{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a03_15.htm","path":"neu/ascp/a03_15.htm","source_url":"https://sacred-texts.com/neu/ascp/a03_15.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Riming Poem\n Verse Indeterminate Saxon\n \n - \n Me lifes onlah \u00a0\u00a0\u00a0\u00a0 se \u00feis leoht onwrah, \n ond \u00fe\u00e6t torhte geteoh, \u00a0\u00a0\u00a0\u00a0 tillice onwrah.\n Gl\u00e6d w\u00e6s ic gliwum, \u00a0\u00a0\u00a0\u00a0 glenged hiwum,\n blissa bleoum, \u00a0\u00a0\u00a0\u00a0 blostma hiwum.\n- 5\n- \n Secgas mec segon, \u00a0\u00a0\u00a0\u00a0 symbel ne alegon, \n feohgiefe gefegon; \u00a0\u00a0\u00a0\u00a0 fr\u00e6twed w\u00e6gon\n wicg ofer wongum \u00a0\u00a0\u00a0\u00a0 wennan gongum,\n lisse mid longum \u00a0\u00a0\u00a0\u00a0 leoma gehongum.\n \u00fea w\u00e6s w\u00e6stmum aweaht, \u00a0\u00a0\u00a0\u00a0 world onspreht,\n- 10\n- \n under roderum areaht, \u00a0\u00a0\u00a0\u00a0 r\u00e6dm\u00e6gne ofer\u00feeaht. \n Giestas gengdon, \u00a0\u00a0\u00a0\u00a0 gerscype mengdon,\n lisse lengdon, \u00a0\u00a0\u00a0\u00a0 lustum glengdon.\n Scrifen scrad glad \u00a0\u00a0\u00a0\u00a0 \u00feurh gescad in brad,\n w\u00e6s on lagustreame lad, \u00a0\u00a0\u00a0\u00a0 \u00fe\u00e6r me leo\u00feu ne biglad.\n- 15\n- \n H\u00e6fde ic heanne had, \u00a0\u00a0\u00a0\u00a0 ne w\u00e6s me in healle gad, \n \u00fe\u00e6t \u00fe\u00e6r rof weord rad. \u00a0\u00a0\u00a0\u00a0 Oft \u00fe\u00e6r rinc gebad,\n \u00fe\u00e6t he in sele s\u00e6ge \u00a0\u00a0\u00a0\u00a0 sincgew\u00e6ge,\n \u00feegnum ge\u00feyhte. \u00a0\u00a0\u00a0\u00a0 \u00feenden w\u00e6s me m\u00e6gen,\n horsce mec heredon, \u00a0\u00a0\u00a0\u00a0 hilde generedon,\n- 20\n- \n f\u00e6gre feredon, \u00a0\u00a0\u00a0\u00a0 feondon biweredon. \n Swa mec hyhtgiefu heold, \u00a0\u00a0\u00a0\u00a0 hygedryht befeold,\n sta\u00feol\u00e6htum steold, \u00a0\u00a0\u00a0\u00a0 stepegongum weold\n swylce eor\u00fee ol, \u00a0\u00a0\u00a0\u00a0 ahte ic ealdorstol,\n galdorwordum gol. \u00a0\u00a0\u00a0\u00a0 Gomen sibbe ne ofoll,\n- 25\n- \n ac w\u00e6s gefest gear, \u00a0\u00a0\u00a0\u00a0 gellende sner, \n wuniendo w\u00e6r \u00a0\u00a0\u00a0\u00a0 wilbec besc\u00e6r.\n Scealcas w\u00e6ron scearpe, \u00a0\u00a0\u00a0\u00a0 scyl w\u00e6s hearpe,\n hlude hlynede, \u00a0\u00a0\u00a0\u00a0 hleo\u00feor dynede,\n sweglrad swinsade, \u00a0\u00a0\u00a0\u00a0 swi\u00fee ne minsade.\n- 30\n- \n Burgsele beofode, \u00a0\u00a0\u00a0\u00a0 beorht hlifade, \n ellen eacnade, \u00a0\u00a0\u00a0\u00a0 ead beacnade,\n freaum frodade, \u00a0\u00a0\u00a0\u00a0 fromum godade,\n mod m\u00e6gnade, \u00a0\u00a0\u00a0\u00a0 mine f\u00e6gnade,\n treow telgade, \u00a0\u00a0\u00a0\u00a0 tir welgade,\n- 35\n- \n bl\u00e6d blissade, \u00a0\u00a0\u00a0\u00a0 \n gold gearwade, \u00a0\u00a0\u00a0\u00a0 gim hwearfade,\n sinc searwade, \u00a0\u00a0\u00a0\u00a0 sib nearwade.\n From ic w\u00e6s in fr\u00e6twum, \u00a0\u00a0\u00a0\u00a0 freolic in geatwum;\n w\u00e6s min dream dryhtlic, \u00a0\u00a0\u00a0\u00a0 drohta\u00f0 hyhtlic.\n- 40\n- \n Foldan ic freo\u00feode, \u00a0\u00a0\u00a0\u00a0 folcum ic leo\u00feode, \n lif w\u00e6s min longe, \u00a0\u00a0\u00a0\u00a0 leodum in gemonge,\n tirum getonge, \u00a0\u00a0\u00a0\u00a0 teala gehonge.\n Nu min hre\u00feer is hreoh, \u00a0\u00a0\u00a0\u00a0 heofsi\u00feum sceoh,\n nydbysgum neah; \u00a0\u00a0\u00a0\u00a0 gewite\u00f0 nihtes in fleah\n- 45\n- \n se \u00e6r in d\u00e6ge w\u00e6s dyre. \u00a0\u00a0\u00a0\u00a0 Scri\u00fee\u00f0 nu deop in feore \n brondhord geblowen, \u00a0\u00a0\u00a0\u00a0 breostum in forgrowen,\n flyhtum toflowen. \u00a0\u00a0\u00a0\u00a0 Flah is geblowen\n miclum in gemynde; \u00a0\u00a0\u00a0\u00a0 modes gecynde\n grete\u00f0 ungrynde \u00a0\u00a0\u00a0\u00a0 grorn efenpynde,\n- 50\n- \n bealofus byrne\u00f0, \u00a0\u00a0\u00a0\u00a0 bittre toyrne\u00f0. \n Werig winne\u00f0, \u00a0\u00a0\u00a0\u00a0 widsi\u00f0 onginne\u00f0,\n sar ne sinni\u00fe, \u00a0\u00a0\u00a0\u00a0 sorgum cinni\u00f0,\n bl\u00e6d his blinni\u00f0, \u00a0\u00a0\u00a0\u00a0 blisse linni\u00f0,\n listum linne\u00f0, \u00a0\u00a0\u00a0\u00a0 lustum ne tinne\u00f0.\n- 55\n- \n Dreamas swa her gedreosa\u00f0, \u00a0\u00a0\u00a0\u00a0 dryhtscype gehreosa\u00f0, \n lif her men forleosa\u00f0, \u00a0\u00a0\u00a0\u00a0 leahtras oft geceosa\u00f0;\n treow\u00ferag is to trag, \u00a0\u00a0\u00a0\u00a0 seo untrume genag,\n steapum eatole mis\u00feah, \u00a0\u00a0\u00a0\u00a0 ond eal stund genag.\n Swa nu world wende\u00fe, \u00a0\u00a0\u00a0\u00a0 wyrde sende\u00fe,\n- 60\n- \n ond hetes hente\u00f0, \u00a0\u00a0\u00a0\u00a0 h\u00e6le\u00fee scynde\u00f0. \n Wercyn gewite\u00f0, \u00a0\u00a0\u00a0\u00a0 w\u00e6lgar slite\u00f0,\n flahmah flite\u00fe, \u00a0\u00a0\u00a0\u00a0 flan mon hwite\u00f0,\n borgsorg bite\u00f0, \u00a0\u00a0\u00a0\u00a0 bald ald \u00fewite\u00fe,\n wr\u00e6cf\u00e6c wri\u00fea\u00f0, \u00a0\u00a0\u00a0\u00a0 wra\u00fe a\u00f0 smite\u00fe,\n- 65\n- \n singryn sida\u00f0, \u00a0\u00a0\u00a0\u00a0 searofearo glide\u00fe, \n gromtorn gr\u00e6fe\u00fe, \u00a0\u00a0\u00a0\u00a0 gr\u00e6ft hafa\u00f0,\n searohwit sola\u00fe, \u00a0\u00a0\u00a0\u00a0 sumurhat cola\u00f0,\n foldwela fealle\u00f0, \u00a0\u00a0\u00a0\u00a0 feondscipe wealle\u00f0,\n eor\u00f0m\u00e6gen ealda\u00fe, \u00a0\u00a0\u00a0\u00a0 ellen cola\u00f0.\n- 70\n- \n Me \u00fe\u00e6t wyrd gew\u00e6f, \u00a0\u00a0\u00a0\u00a0 ond gewyrht forgeaf, \n \u00fe\u00e6t ic grofe gr\u00e6f, \u00a0\u00a0\u00a0\u00a0 ond \u00fe\u00e6t grimme gr\u00e6f\n flean fl\u00e6sce ne m\u00e6g, \u00a0\u00a0\u00a0\u00a0 \u00feonne flanhred d\u00e6g\n nydgrapum nime\u00fe, \u00a0\u00a0\u00a0\u00a0 \u00feonne seo neaht becyme\u00f0\n seo me e\u00f0les ofonn \u00a0\u00a0\u00a0\u00a0 ond mec her eardes onconn.\n- 75\n- \n \u00feonne lichoma lige\u00f0, \u00a0\u00a0\u00a0\u00a0 lima wyrm frite\u00fe, \n ac him wenne gewige\u00f0 \u00a0\u00a0\u00a0\u00a0 ond \u00fea wist ge\u00feyge\u00f0,\n o\u00fe\u00fe\u00e6t beo\u00fe \u00fea ban \u00a0\u00a0\u00a0\u00a0 an,\n ond \u00e6t nyhstan nan \u00a0\u00a0\u00a0\u00a0 nefne se neda tan\n balawun her gehloten. \u00a0\u00a0\u00a0\u00a0 Ne bi\u00fe se hlisa adroren.\n- 80\n- \n \u00e6r \u00fe\u00e6t eadig ge\u00feence\u00f0, \u00a0\u00a0\u00a0\u00a0 he hine \u00fee oftor swence\u00f0, \n byrge\u00f0 him \u00fea bitran synne, \u00a0\u00a0\u00a0\u00a0 hoga\u00fe to \u00fe\u00e6re betran wynne,\n gemon mor\u00fea lisse, \u00a0\u00a0\u00a0\u00a0 \u00fe\u00e6r sindon miltsa blisse\n hyhtlice in heofona rice. \u00a0\u00a0\u00a0\u00a0 Uton nu halgum gelice\n scyldum biscyrede \u00a0\u00a0\u00a0\u00a0 scyndan generede,\n- 85\n- \n wommum biwerede, \u00a0\u00a0\u00a0\u00a0 wuldre generede, \n \u00fe\u00e6r moncyn mot \u00a0\u00a0\u00a0\u00a0 for meotude rot\n so\u00f0ne god geseon, \u00a0\u00a0\u00a0\u00a0 ond aa in sibbe gefean.","title":"The Riming Poem","type":"page"}