{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a03_2227.htm","path":"neu/ascp/a03_2227.htm","source_url":"https://sacred-texts.com/neu/ascp/a03_2227.htm","text":"Ic eom weor\u00f0 werum, wide funden,\nbrungen of bearwum ond of burghleo\u00feum,\nof denum ond of dunum. D\u00e6ges mec w\u00e6gun\nfe\u00fere on lifte, feredon mid liste\n5\nunder hrofes hleo. H\u00e6le\u00f0 mec si\u00fe\u00fean\nba\u00feedan in bydene. Nu ic eom bindere\nond swingere, sona weorpe esne to eor\u00fean, hwilum ealdne ceorl.\nSona \u00fe\u00e6t onfinde\u00f0, se \u00fee mec feh\u00f0 ongean,\n10\nond wi\u00f0 m\u00e6gen\u00feisan minre gen\u00e6ste\u00f0,\n\u00fe\u00e6t he hrycge sceal hrusan secan,\ngif he unr\u00e6des \u00e6r ne geswice\u00f0,\nstrengo bistolen, strong on spr\u00e6ce,\nm\u00e6gene binumen; nah his modes geweald,\n15\nfota ne folma. Frige hw\u00e6t ic hatte,\n\u00f0e on eor\u00fean swa esnas binde,\ndole \u00e6fter dyntum be d\u00e6ges leohte.","title":"Riddle 27","type":"page"}