{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a03_06.htm","path":"neu/ascp/a03_06.htm","source_url":"https://sacred-texts.com/neu/ascp/a03_06.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Wanderer\n Verse Indeterminate Saxon\n \n - \n Oft him anhaga \u00a0\u00a0\u00a0\u00a0 are gebide\u00f0, \n metudes miltse, \u00a0\u00a0\u00a0\u00a0 \u00feeah \u00fee he modcearig\n geond lagulade \u00a0\u00a0\u00a0\u00a0 longe sceolde\n hreran mid hondum \u00a0\u00a0\u00a0\u00a0 hrimcealde s\u00e6,\n- 5\n- \n wadan wr\u00e6clastas. \u00a0\u00a0\u00a0\u00a0 Wyrd bi\u00f0 ful ared! \n Swa cw\u00e6\u00f0 eardstapa, \u00a0\u00a0\u00a0\u00a0 earfe\u00fea gemyndig,\n wra\u00fera w\u00e6lsleahta, \u00a0\u00a0\u00a0\u00a0 winem\u00e6ga hryre:\n \"Oft ic sceolde ana \u00a0\u00a0\u00a0\u00a0 uhtna gehwylce\n mine ceare cwi\u00fean. \u00a0\u00a0\u00a0\u00a0 Nis nu cwicra nan\n- 10\n- \n \u00fee ic him modsefan \u00a0\u00a0\u00a0\u00a0 minne durre \n sweotule asecgan. \u00a0\u00a0\u00a0\u00a0 Ic to so\u00fee wat\n \u00fe\u00e6t bi\u00fe in eorle \u00a0\u00a0\u00a0\u00a0 indryhten \u00feeaw,\n \u00fe\u00e6t he his fer\u00f0locan \u00a0\u00a0\u00a0\u00a0 f\u00e6ste binde,\n healde his hordcofan, \u00a0\u00a0\u00a0\u00a0 hycge swa he wille.\n- 15\n- \n Ne m\u00e6g werig mod \u00a0\u00a0\u00a0\u00a0 wyrde wi\u00f0stondan, \n ne se hreo hyge \u00a0\u00a0\u00a0\u00a0 helpe gefremman.\n For\u00f0on domgeorne \u00a0\u00a0\u00a0\u00a0 dreorigne oft\n in hyra breostcofan \u00a0\u00a0\u00a0\u00a0 binda\u00f0 f\u00e6ste;\n swa ic modsefan \u00a0\u00a0\u00a0\u00a0 minne sceolde,\n- 20\n- \n oft earmcearig, \u00a0\u00a0\u00a0\u00a0 e\u00f0le bid\u00e6led, \n freom\u00e6gum feor \u00a0\u00a0\u00a0\u00a0 feterum s\u00e6lan,\n si\u00fe\u00fean geara iu \u00a0\u00a0\u00a0\u00a0 goldwine minne\n hrusan heolstre biwrah, \u00a0\u00a0\u00a0\u00a0 ond ic hean \u00feonan\n wod wintercearig \u00a0\u00a0\u00a0\u00a0 ofer wa\u00feema gebind,\n- 25\n- \n sohte sele dreorig \u00a0\u00a0\u00a0\u00a0 sinces bryttan, \n hw\u00e6r ic feor o\u00fe\u00fee neah \u00a0\u00a0\u00a0\u00a0 findan meahte\n \u00feone \u00fee in meoduhealle \u00a0\u00a0\u00a0\u00a0 min mine wisse,\n o\u00fe\u00fee mec freondleasne \u00a0\u00a0\u00a0\u00a0 frefran wolde,\n weman mid wynnum. \u00a0\u00a0\u00a0\u00a0 Wat se \u00fee cunna\u00f0,\n- 30\n- \n hu sli\u00feen bi\u00f0 \u00a0\u00a0\u00a0\u00a0 sorg to geferan, \n \u00feam \u00fee him lyt hafa\u00f0 \u00a0\u00a0\u00a0\u00a0 leofra geholena.\n Wara\u00f0 hine wr\u00e6clast, \u00a0\u00a0\u00a0\u00a0 nales wunden gold,\n fer\u00f0loca freorig, \u00a0\u00a0\u00a0\u00a0 nal\u00e6s foldan bl\u00e6d.\n Gemon he selesecgas \u00a0\u00a0\u00a0\u00a0 ond sinc\u00feege,\n- 35\n- \n hu hine on geogu\u00f0e \u00a0\u00a0\u00a0\u00a0 his goldwine \n wenede to wiste. \u00a0\u00a0\u00a0\u00a0 Wyn eal gedreas!\n For\u00feon wat se \u00fee sceal \u00a0\u00a0\u00a0\u00a0 his winedryhtnes\n leofes larcwidum \u00a0\u00a0\u00a0\u00a0 longe for\u00feolian,\n \u00f0onne sorg ond sl\u00e6p \u00a0\u00a0\u00a0\u00a0 somod \u00e6tg\u00e6dre\n- 40\n- \n earmne anhogan \u00a0\u00a0\u00a0\u00a0 oft gebinda\u00f0. \n \u00feince\u00f0 him on mode \u00a0\u00a0\u00a0\u00a0 \u00fe\u00e6t he his mondryhten\n clyppe ond cysse, \u00a0\u00a0\u00a0\u00a0 ond on cneo lecge\n honda ond heafod, \u00a0\u00a0\u00a0\u00a0 swa he hwilum \u00e6r\n in geardagum \u00a0\u00a0\u00a0\u00a0 giefstolas breac.\n- 45\n- \n \u00f0onne onw\u00e6cne\u00f0 eft \u00a0\u00a0\u00a0\u00a0 wineleas guma, \n gesih\u00f0 him biforan \u00a0\u00a0\u00a0\u00a0 fealwe wegas,\n ba\u00feian brimfuglas, \u00a0\u00a0\u00a0\u00a0 br\u00e6dan fe\u00fera,\n hreosan hrim ond snaw, \u00a0\u00a0\u00a0\u00a0 hagle gemenged.\n \u00feonne beo\u00f0 \u00fey hefigran \u00a0\u00a0\u00a0\u00a0 heortan benne,\n- 50\n- \n sare \u00e6fter sw\u00e6sne. \u00a0\u00a0\u00a0\u00a0 Sorg bi\u00f0 geniwad, \n \u00feonne maga gemynd \u00a0\u00a0\u00a0\u00a0 mod geondhweorfe\u00f0;\n grete\u00f0 gliwstafum, \u00a0\u00a0\u00a0\u00a0 georne geondsceawa\u00f0\n secga geseldan. \u00a0\u00a0\u00a0\u00a0 Swimma\u00f0 eft on weg!\n Fleotendra fer\u00f0 \u00a0\u00a0\u00a0\u00a0 no \u00fe\u00e6r fela bringe\u00f0\n- 55\n- \n cu\u00f0ra cwidegiedda. \u00a0\u00a0\u00a0\u00a0 Cearo bi\u00f0 geniwad \n \u00feam \u00fee sendan sceal \u00a0\u00a0\u00a0\u00a0 swi\u00fee geneahhe\n ofer wa\u00feema gebind \u00a0\u00a0\u00a0\u00a0 werigne sefan.\n For\u00feon ic ge\u00feencan ne m\u00e6g \u00a0\u00a0\u00a0\u00a0 geond \u00feas woruld\n for hwan modsefa \u00a0\u00a0\u00a0\u00a0 min ne gesweorce,\n- 60\n- \n \u00feonne ic eorla lif \u00a0\u00a0\u00a0\u00a0 eal geond\u00feence, \n hu hi f\u00e6rlice \u00a0\u00a0\u00a0\u00a0 flet ofgeafon,\n modge magu\u00feegnas. \u00a0\u00a0\u00a0\u00a0 Swa \u00fees middangeard\n ealra dogra gehwam \u00a0\u00a0\u00a0\u00a0 dreose\u00f0 ond fealle\u00fe,\n for\u00feon ne m\u00e6g weor\u00fean wis \u00a0\u00a0\u00a0\u00a0 wer, \u00e6r he age\n- 65\n- \n wintra d\u00e6l in woruldrice. \u00a0\u00a0\u00a0\u00a0 Wita sceal ge\u00feyldig, \n ne sceal no to hatheort \u00a0\u00a0\u00a0\u00a0 ne to hr\u00e6dwyrde,\n ne to wac wiga \u00a0\u00a0\u00a0\u00a0 ne to wanhydig,\n ne to forht ne to f\u00e6gen, \u00a0\u00a0\u00a0\u00a0 ne to feohgifre\n ne n\u00e6fre gielpes to georn, \u00a0\u00a0\u00a0\u00a0 \u00e6r he geare cunne.\n- 70\n- \n Beorn sceal gebidan, \u00a0\u00a0\u00a0\u00a0 \u00feonne he beot sprice\u00f0, \n o\u00fe\u00fe\u00e6t collenfer\u00f0 \u00a0\u00a0\u00a0\u00a0 cunne gearwe\n hwider hre\u00fera gehygd \u00a0\u00a0\u00a0\u00a0 hweorfan wille.\n Ongietan sceal gleaw h\u00e6le \u00a0\u00a0\u00a0\u00a0 hu g\u00e6stlic bi\u00f0,\n \u00feonne ealre \u00feisse worulde wela \u00a0\u00a0\u00a0\u00a0 weste stonde\u00f0,\n- 75\n- \n swa nu missenlice \u00a0\u00a0\u00a0\u00a0 geond \u00feisne middangeard \n winde biwaune \u00a0\u00a0\u00a0\u00a0 weallas stonda\u00fe,\n hrime bihrorene, \u00a0\u00a0\u00a0\u00a0 hry\u00f0ge \u00fea ederas.\n Woria\u00f0 \u00fea winsalo, \u00a0\u00a0\u00a0\u00a0 waldend licga\u00f0\n dreame bidrorene, \u00a0\u00a0\u00a0\u00a0 dugu\u00fe eal gecrong,\n- 80\n- \n wlonc bi wealle. \u00a0\u00a0\u00a0\u00a0 Sume wig fornom, \n ferede in for\u00f0wege, \u00a0\u00a0\u00a0\u00a0 sumne fugel o\u00feb\u00e6r\n ofer heanne holm, \u00a0\u00a0\u00a0\u00a0 sumne se hara wulf\n dea\u00f0e ged\u00e6lde, \u00a0\u00a0\u00a0\u00a0 sumne dreorighleor\n in eor\u00f0scr\u00e6fe \u00a0\u00a0\u00a0\u00a0 eorl gehydde.\n- 85\n- \n Y\u00fede swa \u00feisne eardgeard \u00a0\u00a0\u00a0\u00a0 \u00e6lda scyppend \n o\u00fe\u00fe\u00e6t burgwara \u00a0\u00a0\u00a0\u00a0 breahtma lease\n eald enta geweorc \u00a0\u00a0\u00a0\u00a0 idlu stodon.\n Se \u00feonne \u00feisne wealsteal \u00a0\u00a0\u00a0\u00a0 wise ge\u00feohte\n ond \u00feis deorce lif \u00a0\u00a0\u00a0\u00a0 deope geond\u00feence\u00f0,\n- 90\n- \n frod in fer\u00f0e, \u00a0\u00a0\u00a0\u00a0 feor oft gemon \n w\u00e6lsleahta worn, \u00a0\u00a0\u00a0\u00a0 ond \u00feas word acwi\u00f0:\n \"Hw\u00e6r cwom mearg? Hw\u00e6r cwom mago? \u00a0\u00a0\u00a0\u00a0 Hw\u00e6r cwom ma\u00fe\u00feumgyfa?\n Hw\u00e6r cwom symbla gesetu? \u00a0\u00a0\u00a0\u00a0 Hw\u00e6r sindon seledreamas?\n Eala beorht bune! \u00a0\u00a0\u00a0\u00a0 Eala byrnwiga!\n- 95\n- \n Eala \u00feeodnes \u00ferym! \u00a0\u00a0\u00a0\u00a0 Hu seo \u00ferag gewat, \n genap under nihthelm, \u00a0\u00a0\u00a0\u00a0 swa heo no w\u00e6re.\n Stonde\u00f0 nu on laste \u00a0\u00a0\u00a0\u00a0 leofre dugu\u00fee\n weal wundrum heah, \u00a0\u00a0\u00a0\u00a0 wyrmlicum fah.\n Eorlas fornoman \u00a0\u00a0\u00a0\u00a0 asca \u00fery\u00fee,\n- 100\n- \n w\u00e6pen w\u00e6lgifru, \u00a0\u00a0\u00a0\u00a0 wyrd seo m\u00e6re, \n ond \u00feas stanhleo\u00feu \u00a0\u00a0\u00a0\u00a0 stormas cnyssa\u00f0,\n hri\u00f0 hreosende \u00a0\u00a0\u00a0\u00a0 hrusan binde\u00f0,\n wintres woma, \u00a0\u00a0\u00a0\u00a0 \u00feonne won cyme\u00f0,\n nipe\u00f0 nihtscua, \u00a0\u00a0\u00a0\u00a0 nor\u00fean onsende\u00f0\n- 105\n- \n hreo h\u00e6glfare \u00a0\u00a0\u00a0\u00a0 h\u00e6le\u00feum on andan. \n Eall is earfo\u00f0lic \u00a0\u00a0\u00a0\u00a0 eor\u00fean rice,\n onwende\u00f0 wyrda gesceaft \u00a0\u00a0\u00a0\u00a0 weoruld under heofonum.\n Her bi\u00f0 feoh l\u00e6ne, \u00a0\u00a0\u00a0\u00a0 her bi\u00f0 freond l\u00e6ne,\n her bi\u00f0 mon l\u00e6ne, \u00a0\u00a0\u00a0\u00a0 her bi\u00f0 m\u00e6g l\u00e6ne,\n- 110\n- \n eal \u00feis eor\u00fean gesteal \u00a0\u00a0\u00a0\u00a0 idel weor\u00fee\u00f0!\" \n Swa cw\u00e6\u00f0 snottor on mode, \u00a0\u00a0\u00a0\u00a0 ges\u00e6t him sundor \u00e6t rune.\n Til bi\u00fe se \u00fee his treowe gehealde\u00fe, \u00a0\u00a0\u00a0\u00a0 ne sceal n\u00e6fre his torn to rycene\n beorn of his breostum acy\u00fean, \u00a0\u00a0\u00a0\u00a0 nem\u00fee he \u00e6r \u00fea bote cunne,\n eorl mid elne gefremman. \u00a0\u00a0\u00a0\u00a0 Wel bi\u00f0 \u00feam \u00fee him are sece\u00f0,\n- 115\n- \n frofre to f\u00e6der on heofonum, \u00a0\u00a0\u00a0\u00a0 \u00fe\u00e6r us eal seo f\u00e6stnung stonde\u00f0.","title":"The Wanderer","type":"page"}