e6s\n65\non wega gehwam willan \u00feines\ngeorn on mode; nu \u00f0urh geoh\u00f0a sceal\nd\u00e6de fremman swa \u00fea dumban neat.\n\u00feu ana canst ealra gehygdo,\nmeotud mancynnes, mod in hre\u00f0re.\n70\nGif \u00fein willa sie, wuldres aldor,\n\u00fe\u00e6t me w\u00e6rlogan w\u00e6pna ecgum,\nsweordum, aswebban, ic beo sona gearu\nto adreoganne \u00fe\u00e6t \u00f0u, drihten min,\nengla eadgifa, e\u00f0elleasum,\n75\nduge\u00f0a d\u00e6dfruma, deman wille.\nForgif me to are, \u00e6lmihtig god,\nleoht on \u00feissum life, \u00fey l\u00e6s ic lungre scyle,\nablended in burgum, \u00e6fter billhete\n\u00feurh hearmcwide heorugr\u00e6digra,\n80\nla\u00f0ra leodscea\u00f0ena, leng \u00ferowian\nedwitspr\u00e6ce. Ic to anum \u00fee,\nmiddangeardes weard, mod sta\u00feolige,\nf\u00e6ste fyrh\u00f0lufan, ond \u00fee, f\u00e6der engla,\nbeorht bl\u00e6dgifa, biddan wille\n85\n\u00f0\u00e6t \u00f0u me ne gescyrige mid scyldhetum,\nwerigum wrohtsmi\u00f0um, on \u00feone wyrrestan,\ndugo\u00f0a demend, dea\u00f0 ofer eor\u00f0an.\"\n\u00e6fter \u00feyssum wordum com wuldres tacen\nhalig of heofenum, swylce hadre segl\n90\nto \u00feam carcerne. \u00fe\u00e6r gecy\u00f0ed wear\u00f0\n\u00fe\u00e6t halig god helpe gefremede,\n\u00f0a wear\u00f0 gehyred heofoncyninges stefn\nwr\u00e6tlic under wolcnum, wordhleo\u00f0res sweg\nm\u00e6res \u00feeodnes. He his magu\u00feegne\n95\nunder hearmlocan h\u00e6lo ond frofre\nbeadurofum abead beorhtan stefne:\n\"Ic \u00fee, Matheus, mine sylle sybbe\nunder swegle. Ne beo \u00f0u on sefan to forht,\nne on mode ne murn. Ic \u00fee mid wunige\n100\nond \u00fee alyse of \u00feyssum leo\u00f0ubendum,\nond ealle \u00fea menigo \u00fee \u00fee mid wunia\u00f0\non nearonedum. \u00fee is neorxnawang,\nbl\u00e6da beorhtost, boldwela f\u00e6grost,\nhama hyhtlicost, halegum mihtum\n105\ntorht ontyned. \u00fe\u00e6r \u00f0u tyres most,\nto widan feore willan brucan.\nGe\u00feola \u00feeoda \u00ferea! Nis seo \u00ferah micel\n\u00fe\u00e6t \u00fee w\u00e6rlogan witebendum, synnige \u00f0urh searocr\u00e6ft, swencan motan.\n110\nIc \u00fee Andreas \u00e6dre onsende\nto hleo ond to hro\u00f0re in \u00feas h\u00e6\u00f0enan burg.\nHe \u00f0e alyse\u00f0 of \u00feyssum leodhete.\nIs to \u00fe\u00e6re tide t\u00e6lmet hwile\nemne mid so\u00f0e seofon ond twentig\n115\nnihtgerimes, \u00fe\u00e6t \u00f0u of nede most,\nsorgum geswenced, sigore gewyr\u00f0od, hweorfan of hen\u00f0um in gehyld godes.\" Gewat him \u00fea se halga helm \u00e6lwihta,\nengla scyppend, to \u00feam uplican\n120\ne\u00f0elrice. He is on riht cyning,\nsta\u00f0olf\u00e6st styrend, in stowa gehwam.\n\u00f0a w\u00e6s Matheus miclum onbryrded\nniwan stefne. Nihthelm toglad,\nlungre leorde. Leoht \u00e6fter com,\n\u00fea \u00fee on carcerne clommum f\u00e6ste\nhleoleasan wic hwile wunedon,\nhwylcne hie to \u00e6te \u00e6rest mihton\n\u00e6fter fyrstmearce feores ber\u00e6dan.\nH\u00e6fdon hie on rune ond on rimcr\u00e6fte\n135\nawriten, w\u00e6lgr\u00e6dige, wera endest\u00e6f, hw\u00e6nne hie to mose mete\u00feearfendum\non \u00fe\u00e6re wer\u00feeode weor\u00f0an sceoldon.\nCirmdon caldheorte, (cor\u00f0or o\u00f0rum getang),\nre\u00f0e r\u00e6sboran. Rihtes ne gimdon,\n140\nmeotudes mildse. Oft hira mod onwod\nunder dimscuan deofles larum,\n\u00feonne hie unl\u00e6dra eafe\u00f0um gelyfdon.\nHie \u00f0a gemetton modes glawne,\nhaligne h\u00e6le, under heolstorlocan\n145\nbidan beadurofne \u00fe\u00e6s him beorht cyning,\nengla ordfruma, unnan wolde.\n\u00f0a w\u00e6s first agan frumr\u00e6denne\n\u00feinggemearces butan \u00ferim nihtum,\nswa hit w\u00e6lwulfas awriten h\u00e6fdon\n150\n\u00fe\u00e6t hie banhringas abrecan \u00feohton,\nlungre tolysan lic ond sawle,\nond \u00feonne tod\u00e6lan dugu\u00f0e ond geogo\u00f0e,\nwerum to wiste ond to wil\u00feege,\nf\u00e6ges fl\u00e6schoman. Feorh ne bemurndan,\n155\ngr\u00e6dige gu\u00f0rincas, hu \u00fe\u00e6s gastes si\u00f0\n\u00e6fter swyltcwale geseted wurde.\nSwa hie symble ymb \u00feritig \u00feing gehedon\nnihtgerimes; w\u00e6s him neod micel\n\u00fe\u00e6t hie tobrugdon blodigum ceaflum\n160\nfira fl\u00e6schoman him to foddor\u00feege.\n\u00fea w\u00e6s gemyndig, se \u00f0e middangeard\ngesta\u00f0elode strangum mihtum,\nhu he in ell\u00feeodigum yrm\u00f0um wunode,\nbelocen leo\u00f0ubendum, \u00fee oft his lufan adreg\n165\nfor Ebreum ond Israhelum;\nswylce he Iudea galdorcr\u00e6ftum\nwi\u00f0stod stranglice. \u00fea sio stefn gewear\u00f0\ngehered of heofenum, \u00fe\u00e6r se halga wer\nin Achaia, Andreas, w\u00e6s,\n170\n(leode l\u00e6rde on lifes weg),\n\u00fea him cirebaldum cininga wuldor,\nmeotud mancynnes, modhord onleac,\nweoruda drihten, ond \u00feus wordum cw\u00e6\u00f0:\n\"\u00f0u scealt feran ond fri\u00f0 l\u00e6dan,\n175\nsi\u00f0e gesecan, \u00fe\u00e6r sylf\u00e6tan\neard weardiga\u00f0, e\u00f0el healda\u00fe\nmor\u00f0orcr\u00e6ftum. Swa is \u00fe\u00e6re menigo \u00feeaw\n\u00fe\u00e6t hie uncu\u00f0ra \u00e6ngum ne willa\u00f0\non \u00feam folcstede feores geunnan\n180\nsy\u00fe\u00fean manfulle on Mermedonia\nonfinda\u00fe feasceaftne. \u00fe\u00e6r sceall feorhgedal,\nearmlic ylda cwealm, \u00e6fter wyr\u00fean.\n\u00f0\u00e6r ic seomian wat \u00feinne sigebro\u00f0or\nmid \u00feam burgwarum bendum f\u00e6stne.\n185\nNu bi\u00f0 fore \u00fereo niht \u00fe\u00e6t he on \u00fe\u00e6re \u00feeode sceal\nfore h\u00e6\u00f0enra handgewinne\n\u00feurh gares gripe gast onsendan,\nellorfusne, butan \u00f0u \u00e6r cyme.\"\n\u00e6dre him Andreas agef andsware:\n190\n\"Hu m\u00e6g ic, dryhten min, ofer deop gelad\nfore gefremman on feorne weg\nswa hr\u00e6dlice, heofona scyppend,\nwuldres waldend, swa \u00f0u worde becwist?\n\u00f0\u00e6t m\u00e6g engel \u00fein ea\u00f0 geferan,\n195\nhalig of heofenum con him holma begang,\nsealte s\u00e6streamas ond swanrade,\nwaro\u00f0faru\u00f0a gewinn ond w\u00e6terbrogan,\nwegas ofer widland. Ne synt me winas cu\u00f0e,\neorlas el\u00feeodige, ne \u00fe\u00e6r \u00e6niges wat\n200\nh\u00e6le\u00f0a gehygdo, ne me herestr\u00e6ta\nofer cald w\u00e6ter cu\u00f0e sindon.\"\nHim \u00f0a ondswarude ece dryhten:\n\"Eala, Andreas, \u00fe\u00e6t \u00f0u a woldest\n\u00fe\u00e6s si\u00f0f\u00e6tes s\u00e6ne weor\u00fean!\n205\nNis \u00fe\u00e6t unea\u00f0e eallwealdan gode\nto gefremmanne on foldwege,\n\u00f0\u00e6t sio ceaster hider on \u00feas cneorisse\nunder swegles gang aseted wyr\u00f0e,\nbreogostol breme, mid \u00feam burgwarum,\n210\ngif hit worde becwi\u00f0 wuldres agend.\nNe meaht \u00f0u \u00fe\u00e6s si\u00f0f\u00e6tes s\u00e6ne weor\u00f0an,\nne on gewitte to wac, gif \u00f0u wel \u00feencest\nwi\u00f0 \u00feinne waldend w\u00e6re gehealdan,\ntreowe tacen. Beo \u00f0u on tid gearu;\n215\nne m\u00e6g \u00fe\u00e6s \u00e6rendes ylding wyr\u00f0an.\n\u00f0u scealt \u00fea fore geferan ond \u00fein feorh beran\nin gramra gripe, \u00f0\u00e6r \u00fee gu\u00f0gewinn\n\u00feurh h\u00e6\u00f0enra hildewoman,\nbeorna beaducr\u00e6ft, geboden wyr\u00f0e\u00f0.\n220\nScealtu \u00e6ninga mid \u00e6rd\u00e6ge,\nemne to morgene, \u00e6t meres ende\nceol gestigan ond on cald w\u00e6ter\nbrecan ofer b\u00e6\u00f0weg. Hafa bletsunge\nofer middangeard mine, \u00fe\u00e6r \u00f0u fere!\"\n225\nGewat him \u00fea se halga healdend ond wealdend,\nupengla fruma, e\u00f0el secan,\nmiddangeardes weard, \u00feone m\u00e6ran ham,\n\u00fe\u00e6r so\u00f0f\u00e6stra sawla moton\n\u00e6fter lices hryre lifes brucan.\n230\n\u00fea w\u00e6s \u00e6rende \u00e6\u00f0elum cempan\naboden in burgum, ne w\u00e6s him blea\u00f0 hyge,\nah he w\u00e6s anr\u00e6d ellenweorces,\nheard ond higerof, nalas hildlata,\ngearo, gu\u00f0e fram, to godes campe.\n235\nGewat him \u00fea on uhtan mid \u00e6rd\u00e6ge\nofer sandhleo\u00f0u to s\u00e6s faru\u00f0e,\n\u00feriste on ge\u00feance, ond his \u00feegnas mid,\ngangan on greote. Garsecg hlynede,\nbeoton brimstreamas. Se beorn w\u00e6s on hyhte,\n240\nsy\u00f0\u00fean he on waru\u00f0e widf\u00e6\u00f0me scip\nmodig gemette. \u00fea com morgentorht\nbeacna beorhtost ofer breomo sneowan,\nhalig of heolstre. Heofoncandel blac\nofer lagoflodas. He \u00f0\u00e6r lidweardas,\n245\n\u00ferymlice \u00fery \u00feegnas gemette,\nmodiglice menn, on merebate\nsittan si\u00f0frome, swylce hie ofer s\u00e6 comon.\n\u00fe\u00e6t w\u00e6s drihten sylf, duge\u00f0a wealdend,\nece \u00e6lmihtig, mid his englum twam.\n250\nW\u00e6ron hie on gescirplan scipferendum,\neorlas onlice eali\u00f0endum,\n\u00feonne hie on flodes f\u00e6\u00f0m ofer feorne weg\non cald w\u00e6ter ceolum laca\u00f0.\nHie \u00f0a gegrette, se \u00f0e on greote stod,\n255\nfus on faro\u00f0e, f\u00e6gn reordade:\n\"Hwanon comon ge ceolum li\u00f0an,\nmacr\u00e6ftige menn, on mere\u00feissan,\nane \u00e6gflotan? Hwanon eagorstream\nofer y\u00f0a gewealc eowic brohte?\"\n260\nHim \u00f0a ondswarode \u00e6lmihti god,\nswa \u00fe\u00e6t ne wiste, se \u00f0e \u00fe\u00e6s wordes bad,\nhw\u00e6t se manna w\u00e6s me\u00f0elhegendra,\n\u00fee he \u00fe\u00e6r on waro\u00f0e wi\u00f0\u00feingode:\n\"We of Marmedonia m\u00e6g\u00f0e syndon\n265\nfeorran geferede. Us mid flode b\u00e6r\non hranrade heahstefn naca,\nsnellic s\u00e6mearh, snude bewunden,\no\u00f0\u00fe\u00e6t we \u00feissa leoda land gesohton,\nw\u00e6re bewrecene, swa us wind fordraf.\"\n270\nHim \u00fea Andreas ea\u00f0mod oncw\u00e6\u00f0:\n\"Wolde ic \u00fee biddan, \u00feeh ic \u00fee beaga lyt,\nsincweor\u00f0unga, syllan meahte,\n\u00fe\u00e6t \u00f0u us gebrohte brante ceole,\nhea hornscipe, ofer hw\u00e6les e\u00f0el\n275\non \u00fe\u00e6re m\u00e6g\u00f0e. Bi\u00f0 \u00f0e meor\u00f0 wi\u00f0 god,\n\u00fe\u00e6t \u00f0u us on lade li\u00f0e weor\u00f0e.\"\nEft him ondswarode \u00e6\u00f0elinga helm\nof y\u00f0lide, engla scippend:\n\"Ne magon \u00fe\u00e6r gewunian widferende,\n280\nne \u00fe\u00e6r el\u00feeodige eardes bruca\u00f0,\nah in \u00fe\u00e6re ceastre cwealm \u00ferowia\u00f0,\n\u00fea \u00f0e feorran \u00feyder feorh gel\u00e6da\u00fe,\nond \u00feu wilnast nu ofer widne mere\n\u00fe\u00e6t \u00f0u on \u00fea f\u00e6g\u00f0e \u00feine feore spilde.\"\n285\nHim \u00fea Andreas agef ondsware:\n\"Usic lust hwete\u00f0 on \u00fea leodmearce,\nmycel modes hiht, to \u00fe\u00e6re m\u00e6ran byrig,\n\u00feeoden leofesta, gif \u00f0u us \u00feine wilt\non merefaro\u00f0e miltse gecy\u00f0an.\"\n290\nHim ondswarode engla \u00feeoden,\nneregend fira, of nacan stefne:\n\"We \u00f0e estlice mid us willa\u00f0\nferigan freolice ofer fisces b\u00e6\u00f0\nefne to \u00feam lande \u00fe\u00e6r \u00fee lust myne\u00f0\n295\nto gesecanne, sy\u00f0\u00f0an ge eowre\ngafulr\u00e6denne agifen habba\u00f0,\nsceattas gescrifene, swa eow scipweardas,\naras ofer y\u00f0bord, unnan willa\u00f0.\"\nHim \u00fea ofstlice Andreas wi\u00f0,\n300\nwine\u00feearfende, wordum m\u00e6lde:\n\"N\u00e6bbe ic f\u00e6ted gold ne feohgestreon,\nwelan ne wiste ne wira gespann,\nlandes ne locenra beaga, \u00fe\u00e6t ic \u00fee m\u00e6ge lust ahwettan,\nwillan in worulde, swa \u00f0u worde becwist.\"\n305\nHim \u00fea beorna breogo, \u00fe\u00e6r he on bolcan s\u00e6t,\nofer waro\u00f0a geweorp wi\u00f0\u00feingode:\n\"Hu gewear\u00f0 \u00fee \u00fe\u00e6s, wine leofesta,\n\u00f0\u00e6t \u00f0u s\u00e6beorgas secan woldes,\nmerestreama gemet, ma\u00f0mum bed\u00e6led,\n310\nofer cald cleofu ceoles neosan?\nNafast \u00fee to frofre on faro\u00f0str\u00e6te\nhlafes wiste ne hlutterne\ndrync to dugo\u00f0e. Is se drohta\u00f0 strang\n\u00feam \u00fee lagolade lange cunna\u00fe.\"\n315\n\u00f0a him Andreas \u00f0urh ondsware,\nwis on gewitte, wordhord onleac:\n\"Ne gedafena\u00f0 \u00fee, nu \u00fee dryhten geaf\nwelan ond wiste ond woruldspede,\n\u00f0\u00e6t \u00f0u ondsware mid oferhygdum,\n320\nsece sarcwide. Selre bi\u00f0 \u00e6ghwam\n\u00fe\u00e6t he ea\u00f0medum ellorfusne\noncnawe cu\u00f0lice, swa \u00fe\u00e6t Crist bebead,\n\u00feeoden \u00ferymf\u00e6st. We his \u00feegnas synd\ngecoren to cempum. He is cyning on riht,\n325\nwealdend ond wyrhta wuldor\u00ferymmes,\nan ece god eallra gesceafta,\nswa he ealle befeh\u00f0 anes cr\u00e6fte,\nhefon ond eor\u00f0an, halgum mihtum,\nsigora selost. He \u00f0\u00e6t sylfa cw\u00e6\u00f0,\n330\nf\u00e6der folca gehw\u00e6s, ond us feran het\ngeond ginne grund gasta streonan:\n'Fara\u00f0 nu geond ealle eor\u00f0an sceatas\nemne swa wide swa w\u00e6ter bebuge\u00f0,\no\u00f0\u00f0e stedewangas str\u00e6te gelicga\u00fe.\n335\nBodia\u00f0 \u00e6fter burgum beorhtne geleafan\nofer foldan f\u00e6\u00f0m. Ic eow freo\u00f0o healde.\nNe \u00f0urfan ge on \u00fea fore fr\u00e6twe l\u00e6dan,\ngold ne seolfor. Ic eow goda gehw\u00e6s\non eowerne agenne dom est ahwette.'\n340\nNu \u00f0u seolfa miht si\u00f0 userne\ngehyran hyge\u00feancol. Ic sceal hra\u00f0e cunnan\nhw\u00e6t \u00f0u us to dugu\u00f0um gedon wille.\"\nHim \u00fea ondswarode ece dryhten:\n\"Gif ge syndon \u00feegnas \u00fe\u00e6s \u00fee \u00ferym ahof\n345\nofer middangeard, swa ge me secga\u00fe,\nond ge geheoldon \u00fe\u00e6t eow se halga bead,\n\u00feonne ic eow mid gefean ferian wille\nofer brimstreamas, swa ge benan sint.\"\n\u00fea in ceol stigon collenfyrh\u00f0e,\n350\nellenrofe, \u00e6ghwylcum wear\u00f0\non merefaro\u00f0e mod geblissod.\n\u00f0a ofer y\u00f0a geswing Andreas ongann\nmereli\u00f0endum miltsa biddan\nwuldres aldor, ond \u00feus wordum cw\u00e6\u00f0:\n355\n\"Forgife \u00fee dryhten domweor\u00f0unga,\nwillan in worulde ond in wuldre bl\u00e6d,\nmeotud manncynnes, swa \u00f0u me hafast\non \u00feyssum si\u00f0f\u00e6te sybbe gecy\u00f0ed!\"\nGes\u00e6t him \u00fea se halga helmwearde neah,\n360\n\u00e6\u00f0ele be \u00e6\u00f0elum. \u00e6fre ic ne hyrde\n\u00feon cymlicor ceol gehladenne\nheahgestreonum. H\u00e6le\u00f0 in s\u00e6ton,\n\u00feeodnas \u00ferymfulle, \u00feegnas wlitige.\n\u00f0a reordode rice \u00feeoden,\n365\nece \u00e6lmihtig, heht his engel gan,\nm\u00e6rne magu\u00feegn, ond mete syllan,\nfrefran feasceafte ofer flodes wylm,\n\u00fe\u00e6t hie \u00fee ea\u00f0 mihton ofer y\u00f0a ge\u00fering\ndrohta\u00fe adreogan. \u00fea gedrefed wear\u00f0,\nw\u00e6do gew\u00e6tte. W\u00e6teregsa stod\n\u00fereata \u00fery\u00f0um. \u00feegnas wurdon\nacolmode. \u00e6nig ne wende\n\u00fe\u00e6t he lifgende land begete,\n\u00feara \u00fee mid Andreas on eagorstream\n380\nceol gesohte. N\u00e6s him cu\u00f0 \u00fea gyt\nhwa \u00feam s\u00e6flotan sund wisode.\nHim \u00fea se halga on holmwege\nofer argeblond, Andreas \u00fea git,\n\u00feegn \u00feeodenhold, \u00feanc ges\u00e6gde,\n385\nricum r\u00e6sboran, \u00fea he gereordod w\u00e6s:\n\"\u00f0e \u00feissa sw\u00e6senda so\u00f0f\u00e6st meotud,\nlifes leohtfruma, lean forgilde,\nweoruda waldend, ond \u00fee wist gife,\nheofonlicne hlaf, swa \u00f0u hyldo wi\u00f0 me\n390\nofer firigendstream freode gecy\u00f0dest!\nNu synt ge\u00fereade \u00feegnas mine,\ngeonge gu\u00f0rincas. Garsecg hlymme\u00f0, geofon geotende. Grund is onhrered,\ndeope gedrefed, dugu\u00f0 is geswenced,\n395\nmodigra m\u00e6gen myclum gebysgod.\"\nHim of helman oncw\u00e6\u00f0 h\u00e6le\u00f0a scyppend:\n\"L\u00e6t nu geferian flotan userne,\nlid to lande ofer laguf\u00e6sten,\nond \u00feonne gebidan beornas \u00feine,\n400\naras on earde, hw\u00e6nne \u00f0u eft cyme.\"\nEdre him \u00fea eorlas agefan ondsware,\n\u00feegnas \u00ferohthearde, \u00feafigan ne woldon\n\u00f0\u00e6t hie forleton \u00e6t lides stefnan\nleofne lareow ond him land curon:\n405\n\"Hwider hweorfa\u00f0 we hlafordlease,\ngeomormode, gode orfeorme,\nsynnum wunde, gif we swica\u00f0 \u00fee?\nWe bio\u00f0 la\u00f0e on landa gehwam,\nfolcum fraco\u00f0e, \u00feonne fira bearn,\n410\nellenrofe, \u00e6ht besitta\u00fe,\nhwylc hira selost symle gel\u00e6ste\nhlaforde \u00e6t hilde, \u00feonne hand ond rond\non beaduwange billum forgrunden\n\u00e6t ni\u00f0plegan nearu \u00ferowedon.\"\n415\n\u00fea reordade rice \u00feeoden,\nw\u00e6rf\u00e6st cining, word stunde ahof:\n\"Gif \u00f0u \u00feegn sie \u00ferymsittendes,\nwuldorcyninges, swa \u00f0u worde becwist,\nrece \u00fea gerynu, hu he reordberend\n420\nl\u00e6rde under lyfte. Lang is \u00fees si\u00f0f\u00e6t\nofer fealuwne flod; frefra \u00feine\nm\u00e6cgas on mode. Mycel is nu gena\nlad ofer lagustream, land swi\u00f0e feorr\nto gesecanne. Sund is geblonden,\n425\ngrund wi\u00f0 greote. God ea\u00f0e m\u00e6g\nhea\u00f0oli\u00f0endum helpe gefremman.\"\nOngan \u00fea gleawlice gingran sine,\nwuldorspedige weras wordum trymman:\n\"Ge \u00fe\u00e6t gehogodon, \u00fea ge on holm stigon,\n430\n\u00fe\u00e6t ge on fara folc feorh gel\u00e6ddon,\nond for dryhtnes lufan dea\u00f0 \u00ferowodon,\non \u00e6lmyrcna e\u00f0elrice\nsawle gesealdon. Ic \u00fe\u00e6t sylfa wat,\n\u00fe\u00e6t us gescylde\u00f0 scyppend engla,\n435\nweoruda dryhten. W\u00e6teregesa sceal,\nge\u00f0yd ond ge\u00f0reatod \u00feurh \u00fery\u00f0cining,\nlagu lacende, li\u00f0ra wyr\u00f0an.\nSwa ges\u00e6lde iu, \u00fe\u00e6t we on s\u00e6bate\nofer waru\u00f0gewinn w\u00e6da cunnedan,\n440\nfaro\u00f0ridende. Frecne \u00feuhton\negle ealada. Eagorstreamas\nbeoton bordst\u00e6\u00f0u, brim oft oncw\u00e6\u00f0,\ny\u00f0 o\u00f0erre. Hwilum upp astod\nof brimes bosme on bates f\u00e6\u00f0m\n445\negesa ofer y\u00f0lid. \u00e6lmihtig \u00fe\u00e6r,\nmeotud mancynnes, on mere\u00feyssan\nbeorht basnode. Beornas wurdon\nforhte on mode, fri\u00f0es wilnedon,\nmiltsa to m\u00e6rum. \u00fea seo menigo ongan\n450\nclypian on ceole, cyning sona aras,\nengla eadgifa, y\u00f0um stilde,\nw\u00e6teres w\u00e6lmum. Windas \u00fereade,\ns\u00e6 sessade, smylte wurdon\nmerestreama gemeotu. \u00f0a ure mod ahloh\n455\nsy\u00f0\u00f0an we gesegon under swegles gang\nwindas ond w\u00e6gas ond w\u00e6terbrogan\nforhte gewordne for frean egesan.\nFor\u00fean ic eow to so\u00f0e secgan wille,\n\u00fe\u00e6t n\u00e6fre forl\u00e6te\u00f0 lifgende god\n460\neorl on eor\u00f0an, gif his ellen deah.\"\nSwa hleo\u00f0rode halig cempa,\n\u00f0eawum ge\u00feancul. \u00feegnas l\u00e6rde\neadig oreta, eorlas trymede,\no\u00f0\u00f0\u00e6t hie semninga sl\u00e6p ofereode,\nwis on gewitte, wordlocan onspeonn:\n\"N\u00e6fre ic s\u00e6lidan selran mette,\nmacr\u00e6ftigran, \u00fe\u00e6s \u00f0e me \u00feynce\u00f0,\nrowend rofran, r\u00e6dsnotterran,\nwordes wisran. Ic wille \u00fee,\n475\neorl unforcu\u00f0, anre nu gena\nbene biddan, \u00feeah ic \u00fee beaga lyt,\nsincweor\u00f0unga, syllan mihte,\nf\u00e6tedsinces. Wolde ic freondscipe,\n\u00feeoden \u00ferymf\u00e6st, \u00feinne, gif ic mehte,\n480\nbegitan godne. \u00fe\u00e6s \u00f0u gife hleotest,\nhaligne hyht on heofon\u00ferymme,\ngif \u00f0u lidwerigum larna \u00feinra este wyr\u00f0est. Wolde ic anes to \u00f0e,\ncynerof h\u00e6le\u00f0, cr\u00e6ftes neosan,\n485\n\u00f0\u00e6t \u00f0u me get\u00e6hte, nu \u00fee tir cyning\nond miht forgef, manna scyppend,\nhu \u00f0u w\u00e6gflotan w\u00e6re bestemdon,\ns\u00e6hengeste, sund wisige.\nIc w\u00e6s on gife\u00f0e iu ond nu \u00fea\n490\nsyxtyne si\u00f0um on s\u00e6bate,\nmere hrerendum mundum freorig,\neagorstreamas, (is \u00f0ys ane ma),\nswa ic \u00e6fre ne geseah \u00e6nigne mann,\n\u00fery\u00f0bearn h\u00e6le\u00f0a, \u00fee gelicne,\n495\nsteoran ofer st\u00e6fnan. Streamwelm hwile\u00f0, beate\u00fe brimst\u00e6\u00f0o. Is \u00fees bat ful scrid,\nf\u00e6re\u00f0 famigheals, fugole gelicost\nglide\u00f0 on geofone. Ic georne wat\n\u00fe\u00e6t ic \u00e6fre ne geseah ofer y\u00f0lade\n500\non s\u00e6leodan syllicran cr\u00e6ft.\nIs \u00feon geliccost swa he on landsceare\nstille stande, \u00fe\u00e6r hine storm ne m\u00e6g,\nwind awecgan, ne w\u00e6terflodas\nbrecan brondst\u00e6fne, hw\u00e6\u00f0ere on brim snowe\u00f0\n505\nsnel under segle. \u00f0u eart seolfa geong,\nwigendra hleo, nalas wintrum frod,\nhafast \u00fee on fyrh\u00f0e, faro\u00f0lacende,\neorles ondsware. \u00e6ghwylces canst\nworda for worulde wislic andgit.\"\n510\nHim ondswarode ece dryhten:\n\"Oft \u00fe\u00e6t ges\u00e6le\u00f0, \u00fe\u00e6t we on s\u00e6lade,\nscipum under scealcum, \u00feonne sceor cyme\u00f0,\nbreca\u00f0 ofer b\u00e6\u00f0weg, brimhengestum.\nHwilum us on y\u00f0um earfo\u00f0lice\n515\nges\u00e6le\u00f0 on s\u00e6we, \u00feeh we si\u00f0 nesan,\nfrecne geferan. Flodwylm ne m\u00e6g\nmanna \u00e6nigne ofer meotudes est\nlungre gelettan: ah him lifes geweald,\nse \u00f0e brimu binde\u00f0, brune y\u00f0a\n520\n\u00f0y\u00f0 ond \u00fereata\u00f0. He \u00feeodum sceal\nracian mid rihte, se \u00f0e rodor ahof\nond gef\u00e6stnode folmum sinum,\nworhte ond wre\u00f0ede, wuldras fylde\nbeorhtne boldwelan, swa gebledsod wear\u00f0\n525\nengla e\u00f0el \u00feurh his anes miht.\nFor\u00fean is gesyne, so\u00f0 orgete,\ncu\u00f0 oncnawen, \u00fe\u00e6t \u00f0u cyninges eart\n\u00feegen ge\u00feungen, \u00ferymsittendes,\nfor\u00fean \u00fee sona s\u00e6holm oncneow,\n\"Wes \u00f0u gebledsod, brego mancynnes,\ndryhten h\u00e6lend! A \u00fein dom lyfa\u00f0!\nGe neh ge feor is \u00fein nama halig,\nwuldre gewlitegad ofer wer\u00feeoda,\nmiltsum gem\u00e6rsod. N\u00e6nig manna is\n545\nunder heofonhwealfe, h\u00e6le\u00f0a cynnes,\n\u00f0\u00e6tte areccan m\u00e6g o\u00f0\u00f0e rim wite\nhu \u00f0rymlice, \u00feeoda baldor,\ngasta geocend, \u00feine gife d\u00e6lest.\nHuru is gesyne, sawla nergend,\n550\n\u00fe\u00e6t \u00f0u \u00feissum hysse hold gewurde\nond hine geongne geofum wyr\u00f0odest,\nwis on gewitte ond wordcwidum.\nIc \u00e6t efenealdum \u00e6fre ne mette\non modsefan maran snyttro.\"\n555\nHim \u00f0a of ceole oncw\u00e6\u00f0 cyninga wuldor,\nfr\u00e6gn fromlice fruma ond ende:\n\"Saga, \u00feances gleaw \u00feegn, gif \u00f0u cunne,\nhu \u00f0\u00e6t gewurde be werum tweonum,\n\u00fe\u00e6t \u00f0a arleasan inwid\u00feancum,\n560\nIudea cynn wi\u00f0 godes bearne\nahof hearmcwide. H\u00e6le\u00f0 uns\u00e6lige\nno \u00f0\u00e6r gelyfdon in hira liffruman,\ngrome gealgmode, \u00fe\u00e6t he god w\u00e6re,\n\u00feeah \u00f0e he wundra feala weorodum gecy\u00f0de,\n565\nsweotulra ond gesynra. Synnige ne mihton\noncnawan \u00fe\u00e6t cynebearn, se \u00f0e acenned wear\u00f0\nto hleo ond to hro\u00f0re h\u00e6le\u00f0a cynne,\neallum eor\u00f0warum. \u00e6\u00feelinge weox\nword ond wisdom, ah he \u00feara wundra a,\n570\ndomagende, d\u00e6l n\u00e6nigne\nfr\u00e6tre \u00feeode beforan cy\u00f0de.\"\nHim \u00f0a Andreas agef andsware:\n\"Hu mihte \u00fe\u00e6t gewyr\u00f0an in wer\u00feeode,\n\u00fe\u00e6t \u00f0u ne gehyrde h\u00e6lendes miht,\n575\ngumena leofost, hu he his gif cy\u00f0de\ngeond woruld wide, wealdendes bearn?\nSealde he dumbum gesprec, deafe gehyrdon,\nhealtum ond hreofum hyge blissode,\n\u00f0a \u00fee limseoce lange w\u00e6ron,\n580\nwerige, wanhale, witum gebundene,\n\u00e6fter burhstedum blinde gesegon.\nSwa he on grundw\u00e6ge gumena cynnes\nmanige missenlice men of dea\u00f0e\nworde awehte. Swylce he eac wundra feala\n585\ncynerof cy\u00f0de \u00feurh his cr\u00e6ftes miht.\nHe gehalgode for herem\u00e6gene\nwin of w\u00e6tere ond wendan het,\nbeornum to blisse, on \u00fea beteran gecynd.\nSwylce he afedde of fixum twam\n590\nond of fif hlafum fira cynnes\nfif \u00f0usendo. Fe\u00f0an s\u00e6ton, reonigmode, reste gefegon,\nwerige \u00e6fter wa\u00f0e, wiste \u00feegon,\nmenn on moldan, swa him gemedost w\u00e6s.\n595\nNu \u00f0u miht gehyran, hyse leofesta,\nhu us wuldres weard wordum ond d\u00e6dum\nlufode in life, ond \u00feurh lare speon\nto \u00feam f\u00e6geran gefean, \u00fe\u00e6r freo moton,\neadige mid englum, eard weardigan,\n600\n\u00fea \u00f0e \u00e6fter dea\u00f0e dryhten seca\u00f0.\"\n\u00f0a gen weges weard wordhord onleac,\nbeorn ofer bolcan, beald reordade:\n\"Miht \u00f0u me gesecgan, \u00fe\u00e6t ic so\u00f0 wite,\nhw\u00e6\u00f0er wealdend \u00fein wundor on eor\u00f0an,\n605\n\u00fea he gefremede nalas feam si\u00f0um,\nfolcum to frofre beforan cy\u00f0de,\n\u00fe\u00e6r bisceopas ond boceras\nond ealdormenn \u00e6ht bes\u00e6ton,\nm\u00e6\u00f0elh\u00e6gende? Me \u00fe\u00e6t \u00feince\u00f0,\n610\n\u00f0\u00e6t hie for \u00e6fstum inwit syredon\n\u00feurh deopne gedwolan. Deofles larum\nh\u00e6le\u00f0 hynfuse hyrdon to georne,\nwra\u00f0um w\u00e6rlogan. Hie seo wyrd beswac,\nforleolc ond forl\u00e6rde. Nu hie lungre sceolon,\n615\nwerige mid werigum, wr\u00e6ce \u00ferowian,\nbiterne bryne on banan f\u00e6\u00f0me.\"\nHim \u00f0a Andreas agef ondsware:\n\"Secge ic \u00f0e to so\u00f0e \u00f0\u00e6t he swi\u00f0e oft\nbeforan fremede folces r\u00e6swum\n620\nwundor \u00e6fter wundre on wera gesieh\u00f0e,\nswylce deogollice dryhten gumena\nfolcr\u00e6d fremede, swa he to fri\u00f0e hogode.\"\nHim ondswarode \u00e6\u00f0elinga helm:\n\"Miht \u00f0u, wis h\u00e6le\u00f0, wordum gesecgan,\n625\nmaga mode rof, m\u00e6gen \u00fea he cy\u00f0de,\ndeormod on digle, \u00f0a mid dryhten oft,\nrodera r\u00e6dend, rune bes\u00e6ton?\"\nHim \u00fea Andreas ondsware agef:\n\"Hw\u00e6t frinest \u00f0u me, frea leofesta,\n630\nwordum wr\u00e6tlicum, ond \u00fee wyrda gehw\u00e6re\n\u00feurh snyttra cr\u00e6ft so\u00f0 oncnawest?\"\n\u00f0a git him w\u00e6ges weard wi\u00f0\u00feingode: \"Ne frine ic \u00f0e for t\u00e6le ne \u00f0urh teoncwide\non hranrade, ac min hige blissa\u00f0,\n635\nwynnum wrida\u00f0, \u00feurh \u00feine wordl\u00e6\u00f0e,\n\u00e6\u00f0elum ecne. Ne eom ic ana \u00f0\u00e6t,\nac manna gehwam mod bi\u00f0 on hyhte,\nfyrh\u00f0 afrefred, \u00feam \u00fee feor o\u00f0\u00f0e neah\non mode geman hu se maga fremede,\n640\ngodbearn on grundum. Gastas hweorfon,\nsohton si\u00f0frome swegles dreamas,\nengla e\u00f0el \u00feurh \u00fea \u00e6\u00f0elan miht.\"\nEdre him Andreas agef ondsware:\n\"Nu ic on \u00fee sylfum so\u00f0 oncnawe,\n645\nwisdomes gewit, wundorcr\u00e6fte\nsigesped geseald, (snyttrum blowe\u00f0,\nbeorhtre blisse, breost innanweard),\nnu ic \u00fee sylfum secgan wille\noor ond ende, swa ic \u00fe\u00e6s \u00e6\u00f0elinges\n650\nword ond wisdom on wera gemote\n\u00feurh his sylfes mu\u00f0 symle gehyrde.\nOft gesamnodon side herigeas,\nfolc unm\u00e6te, to frean dome,\n\u00fe\u00e6r hie hyrcnodon haliges lare.\n655\n\u00f0onne eft gewat \u00e6\u00f0elinga helm,\nbeorht bl\u00e6dgifa, in bold o\u00f0er,\n\u00f0\u00e6r him togenes, god herigende,\nto \u00f0am me\u00f0elstede manige comon,\nsnottre seler\u00e6dend. Symble gefegon,\n660\nbeornas bli\u00f0heorte, burhweardes cyme.\nSwa ges\u00e6lde iu \u00fe\u00e6t se sigedema\nferde, frea mihtig. N\u00e6s \u00fe\u00e6r folces ma\non si\u00f0fate, sinra leoda,\nnemne ellefne orettm\u00e6cgas,\n665\ngeteled tireadige. He w\u00e6s twelfta sylf.\n\u00fea we becomon to \u00feam cynestole,\n\u00fe\u00e6r getimbred w\u00e6s tempel dryhtnes,\nheah ond horngeap, h\u00e6le\u00f0um gefrege,\nwuldre gewlitegod. Huscworde ongan\n670\n\u00feurh inwit\u00f0anc ealdorsacerd\nherme hyspan, hordlocan onspeon,\nwroht webbade. He on gewitte oncneow\n\u00fe\u00e6t we so\u00f0f\u00e6stes swa\u00f0e folgodon,\nl\u00e6ston larcwide. He lungre ahof\neadiges orhlytte \u00e6\u00f0eling cy\u00f0a\u00f0,\nsecga\u00f0 so\u00f0lice \u00fe\u00e6t mid suna meotudes\ndrohtigen d\u00e6ghw\u00e6mlice. \u00fe\u00e6t is dugu\u00f0um cu\u00f0\nhwanon \u00feam ordfruman \u00e6\u00f0elu onwocon.\nHe w\u00e6s afeded on \u00feysse folcsceare,\n685\ncildgeong acenned mid his cneomagum.\n\u00feus syndon haten hamsittende,\nf\u00e6der ond modur, \u00fe\u00e6s we gefr\u00e6gen habba\u00f0\n\u00feurh modgemynd, Maria ond Ioseph.\nSyndon him on \u00e6\u00f0elum o\u00f0ere twegen\n690\nbeornas geborene, bro\u00f0orsybbum,\nsuna Iosephes, Simon ond Iacob.'\nSwa hleo\u00f0rodon h\u00e6le\u00f0a r\u00e6swan,\ndugo\u00f0 domgeorne, dyrnan \u00feohton\nmeotudes mihte. Man eft gehwearf,\n695\nyfel endeleas, \u00fe\u00e6r hit \u00e6r aras.\n\u00fea se \u00feeoden gewat \u00feegna heape\nfram \u00feam me\u00f0elstede mihtum geswi\u00f0ed,\nduge\u00f0a dryhten, secan digol land.\nHe \u00feurh wundra feala on \u00feam westenne\n700\ncr\u00e6fta gecy\u00f0de \u00fe\u00e6t he w\u00e6s cyning on riht\nofer middangeard, m\u00e6gene geswi\u00f0ed,\nwaldend ond wyrhta wuldor\u00ferymmes,\nan ece god eallra gesceafta.\nSwylce he o\u00f0erra unrim cy\u00f0de\n705\nwundorworca on wera gesyh\u00f0e.\nSy\u00fe\u00fean eft gewat o\u00f0re si\u00f0e\ngetrume mycle, \u00fe\u00e6t he in temple gestod,\nwuldres aldor. Wordhleo\u00f0or astag\ngeond heahr\u00e6ced. Haliges lare\n710\nsynnige ne swulgon, \u00feeah he so\u00f0ra swa feala\ntacna gecy\u00f0de, \u00fe\u00e6r hie to segon.\nSwylce he wr\u00e6tlice wundor agr\u00e6fene,\nanlicnesse engla sinra\ngeseh, sigora frea, on seles wage,\n715\non twa healfe torhte gefr\u00e6twed,\nwlitige geworhte. He worde cw\u00e6\u00f0:\n'\u00f0is is anlicnes engelcynna\n\u00fe\u00e6s bremestan \u00fee mid \u00feam burgwarum\nin \u00fe\u00e6re ceastre is. Cheruphim et Seraphim\n720\n\u00fea on swegeldreamum syndon nemned.\nFore onsyne ecan dryhtnes\nstanda\u00f0 sti\u00f0fer\u00f0e, stefnum heriga\u00f0,\nhalgum hleo\u00f0rum, heofoncyninges \u00ferym,\nmeotudes mundbyrd. Her amearcod is\n725\nhaligra hiw, \u00feurh handm\u00e6gen\nawriten on wealle wuldres \u00feegnas.'\n\u00fea gen worde cw\u00e6\u00f0 weoruda dryhten,\nheofonhalig gast, fore \u00feam herem\u00e6gene:\n'Nu ic bebeode beacen \u00e6tywan,\n730\nwundor geweor\u00f0an on wera gemange,\n\u00f0\u00e6t \u00feeos onlicnes eor\u00f0an sece,\nwlitig of wage, ond word sprece,\nsecge so\u00f0cwidum, (\u00fey sceolon gelyfan\neorlas on cy\u00f0\u00f0e), hw\u00e6t min \u00e6\u00f0elo sien.'\n735\nNe dorste \u00fea forhylman h\u00e6lendes bebod\nwundor fore weorodum, ac of wealle ahleop,\nfrod fyrngeweorc, \u00fe\u00e6t he on foldan stod,\nstan fram stane. Stefn \u00e6fter cwom,\nhlud \u00feurh heardne, hleo\u00f0or dynede,\nsearowum beswicene, o\u00f0\u00f0e sel nyton,\nmode gemyrde. Ge mon ciga\u00f0\ngodes ece bearn, \u00feone \u00fee grund ond sund,\nheofon ond eor\u00f0an ond hreo w\u00e6gas,\nsalte s\u00e6streamas ond swegl uppe\n750\namearcode mundum sinum.\n\u00feis is se ilca ealwalda god\n\u00f0one on fyrndagum f\u00e6deras cu\u00f0on.\nHe Abrahame ond Isace\nond Iocobe gife bryttode,\n755\nwelum weor\u00f0ode, wordum s\u00e6gde\n\u00e6rest Habrahame \u00e6\u00f0eles ge\u00feingu,\n\u00fe\u00e6t of his cynne cenned sceolde\nweor\u00f0an wuldres god. Is seo wyrd mid eow\nopen, orgete, magan eagum nu\n\u00fe\u00e6t hit drycr\u00e6ftum gedon w\u00e6re,\nscingelacum, \u00fe\u00e6t se scyna stan\nm\u00e6lde for mannum. Man wridode\ngeond beorna breost, brandhata ni\u00f0\nweoll on gewitte, weorm bl\u00e6dum fag,\n770\nattor \u00e6lf\u00e6le. \u00fe\u00e6r orcnawe wear\u00f0\n\u00feurh teoncwide tweogende mod,\nm\u00e6cga misgehygd mor\u00f0re bewunden.\n\u00f0a se \u00feeoden bebead \u00fery\u00f0weorc faran,\nstan on str\u00e6te of stedewange,\n775\nond for\u00f0 gan foldweg tredan,\ngrene grundas, godes \u00e6rendu\nlarum l\u00e6dan on \u00fea leodmearce\nto Channaneum, cyninges worde\nbeodan Habrahame mid his eaforum tw\u00e6m\n780\nof eor\u00f0scr\u00e6fe \u00e6rest fremman,\nl\u00e6tan landreste, leo\u00f0o gadrigean,\ngaste onfon ond geogo\u00f0hade,\nedniwinga andweard cuman,\nfrode fyrnweotan, folce gecy\u00f0an,\n785\nhwylcne hie god mihtum ongiten h\u00e6fdon.\nGewat he \u00fea feran, swa him frea mihtig,\nscyppend wera, gescrifen h\u00e6fde,\nofer mearcpa\u00f0u, \u00fe\u00e6t he on Mambre becom\nbeorhte blican, swa him bebead meotud,\n790\n\u00fe\u00e6r \u00fea lichoman lange \u00ferage,\nheahf\u00e6dera hra, beheled w\u00e6ron.\nHet \u00fea ofstlice up astandan\nHabraham ond Isaac, \u00e6\u00f0eling \u00feriddan\nIacob of greote to godes ge\u00feinge,\n795\nsneome of sl\u00e6pe \u00fe\u00e6m f\u00e6stan. Het hie to \u00feam si\u00f0e gyrwan,\nfaran to frean dome. Sceoldon hie \u00feam folce gecy\u00f0an\nhwa \u00e6t frumsceafte fur\u00f0um teode\neor\u00f0an eallgrene ond upheofon,\nhw\u00e6r se wealdend w\u00e6re \u00fee \u00fe\u00e6t weorc sta\u00f0olade.\n800\nNe dorston \u00fea gelettan leng owihte\nwuldorcyninges word. Geweotan \u00f0a \u00f0a witigan \u00fery\nmodige mearcland tredan. Forl\u00e6tan moldern wunigean\nopen eor\u00f0scr\u00e6fu, woldon hie \u00e6dre gecy\u00f0an\nfrumweorca f\u00e6der. \u00fea \u00fe\u00e6t folc gewear\u00f0\n805\negesan geaclod, \u00fe\u00e6r \u00fea \u00e6\u00f0elingas\nwordum weor\u00f0odon wuldres aldor.\nHie \u00f0a ricene het rices hyrde\nto eadwelan o\u00fere si\u00f0e\nsecan mid sybbe swegles dreamas,\n810\nond \u00fe\u00e6s to widan feore willum neotan.\nNu \u00f0u miht gehyran, hyse leofesta,\nhu he wundra worn wordum cy\u00f0de,\nswa \u00feeah ne gelyfdon larum sinum\nmodblinde menn. Ic wat manig nu gyt\n815\nmycel m\u00e6re spell \u00f0e se maga fremede,\nrodera r\u00e6dend, \u00f0a \u00f0u ar\u00e6fnan ne miht,\nhre\u00f0re behabban, hyge\u00feances gleaw.\"\n\u00feus Andreas ondlangne d\u00e6g\nherede hleo\u00f0orcwidum haliges lare,\n820\no\u00f0\u00f0\u00e6t hine semninga sl\u00e6p ofereode\non hronrade heofoncyninge neh.\n\u00f0a gel\u00e6dan het lifes brytta\nofer y\u00f0a ge\u00fer\u00e6c englas sine,\nf\u00e6\u00f0mum ferigean on f\u00e6der w\u00e6re\n825\nleofne mid lissum ofer laguf\u00e6sten,\no\u00f0\u00f0\u00e6t s\u00e6werige sl\u00e6p ofereode.\n\u00feurh lyftgelac on land becwom\nto \u00fe\u00e6re ceastre \u00fee him cining engla\n\u00f0a \u00fea aras si\u00f0igean,\n830\neadige on upweg, e\u00f0les neosan.\nLeton \u00feone halgan be herestr\u00e6te\nswefan on sybbe under swegles hleo,\nbli\u00f0ne bidan burhwealle neh,\nhis ni\u00f0hetum, nihtlangne fyrst,\nfore burggeatum. Beorgas steape,\nhleo\u00f0u hlifodon, ymbe harne stan\ntigelfagan trafu, torras stodon,\nwindige weallas. \u00fea se wisa oncneow\n\u00fe\u00e6t he Marmedonia m\u00e6g\u00f0e h\u00e6fde\n845\nsi\u00f0e gesohte, swa him sylf bebead, \u00fea he him fore gescraf, f\u00e6der mancynnes.\nGeseh he \u00fea on greote gingran sine,\nbeornas beadurofe, biryhte him\nswefan on sl\u00e6pe. He sona ongann\n850\nwigend weccean, ond worde cw\u00e6\u00f0:\n\"Ic eow secgan m\u00e6g so\u00f0 orgete,\n\u00fe\u00e6t us gystrand\u00e6ge on geofones stream\nofer arwelan \u00e6\u00f0eling ferede.\nIn \u00feam ceole w\u00e6s cyninga wuldor,\n855\nwaldend wer\u00f0eode. Ic his word oncneow,\n\u00feeh he his m\u00e6gwlite bemi\u00f0en h\u00e6fde.\"\nHim \u00fea \u00e6\u00f0elingas ondsweorodon,\ngeonge gencwidum, gastgerynum:\n\"We \u00f0e, Andreas, ea\u00f0e gecy\u00f0a\u00f0\nus ofsl\u00e6pendum sawle abrugdon,\nmid gefean feredon flyhte on lyfte,\nbrehtmum bli\u00f0e, beorhte ond li\u00f0e.\nLissum lufodon ond in lofe wunedon,\n\u00fe\u00e6r w\u00e6s singal sang ond swegles gong,\n870\nwlitig weoroda heap ond wuldres \u00fereat.\nUtan ymbe \u00e6\u00f0elne englas stodon,\n\u00feegnas ymb \u00feeoden, \u00feusendm\u00e6lum,\nheredon on heh\u00f0o halgan stefne\ndryhtna dryhten. Dream w\u00e6s on hyhte.\n875\nWe \u00f0\u00e6r heahf\u00e6deras halige oncneowon\nond martyra m\u00e6gen unlytel,\nsungon sigedryhtne so\u00f0f\u00e6stlic lof,\ndugo\u00f0 domgeorne. \u00fe\u00e6r w\u00e6s Dauid mid,\neadig oretta, Essages sunu,\n880\nfor Crist cumen, cining Israhela.\nSwylce we gesegon for suna meotudes,\n\u00e6\u00f0elum ecne, eowic standan,\ntwelfe getealde, tireadige h\u00e6le\u00f0.\nEow \u00feegnodon \u00ferymsittende,\n885\nhalige heahenglas. \u00f0am bi\u00f0 h\u00e6le\u00f0a well\n\u00fee \u00feara blissa brucan moton.\n\u00fe\u00e6r w\u00e6s wuldres wynn, wigendra \u00ferym,\n\u00e6\u00f0elic onginn, n\u00e6s \u00fe\u00e6r \u00e6nigum gewinn.\n\u00feam bi\u00f0 wr\u00e6csi\u00f0 witod, wite geopenad,\n890\n\u00fee \u00feara gefeana sceal fremde weor\u00f0an,\nhean hwearfian, \u00feonne heonon ganga\u00fe.\"\n\u00fea w\u00e6s modsefa myclum geblissod\nhaliges on hre\u00f0re, sy\u00f0\u00fean hleo\u00f0orcwide\ngingran gehyrdon, \u00fe\u00e6t hie god wolde\n895\nonmunan swa mycles ofer menn ealle,\nond \u00fe\u00e6t word gecw\u00e6\u00f0 wigendra hleo:\n\"Nu ic, god dryhten, ongiten h\u00e6bbe\n\u00fe\u00e6t \u00f0u on faro\u00f0str\u00e6te feor ne w\u00e6re,\ncyninga wuldur, \u00fea ic on ceol gestah,\n900\n\u00f0eh ic on y\u00f0fare, engla \u00feeoden,\ngasta geocend, ongitan ne cu\u00f0e.\nWeor\u00f0 me nu milde, meotud \u00e6lmihtig,\nbli\u00f0e, beorht cyning! Ic on brimstreame\nspr\u00e6c worda worn, wat \u00e6fter nu\n905\nhwa me wyr\u00f0myndum on wudubate\nferede ofer flodas. \u00fe\u00e6t is frofre gast\nh\u00e6le\u00f0a cynne. \u00fe\u00e6r is help gearu,\nmilts \u00e6t m\u00e6rum, manna gehwylcum,\nsigorsped geseald, \u00feam \u00fee sece\u00f0 to him.\"\nfer\u00f0gefeonde! Ic \u00fee fri\u00f0e healde,\n\u00fe\u00e6t \u00fee ne moton mangeni\u00f0lan,\ngrame grynsmi\u00f0as, gaste gesce\u00f0\u00f0an.\"\nFeoll \u00fea to foldan, frio\u00f0o wilnode\nwordum wis h\u00e6le\u00f0, winedryhten fr\u00e6gn:\n920\n\"Hu geworhte ic \u00fe\u00e6t, waldend fira,\nsynnig wi\u00f0 seolfne, sawla nergend,\n\u00fe\u00e6t ic \u00fee swa godne ongitan ne meahte\non w\u00e6gf\u00e6re, \u00fe\u00e6r ic worda gespr\u00e6c\nminra for meotude ma \u00feonne ic sceolde?\"\n925\nHim andswarode ealwalda god:\n\"No \u00f0u swa swi\u00f0e synne gefremedest\nswa \u00f0u in Achaia onds\u00e6c dydest,\n\u00f0\u00e6t \u00f0u on feorwegas feran ne cu\u00f0e\nne in \u00fea ceastre becuman mehte,\n930\n\u00feing gehegan \u00fereora nihta\nfyrstgemearces, swa ic \u00fee feran het\nofer wega gewinn. Wast nu \u00fee gearwor\n\u00fe\u00e6t ic ea\u00f0e m\u00e6g anra gehwylcne\nfremman ond fyr\u00feran freonda minra\n935\non landa gehwylc, \u00fe\u00e6r me leofost bi\u00f0.\nAris nu hr\u00e6dlice, r\u00e6d \u00e6dre ongit,\nbeorn gebledsod, swa \u00fee beorht f\u00e6der\ngeweor\u00f0a\u00f0 wuldorgifum to widan aldre,\ncr\u00e6fte ond mihte. \u00f0u in \u00fea ceastre gong\n940\nunder burglocan, \u00fe\u00e6r \u00fein bro\u00f0or is.\nWat ic Matheus \u00feurh m\u00e6nra hand hrinen heorudolgum, heafodmagan searonettum beseted. \u00feu hine secan scealt,\nleofne alysan of la\u00f0ra hete,\n945\nond eal \u00fe\u00e6t mancynn \u00fee him mid wunige,\nel\u00feeodigra inwitwrasnum,\nbealuwe gebundene. Him sceal bot hra\u00f0e\nweor\u00fean in worulde ond in wuldre lean,\nswa ic him sylfum \u00e6r secgende w\u00e6s.\n950\nNu \u00f0u, Andreas, scealt edre gene\u00f0an\nin gramra gripe. Is \u00fee gu\u00f0 weotod,\nheardum heoruswengum scel \u00fein hra d\u00e6led\nwundum weor\u00f0an, w\u00e6ttre geliccost\nfaran flode blod. Hie \u00fein feorh ne magon\n955\ndea\u00f0e ged\u00e6lan, \u00feeh \u00f0u drype \u00f0olie,\nsynnigra slege. \u00f0u \u00fe\u00e6t sar aber;\nne l\u00e6t \u00fee ahweorfan h\u00e6\u00f0enra \u00ferym,\ngrim gargewinn, \u00fe\u00e6t \u00f0u gode swice,\ndryhtne \u00feinum. Wes a domes georn;\n960\nl\u00e6t \u00f0e on gemyndum hu \u00fe\u00e6t manegum wear\u00f0\nfira gefrege geond feala landa,\n\u00fe\u00e6t me bysmredon bennum f\u00e6stne\nweras wans\u00e6lige. Wordum tyrgdon,\nslogon ond swungon, synnige ne mihton\n965\n\u00feurh sarcwide so\u00f0 gecy\u00f0an.\n\u00fea ic mid Iudeum gealgan \u00feehte,\n(rod w\u00e6s ar\u00e6red), \u00fe\u00e6r rinca sum\nof minre sidan swat ut forlet,\ndreor to foldan. Ic adreah feala\n970\nyrm\u00fea ofer eor\u00f0an. Wolde ic eow on \u00f0on\n\u00feurh bli\u00f0ne hige bysne onstellan,\nswa on ell\u00feeode ywed wyr\u00f0e\u00f0.\nManige syndon in \u00feysse m\u00e6ran byrig\n\u00feara \u00fee \u00f0u gehweorfest to heofonleohte\n975\n\u00feurh minne naman, \u00feeah hie mor\u00f0res feala\nin fyrndagum gefremed habban.\"\nGewat him \u00fea se halga heofonas secan,\neallra cyninga cining, \u00feone cl\u00e6nan ham,\nea\u00f0medum upp, \u00fe\u00e6r is ar gelang\n980\nfira gehwylcum, \u00feam \u00fee hie findan cann.\n\u00f0a w\u00e6s gemyndig modge\u00feyldig,\nbeorn beaduwe heard, eode in burh hra\u00f0e,\nanr\u00e6d oretta, elne gefyr\u00f0red,\nmaga mode rof, meotude getreowe,\n985\nstop on str\u00e6te, (stig wisode),\nswa him n\u00e6nig gumena ongitan ne mihte,\nsynfulra geseon. H\u00e6fde sigora weard\non \u00feam wangstede w\u00e6re betolden\nleofne leodfruman mid lofe sinum.\n990\nH\u00e6fde \u00fea se \u00e6\u00f0eling in ge\u00ferungen,\nCristes cempa, carcerne neh.\nGeseh he h\u00e6\u00f0enra hlo\u00f0 \u00e6tg\u00e6dere,\nfore hlindura hyrdas standan,\nseofone \u00e6tsomne. Ealle swylt fornam,\n995\ndruron domlease. Dea\u00f0r\u00e6s forfeng\nh\u00e6le\u00f0 heorodreorige. \u00f0a se halga geb\u00e6d\nbilwytne f\u00e6der, breostgehygdum\nherede on heh\u00f0o heofoncyninges \u00ferym, godes dryhtendom. Duru sona onarn\n1000\n\u00feurh handhrine haliges gastes,\nond \u00fe\u00e6r in eode, elnes gemyndig,\nh\u00e6le hildedeor. H\u00e6\u00f0ene sw\u00e6fon,\ndreore druncne, dea\u00f0wang rudon.\nGeseh he Matheus in \u00feam mor\u00f0orcofan,\n1005\nh\u00e6le\u00f0 higerofne under heolstorlocan,\nsecgan dryhtne lof, domweor\u00f0inga\nengla \u00f0eodne. He \u00f0\u00e6r ana s\u00e6t\ngeoh\u00f0um geomor in \u00feam gnornhofe.\nGeseh \u00fea under swegle sw\u00e6sne geferan,\n1010\nhalig haligne. Hyht w\u00e6s geniwad.\nAras \u00fea togenes, gode \u00feancade\n\u00fe\u00e6s \u00f0e hie onsunde \u00e6fre moston\ngeseon under sunnan. Syb w\u00e6s gem\u00e6ne\nbam \u00feam gebro\u00f0rum, blis edniwe.\n1015\n\u00e6ghw\u00e6\u00f0er o\u00f0erne earme be\u00feehte,\ncyston hie ond clypton. Criste w\u00e6ron begen\nleofe on mode. Hie leoht ymbscan\nhalig ond heofontorht. Hre\u00f0or innan w\u00e6s\nwynnum awelled. \u00fea worde ongan\n1020\n\u00e6rest Andreas \u00e6\u00f0elne geferan\non clustorcleofan mid cwide sinum\ngretan godfyrhtne, s\u00e6de him gu\u00f0ge\u00f0ingu,\nfeohtan fara monna: \"Nu is \u00feis folc on luste,\nh\u00e6le\u00f0 hyder on\n1025\ngewyrht eardes neosan.\"\n\u00e6fter \u00feyssum wordum wuldres \u00feegnas,\nbegen \u00fea gebro\u00f0or, to gebede hyldon,\nsendon hira bene fore bearn godes.\nSwylce se halga in \u00feam hearmlocan\n1030\nhis god grette ond him geoce b\u00e6d,\nh\u00e6lend helpe, \u00e6r \u00fean hra crunge\nfore h\u00e6\u00f0enra hilde\u00ferymme,\nond \u00fea gel\u00e6dde of leo\u00f0obendum\nfram \u00feam f\u00e6stenne on fri\u00f0 dryhtnes\n1035\ntu ond hundteontig geteled rime,\nswylce feowertig,\ngenerede fram ni\u00f0e, (\u00fe\u00e6r he n\u00e6nigne forlet\nunder burglocan bennum f\u00e6stne), ond \u00fe\u00e6r wifa \u00fea gyt, weorodes to eacan,\non gehyld godes, swa him se halga bebead.\nWeorod on wilsi\u00f0 wolcnum be\u00feehte,\n\u00fee l\u00e6s him scyldhatan scy\u00f0\u00f0an comon\nmid earhfare, ealdgeni\u00f0lan.\n\u00fe\u00e6r \u00fea modigan mid him m\u00e6\u00f0el gehedan,\n1050\ntreowge\u00feoftan, \u00e6r hie on tu hweorfan.\n\u00e6g\u00f0er \u00feara eorla o\u00f0rum trymede\nheofonrices hyht, helle witu\nwordum werede. Swa \u00f0a wigend mid him,\nh\u00e6le\u00f0 higerofe, halgum stefnum\n1055\ncempan coste cyning weor\u00f0adon,\nwyrda waldend, \u00fe\u00e6s wuldres ne bi\u00f0\n\u00e6fre mid eldum ende befangen.\nGewat him \u00fea Andreas inn on ceastre\ngl\u00e6dmod gangan, to \u00fe\u00e6s \u00f0e he gramra gemot,\n1060\nfara folcm\u00e6gen, gefr\u00e6gen h\u00e6fde,\no\u00f0\u00f0\u00e6t he gemette be mearcpa\u00f0e\nstandan str\u00e6te neah stapul \u00e6renne.\nGes\u00e6t him \u00fea be healfe, h\u00e6fde hluttre lufan,\nece upgemynd engla blisse;\n1065\n\u00feanon basnode under burhlocan\nhw\u00e6t him gu\u00f0weorca gife\u00f0e wurde.\n\u00fea gesamnedon side herigeas,\nfolces frumgaras. To \u00feam f\u00e6stenne\nw\u00e6rleasra werod w\u00e6pnum comon,\n1070\nh\u00e6\u00f0ne hildfrecan, to \u00fe\u00e6s \u00fea h\u00e6ftas \u00e6r\nunder hlinscuwan hearm \u00ferowedon.\nWendan ond woldon wi\u00f0erhycgende\n\u00fe\u00e6t hie on el\u00feeodigum \u00e6t geworhton,\nweotude wiste. Him seo wen gelah,\ns\u00e6gdon \u00feam folce \u00fe\u00e6t \u00f0\u00e6r feorrcundra,\nellreordigra, \u00e6nigne to lafe\nin carcerne cwicne negemetton,\nah \u00fe\u00e6r heorodreorige hyrdas lagan,\ng\u00e6sne on greote, gaste berofene,\n1085\nf\u00e6gra fl\u00e6schaman. \u00fea wear\u00f0 forht manig\nfor \u00feam f\u00e6rspelle folces r\u00e6swa,\nhean, hygegeomor, hungres on wenum,\nblates beodgastes. Nyston beteran r\u00e6d,\n\u00feonne hie \u00fea belidenan him to lifnere\n1090\ndeade gefeormedon. Duru\u00feegnum wear\u00f0\nin ane tid eallum \u00e6tsomne\n\u00feurh heard gelac hildbedd styred.\n\u00f0a ic lungre gefr\u00e6gn leode tosomne\nburgwaru bannan. Beornas comon,\n1095\nwiggendra \u00fereat, wicgum gengan,\non mearum modige, m\u00e6\u00f0elhegende,\n\u00e6scum dealle. \u00fea w\u00e6s eall geador\nto \u00feam \u00feingstede \u00feeod gesamnod.\nLeton him \u00fea betweonum taan wisian\n1100\nhwylcne hira \u00e6rest o\u00f0rum sceolde\nto foddur\u00feege feores ongyldan;\nhluton hellcr\u00e6ftum, h\u00e6\u00f0engildum\nteledon betwinum. \u00f0a se tan gehwearf\nefne ofer \u00e6nne ealdgesi\u00f0a,\n1105\nse w\u00e6s u\u00f0weota eorla dugo\u00f0e,\nheriges on ore. Hra\u00f0e si\u00f0\u00f0an wear\u00f0\nfetorwrasnum f\u00e6st, feores orwena.\nCleopode \u00fea collenferh\u00f0 cearegan reorde,\ncw\u00e6\u00f0 he his sylfes sunu syllan wolde\n1110\non \u00e6htgeweald, eaforan geongne,\nlifes to lisse. Hie \u00f0a lac hra\u00f0e\n\u00feegon to \u00feance. \u00feeod w\u00e6s oflysted,\nmetes modgeomre, n\u00e6s him to ma\u00f0me wynn,\nhyht to hordgestreonum. Hungre w\u00e6ron\ngeond \u00fea burh bodad beorne manegum,\n\u00fe\u00e6t hie \u00fe\u00e6s cnihtes cwealm cor\u00f0re gesohton,\ndugu\u00f0e ond eogo\u00f0e, d\u00e6l onfengon\nlifes to leofne. Hie lungre to \u00fe\u00e6s,\nh\u00e6\u00f0ene herigweardas, here samnodan\n1125\nceastrewarena. Cyrm upp astah\n\u00f0a se geonga ongann geomran stefne,\ngeh\u00e6fted for herige, hearmleo\u00f0 galan,\nfreonda feasceaft, fri\u00f0es wilnian.\nNe mihte earmsceapen are findan,\n1130\nfreo\u00f0e \u00e6t \u00feam folce, \u00fee him feores wolde,\nealdres geunnan. H\u00e6fdon \u00e6gl\u00e6can\ns\u00e6cce gesohte. Sceolde sweordes ecg,\nscerp ond scurheard, of scea\u00f0an folme,\nfyrm\u00e6lum fag, feorh acsigan.\n1135\n\u00f0a \u00fe\u00e6t Andrea earmlic \u00feuhte,\n\u00feeodbealo \u00feearlic to ge\u00f0olianne,\n\u00fe\u00e6t he swa unscyldig ealdre sceolde\nlungre linnan. W\u00e6s se leodhete \u00feristond \u00ferohtheard. \u00ferymman sceocan,\n1140\nmodige magu\u00feegnas, mor\u00f0res on luste,\nwoldon \u00e6ninga, ellenrofe,\non \u00feam hysebeor\u00f0re heafolan gescenan,\ngarum agetan. Hine god forstod,\nhalig of heh\u00f0o, h\u00e6\u00f0enum folce.\n1145\nHet w\u00e6pen wera wexe gelicost\non \u00feam orlege eall formeltan,\n\u00fey l\u00e6s scyldhatan sce\u00f0\u00f0an mihton,\negle ondsacan, ecga \u00fery\u00f0um.\nSwa wear\u00f0 alysed of leodhete,\n1150\ngeong of gyrne. Gode ealles \u00feanc,\ndryhtna dryhtne, \u00fe\u00e6s \u00f0e he dom gife\u00f0\ngumena gehwylcum, \u00feara \u00fee geoce to him\nsece\u00f0 mid snytrum. \u00fe\u00e6r bi\u00f0 symle gearu freod unhwilen, \u00feam \u00fee hie findan cann.\n1155\n\u00fea w\u00e6s wop h\u00e6fen in wera burgum,\nhlud heriges cyrm. Hreopon friccan,\nm\u00e6ndon meteleaste, me\u00f0e stodon,\nhungre geh\u00e6fte. Hornsalu wunedon,\nweste winr\u00e6ced, welan ne benohton\n1160\nbeornas to brucanne on \u00fea bitran tid,\nges\u00e6ton searu\u00feancle sundor to rune\nerm\u00f0u eahtigan. N\u00e6s him to e\u00f0le wynn.\nFregn \u00fea gelome freca o\u00f0erne:\n\"Ne hele se \u00f0e h\u00e6bbe holde lare,\n1165\non sefan snyttro! Nu is s\u00e6l cumen,\n\u00ferea orm\u00e6te, is nu \u00feearf mycel\n\u00fe\u00e6t we wisf\u00e6stra wordum hyran.\"\n\u00fea for \u00fe\u00e6re dugo\u00f0e deoful \u00e6tywde,\nwann ond wliteleas, h\u00e6fde weriges hiw.\n1170\nOngan \u00fea meldigan mor\u00feres brytta,\nhellehinca, \u00feone halgan wer\nwi\u00f0erhycgende, ond \u00fe\u00e6t word gecw\u00e6\u00f0:\n\"Her is gefered ofer feorne weg\n\u00e6\u00f0elinga sum innan ceastre,\n1175\nell\u00feeodigra, \u00feone ic Andreas\nnemnan herde. He eow neon gesceod\n\u00f0a he aferede of f\u00e6stenne\nmanncynnes ma \u00feonne gemet w\u00e6re.\nNu ge magon ea\u00f0e oncy\u00f0d\u00e6da\n1180\nwrecan on gewyrhtum. L\u00e6ta\u00f0 w\u00e6pnes spor\niren ecgheard, ealdorgeard sceoran,\nf\u00e6ges feorhhord. Ga\u00f0 fromlice\n\u00fe\u00e6t ge wi\u00f0erfeohtend wiges gehn\u00e6gan.\"\nHim \u00fea Andreas agef ondsware:\n1185\n\"Hw\u00e6t, \u00f0u \u00feristlice \u00feeode l\u00e6rest,\nb\u00e6ldest to beadowe! W\u00e6st \u00fee b\u00e6les cwealm,\nhatne in helle, ond \u00feu here fysest,\nfe\u00f0an to gefeohte. Eart \u00f0u fag wi\u00f0 god,\ndugo\u00f0a demend. Hw\u00e6t, \u00f0u deofles str\u00e6l,\n1190\nicest \u00feine yrm\u00f0o. \u00f0e se \u00e6lmihtiga\nheanne gehn\u00e6gde, ond on heolstor besceaf,\n\u00fe\u00e6r \u00fee cyninga cining clamme belegde,\nond \u00fee sy\u00f0\u00f0an a Satan nemdon,\n\u00f0a \u00f0e dryhtnes a deman cu\u00f0on.\"\n1195\n\u00f0a gyt se wi\u00f0ermeda wordum l\u00e6rde\nfolc to gefeohte, feondes cr\u00e6fte:\n\"Nu ge gehyra\u00f0 h\u00e6le\u00f0a gewinnan,\nse \u00f0yssum herige m\u00e6st hearma gefremede.\n\u00f0\u00e6t is Andreas, se me on flite\u00f0\n1200\nwordum wr\u00e6tlicum for wera menigo.\"\n\u00f0a w\u00e6s beacen boden burhsittendum.\nAhleopon hildfrome heriges brehtme\nond to weallgeatum wigend \u00ferungon,\ncene under cumblum, cor\u00f0re mycle\n1205\nto \u00f0am orlege, ordum ond bordum.\n\u00fea worde cw\u00e6\u00f0 weoroda dryhten,\nmeotud mihtum swi\u00f0 s\u00e6gde his mago\u00feegne:\n\"Scealt \u00f0u, Andreas, ellen fremman!\nNe mi\u00f0 \u00f0u for menigo, ah \u00feinne modsefan\n1210\nsta\u00f0ola wi\u00f0 strangum! Nis seo stund latu\n\u00fe\u00e6t \u00fee w\u00e6lreowe witum belecga\u00fe,\ncealdan clommum. Cy\u00f0 \u00fee sylfne,\nherd hige \u00feinne, heortan sta\u00f0ola,\n\u00fe\u00e6t hie min on \u00f0e m\u00e6gen oncnawan.\n1215\nNe magon hie ond ne moton ofer mine est\n\u00feinne lichoman, lehtrum scyldige,\ndea\u00f0e ged\u00e6lan, \u00f0eah \u00f0u drype \u00feolige,\nmirce manslaga. Ic \u00fee mid wunige.\"\n\u00e6fter \u00feam wordum com werod unm\u00e6te,\n1220\nlyswe larsmeo\u00f0as, mid lindgecrode,\nbolgenmode; b\u00e6ron ut hr\u00e6\u00f0e\nond \u00feam halgan \u00fe\u00e6r handa gebundon.\nSi\u00fe\u00fean geypped w\u00e6s \u00e6\u00f0elinga wynn,\nond hie andweardne eagum meahton\n1225\ngesion sigerofne, \u00fe\u00e6r w\u00e6s sec manig\non \u00feam welwange wiges oflysted\nleoda dugu\u00f0e. Lyt sorgodon\nhwylc him \u00fe\u00e6t edlean \u00e6fter wurde.\nHeton \u00fea l\u00e6dan ofer landsceare,\n1230\n\u00f0ragm\u00e6lum teon, torngeni\u00f0lan,\nswa hie hit frecnost findan meahton.\nDrogon deormodne \u00e6fter dunscr\u00e6fum,\nymb stanhleo\u00f0o, st\u00e6rcedfer\u00fene,\nefne swa wide swa wegas to lagon,\n1235\nenta \u00e6rgeweorc, innan burgum,\nstr\u00e6te stanfage. Storm upp aras\n\u00e6fter ceasterhofum, cirm unlytel\nh\u00e6\u00f0nes heriges. W\u00e6s \u00fe\u00e6s halgan lic\nsarbennum soden, swate bestemed,\n1240\nbanhus abrocen. Blod y\u00f0um weoll, hatan heolfre. H\u00e6fde him on innan\nellen untweonde, w\u00e6s \u00fe\u00e6t \u00e6\u00f0ele mod\nasundrad fram synnum, \u00feeah he sares swa feala\ndeopum dolgslegum dreogan sceolde.\n1245\nSwa w\u00e6s ealne d\u00e6g o\u00f0\u00f0\u00e6t \u00e6fen com sigetorht swungen. Sar eft gewod\nymb \u00fe\u00e6s beornes breost, o\u00f0\u00fe\u00e6t beorht gewat\nsunne swegeltorht to sete glidan.\nL\u00e6ddan \u00fea leode la\u00f0ne gewinnan\n1250\nto carcerne. He w\u00e6s Criste swa \u00feeah\nleof on mode. Him w\u00e6s leoht sefa\nhalig heortan neh, hige untyddre.\n\u00fea se halga w\u00e6s under heolstorscuwan,\neorl ellenheard, ondlange niht\n1255\nsearo\u00feancum beseted. Snaw eor\u00f0an band\nwintergeworpum. Weder coledon\nheardum h\u00e6gelscurum, swylce hrim ond forst,\nhare hildstapan, h\u00e6le\u00f0a e\u00f0el\nlucon, leoda gesetu. Land w\u00e6ron freorig\n1260\ncealdum cylegicelum, clang w\u00e6teres \u00ferym\nofer eastreamas, is brycgade\nbl\u00e6ce brimrade. Bli\u00f0heort wunode\neorl unforcu\u00f0, elnes gemyndig,\n\u00ferist ond \u00ferohtheard in \u00fereanedum\n1265\nwintercealdan niht. No on gewitte blon,\nacol for \u00fey egesan, \u00fe\u00e6s \u00fee he \u00e6r ongann,\n\u00fe\u00e6t he a domlicost dryhten herede,\nweor\u00f0ade wordum, o\u00f0\u00f0\u00e6t wuldres gim\nheofontorht onhlad. \u00f0a com h\u00e6le\u00f0a \u00fereat\n1270\nto \u00f0\u00e6re dimman ding, dugu\u00f0 unlytel,\nwadan w\u00e6lgifre weorodes brehtme.\nHeton ut hr\u00e6\u00f0e \u00e6\u00f0eling l\u00e6dan\nin wra\u00f0ra geweald, w\u00e6rf\u00e6stne h\u00e6le\u00f0.\n\u00f0a w\u00e6s eft swa \u00e6r ondlangne d\u00e6g\n1275\nswungen sarslegum. Swat y\u00f0um weoll\n\u00feurh bancofan, blodlifrum swealg,\nhatan heolfre. Hra weorces ne sann,\nwundum werig. \u00fea cwom wopes hring\n\u00feurh \u00fe\u00e6s beornes breost, blat ut faran,\n1280\nweoll wa\u00f0uman stream, ond he worde cw\u00e6\u00f0:\n\"Geseoh nu, dryhten god, drohta\u00f0 minne,\nweoruda willgeofa! \u00feu w\u00e6st ond const\nanra gehwylces earfe\u00f0si\u00f0as.\nIc gelyfe to \u00f0e, min liffruma,\n1285\n\u00fe\u00e6t \u00f0u mildheort me for \u00feinum m\u00e6genspedum,\nnerigend fira, n\u00e6fre wille,\nece \u00e6lmihtig, anforl\u00e6tan,\nswa ic \u00fe\u00e6t gefremme, \u00feenden feorh leofa\u00f0,\nmin on moldan, \u00fe\u00e6t ic, meotud, \u00feinum\nleahtrum belecgan \u00fea \u00fein lof bera\u00f0.\"\n\u00f0a \u00f0\u00e6r \u00e6tywde se atola gast,\nwra\u00f0 w\u00e6rloga. Wigend l\u00e6rde\nfor \u00feam herem\u00e6gene helle dioful\nawerged in witum, ond \u00fe\u00e6t word gecw\u00e6\u00f0:\n1300\n\"Slea\u00f0 synnigne ofer seolfes mu\u00f0,\nfolces gewinnan! Nu to feala reorda\u00fe.\"\n\u00fea w\u00e6s orlege eft onhrered,\nniwan stefne. Ni\u00f0 upp aras\no\u00fe\u00f0\u00e6t sunne gewat to sete glidan\n1305\nunder niflan n\u00e6s. Niht helmade,\nbrunwann oferbr\u00e6d beorgas steape,\nond se halga w\u00e6s to hofe l\u00e6ded,\ndeor ond domgeorn, in \u00fe\u00e6t dimme r\u00e6ced;\nsceal \u00feonne in neadcofan nihtlangne fyrst\n1310\nw\u00e6rf\u00e6st wunian wic unsyfre.\n\u00fea com seofona sum to sele geongan,\natol \u00e6gl\u00e6ca yfela gemyndig,\nmor\u00f0res manfrea myrce gescyrded,\ndeoful dea\u00f0reow dugu\u00f0um bereafod,\n1315\nongan \u00fea \u00feam halgan hospword sprecan:\n\"Hw\u00e6t hogodest \u00f0u, Andreas, hidercyme \u00feinne\non wra\u00f0ra geweald? Hw\u00e6t is wuldor \u00fein,\n\u00fee \u00f0u oferhigdum upp ar\u00e6rdest,\n\u00fea \u00f0u goda ussa gild gehn\u00e6gdest?\n1320\nHafast nu \u00fee anum eall getihhad\nland ond leode, swa dyde lareow \u00fein.\nCyne\u00ferym ahof, \u00feam w\u00e6s Crist nama,\nofer middangeard, \u00feynden hit meahte swa.\n\u00feone Herodes ealdre besny\u00f0ede,\n1325\nforcom \u00e6t campe cyning Iudea,\nrices ber\u00e6dde, ond hine rode befealg,\n\u00fe\u00e6t he on gealgan his gast onsende.\nSwa ic nu bebeode bearnum minum,\n\u00feegnum \u00fery\u00f0fullum, \u00f0\u00e6t hie \u00f0e hn\u00e6gen,\n1330\ngingran \u00e6t gu\u00f0e. L\u00e6ta\u00f0 gares ord,\nearh \u00e6ttre gem\u00e6l, in gedufan\nin f\u00e6ges fer\u00f0. Ga\u00f0 fromlice,\n\u00f0\u00e6t ge gu\u00f0frecan gylp forbegan.\"\nHie w\u00e6ron reowe, r\u00e6sdon on sona\n1335\ngifrum grapum. Hine god forstod,\nsta\u00f0ulf\u00e6st steorend, \u00feurh his strangan miht.\nSy\u00f0\u00f0an hie oncneowon Cristes rode\non his m\u00e6gwlite, m\u00e6re tacen,\nwurdon hie \u00f0a acle on \u00feam onfenge,\nHim\u00feaearmsceapen agef ondsware,\nfah fyrnscea\u00fea, ond his f\u00e6der oncw\u00e6\u00f0:\n\"Ne magan we him lungre la\u00f0 \u00e6tf\u00e6stan,\nswilt \u00feurh searwe. Ga \u00fee sylfa to!\n\u00fe\u00e6r \u00feu gegninga gu\u00f0e findest,\nwiges woman, weald, hu \u00f0e s\u00e6le\n\u00e6t \u00feam gegnslege. Utan gangan eft,\n\u00fe\u00e6t we bysmrigen bendum f\u00e6stne,\no\u00f0witan him his wr\u00e6csi\u00f0. Habba\u00f0 word gearu\nwi\u00f0 \u00feam \u00e6gl\u00e6can eall getrahtod!\"\n1360\n\u00fea hleo\u00f0rade hludan stefne,\nwitum bew\u00e6led, ond \u00fe\u00e6t word gecw\u00e6\u00f0:\n\"\u00feu \u00fee, Andreas, acl\u00e6ccr\u00e6ftum\nlange feredes! Hw\u00e6t, \u00f0u leoda feala\nforleolce ond forl\u00e6rdest! Nu leng ne miht\n1365\ngewealdan \u00fey weorce. \u00fee synd witu \u00fe\u00e6s grim\nweotud be gewyrhtum. \u00feu scealt werigmod,\nhean, hro\u00f0ra leas, hearm \u00ferowigan,\nsare swyltcwale. Secgas mine\nto \u00feam gu\u00f0plegan gearwe sindon,\n1370\n\u00fea \u00fee \u00e6ninga ellenweorcum\nunfyrn faca feorh \u00e6t\u00feringan.\nHwylc is \u00fe\u00e6s mihtig ofer middangeard,\n\u00fe\u00e6t he \u00fee alyse of leo\u00f0ubendum,\nmanna cynnes, ofer mine est?\"\n1375\nHim \u00fea Andreas agef ondsware:\n\"Hw\u00e6t, me ea\u00f0e \u00e6lmihtig god,\nni\u00f0a neregend, se \u00f0e in niedum iu\ngef\u00e6stnode fyrnum clommum!\n\u00fe\u00e6r \u00f0u sy\u00f0\u00f0an a, susle gebunden,\n1380\nin wr\u00e6c wunne, wuldres blunne,\nsy\u00f0\u00f0an \u00f0u forhogedes heofoncyninges word.\n\u00fe\u00e6r w\u00e6s yfles or, ende n\u00e6fre\n\u00feines wr\u00e6ces weor\u00f0e\u00f0. \u00f0u scealt widan feorh\necan \u00feine yrm\u00f0u. \u00fee bi\u00f0 a symble\n1385\nof d\u00e6ge on d\u00e6g drohta\u00fe strengra.\"\n\u00f0a wear\u00f0 on fleame se \u00f0e \u00f0a f\u00e6h\u00f0o iu\nwi\u00f0 god geara grimme gefremede.\nCom \u00fea on uhtan mid \u00e6rd\u00e6ge\nh\u00e6\u00f0enra hlo\u00f0 haliges neosan\n1390\nleoda weorude. Heton l\u00e6dan ut\n\u00ferohtheardne \u00feegn \u00feriddan si\u00f0e,\nwoldon aninga ellenrofes\nmod gemyltan. Hit ne mihte swa!\n\u00f0a w\u00e6s niowinga ni\u00f0 onhrered,\n1395\nheard ond hetegrim. W\u00e6s se halga wer\nsare geswungen, searwum gebunden,\ndolgbennum \u00feurhdrifen, \u00f0endon d\u00e6g lihte.\nOngan \u00fea geomormod to gode cleopian,\nheard of h\u00e6fte, halgan stefne\n1400\nweop werigfer\u00f0, ond \u00fe\u00e6t word gecw\u00e6\u00f0:\n\"N\u00e6fre ic geferde mid frean willan\nunder heofonhwealfe heardran drohtno\u00f0,\n\u00fe\u00e6r ic dryhtnes \u00e6 deman sceolde.\nSint me leo\u00f0u tolocen, lic sare gebrocen,\n1405\nbanhus blodfag, benne wealla\u00f0,\nseonodolg swatige. Hw\u00e6t, \u00f0u sigora weard,\ndryhten h\u00e6lend, on d\u00e6ges tide\nmid Iudeum geomor wurde\n\u00f0a \u00f0u of gealgan, god lifigende,\n1410\nfyrnweorca frea, to f\u00e6der cleopodest,\ncininga wuldor, ond cw\u00e6de \u00f0us:\n'Ic \u00f0e, f\u00e6der engla, frignan wille,\nlifes leohtfruma, hw\u00e6t forl\u00e6test \u00f0u me?'\nOnd ic nu \u00fery dagas \u00feolian sceolde\n1415\nw\u00e6lgrim witu. Bidde ic, weoroda god,\n\u00fe\u00e6t ic gast minne agifan mote,\nsawla symbelgifa, on \u00feines sylfes hand.\n\u00f0u \u00f0\u00e6t gehete \u00feurh \u00fein halig word,\n\u00fea \u00f0u us twelfe trymman ongunne,\n1420\n\u00fe\u00e6t us heterofra hild ne gesceode,\nne lices d\u00e6l lungre o\u00f0\u00f0eoded,\nne synu ne ban on swa\u00f0e lagon,\nne loc of heafde to forlore wurde,\ngif we \u00feine lare l\u00e6stan woldon.\n1425\nNu sint sionwe toslopen, is min swat adropen,\nlicga\u00f0 \u00e6fter lande loccas todrifene,\nfex on foldan. Is me feorhgedal\nleofre mycle \u00feonne \u00feeos lifcearo.\"\nHim \u00fea stefn oncw\u00e6\u00f0, sti\u00f0hycgendum,\n1430\nwuldorcyninges word hlo\u00f0rode:\n\"Ne wep \u00feone wr\u00e6csi\u00f0, wine leofesta,\nnis \u00fee to frecne. Ic \u00fee fri\u00f0e healde,\nminre mundbyrde m\u00e6gene besette.\nMe is miht ofer eall,\n1435\nsigorsped geseald. So\u00f0 \u00fe\u00e6t gecy\u00f0e\u00f0\nm\u00e6nig \u00e6t me\u00f0le on \u00feam myclan d\u00e6ge,\n\u00fe\u00e6t \u00f0\u00e6t geweor\u00f0e\u00f0, \u00fe\u00e6t \u00f0eos wlitige gesceaft,\nheofon ond eor\u00f0e, hreosa\u00fe togadore,\n\u00e6r aw\u00e6ged sie worda \u00e6nig\n1440\n\u00fee ic \u00feurh minne mu\u00f0 me\u00f0lan onginne.\nGeseoh nu seolfes sw\u00e6\u00f0e, swa \u00fein swat aget\n\u00feurh bangebrec blodige stige, lices l\u00e6lan. No \u00fee la\u00f0es ma\n\u00feurh daro\u00f0a gedrep gedon motan,\n1445\n\u00fea \u00fee heardra m\u00e6st hearma gefremedan.\"\n\u00fea on last beseah leoflic cempa\n\u00e6fter wordcwidum wuldorcyninges.\nGeseh he geblowene bearwas standan\nbl\u00e6dum gehrodene, swa he \u00e6r his blod aget.\n1450\n\u00f0a worde cw\u00e6\u00f0 wigendra hleo:\n\"Sie \u00f0e \u00f0anc ond lof, \u00feeoda waldend,\nto widan feore wuldor on heofonum,\n\u00f0\u00e6s \u00f0u me on sare, sigedryhten min,\nell\u00feeodigne, an ne forl\u00e6te.\"\nto \u00feam carcerne, woldon cr\u00e6fta gehygd,\nmagor\u00e6dendes mod oncyrran\non \u00fe\u00e6re deorcan niht. \u00fea com dryhten god\nin \u00fe\u00e6t hlinr\u00e6ced, h\u00e6le\u00f0a wuldor,\nond \u00fea wine synne wordum grette\n1465\nond frofre gecw\u00e6\u00f0, f\u00e6der manncynnes,\nlifes lareow, heht his lichoman\nhales brucan: \"Ne scealt \u00f0u in hen\u00f0um a leng\nsearoh\u00e6bbendra sar \u00ferowian.\"\nAras \u00fea m\u00e6gene rof, s\u00e6gde meotude \u00feanc,\n1470\nhal of h\u00e6fte heardra wita.\nN\u00e6s him gewemmed wlite, ne wloh of hr\u00e6gle\nlungre alysed, ne loc of heafde,\nne ban gebrocen, ne blodig wund lice gelenge, ne la\u00f0es d\u00e6l,\n1475\n\u00feurh dolgslege dreore bestemed,\nac w\u00e6s eft swa \u00e6r \u00feurh \u00fea \u00e6\u00f0elan miht\nlof l\u00e6dende, ond on his lice trum. Hw\u00e6t, ic hwile nu haliges lare,\nleo\u00f0giddinga, lof \u00fe\u00e6s \u00fee worhte,\n1480\nwordum wemde, wyrd undyrne\nofer min gemet. Mycel is to secganne,\nlangsum leornung, \u00fe\u00e6t he in life adreag,\neall \u00e6fter orde. \u00fe\u00e6t scell \u00e6gl\u00e6wra\nmann on moldan \u00feonne ic me t\u00e6lige\n1485\nfindan on fer\u00f0e, \u00fe\u00e6t fram fruman cunne\neall \u00fea earfe\u00f0o \u00fee he mid elne adreah,\ngrimra gu\u00f0a. Hw\u00e6\u00f0re git sceolon\nlytlum sticcum leo\u00f0worda d\u00e6l\nfur\u00f0ur reccan. \u00fe\u00e6t is fyrns\u00e6gen,\n1490\nhu he weorna feala wita ge\u00f0olode,\nheardra hilda, in \u00fe\u00e6re h\u00e6\u00f0enan byrig.\nHe be wealle geseah wundrum f\u00e6ste\nunder s\u00e6lwage sweras unlytle,\nstapulas standan, storme bedrifene,\n1495\neald enta geweorc. He wi\u00f0 anne \u00fe\u00e6ra,\nmihtig ond modrof, m\u00e6\u00f0el gehede,\nwis, wundrum gleaw, word stunde ahof:\n\"Geher \u00f0u, marmanstan, meotudes r\u00e6dum,\nfore \u00fe\u00e6s onsyne ealle gesceafte\n1500\nforhte geweor\u00f0a\u00f0, \u00feonne hie f\u00e6der geseo\u00f0\nheofonas ond eor\u00f0an herigea m\u00e6ste\non middangeard mancynn secan.\nL\u00e6t nu of \u00feinum sta\u00feole streamas weallan,\nea inflede, nu \u00f0e \u00e6lmihtig\n1505\nhate\u00f0, heofona cyning, \u00fe\u00e6t \u00f0u hr\u00e6dlice\non \u00feis fr\u00e6te folc for\u00f0 onsende\nw\u00e6ter widrynig to wera cwealme, geofon geotende. Hw\u00e6t, \u00f0u golde eart,\nsincgife, sylla! On \u00f0e sylf cyning\n1510\nwrat, wuldres god, wordum cy\u00f0de\nrecene geryno, ond ryhte \u00e6\ngetacnode on tyn wordum,\nmeotud mihtum swi\u00f0. Moyse sealde,\nswa hit so\u00f0f\u00e6ste sy\u00f0\u00fean heoldon,\n1515\nmodige mago\u00feegnas, magas sine,\ngodfyrhte guman, Iosua ond Tobias.\nNu \u00f0u miht gecnawan \u00fe\u00e6t \u00fee cyning engla\ngefr\u00e6twode fur\u00f0ur mycle\ngiofum geardagum \u00feonne eall gimma cynn.\n1520\n\u00feurh his halige h\u00e6s \u00feu scealt hr\u00e6\u00f0e cy\u00f0an\ngif \u00f0u his ondgitan \u00e6nige h\u00e6bbe.\"\nN\u00e6s \u00fea wordlatu wihte \u00feon mare\n\u00fe\u00e6t se stan togan. Stream ut aweoll,\nfleow ofer foldan. Famige walcan\n\u00feurh \u00fe\u00e6s flodes f\u00e6r. F\u00e6ge swulton,\ngeonge on geofene gu\u00f0r\u00e6s fornam\n\u00feurh sealtneweg. \u00fe\u00e6t w\u00e6s sorgbyr\u00feen,\nbiter beor\u00feegu. Byrlas ne g\u00e6ldon,\nombeht\u00feegnas. \u00fe\u00e6r w\u00e6s \u00e6lcum genog\n1535\nfram d\u00e6ges orde drync sona gearu.\nWeox w\u00e6teres \u00ferym. Weras cwanedon,\nealde \u00e6scberend. W\u00e6s him ut myne\nfleon fealone stream, woldon feore beorgan,\nto dunscr\u00e6fum drohta\u00f0 secan,\n1540\neor\u00f0an ondwist. Him \u00fe\u00e6t engel forstod,\nse \u00f0a burh oferbr\u00e6gd blacan lige,\nhatan hea\u00f0ow\u00e6lme. Hreoh w\u00e6s \u00fe\u00e6r inne\nbeatende brim. Ne mihte beorna hlo\u00f0\nof \u00feam f\u00e6stenne fleame spowan.\nEgeslic \u00e6led eagsyne wear\u00f0,\nheardlic hereteam, hleo\u00f0or gryrelic.\n\u00feurh lyftgelac leges bl\u00e6stas\nweallas ymbwurpon, w\u00e6ter mycladon.\n\u00fe\u00e6r w\u00e6s wop wera wide gehyred,\n1555\nearmlic ylda gedr\u00e6g. \u00fea \u00fe\u00e6r an ongann,\nfeasceaft h\u00e6le\u00f0, folc gadorigean,\nhean, hygegeomor, heofende spr\u00e6c:\n\"Nu ge magon sylfe so\u00f0 gecnawan,\n\u00fe\u00e6t we mid unrihte ell\u00feeodigne\n1560\non carcerne clommum belegdon,\nwitebendum. Us seo wyrd scy\u00f0e\u00f0,\nheard ond hetegrim. \u00fe\u00e6t is her swa cu\u00f0,\nis hit mycle selre, \u00fe\u00e6s \u00fee ic so\u00f0 talige,\n\u00fe\u00e6t we hine alysan of leo\u00f0obendum,\n1565\nealle anmode, (ofost is selost),\nond us \u00feone halgan helpe biddan,\ngeoce ond frofre. Us bi\u00f0 gearu sona\nsybb \u00e6fter sorge, gif we seca\u00fe to him.\"\n\u00fea \u00fe\u00e6r Andrea orgete wear\u00f0\n1570\non fyrh\u00f0locan folces geb\u00e6ro,\n\u00fe\u00e6r w\u00e6s modigra m\u00e6gen forbeged,\nwigendra \u00ferym. W\u00e6ter f\u00e6\u00f0medon,\nfleow firgendstream, flod w\u00e6s on luste,\no\u00fe\u00fe\u00e6t breost oferstag, brim weallende,\n1575\neorlum o\u00f0 exle. \u00fea se \u00e6\u00f0eling het\nstreamfare stillan, stormas restan\nymbe stanhleo\u00f0u. Stop ut hr\u00e6\u00f0e\ncene collenfer\u00f0, carcern ageaf,\ngleawmod, gode leof. Him w\u00e6s gearu sona\n1580\n\u00feurh streamr\u00e6ce str\u00e6t gerymed.\nSmeolt w\u00e6s se sigewang, symble w\u00e6s dryge\nfolde fram flode, swa his fot gestop.\nWurdon burgware bli\u00f0e on mode,\nferh\u00f0gefeonde. \u00fea w\u00e6s for\u00f0 cumen\n1585\ngeoc \u00e6fter gyrne. Geofon swa\u00f0rode\n\u00feurh haliges h\u00e6s, hlyst yst forgeaf,\nbrimrad gebad. \u00fea se beorg tohlad,\neor\u00f0scr\u00e6f egeslic, ond \u00fe\u00e6r in forlet\nflod f\u00e6\u00f0mian, fealewe w\u00e6gas,\n1590\ngeotende gegrind grund eall forswealg.\nNalas he \u00fe\u00e6r y\u00f0e ane bisencte,\nach \u00fe\u00e6s weorodes eac \u00f0a wyrrestan,\nfaa folcscea\u00f0an, feowertyne\ngewiton mid \u00fey w\u00e6ge in forwyrd sceacan\n1595\nunder eor\u00fean grund. \u00fea wear\u00f0 acolmod,\nforhtfer\u00f0 manig folces on laste.\nWendan hie wifa ond wera cwealmes,\n\u00feearlra ge\u00feinga \u00f0rage hnagran,\nsy\u00f0\u00f0an mane faa, mor\u00f0orscyldige,\n1600\ngu\u00f0gelacan under grund hruron.\nHie \u00f0a anmode ealle cw\u00e6don:\n\"Nu is gesyne \u00f0\u00e6t \u00fee so\u00f0 meotud,\ncyning eallwihta, cr\u00e6ftum wealde\u00f0,\nse \u00f0isne ar hider onsende\n1605\n\u00feeodum to helpe. Is nu \u00feearf mycel\n\u00fe\u00e6t we gumcystum georne hyran.\"\n\u00fea se halga ongann h\u00e6le\u00f0 blissigean,\nwigendra \u00fereat wordum retan:\n\"Ne beo\u00f0 ge to forhte, \u00feeh \u00fee fell curen\n1610\nsynnigra cynn. Swylt \u00ferowode,\nwitu be gewyrhtum. Eow is wuldres leoht\ntorht ontyned, gif ge teala hycga\u00f0.\"\nSende \u00fea his bene fore bearn godes,\nb\u00e6d haligne helpe gefremman\n1615\ngumena geogo\u00f0e, \u00fee on geofene \u00e6r\n\u00feurh flodes f\u00e6\u00f0m feorh gesealdon,\n\u00f0\u00e6t \u00fea gastas, gode orfeorme,\nin wita forwyrd, wuldre bescyrede,\nin feonda geweald gefered ne wurdan.\n1620\n\u00fea \u00f0\u00e6t \u00e6rende ealwealdan gode\n\u00e6fter hleo\u00f0orcwidum haliges gastes\nw\u00e6s on \u00feanc sprecen, \u00f0eoda r\u00e6swan.\nHet \u00fea onsunde ealle arisan,\ngeonge of greote, \u00fea \u00e6r geofon cwealde.\n1625\n\u00fea \u00fe\u00e6r ofostlice upp astodon\nmanige on me\u00f0le, mine gefrege,\neaforan unweaxne, \u00f0a w\u00e6s eall eador\nleo\u00f0olic ond gastlic, \u00feeah hie lungre \u00e6r\n\u00feurh flodes f\u00e6r feorh aleton.\n1630\nOnfengon fulwihte ond freo\u00f0uw\u00e6re,\nwuldres wedde witum aspedde,\nmundbyrd meotudes. \u00fea se modiga het,\ncyninges cr\u00e6ftiga, ciricean getimbran,\ngerwan godes tempel, \u00fe\u00e6r sio geogo\u00f0 aras\n1635\n\u00feurh f\u00e6der fulwiht ond se flod onsprang.\n\u00fea gesamnodon secga \u00fereate\nweras geond \u00fea winburg wide ond side,\neorlas anmode, ond hira idesa mid,\ncw\u00e6don holdlice hyran woldon,\n1640\nonfon fromlice fullwihtes b\u00e6\u00f0\ndryhtne to willan, ond diofolgild,\nealde eolhstedas, anforl\u00e6tan.\n\u00fea w\u00e6s mid \u00fey folce fulwiht h\u00e6fen,\n\u00e6\u00f0ele mid eorlum, ond \u00e6 godes\n1645\nriht ar\u00e6red, r\u00e6d on lande\nmid \u00feam ceasterwarum, cirice gehalgod.\n\u00fe\u00e6r se ar godes anne gesette,\nwisf\u00e6stne wer, wordes gleawne,\nin \u00fe\u00e6re beorhtan byrig bisceop \u00feam leodum,\n1650\nond gehalgode fore \u00feam herem\u00e6gene\n\u00feurh apostolhad, Platan nemned,\n\u00feeodum on \u00feearfe, ond \u00feriste bebead\n\u00fe\u00e6t hie his lare l\u00e6ston georne,\nfeorhr\u00e6d fremedon. S\u00e6gde his fusne hige,\n1655\n\u00fe\u00e6t he \u00fea goldburg ofgifan wolde,\nsecga seledream ond sincgestreon,\nbeorht beagselu, ond him brim\u00feisan\n\u00e6t s\u00e6s faro\u00f0e secan wolde.\n\u00fe\u00e6t w\u00e6s \u00feam weorode weorc to ge\u00feoligenne,\n1660\n\u00fe\u00e6t hie se leodfruma leng ne wolde\nwihte gewunian. \u00fea him wuldres god\non \u00feam si\u00f0f\u00e6te sylfum \u00e6tywde,\nond \u00fe\u00e6t word gecw\u00e6\u00f0, weoruda dryhten:\n\"folc of firenum? Is him fus hyge\n1665\nga\u00f0 geomriende, geoh\u00f0o m\u00e6na\u00f0\nweras wif samod. Hira wop becom,\nmurnende mod\nfore sneowan.\nNe scealt \u00f0u \u00fe\u00e6t eowde anforl\u00e6tan\n1670\non swa niowan gefean, ah him naman minne\non fer\u00f0locan f\u00e6ste getimbre.\nWuna in \u00fe\u00e6re winbyrig, wigendra hleo,\nsalu sinchroden, seofon nihta fyrst.\nSy\u00f0\u00f0an \u00f0u mid mildse minre ferest.\"\nL\u00e6rde \u00fea \u00fea leode on geleafan weg,\ntrymede torhtlice, tireadigra\nwenede to wuldre weorod unm\u00e6te,\nto \u00feam halgan ham heofona rices,\n\u00fe\u00e6r f\u00e6der ond sunu ond frofre gast\n1685\nin \u00ferinnesse \u00ferymme wealde\u00f0\nin woruld worulda wuldorgestealda.\nSwylce se halga herigeas \u00fereade,\ndeofulgild todraf ond gedwolan fylde.\n\u00fe\u00e6t w\u00e6s Satane sar to ge\u00feolienne,\n1690\nmycel modes sorg, \u00fe\u00e6t he \u00f0a menigeo geseah\nhweorfan higebli\u00f0e fram helltrafum\n\u00feurh Andreas este lare\nto f\u00e6geran gefean, \u00fe\u00e6r n\u00e6fre feondes ne bi\u00f0,\ngastes gramhydiges, gang on lande.\n1695\n\u00fea w\u00e6ron gefylde \u00e6fter frean dome\ndagas on rime, swa him dryhten bebead,\n\u00fe\u00e6t he \u00fea wederburg wunian sceolde.\nOngan hine \u00fea fysan ond to flote gyrwan,\nblissum hremig, wolde on brim\u00feisan\n1700\nAchaie o\u00f0re si\u00f0e\nsylfa gesecan, \u00fe\u00e6r he sawulgedal,\nbeaducwealm gebad. \u00fe\u00e6t \u00feam banan ne wear\u00f0\nhleahtre behworfen, ah in helle ceafl\nsi\u00f0 asette, ond sy\u00f0\u00f0an no,\n1705\nfah, freonda leas, frofre benohte.\n\u00f0a ic l\u00e6dan gefr\u00e6gn leoda weorode\nleofne lareow to lides stefnan,\nm\u00e6cgas modgeomre. \u00fe\u00e6r manegum w\u00e6s\nhat \u00e6t heortan hyge weallende.\n1710\nHie \u00f0a gebrohton \u00e6t brimes n\u00e6sse\non w\u00e6g\u00feele wigan unslawne.\nStodon him \u00f0a on ofre \u00e6fter reotan\n\u00feendon hie on y\u00f0um \u00e6\u00f0elinga wunn\nofer seolhpa\u00f0u geseon mihton,\n1715\nond \u00fea weor\u00f0edon wuldres agend,\ncleopodon on cor\u00f0re, ond cw\u00e6don \u00feus:\n\"An is ece god eallra gesceafta!\nIs his miht ond his \u00e6ht ofer middangeard\nbreme gebledsod, ond his bl\u00e6d ofer eall\n1720\nin heofon\u00ferymme halgum scine\u00f0,\nwlitige on wuldre to widan ealdre,\nece mid englum. \u00fe\u00e6t is \u00e6\u00f0ele cyning!\"","title":"Andreas","type":"page"}