{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a03_02.htm","path":"neu/ascp/a03_02.htm","source_url":"https://sacred-texts.com/neu/ascp/a03_02.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n Guthlac A, B\n Verse Indeterminate Saxon\n \n - \n Se bi\u00f0 gefeana f\u00e6grast \u00a0\u00a0\u00a0\u00a0 \u00feonne hy \u00e6t frym\u00f0e gemeta\u00f0, \n engel ond seo eadge sawl! \u00a0\u00a0\u00a0\u00a0 Ofgiefe\u00fe hio \u00feas eor\u00fean wynne,\n forl\u00e6te\u00f0 \u00feas l\u00e6nan dreamas, \u00a0\u00a0\u00a0\u00a0 ond hio wi\u00fe \u00feam lice ged\u00e6le\u00f0.\n \u00f0onne cwi\u00f0 se engel, \u00a0\u00a0\u00a0\u00a0 (hafa\u00f0 yldran had),\n- 5\n- \n grete\u00f0 g\u00e6st o\u00feerne, \u00a0\u00a0\u00a0\u00a0 abeode\u00f0 him godes \u00e6rende: \n \"Nu \u00feu most feran \u00a0\u00a0\u00a0\u00a0 \u00feider \u00feu fundadest\n longe ond gelome. \u00a0\u00a0\u00a0\u00a0 Ic \u00feec l\u00e6dan sceal.\n Wegas \u00fee sindon we\u00fee, \u00a0\u00a0\u00a0\u00a0 ond wuldres leoht\n torht ontyned. \u00a0\u00a0\u00a0\u00a0 Eart nu tidfara\n- 10\n- \n to \u00feam halgan ham.\" \u00a0\u00a0\u00a0\u00a0 \u00fe\u00e6r n\u00e6fre hreow cyme\u00f0, \n edergong fore yrm\u00feum, \u00a0\u00a0\u00a0\u00a0 ac \u00fe\u00e6r bi\u00fe engla dream,\n sib ond ges\u00e6lignes, \u00a0\u00a0\u00a0\u00a0 ond sawla r\u00e6st,\n ond \u00fe\u00e6r a to feore \u00a0\u00a0\u00a0\u00a0 gefeon motun,\n dryman mid dryhten, \u00a0\u00a0\u00a0\u00a0 \u00fea \u00fee his domas her\n- 15\n- \n \u00e6fna\u00f0 on eor\u00fean. \u00a0\u00a0\u00a0\u00a0 He him ece lean \n healde\u00f0 on heofonum, \u00a0\u00a0\u00a0\u00a0 \u00fe\u00e6r se hyhsta\n ealra cyninga cyning \u00a0\u00a0\u00a0\u00a0 ceastrum wealde\u00f0.\n \u00f0\u00e6t sind \u00fea getimbru \u00a0\u00a0\u00a0\u00a0 \u00fee no tydria\u00f0,\n ne \u00feam fore yrm\u00feum \u00a0\u00a0\u00a0\u00a0 \u00fee \u00fe\u00e6r in wunia\u00f0\n- 20\n- \n lif aspringe\u00f0, \u00a0\u00a0\u00a0\u00a0 ac him bi\u00f0 lenge hu sel; \n geogu\u00fee bruca\u00f0 \u00a0\u00a0\u00a0\u00a0 ond godes miltsa.\n \u00feider so\u00f0f\u00e6stra \u00a0\u00a0\u00a0\u00a0 sawla motun\n cuman \u00e6fter cwealme, \u00a0\u00a0\u00a0\u00a0 \u00fea \u00fee her Cristes \u00e6\n l\u00e6ra\u00f0 ond l\u00e6sta\u00f0, \u00a0\u00a0\u00a0\u00a0 ond his lof r\u00e6ra\u00f0;\n- 25\n- \n oferwinna\u00f0 \u00fea awyrgdan g\u00e6stas, \u00a0\u00a0\u00a0\u00a0 bigyta\u00f0 him wuldres r\u00e6ste, \n hwider sceal \u00fe\u00e6s monnes \u00a0\u00a0\u00a0\u00a0 mod astigan,\n \u00e6r o\u00fe\u00fee \u00e6fter, \u00a0\u00a0\u00a0\u00a0 \u00feonne he his \u00e6nne her\n g\u00e6st bigonge, \u00a0\u00a0\u00a0\u00a0 \u00fe\u00e6t se gode mote,\n womma cl\u00e6ne, \u00a0\u00a0\u00a0\u00a0 in geweald cuman.\n- 30\n- \n Monge sindon \u00a0\u00a0\u00a0\u00a0 geond middangeard \n hadas under heofonum, \u00a0\u00a0\u00a0\u00a0 \u00fea \u00fee in haligra\n rim arisa\u00f0. \u00a0\u00a0\u00a0\u00a0 We \u00fe\u00e6s ryht magun\n \u00e6t \u00e6ghwylcum \u00a0\u00a0\u00a0\u00a0 anra gehyran,\n gif we halig bebodu \u00a0\u00a0\u00a0\u00a0 healdan willa\u00f0;\n- 35\n- \n m\u00e6g nu snottor guma \u00a0\u00a0\u00a0\u00a0 s\u00e6le brucan \n godra tida, \u00a0\u00a0\u00a0\u00a0 ond his g\u00e6ste for\u00f0\n weges willian. \u00a0\u00a0\u00a0\u00a0 Woruld is onhrered,\n cola\u00fe Cristes lufu, \u00a0\u00a0\u00a0\u00a0 sindan costinga\n geond middangeard \u00a0\u00a0\u00a0\u00a0 monge arisene,\n- 40\n- \n swa \u00fe\u00e6t geara iu \u00a0\u00a0\u00a0\u00a0 godes spelbodan \n wordum s\u00e6gdon \u00a0\u00a0\u00a0\u00a0 ond \u00feurh witedom\n eal anemdon, \u00a0\u00a0\u00a0\u00a0 swa hit nu gonge\u00f0.\n Ealda\u00f0 eor\u00fean bl\u00e6d \u00a0\u00a0\u00a0\u00a0 \u00e6\u00feela gehwylcre\n ond of wlite wenda\u00f0 \u00a0\u00a0\u00a0\u00a0 w\u00e6stma gecyndu;\n- 45\n- \n bi\u00f0 seo si\u00fere tid \u00a0\u00a0\u00a0\u00a0 s\u00e6da gehwylces \n m\u00e6tre in m\u00e6gne. \u00a0\u00a0\u00a0\u00a0 For\u00feon se mon ne \u00feearf\n to \u00feisse worulde \u00a0\u00a0\u00a0\u00a0 wyrpe gehycgan,\n \u00fe\u00e6t he us f\u00e6gran \u00a0\u00a0\u00a0\u00a0 gefean bringe\n ofer \u00fea ni\u00feas \u00a0\u00a0\u00a0\u00a0 \u00fee we nu dreoga\u00f0,\n- 50\n- \n \u00e6r\u00feon endien \u00a0\u00a0\u00a0\u00a0 ealle gesceafte \n \u00f0a he gesette \u00a0\u00a0\u00a0\u00a0 on siex dagum,\n \u00f0a nu under heofonum \u00a0\u00a0\u00a0\u00a0 hadas cenna\u00f0,\n micle ond m\u00e6te. \u00a0\u00a0\u00a0\u00a0 Is \u00fees middangeard\n dalum ged\u00e6led. \u00a0\u00a0\u00a0\u00a0 Dryhten sceawa\u00f0\n- 55\n- \n hw\u00e6r \u00fea eardien \u00a0\u00a0\u00a0\u00a0 \u00fee his \u00e6 healden; \n gesih\u00f0 he \u00fea domas \u00a0\u00a0\u00a0\u00a0 dogra gehwylce\n wonian ond wendan \u00a0\u00a0\u00a0\u00a0 of woruldryhte\n \u00f0a he gesette \u00a0\u00a0\u00a0\u00a0 \u00feurh his sylfes word.\n He fela finde\u00f0, \u00a0\u00a0\u00a0\u00a0 fea beo\u00f0 gecorene.\n- 60\n- \n Sume him \u00fe\u00e6s hades \u00a0\u00a0\u00a0\u00a0 hlisan willa\u00f0 \n wegan on wordum \u00a0\u00a0\u00a0\u00a0 ond \u00fea weorc ne do\u00f0.\n Bi\u00f0 him eor\u00f0wela \u00a0\u00a0\u00a0\u00a0 ofer \u00fe\u00e6t ece lif\n hyhta hyhst, \u00a0\u00a0\u00a0\u00a0 se gehwylcum sceal\n foldbuendra \u00a0\u00a0\u00a0\u00a0 fremde geweor\u00fean.\n- 65\n- \n For\u00feon hy nu hyrwa\u00f0 \u00a0\u00a0\u00a0\u00a0 haligra mod, \n \u00f0a \u00fee him to heofonum \u00a0\u00a0\u00a0\u00a0 hyge sta\u00feelia\u00f0,\n witon \u00fe\u00e6t se e\u00f0el \u00a0\u00a0\u00a0\u00a0 ece bide\u00f0\n ealra \u00fe\u00e6re mengu \u00a0\u00a0\u00a0\u00a0 \u00fee geond middangeard\n dryhtne \u00feeowia\u00f0 \u00a0\u00a0\u00a0\u00a0 ond \u00fe\u00e6s deoran ham\n- 70\n- \n wilnia\u00f0 bi gewyrhtum. \u00a0\u00a0\u00a0\u00a0 Swa \u00feas woruldgestreon \n on \u00fea m\u00e6ran god \u00a0\u00a0\u00a0\u00a0 bimutad weor\u00fea\u00f0,\n \u00f0onne \u00fe\u00e6t gegyrna\u00f0 \u00a0\u00a0\u00a0\u00a0 \u00fea \u00fee him godes egsa\n hleona\u00fe ofer heafdum. \u00a0\u00a0\u00a0\u00a0 Hy \u00fey hyhstan beo\u00f0\n \u00ferymme ge\u00fereade, \u00a0\u00a0\u00a0\u00a0 \u00feisses lifes\n- 75\n- \n \u00feurh bibodu bruca\u00f0 \u00a0\u00a0\u00a0\u00a0 ond \u00fe\u00e6s betran for\u00f0 \n wysca\u00f0 ond wena\u00fe. \u00a0\u00a0\u00a0\u00a0 Wuldres bycga\u00f0,\n sella\u00f0 \u00e6lmessan, \u00a0\u00a0\u00a0\u00a0 earme frefra\u00f0,\n beo\u00f0 rummode \u00a0\u00a0\u00a0\u00a0 ryhtra gestreona,\n lufia\u00f0 mid lacum \u00a0\u00a0\u00a0\u00a0 \u00fea \u00fee l\u00e6s agun,\n- 80\n- \n d\u00e6ghwam dryhtne \u00feeowia\u00fe. \u00a0\u00a0\u00a0\u00a0 He hyra d\u00e6de sceawa\u00f0. \n Sume \u00fea wunia\u00f0 \u00a0\u00a0\u00a0\u00a0 on westennum,\n seca\u00f0 ond gesitta\u00f0 \u00a0\u00a0\u00a0\u00a0 sylfra willum\n hamas on heolstrum. \u00a0\u00a0\u00a0\u00a0 Hy \u00f0\u00e6s heofoncundan\n boldes bida\u00f0. \u00a0\u00a0\u00a0\u00a0 Oft him brogan to\n- 85\n- \n la\u00f0ne gel\u00e6de\u00f0, \u00a0\u00a0\u00a0\u00a0 se \u00fee him lifes ofonn, \n eawe\u00f0 him egsan, \u00a0\u00a0\u00a0\u00a0 hwilum idel wuldor,\n br\u00e6gdwis bona \u00a0\u00a0\u00a0\u00a0 hafa\u00f0 bega cr\u00e6ft,\n eahte\u00f0 anbuendra. \u00a0\u00a0\u00a0\u00a0 Fore him englas stonda\u00f0,\n gearwe mid g\u00e6sta w\u00e6pnum, \u00a0\u00a0\u00a0\u00a0 beo\u00fe hyra geoca gemyndge,\n- 90\n- \n healda\u00f0 haligra feorh, \u00a0\u00a0\u00a0\u00a0 witon hyra hyht mid dryhten. \n \u00fe\u00e6t synd \u00fea gecostan cempan \u00a0\u00a0\u00a0\u00a0 \u00fea \u00feam cyninge \u00feeowa\u00f0,\n se n\u00e6fre \u00fea lean alege\u00f0 \u00a0\u00a0\u00a0\u00a0 \u00feam \u00fee his lufan adreoge\u00f0.\n Magun we nu nemnan \u00a0\u00a0\u00a0\u00a0 \u00fe\u00e6t us neah gewear\u00f0\n \u00feurh haligne \u00a0\u00a0\u00a0\u00a0 had gecy\u00feed,\n- 95\n- \n hu Gu\u00f0lac his \u00a0\u00a0\u00a0\u00a0 in godes willan \n mod gerehte, \u00a0\u00a0\u00a0\u00a0 man eall forseah,\n eor\u00f0lic \u00e6\u00feelu, \u00a0\u00a0\u00a0\u00a0 upp gemunde\n ham in heofonum. \u00a0\u00a0\u00a0\u00a0 Him w\u00e6s hyht to \u00feam,\n si\u00fe\u00fean hine inlyhte \u00a0\u00a0\u00a0\u00a0 se \u00fee lifes weg\n- 100\n- \n g\u00e6stum gearwa\u00f0, \u00a0\u00a0\u00a0\u00a0 ond him giefe sealde \n engelcunde, \u00a0\u00a0\u00a0\u00a0 \u00fe\u00e6t he ana ongan\n beorgse\u00feel bugan, \u00a0\u00a0\u00a0\u00a0 ond his bl\u00e6d gode\n \u00feurh ea\u00f0medu \u00a0\u00a0\u00a0\u00a0 ealne gesealde,\n \u00f0one \u00fee he on geogu\u00f0e \u00a0\u00a0\u00a0\u00a0 bigan sceolde\n- 105\n- \n worulde wynnum. \u00a0\u00a0\u00a0\u00a0 Hine weard biheold \n halig of heofonum, \u00a0\u00a0\u00a0\u00a0 se \u00fe\u00e6t hluttre mod\n in \u00fe\u00e6s g\u00e6stes god \u00a0\u00a0\u00a0\u00a0 georne trymede.\n Hw\u00e6t, we hyrdon oft \u00a0\u00a0\u00a0\u00a0 \u00fe\u00e6t se halga wer\n in \u00fea \u00e6restan \u00a0\u00a0\u00a0\u00a0 \u00e6ldu gelufade\n- 110\n- \n frecnessa fela! \u00a0\u00a0\u00a0\u00a0 Fyrst w\u00e6s swa \u00feeana \n in godes dome, \u00a0\u00a0\u00a0\u00a0 hwonne Gu\u00f0lace\n on his ondgietan \u00a0\u00a0\u00a0\u00a0 engel sealde\n \u00fe\u00e6t him swe\u00f0raden \u00a0\u00a0\u00a0\u00a0 synna lustas.\n Tid w\u00e6s toweard; \u00a0\u00a0\u00a0\u00a0 hine twegen ymb\n- 115\n- \n weardas wacedon, \u00a0\u00a0\u00a0\u00a0 \u00fea gewin drugon, \n engel dryhtnes \u00a0\u00a0\u00a0\u00a0 ond se atela g\u00e6st.\n Nal\u00e6s hy him gelice \u00a0\u00a0\u00a0\u00a0 lare b\u00e6ron\n in his modes gemynd \u00a0\u00a0\u00a0\u00a0 mongum tidum.\n O\u00feer him \u00feas eor\u00fean \u00a0\u00a0\u00a0\u00a0 ealle s\u00e6gde\n- 120\n- \n l\u00e6ne under lyfte, \u00a0\u00a0\u00a0\u00a0 ond \u00fea longan god \n herede on heofonum, \u00a0\u00a0\u00a0\u00a0 \u00fe\u00e6r haligra\n sawla gesitta\u00f0 \u00a0\u00a0\u00a0\u00a0 in sigorwuldre\n dryhtnes dreamas; \u00a0\u00a0\u00a0\u00a0 he him d\u00e6da lean\n georne gielde\u00f0, \u00a0\u00a0\u00a0\u00a0 \u00feam \u00fee his giefe willa\u00f0\n- 125\n- \n \u00feicgan to \u00feonce \u00a0\u00a0\u00a0\u00a0 ond him \u00feas woruld \n uttor l\u00e6tan \u00a0\u00a0\u00a0\u00a0 \u00feonne \u00fe\u00e6t ece lif.\n O\u00feer hyne scyhte, \u00a0\u00a0\u00a0\u00a0 \u00fe\u00e6t he scea\u00f0ena gemot\n nihtes sohte \u00a0\u00a0\u00a0\u00a0 ond \u00feurh ne\u00feinge\n wunne \u00e6fter worulde, \u00a0\u00a0\u00a0\u00a0 swa do\u00f0 wr\u00e6cm\u00e6cgas\n- 130\n- \n \u00fea \u00fee ne bimurna\u00f0 \u00a0\u00a0\u00a0\u00a0 monnes feore \n \u00fe\u00e6s \u00fee him to honda \u00a0\u00a0\u00a0\u00a0 hu\u00fee gel\u00e6de\u00f0,\n butan hy \u00fey reafe \u00a0\u00a0\u00a0\u00a0 r\u00e6dan motan.\n Swa hy hine trymedon \u00a0\u00a0\u00a0\u00a0 on twa healfa\n o\u00fe\u00fe\u00e6t \u00fe\u00e6s gewinnes \u00a0\u00a0\u00a0\u00a0 weoroda dryhten\n- 135\n- \n on \u00fe\u00e6s engles dom \u00a0\u00a0\u00a0\u00a0 ende gereahte. \n Feond w\u00e6s geflymed; \u00a0\u00a0\u00a0\u00a0 si\u00fe \u00feam frofre g\u00e6st\n in Gu\u00f0laces \u00a0\u00a0\u00a0\u00a0 geoce gewunade,\n lufade hine ond l\u00e6rde \u00a0\u00a0\u00a0\u00a0 lenge hu geornor,\n \u00fe\u00e6t him leofedan \u00a0\u00a0\u00a0\u00a0 londes wynne,\n- 140\n- \n bold on beorhge. \u00a0\u00a0\u00a0\u00a0 Oft \u00fe\u00e6r broga cwom \n egeslic ond uncu\u00f0, \u00a0\u00a0\u00a0\u00a0 ealdfeonda ni\u00f0,\n searocr\u00e6ftum swi\u00fe; \u00a0\u00a0\u00a0\u00a0 hy him sylf hyra\n onsyn ywdon, \u00a0\u00a0\u00a0\u00a0 ond \u00fe\u00e6r \u00e6r fela\n setla ges\u00e6ton. \u00a0\u00a0\u00a0\u00a0 \u00feonan si\u00f0 tugon\n- 145\n- \n wide wa\u00f0e, \u00a0\u00a0\u00a0\u00a0 wuldre byscyrede, \n lyftlacende. \u00a0\u00a0\u00a0\u00a0 W\u00e6s seo londes stow\n bimi\u00feen fore monnum, \u00a0\u00a0\u00a0\u00a0 o\u00fe\u00fe\u00e6t meotud onwrah\n beorg on bearwe, \u00a0\u00a0\u00a0\u00a0 \u00fea se bytla cwom\n se \u00fe\u00e6r haligne \u00a0\u00a0\u00a0\u00a0 ham ar\u00e6rde,\n- 150\n- \n nales \u00fey he giemde \u00a0\u00a0\u00a0\u00a0 \u00feurh gitsunga \n l\u00e6nes lifwelan, \u00a0\u00a0\u00a0\u00a0 ac \u00fe\u00e6t lond gode\n f\u00e6gre gefreo\u00feode, \u00a0\u00a0\u00a0\u00a0 si\u00fe\u00fean feond oferwon\n Cristes cempa. \u00a0\u00a0\u00a0\u00a0 He gecostad wear\u00f0\n in gemyndigra \u00a0\u00a0\u00a0\u00a0 monna tidum,\n- 155\n- \n \u00f0ara \u00fee nu gena \u00a0\u00a0\u00a0\u00a0 \u00feurh g\u00e6stlicu \n wundor hine weor\u00f0ia\u00f0 \u00a0\u00a0\u00a0\u00a0 ond his wisdomes\n hlisan healda\u00f0, \u00a0\u00a0\u00a0\u00a0 \u00fe\u00e6t se halga \u00feeow\n elne geeode, \u00a0\u00a0\u00a0\u00a0 \u00fea he ana ges\u00e6t\n dygle stowe. \u00a0\u00a0\u00a0\u00a0 \u00f0\u00e6r he dryhtnes lof\n- 160\n- \n reahte ond r\u00e6rde; \u00a0\u00a0\u00a0\u00a0 oft \u00feurh reorde abead, \n \u00feam \u00fee \u00ferowera \u00a0\u00a0\u00a0\u00a0 \u00feeawas lufedon,\n godes \u00e6rendu, \u00a0\u00a0\u00a0\u00a0 \u00fea him g\u00e6st onwrah\n lifes snyttru, \u00a0\u00a0\u00a0\u00a0 \u00fe\u00e6t he his lichoman\n wynna forwyrnde \u00a0\u00a0\u00a0\u00a0 ond woruldblissa,\n- 165\n- \n seftra setla \u00a0\u00a0\u00a0\u00a0 ond symbeldaga, \n swylce eac idelra \u00a0\u00a0\u00a0\u00a0 eagena wynna,\n gierelan gielplices. \u00a0\u00a0\u00a0\u00a0 Him w\u00e6s godes egsa\n mara in gemyndum \u00a0\u00a0\u00a0\u00a0 \u00feonne he menniscum\n \u00ferymme \u00e6fter \u00feonce \u00a0\u00a0\u00a0\u00a0 \u00feegan wolde.\n- 170\n- \n God w\u00e6s Gu\u00f0lac! \u00a0\u00a0\u00a0\u00a0 He in g\u00e6ste b\u00e6r \n heofoncundne hyht, \u00a0\u00a0\u00a0\u00a0 h\u00e6lu ger\u00e6hte\n ecan lifes. \u00a0\u00a0\u00a0\u00a0 Him w\u00e6s engel neah,\n f\u00e6le freo\u00f0uweard, \u00a0\u00a0\u00a0\u00a0 \u00feam \u00fee feara sum\n mearclond ges\u00e6t. \u00a0\u00a0\u00a0\u00a0 \u00fe\u00e6r he mongum wear\u00f0\n- 175\n- \n bysen on Brytene, \u00a0\u00a0\u00a0\u00a0 si\u00fe\u00fean biorg gestah \n eadig oretta, \u00a0\u00a0\u00a0\u00a0 ondwiges heard.\n Gyrede hine georne \u00a0\u00a0\u00a0\u00a0 mid g\u00e6stlicum\n w\u00e6pnum \u00a0\u00a0\u00a0\u00a0 wong bletsade,\n him to \u00e6tst\u00e6lle \u00a0\u00a0\u00a0\u00a0 \u00e6rest ar\u00e6rde\n- 180\n- \n Cristes rode, \u00a0\u00a0\u00a0\u00a0 \u00fe\u00e6r se cempa oferwon \n frecnessa fela. \u00a0\u00a0\u00a0\u00a0 Frome wurdun monge\n godes \u00ferowera; \u00a0\u00a0\u00a0\u00a0 we \u00fe\u00e6s Gu\u00f0laces\n deorwyr\u00f0ne d\u00e6l \u00a0\u00a0\u00a0\u00a0 dryhtne cenna\u00f0.\n He him sige sealde \u00a0\u00a0\u00a0\u00a0 ond snyttrucr\u00e6ft,\n- 185\n- \n mundbyrd meahta, \u00a0\u00a0\u00a0\u00a0 \u00feonne mengu cwom \n feonda f\u00e6rscytum \u00a0\u00a0\u00a0\u00a0 f\u00e6h\u00f0e r\u00e6ran.\n Ne meahton hy \u00e6feste \u00a0\u00a0\u00a0\u00a0 anforl\u00e6tan,\n ac to Gu\u00f0laces \u00a0\u00a0\u00a0\u00a0 g\u00e6ste gel\u00e6ddun\n frasunga fela. \u00a0\u00a0\u00a0\u00a0 Him w\u00e6s fultum neah,\n- 190\n- \n engel hine elne trymede, \u00a0\u00a0\u00a0\u00a0 \u00feonne hy him yrre hweopan, \n frecne fyres wylme. \u00a0\u00a0\u00a0\u00a0 Stodan him on fe\u00f0ehwearfum,\n cw\u00e6don \u00fe\u00e6t he on \u00feam beorge \u00a0\u00a0\u00a0\u00a0 byrnan sceolde\n ond his lichoman \u00a0\u00a0\u00a0\u00a0 lig forswelgan,\n \u00fe\u00e6t his earfe\u00feu \u00a0\u00a0\u00a0\u00a0 eal gelumpe\n- 195\n- \n modcearu m\u00e6gum, \u00a0\u00a0\u00a0\u00a0 gif he monna dream \n of \u00feam orlege \u00a0\u00a0\u00a0\u00a0 eft ne wolde\n sylfa gesecan, \u00a0\u00a0\u00a0\u00a0 ond his sibbe ryht\n mid moncynne \u00a0\u00a0\u00a0\u00a0 maran cr\u00e6fte\n willum bewitigan, \u00a0\u00a0\u00a0\u00a0 l\u00e6tan wr\u00e6ce stille.\n- 200\n- \n Swa him yrsade, \u00a0\u00a0\u00a0\u00a0 se for ealle spr\u00e6c \n feonda mengu. \u00a0\u00a0\u00a0\u00a0 No \u00fey forhtra w\u00e6s\n Gu\u00f0laces g\u00e6st, \u00a0\u00a0\u00a0\u00a0 ac him god sealde\n ellen wi\u00fe \u00feam egsan \u00a0\u00a0\u00a0\u00a0 \u00fe\u00e6t \u00fe\u00e6s ealdfeondes\n scyldigra scolu \u00a0\u00a0\u00a0\u00a0 scome \u00ferowedon;\n- 205\n- \n w\u00e6ron teonsmi\u00f0as \u00a0\u00a0\u00a0\u00a0 tornes fulle, \n cw\u00e6don \u00fe\u00e6t him Gu\u00f0lac \u00a0\u00a0\u00a0\u00a0 eac gode sylfum\n earfe\u00fea m\u00e6st \u00a0\u00a0\u00a0\u00a0 ana gefremede,\n si\u00fe\u00fean he for wlence \u00a0\u00a0\u00a0\u00a0 on westenne\n beorgas br\u00e6ce, \u00a0\u00a0\u00a0\u00a0 \u00fe\u00e6r hy bidinge,\n- 210\n- \n earme ondsacan, \u00a0\u00a0\u00a0\u00a0 \u00e6ror mostun \n \u00e6fter tintergum \u00a0\u00a0\u00a0\u00a0 tidum brucan,\n \u00f0onne hy of wa\u00feum \u00a0\u00a0\u00a0\u00a0 werge cwoman\n restan ryne\u00feragum, \u00a0\u00a0\u00a0\u00a0 rowe gefegon;\n w\u00e6s him seo gelyfed \u00a0\u00a0\u00a0\u00a0 \u00feurh lytel f\u00e6c.\n- 215\n- \n Stod seo dygle stow \u00a0\u00a0\u00a0\u00a0 dryhtne in gemyndum \n idel ond \u00e6men, \u00a0\u00a0\u00a0\u00a0 e\u00feelriehte feor,\n bad bis\u00e6ce \u00a0\u00a0\u00a0\u00a0 betran hyrdes.\n To \u00feon ealdfeondas \u00a0\u00a0\u00a0\u00a0 ondan noman,\n swa hi singales \u00a0\u00a0\u00a0\u00a0 sorge dreoga\u00f0.\n- 220\n- \n Ne motun hi on eor\u00fean \u00a0\u00a0\u00a0\u00a0 eardes brucan, \n ne hy lyft swefe\u00f0 \u00a0\u00a0\u00a0\u00a0 in leoma r\u00e6stum,\n ac hy hleolease \u00a0\u00a0\u00a0\u00a0 hama \u00feolia\u00f0,\n in cearum cwi\u00fea\u00f0, \u00a0\u00a0\u00a0\u00a0 cwealmes wisca\u00f0,\n willen \u00fe\u00e6t him dryhten \u00a0\u00a0\u00a0\u00a0 \u00feurh dea\u00f0es cwealm\n- 225\n- \n to hyra earfe\u00f0a \u00a0\u00a0\u00a0\u00a0 ende geryme. \n Ne mostun hy Gu\u00f0laces \u00a0\u00a0\u00a0\u00a0 g\u00e6ste sce\u00fe\u00fean,\n ne \u00feurh sarslege \u00a0\u00a0\u00a0\u00a0 sawle ged\u00e6lan\n wi\u00f0 lichoman, \u00a0\u00a0\u00a0\u00a0 ac hy ligesearwum\n ahofun hearmstafas, \u00a0\u00a0\u00a0\u00a0 hleahtor alegdon,\n- 230\n- \n sorge seofedon, \u00a0\u00a0\u00a0\u00a0 \u00fea hi swi\u00f0ra oferstag \n weard on wonge. \u00a0\u00a0\u00a0\u00a0 Sceoldon wr\u00e6cm\u00e6cgas\n ofgiefan gnornende \u00a0\u00a0\u00a0\u00a0 grene beorgas.\n Hw\u00e6\u00fere hy \u00fea gena, \u00a0\u00a0\u00a0\u00a0 godes ondsacan,\n s\u00e6gdon sarstafum, \u00a0\u00a0\u00a0\u00a0 swi\u00fee geheton,\n- 235\n- \n \u00fe\u00e6t he dea\u00fea gedal \u00a0\u00a0\u00a0\u00a0 dreogan sceolde, \n gif he leng bide \u00a0\u00a0\u00a0\u00a0 la\u00feran gemotes,\n hwonne hy mid mengu \u00a0\u00a0\u00a0\u00a0 maran cwome,\n \u00fea \u00fee for his life \u00a0\u00a0\u00a0\u00a0 lyt sorgedon.\n Gu\u00f0lac him ongean \u00feingode, \u00a0\u00a0\u00a0\u00a0 cw\u00e6\u00f0 \u00fe\u00e6t hy gielpan ne \u00feorftan\n- 240\n- \n d\u00e6dum wi\u00f0 dryhtnes meahtum. \u00a0\u00a0\u00a0\u00a0 \"\u00feeah \u00fee ge me dea\u00f0 gehaten, \n mec wile wi\u00f0 \u00feam ni\u00feum genergan \u00a0\u00a0\u00a0\u00a0 se \u00fee eowrum nydum wealde\u00f0.\n An is \u00e6lmihtig god, \u00a0\u00a0\u00a0\u00a0 se mec m\u00e6g ea\u00f0e gescyldan;\n he min feorg freo\u00fea\u00f0. \u00a0\u00a0\u00a0\u00a0 Ic eow fela wille\n so\u00fea gesecgan. \u00a0\u00a0\u00a0\u00a0 M\u00e6g ic \u00feis setl on eow\n- 245\n- \n butan earfe\u00f0um \u00a0\u00a0\u00a0\u00a0 ana ge\u00f0ringan. \n Ne eam ic swa fealog, \u00a0\u00a0\u00a0\u00a0 swa ic eow fore stonde,\n monna weorudes, \u00a0\u00a0\u00a0\u00a0 ac me mara d\u00e6l\n in godcundum \u00a0\u00a0\u00a0\u00a0 g\u00e6stgerynum\n wuna\u00f0 ond weaxe\u00f0, \u00a0\u00a0\u00a0\u00a0 se me wra\u00fee healde\u00f0.\n- 250\n- \n Ic me anum her \u00a0\u00a0\u00a0\u00a0 ea\u00f0e getimbre \n hus ond hleona\u00f0; \u00a0\u00a0\u00a0\u00a0 me on heofonum sind\n lare gelonge. \u00a0\u00a0\u00a0\u00a0 Mec \u00fe\u00e6s lyt tweo\u00fe\n \u00fe\u00e6t me engel to \u00a0\u00a0\u00a0\u00a0 ealle gel\u00e6de\u00f0\n spowende sped \u00a0\u00a0\u00a0\u00a0 spreca ond d\u00e6da.\n- 255\n- \n Gewita\u00f0 nu, awyrgde, \u00a0\u00a0\u00a0\u00a0 werigmode, \n from \u00feissum earde \u00a0\u00a0\u00a0\u00a0 \u00fee ge her on stonda\u00f0,\n fleo\u00f0 on feorweg. \u00a0\u00a0\u00a0\u00a0 Ic me fri\u00f0 wille\n \u00e6t gode gegyrnan; \u00a0\u00a0\u00a0\u00a0 ne sceal min g\u00e6st mid eow\n gedwolan dreogan, \u00a0\u00a0\u00a0\u00a0 ac mec dryhtnes hond\n- 260\n- \n munda\u00f0 mid m\u00e6gne. \u00a0\u00a0\u00a0\u00a0 Her sceal min wesan \n eor\u00f0lic e\u00feel, \u00a0\u00a0\u00a0\u00a0 nales eower leng.\"\n \u00f0a wear\u00f0 breahtm h\u00e6fen. \u00a0\u00a0\u00a0\u00a0 Beorg ymbstodan\n hwearfum wr\u00e6cm\u00e6cgas. \u00a0\u00a0\u00a0\u00a0 Wo\u00f0 up astag,\n cearfulra cirm. \u00a0\u00a0\u00a0\u00a0 Cleopedon monige,\n- 265\n- \n feonda foresprecan, \u00a0\u00a0\u00a0\u00a0 firenum gulpon: \n \"Oft we ofersegon \u00a0\u00a0\u00a0\u00a0 bi s\u00e6m tweonum\n \u00feeoda \u00feeawas, \u00a0\u00a0\u00a0\u00a0 \u00fer\u00e6ce modigra,\n \u00feara \u00fee in gelimpe \u00a0\u00a0\u00a0\u00a0 life weoldon.\n No we oferhygdu \u00a0\u00a0\u00a0\u00a0 anes monnes\n- 270\n- \n geond middangeard \u00a0\u00a0\u00a0\u00a0 maran fundon. \n \u00f0u \u00fe\u00e6t gehatest \u00a0\u00a0\u00a0\u00a0 \u00fe\u00e6t \u00f0u ham on us\n gegan wille, \u00a0\u00a0\u00a0\u00a0 \u00f0e eart godes yrming.\n Bi hwon scealt \u00feu lifgan, \u00a0\u00a0\u00a0\u00a0 \u00feeah \u00feu lond age?\n Ne \u00feec mon hider \u00a0\u00a0\u00a0\u00a0 mose fede\u00f0;\n- 275\n- \n beo\u00f0 \u00fee hungor ond \u00feurst \u00a0\u00a0\u00a0\u00a0 hearde gewinnan, \n gif \u00feu gewitest \u00a0\u00a0\u00a0\u00a0 swa wilde deor\n ana from e\u00feele. \u00a0\u00a0\u00a0\u00a0 Nis \u00fe\u00e6t onginn wiht!\n Geswic \u00feisses setles! \u00a0\u00a0\u00a0\u00a0 Ne m\u00e6g \u00feec sellan r\u00e6d\n mon gel\u00e6ran \u00a0\u00a0\u00a0\u00a0 \u00feonne \u00feeos mengu eall.\n- 280\n- \n We \u00fee beo\u00f0 holde \u00a0\u00a0\u00a0\u00a0 gif \u00f0u us hyran wilt, \n o\u00fe\u00fee \u00feec ungearo \u00a0\u00a0\u00a0\u00a0 eft geseca\u00f0\n maran m\u00e6gne, \u00a0\u00a0\u00a0\u00a0 \u00fe\u00e6t \u00fee mon ne \u00feearf\n hondum hrinan, \u00a0\u00a0\u00a0\u00a0 ne \u00fein hra feallan\n w\u00e6pna wundum. \u00a0\u00a0\u00a0\u00a0 We \u00feas wic magun\n- 285\n- \n fotum afyllan; \u00a0\u00a0\u00a0\u00a0 folc in \u00f0rice\u00f0 \n meara \u00fereatum \u00a0\u00a0\u00a0\u00a0 ond monfarum.\n Beo\u00f0 \u00fea gebolgne, \u00a0\u00a0\u00a0\u00a0 \u00fea \u00feec breodwia\u00f0,\n treda\u00f0 \u00feec ond terga\u00f0, \u00a0\u00a0\u00a0\u00a0 ond hyra torn wreca\u00f0,\n tobera\u00f0 \u00feec blodgum lastum; \u00a0\u00a0\u00a0\u00a0 gif \u00feu ure bidan \u00feencest,\n- 290\n- \n we \u00feec ni\u00fea gen\u00e6ga\u00f0. \u00a0\u00a0\u00a0\u00a0 Ongin \u00fee generes wilnian, \n far \u00fe\u00e6r \u00f0u freonda wene, \u00a0\u00a0\u00a0\u00a0 gif \u00f0u \u00feines feores recce.\"\n Gearo w\u00e6s Gu\u00f0lac, \u00a0\u00a0\u00a0\u00a0 hine god fremede\n on ondsware \u00a0\u00a0\u00a0\u00a0 ond on elne strong.\n Ne wond he for worde, \u00a0\u00a0\u00a0\u00a0 ac his wi\u00feerbreocum\n- 295\n- \n sorge ges\u00e6gde, \u00a0\u00a0\u00a0\u00a0 cu\u00f0e him so\u00f0 genog: \n \"Wid is \u00fees westen, \u00a0\u00a0\u00a0\u00a0 wr\u00e6csetla fela,\n eardas onh\u00e6le \u00a0\u00a0\u00a0\u00a0 earmra g\u00e6sta.\n Sindon w\u00e6rlogan \u00a0\u00a0\u00a0\u00a0 \u00fee \u00fea wic buga\u00f0.\n \u00feeah ge \u00fea ealle \u00a0\u00a0\u00a0\u00a0 ut abanne,\n- 300\n- \n ond eow eac gewyrce \u00a0\u00a0\u00a0\u00a0 widor s\u00e6ce, \n ge her ateo\u00f0 \u00a0\u00a0\u00a0\u00a0 in \u00fea tornwr\u00e6ce\n sigeleasne si\u00f0. \u00a0\u00a0\u00a0\u00a0 No ic eow sweord ongean\n mid gebolgne hond \u00a0\u00a0\u00a0\u00a0 o\u00f0beran \u00feence,\n worulde w\u00e6pen, \u00a0\u00a0\u00a0\u00a0 ne sceal \u00fees wong gode\n- 305\n- \n \u00feurh blodgyte \u00a0\u00a0\u00a0\u00a0 gebuen weor\u00f0an, \n ac ic minum Criste \u00a0\u00a0\u00a0\u00a0 cweman \u00feence\n leofran lace. \u00a0\u00a0\u00a0\u00a0 Nu ic \u00feis lond gestag,\n fela ge me earda \u00a0\u00a0\u00a0\u00a0 \u00feurh idel word\n aboden habba\u00f0. \u00a0\u00a0\u00a0\u00a0 Nis min breostsefa\n- 310\n- \n forht ne f\u00e6ge, \u00a0\u00a0\u00a0\u00a0 ac me fri\u00f0e healde\u00f0 \n ofer monna cyn \u00a0\u00a0\u00a0\u00a0 se \u00fee m\u00e6gna gehw\u00e6s\n weorcum wealde\u00f0. \u00a0\u00a0\u00a0\u00a0 Nis me wiht \u00e6t eow\n leofes gelong, \u00a0\u00a0\u00a0\u00a0 ne ge me la\u00fees wiht\n gedon motun. \u00a0\u00a0\u00a0\u00a0 Ic eom dryhtnes \u00feeow,\n- 315\n- \n he mec \u00feurh engel \u00a0\u00a0\u00a0\u00a0 oft afrefre\u00f0. \n For\u00f0on mec longe\u00feas \u00a0\u00a0\u00a0\u00a0 lyt gegreta\u00f0,\n sorge sealdun, \u00a0\u00a0\u00a0\u00a0 nu mec sawelcund\n hyrde bihealde\u00f0. \u00a0\u00a0\u00a0\u00a0 Is min hyht mid god,\n ne ic me eor\u00f0welan \u00a0\u00a0\u00a0\u00a0 owiht sinne,\n- 320\n- \n ne me mid mode \u00a0\u00a0\u00a0\u00a0 micles gyrne, \n ac me dogra gehwam \u00a0\u00a0\u00a0\u00a0 dryhten sende\u00f0\n \u00feurh monnes hond \u00a0\u00a0\u00a0\u00a0 mine \u00feearfe.\"\n Swa modgade, \u00a0\u00a0\u00a0\u00a0 se wi\u00f0 mongum stod,\n awre\u00f0ed weor\u00f0lice \u00a0\u00a0\u00a0\u00a0 wuldres cempa\n- 325\n- \n engla m\u00e6gne. \u00a0\u00a0\u00a0\u00a0 Gewat eal \u00feonan \n feonda mengu. \u00a0\u00a0\u00a0\u00a0 Ne w\u00e6s se fyrst micel\n \u00fee hi Gu\u00f0lace \u00a0\u00a0\u00a0\u00a0 forgiefan \u00feohtan.\n He w\u00e6s on elne \u00a0\u00a0\u00a0\u00a0 ond on ea\u00f0medum,\n bad on beorge, \u00a0\u00a0\u00a0\u00a0 (w\u00e6s him botles neod),\n- 330\n- \n forlet longe\u00feas \u00a0\u00a0\u00a0\u00a0 l\u00e6nra dreama. \n No he hine wi\u00f0 monna \u00a0\u00a0\u00a0\u00a0 miltse ged\u00e6lde,\n ac gesynta b\u00e6d \u00a0\u00a0\u00a0\u00a0 sawla gehwylcre,\n \u00feonne he to eor\u00f0an \u00a0\u00a0\u00a0\u00a0 on \u00feam anade\n hleor onhylde. \u00a0\u00a0\u00a0\u00a0 Him of heofonum wear\u00f0\n- 335\n- \n onbryrded breostsefa \u00a0\u00a0\u00a0\u00a0 bli\u00f0e g\u00e6ste. \n Oft eahtade, \u00a0\u00a0\u00a0\u00a0 (w\u00e6s him engel neah),\n hu \u00feisse worulde \u00a0\u00a0\u00a0\u00a0 wynna \u00feorfte\n mid his lichoman \u00a0\u00a0\u00a0\u00a0 l\u00e6sast brucan.\n No him fore egsan \u00a0\u00a0\u00a0\u00a0 earmra g\u00e6sta\n- 340\n- \n treow getweode, \u00a0\u00a0\u00a0\u00a0 ne he tid fors\u00e6t \n \u00fe\u00e6s \u00fee he for his dryhtne \u00a0\u00a0\u00a0\u00a0 dreogan sceolde,\n \u00fe\u00e6t hine \u00e6reste \u00a0\u00a0\u00a0\u00a0 elne binoman\n sl\u00e6pa sluman \u00a0\u00a0\u00a0\u00a0 o\u00fe\u00fee s\u00e6ne mod.\n Swa sceal oretta \u00a0\u00a0\u00a0\u00a0 a in his mode\n- 345\n- \n gode compian, \u00a0\u00a0\u00a0\u00a0 ond his g\u00e6st beran \n oft on ondan \u00a0\u00a0\u00a0\u00a0 \u00feam \u00fee eahtan wile\n sawla gehwylcre \u00a0\u00a0\u00a0\u00a0 \u00fe\u00e6r he ges\u00e6lan m\u00e6g.\n Symle hy Gu\u00f0lac \u00a0\u00a0\u00a0\u00a0 in godes willan\n fromne fundon, \u00a0\u00a0\u00a0\u00a0 \u00feonne flygereowe\n- 350\n- \n \u00feurh nihta genipu \u00a0\u00a0\u00a0\u00a0 neosan cwoman, \n \u00fea \u00fee onh\u00e6le \u00a0\u00a0\u00a0\u00a0 eardas weredon,\n hw\u00e6\u00fere him \u00fe\u00e6s wonges \u00a0\u00a0\u00a0\u00a0 wyn swe\u00f0rade;\n woldun \u00fe\u00e6t him to mode \u00a0\u00a0\u00a0\u00a0 fore monlufan\n sorg gesohte, \u00a0\u00a0\u00a0\u00a0 \u00fe\u00e6t he si\u00fe tuge\n- 355\n- \n eft to e\u00fele. \u00a0\u00a0\u00a0\u00a0 Ne w\u00e6s \u00fe\u00e6t ongin swylc, \n \u00f0onne hine engel \u00a0\u00a0\u00a0\u00a0 on \u00feam anade\n geornast grette \u00a0\u00a0\u00a0\u00a0 ond him giefe sealde,\n \u00fe\u00e6t hine ne meahte \u00a0\u00a0\u00a0\u00a0 meotudes willan\n longa\u00f0 gelettan, \u00a0\u00a0\u00a0\u00a0 ac he on \u00fe\u00e6s lareowes\n- 360\n- \n w\u00e6re gewunade. \u00a0\u00a0\u00a0\u00a0 Oft worde bicw\u00e6\u00f0: \n \"Huru, \u00fe\u00e6s bihofa\u00f0, \u00a0\u00a0\u00a0\u00a0 se \u00f0e him halig g\u00e6st\n wisa\u00f0 on willan \u00a0\u00a0\u00a0\u00a0 ond his weorc tryma\u00f0,\n la\u00fea\u00f0 hine li\u00feum wordum, \u00a0\u00a0\u00a0\u00a0 gehate\u00f0 him lifes reste,\n \u00fe\u00e6t he \u00fe\u00e6s latteowes \u00a0\u00a0\u00a0\u00a0 larum hyre,\n- 365\n- \n ne lete him ealdfeond \u00a0\u00a0\u00a0\u00a0 eft oncyrran \n mod from his meotude. \u00a0\u00a0\u00a0\u00a0 Hu sceal min cuman\n g\u00e6st to geoce, \u00a0\u00a0\u00a0\u00a0 nemne ic gode sylle\n hyrsumne hige, \u00a0\u00a0\u00a0\u00a0 \u00fe\u00e6t him heortan ge\u00feonc\n ...... \u00e6r o\u00fe\u00fee si\u00f0 \u00a0\u00a0\u00a0\u00a0 ende geweor\u00f0e,\n- 370\n- \n \u00fe\u00e6t ge mec to wundre \u00a0\u00a0\u00a0\u00a0 wegan motun. \n Ne m\u00e6g min lichoma \u00a0\u00a0\u00a0\u00a0 wi\u00f0 \u00feas l\u00e6nan gesceaft\n dea\u00f0 ged\u00e6lan, \u00a0\u00a0\u00a0\u00a0 ac he gedreosan sceal,\n swa \u00feeos eor\u00f0e eall \u00a0\u00a0\u00a0\u00a0 \u00fee ic her on stonde.\n \u00f0eah ge minne fl\u00e6schoman \u00a0\u00a0\u00a0\u00a0 fyres wylme\n- 375\n- \n forgripen gromhydge \u00a0\u00a0\u00a0\u00a0 gifran lege, \n n\u00e6fre ge mec of \u00feissum wordum onwenda\u00f0 \u00a0\u00a0\u00a0\u00a0 \u00feendan mec min gewit gel\u00e6ste\u00f0.\n \u00feeah \u00fee ge hine sarum fors\u00e6cen, \u00a0\u00a0\u00a0\u00a0 ne motan ge mine sawle gretan,\n ac ge on betran gebringa\u00f0. \u00a0\u00a0\u00a0\u00a0 For\u00f0an ic gebidan wille\n \u00fe\u00e6s \u00fee me min dryhten deme\u00f0. \u00a0\u00a0\u00a0\u00a0 Nis me \u00fe\u00e6s dea\u00fees sorg.\n- 380\n- \n \u00f0eah min ban ond blod \u00a0\u00a0\u00a0\u00a0 bu tu geweor\u00feen \n eor\u00fean to eacan, \u00a0\u00a0\u00a0\u00a0 min se eca d\u00e6l\n in gefean fare\u00f0, \u00a0\u00a0\u00a0\u00a0 \u00fe\u00e6r he f\u00e6gran\n botles bruce\u00f0. \u00a0\u00a0\u00a0\u00a0 Nis \u00feisses beorges setl\n meodumre ne mara \u00a0\u00a0\u00a0\u00a0 \u00feonne hit men duge\n- 385\n- \n se \u00fee in \u00ferowingum \u00a0\u00a0\u00a0\u00a0 \u00feeodnes willan \n d\u00e6ghwam dreoge\u00f0. \u00a0\u00a0\u00a0\u00a0 Ne sceal se dryhtnes \u00feeow\n in his modsefan \u00a0\u00a0\u00a0\u00a0 mare gelufian\n eor\u00fean \u00e6htwelan \u00a0\u00a0\u00a0\u00a0 \u00feonne his anes gemet,\n \u00fe\u00e6t he his lichoman \u00a0\u00a0\u00a0\u00a0 lade h\u00e6bbe.\"\n- 390\n- \n \u00f0a w\u00e6s eft swa \u00e6r \u00a0\u00a0\u00a0\u00a0 ealdfeonda ni\u00f0, \n wroht onwylled; \u00a0\u00a0\u00a0\u00a0 wo\u00f0 o\u00feer\n ne lythwon leo\u00f0ode, \u00a0\u00a0\u00a0\u00a0 \u00feonne in lyft astag\n ceargesta cirm. \u00a0\u00a0\u00a0\u00a0 Symle Cristes lof\n in Gu\u00f0laces \u00a0\u00a0\u00a0\u00a0 godum mode\n- 395\n- \n weox ond wunade, \u00a0\u00a0\u00a0\u00a0 ond hine weoruda god \n freo\u00f0ade on foldan, \u00a0\u00a0\u00a0\u00a0 swa he feora gehwylc\n healde\u00f0 in h\u00e6lo, \u00a0\u00a0\u00a0\u00a0 \u00fe\u00e6r se hyra g\u00e6st\n \u00feih\u00f0 in \u00feeawum. \u00a0\u00a0\u00a0\u00a0 He w\u00e6s \u00feeara sum;\n ne won he \u00e6fter worulde, \u00a0\u00a0\u00a0\u00a0 ac he in wuldre ahof\n- 400\n- \n modes wynne. \u00a0\u00a0\u00a0\u00a0 Hwylc w\u00e6s mara \u00feonne se? \n An oretta \u00a0\u00a0\u00a0\u00a0 ussum tidum\n cempa gecy\u00f0e\u00f0 \u00a0\u00a0\u00a0\u00a0 \u00fe\u00e6t him Crist fore\n woruldlicra ma \u00a0\u00a0\u00a0\u00a0 wundra gecy\u00f0de.\n He hine scilde \u00a0\u00a0\u00a0\u00a0 wi\u00f0 sce\u00f0\u00feendra\n- 405\n- \n eglum onfengum \u00a0\u00a0\u00a0\u00a0 earmra g\u00e6sta; \n w\u00e6ron hy reowe \u00a0\u00a0\u00a0\u00a0 to r\u00e6sanne\n gifrum grapum. \u00a0\u00a0\u00a0\u00a0 No god wolde\n \u00fe\u00e6t seo sawl \u00fe\u00e6s \u00a0\u00a0\u00a0\u00a0 sar \u00ferowade\n in lichoman, \u00a0\u00a0\u00a0\u00a0 lyfde se\u00feeana\n- 410\n- \n \u00fe\u00e6t hy him mid hondum \u00a0\u00a0\u00a0\u00a0 hrinan mosten, \n ond \u00fe\u00e6t fri\u00f0 wi\u00f0 hy \u00a0\u00a0\u00a0\u00a0 gefreo\u00fead w\u00e6re.\n Hy hine \u00fea hofun \u00a0\u00a0\u00a0\u00a0 on \u00fea hean lyft,\n sealdon him meahte \u00a0\u00a0\u00a0\u00a0 ofer monna cynn,\n \u00fe\u00e6t he fore eagum \u00a0\u00a0\u00a0\u00a0 eall sceawode\n- 415\n- \n under haligra \u00a0\u00a0\u00a0\u00a0 hyrda gewealdum \n in mynsterum \u00a0\u00a0\u00a0\u00a0 monna geb\u00e6ru,\n \u00feara \u00fee hyra lifes \u00a0\u00a0\u00a0\u00a0 \u00feurh lust brucan,\n idlum \u00e6htum \u00a0\u00a0\u00a0\u00a0 ond oferwlencum,\n gierelum gielplicum, \u00a0\u00a0\u00a0\u00a0 swa bi\u00f0 geogu\u00f0e \u00feeaw,\n- 420\n- \n \u00fe\u00e6r \u00fe\u00e6s ealdres \u00a0\u00a0\u00a0\u00a0 egsa ne styre\u00f0. \n No \u00fe\u00e6r \u00fea feondas \u00a0\u00a0\u00a0\u00a0 gefeon \u00feorfton,\n ac \u00fe\u00e6s bl\u00e6des hra\u00f0e \u00a0\u00a0\u00a0\u00a0 gebrocen h\u00e6fdon\n \u00fee him alyfed w\u00e6s \u00a0\u00a0\u00a0\u00a0 lytle hwile,\n \u00fe\u00e6t hy his lichoman \u00a0\u00a0\u00a0\u00a0 leng ne mostan\n- 425\n- \n witum w\u00e6lan; \u00a0\u00a0\u00a0\u00a0 ne him wiht gescod \n \u00fe\u00e6s \u00fee hy him to teonan \u00a0\u00a0\u00a0\u00a0 \u00feurhtogen h\u00e6fdon.\n L\u00e6ddun hine \u00fea of lyfte \u00a0\u00a0\u00a0\u00a0 to \u00feam leofestan\n earde on eor\u00f0an, \u00a0\u00a0\u00a0\u00a0 \u00fe\u00e6t he eft gestag\n beorg on bearwe. \u00a0\u00a0\u00a0\u00a0 Bonan gnornedon,\n- 430\n- \n m\u00e6ndon murnende \u00a0\u00a0\u00a0\u00a0 \u00fe\u00e6t hy monnes bearn \n \u00feream ofer\u00feunge, \u00a0\u00a0\u00a0\u00a0 ond swa \u00feearfendlic\n him to earfe\u00f0um \u00a0\u00a0\u00a0\u00a0 ana cwome,\n gif hy him ne meahte \u00a0\u00a0\u00a0\u00a0 maran sarum\n gyldan gyrnwr\u00e6ce. \u00a0\u00a0\u00a0\u00a0 Gu\u00f0lac sette\n- 435\n- \n hyht in heofonas, \u00a0\u00a0\u00a0\u00a0 h\u00e6lu getreowde, \n h\u00e6fde feonda feng \u00a0\u00a0\u00a0\u00a0 feore gedyged.\n W\u00e6s seo \u00e6reste \u00a0\u00a0\u00a0\u00a0 earmra g\u00e6sta\n costung ofercumen. \u00a0\u00a0\u00a0\u00a0 Cempa wunade\n bli\u00fee on beorge, \u00a0\u00a0\u00a0\u00a0 w\u00e6s his bl\u00e6d mid god.\n- 440\n- \n \u00f0uhte him on mode \u00a0\u00a0\u00a0\u00a0 \u00fe\u00e6t se moncynnes \n eadig w\u00e6re \u00a0\u00a0\u00a0\u00a0 se \u00fee his anum her\n feore gefreo\u00f0ade, \u00a0\u00a0\u00a0\u00a0 \u00fe\u00e6t him feondes hond\n \u00e6t \u00feam ytmestan \u00a0\u00a0\u00a0\u00a0 ende ne scode,\n \u00feonne him se dryhtnes \u00a0\u00a0\u00a0\u00a0 dom wisade\n- 445\n- \n to \u00feam nyhstan \u00a0\u00a0\u00a0\u00a0 nydgedale. \n Hw\u00e6\u00fere him \u00fea gena \u00a0\u00a0\u00a0\u00a0 gyrna gemyndge\n edwitsprecan \u00a0\u00a0\u00a0\u00a0 erm\u00feu geheton\n tornum teoncwidum. \u00a0\u00a0\u00a0\u00a0 Treow w\u00e6s gecy\u00feed,\n \u00fe\u00e6tte Gu\u00f0lace \u00a0\u00a0\u00a0\u00a0 god leanode\n- 450\n- \n ellen mid arum, \u00a0\u00a0\u00a0\u00a0 \u00fe\u00e6t he ana gewon. \n Him se werga g\u00e6st \u00a0\u00a0\u00a0\u00a0 wordum s\u00e6gde:\n \"No we \u00fee \u00feus swi\u00f0e \u00a0\u00a0\u00a0\u00a0 swencan \u00feorftan,\n \u00fe\u00e6r \u00feu fromlice \u00a0\u00a0\u00a0\u00a0 freonda larum\n hyran wolde, \u00a0\u00a0\u00a0\u00a0 \u00fea \u00feu hean ond earm\n- 455\n- \n on \u00feis orlege \u00a0\u00a0\u00a0\u00a0 \u00e6rest cwome, \n \u00f0a \u00feu gehete \u00a0\u00a0\u00a0\u00a0 \u00fe\u00e6t \u00feec halig g\u00e6st\n wi\u00f0 earfe\u00feum \u00a0\u00a0\u00a0\u00a0 ea\u00f0e gescilde,\n for \u00feam myrcelse \u00a0\u00a0\u00a0\u00a0 \u00fee \u00feec monnes hond\n from \u00feinre onsyne \u00a0\u00a0\u00a0\u00a0 \u00e6\u00feelum ahwyrfde.\n- 460\n- \n In \u00feam m\u00e6gwlite \u00a0\u00a0\u00a0\u00a0 monge lifga\u00f0, \n gyltum forgiefene; \u00a0\u00a0\u00a0\u00a0 nales gode \u00feiga\u00f0,\n ac hy lichoman \u00a0\u00a0\u00a0\u00a0 fore lufan cwema\u00f0\n wista wynnum. \u00a0\u00a0\u00a0\u00a0 Swa ge weor\u00f0myndu\n in dolum dreame \u00a0\u00a0\u00a0\u00a0 dryhtne gielda\u00f0.\n- 465\n- \n Fela ge fore monnum mi\u00fea\u00f0 \u00a0\u00a0\u00a0\u00a0 \u00fe\u00e6s \u00fee ge in mode gehycga\u00f0; \n ne beo\u00f0 eowre d\u00e6da dyrne, \u00a0\u00a0\u00a0\u00a0 \u00feeah \u00fee ge hy in dygle gefremme.\n We \u00feec in lyft gel\u00e6ddun, \u00a0\u00a0\u00a0\u00a0 oftugon \u00fee londes wynna,\n woldun \u00feu \u00fee sylfa gesawe \u00a0\u00a0\u00a0\u00a0 \u00fe\u00e6t we \u00feec so\u00f0 onst\u00e6ldun.\n Ealles \u00feu \u00fe\u00e6s wite awunne; \u00a0\u00a0\u00a0\u00a0 for\u00feon \u00feu hit onwendan ne meahtes.\"\n- 470\n- \n \u00f0a w\u00e6s agongen \u00a0\u00a0\u00a0\u00a0 \u00fe\u00e6t him god wolde \n \u00e6fter \u00ferowinga \u00a0\u00a0\u00a0\u00a0 \u00feonc gegyldan\n \u00fe\u00e6t he martyrhad \u00a0\u00a0\u00a0\u00a0 mode gelufade,\n sealde him snyttru \u00a0\u00a0\u00a0\u00a0 on sefan gehygdum,\n m\u00e6genf\u00e6ste gemynd. \u00a0\u00a0\u00a0\u00a0 He wi\u00f0 mongum stod\n- 475\n- \n ealdfeonda, \u00a0\u00a0\u00a0\u00a0 elne gebylded, \n s\u00e6gde him to sorge \u00a0\u00a0\u00a0\u00a0 \u00fe\u00e6t hy sigelease\n \u00feone grenan wong \u00a0\u00a0\u00a0\u00a0 ofgiefan sceoldan:\n \"Ge sind forscadene, \u00a0\u00a0\u00a0\u00a0 on eow scyld site\u00f0!\n Ne cunnon ge dryhten \u00a0\u00a0\u00a0\u00a0 dugu\u00fee biddan,\n- 480\n- \n ne mid ea\u00f0medum \u00a0\u00a0\u00a0\u00a0 are secan, \n \u00feeah \u00fee eow alyfde \u00a0\u00a0\u00a0\u00a0 lytle hwile,\n \u00fe\u00e6t ge min onwald \u00a0\u00a0\u00a0\u00a0 agan mosten;\n ne ge \u00fe\u00e6t ge\u00feyldum \u00a0\u00a0\u00a0\u00a0 \u00feicgan woldan,\n ac mec yrringa \u00a0\u00a0\u00a0\u00a0 up gel\u00e6ddon,\n- 485\n- \n \u00fe\u00e6t ic of lyfte \u00a0\u00a0\u00a0\u00a0 londa getimbru \n geseon meahte. \u00a0\u00a0\u00a0\u00a0 W\u00e6s me swegles leoht\n torht ontyned, \u00a0\u00a0\u00a0\u00a0 \u00feeah ic torn druge.\n Setton me in edwit \u00a0\u00a0\u00a0\u00a0 \u00fe\u00e6t ic ea\u00f0e forb\u00e6r\n rume regulas \u00a0\u00a0\u00a0\u00a0 ond re\u00fee mod\n- 490\n- \n geongra monna \u00a0\u00a0\u00a0\u00a0 in godes templum; \n woldan \u00fey gehyrwan \u00a0\u00a0\u00a0\u00a0 haligra lof,\n sohtun \u00fea s\u00e6mran, \u00a0\u00a0\u00a0\u00a0 ond \u00fea sellan no\n demdan \u00e6fter d\u00e6dum. \u00a0\u00a0\u00a0\u00a0 Ne beo\u00f0 \u00fea dyrne swa \u00feeah.\n Ic eow so\u00f0 si\u00fe\u00feon \u00a0\u00a0\u00a0\u00a0 secgan wille.\n- 495\n- \n God scop geogu\u00f0e \u00a0\u00a0\u00a0\u00a0 ond gumena dream; \n ne magun \u00fea \u00e6fteryld \u00a0\u00a0\u00a0\u00a0 in \u00feam \u00e6restan\n bl\u00e6de geberan, \u00a0\u00a0\u00a0\u00a0 ac hy blissia\u00f0\n worulde wynnum, \u00a0\u00a0\u00a0\u00a0 o\u00f0\u00f0\u00e6t wintra rim\n geg\u00e6\u00f0 in \u00fea geogu\u00f0e, \u00a0\u00a0\u00a0\u00a0 \u00fe\u00e6t se g\u00e6st lufa\u00f0\n- 500\n- \n onsyn ond \u00e6twist \u00a0\u00a0\u00a0\u00a0 yldran hades, \n \u00f0e gemete monige \u00a0\u00a0\u00a0\u00a0 geond middangeard\n \u00feeowia\u00f0 in \u00feeawum. \u00a0\u00a0\u00a0\u00a0 \u00feeodum ywa\u00fe\n wisdom weras, \u00a0\u00a0\u00a0\u00a0 wlencu forleosa\u00f0,\n si\u00f0\u00f0an geogu\u00f0e \u00a0\u00a0\u00a0\u00a0 gea\u00f0 g\u00e6st aflih\u00f0.\n- 505\n- \n \u00fe\u00e6t ge ne scira\u00f0, \u00a0\u00a0\u00a0\u00a0 ac ge scyldigra \n synne secga\u00f0, \u00a0\u00a0\u00a0\u00a0 so\u00fef\u00e6stra no\n mod ond mon\u00feeaw \u00a0\u00a0\u00a0\u00a0 m\u00e6ran willa\u00f0.\n Gefeo\u00f0 in firenum, \u00a0\u00a0\u00a0\u00a0 frofre ne wena\u00f0,\n \u00fe\u00e6t ge wr\u00e6csi\u00f0a \u00a0\u00a0\u00a0\u00a0 wyrpe gebiden.\n- 510\n- \n Oft ge in gestalum stonda\u00f0; \u00a0\u00a0\u00a0\u00a0 \u00fe\u00e6s cyme\u00f0 steor of heofonum. \n Me \u00feonne sige sende\u00f0 \u00a0\u00a0\u00a0\u00a0 se usic semon m\u00e6g,\n se \u00fee lifa gehw\u00e6s \u00a0\u00a0\u00a0\u00a0 lengu wealde\u00f0.\"\n Swa hleo\u00ferade \u00a0\u00a0\u00a0\u00a0 halig cempa;\n w\u00e6s se martyre \u00a0\u00a0\u00a0\u00a0 from moncynnes\n- 515\n- \n synnum asundrad. \u00a0\u00a0\u00a0\u00a0 Sceolde he sares \u00fea gen \n d\u00e6l adreogan, \u00a0\u00a0\u00a0\u00a0 \u00f0eah \u00fee dryhten his\n witum weolde. \u00a0\u00a0\u00a0\u00a0 Hw\u00e6t, \u00fe\u00e6t wundra sum\n monnum \u00feuhte, \u00a0\u00a0\u00a0\u00a0 \u00fe\u00e6t he ma wolde\n afrum onfengum \u00a0\u00a0\u00a0\u00a0 earme g\u00e6stas\n- 520\n- \n hrinan leton, \u00a0\u00a0\u00a0\u00a0 ond \u00fe\u00e6t hw\u00e6\u00fere gelomp! \n W\u00e6s \u00fe\u00e6t gen mara, \u00a0\u00a0\u00a0\u00a0 \u00fe\u00e6t he middangeard\n sylfa gesohte, \u00a0\u00a0\u00a0\u00a0 ond his swat ageat\n on bonena hond; \u00a0\u00a0\u00a0\u00a0 ahte bega geweald,\n lifes ond dea\u00f0es, \u00a0\u00a0\u00a0\u00a0 \u00fea he lustum dreag\n- 525\n- \n ea\u00f0mod on eor\u00f0an \u00a0\u00a0\u00a0\u00a0 ehtendra ni\u00f0. \n For\u00feon is nu arlic \u00a0\u00a0\u00a0\u00a0 \u00fe\u00e6t we \u00e6f\u00e6stra\n d\u00e6de demen, \u00a0\u00a0\u00a0\u00a0 secgen dryhtne lof\n ealra \u00feara bisena \u00a0\u00a0\u00a0\u00a0 \u00fee us bec fore\n \u00feurh his wundra geweorc \u00a0\u00a0\u00a0\u00a0 wisdom cy\u00fea\u00f0.\n- 530\n- \n Geofu w\u00e6s mid Gu\u00f0lac \u00a0\u00a0\u00a0\u00a0 in godcundum \n m\u00e6gne gemeted. \u00a0\u00a0\u00a0\u00a0 Micel is to secgan\n eall \u00e6fter orde, \u00a0\u00a0\u00a0\u00a0 \u00fe\u00e6t he on elne adreag:\n \u00f0one foregengan \u00a0\u00a0\u00a0\u00a0 f\u00e6der \u00e6lmihtig\n wi\u00f0 onh\u00e6lum \u00a0\u00a0\u00a0\u00a0 ealdorgewinnum\n- 535\n- \n sylfa gesette, \u00a0\u00a0\u00a0\u00a0 \u00fe\u00e6r his sawl wear\u00f0 \n cl\u00e6ne ond gecostad. \u00a0\u00a0\u00a0\u00a0 Cu\u00f0 is wide\n geond middangeard \u00a0\u00a0\u00a0\u00a0 \u00fe\u00e6t his mod ge\u00feah\n in godes willan; \u00a0\u00a0\u00a0\u00a0 is \u00fe\u00e6s gen fela\n to secgenne, \u00a0\u00a0\u00a0\u00a0 \u00fe\u00e6s \u00fee he sylfa adreag\n- 540\n- \n under ny\u00f0gista \u00a0\u00a0\u00a0\u00a0 nearwum clommum. \n He \u00fea sar forseah, \u00a0\u00a0\u00a0\u00a0 a \u00fe\u00e6re sawle wel\n \u00fe\u00e6s mundboran \u00a0\u00a0\u00a0\u00a0 \u00fee \u00fe\u00e6t mod geheold,\n \u00fe\u00e6t him ne getweode \u00a0\u00a0\u00a0\u00a0 treow in breostum,\n ne him gnornunga \u00a0\u00a0\u00a0\u00a0 g\u00e6ste scodun,\n- 545\n- \n ac se hearda hyge \u00a0\u00a0\u00a0\u00a0 halig wunade, \n o\u00fe\u00fe\u00e6t he \u00fea bysgu \u00a0\u00a0\u00a0\u00a0 oferbiden h\u00e6fde.\n \u00ferea w\u00e6ron \u00feearle, \u00a0\u00a0\u00a0\u00a0 \u00feegnas grimme,\n ealle hy \u00feam feore \u00a0\u00a0\u00a0\u00a0 fyl gehehton.\n No hy hine to dea\u00f0e \u00a0\u00a0\u00a0\u00a0 deman moston,\n- 550\n- \n synna hyrdas, \u00a0\u00a0\u00a0\u00a0 ac seo sawul bad \n in lichoman \u00a0\u00a0\u00a0\u00a0 leofran tide.\n Georne hy ongeaton \u00a0\u00a0\u00a0\u00a0 \u00fe\u00e6t hyne god wolde\n nergan wi\u00f0 ni\u00feum \u00a0\u00a0\u00a0\u00a0 ond hyra nydwr\u00e6ce\n deope deman. \u00a0\u00a0\u00a0\u00a0 Swa dryhten m\u00e6g,\n- 555\n- \n ana \u00e6lmihtig, \u00a0\u00a0\u00a0\u00a0 eadigra gehwone \n wi\u00f0 earfe\u00feum \u00a0\u00a0\u00a0\u00a0 ea\u00f0e gescildan.\n Hw\u00e6\u00f0re hine gebrohton \u00a0\u00a0\u00a0\u00a0 bolgenmode,\n wra\u00f0e wr\u00e6cm\u00e6cgas, \u00a0\u00a0\u00a0\u00a0 wuldres cempan,\n halig husulbearn, \u00a0\u00a0\u00a0\u00a0 \u00e6t heldore,\n- 560\n- \n \u00fe\u00e6r firenfulra \u00a0\u00a0\u00a0\u00a0 f\u00e6ge g\u00e6stas \n \u00e6fter swyltcwale \u00a0\u00a0\u00a0\u00a0 secan onginna\u00f0\n ingong \u00e6rest \u00a0\u00a0\u00a0\u00a0 in \u00fe\u00e6t atule hus,\n ni\u00feer under n\u00e6ssas \u00a0\u00a0\u00a0\u00a0 neole grundas.\n Hy hine bregdon, \u00a0\u00a0\u00a0\u00a0 budon orlege,\n- 565\n- \n egsan ond ondan \u00a0\u00a0\u00a0\u00a0 arleaslice, \n frecne fore, \u00a0\u00a0\u00a0\u00a0 swa bi\u00f0 feonda \u00feeaw,\n \u00feonne hy so\u00f0f\u00e6stra \u00a0\u00a0\u00a0\u00a0 sawle willa\u00f0\n synnum beswican \u00a0\u00a0\u00a0\u00a0 ond searocr\u00e6ftum.\n Ongunnon gromheorte \u00a0\u00a0\u00a0\u00a0 godes orettan\n- 570\n- \n in sefan swencan, \u00a0\u00a0\u00a0\u00a0 swi\u00fee geheton \n \u00fe\u00e6t he in \u00feone grimman gryre \u00a0\u00a0\u00a0\u00a0 gongan sceolde,\n hweorfan gehyned \u00a0\u00a0\u00a0\u00a0 to helwarum,\n ond \u00fe\u00e6r in bendum \u00a0\u00a0\u00a0\u00a0 bryne \u00ferowian.\n Woldun hy geteon \u00a0\u00a0\u00a0\u00a0 mid torncwidum\n- 575\n- \n earme agl\u00e6can \u00a0\u00a0\u00a0\u00a0 in orwennysse, \n meotudes cempan. \u00a0\u00a0\u00a0\u00a0 Hit ne meahte swa!\n Cw\u00e6don cearfulle, \u00a0\u00a0\u00a0\u00a0 Criste la\u00f0e,\n to Gu\u00f0lace \u00a0\u00a0\u00a0\u00a0 mid grimnysse:\n \"Ne eart \u00f0u gedefe, \u00a0\u00a0\u00a0\u00a0 ne dryhtnes \u00feeow\n- 580\n- \n cl\u00e6ne gecostad, \u00a0\u00a0\u00a0\u00a0 ne cempa god, \n wordum ond weorcum \u00a0\u00a0\u00a0\u00a0 wel gecy\u00feed,\n halig in heortan. \u00a0\u00a0\u00a0\u00a0 Nu \u00feu in helle scealt\n deope gedufan, \u00a0\u00a0\u00a0\u00a0 nales dryhtnes leoht\n habban in heofonum, \u00a0\u00a0\u00a0\u00a0 heahgetimbru,\n- 585\n- \n seld on swegle, \u00a0\u00a0\u00a0\u00a0 for\u00feon \u00feu synna to fela, \n facna gefremedes \u00a0\u00a0\u00a0\u00a0 in fl\u00e6schoman.\n We \u00fee nu willa\u00f0 \u00a0\u00a0\u00a0\u00a0 womma gehwylces\n lean forgieldan, \u00a0\u00a0\u00a0\u00a0 \u00fe\u00e6r \u00fee la\u00feast bi\u00f0\n in \u00f0am grimmestan \u00a0\u00a0\u00a0\u00a0 g\u00e6stgewinne.\"\n- 590\n- \n Him se eadga wer \u00a0\u00a0\u00a0\u00a0 ondswarode, \n Gu\u00f0lac in g\u00e6ste \u00a0\u00a0\u00a0\u00a0 mid godes m\u00e6gne:\n \"Do\u00f0 efne swa, \u00a0\u00a0\u00a0\u00a0 gif eow dryhten Crist,\n lifes leohtfruma \u00a0\u00a0\u00a0\u00a0 lyfan wylle,\n weoruda waldend, \u00a0\u00a0\u00a0\u00a0 \u00fe\u00e6t ge his wergengan\n- 595\n- \n in \u00feone la\u00f0an leg \u00a0\u00a0\u00a0\u00a0 l\u00e6dan motan. \n \u00fe\u00e6t is in gewealdum \u00a0\u00a0\u00a0\u00a0 wuldorcyninges,\n se eow gehynde \u00a0\u00a0\u00a0\u00a0 ond in h\u00e6ft bidraf\n under nearone clom, \u00a0\u00a0\u00a0\u00a0 nergende Crist.\n Eom ic ea\u00f0mod his \u00a0\u00a0\u00a0\u00a0 ombiehthera,\n- 600\n- \n \u00feeow ge\u00feyldig. \u00a0\u00a0\u00a0\u00a0 Ic ge\u00feafian sceal \n \u00e6ghw\u00e6r ealles \u00a0\u00a0\u00a0\u00a0 his anne dom,\n ond him geornlice \u00a0\u00a0\u00a0\u00a0 g\u00e6stgemyndum\n wille wideferh \u00a0\u00a0\u00a0\u00a0 wesan under\u00feyded,\n hyran holdlice \u00a0\u00a0\u00a0\u00a0 minum h\u00e6lende\n- 605\n- \n \u00feeawum ond ge\u00feync\u00f0um, \u00a0\u00a0\u00a0\u00a0 ond him \u00feoncian \n ealra \u00feara giefena \u00a0\u00a0\u00a0\u00a0 \u00fee god gescop\n englum \u00e6rest \u00a0\u00a0\u00a0\u00a0 ond eor\u00f0warum;\n ond ic bletsige \u00a0\u00a0\u00a0\u00a0 bli\u00f0e mode\n lifes leohtfruman, \u00a0\u00a0\u00a0\u00a0 ond him lof singe\n- 610\n- \n \u00feurh gedefne dom \u00a0\u00a0\u00a0\u00a0 d\u00e6ges ond nihtes, \n herge in heortan \u00a0\u00a0\u00a0\u00a0 heofonrices weard.\n \u00fe\u00e6t eow \u00e6fre ne bi\u00f0 \u00a0\u00a0\u00a0\u00a0 ufan alyfed\n leohtes lissum, \u00a0\u00a0\u00a0\u00a0 \u00fe\u00e6t ge lof moten\n dryhtne secgan, \u00a0\u00a0\u00a0\u00a0 ac ge dea\u00f0e sceolon\n- 615\n- \n weallendne wean \u00a0\u00a0\u00a0\u00a0 wope besingan, \n heaf in helle, \u00a0\u00a0\u00a0\u00a0 nales herenisse\n halge habban \u00a0\u00a0\u00a0\u00a0 heofoncyninges.\n Ic \u00feone deman \u00a0\u00a0\u00a0\u00a0 in dagum minum\n wille weor\u00feian \u00a0\u00a0\u00a0\u00a0 wordum ond d\u00e6dum,\n- 620\n- \n lufian in life, \u00a0\u00a0\u00a0\u00a0 swa is lar ond ar \n to spowendre \u00a0\u00a0\u00a0\u00a0 spr\u00e6ce gel\u00e6ded,\n \u00feam \u00fee in his weorcum \u00a0\u00a0\u00a0\u00a0 willan r\u00e6fna\u00f0.\n Sindon ge w\u00e6rlogan, \u00a0\u00a0\u00a0\u00a0 swa ge in wr\u00e6csi\u00f0e\n longe lifdon, \u00a0\u00a0\u00a0\u00a0 lege bisencte,\n- 625\n- \n swearte beswicene, \u00a0\u00a0\u00a0\u00a0 swegle benumene, \n dreame bidrorene, \u00a0\u00a0\u00a0\u00a0 dea\u00f0e bifolene,\n firenum bifongne, \u00a0\u00a0\u00a0\u00a0 feores orwenan,\n \u00fe\u00e6t ge blindnesse \u00a0\u00a0\u00a0\u00a0 bote fundon.\n Ge \u00fea f\u00e6gran gesceaft \u00a0\u00a0\u00a0\u00a0 in fyrndagum,\n- 630\n- \n g\u00e6stlicne goddream, \u00a0\u00a0\u00a0\u00a0 gearo forsegon, \n \u00fea ge wi\u00f0hogdun \u00a0\u00a0\u00a0\u00a0 halgum dryhtne.\n Ne mostun ge a wunian \u00a0\u00a0\u00a0\u00a0 in wyndagum,\n ac mid scome scyldum \u00a0\u00a0\u00a0\u00a0 scofene wurdon\n fore oferhygdum \u00a0\u00a0\u00a0\u00a0 in ece fyr,\n- 635\n- \n \u00f0\u00e6r ge sceolon dreogan \u00a0\u00a0\u00a0\u00a0 dea\u00f0 ond \u00feystro, \n wop to widan ealdre; \u00a0\u00a0\u00a0\u00a0 n\u00e6fre ge \u00fe\u00e6s wyrpe gebida\u00f0.\n Ond ic \u00fe\u00e6t gelyfe \u00a0\u00a0\u00a0\u00a0 in liffruman,\n ecne onwealdan \u00a0\u00a0\u00a0\u00a0 ealra gesceafta,\n \u00fe\u00e6t he mec for miltsum \u00a0\u00a0\u00a0\u00a0 ond m\u00e6genspedum,\n- 640\n- \n ni\u00f0\u00f0a nergend, \u00a0\u00a0\u00a0\u00a0 n\u00e6fre wille \n \u00feurh ellenweorc \u00a0\u00a0\u00a0\u00a0 anforl\u00e6tan,\n \u00feam ic longe \u00a0\u00a0\u00a0\u00a0 in lichoman\n ond in minum g\u00e6ste \u00a0\u00a0\u00a0\u00a0 gode campode\n \u00feurh monigfealdra \u00a0\u00a0\u00a0\u00a0 m\u00e6gna gerynu.\n- 645\n- \n For\u00f0on ic getrywe \u00a0\u00a0\u00a0\u00a0 in \u00feone torhtestan \n \u00ferynesse \u00ferym, \u00a0\u00a0\u00a0\u00a0 se ge\u00feeahtingum\n hafa\u00f0 in hondum \u00a0\u00a0\u00a0\u00a0 heofon ond eor\u00f0an,\n \u00fe\u00e6t ge mec mid ni\u00feum \u00a0\u00a0\u00a0\u00a0 n\u00e6fre motan\n tornmode teon \u00a0\u00a0\u00a0\u00a0 in tintergu,\n- 650\n- \n mine myr\u00f0ran \u00a0\u00a0\u00a0\u00a0 ond manscea\u00fean, \n swearte sigelease. \u00a0\u00a0\u00a0\u00a0 Eom ic so\u00f0lice\n leohte geleafan \u00a0\u00a0\u00a0\u00a0 ond mid lufan dryhtnes\n f\u00e6gre gefylled \u00a0\u00a0\u00a0\u00a0 in minum feorhlocan,\n breostum inbryrded \u00a0\u00a0\u00a0\u00a0 to \u00feam betran ham,\n- 655\n- \n leomum inlyhted \u00a0\u00a0\u00a0\u00a0 to \u00feam leofestan \n ecan earde, \u00a0\u00a0\u00a0\u00a0 \u00fe\u00e6r is e\u00feellond\n f\u00e6ger ond gefealic \u00a0\u00a0\u00a0\u00a0 in f\u00e6der wuldre,\n \u00f0\u00e6r eow n\u00e6fre \u00a0\u00a0\u00a0\u00a0 fore nergende\n leohtes leoma \u00a0\u00a0\u00a0\u00a0 ne lifes hyht\n- 660\n- \n in godes rice \u00a0\u00a0\u00a0\u00a0 agiefen weor\u00fee\u00f0, \n for \u00feam oferhygdum \u00a0\u00a0\u00a0\u00a0 \u00fee eow in mod astag\n \u00feurh idel gylp \u00a0\u00a0\u00a0\u00a0 ealles to swi\u00f0e.\n Wendun ge ond woldun, \u00a0\u00a0\u00a0\u00a0 wi\u00feerhycgende,\n \u00fe\u00e6t ge scyppende \u00a0\u00a0\u00a0\u00a0 sceoldan gelice\n- 665\n- \n wesan in wuldre. \u00a0\u00a0\u00a0\u00a0 Eow \u00fe\u00e6r wyrs gelomp, \n \u00f0a eow se waldend \u00a0\u00a0\u00a0\u00a0 wra\u00f0e bisencte\n in \u00fe\u00e6t swearte susl, \u00a0\u00a0\u00a0\u00a0 \u00fe\u00e6r eow si\u00f0\u00f0an w\u00e6s\n ad in\u00e6led \u00a0\u00a0\u00a0\u00a0 attre geblonden,\n \u00feurh deopne dom \u00a0\u00a0\u00a0\u00a0 dream afyrred,\n- 670\n- \n engla gemana. \u00a0\u00a0\u00a0\u00a0 Swa nu awa sceal \n wesan wideferh, \u00a0\u00a0\u00a0\u00a0 \u00fe\u00e6t ge w\u00e6rnysse\n brynewylm h\u00e6bben, \u00a0\u00a0\u00a0\u00a0 nales bletsunga.\n Ne \u00feurfun ge wenan, \u00a0\u00a0\u00a0\u00a0 wuldre biscyrede,\n \u00fe\u00e6t ge mec synfulle \u00a0\u00a0\u00a0\u00a0 mid searocr\u00e6ftum\n- 675\n- \n under sc\u00e6d sconde \u00a0\u00a0\u00a0\u00a0 scufan motan, \n ne in b\u00e6lbl\u00e6san \u00a0\u00a0\u00a0\u00a0 bregdon on hinder\n in helle hus, \u00a0\u00a0\u00a0\u00a0 \u00fe\u00e6r eow is ham sceapen,\n sweart sinnehte, \u00a0\u00a0\u00a0\u00a0 sacu butan ende,\n grim g\u00e6stcwalu. \u00a0\u00a0\u00a0\u00a0 \u00fe\u00e6r ge gnornende\n- 680\n- \n dea\u00f0 sceolon dreogan, \u00a0\u00a0\u00a0\u00a0 ond ic dreama wyn \n agan mid englum \u00a0\u00a0\u00a0\u00a0 in \u00feam uplican\n rodera rice, \u00a0\u00a0\u00a0\u00a0 \u00fe\u00e6r is ryht cyning,\n help ond h\u00e6lu \u00a0\u00a0\u00a0\u00a0 h\u00e6le\u00fea cynne,\n dugu\u00f0 ond drohta\u00f0.\" \u00a0\u00a0\u00a0\u00a0 \u00f0a cwom dryhtnes ar,\n- 685\n- \n halig of heofonum, \u00a0\u00a0\u00a0\u00a0 se \u00feurh hleo\u00feor abead \n ufancundne ege \u00a0\u00a0\u00a0\u00a0 earmum g\u00e6stum;\n het eft hra\u00f0e \u00a0\u00a0\u00a0\u00a0 unscyldigne\n of \u00feam wr\u00e6csi\u00f0e \u00a0\u00a0\u00a0\u00a0 wuldres cempan\n l\u00e6dan limhalne, \u00a0\u00a0\u00a0\u00a0 \u00fe\u00e6t se leofesta\n- 690\n- \n g\u00e6st gegearwad \u00a0\u00a0\u00a0\u00a0 in godes w\u00e6re \n on gefean ferde. \u00a0\u00a0\u00a0\u00a0 \u00f0a wear\u00f0 feonda \u00fereat\n acol for \u00f0am egsan. \u00a0\u00a0\u00a0\u00a0 Oferm\u00e6cga spr\u00e6c,\n dyre dryhtnes \u00feegn, \u00a0\u00a0\u00a0\u00a0 d\u00e6ghluttre scan.\n H\u00e6fde Gu\u00f0laces \u00a0\u00a0\u00a0\u00a0 g\u00e6st in gewealdum\n- 695\n- \n modig mundbora, \u00a0\u00a0\u00a0\u00a0 meahtum spedig, \n \u00feeostra \u00feegnas \u00a0\u00a0\u00a0\u00a0 \u00fereaniedlum bond,\n nyd onsette \u00a0\u00a0\u00a0\u00a0 ond geneahhe bibead:\n \"Ne sy him banes bryce \u00a0\u00a0\u00a0\u00a0 ne blodig wund,\n lices l\u00e6la \u00a0\u00a0\u00a0\u00a0 ne la\u00fees wiht,\n- 700\n- \n \u00fe\u00e6s \u00fee ge him to dare \u00a0\u00a0\u00a0\u00a0 gedon motan, \n ac ge hine gesundne asetta\u00fe \u00a0\u00a0\u00a0\u00a0 \u00fe\u00e6r ge hine sylfne genoman.\n He sceal \u00fey wonge wealdan, \u00a0\u00a0\u00a0\u00a0 ne magon ge him \u00fea wic forstondan.\n Ic eom se dema, \u00a0\u00a0\u00a0\u00a0 se mec dryhten heht\n snude gesecgan, \u00a0\u00a0\u00a0\u00a0 \u00fe\u00e6t ge him sara gehwylc\n- 705\n- \n hondum geh\u00e6lde, \u00a0\u00a0\u00a0\u00a0 ond him hearsume \n on his sylfes dom \u00a0\u00a0\u00a0\u00a0 si\u00fe\u00fean w\u00e6ron.\n Ne sceal ic mine onsyn \u00a0\u00a0\u00a0\u00a0 fore eowere\n mengu mi\u00fean. \u00a0\u00a0\u00a0\u00a0 Ic eom meotudes \u00feegn.\n Eom ic \u00feara twelfa sum \u00a0\u00a0\u00a0\u00a0 \u00fee he getreoweste\n- 710\n- \n under monnes hiw \u00a0\u00a0\u00a0\u00a0 mode gelufade. \n He mec of heofonum \u00a0\u00a0\u00a0\u00a0 hider onsende,\n geseah \u00fe\u00e6t ge on eor\u00f0an \u00a0\u00a0\u00a0\u00a0 fore \u00e6fstum\n on his wergengan \u00a0\u00a0\u00a0\u00a0 wite legdon.\n Is \u00fe\u00e6t min bro\u00feor, \u00a0\u00a0\u00a0\u00a0 mec his bysgu gehreaw.\n- 715\n- \n Ic \u00fe\u00e6t gefremme, \u00a0\u00a0\u00a0\u00a0 \u00fe\u00e6r se freond wuna\u00f0 \n on \u00fe\u00e6re socne, \u00a0\u00a0\u00a0\u00a0 \u00fee ic \u00fea sibbe wi\u00f0 hine\n healdan wille, \u00a0\u00a0\u00a0\u00a0 nu ic his helpan mot,\n \u00fe\u00e6t ge min onsynn \u00a0\u00a0\u00a0\u00a0 oft sceawia\u00f0.\n Nu ic his geneahhe \u00a0\u00a0\u00a0\u00a0 neosan wille;\n- 720\n- \n sceal ic his word ond his weorc \u00a0\u00a0\u00a0\u00a0 in gewitnesse \n dryhtne l\u00e6don. \u00a0\u00a0\u00a0\u00a0 He his d\u00e6de conn.\"\n \u00f0a w\u00e6s Gu\u00f0laces \u00a0\u00a0\u00a0\u00a0 g\u00e6st geblissad,\n si\u00fe\u00fean Bartholomeus \u00a0\u00a0\u00a0\u00a0 aboden h\u00e6fde\n godes \u00e6rendu. \u00a0\u00a0\u00a0\u00a0 Gearwe stodun\n- 725\n- \n h\u00e6ftas hearsume, \u00a0\u00a0\u00a0\u00a0 \u00fea \u00fe\u00e6s halgan word \n lyt oferleordun. \u00a0\u00a0\u00a0\u00a0 Ongon \u00fea leofne si\u00f0\n dragan domeadig \u00a0\u00a0\u00a0\u00a0 dryhtnes cempa\n to \u00feam onwillan \u00a0\u00a0\u00a0\u00a0 eor\u00f0an d\u00e6le.\n Hy hine b\u00e6ron \u00a0\u00a0\u00a0\u00a0 ond him bryce heoldon,\n- 730\n- \n hofon hine hondum \u00a0\u00a0\u00a0\u00a0 ond him hryre burgun. \n W\u00e6ron hyra gongas \u00a0\u00a0\u00a0\u00a0 under godes egsan\n sme\u00fee ond gesefte. \u00a0\u00a0\u00a0\u00a0 Sigehre\u00f0ig cwom\n bytla to \u00feam beorge. \u00a0\u00a0\u00a0\u00a0 Hine bletsadon\n monge m\u00e6gwlitas, \u00a0\u00a0\u00a0\u00a0 meaglum reordum,\n- 735\n- \n treofugla tuddor, \u00a0\u00a0\u00a0\u00a0 tacnum cy\u00f0don \n eadges eftcyme. \u00a0\u00a0\u00a0\u00a0 Oft he him \u00e6te heold,\n \u00feonne hy him hungrige \u00a0\u00a0\u00a0\u00a0 ymb hond flugon\n gr\u00e6dum gifre, \u00a0\u00a0\u00a0\u00a0 geoce gefegon.\n Swa \u00fe\u00e6t milde mod \u00a0\u00a0\u00a0\u00a0 wi\u00f0 moncynnes\n- 740\n- \n dreamum ged\u00e6lde, \u00a0\u00a0\u00a0\u00a0 dryhtne \u00feeowde, \n genom him to wildeorum wynne, \u00a0\u00a0\u00a0\u00a0 si\u00fe\u00fean he \u00feas woruld forhogde.\n Smolt w\u00e6s se sigewong \u00a0\u00a0\u00a0\u00a0 ond sele niwe,\n f\u00e6ger fugla reord, \u00a0\u00a0\u00a0\u00a0 folde geblowen;\n geacas gear budon. \u00a0\u00a0\u00a0\u00a0 Gu\u00felac moste\n- 745\n- \n eadig ond onmod \u00a0\u00a0\u00a0\u00a0 eardes brucan. \n Stod se grena wong \u00a0\u00a0\u00a0\u00a0 in godes w\u00e6re;\n h\u00e6fde se heorde, \u00a0\u00a0\u00a0\u00a0 se \u00fee of heofonum cwom,\n feondas afyrde. \u00a0\u00a0\u00a0\u00a0 Hwylc w\u00e6s f\u00e6gerra\n willa geworden \u00a0\u00a0\u00a0\u00a0 in wera life,\n- 750\n- \n \u00feara \u00fee yldran \u00a0\u00a0\u00a0\u00a0 usse gemunde, \n o\u00fe\u00fee we selfe \u00a0\u00a0\u00a0\u00a0 si\u00fe\u00fean cu\u00feen?\n Hw\u00e6t we \u00feissa wundra \u00a0\u00a0\u00a0\u00a0 gewitan sindon!\n Eall \u00feas geeodon \u00a0\u00a0\u00a0\u00a0 in ussera\n tida timan. \u00a0\u00a0\u00a0\u00a0 For\u00feon \u00fe\u00e6s tweogan ne \u00feearf\n- 755\n- \n \u00e6nig ofer eor\u00f0an \u00a0\u00a0\u00a0\u00a0 \u00e6lda cynnes, \n ac swilc god wyrce\u00f0 \u00a0\u00a0\u00a0\u00a0 g\u00e6sta lifes\n to trumna\u00fee, \u00a0\u00a0\u00a0\u00a0 \u00fey l\u00e6s \u00fea tydran mod\n \u00fea gewitnesse \u00a0\u00a0\u00a0\u00a0 wendan \u00feurfe,\n \u00feonne hy in gesih\u00fee \u00a0\u00a0\u00a0\u00a0 so\u00fees bruca\u00f0.\n- 760\n- \n Swa se \u00e6lmihtiga \u00a0\u00a0\u00a0\u00a0 ealle gesceafte \n lufa\u00f0 under lyfte \u00a0\u00a0\u00a0\u00a0 in lichoman,\n monna m\u00e6g\u00f0e \u00a0\u00a0\u00a0\u00a0 geond middangeard.\n Wile se waldend \u00a0\u00a0\u00a0\u00a0 \u00fe\u00e6t we wisdom a\n snyttrum swelgen, \u00a0\u00a0\u00a0\u00a0 \u00fe\u00e6t his so\u00f0 fore us\n- 765\n- \n on his giefena gyld \u00a0\u00a0\u00a0\u00a0 genge weor\u00f0e, \n \u00f0a he us to are \u00a0\u00a0\u00a0\u00a0 ond to ondgiete\n syle\u00f0 ond sende\u00f0, \u00a0\u00a0\u00a0\u00a0 sawlum ryme\u00f0\n li\u00fee lifwegas \u00a0\u00a0\u00a0\u00a0 leohte ger\u00e6hte.\n Nis \u00fe\u00e6t huru l\u00e6sast \u00a0\u00a0\u00a0\u00a0 \u00fe\u00e6t seo lufu cy\u00fee\u00f0,\n- 770\n- \n \u00feonne heo in monnes \u00a0\u00a0\u00a0\u00a0 mode getimbre\u00f0 \n g\u00e6stcunde gife, \u00a0\u00a0\u00a0\u00a0 swa he Gu\u00f0laces\n dagas ond d\u00e6de \u00a0\u00a0\u00a0\u00a0 \u00feurh his dom ahof.\n W\u00e6s se fruma f\u00e6stlic \u00a0\u00a0\u00a0\u00a0 feondum on ondan,\n geseted wi\u00f0 synnum, \u00a0\u00a0\u00a0\u00a0 \u00fe\u00e6r he si\u00fe\u00fean lyt\n- 775\n- \n w\u00e6re gewonade, \u00a0\u00a0\u00a0\u00a0 oft his word gode \n \u00feurh ea\u00f0medu \u00a0\u00a0\u00a0\u00a0 up onsende,\n let his ben cuman \u00a0\u00a0\u00a0\u00a0 in \u00fea beorhtan gesceaft,\n \u00feoncade \u00feeodne \u00a0\u00a0\u00a0\u00a0 \u00fe\u00e6s \u00fee he in \u00ferowingum\n bidan moste, \u00a0\u00a0\u00a0\u00a0 hwonne him betre lif\n- 780\n- \n \u00feurh godes willan \u00a0\u00a0\u00a0\u00a0 agyfen wurde. \n Swa w\u00e6s Gu\u00f0laces \u00a0\u00a0\u00a0\u00a0 g\u00e6st gel\u00e6ded\n engla f\u00e6\u00f0mum \u00a0\u00a0\u00a0\u00a0 in uprodor,\n fore onsyne \u00a0\u00a0\u00a0\u00a0 eces deman\n l\u00e6ddon leoflice. \u00a0\u00a0\u00a0\u00a0 Him w\u00e6s lean geseald,\n- 785\n- \n setl on swegle, \u00a0\u00a0\u00a0\u00a0 \u00fe\u00e6r he symle mot \n awo to ealdre \u00a0\u00a0\u00a0\u00a0 eardf\u00e6st wesan,\n bli\u00f0e bidan. \u00a0\u00a0\u00a0\u00a0 Is him bearn godes\n milde mundbora, \u00a0\u00a0\u00a0\u00a0 meahtig dryhten,\n halig hyrde, \u00a0\u00a0\u00a0\u00a0 heofonrices weard.\n- 790\n- \n Swa so\u00f0f\u00e6stra \u00a0\u00a0\u00a0\u00a0 sawla motun \n in ecne geard \u00a0\u00a0\u00a0\u00a0 up gestigan\n rodera rice, \u00a0\u00a0\u00a0\u00a0 \u00fea \u00fee r\u00e6fna\u00f0 her\n wordum ond weorcum \u00a0\u00a0\u00a0\u00a0 wuldorcyninges\n lare longsume, \u00a0\u00a0\u00a0\u00a0 on hyra lifes tid\n- 795\n- \n earnia\u00f0 on eor\u00f0an \u00a0\u00a0\u00a0\u00a0 ecan lifes, \n hames in heah\u00feu. \u00a0\u00a0\u00a0\u00a0 \u00fe\u00e6t beo\u00f0 husulweras,\n cempan gecorene, \u00a0\u00a0\u00a0\u00a0 Criste leofe,\n bera\u00f0 in breostum \u00a0\u00a0\u00a0\u00a0 beorhtne geleafan,\n haligne hyht, \u00a0\u00a0\u00a0\u00a0 heortan cl\u00e6ne\n- 800\n- \n weor\u00f0ia\u00f0 waldend, \u00a0\u00a0\u00a0\u00a0 habba\u00f0 wisne ge\u00feoht, \n fusne on for\u00f0weg \u00a0\u00a0\u00a0\u00a0 to f\u00e6der e\u00f0le,\n gearwa\u00fe g\u00e6stes hus, \u00a0\u00a0\u00a0\u00a0 ond mid gleawnesse\n feond oferfeohta\u00f0 \u00a0\u00a0\u00a0\u00a0 ond firenlustas\n forbera\u00f0 in breostum, \u00a0\u00a0\u00a0\u00a0 bro\u00feorsibbe\n- 805\n- \n georne bigonga\u00f0, \u00a0\u00a0\u00a0\u00a0 in godes willan \n swenca\u00f0 hi sylfe, \u00a0\u00a0\u00a0\u00a0 sawle fr\u00e6twa\u00f0\n halgum gehygdum, \u00a0\u00a0\u00a0\u00a0 heofoncyninges bibod\n fremma\u00f0 on foldan. \u00a0\u00a0\u00a0\u00a0 F\u00e6sten lufia\u00f0,\n beorga\u00f0 him bealoni\u00fe \u00a0\u00a0\u00a0\u00a0 ond gebedu seca\u00f0,\n- 810\n- \n swinca\u00f0 wi\u00f0 synnum, \u00a0\u00a0\u00a0\u00a0 healda\u00f0 so\u00f0 ond ryht. \n Him \u00fe\u00e6t ne hreowe\u00f0 \u00a0\u00a0\u00a0\u00a0 \u00e6fter hingonge,\n \u00f0onne hy hweorfa\u00f0 \u00a0\u00a0\u00a0\u00a0 in \u00fea halgan burg,\n gonga\u00f0 gegnunga \u00a0\u00a0\u00a0\u00a0 to Hierusalem,\n \u00fe\u00e6r hi to worulde \u00a0\u00a0\u00a0\u00a0 wynnum motun\n- 815\n- \n godes onsyne \u00a0\u00a0\u00a0\u00a0 georne bihealdan, \n sibbe ond gesih\u00f0e, \u00a0\u00a0\u00a0\u00a0 \u00fe\u00e6r heo so\u00f0 wuna\u00f0,\n wlitig, wuldorf\u00e6st, \u00a0\u00a0\u00a0\u00a0 ealne widan ferh\n on lifgendra \u00a0\u00a0\u00a0\u00a0 londes wynne.\n \u00f0\u00e6t is wide cu\u00f0 \u00a0\u00a0\u00a0\u00a0 wera cneorissum,\n- 820\n- \n folcum gefr\u00e6ge, \u00a0\u00a0\u00a0\u00a0 \u00fe\u00e6tte frym\u00fea god \n \u00feone \u00e6restan \u00a0\u00a0\u00a0\u00a0 \u00e6lda cynnes\n of \u00fe\u00e6re cl\u00e6nestan, \u00a0\u00a0\u00a0\u00a0 cyning \u00e6lmihtig,\n foldan geworhte. \u00a0\u00a0\u00a0\u00a0 \u00f0a w\u00e6s fruma niwe\n elda tudres, \u00a0\u00a0\u00a0\u00a0 onst\u00e6l wynlic,\n- 825\n- \n f\u00e6ger ond gefealic. \u00a0\u00a0\u00a0\u00a0 F\u00e6der w\u00e6s acenned \n Adam \u00e6rest \u00a0\u00a0\u00a0\u00a0 \u00feurh est godes\n on neorxnawong, \u00a0\u00a0\u00a0\u00a0 \u00fe\u00e6r him n\u00e6nges w\u00e6s\n willan onsyn, \u00a0\u00a0\u00a0\u00a0 ne welan brosnung,\n ne lifes lyre \u00a0\u00a0\u00a0\u00a0 ne lices hryre,\n- 830\n- \n ne dreames dryre \u00a0\u00a0\u00a0\u00a0 ne dea\u00f0es cyme, \n ac he on \u00feam lande \u00a0\u00a0\u00a0\u00a0 lifgan moste\n ealra leahtra leas, \u00a0\u00a0\u00a0\u00a0 longe neotan\n niwra gefeana. \u00a0\u00a0\u00a0\u00a0 \u00fe\u00e6r he no \u00feorfte\n lifes ne lissa \u00a0\u00a0\u00a0\u00a0 in \u00feam leohtan ham\n- 835\n- \n \u00feurh \u00e6lda tid \u00a0\u00a0\u00a0\u00a0 ende gebidan, \n ac \u00e6fter fyrste \u00a0\u00a0\u00a0\u00a0 to \u00feam f\u00e6restan\n heofonrices gefean \u00a0\u00a0\u00a0\u00a0 hweorfan mostan,\n leomu lic somud \u00a0\u00a0\u00a0\u00a0 ond lifes g\u00e6st,\n ond \u00fe\u00e6r si\u00fe\u00fean a \u00a0\u00a0\u00a0\u00a0 in sindreamum\n- 840\n- \n to widan feore \u00a0\u00a0\u00a0\u00a0 wunian mostun \n dryhtne on gesih\u00f0e, \u00a0\u00a0\u00a0\u00a0 butan dea\u00f0e for\u00f0,\n gif hy halges word \u00a0\u00a0\u00a0\u00a0 healdan woldun\n beorht in breostum, \u00a0\u00a0\u00a0\u00a0 ond his bebodu l\u00e6stan,\n \u00e6fnan on e\u00f0le. \u00a0\u00a0\u00a0\u00a0 Hy to \u00e6r a\u00fereat\n- 845\n- \n \u00fe\u00e6t hy waldendes \u00a0\u00a0\u00a0\u00a0 willan l\u00e6sten, \n ac his wif genom \u00a0\u00a0\u00a0\u00a0 wyrmes larum\n blede forbodene, \u00a0\u00a0\u00a0\u00a0 ond of beame ahneop\n w\u00e6stm biweredne \u00a0\u00a0\u00a0\u00a0 ofer word godes,\n wuldorcyninges, \u00a0\u00a0\u00a0\u00a0 ond hyre were sealde\n- 850\n- \n \u00feurh deofles searo \u00a0\u00a0\u00a0\u00a0 dea\u00f0berende gyfl \n \u00fe\u00e6t \u00f0a sinhiwan \u00a0\u00a0\u00a0\u00a0 to swylte geteah.\n Si\u00fe\u00fean se e\u00feel \u00a0\u00a0\u00a0\u00a0 u\u00f0genge wear\u00f0\n Adame ond Euan, \u00a0\u00a0\u00a0\u00a0 eardwica cyst\n beorht o\u00f0broden, \u00a0\u00a0\u00a0\u00a0 ond hyra bearnum swa,\n- 855\n- \n eaferum \u00e6fter, \u00a0\u00a0\u00a0\u00a0 \u00fea hy on uncy\u00f0\u00f0u, \n scomum scudende, \u00a0\u00a0\u00a0\u00a0 scofene wurdon\n on gewinworuld. \u00a0\u00a0\u00a0\u00a0 Weorces onguldon,\n deopra firena, \u00a0\u00a0\u00a0\u00a0 \u00feurh dea\u00f0es cwealm,\n \u00fee hy unsnyttrum \u00a0\u00a0\u00a0\u00a0 \u00e6r gefremedon.\n- 860\n- \n \u00fe\u00e6re synwr\u00e6ce \u00a0\u00a0\u00a0\u00a0 si\u00fe\u00fean sceoldon \n m\u00e6g\u00f0 ond m\u00e6cgas \u00a0\u00a0\u00a0\u00a0 mor\u00feres ongyldon,\n godscyldge gyrn \u00a0\u00a0\u00a0\u00a0 \u00feurh g\u00e6stgedal,\n deopra firena. \u00a0\u00a0\u00a0\u00a0 Dea\u00f0 in ge\u00ferong\n fira cynne, \u00a0\u00a0\u00a0\u00a0 feond rixade\n- 865\n- \n geond middangeard. \u00a0\u00a0\u00a0\u00a0 N\u00e6nig monna w\u00e6s \n of \u00feam sigetudre \u00a0\u00a0\u00a0\u00a0 si\u00fe\u00fean \u00e6fre\n godes willan \u00fe\u00e6s georn, \u00a0\u00a0\u00a0\u00a0 ne gynnwised,\n \u00fe\u00e6t he bibugan m\u00e6ge \u00a0\u00a0\u00a0\u00a0 \u00feone bitran drync\n \u00feone Eue fyrn \u00a0\u00a0\u00a0\u00a0 Adame geaf,\n- 870\n- \n byrelade bryd geong; \u00a0\u00a0\u00a0\u00a0 \u00fe\u00e6t him bam gescod \n in \u00feam deoran ham. \u00a0\u00a0\u00a0\u00a0 Dea\u00f0 ricsade\n ofer foldbuend, \u00a0\u00a0\u00a0\u00a0 \u00feeah \u00fee fela w\u00e6re\n g\u00e6sthaligra, \u00a0\u00a0\u00a0\u00a0 \u00fe\u00e6r hi godes willan\n on mislicum \u00a0\u00a0\u00a0\u00a0 monna gebih\u00feum\n- 875\n- \n \u00e6fter stedewonga \u00a0\u00a0\u00a0\u00a0 stowum fremedon; \n sume \u00e6r, sume si\u00f0, \u00a0\u00a0\u00a0\u00a0 sume in urra\n \u00e6fter t\u00e6lmearce \u00a0\u00a0\u00a0\u00a0 tida gemyndum\n sigorlean sohtun. \u00a0\u00a0\u00a0\u00a0 Us secga\u00f0 bec\n hu Gu\u00f0lac wear\u00f0 \u00a0\u00a0\u00a0\u00a0 \u00feurh godes willan\n- 880\n- \n eadig on Engle. \u00a0\u00a0\u00a0\u00a0 He him ece geceas \n meaht ond mundbyrd. \u00a0\u00a0\u00a0\u00a0 M\u00e6re wurdon\n his wundra geweorc \u00a0\u00a0\u00a0\u00a0 wide ond side,\n breme \u00e6fter burgum \u00a0\u00a0\u00a0\u00a0 geond Bryten innan,\n hu he monge oft \u00a0\u00a0\u00a0\u00a0 \u00feurh meaht godes\n- 885\n- \n geh\u00e6lde hygegeomre \u00a0\u00a0\u00a0\u00a0 hefigra wita, \n \u00fee hine unsofte, \u00a0\u00a0\u00a0\u00a0 adle gebundne,\n sarge gesohtun \u00a0\u00a0\u00a0\u00a0 of si\u00f0wegum,\n freorigmode. \u00a0\u00a0\u00a0\u00a0 Symle frofre \u00fe\u00e6r\n \u00e6t \u00feam godes cempan \u00a0\u00a0\u00a0\u00a0 gearwe fundon,\n- 890\n- \n helpe ond h\u00e6lo. \u00a0\u00a0\u00a0\u00a0 N\u00e6nig h\u00e6le\u00fea is \n \u00fee areccan m\u00e6ge \u00a0\u00a0\u00a0\u00a0 o\u00fe\u00fee rim wite\n ealra \u00feara wundra \u00a0\u00a0\u00a0\u00a0 \u00fee he in worulde her\n \u00feurh dryhtnes giefe \u00a0\u00a0\u00a0\u00a0 duge\u00feum gefremede.\n Oft to \u00feam wicum \u00a0\u00a0\u00a0\u00a0 weorude cwomun\n- 895\n- \n deofla dea\u00f0m\u00e6gen \u00a0\u00a0\u00a0\u00a0 dugu\u00fea byscyrede \n hlo\u00feum \u00feringan, \u00a0\u00a0\u00a0\u00a0 \u00fe\u00e6r se halga \u00feeow\n elnes anhydig \u00a0\u00a0\u00a0\u00a0 eard weardade.\n \u00fe\u00e6r hy mislice \u00a0\u00a0\u00a0\u00a0 mongum reordum\n on \u00feam westenne \u00a0\u00a0\u00a0\u00a0 wo\u00f0e hofun\n- 900\n- \n hludne herecirm, \u00a0\u00a0\u00a0\u00a0 hiwes binotene, \n dreamum bidrorene. \u00a0\u00a0\u00a0\u00a0 Dryhtnes cempa,\n from folctoga, \u00a0\u00a0\u00a0\u00a0 feonda \u00fereatum\n wi\u00f0stod stronglice. \u00a0\u00a0\u00a0\u00a0 N\u00e6s seo stund latu\n earmra g\u00e6sta, \u00a0\u00a0\u00a0\u00a0 ne \u00fe\u00e6t onbid long,\n- 905\n- \n \u00fe\u00e6t \u00fea wrohtsmi\u00f0as \u00a0\u00a0\u00a0\u00a0 wop ahofun, \n hreopun hre\u00f0lease, \u00a0\u00a0\u00a0\u00a0 hleo\u00ferum brugdon.\n Hwilum wedende \u00a0\u00a0\u00a0\u00a0 swa wilde deor\n cirmdon on cor\u00f0re, \u00a0\u00a0\u00a0\u00a0 hwilum cyrdon eft\n minne manscea\u00fean \u00a0\u00a0\u00a0\u00a0 on mennisc hiw\n- 910\n- \n breahtma m\u00e6ste, \u00a0\u00a0\u00a0\u00a0 hwilum brugdon eft \n awyrgde w\u00e6rlogan \u00a0\u00a0\u00a0\u00a0 on wyrmes bleo,\n earme adloman \u00a0\u00a0\u00a0\u00a0 attre spiowdon.\n Symle hy Gu\u00f0lac \u00a0\u00a0\u00a0\u00a0 gearene fundon,\n \u00feonces gleawne. \u00a0\u00a0\u00a0\u00a0 He ge\u00feyldum bad,\n- 915\n- \n \u00feeah him feonda hlo\u00f0 \u00a0\u00a0\u00a0\u00a0 feorhcwealm bude. \n Hwilum him to honda \u00a0\u00a0\u00a0\u00a0 hungre ge\u00fereatad\n fleag fugla cyn, \u00a0\u00a0\u00a0\u00a0 \u00fe\u00e6r hy feorhnere\n witude fundon \u00a0\u00a0\u00a0\u00a0 ond hine weor\u00f0edon\n meaglum stefnum. \u00a0\u00a0\u00a0\u00a0 Hwilum mennisce\n- 920\n- \n aras ea\u00f0medum \u00a0\u00a0\u00a0\u00a0 eft neosedon, \n ond \u00fe\u00e6r si\u00f0frome \u00a0\u00a0\u00a0\u00a0 on \u00feam sigewonge\n \u00e6t \u00feam halgan \u00feeowan \u00a0\u00a0\u00a0\u00a0 helpe gemetton,\n fer\u00f0\u00fees frofre. \u00a0\u00a0\u00a0\u00a0 N\u00e6nig for\u00feum w\u00e6s,\n \u00fe\u00e6t he \u00e6wiscmod \u00a0\u00a0\u00a0\u00a0 eft si\u00f0ade,\n- 925\n- \n hean, hyhta leas, \u00a0\u00a0\u00a0\u00a0 ac se halga wer \n \u00e6lda gehwylces \u00a0\u00a0\u00a0\u00a0 \u00feurh \u00fea \u00e6\u00feelan meaht,\n \u00fee hine seoslige \u00a0\u00a0\u00a0\u00a0 sohtun on \u00f0earfe,\n h\u00e6le\u00f0 hygegeomre, \u00a0\u00a0\u00a0\u00a0 h\u00e6lde bu tu\n lic ond sawle, \u00a0\u00a0\u00a0\u00a0 \u00feenden lifes weard,\n- 930\n- \n ece \u00e6lmihtig, \u00a0\u00a0\u00a0\u00a0 unnan wolde \n \u00fe\u00e6t he bl\u00e6des her \u00a0\u00a0\u00a0\u00a0 brucan moste,\n worulde lifes. \u00a0\u00a0\u00a0\u00a0 W\u00e6s gewinnes \u00fea\n yrm\u00fea for eor\u00f0an \u00a0\u00a0\u00a0\u00a0 endedogor\n \u00feurh nydgedal \u00a0\u00a0\u00a0\u00a0 neah ge\u00ferungen,\n- 935\n- \n si\u00fe\u00fean he on westenne \u00a0\u00a0\u00a0\u00a0 wiceard geceas, \n fiftynu gear, \u00a0\u00a0\u00a0\u00a0 \u00fea w\u00e6s frofre g\u00e6st\n eadgum \u00e6bodan \u00a0\u00a0\u00a0\u00a0 ufan onsended,\n halig of heah\u00feu. \u00a0\u00a0\u00a0\u00a0 Hre\u00feer innan born,\n afysed on for\u00f0si\u00f0. \u00a0\u00a0\u00a0\u00a0 Him f\u00e6ringa\n- 940\n- \n adl in gewod. \u00a0\u00a0\u00a0\u00a0 He on elne swa \u00feeah \n ungeblyged bad \u00a0\u00a0\u00a0\u00a0 beorhtra gehata\n bli\u00fee in burgum. \u00a0\u00a0\u00a0\u00a0 W\u00e6s \u00feam bancofan\n \u00e6fter nihtglome \u00a0\u00a0\u00a0\u00a0 neah ge\u00ferungen,\n breosthord onboren. \u00a0\u00a0\u00a0\u00a0 W\u00e6s se bli\u00fea g\u00e6st\n- 945\n- \n fus on for\u00f0weg. \u00a0\u00a0\u00a0\u00a0 Nolde f\u00e6der engla \n in \u00feisse wons\u00e6lgan \u00a0\u00a0\u00a0\u00a0 worulde life\n leahtra leasne \u00a0\u00a0\u00a0\u00a0 longfyrst ofer \u00fe\u00e6t\n wunian leton, \u00a0\u00a0\u00a0\u00a0 \u00fee him on weorcum her\n on his dagena tid \u00a0\u00a0\u00a0\u00a0 d\u00e6dum gecwemde\n- 950\n- \n elne unslawe. \u00a0\u00a0\u00a0\u00a0 \u00f0a se \u00e6lmihtiga \n let his hond cuman \u00a0\u00a0\u00a0\u00a0 \u00fe\u00e6r se halga \u00feeow,\n deormod on degle \u00a0\u00a0\u00a0\u00a0 domeadig bad,\n heard ond hygerof. \u00a0\u00a0\u00a0\u00a0 Hyht w\u00e6s geniwad,\n blis in breostum. \u00a0\u00a0\u00a0\u00a0 W\u00e6s se bancofa\n- 955\n- \n adle on\u00e6led, \u00a0\u00a0\u00a0\u00a0 inbendum f\u00e6st, \n lichord onlocen. \u00a0\u00a0\u00a0\u00a0 Leomu hefegedon,\n sarum gesohte. \u00a0\u00a0\u00a0\u00a0 He \u00fe\u00e6t so\u00f0 gecneow\n \u00fe\u00e6t hine \u00e6lmihtig \u00a0\u00a0\u00a0\u00a0 ufan neosade,\n meotud fore miltsum. \u00a0\u00a0\u00a0\u00a0 He his modsefan\n- 960\n- \n wi\u00f0 \u00feam f\u00e6rhagan \u00a0\u00a0\u00a0\u00a0 f\u00e6ste trymede \n feonda gewinna. \u00a0\u00a0\u00a0\u00a0 N\u00e6s he forht se\u00feeah,\n ne seo adl\u00feracu \u00a0\u00a0\u00a0\u00a0 egle on mode,\n ne dea\u00f0gedal, \u00a0\u00a0\u00a0\u00a0 ac him dryhtnes lof\n born in breostum, \u00a0\u00a0\u00a0\u00a0 brondhat lufu\n- 965\n- \n sigorf\u00e6st in sefan, \u00a0\u00a0\u00a0\u00a0 seo him sara gehwylc \n symle forswi\u00f0de. \u00a0\u00a0\u00a0\u00a0 N\u00e6s him sorgcearu\n on \u00feas l\u00e6nan tid, \u00a0\u00a0\u00a0\u00a0 \u00feeah his lic ond g\u00e6st\n hyra somwiste, \u00a0\u00a0\u00a0\u00a0 sinhiwan tu,\n deore ged\u00e6lden. \u00a0\u00a0\u00a0\u00a0 Dagas for\u00f0 scridun,\n- 970\n- \n nihthelma genipu. \u00a0\u00a0\u00a0\u00a0 W\u00e6s neah seo tid \n \u00fe\u00e6t he fyrngewyrht \u00a0\u00a0\u00a0\u00a0 fyllan sceolde\n \u00feurh dea\u00f0es cyme, \u00a0\u00a0\u00a0\u00a0 domes hleotan,\n efne \u00fe\u00e6s ilcan \u00a0\u00a0\u00a0\u00a0 \u00fee usse yldran fyrn\n frecne onfengon, \u00a0\u00a0\u00a0\u00a0 swa him biforan worhton\n- 975\n- \n \u00fea \u00e6restan \u00a0\u00a0\u00a0\u00a0 \u00e6lda cynnes. \n \u00f0a w\u00e6s Gu\u00f0lace \u00a0\u00a0\u00a0\u00a0 on \u00fea geocran tid\n m\u00e6gen geme\u00f0gad, \u00a0\u00a0\u00a0\u00a0 mod swi\u00fee heard,\n elnes anhydig. \u00a0\u00a0\u00a0\u00a0 W\u00e6s seo adl \u00feearl,\n hat ond heorogrim. \u00a0\u00a0\u00a0\u00a0 Hre\u00feer innan weol,\n- 980\n- \n born banloca. \u00a0\u00a0\u00a0\u00a0 Bry\u00feen w\u00e6s ongunnen \n \u00fe\u00e6tte Adame \u00a0\u00a0\u00a0\u00a0 Eue gebyrmde\n \u00e6t fruman worulde. \u00a0\u00a0\u00a0\u00a0 Feond byrlade\n \u00e6rest \u00fe\u00e6re idese, \u00a0\u00a0\u00a0\u00a0 ond heo Adame,\n hyre sw\u00e6sum were, \u00a0\u00a0\u00a0\u00a0 si\u00fe\u00fean scencte\n- 985\n- \n bittor b\u00e6deweg. \u00a0\u00a0\u00a0\u00a0 \u00fe\u00e6s \u00fea byre si\u00fe\u00fean \n grimme onguldon \u00a0\u00a0\u00a0\u00a0 gafulr\u00e6denne\n \u00feurh \u00e6rgewyrht, \u00a0\u00a0\u00a0\u00a0 \u00fe\u00e6tte \u00e6nig ne w\u00e6s\n fyra cynnes \u00a0\u00a0\u00a0\u00a0 from fruman si\u00f0\u00f0an\n mon on moldan, \u00a0\u00a0\u00a0\u00a0 \u00fe\u00e6tte meahte him\n- 990\n- \n gebeorgan ond bibugan \u00a0\u00a0\u00a0\u00a0 \u00feone bleatan drync, \n deopan dea\u00f0weges, \u00a0\u00a0\u00a0\u00a0 ac him duru sylfa\n on \u00fea sli\u00f0nan tid \u00a0\u00a0\u00a0\u00a0 sona ontyne\u00f0,\n ingong geopena\u00f0. \u00a0\u00a0\u00a0\u00a0 Ne m\u00e6g \u00e6nig \u00feam\n fl\u00e6sce bifongen \u00a0\u00a0\u00a0\u00a0 feore wi\u00f0stondan,\n- 995\n- \n ricra ne heanra, \u00a0\u00a0\u00a0\u00a0 ac hine r\u00e6se\u00f0 on \n gifrum grapum. \u00a0\u00a0\u00a0\u00a0 Swa w\u00e6s Gu\u00f0lace\n enge anhoga \u00a0\u00a0\u00a0\u00a0 \u00e6tryhte \u00fea\n \u00e6fter nihtscuan \u00a0\u00a0\u00a0\u00a0 neah ge\u00feyded,\n wiga w\u00e6lgifre. \u00a0\u00a0\u00a0\u00a0 Hine wunade mid\n- 1000\n- \n an ombeht\u00feegn, \u00a0\u00a0\u00a0\u00a0 se hine \u00e6ghwylce \n daga neosade. \u00a0\u00a0\u00a0\u00a0 Ongan \u00f0a deophydig,\n gleawmod gongan \u00a0\u00a0\u00a0\u00a0 to godes temple,\n \u00fe\u00e6r he e\u00feelbodan \u00a0\u00a0\u00a0\u00a0 inne wiste,\n \u00feone leofestan \u00a0\u00a0\u00a0\u00a0 lareow gecorenne,\n- 1005\n- \n ond \u00fea in eode \u00a0\u00a0\u00a0\u00a0 eadgum to spr\u00e6ce, \n wolde hyrcnigan \u00a0\u00a0\u00a0\u00a0 halges lara,\n mildes me\u00feelcwida. \u00a0\u00a0\u00a0\u00a0 Fonde \u00fea his mondryhten\n adlwerigne; \u00a0\u00a0\u00a0\u00a0 him \u00f0\u00e6t in gefeol\n hefig \u00e6t heortan. \u00a0\u00a0\u00a0\u00a0 Hygesorge w\u00e6g,\n- 1010\n- \n micle modceare. \u00a0\u00a0\u00a0\u00a0 Ongan \u00f0a his magu frignan: \n \"Hu gewear\u00f0 \u00fee \u00feus, \u00a0\u00a0\u00a0\u00a0 winedryhten min,\n f\u00e6der, freonda hleo, \u00a0\u00a0\u00a0\u00a0 fer\u00f0 gebysgad,\n nearwe geneged? \u00a0\u00a0\u00a0\u00a0 Ic n\u00e6fre \u00fee,\n \u00feeoden leofesta, \u00a0\u00a0\u00a0\u00a0 \u00feyslicne \u00e6r\n- 1015\n- \n gemette \u00feus me\u00f0ne. \u00a0\u00a0\u00a0\u00a0 Meaht \u00feu me\u00f0elcwidum \n worda gewealdan? \u00a0\u00a0\u00a0\u00a0 Is me on wene ge\u00feuht,\n \u00fe\u00e6t \u00fee untrymnes \u00a0\u00a0\u00a0\u00a0 adle gongum\n on \u00feisse nyhstan \u00a0\u00a0\u00a0\u00a0 niht bysgade,\n sarbennum gesoht. \u00a0\u00a0\u00a0\u00a0 \u00fe\u00e6t me sorgna is\n- 1020\n- \n hatost on hre\u00fere, \u00a0\u00a0\u00a0\u00a0 \u00e6r \u00feu hyge minne \n fer\u00f0 afrefre. \u00a0\u00a0\u00a0\u00a0 Wast \u00feu, freodryhten,\n hu \u00feeos adle scyle \u00a0\u00a0\u00a0\u00a0 ende gesettan?\"\n Him \u00fea si\u00f0 oncw\u00e6\u00f0, \u00a0\u00a0\u00a0\u00a0 sona ne meahte\n oro\u00f0 up geteon; \u00a0\u00a0\u00a0\u00a0 w\u00e6s him in bogen\n- 1025\n- \n bittor banco\u00fea. \u00a0\u00a0\u00a0\u00a0 Beald reordade \n eadig on elne, \u00a0\u00a0\u00a0\u00a0 ondcwis ageaf:\n \"Ic wille secgan \u00a0\u00a0\u00a0\u00a0 \u00fe\u00e6t me sar gehran,\n w\u00e6rc in gewod \u00a0\u00a0\u00a0\u00a0 in \u00f0isse wonnan niht,\n lichord onleac. \u00a0\u00a0\u00a0\u00a0 Leomu hefegia\u00f0,\n- 1030\n- \n sarum gesohte. \u00a0\u00a0\u00a0\u00a0 Sceal \u00feis sawelhus, \n f\u00e6ge fl\u00e6schoma, \u00a0\u00a0\u00a0\u00a0 fold\u00e6rne bi\u00feeaht,\n leomu lames ge\u00feacan, \u00a0\u00a0\u00a0\u00a0 legerbedde f\u00e6st\n wunian w\u00e6lr\u00e6ste. \u00a0\u00a0\u00a0\u00a0 Wiga neal\u00e6ce\u00f0,\n unl\u00e6t laces. \u00a0\u00a0\u00a0\u00a0 Ne bi\u00f0 \u00fe\u00e6s lengra swice\n- 1035\n- \n sawelgedales \u00a0\u00a0\u00a0\u00a0 \u00feonne seofon niht \n fyrstgemearces, \u00a0\u00a0\u00a0\u00a0 \u00fe\u00e6t min feorh heonan\n on \u00feisse eahte\u00fean \u00a0\u00a0\u00a0\u00a0 ende gesece\u00f0\n d\u00e6g scri\u00feende. \u00a0\u00a0\u00a0\u00a0 \u00feonne dogor beo\u00f0\n on moldwege \u00a0\u00a0\u00a0\u00a0 min for\u00f0 scri\u00feen,\n- 1040\n- \n sorg geswe\u00f0rad, \u00a0\u00a0\u00a0\u00a0 ond ic si\u00fe\u00fean mot \n fore meotudes cneowum \u00a0\u00a0\u00a0\u00a0 meorda hleotan,\n gingra geafena, \u00a0\u00a0\u00a0\u00a0 ond godes lomber\n in sindreamum \u00a0\u00a0\u00a0\u00a0 si\u00fe\u00fean awo\n for\u00f0 folgian; \u00a0\u00a0\u00a0\u00a0 is nu fus \u00f0ider\n- 1045\n- \n g\u00e6st si\u00fees georn. \u00a0\u00a0\u00a0\u00a0 Nu \u00feu gearwe const \n leoma lifgedal; \u00a0\u00a0\u00a0\u00a0 long is \u00feis onbid\n worulde lifes.\" \u00a0\u00a0\u00a0\u00a0 \u00f0a w\u00e6s wop ond heaf,\n geongum geocor sefa, \u00a0\u00a0\u00a0\u00a0 geomrende hyge,\n si\u00fe\u00fean he gehyrde \u00a0\u00a0\u00a0\u00a0 \u00fe\u00e6t se halga w\u00e6s\n- 1050\n- \n for\u00f0si\u00fees fus. \u00a0\u00a0\u00a0\u00a0 He \u00fe\u00e6s f\u00e6rspelles \n fore his mondryhtne \u00a0\u00a0\u00a0\u00a0 modsorge w\u00e6g,\n hefige \u00e6t heortan. \u00a0\u00a0\u00a0\u00a0 Hre\u00feer innan swearc,\n hyge hreowcearig, \u00a0\u00a0\u00a0\u00a0 \u00fe\u00e6s \u00fee his hlaford geseah\n ellorfusne. \u00a0\u00a0\u00a0\u00a0 He \u00fe\u00e6s onb\u00e6ru\n- 1055\n- \n habban ne meahte, \u00a0\u00a0\u00a0\u00a0 ac he hate let \n torn \u00feoliende \u00a0\u00a0\u00a0\u00a0 tearas geotan,\n weallan w\u00e6gdropan. \u00a0\u00a0\u00a0\u00a0 Wyrd ne meahte\n in f\u00e6gum leng \u00a0\u00a0\u00a0\u00a0 feorg gehealdan,\n deore fr\u00e6twe, \u00a0\u00a0\u00a0\u00a0 \u00feonne him gedemed w\u00e6s.\n- 1060\n- \n Ongeat g\u00e6sta halig \u00a0\u00a0\u00a0\u00a0 geomormodes \n drusendne hyge. \u00a0\u00a0\u00a0\u00a0 Ongan \u00fea dugu\u00fea hleo,\n gl\u00e6dmod gode leof, \u00a0\u00a0\u00a0\u00a0 geongran retan,\n wine leofestan \u00a0\u00a0\u00a0\u00a0 wordum negan:\n \"Ne beo \u00feu unrot, \u00a0\u00a0\u00a0\u00a0 \u00f0eah \u00feeos adl me\n- 1065\n- \n innan \u00e6le. \u00a0\u00a0\u00a0\u00a0 Nis me earfe\u00f0e \n to ge\u00feolianne \u00a0\u00a0\u00a0\u00a0 \u00feeodnes willan,\n dryhtnes mines, \u00a0\u00a0\u00a0\u00a0 ne ic \u00fe\u00e6s dea\u00f0es hafu\n on \u00feas seocnan tid \u00a0\u00a0\u00a0\u00a0 sorge on mode,\n ne ic me herehlo\u00f0e \u00a0\u00a0\u00a0\u00a0 helle \u00feegna\n- 1070\n- \n swi\u00f0e onsitte, \u00a0\u00a0\u00a0\u00a0 ne m\u00e6g synne on me \n facnes frumbearn \u00a0\u00a0\u00a0\u00a0 fyrene gest\u00e6lan,\n lices leahtor, \u00a0\u00a0\u00a0\u00a0 ac in lige sceolon\n sorgwylmum soden \u00a0\u00a0\u00a0\u00a0 sar wanian,\n wr\u00e6csi\u00f0 wepan, \u00a0\u00a0\u00a0\u00a0 wilna biscirede\n- 1075\n- \n in \u00feam dea\u00f0sele \u00a0\u00a0\u00a0\u00a0 dugu\u00f0a gehwylcre, \n lufena ond lissa. \u00a0\u00a0\u00a0\u00a0 Min \u00fe\u00e6t leofe bearn,\n ne beo \u00feu on sefan to seoc. \u00a0\u00a0\u00a0\u00a0 Ic eom si\u00fees fus\n upeard niman \u00a0\u00a0\u00a0\u00a0 edleana georn\n in \u00feam ecan gefean, \u00a0\u00a0\u00a0\u00a0 \u00e6rgewyrhtum\n- 1080\n- \n geseon sigora frean, \u00a0\u00a0\u00a0\u00a0 min \u00fe\u00e6t sw\u00e6se bearn. \n Nis me wracu ne gewin, \u00a0\u00a0\u00a0\u00a0 \u00fe\u00e6t ic wuldres god\n sece swegelcyning, \u00a0\u00a0\u00a0\u00a0 \u00fe\u00e6r is sib ond blis,\n domf\u00e6stra dream, \u00a0\u00a0\u00a0\u00a0 dryhten ondweard,\n \u00feam ic georne \u00a0\u00a0\u00a0\u00a0 g\u00e6stgerynum,\n- 1085\n- \n in \u00feas dreorgan tid \u00a0\u00a0\u00a0\u00a0 d\u00e6dum cwemde, \n mode ond m\u00e6gne. \u00a0\u00a0\u00a0\u00a0 Ic \u00fea meorde wat\n leahtorlease, \u00a0\u00a0\u00a0\u00a0 lean unhwilen,\n halig on heah\u00feu. \u00a0\u00a0\u00a0\u00a0 \u00fe\u00e6r min hyht myne\u00f0\n to gesecenne, \u00a0\u00a0\u00a0\u00a0 sawul funda\u00f0\n- 1090\n- \n of licfate \u00a0\u00a0\u00a0\u00a0 to \u00feam longan gefean \n in eadwelan. \u00a0\u00a0\u00a0\u00a0 Nis \u00fees e\u00feel me\n ne sar ne sorg. \u00a0\u00a0\u00a0\u00a0 Ic me sylfum wat\n \u00e6fter lices hryre \u00a0\u00a0\u00a0\u00a0 lean unhwilen.\"\n \u00f0a se wuldormaga \u00a0\u00a0\u00a0\u00a0 worda gestilde,\n- 1095\n- \n rof runwita; \u00a0\u00a0\u00a0\u00a0 w\u00e6s him r\u00e6ste neod, \n reonigmodum. \u00a0\u00a0\u00a0\u00a0 Rodor swamode\n ofer ni\u00f0\u00f0a bearn, \u00a0\u00a0\u00a0\u00a0 nihtrim scridon,\n deorc ofer duge\u00f0um. \u00a0\u00a0\u00a0\u00a0 \u00fea se d\u00e6g bicwom\n on \u00feam se lifgenda \u00a0\u00a0\u00a0\u00a0 in lichoman,\n- 1100\n- \n ece \u00e6lmihtig \u00a0\u00a0\u00a0\u00a0 \u00e6rist gefremede, \n dryhten mid dreame, \u00a0\u00a0\u00a0\u00a0 \u00f0a he of dea\u00f0e aras\n onwald of eor\u00f0an \u00a0\u00a0\u00a0\u00a0 in \u00fea eastortid,\n ealra \u00ferymma \u00ferym, \u00a0\u00a0\u00a0\u00a0 \u00f0reata m\u00e6stne\n to heofonum ahof, \u00a0\u00a0\u00a0\u00a0 \u00f0a he from helle astag.\n- 1105\n- \n Swa se eadga wer \u00a0\u00a0\u00a0\u00a0 in \u00fea \u00e6\u00feelan tid \n on \u00feone beorhtan d\u00e6g \u00a0\u00a0\u00a0\u00a0 blissum hremig,\n milde ond gemetf\u00e6st, \u00a0\u00a0\u00a0\u00a0 m\u00e6gen unsofte\n elne ge\u00e6fnde. \u00a0\u00a0\u00a0\u00a0 Aras \u00f0a eorla wynn,\n heard hygesnottor, \u00a0\u00a0\u00a0\u00a0 swa he hra\u00feost meahte,\n- 1110\n- \n me\u00f0e for \u00f0am miclan bysgum. \u00a0\u00a0\u00a0\u00a0 Ongon \u00fea his mod sta\u00feelian \n leohte geleafan, \u00a0\u00a0\u00a0\u00a0 lac ons\u00e6gde\n deophycgende \u00a0\u00a0\u00a0\u00a0 dryhtne to willan\n g\u00e6stgerynum \u00a0\u00a0\u00a0\u00a0 in godes temple,\n ond his \u00feegne ongon, \u00a0\u00a0\u00a0\u00a0 swa \u00feam \u00feeodne geras,\n- 1115\n- \n \u00feurh g\u00e6stes giefe \u00a0\u00a0\u00a0\u00a0 godspel bodian, \n secgan sigortacnum, \u00a0\u00a0\u00a0\u00a0 ond his sefan trymman\n wundrum to wuldre \u00a0\u00a0\u00a0\u00a0 in \u00fea wlitigan gesceaft\n to eadwelan, \u00a0\u00a0\u00a0\u00a0 swa he \u00e6r ne si\u00f0\n \u00e6fre to ealdre \u00a0\u00a0\u00a0\u00a0 o\u00f0re swylce\n- 1120\n- \n on \u00feas l\u00e6nan tid \u00a0\u00a0\u00a0\u00a0 lare gehyrde, \n ne swa deoplice \u00a0\u00a0\u00a0\u00a0 dryhtnes geryne\n \u00feurh menniscne \u00a0\u00a0\u00a0\u00a0 mu\u00f0 areccan\n on sidum sefan. \u00a0\u00a0\u00a0\u00a0 Him w\u00e6s so\u00fera ge\u00feuht\n \u00fe\u00e6t hit ufancundes \u00a0\u00a0\u00a0\u00a0 engles w\u00e6re\n- 1125\n- \n of swegldreamum, \u00a0\u00a0\u00a0\u00a0 swi\u00feor micle \n m\u00e6gen\u00feegnes word, \u00a0\u00a0\u00a0\u00a0 \u00feonne \u00e6niges monnes lar,\n wera ofer eor\u00f0an. \u00a0\u00a0\u00a0\u00a0 Him \u00fe\u00e6t wundra m\u00e6st\n gesewen \u00feuhte, \u00a0\u00a0\u00a0\u00a0 \u00fe\u00e6t swylc snyttrucr\u00e6ft\n \u00e6nges h\u00e6le\u00f0a her \u00a0\u00a0\u00a0\u00a0 hre\u00feer weardade,\n- 1130\n- \n dryhta bearna, \u00a0\u00a0\u00a0\u00a0 w\u00e6s \u00fe\u00e6s deoplic eall \n word ond wisdom, \u00a0\u00a0\u00a0\u00a0 ond \u00fe\u00e6s weres stihtung,\n mod ond m\u00e6gencr\u00e6ft, \u00a0\u00a0\u00a0\u00a0 \u00fee him meotud engla,\n g\u00e6sta geocend \u00a0\u00a0\u00a0\u00a0 forgiefen h\u00e6fde.\n W\u00e6ron feowere \u00f0a \u00a0\u00a0\u00a0\u00a0 for\u00f0 gewitene\n- 1135\n- \n dagas on rime, \u00a0\u00a0\u00a0\u00a0 \u00fe\u00e6s se dryhtnes \u00feegn \n on elne bad, \u00a0\u00a0\u00a0\u00a0 adle gebysgad,\n sarum geswenced. \u00a0\u00a0\u00a0\u00a0 Ne he sorge w\u00e6g\n geocorne sefan \u00a0\u00a0\u00a0\u00a0 g\u00e6stgedales,\n dreorigne hyge. \u00a0\u00a0\u00a0\u00a0 Dea\u00f0 neal\u00e6cte,\n- 1140\n- \n stop stalgongum, \u00a0\u00a0\u00a0\u00a0 strong ond hre\u00f0e \n sohte sawelhus. \u00a0\u00a0\u00a0\u00a0 Com se seofe\u00f0a d\u00e6g\n \u00e6ldum ondweard, \u00a0\u00a0\u00a0\u00a0 \u00fe\u00e6s \u00fee him in gesonc,\n hat, heortan neah, \u00a0\u00a0\u00a0\u00a0 hildescurum\n flacor flan\u00feracu, \u00a0\u00a0\u00a0\u00a0 feorhhord onleac,\n- 1145\n- \n searoc\u00e6gum gesoht. \u00a0\u00a0\u00a0\u00a0 Ongon \u00f0a snottor h\u00e6le, \n ar, onbeht\u00feegn, \u00a0\u00a0\u00a0\u00a0 \u00e6\u00feeles neosan\n to \u00feam halgan hofe, \u00a0\u00a0\u00a0\u00a0 fond \u00fea hlingendne\n fusne on for\u00f0si\u00fe \u00a0\u00a0\u00a0\u00a0 frean unwenne,\n g\u00e6sthaligne \u00a0\u00a0\u00a0\u00a0 in godes temple\n- 1150\n- \n soden sarwylmum. \u00a0\u00a0\u00a0\u00a0 W\u00e6s \u00fea sihste tid \n on midne d\u00e6g, \u00a0\u00a0\u00a0\u00a0 w\u00e6s his mondryhtne\n endedogor \u00a0\u00a0\u00a0\u00a0 \u00e6tryhte \u00fea.\n Nearwum gen\u00e6ged \u00a0\u00a0\u00a0\u00a0 nydcostingum,\n awrecen w\u00e6lpilum, \u00a0\u00a0\u00a0\u00a0 wlo ne meahte\n- 1155\n- \n oro\u00f0 up geteon, \u00a0\u00a0\u00a0\u00a0 ellenspr\u00e6ce \n hleo\u00feor ahebban. \u00a0\u00a0\u00a0\u00a0 Ongon \u00f0a hygegeomor,\n freorig ond fer\u00f0werig, \u00a0\u00a0\u00a0\u00a0 fusne gretan,\n me\u00f0ne modgl\u00e6dne, \u00a0\u00a0\u00a0\u00a0 b\u00e6d hine \u00feurh mihta scyppend,\n gif he his wordcwida \u00a0\u00a0\u00a0\u00a0 wealdan meahte,\n- 1160\n- \n spr\u00e6ce ahebban, \u00a0\u00a0\u00a0\u00a0 \u00fe\u00e6t him on spellum gecy\u00f0de, \n onwrige worda gongum, \u00a0\u00a0\u00a0\u00a0 hu he his wisna truwade,\n drohtes on \u00f0\u00e6re dimman adle, \u00a0\u00a0\u00a0\u00a0 \u00e6r\u00f0on hine dea\u00f0 ons\u00e6gde.\n Him se eadga wer \u00a0\u00a0\u00a0\u00a0 ageaf ondsware,\n leof mon leofum, \u00a0\u00a0\u00a0\u00a0 \u00feeah he late meahte,\n- 1165\n- \n eorl ellenheard, \u00a0\u00a0\u00a0\u00a0 ore\u00fee gebredan: \n \"Min \u00fe\u00e6t sw\u00e6se bearn, \u00a0\u00a0\u00a0\u00a0 nis nu swi\u00fee feor\n \u00feam ytemestan \u00a0\u00a0\u00a0\u00a0 endedogor\n nydgedales, \u00a0\u00a0\u00a0\u00a0 \u00fe\u00e6t \u00f0u \u00fea nyhstan scealt\n in woruldlife \u00a0\u00a0\u00a0\u00a0 worda minra,\n- 1170\n- \n n\u00e6fre leana biloren, \u00a0\u00a0\u00a0\u00a0 lare gehyran, \n noht longe ofer \u00feis. \u00a0\u00a0\u00a0\u00a0 L\u00e6st ealle well\n w\u00e6re ond winescype, \u00a0\u00a0\u00a0\u00a0 word \u00fea wit spr\u00e6con,\n leofast manna.\" \u00a0\u00a0\u00a0\u00a0 \"N\u00e6fre ic lufan sibbe,\n \u00feeoden, \u00e6t \u00feearfe \u00a0\u00a0\u00a0\u00a0 \u00feine forl\u00e6te\n- 1175\n- \n asanian!\" \u00a0\u00a0\u00a0\u00a0 \"Beo \u00feu on si\u00f0 gearu, \n si\u00fe\u00fean lic ond leomu \u00a0\u00a0\u00a0\u00a0 ond \u00fees lifes g\u00e6st\n asundrien \u00a0\u00a0\u00a0\u00a0 somwist hyra\n \u00feurh feorggedal. \u00a0\u00a0\u00a0\u00a0 Fys \u00e6fter \u00feon\n \u00fe\u00e6t \u00feu gesecge \u00a0\u00a0\u00a0\u00a0 sweostor minre,\n- 1180\n- \n \u00fe\u00e6re leofestan, \u00a0\u00a0\u00a0\u00a0 on longne weg \n to \u00feam f\u00e6gran gefean \u00a0\u00a0\u00a0\u00a0 for\u00f0si\u00f0 minne,\n on ecne eard, \u00a0\u00a0\u00a0\u00a0 ond hyre eac gecy\u00f0\n wordum minum, \u00a0\u00a0\u00a0\u00a0 \u00fe\u00e6t ic me warnade\n hyre onsyne \u00a0\u00a0\u00a0\u00a0 ealle \u00ferage\n- 1185\n- \n in woruldlife, \u00a0\u00a0\u00a0\u00a0 for \u00f0y ic wilnode \n \u00fe\u00e6t wit unc eft \u00a0\u00a0\u00a0\u00a0 in \u00feam ecan gefean\n on sweglwuldre \u00a0\u00a0\u00a0\u00a0 geseon mostun\n fore onsyne \u00a0\u00a0\u00a0\u00a0 eces deman\n leahtra lease. \u00a0\u00a0\u00a0\u00a0 \u00fe\u00e6r sceal lufu uncer\n- 1190\n- \n w\u00e6rf\u00e6st wunian, \u00a0\u00a0\u00a0\u00a0 \u00fe\u00e6r wit wilna a \n in \u00f0\u00e6re beorhtan byrig \u00a0\u00a0\u00a0\u00a0 brucan motun,\n eades mid englum. \u00a0\u00a0\u00a0\u00a0 \u00f0u hyre eac saga\n \u00fe\u00e6t heo \u00feis banf\u00e6t \u00a0\u00a0\u00a0\u00a0 beorge bif\u00e6ste,\n lame biluce, \u00a0\u00a0\u00a0\u00a0 lic orsawle\n- 1195\n- \n in \u00feeostorcofan, \u00a0\u00a0\u00a0\u00a0 \u00fe\u00e6r hit \u00ferage sceal \n in sondhofe \u00a0\u00a0\u00a0\u00a0 si\u00fe\u00fean wunian.\"\n \u00f0a wear\u00f0 modge\u00feanc \u00a0\u00a0\u00a0\u00a0 miclum gebisgad,\n \u00feream for\u00ferycced, \u00a0\u00a0\u00a0\u00a0 \u00feurh \u00fe\u00e6s \u00feeodnes word,\n ombeht\u00feegne, \u00a0\u00a0\u00a0\u00a0 \u00fea he \u00e6dre oncneow\n- 1200\n- \n frean feorhgedal, \u00a0\u00a0\u00a0\u00a0 \u00fe\u00e6t hit feor ne w\u00e6s, \n endedogor. \u00a0\u00a0\u00a0\u00a0 Ongon \u00fea ofostlice\n to his winedryhtne \u00a0\u00a0\u00a0\u00a0 wordum m\u00e6\u00f0lan:\n \"Ic \u00feec halsige, \u00a0\u00a0\u00a0\u00a0 h\u00e6le\u00fea leofost\n gumena cynnes, \u00a0\u00a0\u00a0\u00a0 \u00feurh g\u00e6sta weard,\n- 1205\n- \n \u00fe\u00e6t \u00feu hygesorge \u00a0\u00a0\u00a0\u00a0 heortan minre \n gee\u00fee, eorla wyn. \u00a0\u00a0\u00a0\u00a0 Nis \u00fee ende feor,\n \u00fe\u00e6s \u00fee ic on galdrum \u00a0\u00a0\u00a0\u00a0 ongieten h\u00e6bbe.\n Oft mec geomor sefa \u00a0\u00a0\u00a0\u00a0 geh\u00fea gemanode,\n hat \u00e6t heortan, \u00a0\u00a0\u00a0\u00a0 hyge gnornende\n- 1210\n- \n nihtes nearwe, \u00a0\u00a0\u00a0\u00a0 ond ic n\u00e6fre \u00fee, \n f\u00e6der, frofor min, \u00a0\u00a0\u00a0\u00a0 frignan dorste.\n Symle ic gehyrde, \u00a0\u00a0\u00a0\u00a0 \u00feonne heofones gim,\n wyncondel wera, \u00a0\u00a0\u00a0\u00a0 west onhylde,\n sweglbeorht sunne \u00a0\u00a0\u00a0\u00a0 setlgonges fus\n- 1215\n- \n on \u00e6fentid, \u00a0\u00a0\u00a0\u00a0 o\u00feerne mid \u00feec, \n \u00feegn \u00e6t ge\u00feeahte. \u00a0\u00a0\u00a0\u00a0 Ic \u00fe\u00e6s \u00feeodnes word,\n ares uncu\u00fees \u00a0\u00a0\u00a0\u00a0 oft neosendes,\n d\u00e6gwoman bitweon \u00a0\u00a0\u00a0\u00a0 ond \u00fe\u00e6re deorcan niht,\n me\u00feelcwide m\u00e6cges, \u00a0\u00a0\u00a0\u00a0 ond on morgne swa,\n- 1220\n- \n ongeat geomormod, \u00a0\u00a0\u00a0\u00a0 g\u00e6stes spr\u00e6ce, \n gleawes in geardum. \u00a0\u00a0\u00a0\u00a0 Huru, ic giet ne wat,\n \u00e6r \u00feu me, frea min, \u00a0\u00a0\u00a0\u00a0 fur\u00feor cy\u00f0e\n \u00feurh cwide \u00feinne, \u00a0\u00a0\u00a0\u00a0 hwonan his cyme sindon.\"\n \u00f0a se eadga wer \u00a0\u00a0\u00a0\u00a0 ageaf ondsware\n- 1225\n- \n leofum \u00e6fter longre hwile, \u00a0\u00a0\u00a0\u00a0 swa he late meahte, \n elnes oncy\u00f0ig, \u00a0\u00a0\u00a0\u00a0 ore\u00fee gewealdan:\n \"Hw\u00e6t, \u00feu me, wine min, \u00a0\u00a0\u00a0\u00a0 wordum n\u00e6gest,\n fusne frignest, \u00a0\u00a0\u00a0\u00a0 \u00fe\u00e6s \u00fee ic fur\u00feum \u00e6r\n \u00e6fre on ealdre \u00a0\u00a0\u00a0\u00a0 \u00e6ngum ne wolde\n- 1230\n- \n monna ofer moldan \u00a0\u00a0\u00a0\u00a0 melda weor\u00f0an, \n \u00feegne on \u00feeode, \u00a0\u00a0\u00a0\u00a0 butan \u00fee nu \u00f0a,\n \u00fey l\u00e6s \u00fe\u00e6t wundredan \u00a0\u00a0\u00a0\u00a0 weras ond idesa,\n ond on gea\u00f0 gutan, \u00a0\u00a0\u00a0\u00a0 gieddum m\u00e6nden\n bi me lifgendum. \u00a0\u00a0\u00a0\u00a0 Huru, ic nolde sylf\n- 1235\n- \n \u00feurh gielpcwide \u00a0\u00a0\u00a0\u00a0 g\u00e6stes mines \n frofre gelettan, \u00a0\u00a0\u00a0\u00a0 ne f\u00e6der mines\n \u00e6fre ge\u00e6fnan, \u00a0\u00a0\u00a0\u00a0 \u00e6bylg godes.\n Symle me onsende \u00a0\u00a0\u00a0\u00a0 sigedryhten min,\n folca feorhgiefa, \u00a0\u00a0\u00a0\u00a0 si\u00fe\u00fean ic fur\u00feum ongon\n- 1240\n- \n on \u00feone \u00e6fteran \u00a0\u00a0\u00a0\u00a0 anseld bugan \n geargemearces, \u00a0\u00a0\u00a0\u00a0 g\u00e6st haligne,\n engel ufancundne, \u00a0\u00a0\u00a0\u00a0 se mec efna gehwam,\n meahtig meotudes \u00feegn, \u00a0\u00a0\u00a0\u00a0 ond on morgne eft,\n sigorf\u00e6st gesohte, \u00a0\u00a0\u00a0\u00a0 ond me sara gehwylc\n- 1245\n- \n geh\u00e6lde hygesorge, \u00a0\u00a0\u00a0\u00a0 ond me in hre\u00fere bileac \n wuldres wilboda \u00a0\u00a0\u00a0\u00a0 wisdomes giefe\n micle monigfealdran \u00a0\u00a0\u00a0\u00a0 \u00feonne \u00e6nig mon wite\n in life her, \u00a0\u00a0\u00a0\u00a0 \u00fee me alyfed nis\n to gecy\u00feenne \u00a0\u00a0\u00a0\u00a0 cwicra \u00e6ngum\n- 1250\n- \n on foldwege \u00a0\u00a0\u00a0\u00a0 fira cynnes, \n \u00fe\u00e6t me ne meahte \u00a0\u00a0\u00a0\u00a0 monna \u00e6nig\n bideaglian \u00a0\u00a0\u00a0\u00a0 hw\u00e6t he dearninga\n on hyge hogde \u00a0\u00a0\u00a0\u00a0 heortan ge\u00feoncum,\n si\u00fe\u00fean he me fore eagum \u00a0\u00a0\u00a0\u00a0 onsyne wear\u00f0.\n- 1255\n- \n A ic on mode ma\u00f0 \u00a0\u00a0\u00a0\u00a0 monna gehwylcne \n \u00feeodnes \u00ferymcyme \u00a0\u00a0\u00a0\u00a0 o\u00f0 \u00feisne d\u00e6g.\n Leofast monna, \u00a0\u00a0\u00a0\u00a0 nu ic for lufan \u00feinre,\n ond geferscype \u00a0\u00a0\u00a0\u00a0 \u00fe\u00e6t wit fyrn mid unc\n longe l\u00e6stan, \u00a0\u00a0\u00a0\u00a0 nelle ic l\u00e6tan \u00fee\n- 1260\n- \n \u00e6fre unrotne \u00a0\u00a0\u00a0\u00a0 \u00e6fter ealdorlege \n me\u00f0ne modseocne \u00a0\u00a0\u00a0\u00a0 minre geweor\u00f0an,\n soden sorgw\u00e6lmum. \u00a0\u00a0\u00a0\u00a0 A ic sibbe wi\u00fe \u00fee\n healdan wille. \u00a0\u00a0\u00a0\u00a0 Nu of hre\u00feerlocan\n to \u00feam so\u00fean gefean \u00a0\u00a0\u00a0\u00a0 sawel funda\u00f0.\n- 1265\n- \n Nis seo tid latu, \u00a0\u00a0\u00a0\u00a0 tydra\u00f0 \u00feis banf\u00e6t, \n greothord gnorna\u00f0, \u00a0\u00a0\u00a0\u00a0 g\u00e6st hine fyse\u00f0\n on ecne geard, \u00a0\u00a0\u00a0\u00a0 utsi\u00fees georn\n on sellan gesetu. \u00a0\u00a0\u00a0\u00a0 Nu ic swi\u00f0e eom\n weorce gewergad.\" \u00a0\u00a0\u00a0\u00a0 \u00f0a to \u00feam wage gesag,\n- 1270\n- \n heafelan onhylde, \u00a0\u00a0\u00a0\u00a0 hyrde \u00fea gena \n ellen on innan. \u00a0\u00a0\u00a0\u00a0 Oro\u00f0 stundum teah\n m\u00e6gne modig, \u00a0\u00a0\u00a0\u00a0 him of mu\u00f0e cwom\n swecca swetast. \u00a0\u00a0\u00a0\u00a0 Swylce on sumeres tid\n stinca\u00f0 on stowum \u00a0\u00a0\u00a0\u00a0 sta\u00feelum f\u00e6ste\n- 1275\n- \n wynnum \u00e6fter wongum \u00a0\u00a0\u00a0\u00a0 wyrta geblowene, \n hunigflowende, \u00a0\u00a0\u00a0\u00a0 swa \u00fe\u00e6s halgan w\u00e6s\n ondlongne d\u00e6g \u00a0\u00a0\u00a0\u00a0 o\u00fe \u00e6fen for\u00f0\n oro\u00f0 up hl\u00e6den. \u00a0\u00a0\u00a0\u00a0 \u00fea se \u00e6\u00feela gl\u00e6m\n setlgong sohte, \u00a0\u00a0\u00a0\u00a0 swearc nor\u00f0rodor\n- 1280\n- \n won under wolcnum, \u00a0\u00a0\u00a0\u00a0 woruld miste oferteah, \n \u00feystrum bi\u00feeahte, \u00a0\u00a0\u00a0\u00a0 \u00ferong niht ofer tiht\n londes fr\u00e6twa. \u00a0\u00a0\u00a0\u00a0 \u00f0a cwom leohta m\u00e6st,\n halig of heofonum \u00a0\u00a0\u00a0\u00a0 h\u00e6dre scinan,\n beorhte ofer burgsalu. \u00a0\u00a0\u00a0\u00a0 Bad se \u00fee sceolde\n- 1285\n- \n eadig on elne \u00a0\u00a0\u00a0\u00a0 endedogor, \n awrecen w\u00e6lstr\u00e6lum. \u00a0\u00a0\u00a0\u00a0 Wuldres scima,\n \u00e6\u00feele ymb \u00e6\u00feelne, \u00a0\u00a0\u00a0\u00a0 ondlonge niht\n scan scirwered. \u00a0\u00a0\u00a0\u00a0 Scadu swe\u00feredon,\n tolysed under lyfte. \u00a0\u00a0\u00a0\u00a0 W\u00e6s se leohta gl\u00e6m\n- 1290\n- \n ymb \u00fe\u00e6t halge hus, \u00a0\u00a0\u00a0\u00a0 heofonlic condel, \n from \u00e6fenglome \u00a0\u00a0\u00a0\u00a0 o\u00fe\u00fe\u00e6t eastan cwom\n ofer deop gelad \u00a0\u00a0\u00a0\u00a0 d\u00e6gredwoma,\n wedertacen wearm. \u00a0\u00a0\u00a0\u00a0 Aras se wuldormago,\n eadig elnes gemyndig, \u00a0\u00a0\u00a0\u00a0 spr\u00e6c to his onbeht\u00feegne,\n- 1295\n- \n torht to his treowum gesi\u00fee: \u00a0\u00a0\u00a0\u00a0 \"Tid is \u00fe\u00e6t \u00feu fere, \n ond \u00fea \u00e6rendu \u00a0\u00a0\u00a0\u00a0 eal bi\u00feence,\n ofestum l\u00e6de, \u00a0\u00a0\u00a0\u00a0 swa ic \u00fee \u00e6r bibead,\n lac to leofre. \u00a0\u00a0\u00a0\u00a0 Nu of lice is,\n goddreama georn, \u00a0\u00a0\u00a0\u00a0 g\u00e6st swi\u00f0e fus.\"\n- 1300\n- \n Ahof \u00fea his honda, \u00a0\u00a0\u00a0\u00a0 husle gereorded, \n ea\u00f0mod \u00fey \u00e6\u00feelan gyfle, \u00a0\u00a0\u00a0\u00a0 swylce he his eagan ontynde,\n halge heafdes gimmas, \u00a0\u00a0\u00a0\u00a0 biseah \u00fea to heofona rice,\n gl\u00e6dmod to geofona leanum, \u00a0\u00a0\u00a0\u00a0 ond \u00fea his g\u00e6st onsende\n weorcum wlitigne \u00a0\u00a0\u00a0\u00a0 in wuldres dream.\n- 1305\n- \n \u00f0a w\u00e6s Gu\u00f0laces \u00a0\u00a0\u00a0\u00a0 g\u00e6st gel\u00e6ded \n eadig on upweg. \u00a0\u00a0\u00a0\u00a0 Englas feredun\n to \u00feam longan gefean, \u00a0\u00a0\u00a0\u00a0 lic colode,\n belifd under lyfte. \u00a0\u00a0\u00a0\u00a0 \u00f0a \u00fe\u00e6r leoht ascan,\n beama beorhtast. \u00a0\u00a0\u00a0\u00a0 Eal \u00fe\u00e6t beacen w\u00e6s\n- 1310\n- \n ymb \u00fe\u00e6t halge hus, \u00a0\u00a0\u00a0\u00a0 heofonlic leoma, \n from foldan up \u00a0\u00a0\u00a0\u00a0 swylce fyren tor\n ryht ar\u00e6red \u00a0\u00a0\u00a0\u00a0 o\u00f0 rodera hrof,\n gesewen under swegle, \u00a0\u00a0\u00a0\u00a0 sunnan beorhtra,\n \u00e6\u00feeltungla wlite. \u00a0\u00a0\u00a0\u00a0 Engla \u00fereatas\n- 1315\n- \n sigeleo\u00f0 sungon, \u00a0\u00a0\u00a0\u00a0 sweg w\u00e6s on lyfte \n gehyred under heofonum, \u00a0\u00a0\u00a0\u00a0 haligra dream.\n Swa se burgstede w\u00e6s \u00a0\u00a0\u00a0\u00a0 blissum gefylled,\n swetum stencum \u00a0\u00a0\u00a0\u00a0 ond sweglwundrum,\n eadges yrfestol, \u00a0\u00a0\u00a0\u00a0 engla hleo\u00f0res,\n- 1320\n- \n eal innanweard. \u00a0\u00a0\u00a0\u00a0 \u00fe\u00e6r w\u00e6s \u00e6nlicra \n ond wynsumra \u00a0\u00a0\u00a0\u00a0 \u00feonne hit in worulde m\u00e6ge\n stefn areccan, \u00a0\u00a0\u00a0\u00a0 hu se stenc ond se sweg,\n heofonlic hleo\u00feor \u00a0\u00a0\u00a0\u00a0 ond se halga song,\n gehyred w\u00e6s, \u00a0\u00a0\u00a0\u00a0 heah\u00ferym godes,\n- 1325\n- \n breahtem \u00e6fter breahtme. \u00a0\u00a0\u00a0\u00a0 Beofode \u00fe\u00e6t ealond, \n foldwong on\u00ferong. \u00a0\u00a0\u00a0\u00a0 \u00f0a afyrhted wear\u00f0\n ar, elnes biloren, \u00a0\u00a0\u00a0\u00a0 gewat \u00fea ofestlice\n beorn unhy\u00f0ig, \u00a0\u00a0\u00a0\u00a0 \u00fe\u00e6t he bat gestag,\n w\u00e6ghengest wr\u00e6c, \u00a0\u00a0\u00a0\u00a0 w\u00e6ter\u00feisa for,\n- 1330\n- \n snel under sorgum. \u00a0\u00a0\u00a0\u00a0 Swegl hate scan, \n blac ofer burgsalo. \u00a0\u00a0\u00a0\u00a0 Brimwudu scynde,\n leoht, lade fus. \u00a0\u00a0\u00a0\u00a0 Lagumearg snyrede,\n gehl\u00e6sted to hy\u00f0e, \u00a0\u00a0\u00a0\u00a0 \u00fe\u00e6t se h\u00e6rnflota\n \u00e6fter sundplegan \u00a0\u00a0\u00a0\u00a0 sondlond gespearn,\n- 1335\n- \n grond wi\u00f0 greote. \u00a0\u00a0\u00a0\u00a0 Gnornsorge w\u00e6g \n hate \u00e6t heortan, \u00a0\u00a0\u00a0\u00a0 hyge geomurne,\n me\u00f0ne modsefan, \u00a0\u00a0\u00a0\u00a0 se \u00fee his mondryhten,\n life bilidenne, \u00a0\u00a0\u00a0\u00a0 last weardian\n wiste, wine leofne. \u00a0\u00a0\u00a0\u00a0 Him \u00fe\u00e6s wopes hring\n- 1340\n- \n torne gemonade. \u00a0\u00a0\u00a0\u00a0 Teagor y\u00f0um weol, \n hate hleordropan, \u00a0\u00a0\u00a0\u00a0 ond on hre\u00fere w\u00e6g\n micle modceare. \u00a0\u00a0\u00a0\u00a0 He \u00fe\u00e6re m\u00e6ge\u00f0 sceolde\n lace gel\u00e6dan \u00a0\u00a0\u00a0\u00a0 la\u00f0spel to so\u00f0.\n Cwom \u00fea freorigfer\u00f0 \u00a0\u00a0\u00a0\u00a0 \u00fe\u00e6r seo f\u00e6mne w\u00e6s,\n- 1345\n- \n wuldres wynm\u00e6g. \u00a0\u00a0\u00a0\u00a0 He \u00fea wyrd ne ma\u00f0, \n f\u00e6ges for\u00f0si\u00f0. \u00a0\u00a0\u00a0\u00a0 Fusleo\u00f0 agol\n wine\u00feearfende, \u00a0\u00a0\u00a0\u00a0 ond \u00fe\u00e6t word acw\u00e6\u00f0:\n \"Ellen bi\u00fe selast \u00a0\u00a0\u00a0\u00a0 \u00feam \u00fee oftost sceal\n dreogan dryhtenbealu, \u00a0\u00a0\u00a0\u00a0 deope behycgan\n- 1350\n- \n \u00feroht \u00feeodengedal, \u00a0\u00a0\u00a0\u00a0 \u00feonne seo \u00ferag cyme\u00f0, \n wefen wyrdstafum. \u00a0\u00a0\u00a0\u00a0 \u00fe\u00e6t wat se \u00fee sceal\n asw\u00e6man sarigfer\u00f0, \u00a0\u00a0\u00a0\u00a0 wat his sincgiefan\n holdne biheledne. \u00a0\u00a0\u00a0\u00a0 He sceal hean \u00feonan\n geomor hweorfan. \u00a0\u00a0\u00a0\u00a0 \u00feam bi\u00f0 gomenes wana\n- 1355\n- \n \u00f0e \u00fea earfe\u00f0a \u00a0\u00a0\u00a0\u00a0 oftost dreoge\u00f0 \n on sargum sefan. \u00a0\u00a0\u00a0\u00a0 Huru, ic swi\u00f0e ne \u00feearf\n hinsi\u00fe behlehhan. \u00a0\u00a0\u00a0\u00a0 Is hlaford min,\n beorna bealdor, \u00a0\u00a0\u00a0\u00a0 ond bro\u00feor \u00fein,\n se selesta \u00a0\u00a0\u00a0\u00a0 bi s\u00e6m tweonum\n- 1360\n- \n \u00feara \u00fee we on Engle \u00a0\u00a0\u00a0\u00a0 \u00e6fre gefrunen \n acennedne \u00a0\u00a0\u00a0\u00a0 \u00feurh cildes had\n gumena cynnes, \u00a0\u00a0\u00a0\u00a0 to godes dome,\n werigra wra\u00feu, \u00a0\u00a0\u00a0\u00a0 worulddreamum of,\n winem\u00e6ga wyn, \u00a0\u00a0\u00a0\u00a0 in wuldres \u00ferym,\n- 1365\n- \n gewiten, winiga hleo, \u00a0\u00a0\u00a0\u00a0 wica neosan \n eardes on upweg. \u00a0\u00a0\u00a0\u00a0 Nu se eor\u00f0an d\u00e6l,\n banhus abrocen \u00a0\u00a0\u00a0\u00a0 burgum in innan\n wuna\u00f0 w\u00e6lr\u00e6ste, \u00a0\u00a0\u00a0\u00a0 ond se wuldres d\u00e6l\n of licf\u00e6te \u00a0\u00a0\u00a0\u00a0 in leoht godes\n- 1370\n- \n sigorlean sohte, \u00a0\u00a0\u00a0\u00a0 ond \u00fee secgan het \n \u00fe\u00e6t git a mosten \u00a0\u00a0\u00a0\u00a0 in \u00feam ecan gefean\n mid \u00fea sibgedryht \u00a0\u00a0\u00a0\u00a0 somudeard niman,\n weorca wuldorlean, \u00a0\u00a0\u00a0\u00a0 willum neotan\n bl\u00e6des ond blissa. \u00a0\u00a0\u00a0\u00a0 Eac \u00fee abeodan het\n- 1375\n- \n sigedryhten min, \u00a0\u00a0\u00a0\u00a0 \u00fea he w\u00e6s si\u00fees fus, \n \u00fe\u00e6t \u00feu his lichoman, \u00a0\u00a0\u00a0\u00a0 leofast m\u00e6g\u00f0a,\n eor\u00f0an bi\u00f0eahte. \u00a0\u00a0\u00a0\u00a0 Nu \u00feu \u00e6dre const\n si\u00f0f\u00e6t minne. \u00a0\u00a0\u00a0\u00a0 Ic sceal sarigfer\u00f0,\n heanmod hweorfan, \u00a0\u00a0\u00a0\u00a0 hyge drusendne.\"","title":"Guthlac A, B","type":"page"}