{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a03_08.htm","path":"neu/ascp/a03_08.htm","source_url":"https://sacred-texts.com/neu/ascp/a03_08.htm","text":"\u00f0us frod f\u00e6der freobearn l\u00e6rde,\nmodsnottor mon, maga cystum eald,\nwordum wisf\u00e6stum, \u00fe\u00e6t he wel \u00feunge:\n\"Do a \u00fe\u00e6tte duge, deag \u00fein gewyrhtu;\n5\ngod \u00fee bi\u00fe symle goda gehwylces\nfrea ond fultum, feond \u00feam o\u00ferum\nwyrsan gewyrhta. Wene \u00feec \u00fey betran,\nefn elne \u00feis a \u00feenden \u00feu lifge.\nF\u00e6der ond modor freo \u00feu mid heortan,\n10\nmaga gehwylcne, gif him sy meotud on lufan.\nWes \u00feu \u00feinum yldrum arf\u00e6st symle,\nf\u00e6gerwyrde, ond \u00fee in fer\u00f0e l\u00e6t\n\u00feine lareowas leofe in mode,\n\u00fea \u00feec geornast to gode trymmen.\"\n15\nF\u00e6der eft his sunu frod gegrette\no\u00fere si\u00fee: \"Heald elne \u00feis!\nNe freme firene, ne n\u00e6fre freonde \u00feinum,\nm\u00e6ge man ne ge\u00feafa, \u00fey l\u00e6s \u00feec meotud oncunne,\n\u00fe\u00e6t \u00feu sy wommes gewita. He \u00fee mid wite gielde\u00f0,\n20\nswylce \u00feam o\u00ferum mid eadwelan.\"\n\u00f0riddan sy\u00fee \u00feoncsnottor guma\nbreostgehygdum his bearn l\u00e6rde:\n\"Ne gewuna wyrsa, widan feore,\n\u00e6ngum eahta, ac \u00feu \u00fee anne genim\n25\nto gesprecan symle spella ond lara\nr\u00e6dhycgende. Sy ymb rice swa hit m\u00e6ge.\"\nFeor\u00fean si\u00f0e f\u00e6der eft l\u00e6rde\nmodleofne magan, \u00fe\u00e6t he gemunde \u00feis:\n\"Ne aswic sundorwine, ac a symle geheald\n30\nryhtum gerisnum. R\u00e6fn elne \u00feis,\n\u00fe\u00e6t \u00feu n\u00e6fre f\u00e6cne weor\u00f0e freonde \u00feinum.\"\nFiftan si\u00fee f\u00e6der eft ongon\nbreostge\u00feoncum his bearn l\u00e6ran:\n\"Druncen beorg \u00fee ond dollic word,\n35\nman on mode ond in mu\u00fee lyge,\nyrre ond \u00e6feste ond idese lufan.\nFor\u00f0on sceal \u00e6wiscmod oft si\u00feian,\nse \u00fee gewite\u00f0 in wifes lufan,\nfremdre meowlan. \u00fe\u00e6r bi\u00f0 a firena wen,\n40\nla\u00f0licre scome, long ni\u00f0 wi\u00f0 god,\ngeotende gielp. Wes \u00feu a giedda wis,\nw\u00e6r wi\u00f0 willan, worda hyrde.\"\nSiextan si\u00fee sw\u00e6s eft ongon\n\u00feurh bli\u00f0ne ge\u00feoht his bearn l\u00e6ran:\n45\n\"Ongiet georne hw\u00e6t sy god o\u00fe\u00fee yfel,\nond toscead simle scearpe mode\nin sefan \u00feinum ond \u00fee a \u00fe\u00e6t selle geceos.\nA \u00fee bi\u00f0 ged\u00e6led; gif \u00fee deah hyge,\nwuna\u00f0 wisdom in, ond \u00feu wast geare\n50\nondgit yfles, heald \u00fee elne wi\u00f0,\nfeorma \u00feu symle in \u00feinum fer\u00f0e god.\"\nSeofe\u00fean si\u00fee his sunu l\u00e6rde\nf\u00e6der, frod guma, s\u00e6gde fela geongum:\n\"Seldan snottor guma sorgleas blissa\u00f0,\nhis mago monian mildum wordum:\n\"Leorna lare l\u00e6rgedefe,\nwene \u00feec in wisdom, weoruda scyppend\nhafa \u00fee to hyhte, haligra gemynd,\nond a so\u00f0 to syge, \u00feonne \u00feu secge hw\u00e6t.\"\n65\nNige\u00fean si\u00fee n\u00e6gde se gomola,\neald u\u00f0wita s\u00e6gde eaforan worn:\n\"Nis nu fela folca \u00fe\u00e6tte fyrngewritu\nhealdan wille, ac him hyge brosna\u00f0,\nellen cola\u00f0, idla\u00f0 \u00feeodscype;\n70\nne habba\u00f0 wiht for \u00fe\u00e6t, \u00feeah hi wom don\nofer meotudes bibod. Monig sceal ongieldan\nsawelsusles. Ac l\u00e6t \u00feinne sefan healdan for\u00f0fyrngewritu ond frean domas,\n\u00fea \u00fee her on m\u00e6g\u00f0e gehw\u00e6re men forl\u00e6ta\u00fe\n75\nswi\u00feor asigan, \u00feonne him sy sylfum ryht.\"\nTeo\u00fean si\u00fee tornsorgna ful,\neald eft ongon eaforan l\u00e6ran:\n\"Snyttra bruce\u00fe \u00fee fore sawle lufan\nwarna\u00f0 him wommas worda ond d\u00e6da\n80\non sefan symle ond so\u00fe freme\u00f0;\nbi\u00f0 him geofona gehwylc gode geyced,\nmeahtum spedig, \u00feonne he mon flyh\u00f0.\nYrre ne l\u00e6t \u00fee \u00e6fre gewealdan,\nheah in hre\u00fere, heoroworda grund\n85\nwylme bismitan, ac him warna\u00f0 \u00fe\u00e6t\non geheortum hyge. H\u00e6le sceal wisf\u00e6st\nond gemetlice, modes snottor,\ngleaw in gehygdum, georn wisdomes,\nswa he wi\u00f0 \u00e6lda m\u00e6g eades hleotan.\n90\nNe beo \u00feu no to t\u00e6lende, ne to tweospr\u00e6ce,\nne \u00fee on mode l\u00e6t men to fraco\u00fee,\nac beo leofwende, leoht on gehygdum\nber breostcofan. Swa \u00feu, min bearn, gemyne\nfrode f\u00e6der lare ond \u00feec a wi\u00f0 firenum geheald.\"","title":"Precepts","type":"page"}