{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a03_01.htm","path":"neu/ascp/a03_01.htm","source_url":"https://sacred-texts.com/neu/ascp/a03_01.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Next\u00a0\n \n \n Christ A, B, C\n Verse Indeterminate Saxon\n \n - \n \u00a0 \u00a0 \u00a0 \u00a0 cyninge. \n \u00f0u eart se weallstan \u00a0 \u00a0 \u00a0 \u00a0 \u00fee \u00f0a wyrhtan iu\n wi\u00f0wurpon to weorce. \u00a0 \u00a0 \u00a0 \u00a0 Wel \u00fee gerise\u00f0\n \u00fe\u00e6t \u00feu heafod sie \u00a0 \u00a0 \u00a0 \u00a0 healle m\u00e6rre,\n- 5\n- \n ond gesomnige \u00a0 \u00a0 \u00a0 \u00a0 side weallas \n f\u00e6ste gefoge, \u00a0 \u00a0 \u00a0 \u00a0 flint unbr\u00e6cne,\n \u00fe\u00e6t geond eor\u00f0b... ...g eall \u00a0 \u00a0 \u00a0 \u00a0 eagna gesih\u00fee\n wundrien to worlde \u00a0 \u00a0 \u00a0 \u00a0 wuldres ealdor.\n Gesweotula nu \u00feurh searocr\u00e6ft \u00a0 \u00a0 \u00a0 \u00a0 \u00fein sylfes weorc,\n- 10\n- \n so\u00f0f\u00e6st, sigorbeorht, \u00a0 \u00a0 \u00a0 \u00a0 ond sona forl\u00e6t \n weall wi\u00f0 wealle. \u00a0 \u00a0 \u00a0 \u00a0 Nu is \u00feam weorce \u00feearf\n \u00fe\u00e6t se cr\u00e6ftga cume \u00a0 \u00a0 \u00a0 \u00a0 ond se cyning sylfa,\n ond \u00feonne gebete, \u00a0 \u00a0 \u00a0 \u00a0 nu gebrosnad is,\n hus under hrofe. \u00a0 \u00a0 \u00a0 \u00a0 He \u00fe\u00e6t hra gescop,\n- 15\n- \n leomo l\u00e6mena; \u00a0 \u00a0 \u00a0 \u00a0 nu sceal liffrea \n \u00feone wergan heap \u00a0 \u00a0 \u00a0 \u00a0 wra\u00feum ahreddan,\n earme from egsan, \u00a0 \u00a0 \u00a0 \u00a0 swa he oft dyde.\n Eala \u00feu reccend \u00a0 \u00a0 \u00a0 \u00a0 ond \u00feu riht cyning,\n se \u00fee locan healde\u00f0, \u00a0 \u00a0 \u00a0 \u00a0 lif ontyne\u00f0,\n- 20\n- \n eadga... upwegas, \u00a0 \u00a0 \u00a0 \u00a0 o\u00ferum forwyrne\u00f0 \n wlitigan wilsi\u00fees, \u00a0 \u00a0 \u00a0 \u00a0 gif his weorc ne deag.\n Huru we for \u00feearfe \u00a0 \u00a0 \u00a0 \u00a0 \u00feas word spreca\u00f0,\n ond m... ...gia\u00f0 \u00a0 \u00a0 \u00a0 \u00a0 \u00feone \u00fee mon gescop\n \u00fe\u00e6t he ne ...ete... \u00a0 \u00a0 \u00a0 \u00a0 ...ceose weor\u00f0an\n- 25\n- \n cearfulra \u00feing, \u00a0 \u00a0 \u00a0 \u00a0 \u00fee we in carcerne \n sitta\u00f0 sorgende, \u00a0 \u00a0 \u00a0 \u00a0 sunnan wena\u00f0,\n hwonne us liffrea \u00a0 \u00a0 \u00a0 \u00a0 leoht ontyne,\n weor\u00f0e ussum mode \u00a0 \u00a0 \u00a0 \u00a0 to mundboran,\n ond \u00fe\u00e6t tydre gewitt \u00a0 \u00a0 \u00a0 \u00a0 tire bewinde,\n- 30\n- \n gedo usic \u00fe\u00e6s wyr\u00f0e, \u00a0 \u00a0 \u00a0 \u00a0 \u00fee he to wuldre forlet, \n \u00fea we heanlice \u00a0 \u00a0 \u00a0 \u00a0 hweorfan sceoldan\n to \u00feis enge lond, \u00a0 \u00a0 \u00a0 \u00a0 e\u00f0le bescyrede.\n For\u00feon secgan m\u00e6g, \u00a0 \u00a0 \u00a0 \u00a0 se \u00f0e so\u00f0 sprice\u00f0,\n \u00fe\u00e6t he ahredde, \u00a0 \u00a0 \u00a0 \u00a0 \u00fea forhwyrfed w\u00e6s,\n- 35\n- \n frumcyn fira. \u00a0 \u00a0 \u00a0 \u00a0 W\u00e6s seo f\u00e6mne geong, \n m\u00e6g\u00f0 manes leas, \u00a0 \u00a0 \u00a0 \u00a0 \u00fee he him to meder geceas;\n \u00fe\u00e6t w\u00e6s geworden \u00a0 \u00a0 \u00a0 \u00a0 butan weres frigum,\n \u00fe\u00e6t \u00feurh bearnes gebyrd \u00a0 \u00a0 \u00a0 \u00a0 bryd eacen wear\u00f0.\n N\u00e6nig efenlic \u00feam, \u00a0 \u00a0 \u00a0 \u00a0 \u00e6r ne si\u00fe\u00fean,\n- 40\n- \n in worlde gewear\u00f0 \u00a0 \u00a0 \u00a0 \u00a0 wifes gearnung; \n \u00fe\u00e6t degol w\u00e6s, \u00a0 \u00a0 \u00a0 \u00a0 dryhtnes geryne.\n Eal giofu g\u00e6stlic \u00a0 \u00a0 \u00a0 \u00a0 grundsceat geondspreot;\n \u00fe\u00e6r wisna fela \u00a0 \u00a0 \u00a0 \u00a0 wear\u00f0 inlihted\n lare longsume \u00a0 \u00a0 \u00a0 \u00a0 \u00feurh lifes fruman\n- 45\n- \n \u00fee \u00e6r under ho\u00f0man \u00a0 \u00a0 \u00a0 \u00a0 biholen l\u00e6gon, \n witgena wo\u00f0song, \u00a0 \u00a0 \u00a0 \u00a0 \u00fea se waldend cwom,\n se \u00fee reorda gehw\u00e6s \u00a0 \u00a0 \u00a0 \u00a0 ryne gemicla\u00f0\n \u00f0ara \u00fee geneahhe \u00a0 \u00a0 \u00a0 \u00a0 noman scyppendes\n \u00feurh horscne \u00a0 \u00a0 \u00a0 \u00a0 had hergan willa\u00f0.\n- 50\n- \n Eala sibbe gesih\u00f0, \u00a0 \u00a0 \u00a0 \u00a0 sancta Hierusalem, \n cynestola cyst, \u00a0 \u00a0 \u00a0 \u00a0 Cristes burglond,\n engla e\u00feelstol, \u00a0 \u00a0 \u00a0 \u00a0 ond \u00fea ane in \u00fee\n saule so\u00f0f\u00e6stra \u00a0 \u00a0 \u00a0 \u00a0 simle geresta\u00f0,\n wuldrum hremge. \u00a0 \u00a0 \u00a0 \u00a0 N\u00e6fre wommes tacn\n- 55\n- \n in \u00feam eardgearde \u00a0 \u00a0 \u00a0 \u00a0 eawed weor\u00fee\u00f0, \n ac \u00fee firina gehwylc \u00a0 \u00a0 \u00a0 \u00a0 feor abuge\u00f0,\n w\u00e6rg\u00f0o ond gewinnes. \u00a0 \u00a0 \u00a0 \u00a0 Bist to wuldre full\n halgan hyhtes, \u00a0 \u00a0 \u00a0 \u00a0 swa \u00feu gehaten eart.\n Sioh nu sylfa \u00fee geond \u00a0 \u00a0 \u00a0 \u00a0 \u00feas sidan gesceaft,\n- 60\n- \n swylce rodores hrof \u00a0 \u00a0 \u00a0 \u00a0 rume geondwlitan \n ymb healfa gehwone, \u00a0 \u00a0 \u00a0 \u00a0 hu \u00feec heofones cyning\n si\u00f0e gesece\u00f0, \u00a0 \u00a0 \u00a0 \u00a0 ond sylf cyme\u00f0,\n nime\u00f0 eard in \u00fee, \u00a0 \u00a0 \u00a0 \u00a0 swa hit \u00e6r gefyrn\n witgan wisf\u00e6ste \u00a0 \u00a0 \u00a0 \u00a0 wordum s\u00e6gdon,\n- 65\n- \n cy\u00f0don Cristes gebyrd, \u00a0 \u00a0 \u00a0 \u00a0 cw\u00e6don \u00fee to frofre, \n burga betlicast. \u00a0 \u00a0 \u00a0 \u00a0 Nu is \u00fe\u00e6t bearn cymen,\n aw\u00e6cned to wyrpe \u00a0 \u00a0 \u00a0 \u00a0 weorcum Ebrea,\n bringe\u00f0 blisse \u00fee, \u00a0 \u00a0 \u00a0 \u00a0 benda onlyse\u00f0\n ni\u00feum genedde. \u00a0 \u00a0 \u00a0 \u00a0 Nearo\u00feearfe conn,\n- 70\n- \n hu se earma sceal \u00a0 \u00a0 \u00a0 \u00a0 are gebidan. \n Eala wifa wynn \u00a0 \u00a0 \u00a0 \u00a0 geond wuldres \u00ferym,\n f\u00e6mne freolicast \u00a0 \u00a0 \u00a0 \u00a0 ofer ealne foldan sceat\n \u00fe\u00e6s \u00fee \u00e6fre sundbuend \u00a0 \u00a0 \u00a0 \u00a0 secgan hyrdon,\n arece us \u00fe\u00e6t geryne \u00a0 \u00a0 \u00a0 \u00a0 \u00fe\u00e6t \u00fee of roderum cwom,\n- 75\n- \n hu \u00feu eacnunge \u00a0 \u00a0 \u00a0 \u00a0 \u00e6fre onfenge \n bearnes \u00feurh gebyrde, \u00a0 \u00a0 \u00a0 \u00a0 ond \u00feone gebedscipe\n \u00e6fter monwisan \u00a0 \u00a0 \u00a0 \u00a0 mod ne cu\u00f0es.\n Ne we so\u00f0lice \u00a0 \u00a0 \u00a0 \u00a0 swylc ne gefrugnan\n in \u00e6rdagum \u00a0 \u00a0 \u00a0 \u00a0 \u00e6fre gelimpan,\n- 80\n- \n \u00fe\u00e6t \u00f0u in sundurgiefe \u00a0 \u00a0 \u00a0 \u00a0 swylce befenge, \n ne we \u00fe\u00e6re wyrde \u00a0 \u00a0 \u00a0 \u00a0 wenan \u00feurfon\n toweard in tide. \u00a0 \u00a0 \u00a0 \u00a0 Huru treow in \u00fee\n weor\u00f0licu wunade, \u00a0 \u00a0 \u00a0 \u00a0 nu \u00feu wuldres \u00ferym\n bosme geb\u00e6re, \u00a0 \u00a0 \u00a0 \u00a0 ond no gebrosnad wear\u00f0\n- 85\n- \n m\u00e6g\u00f0had se micla. \u00a0 \u00a0 \u00a0 \u00a0 Swa eal manna bearn \n sorgum sawa\u00f0, \u00a0 \u00a0 \u00a0 \u00a0 swa eft ripa\u00f0,\n cenna\u00f0 to cwealme. \u00a0 \u00a0 \u00a0 \u00a0 Cw\u00e6\u00f0 sio eadge m\u00e6g\n symle sigores full, \u00a0 \u00a0 \u00a0 \u00a0 sancta Maria:\n \"Hw\u00e6t is \u00feeos wundrung \u00a0 \u00a0 \u00a0 \u00a0 \u00fee ge wafia\u00f0,\n- 90\n- \n ond geomrende \u00a0 \u00a0 \u00a0 \u00a0 geh\u00feum m\u00e6na\u00f0, \n sunu Solim\u00e6 \u00a0 \u00a0 \u00a0 \u00a0 somod his dohtor?\n Fricga\u00f0 \u00feurh fyrwet \u00a0 \u00a0 \u00a0 \u00a0 hu ic f\u00e6mnan had,\n mund minne geheold, \u00a0 \u00a0 \u00a0 \u00a0 ond eac modor gewear\u00f0\n m\u00e6re meotudes suna. \u00a0 \u00a0 \u00a0 \u00a0 For\u00fean \u00fe\u00e6t monnum nis\n- 95\n- \n cu\u00f0 geryne, \u00a0 \u00a0 \u00a0 \u00a0 ac Crist onwrah \n in Dauides \u00a0 \u00a0 \u00a0 \u00a0 dyrre m\u00e6gan\n \u00fe\u00e6t is Euan scyld \u00a0 \u00a0 \u00a0 \u00a0 eal forpynded,\n w\u00e6rg\u00f0a aworpen, \u00a0 \u00a0 \u00a0 \u00a0 ond gewuldrad is\n se heanra had. \u00a0 \u00a0 \u00a0 \u00a0 Hyht is onfangen\n- 100\n- \n \u00fe\u00e6t nu bletsung mot \u00a0 \u00a0 \u00a0 \u00a0 b\u00e6m gem\u00e6ne, \n werum ond wifum, \u00a0 \u00a0 \u00a0 \u00a0 a to worulde for\u00f0\n in \u00feam uplican \u00a0 \u00a0 \u00a0 \u00a0 engla dreame\n mid so\u00f0f\u00e6der \u00a0 \u00a0 \u00a0 \u00a0 symle wunian.\"\n Eala earendel, \u00a0 \u00a0 \u00a0 \u00a0 engla beorhtast,\n- 105\n- \n ofer middangeard \u00a0 \u00a0 \u00a0 \u00a0 monnum sended, \n ond so\u00f0f\u00e6sta \u00a0 \u00a0 \u00a0 \u00a0 sunnan leoma,\n torht ofer tunglas, \u00a0 \u00a0 \u00a0 \u00a0 \u00feu tida gehwane\n of sylfum \u00fee \u00a0 \u00a0 \u00a0 \u00a0 symle inlihtes!\n Swa \u00feu, god of gode \u00a0 \u00a0 \u00a0 \u00a0 gearo acenned,\n- 110\n- \n sunu so\u00fean f\u00e6der, \u00a0 \u00a0 \u00a0 \u00a0 swegles in wuldre \n butan anginne \u00a0 \u00a0 \u00a0 \u00a0 \u00e6fre w\u00e6re,\n swa \u00feec nu for \u00feearfum \u00a0 \u00a0 \u00a0 \u00a0 \u00fein agen geweorc\n bide\u00f0 \u00feurh byldo, \u00a0 \u00a0 \u00a0 \u00a0 \u00fe\u00e6t \u00feu \u00fea beorhtan us\n sunnan onsende, \u00a0 \u00a0 \u00a0 \u00a0 ond \u00fee sylf cyme\n- 115\n- \n \u00fe\u00e6t \u00f0u inleohte \u00a0 \u00a0 \u00a0 \u00a0 \u00fea \u00fee longe \u00e6r, \n \u00ferosme be\u00feeahte \u00a0 \u00a0 \u00a0 \u00a0 ond in \u00feeostrum her,\n s\u00e6ton sinneahtes; \u00a0 \u00a0 \u00a0 \u00a0 synnum bifealdne\n deorc dea\u00fees sceadu \u00a0 \u00a0 \u00a0 \u00a0 dreogan sceoldan.\n Nu we hyhtfulle \u00a0 \u00a0 \u00a0 \u00a0 h\u00e6lo gelyfa\u00f0\n- 120\n- \n \u00feurh \u00fe\u00e6t word godes \u00a0 \u00a0 \u00a0 \u00a0 weorodum brungen, \n \u00fee on frym\u00f0e w\u00e6s \u00a0 \u00a0 \u00a0 \u00a0 f\u00e6der \u00e6lmihtigum\n efenece mid god, \u00a0 \u00a0 \u00a0 \u00a0 ond nu eft gewear\u00f0\n fl\u00e6sc firena leas, \u00a0 \u00a0 \u00a0 \u00a0 \u00fe\u00e6t seo f\u00e6mne geb\u00e6r\n geomrum to geoce. \u00a0 \u00a0 \u00a0 \u00a0 God w\u00e6s mid us\n- 125\n- \n gesewen butan synnum; \u00a0 \u00a0 \u00a0 \u00a0 somod eardedon \n mihtig meotudes bearn \u00a0 \u00a0 \u00a0 \u00a0 ond se monnes sunu\n ge\u00few\u00e6re on \u00feeode. \u00a0 \u00a0 \u00a0 \u00a0 We \u00fe\u00e6s \u00feonc magon\n secgan sigedryhtne \u00a0 \u00a0 \u00a0 \u00a0 symle bi gewyrhtum,\n \u00fe\u00e6s \u00fee he hine sylfne us \u00a0 \u00a0 \u00a0 \u00a0 sendan wolde.\n- 130\n- \n Eala g\u00e6sta god, \u00a0 \u00a0 \u00a0 \u00a0 hu \u00feu gleawlice \n mid noman ryhte \u00a0 \u00a0 \u00a0 \u00a0 nemned w\u00e6re\n Emmanuhel, \u00a0 \u00a0 \u00a0 \u00a0 swa hit engel gecw\u00e6\u00f0\n \u00e6rest on Ebresc! \u00a0 \u00a0 \u00a0 \u00a0 \u00fe\u00e6t is eft gereht,\n rume bi gerynum: \u00a0 \u00a0 \u00a0 \u00a0 \"Nu is rodera weard,\n- 135\n- \n god sylfa mid us.\" \u00a0 \u00a0 \u00a0 \u00a0 Swa \u00fe\u00e6t gomele gefyrn \n ealra cyninga cyning \u00a0 \u00a0 \u00a0 \u00a0 ond \u00feone cl\u00e6nan eac\n sacerd so\u00f0lice \u00a0 \u00a0 \u00a0 \u00a0 s\u00e6gdon toweard,\n swa se m\u00e6ra iu, \u00a0 \u00a0 \u00a0 \u00a0 Melchisedech,\n gleaw in g\u00e6ste \u00a0 \u00a0 \u00a0 \u00a0 god\u00ferym onwrah\n- 140\n- \n eces alwaldan. \u00a0 \u00a0 \u00a0 \u00a0 Se w\u00e6s \u00e6 bringend, \n lara l\u00e6dend, \u00a0 \u00a0 \u00a0 \u00a0 \u00feam longe his\n hyhtan hidercyme, \u00a0 \u00a0 \u00a0 \u00a0 swa him gehaten w\u00e6s,\n \u00fe\u00e6tte sunu meotudes \u00a0 \u00a0 \u00a0 \u00a0 sylfa wolde\n gef\u00e6lsian \u00a0 \u00a0 \u00a0 \u00a0 foldan m\u00e6g\u00f0e,\n- 145\n- \n swylce grundas eac \u00a0 \u00a0 \u00a0 \u00a0 g\u00e6stes m\u00e6gne \n si\u00fee gesecan. \u00a0 \u00a0 \u00a0 \u00a0 Nu hie softe \u00fe\u00e6s\n bidon in bendum \u00a0 \u00a0 \u00a0 \u00a0 hwonne bearn godes\n cwome to cearigum. \u00a0 \u00a0 \u00a0 \u00a0 For\u00feon cw\u00e6don swa,\n suslum gesl\u00e6hte: \u00a0 \u00a0 \u00a0 \u00a0 \"Nu \u00feu sylfa cum,\n- 150\n- \n heofones heahcyning. \u00a0 \u00a0 \u00a0 \u00a0 Bring us h\u00e6lolif, \n werigum wite\u00feeowum, \u00a0 \u00a0 \u00a0 \u00a0 wope forcymenum,\n bitrum brynetearum. \u00a0 \u00a0 \u00a0 \u00a0 Is seo bot gelong\n eal \u00e6t \u00fee anum \u00a0 \u00a0 \u00a0 \u00a0 ...... ofer\u00feearfum.\n H\u00e6ftas hygegeomre \u00a0 \u00a0 \u00a0 \u00a0 hider ...es;\n- 155\n- \n ne l\u00e6t \u00fee behindan, \u00a0 \u00a0 \u00a0 \u00a0 \u00feonne \u00feu heonan cyrre, \n m\u00e6nigo \u00feus micle, \u00a0 \u00a0 \u00a0 \u00a0 ac \u00feu miltse on us\n gecy\u00f0 cynelice, \u00a0 \u00a0 \u00a0 \u00a0 Crist nergende,\n wuldres \u00e6\u00feeling, \u00a0 \u00a0 \u00a0 \u00a0 ne l\u00e6t awyrgde ofer us\n onwald agan. \u00a0 \u00a0 \u00a0 \u00a0 L\u00e6f us ecne gefean\n- 160\n- \n wuldres \u00feines, \u00a0 \u00a0 \u00a0 \u00a0 \u00fe\u00e6t \u00feec weor\u00f0ien, \n weoroda wuldorcyning, \u00a0 \u00a0 \u00a0 \u00a0 \u00fea \u00feu geworhtes \u00e6r\n hondum \u00feinum. \u00a0 \u00a0 \u00a0 \u00a0 \u00feu in heannissum\n wunast wideferh \u00a0 \u00a0 \u00a0 \u00a0 mid waldend f\u00e6der.\"\n \"Eala Ioseph min, \u00a0 \u00a0 \u00a0 \u00a0 Iacobes bearn,\n- 165\n- \n m\u00e6g Dauides, \u00a0 \u00a0 \u00a0 \u00a0 m\u00e6ran cyninges, \n nu \u00feu freode scealt \u00a0 \u00a0 \u00a0 \u00a0 f\u00e6ste ged\u00e6lan,\n al\u00e6tan lufan mine!\" \u00a0 \u00a0 \u00a0 \u00a0 \"Ic lungre eam\n deope gedrefed, \u00a0 \u00a0 \u00a0 \u00a0 dome bereafod,\n for\u00f0on ic worn for \u00fee \u00a0 \u00a0 \u00a0 \u00a0 worde h\u00e6bbe\n- 170\n- \n sidra sorga \u00a0 \u00a0 \u00a0 \u00a0 ond sarcwida, \n hearmes gehyred, \u00a0 \u00a0 \u00a0 \u00a0 ond me hosp spreca\u00f0,\n tornworda fela. \u00a0 \u00a0 \u00a0 \u00a0 Ic tearas sceal\n geotan geomormod. \u00a0 \u00a0 \u00a0 \u00a0 God ea\u00fee m\u00e6g\n geh\u00e6lan hygesorge \u00a0 \u00a0 \u00a0 \u00a0 heortan minre,\n- 175\n- \n afrefran feasceaftne. \u00a0 \u00a0 \u00a0 \u00a0 Eala f\u00e6mne geong, \n m\u00e6g\u00f0 Maria!\" \u00a0 \u00a0 \u00a0 \u00a0 Hw\u00e6t bemurnest \u00f0u,\n cleopast cearigende? \u00a0 \u00a0 \u00a0 \u00a0 Ne ic culpan in \u00fee,\n incan \u00e6nigne, \u00a0 \u00a0 \u00a0 \u00a0 \u00e6fre onfunde,\n womma geworhtra, \u00a0 \u00a0 \u00a0 \u00a0 ond \u00feu \u00fea word spricest\n- 180\n- \n swa \u00feu sylfa sie \u00a0 \u00a0 \u00a0 \u00a0 synna gehwylcre \n firena gefylled.\" \u00a0 \u00a0 \u00a0 \u00a0 Ic to fela h\u00e6bbe\n \u00fe\u00e6s byrdscypes \u00a0 \u00a0 \u00a0 \u00a0 bealwa onfongen!\n Hu m\u00e6g ic ladigan \u00a0 \u00a0 \u00a0 \u00a0 la\u00fean spr\u00e6ce,\n o\u00fe\u00fee ondsware \u00a0 \u00a0 \u00a0 \u00a0 \u00e6nige findan\n- 185\n- \n wra\u00feum towi\u00feere? \u00a0 \u00a0 \u00a0 \u00a0 Is \u00fe\u00e6t wide cu\u00f0 \n \u00fe\u00e6t ic of \u00feam torhtan \u00a0 \u00a0 \u00a0 \u00a0 temple dryhtnes\n onfeng freolice \u00a0 \u00a0 \u00a0 \u00a0 f\u00e6mnan cl\u00e6ne,\n womma lease, \u00a0 \u00a0 \u00a0 \u00a0 ond nu gehwyrfed is\n \u00feurh nathwylces. \u00a0 \u00a0 \u00a0 \u00a0 Me naw\u00feer deag,\n- 190\n- \n secge ne swige. \u00a0 \u00a0 \u00a0 \u00a0 Gif ic so\u00f0 sprece, \n \u00feonne sceal Dauides \u00a0 \u00a0 \u00a0 \u00a0 dohtor sweltan,\n stanum astyrfed. \u00a0 \u00a0 \u00a0 \u00a0 Gen strengre is\n \u00fe\u00e6t ic mor\u00feor hele; \u00a0 \u00a0 \u00a0 \u00a0 scyle manswara,\n la\u00fe leoda gehwam \u00a0 \u00a0 \u00a0 \u00a0 lifgan si\u00fe\u00fean,\n- 195\n- \n fraco\u00f0 in folcum.\" \u00a0 \u00a0 \u00a0 \u00a0 \u00fea seo f\u00e6mne onwrah \n ryhtgeryno, \u00a0 \u00a0 \u00a0 \u00a0 ond \u00feus reordade:\n \"So\u00f0 ic secge \u00a0 \u00a0 \u00a0 \u00a0 \u00feurh sunu meotudes,\n g\u00e6sta geocend, \u00a0 \u00a0 \u00a0 \u00a0 \u00fe\u00e6t ic gen ne conn\n \u00feurh gem\u00e6cscipe \u00a0 \u00a0 \u00a0 \u00a0 monnes ower,\n- 200\n- \n \u00e6nges on eor\u00f0an, \u00a0 \u00a0 \u00a0 \u00a0 ac me eaden wear\u00f0, \n geongre in geardum, \u00a0 \u00a0 \u00a0 \u00a0 \u00fe\u00e6t me Gabrihel,\n heofones heagengel, \u00a0 \u00a0 \u00a0 \u00a0 h\u00e6lo gebodade.\n S\u00e6gde so\u00f0lice \u00a0 \u00a0 \u00a0 \u00a0 \u00fe\u00e6t me swegles g\u00e6st\n leoman onlyhte, \u00a0 \u00a0 \u00a0 \u00a0 sceolde ic lifes \u00ferym\n- 205\n- \n geberan, beorhtne sunu, \u00a0 \u00a0 \u00a0 \u00a0 bearn eacen godes, \n torhtes tirfruman. \u00a0 \u00a0 \u00a0 \u00a0 Nu ic his tempel eam\n gefremed butan facne, \u00a0 \u00a0 \u00a0 \u00a0 in me frofre g\u00e6st\n geeardode. \u00a0 \u00a0 \u00a0 \u00a0 Nu \u00feu ealle forl\u00e6t\n sare sorgceare. \u00a0 \u00a0 \u00a0 \u00a0 Saga ecne \u00feonc\n- 210\n- \n m\u00e6rum meotodes sunu \u00a0 \u00a0 \u00a0 \u00a0 \u00fe\u00e6t ic his modor gewear\u00f0, \n f\u00e6mne for\u00f0 se\u00feeah, \u00a0 \u00a0 \u00a0 \u00a0 ond \u00feu f\u00e6der cweden\n woruldcund bi wene; \u00a0 \u00a0 \u00a0 \u00a0 sceolde witedom\n in him sylfum beon \u00a0 \u00a0 \u00a0 \u00a0 so\u00f0e gefylled.\"\n Eala \u00feu so\u00f0a \u00a0 \u00a0 \u00a0 \u00a0 ond \u00feu sibsuma\n- 215\n- \n ealra cyninga cyning, \u00a0 \u00a0 \u00a0 \u00a0 Crist \u00e6lmihtig, \n hu \u00feu \u00e6r w\u00e6re \u00a0 \u00a0 \u00a0 \u00a0 eallum geworden\n worulde \u00ferymmum \u00a0 \u00a0 \u00a0 \u00a0 mid \u00feinne wuldorf\u00e6der\n cild acenned \u00a0 \u00a0 \u00a0 \u00a0 \u00feurh his cr\u00e6ft ond meaht!\n Nis \u00e6nig nu \u00a0 \u00a0 \u00a0 \u00a0 eorl under lyfte,\n- 220\n- \n secg searo\u00feoncol, \u00a0 \u00a0 \u00a0 \u00a0 to \u00fe\u00e6s swi\u00f0e gleaw \n \u00fee \u00fe\u00e6t asecgan m\u00e6ge \u00a0 \u00a0 \u00a0 \u00a0 sundbuendum,\n areccan mid ryhte, \u00a0 \u00a0 \u00a0 \u00a0 hu \u00fee rodera weard\n \u00e6t frym\u00f0e genom \u00a0 \u00a0 \u00a0 \u00a0 him to freobearne.\n \u00fe\u00e6t w\u00e6s \u00feara \u00feinga \u00a0 \u00a0 \u00a0 \u00a0 \u00fee her \u00feeoda cynn\n- 225\n- \n gefrugnen mid folcum \u00a0 \u00a0 \u00a0 \u00a0 \u00e6t fruman \u00e6rest \n geworden under wolcnum, \u00a0 \u00a0 \u00a0 \u00a0 \u00fe\u00e6t witig god,\n lifes ordfruma, \u00a0 \u00a0 \u00a0 \u00a0 leoht ond \u00feystro\n ged\u00e6lde dryhtlice, \u00a0 \u00a0 \u00a0 \u00a0 ond him w\u00e6s domes geweald,\n ond \u00fea wisan abead \u00a0 \u00a0 \u00a0 \u00a0 weoroda ealdor:\n- 230\n- \n \"Nu sie geworden for\u00fe \u00a0 \u00a0 \u00a0 \u00a0 a to widan feore \n leoht, lixende gefea, \u00a0 \u00a0 \u00a0 \u00a0 lifgendra gehwam\n \u00fee in cneorissum \u00a0 \u00a0 \u00a0 \u00a0 cende weor\u00f0en.\"\n Ond \u00fea sona gelomp, \u00a0 \u00a0 \u00a0 \u00a0 \u00fea hit swa sceolde,\n leoma leohtade \u00a0 \u00a0 \u00a0 \u00a0 leoda m\u00e6g\u00feum,\n- 235\n- \n torht mid tunglum, \u00a0 \u00a0 \u00a0 \u00a0 \u00e6fter \u00feon tida bigong. \n Sylfa sette \u00a0 \u00a0 \u00a0 \u00a0 \u00fe\u00e6t \u00feu sunu w\u00e6re\n efeneardigende \u00a0 \u00a0 \u00a0 \u00a0 mid \u00feinne engan frean\n \u00e6r\u00feon oht \u00feisses \u00a0 \u00a0 \u00a0 \u00a0 \u00e6fre gewurde.\n \u00feu eart seo snyttro \u00a0 \u00a0 \u00a0 \u00a0 \u00fee \u00feas sidan gesceaft\n- 240\n- \n mid \u00fei waldende \u00a0 \u00a0 \u00a0 \u00a0 worhtes ealle. \n For\u00feon nis \u00e6nig \u00fe\u00e6s horsc, \u00a0 \u00a0 \u00a0 \u00a0 ne \u00fe\u00e6s hygecr\u00e6ftig,\n \u00fee \u00fein fromcyn m\u00e6ge \u00a0 \u00a0 \u00a0 \u00a0 fira bearnum\n sweotule gese\u00fean. \u00a0 \u00a0 \u00a0 \u00a0 Cum, nu, sigores weard,\n meotod moncynnes, \u00a0 \u00a0 \u00a0 \u00a0 ond \u00feine miltse her\n- 245\n- \n arf\u00e6st ywe! \u00a0 \u00a0 \u00a0 \u00a0 Us is eallum neod \n \u00fe\u00e6t we \u00fein medrencynn \u00a0 \u00a0 \u00a0 \u00a0 motan cunnan,\n ryhtgeryno, \u00a0 \u00a0 \u00a0 \u00a0 nu we areccan ne m\u00e6gon\n \u00fe\u00e6t f\u00e6drencynn \u00a0 \u00a0 \u00a0 \u00a0 fier owihte.\n \u00feu \u00feisne middangeard \u00a0 \u00a0 \u00a0 \u00a0 milde geblissa\n- 250\n- \n \u00feurh \u00f0inne hercyme, \u00a0 \u00a0 \u00a0 \u00a0 h\u00e6lende Crist, \n ond \u00fea gyldnan geatu, \u00a0 \u00a0 \u00a0 \u00a0 \u00fee in geardagum\n ful longe \u00e6r \u00a0 \u00a0 \u00a0 \u00a0 bilocen stodan,\n heofona heahfrea, \u00a0 \u00a0 \u00a0 \u00a0 hat ontynan,\n ond usic \u00feonne gesece \u00a0 \u00a0 \u00a0 \u00a0 \u00feurh \u00fein sylfes gong\n- 255\n- \n ea\u00f0mod to eor\u00fean. \u00a0 \u00a0 \u00a0 \u00a0 Us is \u00feinra arna \u00feearf! \n Hafa\u00f0 se awyrgda \u00a0 \u00a0 \u00a0 \u00a0 wulf tostenced,\n deor d\u00e6dscua, \u00a0 \u00a0 \u00a0 \u00a0 dryhten, \u00fein eowde,\n wide towrecene. \u00a0 \u00a0 \u00a0 \u00a0 \u00fe\u00e6t \u00f0u, waldend, \u00e6r\n blode gebohtes, \u00a0 \u00a0 \u00a0 \u00a0 \u00fe\u00e6t se bealofulla\n- 260\n- \n hyne\u00f0 heardlice, \u00a0 \u00a0 \u00a0 \u00a0 ond him on h\u00e6ft nime\u00f0 \n ofer usse nioda lust. \u00a0 \u00a0 \u00a0 \u00a0 For\u00feon we, nergend, \u00fee\n bidda\u00f0 geornlice \u00a0 \u00a0 \u00a0 \u00a0 breostgehygdum\n \u00fe\u00e6t \u00feu hr\u00e6dlice \u00a0 \u00a0 \u00a0 \u00a0 helpe gefremme\n wergum wreccan, \u00a0 \u00a0 \u00a0 \u00a0 \u00fe\u00e6t se wites bona\n- 265\n- \n in helle grund \u00a0 \u00a0 \u00a0 \u00a0 hean gedreose, \n ond \u00fein hondgeweorc, \u00a0 \u00a0 \u00a0 \u00a0 h\u00e6le\u00fea scyppend,\n mote arisan \u00a0 \u00a0 \u00a0 \u00a0 ond on ryht cuman\n to \u00feam upcundan \u00a0 \u00a0 \u00a0 \u00a0 \u00e6\u00feelan rice,\n \u00feonan us \u00e6r \u00feurh synlust \u00a0 \u00a0 \u00a0 \u00a0 se swearta g\u00e6st\n- 270\n- \n forteah ond fortylde, \u00a0 \u00a0 \u00a0 \u00a0 \u00fe\u00e6t we, tires wone, \n a butan ende \u00a0 \u00a0 \u00a0 \u00a0 sculon erm\u00feu dreogan,\n butan \u00feu usic \u00feon ofostlicor, \u00a0 \u00a0 \u00a0 \u00a0 ece dryhten,\n \u00e6t \u00feam leodscea\u00fean, \u00a0 \u00a0 \u00a0 \u00a0 lifgende god,\n helm alwihta, \u00a0 \u00a0 \u00a0 \u00a0 hreddan wille.\n- 275\n- \n Eala \u00feu m\u00e6ra \u00a0 \u00a0 \u00a0 \u00a0 middangeardes \n seo cl\u00e6neste \u00a0 \u00a0 \u00a0 \u00a0 cwen ofer eor\u00fean\n \u00feara \u00fee gewurde \u00a0 \u00a0 \u00a0 \u00a0 to widan feore,\n hu \u00feec mid ryhte \u00a0 \u00a0 \u00a0 \u00a0 ealle reordberend\n hata\u00f0 ond secga\u00f0, \u00a0 \u00a0 \u00a0 \u00a0 h\u00e6le\u00f0 geond foldan,\n- 280\n- \n bli\u00fee mode, \u00a0 \u00a0 \u00a0 \u00a0 \u00fe\u00e6t \u00feu bryd sie \n \u00fe\u00e6s selestan \u00a0 \u00a0 \u00a0 \u00a0 swegles bryttan.\n Swylce \u00fea hyhstan \u00a0 \u00a0 \u00a0 \u00a0 on heofonum eac,\n Cristes \u00feegnas, \u00a0 \u00a0 \u00a0 \u00a0 cwe\u00fea\u00f0 ond singa\u00f0\n \u00fe\u00e6t \u00feu sie hl\u00e6fdige \u00a0 \u00a0 \u00a0 \u00a0 halgum meahtum\n- 285\n- \n wuldorweorudes, \u00a0 \u00a0 \u00a0 \u00a0 ond worldcundra \n hada under heofonum, \u00a0 \u00a0 \u00a0 \u00a0 ond helwara.\n For\u00feon \u00feu \u00fe\u00e6t ana \u00a0 \u00a0 \u00a0 \u00a0 ealra monna\n ge\u00feohtest \u00ferymlice, \u00a0 \u00a0 \u00a0 \u00a0 \u00feristhycgende,\n \u00fe\u00e6t \u00feu \u00feinne m\u00e6g\u00f0had \u00a0 \u00a0 \u00a0 \u00a0 meotude brohtes,\n- 290\n- \n sealdes butan synnum. \u00a0 \u00a0 \u00a0 \u00a0 Nan swylc ne cwom \n \u00e6nig o\u00feer \u00a0 \u00a0 \u00a0 \u00a0 ofer ealle men,\n bryd beaga hroden, \u00a0 \u00a0 \u00a0 \u00a0 \u00fee \u00fea beorhtan lac\n to heofonhame \u00a0 \u00a0 \u00a0 \u00a0 hlutre mode\n si\u00fe\u00fean sende. \u00a0 \u00a0 \u00a0 \u00a0 For\u00f0on heht sigores fruma\n- 295\n- \n his heahbodan \u00a0 \u00a0 \u00a0 \u00a0 hider gefleogan \n of his m\u00e6gen\u00ferymme \u00a0 \u00a0 \u00a0 \u00a0 ond \u00fee meahta sped\n snude cy\u00f0an, \u00a0 \u00a0 \u00a0 \u00a0 \u00fe\u00e6t \u00feu sunu dryhtnes\n \u00feurh cl\u00e6ne gebyrd \u00a0 \u00a0 \u00a0 \u00a0 cennan sceolde\n monnum to miltse, \u00a0 \u00a0 \u00a0 \u00a0 ond \u00fee, Maria, for\u00f0\n- 300\n- \n efne unwemme \u00a0 \u00a0 \u00a0 \u00a0 a gehealdan. \n Eac we \u00fe\u00e6t gefrugnon, \u00a0 \u00a0 \u00a0 \u00a0 \u00fe\u00e6t gefyrn bi \u00fee\n so\u00f0f\u00e6st s\u00e6gde \u00a0 \u00a0 \u00a0 \u00a0 sum wo\u00f0bora\n in ealddagum, \u00a0 \u00a0 \u00a0 \u00a0 Esaias,\n \u00fe\u00e6t he w\u00e6re gel\u00e6ded \u00a0 \u00a0 \u00a0 \u00a0 \u00fe\u00e6t he lifes gesteald\n- 305\n- \n in \u00feam ecan ham \u00a0 \u00a0 \u00a0 \u00a0 eal sceawode. \n Wlat \u00fea swa wisf\u00e6st \u00a0 \u00a0 \u00a0 \u00a0 witga geond \u00feeodland\n o\u00fe\u00fe\u00e6t he gestarode \u00a0 \u00a0 \u00a0 \u00a0 \u00fe\u00e6r gesta\u00feelad w\u00e6s\n \u00e6\u00feelic ingong. \u00a0 \u00a0 \u00a0 \u00a0 Eal w\u00e6s gebunden\n deoran since \u00a0 \u00a0 \u00a0 \u00a0 duru orm\u00e6te,\n- 310\n- \n wundurclommum bewri\u00feen. \u00a0 \u00a0 \u00a0 \u00a0 Wende swi\u00f0e \n \u00fe\u00e6t \u00e6nig elda \u00a0 \u00a0 \u00a0 \u00a0 \u00e6fre ne meahte\n swa f\u00e6stlice \u00a0 \u00a0 \u00a0 \u00a0 forescyttelsas\n on ecnesse \u00a0 \u00a0 \u00a0 \u00a0 o inhebban,\n o\u00fe\u00fee \u00f0\u00e6s ceasterhlides \u00a0 \u00a0 \u00a0 \u00a0 clustor onlucan,\n- 315\n- \n \u00e6r him godes engel \u00a0 \u00a0 \u00a0 \u00a0 \u00feurh gl\u00e6dne ge\u00feonc \n \u00fea wisan onwrah \u00a0 \u00a0 \u00a0 \u00a0 ond \u00fe\u00e6t word acw\u00e6\u00f0:\n \"Ic \u00fee m\u00e6g secgan \u00a0 \u00a0 \u00a0 \u00a0 \u00fe\u00e6t so\u00f0 gewear\u00f0\n \u00fe\u00e6t \u00f0as gyldnan gatu \u00a0 \u00a0 \u00a0 \u00a0 giet sume si\u00fee\n god sylf wile \u00a0 \u00a0 \u00a0 \u00a0 g\u00e6stes m\u00e6gne\n- 320\n- \n gef\u00e6lsian, \u00a0 \u00a0 \u00a0 \u00a0 f\u00e6der \u00e6lmihtig, \n ond \u00feurh \u00fea f\u00e6stan locu \u00a0 \u00a0 \u00a0 \u00a0 foldan neosan,\n ond hio \u00feonne \u00e6fter him \u00a0 \u00a0 \u00a0 \u00a0 ece stonda\u00f0\n simle singales \u00a0 \u00a0 \u00a0 \u00a0 swa beclysed\n \u00fe\u00e6t n\u00e6nig o\u00feer, \u00a0 \u00a0 \u00a0 \u00a0 nym\u00f0e nergend god,\n- 325\n- \n hy \u00e6fre ma \u00a0 \u00a0 \u00a0 \u00a0 eft onluce\u00f0.\" \n Nu \u00fe\u00e6t is gefylled \u00a0 \u00a0 \u00a0 \u00a0 \u00fe\u00e6t se froda \u00fea\n mid eagum \u00fe\u00e6r \u00a0 \u00a0 \u00a0 \u00a0 on wlatade.\n \u00feu eart \u00fe\u00e6t wealldor, \u00a0 \u00a0 \u00a0 \u00a0 \u00feurh \u00fee waldend frea\n \u00e6ne on \u00feas eor\u00f0an \u00a0 \u00a0 \u00a0 \u00a0 ut si\u00f0ade,\n- 330\n- \n ond efne swa \u00feec gemette, \u00a0 \u00a0 \u00a0 \u00a0 meahtum gehrodene, \n cl\u00e6ne ond gecorene, \u00a0 \u00a0 \u00a0 \u00a0 Crist \u00e6lmihtig.\n Swa \u00f0e \u00e6fter him \u00a0 \u00a0 \u00a0 \u00a0 engla \u00feeoden\n eft unm\u00e6le \u00a0 \u00a0 \u00a0 \u00a0 \u00e6lces \u00feinges\n lio\u00feuc\u00e6gan bileac, \u00a0 \u00a0 \u00a0 \u00a0 lifes brytta.\n- 335\n- \n Iowa us nu \u00fea are \u00a0 \u00a0 \u00a0 \u00a0 \u00fee se engel \u00fee, \n godes spelboda, \u00a0 \u00a0 \u00a0 \u00a0 Gabriel brohte.\n Huru \u00fe\u00e6s bidda\u00f0 \u00a0 \u00a0 \u00a0 \u00a0 burgsittende\n \u00fe\u00e6t \u00f0u \u00fea frofre \u00a0 \u00a0 \u00a0 \u00a0 folcum cy\u00f0e,\n \u00feinre sylfre sunu. \u00a0 \u00a0 \u00a0 \u00a0 Si\u00fe\u00fean we motan\n- 340\n- \n anmodlice \u00a0 \u00a0 \u00a0 \u00a0 ealle hyhtan, \n nu we on \u00fe\u00e6t bearn foran \u00a0 \u00a0 \u00a0 \u00a0 breostum staria\u00f0.\n Ge\u00feinga us nu \u00a0 \u00a0 \u00a0 \u00a0 \u00feristum wordum\n \u00fe\u00e6t he us ne l\u00e6te \u00a0 \u00a0 \u00a0 \u00a0 leng owihte\n in \u00feisse dea\u00f0dene \u00a0 \u00a0 \u00a0 \u00a0 gedwolan hyran,\n- 345\n- \n ac \u00fe\u00e6t he usic geferge \u00a0 \u00a0 \u00a0 \u00a0 in f\u00e6der rice, \n \u00fe\u00e6r we sorglease \u00a0 \u00a0 \u00a0 \u00a0 si\u00fe\u00fean motan\n wunigan in wuldre \u00a0 \u00a0 \u00a0 \u00a0 mid weoroda god.\n Eala \u00feu halga \u00a0 \u00a0 \u00a0 \u00a0 heofona dryhten,\n \u00feu mid f\u00e6der \u00feinne \u00a0 \u00a0 \u00a0 \u00a0 gefyrn w\u00e6re\n- 350\n- \n efenwesende \u00a0 \u00a0 \u00a0 \u00a0 in \u00feam \u00e6\u00feelan ham. \n N\u00e6s \u00e6nig \u00fea giet \u00a0 \u00a0 \u00a0 \u00a0 engel geworden,\n ne \u00fe\u00e6s miclan \u00a0 \u00a0 \u00a0 \u00a0 m\u00e6gen\u00ferymmes nan\n \u00f0e in roderum up \u00a0 \u00a0 \u00a0 \u00a0 rice biwitiga\u00f0,\n \u00feeodnes \u00fery\u00f0gesteald \u00a0 \u00a0 \u00a0 \u00a0 ond his \u00feegnunga,\n- 355\n- \n \u00fea \u00feu \u00e6rest w\u00e6re \u00a0 \u00a0 \u00a0 \u00a0 mid \u00feone ecan frean \n sylf settende \u00a0 \u00a0 \u00a0 \u00a0 \u00feas sidan gesceaft,\n brade brytengrundas. \u00a0 \u00a0 \u00a0 \u00a0 B\u00e6m inc is gem\u00e6ne\n heahg\u00e6st hleof\u00e6st. \u00a0 \u00a0 \u00a0 \u00a0 We \u00fee, h\u00e6lend Crist,\n \u00feurh ea\u00f0medu \u00a0 \u00a0 \u00a0 \u00a0 ealle bidda\u00f0\n- 360\n- \n \u00fe\u00e6t \u00feu gehyre \u00a0 \u00a0 \u00a0 \u00a0 h\u00e6fta stefne, \n \u00feinra nied\u00feiowa, \u00a0 \u00a0 \u00a0 \u00a0 nergende god,\n hu we sind geswencte \u00a0 \u00a0 \u00a0 \u00a0 \u00feurh ure sylfra gewill.\n Habba\u00f0 wr\u00e6cm\u00e6cgas \u00a0 \u00a0 \u00a0 \u00a0 wergan g\u00e6stas,\n hetlen helscea\u00fea, \u00a0 \u00a0 \u00a0 \u00a0 hearde genyrwad,\n- 365\n- \n gebunden bealorapum. \u00a0 \u00a0 \u00a0 \u00a0 Is seo bot gelong \n eall \u00e6t \u00fee anum, \u00a0 \u00a0 \u00a0 \u00a0 ece dryhten.\n Hreowcearigum help, \u00a0 \u00a0 \u00a0 \u00a0 \u00fe\u00e6t \u00fein hidercyme\n afrefre feasceafte, \u00a0 \u00a0 \u00a0 \u00a0 \u00feeah we f\u00e6h\u00feo wi\u00f0 \u00feec\n \u00feurh firena lust \u00a0 \u00a0 \u00a0 \u00a0 gefremed h\u00e6bben.\n- 370\n- \n Ara nu onbehtum \u00a0 \u00a0 \u00a0 \u00a0 ond usse yrm\u00fea ge\u00feenc, \n hu we tealtriga\u00f0 \u00a0 \u00a0 \u00a0 \u00a0 tydran mode,\n hwearfia\u00f0 heanlice. \u00a0 \u00a0 \u00a0 \u00a0 Cym nu, h\u00e6le\u00fea cyning,\n ne lata to lange. \u00a0 \u00a0 \u00a0 \u00a0 Us is lissa \u00feearf,\n \u00fe\u00e6t \u00feu us ahredde \u00a0 \u00a0 \u00a0 \u00a0 ond us h\u00e6logiefe\n- 375\n- \n so\u00f0f\u00e6st sylle, \u00a0 \u00a0 \u00a0 \u00a0 \u00fe\u00e6t we si\u00fe\u00fean for\u00f0 \n \u00fea sellan \u00feing \u00a0 \u00a0 \u00a0 \u00a0 symle moten\n ge\u00feeon on \u00feeode, \u00a0 \u00a0 \u00a0 \u00a0 \u00feinne willan.\n Eala seo wlitige, \u00a0 \u00a0 \u00a0 \u00a0 weor\u00f0mynda full,\n heah ond halig, \u00a0 \u00a0 \u00a0 \u00a0 heofoncund \u00ferynes,\n- 380\n- \n brade geblissad \u00a0 \u00a0 \u00a0 \u00a0 geond brytenwongas \n \u00fea mid ryhte sculon \u00a0 \u00a0 \u00a0 \u00a0 reordberende,\n earme eor\u00f0ware \u00a0 \u00a0 \u00a0 \u00a0 ealle m\u00e6gene\n hergan healice, \u00a0 \u00a0 \u00a0 \u00a0 nu us h\u00e6lend god\n w\u00e6rf\u00e6st onwrah \u00a0 \u00a0 \u00a0 \u00a0 \u00fe\u00e6t we hine witan moton.\n- 385\n- \n For\u00feon hy, d\u00e6dhw\u00e6te, \u00a0 \u00a0 \u00a0 \u00a0 dome geswi\u00f0de, \n \u00fe\u00e6t so\u00f0f\u00e6ste \u00a0 \u00a0 \u00a0 \u00a0 seraphinnes cynn,\n uppe mid englum \u00a0 \u00a0 \u00a0 \u00a0 a bremende,\n una\u00fereotendum \u00a0 \u00a0 \u00a0 \u00a0 \u00ferymmum singa\u00f0\n ful healice \u00a0 \u00a0 \u00a0 \u00a0 hludan stefne,\n- 390\n- \n f\u00e6gre feor ond neah. \u00a0 \u00a0 \u00a0 \u00a0 Habba\u00fe folgo\u00fea \n cyst mid cyninge. \u00a0 \u00a0 \u00a0 \u00a0 Him \u00fe\u00e6t Crist forgeaf,\n \u00fe\u00e6t hy motan his \u00e6twiste \u00a0 \u00a0 \u00a0 \u00a0 eagum brucan\n simle singales, \u00a0 \u00a0 \u00a0 \u00a0 swegle gehyrste,\n weor\u00f0ian waldend \u00a0 \u00a0 \u00a0 \u00a0 wide ond side,\n- 395\n- \n ond mid hyra fi\u00ferum \u00a0 \u00a0 \u00a0 \u00a0 frean \u00e6lmihtges \n onsyne weardia\u00f0, \u00a0 \u00a0 \u00a0 \u00a0 ecan dryhtnes,\n ond ymb \u00feeodenstol \u00a0 \u00a0 \u00a0 \u00a0 \u00feringa\u00f0 georne\n hwylc hyra nehst m\u00e6ge \u00a0 \u00a0 \u00a0 \u00a0 ussum nergende\n flihte lacan \u00a0 \u00a0 \u00a0 \u00a0 fri\u00f0geardum in.\n- 400\n- \n Lofia\u00f0 leoflicne \u00a0 \u00a0 \u00a0 \u00a0 ond in leohte him \n \u00fea word cwe\u00fea\u00f0, \u00a0 \u00a0 \u00a0 \u00a0 ond wuldria\u00f0\n \u00e6\u00feelne ordfruman \u00a0 \u00a0 \u00a0 \u00a0 ealra gesceafta:\n \"Halig eart \u00feu, halig, \u00a0 \u00a0 \u00a0 \u00a0 heahengla brego,\n so\u00f0 sigores frea, \u00a0 \u00a0 \u00a0 \u00a0 simle \u00feu bist halig,\n- 405\n- \n dryhtna dryhten! \u00a0 \u00a0 \u00a0 \u00a0 A \u00fein dom wuna\u00f0 \n eor\u00f0lic mid \u00e6ldum \u00a0 \u00a0 \u00a0 \u00a0 in \u00e6lce tid\n wide geweor\u00fead. \u00a0 \u00a0 \u00a0 \u00a0 \u00feu eart weoroda god,\n for\u00feon \u00feu gefyldest \u00a0 \u00a0 \u00a0 \u00a0 foldan ond rodoras,\n wigendra hleo, \u00a0 \u00a0 \u00a0 \u00a0 wuldres \u00feines,\n- 410\n- \n helm alwihta. \u00a0 \u00a0 \u00a0 \u00a0 Sie \u00fee in heannessum \n ece h\u00e6lo, \u00a0 \u00a0 \u00a0 \u00a0 ond in eor\u00fean lof,\n beorht mid beornum. \u00a0 \u00a0 \u00a0 \u00a0 \u00feu gebletsad leofa,\n \u00fee in dryhtnes noman \u00a0 \u00a0 \u00a0 \u00a0 duge\u00feum cwome\n heanum to hro\u00fere. \u00a0 \u00a0 \u00a0 \u00a0 \u00fee in heah\u00feum sie\n- 415\n- \n a butan ende \u00a0 \u00a0 \u00a0 \u00a0 ece herenis.\" \n Eala hw\u00e6t, \u00fe\u00e6t is wr\u00e6clic wrixl \u00a0 \u00a0 \u00a0 \u00a0 in wera life,\n \u00fe\u00e6tte moncynnes \u00a0 \u00a0 \u00a0 \u00a0 milde scyppend\n onfeng \u00e6t f\u00e6mnan \u00a0 \u00a0 \u00a0 \u00a0 fl\u00e6sc unwemme,\n ond sio weres friga \u00a0 \u00a0 \u00a0 \u00a0 wiht ne cu\u00fee,\n- 420\n- \n ne \u00feurh s\u00e6d ne cwom \u00a0 \u00a0 \u00a0 \u00a0 sigores agend \n monnes ofer moldan; \u00a0 \u00a0 \u00a0 \u00a0 ac \u00fe\u00e6t w\u00e6s ma cr\u00e6ft\n \u00feonne hit eor\u00f0buend \u00a0 \u00a0 \u00a0 \u00a0 ealle cu\u00fean\n \u00feurh geryne, \u00a0 \u00a0 \u00a0 \u00a0 hu he, rodera \u00ferim,\n heofona heahfrea, \u00a0 \u00a0 \u00a0 \u00a0 helpe gefremede\n- 425\n- \n monna cynne \u00a0 \u00a0 \u00a0 \u00a0 \u00feurh his modor hrif. \n Ond swa for\u00f0gongende \u00a0 \u00a0 \u00a0 \u00a0 folca nergend\n his forgifnesse \u00a0 \u00a0 \u00a0 \u00a0 gumum to helpe\n d\u00e6le\u00f0 dogra gehwam, \u00a0 \u00a0 \u00a0 \u00a0 dryhten weoroda.\n For\u00feon we hine domhwate \u00a0 \u00a0 \u00a0 \u00a0 d\u00e6dum ond wordum\n- 430\n- \n hergen holdlice. \u00a0 \u00a0 \u00a0 \u00a0 \u00fe\u00e6t is healic r\u00e6d \n monna gehwylcum \u00a0 \u00a0 \u00a0 \u00a0 \u00fee gemynd hafa\u00f0,\n \u00fe\u00e6t he symle oftost \u00a0 \u00a0 \u00a0 \u00a0 ond inlocast\n ond geornlicost \u00a0 \u00a0 \u00a0 \u00a0 god weor\u00feige.\n He him \u00fe\u00e6re lisse \u00a0 \u00a0 \u00a0 \u00a0 lean forgilde\u00f0,\n- 435\n- \n se gehalgoda \u00a0 \u00a0 \u00a0 \u00a0 h\u00e6lend sylfa, \n efne in \u00feam e\u00f0le \u00a0 \u00a0 \u00a0 \u00a0 \u00fe\u00e6r he \u00e6r ne cwom,\n in lifgendra \u00a0 \u00a0 \u00a0 \u00a0 londes wynne,\n \u00fe\u00e6r he ges\u00e6lig \u00a0 \u00a0 \u00a0 \u00a0 si\u00fe\u00fean earda\u00f0,\n ealne widan feorh \u00a0 \u00a0 \u00a0 \u00a0 wuna\u00f0 butan ende. Amen.\n- 440\n- \n Nu \u00f0u geornlice \u00a0 \u00a0 \u00a0 \u00a0 g\u00e6stgerynum, \n mon se m\u00e6ra, \u00a0 \u00a0 \u00a0 \u00a0 modcr\u00e6fte sec\n \u00feurh sefan snyttro, \u00a0 \u00a0 \u00a0 \u00a0 \u00fe\u00e6t \u00feu so\u00f0 wite\n hu \u00fe\u00e6t geeode, \u00a0 \u00a0 \u00a0 \u00a0 \u00fea se \u00e6lmihtiga\n acenned wear\u00f0 \u00a0 \u00a0 \u00a0 \u00a0 \u00feurh cl\u00e6nne had,\n- 445\n- \n si\u00fe\u00fean he Marian, \u00a0 \u00a0 \u00a0 \u00a0 m\u00e6g\u00f0a weolman, \n m\u00e6rre meowlan, \u00a0 \u00a0 \u00a0 \u00a0 mundheals geceas,\n \u00fe\u00e6t \u00fe\u00e6r in hwitum \u00a0 \u00a0 \u00a0 \u00a0 hr\u00e6glum gewerede\n englas ne o\u00f0eowdun, \u00a0 \u00a0 \u00a0 \u00a0 \u00fea se \u00e6\u00feeling cwom,\n beorn in Betlem. \u00a0 \u00a0 \u00a0 \u00a0 Bodan w\u00e6ron gearwe\n- 450\n- \n \u00fea \u00feurh hleo\u00feorcwide \u00a0 \u00a0 \u00a0 \u00a0 hyrdum cy\u00f0don, \n s\u00e6gdon so\u00f0ne gefean, \u00a0 \u00a0 \u00a0 \u00a0 \u00fe\u00e6tte sunu w\u00e6re\n in middangeard \u00a0 \u00a0 \u00a0 \u00a0 meotudes acenned,\n in Betleme. \u00a0 \u00a0 \u00a0 \u00a0 Hw\u00e6\u00fere in bocum ne cwi\u00f0\n \u00fe\u00e6t hy in hwitum \u00fe\u00e6r \u00a0 \u00a0 \u00a0 \u00a0 hr\u00e6glum o\u00f0ywden\n- 455\n- \n in \u00fea \u00e6\u00feelan tid, \u00a0 \u00a0 \u00a0 \u00a0 swa hie eft dydon \n \u00f0a se brega m\u00e6ra \u00a0 \u00a0 \u00a0 \u00a0 to Bethania,\n \u00feeoden \u00ferymf\u00e6st, \u00a0 \u00a0 \u00a0 \u00a0 his \u00feegna gedryht\n gela\u00f0ade, leof weorud. \u00a0 \u00a0 \u00a0 \u00a0 Hy \u00fe\u00e6s lareowes\n on \u00feam wild\u00e6ge \u00a0 \u00a0 \u00a0 \u00a0 word ne gehyrwdon,\n- 460\n- \n hyra sincgiefan. \u00a0 \u00a0 \u00a0 \u00a0 Sona w\u00e6ron gearwe, \n h\u00e6le\u00f0 mid hlaford, \u00a0 \u00a0 \u00a0 \u00a0 to \u00fe\u00e6re halgan byrg,\n \u00fe\u00e6r him tacna fela \u00a0 \u00a0 \u00a0 \u00a0 tires brytta\n onwrah, wuldres helm, \u00a0 \u00a0 \u00a0 \u00a0 wordgerynum,\n \u00e6r\u00feon up stige \u00a0 \u00a0 \u00a0 \u00a0 ancenned sunu,\n- 465\n- \n efenece bearn, \u00a0 \u00a0 \u00a0 \u00a0 agnum f\u00e6der, \n \u00fe\u00e6s ymb feowertig \u00a0 \u00a0 \u00a0 \u00a0 \u00fee he of foldan \u00e6r\n from dea\u00f0e aras, \u00a0 \u00a0 \u00a0 \u00a0 dagena rimes.\n H\u00e6fde \u00fea gefylled, \u00a0 \u00a0 \u00a0 \u00a0 swa \u00e6r biforan sungon,\n witgena word \u00a0 \u00a0 \u00a0 \u00a0 geond woruld innan\n- 470\n- \n \u00feurh his \u00ferowinga. \u00a0 \u00a0 \u00a0 \u00a0 \u00feegnas heredon, \n lufedun leofwendum \u00a0 \u00a0 \u00a0 \u00a0 lifes agend,\n f\u00e6der frumsceafta. \u00a0 \u00a0 \u00a0 \u00a0 He him f\u00e6gre \u00fe\u00e6s\n leofum gesi\u00feum \u00a0 \u00a0 \u00a0 \u00a0 lean \u00e6fter geaf,\n ond \u00fe\u00e6t word acw\u00e6\u00f0 \u00a0 \u00a0 \u00a0 \u00a0 waldend engla,\n- 475\n- \n gefysed, frea mihtig, \u00a0 \u00a0 \u00a0 \u00a0 to f\u00e6der rice: \n \"Gefeo\u00f0 ge on fer\u00f0\u00f0e! \u00a0 \u00a0 \u00a0 \u00a0 N\u00e6fre ic from hweorfe,\n ac ic lufan symle \u00a0 \u00a0 \u00a0 \u00a0 l\u00e6ste wi\u00f0 eowic,\n ond eow meaht giefe \u00a0 \u00a0 \u00a0 \u00a0 ond mid wunige,\n awo to ealdre, \u00a0 \u00a0 \u00a0 \u00a0 \u00fe\u00e6t eow \u00e6fre ne bi\u00f0\n- 480\n- \n \u00feurh gife mine \u00a0 \u00a0 \u00a0 \u00a0 godes onsien. \n Fara\u00f0 nu geond ealne \u00a0 \u00a0 \u00a0 \u00a0 yrmenne grund,\n geond widwegas, \u00a0 \u00a0 \u00a0 \u00a0 weoredum cy\u00f0a\u00f0,\n bodia\u00f0 ond brema\u00f0 \u00a0 \u00a0 \u00a0 \u00a0 beorhtne geleafan,\n ond fulwia\u00f0 \u00a0 \u00a0 \u00a0 \u00a0 folc under roderum.\n- 485\n- \n Hweorfa\u00f0 to h\u00e6\u00fenum, \u00a0 \u00a0 \u00a0 \u00a0 hergas breota\u00fe, \n fylla\u00f0 ond feoga\u00f0, \u00a0 \u00a0 \u00a0 \u00a0 feondscype dw\u00e6sca\u00f0,\n sibbe sawa\u00f0 \u00a0 \u00a0 \u00a0 \u00a0 on sefan manna\n \u00feurh meahta sped. \u00a0 \u00a0 \u00a0 \u00a0 Ic eow mid wunige,\n for\u00f0 on frofre, \u00a0 \u00a0 \u00a0 \u00a0 ond eow fri\u00f0e healde\n- 490\n- \n streng\u00f0u sta\u00feolf\u00e6stre \u00a0 \u00a0 \u00a0 \u00a0 on stowa gehware.\" \n \u00f0a wear\u00f0 semninga \u00a0 \u00a0 \u00a0 \u00a0 sweg on lyfte\n hlud gehyred. \u00a0 \u00a0 \u00a0 \u00a0 Heofonengla \u00fereat,\n weorud wlitescyne, \u00a0 \u00a0 \u00a0 \u00a0 wuldres aras,\n cwomun on cor\u00f0re. \u00a0 \u00a0 \u00a0 \u00a0 Cyning ure gewat\n- 495\n- \n \u00feurh \u00fe\u00e6s temples hrof \u00a0 \u00a0 \u00a0 \u00a0 \u00fe\u00e6r hy to segun, \n \u00fea \u00fee leofes \u00fea gen \u00a0 \u00a0 \u00a0 \u00a0 last weardedun\n on \u00feam \u00feingstede, \u00a0 \u00a0 \u00a0 \u00a0 \u00feegnas gecorene.\n Gesegon hi on heah\u00feu \u00a0 \u00a0 \u00a0 \u00a0 hlaford stigan,\n godbearn of grundum. \u00a0 \u00a0 \u00a0 \u00a0 Him w\u00e6s geomor sefa\n- 500\n- \n hat \u00e6t heortan, \u00a0 \u00a0 \u00a0 \u00a0 hyge murnende, \n \u00fe\u00e6s \u00fee hi swa leofne \u00a0 \u00a0 \u00a0 \u00a0 leng ne mostun\n geseon under swegle. \u00a0 \u00a0 \u00a0 \u00a0 Song ahofun\n aras ufancunde, \u00a0 \u00a0 \u00a0 \u00a0 \u00e6\u00feeling heredun,\n lofedun liffruman, \u00a0 \u00a0 \u00a0 \u00a0 leohte gefegun\n- 505\n- \n \u00fee of \u00fe\u00e6s h\u00e6lendes \u00a0 \u00a0 \u00a0 \u00a0 heafelan lixte. \n Gesegon hy \u00e6lbeorhte \u00a0 \u00a0 \u00a0 \u00a0 englas twegen\n f\u00e6gre ymb \u00fe\u00e6t frumbearn \u00a0 \u00a0 \u00a0 \u00a0 fr\u00e6twum blican,\n cyninga wuldor. \u00a0 \u00a0 \u00a0 \u00a0 Cleopedon of heah\u00feu\n wordum wr\u00e6tlicum \u00a0 \u00a0 \u00a0 \u00a0 ofer wera mengu\n- 510\n- \n beorhtan reorde: \u00a0 \u00a0 \u00a0 \u00a0 \"Hw\u00e6t bida\u00f0 ge, \n Galilesce \u00a0 \u00a0 \u00a0 \u00a0 guman on hwearfte?\n Nu ge sweotule geseo\u00f0 \u00a0 \u00a0 \u00a0 \u00a0 so\u00f0ne dryhten\n on swegl faran; \u00a0 \u00a0 \u00a0 \u00a0 sigores agend\n wile up heonan \u00a0 \u00a0 \u00a0 \u00a0 eard gestigan,\n- 515\n- \n \u00e6\u00feelinga ord, \u00a0 \u00a0 \u00a0 \u00a0 mid \u00feas engla gedryht, \n ealra folca fruma, \u00a0 \u00a0 \u00a0 \u00a0 f\u00e6der e\u00feelstoll.\n We mid \u00feyslice \u00a0 \u00a0 \u00a0 \u00a0 \u00fereate willa\u00f0\n ofer heofona gehlidu \u00a0 \u00a0 \u00a0 \u00a0 hlaford fergan\n to \u00fe\u00e6re beorhtan byrg \u00a0 \u00a0 \u00a0 \u00a0 mid \u00feas bli\u00f0an gedryht,\n- 520\n- \n ealra sigebearna \u00a0 \u00a0 \u00a0 \u00a0 \u00fe\u00e6t seleste \n ond \u00e6\u00feeleste, \u00a0 \u00a0 \u00a0 \u00a0 \u00fee ge her on staria\u00f0\n ond in frofre geseo\u00f0 \u00a0 \u00a0 \u00a0 \u00a0 fr\u00e6twum blican.\n Wile eft swa \u00feeah \u00a0 \u00a0 \u00a0 \u00a0 eor\u00f0an m\u00e6g\u00f0e\n sylfa gesecan \u00a0 \u00a0 \u00a0 \u00a0 side herge,\n- 525\n- \n ond \u00feonne gedeman \u00a0 \u00a0 \u00a0 \u00a0 d\u00e6da gehwylce \n \u00feara \u00f0e gefremedon \u00a0 \u00a0 \u00a0 \u00a0 folc under roderum.\"\n \u00f0a w\u00e6s wuldres weard \u00a0 \u00a0 \u00a0 \u00a0 wolcnum bifongen,\n heahengla cyning, \u00a0 \u00a0 \u00a0 \u00a0 ofer hrofas upp,\n haligra helm. \u00a0 \u00a0 \u00a0 \u00a0 Hyht w\u00e6s geniwad,\n- 530\n- \n blis in burgum, \u00a0 \u00a0 \u00a0 \u00a0 \u00feurh \u00fe\u00e6s beornes cyme. \n Ges\u00e6t sigehremig \u00a0 \u00a0 \u00a0 \u00a0 on \u00fea swi\u00feran hand\n ece eadfruma \u00a0 \u00a0 \u00a0 \u00a0 agnum f\u00e6der.\n Gewitan him \u00fea gongan \u00a0 \u00a0 \u00a0 \u00a0 to Hierusalem\n h\u00e6le\u00f0 hygerofe, \u00a0 \u00a0 \u00a0 \u00a0 in \u00fea halgan burg,\n- 535\n- \n geomormode, \u00a0 \u00a0 \u00a0 \u00a0 \u00feonan hy god nyhst \n up stigende \u00a0 \u00a0 \u00a0 \u00a0 eagum segun,\n hyra wilgifan. \u00a0 \u00a0 \u00a0 \u00a0 \u00fe\u00e6r w\u00e6s wopes hring,\n torne bitolden; \u00a0 \u00a0 \u00a0 \u00a0 w\u00e6s seo treowlufu\n hat \u00e6t heortan, \u00a0 \u00a0 \u00a0 \u00a0 hre\u00f0er innan weoll,\n- 540\n- \n beorn breostsefa. \u00a0 \u00a0 \u00a0 \u00a0 Bidon ealle \u00fe\u00e6r \n \u00feegnas \u00ferymfulle \u00a0 \u00a0 \u00a0 \u00a0 \u00feeodnes gehata\n in \u00fe\u00e6re torhtan \u00a0 \u00a0 \u00a0 \u00a0 byrig tyn niht \u00fea gen,\n swa him sylf bibead \u00a0 \u00a0 \u00a0 \u00a0 swegles agend,\n \u00e6r\u00feon up stige \u00a0 \u00a0 \u00a0 \u00a0 ealles waldend\n- 545\n- \n on heofona gehyld. \u00a0 \u00a0 \u00a0 \u00a0 Hwite cwoman \n eorla eadgiefan \u00a0 \u00a0 \u00a0 \u00a0 englas togeanes.\n \u00f0\u00e6t is wel cweden, \u00a0 \u00a0 \u00a0 \u00a0 swa gewritu secga\u00f0,\n \u00fe\u00e6t him albeorhte \u00a0 \u00a0 \u00a0 \u00a0 englas togeanes\n in \u00fea halgan tid \u00a0 \u00a0 \u00a0 \u00a0 heapum cwoman,\n- 550\n- \n sigan on swegle. \u00a0 \u00a0 \u00a0 \u00a0 \u00fea w\u00e6s symbla m\u00e6st \n geworden in wuldre. \u00a0 \u00a0 \u00a0 \u00a0 Wel \u00fe\u00e6t gedafena\u00f0\n \u00fe\u00e6t to \u00fe\u00e6re blisse, \u00a0 \u00a0 \u00a0 \u00a0 beorhte gewerede,\n in \u00fe\u00e6s \u00feeodnes burg \u00a0 \u00a0 \u00a0 \u00a0 \u00feegnas cwoman,\n weorud wlitescyne. \u00a0 \u00a0 \u00a0 \u00a0 Gesegon wilcuman\n- 555\n- \n on heahsetle \u00a0 \u00a0 \u00a0 \u00a0 heofones waldend, \n folca feorhgiefan, \u00a0 \u00a0 \u00a0 \u00a0 fr\u00e6twum ealles waldend\n middangeardes \u00a0 \u00a0 \u00a0 \u00a0 ond m\u00e6gen\u00ferymmes.\n \"Hafa\u00f0 nu se halga \u00a0 \u00a0 \u00a0 \u00a0 helle bireafod\n ealles \u00fe\u00e6s gafoles \u00a0 \u00a0 \u00a0 \u00a0 \u00fee hi geardagum\n- 560\n- \n in \u00fe\u00e6t orlege \u00a0 \u00a0 \u00a0 \u00a0 unryhte swealg. \n Nu sind forcumene \u00a0 \u00a0 \u00a0 \u00a0 ond in cwicsusle\n gehynde ond geh\u00e6fte, \u00a0 \u00a0 \u00a0 \u00a0 in helle grund\n dugu\u00feum bid\u00e6led, \u00a0 \u00a0 \u00a0 \u00a0 deofla cempan.\n Ne meahtan wi\u00feerbrogan \u00a0 \u00a0 \u00a0 \u00a0 wige spowan,\n- 565\n- \n w\u00e6pna wyrpum, \u00a0 \u00a0 \u00a0 \u00a0 si\u00fe\u00fean wuldres cyning, \n heofonrices helm, \u00a0 \u00a0 \u00a0 \u00a0 hilde gefremede\n wi\u00fe his ealdfeondum \u00a0 \u00a0 \u00a0 \u00a0 anes meahtum,\n \u00fe\u00e6r he of h\u00e6fte ahlod \u00a0 \u00a0 \u00a0 \u00a0 hu\u00fea m\u00e6ste\n of feonda byrig, \u00a0 \u00a0 \u00a0 \u00a0 folces unrim,\n- 570\n- \n \u00feisne ilcan \u00fereat \u00a0 \u00a0 \u00a0 \u00a0 \u00fee ge her on staria\u00f0. \n Wile nu gesecan \u00a0 \u00a0 \u00a0 \u00a0 sawla nergend\n g\u00e6sta giefstol, \u00a0 \u00a0 \u00a0 \u00a0 godes agen bearn,\n \u00e6fter gu\u00f0plegan. \u00a0 \u00a0 \u00a0 \u00a0 Nu ge geare cunnon\n hw\u00e6t se hlaford is \u00a0 \u00a0 \u00a0 \u00a0 se \u00feisne here l\u00e6de\u00f0,\n- 575\n- \n nu ge fromlice \u00a0 \u00a0 \u00a0 \u00a0 freondum togeanes \n gonga\u00f0 gl\u00e6dmode. \u00a0 \u00a0 \u00a0 \u00a0 Geatu, ontyna\u00f0!\n Wile in to eow \u00a0 \u00a0 \u00a0 \u00a0 ealles waldend,\n cyning on ceastre, \u00a0 \u00a0 \u00a0 \u00a0 cor\u00f0re ne lytle,\n fyrnweorca fruma, \u00a0 \u00a0 \u00a0 \u00a0 folc gel\u00e6dan\n- 580\n- \n in dreama dream, \u00a0 \u00a0 \u00a0 \u00a0 \u00f0e he on deoflum genom \n \u00feurh his sylfes sygor. \u00a0 \u00a0 \u00a0 \u00a0 Sib sceal gem\u00e6ne\n englum ond \u00e6ldum \u00a0 \u00a0 \u00a0 \u00a0 a for\u00f0 heonan\n wesan wideferh. \u00a0 \u00a0 \u00a0 \u00a0 W\u00e6r is \u00e6tsomne\n godes ond monna, \u00a0 \u00a0 \u00a0 \u00a0 g\u00e6sthalig treow,\n- 585\n- \n lufu, lifes hyht, \u00a0 \u00a0 \u00a0 \u00a0 ond ealles leohtes gefea.\" \n Hw\u00e6t, we nu gehyrdan \u00a0 \u00a0 \u00a0 \u00a0 hu \u00fe\u00e6t h\u00e6lubearn\n \u00feurh his hydercyme \u00a0 \u00a0 \u00a0 \u00a0 hals eft forgeaf,\n gefreode ond gefreo\u00feade \u00a0 \u00a0 \u00a0 \u00a0 folc under wolcnum,\n m\u00e6re meotudes sunu, \u00a0 \u00a0 \u00a0 \u00a0 \u00fe\u00e6t nu monna gehwylc\n- 590\n- \n cwic \u00feendan her wuna\u00f0, \u00a0 \u00a0 \u00a0 \u00a0 geceosan mot \n swa helle hien\u00feu \u00a0 \u00a0 \u00a0 \u00a0 swa heofones m\u00e6r\u00feu,\n swa \u00fe\u00e6t leohte leoht \u00a0 \u00a0 \u00a0 \u00a0 swa \u00f0a la\u00fean niht,\n swa \u00ferymmes \u00fer\u00e6ce \u00a0 \u00a0 \u00a0 \u00a0 swa \u00feystra wr\u00e6ce,\n swa mid dryhten dream \u00a0 \u00a0 \u00a0 \u00a0 swa mid deoflum hream,\n- 595\n- \n swa wite mid wra\u00feum \u00a0 \u00a0 \u00a0 \u00a0 swa wuldor mid arum, \n swa lif swa dea\u00f0, \u00a0 \u00a0 \u00a0 \u00a0 swa him leofre bi\u00f0\n to gefremmanne, \u00a0 \u00a0 \u00a0 \u00a0 \u00feenden fl\u00e6sc ond g\u00e6st\n wunia\u00f0 in worulde. \u00a0 \u00a0 \u00a0 \u00a0 Wuldor \u00fe\u00e6s age\n \u00ferynysse \u00ferym, \u00a0 \u00a0 \u00a0 \u00a0 \u00feonc butan ende!\n- 600\n- \n \u00f0\u00e6t is \u00fe\u00e6s wyr\u00f0e \u00a0 \u00a0 \u00a0 \u00a0 \u00fe\u00e6tte wer\u00feeode \n secgen dryhtne \u00feonc \u00a0 \u00a0 \u00a0 \u00a0 dugu\u00f0a gehwylcre\n \u00fee us si\u00f0 ond \u00e6r \u00a0 \u00a0 \u00a0 \u00a0 simle gefremede\n \u00feurh monigfealdra \u00a0 \u00a0 \u00a0 \u00a0 m\u00e6gna geryno.\n He us \u00e6t giefe\u00f0 \u00a0 \u00a0 \u00a0 \u00a0 ond \u00e6hta sped,\n- 605\n- \n welan ofer widlond, \u00a0 \u00a0 \u00a0 \u00a0 ond weder li\u00fee \n under swegles hleo. \u00a0 \u00a0 \u00a0 \u00a0 Sunne ond mona,\n \u00e6\u00feelast tungla \u00a0 \u00a0 \u00a0 \u00a0 eallum scina\u00f0,\n heofoncondelle, \u00a0 \u00a0 \u00a0 \u00a0 h\u00e6le\u00feum on eor\u00f0an.\n Dreose\u00f0 deaw ond ren, \u00a0 \u00a0 \u00a0 \u00a0 dugu\u00f0e wecca\u00fe\n- 610\n- \n to feorhnere \u00a0 \u00a0 \u00a0 \u00a0 fira cynne, \n ieca\u00f0 eor\u00f0welan. \u00a0 \u00a0 \u00a0 \u00a0 \u00fe\u00e6s we ealles sculon\n secgan \u00feonc ond lof \u00a0 \u00a0 \u00a0 \u00a0 \u00feeodne ussum,\n ond huru \u00fe\u00e6re h\u00e6lo \u00a0 \u00a0 \u00a0 \u00a0 \u00fee he us to hyhte forgeaf,\n \u00f0a he \u00fea yrmp\u00f0u \u00a0 \u00a0 \u00a0 \u00a0 eft oncyrde\n- 615\n- \n \u00e6t his upstige \u00a0 \u00a0 \u00a0 \u00a0 \u00fee we \u00e6r drugon, \n ond ge\u00feingade \u00a0 \u00a0 \u00a0 \u00a0 \u00feeodbuendum\n wi\u00f0 f\u00e6der sw\u00e6sne \u00a0 \u00a0 \u00a0 \u00a0 f\u00e6h\u00fea m\u00e6ste,\n cyning anboren. \u00a0 \u00a0 \u00a0 \u00a0 Cwide eft onhwearf\n saulum to sibbe, \u00a0 \u00a0 \u00a0 \u00a0 se \u00fee \u00e6r sungen w\u00e6s\n- 620\n- \n \u00feurh yrne hyge \u00a0 \u00a0 \u00a0 \u00a0 \u00e6ldum to sorge: \n \"Ic \u00feec ofer eor\u00f0an geworhte, \u00a0 \u00a0 \u00a0 \u00a0 on \u00fe\u00e6re \u00feu scealt yrm\u00feum lifgan,\n wunian in gewinne \u00a0 \u00a0 \u00a0 \u00a0 ond wr\u00e6ce dreogan,\n feondum to hro\u00feor \u00a0 \u00a0 \u00a0 \u00a0 fusleo\u00f0 galan,\n ond to \u00fe\u00e6re ilcan scealt \u00a0 \u00a0 \u00a0 \u00a0 eft geweor\u00fean,\n- 625\n- \n wyrmum aweallen, \u00a0 \u00a0 \u00a0 \u00a0 \u00feonan wites fyr \n of \u00fe\u00e6re eor\u00f0an scealt \u00a0 \u00a0 \u00a0 \u00a0 eft gesecan.\"\n Hw\u00e6t, us \u00feis se \u00e6\u00feeling \u00a0 \u00a0 \u00a0 \u00a0 y\u00f0re gefremede\n \u00fea he leomum onfeng \u00a0 \u00a0 \u00a0 \u00a0 ond lichoman,\n monnes magutudre! \u00a0 \u00a0 \u00a0 \u00a0 Si\u00fe\u00fean meotodes sunu\n- 630\n- \n engla e\u00feel \u00a0 \u00a0 \u00a0 \u00a0 up gestigan \n wolde, weoroda god, \u00a0 \u00a0 \u00a0 \u00a0 us se willa bicwom\n heanum to helpe \u00a0 \u00a0 \u00a0 \u00a0 on \u00fea halgan tid.\n Bi \u00feon giedd awr\u00e6c \u00a0 \u00a0 \u00a0 \u00a0 Iob, swa he cu\u00f0e,\n herede helm wera, \u00a0 \u00a0 \u00a0 \u00a0 h\u00e6lend lofede,\n- 635\n- \n ond mid siblufan \u00a0 \u00a0 \u00a0 \u00a0 sunu waldendes \n freonoman cende, \u00a0 \u00a0 \u00a0 \u00a0 ond hine fugel nemde,\n \u00feone Iudeas \u00a0 \u00a0 \u00a0 \u00a0 ongietan ne meahtan\n in \u00f0\u00e6re godcundan \u00a0 \u00a0 \u00a0 \u00a0 g\u00e6stes streng\u00f0u.\n W\u00e6s \u00fe\u00e6s fugles flyht \u00a0 \u00a0 \u00a0 \u00a0 feondum on eor\u00fean\n- 640\n- \n dyrne ond degol, \u00a0 \u00a0 \u00a0 \u00a0 \u00feam \u00fee deorc gewit \n h\u00e6fdon on hre\u00fere, \u00a0 \u00a0 \u00a0 \u00a0 heortan st\u00e6nne.\n Noldan hi \u00fea torhtan \u00a0 \u00a0 \u00a0 \u00a0 tacen oncnawan\n \u00fee him beforan fremede \u00a0 \u00a0 \u00a0 \u00a0 freobearn godes,\n monig mislicu, \u00a0 \u00a0 \u00a0 \u00a0 geond middangeard.\n- 645\n- \n Swa se f\u00e6la fugel \u00a0 \u00a0 \u00a0 \u00a0 flyges cunnode; \n hwilum engla eard \u00a0 \u00a0 \u00a0 \u00a0 up gesohte,\n modig meahtum strang, \u00a0 \u00a0 \u00a0 \u00a0 \u00feone maran ham,\n hwilum he to eor\u00fean \u00a0 \u00a0 \u00a0 \u00a0 eft gestylde,\n \u00feurh g\u00e6stes giefe \u00a0 \u00a0 \u00a0 \u00a0 grundsceat sohte,\n- 650\n- \n wende to worulde. \u00a0 \u00a0 \u00a0 \u00a0 Bi \u00feon se witga song: \n \"He w\u00e6s upp hafen \u00a0 \u00a0 \u00a0 \u00a0 engla f\u00e6\u00f0mum\n in his \u00fea miclan \u00a0 \u00a0 \u00a0 \u00a0 meahta spede,\n heah ond halig, \u00a0 \u00a0 \u00a0 \u00a0 ofer heofona \u00ferym.\"\n Ne meahtan \u00fea \u00fe\u00e6s fugles \u00a0 \u00a0 \u00a0 \u00a0 flyht gecnawan\n- 655\n- \n \u00fee \u00fe\u00e6s upstiges \u00a0 \u00a0 \u00a0 \u00a0 onds\u00e6c fremedon, \n ond \u00fe\u00e6t ne gelyfdon, \u00a0 \u00a0 \u00a0 \u00a0 \u00fe\u00e6tte liffruma\n in monnes hiw \u00a0 \u00a0 \u00a0 \u00a0 ofer m\u00e6gna \u00ferym,\n halig from hrusan, \u00a0 \u00a0 \u00a0 \u00a0 ahafen wurde.\n \u00f0a us geweor\u00f0ade \u00a0 \u00a0 \u00a0 \u00a0 se \u00feas world gescop,\n- 660\n- \n godes g\u00e6stsunu, \u00a0 \u00a0 \u00a0 \u00a0 ond us giefe sealde, \n uppe mid englum \u00a0 \u00a0 \u00a0 \u00a0 ece sta\u00feelas,\n ond eac monigfealde \u00a0 \u00a0 \u00a0 \u00a0 modes snyttru\n seow ond sette \u00a0 \u00a0 \u00a0 \u00a0 geond sefan monna.\n Sumum wordla\u00fee \u00a0 \u00a0 \u00a0 \u00a0 wise sende\u00f0\n- 665\n- \n on his modes gemynd \u00a0 \u00a0 \u00a0 \u00a0 \u00feurh his mu\u00fees g\u00e6st, \n \u00e6\u00f0ele ondgiet. \u00a0 \u00a0 \u00a0 \u00a0 Se m\u00e6g eal fela\n singan ond secgan \u00a0 \u00a0 \u00a0 \u00a0 \u00feam bi\u00f0 snyttru cr\u00e6ft\n bifolen on fer\u00f0e. \u00a0 \u00a0 \u00a0 \u00a0 Sum m\u00e6g fingrum wel\n hlude fore h\u00e6le\u00feum \u00a0 \u00a0 \u00a0 \u00a0 hearpan stirgan,\n- 670\n- \n gleobeam gretan. \u00a0 \u00a0 \u00a0 \u00a0 Sum m\u00e6g godcunde \n reccan ryhte \u00e6. \u00a0 \u00a0 \u00a0 \u00a0 Sum m\u00e6g ryne tungla\n secgan, side gesceaft. \u00a0 \u00a0 \u00a0 \u00a0 Sum m\u00e6g searolice\n wordcwide writan. \u00a0 \u00a0 \u00a0 \u00a0 Sumum wiges sped\n giefe\u00f0 \u00e6t gu\u00fee, \u00a0 \u00a0 \u00a0 \u00a0 \u00feonne gargetrum\n- 675\n- \n ofer scildhreadan \u00a0 \u00a0 \u00a0 \u00a0 sceotend senda\u00f0, \n flacor flangeweorc. \u00a0 \u00a0 \u00a0 \u00a0 Sum m\u00e6g fromlice\n ofer sealtne s\u00e6 \u00a0 \u00a0 \u00a0 \u00a0 sundwudu drifan,\n hreran holm\u00fer\u00e6ce. \u00a0 \u00a0 \u00a0 \u00a0 Sum m\u00e6g heanne beam\n st\u00e6lgne gestigan. \u00a0 \u00a0 \u00a0 \u00a0 Sum m\u00e6g styled sweord,\n- 680\n- \n w\u00e6pen gewyrcan. \u00a0 \u00a0 \u00a0 \u00a0 Sum con wonga bigong, \n wegas widgielle. \u00a0 \u00a0 \u00a0 \u00a0 Swa se waldend us,\n godbearn on grundum, \u00a0 \u00a0 \u00a0 \u00a0 his giefe brytta\u00f0.\n Nyle he \u00e6ngum anum \u00a0 \u00a0 \u00a0 \u00a0 ealle gesyllan\n g\u00e6stes snyttru, \u00a0 \u00a0 \u00a0 \u00a0 \u00fey l\u00e6s him gielp sce\u00fe\u00fee\n- 685\n- \n \u00feurh his anes cr\u00e6ft \u00a0 \u00a0 \u00a0 \u00a0 ofer o\u00fere for\u00f0. \n \u00f0us god meahtig \u00a0 \u00a0 \u00a0 \u00a0 geofum unhneawum,\n cyning alwihta, \u00a0 \u00a0 \u00a0 \u00a0 cr\u00e6ftum weor\u00f0a\u00fe\n eor\u00fean tuddor; \u00a0 \u00a0 \u00a0 \u00a0 swylce eadgum bl\u00e6d\n sele\u00f0 on swegle, \u00a0 \u00a0 \u00a0 \u00a0 sibbe r\u00e6re\u00fe\n- 690\n- \n ece to ealdre \u00a0 \u00a0 \u00a0 \u00a0 engla ond monna; \n swa he his weorc weor\u00fea\u00f0. \u00a0 \u00a0 \u00a0 \u00a0 Bi \u00feon se witga cw\u00e6\u00f0\n \u00fe\u00e6t ah\u00e6fen w\u00e6ren \u00a0 \u00a0 \u00a0 \u00a0 halge gimmas,\n h\u00e6dre heofontungol, \u00a0 \u00a0 \u00a0 \u00a0 healice upp,\n sunne ond mona. \u00a0 \u00a0 \u00a0 \u00a0 Hw\u00e6t sindan \u00fea\n- 695\n- \n gimmas swa scyne \u00a0 \u00a0 \u00a0 \u00a0 buton god sylfa? \n He is se so\u00f0f\u00e6sta \u00a0 \u00a0 \u00a0 \u00a0 sunnan leoma,\n englum ond eor\u00f0warum \u00a0 \u00a0 \u00a0 \u00a0 \u00e6\u00feele scima.\n Ofer middangeard \u00a0 \u00a0 \u00a0 \u00a0 mona lixe\u00f0,\n g\u00e6stlic tungol, \u00a0 \u00a0 \u00a0 \u00a0 swa seo godes circe\n- 700\n- \n \u00feurh gesomninga \u00a0 \u00a0 \u00a0 \u00a0 so\u00f0es ond ryhtes \n beorhte blice\u00f0. \u00a0 \u00a0 \u00a0 \u00a0 Swa hit on bocum cwi\u00fe,\n si\u00fe\u00fean of grundum \u00a0 \u00a0 \u00a0 \u00a0 godbearn astag,\n cyning cl\u00e6nra gehw\u00e6s, \u00a0 \u00a0 \u00a0 \u00a0 \u00fea seo circe her\n \u00e6fyllendra \u00a0 \u00a0 \u00a0 \u00a0 eahtnysse bad\n- 705\n- \n under h\u00e6\u00feenra \u00a0 \u00a0 \u00a0 \u00a0 hyrda gewealdum. \n \u00fe\u00e6r \u00f0a synscea\u00f0an \u00a0 \u00a0 \u00a0 \u00a0 so\u00fees ne giemdon,\n g\u00e6stes \u00feearfe, \u00a0 \u00a0 \u00a0 \u00a0 ac hi godes tempel\n br\u00e6can ond b\u00e6rndon, \u00a0 \u00a0 \u00a0 \u00a0 blodgyte worhtan,\n feodan ond fyldon. \u00a0 \u00a0 \u00a0 \u00a0 Hw\u00e6\u00fere for\u00f0 bicwom\n- 710\n- \n \u00feurh g\u00e6stes giefe \u00a0 \u00a0 \u00a0 \u00a0 godes \u00feegna bl\u00e6d \n \u00e6fter upstige \u00a0 \u00a0 \u00a0 \u00a0 ecan dryhtnes.\n Bi \u00feon Salomon song, \u00a0 \u00a0 \u00a0 \u00a0 sunu Daui\u00fees,\n giedda gearosnottor \u00a0 \u00a0 \u00a0 \u00a0 g\u00e6stgerynum,\n waldend wer\u00feeoda, \u00a0 \u00a0 \u00a0 \u00a0 ond \u00fe\u00e6t word acw\u00e6\u00f0:\n- 715\n- \n \"Cu\u00f0 \u00fe\u00e6t geweor\u00f0e\u00f0, \u00a0 \u00a0 \u00a0 \u00a0 \u00fe\u00e6tte cyning engla, \n meotud meahtum swi\u00f0, \u00a0 \u00a0 \u00a0 \u00a0 munt gestylle\u00f0,\n gehleape\u00f0 hea dune, \u00a0 \u00a0 \u00a0 \u00a0 hyllas ond cnollas\n bewri\u00f0 mid his wuldre, \u00a0 \u00a0 \u00a0 \u00a0 woruld alyse\u00f0,\n ealle eor\u00f0buend, \u00a0 \u00a0 \u00a0 \u00a0 \u00feurh \u00feone \u00e6\u00feelan styll.\"\n- 720\n- \n W\u00e6s se forma hlyp \u00a0 \u00a0 \u00a0 \u00a0 \u00fea he on f\u00e6mnan astag, \n m\u00e6ge\u00f0 unm\u00e6le, \u00a0 \u00a0 \u00a0 \u00a0 ond \u00fe\u00e6r mennisc hiw\n onfeng butan firenum \u00a0 \u00a0 \u00a0 \u00a0 \u00fe\u00e6t to frofre gewear\u00f0\n eallum eor\u00f0warum. \u00a0 \u00a0 \u00a0 \u00a0 W\u00e6s se o\u00feer stiell\n bearnes gebyrda, \u00a0 \u00a0 \u00a0 \u00a0 \u00fea he in binne w\u00e6s\n- 725\n- \n in cildes hiw \u00a0 \u00a0 \u00a0 \u00a0 cla\u00feum bewunden, \n ealra \u00ferymma \u00ferym. \u00a0 \u00a0 \u00a0 \u00a0 W\u00e6s se \u00feridda hlyp,\n rodorcyninges r\u00e6s, \u00a0 \u00a0 \u00a0 \u00a0 \u00fea he on rode astag,\n f\u00e6der, frofre g\u00e6st. \u00a0 \u00a0 \u00a0 \u00a0 W\u00e6s se feor\u00f0a stiell\n in byrgenne, \u00a0 \u00a0 \u00a0 \u00a0 \u00fea he \u00feone beam ofgeaf,\n- 730\n- \n fold\u00e6rne f\u00e6st. \u00a0 \u00a0 \u00a0 \u00a0 W\u00e6s se fifta hlyp \n \u00fea he hellwarena \u00a0 \u00a0 \u00a0 \u00a0 heap forbygde\n in cwicsusle, \u00a0 \u00a0 \u00a0 \u00a0 cyning inne gebond,\n feonda foresprecan, \u00a0 \u00a0 \u00a0 \u00a0 fyrnum teagum,\n gromhydigne, \u00a0 \u00a0 \u00a0 \u00a0 \u00fe\u00e6r he gen lige\u00f0\n- 735\n- \n in carcerne \u00a0 \u00a0 \u00a0 \u00a0 clommum gef\u00e6stnad, \n synnum ges\u00e6led. \u00a0 \u00a0 \u00a0 \u00a0 W\u00e6s se siexta hlyp,\n haliges hyhtplega, \u00a0 \u00a0 \u00a0 \u00a0 \u00fea he to heofonum astag\n on his ealdcy\u00f0\u00f0e. \u00a0 \u00a0 \u00a0 \u00a0 \u00fea w\u00e6s engla \u00fereat\n on \u00fea halgan tid \u00a0 \u00a0 \u00a0 \u00a0 hleahtre bli\u00fee\n- 740\n- \n wynnum geworden. \u00a0 \u00a0 \u00a0 \u00a0 Gesawan wuldres \u00ferym, \n \u00e6\u00feelinga ord, \u00a0 \u00a0 \u00a0 \u00a0 e\u00f0les neosan,\n beorhtra bolda. \u00a0 \u00a0 \u00a0 \u00a0 \u00fea wear\u00f0 burgwarum\n eadgum ece gefea \u00a0 \u00a0 \u00a0 \u00a0 \u00e6\u00feelinges plega.\n \u00feus her on grundum \u00a0 \u00a0 \u00a0 \u00a0 godes ece bearn\n- 745\n- \n ofer heahhleo\u00feu \u00a0 \u00a0 \u00a0 \u00a0 hlypum stylde, \n modig \u00e6fter muntum. \u00a0 \u00a0 \u00a0 \u00a0 Swa we men sculon\n heortan gehygdum \u00a0 \u00a0 \u00a0 \u00a0 hlypum styllan\n of m\u00e6gne in m\u00e6gen, \u00a0 \u00a0 \u00a0 \u00a0 m\u00e6r\u00feum tilgan\n \u00fe\u00e6t we to \u00feam hyhstan \u00a0 \u00a0 \u00a0 \u00a0 hrofe gestigan\n- 750\n- \n halgum weorcum, \u00a0 \u00a0 \u00a0 \u00a0 \u00fe\u00e6r is hyht ond blis, \n ge\u00feungen \u00feegnweorud. \u00a0 \u00a0 \u00a0 \u00a0 Is us \u00feearf micel\n \u00fe\u00e6t we mid heortan \u00a0 \u00a0 \u00a0 \u00a0 h\u00e6lo secen,\n \u00fe\u00e6r we mid g\u00e6ste \u00a0 \u00a0 \u00a0 \u00a0 georne gelyfa\u00f0\n \u00fe\u00e6t \u00fe\u00e6t h\u00e6lobearn \u00a0 \u00a0 \u00a0 \u00a0 heonan up stige\n- 755\n- \n mid usse lichoman, \u00a0 \u00a0 \u00a0 \u00a0 lifgende god. \n For\u00feon we a sculon \u00a0 \u00a0 \u00a0 \u00a0 idle lustas,\n synwunde forseon, \u00a0 \u00a0 \u00a0 \u00a0 ond \u00fe\u00e6s sellran gefeon.\n Habba\u00f0 we us to frofre \u00a0 \u00a0 \u00a0 \u00a0 f\u00e6der on roderum\n \u00e6lmeahtigne. \u00a0 \u00a0 \u00a0 \u00a0 He his aras \u00feonan,\n- 760\n- \n halig of heah\u00f0u, \u00a0 \u00a0 \u00a0 \u00a0 hider onsende\u00f0, \n \u00fea us gescilda\u00fe \u00a0 \u00a0 \u00a0 \u00a0 wi\u00f0 sce\u00fe\u00feendra\n eglum earhfarum, \u00a0 \u00a0 \u00a0 \u00a0 \u00fei l\u00e6s unholdan\n wunde gewyrcen, \u00a0 \u00a0 \u00a0 \u00a0 \u00feonne wrohtbora\n in folc godes \u00a0 \u00a0 \u00a0 \u00a0 for\u00f0 onsende\u00f0\n- 765\n- \n of his br\u00e6gdbogan \u00a0 \u00a0 \u00a0 \u00a0 biterne str\u00e6l. \n For\u00feon we f\u00e6ste sculon \u00a0 \u00a0 \u00a0 \u00a0 wi\u00f0 \u00feam f\u00e6rscyte\n symle w\u00e6rlice \u00a0 \u00a0 \u00a0 \u00a0 wearde healdan,\n \u00fey l\u00e6s se attres ord \u00a0 \u00a0 \u00a0 \u00a0 in gebuge,\n biter bordgelac, \u00a0 \u00a0 \u00a0 \u00a0 under banlocan,\n- 770\n- \n feonda f\u00e6rsearo. \u00a0 \u00a0 \u00a0 \u00a0 \u00fe\u00e6t bi\u00f0 frecne wund, \n blatast benna. \u00a0 \u00a0 \u00a0 \u00a0 Utan us beorgan \u00fea,\n \u00feenden we on eor\u00f0an \u00a0 \u00a0 \u00a0 \u00a0 eard weardien;\n utan us to f\u00e6der \u00a0 \u00a0 \u00a0 \u00a0 freo\u00fea wilnian,\n biddan bearn godes \u00a0 \u00a0 \u00a0 \u00a0 ond \u00feone bli\u00f0an g\u00e6st\n- 775\n- \n \u00fe\u00e6t he us gescilde \u00a0 \u00a0 \u00a0 \u00a0 wi\u00f0 scea\u00fean w\u00e6pnum, \n la\u00fera lygesearwum, \u00a0 \u00a0 \u00a0 \u00a0 se us lif forgeaf,\n leomu, lic ond g\u00e6st. \u00a0 \u00a0 \u00a0 \u00a0 Si him lof symle\n \u00feurh woruld worulda, \u00a0 \u00a0 \u00a0 \u00a0 wuldor on heofnum.\n Ne \u00feearf him ondr\u00e6dan \u00a0 \u00a0 \u00a0 \u00a0 deofla str\u00e6las\n- 780\n- \n \u00e6nig on eor\u00f0an \u00a0 \u00a0 \u00a0 \u00a0 \u00e6lda cynnes, \n gromra garfare, \u00a0 \u00a0 \u00a0 \u00a0 gif hine god scilde\u00fe,\n dugu\u00f0a dryhten. \u00a0 \u00a0 \u00a0 \u00a0 Is \u00feam dome neah\n \u00fe\u00e6t we gelice sceolon \u00a0 \u00a0 \u00a0 \u00a0 leanum hleotan,\n swa we widefeorh \u00a0 \u00a0 \u00a0 \u00a0 weorcum hlodun\n- 785\n- \n geond sidne grund. \u00a0 \u00a0 \u00a0 \u00a0 Us secga\u00f0 bec \n hu \u00e6t \u00e6restan \u00a0 \u00a0 \u00a0 \u00a0 eadmod astag\n in middangeard \u00a0 \u00a0 \u00a0 \u00a0 m\u00e6gna goldhord,\n in f\u00e6mnan f\u00e6\u00f0m \u00a0 \u00a0 \u00a0 \u00a0 freobearn godes,\n halig of heah\u00feu. \u00a0 \u00a0 \u00a0 \u00a0 Huru ic wene me\n- 790\n- \n ond eac ondr\u00e6de \u00a0 \u00a0 \u00a0 \u00a0 dom \u00f0y re\u00feran, \n \u00f0onne eft cyme\u00f0 \u00a0 \u00a0 \u00a0 \u00a0 engla \u00feeoden,\n \u00fee ic ne heold teala \u00a0 \u00a0 \u00a0 \u00a0 \u00fe\u00e6t me h\u00e6lend min\n on bocum bibead. \u00a0 \u00a0 \u00a0 \u00a0 Ic \u00fe\u00e6s brogan sceal\n geseon synwr\u00e6ce, \u00a0 \u00a0 \u00a0 \u00a0 \u00fe\u00e6s \u00fee ic so\u00f0 talge,\n- 795\n- \n \u00fe\u00e6r monig beo\u00f0 \u00a0 \u00a0 \u00a0 \u00a0 on gemot l\u00e6ded \n fore onsyne \u00a0 \u00a0 \u00a0 \u00a0 eces deman.\n \u00feonne \u16b3 cwaca\u00f0, \u00a0 \u00a0 \u00a0 \u00a0 gehyre\u00f0 cyning m\u00e6\u00f0lan,\n rodera ryhtend, \u00a0 \u00a0 \u00a0 \u00a0 sprecan re\u00fee word\n \u00feam \u00fee him \u00e6r in worulde \u00a0 \u00a0 \u00a0 \u00a0 wace hyrdon,\n- 800\n- \n \u00feendan \u16a3 ond \u16be \u00a0 \u00a0 \u00a0 \u00a0 y\u00feast meahtan \n frofre findan. \u00a0 \u00a0 \u00a0 \u00a0 \u00fe\u00e6r sceal forht monig\n on \u00feam wongstede \u00a0 \u00a0 \u00a0 \u00a0 werig bidan\n hw\u00e6t him \u00e6fter d\u00e6dum \u00a0 \u00a0 \u00a0 \u00a0 deman wille\n wra\u00fera wita. \u00a0 \u00a0 \u00a0 \u00a0 Bi\u00fe se \u16b9 sc\u00e6cen\n- 805\n- \n eor\u00fean fr\u00e6twa. \u00a0 \u00a0 \u00a0 \u00a0 \u16a2 w\u00e6s longe \n \u16da flodum bilocen, \u00a0 \u00a0 \u00a0 \u00a0 lifwynna d\u00e6l,\n \u16c7 on foldan. \u00a0 \u00a0 \u00a0 \u00a0 \u00feonne fr\u00e6twe sculon\n byrnan on b\u00e6le; \u00a0 \u00a0 \u00a0 \u00a0 blac rasette\u00f0\n recen reada leg, \u00a0 \u00a0 \u00a0 \u00a0 re\u00fee scri\u00fee\u00f0\n- 810\n- \n geond woruld wide. \u00a0 \u00a0 \u00a0 \u00a0 Wongas hreosa\u00f0, \n burgstede bersta\u00f0. \u00a0 \u00a0 \u00a0 \u00a0 Brond bi\u00f0 on tyhte,\n \u00e6le\u00f0 ealdgestreon \u00a0 \u00a0 \u00a0 \u00a0 unmurnlice,\n g\u00e6sta gifrast, \u00a0 \u00a0 \u00a0 \u00a0 \u00fe\u00e6t geo guman heoldan,\n \u00feenden him on eor\u00fean \u00a0 \u00a0 \u00a0 \u00a0 onmedla w\u00e6s.\n- 815\n- \n For\u00feon ic leofra gehwone \u00a0 \u00a0 \u00a0 \u00a0 l\u00e6ran wille \n \u00fe\u00e6t he ne ag\u00e6le \u00a0 \u00a0 \u00a0 \u00a0 g\u00e6stes \u00feearfe,\n ne on gylp geote, \u00a0 \u00a0 \u00a0 \u00a0 \u00feenden god wille\n \u00fe\u00e6t he her in worulde \u00a0 \u00a0 \u00a0 \u00a0 wunian mote,\n somed si\u00feian \u00a0 \u00a0 \u00a0 \u00a0 sawel in lice,\n- 820\n- \n in \u00feam g\u00e6sthofe. \u00a0 \u00a0 \u00a0 \u00a0 Scyle gumena gehwylc \n on his geardagum \u00a0 \u00a0 \u00a0 \u00a0 georne bi\u00feencan\n \u00fe\u00e6t us milde bicwom \u00a0 \u00a0 \u00a0 \u00a0 meahta waldend\n \u00e6t \u00e6restan \u00a0 \u00a0 \u00a0 \u00a0 \u00feurh \u00fe\u00e6s engles word.\n Bi\u00f0 nu eorneste \u00a0 \u00a0 \u00a0 \u00a0 \u00feonne eft cyme\u00f0,\n- 825\n- \n re\u00f0e ond ryhtwis. \u00a0 \u00a0 \u00a0 \u00a0 Rodor bi\u00f0 onhrered, \n ond \u00feas miclan gemetu \u00a0 \u00a0 \u00a0 \u00a0 middangeardes\n beofia\u00f0 \u00feonne. \u00a0 \u00a0 \u00a0 \u00a0 Beorht cyning leana\u00f0\n \u00fe\u00e6s \u00fee hy on eor\u00fean \u00a0 \u00a0 \u00a0 \u00a0 eargum d\u00e6dum\n lifdon leahtrum fa. \u00a0 \u00a0 \u00a0 \u00a0 \u00fe\u00e6s hi longe sculon\n- 830\n- \n fer\u00f0werige onfon \u00a0 \u00a0 \u00a0 \u00a0 in fyrba\u00f0e, \n w\u00e6lmum biwrecene, \u00a0 \u00a0 \u00a0 \u00a0 wra\u00felic ondlean,\n \u00feonne m\u00e6gna cyning \u00a0 \u00a0 \u00a0 \u00a0 on gemot cyme\u00f0,\n \u00ferymma m\u00e6ste. \u00a0 \u00a0 \u00a0 \u00a0 \u00feeodegsa bi\u00f0\n hlud gehyred \u00a0 \u00a0 \u00a0 \u00a0 bi heofonwoman,\n- 835\n- \n cwaniendra cirm, \u00a0 \u00a0 \u00a0 \u00a0 cerge reota\u00f0 \n fore onsyne \u00a0 \u00a0 \u00a0 \u00a0 eces deman,\n \u00fea \u00fee hyra weorcum \u00a0 \u00a0 \u00a0 \u00a0 wace truwia\u00f0.\n \u00f0\u00e6r bi\u00fe o\u00f0ywed \u00a0 \u00a0 \u00a0 \u00a0 egsa mara\n \u00feonne from frumgesceape \u00a0 \u00a0 \u00a0 \u00a0 gefr\u00e6gen wurde\n- 840\n- \n \u00e6fre on eor\u00f0an. \u00a0 \u00a0 \u00a0 \u00a0 \u00fe\u00e6r bi\u00f0 \u00e6ghwylcum \n synwyrcendra \u00a0 \u00a0 \u00a0 \u00a0 on \u00fea snudan tid\n leofra micle \u00a0 \u00a0 \u00a0 \u00a0 \u00feonne eall \u00feeos l\u00e6ne gesceaft,\n \u00fe\u00e6r he hine sylfne \u00a0 \u00a0 \u00a0 \u00a0 on \u00feam sige\u00fereate\n behydan m\u00e6ge, \u00a0 \u00a0 \u00a0 \u00a0 \u00feonne herga fruma,\n- 845\n- \n \u00e6\u00feelinga ord, \u00a0 \u00a0 \u00a0 \u00a0 eallum deme\u00f0, \n leofum ge la\u00f0um, \u00a0 \u00a0 \u00a0 \u00a0 lean \u00e6fter ryhte,\n \u00feeoda gehwylcre. \u00a0 \u00a0 \u00a0 \u00a0 Is us \u00feearf micel\n \u00fe\u00e6t we g\u00e6stes wlite \u00a0 \u00a0 \u00a0 \u00a0 \u00e6r \u00feam gryrebrogan\n on \u00feas g\u00e6snan tid \u00a0 \u00a0 \u00a0 \u00a0 georne bi\u00feencen.\n- 850\n- \n Nu is \u00feon gelicost \u00a0 \u00a0 \u00a0 \u00a0 swa we on laguflode \n ofer cald w\u00e6ter \u00a0 \u00a0 \u00a0 \u00a0 ceolum li\u00f0an\n geond sidne s\u00e6, \u00a0 \u00a0 \u00a0 \u00a0 sundhengestum,\n flodwudu fergen. \u00a0 \u00a0 \u00a0 \u00a0 Is \u00fe\u00e6t frecne stream\n y\u00f0a oferm\u00e6ta \u00a0 \u00a0 \u00a0 \u00a0 \u00fee we her on laca\u00f0\n- 855\n- \n geond \u00feas wacan woruld, \u00a0 \u00a0 \u00a0 \u00a0 windge holmas \n ofer deop gelad. \u00a0 \u00a0 \u00a0 \u00a0 W\u00e6s se drohta\u00f0 strong\n \u00e6r\u00feon we to londe \u00a0 \u00a0 \u00a0 \u00a0 geliden h\u00e6fdon\n ofer hreone hrycg. \u00a0 \u00a0 \u00a0 \u00a0 \u00fea us help bicwom,\n \u00fe\u00e6t us to h\u00e6lo \u00a0 \u00a0 \u00a0 \u00a0 hy\u00fee gel\u00e6dde,\n- 860\n- \n godes g\u00e6stsunu, \u00a0 \u00a0 \u00a0 \u00a0 ond us giefe sealde \n \u00fe\u00e6t we oncnawan magun \u00a0 \u00a0 \u00a0 \u00a0 ofer ceoles bord\n hw\u00e6r we s\u00e6lan sceolon \u00a0 \u00a0 \u00a0 \u00a0 sundhengestas,\n ealde y\u00f0mearas, \u00a0 \u00a0 \u00a0 \u00a0 ancrum f\u00e6ste.\n Utan us to \u00fe\u00e6re hy\u00f0e \u00a0 \u00a0 \u00a0 \u00a0 hyht sta\u00feelian,\n- 865\n- \n \u00f0a us gerymde \u00a0 \u00a0 \u00a0 \u00a0 rodera waldend, \n halge on heah\u00feu, \u00a0 \u00a0 \u00a0 \u00a0 \u00fea he heofonum astag.\n \u00f0onne mid fere \u00a0 \u00a0 \u00a0 \u00a0 foldbuende\n se micla d\u00e6g \u00a0 \u00a0 \u00a0 \u00a0 meahtan dryhtnes\n \u00e6t midre niht \u00a0 \u00a0 \u00a0 \u00a0 m\u00e6gne bihl\u00e6me\u00f0,\n- 870\n- \n scire gesceafte, \u00a0 \u00a0 \u00a0 \u00a0 swa oft scea\u00f0a f\u00e6cne, \n \u00feeof \u00feristlice, \u00a0 \u00a0 \u00a0 \u00a0 \u00fee on \u00feystre fare\u00f0,\n on sweartre niht, \u00a0 \u00a0 \u00a0 \u00a0 sorglease h\u00e6le\u00f0\n semninga forfeh\u00f0 \u00a0 \u00a0 \u00a0 \u00a0 sl\u00e6pe gebundne,\n eorlas ungearwe \u00a0 \u00a0 \u00a0 \u00a0 yfles gen\u00e6ge\u00f0.\n- 875\n- \n Swa on Syne beorg \u00a0 \u00a0 \u00a0 \u00a0 somod up cyme\u00f0 \n m\u00e6genfolc micel, \u00a0 \u00a0 \u00a0 \u00a0 meotude getrywe,\n beorht ond bli\u00fee. \u00a0 \u00a0 \u00a0 \u00a0 Him weor\u00fee\u00f0 bl\u00e6d gifen!\n \u00feonne from feowerum \u00a0 \u00a0 \u00a0 \u00a0 foldan sceatum,\n \u00feam ytemestum \u00a0 \u00a0 \u00a0 \u00a0 eor\u00fean rices,\n- 880\n- \n englas \u00e6lbeorhte \u00a0 \u00a0 \u00a0 \u00a0 on efen blawa\u00f0 \n byman on brehtme. \u00a0 \u00a0 \u00a0 \u00a0 Beofa\u00f0 middangeard,\n hruse under h\u00e6le\u00feum. \u00a0 \u00a0 \u00a0 \u00a0 Hlyda\u00f0 tosomne,\n trume ond torhte, \u00a0 \u00a0 \u00a0 \u00a0 wi\u00f0 tungla gong,\n singa\u00f0 ond swinsia\u00fe \u00a0 \u00a0 \u00a0 \u00a0 su\u00fean ond nor\u00fean,\n- 885\n- \n eastan ond westan, \u00a0 \u00a0 \u00a0 \u00a0 ofer ealle gesceaft. \n Wecca\u00f0 of dea\u00f0e \u00a0 \u00a0 \u00a0 \u00a0 dryhtgumena bearn,\n eall monna cynn, \u00a0 \u00a0 \u00a0 \u00a0 to meotudsceafte\n egeslic of \u00fe\u00e6re ealdan moldan, \u00a0 \u00a0 \u00a0 \u00a0 hata\u00f0 hy upp astandan\n sneome of sl\u00e6pe \u00fey f\u00e6stan. \u00a0 \u00a0 \u00a0 \u00a0 \u00fe\u00e6r mon m\u00e6g sorgende folc\n- 890\n- \n gehyran hygegeomor, \u00a0 \u00a0 \u00a0 \u00a0 hearde gefysed, \n cearum cwi\u00feende \u00a0 \u00a0 \u00a0 \u00a0 cwicra gewyrhtu,\n forhte af\u00e6rde. \u00a0 \u00a0 \u00a0 \u00a0 \u00fe\u00e6t bi\u00f0 foretacna m\u00e6st\n \u00feara \u00fee \u00e6r o\u00fe\u00fee si\u00f0 \u00a0 \u00a0 \u00a0 \u00a0 \u00e6fre gewurde\n monnum o\u00feywed, \u00a0 \u00a0 \u00a0 \u00a0 \u00fe\u00e6r gemengde beo\u00f0\n- 895\n- \n onh\u00e6lo gelac \u00a0 \u00a0 \u00a0 \u00a0 engla ond deofla, \n beorhtra ond blacra. \u00a0 \u00a0 \u00a0 \u00a0 Weor\u00fee\u00f0 bega cyme,\n hwitra ond sweartra, \u00a0 \u00a0 \u00a0 \u00a0 swa him is ham sceapen\n ungelice, \u00a0 \u00a0 \u00a0 \u00a0 englum ond deoflum.\n \u00feonne semninga \u00a0 \u00a0 \u00a0 \u00a0 on Syne beorg\n- 900\n- \n su\u00feaneastan \u00a0 \u00a0 \u00a0 \u00a0 sunnan leoma \n cyme\u00f0 of scyppende \u00a0 \u00a0 \u00a0 \u00a0 scynan leohtor\n \u00feonne hit men m\u00e6gen \u00a0 \u00a0 \u00a0 \u00a0 modum ahycgan,\n beorhte blican, \u00a0 \u00a0 \u00a0 \u00a0 \u00feonne bearn godes\n \u00feurh heofona gehleodu \u00a0 \u00a0 \u00a0 \u00a0 hider o\u00f0ywe\u00f0.\n- 905\n- \n Cyme\u00f0 wundorlic \u00a0 \u00a0 \u00a0 \u00a0 Cristes onsyn, \n \u00e6\u00feelcyninges wlite, \u00a0 \u00a0 \u00a0 \u00a0 eastan fram roderum,\n on sefan swete \u00a0 \u00a0 \u00a0 \u00a0 sinum folce,\n biter bealofullum, \u00a0 \u00a0 \u00a0 \u00a0 gebleod wundrum,\n eadgum ond earmum \u00a0 \u00a0 \u00a0 \u00a0 ungelice.\n- 910\n- \n He bi\u00f0 \u00feam godum \u00a0 \u00a0 \u00a0 \u00a0 gl\u00e6dmod on gesih\u00fee, \n wlitig, wynsumlic, \u00a0 \u00a0 \u00a0 \u00a0 weorude \u00feam halgan,\n on gefean f\u00e6ger, \u00a0 \u00a0 \u00a0 \u00a0 freond ond leoft\u00e6l,\n lufsum ond li\u00fee \u00a0 \u00a0 \u00a0 \u00a0 leofum monnum\n to sceawianne \u00a0 \u00a0 \u00a0 \u00a0 \u00feone scynan wlite,\n- 915\n- \n we\u00f0ne mid willum, \u00a0 \u00a0 \u00a0 \u00a0 waldendes cyme, \n m\u00e6gencyninges, \u00a0 \u00a0 \u00a0 \u00a0 \u00feam \u00fee him on mode \u00e6r\n wordum ond weorcum \u00a0 \u00a0 \u00a0 \u00a0 wel gecwemdun.\n He bi\u00f0 \u00feam yflum \u00a0 \u00a0 \u00a0 \u00a0 egeslic ond grimlic\n to geseonne, \u00a0 \u00a0 \u00a0 \u00a0 synnegum monnum,\n- 920\n- \n \u00feam \u00fe\u00e6r mid firenum cuma\u00f0, \u00a0 \u00a0 \u00a0 \u00a0 for\u00f0 forworhte. \n \u00fe\u00e6t m\u00e6g wites to wearninga \u00a0 \u00a0 \u00a0 \u00a0 \u00feam \u00fee hafa\u00f0 wisne ge\u00feoht,\n \u00fe\u00e6t se him eallunga \u00a0 \u00a0 \u00a0 \u00a0 owiht ne ondr\u00e6de\u00f0,\n se for \u00f0\u00e6re onsyne \u00a0 \u00a0 \u00a0 \u00a0 egsan ne weor\u00fee\u00f0\n forht on fer\u00f0e, \u00a0 \u00a0 \u00a0 \u00a0 \u00feonne he frean gesih\u00f0\n- 925\n- \n ealra gesceafta \u00a0 \u00a0 \u00a0 \u00a0 ondweardne faran \n mid m\u00e6genwundrum \u00a0 \u00a0 \u00a0 \u00a0 mongum to \u00feinge,\n ond him on healfa gehwone \u00a0 \u00a0 \u00a0 \u00a0 heofonengla \u00fereat\n ymbutan fara\u00f0, \u00a0 \u00a0 \u00a0 \u00a0 \u00e6lbeorhtra scolu,\n hergas haligra, \u00a0 \u00a0 \u00a0 \u00a0 heapum geneahhe.\n- 930\n- \n Dyne\u00f0 deop gesceaft, \u00a0 \u00a0 \u00a0 \u00a0 ond fore dryhtne f\u00e6re\u00f0 \n w\u00e6lmfyra m\u00e6st \u00a0 \u00a0 \u00a0 \u00a0 ofer widne grund.\n Hlemme\u00f0 hata leg, \u00a0 \u00a0 \u00a0 \u00a0 heofonas bersta\u00f0,\n trume ond torhte, \u00a0 \u00a0 \u00a0 \u00a0 tungol ofhreosa\u00f0.\n \u00feonne weor\u00fee\u00f0 sunne \u00a0 \u00a0 \u00a0 \u00a0 sweart gewended\n- 935\n- \n on blodes hiw, \u00a0 \u00a0 \u00a0 \u00a0 seo \u00f0e beorhte scan \n ofer \u00e6rworuld \u00a0 \u00a0 \u00a0 \u00a0 \u00e6lda bearnum;\n mona \u00fe\u00e6t sylfe, \u00a0 \u00a0 \u00a0 \u00a0 \u00fee \u00e6r moncynne\n nihtes lyhte, \u00a0 \u00a0 \u00a0 \u00a0 ni\u00feer gehreose\u00f0\n ond steorran swa some \u00a0 \u00a0 \u00a0 \u00a0 streda\u00f0 of heofone,\n- 940\n- \n \u00feurh \u00f0a strongan lyft \u00a0 \u00a0 \u00a0 \u00a0 stormum abeatne. \n Wile \u00e6lmihtig \u00a0 \u00a0 \u00a0 \u00a0 mid his engla gedryht,\n m\u00e6gencyninga meotod, \u00a0 \u00a0 \u00a0 \u00a0 on gemot cuman,\n \u00ferymf\u00e6st \u00feeoden. \u00a0 \u00a0 \u00a0 \u00a0 Bi\u00f0 \u00fe\u00e6r his \u00feegna eac\n hre\u00feeadig heap. \u00a0 \u00a0 \u00a0 \u00a0 Halge sawle\n- 945\n- \n mid hyra frean fara\u00f0, \u00a0 \u00a0 \u00a0 \u00a0 \u00feonne folca weard \n \u00feurh egsan \u00ferea \u00a0 \u00a0 \u00a0 \u00a0 eor\u00f0an m\u00e6g\u00f0e\n sylfa gesece\u00f0. \u00a0 \u00a0 \u00a0 \u00a0 Weor\u00fee\u00f0 geond sidne grund\n hlud gehyred \u00a0 \u00a0 \u00a0 \u00a0 heofonbyman stefn,\n ond on seofon healfa \u00a0 \u00a0 \u00a0 \u00a0 swoga\u00f0 windas,\n- 950\n- \n blawa\u00f0 brecende \u00a0 \u00a0 \u00a0 \u00a0 bearhtma m\u00e6ste, \n wecca\u00f0 ond wonia\u00f0 \u00a0 \u00a0 \u00a0 \u00a0 woruld mid storme,\n fylla\u00f0 mid fere \u00a0 \u00a0 \u00a0 \u00a0 foldan gesceafte.\n \u00f0onne heard gebrec, \u00a0 \u00a0 \u00a0 \u00a0 hlud, unm\u00e6te,\n swar ond swi\u00f0lic, \u00a0 \u00a0 \u00a0 \u00a0 swegdynna m\u00e6st,\n- 955\n- \n \u00e6ldum egeslic, \u00a0 \u00a0 \u00a0 \u00a0 eawed weor\u00fee\u00f0. \n \u00fe\u00e6r m\u00e6gen werge \u00a0 \u00a0 \u00a0 \u00a0 monna cynnes\n wornum hweorfa\u00f0 \u00a0 \u00a0 \u00a0 \u00a0 on widne leg,\n \u00fea \u00fe\u00e6r cwice mete\u00f0 \u00a0 \u00a0 \u00a0 \u00a0 cwelmende fyr,\n sume up, sume ni\u00feer, \u00a0 \u00a0 \u00a0 \u00a0 \u00e6ldes fulle.\n- 960\n- \n \u00feonne bi\u00f0 untweo \u00a0 \u00a0 \u00a0 \u00a0 \u00fe\u00e6t \u00fe\u00e6r Adames \n cyn, cearena full, \u00a0 \u00a0 \u00a0 \u00a0 cwi\u00fee\u00f0 gesargad,\n nales fore lytlum, \u00a0 \u00a0 \u00a0 \u00a0 leode geomre,\n ac fore \u00feam m\u00e6stan \u00a0 \u00a0 \u00a0 \u00a0 m\u00e6genearfe\u00feum,\n \u00f0onne eall \u00fereo \u00a0 \u00a0 \u00a0 \u00a0 on efen nime\u00f0\n- 965\n- \n won fyres w\u00e6lm \u00a0 \u00a0 \u00a0 \u00a0 wide tosomne, \n se swearta lig, \u00a0 \u00a0 \u00a0 \u00a0 s\u00e6s mid hyra fiscum,\n eor\u00fean mid hire beorgum, \u00a0 \u00a0 \u00a0 \u00a0 ond upheofon\n torhtne mid his tunglum. \u00a0 \u00a0 \u00a0 \u00a0 Teonleg somod\n \u00fery\u00feum b\u00e6rne\u00f0 \u00a0 \u00a0 \u00a0 \u00a0 \u00fereo eal on an\n- 970\n- \n grimme tog\u00e6dre. \u00a0 \u00a0 \u00a0 \u00a0 Grorna\u00f0 gesargad \n eal middangeard \u00a0 \u00a0 \u00a0 \u00a0 on \u00fea m\u00e6ran tid.\n Swa se gifra g\u00e6st \u00a0 \u00a0 \u00a0 \u00a0 grundas geondsece\u00f0;\n hi\u00feende leg \u00a0 \u00a0 \u00a0 \u00a0 heahgetimbro\n fylle\u00f0 on foldwong \u00a0 \u00a0 \u00a0 \u00a0 fyres egsan,\n- 975\n- \n widm\u00e6re bl\u00e6st \u00a0 \u00a0 \u00a0 \u00a0 woruld mid ealle, \n hat, heorogifre. \u00a0 \u00a0 \u00a0 \u00a0 Hreosa\u00f0 geneahhe\n tobrocene burgweallas. \u00a0 \u00a0 \u00a0 \u00a0 Beorgas gemelta\u00f0\n ond heahcleofu, \u00a0 \u00a0 \u00a0 \u00a0 \u00fea wi\u00f0 holme \u00e6r\n f\u00e6ste wi\u00f0 flodum \u00a0 \u00a0 \u00a0 \u00a0 foldan sceldun,\n- 980\n- \n sti\u00f0 ond st\u00e6\u00f0f\u00e6st, \u00a0 \u00a0 \u00a0 \u00a0 sta\u00feelas wi\u00f0 w\u00e6ge, \n w\u00e6tre windendum. \u00a0 \u00a0 \u00a0 \u00a0 \u00feonne wihta gehwylce,\n deora ond fugla, \u00a0 \u00a0 \u00a0 \u00a0 dea\u00f0leg nime\u00f0,\n f\u00e6re\u00f0 \u00e6fter foldan \u00a0 \u00a0 \u00a0 \u00a0 fyrswearta leg,\n weallende wiga. \u00a0 \u00a0 \u00a0 \u00a0 Swa \u00e6r w\u00e6ter fleowan,\n- 985\n- \n flodas afysde, \u00a0 \u00a0 \u00a0 \u00a0 \u00feonne on fyrba\u00f0e \n swela\u00f0 s\u00e6fiscas; \u00a0 \u00a0 \u00a0 \u00a0 sundes getw\u00e6fde\n w\u00e6gdeora gehwylc \u00a0 \u00a0 \u00a0 \u00a0 werig swelte\u00f0,\n byrne\u00fe w\u00e6ter swa weax. \u00a0 \u00a0 \u00a0 \u00a0 \u00fe\u00e6r bi\u00f0 wundra ma\n \u00feonne hit \u00e6nig on mode \u00a0 \u00a0 \u00a0 \u00a0 m\u00e6ge a\u00feencan,\n- 990\n- \n hu \u00fe\u00e6t gestun ond se storm \u00a0 \u00a0 \u00a0 \u00a0 ond seo stronge lyft \n breca\u00f0 brade gesceaft. \u00a0 \u00a0 \u00a0 \u00a0 Beornas greta\u00f0,\n wepa\u00f0 wanende \u00a0 \u00a0 \u00a0 \u00a0 wergum stefnum,\n heane, hygegeomre, \u00a0 \u00a0 \u00a0 \u00a0 hreowum gedreahte.\n Seo\u00fee\u00f0 swearta leg \u00a0 \u00a0 \u00a0 \u00a0 synne on fordonum,\n- 995\n- \n ond goldfr\u00e6twe \u00a0 \u00a0 \u00a0 \u00a0 gleda forswelga\u00f0, \n eall \u00e6rgestreon \u00a0 \u00a0 \u00a0 \u00a0 e\u00feelcyninga.\n \u00f0\u00e6r bi\u00f0 cirm ond cearu, \u00a0 \u00a0 \u00a0 \u00a0 ond cwicra gewin,\n gehreow ond hlud wop \u00a0 \u00a0 \u00a0 \u00a0 bi heofonwoman,\n earmlic \u00e6lda gedreag. \u00a0 \u00a0 \u00a0 \u00a0 \u00feonan \u00e6nig ne m\u00e6g,\n- 1000\n- \n firend\u00e6dum fah, \u00a0 \u00a0 \u00a0 \u00a0 fri\u00f0 gewinnan, \n legbryne losian \u00a0 \u00a0 \u00a0 \u00a0 londes ower,\n ac \u00fe\u00e6t fyr nime\u00f0 \u00a0 \u00a0 \u00a0 \u00a0 \u00feurh foldan gehw\u00e6t,\n gr\u00e6fe\u00f0 grimlice, \u00a0 \u00a0 \u00a0 \u00a0 georne asece\u00f0\n innan ond utan \u00a0 \u00a0 \u00a0 \u00a0 eor\u00f0an sceatas,\n- 1005\n- \n o\u00fe\u00fe\u00e6t eall hafa\u00f0 \u00a0 \u00a0 \u00a0 \u00a0 \u00e6ldes leoma \n woruldwidles wom \u00a0 \u00a0 \u00a0 \u00a0 w\u00e6lme forb\u00e6rned.\n \u00f0onne mihtig god \u00a0 \u00a0 \u00a0 \u00a0 on \u00feone m\u00e6ran beorg\n mid \u00fey m\u00e6stan \u00a0 \u00a0 \u00a0 \u00a0 m\u00e6gen\u00ferymme cyme\u00f0,\n heofonengla cyning, \u00a0 \u00a0 \u00a0 \u00a0 halig scine\u00f0,\n- 1010\n- \n wuldorlic ofer weredum, \u00a0 \u00a0 \u00a0 \u00a0 waldende god, \n ond hine ymbutan \u00a0 \u00a0 \u00a0 \u00a0 \u00e6\u00feeldugu\u00f0 betast,\n halge herefe\u00f0an, \u00a0 \u00a0 \u00a0 \u00a0 hlutre blica\u00f0,\n eadig engla gedryht. \u00a0 \u00a0 \u00a0 \u00a0 Inge\u00feoncum\n forhte beofia\u00f0 \u00a0 \u00a0 \u00a0 \u00a0 fore f\u00e6der egsan.\n- 1015\n- \n For\u00feon nis \u00e6nig wundor \u00a0 \u00a0 \u00a0 \u00a0 hu him woruldmonna \n seo uncl\u00e6ne gecynd, \u00a0 \u00a0 \u00a0 \u00a0 cearum sorgende,\n hearde ondrede, \u00a0 \u00a0 \u00a0 \u00a0 \u00f0onne sio halge gecynd,\n hwit ond heofonbeorht, \u00a0 \u00a0 \u00a0 \u00a0 heagengla m\u00e6gen,\n for \u00f0\u00e6re onsyne beo\u00f0 \u00a0 \u00a0 \u00a0 \u00a0 egsan afyrhte,\n- 1020\n- \n bida\u00f0 beofiende \u00a0 \u00a0 \u00a0 \u00a0 beorhte gesceafte \n dryhtnes domes. \u00a0 \u00a0 \u00a0 \u00a0 Daga egeslicast\n weor\u00fee\u00f0 in worulde, \u00a0 \u00a0 \u00a0 \u00a0 \u00feonne wuldorcyning\n \u00feurh \u00ferym \u00ferea\u00f0 \u00a0 \u00a0 \u00a0 \u00a0 \u00feeoda gehwylce,\n hate\u00f0 arisan \u00a0 \u00a0 \u00a0 \u00a0 reordberende\n- 1025\n- \n of foldgrafum, \u00a0 \u00a0 \u00a0 \u00a0 folc anra gehwylc, \n cuman to gemote \u00a0 \u00a0 \u00a0 \u00a0 moncynnes gehwone.\n \u00feonne eall hra\u00f0e \u00a0 \u00a0 \u00a0 \u00a0 Adames cynn\n onfeh\u00f0 fl\u00e6sce, \u00a0 \u00a0 \u00a0 \u00a0 weor\u00fee\u00f0 foldr\u00e6ste\n eardes \u00e6t ende. \u00a0 \u00a0 \u00a0 \u00a0 Sceal \u00feonne anra gehwylc\n- 1030\n- \n fore Cristes cyme \u00a0 \u00a0 \u00a0 \u00a0 cwic arisan, \n leo\u00f0um onfon \u00a0 \u00a0 \u00a0 \u00a0 ond lichoman,\n edgeong wesan. \u00a0 \u00a0 \u00a0 \u00a0 Hafa\u00f0 eall on him\n \u00fe\u00e6s \u00fee he on foldan \u00a0 \u00a0 \u00a0 \u00a0 in fyrndagum,\n godes o\u00fe\u00fee gales, \u00a0 \u00a0 \u00a0 \u00a0 on his g\u00e6ste gehlod,\n- 1035\n- \n geara gongum, \u00a0 \u00a0 \u00a0 \u00a0 hafa\u00f0 \u00e6tg\u00e6dre bu, \n lic ond sawle. \u00a0 \u00a0 \u00a0 \u00a0 Sceal on leoht cuman\n sinra weorca wlite \u00a0 \u00a0 \u00a0 \u00a0 ond worda gemynd\n ond heortan gehygd \u00a0 \u00a0 \u00a0 \u00a0 fore heofona cyning.\n \u00f0onne bi\u00fe geyced \u00a0 \u00a0 \u00a0 \u00a0 ond geedniwad\n- 1040\n- \n moncyn \u00feurh meotud. \u00a0 \u00a0 \u00a0 \u00a0 Micel arise\u00f0 \n dryhtfolc to dome, \u00a0 \u00a0 \u00a0 \u00a0 si\u00fe\u00fean dea\u00fees bend\n tolese\u00f0 liffruma. \u00a0 \u00a0 \u00a0 \u00a0 Lyft bi\u00f0 onb\u00e6rned,\n hreosa\u00f0 heofonsteorran, \u00a0 \u00a0 \u00a0 \u00a0 hy\u00fea\u00f0 wide\n gifre glede, \u00a0 \u00a0 \u00a0 \u00a0 g\u00e6stas hweorfa\u00f0\n- 1045\n- \n on ecne eard. \u00a0 \u00a0 \u00a0 \u00a0 Opene weor\u00fea\u00f0 \n ofer middangeard \u00a0 \u00a0 \u00a0 \u00a0 monna d\u00e6de.\n Ne magun hord weras, \u00a0 \u00a0 \u00a0 \u00a0 heortan ge\u00feohtas,\n fore waldende \u00a0 \u00a0 \u00a0 \u00a0 wihte bemi\u00fean.\n Ne sindon him d\u00e6da dyrne, \u00a0 \u00a0 \u00a0 \u00a0 ac \u00fe\u00e6r bi\u00f0 dryhtne cu\u00f0\n- 1050\n- \n on \u00feam miclan d\u00e6ge, \u00a0 \u00a0 \u00a0 \u00a0 hu monna gehwylc \n \u00e6r earnode \u00a0 \u00a0 \u00a0 \u00a0 eces lifes,\n ond eall ondweard \u00a0 \u00a0 \u00a0 \u00a0 \u00fe\u00e6t hi \u00e6r o\u00fe\u00fee si\u00f0\n worhtun in worulde. \u00a0 \u00a0 \u00a0 \u00a0 Ne bi\u00f0 \u00fe\u00e6r wiht forholen\n monna gehygda, \u00a0 \u00a0 \u00a0 \u00a0 ac se m\u00e6ra d\u00e6g\n- 1055\n- \n hre\u00feerlocena hord, \u00a0 \u00a0 \u00a0 \u00a0 heortan ge\u00feohtas, \n ealle \u00e6tywe\u00f0. \u00a0 \u00a0 \u00a0 \u00a0 \u00e6r sceal ge\u00feencan\n g\u00e6stes \u00feearfe, \u00a0 \u00a0 \u00a0 \u00a0 se \u00fee gode mynte\u00f0\n bringan beorhtne wlite, \u00a0 \u00a0 \u00a0 \u00a0 \u00feonne bryne costa\u00f0,\n hat, heorugifre, \u00a0 \u00a0 \u00a0 \u00a0 hu gehealdne sind\n- 1060\n- \n sawle wi\u00f0 synnum \u00a0 \u00a0 \u00a0 \u00a0 fore sigedeman. \n \u00f0onne sio byman stefen \u00a0 \u00a0 \u00a0 \u00a0 ond se beorhta segn,\n ond \u00fe\u00e6t hate fyr \u00a0 \u00a0 \u00a0 \u00a0 ond seo hea dugu\u00f0,\n ond se engla \u00ferym \u00a0 \u00a0 \u00a0 \u00a0 ond se egsan \u00ferea,\n ond se hearda d\u00e6g \u00a0 \u00a0 \u00a0 \u00a0 ond seo hea rod,\n- 1065\n- \n ryht ar\u00e6red \u00a0 \u00a0 \u00a0 \u00a0 rices to beacne, \n folcdryht wera \u00a0 \u00a0 \u00a0 \u00a0 biforan bonna\u00f0,\n sawla gehwylce \u00a0 \u00a0 \u00a0 \u00a0 \u00feara \u00fee si\u00f0 o\u00fe\u00fee \u00e6r\n on lichoman \u00a0 \u00a0 \u00a0 \u00a0 leo\u00feum onfengen.\n \u00f0onne weoroda m\u00e6st \u00a0 \u00a0 \u00a0 \u00a0 fore waldende,\n- 1070\n- \n ece ond edgeong, \u00a0 \u00a0 \u00a0 \u00a0 ondweard g\u00e6\u00f0 \n neode ond nyde, \u00a0 \u00a0 \u00a0 \u00a0 bi noman gehatne,\n bera\u00f0 breosta hord \u00a0 \u00a0 \u00a0 \u00a0 fore bearn godes,\n feores fr\u00e6twe. \u00a0 \u00a0 \u00a0 \u00a0 Wile f\u00e6der eahtan\n hu gesunde suna \u00a0 \u00a0 \u00a0 \u00a0 sawle bringen\n- 1075\n- \n of \u00feam e\u00f0le \u00a0 \u00a0 \u00a0 \u00a0 \u00fee hi on lifdon. \n \u00f0onne beo\u00f0 bealde \u00a0 \u00a0 \u00a0 \u00a0 \u00fea \u00fee beorhtne wlite\n meotude bringa\u00f0. \u00a0 \u00a0 \u00a0 \u00a0 Bi\u00f0 hyra meaht ond gefea\n swi\u00f0e ges\u00e6liglic \u00a0 \u00a0 \u00a0 \u00a0 sawlum to gielde,\n wuldorlean weorca. \u00a0 \u00a0 \u00a0 \u00a0 Wel is \u00feam \u00fee motun\n- 1080\n- \n on \u00fea grimman tid \u00a0 \u00a0 \u00a0 \u00a0 gode lician. \n \u00fe\u00e6r him sylfe geseo\u00f0 \u00a0 \u00a0 \u00a0 \u00a0 sorga m\u00e6ste,\n synfa men, \u00a0 \u00a0 \u00a0 \u00a0 sarigfer\u00f0e.\n Ne bi\u00f0 him to are \u00a0 \u00a0 \u00a0 \u00a0 \u00fe\u00e6t \u00fe\u00e6r fore ell\u00feeodum\n usses dryhtnes rod \u00a0 \u00a0 \u00a0 \u00a0 ondweard stonde\u00f0,\n- 1085\n- \n beacna beorhtast, \u00a0 \u00a0 \u00a0 \u00a0 blode bistemed, \n heofoncyninges \u00a0 \u00a0 \u00a0 \u00a0 hlutran dreore,\n biseon mid swate \u00a0 \u00a0 \u00a0 \u00a0 \u00fe\u00e6t ofer side gesceaft\n scire scine\u00f0. \u00a0 \u00a0 \u00a0 \u00a0 Sceadu beo\u00f0 bidyrned\n \u00fe\u00e6r se leohta beam \u00a0 \u00a0 \u00a0 \u00a0 leodum byrhte\u00f0.\n- 1090\n- \n \u00fe\u00e6t \u00feeah to teonum \u00a0 \u00a0 \u00a0 \u00a0 geteod weor\u00fee\u00f0, \n \u00feeodum to \u00ferea, \u00a0 \u00a0 \u00a0 \u00a0 \u00feam \u00fee \u00feonc gode\n womwyrcende \u00a0 \u00a0 \u00a0 \u00a0 wita ne cu\u00feun,\n \u00fe\u00e6s he on \u00feone halgan beam \u00a0 \u00a0 \u00a0 \u00a0 ahongen w\u00e6s\n fore moncynnes \u00a0 \u00a0 \u00a0 \u00a0 manforwyrhtu,\n- 1095\n- \n \u00fe\u00e6r he leoflice \u00a0 \u00a0 \u00a0 \u00a0 lifes ceapode, \n \u00feeoden moncynne, \u00a0 \u00a0 \u00a0 \u00a0 on \u00feam d\u00e6ge,\n mid \u00fey weor\u00f0e, \u00a0 \u00a0 \u00a0 \u00a0 \u00fee no wom dyde\n his lichoma \u00a0 \u00a0 \u00a0 \u00a0 leahtra firena,\n mid \u00fey usic alysde. \u00a0 \u00a0 \u00a0 \u00a0 \u00fe\u00e6s he eftlean wile\n- 1100\n- \n \u00feurh eorneste \u00a0 \u00a0 \u00a0 \u00a0 ealles gemonian, \n \u00f0onne sio reade \u00a0 \u00a0 \u00a0 \u00a0 rod ofer ealle\n swegle scine\u00f0 \u00a0 \u00a0 \u00a0 \u00a0 on \u00fe\u00e6re sunnan gyld.\n On \u00fea forhtlice \u00a0 \u00a0 \u00a0 \u00a0 firenum fordone,\n swearte synwyrcend, \u00a0 \u00a0 \u00a0 \u00a0 sorgum wlita\u00f0,\n- 1105\n- \n geseo\u00f0 him to bealwe \u00a0 \u00a0 \u00a0 \u00a0 \u00fe\u00e6t him betst bicwom, \n \u00fe\u00e6r hy hit to gode \u00a0 \u00a0 \u00a0 \u00a0 ongietan woldan.\n Ond eac \u00fea ealdan wunde \u00a0 \u00a0 \u00a0 \u00a0 ond \u00fea openan dolg\n on hyra dryhtne geseo\u00f0 \u00a0 \u00a0 \u00a0 \u00a0 dreorigfer\u00f0e,\n swa him mid n\u00e6glum \u00feurhdrifan \u00a0 \u00a0 \u00a0 \u00a0 ni\u00f0hycgende\n- 1110\n- \n \u00fea hwitan honda \u00a0 \u00a0 \u00a0 \u00a0 ond \u00fea halgan fet, \n ond of his sidan swa some \u00a0 \u00a0 \u00a0 \u00a0 swat forletan,\n \u00fe\u00e6r blod ond w\u00e6ter \u00a0 \u00a0 \u00a0 \u00a0 bu tu \u00e6tsomne\n ut bicwoman \u00a0 \u00a0 \u00a0 \u00a0 fore eagna gesyh\u00f0,\n rinnan fore rincum, \u00a0 \u00a0 \u00a0 \u00a0 \u00fea he on rode w\u00e6s.\n- 1115\n- \n Eall \u00feis magon him sylfe \u00a0 \u00a0 \u00a0 \u00a0 geseon \u00feonne, \n open, orgete, \u00a0 \u00a0 \u00a0 \u00a0 \u00fe\u00e6t he for \u00e6lda lufan,\n firenfremmendra, \u00a0 \u00a0 \u00a0 \u00a0 fela \u00ferowade.\n Magun leoda bearn \u00a0 \u00a0 \u00a0 \u00a0 leohte oncnawan\n hu hine lygnedon \u00a0 \u00a0 \u00a0 \u00a0 lease on ge\u00feoncum,\n- 1120\n- \n hysptun hearmcwidum, \u00a0 \u00a0 \u00a0 \u00a0 ond on his hleor somod \n hyra spatl speowdon. \u00a0 \u00a0 \u00a0 \u00a0 Spr\u00e6con him edwit,\n ond on \u00feone eadgan \u00a0 \u00a0 \u00a0 \u00a0 ondwlitan swa some\n helfuse men \u00a0 \u00a0 \u00a0 \u00a0 hondum slogun,\n folmum areahtum \u00a0 \u00a0 \u00a0 \u00a0 ond fystum eac,\n- 1125\n- \n ond ymb his heafod \u00a0 \u00a0 \u00a0 \u00a0 heardne gebigdon \n beag \u00feyrnenne, \u00a0 \u00a0 \u00a0 \u00a0 blinde on ge\u00feoncum,\n dysge ond gedwealde. \u00a0 \u00a0 \u00a0 \u00a0 Gesegun \u00fea dumban gesceaft,\n eor\u00f0an ealgrene \u00a0 \u00a0 \u00a0 \u00a0 ond uprodor,\n forhte gefelan \u00a0 \u00a0 \u00a0 \u00a0 frean \u00ferowinga,\n- 1130\n- \n ond mid cearum cwi\u00f0dun, \u00a0 \u00a0 \u00a0 \u00a0 \u00feeah hi cwice n\u00e6ron, \n \u00fea hyra scyppend \u00a0 \u00a0 \u00a0 \u00a0 scea\u00fean onfengon\n syngum hondum. \u00a0 \u00a0 \u00a0 \u00a0 Sunne wear\u00f0 adw\u00e6sced,\n \u00feream a\u00ferysmed; \u00a0 \u00a0 \u00a0 \u00a0 \u00fea sio \u00feeod geseah\n in Hierusalem \u00a0 \u00a0 \u00a0 \u00a0 godwebba cyst\n- 1135\n- \n \u00fe\u00e6t \u00e6r \u00f0am halgan \u00a0 \u00a0 \u00a0 \u00a0 huse sceolde \n to weor\u00feunga \u00a0 \u00a0 \u00a0 \u00a0 weorud sceawian;\n ufan eall forb\u00e6rst \u00a0 \u00a0 \u00a0 \u00a0 \u00fe\u00e6t hit on eor\u00fean l\u00e6g\n on twam styccum. \u00a0 \u00a0 \u00a0 \u00a0 \u00fe\u00e6s temples segl,\n wundorbleom geworht \u00a0 \u00a0 \u00a0 \u00a0 to wlite \u00fe\u00e6s huses,\n- 1140\n- \n sylf slat on tu, \u00a0 \u00a0 \u00a0 \u00a0 swylce hit seaxes ecg \n scearp \u00feurhwode. \u00a0 \u00a0 \u00a0 \u00a0 Scire burstan\n muras ond stanas \u00a0 \u00a0 \u00a0 \u00a0 monge \u00e6fter foldan,\n ond seo eor\u00f0e eac, \u00a0 \u00a0 \u00a0 \u00a0 egsan myrde,\n beofode on bearhtme, \u00a0 \u00a0 \u00a0 \u00a0 ond se brada s\u00e6\n- 1145\n- \n cy\u00f0de cr\u00e6ftes meaht \u00a0 \u00a0 \u00a0 \u00a0 ond of clomme br\u00e6c \n up yrringa \u00a0 \u00a0 \u00a0 \u00a0 on eor\u00fean f\u00e6\u00f0m,\n ge on stede scynum \u00a0 \u00a0 \u00a0 \u00a0 steorran forleton\n hyra sw\u00e6sne wlite. \u00a0 \u00a0 \u00a0 \u00a0 On \u00fea sylfan tid\n heofon hluttre ongeat \u00a0 \u00a0 \u00a0 \u00a0 hwa hine healice\n- 1150\n- \n torhtne getremede \u00a0 \u00a0 \u00a0 \u00a0 tungolgimmum; \n for\u00feon he his bodan sende, \u00a0 \u00a0 \u00a0 \u00a0 \u00fea w\u00e6s geboren \u00e6rest\n gesceafta scircyning. \u00a0 \u00a0 \u00a0 \u00a0 Hw\u00e6t, eac scyldge men\n gesegon to so\u00f0e, \u00a0 \u00a0 \u00a0 \u00a0 \u00fey sylfan d\u00e6ge\n \u00fee on \u00ferowade, \u00a0 \u00a0 \u00a0 \u00a0 \u00feeodwundor micel,\n- 1155\n- \n \u00fe\u00e6tte eor\u00f0e ageaf \u00a0 \u00a0 \u00a0 \u00a0 \u00fea hyre on l\u00e6gun. \n Eft lifgende \u00a0 \u00a0 \u00a0 \u00a0 up astodan\n \u00fea \u00fee heo \u00e6r f\u00e6ste \u00a0 \u00a0 \u00a0 \u00a0 bifen h\u00e6fde,\n deade bibyrgde, \u00a0 \u00a0 \u00a0 \u00a0 \u00fee dryhtnes bibod\n heoldon on hre\u00fere. \u00a0 \u00a0 \u00a0 \u00a0 Hell eac ongeat,\n- 1160\n- \n scyldwreccende, \u00a0 \u00a0 \u00a0 \u00a0 \u00fe\u00e6t se scyppend cwom, \n waldende god, \u00a0 \u00a0 \u00a0 \u00a0 \u00fea heo \u00fe\u00e6t weorud ageaf,\n hlo\u00fee of \u00f0am hatan hre\u00fere. \u00a0 \u00a0 \u00a0 \u00a0 Hyge wear\u00f0 mongum blissad,\n sawlum sorge toglidene. \u00a0 \u00a0 \u00a0 \u00a0 Hw\u00e6t, eac s\u00e6 cy\u00f0de\n hwa hine gesette \u00a0 \u00a0 \u00a0 \u00a0 on sidne grund,\n- 1165\n- \n tirmeahtig cyning; \u00a0 \u00a0 \u00a0 \u00a0 for\u00feon he hine tredne him \n ongean gyrede, \u00a0 \u00a0 \u00a0 \u00a0 \u00feonne god wolde\n ofer sine y\u00f0e gan. \u00a0 \u00a0 \u00a0 \u00a0 Eahstream ne dorste\n his frean fet \u00a0 \u00a0 \u00a0 \u00a0 flode bisencan,\n ge eac beamas onbudon \u00a0 \u00a0 \u00a0 \u00a0 hwa hy mid bledum sceop,\n- 1170\n- \n monge, nales fea, \u00a0 \u00a0 \u00a0 \u00a0 \u00f0a mihtig god \n on hira anne gestag \u00a0 \u00a0 \u00a0 \u00a0 \u00fe\u00e6r he earfe\u00feu\n ge\u00feolade fore \u00feearfe \u00a0 \u00a0 \u00a0 \u00a0 \u00feeodbuendra,\n la\u00f0licne dea\u00f0 \u00a0 \u00a0 \u00a0 \u00a0 leodum to helpe.\n \u00f0a wear\u00f0 beam monig \u00a0 \u00a0 \u00a0 \u00a0 blodigum tearum\n- 1175\n- \n birunnen under rindum, \u00a0 \u00a0 \u00a0 \u00a0 reade ond \u00feicce; \n s\u00e6p wear\u00f0 to swate. \u00a0 \u00a0 \u00a0 \u00a0 \u00fe\u00e6t asecgan ne magun\n foldbuende \u00a0 \u00a0 \u00a0 \u00a0 \u00feurh frod gewit,\n hu fela \u00fea onfundun \u00a0 \u00a0 \u00a0 \u00a0 \u00fea gefelan ne magun\n dryhtnes \u00ferowinga, \u00a0 \u00a0 \u00a0 \u00a0 deade gesceafte.\n- 1180\n- \n \u00fea \u00fee \u00e6\u00feelast sind \u00a0 \u00a0 \u00a0 \u00a0 eor\u00f0an gecynda, \n ond heofones eac \u00a0 \u00a0 \u00a0 \u00a0 heahgetimbro,\n eall fore \u00feam anum \u00a0 \u00a0 \u00a0 \u00a0 unrot gewear\u00f0,\n forhtafongen. \u00a0 \u00a0 \u00a0 \u00a0 \u00feeah hi fer\u00f0gewit\n of hyra \u00e6\u00feelum \u00a0 \u00a0 \u00a0 \u00a0 \u00e6nig ne cu\u00feen,\n- 1185\n- \n wendon swa \u00feeah wundrum, \u00a0 \u00a0 \u00a0 \u00a0 \u00fea hyra waldend for \n of lichoman. \u00a0 \u00a0 \u00a0 \u00a0 Leode ne cu\u00feon,\n modblinde men \u00a0 \u00a0 \u00a0 \u00a0 meotud oncnawan,\n flintum heardran, \u00a0 \u00a0 \u00a0 \u00a0 \u00fe\u00e6t hi frea nerede\n fram hellcwale \u00a0 \u00a0 \u00a0 \u00a0 halgum meahtum,\n- 1190\n- \n alwalda god. \u00a0 \u00a0 \u00a0 \u00a0 \u00fe\u00e6t \u00e6t \u00e6restan \n fore\u00feoncle men \u00a0 \u00a0 \u00a0 \u00a0 from fruman worulde\n \u00feurh wis gewit, \u00a0 \u00a0 \u00a0 \u00a0 witgan dryhtnes,\n halge higegleawe, \u00a0 \u00a0 \u00a0 \u00a0 h\u00e6le\u00feum s\u00e6gdon,\n oft, nales \u00e6ne, \u00a0 \u00a0 \u00a0 \u00a0 ymb \u00fe\u00e6t \u00e6\u00feele bearn,\n- 1195\n- \n \u00f0\u00e6t se earcnanstan \u00a0 \u00a0 \u00a0 \u00a0 eallum sceolde \n to hleo ond to hro\u00feer \u00a0 \u00a0 \u00a0 \u00a0 h\u00e6le\u00fea cynne\n weor\u00f0an in worulde, \u00a0 \u00a0 \u00a0 \u00a0 wuldres agend,\n eades ordfruma, \u00a0 \u00a0 \u00a0 \u00a0 \u00feurh \u00fea \u00e6\u00feelan cwenn.\n Hw\u00e6s wene\u00f0 se \u00a0 \u00a0 \u00a0 \u00a0 \u00fee mid gewitte nyle\n- 1200\n- \n gemunan \u00fea mildan \u00a0 \u00a0 \u00a0 \u00a0 meotudes lare, \n ond eal \u00f0a earfe\u00f0u \u00a0 \u00a0 \u00a0 \u00a0 \u00fee he fore \u00e6ldum adreag,\n for\u00feon \u00fee he wolde \u00a0 \u00a0 \u00a0 \u00a0 \u00fe\u00e6t we wuldres eard\n in ecnesse \u00a0 \u00a0 \u00a0 \u00a0 agan mosten?\n Swa \u00feam bi\u00f0 grorne \u00a0 \u00a0 \u00a0 \u00a0 on \u00feam grimman d\u00e6ge\n- 1205\n- \n domes \u00fe\u00e6s miclan, \u00a0 \u00a0 \u00a0 \u00a0 \u00feam \u00fee dryhtnes sceal, \n dea\u00f0firenum forden, \u00a0 \u00a0 \u00a0 \u00a0 dolg sceawian,\n wunde ond wite. \u00a0 \u00a0 \u00a0 \u00a0 On werigum sefan\n geseo\u00f0 sorga m\u00e6ste, \u00a0 \u00a0 \u00a0 \u00a0 hu se sylfa cyning\n mid sine lichoman \u00a0 \u00a0 \u00a0 \u00a0 lysde of firenum\n- 1210\n- \n \u00feurh milde mod, \u00a0 \u00a0 \u00a0 \u00a0 \u00fe\u00e6t hy mostun manweorca \n tome lifgan, \u00a0 \u00a0 \u00a0 \u00a0 ond tires bl\u00e6d\n ecne agan. \u00a0 \u00a0 \u00a0 \u00a0 Hy \u00fe\u00e6s e\u00f0les \u00feonc\n hyra waldende \u00a0 \u00a0 \u00a0 \u00a0 wita ne cu\u00feon;\n for\u00feon \u00fe\u00e6r to teonum \u00a0 \u00a0 \u00a0 \u00a0 \u00fea tacen geseo\u00f0\n- 1215\n- \n orgeatu on gode, \u00a0 \u00a0 \u00a0 \u00a0 unges\u00e6lge, \n \u00feonne Crist site\u00f0 \u00a0 \u00a0 \u00a0 \u00a0 on his cynestole,\n on heahsetle, \u00a0 \u00a0 \u00a0 \u00a0 heofonm\u00e6gna god,\n f\u00e6der \u00e6lmihtig. \u00a0 \u00a0 \u00a0 \u00a0 Folca gehwylcum\n scyppend scinende \u00a0 \u00a0 \u00a0 \u00a0 scrife\u00f0 bi gewyrhtum,\n- 1220\n- \n eall \u00e6fter ryhte \u00a0 \u00a0 \u00a0 \u00a0 rodera waldend. \n \u00f0onne beo\u00f0 gesomnad \u00a0 \u00a0 \u00a0 \u00a0 on \u00fea swi\u00feran hond\n \u00fea cl\u00e6nan folc, \u00a0 \u00a0 \u00a0 \u00a0 Criste sylfum\n gecorene bi cystum, \u00a0 \u00a0 \u00a0 \u00a0 \u00fea \u00e6r sinne cwide georne\n lustum l\u00e6stun \u00a0 \u00a0 \u00a0 \u00a0 on hyra lifdagum,\n- 1225\n- \n ond \u00fe\u00e6r womscea\u00fean \u00a0 \u00a0 \u00a0 \u00a0 on \u00feone wyrsan d\u00e6l \n fore scyppende \u00a0 \u00a0 \u00a0 \u00a0 scyrede weor\u00fea\u00f0,\n hate\u00f0 him gewitan \u00a0 \u00a0 \u00a0 \u00a0 on \u00fea winstran hond,\n sigora so\u00f0cyning, \u00a0 \u00a0 \u00a0 \u00a0 synfulra weorud.\n \u00fe\u00e6r hy arasade \u00a0 \u00a0 \u00a0 \u00a0 reota\u00f0 ond beofia\u00f0\n- 1230\n- \n fore frean forhte, \u00a0 \u00a0 \u00a0 \u00a0 swa fule swa g\u00e6t, \n unsyfre folc, \u00a0 \u00a0 \u00a0 \u00a0 arna ne wena\u00f0.\n \u00f0onne bi\u00f0 g\u00e6sta dom \u00a0 \u00a0 \u00a0 \u00a0 fore gode sceaden\n wera cneorissum, \u00a0 \u00a0 \u00a0 \u00a0 swa hi geworhtun \u00e6r,\n \u00fe\u00e6r bi\u00f0 on eadgum \u00a0 \u00a0 \u00a0 \u00a0 e\u00f0gesyne\n- 1235\n- \n \u00fereo tacen somod, \u00a0 \u00a0 \u00a0 \u00a0 \u00fe\u00e6s \u00fee hi hyra \u00feeodnes wel \n wordum ond weorcum \u00a0 \u00a0 \u00a0 \u00a0 willan heoldon.\n An is \u00e6rest \u00a0 \u00a0 \u00a0 \u00a0 orgeate \u00fe\u00e6r\n \u00fe\u00e6t hy fore leodum \u00a0 \u00a0 \u00a0 \u00a0 leohte blica\u00fe,\n bl\u00e6de ond byrhte \u00a0 \u00a0 \u00a0 \u00a0 ofer burga gesetu.\n- 1240\n- \n Him on scina\u00f0 \u00a0 \u00a0 \u00a0 \u00a0 \u00e6rgewyrhtu, \n on sylfra gehwam \u00a0 \u00a0 \u00a0 \u00a0 sunnan beorhtran.\n O\u00feer is to eacan \u00a0 \u00a0 \u00a0 \u00a0 ondgete swa some,\n \u00fe\u00e6t hy him in wuldre witon \u00a0 \u00a0 \u00a0 \u00a0 waldendes giefe,\n ond on seo\u00f0, \u00a0 \u00a0 \u00a0 \u00a0 eagum to wynne,\n- 1245\n- \n \u00fe\u00e6t hi on heofonrice \u00a0 \u00a0 \u00a0 \u00a0 hlutre dreamas \n eadge mid englum \u00a0 \u00a0 \u00a0 \u00a0 agan motun.\n \u00f0onne bi\u00f0 \u00feridde, \u00a0 \u00a0 \u00a0 \u00a0 hu on \u00feystra bealo\n \u00fe\u00e6t ges\u00e6lige weorud \u00a0 \u00a0 \u00a0 \u00a0 gesih\u00f0 \u00fe\u00e6t fordone\n sar \u00ferowian, \u00a0 \u00a0 \u00a0 \u00a0 synna to wite,\n- 1250\n- \n weallendne lig, \u00a0 \u00a0 \u00a0 \u00a0 ond wyrma slite \n bitrum ceaflum, \u00a0 \u00a0 \u00a0 \u00a0 byrnendra scole.\n Of \u00feam him aweaxe\u00f0 \u00a0 \u00a0 \u00a0 \u00a0 wynsum gefea,\n \u00feonne hi \u00fe\u00e6t yfel geseo\u00f0 \u00a0 \u00a0 \u00a0 \u00a0 o\u00f0re dreogan,\n \u00fe\u00e6t hy \u00feurh miltse \u00a0 \u00a0 \u00a0 \u00a0 meotudes gen\u00e6son.\n- 1255\n- \n \u00f0onne hi \u00fey geornor \u00a0 \u00a0 \u00a0 \u00a0 gode \u00feoncia\u00f0 \n bl\u00e6des ond blissa \u00a0 \u00a0 \u00a0 \u00a0 \u00fee hy bu geseo\u00f0,\n \u00fe\u00e6t he hy generede \u00a0 \u00a0 \u00a0 \u00a0 from ni\u00f0cwale\n ond eac forgeaf \u00a0 \u00a0 \u00a0 \u00a0 ece dreamas;\n bi\u00f0 him hel bilocen, \u00a0 \u00a0 \u00a0 \u00a0 heofonrice agiefen.\n- 1260\n- \n Swa sceal gewrixled \u00a0 \u00a0 \u00a0 \u00a0 \u00feam \u00fee \u00e6r wel heoldon \n \u00feurh modlufan \u00a0 \u00a0 \u00a0 \u00a0 meotudes willan.\n \u00f0onne bi\u00f0 \u00feam o\u00ferum \u00a0 \u00a0 \u00a0 \u00a0 ungelice\n willa geworden. \u00a0 \u00a0 \u00a0 \u00a0 Magon weana to fela\n geseon on him selfum, \u00a0 \u00a0 \u00a0 \u00a0 synne genoge\n- 1265\n- \n atolearfo\u00f0a \u00a0 \u00a0 \u00a0 \u00a0 \u00e6r gedenra. \n \u00fe\u00e6r him sorgendum \u00a0 \u00a0 \u00a0 \u00a0 sar o\u00f0clife\u00f0,\n \u00feroht \u00feeodbealu, \u00a0 \u00a0 \u00a0 \u00a0 on \u00fereo healfa.\n An is \u00feara \u00a0 \u00a0 \u00a0 \u00a0 \u00fe\u00e6t hy him yrm\u00fea to fela,\n grim helle fyr, \u00a0 \u00a0 \u00a0 \u00a0 gearo to wite\n- 1270\n- \n ondweard seo\u00f0, \u00a0 \u00a0 \u00a0 \u00a0 on \u00feam hi awo sculon, \n wr\u00e6c winnende, \u00a0 \u00a0 \u00a0 \u00a0 w\u00e6rg\u00f0u dreogan.\n \u00feonne is him o\u00feer \u00a0 \u00a0 \u00a0 \u00a0 earfe\u00feu swa some\n scyldgum to sconde, \u00a0 \u00a0 \u00a0 \u00a0 \u00fe\u00e6t hi \u00fe\u00e6r scoma m\u00e6ste\n dreoga\u00f0 fordone. \u00a0 \u00a0 \u00a0 \u00a0 On him dryhten gesih\u00f0\n- 1275\n- \n nales feara sum \u00a0 \u00a0 \u00a0 \u00a0 firenbealu la\u00f0lic, \n ond \u00fe\u00e6t \u00e6llbeorhte \u00a0 \u00a0 \u00a0 \u00a0 eac sceawia\u00f0\n heofonengla here, \u00a0 \u00a0 \u00a0 \u00a0 ond h\u00e6le\u00fea bearn,\n ealle eor\u00f0buend \u00a0 \u00a0 \u00a0 \u00a0 ond atol deofol,\n mircne m\u00e6gencr\u00e6ft, \u00a0 \u00a0 \u00a0 \u00a0 manwomma gehwone\n- 1280\n- \n magun \u00feurh \u00fea lichoman, \u00a0 \u00a0 \u00a0 \u00a0 leahtra firene, \n geseon on \u00feam sawlum. \u00a0 \u00a0 \u00a0 \u00a0 Beo\u00f0 \u00fea syngan fl\u00e6sc\n scandum \u00feurhwaden \u00a0 \u00a0 \u00a0 \u00a0 swa \u00fe\u00e6t scire gl\u00e6s,\n \u00fe\u00e6t mon y\u00fe\u00e6st m\u00e6g \u00a0 \u00a0 \u00a0 \u00a0 eall \u00feurhwlitan.\n \u00f0onne bi\u00f0 \u00fe\u00e6t \u00feridde \u00a0 \u00a0 \u00a0 \u00a0 \u00feearfendum sorg,\n- 1285\n- \n cwi\u00feende cearo, \u00a0 \u00a0 \u00a0 \u00a0 \u00fe\u00e6t hy on \u00fea cl\u00e6nan seo\u00f0, \n hu hi fore godd\u00e6dum \u00a0 \u00a0 \u00a0 \u00a0 glade blissia\u00f0,\n \u00fea hy, uns\u00e6lge, \u00a0 \u00a0 \u00a0 \u00a0 \u00e6r forhogdun\n to donne \u00a0 \u00a0 \u00a0 \u00a0 \u00feonne him dagas l\u00e6stun;\n ond be hyra weorcum \u00a0 \u00a0 \u00a0 \u00a0 wepende sar\n- 1290\n- \n \u00fe\u00e6t hi \u00e6r freolice \u00a0 \u00a0 \u00a0 \u00a0 fremedon unryht. \n Geseo\u00f0 hi \u00fea betran \u00a0 \u00a0 \u00a0 \u00a0 bl\u00e6de scinan;\n ne bi\u00f0 him hyra yrm\u00f0u \u00a0 \u00a0 \u00a0 \u00a0 an to wite,\n ac \u00feara o\u00feerra \u00a0 \u00a0 \u00a0 \u00a0 ead to sorgum,\n \u00fe\u00e6s \u00fee hy swa f\u00e6gre gefean \u00a0 \u00a0 \u00a0 \u00a0 on fyrndagum\n- 1295\n- \n ond swa \u00e6nlice \u00a0 \u00a0 \u00a0 \u00a0 anforletun, \n \u00feurh leaslice \u00a0 \u00a0 \u00a0 \u00a0 lices wynne,\n earges fl\u00e6schoman \u00a0 \u00a0 \u00a0 \u00a0 idelne lust.\n \u00fe\u00e6r hi ascamode, \u00a0 \u00a0 \u00a0 \u00a0 scondum gedreahte,\n swicia\u00f0 on swiman; \u00a0 \u00a0 \u00a0 \u00a0 synbyr\u00feenne,\n- 1300\n- \n firenweorc bera\u00f0, \u00a0 \u00a0 \u00a0 \u00a0 on \u00fe\u00e6t \u00fea folc seo\u00f0. \n W\u00e6re him \u00feonne betre \u00a0 \u00a0 \u00a0 \u00a0 \u00fe\u00e6t hy bealod\u00e6de,\n \u00e6lces unryhtes, \u00a0 \u00a0 \u00a0 \u00a0 \u00e6r gescomeden\n fore anum men, \u00a0 \u00a0 \u00a0 \u00a0 eargra weorca,\n godes bodan s\u00e6gdon \u00a0 \u00a0 \u00a0 \u00a0 \u00fe\u00e6t hi to gyrne wiston\n- 1305\n- \n firend\u00e6da on him. \u00a0 \u00a0 \u00a0 \u00a0 Ne m\u00e6g \u00feurh \u00fe\u00e6t fl\u00e6sc se scrift \n geseon on \u00fe\u00e6re sawle, \u00a0 \u00a0 \u00a0 \u00a0 hw\u00e6\u00feer him mon so\u00f0 \u00fee lyge\n saga\u00f0 on hine sylfne, \u00a0 \u00a0 \u00a0 \u00a0 \u00feonne he \u00fea synne big\u00e6\u00f0.\n M\u00e6g mon swa \u00feeah gelacnigan \u00a0 \u00a0 \u00a0 \u00a0 leahtra gehwylcne,\n yfel uncl\u00e6ne, \u00a0 \u00a0 \u00a0 \u00a0 gif he hit anum geseg\u00f0,\n- 1310\n- \n ond n\u00e6nig bihelan m\u00e6g \u00a0 \u00a0 \u00a0 \u00a0 on \u00feam heardan d\u00e6ge \n wom unbeted, \u00a0 \u00a0 \u00a0 \u00a0 \u00f0\u00e6r hit \u00fea weorud geseo\u00f0.\n Eala, \u00fe\u00e6r we nu magon \u00a0 \u00a0 \u00a0 \u00a0 wra\u00fee firene\n geseon on ussum sawlum, \u00a0 \u00a0 \u00a0 \u00a0 synna wunde,\n mid lichoman \u00a0 \u00a0 \u00a0 \u00a0 leahtra gehygdu,\n- 1315\n- \n eagum uncl\u00e6ne \u00a0 \u00a0 \u00a0 \u00a0 inge\u00feoncas! \n Ne \u00fe\u00e6t \u00e6nig m\u00e6g \u00a0 \u00a0 \u00a0 \u00a0 o\u00ferum gesecgan\n mid hu micle elne \u00a0 \u00a0 \u00a0 \u00a0 \u00e6ghwylc wille\n \u00feurh ealle list \u00a0 \u00a0 \u00a0 \u00a0 lifes tiligan,\n feores forhtlice, \u00a0 \u00a0 \u00a0 \u00a0 for\u00f0 a\u00f0olian,\n- 1320\n- \n synrust \u00fewean \u00a0 \u00a0 \u00a0 \u00a0 ond hine sylfne \u00ferean, \n ond \u00fe\u00e6t wom \u00e6rran \u00a0 \u00a0 \u00a0 \u00a0 wunde h\u00e6lan,\n \u00feone lytlan fyrst \u00a0 \u00a0 \u00a0 \u00a0 \u00fee her lifes sy,\n \u00fe\u00e6t he m\u00e6ge fore eagum \u00a0 \u00a0 \u00a0 \u00a0 eor\u00f0buendra\n unscomiende \u00a0 \u00a0 \u00a0 \u00a0 e\u00f0les mid monnum\n- 1325\n- \n brucan bysmerleas, \u00a0 \u00a0 \u00a0 \u00a0 \u00feendan bu somod \n lic ond sawle \u00a0 \u00a0 \u00a0 \u00a0 lifgan mote.\n Nu we sceolon georne \u00a0 \u00a0 \u00a0 \u00a0 gleawlice \u00feurhseon\n usse hre\u00feercofan \u00a0 \u00a0 \u00a0 \u00a0 heortan eagum,\n innan uncyste. \u00a0 \u00a0 \u00a0 \u00a0 We mid \u00feam o\u00f0rum ne magun,\n- 1330\n- \n heafodgimmum, \u00a0 \u00a0 \u00a0 \u00a0 hyge\u00feonces fer\u00f0 \n eagum \u00feurhwlitan \u00a0 \u00a0 \u00a0 \u00a0 \u00e6nge \u00feinga,\n hw\u00e6\u00feer him yfel \u00fee god \u00a0 \u00a0 \u00a0 \u00a0 under wunige,\n \u00fe\u00e6t he on \u00fea grimman tid \u00a0 \u00a0 \u00a0 \u00a0 gode licie,\n \u00feonne he ofer weoruda gehwylc \u00a0 \u00a0 \u00a0 \u00a0 wuldre scine\u00f0\n- 1335\n- \n of his heahsetle \u00a0 \u00a0 \u00a0 \u00a0 hlutran lege. \n \u00fe\u00e6r he fore englum \u00a0 \u00a0 \u00a0 \u00a0 ond fore el\u00feeodum\n to \u00feam eadgestum \u00a0 \u00a0 \u00a0 \u00a0 \u00e6rest m\u00e6\u00f0le\u00f0,\n ond him sw\u00e6slice \u00a0 \u00a0 \u00a0 \u00a0 sibbe gehate\u00f0,\n heofona heahcyning; \u00a0 \u00a0 \u00a0 \u00a0 halgan reorde\n- 1340\n- \n frefre\u00f0 he f\u00e6gre \u00a0 \u00a0 \u00a0 \u00a0 ond him fri\u00fe beode\u00f0, \n hate\u00f0 hy gesunde \u00a0 \u00a0 \u00a0 \u00a0 ond gesenade\n on e\u00feel faran \u00a0 \u00a0 \u00a0 \u00a0 engla dreames,\n ond \u00fe\u00e6s to widan feore \u00a0 \u00a0 \u00a0 \u00a0 willum neotan:\n \"Onfo\u00f0 nu mid freondum \u00a0 \u00a0 \u00a0 \u00a0 mines f\u00e6der rice\n- 1345\n- \n \u00fe\u00e6t eow w\u00e6s \u00e6r woruldum \u00a0 \u00a0 \u00a0 \u00a0 wynlice gearo, \n bl\u00e6d mid blissum, \u00a0 \u00a0 \u00a0 \u00a0 beorht e\u00f0les wlite,\n hwonne ge \u00fea lifwelan \u00a0 \u00a0 \u00a0 \u00a0 mid \u00feam leofstum,\n swase swegldreamas, \u00a0 \u00a0 \u00a0 \u00a0 geseon mosten.\n Ge \u00fe\u00e6s earnedon \u00a0 \u00a0 \u00a0 \u00a0 \u00fea ge earme men,\n- 1350\n- \n woruld\u00feearfende, \u00a0 \u00a0 \u00a0 \u00a0 willum onfengun \n on mildum sefan. \u00a0 \u00a0 \u00a0 \u00a0 \u00f0onne hy him \u00feurh minne noman\n ea\u00f0mode to eow \u00a0 \u00a0 \u00a0 \u00a0 arna b\u00e6dun,\n \u00feonne ge hyra hulpon \u00a0 \u00a0 \u00a0 \u00a0 ond him hleo\u00f0 gefon,\n hingrendum hlaf \u00a0 \u00a0 \u00a0 \u00a0 ond hr\u00e6gl nacedum;\n- 1355\n- \n ond \u00fea \u00fee on sare \u00a0 \u00a0 \u00a0 \u00a0 seoce lagun, \n \u00e6fdon unsofte, \u00a0 \u00a0 \u00a0 \u00a0 adle gebundne,\n to \u00feam ge holdlice \u00a0 \u00a0 \u00a0 \u00a0 hyge sta\u00feeladon\n mid modes myne. \u00a0 \u00a0 \u00a0 \u00a0 Eall ge \u00fe\u00e6t me dydon,\n \u00f0onne ge hy mid sibbum sohtun, \u00a0 \u00a0 \u00a0 \u00a0 ond hyra sefan trymedon\n- 1360\n- \n for\u00f0 on frofre. \u00a0 \u00a0 \u00a0 \u00a0 \u00fe\u00e6s ge f\u00e6gre sceolon \n lean mid leofum \u00a0 \u00a0 \u00a0 \u00a0 lange brucan.\"\n Onginne\u00f0 \u00feonne to \u00feam yflum \u00a0 \u00a0 \u00a0 \u00a0 ungelice\n wordum m\u00e6\u00f0lan \u00a0 \u00a0 \u00a0 \u00a0 \u00fee him bi\u00f0 on \u00fea wynstran hond,\n \u00feurh egsan \u00ferea, \u00a0 \u00a0 \u00a0 \u00a0 alwalda god.\n- 1365\n- \n Ne \u00feurfon hi \u00feonne to meotude \u00a0 \u00a0 \u00a0 \u00a0 miltse gewenan, \n lifes ne lissa, \u00a0 \u00a0 \u00a0 \u00a0 ac \u00fe\u00e6r lean cuma\u00f0\n werum bi gewyrhtum \u00a0 \u00a0 \u00a0 \u00a0 worda ond d\u00e6da,\n reordberendum; \u00a0 \u00a0 \u00a0 \u00a0 sceolon \u00feone ryhtan dom\n anne ge\u00e6fnan, \u00a0 \u00a0 \u00a0 \u00a0 egsan fulne.\n- 1370\n- \n Bi\u00f0 \u00fe\u00e6r seo miccle \u00a0 \u00a0 \u00a0 \u00a0 milts afyrred \n \u00feeodbuendum, \u00a0 \u00a0 \u00a0 \u00a0 on \u00feam d\u00e6ge,\n \u00fe\u00e6s \u00e6lmihtigan, \u00a0 \u00a0 \u00a0 \u00a0 \u00feonne he yrringa\n on \u00fe\u00e6t fr\u00e6te folc \u00a0 \u00a0 \u00a0 \u00a0 firene st\u00e6le\u00f0\n la\u00feum wordum, \u00a0 \u00a0 \u00a0 \u00a0 hate\u00f0 hyra lifes riht\n- 1375\n- \n ondweard ywan \u00a0 \u00a0 \u00a0 \u00a0 \u00fe\u00e6t he him \u00e6r forgeaf \n syngum to s\u00e6lum. \u00a0 \u00a0 \u00a0 \u00a0 Onginne\u00f0 sylf cwe\u00f0an,\n swa he to anum sprece, \u00a0 \u00a0 \u00a0 \u00a0 ond hw\u00e6\u00fere ealle m\u00e6ne\u00f0,\n firensynnig folc, \u00a0 \u00a0 \u00a0 \u00a0 frea \u00e6lmihtig:\n \"Hw\u00e6t, ic \u00feec mon \u00a0 \u00a0 \u00a0 \u00a0 minum hondum\n- 1380\n- \n \u00e6rest geworhte, \u00a0 \u00a0 \u00a0 \u00a0 ond \u00fee ondgiet sealde. \n Of lame ic \u00fee leo\u00feo gesette, \u00a0 \u00a0 \u00a0 \u00a0 geaf ic \u00f0e lifgendne g\u00e6st,\n arode \u00fee ofer ealle gesceafte, \u00a0 \u00a0 \u00a0 \u00a0 gedyde ic \u00fe\u00e6t \u00feu onsyn h\u00e6fdest,\n m\u00e6gwlite me gelicne. \u00a0 \u00a0 \u00a0 \u00a0 Geaf ic \u00fee eac meahta sped,\n welan ofer widlonda gehwylc, \u00a0 \u00a0 \u00a0 \u00a0 nysses \u00feu wean \u00e6nigne d\u00e6l,\n- 1385\n- \n \u00f0ystra \u00fe\u00e6t \u00feu \u00feolian sceolde. \u00a0 \u00a0 \u00a0 \u00a0 \u00feu \u00fe\u00e6s \u00feonc ne wisses. \n \u00fea ic \u00f0e swa scienne \u00a0 \u00a0 \u00a0 \u00a0 gesceapen h\u00e6fde,\n wynlicne geworht, \u00a0 \u00a0 \u00a0 \u00a0 ond \u00fee welan forgyfen\n \u00fe\u00e6t \u00f0u mostes wealdan \u00a0 \u00a0 \u00a0 \u00a0 worulde gesceaftum,\n \u00f0a ic \u00fee on \u00fea f\u00e6gran \u00a0 \u00a0 \u00a0 \u00a0 foldan gesette\n- 1390\n- \n to neotenne \u00a0 \u00a0 \u00a0 \u00a0 neorxnawonges \n beorhtne bl\u00e6dwelan, \u00a0 \u00a0 \u00a0 \u00a0 bleom scinende,\n \u00f0a \u00feu lifes word \u00a0 \u00a0 \u00a0 \u00a0 l\u00e6stan noldes,\n ac min bibod br\u00e6ce \u00a0 \u00a0 \u00a0 \u00a0 be \u00feines bonan worde.\n F\u00e6cnum feonde \u00a0 \u00a0 \u00a0 \u00a0 fur\u00feor hyrdes,\n- 1395\n- \n sce\u00fe\u00feendum sca\u00fean, \u00a0 \u00a0 \u00a0 \u00a0 \u00feonne \u00feinum scyppende. \n Nu ic \u00f0a ealdan race \u00a0 \u00a0 \u00a0 \u00a0 anforl\u00e6te,\n hu \u00feu \u00e6t \u00e6restan \u00a0 \u00a0 \u00a0 \u00a0 yfle gehogdes,\n firenweorcum forlure \u00a0 \u00a0 \u00a0 \u00a0 \u00fe\u00e6t ic \u00f0e to fremum sealde.\n \u00fea ic \u00fee goda swa fela \u00a0 \u00a0 \u00a0 \u00a0 forgiefen h\u00e6fde\n- 1400\n- \n ond \u00fee on \u00feam eallum \u00a0 \u00a0 \u00a0 \u00a0 eades to lyt \n mode \u00feuhte, \u00a0 \u00a0 \u00a0 \u00a0 gif \u00feu meahte sped\n efenmicle gode \u00a0 \u00a0 \u00a0 \u00a0 agan ne moste,\n \u00f0a \u00feu of \u00fean gefean \u00a0 \u00a0 \u00a0 \u00a0 fremde wurde,\n feondum to willan \u00a0 \u00a0 \u00a0 \u00a0 feor aworpen.\n- 1405\n- \n Neorxnawonges wlite \u00a0 \u00a0 \u00a0 \u00a0 nyde sceoldes \n agiefan geomormod, \u00a0 \u00a0 \u00a0 \u00a0 g\u00e6sta e\u00feel,\n earg ond unrot, \u00a0 \u00a0 \u00a0 \u00a0 eallum bid\u00e6led\n duge\u00feum ond dreamum, \u00a0 \u00a0 \u00a0 \u00a0 ond \u00fea bidrifen wurde\n on \u00feas \u00feeostran weoruld, \u00a0 \u00a0 \u00a0 \u00a0 \u00fe\u00e6r \u00feu \u00feolades si\u00fe\u00fean\n- 1410\n- \n m\u00e6genearfe\u00feu \u00a0 \u00a0 \u00a0 \u00a0 micle stunde, \n sar ond swar gewin \u00a0 \u00a0 \u00a0 \u00a0 ond sweartne dea\u00f0,\n ond \u00e6fter hingonge \u00a0 \u00a0 \u00a0 \u00a0 hreosan sceoldes\n hean in helle, \u00a0 \u00a0 \u00a0 \u00a0 helpendra leas.\n \u00f0a mec ongon hreowan \u00a0 \u00a0 \u00a0 \u00a0 \u00fe\u00e6t min hondgeweorc\n- 1415\n- \n on feonda geweald \u00a0 \u00a0 \u00a0 \u00a0 feran sceolde, \n moncynnes tuddor \u00a0 \u00a0 \u00a0 \u00a0 mancwealm seon,\n sceolde uncu\u00f0ne \u00a0 \u00a0 \u00a0 \u00a0 eard cunnian,\n sare si\u00feas. \u00a0 \u00a0 \u00a0 \u00a0 \u00fea ic sylf gestag,\n maga in modor, \u00a0 \u00a0 \u00a0 \u00a0 \u00feeah w\u00e6s hyre m\u00e6gdenhad\n- 1420\n- \n \u00e6ghw\u00e6s onwalg. \u00a0 \u00a0 \u00a0 \u00a0 Wear\u00f0 ic ana geboren \n folcum to frofre. \u00a0 \u00a0 \u00a0 \u00a0 Mec mon folmum biwond,\n bi\u00feeahte mid \u00feearfan w\u00e6dum, \u00a0 \u00a0 \u00a0 \u00a0 ond mec \u00fea on \u00feeostre alegde\n biwundenne mid wonnum cla\u00feum. \u00a0 \u00a0 \u00a0 \u00a0 Hw\u00e6t, ic \u00fe\u00e6t for worulde ge\u00feolade!\n Lytel \u00feuhte ic leoda bearnum, \u00a0 \u00a0 \u00a0 \u00a0 l\u00e6g ic on heardum stane,\n- 1425\n- \n cildgeong on crybbe. \u00a0 \u00a0 \u00a0 \u00a0 Mid \u00fey ic \u00fee wolde cwealm afyrran, \n hat helle bealu, \u00a0 \u00a0 \u00a0 \u00a0 \u00fe\u00e6t \u00feu moste halig scinan\n eadig on \u00feam ecan life, \u00a0 \u00a0 \u00a0 \u00a0 for\u00f0on ic \u00fe\u00e6t earfe\u00fee wonn.\n N\u00e6s me for mode, \u00a0 \u00a0 \u00a0 \u00a0 ac ic on magugeogu\u00f0e\n yrm\u00feu ge\u00e6fnde, \u00a0 \u00a0 \u00a0 \u00a0 arleas licsar,\n- 1430\n- \n \u00fe\u00e6t ic \u00feurh \u00fea \u00a0 \u00a0 \u00a0 \u00a0 w\u00e6re \u00fee gelic, \n ond \u00feu meahte \u00a0 \u00a0 \u00a0 \u00a0 minum weor\u00fean\n m\u00e6gwlite gelic, \u00a0 \u00a0 \u00a0 \u00a0 mane bid\u00e6led.\n Ond fore monna lufan \u00a0 \u00a0 \u00a0 \u00a0 min \u00ferowade\n heafod hearmslege; \u00a0 \u00a0 \u00a0 \u00a0 hleor ge\u00feolade,\n- 1435\n- \n oft ondlata, \u00a0 \u00a0 \u00a0 \u00a0 arleasra spatl, \n of mu\u00f0e onfeng, \u00a0 \u00a0 \u00a0 \u00a0 manfremmendra.\n Swylce hi me geblendon \u00a0 \u00a0 \u00a0 \u00a0 bittre tosomne\n unswetne drync \u00a0 \u00a0 \u00a0 \u00a0 ecedes ond geallan.\n \u00f0onne ic fore folce onfeng \u00a0 \u00a0 \u00a0 \u00a0 feonda geni\u00f0lan,\n- 1440\n- \n fylgdon me mid firenum, \u00a0 \u00a0 \u00a0 \u00a0 f\u00e6h\u00fee ne rohtun, \n ond mid sweopum slogun. \u00a0 \u00a0 \u00a0 \u00a0 Ic \u00fe\u00e6t sar for \u00f0e\n \u00feurh ea\u00f0medu \u00a0 \u00a0 \u00a0 \u00a0 eall ge\u00feolade,\n hosp ond heardcwide. \u00a0 \u00a0 \u00a0 \u00a0 \u00fea hi hw\u00e6sne beag\n ymb min heafod \u00a0 \u00a0 \u00a0 \u00a0 heardne gebygdon,\n- 1445\n- \n \u00feream bi\u00ferycton, \u00a0 \u00a0 \u00a0 \u00a0 se w\u00e6s of \u00feornum geworht. \n \u00f0a ic w\u00e6s ahongen \u00a0 \u00a0 \u00a0 \u00a0 on heanne beam,\n rode gef\u00e6stnad, \u00a0 \u00a0 \u00a0 \u00a0 \u00f0a hi ricene mid spere\n of minre sidan \u00a0 \u00a0 \u00a0 \u00a0 swat ut guton,\n dreor to foldan, \u00a0 \u00a0 \u00a0 \u00a0 \u00fe\u00e6t \u00feu of deofles \u00feurh \u00fe\u00e6t\n- 1450\n- \n nydgewalde \u00a0 \u00a0 \u00a0 \u00a0 genered wurde. \n \u00f0a ic, womma leas, \u00a0 \u00a0 \u00a0 \u00a0 wite \u00feolade,\n yfel earfe\u00feu, \u00a0 \u00a0 \u00a0 \u00a0 o\u00fe\u00fe\u00e6t ic anne forlet\n of minum lichoman \u00a0 \u00a0 \u00a0 \u00a0 lifgendne g\u00e6st.\n Geseo\u00f0 nu \u00fea feorhdolg \u00a0 \u00a0 \u00a0 \u00a0 \u00fee ge gefremedun \u00e6r\n- 1455\n- \n on minum folmum \u00a0 \u00a0 \u00a0 \u00a0 ond on fotum swa some, \n \u00feurh \u00fea ic hongade \u00a0 \u00a0 \u00a0 \u00a0 hearde gef\u00e6stnad;\n meaht her eac geseon \u00a0 \u00a0 \u00a0 \u00a0 orgete nu gen\n on minre sidan \u00a0 \u00a0 \u00a0 \u00a0 swatge wunde.\n Hu \u00fe\u00e6r w\u00e6s unefen racu \u00a0 \u00a0 \u00a0 \u00a0 unc gem\u00e6ne!\n- 1460\n- \n Ic onfeng \u00fein sar \u00a0 \u00a0 \u00a0 \u00a0 \u00fe\u00e6t \u00feu moste ges\u00e6lig \n mines e\u00feelrices \u00a0 \u00a0 \u00a0 \u00a0 eadig neotan,\n ond \u00fee mine dea\u00f0e \u00a0 \u00a0 \u00a0 \u00a0 deore gebohte\n \u00fe\u00e6t longe lif \u00a0 \u00a0 \u00a0 \u00a0 \u00fe\u00e6t \u00feu on leohte si\u00fe\u00fean,\n wlitig, womma leas, \u00a0 \u00a0 \u00a0 \u00a0 wunian mostes.\n- 1465\n- \n L\u00e6g min fl\u00e6schoma \u00a0 \u00a0 \u00a0 \u00a0 in foldan bigrafen, \n ni\u00fere gehyded, \u00a0 \u00a0 \u00a0 \u00a0 se \u00f0e n\u00e6ngum scod,\n in byrgenne, \u00a0 \u00a0 \u00a0 \u00a0 \u00fe\u00e6t \u00feu meahte beorhte uppe\n on roderum wesan, \u00a0 \u00a0 \u00a0 \u00a0 rice mid englum.\n For hwon forlete \u00feu \u00a0 \u00a0 \u00a0 \u00a0 lif \u00fe\u00e6t scyne\n- 1470\n- \n \u00fe\u00e6t ic \u00fee for lufan \u00a0 \u00a0 \u00a0 \u00a0 mid mine lichoman \n heanum to helpe \u00a0 \u00a0 \u00a0 \u00a0 hold gecypte?\n Wurde \u00feu \u00fe\u00e6s gewitleas \u00a0 \u00a0 \u00a0 \u00a0 \u00fe\u00e6t \u00feu waldende\n \u00feinre alysnesse \u00a0 \u00a0 \u00a0 \u00a0 \u00feonc ne wisses?\n Ne ascige ic nu \u00a0 \u00a0 \u00a0 \u00a0 owiht bi \u00feam bitran\n- 1475\n- \n dea\u00f0e minum \u00a0 \u00a0 \u00a0 \u00a0 \u00fee ic adreag fore \u00fee, \n ac forgield me \u00fein lif, \u00a0 \u00a0 \u00a0 \u00a0 \u00fe\u00e6s \u00fee ic iu \u00fee min\n \u00feurh woruldwite \u00a0 \u00a0 \u00a0 \u00a0 weor\u00f0 gesealde;\n \u00f0\u00e6s lifes ic manige \u00a0 \u00a0 \u00a0 \u00a0 \u00fee \u00feu mid leahtrum hafast\n ofslegen synlice \u00a0 \u00a0 \u00a0 \u00a0 sylfum to sconde.\n- 1480\n- \n For hwan \u00feu \u00fe\u00e6t selegescot \u00a0 \u00a0 \u00a0 \u00a0 \u00fe\u00e6t ic me sw\u00e6s on \u00fee \n gehalgode, \u00a0 \u00a0 \u00a0 \u00a0 hus to wynne,\n \u00feurh firenlustas, \u00a0 \u00a0 \u00a0 \u00a0 fule synne,\n unsyfre bismite \u00a0 \u00a0 \u00a0 \u00a0 sylfes willum?\n Ge \u00feu \u00feone lichoman \u00a0 \u00a0 \u00a0 \u00a0 \u00fee ic alysde me\n- 1485\n- \n feondum of f\u00e6\u00f0me, \u00a0 \u00a0 \u00a0 \u00a0 ond \u00fea him firene forbead, \n scyldwyrcende \u00a0 \u00a0 \u00a0 \u00a0 scondum gewemdest.\n For hwon ahenge \u00feu mec hefgor \u00a0 \u00a0 \u00a0 \u00a0 on \u00feinra honda rode\n \u00feonne iu hongade? \u00a0 \u00a0 \u00a0 \u00a0 Hw\u00e6t, me \u00feeos heardra \u00feynce\u00f0!\n Nu is sw\u00e6rra mid mec \u00a0 \u00a0 \u00a0 \u00a0 \u00feinra synna rod\n- 1490\n- \n \u00fee ic unwillum \u00a0 \u00a0 \u00a0 \u00a0 on beom gef\u00e6stnad, \n \u00feonne seo o\u00feer w\u00e6s \u00a0 \u00a0 \u00a0 \u00a0 \u00fee ic \u00e6r gestag,\n willum minum, \u00a0 \u00a0 \u00a0 \u00a0 \u00fea mec \u00fein wea swi\u00feast\n \u00e6t heortan gehreaw, \u00a0 \u00a0 \u00a0 \u00a0 \u00fea ic \u00feec from helle ateah,\n \u00fe\u00e6r \u00feu hit wolde sylfa \u00a0 \u00a0 \u00a0 \u00a0 si\u00fe\u00fean gehealdan.\n- 1495\n- \n Ic w\u00e6s on worulde w\u00e6dla \u00a0 \u00a0 \u00a0 \u00a0 \u00fe\u00e6t \u00f0u wurde welig in heofonum, \n earm ic w\u00e6s on e\u00f0le \u00feinum \u00a0 \u00a0 \u00a0 \u00a0 \u00fe\u00e6t \u00feu wurde eadig on minum.\n \u00fea \u00f0u \u00fe\u00e6s ealles \u00a0 \u00a0 \u00a0 \u00a0 \u00e6nigne \u00feonc\n \u00feinum nergende \u00a0 \u00a0 \u00a0 \u00a0 nysses on mode.\n Bibead ic eow \u00a0 \u00a0 \u00a0 \u00a0 \u00fe\u00e6t ge bro\u00feor mine\n- 1500\n- \n in woruldrice \u00a0 \u00a0 \u00a0 \u00a0 wel aretten \n of \u00feam \u00e6htum \u00a0 \u00a0 \u00a0 \u00a0 \u00fee ic eow on eor\u00f0an geaf,\n earmra hulpen. \u00a0 \u00a0 \u00a0 \u00a0 Earge ge \u00fe\u00e6t l\u00e6stun,\n \u00feearfum forwyrndon \u00a0 \u00a0 \u00a0 \u00a0 \u00fe\u00e6t hi under eowrum \u00fe\u00e6ce mosten\n in gebugan, \u00a0 \u00a0 \u00a0 \u00a0 ond him \u00e6ghw\u00e6s oftugon,\n- 1505\n- \n \u00feurh heardne hyge, \u00a0 \u00a0 \u00a0 \u00a0 hr\u00e6gles nacedum, \n moses meteleasum. \u00a0 \u00a0 \u00a0 \u00a0 \u00feeah hy him \u00feurh minne noman\n werge, wonhale, \u00a0 \u00a0 \u00a0 \u00a0 w\u00e6tan b\u00e6dan,\n drynces gedreahte, \u00a0 \u00a0 \u00a0 \u00a0 dugu\u00fea lease,\n \u00feurste ge\u00feegede, \u00a0 \u00a0 \u00a0 \u00a0 ge him \u00feriste oftugon.\n- 1510\n- \n Sarge ge ne sohton, \u00a0 \u00a0 \u00a0 \u00a0 ne him sw\u00e6slic word \n frofre gespr\u00e6con, \u00a0 \u00a0 \u00a0 \u00a0 \u00fe\u00e6t hy \u00fey freoran hyge\n mode gefengen. \u00a0 \u00a0 \u00a0 \u00a0 Eall ge \u00fe\u00e6t me dydan,\n to hyn\u00feum heofoncyninge. \u00a0 \u00a0 \u00a0 \u00a0 \u00fe\u00e6s ge sceolon hearde adreogan\n wite to widan ealdre, \u00a0 \u00a0 \u00a0 \u00a0 wr\u00e6c mid deoflum ge\u00feolian.\"\n- 1515\n- \n \u00f0onne \u00fe\u00e6r ofer ealle \u00a0 \u00a0 \u00a0 \u00a0 egeslicne cwide \n sylf sigora weard, \u00a0 \u00a0 \u00a0 \u00a0 sares fulne,\n ofer \u00fe\u00e6t f\u00e6ge folc \u00a0 \u00a0 \u00a0 \u00a0 for\u00f0 forl\u00e6te\u00f0,\n cwi\u00f0 to \u00feara synfulra \u00a0 \u00a0 \u00a0 \u00a0 sawla fe\u00fean:\n \"Fara\u00f0 nu, awyrgde, \u00a0 \u00a0 \u00a0 \u00a0 willum biscyrede\n- 1520\n- \n engla dreames, \u00a0 \u00a0 \u00a0 \u00a0 on ece fir \n \u00fe\u00e6t w\u00e6s Satane \u00a0 \u00a0 \u00a0 \u00a0 ond his gesi\u00feum mid,\n deofle gegearwad \u00a0 \u00a0 \u00a0 \u00a0 ond \u00fe\u00e6re deorcan scole,\n hat ond heorogrim. \u00a0 \u00a0 \u00a0 \u00a0 On \u00fe\u00e6t ge hreosan sceolan!\"\n Ne magon hi \u00feonne gehynan \u00a0 \u00a0 \u00a0 \u00a0 heofoncyninges bibod,\n- 1525\n- \n r\u00e6dum birofene. \u00a0 \u00a0 \u00a0 \u00a0 Sceolon ra\u00fee feallan \n on grimne grund \u00a0 \u00a0 \u00a0 \u00a0 \u00fea \u00e6r wi\u00fe gode wunnon.\n Bi\u00f0 \u00feonne rices weard \u00a0 \u00a0 \u00a0 \u00a0 re\u00fee ond meahtig,\n yrre ond egesful. \u00a0 \u00a0 \u00a0 \u00a0 Ondweard ne m\u00e6g\n on \u00feissum foldwege \u00a0 \u00a0 \u00a0 \u00a0 feond gebidan.\n- 1530\n- \n Swape\u00f0 sigemece \u00a0 \u00a0 \u00a0 \u00a0 mid \u00fe\u00e6re swi\u00f0ran hond \n \u00fe\u00e6t on \u00fe\u00e6t deope d\u00e6l \u00a0 \u00a0 \u00a0 \u00a0 deofol gefealla\u00f0\n in sweartne leg, \u00a0 \u00a0 \u00a0 \u00a0 synfulra here\n under foldan sceat, \u00a0 \u00a0 \u00a0 \u00a0 f\u00e6ge g\u00e6stas\n on wra\u00fera wic, \u00a0 \u00a0 \u00a0 \u00a0 womfulra scolu\n- 1535\n- \n werge to forwyrde \u00a0 \u00a0 \u00a0 \u00a0 on witehus, \n dea\u00f0sele deofles. \u00a0 \u00a0 \u00a0 \u00a0 Nales dryhtnes gemynd\n si\u00fe\u00fean geseca\u00f0, \u00a0 \u00a0 \u00a0 \u00a0 synne ne aspringa\u00f0,\n \u00fe\u00e6r hi leahtrum fa, \u00a0 \u00a0 \u00a0 \u00a0 lege gebundne,\n swylt \u00ferowia\u00f0. \u00a0 \u00a0 \u00a0 \u00a0 Bi\u00f0 him synwracu\n- 1540\n- \n ondweard undyrne; \u00a0 \u00a0 \u00a0 \u00a0 \u00fe\u00e6t is ece cwealm. \n Ne m\u00e6g \u00fe\u00e6t hate d\u00e6l \u00a0 \u00a0 \u00a0 \u00a0 of heolo\u00f0cynne\n in sinnehte \u00a0 \u00a0 \u00a0 \u00a0 synne forb\u00e6rnan\n to widan feore, \u00a0 \u00a0 \u00a0 \u00a0 wom of \u00fe\u00e6re sawle,\n ac \u00fe\u00e6r se deopa sea\u00f0 \u00a0 \u00a0 \u00a0 \u00a0 dreorge fede\u00f0,\n- 1545\n- \n grundleas gieme\u00f0 \u00a0 \u00a0 \u00a0 \u00a0 g\u00e6sta on \u00feeostre, \n \u00e6le\u00f0 hy mid \u00fey ealdan lige, \u00a0 \u00a0 \u00a0 \u00a0 ond mid \u00fey egsan forste,\n wra\u00feum wyrmum \u00a0 \u00a0 \u00a0 \u00a0 ond mid wita fela,\n frecnum feorhgomum, \u00a0 \u00a0 \u00a0 \u00a0 folcum scende\u00f0.\n \u00fe\u00e6t we magon eahtan \u00a0 \u00a0 \u00a0 \u00a0 ond on an cwe\u00fean,\n- 1550\n- \n so\u00f0e secgan, \u00a0 \u00a0 \u00a0 \u00a0 \u00fe\u00e6t se sawle weard, \n lifes wisdom, \u00a0 \u00a0 \u00a0 \u00a0 forloren h\u00e6bbe,\n se \u00fee nu ne gieme\u00f0 \u00a0 \u00a0 \u00a0 \u00a0 hw\u00e6\u00feer his g\u00e6st sie\n earm \u00fee eadig, \u00a0 \u00a0 \u00a0 \u00a0 \u00fe\u00e6r he ece sceal\n \u00e6fter hingonge \u00a0 \u00a0 \u00a0 \u00a0 hamf\u00e6st wesan.\n- 1555\n- \n Ne bisorga\u00f0 he \u00a0 \u00a0 \u00a0 \u00a0 synne to fremman, \n wonhydig mon, \u00a0 \u00a0 \u00a0 \u00a0 ne he wihte hafa\u00f0\n hreowe on mode \u00a0 \u00a0 \u00a0 \u00a0 \u00fe\u00e6t him halig g\u00e6st\n losige \u00feurh leahtras \u00a0 \u00a0 \u00a0 \u00a0 on \u00feas l\u00e6nan tid.\n \u00f0onne manscea\u00f0a \u00a0 \u00a0 \u00a0 \u00a0 fore meotude forht,\n- 1560\n- \n deorc on \u00feam dome stande\u00f0, \u00a0 \u00a0 \u00a0 \u00a0 ond dea\u00f0e fah, \n wommum awyrged, \u00a0 \u00a0 \u00a0 \u00a0 bi\u00f0 se w\u00e6rloga\n fyres afylled. \u00a0 \u00a0 \u00a0 \u00a0 Feores unwyr\u00f0e,\n egsan ge\u00feread, \u00a0 \u00a0 \u00a0 \u00a0 ondweard gode\n won ond wliteleas \u00a0 \u00a0 \u00a0 \u00a0 hafa\u00f0 werges bleo,\n- 1565\n- \n facentacen feores. \u00a0 \u00a0 \u00a0 \u00a0 \u00f0onne firena bearn \n tearum geota\u00f0, \u00a0 \u00a0 \u00a0 \u00a0 \u00feonne \u00fe\u00e6s tid ne bi\u00fe,\n synne cwi\u00fea\u00f0; \u00a0 \u00a0 \u00a0 \u00a0 ac hy to si\u00f0 do\u00f0\n g\u00e6stum helpe, \u00a0 \u00a0 \u00a0 \u00a0 \u00f0onne \u00fe\u00e6s giman nele\n weoruda waldend, \u00a0 \u00a0 \u00a0 \u00a0 hu \u00fea womscea\u00fean\n- 1570\n- \n hyra ealdgestreon \u00a0 \u00a0 \u00a0 \u00a0 on \u00fea openan tid \n sare greten. \u00a0 \u00a0 \u00a0 \u00a0 Ne bi\u00fe \u00fe\u00e6t sorga tid\n leodum alyfed, \u00a0 \u00a0 \u00a0 \u00a0 \u00fe\u00e6t \u00fe\u00e6r l\u00e6cedom\n findan mote, \u00a0 \u00a0 \u00a0 \u00a0 se \u00fee nu his feore nyle\n h\u00e6lo strynan \u00a0 \u00a0 \u00a0 \u00a0 \u00feenden her leofa\u00f0.\n- 1575\n- \n Ne bi\u00f0 \u00fe\u00e6r \u00e6ngum godum \u00a0 \u00a0 \u00a0 \u00a0 gnorn \u00e6tywed, \n ne n\u00e6ngum yflum wel, \u00a0 \u00a0 \u00a0 \u00a0 ac \u00fe\u00e6r \u00e6ghw\u00e6\u00feer\n anfealde gewyrht \u00a0 \u00a0 \u00a0 \u00a0 ondweard wige\u00f0.\n For\u00f0on sceal onettan, \u00a0 \u00a0 \u00a0 \u00a0 se \u00fee agan wile\n lif \u00e6t meotude, \u00a0 \u00a0 \u00a0 \u00a0 \u00feenden him leoht ond g\u00e6st\n- 1580\n- \n somodf\u00e6st seon. \u00a0 \u00a0 \u00a0 \u00a0 He his sawle wlite \n georne bigonge \u00a0 \u00a0 \u00a0 \u00a0 on godes willan,\n ond w\u00e6r weor\u00f0e \u00a0 \u00a0 \u00a0 \u00a0 worda ond d\u00e6da,\n \u00feeawa ond ge\u00feonca, \u00a0 \u00a0 \u00a0 \u00a0 \u00feenden him \u00feeos woruld,\n sceadum scri\u00feende, \u00a0 \u00a0 \u00a0 \u00a0 scinan mote,\n- 1585\n- \n \u00fe\u00e6t he ne forleose \u00a0 \u00a0 \u00a0 \u00a0 on \u00feas l\u00e6nan tid \n his dreames bl\u00e6d \u00a0 \u00a0 \u00a0 \u00a0 ond his dagena rim,\n ond his weorces wlite \u00a0 \u00a0 \u00a0 \u00a0 ond wuldres lean,\n \u00fe\u00e6tte heofones cyning \u00a0 \u00a0 \u00a0 \u00a0 on \u00fea halgan tid\n so\u00f0f\u00e6st syle\u00f0 \u00a0 \u00a0 \u00a0 \u00a0 to sigorleanum\n- 1590\n- \n \u00feam \u00fee him on g\u00e6stum \u00a0 \u00a0 \u00a0 \u00a0 georne hyra\u00f0. \n \u00feonne heofon ond hel \u00a0 \u00a0 \u00a0 \u00a0 h\u00e6le\u00fea bearnum,\n fira feorum, \u00a0 \u00a0 \u00a0 \u00a0 fylde weor\u00fee\u00f0.\n Grundas swelga\u00f0 \u00a0 \u00a0 \u00a0 \u00a0 godes ondsacan,\n lacende leg \u00a0 \u00a0 \u00a0 \u00a0 la\u00f0wende men,\n- 1595\n- \n \u00ferea\u00f0 \u00feeodscea\u00fean, \u00a0 \u00a0 \u00a0 \u00a0 ond no \u00feonan l\u00e6te\u00f0 \n on gefean faran \u00a0 \u00a0 \u00a0 \u00a0 to feorhnere,\n ac se bryne binde\u00f0 \u00a0 \u00a0 \u00a0 \u00a0 bidf\u00e6stne here,\n feo\u00f0 firena bearn. \u00a0 \u00a0 \u00a0 \u00a0 Frecne me \u00feince\u00f0\n \u00fe\u00e6t \u00feas g\u00e6stberend \u00a0 \u00a0 \u00a0 \u00a0 giman nella\u00f0,\n- 1600\n- \n men on mode, \u00a0 \u00a0 \u00a0 \u00a0 \u00feonne man fremma\u00f0, \n hw\u00e6t him se waldend \u00a0 \u00a0 \u00a0 \u00a0 to wrace gesette,\n la\u00feum leodum. \u00a0 \u00a0 \u00a0 \u00a0 \u00feonne lif ond dea\u00f0\n sawlum swelga\u00f0. \u00a0 \u00a0 \u00a0 \u00a0 Bi\u00f0 susla hus\n open ond o\u00f0eawed, \u00a0 \u00a0 \u00a0 \u00a0 a\u00f0logum ongean,\n- 1605\n- \n \u00f0\u00e6t sceolon fyllan \u00a0 \u00a0 \u00a0 \u00a0 firengeorne men \n sweartum sawlum. \u00a0 \u00a0 \u00a0 \u00a0 \u00feonne synna to wrace\n scyldigra scolu \u00a0 \u00a0 \u00a0 \u00a0 ascyred weor\u00fee\u00f0\n heane from halgum \u00a0 \u00a0 \u00a0 \u00a0 on hearmcwale.\n \u00f0\u00e6r sceolan \u00feeofas \u00a0 \u00a0 \u00a0 \u00a0 ond \u00feeodscea\u00fean,\n- 1610\n- \n lease ond forlegene, \u00a0 \u00a0 \u00a0 \u00a0 lifes ne wenan, \n ond mansworan \u00a0 \u00a0 \u00a0 \u00a0 mor\u00feorlean seon,\n heard ond heorogrim. \u00a0 \u00a0 \u00a0 \u00a0 \u00feonne hel nime\u00f0\n w\u00e6rleasra weorud, \u00a0 \u00a0 \u00a0 \u00a0 ond hi waldend giefe\u00f0\n feondum in forwyrd; \u00a0 \u00a0 \u00a0 \u00a0 fa \u00ferowia\u00f0\n- 1615\n- \n ealdorbealu egeslic. \u00a0 \u00a0 \u00a0 \u00a0 Earm bi\u00f0 se \u00fee wile \n firenum gewyrcan, \u00a0 \u00a0 \u00a0 \u00a0 \u00fe\u00e6t he fah scyle\n from his scyppende \u00a0 \u00a0 \u00a0 \u00a0 ascyred weor\u00f0an\n \u00e6t domd\u00e6ge \u00a0 \u00a0 \u00a0 \u00a0 to dea\u00f0e ni\u00feer,\n under helle cinn \u00a0 \u00a0 \u00a0 \u00a0 in \u00fe\u00e6t hate fyr,\n- 1620\n- \n under liges locan, \u00a0 \u00a0 \u00a0 \u00a0 \u00fe\u00e6r hy leomu r\u00e6ca\u00f0 \n to bindenne \u00a0 \u00a0 \u00a0 \u00a0 ond to b\u00e6rnenne\n ond to swingenne \u00a0 \u00a0 \u00a0 \u00a0 synna to wite.\n \u00f0onne halig g\u00e6st \u00a0 \u00a0 \u00a0 \u00a0 helle biluce\u00f0,\n mor\u00feerhusa m\u00e6st, \u00a0 \u00a0 \u00a0 \u00a0 \u00feurh meaht godes,\n- 1625\n- \n fyres fulle, \u00a0 \u00a0 \u00a0 \u00a0 ond feonda here, \n cyninges worde. \u00a0 \u00a0 \u00a0 \u00a0 Se bi\u00fe cwealma m\u00e6st\n deofla ond monna! \u00a0 \u00a0 \u00a0 \u00a0 \u00fe\u00e6t is dreamleas hus,\n \u00f0\u00e6r \u00e6nig ne m\u00e6g \u00a0 \u00a0 \u00a0 \u00a0 ower losian\n caldan clommum. \u00a0 \u00a0 \u00a0 \u00a0 Hy br\u00e6con cyninges word,\n- 1630\n- \n beorht boca bibod; \u00a0 \u00a0 \u00a0 \u00a0 for\u00feon hy abidan sceolon \n in sinnehte, \u00a0 \u00a0 \u00a0 \u00a0 sar endeleas,\n firend\u00e6dum fa, \u00a0 \u00a0 \u00a0 \u00a0 for\u00f0 \u00ferowian,\n \u00f0a \u00fee her forhogdun \u00a0 \u00a0 \u00a0 \u00a0 heofonrices \u00ferym.\n \u00feonne \u00fea gecorenan \u00a0 \u00a0 \u00a0 \u00a0 fore Crist bera\u00f0\n- 1635\n- \n beorhte fr\u00e6twe. \u00a0 \u00a0 \u00a0 \u00a0 Hyra bl\u00e6d leofa\u00f0 \n \u00e6t domd\u00e6ge, \u00a0 \u00a0 \u00a0 \u00a0 agan dream mid gode\n li\u00fees lifes, \u00a0 \u00a0 \u00a0 \u00a0 \u00fe\u00e6s \u00fee alyfed bi\u00fe\n haligra gehwam \u00a0 \u00a0 \u00a0 \u00a0 on heofonrice.\n \u00f0\u00e6t is se e\u00feel \u00a0 \u00a0 \u00a0 \u00a0 \u00fee no geendad weor\u00fee\u00f0,\n- 1640\n- \n ac \u00fe\u00e6r symle for\u00f0 \u00a0 \u00a0 \u00a0 \u00a0 synna lease \n dream weardia\u00f0, \u00a0 \u00a0 \u00a0 \u00a0 dryhten lofia\u00f0,\n leofne lifes weard, \u00a0 \u00a0 \u00a0 \u00a0 leohte biwundne,\n sibbum biswe\u00f0ede, \u00a0 \u00a0 \u00a0 \u00a0 sorgum biwerede,\n dreamum gedyrde, \u00a0 \u00a0 \u00a0 \u00a0 dryhtne gelyfde.\n- 1645\n- \n Awo to ealdre \u00a0 \u00a0 \u00a0 \u00a0 engla gemanan \n bruca\u00f0 mid blisse, \u00a0 \u00a0 \u00a0 \u00a0 beorhte mid lisse,\n freoga\u00f0 folces weard. \u00a0 \u00a0 \u00a0 \u00a0 F\u00e6der ealra geweald\n hafa\u00f0 ond healde\u00f0 \u00a0 \u00a0 \u00a0 \u00a0 haligra weorud.\n \u00f0\u00e6r is engla song, \u00a0 \u00a0 \u00a0 \u00a0 eadigra blis,\n- 1650\n- \n \u00fe\u00e6r is seo dyre \u00a0 \u00a0 \u00a0 \u00a0 dryhtnes onsien \n eallum \u00feam ges\u00e6lgum \u00a0 \u00a0 \u00a0 \u00a0 sunnan leohtra.\n \u00f0\u00e6r is leofra lufu, \u00a0 \u00a0 \u00a0 \u00a0 lif butan endedea\u00f0e,\n gl\u00e6d gumena weorud, \u00a0 \u00a0 \u00a0 \u00a0 giogu\u00f0 butan ylde,\n heofondugu\u00f0a \u00ferym, \u00a0 \u00a0 \u00a0 \u00a0 h\u00e6lu butan sare,\n- 1655\n- \n ryhtfremmendum \u00a0 \u00a0 \u00a0 \u00a0 r\u00e6st butan gewinne, \n domeadigra \u00a0 \u00a0 \u00a0 \u00a0 d\u00e6g butan \u00feeostrum,\n beorht bl\u00e6des full, \u00a0 \u00a0 \u00a0 \u00a0 blis butan sorgum,\n fri\u00f0 freondum bitweon \u00a0 \u00a0 \u00a0 \u00a0 for\u00f0 butan \u00e6festum,\n ges\u00e6lgum on swegle, \u00a0 \u00a0 \u00a0 \u00a0 sib butan ni\u00fee\n- 1660\n- \n halgum on gemonge. \u00a0 \u00a0 \u00a0 \u00a0 Nis \u00fe\u00e6r hungor ne \u00feurst, \n sl\u00e6p ne swar leger, \u00a0 \u00a0 \u00a0 \u00a0 ne sunnan bryne,\n ne cyle ne cearo, \u00a0 \u00a0 \u00a0 \u00a0 ac \u00fe\u00e6r cyninges giefe\n awo bruca\u00f0 \u00a0 \u00a0 \u00a0 \u00a0 eadigra gedryht,\n weoruda wlitescynast, \u00a0 \u00a0 \u00a0 \u00a0 wuldres mid dryhten.","title":"Christ A, B, C","type":"page"}