{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a03_23.htm","path":"neu/ascp/a03_23.htm","source_url":"https://sacred-texts.com/neu/ascp/a03_23.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Wife's Lament\n Verse Indeterminate Saxon\n \n - \n Ic \u00feis giedd wrece \u00a0\u00a0\u00a0\u00a0 bi me ful geomorre, \n minre sylfre si\u00f0. \u00a0\u00a0\u00a0\u00a0 Ic \u00fe\u00e6t secgan m\u00e6g,\n hw\u00e6t ic yrm\u00fea gebad, \u00a0\u00a0\u00a0\u00a0 si\u00fe\u00fean ic up weox,\n niwes o\u00fe\u00fee ealdes, \u00a0\u00a0\u00a0\u00a0 no ma \u00feonne nu.\n- 5\n- \n A ic wite wonn \u00a0\u00a0\u00a0\u00a0 minra wr\u00e6csi\u00fea. \n \u00e6rest min hlaford gewat \u00a0\u00a0\u00a0\u00a0 heonan of leodum\n ofer y\u00fea gelac; \u00a0\u00a0\u00a0\u00a0 h\u00e6fde ic uhtceare\n hw\u00e6r min leodfruma \u00a0\u00a0\u00a0\u00a0 londes w\u00e6re.\n \u00f0a ic me feran gewat \u00a0\u00a0\u00a0\u00a0 folga\u00f0 secan,\n- 10\n- \n wineleas wrecca, \u00a0\u00a0\u00a0\u00a0 for minre wea\u00feearfe. \n Ongunnon \u00fe\u00e6t \u00fe\u00e6s monnes \u00a0\u00a0\u00a0\u00a0 magas hycgan\n \u00feurh dyrne ge\u00feoht, \u00a0\u00a0\u00a0\u00a0 \u00fe\u00e6t hy tod\u00e6lden unc,\n \u00fe\u00e6t wit gewidost \u00a0\u00a0\u00a0\u00a0 in woruldrice\n lifdon la\u00f0licost, \u00a0\u00a0\u00a0\u00a0 ond mec longade.\n- 15\n- \n Het mec hlaford min \u00a0\u00a0\u00a0\u00a0 herheard niman, \n ahte ic leofra lyt \u00a0\u00a0\u00a0\u00a0 on \u00feissum londstede,\n holdra freonda. \u00a0\u00a0\u00a0\u00a0 For\u00feon is min hyge geomor,\n \u00f0a ic me ful gem\u00e6cne \u00a0\u00a0\u00a0\u00a0 monnan funde,\n heards\u00e6ligne, \u00a0\u00a0\u00a0\u00a0 hygegeomorne,\n- 20\n- \n mod mi\u00feendne, \u00a0\u00a0\u00a0\u00a0 mor\u00feor hycgendne. \n Bli\u00fee geb\u00e6ro \u00a0\u00a0\u00a0\u00a0 ful oft wit beotedan\n \u00fe\u00e6t unc ne ged\u00e6lde \u00a0\u00a0\u00a0\u00a0 nemne dea\u00f0 ana\n owiht elles; \u00a0\u00a0\u00a0\u00a0 eft is \u00fe\u00e6t onhworfen,\n is nu \u00a0\u00a0\u00a0\u00a0 swa hit no w\u00e6re\n- 25\n- \n freondscipe uncer. \u00a0\u00a0\u00a0\u00a0 Sceal ic feor ge neah \n mines felaleofan \u00a0\u00a0\u00a0\u00a0 f\u00e6h\u00f0u dreogan.\n Heht mec mon wunian \u00a0\u00a0\u00a0\u00a0 on wuda bearwe,\n under actreo \u00a0\u00a0\u00a0\u00a0 in \u00feam eor\u00f0scr\u00e6fe.\n Eald is \u00fees eor\u00f0sele, \u00a0\u00a0\u00a0\u00a0 eal ic eom oflongad,\n- 30\n- \n sindon dena dimme, \u00a0\u00a0\u00a0\u00a0 duna uphea, \n bitre burgtunas, \u00a0\u00a0\u00a0\u00a0 brerum beweaxne,\n wic wynna leas. \u00a0\u00a0\u00a0\u00a0 Ful oft mec her wra\u00fee begeat\n fromsi\u00fe frean. \u00a0\u00a0\u00a0\u00a0 Frynd sind on eor\u00fean,\n leofe lifgende, \u00a0\u00a0\u00a0\u00a0 leger weardia\u00f0,\n- 35\n- \n \u00feonne ic on uhtan \u00a0\u00a0\u00a0\u00a0 ana gonge \n under actreo \u00a0\u00a0\u00a0\u00a0 geond \u00feas eor\u00f0scrafu.\n \u00fe\u00e6r ic sittan mot \u00a0\u00a0\u00a0\u00a0 sumorlangne d\u00e6g,\n \u00fe\u00e6r ic wepan m\u00e6g \u00a0\u00a0\u00a0\u00a0 mine wr\u00e6csi\u00feas,\n earfo\u00fea fela; \u00a0\u00a0\u00a0\u00a0 for\u00feon ic \u00e6fre ne m\u00e6g\n- 40\n- \n \u00fe\u00e6re modceare \u00a0\u00a0\u00a0\u00a0 minre gerestan, \n ne ealles \u00fe\u00e6s longa\u00fees \u00a0\u00a0\u00a0\u00a0 \u00fee mec on \u00feissum life begeat.\n A scyle geong mon \u00a0\u00a0\u00a0\u00a0 wesan geomormod,\n heard heortan ge\u00feoht, \u00a0\u00a0\u00a0\u00a0 swylce habban sceal\n bli\u00fee geb\u00e6ro, \u00a0\u00a0\u00a0\u00a0 eac \u00feon breostceare,\n- 45\n- \n sinsorgna gedreag, \u00a0\u00a0\u00a0\u00a0 sy \u00e6t him sylfum gelong \n eal his worulde wyn, \u00a0\u00a0\u00a0\u00a0 sy ful wide fah\n feorres folclondes, \u00a0\u00a0\u00a0\u00a0 \u00fe\u00e6t min freond site\u00f0\n under stanhli\u00fee \u00a0\u00a0\u00a0\u00a0 storme behrimed,\n wine werigmod, \u00a0\u00a0\u00a0\u00a0 w\u00e6tre beflowen\n- 50\n- \n on dreorsele. \u00a0\u00a0\u00a0\u00a0 Dreoge\u00f0 se min wine \n micle modceare; \u00a0\u00a0\u00a0\u00a0 he gemon to oft\n wynlicran wic. \u00a0\u00a0\u00a0\u00a0 Wa bi\u00f0 \u00feam \u00fee sceal\n of lango\u00fee \u00a0\u00a0\u00a0\u00a0 leofes abidan.","title":"The Wife's Lament","type":"page"}