{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a03_11.htm","path":"neu/ascp/a03_11.htm","source_url":"https://sacred-texts.com/neu/ascp/a03_11.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n Widsith\n Verse Indeterminate Saxon\n \n - \n Widsi\u00f0 ma\u00f0olade, \u00a0\u00a0\u00a0\u00a0 wordhord onleac, \n se \u00fee monna m\u00e6st \u00a0\u00a0\u00a0\u00a0 m\u00e6g\u00fea ofer eor\u00fean,\n folca geondferde; \u00a0\u00a0\u00a0\u00a0 oft he on flette ge\u00feah\n mynelicne ma\u00fe\u00feum. \u00a0\u00a0\u00a0\u00a0 Him from Myrgingum\n- 5\n- \n \u00e6\u00feele onwocon. \u00a0\u00a0\u00a0\u00a0 He mid Ealhhilde, \n f\u00e6lre freo\u00feuwebban, \u00a0\u00a0\u00a0\u00a0 forman si\u00fee\n Hre\u00f0cyninges \u00a0\u00a0\u00a0\u00a0 ham gesohte\n eastan of Ongle, \u00a0\u00a0\u00a0\u00a0 Eormanrices,\n wra\u00fees w\u00e6rlogan. \u00a0\u00a0\u00a0\u00a0 Ongon \u00fea worn sprecan:\n- 10\n- \n \"Fela ic monna gefr\u00e6gn \u00a0\u00a0\u00a0\u00a0 m\u00e6g\u00feum wealdan! \n Sceal \u00feeodna gehwylc \u00a0\u00a0\u00a0\u00a0 \u00feeawum lifgan,\n eorl \u00e6fter o\u00ferum \u00a0\u00a0\u00a0\u00a0 e\u00f0le r\u00e6dan,\n se \u00fee his \u00feeodenstol \u00a0\u00a0\u00a0\u00a0 ge\u00feeon wile.\n \u00feara w\u00e6s Hwala \u00a0\u00a0\u00a0\u00a0 hwile selast,\n- 15\n- \n ond Alexandreas \u00a0\u00a0\u00a0\u00a0 ealra ricost \n monna cynnes, \u00a0\u00a0\u00a0\u00a0 ond he m\u00e6st ge\u00feah\n \u00feara \u00fee ic ofer foldan \u00a0\u00a0\u00a0\u00a0 gefr\u00e6gen h\u00e6bbe.\n \u00e6tla weold Hunum, \u00a0\u00a0\u00a0\u00a0 Eormanric Gotum,\n Becca Baningum, \u00a0\u00a0\u00a0\u00a0 Burgendum Gifica.\n- 20\n- \n Casere weold Creacum \u00a0\u00a0\u00a0\u00a0 ond Celic Finnum, \n Hagena Holmrygum \u00a0\u00a0\u00a0\u00a0 ond Heoden Glommum.\n Witta weold Sw\u00e6fum, \u00a0\u00a0\u00a0\u00a0 Wada H\u00e6lsingum,\n Meaca Myrgingum, \u00a0\u00a0\u00a0\u00a0 Mearchealf Hundingum.\n \u00feeodric weold Froncum, \u00a0\u00a0\u00a0\u00a0 \u00feyle Rondingum,\n- 25\n- \n Breoca Brondingum, \u00a0\u00a0\u00a0\u00a0 Billing Wernum. \n Oswine weold Eowum \u00a0\u00a0\u00a0\u00a0 ond Ytum Gefwulf,\n Fin Folcwalding \u00a0\u00a0\u00a0\u00a0 Fresna cynne.\n Sigehere lengest \u00a0\u00a0\u00a0\u00a0 S\u00e6denum weold,\n Hn\u00e6f Hocingum, \u00a0\u00a0\u00a0\u00a0 Helm Wulfingum,\n- 30\n- \n Wald Woingum, \u00a0\u00a0\u00a0\u00a0 Wod \u00feyringum, \n S\u00e6fer\u00f0 Sycgum, \u00a0\u00a0\u00a0\u00a0 Sweom Ongend\u00feeow,\n Sceafthere Ymbrum, \u00a0\u00a0\u00a0\u00a0 Sceafa Longbeardum,\n Hun H\u00e6twerum \u00a0\u00a0\u00a0\u00a0 ond Holen Wrosnum.\n Hringweald w\u00e6s haten \u00a0\u00a0\u00a0\u00a0 Herefarena cyning.\n- 35\n- \n Offa weold Ongle, \u00a0\u00a0\u00a0\u00a0 Alewih Denum; \n se w\u00e6s \u00feara manna \u00a0\u00a0\u00a0\u00a0 modgast ealra,\n no hw\u00e6\u00fere he ofer Offan \u00a0\u00a0\u00a0\u00a0 eorlscype fremede,\n ac Offa geslog \u00a0\u00a0\u00a0\u00a0 \u00e6rest monna,\n cnihtwesende, \u00a0\u00a0\u00a0\u00a0 cynerica m\u00e6st.\n- 40\n- \n N\u00e6nig efeneald him \u00a0\u00a0\u00a0\u00a0 eorlscipe maran \n on orette. \u00a0\u00a0\u00a0\u00a0 Ane sweorde\n merce gem\u00e6rde \u00a0\u00a0\u00a0\u00a0 wi\u00f0 Myrgingum\n bi Fifeldore; \u00a0\u00a0\u00a0\u00a0 heoldon for\u00f0 si\u00fe\u00fean\n Engle ond Sw\u00e6fe, \u00a0\u00a0\u00a0\u00a0 swa hit Offa geslog.\n- 45\n- \n Hro\u00fewulf ond Hro\u00f0gar \u00a0\u00a0\u00a0\u00a0 heoldon lengest \n sibbe \u00e6tsomne \u00a0\u00a0\u00a0\u00a0 suhtorf\u00e6dran,\n si\u00fe\u00fean hy forwr\u00e6con \u00a0\u00a0\u00a0\u00a0 wicinga cynn\n ond Ingeldes \u00a0\u00a0\u00a0\u00a0 ord forbigdan,\n forheowan \u00e6t Heorote \u00a0\u00a0\u00a0\u00a0 Hea\u00f0obeardna \u00ferym.\n- 50\n- \n Swa ic geondferde fela \u00a0\u00a0\u00a0\u00a0 fremdra londa \n geond ginne grund. \u00a0\u00a0\u00a0\u00a0 Godes ond yfles\n \u00fe\u00e6r ic cunnade \u00a0\u00a0\u00a0\u00a0 cnosle bid\u00e6led,\n freom\u00e6gum feor \u00a0\u00a0\u00a0\u00a0 folgade wide.\n For\u00feon ic m\u00e6g singan \u00a0\u00a0\u00a0\u00a0 ond secgan spell,\n- 55\n- \n m\u00e6nan fore mengo \u00a0\u00a0\u00a0\u00a0 in meoduhealle \n hu me cynegode \u00a0\u00a0\u00a0\u00a0 cystum dohten.\n Ic w\u00e6s mid Hunum \u00a0\u00a0\u00a0\u00a0 ond mid Hre\u00f0gotum,\n mid Sweom ond mid Geatum \u00a0\u00a0\u00a0\u00a0 ond mid Su\u00fedenum.\n Mid Wenlum ic w\u00e6s ond mid W\u00e6rnum \u00a0\u00a0\u00a0\u00a0 ond mid wicingum.\n- 60\n- \n Mid Gef\u00feum ic w\u00e6s ond mid Winedum \u00a0\u00a0\u00a0\u00a0 ond mid Gefflegum. \n Mid Englum ic w\u00e6s ond mid Sw\u00e6fum \u00a0\u00a0\u00a0\u00a0 ond mid \u00e6nenum.\n Mid Seaxum ic w\u00e6s ond Sycgum \u00a0\u00a0\u00a0\u00a0 ond mid Sweordwerum.\n Mid Hronum ic w\u00e6s ond mid Deanum \u00a0\u00a0\u00a0\u00a0 ond mid Hea\u00feoreamum.\n Mid \u00feyringum ic w\u00e6s \u00a0\u00a0\u00a0\u00a0 ond mid \u00ferowendum,\n- 65\n- \n ond mid Burgendum, \u00a0\u00a0\u00a0\u00a0 \u00fe\u00e6r ic beag ge\u00feah; \n me \u00fe\u00e6r Gu\u00f0here forgeaf \u00a0\u00a0\u00a0\u00a0 gl\u00e6dlicne ma\u00fe\u00feum\n songes to leane. \u00a0\u00a0\u00a0\u00a0 N\u00e6s \u00fe\u00e6t s\u00e6ne cyning!\n Mid Froncum ic w\u00e6s ond mid Frysum \u00a0\u00a0\u00a0\u00a0 ond mid Frumtingum.\n Mid Rugum ic w\u00e6s ond mid Glommum \u00a0\u00a0\u00a0\u00a0 ond mid Rumwalum.\n- 70\n- \n Swylce ic w\u00e6s on Eatule \u00a0\u00a0\u00a0\u00a0 mid \u00e6lfwine, \n se h\u00e6fde moncynnes, \u00a0\u00a0\u00a0\u00a0 mine gefr\u00e6ge,\n leohteste hond \u00a0\u00a0\u00a0\u00a0 lofes to wyrcenne,\n heortan unhneaweste \u00a0\u00a0\u00a0\u00a0 hringa gedales,\n beorhtra beaga, \u00a0\u00a0\u00a0\u00a0 bearn Eadwines.\n- 75\n- \n Mid Sercingum ic w\u00e6s \u00a0\u00a0\u00a0\u00a0 ond mid Seringum; \n mid Creacum ic w\u00e6s ond mid Finnum \u00a0\u00a0\u00a0\u00a0 ond mid Casere,\n se \u00fee winburga \u00a0\u00a0\u00a0\u00a0 geweald ahte,\n wiolena ond wilna, \u00a0\u00a0\u00a0\u00a0 ond Wala rices.\n Mid Scottum ic w\u00e6s ond mid Peohtum \u00a0\u00a0\u00a0\u00a0 ond mid Scridefinnum;\n- 80\n- \n mid Lidwicingum ic w\u00e6s ond mid Leonum \u00a0\u00a0\u00a0\u00a0 ond mid Longbeardum, \n mid h\u00e6\u00f0num ond mid h\u00e6le\u00feum \u00a0\u00a0\u00a0\u00a0 ond mid Hundingum.\n Mid Israhelum ic w\u00e6s \u00a0\u00a0\u00a0\u00a0 ond mid Exsyringum,\n mid Ebreum ond mid Indeum \u00a0\u00a0\u00a0\u00a0 ond mid Egyptum.\n Mid Moidum ic w\u00e6s ond mid Persum \u00a0\u00a0\u00a0\u00a0 ond mid Myrgingum,\n- 85\n- \n ond Mofdingum \u00a0\u00a0\u00a0\u00a0 ond ongend Myrgingum, \n ond mid Amothingum. \u00a0\u00a0\u00a0\u00a0 Mid East\u00feyringum ic w\u00e6s\n ond mid Eolum ond mid Istum \u00a0\u00a0\u00a0\u00a0 ond Idumingum.\n Ond ic w\u00e6s mid Eormanrice \u00a0\u00a0\u00a0\u00a0 ealle \u00ferage,\n \u00fe\u00e6r me Gotena cyning \u00a0\u00a0\u00a0\u00a0 gode dohte;\n- 90\n- \n se me beag forgeaf, \u00a0\u00a0\u00a0\u00a0 burgwarena fruma, \n on \u00feam siex hund w\u00e6s \u00a0\u00a0\u00a0\u00a0 sm\u00e6tes goldes,\n gescyred sceatta \u00a0\u00a0\u00a0\u00a0 scillingrime;\n \u00feone ic Eadgilse \u00a0\u00a0\u00a0\u00a0 on \u00e6ht sealde,\n minum hleodryhtne, \u00a0\u00a0\u00a0\u00a0 \u00fea ic to ham bicwom,\n- 95\n- \n leofum to leane, \u00a0\u00a0\u00a0\u00a0 \u00fe\u00e6s \u00fee he me lond forgeaf, \n mines f\u00e6der e\u00feel, \u00a0\u00a0\u00a0\u00a0 frea Myrginga.\n Ond me \u00fea Ealhhild \u00a0\u00a0\u00a0\u00a0 o\u00feerne forgeaf,\n dryhtcwen dugu\u00fee, \u00a0\u00a0\u00a0\u00a0 dohtor Eadwines.\n Hyre lof lengde \u00a0\u00a0\u00a0\u00a0 geond londa fela,\n- 100\n- \n \u00feonne ic be songe \u00a0\u00a0\u00a0\u00a0 secgan sceolde \n hw\u00e6r ic under swegle \u00a0\u00a0\u00a0\u00a0 selast wisse\n goldhrodene cwen \u00a0\u00a0\u00a0\u00a0 giefe bryttian.\n \u00f0onne wit Scilling \u00a0\u00a0\u00a0\u00a0 sciran reorde\n for uncrum sigedryhtne \u00a0\u00a0\u00a0\u00a0 song ahofan,\n- 105\n- \n hlude bi hearpan \u00a0\u00a0\u00a0\u00a0 hleo\u00feor swinsade, \n \u00feonne monige men, \u00a0\u00a0\u00a0\u00a0 modum wlonce,\n wordum sprecan, \u00a0\u00a0\u00a0\u00a0 \u00fea \u00fee wel cu\u00fean,\n \u00fe\u00e6t hi n\u00e6fre song \u00a0\u00a0\u00a0\u00a0 sellan ne hyrdon.\n \u00f0onan ic ealne geondhwearf \u00a0\u00a0\u00a0\u00a0 e\u00feel Gotena,\n- 110\n- \n sohte ic a gesi\u00fea \u00a0\u00a0\u00a0\u00a0 \u00fea selestan; \n \u00fe\u00e6t w\u00e6s innweorud \u00a0\u00a0\u00a0\u00a0 Earmanrices.\n He\u00f0can sohte ic ond Beadecan \u00a0\u00a0\u00a0\u00a0 ond Herelingas,\n Emercan sohte ic ond Fridlan \u00a0\u00a0\u00a0\u00a0 ond Eastgotan,\n frodne ond godne \u00a0\u00a0\u00a0\u00a0 f\u00e6der Unwenes.\n- 115\n- \n Seccan sohte ic ond Beccan, \u00a0\u00a0\u00a0\u00a0 Seafolan ond \u00feeodric, \n Hea\u00feoric ond Sifecan, \u00a0\u00a0\u00a0\u00a0 Hli\u00fee ond Incgen\u00feeow.\n Eadwine sohte ic ond Elsan, \u00a0\u00a0\u00a0\u00a0 \u00e6gelmund ond Hungar,\n ond \u00fea wloncan gedryht \u00a0\u00a0\u00a0\u00a0 Wi\u00femyrginga.\n Wulfhere sohte ic ond Wyrmhere; \u00a0\u00a0\u00a0\u00a0 ful oft \u00fe\u00e6r wig ne al\u00e6g,\n- 120\n- \n \u00feonne Hr\u00e6da here \u00a0\u00a0\u00a0\u00a0 heardum sweordum \n ymb Wistlawudu \u00a0\u00a0\u00a0\u00a0 wergan sceoldon\n ealdne e\u00feelstol \u00a0\u00a0\u00a0\u00a0 \u00e6tlan leodum.\n R\u00e6dhere sohte ic ond Rondhere, \u00a0\u00a0\u00a0\u00a0 Rumstan ond Gislhere,\n Wi\u00feergield ond Freo\u00feeric, \u00a0\u00a0\u00a0\u00a0 Wudgan ond Haman;\n- 125\n- \n ne w\u00e6ran \u00fe\u00e6t gesi\u00fea \u00a0\u00a0\u00a0\u00a0 \u00fea s\u00e6mestan, \n \u00feeah \u00fee ic hy anihst \u00a0\u00a0\u00a0\u00a0 nemnan sceolde.\n Ful oft of \u00feam heape \u00a0\u00a0\u00a0\u00a0 hwinende fleag\n giellende gar \u00a0\u00a0\u00a0\u00a0 on grome \u00feeode;\n wr\u00e6ccan \u00fe\u00e6r weoldan \u00a0\u00a0\u00a0\u00a0 wundnan golde\n- 130\n- \n werum ond wifum, \u00a0\u00a0\u00a0\u00a0 Wudga ond Hama. \n Swa ic \u00fe\u00e6t symle onfond \u00a0\u00a0\u00a0\u00a0 on \u00fe\u00e6re feringe,\n \u00fe\u00e6t se bi\u00fe leofast \u00a0\u00a0\u00a0\u00a0 londbuendum\n se \u00fee him god syle\u00f0 \u00a0\u00a0\u00a0\u00a0 gumena rice\n to gehealdenne, \u00a0\u00a0\u00a0\u00a0 \u00feenden he her leofa\u00f0.\"\n- 135\n- \n Swa scri\u00feende \u00a0\u00a0\u00a0\u00a0 gesceapum hweorfa\u00f0 \n gleomen gumena \u00a0\u00a0\u00a0\u00a0 geond grunda fela,\n \u00feearfe secga\u00f0, \u00a0\u00a0\u00a0\u00a0 \u00feoncword spreca\u00fe,\n simle su\u00f0 o\u00fe\u00fee nor\u00f0 \u00a0\u00a0\u00a0\u00a0 sumne gemeta\u00f0\n gydda gleawne, \u00a0\u00a0\u00a0\u00a0 geofum unhneawne,\n- 140\n- \n se \u00fee fore dugu\u00fee wile \u00a0\u00a0\u00a0\u00a0 dom ar\u00e6ran, \n eorlscipe \u00e6fnan, \u00a0\u00a0\u00a0\u00a0 o\u00fe\u00fe\u00e6t eal sc\u00e6ce\u00f0,\n leoht ond lif somod; \u00a0\u00a0\u00a0\u00a0 lof se gewyrce\u00f0,\n hafa\u00f0 under heofonum \u00a0\u00a0\u00a0\u00a0 heahf\u00e6stne dom.","title":"Widsith","type":"page"}