{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a03_09.htm","path":"neu/ascp/a03_09.htm","source_url":"https://sacred-texts.com/neu/ascp/a03_09.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Seafarer\n Verse Indeterminate Saxon\n \n - \n M\u00e6g ic be me sylfum \u00a0\u00a0\u00a0\u00a0 so\u00f0gied wrecan, \n si\u00feas secgan, \u00a0\u00a0\u00a0\u00a0 hu ic geswincdagum\n earfo\u00f0hwile \u00a0\u00a0\u00a0\u00a0 oft \u00ferowade,\n bitre breostceare \u00a0\u00a0\u00a0\u00a0 gebiden h\u00e6bbe,\n- 5\n- \n gecunnad in ceole \u00a0\u00a0\u00a0\u00a0 cearselda fela, \n atol y\u00fea gewealc, \u00a0\u00a0\u00a0\u00a0 \u00fe\u00e6r mec oft bigeat\n nearo nihtwaco \u00a0\u00a0\u00a0\u00a0 \u00e6t nacan stefnan,\n \u00feonne he be clifum cnossa\u00f0. \u00a0\u00a0\u00a0\u00a0 Calde ge\u00ferungen\n w\u00e6ron mine fet, \u00a0\u00a0\u00a0\u00a0 forste gebunden,\n- 10\n- \n caldum clommum, \u00a0\u00a0\u00a0\u00a0 \u00fe\u00e6r \u00fea ceare seofedun \n hat ymb heortan; \u00a0\u00a0\u00a0\u00a0 hungor innan slat\n merewerges mod. \u00a0\u00a0\u00a0\u00a0 \u00fe\u00e6t se mon ne wat\n \u00fee him on foldan \u00a0\u00a0\u00a0\u00a0 f\u00e6grost limpe\u00f0,\n hu ic earmcearig \u00a0\u00a0\u00a0\u00a0 iscealdne s\u00e6\n- 15\n- \n winter wunade \u00a0\u00a0\u00a0\u00a0 wr\u00e6ccan lastum, \n winem\u00e6gum bidroren,\n bihongen hrimgicelum; \u00a0\u00a0\u00a0\u00a0 h\u00e6gl scurum fleag.\n \u00fe\u00e6r ic ne gehyrde \u00a0\u00a0\u00a0\u00a0 butan hlimman s\u00e6,\n iscaldne w\u00e6g. \u00a0\u00a0\u00a0\u00a0 Hwilum ylfete song\n- 20\n- \n dyde ic me to gomene, \u00a0\u00a0\u00a0\u00a0 ganetes hleo\u00feor \n ond huilpan sweg \u00a0\u00a0\u00a0\u00a0 fore hleahtor wera,\n m\u00e6w singende \u00a0\u00a0\u00a0\u00a0 fore medodrince.\n Stormas \u00fe\u00e6r stanclifu beotan, \u00a0\u00a0\u00a0\u00a0 \u00fe\u00e6r him stearn oncw\u00e6\u00f0\n isigfe\u00feera; \u00a0\u00a0\u00a0\u00a0 ful oft \u00fe\u00e6t earn bigeal,\n- 25\n- \n urigfe\u00fera; \u00a0\u00a0\u00a0\u00a0 ne \u00e6nig hleom\u00e6ga \n feasceaftig fer\u00f0 \u00a0\u00a0\u00a0\u00a0 frefran meahte.\n For\u00feon him gelyfe\u00f0 lyt, \u00a0\u00a0\u00a0\u00a0 se \u00fee ah lifes wyn\n gebiden in burgum, \u00a0\u00a0\u00a0\u00a0 bealosi\u00fea hwon,\n wlonc ond wingal, \u00a0\u00a0\u00a0\u00a0 hu ic werig oft\n- 30\n- \n in brimlade \u00a0\u00a0\u00a0\u00a0 bidan sceolde. \n Nap nihtscua, \u00a0\u00a0\u00a0\u00a0 nor\u00fean sniwde,\n hrim hrusan bond, \u00a0\u00a0\u00a0\u00a0 h\u00e6gl feol on eor\u00fean,\n corna caldast. \u00a0\u00a0\u00a0\u00a0 For\u00feon cnyssa\u00f0 nu\n heortan ge\u00feohtas, \u00a0\u00a0\u00a0\u00a0 \u00fe\u00e6t ic hean streamas,\n- 35\n- \n sealty\u00fea gelac \u00a0\u00a0\u00a0\u00a0 sylf cunnige; \n mona\u00f0 modes lust \u00a0\u00a0\u00a0\u00a0 m\u00e6la gehwylce\n fer\u00f0 to feran, \u00a0\u00a0\u00a0\u00a0 \u00fe\u00e6t ic feor heonan\n el\u00feeodigra \u00a0\u00a0\u00a0\u00a0 eard gesece.\n For\u00feon nis \u00fe\u00e6s modwlonc \u00a0\u00a0\u00a0\u00a0 mon ofer eor\u00fean,\n- 40\n- \n ne his gifena \u00fe\u00e6s god, \u00a0\u00a0\u00a0\u00a0 ne in geogu\u00fee to \u00fe\u00e6s hw\u00e6t, \n ne in his d\u00e6dum to \u00fe\u00e6s deor, \u00a0\u00a0\u00a0\u00a0 ne him his dryhten to \u00fe\u00e6s hold,\n \u00fe\u00e6t he a his s\u00e6fore \u00a0\u00a0\u00a0\u00a0 sorge n\u00e6bbe,\n to hwon hine dryhten \u00a0\u00a0\u00a0\u00a0 gedon wille.\n Ne bi\u00fe him to hearpan hyge \u00a0\u00a0\u00a0\u00a0 ne to hring\u00feege,\n- 45\n- \n ne to wife wyn \u00a0\u00a0\u00a0\u00a0 ne to worulde hyht, \n ne ymbe owiht elles, \u00a0\u00a0\u00a0\u00a0 nefne ymb y\u00f0a gewealc,\n ac a hafa\u00f0 longunge \u00a0\u00a0\u00a0\u00a0 se \u00fee on lagu funda\u00f0.\n Bearwas blostmum nima\u00f0, \u00a0\u00a0\u00a0\u00a0 byrig f\u00e6gria\u00f0,\n wongas wlitiga\u00f0, \u00a0\u00a0\u00a0\u00a0 woruld onette\u00f0;\n- 50\n- \n ealle \u00fea gemonia\u00f0 \u00a0\u00a0\u00a0\u00a0 modes fusne \n sefan to si\u00fee, \u00a0\u00a0\u00a0\u00a0 \u00feam \u00fee swa \u00feence\u00f0\n on flodwegas \u00a0\u00a0\u00a0\u00a0 feor gewitan.\n Swylce geac mona\u00f0 \u00a0\u00a0\u00a0\u00a0 geomran reorde,\n singe\u00f0 sumeres weard, \u00a0\u00a0\u00a0\u00a0 sorge beode\u00f0\n- 55\n- \n bitter in breosthord. \u00a0\u00a0\u00a0\u00a0 \u00fe\u00e6t se beorn ne wat, \n esteadig secg, \u00a0\u00a0\u00a0\u00a0 hw\u00e6t \u00fea sume dreoga\u00f0\n \u00fee \u00fea wr\u00e6clastas \u00a0\u00a0\u00a0\u00a0 widost lecga\u00f0.\n For\u00feon nu min hyge hweorfe\u00f0 \u00a0\u00a0\u00a0\u00a0 ofer hre\u00feerlocan,\n min modsefa \u00a0\u00a0\u00a0\u00a0 mid mereflode\n- 60\n- \n ofer hw\u00e6les e\u00feel \u00a0\u00a0\u00a0\u00a0 hweorfe\u00f0 wide, \n eor\u00fean sceatas, \u00a0\u00a0\u00a0\u00a0 cyme\u00f0 eft to me\n gifre ond gr\u00e6dig, \u00a0\u00a0\u00a0\u00a0 gielle\u00f0 anfloga,\n hwete\u00f0 on hw\u00e6lweg \u00a0\u00a0\u00a0\u00a0 hre\u00feer unwearnum\n ofer holma gelagu. \u00a0\u00a0\u00a0\u00a0 For\u00feon me hatran sind\n- 65\n- \n dryhtnes dreamas \u00a0\u00a0\u00a0\u00a0 \u00feonne \u00feis deade lif, \n l\u00e6ne on londe. \u00a0\u00a0\u00a0\u00a0 Ic gelyfe no\n \u00fe\u00e6t him eor\u00f0welan \u00a0\u00a0\u00a0\u00a0 ece stonda\u00f0.\n Simle \u00fereora sum \u00a0\u00a0\u00a0\u00a0 \u00feinga gehwylce,\n \u00e6r his tid aga, \u00a0\u00a0\u00a0\u00a0 to tweon weor\u00fee\u00f0;\n- 70\n- \n adl o\u00fe\u00fee yldo \u00a0\u00a0\u00a0\u00a0 o\u00fe\u00fee ecghete \n f\u00e6gum fromweardum \u00a0\u00a0\u00a0\u00a0 feorh o\u00f0\u00feringe\u00f0.\n For\u00feon \u00fe\u00e6t bi\u00f0 eorla gehwam \u00a0\u00a0\u00a0\u00a0 \u00e6ftercwe\u00feendra\n lof lifgendra \u00a0\u00a0\u00a0\u00a0 lastworda betst,\n \u00fe\u00e6t he gewyrce, \u00a0\u00a0\u00a0\u00a0 \u00e6r he on weg scyle,\n- 75\n- \n fremum on foldan \u00a0\u00a0\u00a0\u00a0 wi\u00f0 feonda ni\u00fe, \n deorum d\u00e6dum \u00a0\u00a0\u00a0\u00a0 deofle togeanes,\n \u00fe\u00e6t hine \u00e6lda bearn \u00a0\u00a0\u00a0\u00a0 \u00e6fter hergen,\n ond his lof si\u00fe\u00fean \u00a0\u00a0\u00a0\u00a0 lifge mid englum\n awa to ealdre, \u00a0\u00a0\u00a0\u00a0 ecan lifes bl\u00e6d,\n- 80\n- \n dream mid duge\u00feum. \u00a0\u00a0\u00a0\u00a0 Dagas sind gewitene, \n ealle onmedlan \u00a0\u00a0\u00a0\u00a0 eor\u00fean rices;\n n\u00e6ron nu cyningas \u00a0\u00a0\u00a0\u00a0 ne caseras\n ne goldgiefan \u00a0\u00a0\u00a0\u00a0 swylce iu w\u00e6ron,\n \u00feonne hi m\u00e6st mid him \u00a0\u00a0\u00a0\u00a0 m\u00e6r\u00fea gefremedon\n- 85\n- \n ond on dryhtlicestum \u00a0\u00a0\u00a0\u00a0 dome lifdon. \n Gedroren is \u00feeos dugu\u00f0 eal, \u00a0\u00a0\u00a0\u00a0 dreamas sind gewitene,\n wunia\u00f0 \u00fea wacran \u00a0\u00a0\u00a0\u00a0 ond \u00feas woruld healda\u00fe,\n bruca\u00f0 \u00feurh bisgo. \u00a0\u00a0\u00a0\u00a0 Bl\u00e6d is gehn\u00e6ged,\n eor\u00fean indryhto \u00a0\u00a0\u00a0\u00a0 ealda\u00f0 ond seara\u00f0,\n- 90\n- \n swa nu monna gehwylc \u00a0\u00a0\u00a0\u00a0 geond middangeard. \n Yldo him on fare\u00f0, \u00a0\u00a0\u00a0\u00a0 onsyn blaca\u00f0,\n gomelfeax gnorna\u00f0, \u00a0\u00a0\u00a0\u00a0 wat his iuwine,\n \u00e6\u00feelinga bearn, \u00a0\u00a0\u00a0\u00a0 eor\u00fean forgiefene.\n Ne m\u00e6g him \u00feonne se fl\u00e6schoma, \u00a0\u00a0\u00a0\u00a0 \u00feonne him \u00fe\u00e6t feorg losa\u00f0,\n- 95\n- \n ne swete forswelgan \u00a0\u00a0\u00a0\u00a0 ne sar gefelan, \n ne hond onhreran \u00a0\u00a0\u00a0\u00a0 ne mid hyge \u00feencan.\n \u00feeah \u00fee gr\u00e6f wille \u00a0\u00a0\u00a0\u00a0 golde stregan\n bro\u00feor his geborenum, \u00a0\u00a0\u00a0\u00a0 byrgan be deadum,\n ma\u00femum mislicum \u00a0\u00a0\u00a0\u00a0 \u00fe\u00e6t hine mid wille,\n- 100\n- \n ne m\u00e6g \u00fe\u00e6re sawle \u00a0\u00a0\u00a0\u00a0 \u00fee bi\u00fe synna ful \n gold to geoce \u00a0\u00a0\u00a0\u00a0 for godes egsan,\n \u00feonne he hit \u00e6r hyde\u00f0 \u00a0\u00a0\u00a0\u00a0 \u00feenden he her leofa\u00f0.\n Micel bi\u00fe se meotudes egsa, \u00a0\u00a0\u00a0\u00a0 for\u00feon hi seo molde oncyrre\u00f0;\n se gesta\u00feelade \u00a0\u00a0\u00a0\u00a0 sti\u00fee grundas,\n- 105\n- \n eor\u00fean sceatas \u00a0\u00a0\u00a0\u00a0 ond uprodor. \n Dol bi\u00fe se \u00fee him his dryhten ne ondr\u00e6de\u00fe; \u00a0\u00a0\u00a0\u00a0 cyme\u00f0 him se dea\u00f0 un\u00feinged.\n Eadig bi\u00f0 se \u00fee ea\u00femod leofa\u00fe; \u00a0\u00a0\u00a0\u00a0 cyme\u00f0 him seo ar of heofonum,\n meotod him \u00fe\u00e6t mod gesta\u00feela\u00f0, \u00a0\u00a0\u00a0\u00a0 for\u00feon he in his meahte gelyfe\u00f0.\n Stieran mon sceal strongum mode, \u00a0\u00a0\u00a0\u00a0 ond \u00fe\u00e6t on sta\u00feelum healdan,\n- 110\n- \n ond gewis werum, \u00a0\u00a0\u00a0\u00a0 wisum cl\u00e6ne, \n scyle monna gehwylc \u00a0\u00a0\u00a0\u00a0 mid gemete healdan\n wi\u00fe leofne ond wi\u00f0 la\u00fene \u00a0\u00a0\u00a0\u00a0 bealo,\n \u00feeah \u00fee he hine wille fyres \u00a0\u00a0\u00a0\u00a0 fulne\n o\u00fe\u00fee on b\u00e6le \u00a0\u00a0\u00a0\u00a0 forb\u00e6rnedne\n- 115\n- \n his geworhtne wine. \u00a0\u00a0\u00a0\u00a0 Wyrd bi\u00fe swi\u00fere, \n meotud meahtigra \u00a0\u00a0\u00a0\u00a0 \u00feonne \u00e6nges monnes gehygd.\n Uton we hycgan \u00a0\u00a0\u00a0\u00a0 hw\u00e6r we ham agen,\n ond \u00feonne ge\u00feencan \u00a0\u00a0\u00a0\u00a0 hu we \u00feider cumen,\n ond we \u00feonne eac tilien, \u00a0\u00a0\u00a0\u00a0 \u00fe\u00e6t we to moten\n- 120\n- \n in \u00fea ecan \u00a0\u00a0\u00a0\u00a0 eadignesse, \n \u00fe\u00e6r is lif gelong \u00a0\u00a0\u00a0\u00a0 in lufan dryhtnes,\n hyht in heofonum. \u00a0\u00a0\u00a0\u00a0 \u00fe\u00e6s sy \u00feam halgan \u00feonc,\n \u00fe\u00e6t he usic geweor\u00feade, \u00a0\u00a0\u00a0\u00a0 wuldres ealdor,\n ece dryhten, \u00a0\u00a0\u00a0\u00a0 in ealle tid.\n- 125\n- \n Amen.","title":"The Seafarer","type":"page"}