{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a02_05.htm","path":"neu/ascp/a02_05.htm","source_url":"https://sacred-texts.com/neu/ascp/a02_05.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n Dream of the Rood\n Verse Indeterminate Saxon\n \n - \n Hw\u00e6t! Ic swefna cyst \u00a0\u00a0\u00a0\u00a0 secgan wylle, \n hw\u00e6t me gem\u00e6tte \u00a0\u00a0\u00a0\u00a0 to midre nihte,\n sy\u00f0\u00fean reordberend \u00a0\u00a0\u00a0\u00a0 reste wunedon!\n \u00feuhte me \u00fe\u00e6t ic gesawe \u00a0\u00a0\u00a0\u00a0 syllicre treow\n- 5\n- \n on lyft l\u00e6dan, \u00a0\u00a0\u00a0\u00a0 leohte bewunden, \n beama beorhtost. \u00a0\u00a0\u00a0\u00a0 Eall \u00fe\u00e6t beacen w\u00e6s\n begoten mid golde. \u00a0\u00a0\u00a0\u00a0 Gimmas stodon\n f\u00e6gere \u00e6t foldan sceatum, \u00a0\u00a0\u00a0\u00a0 swylce \u00fe\u00e6r fife w\u00e6ron\n uppe on \u00feam eaxlegespanne. \u00a0\u00a0\u00a0\u00a0 Beheoldon \u00fe\u00e6r engel dryhtnes ealle,\n- 10\n- \n f\u00e6gere \u00feurh for\u00f0gesceaft. \u00a0\u00a0\u00a0\u00a0 Ne w\u00e6s \u00f0\u00e6r huru fracodes gealga, \n ac hine \u00fe\u00e6r beheoldon \u00a0\u00a0\u00a0\u00a0 halige gastas,\n men ofer moldan, \u00a0\u00a0\u00a0\u00a0 ond eall \u00feeos m\u00e6re gesceaft.\n Syllic w\u00e6s se sigebeam, \u00a0\u00a0\u00a0\u00a0 ond ic synnum fah,\n forwunded mid wommum. \u00a0\u00a0\u00a0\u00a0 Geseah ic wuldres treow,\n- 15\n- \n w\u00e6dum geweor\u00f0ode, \u00a0\u00a0\u00a0\u00a0 wynnum scinan, \n gegyred mid golde; \u00a0\u00a0\u00a0\u00a0 gimmas h\u00e6fdon\n bewrigene weor\u00f0lice \u00a0\u00a0\u00a0\u00a0 wealdendes treow.\n Hw\u00e6\u00f0re ic \u00feurh \u00fe\u00e6t gold \u00a0\u00a0\u00a0\u00a0 ongytan meahte\n earmra \u00e6rgewin, \u00a0\u00a0\u00a0\u00a0 \u00fe\u00e6t hit \u00e6rest ongan\n- 20\n- \n sw\u00e6tan on \u00fea swi\u00f0ran healfe. \u00a0\u00a0\u00a0\u00a0 Eall ic w\u00e6s mid sorgum gedrefed, \n forht ic w\u00e6s for \u00fe\u00e6re f\u00e6gran gesyh\u00f0e. \u00a0\u00a0\u00a0\u00a0 Geseah ic \u00fe\u00e6t fuse beacen\n wendan w\u00e6dum ond bleom; \u00a0\u00a0\u00a0\u00a0 hwilum hit w\u00e6s mid w\u00e6tan bestemed,\n beswyled mid swates gange, \u00a0\u00a0\u00a0\u00a0 hwilum mid since gegyrwed.\n Hw\u00e6\u00f0re ic \u00fe\u00e6r licgende \u00a0\u00a0\u00a0\u00a0 lange hwile\n- 25\n- \n beheold hreowcearig \u00a0\u00a0\u00a0\u00a0 h\u00e6lendes treow, \n o\u00f0\u00f0\u00e6t ic gehyrde \u00a0\u00a0\u00a0\u00a0 \u00fe\u00e6t hit hleo\u00f0rode.\n Ongan \u00fea word sprecan \u00a0\u00a0\u00a0\u00a0 wudu selesta:\n \"\u00fe\u00e6t w\u00e6s geara iu, \u00a0\u00a0\u00a0\u00a0 (ic \u00fe\u00e6t gyta geman),\n \u00fe\u00e6t ic w\u00e6s aheawen \u00a0\u00a0\u00a0\u00a0 holtes on ende,\n- 30\n- \n astyred of stefne minum. \u00a0\u00a0\u00a0\u00a0 Genaman me \u00f0\u00e6r strange feondas, \n geworhton him \u00fe\u00e6r to w\u00e6fersyne, \u00a0\u00a0\u00a0\u00a0 heton me heora wergas hebban.\n B\u00e6ron me \u00f0\u00e6r beornas on eaxlum, \u00a0\u00a0\u00a0\u00a0 o\u00f0\u00f0\u00e6t hie me on beorg asetton,\n gef\u00e6stnodon me \u00fe\u00e6r feondas genoge. \u00a0\u00a0\u00a0\u00a0 Geseah ic \u00fea frean mancynnes\n efstan elne mycle \u00a0\u00a0\u00a0\u00a0 \u00fe\u00e6t he me wolde on gestigan.\n- 35\n- \n \u00fe\u00e6r ic \u00fea ne dorste \u00a0\u00a0\u00a0\u00a0 ofer dryhtnes word \n bugan o\u00f0\u00f0e berstan, \u00a0\u00a0\u00a0\u00a0 \u00fea ic bifian geseah\n eor\u00f0an sceatas. \u00a0\u00a0\u00a0\u00a0 Ealle ic mihte\n feondas gefyllan, \u00a0\u00a0\u00a0\u00a0 hw\u00e6\u00f0re ic f\u00e6ste stod.\n Ongyrede hine \u00fea geong h\u00e6le\u00f0, \u00a0\u00a0\u00a0\u00a0 (\u00fe\u00e6t w\u00e6s god \u00e6lmihtig),\n- 40\n- \n strang ond sti\u00f0mod. \u00a0\u00a0\u00a0\u00a0 Gestah he on gealgan heanne, \n modig on manigra gesyh\u00f0e, \u00a0\u00a0\u00a0\u00a0 \u00fea he wolde mancyn lysan.\n Bifode ic \u00fea me se beorn ymbclypte. \u00a0\u00a0\u00a0\u00a0 Ne dorste ic hw\u00e6\u00f0re bugan to eor\u00f0an,\n feallan to foldan sceatum, \u00a0\u00a0\u00a0\u00a0 ac ic sceolde f\u00e6ste standan.\n Rod w\u00e6s ic ar\u00e6red. \u00a0\u00a0\u00a0\u00a0 Ahof ic ricne cyning,\n- 45\n- \n heofona hlaford, \u00a0\u00a0\u00a0\u00a0 hyldan me ne dorste. \n \u00feurhdrifan hi me mid deorcan n\u00e6glum. \u00a0\u00a0\u00a0\u00a0 On me syndon \u00fea dolg gesiene,\n opene inwidhlemmas. \u00a0\u00a0\u00a0\u00a0 Ne dorste ic hira n\u00e6nigum sce\u00f0\u00f0an.\n Bysmeredon hie unc butu \u00e6tg\u00e6dere. \u00a0\u00a0\u00a0\u00a0 Eall ic w\u00e6s mid blode bestemed,\n begoten of \u00fe\u00e6s guman sidan, \u00a0\u00a0\u00a0\u00a0 si\u00f0\u00f0an he h\u00e6fde his gast onsended.\n- 50\n- \n Feala ic on \u00feam beorge \u00a0\u00a0\u00a0\u00a0 gebiden h\u00e6bbe \n wra\u00f0ra wyrda. \u00a0\u00a0\u00a0\u00a0 Geseah ic weruda god\n \u00feearle \u00feenian. \u00a0\u00a0\u00a0\u00a0 \u00feystro h\u00e6fdon\n bewrigen mid wolcnum \u00a0\u00a0\u00a0\u00a0 wealdendes hr\u00e6w,\n scirne sciman, \u00a0\u00a0\u00a0\u00a0 sceadu for\u00f0eode,\n- 55\n- \n wann under wolcnum. \u00a0\u00a0\u00a0\u00a0 Weop eal gesceaft, \n cwi\u00f0don cyninges fyll. \u00a0\u00a0\u00a0\u00a0 Crist w\u00e6s on rode.\n Hw\u00e6\u00f0ere \u00fe\u00e6r fuse \u00a0\u00a0\u00a0\u00a0 feorran cwoman\n to \u00feam \u00e6\u00f0elinge. \u00a0\u00a0\u00a0\u00a0 Ic \u00fe\u00e6t eall beheold.\n Sare ic w\u00e6s mid sorgum gedrefed, \u00a0\u00a0\u00a0\u00a0 hnag ic hw\u00e6\u00f0re \u00feam secgum to handa,\n- 60\n- \n ea\u00f0mod elne mycle. \u00a0\u00a0\u00a0\u00a0 Genamon hie \u00fe\u00e6r \u00e6lmihtigne god, \n ahofon hine of \u00f0am hefian wite. \u00a0\u00a0\u00a0\u00a0 Forleton me \u00fea hilderincas\n standan steame bedrifenne; \u00a0\u00a0\u00a0\u00a0 eall ic w\u00e6s mid str\u00e6lum forwundod.\n Aledon hie \u00f0\u00e6r limwerigne, \u00a0\u00a0\u00a0\u00a0 gestodon him \u00e6t his lices heafdum,\n beheoldon hie \u00f0\u00e6r heofenes dryhten, \u00a0\u00a0\u00a0\u00a0 ond he hine \u00f0\u00e6r hwile reste,\n- 65\n- \n me\u00f0e \u00e6fter \u00f0am miclan gewinne. \u00a0\u00a0\u00a0\u00a0 Ongunnon him \u00fea moldern wyrcan \n beornas on banan gesyh\u00f0e; \u00a0\u00a0\u00a0\u00a0 curfon hie \u00f0\u00e6t of beorhtan stane,\n gesetton hie \u00f0\u00e6ron sigora wealdend. \u00a0\u00a0\u00a0\u00a0 Ongunnon him \u00fea sorhleo\u00f0 galan\n earme on \u00fea \u00e6fentide, \u00a0\u00a0\u00a0\u00a0 \u00fea hie woldon eft si\u00f0ian,\n me\u00f0e fram \u00feam m\u00e6ran \u00feeodne. \u00a0\u00a0\u00a0\u00a0 Reste he \u00f0\u00e6r m\u00e6te weorode.\n- 70\n- \n Hw\u00e6\u00f0ere we \u00f0\u00e6r greotende \u00a0\u00a0\u00a0\u00a0 gode hwile \n stodon on sta\u00f0ole, \u00a0\u00a0\u00a0\u00a0 sy\u00f0\u00f0an stefn up gewat\n hilderinca. \u00a0\u00a0\u00a0\u00a0 Hr\u00e6w colode,\n f\u00e6ger feorgbold. \u00a0\u00a0\u00a0\u00a0 \u00fea us man fyllan ongan\n ealle to eor\u00f0an. \u00a0\u00a0\u00a0\u00a0 \u00fe\u00e6t w\u00e6s egeslic wyrd!\n- 75\n- \n Bedealf us man on deopan sea\u00fee. \u00a0\u00a0\u00a0\u00a0 Hw\u00e6\u00f0re me \u00fe\u00e6r dryhtnes \u00feegnas, \n freondas gefrunon,\n ond gyredon me \u00a0\u00a0\u00a0\u00a0 golde ond seolfre.\n Nu \u00f0u miht gehyran, \u00a0\u00a0\u00a0\u00a0 h\u00e6le\u00f0 min se leofa,\n \u00fe\u00e6t ic bealuwara weorc \u00a0\u00a0\u00a0\u00a0 gebiden h\u00e6bbe,\n- 80\n- \n sarra sorga. \u00a0\u00a0\u00a0\u00a0 Is nu s\u00e6l cumen \n \u00fe\u00e6t me weor\u00f0ia\u00f0 \u00a0\u00a0\u00a0\u00a0 wide ond side\n menn ofer moldan, \u00a0\u00a0\u00a0\u00a0 ond eall \u00feeos m\u00e6re gesceaft,\n gebidda\u00fe him to \u00feyssum beacne. \u00a0\u00a0\u00a0\u00a0 On me bearn godes\n \u00ferowode hwile. \u00a0\u00a0\u00a0\u00a0 For\u00fean ic \u00ferymf\u00e6st nu\n- 85\n- \n hlifige under heofenum, \u00a0\u00a0\u00a0\u00a0 ond ic h\u00e6lan m\u00e6g \n \u00e6ghwylcne anra, \u00a0\u00a0\u00a0\u00a0 \u00feara \u00fee him bi\u00f0 egesa to me.\n Iu ic w\u00e6s geworden \u00a0\u00a0\u00a0\u00a0 wita heardost,\n leodum la\u00f0ost, \u00a0\u00a0\u00a0\u00a0 \u00e6r\u00fean ic him lifes weg\n rihtne gerymde, \u00a0\u00a0\u00a0\u00a0 reordberendum.\n- 90\n- \n Hw\u00e6t, me \u00fea geweor\u00f0ode \u00a0\u00a0\u00a0\u00a0 wuldres ealdor \n ofer holmwudu, \u00a0\u00a0\u00a0\u00a0 heofonrices weard!\n Swylce swa he his modor eac, \u00a0\u00a0\u00a0\u00a0 Marian sylfe,\n \u00e6lmihtig god \u00a0\u00a0\u00a0\u00a0 for ealle menn\n geweor\u00f0ode \u00a0\u00a0\u00a0\u00a0 ofer eall wifa cynn.\n- 95\n- \n Nu ic \u00fee hate, \u00a0\u00a0\u00a0\u00a0 h\u00e6le\u00f0 min se leofa, \n \u00fe\u00e6t \u00f0u \u00feas gesyh\u00f0e \u00a0\u00a0\u00a0\u00a0 secge mannum,\n onwreoh wordum \u00a0\u00a0\u00a0\u00a0 \u00fe\u00e6t hit is wuldres beam,\n se \u00f0e \u00e6lmihtig god \u00a0\u00a0\u00a0\u00a0 on \u00ferowode\n for mancynnes \u00a0\u00a0\u00a0\u00a0 manegum synnum\n- 100\n- \n ond Adomes \u00a0\u00a0\u00a0\u00a0 ealdgewyrhtum. \n Dea\u00f0 he \u00fe\u00e6r byrigde, \u00a0\u00a0\u00a0\u00a0 hw\u00e6\u00f0ere eft dryhten aras\n mid his miclan mihte \u00a0\u00a0\u00a0\u00a0 mannum to helpe.\n He \u00f0a on heofenas astag. \u00a0\u00a0\u00a0\u00a0 Hider eft funda\u00fe\n on \u00feysne middangeard \u00a0\u00a0\u00a0\u00a0 mancynn secan\n- 105\n- \n on domd\u00e6ge \u00a0\u00a0\u00a0\u00a0 dryhten sylfa, \n \u00e6lmihtig god, \u00a0\u00a0\u00a0\u00a0 ond his englas mid,\n \u00fe\u00e6t he \u00feonne wile deman, \u00a0\u00a0\u00a0\u00a0 se ah domes geweald,\n anra gehwylcum \u00a0\u00a0\u00a0\u00a0 swa he him \u00e6rur her\n on \u00feyssum l\u00e6num \u00a0\u00a0\u00a0\u00a0 life geearna\u00fe.\n- 110\n- \n Ne m\u00e6g \u00fe\u00e6r \u00e6nig \u00a0\u00a0\u00a0\u00a0 unforht wesan \n for \u00feam worde \u00a0\u00a0\u00a0\u00a0 \u00fee se wealdend cwy\u00f0.\n Frine\u00f0 he for \u00fe\u00e6re m\u00e6nige \u00a0\u00a0\u00a0\u00a0 hw\u00e6r se man sie,\n se \u00f0e for dryhtnes naman \u00a0\u00a0\u00a0\u00a0 dea\u00f0es wolde\n biteres onbyrigan, \u00a0\u00a0\u00a0\u00a0 swa he \u00e6r on \u00f0am beame dyde.\n- 115\n- \n Ac hie \u00feonne forhtia\u00f0, \u00a0\u00a0\u00a0\u00a0 ond fea \u00feenca\u00fe \n hw\u00e6t hie to Criste \u00a0\u00a0\u00a0\u00a0 cwe\u00f0an onginnen.\n Ne \u00feearf \u00f0\u00e6r \u00feonne \u00e6nig \u00a0\u00a0\u00a0\u00a0 anforht wesan\n \u00fee him \u00e6r in breostum bere\u00f0 \u00a0\u00a0\u00a0\u00a0 beacna selest,\n ac \u00f0urh \u00f0a rode sceal \u00a0\u00a0\u00a0\u00a0 rice gesecan\n- 120\n- \n of eor\u00f0wege \u00a0\u00a0\u00a0\u00a0 \u00e6ghwylc sawl, \n seo \u00fee mid wealdende \u00a0\u00a0\u00a0\u00a0 wunian \u00feence\u00f0.\"\n Geb\u00e6d ic me \u00fea to \u00fean beame \u00a0\u00a0\u00a0\u00a0 bli\u00f0e mode,\n elne mycle, \u00a0\u00a0\u00a0\u00a0 \u00fe\u00e6r ic ana w\u00e6s\n m\u00e6te werede. \u00a0\u00a0\u00a0\u00a0 W\u00e6s modsefa\n- 125\n- \n afysed on for\u00f0wege, \u00a0\u00a0\u00a0\u00a0 feala ealra gebad \n langunghwila. \u00a0\u00a0\u00a0\u00a0 Is me nu lifes hyht\n \u00fe\u00e6t ic \u00feone sigebeam \u00a0\u00a0\u00a0\u00a0 secan mote\n ana oftor \u00a0\u00a0\u00a0\u00a0 \u00feonne ealle men,\n well weor\u00feian. \u00a0\u00a0\u00a0\u00a0 Me is willa to \u00f0am\n- 130\n- \n mycel on mode, \u00a0\u00a0\u00a0\u00a0 ond min mundbyrd is \n geriht to \u00fe\u00e6re rode. \u00a0\u00a0\u00a0\u00a0 Nah ic ricra feala\n freonda on foldan, \u00a0\u00a0\u00a0\u00a0 ac hie for\u00f0 heonon\n gewiton of worulde dreamum, \u00a0\u00a0\u00a0\u00a0 sohton him wuldres cyning,\n lifia\u00fe nu on heofenum \u00a0\u00a0\u00a0\u00a0 mid heahf\u00e6dere,\n- 135\n- \n wunia\u00fe on wuldre, \u00a0\u00a0\u00a0\u00a0 ond ic wene me \n daga gehwylce \u00a0\u00a0\u00a0\u00a0 hw\u00e6nne me dryhtnes rod,\n \u00fee ic her on eor\u00f0an \u00a0\u00a0\u00a0\u00a0 \u00e6r sceawode,\n on \u00feysson l\u00e6nan \u00a0\u00a0\u00a0\u00a0 life gefetige\n ond me \u00feonne gebringe \u00a0\u00a0\u00a0\u00a0 \u00fe\u00e6r is blis mycel,\n- 140\n- \n dream on heofonum, \u00a0\u00a0\u00a0\u00a0 \u00fe\u00e6r is dryhtnes folc \n geseted to symle, \u00a0\u00a0\u00a0\u00a0 \u00fe\u00e6r is singal blis,\n ond me \u00feonne asette \u00a0\u00a0\u00a0\u00a0 \u00fe\u00e6r ic sy\u00fe\u00fean mot\n wunian on wuldre, \u00a0\u00a0\u00a0\u00a0 well mid \u00feam halgum\n dreames brucan. \u00a0\u00a0\u00a0\u00a0 Si me dryhten freond,\n- 145\n- \n se \u00f0e her on eor\u00fean \u00a0\u00a0\u00a0\u00a0 \u00e6r \u00ferowode \n on \u00feam gealgtreowe \u00a0\u00a0\u00a0\u00a0 for guman synnum.\n He us onlysde \u00a0\u00a0\u00a0\u00a0 ond us lif forgeaf,\n heofonlicne ham. \u00a0\u00a0\u00a0\u00a0 Hiht w\u00e6s geniwad\n mid bledum ond mid blisse \u00a0\u00a0\u00a0\u00a0 \u00feam \u00fee \u00fe\u00e6r bryne \u00feolodan.\n- 150\n- \n Se sunu w\u00e6s sigorf\u00e6st \u00a0\u00a0\u00a0\u00a0 on \u00feam si\u00f0fate, \n mihtig ond spedig, \u00a0\u00a0\u00a0\u00a0 \u00fea he mid manigeo com,\n gasta weorode, \u00a0\u00a0\u00a0\u00a0 on godes rice,\n anwealda \u00e6lmihtig, \u00a0\u00a0\u00a0\u00a0 englum to blisse\n ond eallum \u00f0am halgum \u00a0\u00a0\u00a0\u00a0 \u00feam \u00fee on heofonum \u00e6r\n- 155\n- \n wunedon on wuldre, \u00a0\u00a0\u00a0\u00a0 \u00fea heora wealdend cwom, \n \u00e6lmihtig god, \u00a0\u00a0\u00a0\u00a0 \u00fe\u00e6r his e\u00f0el w\u00e6s.","title":"Dream of the Rood","type":"page"}