{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a03_2240.htm","path":"neu/ascp/a03_2240.htm","source_url":"https://sacred-texts.com/neu/ascp/a03_2240.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n Riddle 40\n Verse Indeterminate Saxon\n \n - \n Ece is se scyppend, \u00a0\u00a0\u00a0\u00a0 se \u00feas eor\u00fean nu \n wre\u00f0stu\u00feum wealde\u00f0 \u00a0\u00a0\u00a0\u00a0 ond \u00feas world healde\u00f0.\n Rice is se reccend \u00a0\u00a0\u00a0\u00a0 ond on ryht cyning\n ealra anwalda, \u00a0\u00a0\u00a0\u00a0 eor\u00fean ond heofones,\n- 5\n- \n healde\u00f0 ond wealde\u00f0, \u00a0\u00a0\u00a0\u00a0 swa he ymb \u00feas utan hweorfe\u00f0. \n He mec wr\u00e6tlice \u00a0\u00a0\u00a0\u00a0 worhte \u00e6t frym\u00fee,\n \u00fea he \u00feisne ymbhwyrft \u00a0\u00a0\u00a0\u00a0 \u00e6rest sette,\n heht mec w\u00e6ccende \u00a0\u00a0\u00a0\u00a0 wunian longe,\n \u00fe\u00e6t ic ne slepe \u00a0\u00a0\u00a0\u00a0 si\u00fe\u00fean \u00e6fre,\n- 10\n- \n ond mec semninga \u00a0\u00a0\u00a0\u00a0 sl\u00e6p ofergonge\u00fe, \n beo\u00f0 eagan min \u00a0\u00a0\u00a0\u00a0 ofestum betyned.\n \u00feisne middangeard \u00a0\u00a0\u00a0\u00a0 meahtig dryhten\n mid his onwalde \u00a0\u00a0\u00a0\u00a0 \u00e6ghw\u00e6r styre\u00f0;\n swa ic mid waldendes \u00a0\u00a0\u00a0\u00a0 worde ealne\n- 15\n- \n \u00feisne ymbhwyrft \u00a0\u00a0\u00a0\u00a0 utan ymbclyppe. \n Ic eom to \u00feon blea\u00f0, \u00a0\u00a0\u00a0\u00a0 \u00fe\u00e6t mec bealdlice m\u00e6g\n gearu gongende \u00a0\u00a0\u00a0\u00a0 grima abregan,\n ond eofore eom \u00a0\u00a0\u00a0\u00a0 \u00e6ghw\u00e6r cenra,\n \u00feonne he gebolgen \u00a0\u00a0\u00a0\u00a0 bidsteal giefe\u00f0;\n- 20\n- \n ne m\u00e6g mec oferswi\u00fean \u00a0\u00a0\u00a0\u00a0 segnberendra \n \u00e6nig ofer eor\u00fean, \u00a0\u00a0\u00a0\u00a0 nym\u00fee se ana god\n se \u00feisne hean heofon \u00a0\u00a0\u00a0\u00a0 healde\u00fe ond wealde\u00fe.\n Ic eom on stence \u00a0\u00a0\u00a0\u00a0 strengre micle\n \u00feonne ricels \u00a0\u00a0\u00a0\u00a0 o\u00fe\u00fee rose sy,\n- 25\n- \n \u00a0\u00a0\u00a0\u00a0 on eor\u00fean tyrf \n wynlic weaxe\u00f0; \u00a0\u00a0\u00a0\u00a0 ic eom wr\u00e6stre \u00feonne heo.\n \u00feeah \u00fee lilie sy \u00a0\u00a0\u00a0\u00a0 leof moncynne,\n beorht on blostman, \u00a0\u00a0\u00a0\u00a0 ic eom betre \u00feonne heo;\n swylce ic nardes stenc \u00a0\u00a0\u00a0\u00a0 nyde oferswi\u00fee\n- 30\n- \n mid minre swetnesse \u00a0\u00a0\u00a0\u00a0 symle \u00e6ghw\u00e6r, \n ond ic fulre eom \u00a0\u00a0\u00a0\u00a0 \u00feonne \u00feis fen swearte\n \u00fe\u00e6t her yfle \u00a0\u00a0\u00a0\u00a0 adelan stince\u00f0.\n Eal ic under heofones \u00a0\u00a0\u00a0\u00a0 hwearfte recce,\n swa me leof f\u00e6der \u00a0\u00a0\u00a0\u00a0 l\u00e6rde \u00e6t frym\u00fee,\n- 35\n- \n \u00fe\u00e6t ic \u00fea mid ryhte \u00a0\u00a0\u00a0\u00a0 reccan moste \n \u00feicce ond \u00feynne; \u00a0\u00a0\u00a0\u00a0 \u00feinga gehwylces\n onlicnesse \u00a0\u00a0\u00a0\u00a0 \u00e6ghw\u00e6r healde.\n Hyrre ic eom heofone, \u00a0\u00a0\u00a0\u00a0 hate\u00fe mec heahcyning\n his deagol \u00feing \u00a0\u00a0\u00a0\u00a0 dyre bihealdan;\n- 40\n- \n eac ic under eor\u00fean \u00a0\u00a0\u00a0\u00a0 eal sceawige \n wom wra\u00f0scrafu \u00a0\u00a0\u00a0\u00a0 wra\u00fera g\u00e6sta.\n Ic eom micle yldra \u00a0\u00a0\u00a0\u00a0 \u00feonne ymbhwyrft \u00fees\n o\u00fe\u00fee \u00fees middangeard \u00a0\u00a0\u00a0\u00a0 meahte geweor\u00fean,\n ond ic giestron w\u00e6s \u00a0\u00a0\u00a0\u00a0 geong acenned\n- 45\n- \n m\u00e6re to monnum \u00a0\u00a0\u00a0\u00a0 \u00feurh minre modor hrif. \n Ic eom f\u00e6gerre \u00a0\u00a0\u00a0\u00a0 fr\u00e6twum goldes,\n \u00feeah hit mon awerge \u00a0\u00a0\u00a0\u00a0 wirum utan;\n ic eom wyrslicre \u00a0\u00a0\u00a0\u00a0 \u00feonne \u00fees wudu fula\n o\u00f0\u00f0e \u00feis waro\u00f0 \u00a0\u00a0\u00a0\u00a0 \u00fee her aworpen lige\u00f0.\n- 50\n- \n Ic eor\u00fean eom \u00a0\u00a0\u00a0\u00a0 \u00e6ghw\u00e6r br\u00e6dre, \n ond widgielra \u00a0\u00a0\u00a0\u00a0 \u00feonne \u00fees wong grena;\n folm mec m\u00e6g bifon \u00a0\u00a0\u00a0\u00a0 ond fingras \u00fery\n utan ea\u00fee \u00a0\u00a0\u00a0\u00a0 ealle ymbclyppan.\n Heardra ic eom ond caldra \u00a0\u00a0\u00a0\u00a0 \u00feonne se hearda forst,\n- 55\n- \n hrim heorugrimma, \u00a0\u00a0\u00a0\u00a0 \u00feonne he to hrusan cyme\u00f0; \n ic eom Ulcanus \u00a0\u00a0\u00a0\u00a0 up irnendan\n leohtan leoman \u00a0\u00a0\u00a0\u00a0 lege hatra.\n Ic eom on goman \u00a0\u00a0\u00a0\u00a0 gena swetra\n \u00feonne \u00feu beobread \u00a0\u00a0\u00a0\u00a0 blende mid hunige;\n- 60\n- \n swylce ic eom wra\u00fere \u00a0\u00a0\u00a0\u00a0 \u00feonne wermod sy, \n \u00fee her on hyrstum \u00a0\u00a0\u00a0\u00a0 heasewe stonde\u00fe.\n Ic mesan m\u00e6g \u00a0\u00a0\u00a0\u00a0 meahtelicor\n ond efnetan \u00a0\u00a0\u00a0\u00a0 ealdum \u00feyrse,\n ond ic ges\u00e6lig m\u00e6g \u00a0\u00a0\u00a0\u00a0 symle lifgan\n- 65\n- \n \u00feeah ic \u00e6tes ne sy \u00a0\u00a0\u00a0\u00a0 \u00e6fre to feore. \n Ic m\u00e6g fromlicor \u00a0\u00a0\u00a0\u00a0 fleogan \u00feonne pernex\n o\u00fe\u00fee earn o\u00fe\u00fee hafoc \u00a0\u00a0\u00a0\u00a0 \u00e6fre meahte;\n nis zefferus, \u00a0\u00a0\u00a0\u00a0 se swifta wind,\n \u00fe\u00e6t swa fromlice m\u00e6g \u00a0\u00a0\u00a0\u00a0 feran \u00e6ghw\u00e6r;\n- 70\n- \n me is sn\u00e6gl swiftra, \u00a0\u00a0\u00a0\u00a0 snelra regnwyrm \n ond fenyce \u00a0\u00a0\u00a0\u00a0 fore hre\u00fere;\n is \u00fe\u00e6s gores sunu \u00a0\u00a0\u00a0\u00a0 gonge hr\u00e6dra,\n \u00feone we wifel \u00a0\u00a0\u00a0\u00a0 wordum nemna\u00f0.\n Hefigere ic eom micle \u00a0\u00a0\u00a0\u00a0 \u00feonne se hara stan\n- 75\n- \n o\u00fe\u00fee unlytel \u00a0\u00a0\u00a0\u00a0 leades clympre, \n leohtre ic eom micle \u00a0\u00a0\u00a0\u00a0 \u00feonne \u00fees lytla wyrm\n \u00fee her on flode g\u00e6\u00f0 \u00a0\u00a0\u00a0\u00a0 fotum dryge.\n Flinte ic eom heardre \u00a0\u00a0\u00a0\u00a0 \u00fee \u00feis fyr drife\u00fe\n of \u00feissum strongan \u00a0\u00a0\u00a0\u00a0 style heardan,\n- 80\n- \n hnescre ic eom micle \u00a0\u00a0\u00a0\u00a0 halsrefe\u00fere, \n seo her on winde \u00a0\u00a0\u00a0\u00a0 w\u00e6we\u00f0 on lyfte.\n Ic eor\u00fean eom \u00a0\u00a0\u00a0\u00a0 \u00e6ghw\u00e6r br\u00e6dre\n ond widgelra \u00a0\u00a0\u00a0\u00a0 \u00feonne \u00fees wong grena;\n ic uttor ea\u00fee \u00a0\u00a0\u00a0\u00a0 eal ymbwinde,\n- 85\n- \n wr\u00e6tlice gewefen \u00a0\u00a0\u00a0\u00a0 wundorcr\u00e6fte. \n Nis under me \u00a0\u00a0\u00a0\u00a0 \u00e6nig o\u00feer\n wiht waldendre \u00a0\u00a0\u00a0\u00a0 on worldlife;\n ic eom ufor \u00a0\u00a0\u00a0\u00a0 ealra gesceafta,\n \u00feara \u00fee worhte \u00a0\u00a0\u00a0\u00a0 waldend user,\n- 90\n- \n se mec ana m\u00e6g \u00a0\u00a0\u00a0\u00a0 ecan meahtum, \n ge\u00feeon \u00ferymme, \u00a0\u00a0\u00a0\u00a0 \u00fe\u00e6t ic on\u00feunian ne sceal.\n Mara ic eom ond strengra \u00a0\u00a0\u00a0\u00a0 \u00feonne se micla hw\u00e6l,\n se \u00fee garsecges \u00a0\u00a0\u00a0\u00a0 grund bihealde\u00f0\n sweartan syne; \u00a0\u00a0\u00a0\u00a0 ic eom swi\u00fere \u00feonne he,\n- 95\n- \n swylce ic eom on m\u00e6gene \u00a0\u00a0\u00a0\u00a0 minum l\u00e6sse \n \u00feonne se hondwyrm, \u00a0\u00a0\u00a0\u00a0 se \u00fee h\u00e6le\u00fea bearn,\n secgas searo\u00feoncle, \u00a0\u00a0\u00a0\u00a0 seaxe delfa\u00f0.\n Nu hafu ic in heafde \u00a0\u00a0\u00a0\u00a0 hwite loccas\n wr\u00e6ste gewundne, \u00a0\u00a0\u00a0\u00a0 ac ic eom wide calu;\n- 100\n- \n ne ic breaga ne bruna \u00a0\u00a0\u00a0\u00a0 brucan moste, \n ac mec bescyrede \u00a0\u00a0\u00a0\u00a0 scyppend eallum;\n nu me wr\u00e6tlice \u00a0\u00a0\u00a0\u00a0 weaxa\u00f0 on heafde\n \u00fe\u00e6t me on gescyldrum \u00a0\u00a0\u00a0\u00a0 scinan motan\n ful wr\u00e6tlice \u00a0\u00a0\u00a0\u00a0 wundne loccas.\n- 105\n- \n Mara ic eom ond f\u00e6ttra \u00a0\u00a0\u00a0\u00a0 \u00feonne am\u00e6sted swin, \n bearg bellende, \u00a0\u00a0\u00a0\u00a0 \u00fee on bocwuda,\n won wrotende \u00a0\u00a0\u00a0\u00a0 wynnum lifde\n \u00fe\u00e6t he","title":"Riddle 40","type":"page"}