{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a03_12.htm","path":"neu/ascp/a03_12.htm","source_url":"https://sacred-texts.com/neu/ascp/a03_12.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Fortunes of Men\n Verse Indeterminate Saxon\n \n - \n Ful oft \u00fe\u00e6t gegonge\u00f0, \u00a0\u00a0\u00a0\u00a0 mid godes meahtum, \n \u00fe\u00e6tte wer ond wif \u00a0\u00a0\u00a0\u00a0 in woruld cenna\u00f0\n bearn mid gebyrdum \u00a0\u00a0\u00a0\u00a0 ond mid bleom gyrwa\u00f0,\n tenna\u00fe ond t\u00e6ta\u00fe, \u00a0\u00a0\u00a0\u00a0 o\u00fe\u00fe\u00e6t seo tid cyme\u00f0,\n- 5\n- \n geg\u00e6\u00f0 gearrimum, \u00a0\u00a0\u00a0\u00a0 \u00fe\u00e6t \u00fea geongan leomu, \n liff\u00e6stan leo\u00feu, \u00a0\u00a0\u00a0\u00a0 geloden weor\u00fea\u00f0.\n Ferga\u00f0 swa ond fe\u00fea\u00f0 \u00a0\u00a0\u00a0\u00a0 f\u00e6der ond modor,\n giefa\u00f0 ond gierwa\u00fe. \u00a0\u00a0\u00a0\u00a0 God ana wat\n hw\u00e6t him weaxendum \u00a0\u00a0\u00a0\u00a0 winter bringa\u00f0!\n- 10\n- \n Sumum \u00fe\u00e6t gegonge\u00f0 \u00a0\u00a0\u00a0\u00a0 on geogu\u00f0feore \n \u00fe\u00e6t se endest\u00e6f \u00a0\u00a0\u00a0\u00a0 earfe\u00f0m\u00e6cgum\n wealic weor\u00fee\u00f0. \u00a0\u00a0\u00a0\u00a0 Sceal hine wulf etan,\n har h\u00e6\u00f0stapa; \u00a0\u00a0\u00a0\u00a0 hinsi\u00fe \u00feonne\n modor bimurne\u00f0. \u00a0\u00a0\u00a0\u00a0 Ne bi\u00f0 swylc monnes geweald!\n- 15\n- \n Sumne sceal hungor ahi\u00fean, \u00a0\u00a0\u00a0\u00a0 sumne sceal hreoh fordrifan, \n sumne sceal gar agetan, \u00a0\u00a0\u00a0\u00a0 sumne gu\u00f0 abreotan.\n Sum sceal leomena leas \u00a0\u00a0\u00a0\u00a0 lifes neotan,\n folmum \u00e6tfeohtan, \u00a0\u00a0\u00a0\u00a0 sum on fe\u00f0e lef,\n seonobennum seoc, \u00a0\u00a0\u00a0\u00a0 sar cwanian,\n- 20\n- \n murnan meotudgesceaft \u00a0\u00a0\u00a0\u00a0 mode gebysgad. \n Sum sceal on holte \u00a0\u00a0\u00a0\u00a0 of hean beame\n fi\u00feerleas feallan; \u00a0\u00a0\u00a0\u00a0 bi\u00f0 on flihte se\u00feeah,\n lace\u00f0 on lyfte, \u00a0\u00a0\u00a0\u00a0 o\u00fe\u00fe\u00e6t lengre ne bi\u00f0\n westem wudubeames. \u00a0\u00a0\u00a0\u00a0 \u00feonne he on wyrtruman\n- 25\n- \n sige\u00f0 sworcenfer\u00f0, \u00a0\u00a0\u00a0\u00a0 sawle bireafod, \n fealle\u00fe on foldan, \u00a0\u00a0\u00a0\u00a0 feor\u00f0 bi\u00fe on si\u00fee.\n Sum sceal on fe\u00fee \u00a0\u00a0\u00a0\u00a0 on feorwegas\n nyde gongan \u00a0\u00a0\u00a0\u00a0 ond his nest beran,\n tredan uriglast \u00a0\u00a0\u00a0\u00a0 el\u00feeodigra,\n- 30\n- \n frecne foldan; \u00a0\u00a0\u00a0\u00a0 ah he feormendra \n lyt lifgendra, \u00a0\u00a0\u00a0\u00a0 la\u00f0 bi\u00fe \u00e6ghw\u00e6r\n fore his wonsceaftum \u00a0\u00a0\u00a0\u00a0 wineleas h\u00e6le.\n Sum sceal on geapum \u00a0\u00a0\u00a0\u00a0 galgan ridan,\n seomian \u00e6t swylte, \u00a0\u00a0\u00a0\u00a0 o\u00fe\u00fe\u00e6t sawlhord,\n- 35\n- \n bancofa blodig, \u00a0\u00a0\u00a0\u00a0 abrocen weor\u00fee\u00f0. \n \u00fe\u00e6r him hrefn nime\u00fe \u00a0\u00a0\u00a0\u00a0 heafodsyne,\n slite\u00f0 salwigpad \u00a0\u00a0\u00a0\u00a0 sawelleasne;\n no\u00feer he \u00fey facne m\u00e6g \u00a0\u00a0\u00a0\u00a0 folmum biwergan,\n la\u00feum lyftscea\u00fean, \u00a0\u00a0\u00a0\u00a0 bi\u00fe his lif sc\u00e6cen,\n- 40\n- \n ond he feleleas, \u00a0\u00a0\u00a0\u00a0 feores orwena, \n blac on beame \u00a0\u00a0\u00a0\u00a0 bide\u00f0 wyrde,\n bewegen w\u00e6lmiste. \u00a0\u00a0\u00a0\u00a0 Bi\u00f0 him werig noma!\n Sumne on b\u00e6le sceal \u00a0\u00a0\u00a0\u00a0 brond aswencan,\n fretan frecne lig \u00a0\u00a0\u00a0\u00a0 f\u00e6gne monnan;\n- 45\n- \n \u00fe\u00e6r him lifgedal \u00a0\u00a0\u00a0\u00a0 lungre weor\u00f0e\u00f0, \n read re\u00fee gled; \u00a0\u00a0\u00a0\u00a0 reote\u00f0 meowle,\n seo hyre bearn gesih\u00f0 \u00a0\u00a0\u00a0\u00a0 brondas \u00feeccan.\n Sumum meces ecg \u00a0\u00a0\u00a0\u00a0 on meodubence\n yrrum ealowosan \u00a0\u00a0\u00a0\u00a0 ealdor o\u00fe\u00feringe\u00f0,\n- 50\n- \n were winsadum; \u00a0\u00a0\u00a0\u00a0 bi\u00f0 \u00e6r his worda to hr\u00e6d. \n Sum sceal on beore \u00a0\u00a0\u00a0\u00a0 \u00feurh byreles hond\n meodugal m\u00e6cga; \u00a0\u00a0\u00a0\u00a0 \u00feonne he gemet ne con\n gemearcian his mu\u00fee \u00a0\u00a0\u00a0\u00a0 mode sine,\n ac sceal ful earmlice \u00a0\u00a0\u00a0\u00a0 ealdre linnan,\n- 55\n- \n dreogan dryhtenbealo \u00a0\u00a0\u00a0\u00a0 dreamum biscyred, \n ond hine to sylfcwale \u00a0\u00a0\u00a0\u00a0 secgas nemna\u00f0,\n m\u00e6na\u00f0 mid mu\u00fee \u00a0\u00a0\u00a0\u00a0 meodugales gedrinc.\n Sum sceal on geogu\u00fee \u00a0\u00a0\u00a0\u00a0 mid godes meahtum\n his earfo\u00f0si\u00fe \u00a0\u00a0\u00a0\u00a0 ealne forspildan,\n- 60\n- \n ond on yldo eft \u00a0\u00a0\u00a0\u00a0 eadig weor\u00fean, \n wunian wyndagum \u00a0\u00a0\u00a0\u00a0 ond welan \u00feicgan,\n ma\u00femas ond meoduful \u00a0\u00a0\u00a0\u00a0 m\u00e6gburge on,\n \u00fe\u00e6s \u00fee \u00e6nig fira m\u00e6ge \u00a0\u00a0\u00a0\u00a0 for\u00f0 gehealdan.\n Swa missenlice \u00a0\u00a0\u00a0\u00a0 meahtig dryhten\n- 65\n- \n geond eor\u00fean sceat \u00a0\u00a0\u00a0\u00a0 eallum d\u00e6le\u00f0, \n scyre\u00fe ond scrife\u00f0 \u00a0\u00a0\u00a0\u00a0 ond gesceapo healde\u00f0,\n sumum eadwelan, \u00a0\u00a0\u00a0\u00a0 sumum earfe\u00fea d\u00e6l,\n sumum geogo\u00fee gl\u00e6d, \u00a0\u00a0\u00a0\u00a0 sumum gu\u00fee bl\u00e6d,\n gewealdenne wigplegan, \u00a0\u00a0\u00a0\u00a0 sumum wyrp o\u00fe\u00fee scyte,\n- 70\n- \n torhtlicne tiir, \u00a0\u00a0\u00a0\u00a0 sumum t\u00e6fle cr\u00e6ft, \n bleobordes gebregd. \u00a0\u00a0\u00a0\u00a0 Sume boceras\n weor\u00fea\u00f0 wisf\u00e6ste. \u00a0\u00a0\u00a0\u00a0 Sumum wundorgiefe\n \u00feurh goldsmi\u00fee \u00a0\u00a0\u00a0\u00a0 gearwad weor\u00fea\u00f0;\n ful oft he gehyrde\u00f0 \u00a0\u00a0\u00a0\u00a0 ond gehyrste\u00f0 wel,\n- 75\n- \n brytencyninges beorn, \u00a0\u00a0\u00a0\u00a0 ond he him brad syle\u00f0 \n lond to leane. \u00a0\u00a0\u00a0\u00a0 He hit on lust \u00feige\u00f0.\n Sum sceal on heape \u00a0\u00a0\u00a0\u00a0 h\u00e6le\u00feum cweman,\n blissian \u00e6t beore \u00a0\u00a0\u00a0\u00a0 bencsittendum;\n \u00fe\u00e6r bi\u00fe drincendra \u00a0\u00a0\u00a0\u00a0 dream se micla.\n- 80\n- \n Sum sceal mid hearpan \u00a0\u00a0\u00a0\u00a0 \u00e6t his hlafordes \n fotum sittan, \u00a0\u00a0\u00a0\u00a0 feoh \u00feicgan,\n ond a snellice \u00a0\u00a0\u00a0\u00a0 snere wr\u00e6stan,\n l\u00e6tan scralletan \u00a0\u00a0\u00a0\u00a0 sceacol, se \u00fee hleape\u00f0,\n n\u00e6gl neomegende; \u00a0\u00a0\u00a0\u00a0 bi\u00fe him neod micel.\n- 85\n- \n Sum sceal wildne fugel \u00a0\u00a0\u00a0\u00a0 wloncne atemian, \n heafoc on honda, \u00a0\u00a0\u00a0\u00a0 o\u00fe\u00fe\u00e6t seo heoroswealwe\n wynsum weor\u00fee\u00f0; \u00a0\u00a0\u00a0\u00a0 de\u00fe he wyrplas on,\n fede\u00fe swa on feterum \u00a0\u00a0\u00a0\u00a0 fi\u00ferum dealne,\n lepe\u00fe lyftswiftne \u00a0\u00a0\u00a0\u00a0 lytlum gieflum,\n- 90\n- \n o\u00fe\u00fe\u00e6t se w\u00e6lisca \u00a0\u00a0\u00a0\u00a0 w\u00e6dum ond d\u00e6dum \n his \u00e6tgiefan \u00a0\u00a0\u00a0\u00a0 ea\u00f0mod weor\u00fee\u00f0\n ond to hagostealdes \u00a0\u00a0\u00a0\u00a0 honda gel\u00e6red.\n Swa wr\u00e6tlice \u00a0\u00a0\u00a0\u00a0 weoroda nergend\n geond middangeard \u00a0\u00a0\u00a0\u00a0 monna cr\u00e6ftas\n- 95\n- \n sceop ond scyrede \u00a0\u00a0\u00a0\u00a0 ond gesceapo ferede \n \u00e6ghwylcum on eor\u00fean \u00a0\u00a0\u00a0\u00a0 eormencynnes.\n For\u00feon him nu ealles \u00feonc \u00a0\u00a0\u00a0\u00a0 \u00e6ghwa secge,\n \u00fe\u00e6s \u00fee he fore his miltsum \u00a0\u00a0\u00a0\u00a0 monnum scrife\u00f0.","title":"The Fortunes of Men","type":"page"}