{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a03_14.htm","path":"neu/ascp/a03_14.htm","source_url":"https://sacred-texts.com/neu/ascp/a03_14.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Order of the World\n Verse Indeterminate Saxon\n \n - \n Wilt \u00feu, fus h\u00e6le, \u00a0\u00a0\u00a0\u00a0 fremdne monnan, \n wisne wo\u00f0boran \u00a0\u00a0\u00a0\u00a0 wordum gretan,\n fricgan felageongne \u00a0\u00a0\u00a0\u00a0 ymb for\u00f0gesceaft,\n biddan \u00fee gesecge \u00a0\u00a0\u00a0\u00a0 sidra gesceafta\n- 5\n- \n cr\u00e6ftas cyndelice \u00a0\u00a0\u00a0\u00a0 cwichrerende, \n \u00fea \u00fee dogra gehwam \u00a0\u00a0\u00a0\u00a0 \u00feurh dom godes\n bringe wundra fela \u00a0\u00a0\u00a0\u00a0 wera cneorissum!\n Is \u00feara anra gehwam \u00a0\u00a0\u00a0\u00a0 orgeate tacen,\n \u00feam \u00feurh wisdom \u00a0\u00a0\u00a0\u00a0 woruld ealle con\n- 10\n- \n behabban on hre\u00fere, \u00a0\u00a0\u00a0\u00a0 hycgende mon, \n \u00fe\u00e6t geara iu, \u00a0\u00a0\u00a0\u00a0 gliwes cr\u00e6fte,\n mid gieddingum \u00a0\u00a0\u00a0\u00a0 guman oft wrecan,\n rincas r\u00e6df\u00e6ste; \u00a0\u00a0\u00a0\u00a0 cu\u00feon ryht sprecan,\n \u00fe\u00e6t a fricgende \u00a0\u00a0\u00a0\u00a0 fira cynnes\n- 15\n- \n ond secgende \u00a0\u00a0\u00a0\u00a0 searoruna gespon \n a gemyndge m\u00e6st \u00a0\u00a0\u00a0\u00a0 monna wiston.\n For\u00feon scyle ascian, \u00a0\u00a0\u00a0\u00a0 se \u00fee on elne leofa\u00f0,\n deophydig mon, \u00a0\u00a0\u00a0\u00a0 dygelra gesceafta,\n bewritan in gewitte \u00a0\u00a0\u00a0\u00a0 wordhordes cr\u00e6ft,\n- 20\n- \n f\u00e6stnian fer\u00f0sefan, \u00a0\u00a0\u00a0\u00a0 \u00feencan for\u00f0 teala; \n ne sceal \u00fe\u00e6s a\u00fereotan \u00a0\u00a0\u00a0\u00a0 \u00feegn modigne,\n \u00fe\u00e6t he wislice \u00a0\u00a0\u00a0\u00a0 woruld fulgonge.\n Leorna \u00feas lare. \u00a0\u00a0\u00a0\u00a0 Ic \u00fee lungre sceal\n meotudes m\u00e6gensped \u00a0\u00a0\u00a0\u00a0 maran gesecgan,\n- 25\n- \n \u00feonne \u00feu hygecr\u00e6ftig \u00a0\u00a0\u00a0\u00a0 in hre\u00fere m\u00e6ge \n mode gegripan. \u00a0\u00a0\u00a0\u00a0 Is sin meaht forswi\u00fe.\n Nis \u00fe\u00e6t monnes gemet \u00a0\u00a0\u00a0\u00a0 moldhrerendra,\n \u00fe\u00e6t he m\u00e6ge in hre\u00fere \u00a0\u00a0\u00a0\u00a0 his heah geweorc\n fur\u00feor aspyrgan \u00a0\u00a0\u00a0\u00a0 \u00feonne him frea sylle\n- 30\n- \n to ongietanne \u00a0\u00a0\u00a0\u00a0 godes agen bibod; \n ac we sculon \u00feoncian \u00a0\u00a0\u00a0\u00a0 \u00feeodne m\u00e6rum\n awa to ealdre, \u00a0\u00a0\u00a0\u00a0 \u00fe\u00e6s \u00fee us se eca cyning\n on g\u00e6ste wlite \u00a0\u00a0\u00a0\u00a0 forgiefan wille\n \u00fe\u00e6t we ea\u00f0e magon \u00a0\u00a0\u00a0\u00a0 upcund rice\n- 35\n- \n for\u00f0 gestigan, \u00a0\u00a0\u00a0\u00a0 gif us on fer\u00f0e geneah \n ond we willa\u00f0 healdan \u00a0\u00a0\u00a0\u00a0 heofoncyninges bibod.\n Gehyr nu \u00feis herespel \u00a0\u00a0\u00a0\u00a0 ond \u00feinne hyge gef\u00e6stna.\n Hw\u00e6t, on frym\u00fee gescop \u00a0\u00a0\u00a0\u00a0 f\u00e6der \u00e6lmihtig,\n heah hordes weard, \u00a0\u00a0\u00a0\u00a0 heofon ond eor\u00f0an,\n- 40\n- \n s\u00e6s sidne grund, \u00a0\u00a0\u00a0\u00a0 sweotule gesceafte, \n \u00fea nu in \u00feam \u00feream \u00a0\u00a0\u00a0\u00a0 \u00feurh \u00feeodnes hond\n hea\u00fe ond hebba\u00fe \u00a0\u00a0\u00a0\u00a0 \u00feone halgan bl\u00e6d.\n For\u00feon eal swa teofanade, \u00a0\u00a0\u00a0\u00a0 se \u00fee teala cu\u00fee,\n \u00e6ghwylc wi\u00fe o\u00ferum; \u00a0\u00a0\u00a0\u00a0 sceoldon eal beran\n- 45\n- \n sti\u00fee stefnbyrd, \u00a0\u00a0\u00a0\u00a0 swa him se steora bibead \n missenlice gemetu \u00a0\u00a0\u00a0\u00a0 \u00feurh \u00fea miclan gecynd.\n Swa hi to worulde \u00a0\u00a0\u00a0\u00a0 wlite for\u00fe bera\u00f0\n dryhtnes dugu\u00fee \u00a0\u00a0\u00a0\u00a0 ond his d\u00e6da \u00ferym,\n lixende lof \u00a0\u00a0\u00a0\u00a0 in \u00fea longan tid,\n- 50\n- \n fremma\u00fe f\u00e6stlice \u00a0\u00a0\u00a0\u00a0 frean ece word \n in \u00feam frumstole \u00a0\u00a0\u00a0\u00a0 \u00fee him frea sette,\n hluttor heofones weard, \u00a0\u00a0\u00a0\u00a0 healda\u00f0 georne\n mere gem\u00e6re; \u00a0\u00a0\u00a0\u00a0 meaht for\u00f0 tih\u00f0\n heofoncondelle \u00a0\u00a0\u00a0\u00a0 ond holmas mid,\n- 55\n- \n la\u00fea\u00f0 ond l\u00e6de\u00fe \u00a0\u00a0\u00a0\u00a0 lifes agend \n in his anes f\u00e6\u00fem \u00a0\u00a0\u00a0\u00a0 ealle gesceafta.\n Swa him wideferh \u00a0\u00a0\u00a0\u00a0 wuldor stonde\u00fe,\n ealra demena \u00a0\u00a0\u00a0\u00a0 \u00feam gedefestan,\n \u00fee us \u00feis lif gescop, \u00a0\u00a0\u00a0\u00a0 ond \u00feis leohte beorht\n- 60\n- \n cyme\u00f0 morgna gehwam \u00a0\u00a0\u00a0\u00a0 ofer misthleo\u00feu \n wadan ofer w\u00e6gas \u00a0\u00a0\u00a0\u00a0 wundrum gegierwed,\n ond mid \u00e6rd\u00e6ge \u00a0\u00a0\u00a0\u00a0 eastan snowe\u00f0\n wlitig ond wynsum \u00a0\u00a0\u00a0\u00a0 wera cneorissum;\n lifgendra gehwam \u00a0\u00a0\u00a0\u00a0 leoht for\u00f0 biere\u00f0\n- 65\n- \n bronda beorhtost, \u00a0\u00a0\u00a0\u00a0 ond his brucan mot \n \u00e6ghwylc on eor\u00fean, \u00a0\u00a0\u00a0\u00a0 \u00fee him eagna gesih\u00f0\n sigora so\u00f0cyning \u00a0\u00a0\u00a0\u00a0 syllan wolde.\n Gewite\u00f0 \u00feonne mid \u00fey wuldre \u00a0\u00a0\u00a0\u00a0 on westrodor\n for\u00f0m\u00e6re tungol \u00a0\u00a0\u00a0\u00a0 faran on heape,\n- 70\n- \n o\u00fe\u00fe\u00e6t on \u00e6fenne \u00a0\u00a0\u00a0\u00a0 ut garsecges \n grundas p\u00e6\u00fee\u00f0, \u00a0\u00a0\u00a0\u00a0 glom o\u00feer cig\u00f0;\n niht \u00e6fter cyme\u00f0, \u00a0\u00a0\u00a0\u00a0 healde\u00f0 nydbibod\n halgan dryhtnes. \u00a0\u00a0\u00a0\u00a0 Heofontorht swegl\n scir gescynde\u00f0 \u00a0\u00a0\u00a0\u00a0 in gesceaft godes\n- 75\n- \n under foldan f\u00e6\u00fem, \u00a0\u00a0\u00a0\u00a0 farende tungol. \n For\u00feon n\u00e6nig fira \u00a0\u00a0\u00a0\u00a0 \u00fe\u00e6s frod leofa\u00f0\n \u00fe\u00e6t his m\u00e6ge \u00e6springe \u00a0\u00a0\u00a0\u00a0 \u00feurh his \u00e6gne sped witan,\n hu geond grund f\u00e6re\u00f0 \u00a0\u00a0\u00a0\u00a0 goldtorht sunne\n in \u00fe\u00e6t wonne genip \u00a0\u00a0\u00a0\u00a0 under w\u00e6tra ge\u00fering,\n- 80\n- \n o\u00fe\u00fee hwa \u00fees leohtes \u00a0\u00a0\u00a0\u00a0 londbuende \n brucan mote, \u00a0\u00a0\u00a0\u00a0 si\u00fe\u00fean heo ofer brim hweorfe\u00f0.\n For\u00feon swa teofenede, \u00a0\u00a0\u00a0\u00a0 se \u00fee teala cu\u00fee,\n d\u00e6g wi\u00fe nihte, \u00a0\u00a0\u00a0\u00a0 deop wi\u00f0 hean,\n lyft wi\u00f0 lagustream, \u00a0\u00a0\u00a0\u00a0 lond wi\u00fe w\u00e6ge,\n- 85\n- \n flod wi\u00f0 flode, \u00a0\u00a0\u00a0\u00a0 fisc wi\u00f0 y\u00feum. \n Ne wacia\u00f0 \u00feas geweorc, \u00a0\u00a0\u00a0\u00a0 ac he hi wel healde\u00f0;\n stonda\u00f0 sti\u00f0lice \u00a0\u00a0\u00a0\u00a0 bestry\u00feed f\u00e6ste\n miclum meahtlocum \u00a0\u00a0\u00a0\u00a0 in \u00feam m\u00e6gen\u00ferymme\n mid \u00feam sy ahefed \u00a0\u00a0\u00a0\u00a0 heofon ond eor\u00fee.\n- 90\n- \n Beo\u00f0 \u00feonne eadge \u00a0\u00a0\u00a0\u00a0 \u00fea \u00fe\u00e6r in wunia\u00f0, \n hyhtlic is \u00fe\u00e6t heor\u00f0werud. \u00a0\u00a0\u00a0\u00a0 \u00fe\u00e6t is herga m\u00e6st,\n eadigra unrim, \u00a0\u00a0\u00a0\u00a0 engla \u00fereatas.\n Hy geseo\u00f0 symle \u00a0\u00a0\u00a0\u00a0 hyra sylfra cyning,\n eagum on wlita\u00f0, \u00a0\u00a0\u00a0\u00a0 habba\u00f0 \u00e6ghw\u00e6s genoh.\n- 95\n- \n Nis him wihte won, \u00a0\u00a0\u00a0\u00a0 \u00feam \u00fee wuldres cyning \n geseo\u00fe in swegle; \u00a0\u00a0\u00a0\u00a0 him is symbel ond dream\n ece unhwylen \u00a0\u00a0\u00a0\u00a0 eadgum to frofre.\n For\u00feon scyle mon gehycgan \u00a0\u00a0\u00a0\u00a0 \u00fe\u00e6t he meotude hyre;\n \u00e6ghwylc \u00e6lda bearna \u00a0\u00a0\u00a0\u00a0 forl\u00e6te idle lustas,\n- 100\n- \n l\u00e6ne lifes wynne, \u00a0\u00a0\u00a0\u00a0 fundige him to lissa blisse, \n forl\u00e6te heteni\u00fea \u00a0\u00a0\u00a0\u00a0 gehwone sigan\n mid synna fyrnum, \u00a0\u00a0\u00a0\u00a0 fere him to \u00feam sellan rice.","title":"The Order of the World","type":"page"}