{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a03_04.htm","path":"neu/ascp/a03_04.htm","source_url":"https://sacred-texts.com/neu/ascp/a03_04.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Phoenix\n Verse Indeterminate Saxon\n \n - \n H\u00e6bbe ic gefrugnen \u00a0\u00a0\u00a0\u00a0 \u00fe\u00e6tte is feor heonan \n eastd\u00e6lum on \u00a0\u00a0\u00a0\u00a0 \u00e6\u00feelast londa,\n firum gefr\u00e6ge. \u00a0\u00a0\u00a0\u00a0 Nis se foldan sceat\n ofer middangeard \u00a0\u00a0\u00a0\u00a0 mongum gefere\n- 5\n- \n folcagendra, \u00a0\u00a0\u00a0\u00a0 ac he afyrred is \n \u00feurh meotudes meaht \u00a0\u00a0\u00a0\u00a0 manfremmendum.\n Wlitig is se wong eall, \u00a0\u00a0\u00a0\u00a0 wynnum geblissad\n mid \u00feam f\u00e6grestum \u00a0\u00a0\u00a0\u00a0 foldan stencum.\n \u00e6nlic is \u00fe\u00e6t iglond, \u00a0\u00a0\u00a0\u00a0 \u00e6\u00feele se wyrhta,\n- 10\n- \n modig, meahtum spedig, \u00a0\u00a0\u00a0\u00a0 se \u00fea moldan gesette. \n \u00f0\u00e6r bi\u00f0 oft open \u00a0\u00a0\u00a0\u00a0 eadgum togeanes\n onhliden hleo\u00fera wyn, \u00a0\u00a0\u00a0\u00a0 heofonrices duru.\n \u00fe\u00e6t is wynsum wong, \u00a0\u00a0\u00a0\u00a0 wealdas grene,\n rume under roderum. \u00a0\u00a0\u00a0\u00a0 Ne m\u00e6g \u00fe\u00e6r ren ne snaw,\n- 15\n- \n ne forstes fn\u00e6st, \u00a0\u00a0\u00a0\u00a0 ne fyres bl\u00e6st, \n ne h\u00e6gles hryre, \u00a0\u00a0\u00a0\u00a0 ne hrimes dryre,\n ne sunnan h\u00e6tu, \u00a0\u00a0\u00a0\u00a0 ne sincaldu,\n ne wearm weder, \u00a0\u00a0\u00a0\u00a0 ne winterscur\n wihte gewyrdan, \u00a0\u00a0\u00a0\u00a0 ac se wong seoma\u00f0\n- 20\n- \n eadig ond onsund. \u00a0\u00a0\u00a0\u00a0 Is \u00fe\u00e6t \u00e6\u00feele lond \n blostmum geblowen. \u00a0\u00a0\u00a0\u00a0 Beorgas \u00fe\u00e6r ne muntas\n steape ne stonda\u00f0, \u00a0\u00a0\u00a0\u00a0 ne stanclifu\n heah hlifia\u00f0, \u00a0\u00a0\u00a0\u00a0 swa her mid us,\n ne dene ne dalu \u00a0\u00a0\u00a0\u00a0 ne dunscrafu,\n- 25\n- \n hl\u00e6was ne hlincas, \u00a0\u00a0\u00a0\u00a0 ne \u00fe\u00e6r hleona\u00f0 oo \n unsme\u00fees wiht, \u00a0\u00a0\u00a0\u00a0 ac se \u00e6\u00feela feld\n wrida\u00f0 under wolcnum, \u00a0\u00a0\u00a0\u00a0 wynnum geblowen.\n Is \u00fe\u00e6t torhte lond \u00a0\u00a0\u00a0\u00a0 twelfum herra,\n folde f\u00e6\u00f0mrimes, \u00a0\u00a0\u00a0\u00a0 swa us gefreogum gleawe\n- 30\n- \n witgan \u00feurh wisdom \u00a0\u00a0\u00a0\u00a0 on gewritum cy\u00fea\u00f0, \n \u00feonne \u00e6nig \u00feara beorga \u00a0\u00a0\u00a0\u00a0 \u00fee her beorhte mid us\n hea hlifia\u00f0 \u00a0\u00a0\u00a0\u00a0 under heofontunglum.\n Smylte is se sigewong; \u00a0\u00a0\u00a0\u00a0 sunbearo lixe\u00f0,\n wuduholt wynlic. \u00a0\u00a0\u00a0\u00a0 W\u00e6stmas ne dreosa\u00f0,\n- 35\n- \n beorhte blede, \u00a0\u00a0\u00a0\u00a0 ac \u00fea beamas a \n grene stonda\u00f0, \u00a0\u00a0\u00a0\u00a0 swa him god bibead.\n Wintres ond sumeres \u00a0\u00a0\u00a0\u00a0 wudu bi\u00f0 gelice\n bledum gehongen; \u00a0\u00a0\u00a0\u00a0 n\u00e6fre brosnia\u00f0\n leaf under lyfte, \u00a0\u00a0\u00a0\u00a0 ne him lig sce\u00fee\u00f0\n- 40\n- \n \u00e6fre to ealdre, \u00a0\u00a0\u00a0\u00a0 \u00e6r\u00feon edwenden \n worulde geweor\u00f0e. \u00a0\u00a0\u00a0\u00a0 Swa iu w\u00e6tres \u00ferym\n ealne middangeard \u00a0\u00a0\u00a0\u00a0 mereflod \u00feeahte,\n eor\u00fean ymbhwyrft, \u00a0\u00a0\u00a0\u00a0 \u00fea se \u00e6\u00feela wong,\n \u00e6ghw\u00e6s onsund, \u00a0\u00a0\u00a0\u00a0 wi\u00f0 y\u00f0fare\n- 45\n- \n gehealden stod \u00a0\u00a0\u00a0\u00a0 hreora w\u00e6ga, \n eadig, unwemme, \u00a0\u00a0\u00a0\u00a0 \u00feurh est godes;\n bide\u00f0 swa geblowen \u00a0\u00a0\u00a0\u00a0 o\u00f0 b\u00e6les cyme,\n dryhtnes domes, \u00a0\u00a0\u00a0\u00a0 \u00feonne dea\u00f0r\u00e6ced,\n h\u00e6le\u00fea heolstorcofan, \u00a0\u00a0\u00a0\u00a0 onhliden weor\u00fea\u00f0.\n- 50\n- \n Nis \u00fe\u00e6r on \u00feam londe \u00a0\u00a0\u00a0\u00a0 la\u00f0geni\u00f0la, \n ne wop ne wracu, \u00a0\u00a0\u00a0\u00a0 weatacen nan,\n yldu ne yrm\u00f0u \u00a0\u00a0\u00a0\u00a0 ne se enga dea\u00f0,\n ne lifes lyre, \u00a0\u00a0\u00a0\u00a0 ne la\u00fees cyme,\n ne synn ne sacu \u00a0\u00a0\u00a0\u00a0 ne sarwracu,\n- 55\n- \n ne w\u00e6dle gewin, \u00a0\u00a0\u00a0\u00a0 ne welan onsyn, \n ne sorg ne sl\u00e6p \u00a0\u00a0\u00a0\u00a0 ne swar leger,\n ne wintergeweorp, \u00a0\u00a0\u00a0\u00a0 ne wedra gebregd,\n hreoh under heofonum, \u00a0\u00a0\u00a0\u00a0 ne se hearda forst,\n caldum cylegicelum, \u00a0\u00a0\u00a0\u00a0 cnyse\u00f0 \u00e6nigne.\n- 60\n- \n \u00fe\u00e6r ne h\u00e6gl ne hrim \u00a0\u00a0\u00a0\u00a0 hreosa\u00f0 to foldan, \n ne windig wolcen, \u00a0\u00a0\u00a0\u00a0 ne \u00fe\u00e6r w\u00e6ter fealle\u00fe,\n lyfte gebysgad, \u00a0\u00a0\u00a0\u00a0 ac \u00fe\u00e6r lagustreamas,\n wundrum wr\u00e6tlice, \u00a0\u00a0\u00a0\u00a0 wyllan onspringa\u00f0\n f\u00e6grum flodwylmum. \u00a0\u00a0\u00a0\u00a0 Foldan lecca\u00fe\n- 65\n- \n w\u00e6ter wynsumu \u00a0\u00a0\u00a0\u00a0 of \u00fe\u00e6s wuda midle; \n \u00fea mon\u00fea gehwam \u00a0\u00a0\u00a0\u00a0 of \u00fe\u00e6re moldan tyrf\n brimcald breca\u00f0, \u00a0\u00a0\u00a0\u00a0 bearo ealne geondfara\u00f0,\n \u00feragum \u00ferymlice. \u00a0\u00a0\u00a0\u00a0 Is \u00fe\u00e6t \u00feeodnes gebod,\n \u00fe\u00e6tte twelf si\u00feum \u00a0\u00a0\u00a0\u00a0 \u00fe\u00e6t tirf\u00e6ste\n- 70\n- \n lond geondlace \u00a0\u00a0\u00a0\u00a0 lagufloda wynn. \n Sindon \u00fea bearwas \u00a0\u00a0\u00a0\u00a0 bledum gehongne,\n wlitigum w\u00e6stmum, \u00a0\u00a0\u00a0\u00a0 \u00fe\u00e6r no wania\u00f0 o,\n halge under heofonum, \u00a0\u00a0\u00a0\u00a0 holtes fr\u00e6twe.\n Ne fealla\u00f0 \u00fe\u00e6r on foldan \u00a0\u00a0\u00a0\u00a0 fealwe blostman,\n- 75\n- \n wudubeama wlite, \u00a0\u00a0\u00a0\u00a0 ac \u00fe\u00e6r wr\u00e6tlice \n on \u00feam treowum symle \u00a0\u00a0\u00a0\u00a0 telgan gehladene,\n ofett edniwe, \u00a0\u00a0\u00a0\u00a0 in ealle tid\n on \u00feam gr\u00e6swonge \u00a0\u00a0\u00a0\u00a0 grene stonda\u00fe,\n gehroden hyhtlice \u00a0\u00a0\u00a0\u00a0 haliges meahtum,\n- 80\n- \n beorhtast bearwa. \u00a0\u00a0\u00a0\u00a0 No gebrocen weor\u00fee\u00f0 \n holt on hiwe, \u00a0\u00a0\u00a0\u00a0 \u00fe\u00e6r se halga stenc\n wuna\u00fe geond wynlond; \u00a0\u00a0\u00a0\u00a0 \u00fe\u00e6t onwended ne bi\u00f0\n \u00e6fre to ealdre, \u00a0\u00a0\u00a0\u00a0 \u00e6r\u00feon endige\n frod fyrngeweorc \u00a0\u00a0\u00a0\u00a0 se hit on frym\u00fee gescop.\n- 85\n- \n \u00f0one wudu wearda\u00fe \u00a0\u00a0\u00a0\u00a0 wundrum f\u00e6ger \n fugel fe\u00ferum strong, \u00a0\u00a0\u00a0\u00a0 se is fenix haten.\n \u00fe\u00e6r se anhaga \u00a0\u00a0\u00a0\u00a0 eard bihealde\u00fe,\n deormod drohta\u00f0; \u00a0\u00a0\u00a0\u00a0 n\u00e6fre him dea\u00fe sce\u00fee\u00f0\n on \u00feam willwonge, \u00a0\u00a0\u00a0\u00a0 \u00feenden woruld stonde\u00fe.\n- 90\n- \n Se sceal \u00fe\u00e6re sunnan \u00a0\u00a0\u00a0\u00a0 si\u00f0 behealdan \n ond ongean cuman \u00a0\u00a0\u00a0\u00a0 godes condelle,\n gl\u00e6dum gimme, \u00a0\u00a0\u00a0\u00a0 georne bewitigan,\n hwonne up cyme \u00a0\u00a0\u00a0\u00a0 \u00e6\u00feelast tungla\n ofer y\u00f0mere \u00a0\u00a0\u00a0\u00a0 estan lixan,\n- 95\n- \n f\u00e6der fyrngeweorc \u00a0\u00a0\u00a0\u00a0 fr\u00e6twum blican, \n torht tacen godes. \u00a0\u00a0\u00a0\u00a0 Tungol beo\u00fe ahyded,\n gewiten under wa\u00feeman \u00a0\u00a0\u00a0\u00a0 westd\u00e6las on,\n bideglad on d\u00e6gred, \u00a0\u00a0\u00a0\u00a0 ond seo deorce niht\n won gewite\u00f0; \u00a0\u00a0\u00a0\u00a0 \u00feonne wa\u00feum strong\n- 100\n- \n fugel fe\u00ferum wlonc \u00a0\u00a0\u00a0\u00a0 on firgenstream \n under lyft, ofer lagu \u00a0\u00a0\u00a0\u00a0 loca\u00f0 georne,\n hwonne up cyme \u00a0\u00a0\u00a0\u00a0 eastan glidan\n ofer sidne s\u00e6 \u00a0\u00a0\u00a0\u00a0 swegles leoma.\n Swa se \u00e6\u00feela fugel \u00a0\u00a0\u00a0\u00a0 \u00e6t \u00feam \u00e6springe\n- 105\n- \n wlitigf\u00e6st wuna\u00f0 \u00a0\u00a0\u00a0\u00a0 wyllestreamas, \n \u00fe\u00e6r se tireadga \u00a0\u00a0\u00a0\u00a0 twelf si\u00feum hine\n biba\u00fea\u00f0 in \u00feam burnan \u00a0\u00a0\u00a0\u00a0 \u00e6r \u00fe\u00e6s beacnes cyme,\n sweglcondelle, \u00a0\u00a0\u00a0\u00a0 ond symle swa oft\n of \u00feam wilsuman \u00a0\u00a0\u00a0\u00a0 wyllgespryngum\n- 110\n- \n brimcald beorge\u00f0 \u00a0\u00a0\u00a0\u00a0 \u00e6t ba\u00f0a gehwylcum. \n Si\u00fe\u00fean hine sylfne \u00a0\u00a0\u00a0\u00a0 \u00e6fter sundplegan\n heahmod hefe\u00f0 \u00a0\u00a0\u00a0\u00a0 on heanne beam,\n \u00feonan y\u00feast m\u00e6g \u00a0\u00a0\u00a0\u00a0 on eastwegum\n si\u00f0 bihealdan, \u00a0\u00a0\u00a0\u00a0 hwonne swegles tapur\n- 115\n- \n ofer holm\u00fer\u00e6ce \u00a0\u00a0\u00a0\u00a0 h\u00e6dre blice, \n leohtes leoma. \u00a0\u00a0\u00a0\u00a0 Lond beo\u00f0 gefr\u00e6twad,\n woruld gewlitegad, \u00a0\u00a0\u00a0\u00a0 si\u00fe\u00fean wuldres gim\n ofer geofones gong \u00a0\u00a0\u00a0\u00a0 grund gescine\u00fe\n geond middangeard, \u00a0\u00a0\u00a0\u00a0 m\u00e6rost tungla.\n- 120\n- \n Sona swa seo sunne \u00a0\u00a0\u00a0\u00a0 sealte streamas \n hea oferhlifa\u00f0, \u00a0\u00a0\u00a0\u00a0 swa se haswa fugel\n beorht of \u00fe\u00e6s bearwes \u00a0\u00a0\u00a0\u00a0 beame gewite\u00f0,\n fare\u00f0 fe\u00ferum snell \u00a0\u00a0\u00a0\u00a0 flyhte on lyfte,\n swinsa\u00f0 ond singe\u00f0 \u00a0\u00a0\u00a0\u00a0 swegle togeanes.\n- 125\n- \n \u00f0onne bi\u00f0 swa f\u00e6ger \u00a0\u00a0\u00a0\u00a0 fugles geb\u00e6ru, \n onbryrded breostsefa, \u00a0\u00a0\u00a0\u00a0 blissum hremig;\n wrixle\u00f0 wo\u00f0cr\u00e6fte \u00a0\u00a0\u00a0\u00a0 wundorlicor\n beorhtan reorde, \u00a0\u00a0\u00a0\u00a0 \u00feonne \u00e6fre byre monnes\n hyrde under heofonum, \u00a0\u00a0\u00a0\u00a0 si\u00fe\u00fean heahcyning,\n- 130\n- \n wuldres wyrhta, \u00a0\u00a0\u00a0\u00a0 woruld sta\u00feelode, \n heofon ond eor\u00fean. \u00a0\u00a0\u00a0\u00a0 Bi\u00fe \u00fe\u00e6s hleo\u00f0res sweg\n eallum songcr\u00e6ftum \u00a0\u00a0\u00a0\u00a0 swetra ond wlitigra\n ond wynsumra \u00a0\u00a0\u00a0\u00a0 wrenca gehwylcum.\n Ne magon \u00feam breahtme \u00a0\u00a0\u00a0\u00a0 byman ne hornas,\n- 135\n- \n ne hearpan hlyn, \u00a0\u00a0\u00a0\u00a0 ne h\u00e6le\u00fea stefn \n \u00e6nges on eor\u00fean, \u00a0\u00a0\u00a0\u00a0 ne organan,\n sweghleo\u00feres geswin, \u00a0\u00a0\u00a0\u00a0 ne swanes fe\u00f0re,\n ne \u00e6nig \u00feara dreama \u00a0\u00a0\u00a0\u00a0 \u00fee dryhten gescop\n gumum to gliwe \u00a0\u00a0\u00a0\u00a0 in \u00feas geomran woruld.\n- 140\n- \n Singe\u00f0 swa ond swinsa\u00f0 \u00a0\u00a0\u00a0\u00a0 s\u00e6lum geblissad, \n o\u00fe\u00fe\u00e6t seo sunne \u00a0\u00a0\u00a0\u00a0 on su\u00f0rodor\n s\u00e6ged weor\u00fee\u00f0. \u00a0\u00a0\u00a0\u00a0 \u00feonne swia\u00f0 he\n ond hlyst gefe\u00f0, \u00a0\u00a0\u00a0\u00a0 heafde onbrygde\u00f0,\n \u00ferist, \u00feonces gleaw, \u00a0\u00a0\u00a0\u00a0 ond \u00feriwa asc\u00e6ce\u00f0\n- 145\n- \n fe\u00fere flyhthwate; \u00a0\u00a0\u00a0\u00a0 fugol bi\u00f0 geswiged. \n Symle he twelf si\u00feum \u00a0\u00a0\u00a0\u00a0 tida gemearca\u00f0\n d\u00e6ges ond nihtes. \u00a0\u00a0\u00a0\u00a0 Swa gedemed is\n bearwes bigengan, \u00a0\u00a0\u00a0\u00a0 \u00fe\u00e6t he \u00fe\u00e6r brucan mot\n wonges mid willum, \u00a0\u00a0\u00a0\u00a0 ond welan neotan,\n- 150\n- \n lifes ond lissa, \u00a0\u00a0\u00a0\u00a0 londes fr\u00e6twa, \n o\u00fe\u00fe\u00e6t he \u00feusende \u00a0\u00a0\u00a0\u00a0 \u00feisses lifes,\n wudubearwes weard, \u00a0\u00a0\u00a0\u00a0 wintra gebide\u00fe.\n \u00f0onne bi\u00f0 gehefgad \u00a0\u00a0\u00a0\u00a0 haswigfe\u00f0ra,\n gomol, gearum frod, \u00a0\u00a0\u00a0\u00a0 grene eor\u00f0an\n- 155\n- \n aflyh\u00f0, fugla wyn, \u00a0\u00a0\u00a0\u00a0 foldan geblowene, \n ond \u00feonne gesece\u00f0 \u00a0\u00a0\u00a0\u00a0 side rice\n middangeardes, \u00a0\u00a0\u00a0\u00a0 \u00fe\u00e6r no men buga\u00f0\n eard ond e\u00feel. \u00a0\u00a0\u00a0\u00a0 \u00fe\u00e6r he ealdordom\n onfeh\u00f0 foremihtig \u00a0\u00a0\u00a0\u00a0 ofer fugla cynn,\n- 160\n- \n ge\u00feungen on \u00feeode, \u00a0\u00a0\u00a0\u00a0 ond \u00ferage mid him \n westen wearda\u00f0. \u00a0\u00a0\u00a0\u00a0 \u00feonne wa\u00feum strong\n west gewite\u00f0 \u00a0\u00a0\u00a0\u00a0 wintrum gebysgad\n fleogan fe\u00ferum snel. \u00a0\u00a0\u00a0\u00a0 Fuglas \u00feringa\u00f0\n utan ymbe \u00e6\u00feelne; \u00a0\u00a0\u00a0\u00a0 \u00e6ghwylc wille\n- 165\n- \n wesan \u00feegn ond \u00feeow \u00a0\u00a0\u00a0\u00a0 \u00feeodne m\u00e6rum, \n o\u00fe\u00fe\u00e6t hy geseca\u00f0 \u00a0\u00a0\u00a0\u00a0 Syrwara lond\n cor\u00f0ra m\u00e6ste. \u00a0\u00a0\u00a0\u00a0 Him se cl\u00e6na \u00fe\u00e6r\n o\u00f0scufe\u00f0 scearplice, \u00a0\u00a0\u00a0\u00a0 \u00fe\u00e6t he in scade wearda\u00f0,\n on wudubearwe, \u00a0\u00a0\u00a0\u00a0 weste stowe,\n- 170\n- \n biholene ond bihydde \u00a0\u00a0\u00a0\u00a0 h\u00e6le\u00fea monegum. \n \u00f0\u00e6r he heanne beam \u00a0\u00a0\u00a0\u00a0 on holtwuda\n wuna\u00f0 ond wearda\u00f0, \u00a0\u00a0\u00a0\u00a0 wyrtum f\u00e6stne\n under heofunhrofe, \u00a0\u00a0\u00a0\u00a0 \u00feone hata\u00f0 men\n Fenix on foldan, \u00a0\u00a0\u00a0\u00a0 of \u00fe\u00e6s fugles noman.\n- 175\n- \n Hafa\u00f0 \u00feam treowe forgiefen \u00a0\u00a0\u00a0\u00a0 tirmeahtig cyning, \n meotud moncynnes, \u00a0\u00a0\u00a0\u00a0 mine gefr\u00e6ge,\n \u00fe\u00e6t se ana is \u00a0\u00a0\u00a0\u00a0 ealra beama\n on eor\u00f0wege \u00a0\u00a0\u00a0\u00a0 upl\u00e6dendra\n beorhtast geblowen; \u00a0\u00a0\u00a0\u00a0 ne m\u00e6g him bitres wiht\n- 180\n- \n scyldum sce\u00f0\u00f0an, \u00a0\u00a0\u00a0\u00a0 ac gescylded a \n wuna\u00f0 ungewyrded, \u00a0\u00a0\u00a0\u00a0 \u00feenden woruld stonde\u00f0.\n \u00f0onne wind lige\u00f0, \u00a0\u00a0\u00a0\u00a0 weder bi\u00f0 f\u00e6ger,\n hluttor heofones gim \u00a0\u00a0\u00a0\u00a0 halig scine\u00f0,\n beo\u00f0 wolcen towegen, \u00a0\u00a0\u00a0\u00a0 w\u00e6tra \u00fery\u00fee\n- 185\n- \n stille stonda\u00f0, \u00a0\u00a0\u00a0\u00a0 bi\u00fe storma gehwylc \n aswefed under swegle, \u00a0\u00a0\u00a0\u00a0 su\u00fean blice\u00f0\n wedercondel wearm, \u00a0\u00a0\u00a0\u00a0 weorodum lyhte\u00f0,\n \u00f0onne on \u00feam telgum \u00a0\u00a0\u00a0\u00a0 timbran onginne\u00f0,\n nest gearwian. \u00a0\u00a0\u00a0\u00a0 Bi\u00f0 him neod micel\n- 190\n- \n \u00fe\u00e6t he \u00fea yldu \u00a0\u00a0\u00a0\u00a0 ofestum mote \n \u00feurh gewittes wylm \u00a0\u00a0\u00a0\u00a0 wendan to life,\n feorg geong onfon. \u00a0\u00a0\u00a0\u00a0 \u00feonne feor ond neah\n \u00fea swetestan \u00a0\u00a0\u00a0\u00a0 somna\u00f0 ond g\u00e6dra\u00f0\n wyrta wynsume \u00a0\u00a0\u00a0\u00a0 ond wudubleda\n- 195\n- \n to \u00feam eardstede, \u00a0\u00a0\u00a0\u00a0 \u00e6\u00feelstenca gehwone, \n wyrta wynsumra, \u00a0\u00a0\u00a0\u00a0 \u00fee wuldorcyning,\n f\u00e6der frym\u00f0a gehw\u00e6s, \u00a0\u00a0\u00a0\u00a0 ofer foldan gescop\n to indryhtum \u00a0\u00a0\u00a0\u00a0 \u00e6lda cynne,\n swetes under swegle. \u00a0\u00a0\u00a0\u00a0 \u00fe\u00e6r he sylf biere\u00f0\n- 200\n- \n in \u00fe\u00e6t treow innan \u00a0\u00a0\u00a0\u00a0 torhte fr\u00e6twe; \n \u00fe\u00e6r se wilda fugel \u00a0\u00a0\u00a0\u00a0 in \u00feam westenne\n ofer heanne beam \u00a0\u00a0\u00a0\u00a0 hus getimbre\u00f0,\n wlitig ond wynsum, \u00a0\u00a0\u00a0\u00a0 ond gewica\u00f0 \u00fe\u00e6r\n sylf in \u00feam solere, \u00a0\u00a0\u00a0\u00a0 ond ymbsete\u00f0 utan\n- 205\n- \n in \u00feam leafsceade \u00a0\u00a0\u00a0\u00a0 lic ond fe\u00fere \n on healfa gehware \u00a0\u00a0\u00a0\u00a0 halgum stencum\n ond \u00feam \u00e6\u00feelestum \u00a0\u00a0\u00a0\u00a0 eor\u00fean bledum.\n Site\u00f0 si\u00fees fus. \u00a0\u00a0\u00a0\u00a0 \u00feonne swegles gim\n on sumeres tid, \u00a0\u00a0\u00a0\u00a0 sunne hatost,\n- 210\n- \n ofer sceadu scine\u00f0 \u00a0\u00a0\u00a0\u00a0 ond gesceapu dreoge\u00f0, \n woruld geondwlite\u00f0, \u00a0\u00a0\u00a0\u00a0 \u00feonne weor\u00f0e\u00f0 his\n hus onh\u00e6ted \u00a0\u00a0\u00a0\u00a0 \u00feurh hador swegl.\n Wyrta wearmia\u00f0, \u00a0\u00a0\u00a0\u00a0 willsele styme\u00f0\n swetum sw\u00e6ccum, \u00a0\u00a0\u00a0\u00a0 \u00feonne on swole byrne\u00f0\n- 215\n- \n \u00feurh fyres feng \u00a0\u00a0\u00a0\u00a0 fugel mid neste. \n B\u00e6l bi\u00f0 on\u00e6led. \u00a0\u00a0\u00a0\u00a0 \u00feonne brond \u00feece\u00f0\n heorodreorges hus, \u00a0\u00a0\u00a0\u00a0 hreoh onette\u00f0,\n fealo lig feorma\u00f0 \u00a0\u00a0\u00a0\u00a0 ond fenix byrne\u00f0,\n fyrngearum frod. \u00a0\u00a0\u00a0\u00a0 \u00feonne fyr \u00feige\u00f0\n- 220\n- \n l\u00e6nne lichoman; \u00a0\u00a0\u00a0\u00a0 lif bi\u00f0 on si\u00f0e, \n f\u00e6ges feorhhord, \u00a0\u00a0\u00a0\u00a0 \u00feonne fl\u00e6sc ond ban\n adleg \u00e6le\u00f0. \u00a0\u00a0\u00a0\u00a0 Hw\u00e6\u00fere him eft cyme\u00f0\n \u00e6fter fyrstmearce \u00a0\u00a0\u00a0\u00a0 feorh edniwe,\n si\u00fe\u00fean \u00fea yslan \u00a0\u00a0\u00a0\u00a0 eft onginna\u00f0\n- 225\n- \n \u00e6fter lig\u00fer\u00e6ce \u00a0\u00a0\u00a0\u00a0 lucan tog\u00e6dre, \n geclungne to cleowenne. \u00a0\u00a0\u00a0\u00a0 \u00feonne cl\u00e6ne bi\u00f0\n beorhtast nesta, \u00a0\u00a0\u00a0\u00a0 b\u00e6le forgrunden\n hea\u00feorofes hof; \u00a0\u00a0\u00a0\u00a0 hra bi\u00f0 acolad,\n banf\u00e6t gebrocen, \u00a0\u00a0\u00a0\u00a0 ond se bryne swe\u00fera\u00f0.\n- 230\n- \n \u00feonne of \u00feam ade \u00a0\u00a0\u00a0\u00a0 \u00e6ples gelicnes \n on \u00fe\u00e6re ascan bi\u00f0 \u00a0\u00a0\u00a0\u00a0 eft gemeted,\n of \u00feam weaxe\u00f0 wyrm, \u00a0\u00a0\u00a0\u00a0 wundrum f\u00e6ger,\n swylce he of \u00e6gerum \u00a0\u00a0\u00a0\u00a0 ut al\u00e6de,\n scir of scylle. \u00a0\u00a0\u00a0\u00a0 \u00feonne on sceade weaxe\u00f0,\n- 235\n- \n \u00fe\u00e6t he \u00e6rest bi\u00f0 \u00a0\u00a0\u00a0\u00a0 swylce earnes brid, \n f\u00e6ger fugeltimber; \u00a0\u00a0\u00a0\u00a0 \u00f0onne fur\u00feor gin\n wrida\u00f0 on wynnum, \u00a0\u00a0\u00a0\u00a0 \u00fe\u00e6t he bi\u00f0 w\u00e6stmum gelic\n ealdum earne, \u00a0\u00a0\u00a0\u00a0 and \u00e6fter \u00feon\n fe\u00ferum gefr\u00e6twad, \u00a0\u00a0\u00a0\u00a0 swylc he \u00e6t frym\u00f0e w\u00e6s,\n- 240\n- \n beorht geblowen. \u00a0\u00a0\u00a0\u00a0 \u00feonne br\u00e6d weor\u00fee\u00f0 \n eal edniwe \u00a0\u00a0\u00a0\u00a0 eft acenned,\n synnum asundrad, \u00a0\u00a0\u00a0\u00a0 sumes onlice\n swa mon to ondleofne \u00a0\u00a0\u00a0\u00a0 eor\u00f0an w\u00e6stmas\n on h\u00e6rfeste \u00a0\u00a0\u00a0\u00a0 ham gel\u00e6de\u00f0,\n- 245\n- \n wiste wynsume, \u00a0\u00a0\u00a0\u00a0 \u00e6r wintres cyme, \n on rypes timan, \u00a0\u00a0\u00a0\u00a0 \u00fey l\u00e6s hi renes scur\n awyrde under wolcnum; \u00a0\u00a0\u00a0\u00a0 \u00fe\u00e6r hi wra\u00f0e meta\u00f0,\n fodor\u00feege gefean, \u00a0\u00a0\u00a0\u00a0 \u00feonne forst ond snaw\n mid oferm\u00e6gne \u00a0\u00a0\u00a0\u00a0 eor\u00fean \u00feecca\u00f0\n- 250\n- \n wintergew\u00e6dum. \u00a0\u00a0\u00a0\u00a0 Of \u00feam w\u00e6stmum sceal \n eorla eadwela \u00a0\u00a0\u00a0\u00a0 eft al\u00e6dan\n \u00feurh cornes gecynd, \u00a0\u00a0\u00a0\u00a0 \u00fee \u00e6r cl\u00e6ne bi\u00f0\n s\u00e6d onsawen. \u00a0\u00a0\u00a0\u00a0 \u00feonne sunnan gl\u00e6m\n on lenctenne, \u00a0\u00a0\u00a0\u00a0 lifes tacen,\n- 255\n- \n wece\u00f0 woruldgestreon, \u00a0\u00a0\u00a0\u00a0 \u00fe\u00e6t \u00fea w\u00e6stmas beo\u00f0 \n \u00feurh agne gecynd \u00a0\u00a0\u00a0\u00a0 eft acende,\n foldan fr\u00e6twe. \u00a0\u00a0\u00a0\u00a0 Swa se fugel weor\u00fee\u00f0,\n gomel \u00e6fter gearum, \u00a0\u00a0\u00a0\u00a0 geong edniwe,\n fl\u00e6sce bifongen. \u00a0\u00a0\u00a0\u00a0 No he foddor \u00feige\u00f0,\n- 260\n- \n mete on moldan, \u00a0\u00a0\u00a0\u00a0 nemne meledeawes \n d\u00e6l gebyrge, \u00a0\u00a0\u00a0\u00a0 se dreose\u00f0 oft\n \u00e6t middre nihte; \u00a0\u00a0\u00a0\u00a0 bi \u00feon se modga his\n feorh afede\u00f0, \u00a0\u00a0\u00a0\u00a0 o\u00fe\u00fe\u00e6t fyrngesetu,\n agenne eard, \u00a0\u00a0\u00a0\u00a0 eft gesece\u00f0.\n- 265\n- \n \u00feonne bi\u00f0 aweaxen \u00a0\u00a0\u00a0\u00a0 wyrtum in gemonge \n fugel fe\u00ferum deal; \u00a0\u00a0\u00a0\u00a0 feorh bi\u00f0 niwe,\n geong, geofona ful, \u00a0\u00a0\u00a0\u00a0 \u00feonne he of greote his\n lic leo\u00feucr\u00e6ftig, \u00a0\u00a0\u00a0\u00a0 \u00fe\u00e6t \u00e6r lig fornom,\n somna\u00f0, swoles lafe, \u00a0\u00a0\u00a0\u00a0 searwum geg\u00e6dra\u00f0\n- 270\n- \n ban gebrosnad, \u00a0\u00a0\u00a0\u00a0 \u00e6fter b\u00e6l\u00fer\u00e6ce, \n ond \u00feonne gebringe\u00f0 \u00a0\u00a0\u00a0\u00a0 ban ond yslan,\n ades lafe, \u00a0\u00a0\u00a0\u00a0 eft \u00e6tsomne,\n ond \u00feonne \u00fe\u00e6t w\u00e6lreaf \u00a0\u00a0\u00a0\u00a0 wyrtum bitelde\u00f0,\n f\u00e6gre gefr\u00e6twed. \u00a0\u00a0\u00a0\u00a0 \u00f0onne afysed bi\u00f0\n- 275\n- \n agenne eard \u00a0\u00a0\u00a0\u00a0 eft to secan. \n \u00feonne fotum ymbfeh\u00f0 \u00a0\u00a0\u00a0\u00a0 fyres lafe,\n clam biclyppe\u00f0, \u00a0\u00a0\u00a0\u00a0 ond his cy\u00fe\u00feu eft,\n sunbeorht gesetu, \u00a0\u00a0\u00a0\u00a0 sece\u00f0 on wynnum,\n eadig e\u00feellond. \u00a0\u00a0\u00a0\u00a0 Eall bi\u00f0 geniwad\n- 280\n- \n feorh ond fe\u00feerhoma, \u00a0\u00a0\u00a0\u00a0 swa he \u00e6t frym\u00fee w\u00e6s, \n \u00fea hine \u00e6rest god \u00a0\u00a0\u00a0\u00a0 on \u00feone \u00e6\u00feelan wong\n sigorf\u00e6st sette. \u00a0\u00a0\u00a0\u00a0 He his sylfes \u00fe\u00e6r\n ban gebringe\u00f0, \u00a0\u00a0\u00a0\u00a0 \u00fea \u00e6r brondes wylm\n on beorhstede \u00a0\u00a0\u00a0\u00a0 b\u00e6le for\u00feylmde,\n- 285\n- \n ascan to eacan. \u00a0\u00a0\u00a0\u00a0 \u00feonne eal geador \n bebyrge\u00f0 beaducr\u00e6ftig \u00a0\u00a0\u00a0\u00a0 ban ond yslan\n on \u00feam ealonde. \u00a0\u00a0\u00a0\u00a0 Bi\u00f0 him edniwe\n \u00fe\u00e6re sunnan segn, \u00a0\u00a0\u00a0\u00a0 \u00feonne swegles leoht,\n gimma gladost, \u00a0\u00a0\u00a0\u00a0 ofer garsecg up,\n- 290\n- \n \u00e6\u00feeltungla wyn, \u00a0\u00a0\u00a0\u00a0 eastan lixe\u00f0. \n Is se fugel f\u00e6ger \u00a0\u00a0\u00a0\u00a0 forweard hiwe,\n bleobrygdum fag \u00a0\u00a0\u00a0\u00a0 ymb \u00fea breost foran.\n Is him \u00fe\u00e6t heafod \u00a0\u00a0\u00a0\u00a0 hindan grene,\n wr\u00e6tlice wrixled, \u00a0\u00a0\u00a0\u00a0 wurman geblonden.\n- 295\n- \n \u00feonne is se finta \u00a0\u00a0\u00a0\u00a0 f\u00e6gre ged\u00e6led, \n sum brun, sum basu, \u00a0\u00a0\u00a0\u00a0 sum blacum splottum\n searolice beseted. \u00a0\u00a0\u00a0\u00a0 Sindon \u00fea fi\u00feru\n hwit hindanweard, \u00a0\u00a0\u00a0\u00a0 ond se hals grene\n nio\u00feoweard ond ufeweard, \u00a0\u00a0\u00a0\u00a0 ond \u00fe\u00e6t nebb lixe\u00f0\n- 300\n- \n swa gl\u00e6s o\u00fe\u00fee gim, \u00a0\u00a0\u00a0\u00a0 geaflas scyne \n innan ond utan. \u00a0\u00a0\u00a0\u00a0 Is seo eaggebyrd\n stearc ond hiwe \u00a0\u00a0\u00a0\u00a0 stane gelicast,\n gladum gimme, \u00a0\u00a0\u00a0\u00a0 \u00feonne in goldfate\n smi\u00fea or\u00feoncum \u00a0\u00a0\u00a0\u00a0 biseted weor\u00fee\u00f0.\n- 305\n- \n Is ymb \u00feone sweoran, \u00a0\u00a0\u00a0\u00a0 swylce sunnan hring, \n beaga beorhtast \u00a0\u00a0\u00a0\u00a0 brogden fe\u00f0rum.\n Wr\u00e6tlic is seo womb neo\u00fean, \u00a0\u00a0\u00a0\u00a0 wundrum f\u00e6ger,\n scir ond scyne. \u00a0\u00a0\u00a0\u00a0 Is se scyld ufan\n fr\u00e6twum gefeged \u00a0\u00a0\u00a0\u00a0 ofer \u00fe\u00e6s fugles b\u00e6c.\n- 310\n- \n Sindon \u00fea scancan \u00a0\u00a0\u00a0\u00a0 scyllum biweaxen, \n fealwe fotas. \u00a0\u00a0\u00a0\u00a0 Se fugel is on hiwe\n \u00e6ghw\u00e6s \u00e6nlic, \u00a0\u00a0\u00a0\u00a0 onlicost pean,\n wynnum geweaxen, \u00a0\u00a0\u00a0\u00a0 \u00fe\u00e6s gewritu secga\u00f0.\n Nis he hinderweard, \u00a0\u00a0\u00a0\u00a0 ne hygeg\u00e6lsa,\n- 315\n- \n swar ne swongor, \u00a0\u00a0\u00a0\u00a0 swa sume fuglas, \n \u00fea \u00fee late \u00feurh lyft \u00a0\u00a0\u00a0\u00a0 laca\u00f0 fi\u00ferum,\n ac he is snel ond swift \u00a0\u00a0\u00a0\u00a0 ond swi\u00fee leoht,\n wlitig ond wynsum, \u00a0\u00a0\u00a0\u00a0 wuldre gemearcad.\n Ece is se \u00e6\u00feeling \u00a0\u00a0\u00a0\u00a0 se \u00fee him \u00fe\u00e6t ead gefe\u00f0!\n- 320\n- \n \u00feonne he gewite\u00f0 \u00a0\u00a0\u00a0\u00a0 wongas secan, \n his ealdne eard, \u00a0\u00a0\u00a0\u00a0 of \u00feisse e\u00feeltyrf.\n Swa se fugel fleoge\u00f0, \u00a0\u00a0\u00a0\u00a0 folcum o\u00f0eawe\u00f0\n mongum monna \u00a0\u00a0\u00a0\u00a0 geond middangeard,\n \u00feonne somnia\u00f0 \u00a0\u00a0\u00a0\u00a0 su\u00fean ond nor\u00fean,\n- 325\n- \n eastan ond westan, \u00a0\u00a0\u00a0\u00a0 eoredciestum, \n fara\u00f0 feorran ond nean \u00a0\u00a0\u00a0\u00a0 folca \u00fery\u00feum\n \u00fe\u00e6r hi sceawia\u00fe \u00a0\u00a0\u00a0\u00a0 scyppendes giefe\n f\u00e6gre on \u00feam fugle, \u00a0\u00a0\u00a0\u00a0 swa him \u00e6t fruman sette\n sigora so\u00f0cyning \u00a0\u00a0\u00a0\u00a0 sellicran gecynd,\n- 330\n- \n fr\u00e6twe f\u00e6gerran \u00a0\u00a0\u00a0\u00a0 ofer fugla cyn. \n \u00f0onne wundria\u00f0 \u00a0\u00a0\u00a0\u00a0 weras ofer eor\u00fean\n wlite ond w\u00e6stma, \u00a0\u00a0\u00a0\u00a0 ond gewritum cy\u00fea\u00f0,\n mundum mearcia\u00f0 \u00a0\u00a0\u00a0\u00a0 on marmstane,\n hwonne se d\u00e6g ond seo tid \u00a0\u00a0\u00a0\u00a0 dryhtum geeawe\n- 335\n- \n fr\u00e6twe flyhthwates. \u00a0\u00a0\u00a0\u00a0 \u00f0onne fugla cynn \n on healfa gehwone \u00a0\u00a0\u00a0\u00a0 heapum \u00feringa\u00f0,\n siga\u00f0 sidwegum, \u00a0\u00a0\u00a0\u00a0 songe lofia\u00f0,\n m\u00e6ra\u00f0 modigne \u00a0\u00a0\u00a0\u00a0 meaglum reordum,\n ond swa \u00feone halgan \u00a0\u00a0\u00a0\u00a0 hringe betelda\u00f0\n- 340\n- \n flyhte on lyfte; \u00a0\u00a0\u00a0\u00a0 fenix bi\u00fe on middum, \n \u00fereatum bi\u00ferungen. \u00a0\u00a0\u00a0\u00a0 \u00feeoda wlita\u00f0,\n wundrum wafia\u00f0, \u00a0\u00a0\u00a0\u00a0 hu seo wilgedryht\n wildne weor\u00feia\u00f0, \u00a0\u00a0\u00a0\u00a0 worn \u00e6fter o\u00ferum,\n cr\u00e6ftum cy\u00fea\u00f0 \u00a0\u00a0\u00a0\u00a0 ond for cyning m\u00e6ra\u00f0\n- 345\n- \n leofne leodfruman, \u00a0\u00a0\u00a0\u00a0 l\u00e6da\u00f0 mid wynnum \n \u00e6\u00feelne to earde, \u00a0\u00a0\u00a0\u00a0 o\u00fe\u00fe\u00e6t se anhoga\n o\u00f0fleoge\u00f0, fe\u00ferum snel, \u00a0\u00a0\u00a0\u00a0 \u00fe\u00e6t him gefylgan ne m\u00e6g\n drymendra gedryht, \u00a0\u00a0\u00a0\u00a0 \u00feonne dugu\u00f0a wyn\n of \u00feisse eor\u00fean tyrf \u00a0\u00a0\u00a0\u00a0 e\u00feel sece\u00f0.\n- 350\n- \n Swa se ges\u00e6liga \u00a0\u00a0\u00a0\u00a0 \u00e6fter swylthwile \n his ealdcy\u00f0\u00fee \u00a0\u00a0\u00a0\u00a0 eft geneosa\u00f0,\n f\u00e6gre foldan. \u00a0\u00a0\u00a0\u00a0 Fugelas cyrra\u00f0\n from \u00feam gu\u00f0frecan \u00a0\u00a0\u00a0\u00a0 geomormode\n eft to earde. \u00a0\u00a0\u00a0\u00a0 \u00feonne se \u00e6\u00feeling bi\u00f0\n- 355\n- \n giong in geardum. \u00a0\u00a0\u00a0\u00a0 God ana wat, \n cyning \u00e6lmihtig, \u00a0\u00a0\u00a0\u00a0 hu his gecynde bi\u00f0,\n wifhades \u00fee weres; \u00a0\u00a0\u00a0\u00a0 \u00fe\u00e6t ne wat \u00e6nig\n monna cynnes, \u00a0\u00a0\u00a0\u00a0 butan meotod ana,\n hu \u00fea wisan sind \u00a0\u00a0\u00a0\u00a0 wundorlice,\n- 360\n- \n f\u00e6ger fyrngesceap, \u00a0\u00a0\u00a0\u00a0 ymb \u00fe\u00e6s fugles gebyrd. \n \u00fe\u00e6r se eadga mot \u00a0\u00a0\u00a0\u00a0 eardes neotan,\n wyllestreama \u00a0\u00a0\u00a0\u00a0 wuduholtum in,\n wunian in wonge, \u00a0\u00a0\u00a0\u00a0 o\u00fe\u00fe\u00e6t wintra bi\u00f0\n \u00feusend urnen. \u00a0\u00a0\u00a0\u00a0 \u00feonne him weor\u00fee\u00f0\n- 365\n- \n ende lifes; \u00a0\u00a0\u00a0\u00a0 hine ad \u00feece\u00f0 \n \u00feurh \u00e6ledfyr. \u00a0\u00a0\u00a0\u00a0 Hw\u00e6\u00fere eft cyme\u00f0\n aweaht wr\u00e6tlice \u00a0\u00a0\u00a0\u00a0 wundrum to life.\n For\u00feon he drusende \u00a0\u00a0\u00a0\u00a0 dea\u00f0 ne bisorga\u00f0,\n sare swyltcwale, \u00a0\u00a0\u00a0\u00a0 \u00fee him symle wat\n- 370\n- \n \u00e6fter lig\u00fer\u00e6ce \u00a0\u00a0\u00a0\u00a0 lif edniwe, \n feorh \u00e6fter fylle, \u00a0\u00a0\u00a0\u00a0 \u00feonne fromlice\n \u00feurh briddes had \u00a0\u00a0\u00a0\u00a0 gebreadad weor\u00f0e\u00f0\n eft of ascan, \u00a0\u00a0\u00a0\u00a0 edgeong wese\u00f0\n under swegles hleo. \u00a0\u00a0\u00a0\u00a0 Bi\u00f0 him self gehw\u00e6\u00f0er\n- 375\n- \n sunu ond sw\u00e6s f\u00e6der, \u00a0\u00a0\u00a0\u00a0 ond symle eac \n eft yrfeweard \u00a0\u00a0\u00a0\u00a0 ealdre lafe.\n Forgeaf him se meahta \u00a0\u00a0\u00a0\u00a0 moncynnes fruma\n \u00fe\u00e6t he swa wr\u00e6tlice \u00a0\u00a0\u00a0\u00a0 weor\u00fean sceolde\n eft \u00fe\u00e6t ilce \u00a0\u00a0\u00a0\u00a0 \u00fe\u00e6t he \u00e6r \u00feon w\u00e6s,\n- 380\n- \n fe\u00ferum bifongen, \u00a0\u00a0\u00a0\u00a0 \u00feeah hine fyr nime. \n Swa \u00fe\u00e6t ece lif \u00a0\u00a0\u00a0\u00a0 eadigra gehwylc\n \u00e6fter sarwr\u00e6ce \u00a0\u00a0\u00a0\u00a0 sylf geceose\u00f0\n \u00feurh deorcne dea\u00f0, \u00a0\u00a0\u00a0\u00a0 \u00fe\u00e6t he dryhtnes mot\n \u00e6fter geardagum \u00a0\u00a0\u00a0\u00a0 geofona neotan\n- 385\n- \n on sindreamum, \u00a0\u00a0\u00a0\u00a0 ond si\u00fe\u00fean a \n wunian in wuldre \u00a0\u00a0\u00a0\u00a0 weorca to leane.\n \u00feisses fugles gecynd \u00a0\u00a0\u00a0\u00a0 fela gelices\n bi \u00feam gecornum \u00a0\u00a0\u00a0\u00a0 Cristes \u00feegnum\n beacna\u00f0 in burgum, \u00a0\u00a0\u00a0\u00a0 hu hi beorhtne gefean\n- 390\n- \n \u00feurh f\u00e6der fultum \u00a0\u00a0\u00a0\u00a0 on \u00feas frecnan tid \n healda\u00fe under heofonum, \u00a0\u00a0\u00a0\u00a0 ond him heanne bl\u00e6d\n in \u00feam uplican \u00a0\u00a0\u00a0\u00a0 e\u00f0le gestryna\u00fe.\n Habba\u00fe we geascad \u00a0\u00a0\u00a0\u00a0 \u00fe\u00e6t se \u00e6lmihtiga\n worhte wer ond wif \u00a0\u00a0\u00a0\u00a0 \u00feurh his wundra sped,\n- 395\n- \n ond hi \u00fea gesette \u00a0\u00a0\u00a0\u00a0 on \u00feone selestan \n foldan sceata, \u00a0\u00a0\u00a0\u00a0 \u00feone fira bearn\n nemna\u00f0 neorxnawong, \u00a0\u00a0\u00a0\u00a0 \u00fe\u00e6r him n\u00e6nges w\u00e6s\n eades onsyn, \u00a0\u00a0\u00a0\u00a0 \u00feenden eces word,\n halges hleo\u00feorcwide, \u00a0\u00a0\u00a0\u00a0 healdan woldan\n- 400\n- \n on \u00feam niwan gefean. \u00a0\u00a0\u00a0\u00a0 \u00fe\u00e6r him ni\u00fe gescod, \n ealdfeondes \u00e6fest, \u00a0\u00a0\u00a0\u00a0 se him \u00e6t gebead,\n beames blede, \u00a0\u00a0\u00a0\u00a0 \u00fe\u00e6t hi bu \u00feegun\n \u00e6ppel unr\u00e6dum \u00a0\u00a0\u00a0\u00a0 ofer est godes,\n byrgdon forbodene. \u00a0\u00a0\u00a0\u00a0 \u00fe\u00e6r him bitter wear\u00f0\n- 405\n- \n yrm\u00feu \u00e6fter \u00e6te \u00a0\u00a0\u00a0\u00a0 ond hyra eaferum swa, \n sarlic symbel \u00a0\u00a0\u00a0\u00a0 sunum ond dohtrum.\n Wurdon teonlice \u00a0\u00a0\u00a0\u00a0 to\u00feas idge\n ageald \u00e6fter gylte. \u00a0\u00a0\u00a0\u00a0 H\u00e6fdon godes yrre,\n bittre bealosorge. \u00a0\u00a0\u00a0\u00a0 \u00fe\u00e6s \u00fea byre si\u00fe\u00fean\n- 410\n- \n gyrne onguldon, \u00a0\u00a0\u00a0\u00a0 \u00fee hi \u00fe\u00e6t gyfl \u00feegun \n ofer eces word. \u00a0\u00a0\u00a0\u00a0 For\u00feon hy e\u00f0les wyn\n geomormode \u00a0\u00a0\u00a0\u00a0 ofgiefan sceoldon\n \u00feurh n\u00e6dran ni\u00fe, \u00a0\u00a0\u00a0\u00a0 \u00fea heo nearwe biswac\n yldran usse \u00a0\u00a0\u00a0\u00a0 in \u00e6rdagum\n- 415\n- \n \u00feurh f\u00e6cne fer\u00f0, \u00a0\u00a0\u00a0\u00a0 \u00fe\u00e6t hi feor \u00feonan \n in \u00feas dea\u00f0dene \u00a0\u00a0\u00a0\u00a0 drohta\u00f0 sohton,\n sorgfulran gesetu. \u00a0\u00a0\u00a0\u00a0 Him wear\u00f0 selle lif\n heolstre bihyded, \u00a0\u00a0\u00a0\u00a0 ond se halga wong\n \u00feurh feondes searo \u00a0\u00a0\u00a0\u00a0 f\u00e6ste bityned\n- 420\n- \n wintra mengu, \u00a0\u00a0\u00a0\u00a0 o\u00fe\u00fe\u00e6t wuldorcyning \n \u00feurh his hidercyme \u00a0\u00a0\u00a0\u00a0 halgum togeanes,\n moncynnes gefea, \u00a0\u00a0\u00a0\u00a0 me\u00fera frefrend,\n ond se anga hyht, \u00a0\u00a0\u00a0\u00a0 eft ontynde.\n Is \u00feon gelicast, \u00a0\u00a0\u00a0\u00a0 \u00fe\u00e6s \u00fee us leorneras\n- 425\n- \n wordum secga\u00f0, \u00a0\u00a0\u00a0\u00a0 ond writu cy\u00fea\u00f0, \n \u00feisses fugles gef\u00e6r, \u00a0\u00a0\u00a0\u00a0 \u00feonne frod ofgiefe\u00f0\n eard ond e\u00feel, \u00a0\u00a0\u00a0\u00a0 ond geealdad bi\u00f0.\n Gewite\u00f0 werigmod, \u00a0\u00a0\u00a0\u00a0 wintrum gebysgad,\n \u00fe\u00e6r he holtes hleo \u00a0\u00a0\u00a0\u00a0 heah gemete\u00f0,\n- 430\n- \n in \u00feam he getimbre\u00f0 \u00a0\u00a0\u00a0\u00a0 tanum ond wyrtum \n \u00feam \u00e6\u00feelestum \u00a0\u00a0\u00a0\u00a0 eardwic niwe,\n nest on bearwe. \u00a0\u00a0\u00a0\u00a0 Bi\u00f0 him neod micel\n \u00fe\u00e6t he feorhgeong eft \u00a0\u00a0\u00a0\u00a0 onfon mote\n \u00feurh liges bl\u00e6st \u00a0\u00a0\u00a0\u00a0 lif \u00e6fter dea\u00fee,\n- 435\n- \n edgeong wesan, \u00a0\u00a0\u00a0\u00a0 ond his ealdcy\u00f0\u00feu, \n sunbeorht gesetu, \u00a0\u00a0\u00a0\u00a0 secan mote\n \u00e6fter fyrba\u00f0e. \u00a0\u00a0\u00a0\u00a0 Swa \u00f0a foregengan,\n yldran usse, \u00a0\u00a0\u00a0\u00a0 anforleton\n \u00feone wlitigan wong \u00a0\u00a0\u00a0\u00a0 ond wuldres setl,\n- 440\n- \n leoflic on laste, \u00a0\u00a0\u00a0\u00a0 tugon longne si\u00f0 \n in hearmra hond, \u00a0\u00a0\u00a0\u00a0 \u00fe\u00e6r him hettende,\n earme agl\u00e6can, \u00a0\u00a0\u00a0\u00a0 oft gescodan.\n W\u00e6ron hw\u00e6\u00fere monge, \u00a0\u00a0\u00a0\u00a0 \u00fea \u00fee meotude wel\n gehyrdun under heofonum \u00a0\u00a0\u00a0\u00a0 halgum \u00f0eawum,\n- 445\n- \n d\u00e6dum domlicum, \u00a0\u00a0\u00a0\u00a0 \u00fe\u00e6t him dryhten wear\u00f0, \n heofona heahcyning, \u00a0\u00a0\u00a0\u00a0 hold on mode.\n \u00f0\u00e6t is se hea beam \u00a0\u00a0\u00a0\u00a0 in \u00feam halge nu\n wic weardia\u00f0, \u00a0\u00a0\u00a0\u00a0 \u00fe\u00e6r him wihte ne m\u00e6g\n ealdfeonda nan \u00a0\u00a0\u00a0\u00a0 atre sce\u00fe\u00fean,\n- 450\n- \n facnes tacne, \u00a0\u00a0\u00a0\u00a0 on \u00feas frecnan tid. \n \u00fe\u00e6r him nest wyrce\u00f0 \u00a0\u00a0\u00a0\u00a0 wi\u00f0 ni\u00fea gehwam\n d\u00e6dum domlicum \u00a0\u00a0\u00a0\u00a0 dryhtnes cempa,\n \u00feonne he \u00e6lmessan \u00a0\u00a0\u00a0\u00a0 earmum d\u00e6le\u00f0,\n duge\u00fea leasum, \u00a0\u00a0\u00a0\u00a0 ond him dryhten gecyg\u00f0,\n- 455\n- \n f\u00e6der on fultum, \u00a0\u00a0\u00a0\u00a0 for\u00f0 onette\u00f0, \n l\u00e6nan lifes \u00a0\u00a0\u00a0\u00a0 leahtras dw\u00e6sce\u00fe,\n mirce mand\u00e6de, \u00a0\u00a0\u00a0\u00a0 healde\u00f0 meotudes \u00e6\n beald in breostum, \u00a0\u00a0\u00a0\u00a0 ond gebedu sece\u00f0\n cl\u00e6num gehygdum, \u00a0\u00a0\u00a0\u00a0 ond his cneo bige\u00f0\n- 460\n- \n \u00e6\u00feele to eor\u00fean, \u00a0\u00a0\u00a0\u00a0 flyh\u00f0 yfla gehwylc, \n grimme gieltas, \u00a0\u00a0\u00a0\u00a0 for godes egsan,\n gl\u00e6dmod gyrne\u00f0 \u00a0\u00a0\u00a0\u00a0 \u00fe\u00e6t he godra m\u00e6st\n d\u00e6da gefremme; \u00a0\u00a0\u00a0\u00a0 \u00feam bi\u00fe dryhten scyld\n in si\u00fea gehwane, \u00a0\u00a0\u00a0\u00a0 sigora waldend,\n- 465\n- \n weoruda wilgiefa. \u00a0\u00a0\u00a0\u00a0 \u00feis \u00fea wyrta sind, \n w\u00e6stma blede, \u00a0\u00a0\u00a0\u00a0 \u00fea se wilda fugel\n somna\u00f0 under swegle \u00a0\u00a0\u00a0\u00a0 side ond wide\n to his wicstowe, \u00a0\u00a0\u00a0\u00a0 \u00fe\u00e6r he wundrum f\u00e6st\n wi\u00f0 ni\u00fea gehwam \u00a0\u00a0\u00a0\u00a0 nest gewyrce\u00f0.\n- 470\n- \n Swa nu in \u00feam wicum \u00a0\u00a0\u00a0\u00a0 willan fremma\u00f0 \n mode ond m\u00e6gne \u00a0\u00a0\u00a0\u00a0 meotudes cempan,\n m\u00e6r\u00f0a tilga\u00f0; \u00a0\u00a0\u00a0\u00a0 \u00fe\u00e6s him meorde wile\n ece \u00e6lmihtig \u00a0\u00a0\u00a0\u00a0 eadge forgildan.\n Beo\u00f0 him of \u00feam wyrtum \u00a0\u00a0\u00a0\u00a0 wic gesta\u00feelad\n- 475\n- \n in wuldres byrig \u00a0\u00a0\u00a0\u00a0 weorca to leane, \n \u00fe\u00e6s \u00fee hi geheoldan \u00a0\u00a0\u00a0\u00a0 halge lare\n hate \u00e6t heortan, \u00a0\u00a0\u00a0\u00a0 hige weallende\n d\u00e6ges ond nihtes \u00a0\u00a0\u00a0\u00a0 dryhten lufia\u00f0,\n leohte geleafan \u00a0\u00a0\u00a0\u00a0 leofne ceosa\u00f0\n- 480\n- \n ofer woruldwelan; \u00a0\u00a0\u00a0\u00a0 ne bi\u00fe him wynne hyht \n \u00fe\u00e6t hy \u00feis l\u00e6ne lif \u00a0\u00a0\u00a0\u00a0 long gewunien.\n \u00feus eadig eorl \u00a0\u00a0\u00a0\u00a0 ecan dreames,\n heofona hames \u00a0\u00a0\u00a0\u00a0 mid heahcyning\n earna\u00f0 on elne, \u00a0\u00a0\u00a0\u00a0 o\u00fe\u00fe\u00e6t ende cyme\u00f0\n- 485\n- \n dogorrimes, \u00a0\u00a0\u00a0\u00a0 \u00feonne dea\u00f0 nime\u00f0, \n wiga w\u00e6lgifre, \u00a0\u00a0\u00a0\u00a0 w\u00e6pnum ge\u00fery\u00feed,\n ealdor anra gehw\u00e6s, \u00a0\u00a0\u00a0\u00a0 ond in eor\u00fean f\u00e6\u00f0m\n snude sende\u00f0 \u00a0\u00a0\u00a0\u00a0 sawlum binumene\n l\u00e6ne lichoman, \u00a0\u00a0\u00a0\u00a0 \u00fe\u00e6r hi longe beo\u00f0\n- 490\n- \n o\u00f0 fyres cyme \u00a0\u00a0\u00a0\u00a0 foldan bi\u00feeahte. \n \u00f0onne monge beo\u00f0 \u00a0\u00a0\u00a0\u00a0 on gemot l\u00e6ded\n fyra cynnes; \u00a0\u00a0\u00a0\u00a0 wile f\u00e6der engla,\n sigora so\u00f0cyning, \u00a0\u00a0\u00a0\u00a0 seono\u00fe gehegan,\n dugu\u00f0a dryhten, \u00a0\u00a0\u00a0\u00a0 deman mid ryhte.\n- 495\n- \n \u00feonne \u00e6riste \u00a0\u00a0\u00a0\u00a0 ealle gefremma\u00fe \n men on moldan, \u00a0\u00a0\u00a0\u00a0 swa se mihtiga cyning\n beode\u00f0, brego engla, \u00a0\u00a0\u00a0\u00a0 byman stefne\n ofer sidne grund, \u00a0\u00a0\u00a0\u00a0 sawla nergend.\n Bi\u00f0 se deorca dea\u00f0 \u00a0\u00a0\u00a0\u00a0 dryhtnes meahtum\n- 500\n- \n eadgum geendad. \u00a0\u00a0\u00a0\u00a0 \u00e6\u00f0ele hweorfa\u00f0, \n \u00fereatum \u00feringa\u00f0, \u00a0\u00a0\u00a0\u00a0 \u00feonne \u00feeos woruld,\n scyldwyrcende, \u00a0\u00a0\u00a0\u00a0 in scome byrne\u00f0,\n ade on\u00e6led. \u00a0\u00a0\u00a0\u00a0 Weor\u00fee\u00f0 anra gehwylc\n forht on fer\u00fe\u00fee, \u00a0\u00a0\u00a0\u00a0 \u00feonne fyr brice\u00f0\n- 505\n- \n l\u00e6ne londwelan, \u00a0\u00a0\u00a0\u00a0 lig eal \u00feige\u00f0 \n eor\u00f0an \u00e6htgestreon, \u00a0\u00a0\u00a0\u00a0 \u00e6pplede gold\n gifre forgripe\u00f0, \u00a0\u00a0\u00a0\u00a0 gr\u00e6dig swelge\u00f0\n londes fr\u00e6twe. \u00a0\u00a0\u00a0\u00a0 \u00feonne on leoht cyme\u00f0\n \u00e6ldum \u00feisses \u00a0\u00a0\u00a0\u00a0 in \u00fea openan tid\n- 510\n- \n f\u00e6ger ond gefealic \u00a0\u00a0\u00a0\u00a0 fugles tacen, \n \u00feonne anwald eal \u00a0\u00a0\u00a0\u00a0 up astelle\u00f0\n of byrgenum, \u00a0\u00a0\u00a0\u00a0 ban geg\u00e6dra\u00f0,\n leomu lic somod, \u00a0\u00a0\u00a0\u00a0 ond lifes g\u00e6st,\n fore Cristes cneo. \u00a0\u00a0\u00a0\u00a0 Cyning \u00ferymlice\n- 515\n- \n of his heahsetle \u00a0\u00a0\u00a0\u00a0 halgum scine\u00f0, \n wlitig wuldres gim. \u00a0\u00a0\u00a0\u00a0 Wel bi\u00fe \u00feam \u00fee mot\n in \u00fea geomran tid \u00a0\u00a0\u00a0\u00a0 gode lician.\n \u00f0\u00e6r \u00fea lichoman, \u00a0\u00a0\u00a0\u00a0 leahtra cl\u00e6ne,\n gonga\u00f0 gl\u00e6dmode, \u00a0\u00a0\u00a0\u00a0 g\u00e6stas hweorfa\u00f0\n- 520\n- \n in banfatu, \u00a0\u00a0\u00a0\u00a0 \u00feonne bryne stige\u00f0 \n heah to heofonum. \u00a0\u00a0\u00a0\u00a0 Hat bi\u00f0 monegum\n egeslic \u00e6led, \u00a0\u00a0\u00a0\u00a0 \u00feonne anra gehwylc,\n so\u00f0f\u00e6st ge synnig, \u00a0\u00a0\u00a0\u00a0 sawel mid lice,\n from moldgrafum \u00a0\u00a0\u00a0\u00a0 sece\u00f0 meotudes dom,\n- 525\n- \n forhtaf\u00e6red. \u00a0\u00a0\u00a0\u00a0 Fyr bi\u00f0 on tihte, \n \u00e6le\u00f0 uncyste. \u00a0\u00a0\u00a0\u00a0 \u00fe\u00e6r \u00fea eadgan beo\u00f0\n \u00e6fter wr\u00e6chwile \u00a0\u00a0\u00a0\u00a0 weorcum bifongen,\n agnum d\u00e6dum. \u00a0\u00a0\u00a0\u00a0 \u00fe\u00e6t \u00fea \u00e6\u00feelan sind\n wyrta wynsume, \u00a0\u00a0\u00a0\u00a0 mid \u00feam se wilda fugel\n- 530\n- \n his sylfes nest \u00a0\u00a0\u00a0\u00a0 bisete\u00f0 utan, \n \u00fe\u00e6t hit f\u00e6ringa \u00a0\u00a0\u00a0\u00a0 fyre byrne\u00f0,\n forswele\u00f0 under sunnan, \u00a0\u00a0\u00a0\u00a0 ond he sylfa mid,\n ond \u00feonne \u00e6fter lige \u00a0\u00a0\u00a0\u00a0 lif eft onfeh\u00f0\n edniwinga. \u00a0\u00a0\u00a0\u00a0 Swa bi\u00f0 anra gehwylc\n- 535\n- \n fl\u00e6sce bifongen \u00a0\u00a0\u00a0\u00a0 fira cynnes, \n \u00e6nlic ond edgeong, \u00a0\u00a0\u00a0\u00a0 se \u00fee his agnum her\n willum gewyrce\u00f0 \u00a0\u00a0\u00a0\u00a0 \u00fe\u00e6t him wuldorcyning\n meahtig \u00e6t \u00feam m\u00e6\u00fele \u00a0\u00a0\u00a0\u00a0 milde geweor\u00fee\u00f0.\n \u00feonne hleo\u00feria\u00f0 \u00a0\u00a0\u00a0\u00a0 halge g\u00e6stas,\n- 540\n- \n sawla so\u00f0f\u00e6ste, \u00a0\u00a0\u00a0\u00a0 song ahebba\u00f0, \n cl\u00e6ne ond gecorene, \u00a0\u00a0\u00a0\u00a0 herga\u00f0 cyninges \u00ferym,\n stefn \u00e6fter stefne, \u00a0\u00a0\u00a0\u00a0 stiga\u00f0 to wuldre\n wlitige gewyrtad \u00a0\u00a0\u00a0\u00a0 mid hyra weld\u00e6dum.\n Beo\u00f0 \u00feonne amerede \u00a0\u00a0\u00a0\u00a0 monna g\u00e6stas,\n- 545\n- \n beorhte abywde \u00a0\u00a0\u00a0\u00a0 \u00feurh bryne fyres. \n Ne wene \u00fe\u00e6s \u00e6nig \u00a0\u00a0\u00a0\u00a0 \u00e6lda cynnes\n \u00fe\u00e6t ic lygewordum \u00a0\u00a0\u00a0\u00a0 leo\u00f0 somnige,\n write wo\u00f0cr\u00e6fte. \u00a0\u00a0\u00a0\u00a0 Gehyra\u00f0 witedom\n Iobes gieddinga. \u00a0\u00a0\u00a0\u00a0 \u00feurh g\u00e6stes bl\u00e6d\n- 550\n- \n breostum onbryrded, \u00a0\u00a0\u00a0\u00a0 beald reordade, \n wuldre geweor\u00f0ad; \u00a0\u00a0\u00a0\u00a0 he \u00fe\u00e6t word gecw\u00e6\u00f0:\n \"Ic \u00fe\u00e6t ne forhycge \u00a0\u00a0\u00a0\u00a0 heortan ge\u00feoncum,\n \u00fe\u00e6t ic in minum neste \u00a0\u00a0\u00a0\u00a0 neobed ceose,\n h\u00e6le hrawerig, \u00a0\u00a0\u00a0\u00a0 gewite hean \u00feonan\n- 555\n- \n on longne si\u00f0, \u00a0\u00a0\u00a0\u00a0 lame bitolden, \n geomor gud\u00e6da, \u00a0\u00a0\u00a0\u00a0 in greotes f\u00e6\u00f0m,\n ond \u00feonne \u00e6fter dea\u00fee \u00a0\u00a0\u00a0\u00a0 \u00feurh dryhtnes giefe\n swa se fugel fenix \u00a0\u00a0\u00a0\u00a0 feorh edniwe\n \u00e6fter \u00e6riste \u00a0\u00a0\u00a0\u00a0 agan mote,\n- 560\n- \n dreamas mid dryhten, \u00a0\u00a0\u00a0\u00a0 \u00fe\u00e6r seo deore scolu \n leofne lofia\u00f0. \u00a0\u00a0\u00a0\u00a0 Ic \u00fe\u00e6s lifes ne m\u00e6g\n \u00e6fre to ealdre \u00a0\u00a0\u00a0\u00a0 ende gebidan,\n leohtes ond lissa. \u00a0\u00a0\u00a0\u00a0 \u00feeah min lic scyle\n on mold\u00e6rne \u00a0\u00a0\u00a0\u00a0 molsnad weor\u00fean\n- 565\n- \n wyrmum to willan, \u00a0\u00a0\u00a0\u00a0 swa \u00feeah weoruda god \n \u00e6fter swylthwile \u00a0\u00a0\u00a0\u00a0 sawle alyse\u00f0\n ond in wuldor awece\u00f0. \u00a0\u00a0\u00a0\u00a0 Me \u00fe\u00e6s wen n\u00e6fre\n forbirste\u00f0 in breostum, \u00a0\u00a0\u00a0\u00a0 \u00f0e ic in brego engla\n for\u00f0weardne gefean \u00a0\u00a0\u00a0\u00a0 f\u00e6ste h\u00e6bbe.\"\n- 570\n- \n \u00f0us frod guma \u00a0\u00a0\u00a0\u00a0 on fyrndagum \n gieddade gleawmod, \u00a0\u00a0\u00a0\u00a0 godes spelboda,\n ymb his \u00e6riste \u00a0\u00a0\u00a0\u00a0 in ece lif,\n \u00fe\u00e6t we \u00fey geornor \u00a0\u00a0\u00a0\u00a0 ongietan meahten\n tirf\u00e6st tacen \u00a0\u00a0\u00a0\u00a0 \u00fe\u00e6t se torhta fugel\n- 575\n- \n \u00feurh bryne beacna\u00f0. \u00a0\u00a0\u00a0\u00a0 Bana lafe, \n ascan ond yslan, \u00a0\u00a0\u00a0\u00a0 ealle gesomna\u00f0\n \u00e6fter ligbryne, \u00a0\u00a0\u00a0\u00a0 l\u00e6de\u00fe si\u00fe\u00fean\n fugel on fotum \u00a0\u00a0\u00a0\u00a0 to frean geardum,\n sunnan togeanes. \u00a0\u00a0\u00a0\u00a0 \u00fe\u00e6r hi si\u00fe\u00fean for\u00f0\n- 580\n- \n wunia\u00f0 wintra fela, \u00a0\u00a0\u00a0\u00a0 w\u00e6stmum geniwad, \n ealles edgiong, \u00a0\u00a0\u00a0\u00a0 \u00fe\u00e6r \u00e6nig ne m\u00e6g\n in \u00feam leodscype \u00a0\u00a0\u00a0\u00a0 l\u00e6\u00fe\u00feum hwopan.\n Swa nu \u00e6fter dea\u00f0e \u00a0\u00a0\u00a0\u00a0 \u00feurh dryhtnes miht\n somod si\u00feia\u00fe \u00a0\u00a0\u00a0\u00a0 sawla mid lice,\n- 585\n- \n f\u00e6gre gefr\u00e6twed, \u00a0\u00a0\u00a0\u00a0 fugle gelicast, \n in eadwelum \u00a0\u00a0\u00a0\u00a0 \u00e6\u00feelum stencum,\n \u00fe\u00e6r seo so\u00fef\u00e6ste \u00a0\u00a0\u00a0\u00a0 sunne lihte\u00f0\n wlitig ofer weoredum \u00a0\u00a0\u00a0\u00a0 in wuldres byrig.\n \u00f0onne so\u00f0f\u00e6stum \u00a0\u00a0\u00a0\u00a0 sawlum scine\u00f0\n- 590\n- \n heah ofer hrofas \u00a0\u00a0\u00a0\u00a0 h\u00e6lende Crist. \n Him folgia\u00f0 \u00a0\u00a0\u00a0\u00a0 fuglas scyne,\n beorhte gebredade, \u00a0\u00a0\u00a0\u00a0 blissum hremige,\n in \u00feam gladan ham, \u00a0\u00a0\u00a0\u00a0 g\u00e6stas gecorene,\n ece to ealdre. \u00a0\u00a0\u00a0\u00a0 \u00fe\u00e6r him yfle ne m\u00e6g\n- 595\n- \n fah feond gemah \u00a0\u00a0\u00a0\u00a0 facne sce\u00fe\u00fean, \n ac \u00fe\u00e6r lifga\u00f0 a \u00a0\u00a0\u00a0\u00a0 leohte werede,\n swa se fugel fenix, \u00a0\u00a0\u00a0\u00a0 in freo\u00feu dryhtnes,\n wlitige in wuldre. \u00a0\u00a0\u00a0\u00a0 Weorc anra gehw\u00e6s\n beorhte blice\u00f0 \u00a0\u00a0\u00a0\u00a0 in \u00feam bli\u00fean ham\n- 600\n- \n fore onsyne \u00a0\u00a0\u00a0\u00a0 ecan dryhtnes, \n symle in sibbe, \u00a0\u00a0\u00a0\u00a0 sunnan gelice.\n \u00fe\u00e6r se beorhta beag, \u00a0\u00a0\u00a0\u00a0 brogden wundrum\n eorcnanstanum, \u00a0\u00a0\u00a0\u00a0 eadigra gehwam\n hlifa\u00f0 ofer heafde. \u00a0\u00a0\u00a0\u00a0 Heafelan lixa\u00f0,\n- 605\n- \n \u00ferymme bi\u00feeahte. \u00a0\u00a0\u00a0\u00a0 \u00f0eodnes cynegold \n so\u00f0f\u00e6stra gehwone \u00a0\u00a0\u00a0\u00a0 sellic glenge\u00f0\n leohte in life, \u00a0\u00a0\u00a0\u00a0 \u00fe\u00e6r se longa gefea,\n ece ond edgeong, \u00a0\u00a0\u00a0\u00a0 \u00e6fre ne swe\u00fera\u00f0,\n ac hy in wlite wunia\u00f0, \u00a0\u00a0\u00a0\u00a0 wuldre bitolden\n- 610\n- \n f\u00e6grum fr\u00e6twum, \u00a0\u00a0\u00a0\u00a0 mid f\u00e6der engla. \n Ne bi\u00f0 him on \u00feam wicum \u00a0\u00a0\u00a0\u00a0 wiht to sorge,\n wroht ne we\u00feel \u00a0\u00a0\u00a0\u00a0 ne gewindagas,\n hungor se hata \u00a0\u00a0\u00a0\u00a0 ne se hearda \u00feurst,\n yrm\u00feu ne yldo. \u00a0\u00a0\u00a0\u00a0 Him se \u00e6\u00feela cyning\n- 615\n- \n forgife\u00f0 goda gehwylc. \u00a0\u00a0\u00a0\u00a0 \u00fe\u00e6r g\u00e6sta gedryht \n h\u00e6lend herga\u00f0 \u00a0\u00a0\u00a0\u00a0 ond heofoncyninges\n meahte m\u00e6rsia\u00f0, \u00a0\u00a0\u00a0\u00a0 singa\u00f0 metude lof.\n Swinsa\u00f0 sibgedryht \u00a0\u00a0\u00a0\u00a0 swega m\u00e6ste\n h\u00e6dre ymb \u00fe\u00e6t halge \u00a0\u00a0\u00a0\u00a0 heahseld godes,\n- 620\n- \n bli\u00fee bletsia\u00f0 \u00a0\u00a0\u00a0\u00a0 bregu selestan \n eadge mid englum, \u00a0\u00a0\u00a0\u00a0 efenhleo\u00fere \u00feus:\n \"Sib si \u00fee, so\u00f0 god, \u00a0\u00a0\u00a0\u00a0 ond snyttrucr\u00e6ft,\n ond \u00fee \u00feonc sy \u00a0\u00a0\u00a0\u00a0 \u00ferymsittendum\n geongra gyfena, \u00a0\u00a0\u00a0\u00a0 goda gehwylces.\n- 625\n- \n Micel, unm\u00e6te \u00a0\u00a0\u00a0\u00a0 m\u00e6gnes streng\u00f0u, \n heah ond halig! \u00a0\u00a0\u00a0\u00a0 Heofonas sindon\n f\u00e6gre gefylled, \u00a0\u00a0\u00a0\u00a0 f\u00e6der \u00e6lmihtig,\n ealra \u00ferymma \u00ferym, \u00a0\u00a0\u00a0\u00a0 \u00feines wuldres,\n uppe mid englum \u00a0\u00a0\u00a0\u00a0 ond on eor\u00f0an somod.\n- 630\n- \n Gefreo\u00fea usic, frym\u00fea scyppend! \u00a0\u00a0\u00a0\u00a0 \u00feu eart f\u00e6der \u00e6lmihtig \n in heannesse, \u00a0\u00a0\u00a0\u00a0 heofuna waldend.\"\n \u00f0us reordia\u00f0 \u00a0\u00a0\u00a0\u00a0 ryhtfremmende,\n manes amerede, \u00a0\u00a0\u00a0\u00a0 in \u00fe\u00e6re m\u00e6ran byrig;\n cyne\u00ferym cy\u00fea\u00f0, \u00a0\u00a0\u00a0\u00a0 caseres lof\n- 635\n- \n singa\u00f0 on swegle \u00a0\u00a0\u00a0\u00a0 so\u00f0f\u00e6stra gedryht, \n \u00feam anum is \u00a0\u00a0\u00a0\u00a0 ece weor\u00f0mynd\n for\u00f0 butan ende. \u00a0\u00a0\u00a0\u00a0 N\u00e6s his frym\u00f0 \u00e6fre,\n eades ongyn. \u00a0\u00a0\u00a0\u00a0 \u00feeah he on eor\u00fean her\n \u00feurh cildes had \u00a0\u00a0\u00a0\u00a0 cenned w\u00e6re\n- 640\n- \n in middangeard, \u00a0\u00a0\u00a0\u00a0 hw\u00e6\u00fere his meahta sped \n heah ofer heofonum \u00a0\u00a0\u00a0\u00a0 halig wunade,\n dom unbryce. \u00a0\u00a0\u00a0\u00a0 \u00feeah he dea\u00fees cwealm\n on rode treow \u00a0\u00a0\u00a0\u00a0 r\u00e6fnan sceolde,\n \u00feearlic wite, \u00a0\u00a0\u00a0\u00a0 he \u00fey \u00feriddan d\u00e6ge\n- 645\n- \n \u00e6fter lices hryre \u00a0\u00a0\u00a0\u00a0 lif eft onfeng \n \u00feurh f\u00e6der fultum. \u00a0\u00a0\u00a0\u00a0 Swa fenix beacna\u00f0,\n geong in geardum, \u00a0\u00a0\u00a0\u00a0 godbearnes meaht,\n \u00feonne he of ascan \u00a0\u00a0\u00a0\u00a0 eft onw\u00e6cne\u00f0\n in lifes lif, \u00a0\u00a0\u00a0\u00a0 leomum ge\u00feungen.\n- 650\n- \n Swa se h\u00e6lend us \u00a0\u00a0\u00a0\u00a0 helpe gefremede \n \u00feurh his lices gedal, \u00a0\u00a0\u00a0\u00a0 lif butan ende,\n swa se fugel swetum \u00a0\u00a0\u00a0\u00a0 his fi\u00feru tu\n ond wynsumum \u00a0\u00a0\u00a0\u00a0 wyrtum gefylle\u00f0,\n f\u00e6grum foldw\u00e6stmum, \u00a0\u00a0\u00a0\u00a0 \u00feonne afysed bi\u00f0.\n- 655\n- \n \u00fe\u00e6t sindon \u00fea word, \u00a0\u00a0\u00a0\u00a0 swa us gewritu secga\u00f0, \n hleo\u00feor haligra, \u00a0\u00a0\u00a0\u00a0 \u00fee him to heofonum bi\u00f0,\n to \u00feam mildan gode, \u00a0\u00a0\u00a0\u00a0 mod afysed\n in dreama dream, \u00a0\u00a0\u00a0\u00a0 \u00fe\u00e6r hi dryhtne to giefe\n worda ond weorca \u00a0\u00a0\u00a0\u00a0 wynsumne stenc\n- 660\n- \n in \u00fea m\u00e6ran gesceaft \u00a0\u00a0\u00a0\u00a0 meotude bringa\u00f0, \n in \u00fe\u00e6t leohte lif. \u00a0\u00a0\u00a0\u00a0 Sy him lof symle\n \u00feurh woruld worulda, \u00a0\u00a0\u00a0\u00a0 ond wuldres bl\u00e6d,\n ar ond onwald, \u00a0\u00a0\u00a0\u00a0 in \u00feam uplican\n rodera rice. \u00a0\u00a0\u00a0\u00a0 He is on ryht cyning\n- 665\n- \n middangeardes \u00a0\u00a0\u00a0\u00a0 ond m\u00e6gen\u00ferymmes, \n wuldre biwunden \u00a0\u00a0\u00a0\u00a0 in \u00fe\u00e6re wlitigan byrig.\n Hafa\u00f0 us alyfed \u00a0\u00a0\u00a0\u00a0 lucis auctor\n \u00fe\u00e6t we motun her \u00a0\u00a0\u00a0\u00a0 merueri,\n godd\u00e6dum begietan \u00a0\u00a0\u00a0\u00a0 gaudia in celo,\n- 670\n- \n \u00fe\u00e6r we motun \u00a0\u00a0\u00a0\u00a0 maxima regna \n secan ond gesittan \u00a0\u00a0\u00a0\u00a0 sedibus altis,\n lifgan in lisse \u00a0\u00a0\u00a0\u00a0 lucis et pacis,\n agan eardinga \u00a0\u00a0\u00a0\u00a0 alm\u00e6 letitie,\n brucan bl\u00e6ddaga, \u00a0\u00a0\u00a0\u00a0 blandem et mitem\n- 675\n- \n geseon sigora frean \u00a0\u00a0\u00a0\u00a0 sine fine, \n ond him lof singan \u00a0\u00a0\u00a0\u00a0 laude perenne,\n eadge mid englum. \u00a0\u00a0\u00a0\u00a0 Alleluia.","title":"The Phoenix","type":"page"}