{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a04_01.htm","path":"neu/ascp/a04_01.htm","source_url":"https://sacred-texts.com/neu/ascp/a04_01.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Next\u00a0\n \n \n Beowulf\n Verse Indeterminate Saxon\n \n - \n Hw\u00e6t! We Gardena \u00a0 \u00a0 \u00a0 \u00a0 in geardagum, \n \u00feeodcyninga, \u00a0 \u00a0 \u00a0 \u00a0 \u00ferym gefrunon,\n hu \u00f0a \u00e6\u00feelingas \u00a0 \u00a0 \u00a0 \u00a0 ellen fremedon.\n Oft Scyld Scefing \u00a0 \u00a0 \u00a0 \u00a0 scea\u00feena \u00fereatum,\n- 5\n- \n monegum m\u00e6g\u00feum, \u00a0 \u00a0 \u00a0 \u00a0 meodosetla ofteah, \n egsode eorlas. \u00a0 \u00a0 \u00a0 \u00a0 Sy\u00f0\u00f0an \u00e6rest wear\u00f0\n feasceaft funden, \u00a0 \u00a0 \u00a0 \u00a0 he \u00fe\u00e6s frofre gebad,\n weox under wolcnum, \u00a0 \u00a0 \u00a0 \u00a0 weor\u00f0myndum \u00feah,\n o\u00f0\u00fe\u00e6t him \u00e6ghwylc \u00a0 \u00a0 \u00a0 \u00a0 \u00feara ymbsittendra\n- 10\n- \n ofer hronrade \u00a0 \u00a0 \u00a0 \u00a0 hyran scolde, \n gomban gyldan. \u00a0 \u00a0 \u00a0 \u00a0 \u00fe\u00e6t w\u00e6s god cyning!\n \u00f0\u00e6m eafera w\u00e6s \u00a0 \u00a0 \u00a0 \u00a0 \u00e6fter cenned,\n geong in geardum, \u00a0 \u00a0 \u00a0 \u00a0 \u00feone god sende\n folce to frofre; \u00a0 \u00a0 \u00a0 \u00a0 fyren\u00f0earfe ongeat\n- 15\n- \n \u00fee hie \u00e6r drugon \u00a0 \u00a0 \u00a0 \u00a0 aldorlease \n lange hwile. \u00a0 \u00a0 \u00a0 \u00a0 Him \u00fe\u00e6s liffrea,\n wuldres wealdend, \u00a0 \u00a0 \u00a0 \u00a0 woroldare forgeaf;\n Beowulf w\u00e6s breme \u00a0 \u00a0 \u00a0 \u00a0 (bl\u00e6d wide sprang),\n Scyldes eafera \u00a0 \u00a0 \u00a0 \u00a0 Scedelandum in.\n- 20\n- \n Swa sceal geong guma \u00a0 \u00a0 \u00a0 \u00a0 gode gewyrcean, \n fromum feohgiftum \u00a0 \u00a0 \u00a0 \u00a0 on f\u00e6der bearme,\n \u00fe\u00e6t hine on ylde \u00a0 \u00a0 \u00a0 \u00a0 eft gewunigen\n wilgesi\u00feas, \u00a0 \u00a0 \u00a0 \u00a0 \u00feonne wig cume,\n leode gel\u00e6sten; \u00a0 \u00a0 \u00a0 \u00a0 lofd\u00e6dum sceal\n- 25\n- \n in m\u00e6g\u00fea gehw\u00e6re \u00a0 \u00a0 \u00a0 \u00a0 man ge\u00feeon. \n Him \u00f0a Scyld gewat \u00a0 \u00a0 \u00a0 \u00a0 to gesc\u00e6phwile\n felahror feran \u00a0 \u00a0 \u00a0 \u00a0 on frean w\u00e6re.\n Hi hyne \u00fea \u00e6tb\u00e6ron \u00a0 \u00a0 \u00a0 \u00a0 to brimes faro\u00f0e,\n sw\u00e6se gesi\u00feas, \u00a0 \u00a0 \u00a0 \u00a0 swa he selfa b\u00e6d,\n- 30\n- \n \u00feenden wordum weold \u00a0 \u00a0 \u00a0 \u00a0 wine Scyldinga; \n leof landfruma \u00a0 \u00a0 \u00a0 \u00a0 lange ahte.\n \u00fe\u00e6r \u00e6t hy\u00f0e stod \u00a0 \u00a0 \u00a0 \u00a0 hringedstefna,\n isig ond utfus, \u00a0 \u00a0 \u00a0 \u00a0 \u00e6\u00feelinges f\u00e6r.\n Aledon \u00fea \u00a0 \u00a0 \u00a0 \u00a0 leofne \u00feeoden,\n- 35\n- \n beaga bryttan, \u00a0 \u00a0 \u00a0 \u00a0 on bearm scipes, \n m\u00e6rne be m\u00e6ste. \u00a0 \u00a0 \u00a0 \u00a0 \u00fe\u00e6r w\u00e6s madma fela\n of feorwegum, \u00a0 \u00a0 \u00a0 \u00a0 fr\u00e6twa, gel\u00e6ded;\n ne hyrde ic cymlicor \u00a0 \u00a0 \u00a0 \u00a0 ceol gegyrwan\n hildew\u00e6pnum \u00a0 \u00a0 \u00a0 \u00a0 ond hea\u00f0ow\u00e6dum,\n- 40\n- \n billum ond byrnum; \u00a0 \u00a0 \u00a0 \u00a0 him on bearme l\u00e6g \n madma m\u00e6nigo, \u00a0 \u00a0 \u00a0 \u00a0 \u00fea him mid scoldon\n on flodes \u00e6ht \u00a0 \u00a0 \u00a0 \u00a0 feor gewitan.\n Nal\u00e6s hi hine l\u00e6ssan \u00a0 \u00a0 \u00a0 \u00a0 lacum teodan,\n \u00feeodgestreonum, \u00a0 \u00a0 \u00a0 \u00a0 \u00feon \u00fea dydon\n- 45\n- \n \u00fee hine \u00e6t frumsceafte \u00a0 \u00a0 \u00a0 \u00a0 for\u00f0 onsendon \n \u00e6nne ofer y\u00f0e \u00a0 \u00a0 \u00a0 \u00a0 umborwesende.\n \u00fea gyt hie him asetton \u00a0 \u00a0 \u00a0 \u00a0 segen geldenne\n heah ofer heafod, \u00a0 \u00a0 \u00a0 \u00a0 leton holm beran,\n geafon on garsecg; \u00a0 \u00a0 \u00a0 \u00a0 him w\u00e6s geomor sefa,\n- 50\n- \n murnende mod. \u00a0 \u00a0 \u00a0 \u00a0 Men ne cunnon \n secgan to so\u00f0e, \u00a0 \u00a0 \u00a0 \u00a0 seler\u00e6dende,\n h\u00e6le\u00f0 under heofenum, \u00a0 \u00a0 \u00a0 \u00a0 hwa \u00fe\u00e6m hl\u00e6ste onfeng.\n \u00f0a w\u00e6s on burgum \u00a0 \u00a0 \u00a0 \u00a0 Beowulf Scyldinga,\n leof leodcyning, \u00a0 \u00a0 \u00a0 \u00a0 longe \u00ferage\n- 55\n- \n folcum gefr\u00e6ge \u00a0 \u00a0 \u00a0 \u00a0 (f\u00e6der ellor hwearf, \n aldor of earde), \u00a0 \u00a0 \u00a0 \u00a0 o\u00fe\u00fe\u00e6t him eft onwoc\n heah Healfdene; \u00a0 \u00a0 \u00a0 \u00a0 heold \u00feenden lifde,\n gamol ond gu\u00f0reouw, \u00a0 \u00a0 \u00a0 \u00a0 gl\u00e6de Scyldingas.\n \u00f0\u00e6m feower bearn \u00a0 \u00a0 \u00a0 \u00a0 for\u00f0 gerimed\n- 60\n- \n in worold wocun, \u00a0 \u00a0 \u00a0 \u00a0 weoroda r\u00e6swan, \n Heorogar ond Hro\u00f0gar \u00a0 \u00a0 \u00a0 \u00a0 ond Halga til;\n hyrde ic \u00fe\u00e6t \u00a0 \u00a0 \u00a0 \u00a0 w\u00e6s Onelan cwen,\n Hea\u00f0oscilfingas \u00a0 \u00a0 \u00a0 \u00a0 healsgebedda.\n \u00fea w\u00e6s Hro\u00f0gare \u00a0 \u00a0 \u00a0 \u00a0 heresped gyfen,\n- 65\n- \n wiges weor\u00f0mynd, \u00a0 \u00a0 \u00a0 \u00a0 \u00fe\u00e6t him his winemagas \n georne hyrdon, \u00a0 \u00a0 \u00a0 \u00a0 o\u00f0\u00f0 \u00fe\u00e6t seo geogo\u00f0 geweox,\n magodriht micel. \u00a0 \u00a0 \u00a0 \u00a0 Him on mod bearn\n \u00fe\u00e6t healreced \u00a0 \u00a0 \u00a0 \u00a0 hatan wolde,\n medo\u00e6rn micel, \u00a0 \u00a0 \u00a0 \u00a0 men gewyrcean\n- 70\n- \n \u00feonne yldo bearn \u00a0 \u00a0 \u00a0 \u00a0 \u00e6fre gefrunon, \n ond \u00fe\u00e6r on innan \u00a0 \u00a0 \u00a0 \u00a0 eall ged\u00e6lan\n geongum ond ealdum, \u00a0 \u00a0 \u00a0 \u00a0 swylc him god sealde,\n buton folcscare \u00a0 \u00a0 \u00a0 \u00a0 ond feorum gumena.\n \u00f0a ic wide gefr\u00e6gn \u00a0 \u00a0 \u00a0 \u00a0 weorc gebannan\n- 75\n- \n manigre m\u00e6g\u00fee \u00a0 \u00a0 \u00a0 \u00a0 geond \u00feisne middangeard, \n folcstede fr\u00e6twan. \u00a0 \u00a0 \u00a0 \u00a0 Him on fyrste gelomp,\n \u00e6dre mid yldum, \u00a0 \u00a0 \u00a0 \u00a0 \u00fe\u00e6t hit wear\u00f0 ealgearo,\n heal\u00e6rna m\u00e6st; \u00a0 \u00a0 \u00a0 \u00a0 scop him Heort naman\n se \u00fee his wordes geweald \u00a0 \u00a0 \u00a0 \u00a0 wide h\u00e6fde.\n- 80\n- \n He beot ne aleh, \u00a0 \u00a0 \u00a0 \u00a0 beagas d\u00e6lde, \n sinc \u00e6t symle. \u00a0 \u00a0 \u00a0 \u00a0 Sele hlifade,\n heah ond horngeap, \u00a0 \u00a0 \u00a0 \u00a0 hea\u00f0owylma bad,\n la\u00f0an liges; \u00a0 \u00a0 \u00a0 \u00a0 ne w\u00e6s hit lenge \u00fea gen\n \u00fe\u00e6t se ecghete \u00a0 \u00a0 \u00a0 \u00a0 a\u00feumsweorum\n- 85\n- \n \u00e6fter w\u00e6lni\u00f0e \u00a0 \u00a0 \u00a0 \u00a0 w\u00e6cnan scolde. \n \u00f0a se elleng\u00e6st \u00a0 \u00a0 \u00a0 \u00a0 earfo\u00f0lice\n \u00ferage ge\u00feolode, \u00a0 \u00a0 \u00a0 \u00a0 se \u00fee in \u00feystrum bad,\n \u00fe\u00e6t he dogora gehwam \u00a0 \u00a0 \u00a0 \u00a0 dream gehyrde\n hludne in healle; \u00a0 \u00a0 \u00a0 \u00a0 \u00fe\u00e6r w\u00e6s hearpan sweg,\n- 90\n- \n swutol sang scopes. \u00a0 \u00a0 \u00a0 \u00a0 S\u00e6gde se \u00fee cu\u00fee \n frumsceaft fira \u00a0 \u00a0 \u00a0 \u00a0 feorran reccan,\n cw\u00e6\u00f0 \u00fe\u00e6t se \u00e6lmihtiga \u00a0 \u00a0 \u00a0 \u00a0 eor\u00f0an worhte,\n wlitebeorhtne wang, \u00a0 \u00a0 \u00a0 \u00a0 swa w\u00e6ter bebuge\u00f0,\n gesette sigehre\u00feig \u00a0 \u00a0 \u00a0 \u00a0 sunnan ond monan\n- 95\n- \n leoman to leohte \u00a0 \u00a0 \u00a0 \u00a0 landbuendum \n ond gefr\u00e6twade \u00a0 \u00a0 \u00a0 \u00a0 foldan sceatas\n leomum ond leafum, \u00a0 \u00a0 \u00a0 \u00a0 lif eac gesceop\n cynna gehwylcum \u00a0 \u00a0 \u00a0 \u00a0 \u00feara \u00f0e cwice hwyrfa\u00fe.\n Swa \u00f0a drihtguman \u00a0 \u00a0 \u00a0 \u00a0 dreamum lifdon\n- 100\n- \n eadiglice, \u00a0 \u00a0 \u00a0 \u00a0 o\u00f0\u00f0\u00e6t an ongan \n fyrene fremman \u00a0 \u00a0 \u00a0 \u00a0 feond on helle.\n W\u00e6s se grimma g\u00e6st \u00a0 \u00a0 \u00a0 \u00a0 Grendel haten,\n m\u00e6re mearcstapa, \u00a0 \u00a0 \u00a0 \u00a0 se \u00fee moras heold,\n fen ond f\u00e6sten; \u00a0 \u00a0 \u00a0 \u00a0 fifelcynnes eard\n- 105\n- \n wons\u00e6li wer \u00a0 \u00a0 \u00a0 \u00a0 weardode hwile, \n si\u00fe\u00f0an him scyppend \u00a0 \u00a0 \u00a0 \u00a0 forscrifen h\u00e6fde\n in Caines cynne. \u00a0 \u00a0 \u00a0 \u00a0 \u00feone cwealm gewr\u00e6c\n ece drihten, \u00a0 \u00a0 \u00a0 \u00a0 \u00fe\u00e6s \u00fee he Abel slog;\n ne gefeah he \u00fe\u00e6re f\u00e6h\u00f0e, \u00a0 \u00a0 \u00a0 \u00a0 ac he hine feor forwr\u00e6c,\n- 110\n- \n metod for \u00fey mane, \u00a0 \u00a0 \u00a0 \u00a0 mancynne fram. \n \u00feanon untydras \u00a0 \u00a0 \u00a0 \u00a0 ealle onwocon,\n eotenas ond ylfe \u00a0 \u00a0 \u00a0 \u00a0 ond orcneas,\n swylce gigantas, \u00a0 \u00a0 \u00a0 \u00a0 \u00fea wi\u00f0 gode wunnon\n lange \u00ferage; \u00a0 \u00a0 \u00a0 \u00a0 he him \u00f0\u00e6s lean forgeald.\n- 115\n- \n Gewat \u00f0a neosian, \u00a0 \u00a0 \u00a0 \u00a0 sy\u00fe\u00f0an niht becom, \n hean huses, \u00a0 \u00a0 \u00a0 \u00a0 hu hit Hringdene\n \u00e6fter beor\u00feege \u00a0 \u00a0 \u00a0 \u00a0 gebun h\u00e6fdon.\n Fand \u00fea \u00f0\u00e6r inne \u00a0 \u00a0 \u00a0 \u00a0 \u00e6\u00feelinga gedriht\n swefan \u00e6fter symble; \u00a0 \u00a0 \u00a0 \u00a0 sorge ne cu\u00f0on,\n- 120\n- \n wonsceaft wera. \u00a0 \u00a0 \u00a0 \u00a0 Wiht unh\u00e6lo, \n grim ond gr\u00e6dig, \u00a0 \u00a0 \u00a0 \u00a0 gearo sona w\u00e6s,\n reoc ond re\u00fee, \u00a0 \u00a0 \u00a0 \u00a0 ond on r\u00e6ste genam\n \u00feritig \u00feegna, \u00a0 \u00a0 \u00a0 \u00a0 \u00feanon eft gewat\n hu\u00f0e hremig \u00a0 \u00a0 \u00a0 \u00a0 to ham faran,\n- 125\n- \n mid \u00fe\u00e6re w\u00e6lfylle \u00a0 \u00a0 \u00a0 \u00a0 wica neosan. \n \u00f0a w\u00e6s on uhtan \u00a0 \u00a0 \u00a0 \u00a0 mid \u00e6rd\u00e6ge\n Grendles gu\u00f0cr\u00e6ft \u00a0 \u00a0 \u00a0 \u00a0 gumum undyrne;\n \u00fea w\u00e6s \u00e6fter wiste \u00a0 \u00a0 \u00a0 \u00a0 wop up ahafen,\n micel morgensweg. \u00a0 \u00a0 \u00a0 \u00a0 M\u00e6re \u00feeoden,\n- 130\n- \n \u00e6\u00feeling \u00e6rgod, \u00a0 \u00a0 \u00a0 \u00a0 unbli\u00f0e s\u00e6t, \n \u00feolode \u00f0ry\u00f0swy\u00f0, \u00a0 \u00a0 \u00a0 \u00a0 \u00feegnsorge dreah,\n sy\u00f0\u00fean hie \u00fe\u00e6s la\u00f0an \u00a0 \u00a0 \u00a0 \u00a0 last sceawedon,\n wergan gastes; \u00a0 \u00a0 \u00a0 \u00a0 w\u00e6s \u00fe\u00e6t gewin to strang,\n la\u00f0 ond longsum. \u00a0 \u00a0 \u00a0 \u00a0 N\u00e6s hit lengra fyrst,\n- 135\n- \n ac ymb ane niht \u00a0 \u00a0 \u00a0 \u00a0 eft gefremede \n mor\u00f0beala mare \u00a0 \u00a0 \u00a0 \u00a0 ond no mearn fore,\n f\u00e6h\u00f0e ond fyrene; \u00a0 \u00a0 \u00a0 \u00a0 w\u00e6s to f\u00e6st on \u00feam.\n \u00fea w\u00e6s ea\u00f0fynde \u00a0 \u00a0 \u00a0 \u00a0 \u00fee him elles hw\u00e6r\n gerumlicor \u00a0 \u00a0 \u00a0 \u00a0 r\u00e6ste sohte,\n- 140\n- \n bed \u00e6fter burum, \u00a0 \u00a0 \u00a0 \u00a0 \u00f0a him gebeacnod wice \u00a0 \u00a0 \u00a0 \u00a0 sweotolan tacne \n heal\u00f0egnes hete; \u00a0 \u00a0 \u00a0 \u00a0 heold hyne sy\u00f0\u00fean\n fyr ond f\u00e6stor \u00a0 \u00a0 \u00a0 \u00a0 se \u00fe\u00e6m feonde \u00e6twand.\n Swa rixode \u00a0 \u00a0 \u00a0 \u00a0 ond wi\u00f0 rihte wan,\n- 145\n- \n ana wi\u00f0 eallum, \u00a0 \u00a0 \u00a0 \u00a0 o\u00f0\u00fe\u00e6t idel stod \n husa selest. \u00a0 \u00a0 \u00a0 \u00a0 W\u00e6s seo hwil micel;\n XII wintra tid \u00a0 \u00a0 \u00a0 \u00a0 torn ge\u00feolode\n wine Scyldinga, \u00a0 \u00a0 \u00a0 \u00a0 weana gehwelcne,\n sidra sorga. \u00a0 \u00a0 \u00a0 \u00a0 For\u00f0am secgum wear\u00f0,\n- 150\n- \n ylda bearnum, \u00a0 \u00a0 \u00a0 \u00a0 undyrne cu\u00f0, \n gyddum geomore, \u00a0 \u00a0 \u00a0 \u00a0 \u00fe\u00e6tte Grendel wan\n hwile wi\u00f0 Hro\u00fegar, \u00a0 \u00a0 \u00a0 \u00a0 heteni\u00f0as w\u00e6g,\n fyrene ond f\u00e6h\u00f0e \u00a0 \u00a0 \u00a0 \u00a0 fela missera,\n singale s\u00e6ce, \u00a0 \u00a0 \u00a0 \u00a0 sibbe ne wolde\n- 155\n- \n wi\u00f0 manna hwone \u00a0 \u00a0 \u00a0 \u00a0 m\u00e6genes Deniga, \n feorhbealo feorran, \u00a0 \u00a0 \u00a0 \u00a0 fea \u00feingian,\n ne \u00fe\u00e6r n\u00e6nig witena \u00a0 \u00a0 \u00a0 \u00a0 wenan \u00feorfte\n beorhtre bote \u00a0 \u00a0 \u00a0 \u00a0 to banan folmum,\n ac se \u00e6gl\u00e6ca \u00a0 \u00a0 \u00a0 \u00a0 ehtende w\u00e6s,\n- 160\n- \n deorc dea\u00fescua, \u00a0 \u00a0 \u00a0 \u00a0 dugu\u00fee ond geogo\u00fee, \n seomade ond syrede, \u00a0 \u00a0 \u00a0 \u00a0 sinnihte heold\n mistige moras; \u00a0 \u00a0 \u00a0 \u00a0 men ne cunnon\n hwyder helrunan \u00a0 \u00a0 \u00a0 \u00a0 hwyrftum scri\u00fea\u00f0.\n Swa fela fyrena \u00a0 \u00a0 \u00a0 \u00a0 feond mancynnes,\n- 165\n- \n atol angengea, \u00a0 \u00a0 \u00a0 \u00a0 oft gefremede, \n heardra hyn\u00f0a. \u00a0 \u00a0 \u00a0 \u00a0 Heorot eardode,\n sincfage sel \u00a0 \u00a0 \u00a0 \u00a0 sweartum nihtum;\n no he \u00feone gifstol \u00a0 \u00a0 \u00a0 \u00a0 gretan moste,\n ma\u00fe\u00f0um for metode, \u00a0 \u00a0 \u00a0 \u00a0 ne his myne wisse.\n- 170\n- \n \u00fe\u00e6t w\u00e6s wr\u00e6c micel \u00a0 \u00a0 \u00a0 \u00a0 wine Scyldinga, \n modes brec\u00f0a. \u00a0 \u00a0 \u00a0 \u00a0 Monig oft ges\u00e6t\n rice to rune; \u00a0 \u00a0 \u00a0 \u00a0 r\u00e6d eahtedon\n hw\u00e6t swi\u00f0ferh\u00f0um \u00a0 \u00a0 \u00a0 \u00a0 selest w\u00e6re\n wi\u00f0 f\u00e6rgryrum \u00a0 \u00a0 \u00a0 \u00a0 to gefremmanne.\n- 175\n- \n Hwilum hie geheton \u00a0 \u00a0 \u00a0 \u00a0 \u00e6t h\u00e6rgtrafum \n wigweor\u00feunga, \u00a0 \u00a0 \u00a0 \u00a0 wordum b\u00e6don\n \u00fe\u00e6t him gastbona \u00a0 \u00a0 \u00a0 \u00a0 geoce gefremede\n wi\u00f0 \u00feeod\u00fereaum. \u00a0 \u00a0 \u00a0 \u00a0 Swylc w\u00e6s \u00feeaw hyra,\n h\u00e6\u00feenra hyht; \u00a0 \u00a0 \u00a0 \u00a0 helle gemundon\n- 180\n- \n in modsefan, \u00a0 \u00a0 \u00a0 \u00a0 metod hie ne cu\u00feon, \n d\u00e6da demend, \u00a0 \u00a0 \u00a0 \u00a0 ne wiston hie drihten god,\n ne hie huru heofena helm \u00a0 \u00a0 \u00a0 \u00a0 herian ne cu\u00feon,\n wuldres waldend. \u00a0 \u00a0 \u00a0 \u00a0 Wa bi\u00f0 \u00fe\u00e6m \u00f0e sceal\n \u00feurh sli\u00f0ne ni\u00f0 \u00a0 \u00a0 \u00a0 \u00a0 sawle bescufan\n- 185\n- \n in fyres f\u00e6\u00fem, \u00a0 \u00a0 \u00a0 \u00a0 frofre ne wenan, \n wihte gewendan; \u00a0 \u00a0 \u00a0 \u00a0 wel bi\u00f0 \u00fe\u00e6m \u00fee mot\n \u00e6fter dea\u00f0d\u00e6ge \u00a0 \u00a0 \u00a0 \u00a0 drihten secean\n ond to f\u00e6der f\u00e6\u00femum \u00a0 \u00a0 \u00a0 \u00a0 freo\u00f0o wilnian.\n Swa \u00f0a m\u00e6lceare \u00a0 \u00a0 \u00a0 \u00a0 maga Healfdenes\n- 190\n- \n singala sea\u00f0, \u00a0 \u00a0 \u00a0 \u00a0 ne mihte snotor h\u00e6le\u00f0 \n wean onwendan; \u00a0 \u00a0 \u00a0 \u00a0 w\u00e6s \u00fe\u00e6t gewin to swy\u00f0,\n la\u00fe ond longsum, \u00a0 \u00a0 \u00a0 \u00a0 \u00fee on \u00f0a leode becom,\n nydwracu ni\u00fegrim, \u00a0 \u00a0 \u00a0 \u00a0 nihtbealwa m\u00e6st.\n \u00fe\u00e6t fram ham gefr\u00e6gn \u00a0 \u00a0 \u00a0 \u00a0 Higelaces \u00feegn,\n- 195\n- \n god mid Geatum, \u00a0 \u00a0 \u00a0 \u00a0 Grendles d\u00e6da; \n se w\u00e6s moncynnes \u00a0 \u00a0 \u00a0 \u00a0 m\u00e6genes strengest\n on \u00fe\u00e6m d\u00e6ge \u00a0 \u00a0 \u00a0 \u00a0 \u00feysses lifes,\n \u00e6\u00feele ond eacen. \u00a0 \u00a0 \u00a0 \u00a0 Het him y\u00f0lidan\n godne gegyrwan, \u00a0 \u00a0 \u00a0 \u00a0 cw\u00e6\u00f0, he gu\u00f0cyning\n- 200\n- \n ofer swanrade \u00a0 \u00a0 \u00a0 \u00a0 secean wolde, \n m\u00e6rne \u00feeoden, \u00a0 \u00a0 \u00a0 \u00a0 \u00fea him w\u00e6s manna \u00feearf.\n \u00f0one si\u00f0f\u00e6t him \u00a0 \u00a0 \u00a0 \u00a0 snotere ceorlas\n lythwon logon, \u00a0 \u00a0 \u00a0 \u00a0 \u00feeah he him leof w\u00e6re;\n hwetton higerofne, \u00a0 \u00a0 \u00a0 \u00a0 h\u00e6l sceawedon.\n- 205\n- \n H\u00e6fde se goda \u00a0 \u00a0 \u00a0 \u00a0 Geata leoda \n cempan gecorone \u00a0 \u00a0 \u00a0 \u00a0 \u00feara \u00fee he cenoste\n findan mihte; \u00a0 \u00a0 \u00a0 \u00a0 XVna sum\n sundwudu sohte; \u00a0 \u00a0 \u00a0 \u00a0 secg wisade,\n lagucr\u00e6ftig mon, \u00a0 \u00a0 \u00a0 \u00a0 landgemyrcu.\n- 210\n- \n Fyrst for\u00f0 gewat. \u00a0 \u00a0 \u00a0 \u00a0 Flota w\u00e6s on y\u00f0um, \n bat under beorge. \u00a0 \u00a0 \u00a0 \u00a0 Beornas gearwe\n on stefn stigon; \u00a0 \u00a0 \u00a0 \u00a0 streamas wundon,\n sund wi\u00f0 sande; \u00a0 \u00a0 \u00a0 \u00a0 secgas b\u00e6ron\n on bearm nacan \u00a0 \u00a0 \u00a0 \u00a0 beorhte fr\u00e6twe,\n- 215\n- \n gu\u00f0searo geatolic; \u00a0 \u00a0 \u00a0 \u00a0 guman ut scufon, \n weras on wilsi\u00f0, \u00a0 \u00a0 \u00a0 \u00a0 wudu bundenne.\n Gewat \u00fea ofer w\u00e6gholm, \u00a0 \u00a0 \u00a0 \u00a0 winde gefysed,\n flota famiheals \u00a0 \u00a0 \u00a0 \u00a0 fugle gelicost,\n o\u00f0\u00fe\u00e6t ymb antid \u00a0 \u00a0 \u00a0 \u00a0 o\u00feres dogores\n- 220\n- \n wundenstefna \u00a0 \u00a0 \u00a0 \u00a0 gewaden h\u00e6fde \n \u00fe\u00e6t \u00f0a li\u00f0ende \u00a0 \u00a0 \u00a0 \u00a0 land gesawon,\n brimclifu blican, \u00a0 \u00a0 \u00a0 \u00a0 beorgas steape,\n side s\u00e6n\u00e6ssas; \u00a0 \u00a0 \u00a0 \u00a0 \u00fea w\u00e6s sund liden,\n eoletes \u00e6t ende. \u00a0 \u00a0 \u00a0 \u00a0 \u00feanon up hra\u00f0e\n- 225\n- \n Wedera leode \u00a0 \u00a0 \u00a0 \u00a0 on wang stigon, \n s\u00e6wudu s\u00e6ldon \u00a0 \u00a0 \u00a0 \u00a0 (syrcan hrysedon,\n gu\u00f0gew\u00e6do), \u00a0 \u00a0 \u00a0 \u00a0 gode \u00feancedon\n \u00fe\u00e6s \u00fee him y\u00felade \u00a0 \u00a0 \u00a0 \u00a0 ea\u00f0e wurdon.\n \u00fea of wealle geseah \u00a0 \u00a0 \u00a0 \u00a0 weard Scildinga,\n- 230\n- \n se \u00fee holmclifu \u00a0 \u00a0 \u00a0 \u00a0 healdan scolde, \n beran ofer bolcan \u00a0 \u00a0 \u00a0 \u00a0 beorhte randas,\n fyrdsearu fuslicu; \u00a0 \u00a0 \u00a0 \u00a0 hine fyrwyt br\u00e6c\n modgehygdum, \u00a0 \u00a0 \u00a0 \u00a0 hw\u00e6t \u00fea men w\u00e6ron.\n Gewat him \u00fea to waro\u00f0e \u00a0 \u00a0 \u00a0 \u00a0 wicge ridan\n- 235\n- \n \u00feegn Hro\u00f0gares, \u00a0 \u00a0 \u00a0 \u00a0 \u00ferymmum cwehte \n m\u00e6genwudu mundum, \u00a0 \u00a0 \u00a0 \u00a0 me\u00feelwordum fr\u00e6gn:\n \"Hw\u00e6t syndon ge \u00a0 \u00a0 \u00a0 \u00a0 searoh\u00e6bbendra,\n byrnum werede, \u00a0 \u00a0 \u00a0 \u00a0 \u00fee \u00feus brontne ceol\n ofer lagustr\u00e6te \u00a0 \u00a0 \u00a0 \u00a0 l\u00e6dan cwomon,\n- 240\n- \n hider ofer holmas? \u00a0 \u00a0 \u00a0 \u00a0 ...le w\u00e6s \n endes\u00e6ta, \u00a0 \u00a0 \u00a0 \u00a0 \u00e6gwearde heold,\n \u00fee on land Dena \u00a0 \u00a0 \u00a0 \u00a0 la\u00f0ra n\u00e6nig\n mid scipherge \u00a0 \u00a0 \u00a0 \u00a0 sce\u00f0\u00fean ne meahte.\n No her cu\u00f0licor \u00a0 \u00a0 \u00a0 \u00a0 cuman ongunnon\n- 245\n- \n lindh\u00e6bbende; \u00a0 \u00a0 \u00a0 \u00a0 ne ge leafnesword \n gu\u00f0fremmendra \u00a0 \u00a0 \u00a0 \u00a0 gearwe ne wisson,\n maga gemedu. \u00a0 \u00a0 \u00a0 \u00a0 N\u00e6fre ic maran geseah\n eorla ofer eor\u00fean \u00a0 \u00a0 \u00a0 \u00a0 \u00f0onne is eower sum,\n secg on searwum; \u00a0 \u00a0 \u00a0 \u00a0 nis \u00fe\u00e6t seldguma,\n- 250\n- \n w\u00e6pnum geweor\u00f0ad, \u00a0 \u00a0 \u00a0 \u00a0 n\u00e6fne him his wlite leoge, \n \u00e6nlic ansyn. \u00a0 \u00a0 \u00a0 \u00a0 Nu ic eower sceal\n frumcyn witan, \u00a0 \u00a0 \u00a0 \u00a0 \u00e6r ge fyr heonan,\n leassceaweras, \u00a0 \u00a0 \u00a0 \u00a0 on land Dena\n fur\u00feur feran. \u00a0 \u00a0 \u00a0 \u00a0 Nu ge feorbuend,\n- 255\n- \n mereli\u00f0ende, \u00a0 \u00a0 \u00a0 \u00a0 minne gehyra\u00f0 \n anfealdne ge\u00feoht: \u00a0 \u00a0 \u00a0 \u00a0 Ofost is selest\n to gecy\u00f0anne \u00a0 \u00a0 \u00a0 \u00a0 hwanan eowre cyme syndon.\"\n Him se yldesta \u00a0 \u00a0 \u00a0 \u00a0 ondswarode,\n werodes wisa, \u00a0 \u00a0 \u00a0 \u00a0 wordhord onleac:\n- 260\n- \n \"We synt gumcynnes \u00a0 \u00a0 \u00a0 \u00a0 Geata leode \n ond Higelaces \u00a0 \u00a0 \u00a0 \u00a0 heor\u00f0geneatas.\n W\u00e6s min f\u00e6der \u00a0 \u00a0 \u00a0 \u00a0 folcum gecy\u00feed,\n \u00e6\u00feele ordfruma, \u00a0 \u00a0 \u00a0 \u00a0 Ecg\u00feeow haten.\n Gebad wintra worn, \u00a0 \u00a0 \u00a0 \u00a0 \u00e6r he on weg hwurfe,\n- 265\n- \n gamol of geardum; \u00a0 \u00a0 \u00a0 \u00a0 hine gearwe geman \n witena welhwylc \u00a0 \u00a0 \u00a0 \u00a0 wide geond eor\u00fean.\n We \u00feurh holdne hige \u00a0 \u00a0 \u00a0 \u00a0 hlaford \u00feinne,\n sunu Healfdenes, \u00a0 \u00a0 \u00a0 \u00a0 secean cwomon,\n leodgebyrgean; \u00a0 \u00a0 \u00a0 \u00a0 wes \u00feu us larena god.\n- 270\n- \n Habba\u00f0 we to \u00fe\u00e6m m\u00e6ran \u00a0 \u00a0 \u00a0 \u00a0 micel \u00e6rende, \n Deniga frean, \u00a0 \u00a0 \u00a0 \u00a0 ne sceal \u00fe\u00e6r dyrne sum\n wesan, \u00fe\u00e6s ic wene. \u00a0 \u00a0 \u00a0 \u00a0 \u00feu wast (gif hit is\n swa we so\u00felice \u00a0 \u00a0 \u00a0 \u00a0 secgan hyrdon)\n \u00fe\u00e6t mid Scyldingum \u00a0 \u00a0 \u00a0 \u00a0 scea\u00f0ona ic nat hwylc,\n- 275\n- \n deogol d\u00e6dhata, \u00a0 \u00a0 \u00a0 \u00a0 deorcum nihtum \n eawe\u00f0 \u00feurh egsan \u00a0 \u00a0 \u00a0 \u00a0 uncu\u00f0ne ni\u00f0,\n hyn\u00f0u ond hrafyl. \u00a0 \u00a0 \u00a0 \u00a0 Ic \u00fe\u00e6s Hro\u00f0gar m\u00e6g\n \u00feurh rumne sefan \u00a0 \u00a0 \u00a0 \u00a0 r\u00e6d gel\u00e6ran,\n hu he frod ond god \u00a0 \u00a0 \u00a0 \u00a0 feond oferswy\u00f0e\u00fe,\n- 280\n- \n gyf him edwendan \u00a0 \u00a0 \u00a0 \u00a0 \u00e6fre scolde \n bealuwa bisigu, \u00a0 \u00a0 \u00a0 \u00a0 bot eft cuman,\n ond \u00fea cearwylmas \u00a0 \u00a0 \u00a0 \u00a0 colran wur\u00f0a\u00fe;\n o\u00f0\u00f0e a sy\u00fe\u00f0an \u00a0 \u00a0 \u00a0 \u00a0 earfo\u00f0\u00ferage,\n \u00fereanyd \u00feola\u00f0, \u00a0 \u00a0 \u00a0 \u00a0 \u00feenden \u00fe\u00e6r wuna\u00f0\n- 285\n- \n on heahstede \u00a0 \u00a0 \u00a0 \u00a0 husa selest.\" \n Weard ma\u00feelode, \u00a0 \u00a0 \u00a0 \u00a0 \u00f0\u00e6r on wicge s\u00e6t,\n ombeht unforht: \u00a0 \u00a0 \u00a0 \u00a0 \"\u00e6ghw\u00e6\u00feres sceal\n scearp scyldwiga \u00a0 \u00a0 \u00a0 \u00a0 gescad witan,\n worda ond worca, \u00a0 \u00a0 \u00a0 \u00a0 se \u00fee wel \u00feence\u00f0.\n- 290\n- \n Ic \u00fe\u00e6t gehyre, \u00a0 \u00a0 \u00a0 \u00a0 \u00fe\u00e6t \u00feis is hold weorod \n frean Scyldinga. \u00a0 \u00a0 \u00a0 \u00a0 Gewita\u00fe for\u00f0 beran\n w\u00e6pen ond gew\u00e6du; \u00a0 \u00a0 \u00a0 \u00a0 ic eow wisige.\n Swylce ic magu\u00feegnas \u00a0 \u00a0 \u00a0 \u00a0 mine hate\n wi\u00f0 feonda gehwone \u00a0 \u00a0 \u00a0 \u00a0 flotan eowerne,\n- 295\n- \n niwtyrwydne \u00a0 \u00a0 \u00a0 \u00a0 nacan on sande \n arum healdan, \u00a0 \u00a0 \u00a0 \u00a0 o\u00fe\u00f0\u00e6t eft byre\u00f0\n ofer lagustreamas \u00a0 \u00a0 \u00a0 \u00a0 leofne mannan\n wudu wundenhals \u00a0 \u00a0 \u00a0 \u00a0 to Wedermearce,\n godfremmendra \u00a0 \u00a0 \u00a0 \u00a0 swylcum gife\u00fee bi\u00f0\n- 300\n- \n \u00fe\u00e6t \u00feone hilder\u00e6s \u00a0 \u00a0 \u00a0 \u00a0 hal gedige\u00f0.\" \n Gewiton him \u00fea feran. \u00a0 \u00a0 \u00a0 \u00a0 Flota stille bad,\n seomode on sale \u00a0 \u00a0 \u00a0 \u00a0 sidf\u00e6\u00femed scip,\n on ancre f\u00e6st. \u00a0 \u00a0 \u00a0 \u00a0 Eoforlic scionon\n ofer hleorberan \u00a0 \u00a0 \u00a0 \u00a0 gehroden golde,\n- 305\n- \n fah ond fyrheard; \u00a0 \u00a0 \u00a0 \u00a0 ferhwearde heold \n gu\u00femod grimmon. \u00a0 \u00a0 \u00a0 \u00a0 Guman onetton,\n sigon \u00e6tsomne, \u00a0 \u00a0 \u00a0 \u00a0 o\u00fe\u00fe\u00e6t hy s\u00e6l timbred,\n geatolic ond goldfah, \u00a0 \u00a0 \u00a0 \u00a0 ongyton mihton;\n \u00fe\u00e6t w\u00e6s forem\u00e6rost \u00a0 \u00a0 \u00a0 \u00a0 foldbuendum\n- 310\n- \n receda under roderum, \u00a0 \u00a0 \u00a0 \u00a0 on \u00fe\u00e6m se rica bad; \n lixte se leoma \u00a0 \u00a0 \u00a0 \u00a0 ofer landa fela.\n Him \u00fea hildedeor \u00a0 \u00a0 \u00a0 \u00a0 hof modigra\n torht get\u00e6hte, \u00a0 \u00a0 \u00a0 \u00a0 \u00fe\u00e6t hie him to mihton\n gegnum gangan; \u00a0 \u00a0 \u00a0 \u00a0 gu\u00f0beorna sum\n- 315\n- \n wicg gewende, \u00a0 \u00a0 \u00a0 \u00a0 word \u00e6fter cw\u00e6\u00f0: \n \"M\u00e6l is me to feran; \u00a0 \u00a0 \u00a0 \u00a0 f\u00e6der alwalda\n mid arstafum \u00a0 \u00a0 \u00a0 \u00a0 eowic gehealde\n si\u00f0a gesunde. \u00a0 \u00a0 \u00a0 \u00a0 Ic to s\u00e6 wille\n wi\u00f0 wra\u00f0 werod \u00a0 \u00a0 \u00a0 \u00a0 wearde healdan.\"\n- 320\n- \n Str\u00e6t w\u00e6s stanfah, \u00a0 \u00a0 \u00a0 \u00a0 stig wisode \n gumum \u00e6tg\u00e6dere. \u00a0 \u00a0 \u00a0 \u00a0 Gu\u00f0byrne scan\n heard hondlocen, \u00a0 \u00a0 \u00a0 \u00a0 hringiren scir\n song in searwum, \u00a0 \u00a0 \u00a0 \u00a0 \u00fea hie to sele fur\u00f0um\n in hyra gryregeatwum \u00a0 \u00a0 \u00a0 \u00a0 gangan cwomon.\n- 325\n- \n Setton s\u00e6me\u00fee \u00a0 \u00a0 \u00a0 \u00a0 side scyldas, \n rondas regnhearde, \u00a0 \u00a0 \u00a0 \u00a0 wi\u00f0 \u00fe\u00e6s recedes weal,\n bugon \u00fea to bence. \u00a0 \u00a0 \u00a0 \u00a0 Byrnan hringdon,\n gu\u00f0searo gumena; \u00a0 \u00a0 \u00a0 \u00a0 garas stodon,\n s\u00e6manna searo, \u00a0 \u00a0 \u00a0 \u00a0 samod \u00e6tg\u00e6dere,\n- 330\n- \n \u00e6scholt ufan gr\u00e6g; \u00a0 \u00a0 \u00a0 \u00a0 w\u00e6s se iren\u00fereat \n w\u00e6pnum gewur\u00fead. \u00a0 \u00a0 \u00a0 \u00a0 \u00fea \u00f0\u00e6r wlonc h\u00e6le\u00f0\n oretmecgas \u00a0 \u00a0 \u00a0 \u00a0 \u00e6fter \u00e6\u00feelum fr\u00e6gn:\n \"Hwanon ferigea\u00f0 ge \u00a0 \u00a0 \u00a0 \u00a0 f\u00e6tte scyldas,\n gr\u00e6ge syrcan \u00a0 \u00a0 \u00a0 \u00a0 ond grimhelmas,\n- 335\n- \n heresceafta heap? \u00a0 \u00a0 \u00a0 \u00a0 Ic eom Hro\u00f0gares \n ar ond ombiht. \u00a0 \u00a0 \u00a0 \u00a0 Ne seah ic el\u00feeodige\n \u00feus manige men \u00a0 \u00a0 \u00a0 \u00a0 modiglicran.\n Wen ic \u00fe\u00e6t ge for wlenco, \u00a0 \u00a0 \u00a0 \u00a0 nalles for wr\u00e6csi\u00f0um,\n ac for hige\u00ferymmum \u00a0 \u00a0 \u00a0 \u00a0 Hro\u00f0gar sohton.\"\n- 340\n- \n Him \u00fea ellenrof \u00a0 \u00a0 \u00a0 \u00a0 andswarode, \n wlanc Wedera leod, \u00a0 \u00a0 \u00a0 \u00a0 word \u00e6fter spr\u00e6c,\n heard under helme: \u00a0 \u00a0 \u00a0 \u00a0 \"We synt Higelaces\n beodgeneatas; \u00a0 \u00a0 \u00a0 \u00a0 Beowulf is min nama.\n Wille ic asecgan \u00a0 \u00a0 \u00a0 \u00a0 sunu Healfdenes,\n- 345\n- \n m\u00e6rum \u00feeodne, \u00a0 \u00a0 \u00a0 \u00a0 min \u00e6rende, \n aldre \u00feinum, \u00a0 \u00a0 \u00a0 \u00a0 gif he us geunnan wile\n \u00fe\u00e6t we hine swa godne \u00a0 \u00a0 \u00a0 \u00a0 gretan moton.\"\n Wulfgar ma\u00feelode \u00a0 \u00a0 \u00a0 \u00a0 (\u00fe\u00e6t w\u00e6s Wendla leod;\n w\u00e6s his modsefa \u00a0 \u00a0 \u00a0 \u00a0 manegum gecy\u00f0ed,\n- 350\n- \n wig ond wisdom): \u00a0 \u00a0 \u00a0 \u00a0 \"Ic \u00fe\u00e6s wine Deniga, \n frean Scildinga, \u00a0 \u00a0 \u00a0 \u00a0 frinan wille,\n beaga bryttan, \u00a0 \u00a0 \u00a0 \u00a0 swa \u00feu bena eart,\n \u00feeoden m\u00e6rne, \u00a0 \u00a0 \u00a0 \u00a0 ymb \u00feinne si\u00f0,\n ond \u00fee \u00fea ondsware \u00a0 \u00a0 \u00a0 \u00a0 \u00e6dre gecy\u00f0an\n- 355\n- \n \u00f0e me se goda \u00a0 \u00a0 \u00a0 \u00a0 agifan \u00feence\u00f0.\" \n Hwearf \u00fea hr\u00e6dlice \u00a0 \u00a0 \u00a0 \u00a0 \u00fe\u00e6r Hro\u00f0gar s\u00e6t\n eald ond anhar \u00a0 \u00a0 \u00a0 \u00a0 mid his eorla gedriht;\n eode ellenrof, \u00a0 \u00a0 \u00a0 \u00a0 \u00fe\u00e6t he for eaxlum gestod\n Deniga frean; \u00a0 \u00a0 \u00a0 \u00a0 cu\u00fee he dugu\u00f0e \u00feeaw.\n- 360\n- \n Wulfgar ma\u00f0elode \u00a0 \u00a0 \u00a0 \u00a0 to his winedrihtne: \n \"Her syndon geferede, \u00a0 \u00a0 \u00a0 \u00a0 feorran cumene\n ofer geofenes begang \u00a0 \u00a0 \u00a0 \u00a0 Geata leode;\n \u00feone yldestan \u00a0 \u00a0 \u00a0 \u00a0 oretmecgas\n Beowulf nemna\u00f0. \u00a0 \u00a0 \u00a0 \u00a0 Hy benan synt\n- 365\n- \n \u00fe\u00e6t hie, \u00feeoden min, \u00a0 \u00a0 \u00a0 \u00a0 wi\u00f0 \u00fee moton \n wordum wrixlan. \u00a0 \u00a0 \u00a0 \u00a0 No \u00f0u him wearne geteoh\n \u00f0inra gegncwida, \u00a0 \u00a0 \u00a0 \u00a0 gl\u00e6dman Hro\u00f0gar.\n Hy on wiggetawum \u00a0 \u00a0 \u00a0 \u00a0 wyr\u00f0e \u00feincea\u00f0\n eorla ge\u00e6htlan; \u00a0 \u00a0 \u00a0 \u00a0 huru se aldor deah,\n- 370\n- \n se \u00fe\u00e6m hea\u00f0orincum \u00a0 \u00a0 \u00a0 \u00a0 hider wisade.\" \n Hro\u00f0gar ma\u00feelode, \u00a0 \u00a0 \u00a0 \u00a0 helm Scyldinga:\n \"Ic hine cu\u00f0e \u00a0 \u00a0 \u00a0 \u00a0 cnihtwesende.\n W\u00e6s his ealdf\u00e6der \u00a0 \u00a0 \u00a0 \u00a0 Ecg\u00feeo haten,\n \u00f0\u00e6m to ham forgeaf \u00a0 \u00a0 \u00a0 \u00a0 Hre\u00feel Geata\n- 375\n- \n angan dohtor; \u00a0 \u00a0 \u00a0 \u00a0 is his eafora nu \n heard her cumen, \u00a0 \u00a0 \u00a0 \u00a0 sohte holdne wine.\n \u00f0onne s\u00e6gdon \u00fe\u00e6t \u00a0 \u00a0 \u00a0 \u00a0 s\u00e6li\u00feende,\n \u00fea \u00f0e gifsceattas \u00a0 \u00a0 \u00a0 \u00a0 Geata fyredon\n \u00feyder to \u00feance, \u00a0 \u00a0 \u00a0 \u00a0 \u00fe\u00e6t he XXXtiges\n- 380\n- \n manna m\u00e6gencr\u00e6ft \u00a0 \u00a0 \u00a0 \u00a0 on his mundgripe \n hea\u00feorof h\u00e6bbe. \u00a0 \u00a0 \u00a0 \u00a0 Hine halig god\n for arstafum \u00a0 \u00a0 \u00a0 \u00a0 us onsende,\n to Westdenum, \u00a0 \u00a0 \u00a0 \u00a0 \u00fe\u00e6s ic wen h\u00e6bbe,\n wi\u00f0 Grendles gryre. \u00a0 \u00a0 \u00a0 \u00a0 Ic \u00fe\u00e6m godan sceal\n- 385\n- \n for his mod\u00fer\u00e6ce \u00a0 \u00a0 \u00a0 \u00a0 madmas beodan. \n Beo \u00f0u on ofeste, \u00a0 \u00a0 \u00a0 \u00a0 hat in gan\n seon sibbegedriht \u00a0 \u00a0 \u00a0 \u00a0 samod \u00e6tg\u00e6dere;\n gesaga him eac wordum \u00a0 \u00a0 \u00a0 \u00a0 \u00fe\u00e6t hie sint wilcuman\n Deniga leodum.\"\n- 390\n- \n \u00a0 \u00a0 \u00a0 \u00a0 word inne abead: \n \"Eow het secgan \u00a0 \u00a0 \u00a0 \u00a0 sigedrihten min,\n aldor Eastdena, \u00a0 \u00a0 \u00a0 \u00a0 \u00fe\u00e6t he eower \u00e6\u00feelu can,\n ond ge him syndon \u00a0 \u00a0 \u00a0 \u00a0 ofer s\u00e6wylmas\n heardhicgende \u00a0 \u00a0 \u00a0 \u00a0 hider wilcuman.\n- 395\n- \n Nu ge moton gangan \u00a0 \u00a0 \u00a0 \u00a0 in eowrum gu\u00f0geatawum \n under heregriman \u00a0 \u00a0 \u00a0 \u00a0 Hro\u00f0gar geseon;\n l\u00e6ta\u00f0 hildebord \u00a0 \u00a0 \u00a0 \u00a0 her onbidan,\n wudu, w\u00e6lsceaftas, \u00a0 \u00a0 \u00a0 \u00a0 worda ge\u00feinges.\"\n Aras \u00fea se rica, \u00a0 \u00a0 \u00a0 \u00a0 ymb hine rinc manig,\n- 400\n- \n \u00fery\u00f0lic \u00feegna heap; \u00a0 \u00a0 \u00a0 \u00a0 sume \u00fe\u00e6r bidon, \n hea\u00f0oreaf heoldon, \u00a0 \u00a0 \u00a0 \u00a0 swa him se hearda bebead.\n Snyredon \u00e6tsomne, \u00a0 \u00a0 \u00a0 \u00a0 \u00fea secg wisode,\n under Heorotes hrof\n heard under helme, \u00a0 \u00a0 \u00a0 \u00a0 \u00fe\u00e6t he on heo\u00f0e gestod.\n- 405\n- \n Beowulf ma\u00f0elode \u00a0 \u00a0 \u00a0 \u00a0 (on him byrne scan, \n searonet seowed \u00a0 \u00a0 \u00a0 \u00a0 smi\u00fees or\u00feancum):\n \"W\u00e6s \u00feu, Hro\u00f0gar, hal! \u00a0 \u00a0 \u00a0 \u00a0 Ic eom Higelaces\n m\u00e6g ond mago\u00f0egn; \u00a0 \u00a0 \u00a0 \u00a0 h\u00e6bbe ic m\u00e6r\u00f0a fela\n ongunnen on geogo\u00fee. \u00a0 \u00a0 \u00a0 \u00a0 Me wear\u00f0 Grendles \u00feing\n- 410\n- \n on minre e\u00feeltyrf \u00a0 \u00a0 \u00a0 \u00a0 undyrne cu\u00f0; \n secga\u00f0 s\u00e6li\u00f0end \u00a0 \u00a0 \u00a0 \u00a0 \u00fe\u00e6t \u00fe\u00e6s sele stande,\n reced selesta, \u00a0 \u00a0 \u00a0 \u00a0 rinca gehwylcum\n idel ond unnyt, \u00a0 \u00a0 \u00a0 \u00a0 si\u00f0\u00f0an \u00e6fenleoht\n under heofenes hador \u00a0 \u00a0 \u00a0 \u00a0 beholen weor\u00fee\u00f0.\n- 415\n- \n \u00fea me \u00fe\u00e6t gel\u00e6rdon \u00a0 \u00a0 \u00a0 \u00a0 leode mine \n \u00fea selestan, \u00a0 \u00a0 \u00a0 \u00a0 snotere ceorlas,\n \u00feeoden Hro\u00f0gar, \u00a0 \u00a0 \u00a0 \u00a0 \u00fe\u00e6t ic \u00fee sohte,\n for\u00fean hie m\u00e6genes cr\u00e6ft \u00a0 \u00a0 \u00a0 \u00a0 minne cu\u00feon,\n selfe ofersawon, \u00a0 \u00a0 \u00a0 \u00a0 \u00f0a ic of searwum cwom,\n- 420\n- \n fah from feondum, \u00a0 \u00a0 \u00a0 \u00a0 \u00fe\u00e6r ic fife geband, \n y\u00f0de eotena cyn \u00a0 \u00a0 \u00a0 \u00a0 ond on y\u00f0um slog\n niceras nihtes, \u00a0 \u00a0 \u00a0 \u00a0 nearo\u00feearfe dreah,\n wr\u00e6c Wedera ni\u00f0 \u00a0 \u00a0 \u00a0 \u00a0 (wean ahsodon),\n forgrand gramum, \u00a0 \u00a0 \u00a0 \u00a0 ond nu wi\u00f0 Grendel sceal,\n- 425\n- \n wi\u00f0 \u00feam agl\u00e6can, \u00a0 \u00a0 \u00a0 \u00a0 ana gehegan \n \u00f0ing wi\u00f0 \u00feyrse. \u00a0 \u00a0 \u00a0 \u00a0 Ic \u00fee nu \u00f0a,\n brego Beorhtdena, \u00a0 \u00a0 \u00a0 \u00a0 biddan wille,\n eodor Scyldinga, \u00a0 \u00a0 \u00a0 \u00a0 anre bene,\n \u00fe\u00e6t \u00f0u me ne forwyrne, \u00a0 \u00a0 \u00a0 \u00a0 wigendra hleo,\n- 430\n- \n freowine folca, \u00a0 \u00a0 \u00a0 \u00a0 nu ic \u00feus feorran com, \n \u00fe\u00e6t ic mote ana \u00a0 \u00a0 \u00a0 \u00a0 ond minra eorla gedryht,\n \u00fees hearda heap, \u00a0 \u00a0 \u00a0 \u00a0 Heorot f\u00e6lsian.\n H\u00e6bbe ic eac geahsod \u00a0 \u00a0 \u00a0 \u00a0 \u00fe\u00e6t se \u00e6gl\u00e6ca\n for his wonhydum \u00a0 \u00a0 \u00a0 \u00a0 w\u00e6pna ne recce\u00f0.\n- 435\n- \n Ic \u00fe\u00e6t \u00feonne forhicge \u00a0 \u00a0 \u00a0 \u00a0 (swa me Higelac sie, \n min mondrihten, \u00a0 \u00a0 \u00a0 \u00a0 modes bli\u00f0e),\n \u00fe\u00e6t ic sweord bere \u00a0 \u00a0 \u00a0 \u00a0 o\u00fe\u00f0e sidne scyld,\n geolorand to gu\u00fee, \u00a0 \u00a0 \u00a0 \u00a0 ac ic mid grape sceal\n fon wi\u00f0 feonde \u00a0 \u00a0 \u00a0 \u00a0 ond ymb feorh sacan,\n- 440\n- \n la\u00f0 wi\u00f0 la\u00feum; \u00a0 \u00a0 \u00a0 \u00a0 \u00f0\u00e6r gelyfan sceal \n dryhtnes dome \u00a0 \u00a0 \u00a0 \u00a0 se \u00fee hine dea\u00f0 nime\u00f0.\n Wen ic \u00fe\u00e6t he wille, \u00a0 \u00a0 \u00a0 \u00a0 gif he wealdan mot,\n in \u00fe\u00e6m gu\u00f0sele \u00a0 \u00a0 \u00a0 \u00a0 Geotena leode\n etan unforhte, \u00a0 \u00a0 \u00a0 \u00a0 swa he oft dyde,\n- 445\n- \n m\u00e6gen Hre\u00f0manna. \u00a0 \u00a0 \u00a0 \u00a0 Na \u00feu minne \u00feearft \n hafalan hydan, \u00a0 \u00a0 \u00a0 \u00a0 ac he me habban wile\n dreore fahne, \u00a0 \u00a0 \u00a0 \u00a0 gif mec dea\u00f0 nime\u00f0.\n Byre\u00f0 blodig w\u00e6l, \u00a0 \u00a0 \u00a0 \u00a0 byrgean \u00feence\u00f0,\n ete\u00f0 angenga \u00a0 \u00a0 \u00a0 \u00a0 unmurnlice,\n- 450\n- \n mearca\u00f0 morhopu; \u00a0 \u00a0 \u00a0 \u00a0 no \u00f0u ymb mines ne \u00feearft \n lices feorme \u00a0 \u00a0 \u00a0 \u00a0 leng sorgian.\n Onsend Higelace, \u00a0 \u00a0 \u00a0 \u00a0 gif mec hild nime,\n beaduscruda betst, \u00a0 \u00a0 \u00a0 \u00a0 \u00fe\u00e6t mine breost were\u00f0,\n hr\u00e6gla selest; \u00a0 \u00a0 \u00a0 \u00a0 \u00fe\u00e6t is Hr\u00e6dlan laf,\n- 455\n- \n Welandes geweorc. \u00a0 \u00a0 \u00a0 \u00a0 G\u00e6\u00f0 a wyrd swa hio scel.\" \n Hro\u00f0gar ma\u00feelode, \u00a0 \u00a0 \u00a0 \u00a0 helm Scyldinga:\n \"For gewyrhtum \u00feu, \u00a0 \u00a0 \u00a0 \u00a0 wine min Beowulf,\n ond for arstafum \u00a0 \u00a0 \u00a0 \u00a0 usic sohtest.\n Gesloh \u00fein f\u00e6der \u00a0 \u00a0 \u00a0 \u00a0 f\u00e6h\u00f0e m\u00e6ste;\n- 460\n- \n wear\u00fe he Hea\u00feolafe \u00a0 \u00a0 \u00a0 \u00a0 to handbonan \n mid Wilfingum; \u00a0 \u00a0 \u00a0 \u00a0 \u00f0a hine Wedera cyn\n for herebrogan \u00a0 \u00a0 \u00a0 \u00a0 habban ne mihte.\n \u00feanon he gesohte \u00a0 \u00a0 \u00a0 \u00a0 Su\u00f0dena folc\n ofer y\u00f0a gewealc, \u00a0 \u00a0 \u00a0 \u00a0 Arscyldinga.\n- 465\n- \n \u00f0a ic fur\u00feum weold \u00a0 \u00a0 \u00a0 \u00a0 folce Deniga \n ond on geogo\u00f0e heold \u00a0 \u00a0 \u00a0 \u00a0 ginne rice,\n hordburh h\u00e6le\u00fea; \u00a0 \u00a0 \u00a0 \u00a0 \u00f0a w\u00e6s Heregar dead,\n min yldra m\u00e6g \u00a0 \u00a0 \u00a0 \u00a0 unlifigende,\n bearn Healfdenes; \u00a0 \u00a0 \u00a0 \u00a0 se w\u00e6s betera \u00f0onne ic.\n- 470\n- \n Si\u00f0\u00f0an \u00fea f\u00e6h\u00f0e \u00a0 \u00a0 \u00a0 \u00a0 feo \u00feingode; \n sende ic Wylfingum \u00a0 \u00a0 \u00a0 \u00a0 ofer w\u00e6teres hrycg\n ealde madmas; \u00a0 \u00a0 \u00a0 \u00a0 he me a\u00feas swor.\n Sorh is me to secganne \u00a0 \u00a0 \u00a0 \u00a0 on sefan minum\n gumena \u00e6ngum \u00a0 \u00a0 \u00a0 \u00a0 hw\u00e6t me Grendel hafa\u00f0\n- 475\n- \n hyn\u00f0o on Heorote \u00a0 \u00a0 \u00a0 \u00a0 mid his hete\u00feancum, \n f\u00e6rni\u00f0a gefremed. \u00a0 \u00a0 \u00a0 \u00a0 Is min fletwerod,\n wigheap gewanod; \u00a0 \u00a0 \u00a0 \u00a0 hie wyrd forsweop\n on Grendles gryre. \u00a0 \u00a0 \u00a0 \u00a0 God ea\u00fee m\u00e6g\n \u00feone dolscea\u00f0an \u00a0 \u00a0 \u00a0 \u00a0 d\u00e6da getw\u00e6fan.\n- 480\n- \n Ful oft gebeotedon \u00a0 \u00a0 \u00a0 \u00a0 beore druncne \n ofer ealow\u00e6ge \u00a0 \u00a0 \u00a0 \u00a0 oretmecgas\n \u00fe\u00e6t hie in beorsele \u00a0 \u00a0 \u00a0 \u00a0 bidan woldon\n Grendles gu\u00fee \u00a0 \u00a0 \u00a0 \u00a0 mid gryrum ecga.\n \u00f0onne w\u00e6s \u00feeos medoheal \u00a0 \u00a0 \u00a0 \u00a0 on morgentid,\n- 485\n- \n drihtsele dreorfah, \u00a0 \u00a0 \u00a0 \u00a0 \u00feonne d\u00e6g lixte, \n eal benc\u00feelu \u00a0 \u00a0 \u00a0 \u00a0 blode bestymed,\n heall heorudreore; \u00a0 \u00a0 \u00a0 \u00a0 ahte ic holdra \u00fey l\u00e6s,\n deorre dugu\u00f0e, \u00a0 \u00a0 \u00a0 \u00a0 \u00fee \u00fea dea\u00f0 fornam.\n Site nu to symle \u00a0 \u00a0 \u00a0 \u00a0 ond ons\u00e6l meoto,\n- 490\n- \n sigehre\u00f0 secgum, \u00a0 \u00a0 \u00a0 \u00a0 swa \u00fein sefa hwette.\" \n \u00fea w\u00e6s Geatm\u00e6cgum \u00a0 \u00a0 \u00a0 \u00a0 geador \u00e6tsomne\n on beorsele \u00a0 \u00a0 \u00a0 \u00a0 benc gerymed;\n \u00fe\u00e6r swi\u00f0ferh\u00fee \u00a0 \u00a0 \u00a0 \u00a0 sittan eodon,\n \u00fery\u00f0um dealle. \u00a0 \u00a0 \u00a0 \u00a0 \u00feegn nytte beheold,\n- 495\n- \n se \u00fee on handa b\u00e6r \u00a0 \u00a0 \u00a0 \u00a0 hroden ealow\u00e6ge, \n scencte scir wered. \u00a0 \u00a0 \u00a0 \u00a0 Scop hwilum sang\n hador on Heorote. \u00a0 \u00a0 \u00a0 \u00a0 \u00fe\u00e6r w\u00e6s h\u00e6le\u00f0a dream,\n dugu\u00f0 unlytel \u00a0 \u00a0 \u00a0 \u00a0 Dena ond Wedera.\n Unfer\u00f0 ma\u00feelode, \u00a0 \u00a0 \u00a0 \u00a0 Ecglafes bearn,\n- 500\n- \n \u00fee \u00e6t fotum s\u00e6t \u00a0 \u00a0 \u00a0 \u00a0 frean Scyldinga, \n onband beadurune \u00a0 \u00a0 \u00a0 \u00a0 (w\u00e6s him Beowulfes si\u00f0,\n modges merefaran, \u00a0 \u00a0 \u00a0 \u00a0 micel \u00e6f\u00feunca,\n for\u00feon \u00fee he ne u\u00fee \u00a0 \u00a0 \u00a0 \u00a0 \u00fe\u00e6t \u00e6nig o\u00f0er man\n \u00e6fre m\u00e6r\u00f0a \u00feon ma \u00a0 \u00a0 \u00a0 \u00a0 middangeardes\n- 505\n- \n gehedde under heofenum \u00a0 \u00a0 \u00a0 \u00a0 \u00feonne he sylfa): \n \"Eart \u00feu se Beowulf, \u00a0 \u00a0 \u00a0 \u00a0 se \u00fee wi\u00f0 Brecan wunne,\n on sidne s\u00e6 \u00a0 \u00a0 \u00a0 \u00a0 ymb sund flite,\n \u00f0\u00e6r git for wlence \u00a0 \u00a0 \u00a0 \u00a0 wada cunnedon\n ond for dolgilpe \u00a0 \u00a0 \u00a0 \u00a0 on deop w\u00e6ter\n- 510\n- \n aldrum ne\u00fedon? \u00a0 \u00a0 \u00a0 \u00a0 Ne inc \u00e6nig mon, \n ne leof ne la\u00f0, \u00a0 \u00a0 \u00a0 \u00a0 belean mihte\n sorhfullne si\u00f0, \u00a0 \u00a0 \u00a0 \u00a0 \u00fea git on sund reon.\n \u00fe\u00e6r git eagorstream \u00a0 \u00a0 \u00a0 \u00a0 earmum \u00feehton,\n m\u00e6ton merestr\u00e6ta, \u00a0 \u00a0 \u00a0 \u00a0 mundum brugdon,\n- 515\n- \n glidon ofer garsecg; \u00a0 \u00a0 \u00a0 \u00a0 geofon y\u00feum weol, \n wintrys wylmum. \u00a0 \u00a0 \u00a0 \u00a0 Git on w\u00e6teres \u00e6ht\n seofon niht swuncon; \u00a0 \u00a0 \u00a0 \u00a0 he \u00fee \u00e6t sunde oferflat,\n h\u00e6fde mare m\u00e6gen. \u00a0 \u00a0 \u00a0 \u00a0 \u00fea hine on morgentid\n on Hea\u00feor\u00e6mas \u00a0 \u00a0 \u00a0 \u00a0 holm up \u00e6tb\u00e6r;\n- 520\n- \n \u00f0onon he gesohte \u00a0 \u00a0 \u00a0 \u00a0 sw\u00e6sne \u16df, \n leof his leodum, \u00a0 \u00a0 \u00a0 \u00a0 lond Brondinga,\n freo\u00f0oburh f\u00e6gere, \u00a0 \u00a0 \u00a0 \u00a0 \u00fe\u00e6r he folc ahte,\n burh ond beagas. \u00a0 \u00a0 \u00a0 \u00a0 Beot eal wi\u00f0 \u00fee\n sunu Beanstanes \u00a0 \u00a0 \u00a0 \u00a0 so\u00f0e gel\u00e6ste.\n- 525\n- \n \u00f0onne wene ic to \u00fee \u00a0 \u00a0 \u00a0 \u00a0 wyrsan ge\u00feingea, \n \u00f0eah \u00feu hea\u00f0or\u00e6sa \u00a0 \u00a0 \u00a0 \u00a0 gehw\u00e6r dohte,\n grimre gu\u00f0e, \u00a0 \u00a0 \u00a0 \u00a0 gif \u00feu Grendles dearst\n nihtlongne fyrst \u00a0 \u00a0 \u00a0 \u00a0 nean bidan.\"\n Beowulf ma\u00feelode, \u00a0 \u00a0 \u00a0 \u00a0 bearn Ecg\u00feeowes:\n- 530\n- \n \"Hw\u00e6t! \u00feu worn fela, \u00a0 \u00a0 \u00a0 \u00a0 wine min Unfer\u00f0, \n beore druncen \u00a0 \u00a0 \u00a0 \u00a0 ymb Brecan spr\u00e6ce,\n s\u00e6gdest from his si\u00f0e. \u00a0 \u00a0 \u00a0 \u00a0 So\u00f0 ic talige,\n \u00fe\u00e6t ic merestrengo \u00a0 \u00a0 \u00a0 \u00a0 maran ahte,\n earfe\u00feo on y\u00feum, \u00a0 \u00a0 \u00a0 \u00a0 \u00f0onne \u00e6nig o\u00feer man.\n- 535\n- \n Wit \u00fe\u00e6t gecw\u00e6don \u00a0 \u00a0 \u00a0 \u00a0 cnihtwesende \n ond gebeotedon \u00a0 \u00a0 \u00a0 \u00a0 (w\u00e6ron begen \u00fea git\n on geogo\u00f0feore) \u00a0 \u00a0 \u00a0 \u00a0 \u00fe\u00e6t wit on garsecg ut\n aldrum ne\u00f0don, \u00a0 \u00a0 \u00a0 \u00a0 ond \u00fe\u00e6t ge\u00e6fndon swa.\n H\u00e6fdon swurd nacod, \u00a0 \u00a0 \u00a0 \u00a0 \u00fea wit on sund reon,\n- 540\n- \n heard on handa; \u00a0 \u00a0 \u00a0 \u00a0 wit unc wi\u00f0 hronfixas \n werian \u00feohton. \u00a0 \u00a0 \u00a0 \u00a0 No he wiht fram me\n flody\u00feum feor \u00a0 \u00a0 \u00a0 \u00a0 fleotan meahte,\n hra\u00feor on holme; \u00a0 \u00a0 \u00a0 \u00a0 no ic fram him wolde.\n \u00f0a wit \u00e6tsomne \u00a0 \u00a0 \u00a0 \u00a0 on s\u00e6 w\u00e6ron\n- 545\n- \n fif nihta fyrst, \u00a0 \u00a0 \u00a0 \u00a0 o\u00fe\u00fe\u00e6t unc flod todraf, \n wado weallende, \u00a0 \u00a0 \u00a0 \u00a0 wedera cealdost,\n nipende niht, \u00a0 \u00a0 \u00a0 \u00a0 ond nor\u00feanwind\n hea\u00f0ogrim ondhwearf; \u00a0 \u00a0 \u00a0 \u00a0 hreo w\u00e6ron y\u00fea.\n W\u00e6s merefixa \u00a0 \u00a0 \u00a0 \u00a0 mod onhrered;\n- 550\n- \n \u00fe\u00e6r me wi\u00f0 la\u00f0um \u00a0 \u00a0 \u00a0 \u00a0 licsyrce min, \n heard, hondlocen, \u00a0 \u00a0 \u00a0 \u00a0 helpe gefremede,\n beadohr\u00e6gl broden \u00a0 \u00a0 \u00a0 \u00a0 on breostum l\u00e6g\n golde gegyrwed. \u00a0 \u00a0 \u00a0 \u00a0 Me to grunde teah\n fah feondsca\u00f0a, \u00a0 \u00a0 \u00a0 \u00a0 f\u00e6ste h\u00e6fde\n- 555\n- \n grim on grape; \u00a0 \u00a0 \u00a0 \u00a0 hw\u00e6\u00fere me gyfe\u00fee wear\u00f0 \n \u00fe\u00e6t ic agl\u00e6can \u00a0 \u00a0 \u00a0 \u00a0 orde ger\u00e6hte,\n hildebille; \u00a0 \u00a0 \u00a0 \u00a0 hea\u00feor\u00e6s fornam\n mihtig meredeor \u00a0 \u00a0 \u00a0 \u00a0 \u00feurh mine hand.\n Swa mec gelome \u00a0 \u00a0 \u00a0 \u00a0 la\u00f0geteonan\n- 560\n- \n \u00fereatedon \u00feearle. \u00a0 \u00a0 \u00a0 \u00a0 Ic him \u00feenode \n deoran sweorde, \u00a0 \u00a0 \u00a0 \u00a0 swa hit gedefe w\u00e6s.\n N\u00e6s hie \u00f0\u00e6re fylle \u00a0 \u00a0 \u00a0 \u00a0 gefean h\u00e6fdon,\n manford\u00e6dlan, \u00a0 \u00a0 \u00a0 \u00a0 \u00fe\u00e6t hie me \u00feegon,\n symbel ymbs\u00e6ton \u00a0 \u00a0 \u00a0 \u00a0 s\u00e6grunde neah;\n- 565\n- \n ac on mergenne \u00a0 \u00a0 \u00a0 \u00a0 mecum wunde \n be y\u00f0lafe \u00a0 \u00a0 \u00a0 \u00a0 uppe l\u00e6gon,\n sweordum aswefede, \u00a0 \u00a0 \u00a0 \u00a0 \u00fe\u00e6t sy\u00f0\u00fean na\n ymb brontne ford \u00a0 \u00a0 \u00a0 \u00a0 brimli\u00f0ende\n lade ne letton. \u00a0 \u00a0 \u00a0 \u00a0 Leoht eastan com,\n- 570\n- \n beorht beacen godes; \u00a0 \u00a0 \u00a0 \u00a0 brimu swa\u00feredon, \n \u00fe\u00e6t ic s\u00e6n\u00e6ssas \u00a0 \u00a0 \u00a0 \u00a0 geseon mihte,\n windige weallas. \u00a0 \u00a0 \u00a0 \u00a0 Wyrd oft nere\u00f0\n unf\u00e6gne eorl, \u00a0 \u00a0 \u00a0 \u00a0 \u00feonne his ellen deah.\n Hw\u00e6\u00feere me ges\u00e6lde \u00a0 \u00a0 \u00a0 \u00a0 \u00fe\u00e6t ic mid sweorde ofsloh\n- 575\n- \n niceras nigene. \u00a0 \u00a0 \u00a0 \u00a0 No ic on niht gefr\u00e6gn \n under heofones hwealf \u00a0 \u00a0 \u00a0 \u00a0 heardran feohtan,\n ne on egstreamum \u00a0 \u00a0 \u00a0 \u00a0 earmran mannon;\n hwa\u00feere ic fara feng \u00a0 \u00a0 \u00a0 \u00a0 feore gedigde,\n si\u00fees werig. \u00a0 \u00a0 \u00a0 \u00a0 \u00f0a mec s\u00e6 o\u00feb\u00e6r,\n- 580\n- \n flod \u00e6fter faro\u00f0e \u00a0 \u00a0 \u00a0 \u00a0 on Finna land, \n wadu weallendu. \u00a0 \u00a0 \u00a0 \u00a0 No ic wiht fram \u00fee\n swylcra searoni\u00f0a \u00a0 \u00a0 \u00a0 \u00a0 secgan hyrde,\n billa brogan. \u00a0 \u00a0 \u00a0 \u00a0 Breca n\u00e6fre git\n \u00e6t hea\u00f0olace, \u00a0 \u00a0 \u00a0 \u00a0 ne gehw\u00e6\u00feer incer,\n- 585\n- \n swa deorlice \u00a0 \u00a0 \u00a0 \u00a0 d\u00e6d gefremede \n fagum sweordum \u00a0 \u00a0 \u00a0 \u00a0 (no ic \u00fe\u00e6s fela gylpe),\n \u00feeah \u00f0u \u00feinum bro\u00f0rum \u00a0 \u00a0 \u00a0 \u00a0 to banan wurde,\n heafodm\u00e6gum; \u00a0 \u00a0 \u00a0 \u00a0 \u00fe\u00e6s \u00feu in helle scealt\n werh\u00f0o dreogan, \u00a0 \u00a0 \u00a0 \u00a0 \u00feeah \u00fein wit duge.\n- 590\n- \n Secge ic \u00fee to so\u00f0e, \u00a0 \u00a0 \u00a0 \u00a0 sunu Ecglafes, \n \u00fe\u00e6t n\u00e6fre Grendel swa fela \u00a0 \u00a0 \u00a0 \u00a0 gryra gefremede,\n atol \u00e6gl\u00e6ca, \u00a0 \u00a0 \u00a0 \u00a0 ealdre \u00feinum,\n hyn\u00f0o on Heorote, \u00a0 \u00a0 \u00a0 \u00a0 gif \u00fein hige w\u00e6re,\n sefa swa searogrim, \u00a0 \u00a0 \u00a0 \u00a0 swa \u00feu self talast.\n- 595\n- \n Ac he hafa\u00f0 onfunden \u00a0 \u00a0 \u00a0 \u00a0 \u00fe\u00e6t he \u00fea f\u00e6h\u00f0e ne \u00feearf, \n atole ecg\u00fer\u00e6ce \u00a0 \u00a0 \u00a0 \u00a0 eower leode\n swi\u00f0e onsittan, \u00a0 \u00a0 \u00a0 \u00a0 Sigescyldinga;\n nyme\u00f0 nydbade, \u00a0 \u00a0 \u00a0 \u00a0 n\u00e6negum ara\u00f0\n leode Deniga, \u00a0 \u00a0 \u00a0 \u00a0 ac he lust wige\u00f0,\n- 600\n- \n swefe\u00f0 ond sende\u00fe, \u00a0 \u00a0 \u00a0 \u00a0 secce ne wene\u00fe \n to Gardenum. \u00a0 \u00a0 \u00a0 \u00a0 Ac ic him Geata sceal\n eafo\u00f0 ond ellen \u00a0 \u00a0 \u00a0 \u00a0 ungeara nu,\n gu\u00fee gebeodan. \u00a0 \u00a0 \u00a0 \u00a0 G\u00e6\u00fe eft se \u00fee mot\n to medo modig, \u00a0 \u00a0 \u00a0 \u00a0 si\u00fe\u00fean morgenleoht\n- 605\n- \n ofer ylda bearn \u00a0 \u00a0 \u00a0 \u00a0 o\u00feres dogores, \n sunne sweglwered \u00a0 \u00a0 \u00a0 \u00a0 su\u00fean scine\u00f0.\"\n \u00fea w\u00e6s on salum \u00a0 \u00a0 \u00a0 \u00a0 sinces brytta,\n gamolfeax ond gu\u00f0rof; \u00a0 \u00a0 \u00a0 \u00a0 geoce gelyfde\n brego Beorhtdena, \u00a0 \u00a0 \u00a0 \u00a0 gehyrde on Beowulfe\n- 610\n- \n folces hyrde \u00a0 \u00a0 \u00a0 \u00a0 f\u00e6str\u00e6dne ge\u00feoht. \n \u00f0\u00e6r w\u00e6s h\u00e6le\u00fea hleahtor, \u00a0 \u00a0 \u00a0 \u00a0 hlyn swynsode,\n word w\u00e6ron wynsume. \u00a0 \u00a0 \u00a0 \u00a0 Eode Wealh\u00feeow for\u00f0,\n cwen Hro\u00f0gares, \u00a0 \u00a0 \u00a0 \u00a0 cynna gemyndig,\n grette goldhroden \u00a0 \u00a0 \u00a0 \u00a0 guman on healle,\n- 615\n- \n ond \u00fea freolic wif \u00a0 \u00a0 \u00a0 \u00a0 ful gesealde \n \u00e6rest Eastdena \u00a0 \u00a0 \u00a0 \u00a0 e\u00feelwearde,\n b\u00e6d hine bli\u00f0ne \u00a0 \u00a0 \u00a0 \u00a0 \u00e6t \u00fe\u00e6re beor\u00feege,\n leodum leofne. \u00a0 \u00a0 \u00a0 \u00a0 He on lust ge\u00feeah\n symbel ond seleful, \u00a0 \u00a0 \u00a0 \u00a0 sigerof kyning.\n- 620\n- \n Ymbeode \u00fea \u00a0 \u00a0 \u00a0 \u00a0 ides Helminga \n dugu\u00fee ond geogo\u00fee \u00a0 \u00a0 \u00a0 \u00a0 d\u00e6l \u00e6ghwylcne,\n sincfato sealde, \u00a0 \u00a0 \u00a0 \u00a0 o\u00fe\u00fe\u00e6t s\u00e6l alamp\n \u00fe\u00e6t hio Beowulfe, \u00a0 \u00a0 \u00a0 \u00a0 beaghroden cwen\n mode ge\u00feungen, \u00a0 \u00a0 \u00a0 \u00a0 medoful \u00e6tb\u00e6r;\n- 625\n- \n grette Geata leod, \u00a0 \u00a0 \u00a0 \u00a0 gode \u00feancode \n wisf\u00e6st wordum \u00a0 \u00a0 \u00a0 \u00a0 \u00fe\u00e6s \u00f0e hire se willa gelamp\n \u00fe\u00e6t heo on \u00e6nigne \u00a0 \u00a0 \u00a0 \u00a0 eorl gelyfde\n fyrena frofre. \u00a0 \u00a0 \u00a0 \u00a0 He \u00fe\u00e6t ful ge\u00feeah,\n w\u00e6lreow wiga, \u00a0 \u00a0 \u00a0 \u00a0 \u00e6t Wealh\u00feeon,\n- 630\n- \n ond \u00fea gyddode \u00a0 \u00a0 \u00a0 \u00a0 gu\u00fee gefysed; \n Beowulf ma\u00feelode, \u00a0 \u00a0 \u00a0 \u00a0 bearn Ecg\u00feeowes:\n \"Ic \u00fe\u00e6t hogode, \u00a0 \u00a0 \u00a0 \u00a0 \u00fea ic on holm gestah,\n s\u00e6bat ges\u00e6t \u00a0 \u00a0 \u00a0 \u00a0 mid minra secga gedriht,\n \u00fe\u00e6t ic anunga \u00a0 \u00a0 \u00a0 \u00a0 eowra leoda\n- 635\n- \n willan geworhte \u00a0 \u00a0 \u00a0 \u00a0 o\u00fe\u00f0e on w\u00e6l crunge, \n feondgrapum f\u00e6st. \u00a0 \u00a0 \u00a0 \u00a0 Ic gefremman sceal\n eorlic ellen, \u00a0 \u00a0 \u00a0 \u00a0 o\u00fe\u00f0e ended\u00e6g\n on \u00feisse meoduhealle \u00a0 \u00a0 \u00a0 \u00a0 minne gebidan.\"\n \u00f0am wife \u00fea word \u00a0 \u00a0 \u00a0 \u00a0 wel licodon,\n- 640\n- \n gilpcwide Geates; \u00a0 \u00a0 \u00a0 \u00a0 eode goldhroden \n freolicu folccwen \u00a0 \u00a0 \u00a0 \u00a0 to hire frean sittan.\n \u00fea w\u00e6s eft swa \u00e6r \u00a0 \u00a0 \u00a0 \u00a0 inne on healle\n \u00fery\u00f0word sprecen, \u00a0 \u00a0 \u00a0 \u00a0 \u00f0eod on s\u00e6lum,\n sigefolca sweg, \u00a0 \u00a0 \u00a0 \u00a0 o\u00fe\u00fe\u00e6t semninga\n- 645\n- \n sunu Healfdenes \u00a0 \u00a0 \u00a0 \u00a0 secean wolde \n \u00e6fenr\u00e6ste; \u00a0 \u00a0 \u00a0 \u00a0 wiste \u00fe\u00e6m ahl\u00e6can\n to \u00fe\u00e6m heahsele \u00a0 \u00a0 \u00a0 \u00a0 hilde ge\u00feinged,\n si\u00f0\u00f0an hie sunnan leoht \u00a0 \u00a0 \u00a0 \u00a0 geseon ne meahton,\n o\u00fe\u00f0e nipende \u00a0 \u00a0 \u00a0 \u00a0 niht ofer ealle,\n- 650\n- \n scaduhelma gesceapu \u00a0 \u00a0 \u00a0 \u00a0 scri\u00f0an cwoman, \n wan under wolcnum. \u00a0 \u00a0 \u00a0 \u00a0 Werod eall aras.\n Gegrette \u00fea \u00a0 \u00a0 \u00a0 \u00a0 guma o\u00feerne,\n Hro\u00f0gar Beowulf, \u00a0 \u00a0 \u00a0 \u00a0 ond him h\u00e6l abead,\n win\u00e6rnes geweald, \u00a0 \u00a0 \u00a0 \u00a0 ond \u00fe\u00e6t word acw\u00e6\u00f0:\n- 655\n- \n \"N\u00e6fre ic \u00e6negum men \u00a0 \u00a0 \u00a0 \u00a0 \u00e6r alyfde, \n si\u00fe\u00f0an ic hond ond rond \u00a0 \u00a0 \u00a0 \u00a0 hebban mihte,\n \u00f0ry\u00fe\u00e6rn Dena \u00a0 \u00a0 \u00a0 \u00a0 buton \u00fee nu \u00f0a.\n Hafa nu ond geheald \u00a0 \u00a0 \u00a0 \u00a0 husa selest,\n gemyne m\u00e6r\u00feo, \u00a0 \u00a0 \u00a0 \u00a0 m\u00e6genellen cy\u00f0,\n- 660\n- \n waca wi\u00f0 wra\u00feum. \u00a0 \u00a0 \u00a0 \u00a0 Ne bi\u00f0 \u00fee wilna gad, \n gif \u00feu \u00fe\u00e6t ellenweorc \u00a0 \u00a0 \u00a0 \u00a0 aldre gedigest.\"\n \u00f0a him Hro\u00fegar gewat \u00a0 \u00a0 \u00a0 \u00a0 mid his h\u00e6le\u00fea gedryht,\n eodur Scyldinga, \u00a0 \u00a0 \u00a0 \u00a0 ut of healle;\n wolde wigfruma \u00a0 \u00a0 \u00a0 \u00a0 Wealh\u00feeo secan,\n- 665\n- \n cwen to gebeddan. \u00a0 \u00a0 \u00a0 \u00a0 H\u00e6fde kyningwuldor \n Grendle togeanes, \u00a0 \u00a0 \u00a0 \u00a0 swa guman gefrungon,\n seleweard aseted; \u00a0 \u00a0 \u00a0 \u00a0 sundornytte beheold\n ymb aldor Dena, \u00a0 \u00a0 \u00a0 \u00a0 eotonweard abead.\n Huru Geata leod \u00a0 \u00a0 \u00a0 \u00a0 georne truwode\n- 670\n- \n modgan m\u00e6gnes, \u00a0 \u00a0 \u00a0 \u00a0 metodes hyldo. \n \u00f0a he him of dyde \u00a0 \u00a0 \u00a0 \u00a0 isernbyrnan,\n helm of hafelan, \u00a0 \u00a0 \u00a0 \u00a0 sealde his hyrsted sweord,\n irena cyst, \u00a0 \u00a0 \u00a0 \u00a0 ombiht\u00feegne,\n ond gehealdan het \u00a0 \u00a0 \u00a0 \u00a0 hildegeatwe.\n- 675\n- \n Gespr\u00e6c \u00fea se goda \u00a0 \u00a0 \u00a0 \u00a0 gylpworda sum, \n Beowulf Geata, \u00a0 \u00a0 \u00a0 \u00a0 \u00e6r he on bed stige:\n \"No ic me an herew\u00e6smun \u00a0 \u00a0 \u00a0 \u00a0 hnagran talige,\n gu\u00fegeweorca, \u00a0 \u00a0 \u00a0 \u00a0 \u00feonne Grendel hine;\n for\u00fean ic hine sweorde \u00a0 \u00a0 \u00a0 \u00a0 swebban nelle,\n- 680\n- \n aldre beneotan, \u00a0 \u00a0 \u00a0 \u00a0 \u00feeah ic eal m\u00e6ge. \n Nat he \u00feara goda \u00a0 \u00a0 \u00a0 \u00a0 \u00fe\u00e6t he me ongean slea,\n rand geheawe, \u00a0 \u00a0 \u00a0 \u00a0 \u00feeah \u00f0e he rof sie\n ni\u00fegeweorca; \u00a0 \u00a0 \u00a0 \u00a0 ac wit on niht sculon\n secge ofersittan, \u00a0 \u00a0 \u00a0 \u00a0 gif he gesecean dear\n- 685\n- \n wig ofer w\u00e6pen, \u00a0 \u00a0 \u00a0 \u00a0 ond si\u00fe\u00f0an witig god \n on swa hw\u00e6\u00feere hond, \u00a0 \u00a0 \u00a0 \u00a0 halig dryhten,\n m\u00e6r\u00f0o deme, \u00a0 \u00a0 \u00a0 \u00a0 swa him gemet \u00feince.\"\n Hylde hine \u00fea hea\u00feodeor, \u00a0 \u00a0 \u00a0 \u00a0 hleorbolster onfeng\n eorles andwlitan, \u00a0 \u00a0 \u00a0 \u00a0 ond hine ymb monig\n- 690\n- \n snellic s\u00e6rinc \u00a0 \u00a0 \u00a0 \u00a0 selereste gebeah. \n N\u00e6nig heora \u00feohte \u00a0 \u00a0 \u00a0 \u00a0 \u00fe\u00e6t he \u00feanon scolde\n eft eardlufan \u00a0 \u00a0 \u00a0 \u00a0 \u00e6fre gesecean,\n folc o\u00fe\u00f0e freoburh, \u00a0 \u00a0 \u00a0 \u00a0 \u00fe\u00e6r he afeded w\u00e6s;\n ac hie h\u00e6fdon gefrunen \u00a0 \u00a0 \u00a0 \u00a0 \u00fe\u00e6t hie \u00e6r to fela micles\n- 695\n- \n in \u00fe\u00e6m winsele \u00a0 \u00a0 \u00a0 \u00a0 w\u00e6ldea\u00f0 fornam, \n Denigea leode. \u00a0 \u00a0 \u00a0 \u00a0 Ac him dryhten forgeaf\n wigspeda gewiofu, \u00a0 \u00a0 \u00a0 \u00a0 Wedera leodum,\n frofor ond fultum, \u00a0 \u00a0 \u00a0 \u00a0 \u00fe\u00e6t hie feond heora\n \u00f0urh anes cr\u00e6ft \u00a0 \u00a0 \u00a0 \u00a0 ealle ofercomon,\n- 700\n- \n selfes mihtum. \u00a0 \u00a0 \u00a0 \u00a0 So\u00f0 is gecy\u00feed \n \u00fe\u00e6t mihtig god \u00a0 \u00a0 \u00a0 \u00a0 manna cynnes\n weold wideferh\u00f0. \u00a0 \u00a0 \u00a0 \u00a0 Com on wanre niht\n scri\u00f0an sceadugenga. \u00a0 \u00a0 \u00a0 \u00a0 Sceotend sw\u00e6fon,\n \u00fea \u00fe\u00e6t hornreced \u00a0 \u00a0 \u00a0 \u00a0 healdan scoldon,\n- 705\n- \n ealle buton anum. \u00a0 \u00a0 \u00a0 \u00a0 \u00fe\u00e6t w\u00e6s yldum cu\u00fe \n \u00fe\u00e6t hie ne moste, \u00a0 \u00a0 \u00a0 \u00a0 \u00fea metod nolde,\n se scynsca\u00fea \u00a0 \u00a0 \u00a0 \u00a0 under sceadu bregdan;\n ac he w\u00e6ccende \u00a0 \u00a0 \u00a0 \u00a0 wra\u00feum on andan\n bad bolgenmod \u00a0 \u00a0 \u00a0 \u00a0 beadwa ge\u00feinges.\n- 710\n- \n \u00f0a com of more \u00a0 \u00a0 \u00a0 \u00a0 under misthleo\u00feum \n Grendel gongan, \u00a0 \u00a0 \u00a0 \u00a0 godes yrre b\u00e6r;\n mynte se mansca\u00f0a \u00a0 \u00a0 \u00a0 \u00a0 manna cynnes\n sumne besyrwan \u00a0 \u00a0 \u00a0 \u00a0 in sele \u00feam hean.\n Wod under wolcnum \u00a0 \u00a0 \u00a0 \u00a0 to \u00fe\u00e6s \u00fee he winreced,\n- 715\n- \n goldsele gumena, \u00a0 \u00a0 \u00a0 \u00a0 gearwost wisse, \n f\u00e6ttum fahne. \u00a0 \u00a0 \u00a0 \u00a0 Ne w\u00e6s \u00fe\u00e6t forma si\u00f0\n \u00fe\u00e6t he Hro\u00fegares \u00a0 \u00a0 \u00a0 \u00a0 ham gesohte;\n n\u00e6fre he on aldordagum \u00a0 \u00a0 \u00a0 \u00a0 \u00e6r ne si\u00fe\u00f0an\n heardran h\u00e6le, \u00a0 \u00a0 \u00a0 \u00a0 heal\u00f0egnas fand.\n- 720\n- \n Com \u00fea to recede \u00a0 \u00a0 \u00a0 \u00a0 rinc si\u00f0ian, \n dreamum bed\u00e6led. \u00a0 \u00a0 \u00a0 \u00a0 Duru sona onarn,\n fyrbendum f\u00e6st, \u00a0 \u00a0 \u00a0 \u00a0 sy\u00fe\u00f0an he hire folmum \u00e6thran;\n onbr\u00e6d \u00fea bealohydig, \u00a0 \u00a0 \u00a0 \u00a0 \u00f0a he gebolgen w\u00e6s,\n recedes mu\u00fean. \u00a0 \u00a0 \u00a0 \u00a0 Ra\u00fee \u00e6fter \u00feon\n- 725\n- \n on fagne flor \u00a0 \u00a0 \u00a0 \u00a0 feond treddode, \n eode yrremod; \u00a0 \u00a0 \u00a0 \u00a0 him of eagum stod\n ligge gelicost \u00a0 \u00a0 \u00a0 \u00a0 leoht unf\u00e6ger.\n Geseah he in recede \u00a0 \u00a0 \u00a0 \u00a0 rinca manige,\n swefan sibbegedriht \u00a0 \u00a0 \u00a0 \u00a0 samod \u00e6tg\u00e6dere,\n- 730\n- \n magorinca heap. \u00a0 \u00a0 \u00a0 \u00a0 \u00fea his mod ahlog; \n mynte \u00fe\u00e6t he ged\u00e6lde, \u00a0 \u00a0 \u00a0 \u00a0 \u00e6r\u00feon d\u00e6g cwome,\n atol agl\u00e6ca, \u00a0 \u00a0 \u00a0 \u00a0 anra gehwylces\n lif wi\u00f0 lice, \u00a0 \u00a0 \u00a0 \u00a0 \u00fea him alumpen w\u00e6s\n wistfylle wen. \u00a0 \u00a0 \u00a0 \u00a0 Ne w\u00e6s \u00fe\u00e6t wyrd \u00fea gen\n- 735\n- \n \u00fe\u00e6t he ma moste \u00a0 \u00a0 \u00a0 \u00a0 manna cynnes \n \u00f0icgean ofer \u00fea niht. \u00a0 \u00a0 \u00a0 \u00a0 \u00fery\u00f0swy\u00f0 beheold\n m\u00e6g Higelaces, \u00a0 \u00a0 \u00a0 \u00a0 hu se mansca\u00f0a\n under f\u00e6rgripum \u00a0 \u00a0 \u00a0 \u00a0 gefaran wolde.\n Ne \u00fe\u00e6t se agl\u00e6ca \u00a0 \u00a0 \u00a0 \u00a0 yldan \u00feohte,\n- 740\n- \n ac he gefeng hra\u00f0e \u00a0 \u00a0 \u00a0 \u00a0 forman si\u00f0e \n sl\u00e6pendne rinc, \u00a0 \u00a0 \u00a0 \u00a0 slat unwearnum,\n bat banlocan, \u00a0 \u00a0 \u00a0 \u00a0 blod edrum dranc,\n synsn\u00e6dum swealh; \u00a0 \u00a0 \u00a0 \u00a0 sona h\u00e6fde\n unlyfigendes \u00a0 \u00a0 \u00a0 \u00a0 eal gefeormod,\n- 745\n- \n fet ond folma. \u00a0 \u00a0 \u00a0 \u00a0 For\u00f0 near \u00e6tstop, \n nam \u00fea mid handa \u00a0 \u00a0 \u00a0 \u00a0 hige\u00feihtigne\n rinc on r\u00e6ste, \u00a0 \u00a0 \u00a0 \u00a0 r\u00e6hte ongean\n feond mid folme; \u00a0 \u00a0 \u00a0 \u00a0 he onfeng hra\u00fee\n inwit\u00feancum \u00a0 \u00a0 \u00a0 \u00a0 ond wi\u00f0 earm ges\u00e6t.\n- 750\n- \n Sona \u00fe\u00e6t onfunde \u00a0 \u00a0 \u00a0 \u00a0 fyrena hyrde \n \u00fe\u00e6t he ne mette \u00a0 \u00a0 \u00a0 \u00a0 middangeardes,\n eor\u00fean sceata, \u00a0 \u00a0 \u00a0 \u00a0 on elran men\n mundgripe maran. \u00a0 \u00a0 \u00a0 \u00a0 He on mode wear\u00f0\n forht on ferh\u00f0e; \u00a0 \u00a0 \u00a0 \u00a0 no \u00fey \u00e6r fram meahte.\n- 755\n- \n Hyge w\u00e6s him hinfus, \u00a0 \u00a0 \u00a0 \u00a0 wolde on heolster fleon, \n secan deofla gedr\u00e6g; \u00a0 \u00a0 \u00a0 \u00a0 ne w\u00e6s his drohto\u00f0 \u00fe\u00e6r\n swylce he on ealderdagum \u00a0 \u00a0 \u00a0 \u00a0 \u00e6r gemette.\n Gemunde \u00fea se goda, \u00a0 \u00a0 \u00a0 \u00a0 m\u00e6g Higelaces,\n \u00e6fenspr\u00e6ce, \u00a0 \u00a0 \u00a0 \u00a0 uplang astod\n- 760\n- \n ond him f\u00e6ste wi\u00f0feng; \u00a0 \u00a0 \u00a0 \u00a0 fingras burston. \n Eoten w\u00e6s utweard; \u00a0 \u00a0 \u00a0 \u00a0 eorl fur\u00feur stop.\n Mynte se m\u00e6ra, \u00a0 \u00a0 \u00a0 \u00a0 \u00fe\u00e6r he meahte swa,\n widre gewindan \u00a0 \u00a0 \u00a0 \u00a0 ond on weg \u00feanon\n fleon on fenhopu; \u00a0 \u00a0 \u00a0 \u00a0 wiste his fingra geweald\n- 765\n- \n on grames grapum. \u00a0 \u00a0 \u00a0 \u00a0 \u00fe\u00e6t w\u00e6s geocor si\u00f0 \n \u00fe\u00e6t se hearmsca\u00fea \u00a0 \u00a0 \u00a0 \u00a0 to Heorute ateah.\n Dryhtsele dynede; \u00a0 \u00a0 \u00a0 \u00a0 Denum eallum wear\u00f0,\n ceasterbuendum, \u00a0 \u00a0 \u00a0 \u00a0 cenra gehwylcum,\n eorlum ealuscerwen. \u00a0 \u00a0 \u00a0 \u00a0 Yrre w\u00e6ron begen,\n- 770\n- \n re\u00fee renweardas. \u00a0 \u00a0 \u00a0 \u00a0 Reced hlynsode. \n \u00fea w\u00e6s wundor micel \u00a0 \u00a0 \u00a0 \u00a0 \u00fe\u00e6t se winsele\n wi\u00f0h\u00e6fde hea\u00feodeorum, \u00a0 \u00a0 \u00a0 \u00a0 \u00fe\u00e6t he on hrusan ne feol,\n f\u00e6ger foldbold; \u00a0 \u00a0 \u00a0 \u00a0 ac he \u00fe\u00e6s f\u00e6ste w\u00e6s\n innan ond utan \u00a0 \u00a0 \u00a0 \u00a0 irenbendum\n- 775\n- \n searo\u00feoncum besmi\u00feod. \u00a0 \u00a0 \u00a0 \u00a0 \u00fe\u00e6r fram sylle abeag \n medubenc monig, \u00a0 \u00a0 \u00a0 \u00a0 mine gefr\u00e6ge,\n golde geregnad, \u00a0 \u00a0 \u00a0 \u00a0 \u00fe\u00e6r \u00fea graman wunnon.\n \u00fe\u00e6s ne wendon \u00e6r \u00a0 \u00a0 \u00a0 \u00a0 witan Scyldinga\n \u00fe\u00e6t hit a mid gemete \u00a0 \u00a0 \u00a0 \u00a0 manna \u00e6nig,\n- 780\n- \n betlic ond banfag, \u00a0 \u00a0 \u00a0 \u00a0 tobrecan meahte, \n listum tolucan, \u00a0 \u00a0 \u00a0 \u00a0 nym\u00fee liges f\u00e6\u00fem\n swulge on swa\u00feule. \u00a0 \u00a0 \u00a0 \u00a0 Sweg up astag\n niwe geneahhe; \u00a0 \u00a0 \u00a0 \u00a0 Nor\u00f0denum stod\n atelic egesa, \u00a0 \u00a0 \u00a0 \u00a0 anra gehwylcum\n- 785\n- \n \u00feara \u00fee of wealle \u00a0 \u00a0 \u00a0 \u00a0 wop gehyrdon, \n gryreleo\u00f0 galan \u00a0 \u00a0 \u00a0 \u00a0 godes ondsacan,\n sigeleasne sang, \u00a0 \u00a0 \u00a0 \u00a0 sar wanigean\n helle h\u00e6fton. \u00a0 \u00a0 \u00a0 \u00a0 Heold hine f\u00e6ste\n se \u00fee manna w\u00e6s \u00a0 \u00a0 \u00a0 \u00a0 m\u00e6gene strengest\n- 790\n- \n on \u00fe\u00e6m d\u00e6ge \u00a0 \u00a0 \u00a0 \u00a0 \u00feysses lifes. \n Nolde eorla hleo \u00a0 \u00a0 \u00a0 \u00a0 \u00e6nige \u00feinga\n \u00feone cwealmcuman \u00a0 \u00a0 \u00a0 \u00a0 cwicne forl\u00e6tan,\n ne his lifdagas \u00a0 \u00a0 \u00a0 \u00a0 leoda \u00e6nigum\n nytte tealde. \u00a0 \u00a0 \u00a0 \u00a0 \u00fe\u00e6r genehost br\u00e6gd\n- 795\n- \n eorl Beowulfes \u00a0 \u00a0 \u00a0 \u00a0 ealde lafe, \n wolde freadrihtnes \u00a0 \u00a0 \u00a0 \u00a0 feorh ealgian,\n m\u00e6res \u00feeodnes, \u00a0 \u00a0 \u00a0 \u00a0 \u00f0\u00e6r hie meahton swa.\n Hie \u00fe\u00e6t ne wiston, \u00a0 \u00a0 \u00a0 \u00a0 \u00fea hie gewin drugon,\n heardhicgende \u00a0 \u00a0 \u00a0 \u00a0 hildemecgas,\n- 800\n- \n ond on healfa gehwone \u00a0 \u00a0 \u00a0 \u00a0 heawan \u00feohton, \n sawle secan, \u00a0 \u00a0 \u00a0 \u00a0 \u00feone synsca\u00f0an\n \u00e6nig ofer eor\u00fean \u00a0 \u00a0 \u00a0 \u00a0 irenna cyst,\n gu\u00f0billa nan, \u00a0 \u00a0 \u00a0 \u00a0 gretan nolde,\n ac he sigew\u00e6pnum \u00a0 \u00a0 \u00a0 \u00a0 forsworen h\u00e6fde,\n- 805\n- \n ecga gehwylcre. \u00a0 \u00a0 \u00a0 \u00a0 Scolde his aldorgedal \n on \u00f0\u00e6m d\u00e6ge \u00a0 \u00a0 \u00a0 \u00a0 \u00feysses lifes\n earmlic wur\u00f0an, \u00a0 \u00a0 \u00a0 \u00a0 ond se ellorgast\n on feonda geweald \u00a0 \u00a0 \u00a0 \u00a0 feor si\u00f0ian.\n \u00f0a \u00fe\u00e6t onfunde \u00a0 \u00a0 \u00a0 \u00a0 se \u00fee fela \u00e6ror\n- 810\n- \n modes myr\u00f0e \u00a0 \u00a0 \u00a0 \u00a0 manna cynne, \n fyrene gefremede \u00a0 \u00a0 \u00a0 \u00a0 (he w\u00e6s fag wi\u00f0 god),\n \u00fe\u00e6t him se lichoma \u00a0 \u00a0 \u00a0 \u00a0 l\u00e6stan nolde,\n ac hine se modega \u00a0 \u00a0 \u00a0 \u00a0 m\u00e6g Hygelaces\n h\u00e6fde be honda; \u00a0 \u00a0 \u00a0 \u00a0 w\u00e6s gehw\u00e6\u00feer o\u00f0rum\n- 815\n- \n lifigende la\u00f0. \u00a0 \u00a0 \u00a0 \u00a0 Licsar gebad \n atol \u00e6gl\u00e6ca; \u00a0 \u00a0 \u00a0 \u00a0 him on eaxle wear\u00f0\n syndolh sweotol, \u00a0 \u00a0 \u00a0 \u00a0 seonowe onsprungon,\n burston banlocan. \u00a0 \u00a0 \u00a0 \u00a0 Beowulfe wear\u00f0\n gu\u00f0hre\u00f0 gyfe\u00fee; \u00a0 \u00a0 \u00a0 \u00a0 scolde Grendel \u00feonan\n- 820\n- \n feorhseoc fleon \u00a0 \u00a0 \u00a0 \u00a0 under fenhleo\u00f0u, \n secean wynleas wic; \u00a0 \u00a0 \u00a0 \u00a0 wiste \u00fee geornor\n \u00fe\u00e6t his aldres w\u00e6s \u00a0 \u00a0 \u00a0 \u00a0 ende gegongen,\n dogera d\u00e6grim. \u00a0 \u00a0 \u00a0 \u00a0 Denum eallum wear\u00f0\n \u00e6fter \u00feam w\u00e6lr\u00e6se \u00a0 \u00a0 \u00a0 \u00a0 willa gelumpen.\n- 825\n- \n H\u00e6fde \u00fea gef\u00e6lsod \u00a0 \u00a0 \u00a0 \u00a0 se \u00fee \u00e6r feorran com, \n snotor ond swy\u00f0ferh\u00f0, \u00a0 \u00a0 \u00a0 \u00a0 sele Hro\u00f0gares,\n genered wi\u00f0 ni\u00f0e; \u00a0 \u00a0 \u00a0 \u00a0 nihtweorce gefeh,\n ellenm\u00e6r\u00feum. \u00a0 \u00a0 \u00a0 \u00a0 H\u00e6fde Eastdenum\n Geatmecga leod \u00a0 \u00a0 \u00a0 \u00a0 gilp gel\u00e6sted,\n- 830\n- \n swylce oncy\u00fe\u00f0e \u00a0 \u00a0 \u00a0 \u00a0 ealle gebette, \n inwidsorge, \u00a0 \u00a0 \u00a0 \u00a0 \u00fee hie \u00e6r drugon\n ond for \u00fereanydum \u00a0 \u00a0 \u00a0 \u00a0 \u00feolian scoldon,\n torn unlytel. \u00a0 \u00a0 \u00a0 \u00a0 \u00fe\u00e6t w\u00e6s tacen sweotol,\n sy\u00fe\u00f0an hildedeor \u00a0 \u00a0 \u00a0 \u00a0 hond alegde,\n- 835\n- \n earm ond eaxle \u00a0 \u00a0 \u00a0 \u00a0 (\u00fe\u00e6r w\u00e6s eal geador \n Grendles grape) \u00a0 \u00a0 \u00a0 \u00a0 under geapne hrof.\n \u00f0a w\u00e6s on morgen \u00a0 \u00a0 \u00a0 \u00a0 mine gefr\u00e6ge\n ymb \u00fea gifhealle \u00a0 \u00a0 \u00a0 \u00a0 gu\u00f0rinc monig;\n ferdon folctogan \u00a0 \u00a0 \u00a0 \u00a0 feorran ond nean\n- 840\n- \n geond widwegas \u00a0 \u00a0 \u00a0 \u00a0 wundor sceawian, \n la\u00fees lastas. \u00a0 \u00a0 \u00a0 \u00a0 No his lifgedal\n sarlic \u00feuhte \u00a0 \u00a0 \u00a0 \u00a0 secga \u00e6negum\n \u00feara \u00fee tirleases \u00a0 \u00a0 \u00a0 \u00a0 trode sceawode,\n hu he werigmod \u00a0 \u00a0 \u00a0 \u00a0 on weg \u00feanon,\n- 845\n- \n ni\u00f0a ofercumen, \u00a0 \u00a0 \u00a0 \u00a0 on nicera mere \n f\u00e6ge ond geflymed \u00a0 \u00a0 \u00a0 \u00a0 feorhlastas b\u00e6r.\n \u00f0\u00e6r w\u00e6s on blode \u00a0 \u00a0 \u00a0 \u00a0 brim weallende,\n atol y\u00f0a geswing \u00a0 \u00a0 \u00a0 \u00a0 eal gemenged\n haton heolfre, \u00a0 \u00a0 \u00a0 \u00a0 heorodreore weol.\n- 850\n- \n Dea\u00f0f\u00e6ge deog, \u00a0 \u00a0 \u00a0 \u00a0 si\u00f0\u00f0an dreama leas \n in fenfreo\u00f0o \u00a0 \u00a0 \u00a0 \u00a0 feorh alegde,\n h\u00e6\u00feene sawle; \u00a0 \u00a0 \u00a0 \u00a0 \u00fe\u00e6r him hel onfeng.\n \u00feanon eft gewiton \u00a0 \u00a0 \u00a0 \u00a0 ealdgesi\u00f0as,\n swylce geong manig \u00a0 \u00a0 \u00a0 \u00a0 of gomenwa\u00fee\n- 855\n- \n fram mere modge \u00a0 \u00a0 \u00a0 \u00a0 mearum ridan, \n beornas on blancum. \u00a0 \u00a0 \u00a0 \u00a0 \u00f0\u00e6r w\u00e6s Beowulfes\n m\u00e6r\u00f0o m\u00e6ned; \u00a0 \u00a0 \u00a0 \u00a0 monig oft gecw\u00e6\u00f0\n \u00fe\u00e6tte su\u00f0 ne nor\u00f0 \u00a0 \u00a0 \u00a0 \u00a0 be s\u00e6m tweonum\n ofer eormengrund \u00a0 \u00a0 \u00a0 \u00a0 o\u00feer n\u00e6nig\n- 860\n- \n under swegles begong \u00a0 \u00a0 \u00a0 \u00a0 selra n\u00e6re \n rondh\u00e6bbendra, \u00a0 \u00a0 \u00a0 \u00a0 rices wyr\u00f0ra.\n Ne hie huru winedrihten \u00a0 \u00a0 \u00a0 \u00a0 wiht ne logon,\n gl\u00e6dne Hro\u00f0gar, \u00a0 \u00a0 \u00a0 \u00a0 ac \u00fe\u00e6t w\u00e6s god cyning.\n Hwilum hea\u00feorofe \u00a0 \u00a0 \u00a0 \u00a0 hleapan leton,\n- 865\n- \n on geflit faran \u00a0 \u00a0 \u00a0 \u00a0 fealwe mearas \n \u00f0\u00e6r him foldwegas \u00a0 \u00a0 \u00a0 \u00a0 f\u00e6gere \u00feuhton,\n cystum cu\u00f0e. \u00a0 \u00a0 \u00a0 \u00a0 Hwilum cyninges \u00feegn,\n guma gilphl\u00e6den, \u00a0 \u00a0 \u00a0 \u00a0 gidda gemyndig,\n se \u00f0e ealfela \u00a0 \u00a0 \u00a0 \u00a0 ealdgesegena\n- 870\n- \n worn gemunde, \u00a0 \u00a0 \u00a0 \u00a0 word o\u00feer fand \n so\u00f0e gebunden; \u00a0 \u00a0 \u00a0 \u00a0 secg eft ongan\n si\u00f0 Beowulfes \u00a0 \u00a0 \u00a0 \u00a0 snyttrum styrian\n ond on sped wrecan \u00a0 \u00a0 \u00a0 \u00a0 spel gerade,\n wordum wrixlan. \u00a0 \u00a0 \u00a0 \u00a0 Welhwylc gecw\u00e6\u00f0\n- 875\n- \n \u00fe\u00e6t he fram Sigemundes \u00a0 \u00a0 \u00a0 \u00a0 secgan hyrde \n ellend\u00e6dum, \u00a0 \u00a0 \u00a0 \u00a0 uncu\u00fees fela,\n W\u00e6lsinges gewin, \u00a0 \u00a0 \u00a0 \u00a0 wide si\u00f0as,\n \u00feara \u00fee gumena bearn \u00a0 \u00a0 \u00a0 \u00a0 gearwe ne wiston,\n f\u00e6h\u00f0e ond fyrena, \u00a0 \u00a0 \u00a0 \u00a0 buton Fitela mid hine,\n- 880\n- \n \u00feonne he swulces hw\u00e6t \u00a0 \u00a0 \u00a0 \u00a0 secgan wolde, \n eam his nefan, \u00a0 \u00a0 \u00a0 \u00a0 swa hie a w\u00e6ron\n \u00e6t ni\u00f0a gehwam \u00a0 \u00a0 \u00a0 \u00a0 nydgesteallan;\n h\u00e6fdon ealfela \u00a0 \u00a0 \u00a0 \u00a0 eotena cynnes\n sweordum ges\u00e6ged. \u00a0 \u00a0 \u00a0 \u00a0 Sigemunde gesprong\n- 885\n- \n \u00e6fter dea\u00f0d\u00e6ge \u00a0 \u00a0 \u00a0 \u00a0 dom unlytel, \n sy\u00fe\u00f0an wiges heard \u00a0 \u00a0 \u00a0 \u00a0 wyrm acwealde,\n hordes hyrde. \u00a0 \u00a0 \u00a0 \u00a0 He under harne stan,\n \u00e6\u00feelinges bearn, \u00a0 \u00a0 \u00a0 \u00a0 ana gene\u00f0de\n frecne d\u00e6de, \u00a0 \u00a0 \u00a0 \u00a0 ne w\u00e6s him Fitela mid.\n- 890\n- \n Hw\u00e6\u00fere him ges\u00e6lde \u00a0 \u00a0 \u00a0 \u00a0 \u00f0\u00e6t \u00fe\u00e6t swurd \u00feurhwod \n wr\u00e6tlicne wyrm, \u00a0 \u00a0 \u00a0 \u00a0 \u00fe\u00e6t hit on wealle \u00e6tstod,\n dryhtlic iren; \u00a0 \u00a0 \u00a0 \u00a0 draca mor\u00f0re swealt.\n H\u00e6fde agl\u00e6ca \u00a0 \u00a0 \u00a0 \u00a0 elne gegongen\n \u00fe\u00e6t he beahhordes \u00a0 \u00a0 \u00a0 \u00a0 brucan moste\n- 895\n- \n selfes dome; \u00a0 \u00a0 \u00a0 \u00a0 s\u00e6bat gehleod, \n b\u00e6r on bearm scipes \u00a0 \u00a0 \u00a0 \u00a0 beorhte fr\u00e6twa,\n W\u00e6lses eafera. \u00a0 \u00a0 \u00a0 \u00a0 Wyrm hat gemealt.\n Se w\u00e6s wreccena \u00a0 \u00a0 \u00a0 \u00a0 wide m\u00e6rost\n ofer wer\u00feeode, \u00a0 \u00a0 \u00a0 \u00a0 wigendra hleo,\n- 900\n- \n ellend\u00e6dum \u00a0 \u00a0 \u00a0 \u00a0 (he \u00fe\u00e6s \u00e6r on\u00f0ah), \n si\u00f0\u00f0an Heremodes \u00a0 \u00a0 \u00a0 \u00a0 hild swe\u00f0rode,\n eafo\u00f0 ond ellen. \u00a0 \u00a0 \u00a0 \u00a0 He mid Eotenum wear\u00f0\n on feonda geweald \u00a0 \u00a0 \u00a0 \u00a0 for\u00f0 forlacen,\n snude forsended. \u00a0 \u00a0 \u00a0 \u00a0 Hine sorhwylmas\n- 905\n- \n lemede to lange; \u00a0 \u00a0 \u00a0 \u00a0 he his leodum wear\u00f0, \n eallum \u00e6\u00feellingum \u00a0 \u00a0 \u00a0 \u00a0 to aldorceare;\n swylce oft bemearn \u00a0 \u00a0 \u00a0 \u00a0 \u00e6rran m\u00e6lum\n swi\u00f0ferh\u00fees si\u00f0 \u00a0 \u00a0 \u00a0 \u00a0 snotor ceorl monig,\n se \u00fee him bealwa to \u00a0 \u00a0 \u00a0 \u00a0 bote gelyfde,\n- 910\n- \n \u00fe\u00e6t \u00fe\u00e6t \u00f0eodnes bearn \u00a0 \u00a0 \u00a0 \u00a0 ge\u00feeon scolde, \n f\u00e6der\u00e6\u00feelum onfon, \u00a0 \u00a0 \u00a0 \u00a0 folc gehealdan,\n hord ond hleoburh, \u00a0 \u00a0 \u00a0 \u00a0 h\u00e6le\u00fea rice,\n \u16df Scyldinga. \u00a0 \u00a0 \u00a0 \u00a0 He \u00fe\u00e6r eallum wear\u00f0,\n m\u00e6g Higelaces, \u00a0 \u00a0 \u00a0 \u00a0 manna cynne,\n- 915\n- \n freondum gef\u00e6gra; \u00a0 \u00a0 \u00a0 \u00a0 hine fyren onwod. \n Hwilum flitende \u00a0 \u00a0 \u00a0 \u00a0 fealwe str\u00e6te\n mearum m\u00e6ton. \u00a0 \u00a0 \u00a0 \u00a0 \u00f0a w\u00e6s morgenleoht\n scofen ond scynded. \u00a0 \u00a0 \u00a0 \u00a0 Eode scealc monig\n swi\u00f0hicgende \u00a0 \u00a0 \u00a0 \u00a0 to sele \u00feam hean\n- 920\n- \n searowundor seon; \u00a0 \u00a0 \u00a0 \u00a0 swylce self cyning \n of brydbure, \u00a0 \u00a0 \u00a0 \u00a0 beahhorda weard,\n tryddode tirf\u00e6st \u00a0 \u00a0 \u00a0 \u00a0 getrume micle,\n cystum gecy\u00feed, \u00a0 \u00a0 \u00a0 \u00a0 ond his cwen mid him\n medostigge m\u00e6t \u00a0 \u00a0 \u00a0 \u00a0 m\u00e6g\u00fea hose.\n- 925\n- \n Hro\u00f0gar ma\u00feelode \u00a0 \u00a0 \u00a0 \u00a0 (he to healle geong, \n stod on stapole, \u00a0 \u00a0 \u00a0 \u00a0 geseah steapne hrof,\n golde fahne, \u00a0 \u00a0 \u00a0 \u00a0 ond Grendles hond):\n \"\u00f0isse ansyne \u00a0 \u00a0 \u00a0 \u00a0 alwealdan \u00feanc\n lungre gelimpe! \u00a0 \u00a0 \u00a0 \u00a0 Fela ic la\u00fees gebad,\n- 930\n- \n grynna \u00e6t Grendle; \u00a0 \u00a0 \u00a0 \u00a0 a m\u00e6g god wyrcan \n wunder \u00e6fter wundre, \u00a0 \u00a0 \u00a0 \u00a0 wuldres hyrde.\n \u00f0\u00e6t w\u00e6s ungeara \u00a0 \u00a0 \u00a0 \u00a0 \u00fe\u00e6t ic \u00e6nigra me\n weana ne wende \u00a0 \u00a0 \u00a0 \u00a0 to widan feore\n bote gebidan, \u00a0 \u00a0 \u00a0 \u00a0 \u00feonne blode fah\n- 935\n- \n husa selest \u00a0 \u00a0 \u00a0 \u00a0 heorodreorig stod, \n wea widscofen \u00a0 \u00a0 \u00a0 \u00a0 witena gehwylcum\n \u00f0ara \u00fee ne wendon \u00a0 \u00a0 \u00a0 \u00a0 \u00fe\u00e6t hie wideferh\u00f0\n leoda landgeweorc \u00a0 \u00a0 \u00a0 \u00a0 la\u00feum beweredon\n scuccum ond scinnum. \u00a0 \u00a0 \u00a0 \u00a0 Nu scealc hafa\u00f0\n- 940\n- \n \u00feurh drihtnes miht \u00a0 \u00a0 \u00a0 \u00a0 d\u00e6d gefremede \n \u00f0e we ealle \u00a0 \u00a0 \u00a0 \u00a0 \u00e6r ne meahton\n snyttrum besyrwan. \u00a0 \u00a0 \u00a0 \u00a0 Hw\u00e6t, \u00fe\u00e6t secgan m\u00e6g\n efne swa hwylc m\u00e6g\u00fea \u00a0 \u00a0 \u00a0 \u00a0 swa \u00f0one magan cende\n \u00e6fter gumcynnum, \u00a0 \u00a0 \u00a0 \u00a0 gyf heo gyt lyfa\u00f0,\n- 945\n- \n \u00fe\u00e6t hyre ealdmetod \u00a0 \u00a0 \u00a0 \u00a0 este w\u00e6re \n bearngebyrdo. \u00a0 \u00a0 \u00a0 \u00a0 Nu ic, Beowulf, \u00feec,\n secg betsta, \u00a0 \u00a0 \u00a0 \u00a0 me for sunu wylle\n freogan on ferh\u00fee; \u00a0 \u00a0 \u00a0 \u00a0 heald for\u00f0 tela\n niwe sibbe. \u00a0 \u00a0 \u00a0 \u00a0 Ne bi\u00f0 \u00fee n\u00e6nigra gad\n- 950\n- \n worolde wilna, \u00a0 \u00a0 \u00a0 \u00a0 \u00fee ic geweald h\u00e6bbe. \n Ful oft ic for l\u00e6ssan \u00a0 \u00a0 \u00a0 \u00a0 lean teohhode,\n hordweor\u00feunge \u00a0 \u00a0 \u00a0 \u00a0 hnahran rince,\n s\u00e6mran \u00e6t s\u00e6cce. \u00a0 \u00a0 \u00a0 \u00a0 \u00feu \u00fee self hafast\n d\u00e6dum gefremed \u00a0 \u00a0 \u00a0 \u00a0 \u00fe\u00e6t \u00fein dom lyfa\u00f0\n- 955\n- \n awa to aldre. \u00a0 \u00a0 \u00a0 \u00a0 Alwalda \u00feec \n gode forgylde, \u00a0 \u00a0 \u00a0 \u00a0 swa he nu gyt dyde!\"\n Beowulf ma\u00feelode, \u00a0 \u00a0 \u00a0 \u00a0 bearn Ec\u00feeowes:\n \"We \u00fe\u00e6t ellenweorc \u00a0 \u00a0 \u00a0 \u00a0 estum miclum,\n feohtan fremedon, \u00a0 \u00a0 \u00a0 \u00a0 frecne gene\u00f0don\n- 960\n- \n eafo\u00f0 uncu\u00fees. \u00a0 \u00a0 \u00a0 \u00a0 U\u00fee ic swi\u00feor \n \u00fe\u00e6t \u00f0u hine selfne \u00a0 \u00a0 \u00a0 \u00a0 geseon moste,\n feond on fr\u00e6tewum \u00a0 \u00a0 \u00a0 \u00a0 fylwerigne.\n Ic hine hr\u00e6dlice \u00a0 \u00a0 \u00a0 \u00a0 heardan clammum\n on w\u00e6lbedde \u00a0 \u00a0 \u00a0 \u00a0 wri\u00fean \u00feohte,\n- 965\n- \n \u00fe\u00e6t he for mundgripe \u00a0 \u00a0 \u00a0 \u00a0 minum scolde \n licgean lifbysig, \u00a0 \u00a0 \u00a0 \u00a0 butan his lic swice.\n Ic hine ne mihte, \u00a0 \u00a0 \u00a0 \u00a0 \u00fea metod nolde,\n ganges getw\u00e6man, \u00a0 \u00a0 \u00a0 \u00a0 no ic him \u00fe\u00e6s georne \u00e6tfealh,\n feorhgeni\u00f0lan; \u00a0 \u00a0 \u00a0 \u00a0 w\u00e6s to foremihtig\n- 970\n- \n feond on fe\u00fee. \u00a0 \u00a0 \u00a0 \u00a0 Hw\u00e6\u00feere he his folme forlet \n to lifwra\u00fee \u00a0 \u00a0 \u00a0 \u00a0 last weardian,\n earm ond eaxle. \u00a0 \u00a0 \u00a0 \u00a0 No \u00fe\u00e6r \u00e6nige swa \u00feeah\n feasceaft guma \u00a0 \u00a0 \u00a0 \u00a0 frofre gebohte;\n no \u00fey leng leofa\u00f0 \u00a0 \u00a0 \u00a0 \u00a0 la\u00f0geteona,\n- 975\n- \n synnum geswenced, \u00a0 \u00a0 \u00a0 \u00a0 ac hyne sar hafa\u00f0 \n mid nydgripe \u00a0 \u00a0 \u00a0 \u00a0 nearwe befongen,\n balwon bendum. \u00a0 \u00a0 \u00a0 \u00a0 \u00f0\u00e6r abidan sceal\n maga mane fah \u00a0 \u00a0 \u00a0 \u00a0 miclan domes,\n hu him scir metod \u00a0 \u00a0 \u00a0 \u00a0 scrifan wille.\"\n- 980\n- \n \u00f0a w\u00e6s swigra secg, \u00a0 \u00a0 \u00a0 \u00a0 sunu Eclafes, \n on gylpspr\u00e6ce \u00a0 \u00a0 \u00a0 \u00a0 gu\u00f0geweorca,\n si\u00fe\u00f0an \u00e6\u00feelingas \u00a0 \u00a0 \u00a0 \u00a0 eorles cr\u00e6fte\n ofer heanne hrof \u00a0 \u00a0 \u00a0 \u00a0 hand sceawedon,\n feondes fingras. \u00a0 \u00a0 \u00a0 \u00a0 Foran \u00e6ghwylc w\u00e6s,\n- 985\n- \n sti\u00f0ra n\u00e6gla gehwylc, \u00a0 \u00a0 \u00a0 \u00a0 style gelicost, \n h\u00e6\u00feenes handsporu \u00a0 \u00a0 \u00a0 \u00a0 hilderinces,\n egl, unheoru. \u00a0 \u00a0 \u00a0 \u00a0 \u00e6ghwylc gecw\u00e6\u00f0\n \u00fe\u00e6t him heardra nan \u00a0 \u00a0 \u00a0 \u00a0 hrinan wolde\n iren \u00e6rgod, \u00a0 \u00a0 \u00a0 \u00a0 \u00fe\u00e6t \u00f0\u00e6s ahl\u00e6can\n- 990\n- \n blodge beadufolme \u00a0 \u00a0 \u00a0 \u00a0 onberan wolde. \n \u00f0a w\u00e6s haten hre\u00fee \u00a0 \u00a0 \u00a0 \u00a0 Heort innanweard\n folmum gefr\u00e6twod. \u00a0 \u00a0 \u00a0 \u00a0 Fela \u00fe\u00e6ra w\u00e6s,\n wera ond wifa, \u00a0 \u00a0 \u00a0 \u00a0 \u00fee \u00fe\u00e6t winreced,\n gestsele gyredon. \u00a0 \u00a0 \u00a0 \u00a0 Goldfag scinon\n- 995\n- \n web \u00e6fter wagum, \u00a0 \u00a0 \u00a0 \u00a0 wundorsiona fela \n secga gehwylcum \u00a0 \u00a0 \u00a0 \u00a0 \u00feara \u00fee on swylc stara\u00f0.\n W\u00e6s \u00fe\u00e6t beorhte bold \u00a0 \u00a0 \u00a0 \u00a0 tobrocen swi\u00f0e,\n eal inneweard \u00a0 \u00a0 \u00a0 \u00a0 irenbendum f\u00e6st,\n heorras tohlidene. \u00a0 \u00a0 \u00a0 \u00a0 Hrof ana gen\u00e6s,\n- 1000\n- \n ealles ansund, \u00a0 \u00a0 \u00a0 \u00a0 \u00fee se agl\u00e6ca, \n fyrend\u00e6dum fag, \u00a0 \u00a0 \u00a0 \u00a0 on fleam gewand,\n aldres orwena. \u00a0 \u00a0 \u00a0 \u00a0 No \u00fe\u00e6t y\u00f0e by\u00f0\n to befleonne, \u00a0 \u00a0 \u00a0 \u00a0 fremme se \u00fee wille,\n ac gesecan sceal \u00a0 \u00a0 \u00a0 \u00a0 sawlberendra,\n- 1005\n- \n nyde genydde, \u00a0 \u00a0 \u00a0 \u00a0 ni\u00fe\u00f0a bearna, \n grundbuendra \u00a0 \u00a0 \u00a0 \u00a0 gearwe stowe,\n \u00fe\u00e6r his lichoma \u00a0 \u00a0 \u00a0 \u00a0 legerbedde f\u00e6st\n swefe\u00fe \u00e6fter symle. \u00a0 \u00a0 \u00a0 \u00a0 \u00fea w\u00e6s s\u00e6l ond m\u00e6l\n \u00fe\u00e6t to healle gang \u00a0 \u00a0 \u00a0 \u00a0 Healfdenes sunu;\n- 1010\n- \n wolde self cyning \u00a0 \u00a0 \u00a0 \u00a0 symbel \u00feicgan. \n Ne gefr\u00e6gen ic \u00fea m\u00e6g\u00fee \u00a0 \u00a0 \u00a0 \u00a0 maran weorode\n ymb hyra sincgyfan \u00a0 \u00a0 \u00a0 \u00a0 sel geb\u00e6ran.\n Bugon \u00fea to bence \u00a0 \u00a0 \u00a0 \u00a0 bl\u00e6dagande,\n fylle gef\u00e6gon; \u00a0 \u00a0 \u00a0 \u00a0 f\u00e6gere ge\u00fe\u00e6gon\n- 1015\n- \n medoful manig \u00a0 \u00a0 \u00a0 \u00a0 magas \u00feara \n swi\u00f0hicgende \u00a0 \u00a0 \u00a0 \u00a0 on sele \u00feam hean,\n Hro\u00f0gar ond Hro\u00feulf. \u00a0 \u00a0 \u00a0 \u00a0 Heorot innan w\u00e6s\n freondum afylled; \u00a0 \u00a0 \u00a0 \u00a0 nalles facenstafas\n \u00feeodscyldingas \u00a0 \u00a0 \u00a0 \u00a0 \u00feenden fremedon.\n- 1020\n- \n Forgeaf \u00fea Beowulfe \u00a0 \u00a0 \u00a0 \u00a0 bearn Healfdenes \n segen gyldenne \u00a0 \u00a0 \u00a0 \u00a0 sigores to leane;\n hroden hildecumbor, \u00a0 \u00a0 \u00a0 \u00a0 helm ond byrnan,\n m\u00e6re ma\u00f0\u00feumsweord \u00a0 \u00a0 \u00a0 \u00a0 manige gesawon\n beforan beorn beran. \u00a0 \u00a0 \u00a0 \u00a0 Beowulf ge\u00feah\n- 1025\n- \n ful on flette; \u00a0 \u00a0 \u00a0 \u00a0 no he \u00fe\u00e6re feohgyfte \n for sceotendum \u00a0 \u00a0 \u00a0 \u00a0 scamigan \u00f0orfte.\n Ne gefr\u00e6gn ic freondlicor \u00a0 \u00a0 \u00a0 \u00a0 feower madmas\n golde gegyrede \u00a0 \u00a0 \u00a0 \u00a0 gummanna fela\n in ealobence \u00a0 \u00a0 \u00a0 \u00a0 o\u00f0rum gesellan.\n- 1030\n- \n Ymb \u00fe\u00e6s helmes hrof \u00a0 \u00a0 \u00a0 \u00a0 heafodbeorge \n wirum bewunden \u00a0 \u00a0 \u00a0 \u00a0 walu utan heold,\n \u00fe\u00e6t him fela laf \u00a0 \u00a0 \u00a0 \u00a0 frecne ne meahton\n scurheard sce\u00fe\u00f0an, \u00a0 \u00a0 \u00a0 \u00a0 \u00feonne scyldfreca\n ongean gramum \u00a0 \u00a0 \u00a0 \u00a0 gangan scolde.\n- 1035\n- \n Heht \u00f0a eorla hleo \u00a0 \u00a0 \u00a0 \u00a0 eahta mearas \n f\u00e6tedhleore \u00a0 \u00a0 \u00a0 \u00a0 on flet teon,\n in under eoderas. \u00a0 \u00a0 \u00a0 \u00a0 \u00feara anum stod\n sadol searwum fah, \u00a0 \u00a0 \u00a0 \u00a0 since gewur\u00fead;\n \u00fe\u00e6t w\u00e6s hildesetl \u00a0 \u00a0 \u00a0 \u00a0 heahcyninges,\n- 1040\n- \n \u00f0onne sweorda gelac \u00a0 \u00a0 \u00a0 \u00a0 sunu Healfdenes \n efnan wolde. \u00a0 \u00a0 \u00a0 \u00a0 N\u00e6fre on ore l\u00e6g\n widcu\u00fees wig, \u00a0 \u00a0 \u00a0 \u00a0 \u00f0onne walu feollon.\n Ond \u00f0a Beowulfe \u00a0 \u00a0 \u00a0 \u00a0 bega gehw\u00e6\u00feres\n eodor Ingwina \u00a0 \u00a0 \u00a0 \u00a0 onweald geteah,\n- 1045\n- \n wicga ond w\u00e6pna, \u00a0 \u00a0 \u00a0 \u00a0 het hine wel brucan. \n Swa manlice \u00a0 \u00a0 \u00a0 \u00a0 m\u00e6re \u00feeoden,\n hordweard h\u00e6le\u00fea, \u00a0 \u00a0 \u00a0 \u00a0 hea\u00feor\u00e6sas geald\n mearum ond madmum, \u00a0 \u00a0 \u00a0 \u00a0 swa hy n\u00e6fre man lyh\u00f0,\n se \u00fee secgan wile \u00a0 \u00a0 \u00a0 \u00a0 so\u00f0 \u00e6fter rihte.\n- 1050\n- \n \u00f0a gyt \u00e6ghwylcum \u00a0 \u00a0 \u00a0 \u00a0 eorla drihten \n \u00feara \u00fee mid Beowulfe \u00a0 \u00a0 \u00a0 \u00a0 brimlade teah\n on \u00fe\u00e6re medubence \u00a0 \u00a0 \u00a0 \u00a0 ma\u00fe\u00f0um gesealde,\n yrfelafe, \u00a0 \u00a0 \u00a0 \u00a0 ond \u00feone \u00e6nne heht\n golde forgyldan, \u00a0 \u00a0 \u00a0 \u00a0 \u00feone \u00f0e Grendel \u00e6r\n- 1055\n- \n mane acwealde, \u00a0 \u00a0 \u00a0 \u00a0 swa he hyra ma wolde, \n nefne him witig god \u00a0 \u00a0 \u00a0 \u00a0 wyrd forstode\n ond \u00f0\u00e6s mannes mod. \u00a0 \u00a0 \u00a0 \u00a0 Metod eallum weold\n gumena cynnes, \u00a0 \u00a0 \u00a0 \u00a0 swa he nu git de\u00f0.\n For\u00fean bi\u00f0 andgit \u00a0 \u00a0 \u00a0 \u00a0 \u00e6ghw\u00e6r selest,\n- 1060\n- \n ferh\u00f0es fore\u00feanc. \u00a0 \u00a0 \u00a0 \u00a0 Fela sceal gebidan \n leofes ond la\u00fees \u00a0 \u00a0 \u00a0 \u00a0 se \u00fee longe her\n on \u00f0yssum windagum \u00a0 \u00a0 \u00a0 \u00a0 worolde bruce\u00f0.\n \u00fe\u00e6r w\u00e6s sang ond sweg \u00a0 \u00a0 \u00a0 \u00a0 samod \u00e6tg\u00e6dere\n fore Healfdenes \u00a0 \u00a0 \u00a0 \u00a0 hildewisan,\n- 1065\n- \n gomenwudu greted, \u00a0 \u00a0 \u00a0 \u00a0 gid oft wrecen, \n \u00f0onne healgamen \u00a0 \u00a0 \u00a0 \u00a0 Hro\u00fegares scop\n \u00e6fter medobence \u00a0 \u00a0 \u00a0 \u00a0 m\u00e6nan scolde\n be Finnes eaferum, \u00a0 \u00a0 \u00a0 \u00a0 \u00f0a hie se f\u00e6r begeat,\n h\u00e6le\u00f0 Healfdena, \u00a0 \u00a0 \u00a0 \u00a0 Hn\u00e6f Scyldinga,\n- 1070\n- \n in Fresw\u00e6le \u00a0 \u00a0 \u00a0 \u00a0 feallan scolde. \n Ne huru Hildeburh \u00a0 \u00a0 \u00a0 \u00a0 herian \u00feorfte\n Eotena treowe; \u00a0 \u00a0 \u00a0 \u00a0 unsynnum wear\u00f0\n beloren leofum \u00a0 \u00a0 \u00a0 \u00a0 \u00e6t \u00feam lindplegan,\n bearnum ond bro\u00f0rum; \u00a0 \u00a0 \u00a0 \u00a0 hie on gebyrd hruron,\n- 1075\n- \n gare wunde. \u00a0 \u00a0 \u00a0 \u00a0 \u00fe\u00e6t w\u00e6s geomuru ides! \n Nalles holinga \u00a0 \u00a0 \u00a0 \u00a0 Hoces dohtor\n meotodsceaft bemearn, \u00a0 \u00a0 \u00a0 \u00a0 sy\u00fe\u00f0an morgen com,\n \u00f0a heo under swegle \u00a0 \u00a0 \u00a0 \u00a0 geseon meahte\n mor\u00feorbealo maga, \u00a0 \u00a0 \u00a0 \u00a0 \u00fe\u00e6r heo \u00e6r m\u00e6ste heold\n- 1080\n- \n worolde wynne. \u00a0 \u00a0 \u00a0 \u00a0 Wig ealle fornam \n Finnes \u00feegnas \u00a0 \u00a0 \u00a0 \u00a0 nemne feaum anum,\n \u00fe\u00e6t he ne mehte \u00a0 \u00a0 \u00a0 \u00a0 on \u00fe\u00e6m me\u00f0elstede\n wig Hengeste \u00a0 \u00a0 \u00a0 \u00a0 wiht gefeohtan,\n ne \u00fea wealafe \u00a0 \u00a0 \u00a0 \u00a0 wige for\u00feringan\n- 1085\n- \n \u00feeodnes \u00f0egna; \u00a0 \u00a0 \u00a0 \u00a0 ac hig him ge\u00feingo budon, \n \u00fe\u00e6t hie him o\u00f0er flet \u00a0 \u00a0 \u00a0 \u00a0 eal gerymdon,\n healle ond heahsetl, \u00a0 \u00a0 \u00a0 \u00a0 \u00fe\u00e6t hie healfre geweald\n wi\u00f0 Eotena bearn \u00a0 \u00a0 \u00a0 \u00a0 agan moston,\n ond \u00e6t feohgyftum \u00a0 \u00a0 \u00a0 \u00a0 Folcwaldan sunu\n- 1090\n- \n dogra gehwylce \u00a0 \u00a0 \u00a0 \u00a0 Dene weor\u00feode, \n Hengestes heap \u00a0 \u00a0 \u00a0 \u00a0 hringum wenede\n efne swa swi\u00f0e \u00a0 \u00a0 \u00a0 \u00a0 sincgestreonum\n f\u00e6ttan goldes, \u00a0 \u00a0 \u00a0 \u00a0 swa he Fresena cyn\n on beorsele \u00a0 \u00a0 \u00a0 \u00a0 byldan wolde.\n- 1095\n- \n \u00f0a hie getruwedon \u00a0 \u00a0 \u00a0 \u00a0 on twa healfa \n f\u00e6ste frio\u00f0uw\u00e6re. \u00a0 \u00a0 \u00a0 \u00a0 Fin Hengeste\n elne, unflitme \u00a0 \u00a0 \u00a0 \u00a0 a\u00f0um benemde\n \u00fe\u00e6t he \u00fea wealafe \u00a0 \u00a0 \u00a0 \u00a0 weotena dome\n arum heolde, \u00a0 \u00a0 \u00a0 \u00a0 \u00fe\u00e6t \u00f0\u00e6r \u00e6nig mon\n- 1100\n- \n wordum ne worcum \u00a0 \u00a0 \u00a0 \u00a0 w\u00e6re ne br\u00e6ce, \n ne \u00feurh inwitsearo \u00a0 \u00a0 \u00a0 \u00a0 \u00e6fre gem\u00e6nden\n \u00f0eah hie hira beaggyfan \u00a0 \u00a0 \u00a0 \u00a0 banan folgedon\n \u00f0eodenlease, \u00a0 \u00a0 \u00a0 \u00a0 \u00fea him swa ge\u00feearfod w\u00e6s;\n gyf \u00feonne Frysna hwylc \u00a0 \u00a0 \u00a0 \u00a0 frecnan spr\u00e6ce\n- 1105\n- \n \u00f0\u00e6s mor\u00feorhetes \u00a0 \u00a0 \u00a0 \u00a0 myndgiend w\u00e6re, \n \u00feonne hit sweordes ecg \u00a0 \u00a0 \u00a0 \u00a0 se\u00f0an scolde.\n Ad w\u00e6s ge\u00e6fned \u00a0 \u00a0 \u00a0 \u00a0 ond icge gold\n ah\u00e6fen of horde. \u00a0 \u00a0 \u00a0 \u00a0 Herescyldinga\n betst beadorinca \u00a0 \u00a0 \u00a0 \u00a0 w\u00e6s on b\u00e6l gearu.\n- 1110\n- \n \u00e6t \u00fe\u00e6m ade w\u00e6s \u00a0 \u00a0 \u00a0 \u00a0 e\u00fegesyne \n swatfah syrce, \u00a0 \u00a0 \u00a0 \u00a0 swyn ealgylden,\n eofer irenheard, \u00a0 \u00a0 \u00a0 \u00a0 \u00e6\u00feeling manig\n wundum awyrded; \u00a0 \u00a0 \u00a0 \u00a0 sume on w\u00e6le crungon.\n Het \u00f0a Hildeburh \u00a0 \u00a0 \u00a0 \u00a0 \u00e6t Hn\u00e6fes ade\n- 1115\n- \n hire selfre sunu \u00a0 \u00a0 \u00a0 \u00a0 sweolo\u00f0e bef\u00e6stan, \n banfatu b\u00e6rnan \u00a0 \u00a0 \u00a0 \u00a0 ond on b\u00e6l don\n eame on eaxle. \u00a0 \u00a0 \u00a0 \u00a0 Ides gnornode,\n geomrode giddum. \u00a0 \u00a0 \u00a0 \u00a0 Gu\u00f0rinc astah.\n Wand to wolcnum \u00a0 \u00a0 \u00a0 \u00a0 w\u00e6lfyra m\u00e6st,\n- 1120\n- \n hlynode for hlawe; \u00a0 \u00a0 \u00a0 \u00a0 hafelan multon, \n bengeato burston, \u00a0 \u00a0 \u00a0 \u00a0 \u00f0onne blod \u00e6tspranc,\n la\u00f0bite lices. \u00a0 \u00a0 \u00a0 \u00a0 Lig ealle forswealg,\n g\u00e6sta gifrost, \u00a0 \u00a0 \u00a0 \u00a0 \u00feara \u00f0e \u00fe\u00e6r gu\u00f0 fornam\n bega folces; \u00a0 \u00a0 \u00a0 \u00a0 w\u00e6s hira bl\u00e6d scacen.\n- 1125\n- \n Gewiton him \u00f0a wigend \u00a0 \u00a0 \u00a0 \u00a0 wica neosian, \n freondum befeallen, \u00a0 \u00a0 \u00a0 \u00a0 Frysland geseon,\n hamas ond heaburh. \u00a0 \u00a0 \u00a0 \u00a0 Hengest \u00f0a gyt\n w\u00e6lfagne winter \u00a0 \u00a0 \u00a0 \u00a0 wunode mid Finne\n eal unhlitme. \u00a0 \u00a0 \u00a0 \u00a0 Eard gemunde,\n- 1130\n- \n \u00feeah \u00fee he ne meahte \u00a0 \u00a0 \u00a0 \u00a0 on mere drifan \n hringedstefnan; \u00a0 \u00a0 \u00a0 \u00a0 holm storme weol,\n won wi\u00f0 winde, \u00a0 \u00a0 \u00a0 \u00a0 winter y\u00fee beleac\n isgebinde, \u00a0 \u00a0 \u00a0 \u00a0 o\u00fe\u00f0\u00e6t o\u00feer com\n gear in geardas, \u00a0 \u00a0 \u00a0 \u00a0 swa nu gyt de\u00f0,\n- 1135\n- \n \u00fea \u00f0e syngales \u00a0 \u00a0 \u00a0 \u00a0 sele bewitia\u00f0, \n wuldortorhtan weder. \u00a0 \u00a0 \u00a0 \u00a0 \u00f0a w\u00e6s winter scacen,\n f\u00e6ger foldan bearm. \u00a0 \u00a0 \u00a0 \u00a0 Fundode wrecca,\n gist of geardum; \u00a0 \u00a0 \u00a0 \u00a0 he to gyrnwr\u00e6ce\n swi\u00f0or \u00feohte \u00a0 \u00a0 \u00a0 \u00a0 \u00feonne to s\u00e6lade,\n- 1140\n- \n gif he torngemot \u00a0 \u00a0 \u00a0 \u00a0 \u00feurhteon mihte \n \u00fe\u00e6t he Eotena bearn \u00a0 \u00a0 \u00a0 \u00a0 inne gemunde.\n Swa he ne forwyrnde \u00a0 \u00a0 \u00a0 \u00a0 woroldr\u00e6denne,\n \u00feonne him Hunlafing \u00a0 \u00a0 \u00a0 \u00a0 hildeleoman,\n billa selest, \u00a0 \u00a0 \u00a0 \u00a0 on bearm dyde,\n- 1145\n- \n \u00fe\u00e6s w\u00e6ron mid Eotenum \u00a0 \u00a0 \u00a0 \u00a0 ecge cu\u00f0e. \n Swylce ferh\u00f0frecan \u00a0 \u00a0 \u00a0 \u00a0 Fin eft begeat\n sweordbealo sli\u00f0en \u00a0 \u00a0 \u00a0 \u00a0 \u00e6t his selfes ham,\n si\u00fe\u00f0an grimne gripe \u00a0 \u00a0 \u00a0 \u00a0 Gu\u00f0laf ond Oslaf\n \u00e6fter s\u00e6si\u00f0e, \u00a0 \u00a0 \u00a0 \u00a0 sorge, m\u00e6ndon,\n- 1150\n- \n \u00e6twiton weana d\u00e6l; \u00a0 \u00a0 \u00a0 \u00a0 ne meahte w\u00e6fre mod \n forhabban in hre\u00fere. \u00a0 \u00a0 \u00a0 \u00a0 \u00f0a w\u00e6s heal roden\n feonda feorum, \u00a0 \u00a0 \u00a0 \u00a0 swilce Fin sl\u00e6gen,\n cyning on cor\u00fere, \u00a0 \u00a0 \u00a0 \u00a0 ond seo cwen numen.\n Sceotend Scyldinga \u00a0 \u00a0 \u00a0 \u00a0 to scypon feredon\n- 1155\n- \n eal ingesteald \u00a0 \u00a0 \u00a0 \u00a0 eor\u00f0cyninges, \n swylce hie \u00e6t Finnes ham \u00a0 \u00a0 \u00a0 \u00a0 findan meahton\n sigla, searogimma. \u00a0 \u00a0 \u00a0 \u00a0 Hie on s\u00e6lade\n drihtlice wif \u00a0 \u00a0 \u00a0 \u00a0 to Denum feredon,\n l\u00e6ddon to leodum. \u00a0 \u00a0 \u00a0 \u00a0 Leo\u00f0 w\u00e6s asungen,\n- 1160\n- \n gleomannes gyd. \u00a0 \u00a0 \u00a0 \u00a0 Gamen eft astah, \n beorhtode bencsweg; \u00a0 \u00a0 \u00a0 \u00a0 byrelas sealdon\n win of wunderfatum. \u00a0 \u00a0 \u00a0 \u00a0 \u00fea cwom Wealh\u00feeo for\u00f0\n gan under gyldnum beage, \u00a0 \u00a0 \u00a0 \u00a0 \u00fe\u00e6r \u00fea godan twegen\n s\u00e6ton suhtergef\u00e6deran; \u00a0 \u00a0 \u00a0 \u00a0 \u00fea gyt w\u00e6s hiera sib \u00e6tg\u00e6dere,\n- 1165\n- \n \u00e6ghwylc o\u00f0rum trywe. \u00a0 \u00a0 \u00a0 \u00a0 Swylce \u00fe\u00e6r Unfer\u00fe \u00feyle \n \u00e6t fotum s\u00e6t frean Scyldinga; \u00a0 \u00a0 \u00a0 \u00a0 gehwylc hiora his ferh\u00fee treowde,\n \u00fe\u00e6t he h\u00e6fde mod micel, \u00a0 \u00a0 \u00a0 \u00a0 \u00feeah \u00fee he his magum n\u00e6re\n arf\u00e6st \u00e6t ecga gelacum. \u00a0 \u00a0 \u00a0 \u00a0 Spr\u00e6c \u00f0a ides Scyldinga:\n \"Onfoh \u00feissum fulle, \u00a0 \u00a0 \u00a0 \u00a0 freodrihten min,\n- 1170\n- \n sinces brytta! \u00a0 \u00a0 \u00a0 \u00a0 \u00feu on s\u00e6lum wes, \n goldwine gumena, \u00a0 \u00a0 \u00a0 \u00a0 ond to Geatum spr\u00e6c\n mildum wordum, \u00a0 \u00a0 \u00a0 \u00a0 swa sceal man don.\n Beo wi\u00f0 Geatas gl\u00e6d, \u00a0 \u00a0 \u00a0 \u00a0 geofena gemyndig,\n nean ond feorran \u00a0 \u00a0 \u00a0 \u00a0 \u00feu nu hafast.\n- 1175\n- \n Me man s\u00e6gde \u00a0 \u00a0 \u00a0 \u00a0 \u00fe\u00e6t \u00feu \u00f0e for sunu wolde \n hererinc habban. \u00a0 \u00a0 \u00a0 \u00a0 Heorot is gef\u00e6lsod,\n beahsele beorhta; \u00a0 \u00a0 \u00a0 \u00a0 bruc \u00feenden \u00feu mote\n manigra medo, \u00a0 \u00a0 \u00a0 \u00a0 ond \u00feinum magum l\u00e6f\n folc ond rice, \u00a0 \u00a0 \u00a0 \u00a0 \u00feonne \u00f0u for\u00f0 scyle\n- 1180\n- \n metodsceaft seon. \u00a0 \u00a0 \u00a0 \u00a0 Ic minne can \n gl\u00e6dne Hro\u00feulf, \u00a0 \u00a0 \u00a0 \u00a0 \u00fe\u00e6t he \u00fea geogo\u00f0e wile\n arum healdan, \u00a0 \u00a0 \u00a0 \u00a0 gyf \u00feu \u00e6r \u00feonne he,\n wine Scildinga, \u00a0 \u00a0 \u00a0 \u00a0 worold ofl\u00e6test;\n wene ic \u00fe\u00e6t he mid gode \u00a0 \u00a0 \u00a0 \u00a0 gyldan wille\n- 1185\n- \n uncran eaferan, \u00a0 \u00a0 \u00a0 \u00a0 gif he \u00fe\u00e6t eal gemon, \n hw\u00e6t wit to willan \u00a0 \u00a0 \u00a0 \u00a0 ond to wor\u00f0myndum\n umborwesendum \u00e6r \u00a0 \u00a0 \u00a0 \u00a0 arna gefremedon.\"\n Hwearf \u00fea bi bence \u00a0 \u00a0 \u00a0 \u00a0 \u00fe\u00e6r hyre byre w\u00e6ron,\n Hre\u00f0ric ond Hro\u00f0mund, \u00a0 \u00a0 \u00a0 \u00a0 ond h\u00e6le\u00fea bearn,\n- 1190\n- \n giogo\u00f0 \u00e6tg\u00e6dere; \u00a0 \u00a0 \u00a0 \u00a0 \u00fe\u00e6r se goda s\u00e6t, \n Beowulf Geata, \u00a0 \u00a0 \u00a0 \u00a0 be \u00fe\u00e6m gebro\u00f0rum tw\u00e6m.\n Him w\u00e6s ful boren \u00a0 \u00a0 \u00a0 \u00a0 ond freondla\u00feu\n wordum bew\u00e6gned, \u00a0 \u00a0 \u00a0 \u00a0 ond wunden gold\n estum geeawed, \u00a0 \u00a0 \u00a0 \u00a0 earmreade twa,\n- 1195\n- \n hr\u00e6gl ond hringas, \u00a0 \u00a0 \u00a0 \u00a0 healsbeaga m\u00e6st \n \u00feara \u00fee ic on foldan \u00a0 \u00a0 \u00a0 \u00a0 gefr\u00e6gen h\u00e6bbe.\n N\u00e6nigne ic under swegle \u00a0 \u00a0 \u00a0 \u00a0 selran hyrde\n hordma\u00f0\u00f0um h\u00e6le\u00fea, \u00a0 \u00a0 \u00a0 \u00a0 sy\u00fe\u00f0an Hama \u00e6tw\u00e6g\n to \u00fe\u00e6re byrhtan byrig \u00a0 \u00a0 \u00a0 \u00a0 Brosinga mene,\n- 1200\n- \n sigle ond sincf\u00e6t; \u00a0 \u00a0 \u00a0 \u00a0 searoni\u00f0as fleah \n Eormenrices, \u00a0 \u00a0 \u00a0 \u00a0 geceas ecne r\u00e6d.\n \u00feone hring h\u00e6fde \u00a0 \u00a0 \u00a0 \u00a0 Higelac Geata,\n nefa Swertinges, \u00a0 \u00a0 \u00a0 \u00a0 nyhstan si\u00f0e,\n si\u00f0\u00fean he under segne \u00a0 \u00a0 \u00a0 \u00a0 sinc ealgode,\n- 1205\n- \n w\u00e6lreaf werede; \u00a0 \u00a0 \u00a0 \u00a0 hyne wyrd fornam, \n sy\u00fe\u00f0an he for wlenco \u00a0 \u00a0 \u00a0 \u00a0 wean ahsode,\n f\u00e6h\u00f0e to Frysum. \u00a0 \u00a0 \u00a0 \u00a0 He \u00fea fr\u00e6twe w\u00e6g,\n eorclanstanas \u00a0 \u00a0 \u00a0 \u00a0 ofer y\u00f0a ful,\n rice \u00feeoden; \u00a0 \u00a0 \u00a0 \u00a0 he under rande gecranc.\n- 1210\n- \n Gehwearf \u00fea in Francna f\u00e6\u00fem \u00a0 \u00a0 \u00a0 \u00a0 feorh cyninges, \n breostgew\u00e6du \u00a0 \u00a0 \u00a0 \u00a0 ond se beah somod;\n wyrsan wigfrecan \u00a0 \u00a0 \u00a0 \u00a0 w\u00e6l reafedon\n \u00e6fter gu\u00f0sceare, \u00a0 \u00a0 \u00a0 \u00a0 Geata leode,\n hreawic heoldon. \u00a0 \u00a0 \u00a0 \u00a0 Heal swege onfeng.\n- 1215\n- \n Wealh\u00f0eo ma\u00feelode, \u00a0 \u00a0 \u00a0 \u00a0 heo fore \u00fe\u00e6m werede spr\u00e6c: \n \"Bruc \u00f0isses beages, \u00a0 \u00a0 \u00a0 \u00a0 Beowulf leofa,\n hyse, mid h\u00e6le, \u00a0 \u00a0 \u00a0 \u00a0 ond \u00feisses hr\u00e6gles neot,\n \u00feeodgestreona, \u00a0 \u00a0 \u00a0 \u00a0 ond ge\u00feeoh tela,\n cen \u00feec mid cr\u00e6fte \u00a0 \u00a0 \u00a0 \u00a0 ond \u00feyssum cnyhtum wes\n- 1220\n- \n lara li\u00f0e; \u00a0 \u00a0 \u00a0 \u00a0 ic \u00fee \u00fe\u00e6s lean geman. \n Hafast \u00feu gefered \u00a0 \u00a0 \u00a0 \u00a0 \u00fe\u00e6t \u00f0e feor ond neah\n ealne wideferh\u00fe \u00a0 \u00a0 \u00a0 \u00a0 weras ehtiga\u00f0,\n efne swa side \u00a0 \u00a0 \u00a0 \u00a0 swa s\u00e6 bebuge\u00f0,\n windgeard, weallas. \u00a0 \u00a0 \u00a0 \u00a0 Wes \u00feenden \u00feu lifige,\n- 1225\n- \n \u00e6\u00feeling, eadig. \u00a0 \u00a0 \u00a0 \u00a0 Ic \u00fee an tela \n sincgestreona. \u00a0 \u00a0 \u00a0 \u00a0 Beo \u00feu suna minum\n d\u00e6dum gedefe, \u00a0 \u00a0 \u00a0 \u00a0 dreamhealdende.\n Her is \u00e6ghwylc eorl \u00a0 \u00a0 \u00a0 \u00a0 o\u00ferum getrywe,\n modes milde, \u00a0 \u00a0 \u00a0 \u00a0 mandrihtne hold;\n- 1230\n- \n \u00feegnas syndon ge\u00few\u00e6re, \u00a0 \u00a0 \u00a0 \u00a0 \u00feeod ealgearo, \n druncne dryhtguman \u00a0 \u00a0 \u00a0 \u00a0 do\u00f0 swa ic bidde.\"\n Eode \u00fea to setle. \u00a0 \u00a0 \u00a0 \u00a0 \u00fe\u00e6r w\u00e6s symbla cyst;\n druncon win weras. \u00a0 \u00a0 \u00a0 \u00a0 Wyrd ne cu\u00feon,\n geosceaft grimme, \u00a0 \u00a0 \u00a0 \u00a0 swa hit agangen wear\u00f0\n- 1235\n- \n eorla manegum, \u00a0 \u00a0 \u00a0 \u00a0 sy\u00fe\u00f0an \u00e6fen cwom \n ond him Hro\u00fegar gewat \u00a0 \u00a0 \u00a0 \u00a0 to hofe sinum,\n rice to r\u00e6ste. \u00a0 \u00a0 \u00a0 \u00a0 Reced weardode\n unrim eorla, \u00a0 \u00a0 \u00a0 \u00a0 swa hie oft \u00e6r dydon.\n Benc\u00feelu beredon; \u00a0 \u00a0 \u00a0 \u00a0 hit geondbr\u00e6ded wear\u00f0\n- 1240\n- \n beddum ond bolstrum. \u00a0 \u00a0 \u00a0 \u00a0 Beorscealca sum \n fus ond f\u00e6ge \u00a0 \u00a0 \u00a0 \u00a0 fletr\u00e6ste gebeag.\n Setton him to heafdon \u00a0 \u00a0 \u00a0 \u00a0 hilderandas,\n bordwudu beorhtan; \u00a0 \u00a0 \u00a0 \u00a0 \u00fe\u00e6r on bence w\u00e6s\n ofer \u00e6\u00feelinge \u00a0 \u00a0 \u00a0 \u00a0 y\u00fegesene\n- 1245\n- \n hea\u00feosteapa helm, \u00a0 \u00a0 \u00a0 \u00a0 hringed byrne, \n \u00ferecwudu \u00ferymlic. \u00a0 \u00a0 \u00a0 \u00a0 W\u00e6s \u00feeaw hyra\n \u00fe\u00e6t hie oft w\u00e6ron \u00a0 \u00a0 \u00a0 \u00a0 an wig gearwe,\n ge \u00e6t ham ge on herge, \u00a0 \u00a0 \u00a0 \u00a0 ge gehw\u00e6\u00feer \u00feara,\n efne swylce m\u00e6la \u00a0 \u00a0 \u00a0 \u00a0 swylce hira mandryhtne\n- 1250\n- \n \u00feearf ges\u00e6lde; \u00a0 \u00a0 \u00a0 \u00a0 w\u00e6s seo \u00feeod tilu. \n Sigon \u00fea to sl\u00e6pe. \u00a0 \u00a0 \u00a0 \u00a0 Sum sare angeald\n \u00e6fenr\u00e6ste, \u00a0 \u00a0 \u00a0 \u00a0 swa him ful oft gelamp,\n si\u00fe\u00f0an goldsele \u00a0 \u00a0 \u00a0 \u00a0 Grendel warode,\n unriht \u00e6fnde, \u00a0 \u00a0 \u00a0 \u00a0 o\u00fe\u00fe\u00e6t ende becwom,\n- 1255\n- \n swylt \u00e6fter synnum. \u00a0 \u00a0 \u00a0 \u00a0 \u00fe\u00e6t gesyne wear\u00fe, \n widcu\u00fe werum, \u00a0 \u00a0 \u00a0 \u00a0 \u00fe\u00e6tte wrecend \u00fea gyt\n lifde \u00e6fter la\u00feum, \u00a0 \u00a0 \u00a0 \u00a0 lange \u00ferage,\n \u00e6fter gu\u00f0ceare. \u00a0 \u00a0 \u00a0 \u00a0 Grendles modor,\n ides, agl\u00e6cwif, \u00a0 \u00a0 \u00a0 \u00a0 yrm\u00fee gemunde,\n- 1260\n- \n se \u00fee w\u00e6teregesan \u00a0 \u00a0 \u00a0 \u00a0 wunian scolde, \n cealde streamas, \u00a0 \u00a0 \u00a0 \u00a0 si\u00fe\u00f0an Cain wear\u00f0\n to ecgbanan \u00a0 \u00a0 \u00a0 \u00a0 angan bre\u00feer,\n f\u00e6derenm\u00e6ge; \u00a0 \u00a0 \u00a0 \u00a0 he \u00fea fag gewat,\n mor\u00fere gemearcod, \u00a0 \u00a0 \u00a0 \u00a0 mandream fleon,\n- 1265\n- \n westen warode. \u00a0 \u00a0 \u00a0 \u00a0 \u00feanon woc fela \n geosceaftgasta; \u00a0 \u00a0 \u00a0 \u00a0 w\u00e6s \u00fe\u00e6ra Grendel sum,\n heorowearh hetelic, \u00a0 \u00a0 \u00a0 \u00a0 se \u00e6t Heorote fand\n w\u00e6ccendne wer \u00a0 \u00a0 \u00a0 \u00a0 wiges bidan.\n \u00fe\u00e6r him agl\u00e6ca \u00a0 \u00a0 \u00a0 \u00a0 \u00e6tgr\u00e6pe wear\u00f0;\n- 1270\n- \n hw\u00e6\u00fere he gemunde \u00a0 \u00a0 \u00a0 \u00a0 m\u00e6genes strenge, \n gimf\u00e6ste gife \u00a0 \u00a0 \u00a0 \u00a0 \u00f0e him god sealde,\n ond him to anwaldan \u00a0 \u00a0 \u00a0 \u00a0 are gelyfde,\n frofre ond fultum; \u00a0 \u00a0 \u00a0 \u00a0 \u00f0y he \u00feone feond ofercwom,\n gehn\u00e6gde helle gast. \u00a0 \u00a0 \u00a0 \u00a0 \u00fea he hean gewat,\n- 1275\n- \n dreame bed\u00e6led, \u00a0 \u00a0 \u00a0 \u00a0 dea\u00fewic seon, \n mancynnes feond, \u00a0 \u00a0 \u00a0 \u00a0 ond his modor \u00fea gyt,\n gifre ond galgmod, \u00a0 \u00a0 \u00a0 \u00a0 gegan wolde\n sorhfulne si\u00f0, \u00a0 \u00a0 \u00a0 \u00a0 sunu dea\u00f0 wrecan.\n Com \u00fea to Heorote, \u00a0 \u00a0 \u00a0 \u00a0 \u00f0\u00e6r Hringdene\n- 1280\n- \n geond \u00fe\u00e6t s\u00e6ld sw\u00e6fun. \u00a0 \u00a0 \u00a0 \u00a0 \u00fea \u00f0\u00e6r sona wear\u00f0 \n edhwyrft eorlum, \u00a0 \u00a0 \u00a0 \u00a0 si\u00fe\u00f0an inne fealh\n Grendles modor. \u00a0 \u00a0 \u00a0 \u00a0 W\u00e6s se gryre l\u00e6ssa\n efne swa micle \u00a0 \u00a0 \u00a0 \u00a0 swa bi\u00f0 m\u00e6g\u00fea cr\u00e6ft,\n wiggryre wifes, \u00a0 \u00a0 \u00a0 \u00a0 be w\u00e6pnedmen,\n- 1285\n- \n \u00feonne heoru bunden, \u00a0 \u00a0 \u00a0 \u00a0 hamere ge\u00feuren, \n sweord swate fah \u00a0 \u00a0 \u00a0 \u00a0 swin ofer helme\n ecgum dyhttig \u00a0 \u00a0 \u00a0 \u00a0 andweard scire\u00f0.\n \u00fea w\u00e6s on healle \u00a0 \u00a0 \u00a0 \u00a0 heardecg togen\n sweord ofer setlum, \u00a0 \u00a0 \u00a0 \u00a0 sidrand manig\n- 1290\n- \n hafen handa f\u00e6st; \u00a0 \u00a0 \u00a0 \u00a0 helm ne gemunde, \n byrnan side, \u00a0 \u00a0 \u00a0 \u00a0 \u00fea hine se broga angeat.\n Heo w\u00e6s on ofste, \u00a0 \u00a0 \u00a0 \u00a0 wolde ut \u00feanon,\n feore beorgan, \u00a0 \u00a0 \u00a0 \u00a0 \u00fea heo onfunden w\u00e6s.\n Hra\u00f0e heo \u00e6\u00feelinga \u00a0 \u00a0 \u00a0 \u00a0 anne h\u00e6fde\n- 1295\n- \n f\u00e6ste befangen, \u00a0 \u00a0 \u00a0 \u00a0 \u00fea heo to fenne gang. \n Se w\u00e6s Hro\u00fegare \u00a0 \u00a0 \u00a0 \u00a0 h\u00e6le\u00fea leofost\n on gesi\u00f0es had \u00a0 \u00a0 \u00a0 \u00a0 be s\u00e6m tweonum,\n rice randwiga, \u00a0 \u00a0 \u00a0 \u00a0 \u00feone \u00f0e heo on r\u00e6ste abreat,\n bl\u00e6df\u00e6stne beorn. \u00a0 \u00a0 \u00a0 \u00a0 N\u00e6s Beowulf \u00f0\u00e6r,\n- 1300\n- \n ac w\u00e6s o\u00feer in \u00a0 \u00a0 \u00a0 \u00a0 \u00e6r geteohhod \n \u00e6fter ma\u00fe\u00f0umgife \u00a0 \u00a0 \u00a0 \u00a0 m\u00e6rum Geate.\n Hream wear\u00f0 in Heorote; \u00a0 \u00a0 \u00a0 \u00a0 heo under heolfre genam\n cu\u00fee folme; \u00a0 \u00a0 \u00a0 \u00a0 cearu w\u00e6s geniwod,\n geworden in wicun. \u00a0 \u00a0 \u00a0 \u00a0 Ne w\u00e6s \u00fe\u00e6t gewrixle til,\n- 1305\n- \n \u00fe\u00e6t hie on ba healfa \u00a0 \u00a0 \u00a0 \u00a0 bicgan scoldon \n freonda feorum. \u00a0 \u00a0 \u00a0 \u00a0 \u00fea w\u00e6s frod cyning,\n har hilderinc, \u00a0 \u00a0 \u00a0 \u00a0 on hreon mode,\n sy\u00f0\u00fean he aldor\u00feegn \u00a0 \u00a0 \u00a0 \u00a0 unlyfigendne,\n \u00feone deorestan \u00a0 \u00a0 \u00a0 \u00a0 deadne wisse.\n- 1310\n- \n Hra\u00fee w\u00e6s to bure \u00a0 \u00a0 \u00a0 \u00a0 Beowulf fetod, \n sigoreadig secg. \u00a0 \u00a0 \u00a0 \u00a0 Samod \u00e6rd\u00e6ge\n eode eorla sum, \u00a0 \u00a0 \u00a0 \u00a0 \u00e6\u00feele cempa\n self mid gesi\u00f0um \u00a0 \u00a0 \u00a0 \u00a0 \u00fe\u00e6r se snotera bad,\n hw\u00e6\u00feer him alwalda \u00a0 \u00a0 \u00a0 \u00a0 \u00e6fre wille\n- 1315\n- \n \u00e6fter weaspelle \u00a0 \u00a0 \u00a0 \u00a0 wyrpe gefremman. \n Gang \u00f0a \u00e6fter flore \u00a0 \u00a0 \u00a0 \u00a0 fyrdwyr\u00f0e man\n mid his handscale \u00a0 \u00a0 \u00a0 \u00a0 (healwudu dynede),\n \u00fe\u00e6t he \u00feone wisan \u00a0 \u00a0 \u00a0 \u00a0 wordum n\u00e6gde\n frean Ingwina, \u00a0 \u00a0 \u00a0 \u00a0 fr\u00e6gn gif him w\u00e6re\n- 1320\n- \n \u00e6fter neodla\u00f0um \u00a0 \u00a0 \u00a0 \u00a0 niht get\u00e6se. \n Hro\u00f0gar ma\u00feelode, \u00a0 \u00a0 \u00a0 \u00a0 helm Scyldinga:\n \"Ne frin \u00feu \u00e6fter s\u00e6lum! \u00a0 \u00a0 \u00a0 \u00a0 Sorh is geniwod\n Denigea leodum. \u00a0 \u00a0 \u00a0 \u00a0 Dead is \u00e6schere,\n Yrmenlafes \u00a0 \u00a0 \u00a0 \u00a0 yldra bro\u00feor,\n- 1325\n- \n min runwita \u00a0 \u00a0 \u00a0 \u00a0 ond min r\u00e6dbora, \n eaxlgestealla, \u00a0 \u00a0 \u00a0 \u00a0 \u00f0onne we on orlege\n hafelan weredon, \u00a0 \u00a0 \u00a0 \u00a0 \u00feonne hniton fe\u00fean,\n eoferas cnysedan. \u00a0 \u00a0 \u00a0 \u00a0 Swylc scolde eorl wesan,\n \u00e6\u00feeling \u00e6rgod, \u00a0 \u00a0 \u00a0 \u00a0 swylc \u00e6schere w\u00e6s!\n- 1330\n- \n Wear\u00f0 him on Heorote \u00a0 \u00a0 \u00a0 \u00a0 to handbanan \n w\u00e6lg\u00e6st w\u00e6fre; \u00a0 \u00a0 \u00a0 \u00a0 ic ne wat hw\u00e6der\n atol \u00e6se wlanc \u00a0 \u00a0 \u00a0 \u00a0 eftsi\u00f0as teah,\n fylle gef\u00e6gnod. \u00a0 \u00a0 \u00a0 \u00a0 Heo \u00fea f\u00e6h\u00f0e wr\u00e6c\n \u00fee \u00feu gystran niht \u00a0 \u00a0 \u00a0 \u00a0 Grendel cwealdest\n- 1335\n- \n \u00feurh h\u00e6stne had \u00a0 \u00a0 \u00a0 \u00a0 heardum clammum, \n for\u00fean he to lange \u00a0 \u00a0 \u00a0 \u00a0 leode mine\n wanode ond wyrde. \u00a0 \u00a0 \u00a0 \u00a0 He \u00e6t wige gecrang\n ealdres scyldig, \u00a0 \u00a0 \u00a0 \u00a0 ond nu o\u00feer cwom\n mihtig mansca\u00f0a, \u00a0 \u00a0 \u00a0 \u00a0 wolde hyre m\u00e6g wrecan,\n- 1340\n- \n ge feor hafa\u00f0 \u00a0 \u00a0 \u00a0 \u00a0 f\u00e6h\u00f0e gest\u00e6led \n (\u00fe\u00e6s \u00fee \u00feincean m\u00e6g \u00a0 \u00a0 \u00a0 \u00a0 \u00feegne monegum,\n se \u00fee \u00e6fter sincgyfan \u00a0 \u00a0 \u00a0 \u00a0 on sefan greote\u00fe),\n hre\u00feerbealo hearde; \u00a0 \u00a0 \u00a0 \u00a0 nu seo hand lige\u00f0,\n se \u00fee eow welhwylcra \u00a0 \u00a0 \u00a0 \u00a0 wilna dohte.\n- 1345\n- \n Ic \u00fe\u00e6t londbuend, \u00a0 \u00a0 \u00a0 \u00a0 leode mine, \n seler\u00e6dende, \u00a0 \u00a0 \u00a0 \u00a0 secgan hyrde\n \u00fe\u00e6t hie gesawon \u00a0 \u00a0 \u00a0 \u00a0 swylce twegen\n micle mearcstapan \u00a0 \u00a0 \u00a0 \u00a0 moras healdan,\n ellorg\u00e6stas. \u00a0 \u00a0 \u00a0 \u00a0 \u00f0\u00e6ra o\u00f0er w\u00e6s,\n- 1350\n- \n \u00fe\u00e6s \u00fee hie gewislicost \u00a0 \u00a0 \u00a0 \u00a0 gewitan meahton, \n idese onlicn\u00e6s; \u00a0 \u00a0 \u00a0 \u00a0 o\u00f0er earmsceapen\n on weres w\u00e6stmum \u00a0 \u00a0 \u00a0 \u00a0 wr\u00e6clastas tr\u00e6d,\n n\u00e6fne he w\u00e6s mara \u00a0 \u00a0 \u00a0 \u00a0 \u00feonne \u00e6nig man o\u00f0er;\n \u00feone on geardagum \u00a0 \u00a0 \u00a0 \u00a0 Grendel nemdon\n- 1355\n- \n foldbuende. \u00a0 \u00a0 \u00a0 \u00a0 No hie f\u00e6der cunnon, \n hw\u00e6\u00feer him \u00e6nig w\u00e6s \u00a0 \u00a0 \u00a0 \u00a0 \u00e6r acenned\n dyrnra gasta. \u00a0 \u00a0 \u00a0 \u00a0 Hie dygel lond\n warigea\u00f0, wulfhleo\u00feu, \u00a0 \u00a0 \u00a0 \u00a0 windige n\u00e6ssas,\n frecne fengelad, \u00a0 \u00a0 \u00a0 \u00a0 \u00f0\u00e6r fyrgenstream\n- 1360\n- \n under n\u00e6ssa genipu \u00a0 \u00a0 \u00a0 \u00a0 ni\u00feer gewite\u00f0, \n flod under foldan. \u00a0 \u00a0 \u00a0 \u00a0 Nis \u00fe\u00e6t feor heonon\n milgemearces \u00a0 \u00a0 \u00a0 \u00a0 \u00fe\u00e6t se mere stande\u00f0;\n ofer \u00fe\u00e6m hongia\u00f0 \u00a0 \u00a0 \u00a0 \u00a0 hrinde bearwas,\n wudu wyrtum f\u00e6st \u00a0 \u00a0 \u00a0 \u00a0 w\u00e6ter oferhelma\u00f0.\n- 1365\n- \n \u00fe\u00e6r m\u00e6g nihta gehw\u00e6m \u00a0 \u00a0 \u00a0 \u00a0 ni\u00f0wundor seon, \n fyr on flode. \u00a0 \u00a0 \u00a0 \u00a0 No \u00fe\u00e6s frod leofa\u00f0\n gumena bearna, \u00a0 \u00a0 \u00a0 \u00a0 \u00fe\u00e6t \u00feone grund wite;\n \u00f0eah \u00fee h\u00e6\u00f0stapa \u00a0 \u00a0 \u00a0 \u00a0 hundum geswenced,\n heorot hornum trum, \u00a0 \u00a0 \u00a0 \u00a0 holtwudu sece,\n- 1370\n- \n feorran geflymed, \u00a0 \u00a0 \u00a0 \u00a0 \u00e6r he feorh sele\u00f0, \n aldor on ofre, \u00a0 \u00a0 \u00a0 \u00a0 \u00e6r he in wille\n hafelan hydan. \u00a0 \u00a0 \u00a0 \u00a0 Nis \u00fe\u00e6t heoru stow!\n \u00feonon y\u00f0geblond \u00a0 \u00a0 \u00a0 \u00a0 up astige\u00f0\n won to wolcnum, \u00a0 \u00a0 \u00a0 \u00a0 \u00feonne wind styre\u00fe,\n- 1375\n- \n la\u00f0 gewidru, \u00a0 \u00a0 \u00a0 \u00a0 o\u00f0\u00fe\u00e6t lyft drysma\u00fe, \n roderas reota\u00f0. \u00a0 \u00a0 \u00a0 \u00a0 Nu is se r\u00e6d gelang\n eft \u00e6t \u00fee anum. \u00a0 \u00a0 \u00a0 \u00a0 Eard git ne const,\n frecne stowe, \u00a0 \u00a0 \u00a0 \u00a0 \u00f0\u00e6r \u00feu findan miht\n felasinnigne secg; \u00a0 \u00a0 \u00a0 \u00a0 sec gif \u00feu dyrre.\n- 1380\n- \n Ic \u00fee \u00fea f\u00e6h\u00f0e \u00a0 \u00a0 \u00a0 \u00a0 feo leanige, \n ealdgestreonum, \u00a0 \u00a0 \u00a0 \u00a0 swa ic \u00e6r dyde,\n wundnum golde, \u00a0 \u00a0 \u00a0 \u00a0 gyf \u00feu on weg cymest.\"\n Beowulf ma\u00feelode, \u00a0 \u00a0 \u00a0 \u00a0 bearn Ecg\u00feeowes:\n \"Ne sorga, snotor guma; \u00a0 \u00a0 \u00a0 \u00a0 selre bi\u00f0 \u00e6ghw\u00e6m\n- 1385\n- \n \u00fe\u00e6t he his freond wrece, \u00a0 \u00a0 \u00a0 \u00a0 \u00feonne he fela murne. \n Ure \u00e6ghwylc sceal \u00a0 \u00a0 \u00a0 \u00a0 ende gebidan\n worolde lifes; \u00a0 \u00a0 \u00a0 \u00a0 wyrce se \u00fee mote\n domes \u00e6r dea\u00fee; \u00a0 \u00a0 \u00a0 \u00a0 \u00fe\u00e6t bi\u00f0 drihtguman\n unlifgendum \u00a0 \u00a0 \u00a0 \u00a0 \u00e6fter selest.\n- 1390\n- \n Aris, rices weard, \u00a0 \u00a0 \u00a0 \u00a0 uton ra\u00fee feran \n Grendles magan \u00a0 \u00a0 \u00a0 \u00a0 gang sceawigan.\n Ic hit \u00fee gehate, \u00a0 \u00a0 \u00a0 \u00a0 no he on helm losa\u00fe,\n ne on foldan f\u00e6\u00fem, \u00a0 \u00a0 \u00a0 \u00a0 ne on fyrgenholt,\n ne on gyfenes grund, \u00a0 \u00a0 \u00a0 \u00a0 ga \u00fe\u00e6r he wille.\n- 1395\n- \n \u00f0ys dogor \u00feu \u00a0 \u00a0 \u00a0 \u00a0 ge\u00feyld hafa \n weana gehwylces, \u00a0 \u00a0 \u00a0 \u00a0 swa ic \u00fee wene to.\"\n Ahleop \u00f0a se gomela, \u00a0 \u00a0 \u00a0 \u00a0 gode \u00feancode,\n mihtigan drihtne, \u00a0 \u00a0 \u00a0 \u00a0 \u00fe\u00e6s se man gespr\u00e6c.\n \u00fea w\u00e6s Hro\u00f0gare \u00a0 \u00a0 \u00a0 \u00a0 hors geb\u00e6ted,\n- 1400\n- \n wicg wundenfeax. \u00a0 \u00a0 \u00a0 \u00a0 Wisa fengel \n geatolic gende; \u00a0 \u00a0 \u00a0 \u00a0 gumfe\u00fea stop\n lindh\u00e6bbendra. \u00a0 \u00a0 \u00a0 \u00a0 Lastas w\u00e6ron\n \u00e6fter waldswa\u00feum \u00a0 \u00a0 \u00a0 \u00a0 wide gesyne,\n gang ofer grundas, \u00a0 \u00a0 \u00a0 \u00a0 \u00fe\u00e6r heo gegnum for\n- 1405\n- \n ofer myrcan mor, \u00a0 \u00a0 \u00a0 \u00a0 mago\u00feegna b\u00e6r \n \u00feone selestan \u00a0 \u00a0 \u00a0 \u00a0 sawolleasne\n \u00feara \u00fee mid Hro\u00f0gare \u00a0 \u00a0 \u00a0 \u00a0 ham eahtode.\n Ofereode \u00fea \u00a0 \u00a0 \u00a0 \u00a0 \u00e6\u00feelinga bearn\n steap stanhli\u00f0o, \u00a0 \u00a0 \u00a0 \u00a0 stige nearwe,\n- 1410\n- \n enge anpa\u00f0as, \u00a0 \u00a0 \u00a0 \u00a0 uncu\u00f0 gelad, \n neowle n\u00e6ssas, \u00a0 \u00a0 \u00a0 \u00a0 nicorhusa fela.\n He feara sum \u00a0 \u00a0 \u00a0 \u00a0 beforan gengde\n wisra monna \u00a0 \u00a0 \u00a0 \u00a0 wong sceawian,\n o\u00fe\u00fe\u00e6t he f\u00e6ringa \u00a0 \u00a0 \u00a0 \u00a0 fyrgenbeamas\n- 1415\n- \n ofer harne stan \u00a0 \u00a0 \u00a0 \u00a0 hleonian funde, \n wynleasne wudu; \u00a0 \u00a0 \u00a0 \u00a0 w\u00e6ter under stod\n dreorig ond gedrefed. \u00a0 \u00a0 \u00a0 \u00a0 Denum eallum w\u00e6s,\n winum Scyldinga, \u00a0 \u00a0 \u00a0 \u00a0 weorce on mode\n to ge\u00feolianne, \u00a0 \u00a0 \u00a0 \u00a0 \u00f0egne monegum,\n- 1420\n- \n oncy\u00f0 eorla gehw\u00e6m, \u00a0 \u00a0 \u00a0 \u00a0 sy\u00f0\u00fean \u00e6scheres \n on \u00feam holmclife \u00a0 \u00a0 \u00a0 \u00a0 hafelan metton.\n Flod blode weol \u00a0 \u00a0 \u00a0 \u00a0 (folc to s\u00e6gon),\n hatan heolfre. \u00a0 \u00a0 \u00a0 \u00a0 Horn stundum song\n fuslic fyrdleo\u00f0. \u00a0 \u00a0 \u00a0 \u00a0 Fe\u00fea eal ges\u00e6t.\n- 1425\n- \n Gesawon \u00f0a \u00e6fter w\u00e6tere \u00a0 \u00a0 \u00a0 \u00a0 wyrmcynnes fela, \n sellice s\u00e6dracan, \u00a0 \u00a0 \u00a0 \u00a0 sund cunnian,\n swylce on n\u00e6shleo\u00f0um \u00a0 \u00a0 \u00a0 \u00a0 nicras licgean,\n \u00f0a on undernm\u00e6l \u00a0 \u00a0 \u00a0 \u00a0 oft bewitiga\u00f0\n sorhfulne si\u00f0 \u00a0 \u00a0 \u00a0 \u00a0 on seglrade,\n- 1430\n- \n wyrmas ond wildeor; \u00a0 \u00a0 \u00a0 \u00a0 hie on weg hruron, \n bitere ond gebolgne, \u00a0 \u00a0 \u00a0 \u00a0 bearhtm ongeaton,\n gu\u00f0horn galan. \u00a0 \u00a0 \u00a0 \u00a0 Sumne Geata leod\n of flanbogan \u00a0 \u00a0 \u00a0 \u00a0 feores getw\u00e6fde,\n y\u00f0gewinnes, \u00a0 \u00a0 \u00a0 \u00a0 \u00fe\u00e6t him on aldre stod\n- 1435\n- \n herestr\u00e6l hearda; \u00a0 \u00a0 \u00a0 \u00a0 he on holme w\u00e6s \n sundes \u00fee s\u00e6nra, \u00a0 \u00a0 \u00a0 \u00a0 \u00f0e hyne swylt fornam.\n Hr\u00e6\u00fee wear\u00f0 on y\u00f0um \u00a0 \u00a0 \u00a0 \u00a0 mid eoferspreotum\n heorohocyhtum \u00a0 \u00a0 \u00a0 \u00a0 hearde genearwod,\n ni\u00f0a gen\u00e6ged, \u00a0 \u00a0 \u00a0 \u00a0 ond on n\u00e6s togen,\n- 1440\n- \n wundorlic w\u00e6gbora; \u00a0 \u00a0 \u00a0 \u00a0 weras sceawedon \n gryrelicne gist. \u00a0 \u00a0 \u00a0 \u00a0 Gyrede hine Beowulf\n eorlgew\u00e6dum, \u00a0 \u00a0 \u00a0 \u00a0 nalles for ealdre mearn.\n Scolde herebyrne \u00a0 \u00a0 \u00a0 \u00a0 hondum gebroden,\n sid ond searofah, \u00a0 \u00a0 \u00a0 \u00a0 sund cunnian,\n- 1445\n- \n seo \u00f0e bancofan \u00a0 \u00a0 \u00a0 \u00a0 beorgan cu\u00fee, \n \u00fe\u00e6t him hildegrap \u00a0 \u00a0 \u00a0 \u00a0 hre\u00fere ne mihte,\n eorres inwitfeng, \u00a0 \u00a0 \u00a0 \u00a0 aldre gesce\u00fe\u00f0an;\n ac se hwita helm \u00a0 \u00a0 \u00a0 \u00a0 hafelan werede,\n se \u00fee meregrundas \u00a0 \u00a0 \u00a0 \u00a0 mengan scolde,\n- 1450\n- \n secan sundgebland \u00a0 \u00a0 \u00a0 \u00a0 since geweor\u00f0ad, \n befongen freawrasnum, \u00a0 \u00a0 \u00a0 \u00a0 swa hine fyrndagum\n worhte w\u00e6pna smi\u00f0, \u00a0 \u00a0 \u00a0 \u00a0 wundrum teode,\n besette swinlicum, \u00a0 \u00a0 \u00a0 \u00a0 \u00fe\u00e6t hine sy\u00f0\u00fean no\n brond ne beadomecas \u00a0 \u00a0 \u00a0 \u00a0 bitan ne meahton.\n- 1455\n- \n N\u00e6s \u00fe\u00e6t \u00feonne m\u00e6tost \u00a0 \u00a0 \u00a0 \u00a0 m\u00e6genfultuma \n \u00fe\u00e6t him on \u00f0earfe lah \u00a0 \u00a0 \u00a0 \u00a0 \u00f0yle Hro\u00f0gares;\n w\u00e6s \u00fe\u00e6m h\u00e6ftmece \u00a0 \u00a0 \u00a0 \u00a0 Hrunting nama.\n \u00fe\u00e6t w\u00e6s an foran \u00a0 \u00a0 \u00a0 \u00a0 ealdgestreona;\n ecg w\u00e6s iren, \u00a0 \u00a0 \u00a0 \u00a0 atertanum fah,\n- 1460\n- \n ahyrded hea\u00feoswate; \u00a0 \u00a0 \u00a0 \u00a0 n\u00e6fre hit \u00e6t hilde ne swac \n manna \u00e6ngum \u00a0 \u00a0 \u00a0 \u00a0 \u00feara \u00fee hit mid mundum bewand,\n se \u00f0e gryresi\u00f0as \u00a0 \u00a0 \u00a0 \u00a0 gegan dorste,\n folcstede fara; \u00a0 \u00a0 \u00a0 \u00a0 n\u00e6s \u00fe\u00e6t forma si\u00f0\n \u00fe\u00e6t hit ellenweorc \u00a0 \u00a0 \u00a0 \u00a0 \u00e6fnan scolde.\n- 1465\n- \n Huru ne gemunde \u00a0 \u00a0 \u00a0 \u00a0 mago Ecglafes, \n eafo\u00fees cr\u00e6ftig, \u00a0 \u00a0 \u00a0 \u00a0 \u00fe\u00e6t he \u00e6r gespr\u00e6c\n wine druncen, \u00a0 \u00a0 \u00a0 \u00a0 \u00fea he \u00fe\u00e6s w\u00e6pnes onlah\n selran sweordfrecan. \u00a0 \u00a0 \u00a0 \u00a0 Selfa ne dorste\n under y\u00f0a gewin \u00a0 \u00a0 \u00a0 \u00a0 aldre gene\u00fean,\n- 1470\n- \n drihtscype dreogan; \u00a0 \u00a0 \u00a0 \u00a0 \u00fe\u00e6r he dome forleas, \n ellenm\u00e6r\u00f0um. \u00a0 \u00a0 \u00a0 \u00a0 Ne w\u00e6s \u00fe\u00e6m o\u00f0rum swa,\n sy\u00f0\u00fean he hine to gu\u00f0e \u00a0 \u00a0 \u00a0 \u00a0 gegyred h\u00e6fde.\n Beowulf ma\u00f0elode, \u00a0 \u00a0 \u00a0 \u00a0 bearn Ecg\u00feeowes:\n \"Ge\u00feenc nu, se m\u00e6ra \u00a0 \u00a0 \u00a0 \u00a0 maga Healfdenes,\n- 1475\n- \n snottra fengel, \u00a0 \u00a0 \u00a0 \u00a0 nu ic eom si\u00f0es fus, \n goldwine gumena, \u00a0 \u00a0 \u00a0 \u00a0 hw\u00e6t wit geo spr\u00e6con,\n gif ic \u00e6t \u00feearfe \u00a0 \u00a0 \u00a0 \u00a0 \u00feinre scolde\n aldre linnan, \u00a0 \u00a0 \u00a0 \u00a0 \u00fe\u00e6t \u00f0u me a w\u00e6re\n for\u00f0gewitenum \u00a0 \u00a0 \u00a0 \u00a0 on f\u00e6der st\u00e6le.\n- 1480\n- \n Wes \u00feu mundbora \u00a0 \u00a0 \u00a0 \u00a0 minum mago\u00feegnum, \n hondgesellum, \u00a0 \u00a0 \u00a0 \u00a0 gif mec hild nime;\n swylce \u00feu \u00f0a madmas \u00a0 \u00a0 \u00a0 \u00a0 \u00fee \u00feu me sealdest,\n Hro\u00f0gar leofa, \u00a0 \u00a0 \u00a0 \u00a0 Higelace onsend.\n M\u00e6g \u00feonne on \u00fe\u00e6m golde ongitan \u00a0 \u00a0 \u00a0 \u00a0 Geata dryhten,\n- 1485\n- \n geseon sunu Hr\u00e6dles, \u00a0 \u00a0 \u00a0 \u00a0 \u00feonne he on \u00fe\u00e6t sinc stara\u00f0, \n \u00fe\u00e6t ic gumcystum \u00a0 \u00a0 \u00a0 \u00a0 godne funde\n beaga bryttan, \u00a0 \u00a0 \u00a0 \u00a0 breac \u00feonne moste.\n Ond \u00feu Unfer\u00f0 l\u00e6t \u00a0 \u00a0 \u00a0 \u00a0 ealde lafe,\n wr\u00e6tlic w\u00e6gsweord, \u00a0 \u00a0 \u00a0 \u00a0 widcu\u00f0ne man\n- 1490\n- \n heardecg habban; \u00a0 \u00a0 \u00a0 \u00a0 ic me mid Hruntinge \n dom gewyrce, \u00a0 \u00a0 \u00a0 \u00a0 o\u00fe\u00f0e mec dea\u00f0 nime\u00f0.\"\n \u00e6fter \u00fe\u00e6m wordum \u00a0 \u00a0 \u00a0 \u00a0 Wedergeata leod\n efste mid elne, \u00a0 \u00a0 \u00a0 \u00a0 nalas ondsware\n bidan wolde; \u00a0 \u00a0 \u00a0 \u00a0 brimwylm onfeng\n- 1495\n- \n hilderince. \u00a0 \u00a0 \u00a0 \u00a0 \u00f0a w\u00e6s hwil d\u00e6ges \n \u00e6r he \u00feone grundwong \u00a0 \u00a0 \u00a0 \u00a0 ongytan mehte.\n Sona \u00fe\u00e6t onfunde \u00a0 \u00a0 \u00a0 \u00a0 se \u00f0e floda begong\n heorogifre beheold \u00a0 \u00a0 \u00a0 \u00a0 hund missera,\n grim ond gr\u00e6dig, \u00a0 \u00a0 \u00a0 \u00a0 \u00fe\u00e6t \u00fe\u00e6r gumena sum\n- 1500\n- \n \u00e6lwihta eard \u00a0 \u00a0 \u00a0 \u00a0 ufan cunnode. \n Grap \u00fea togeanes, \u00a0 \u00a0 \u00a0 \u00a0 gu\u00f0rinc gefeng\n atolan clommum. \u00a0 \u00a0 \u00a0 \u00a0 No \u00fey \u00e6r in gescod\n halan lice; \u00a0 \u00a0 \u00a0 \u00a0 hring utan ymbbearh,\n \u00fe\u00e6t heo \u00feone fyrdhom \u00a0 \u00a0 \u00a0 \u00a0 \u00f0urhfon ne mihte,\n- 1505\n- \n locene leo\u00f0osyrcan \u00a0 \u00a0 \u00a0 \u00a0 la\u00fean fingrum. \n B\u00e6r \u00fea seo brimwylf, \u00a0 \u00a0 \u00a0 \u00a0 \u00fea heo to botme com,\n hringa \u00feengel \u00a0 \u00a0 \u00a0 \u00a0 to hofe sinum,\n swa he ne mihte, \u00a0 \u00a0 \u00a0 \u00a0 no he \u00fe\u00e6s modig w\u00e6s,\n w\u00e6pna gewealdan, \u00a0 \u00a0 \u00a0 \u00a0 ac hine wundra \u00fe\u00e6s fela\n- 1510\n- \n swencte on sunde, \u00a0 \u00a0 \u00a0 \u00a0 s\u00e6deor monig \n hildetuxum \u00a0 \u00a0 \u00a0 \u00a0 heresyrcan br\u00e6c,\n ehton agl\u00e6can. \u00a0 \u00a0 \u00a0 \u00a0 \u00f0a se eorl ongeat\n \u00fe\u00e6t he in ni\u00f0sele \u00a0 \u00a0 \u00a0 \u00a0 nathwylcum w\u00e6s,\n \u00fe\u00e6r him n\u00e6nig w\u00e6ter \u00a0 \u00a0 \u00a0 \u00a0 wihte ne sce\u00feede,\n- 1515\n- \n ne him for hrofsele \u00a0 \u00a0 \u00a0 \u00a0 hrinan ne mehte \n f\u00e6rgripe flodes; \u00a0 \u00a0 \u00a0 \u00a0 fyrleoht geseah,\n blacne leoman, \u00a0 \u00a0 \u00a0 \u00a0 beorhte scinan.\n Ongeat \u00fea se goda \u00a0 \u00a0 \u00a0 \u00a0 grundwyrgenne,\n merewif mihtig; \u00a0 \u00a0 \u00a0 \u00a0 m\u00e6genr\u00e6s forgeaf\n- 1520\n- \n hildebille, \u00a0 \u00a0 \u00a0 \u00a0 hond sweng ne ofteah, \n \u00fe\u00e6t hire on hafelan \u00a0 \u00a0 \u00a0 \u00a0 hringm\u00e6l agol\n gr\u00e6dig gu\u00f0leo\u00f0. \u00a0 \u00a0 \u00a0 \u00a0 \u00f0a se gist onfand\n \u00fe\u00e6t se beadoleoma \u00a0 \u00a0 \u00a0 \u00a0 bitan nolde,\n aldre sce\u00fe\u00f0an, \u00a0 \u00a0 \u00a0 \u00a0 ac seo ecg geswac\n- 1525\n- \n \u00f0eodne \u00e6t \u00feearfe; \u00a0 \u00a0 \u00a0 \u00a0 \u00f0olode \u00e6r fela \n hondgemota, \u00a0 \u00a0 \u00a0 \u00a0 helm oft gesc\u00e6r,\n f\u00e6ges fyrdhr\u00e6gl; \u00a0 \u00a0 \u00a0 \u00a0 \u00f0a w\u00e6s forma si\u00f0\n deorum madme, \u00a0 \u00a0 \u00a0 \u00a0 \u00fe\u00e6t his dom al\u00e6g.\n Eft w\u00e6s anr\u00e6d, \u00a0 \u00a0 \u00a0 \u00a0 nalas elnes l\u00e6t,\n- 1530\n- \n m\u00e6r\u00f0a gemyndig \u00a0 \u00a0 \u00a0 \u00a0 m\u00e6g Hylaces. \n Wearp \u00f0a wundenm\u00e6l \u00a0 \u00a0 \u00a0 \u00a0 wr\u00e6ttum gebunden\n yrre oretta, \u00a0 \u00a0 \u00a0 \u00a0 \u00fe\u00e6t hit on eor\u00f0an l\u00e6g,\n sti\u00f0 ond stylecg; \u00a0 \u00a0 \u00a0 \u00a0 strenge getruwode,\n mundgripe m\u00e6genes. \u00a0 \u00a0 \u00a0 \u00a0 Swa sceal man don,\n- 1535\n- \n \u00feonne he \u00e6t gu\u00f0e \u00a0 \u00a0 \u00a0 \u00a0 gegan \u00feence\u00f0 \n longsumne lof, \u00a0 \u00a0 \u00a0 \u00a0 na ymb his lif ceara\u00f0.\n Gefeng \u00fea be eaxle \u00a0 \u00a0 \u00a0 \u00a0 (nalas for f\u00e6h\u00f0e mearn)\n Gu\u00f0geata leod \u00a0 \u00a0 \u00a0 \u00a0 Grendles modor;\n br\u00e6gd \u00fea beadwe heard, \u00a0 \u00a0 \u00a0 \u00a0 \u00fea he gebolgen w\u00e6s,\n- 1540\n- \n feorhgeni\u00f0lan, \u00a0 \u00a0 \u00a0 \u00a0 \u00fe\u00e6t heo on flet gebeah. \n Heo him eft hra\u00fee \u00a0 \u00a0 \u00a0 \u00a0 andlean forgeald\n grimman grapum \u00a0 \u00a0 \u00a0 \u00a0 ond him togeanes feng;\n oferwearp \u00fea werigmod \u00a0 \u00a0 \u00a0 \u00a0 wigena strengest,\n fe\u00feecempa, \u00a0 \u00a0 \u00a0 \u00a0 \u00fe\u00e6t he on fylle wear\u00f0.\n- 1545\n- \n Ofs\u00e6t \u00fea \u00feone selegyst \u00a0 \u00a0 \u00a0 \u00a0 ond hyre seax geteah, \n brad ond brunecg, \u00a0 \u00a0 \u00a0 \u00a0 wolde hire bearn wrecan,\n angan eaferan. \u00a0 \u00a0 \u00a0 \u00a0 Him on eaxle l\u00e6g\n breostnet broden; \u00a0 \u00a0 \u00a0 \u00a0 \u00fe\u00e6t gebearh feore,\n wi\u00f0 ord ond wi\u00f0 ecge \u00a0 \u00a0 \u00a0 \u00a0 ingang forstod.\n- 1550\n- \n H\u00e6fde \u00f0a forsi\u00f0od \u00a0 \u00a0 \u00a0 \u00a0 sunu Ecg\u00feeowes \n under gynne grund, \u00a0 \u00a0 \u00a0 \u00a0 Geata cempa,\n nemne him hea\u00f0obyrne \u00a0 \u00a0 \u00a0 \u00a0 helpe gefremede,\n herenet hearde, \u00a0 \u00a0 \u00a0 \u00a0 ond halig god\n geweold wigsigor; \u00a0 \u00a0 \u00a0 \u00a0 witig drihten,\n- 1555\n- \n rodera r\u00e6dend, \u00a0 \u00a0 \u00a0 \u00a0 hit on ryht gesced \n y\u00f0elice, \u00a0 \u00a0 \u00a0 \u00a0 sy\u00fe\u00f0an he eft astod.\n Geseah \u00f0a on searwum \u00a0 \u00a0 \u00a0 \u00a0 sigeeadig bil,\n eald sweord eotenisc, \u00a0 \u00a0 \u00a0 \u00a0 ecgum \u00feyhtig,\n wigena weor\u00f0mynd; \u00a0 \u00a0 \u00a0 \u00a0 \u00fe\u00e6t w\u00e6s w\u00e6pna cyst,\n- 1560\n- \n buton hit w\u00e6s mare \u00a0 \u00a0 \u00a0 \u00a0 \u00f0onne \u00e6nig mon o\u00f0er \n to beadulace \u00a0 \u00a0 \u00a0 \u00a0 \u00e6tberan meahte,\n god ond geatolic, \u00a0 \u00a0 \u00a0 \u00a0 giganta geweorc.\n He gefeng \u00fea fetelhilt, \u00a0 \u00a0 \u00a0 \u00a0 freca Scyldinga\n hreoh ond heorogrim \u00a0 \u00a0 \u00a0 \u00a0 hringm\u00e6l gebr\u00e6gd,\n- 1565\n- \n aldres orwena, \u00a0 \u00a0 \u00a0 \u00a0 yrringa sloh, \n \u00fe\u00e6t hire wi\u00f0 halse \u00a0 \u00a0 \u00a0 \u00a0 heard grapode,\n banhringas br\u00e6c. \u00a0 \u00a0 \u00a0 \u00a0 Bil eal \u00f0urhwod\n f\u00e6gne fl\u00e6schoman; \u00a0 \u00a0 \u00a0 \u00a0 heo on flet gecrong.\n Sweord w\u00e6s swatig, \u00a0 \u00a0 \u00a0 \u00a0 secg weorce gefeh.\n- 1570\n- \n Lixte se leoma, \u00a0 \u00a0 \u00a0 \u00a0 leoht inne stod, \n efne swa of hefene \u00a0 \u00a0 \u00a0 \u00a0 hadre scine\u00f0\n rodores candel. \u00a0 \u00a0 \u00a0 \u00a0 He \u00e6fter recede wlat;\n hwearf \u00fea be wealle, \u00a0 \u00a0 \u00a0 \u00a0 w\u00e6pen hafenade\n heard be hiltum \u00a0 \u00a0 \u00a0 \u00a0 Higelaces \u00f0egn,\n- 1575\n- \n yrre ond anr\u00e6d. \u00a0 \u00a0 \u00a0 \u00a0 N\u00e6s seo ecg fracod \n hilderince, \u00a0 \u00a0 \u00a0 \u00a0 ac he hra\u00fee wolde\n Grendle forgyldan \u00a0 \u00a0 \u00a0 \u00a0 gu\u00f0r\u00e6sa fela\n \u00f0ara \u00fee he geworhte \u00a0 \u00a0 \u00a0 \u00a0 to Westdenum\n oftor micle \u00a0 \u00a0 \u00a0 \u00a0 \u00f0onne on \u00e6nne si\u00f0,\n- 1580\n- \n \u00feonne he Hro\u00f0gares \u00a0 \u00a0 \u00a0 \u00a0 heor\u00f0geneatas \n sloh on sweofote, \u00a0 \u00a0 \u00a0 \u00a0 sl\u00e6pende fr\u00e6t\n folces Denigea \u00a0 \u00a0 \u00a0 \u00a0 fyftyne men\n ond o\u00f0er swylc \u00a0 \u00a0 \u00a0 \u00a0 ut offerede,\n la\u00f0licu lac. \u00a0 \u00a0 \u00a0 \u00a0 He him \u00fe\u00e6s lean forgeald,\n- 1585\n- \n re\u00fee cempa, \u00a0 \u00a0 \u00a0 \u00a0 to \u00f0\u00e6s \u00fee he on r\u00e6ste geseah \n gu\u00f0werigne \u00a0 \u00a0 \u00a0 \u00a0 Grendel licgan\n aldorleasne, \u00a0 \u00a0 \u00a0 \u00a0 swa him \u00e6r gescod\n hild \u00e6t Heorote. \u00a0 \u00a0 \u00a0 \u00a0 Hra wide sprong,\n sy\u00fe\u00f0an he \u00e6fter dea\u00f0e \u00a0 \u00a0 \u00a0 \u00a0 drepe \u00ferowade,\n- 1590\n- \n heorosweng heardne, \u00a0 \u00a0 \u00a0 \u00a0 ond hine \u00fea heafde becearf. \n Sona \u00fe\u00e6t gesawon \u00a0 \u00a0 \u00a0 \u00a0 snottre ceorlas,\n \u00fea \u00f0e mid Hro\u00f0gare \u00a0 \u00a0 \u00a0 \u00a0 on holm wliton,\n \u00fe\u00e6t w\u00e6s y\u00f0geblond \u00a0 \u00a0 \u00a0 \u00a0 eal gemenged,\n brim blode fah. \u00a0 \u00a0 \u00a0 \u00a0 Blondenfeaxe,\n- 1595\n- \n gomele ymb godne, \u00a0 \u00a0 \u00a0 \u00a0 ongeador spr\u00e6con \n \u00fe\u00e6t hig \u00fe\u00e6s \u00e6\u00f0elinges \u00a0 \u00a0 \u00a0 \u00a0 eft ne wendon\n \u00fe\u00e6t he sigehre\u00f0ig \u00a0 \u00a0 \u00a0 \u00a0 secean come\n m\u00e6rne \u00feeoden; \u00a0 \u00a0 \u00a0 \u00a0 \u00fea \u00f0\u00e6s monige gewear\u00f0\n \u00fe\u00e6t hine seo brimwylf \u00a0 \u00a0 \u00a0 \u00a0 abroten h\u00e6fde.\n- 1600\n- \n \u00f0a com non d\u00e6ges. \u00a0 \u00a0 \u00a0 \u00a0 N\u00e6s ofgeafon \n hwate Scyldingas; \u00a0 \u00a0 \u00a0 \u00a0 gewat him ham \u00feonon\n goldwine gumena. \u00a0 \u00a0 \u00a0 \u00a0 Gistas setan\n modes seoce \u00a0 \u00a0 \u00a0 \u00a0 ond on mere staredon,\n wiston ond ne wendon \u00a0 \u00a0 \u00a0 \u00a0 \u00fe\u00e6t hie heora winedrihten\n- 1605\n- \n selfne gesawon. \u00a0 \u00a0 \u00a0 \u00a0 \u00fea \u00fe\u00e6t sweord ongan \n \u00e6fter hea\u00feoswate \u00a0 \u00a0 \u00a0 \u00a0 hildegicelum,\n wigbil wanian. \u00a0 \u00a0 \u00a0 \u00a0 \u00fe\u00e6t w\u00e6s wundra sum,\n \u00fe\u00e6t hit eal gemealt \u00a0 \u00a0 \u00a0 \u00a0 ise gelicost,\n \u00f0onne forstes bend \u00a0 \u00a0 \u00a0 \u00a0 f\u00e6der onl\u00e6te\u00f0,\n- 1610\n- \n onwinde\u00f0 w\u00e6lrapas, \u00a0 \u00a0 \u00a0 \u00a0 se geweald hafa\u00f0 \n s\u00e6la ond m\u00e6la; \u00a0 \u00a0 \u00a0 \u00a0 \u00fe\u00e6t is so\u00f0 metod.\n Ne nom he in \u00fe\u00e6m wicum, \u00a0 \u00a0 \u00a0 \u00a0 Wedergeata leod,\n ma\u00f0m\u00e6hta ma, \u00a0 \u00a0 \u00a0 \u00a0 \u00feeh he \u00fe\u00e6r monige geseah,\n buton \u00feone hafelan \u00a0 \u00a0 \u00a0 \u00a0 ond \u00fea hilt somod\n- 1615\n- \n since fage. \u00a0 \u00a0 \u00a0 \u00a0 Sweord \u00e6r gemealt, \n forbarn brodenm\u00e6l; \u00a0 \u00a0 \u00a0 \u00a0 w\u00e6s \u00fe\u00e6t blod to \u00fe\u00e6s hat,\n \u00e6ttren ellorg\u00e6st \u00a0 \u00a0 \u00a0 \u00a0 se \u00fe\u00e6r inne swealt.\n Sona w\u00e6s on sunde \u00a0 \u00a0 \u00a0 \u00a0 se \u00fee \u00e6r \u00e6t s\u00e6cce gebad\n wighryre wra\u00f0ra, \u00a0 \u00a0 \u00a0 \u00a0 w\u00e6ter up \u00feurhdeaf.\n- 1620\n- \n W\u00e6ron y\u00f0gebland \u00a0 \u00a0 \u00a0 \u00a0 eal gef\u00e6lsod, \n eacne eardas, \u00a0 \u00a0 \u00a0 \u00a0 \u00fea se ellorgast\n oflet lifdagas \u00a0 \u00a0 \u00a0 \u00a0 ond \u00feas l\u00e6nan gesceaft.\n Com \u00fea to lande \u00a0 \u00a0 \u00a0 \u00a0 lidmanna helm\n swi\u00f0mod swymman; \u00a0 \u00a0 \u00a0 \u00a0 s\u00e6lace gefeah,\n- 1625\n- \n m\u00e6genbyr\u00feenne \u00a0 \u00a0 \u00a0 \u00a0 \u00feara \u00fee he him mid h\u00e6fde. \n Eodon him \u00fea togeanes, \u00a0 \u00a0 \u00a0 \u00a0 gode \u00feancodon,\n \u00f0ry\u00f0lic \u00feegna heap, \u00a0 \u00a0 \u00a0 \u00a0 \u00feeodnes gefegon,\n \u00fe\u00e6s \u00fee hi hyne gesundne \u00a0 \u00a0 \u00a0 \u00a0 geseon moston.\n \u00f0a w\u00e6s of \u00fe\u00e6m hroran \u00a0 \u00a0 \u00a0 \u00a0 helm ond byrne\n- 1630\n- \n lungre alysed. \u00a0 \u00a0 \u00a0 \u00a0 Lagu drusade, \n w\u00e6ter under wolcnum, \u00a0 \u00a0 \u00a0 \u00a0 w\u00e6ldreore fag.\n Ferdon for\u00f0 \u00feonon \u00a0 \u00a0 \u00a0 \u00a0 fe\u00feelastum\n ferh\u00feum f\u00e6gne, \u00a0 \u00a0 \u00a0 \u00a0 foldweg m\u00e6ton,\n cu\u00fee str\u00e6te. \u00a0 \u00a0 \u00a0 \u00a0 Cyningbalde men\n- 1635\n- \n from \u00fe\u00e6m holmclife \u00a0 \u00a0 \u00a0 \u00a0 hafelan b\u00e6ron \n earfo\u00f0lice \u00a0 \u00a0 \u00a0 \u00a0 heora \u00e6ghw\u00e6\u00ferum,\n felamodigra; \u00a0 \u00a0 \u00a0 \u00a0 feower scoldon\n on \u00fe\u00e6m w\u00e6lstenge \u00a0 \u00a0 \u00a0 \u00a0 weorcum geferian\n to \u00fe\u00e6m goldsele \u00a0 \u00a0 \u00a0 \u00a0 Grendles heafod,\n- 1640\n- \n o\u00fe\u00f0\u00e6t semninga \u00a0 \u00a0 \u00a0 \u00a0 to sele comon \n frome fyrdhwate \u00a0 \u00a0 \u00a0 \u00a0 feowertyne\n Geata gongan; \u00a0 \u00a0 \u00a0 \u00a0 gumdryhten mid\n modig on gemonge \u00a0 \u00a0 \u00a0 \u00a0 meodowongas tr\u00e6d.\n \u00f0a com in gan \u00a0 \u00a0 \u00a0 \u00a0 ealdor \u00f0egna,\n- 1645\n- \n d\u00e6dcene mon \u00a0 \u00a0 \u00a0 \u00a0 dome gewur\u00fead, \n h\u00e6le hildedeor, \u00a0 \u00a0 \u00a0 \u00a0 Hro\u00f0gar gretan.\n \u00fea w\u00e6s be feaxe \u00a0 \u00a0 \u00a0 \u00a0 on flet boren\n Grendles heafod, \u00a0 \u00a0 \u00a0 \u00a0 \u00fe\u00e6r guman druncon,\n egeslic for eorlum \u00a0 \u00a0 \u00a0 \u00a0 ond \u00fe\u00e6re idese mid,\n- 1650\n- \n wliteseon wr\u00e6tlic; \u00a0 \u00a0 \u00a0 \u00a0 weras on sawon. \n Beowulf ma\u00feelode, \u00a0 \u00a0 \u00a0 \u00a0 bearn Ecg\u00feeowes:\n \"Hw\u00e6t! we \u00fee \u00feas s\u00e6lac, \u00a0 \u00a0 \u00a0 \u00a0 sunu Healfdenes,\n leod Scyldinga, \u00a0 \u00a0 \u00a0 \u00a0 lustum brohton\n tires to tacne, \u00a0 \u00a0 \u00a0 \u00a0 \u00fee \u00feu her to locast.\n- 1655\n- \n Ic \u00fe\u00e6t unsofte \u00a0 \u00a0 \u00a0 \u00a0 ealdre gedigde \n wigge under w\u00e6tere, \u00a0 \u00a0 \u00a0 \u00a0 weorc gene\u00fede\n earfo\u00f0lice; \u00a0 \u00a0 \u00a0 \u00a0 \u00e6trihte w\u00e6s\n gu\u00f0 getw\u00e6fed, \u00a0 \u00a0 \u00a0 \u00a0 nym\u00f0e mec god scylde.\n Ne meahte ic \u00e6t hilde \u00a0 \u00a0 \u00a0 \u00a0 mid Hruntinge\n- 1660\n- \n wiht gewyrcan, \u00a0 \u00a0 \u00a0 \u00a0 \u00feeah \u00fe\u00e6t w\u00e6pen duge; \n ac me geu\u00f0e \u00a0 \u00a0 \u00a0 \u00a0 ylda waldend\n \u00fe\u00e6t ic on wage geseah \u00a0 \u00a0 \u00a0 \u00a0 wlitig hangian\n eald sweord eacen \u00a0 \u00a0 \u00a0 \u00a0 (oftost wisode\n winigea leasum), \u00a0 \u00a0 \u00a0 \u00a0 \u00fe\u00e6t ic \u00f0y w\u00e6pne gebr\u00e6d.\n- 1665\n- \n Ofsloh \u00f0a \u00e6t \u00fe\u00e6re s\u00e6cce, \u00a0 \u00a0 \u00a0 \u00a0 \u00fea me s\u00e6l ageald, \n huses hyrdas. \u00a0 \u00a0 \u00a0 \u00a0 \u00fea \u00fe\u00e6t hildebil\n forbarn brogdenm\u00e6l, \u00a0 \u00a0 \u00a0 \u00a0 swa \u00fe\u00e6t blod gesprang,\n hatost hea\u00feoswata. \u00a0 \u00a0 \u00a0 \u00a0 Ic \u00fe\u00e6t hilt \u00feanan\n feondum \u00e6tferede, \u00a0 \u00a0 \u00a0 \u00a0 fyrend\u00e6da wr\u00e6c,\n- 1670\n- \n dea\u00f0cwealm Denigea, \u00a0 \u00a0 \u00a0 \u00a0 swa hit gedefe w\u00e6s. \n Ic hit \u00fee \u00feonne gehate, \u00a0 \u00a0 \u00a0 \u00a0 \u00fe\u00e6t \u00feu on Heorote most\n sorhleas swefan \u00a0 \u00a0 \u00a0 \u00a0 mid \u00feinra secga gedryht\n ond \u00feegna gehwylc \u00a0 \u00a0 \u00a0 \u00a0 \u00feinra leoda,\n dugu\u00f0e ond iogo\u00fee, \u00a0 \u00a0 \u00a0 \u00a0 \u00fe\u00e6t \u00feu him ondr\u00e6dan ne \u00feearft,\n- 1675\n- \n \u00feeoden Scyldinga, \u00a0 \u00a0 \u00a0 \u00a0 on \u00fea healfe, \n aldorbealu eorlum, \u00a0 \u00a0 \u00a0 \u00a0 swa \u00feu \u00e6r dydest.\"\n \u00f0a w\u00e6s gylden hilt \u00a0 \u00a0 \u00a0 \u00a0 gamelum rince,\n harum hildfruman, \u00a0 \u00a0 \u00a0 \u00a0 on hand gyfen,\n enta \u00e6rgeweorc; \u00a0 \u00a0 \u00a0 \u00a0 hit on \u00e6ht gehwearf\n- 1680\n- \n \u00e6fter deofla hryre \u00a0 \u00a0 \u00a0 \u00a0 Denigea frean, \n wundorsmi\u00fea geweorc, \u00a0 \u00a0 \u00a0 \u00a0 ond \u00fea \u00feas worold ofgeaf\n gromheort guma, \u00a0 \u00a0 \u00a0 \u00a0 godes ondsaca,\n mor\u00f0res scyldig, \u00a0 \u00a0 \u00a0 \u00a0 ond his modor eac,\n on geweald gehwearf \u00a0 \u00a0 \u00a0 \u00a0 woroldcyninga\n- 1685\n- \n \u00f0\u00e6m selestan \u00a0 \u00a0 \u00a0 \u00a0 be s\u00e6m tweonum \n \u00f0ara \u00fee on Scedenigge \u00a0 \u00a0 \u00a0 \u00a0 sceattas d\u00e6lde.\n Hro\u00f0gar ma\u00f0elode, \u00a0 \u00a0 \u00a0 \u00a0 hylt sceawode,\n ealde lafe, \u00a0 \u00a0 \u00a0 \u00a0 on \u00f0\u00e6m w\u00e6s or writen\n fyrngewinnes, \u00a0 \u00a0 \u00a0 \u00a0 sy\u00f0\u00fean flod ofsloh,\n- 1690\n- \n gifen geotende, \u00a0 \u00a0 \u00a0 \u00a0 giganta cyn \n (frecne geferdon); \u00a0 \u00a0 \u00a0 \u00a0 \u00fe\u00e6t w\u00e6s fremde \u00feeod\n ecean dryhtne; \u00a0 \u00a0 \u00a0 \u00a0 him \u00fe\u00e6s endelean\n \u00feurh w\u00e6teres wylm \u00a0 \u00a0 \u00a0 \u00a0 waldend sealde.\n Swa w\u00e6s on \u00f0\u00e6m scennum \u00a0 \u00a0 \u00a0 \u00a0 sciran goldes\n- 1695\n- \n \u00feurh runstafas \u00a0 \u00a0 \u00a0 \u00a0 rihte gemearcod, \n geseted ond ges\u00e6d \u00a0 \u00a0 \u00a0 \u00a0 hwam \u00fe\u00e6t sweord geworht,\n irena cyst, \u00a0 \u00a0 \u00a0 \u00a0 \u00e6rest w\u00e6re,\n wreo\u00feenhilt ond wyrmfah. \u00a0 \u00a0 \u00a0 \u00a0 \u00f0a se wisa spr\u00e6c\n sunu Healfdenes \u00a0 \u00a0 \u00a0 \u00a0 (swigedon ealle):\n- 1700\n- \n \"\u00fe\u00e6t, la, m\u00e6g secgan \u00a0 \u00a0 \u00a0 \u00a0 se \u00fee so\u00f0 ond riht \n freme\u00f0 on folce, \u00a0 \u00a0 \u00a0 \u00a0 feor eal gemon,\n eald \u16dfweard, \u00a0 \u00a0 \u00a0 \u00a0 \u00fe\u00e6t \u00f0es eorl w\u00e6re\n geboren betera! \u00a0 \u00a0 \u00a0 \u00a0 Bl\u00e6d is ar\u00e6red\n geond widwegas, \u00a0 \u00a0 \u00a0 \u00a0 wine min Beowulf,\n- 1705\n- \n \u00f0in ofer \u00feeoda gehwylce. \u00a0 \u00a0 \u00a0 \u00a0 Eal \u00feu hit ge\u00feyldum healdest, \n m\u00e6gen mid modes snyttrum. \u00a0 \u00a0 \u00a0 \u00a0 Ic \u00fee sceal mine gel\u00e6stan\n freode, swa wit fur\u00f0um spr\u00e6con. \u00a0 \u00a0 \u00a0 \u00a0 \u00f0u scealt to frofre weor\u00fean\n eal langtwidig \u00a0 \u00a0 \u00a0 \u00a0 leodum \u00feinum,\n h\u00e6le\u00f0um to helpe. \u00a0 \u00a0 \u00a0 \u00a0 Ne wear\u00f0 Heremod swa\n- 1710\n- \n eaforum Ecgwelan, \u00a0 \u00a0 \u00a0 \u00a0 Arscyldingum; \n ne geweox he him to willan, \u00a0 \u00a0 \u00a0 \u00a0 ac to w\u00e6lfealle\n ond to dea\u00f0cwalum \u00a0 \u00a0 \u00a0 \u00a0 Deniga leodum;\n breat bolgenmod \u00a0 \u00a0 \u00a0 \u00a0 beodgeneatas,\n eaxlgesteallan, \u00a0 \u00a0 \u00a0 \u00a0 o\u00fe\u00fe\u00e6t he ana hwearf,\n- 1715\n- \n m\u00e6re \u00feeoden, \u00a0 \u00a0 \u00a0 \u00a0 mondreamum from. \n \u00f0eah \u00fee hine mihtig god \u00a0 \u00a0 \u00a0 \u00a0 m\u00e6genes wynnum,\n eafe\u00feum stepte, \u00a0 \u00a0 \u00a0 \u00a0 ofer ealle men\n for\u00f0 gefremede, \u00a0 \u00a0 \u00a0 \u00a0 hw\u00e6\u00feere him on ferh\u00fee greow\n breosthord blodreow. \u00a0 \u00a0 \u00a0 \u00a0 Nallas beagas geaf\n- 1720\n- \n Denum \u00e6fter dome; \u00a0 \u00a0 \u00a0 \u00a0 dreamleas gebad \n \u00fe\u00e6t he \u00fe\u00e6s gewinnes \u00a0 \u00a0 \u00a0 \u00a0 weorc \u00ferowade,\n leodbealo longsum. \u00a0 \u00a0 \u00a0 \u00a0 \u00f0u \u00fee l\u00e6r be \u00feon,\n gumcyste ongit; \u00a0 \u00a0 \u00a0 \u00a0 ic \u00feis gid be \u00fee\n awr\u00e6c wintrum frod. \u00a0 \u00a0 \u00a0 \u00a0 Wundor is to secganne\n- 1725\n- \n hu mihtig god \u00a0 \u00a0 \u00a0 \u00a0 manna cynne \n \u00feurh sidne sefan \u00a0 \u00a0 \u00a0 \u00a0 snyttru brytta\u00f0,\n eard ond eorlscipe; \u00a0 \u00a0 \u00a0 \u00a0 he ah ealra geweald.\n Hwilum he on lufan \u00a0 \u00a0 \u00a0 \u00a0 l\u00e6te\u00f0 hworfan\n monnes modge\u00feonc \u00a0 \u00a0 \u00a0 \u00a0 m\u00e6ran cynnes,\n- 1730\n- \n sele\u00f0 him on e\u00fele \u00a0 \u00a0 \u00a0 \u00a0 eor\u00fean wynne \n to healdanne, \u00a0 \u00a0 \u00a0 \u00a0 hleoburh wera,\n gede\u00f0 him swa gewealdene \u00a0 \u00a0 \u00a0 \u00a0 worolde d\u00e6las,\n side rice, \u00a0 \u00a0 \u00a0 \u00a0 \u00fe\u00e6t he his selfa ne m\u00e6g\n for his unsnyttrum \u00a0 \u00a0 \u00a0 \u00a0 ende ge\u00feencean.\n- 1735\n- \n Wuna\u00f0 he on wiste; \u00a0 \u00a0 \u00a0 \u00a0 no hine wiht dwele\u00f0 \n adl ne yldo, \u00a0 \u00a0 \u00a0 \u00a0 ne him inwitsorh\n on sefan sweorce\u00f0, \u00a0 \u00a0 \u00a0 \u00a0 ne gesacu ohw\u00e6r\n ecghete eowe\u00f0, \u00a0 \u00a0 \u00a0 \u00a0 ac him eal worold\n wende\u00f0 on willan \u00a0 \u00a0 \u00a0 \u00a0 (he \u00fe\u00e6t wyrse ne con),\n- 1740\n- \n o\u00f0\u00fe\u00e6t him on innan \u00a0 \u00a0 \u00a0 \u00a0 oferhygda d\u00e6l \n weaxe\u00f0 ond wrida\u00f0. \u00a0 \u00a0 \u00a0 \u00a0 \u00feonne se weard swefe\u00f0,\n sawele hyrde; \u00a0 \u00a0 \u00a0 \u00a0 bi\u00f0 se sl\u00e6p to f\u00e6st,\n bisgum gebunden, \u00a0 \u00a0 \u00a0 \u00a0 bona swi\u00f0e neah,\n se \u00fee of flanbogan \u00a0 \u00a0 \u00a0 \u00a0 fyrenum sceote\u00f0.\n- 1745\n- \n \u00feonne bi\u00f0 on hre\u00fere \u00a0 \u00a0 \u00a0 \u00a0 under helm drepen \n biteran str\u00e6le \u00a0 \u00a0 \u00a0 \u00a0 (him bebeorgan ne con),\n wom wundorbebodum \u00a0 \u00a0 \u00a0 \u00a0 wergan gastes;\n \u00feince\u00f0 him to lytel \u00a0 \u00a0 \u00a0 \u00a0 \u00fe\u00e6t he lange heold,\n gytsa\u00f0 gromhydig, \u00a0 \u00a0 \u00a0 \u00a0 nallas on gylp sele\u00f0\n- 1750\n- \n f\u00e6dde beagas, \u00a0 \u00a0 \u00a0 \u00a0 ond he \u00fea for\u00f0gesceaft \n forgyte\u00f0 ond forgyme\u00f0, \u00a0 \u00a0 \u00a0 \u00a0 \u00fe\u00e6s \u00fee him \u00e6r god sealde,\n wuldres waldend, \u00a0 \u00a0 \u00a0 \u00a0 weor\u00f0mynda d\u00e6l.\n Hit on endest\u00e6f \u00a0 \u00a0 \u00a0 \u00a0 eft gelimpe\u00f0\n \u00fe\u00e6t se lichoma \u00a0 \u00a0 \u00a0 \u00a0 l\u00e6ne gedreose\u00f0,\n- 1755\n- \n f\u00e6ge gefealle\u00f0; \u00a0 \u00a0 \u00a0 \u00a0 feh\u00f0 o\u00feer to, \n se \u00fee unmurnlice \u00a0 \u00a0 \u00a0 \u00a0 madmas d\u00e6le\u00fe,\n eorles \u00e6rgestreon, \u00a0 \u00a0 \u00a0 \u00a0 egesan ne gyme\u00f0.\n Bebeorh \u00fee \u00f0one bealoni\u00f0, \u00a0 \u00a0 \u00a0 \u00a0 Beowulf leofa,\n secg betsta, \u00a0 \u00a0 \u00a0 \u00a0 ond \u00fee \u00fe\u00e6t selre geceos,\n- 1760\n- \n ece r\u00e6das; \u00a0 \u00a0 \u00a0 \u00a0 oferhyda ne gym, \n m\u00e6re cempa. \u00a0 \u00a0 \u00a0 \u00a0 Nu is \u00feines m\u00e6gnes bl\u00e6d\n ane hwile. \u00a0 \u00a0 \u00a0 \u00a0 Eft sona bi\u00f0\n \u00fe\u00e6t \u00feec adl o\u00f0\u00f0e ecg \u00a0 \u00a0 \u00a0 \u00a0 eafo\u00fees getw\u00e6fe\u00f0,\n o\u00f0\u00f0e fyres feng, \u00a0 \u00a0 \u00a0 \u00a0 o\u00f0\u00f0e flodes wylm,\n- 1765\n- \n o\u00f0\u00f0e gripe meces, \u00a0 \u00a0 \u00a0 \u00a0 o\u00f0\u00f0e gares fliht, \n o\u00f0\u00f0e atol yldo; \u00a0 \u00a0 \u00a0 \u00a0 o\u00f0\u00f0e eagena bearhtm\n forsite\u00f0 ond forsworce\u00f0; \u00a0 \u00a0 \u00a0 \u00a0 semninga bi\u00f0\n \u00fe\u00e6t \u00f0ec, dryhtguma, \u00a0 \u00a0 \u00a0 \u00a0 dea\u00f0 oferswy\u00f0e\u00f0.\n Swa ic Hringdena \u00a0 \u00a0 \u00a0 \u00a0 hund missera\n- 1770\n- \n weold under wolcnum \u00a0 \u00a0 \u00a0 \u00a0 ond hig wigge beleac \n manigum m\u00e6g\u00fea \u00a0 \u00a0 \u00a0 \u00a0 geond \u00feysne middangeard,\n \u00e6scum ond ecgum, \u00a0 \u00a0 \u00a0 \u00a0 \u00fe\u00e6t ic me \u00e6nigne\n under swegles begong \u00a0 \u00a0 \u00a0 \u00a0 gesacan ne tealde.\n Hw\u00e6t, me \u00fe\u00e6s on e\u00fele \u00a0 \u00a0 \u00a0 \u00a0 edwenden cwom,\n- 1775\n- \n gyrn \u00e6fter gomene, \u00a0 \u00a0 \u00a0 \u00a0 seo\u00fe\u00f0an Grendel wear\u00f0, \n ealdgewinna, \u00a0 \u00a0 \u00a0 \u00a0 ingenga min;\n ic \u00fe\u00e6re socne \u00a0 \u00a0 \u00a0 \u00a0 singales w\u00e6g\n modceare micle. \u00a0 \u00a0 \u00a0 \u00a0 \u00fe\u00e6s sig metode \u00feanc,\n ecean dryhtne, \u00a0 \u00a0 \u00a0 \u00a0 \u00fe\u00e6s \u00f0e ic on aldre gebad\n- 1780\n- \n \u00fe\u00e6t ic on \u00feone hafelan \u00a0 \u00a0 \u00a0 \u00a0 heorodreorigne \n ofer ealdgewin \u00a0 \u00a0 \u00a0 \u00a0 eagum starige!\n Ga nu to setle, \u00a0 \u00a0 \u00a0 \u00a0 symbelwynne dreoh\n wigge weor\u00fead; \u00a0 \u00a0 \u00a0 \u00a0 unc sceal worn fela\n ma\u00fema gem\u00e6nra, \u00a0 \u00a0 \u00a0 \u00a0 si\u00fe\u00f0an morgen bi\u00f0.\"\n- 1785\n- \n Geat w\u00e6s gl\u00e6dmod, \u00a0 \u00a0 \u00a0 \u00a0 geong sona to \n setles neosan, \u00a0 \u00a0 \u00a0 \u00a0 swa se snottra heht.\n \u00fea w\u00e6s eft swa \u00e6r \u00a0 \u00a0 \u00a0 \u00a0 ellenrofum\n fletsittendum \u00a0 \u00a0 \u00a0 \u00a0 f\u00e6gere gereorded\n niowan stefne. \u00a0 \u00a0 \u00a0 \u00a0 Nihthelm geswearc\n- 1790\n- \n deorc ofer dryhtgumum. \u00a0 \u00a0 \u00a0 \u00a0 Dugu\u00f0 eal aras. \n Wolde blondenfeax \u00a0 \u00a0 \u00a0 \u00a0 beddes neosan,\n gamela Scylding. \u00a0 \u00a0 \u00a0 \u00a0 Geat unigmetes wel,\n rofne randwigan, \u00a0 \u00a0 \u00a0 \u00a0 restan lyste;\n sona him sele\u00feegn \u00a0 \u00a0 \u00a0 \u00a0 si\u00f0es wergum,\n- 1795\n- \n feorrancundum, \u00a0 \u00a0 \u00a0 \u00a0 for\u00f0 wisade, \n se for andrysnum \u00a0 \u00a0 \u00a0 \u00a0 ealle beweotede\n \u00feegnes \u00feearfe, \u00a0 \u00a0 \u00a0 \u00a0 swylce \u00fey dogore\n hea\u00feoli\u00f0ende \u00a0 \u00a0 \u00a0 \u00a0 habban scoldon.\n Reste hine \u00fea rumheort; \u00a0 \u00a0 \u00a0 \u00a0 reced hliuade\n- 1800\n- \n geap ond goldfah; \u00a0 \u00a0 \u00a0 \u00a0 g\u00e6st inne sw\u00e6f \n o\u00fe\u00fe\u00e6t hrefn blaca \u00a0 \u00a0 \u00a0 \u00a0 heofones wynne\n bli\u00f0heort bodode. \u00a0 \u00a0 \u00a0 \u00a0 \u00f0a com beorht scacan\n sca\u00fean onetton,\n w\u00e6ron \u00e6\u00feelingas \u00a0 \u00a0 \u00a0 \u00a0 eft to leodum\n- 1805\n- \n fuse to farenne; \u00a0 \u00a0 \u00a0 \u00a0 wolde feor \u00feanon \n cuma collenferh\u00f0 \u00a0 \u00a0 \u00a0 \u00a0 ceoles neosan.\n Heht \u00fea se hearda \u00a0 \u00a0 \u00a0 \u00a0 Hrunting beran\n sunu Ecglafes, \u00a0 \u00a0 \u00a0 \u00a0 heht his sweord niman,\n leoflic iren; \u00a0 \u00a0 \u00a0 \u00a0 s\u00e6gde him \u00fe\u00e6s leanes \u00feanc,\n- 1810\n- \n cw\u00e6\u00f0, he \u00feone gu\u00f0wine \u00a0 \u00a0 \u00a0 \u00a0 godne tealde, \n wigcr\u00e6ftigne, \u00a0 \u00a0 \u00a0 \u00a0 nales wordum log\n meces ecge; \u00a0 \u00a0 \u00a0 \u00a0 \u00fe\u00e6t w\u00e6s modig secg.\n Ond \u00fea si\u00f0frome, \u00a0 \u00a0 \u00a0 \u00a0 searwum gearwe\n wigend w\u00e6ron; \u00a0 \u00a0 \u00a0 \u00a0 eode weor\u00f0 Denum\n- 1815\n- \n \u00e6\u00feeling to yppan, \u00a0 \u00a0 \u00a0 \u00a0 \u00fe\u00e6r se o\u00feer w\u00e6s, \n h\u00e6le hildedeor \u00a0 \u00a0 \u00a0 \u00a0 Hro\u00f0gar grette.\n Beowulf ma\u00feelode, \u00a0 \u00a0 \u00a0 \u00a0 bearn Ecg\u00feeowes:\n \"Nu we s\u00e6li\u00f0end \u00a0 \u00a0 \u00a0 \u00a0 secgan wylla\u00f0,\n feorran cumene, \u00a0 \u00a0 \u00a0 \u00a0 \u00fe\u00e6t we fundia\u00fe\n- 1820\n- \n Higelac secan. \u00a0 \u00a0 \u00a0 \u00a0 W\u00e6ron her tela \n willum bewenede; \u00a0 \u00a0 \u00a0 \u00a0 \u00feu us wel dohtest.\n Gif ic \u00feonne on eor\u00fean \u00a0 \u00a0 \u00a0 \u00a0 owihte m\u00e6g\n \u00feinre modlufan \u00a0 \u00a0 \u00a0 \u00a0 maran tilian,\n gumena dryhten, \u00a0 \u00a0 \u00a0 \u00a0 \u00f0onne ic gyt dyde,\n- 1825\n- \n gu\u00f0geweorca, \u00a0 \u00a0 \u00a0 \u00a0 ic beo gearo sona. \n Gif ic \u00fe\u00e6t gefricge \u00a0 \u00a0 \u00a0 \u00a0 ofer floda begang,\n \u00fe\u00e6t \u00feec ymbsittend \u00a0 \u00a0 \u00a0 \u00a0 egesan \u00feywa\u00f0,\n swa \u00feec hetende \u00a0 \u00a0 \u00a0 \u00a0 hwilum dydon,\n ic \u00f0e \u00feusenda \u00a0 \u00a0 \u00a0 \u00a0 \u00feegna bringe,\n- 1830\n- \n h\u00e6le\u00fea to helpe. \u00a0 \u00a0 \u00a0 \u00a0 Ic on Higelac wat, \n Geata dryhten, \u00a0 \u00a0 \u00a0 \u00a0 \u00feeah \u00f0e he geong sy,\n folces hyrde, \u00a0 \u00a0 \u00a0 \u00a0 \u00fe\u00e6t he mec fremman wile\n wordum ond worcum, \u00a0 \u00a0 \u00a0 \u00a0 \u00fe\u00e6t ic \u00fee wel herige\n ond \u00fee to geoce \u00a0 \u00a0 \u00a0 \u00a0 garholt bere,\n- 1835\n- \n m\u00e6genes fultum, \u00a0 \u00a0 \u00a0 \u00a0 \u00fe\u00e6r \u00f0e bi\u00f0 manna \u00feearf. \n Gif him \u00feonne Hre\u00feric \u00a0 \u00a0 \u00a0 \u00a0 to hofum Geata\n ge\u00feinge\u00f0, \u00feeodnes bearn, \u00a0 \u00a0 \u00a0 \u00a0 he m\u00e6g \u00fe\u00e6r fela\n freonda findan; \u00a0 \u00a0 \u00a0 \u00a0 feorcy\u00fe\u00f0e beo\u00f0\n selran gesohte \u00a0 \u00a0 \u00a0 \u00a0 \u00fe\u00e6m \u00fee him selfa deah.\"\n- 1840\n- \n Hro\u00f0gar ma\u00feelode \u00a0 \u00a0 \u00a0 \u00a0 him on ondsware: \n \"\u00fee \u00fea wordcwydas \u00a0 \u00a0 \u00a0 \u00a0 wigtig drihten\n on sefan sende; \u00a0 \u00a0 \u00a0 \u00a0 ne hyrde ic snotorlicor\n on swa geongum feore \u00a0 \u00a0 \u00a0 \u00a0 guman \u00feingian.\n \u00feu eart m\u00e6genes strang \u00a0 \u00a0 \u00a0 \u00a0 ond on mode frod,\n- 1845\n- \n wis wordcwida. \u00a0 \u00a0 \u00a0 \u00a0 Wen ic talige, \n gif \u00fe\u00e6t gegange\u00f0, \u00a0 \u00a0 \u00a0 \u00a0 \u00fe\u00e6t \u00f0e gar nyme\u00f0,\n hild heorugrimme, \u00a0 \u00a0 \u00a0 \u00a0 Hre\u00feles eaferan,\n adl o\u00fe\u00f0e iren \u00a0 \u00a0 \u00a0 \u00a0 ealdor \u00f0inne,\n folces hyrde, \u00a0 \u00a0 \u00a0 \u00a0 ond \u00feu \u00fein feorh hafast,\n- 1850\n- \n \u00fe\u00e6t \u00fee S\u00e6geatas \u00a0 \u00a0 \u00a0 \u00a0 selran n\u00e6bben \n to geceosenne \u00a0 \u00a0 \u00a0 \u00a0 cyning \u00e6nigne,\n hordweard h\u00e6le\u00fea, \u00a0 \u00a0 \u00a0 \u00a0 gyf \u00feu healdan wylt\n maga rice. \u00a0 \u00a0 \u00a0 \u00a0 Me \u00fein modsefa\n lica\u00f0 leng swa wel, \u00a0 \u00a0 \u00a0 \u00a0 leofa Beowulf.\n- 1855\n- \n Hafast \u00feu gefered \u00a0 \u00a0 \u00a0 \u00a0 \u00fe\u00e6t \u00feam folcum sceal, \n Geata leodum \u00a0 \u00a0 \u00a0 \u00a0 ond Gardenum,\n sib gem\u00e6ne, \u00a0 \u00a0 \u00a0 \u00a0 ond sacu restan,\n inwitni\u00feas, \u00a0 \u00a0 \u00a0 \u00a0 \u00fee hie \u00e6r drugon,\n wesan, \u00feenden ic wealde \u00a0 \u00a0 \u00a0 \u00a0 widan rices,\n- 1860\n- \n ma\u00femas gem\u00e6ne, \u00a0 \u00a0 \u00a0 \u00a0 manig o\u00feerne \n godum gegretan \u00a0 \u00a0 \u00a0 \u00a0 ofer ganotes b\u00e6\u00f0;\n sceal hringnaca \u00a0 \u00a0 \u00a0 \u00a0 ofer heafu bringan\n lac ond luftacen. \u00a0 \u00a0 \u00a0 \u00a0 Ic \u00fea leode wat\n ge wi\u00f0 feond ge wi\u00f0 freond \u00a0 \u00a0 \u00a0 \u00a0 f\u00e6ste geworhte,\n- 1865\n- \n \u00e6ghw\u00e6s unt\u00e6le \u00a0 \u00a0 \u00a0 \u00a0 ealde wisan.\" \n \u00f0a git him eorla hleo \u00a0 \u00a0 \u00a0 \u00a0 inne gesealde,\n mago Healfdenes, \u00a0 \u00a0 \u00a0 \u00a0 ma\u00femas XII;\n het hine mid \u00fe\u00e6m lacum \u00a0 \u00a0 \u00a0 \u00a0 leode sw\u00e6se\n secean on gesyntum, \u00a0 \u00a0 \u00a0 \u00a0 snude eft cuman.\n- 1870\n- \n Gecyste \u00fea \u00a0 \u00a0 \u00a0 \u00a0 cyning \u00e6\u00feelum god, \n \u00feeoden Scyldinga, \u00a0 \u00a0 \u00a0 \u00a0 \u00f0egn betstan\n ond be healse genam; \u00a0 \u00a0 \u00a0 \u00a0 hruron him tearas,\n blondenfeaxum. \u00a0 \u00a0 \u00a0 \u00a0 Him w\u00e6s bega wen,\n ealdum infrodum, \u00a0 \u00a0 \u00a0 \u00a0 o\u00feres swi\u00f0or,\n- 1875\n- \n \u00fe\u00e6t hie seo\u00f0\u00f0an no \u00a0 \u00a0 \u00a0 \u00a0 geseon moston, \n modige on me\u00fele. \u00a0 \u00a0 \u00a0 \u00a0 W\u00e6s him se man to \u00feon leof\n \u00fe\u00e6t he \u00feone breostwylm \u00a0 \u00a0 \u00a0 \u00a0 forberan ne mehte,\n ac him on hre\u00fere \u00a0 \u00a0 \u00a0 \u00a0 hygebendum f\u00e6st\n \u00e6fter deorum men \u00a0 \u00a0 \u00a0 \u00a0 dyrne langa\u00f0\n- 1880\n- \n beorn wi\u00f0 blode. \u00a0 \u00a0 \u00a0 \u00a0 Him Beowulf \u00feanan, \n gu\u00f0rinc goldwlanc, \u00a0 \u00a0 \u00a0 \u00a0 gr\u00e6smoldan tr\u00e6d\n since hremig; \u00a0 \u00a0 \u00a0 \u00a0 s\u00e6genga bad\n agendfrean, \u00a0 \u00a0 \u00a0 \u00a0 se \u00fee on ancre rad.\n \u00fea w\u00e6s on gange \u00a0 \u00a0 \u00a0 \u00a0 gifu Hro\u00f0gares\n- 1885\n- \n oft ge\u00e6hted; \u00a0 \u00a0 \u00a0 \u00a0 \u00fe\u00e6t w\u00e6s an cyning, \n \u00e6ghw\u00e6s orleahtre, \u00a0 \u00a0 \u00a0 \u00a0 o\u00fe\u00fe\u00e6t hine yldo benam\n m\u00e6genes wynnum, \u00a0 \u00a0 \u00a0 \u00a0 se \u00fee oft manegum scod.\n Cwom \u00fea to flode \u00a0 \u00a0 \u00a0 \u00a0 felamodigra,\n h\u00e6gstealdra heap, \u00a0 \u00a0 \u00a0 \u00a0 hringnet b\u00e6ron,\n- 1890\n- \n locene leo\u00f0osyrcan. \u00a0 \u00a0 \u00a0 \u00a0 Landweard onfand \n eftsi\u00f0 eorla, \u00a0 \u00a0 \u00a0 \u00a0 swa he \u00e6r dyde;\n no he mid hearme \u00a0 \u00a0 \u00a0 \u00a0 of hli\u00f0es nosan\n g\u00e6stas grette, \u00a0 \u00a0 \u00a0 \u00a0 ac him togeanes rad,\n cw\u00e6\u00f0 \u00fe\u00e6t wilcuman \u00a0 \u00a0 \u00a0 \u00a0 Wedera leodum\n- 1895\n- \n sca\u00fean scirhame \u00a0 \u00a0 \u00a0 \u00a0 to scipe foron. \n \u00fea w\u00e6s on sande \u00a0 \u00a0 \u00a0 \u00a0 s\u00e6geap naca\n hladen herew\u00e6dum, \u00a0 \u00a0 \u00a0 \u00a0 hringedstefna,\n mearum ond ma\u00f0mum; \u00a0 \u00a0 \u00a0 \u00a0 m\u00e6st hlifade\n ofer Hro\u00f0gares \u00a0 \u00a0 \u00a0 \u00a0 hordgestreonum.\n- 1900\n- \n He \u00fe\u00e6m batwearde \u00a0 \u00a0 \u00a0 \u00a0 bunden golde \n swurd gesealde, \u00a0 \u00a0 \u00a0 \u00a0 \u00fe\u00e6t he sy\u00f0\u00fean w\u00e6s\n on meodubence \u00a0 \u00a0 \u00a0 \u00a0 ma\u00feme \u00fey weor\u00fera,\n yrfelafe. \u00a0 \u00a0 \u00a0 \u00a0 Gewat him on naca\n drefan deop w\u00e6ter, \u00a0 \u00a0 \u00a0 \u00a0 Dena land ofgeaf.\n- 1905\n- \n \u00fea w\u00e6s be m\u00e6ste \u00a0 \u00a0 \u00a0 \u00a0 merehr\u00e6gla sum, \n segl sale f\u00e6st; \u00a0 \u00a0 \u00a0 \u00a0 sundwudu \u00feunede.\n No \u00fe\u00e6r wegflotan \u00a0 \u00a0 \u00a0 \u00a0 wind ofer y\u00f0um\n si\u00f0es getw\u00e6fde; \u00a0 \u00a0 \u00a0 \u00a0 s\u00e6genga for,\n fleat famigheals \u00a0 \u00a0 \u00a0 \u00a0 for\u00f0 ofer y\u00f0e,\n- 1910\n- \n bundenstefna \u00a0 \u00a0 \u00a0 \u00a0 ofer brimstreamas, \n \u00fe\u00e6t hie Geata clifu \u00a0 \u00a0 \u00a0 \u00a0 ongitan meahton,\n cu\u00fee n\u00e6ssas. \u00a0 \u00a0 \u00a0 \u00a0 Ceol up ge\u00ferang\n lyftgeswenced, \u00a0 \u00a0 \u00a0 \u00a0 on lande stod.\n Hra\u00fee w\u00e6s \u00e6t holme \u00a0 \u00a0 \u00a0 \u00a0 hy\u00f0weard geara,\n- 1915\n- \n se \u00fee \u00e6r lange tid \u00a0 \u00a0 \u00a0 \u00a0 leofra manna \n fus \u00e6t faro\u00f0e \u00a0 \u00a0 \u00a0 \u00a0 feor wlatode;\n s\u00e6lde to sande \u00a0 \u00a0 \u00a0 \u00a0 sidf\u00e6\u00feme scip,\n oncerbendum f\u00e6st, \u00a0 \u00a0 \u00a0 \u00a0 \u00fey l\u00e6s hym y\u00fea \u00f0rym\n wudu wynsuman \u00a0 \u00a0 \u00a0 \u00a0 forwrecan meahte.\n- 1920\n- \n Het \u00fea up beran \u00a0 \u00a0 \u00a0 \u00a0 \u00e6\u00feelinga gestreon, \n fr\u00e6twe ond f\u00e6tgold; \u00a0 \u00a0 \u00a0 \u00a0 n\u00e6s him feor \u00feanon\n to gesecanne \u00a0 \u00a0 \u00a0 \u00a0 sinces bryttan,\n Higelac Hre\u00feling, \u00a0 \u00a0 \u00a0 \u00a0 \u00fe\u00e6r \u00e6t ham wuna\u00f0\n selfa mid gesi\u00f0um \u00a0 \u00a0 \u00a0 \u00a0 s\u00e6wealle neah.\n- 1925\n- \n Bold w\u00e6s betlic, \u00a0 \u00a0 \u00a0 \u00a0 bregorof cyning, \n heah in healle, \u00a0 \u00a0 \u00a0 \u00a0 Hygd swi\u00f0e geong,\n wis, wel\u00feungen, \u00a0 \u00a0 \u00a0 \u00a0 \u00feeah \u00f0e wintra lyt\n under burhlocan \u00a0 \u00a0 \u00a0 \u00a0 gebiden h\u00e6bbe,\n H\u00e6re\u00fees dohtor; \u00a0 \u00a0 \u00a0 \u00a0 n\u00e6s hio hnah swa \u00feeah,\n- 1930\n- \n ne to gnea\u00f0 gifa \u00a0 \u00a0 \u00a0 \u00a0 Geata leodum, \n ma\u00femgestreona. \u00a0 \u00a0 \u00a0 \u00a0 Mod \u00fery\u00f0o w\u00e6g,\n fremu folces cwen, \u00a0 \u00a0 \u00a0 \u00a0 firen ondrysne.\n N\u00e6nig \u00fe\u00e6t dorste \u00a0 \u00a0 \u00a0 \u00a0 deor gene\u00fean\n sw\u00e6sra gesi\u00f0a, \u00a0 \u00a0 \u00a0 \u00a0 nefne sinfrea,\n- 1935\n- \n \u00fe\u00e6t hire an d\u00e6ges \u00a0 \u00a0 \u00a0 \u00a0 eagum starede, \n ac him w\u00e6lbende \u00a0 \u00a0 \u00a0 \u00a0 weotode tealde\n handgewri\u00feene; \u00a0 \u00a0 \u00a0 \u00a0 hra\u00fee seo\u00fe\u00f0an w\u00e6s\n \u00e6fter mundgripe \u00a0 \u00a0 \u00a0 \u00a0 mece ge\u00feinged,\n \u00fe\u00e6t hit sceadenm\u00e6l \u00a0 \u00a0 \u00a0 \u00a0 scyran moste,\n- 1940\n- \n cwealmbealu cy\u00f0an. \u00a0 \u00a0 \u00a0 \u00a0 Ne bi\u00f0 swylc cwenlic \u00feeaw \n idese to efnanne, \u00a0 \u00a0 \u00a0 \u00a0 \u00feeah \u00f0e hio \u00e6nlicu sy,\n \u00fe\u00e6tte freo\u00f0uwebbe \u00a0 \u00a0 \u00a0 \u00a0 feores ons\u00e6ce\n \u00e6fter ligetorne \u00a0 \u00a0 \u00a0 \u00a0 leofne mannan.\n Huru \u00fe\u00e6t onhohsnode \u00a0 \u00a0 \u00a0 \u00a0 Hemminges m\u00e6g;\n- 1945\n- \n ealodrincende \u00a0 \u00a0 \u00a0 \u00a0 o\u00f0er s\u00e6dan, \n \u00fe\u00e6t hio leodbealewa \u00a0 \u00a0 \u00a0 \u00a0 l\u00e6s gefremede,\n inwitni\u00f0a, \u00a0 \u00a0 \u00a0 \u00a0 sy\u00f0\u00f0an \u00e6rest wear\u00f0\n gyfen goldhroden \u00a0 \u00a0 \u00a0 \u00a0 geongum cempan,\n \u00e6\u00f0elum diore, \u00a0 \u00a0 \u00a0 \u00a0 sy\u00f0\u00f0an hio Offan flet\n- 1950\n- \n ofer fealone flod \u00a0 \u00a0 \u00a0 \u00a0 be f\u00e6der lare \n si\u00f0e gesohte; \u00a0 \u00a0 \u00a0 \u00a0 \u00f0\u00e6r hio sy\u00f0\u00f0an well\n in gumstole, \u00a0 \u00a0 \u00a0 \u00a0 gode, m\u00e6re,\n lifgesceafta \u00a0 \u00a0 \u00a0 \u00a0 lifigende breac,\n hiold heahlufan \u00a0 \u00a0 \u00a0 \u00a0 wi\u00f0 h\u00e6le\u00fea brego,\n- 1955\n- \n ealles moncynnes \u00a0 \u00a0 \u00a0 \u00a0 mine gefr\u00e6ge \n \u00feone selestan \u00a0 \u00a0 \u00a0 \u00a0 bi s\u00e6m tweonum,\n eormencynnes. \u00a0 \u00a0 \u00a0 \u00a0 For\u00f0am Offa w\u00e6s\n geofum ond gu\u00f0um, \u00a0 \u00a0 \u00a0 \u00a0 garcene man,\n wide geweor\u00f0od, \u00a0 \u00a0 \u00a0 \u00a0 wisdome heold\n- 1960\n- \n e\u00f0el sinne; \u00a0 \u00a0 \u00a0 \u00a0 \u00feonon Eomer woc \n h\u00e6le\u00f0um to helpe, \u00a0 \u00a0 \u00a0 \u00a0 Hemminges m\u00e6g,\n nefa Garmundes, \u00a0 \u00a0 \u00a0 \u00a0 ni\u00f0a cr\u00e6ftig.\n Gewat him \u00f0a se hearda \u00a0 \u00a0 \u00a0 \u00a0 mid his hondscole\n sylf \u00e6fter sande \u00a0 \u00a0 \u00a0 \u00a0 s\u00e6wong tredan,\n- 1965\n- \n wide waro\u00f0as. \u00a0 \u00a0 \u00a0 \u00a0 Woruldcandel scan, \n sigel su\u00f0an fus. \u00a0 \u00a0 \u00a0 \u00a0 Hi si\u00f0 drugon,\n elne geeodon, \u00a0 \u00a0 \u00a0 \u00a0 to \u00f0\u00e6s \u00f0e eorla hleo,\n bonan Ongen\u00feeoes \u00a0 \u00a0 \u00a0 \u00a0 burgum in innan,\n geongne gu\u00f0cyning \u00a0 \u00a0 \u00a0 \u00a0 godne gefrunon\n- 1970\n- \n hringas d\u00e6lan. \u00a0 \u00a0 \u00a0 \u00a0 Higelace w\u00e6s \n si\u00f0 Beowulfes \u00a0 \u00a0 \u00a0 \u00a0 snude gecy\u00f0ed,\n \u00fe\u00e6t \u00f0\u00e6r on wor\u00f0ig \u00a0 \u00a0 \u00a0 \u00a0 wigendra hleo,\n lindgestealla, \u00a0 \u00a0 \u00a0 \u00a0 lifigende cwom,\n hea\u00f0olaces hal \u00a0 \u00a0 \u00a0 \u00a0 to hofe gongan.\n- 1975\n- \n Hra\u00f0e w\u00e6s gerymed, \u00a0 \u00a0 \u00a0 \u00a0 swa se rica bebead, \n fe\u00f0egestum \u00a0 \u00a0 \u00a0 \u00a0 flet innanweard.\n Ges\u00e6t \u00fea wi\u00f0 sylfne \u00a0 \u00a0 \u00a0 \u00a0 se \u00f0a s\u00e6cce gen\u00e6s,\n m\u00e6g wi\u00f0 m\u00e6ge, \u00a0 \u00a0 \u00a0 \u00a0 sy\u00f0\u00f0an mandryhten\n \u00feurh hleo\u00f0orcwyde \u00a0 \u00a0 \u00a0 \u00a0 holdne gegrette,\n- 1980\n- \n meaglum wordum. \u00a0 \u00a0 \u00a0 \u00a0 Meoduscencum hwearf \n geond \u00fe\u00e6t healreced \u00a0 \u00a0 \u00a0 \u00a0 H\u00e6re\u00f0es dohtor,\n lufode \u00f0a leode, \u00a0 \u00a0 \u00a0 \u00a0 li\u00f0w\u00e6ge b\u00e6r\n h\u00e6le\u00f0um to handa. \u00a0 \u00a0 \u00a0 \u00a0 Higelac ongan\n sinne geseldan \u00a0 \u00a0 \u00a0 \u00a0 in sele \u00feam hean\n- 1985\n- \n f\u00e6gre fricgcean \u00a0 \u00a0 \u00a0 \u00a0 (hyne fyrwet br\u00e6c, \n hwylce S\u00e6geata \u00a0 \u00a0 \u00a0 \u00a0 si\u00f0as w\u00e6ron):\n \"Hu lomp eow on lade, \u00a0 \u00a0 \u00a0 \u00a0 leofa Biowulf,\n \u00fea \u00f0u f\u00e6ringa \u00a0 \u00a0 \u00a0 \u00a0 feorr gehogodest\n s\u00e6cce secean \u00a0 \u00a0 \u00a0 \u00a0 ofer sealt w\u00e6ter,\n- 1990\n- \n hilde to Hiorote? \u00a0 \u00a0 \u00a0 \u00a0 Ac \u00f0u Hro\u00f0gare \n widcu\u00f0ne wean \u00a0 \u00a0 \u00a0 \u00a0 wihte gebettest,\n m\u00e6rum \u00f0eodne? \u00a0 \u00a0 \u00a0 \u00a0 Ic \u00f0\u00e6s modceare\n sorhwylmum sea\u00f0, \u00a0 \u00a0 \u00a0 \u00a0 si\u00f0e ne truwode\n leofes mannes; \u00a0 \u00a0 \u00a0 \u00a0 ic \u00f0e lange b\u00e6d\n- 1995\n- \n \u00fe\u00e6t \u00f0u \u00feone w\u00e6lg\u00e6st \u00a0 \u00a0 \u00a0 \u00a0 wihte ne grette, \n lete Su\u00f0dene \u00a0 \u00a0 \u00a0 \u00a0 sylfe geweor\u00f0an\n gu\u00f0e wi\u00f0 Grendel. \u00a0 \u00a0 \u00a0 \u00a0 Gode ic \u00feanc secge\n \u00fe\u00e6s \u00f0e ic \u00f0e gesundne \u00a0 \u00a0 \u00a0 \u00a0 geseon moste.\"\n Biowulf ma\u00f0elode, \u00a0 \u00a0 \u00a0 \u00a0 bearn Ecg\u00f0ioes:\n- 2000\n- \n \"\u00fe\u00e6t is undyrne, \u00a0 \u00a0 \u00a0 \u00a0 dryhten Higelac, \n micel gemeting, \u00a0 \u00a0 \u00a0 \u00a0 monegum fira,\n hwylc orleghwil \u00a0 \u00a0 \u00a0 \u00a0 uncer Grendles\n wear\u00f0 on \u00f0am wange, \u00a0 \u00a0 \u00a0 \u00a0 \u00fe\u00e6r he worna fela\n Sigescyldingum \u00a0 \u00a0 \u00a0 \u00a0 sorge gefremede,\n- 2005\n- \n yrm\u00f0e to aldre. \u00a0 \u00a0 \u00a0 \u00a0 Ic \u00f0\u00e6t eall gewr\u00e6c, \n swa begylpan ne \u00feearf \u00a0 \u00a0 \u00a0 \u00a0 Grendeles maga\n \u00e6nig ofer eor\u00f0an \u00a0 \u00a0 \u00a0 \u00a0 uhthlem \u00feone,\n se \u00f0e lengest leofa\u00f0 \u00a0 \u00a0 \u00a0 \u00a0 la\u00f0an cynnes,\n facne bifongen. \u00a0 \u00a0 \u00a0 \u00a0 Ic \u00f0\u00e6r fur\u00f0um cwom\n- 2010\n- \n to \u00f0am hringsele \u00a0 \u00a0 \u00a0 \u00a0 Hro\u00f0gar gretan; \n sona me se m\u00e6ra \u00a0 \u00a0 \u00a0 \u00a0 mago Healfdenes,\n sy\u00f0\u00f0an he modsefan \u00a0 \u00a0 \u00a0 \u00a0 minne cu\u00f0e,\n wi\u00f0 his sylfes sunu \u00a0 \u00a0 \u00a0 \u00a0 setl get\u00e6hte.\n Weorod w\u00e6s on wynne; \u00a0 \u00a0 \u00a0 \u00a0 ne seah ic widan feorh\n- 2015\n- \n under heofones hwealf \u00a0 \u00a0 \u00a0 \u00a0 healsittendra \n medudream maran. \u00a0 \u00a0 \u00a0 \u00a0 Hwilum m\u00e6ru cwen,\n fri\u00f0usibb folca, \u00a0 \u00a0 \u00a0 \u00a0 flet eall geondhwearf,\n b\u00e6dde byre geonge; \u00a0 \u00a0 \u00a0 \u00a0 oft hio beahwri\u00f0an\n secge sealde, \u00a0 \u00a0 \u00a0 \u00a0 \u00e6r hie to setle geong.\n- 2020\n- \n Hwilum for dugu\u00f0e \u00a0 \u00a0 \u00a0 \u00a0 dohtor Hro\u00f0gares \n eorlum on ende \u00a0 \u00a0 \u00a0 \u00a0 ealuw\u00e6ge b\u00e6r;\n \u00fea ic Freaware \u00a0 \u00a0 \u00a0 \u00a0 fletsittende\n nemnan hyrde, \u00a0 \u00a0 \u00a0 \u00a0 \u00fe\u00e6r hio n\u00e6gled sinc\n h\u00e6le\u00f0um sealde. \u00a0 \u00a0 \u00a0 \u00a0 Sio gehaten is,\n- 2025\n- \n geong, goldhroden, \u00a0 \u00a0 \u00a0 \u00a0 gladum suna Frodan; \n hafa\u00f0 \u00fe\u00e6s geworden \u00a0 \u00a0 \u00a0 \u00a0 wine Scyldinga,\n rices hyrde, \u00a0 \u00a0 \u00a0 \u00a0 ond \u00fe\u00e6t r\u00e6d tala\u00f0,\n \u00fe\u00e6t he mid \u00f0y wife \u00a0 \u00a0 \u00a0 \u00a0 w\u00e6lf\u00e6h\u00f0a d\u00e6l,\n s\u00e6cca gesette. \u00a0 \u00a0 \u00a0 \u00a0 Oft seldan hw\u00e6r\n- 2030\n- \n \u00e6fter leodhryre \u00a0 \u00a0 \u00a0 \u00a0 lytle hwile \n bongar buge\u00f0, \u00a0 \u00a0 \u00a0 \u00a0 \u00feeah seo bryd duge!\n M\u00e6g \u00fe\u00e6s \u00feonne of\u00feyncan \u00a0 \u00a0 \u00a0 \u00a0 \u00f0eodne Hea\u00f0obeardna\n ond \u00feegna gehwam \u00a0 \u00a0 \u00a0 \u00a0 \u00feara leoda,\n \u00feonne he mid f\u00e6mnan \u00a0 \u00a0 \u00a0 \u00a0 on flett g\u00e6\u00f0,\n- 2035\n- \n dryhtbearn Dena, \u00a0 \u00a0 \u00a0 \u00a0 dugu\u00f0a biwenede; \n on him gladia\u00f0 \u00a0 \u00a0 \u00a0 \u00a0 gomelra lafe,\n heard ond hringm\u00e6l \u00a0 \u00a0 \u00a0 \u00a0 Hea\u00f0abeardna gestreon\n \u00feenden hie \u00f0am w\u00e6pnum \u00a0 \u00a0 \u00a0 \u00a0 wealdan moston,\n o\u00f0\u00f0\u00e6t hie forl\u00e6ddan \u00a0 \u00a0 \u00a0 \u00a0 to \u00f0am lindplegan\n- 2040\n- \n sw\u00e6se gesi\u00f0as \u00a0 \u00a0 \u00a0 \u00a0 ond hyra sylfra feorh. \n \u00feonne cwi\u00f0 \u00e6t beore \u00a0 \u00a0 \u00a0 \u00a0 se \u00f0e beah gesyh\u00f0,\n eald \u00e6scwiga, \u00a0 \u00a0 \u00a0 \u00a0 se \u00f0e eall geman,\n garcwealm gumena \u00a0 \u00a0 \u00a0 \u00a0 (him bi\u00f0 grim sefa),\n onginne\u00f0 geomormod \u00a0 \u00a0 \u00a0 \u00a0 geongum cempan\n- 2045\n- \n \u00feurh hre\u00f0ra gehygd \u00a0 \u00a0 \u00a0 \u00a0 higes cunnian, \n wigbealu weccean, \u00a0 \u00a0 \u00a0 \u00a0 ond \u00fe\u00e6t word acwy\u00f0:\n 'Meaht \u00f0u, min wine, \u00a0 \u00a0 \u00a0 \u00a0 mece gecnawan\n \u00feone \u00fein f\u00e6der \u00a0 \u00a0 \u00a0 \u00a0 to gefeohte b\u00e6r\n under heregriman \u00a0 \u00a0 \u00a0 \u00a0 hindeman si\u00f0e,\n- 2050\n- \n dyre iren, \u00a0 \u00a0 \u00a0 \u00a0 \u00fe\u00e6r hyne Dene slogon, \n weoldon w\u00e6lstowe, \u00a0 \u00a0 \u00a0 \u00a0 sy\u00f0\u00f0an Wi\u00f0ergyld l\u00e6g,\n \u00e6fter h\u00e6le\u00fea hryre, \u00a0 \u00a0 \u00a0 \u00a0 hwate Scyldungas?\n Nu her \u00feara banena \u00a0 \u00a0 \u00a0 \u00a0 byre nathwylces\n fr\u00e6twum hremig \u00a0 \u00a0 \u00a0 \u00a0 on flet g\u00e6\u00f0,\n- 2055\n- \n mor\u00f0res gylpe\u00f0, \u00a0 \u00a0 \u00a0 \u00a0 ond \u00feone ma\u00f0\u00feum byre\u00f0, \n \u00feone \u00fee \u00f0u mid rihte \u00a0 \u00a0 \u00a0 \u00a0 r\u00e6dan sceoldest.'\n Mana\u00f0 swa ond myndga\u00f0 \u00a0 \u00a0 \u00a0 \u00a0 m\u00e6la gehwylce\n sarum wordum, \u00a0 \u00a0 \u00a0 \u00a0 o\u00f0\u00f0\u00e6t s\u00e6l cyme\u00f0\n \u00fe\u00e6t se f\u00e6mnan \u00feegn \u00a0 \u00a0 \u00a0 \u00a0 fore f\u00e6der d\u00e6dum\n- 2060\n- \n \u00e6fter billes bite \u00a0 \u00a0 \u00a0 \u00a0 blodfag swefe\u00f0, \n ealdres scyldig; \u00a0 \u00a0 \u00a0 \u00a0 him se o\u00f0er \u00feonan\n losa\u00f0 lifigende, \u00a0 \u00a0 \u00a0 \u00a0 con him land geare.\n \u00feonne bio\u00f0 abrocene \u00a0 \u00a0 \u00a0 \u00a0 on ba healfe\n a\u00f0sweord eorla; \u00a0 \u00a0 \u00a0 \u00a0 sy\u00f0\u00f0an Ingelde\n- 2065\n- \n wealla\u00f0 w\u00e6lni\u00f0as, \u00a0 \u00a0 \u00a0 \u00a0 ond him wiflufan \n \u00e6fter cearw\u00e6lmum \u00a0 \u00a0 \u00a0 \u00a0 colran weor\u00f0a\u00f0.\n \u00fey ic Hea\u00f0obeardna \u00a0 \u00a0 \u00a0 \u00a0 hyldo ne telge,\n dryhtsibbe d\u00e6l \u00a0 \u00a0 \u00a0 \u00a0 Denum unf\u00e6cne,\n freondscipe f\u00e6stne. \u00a0 \u00a0 \u00a0 \u00a0 Ic sceal for\u00f0 sprecan\n- 2070\n- \n gen ymbe Grendel, \u00a0 \u00a0 \u00a0 \u00a0 \u00fe\u00e6t \u00f0u geare cunne, \n sinces brytta, \u00a0 \u00a0 \u00a0 \u00a0 to hwan sy\u00f0\u00f0an wear\u00f0\n hondr\u00e6s h\u00e6le\u00f0a. \u00a0 \u00a0 \u00a0 \u00a0 Sy\u00f0\u00f0an heofones gim\n glad ofer grundas, \u00a0 \u00a0 \u00a0 \u00a0 g\u00e6st yrre cwom,\n eatol, \u00e6fengrom, \u00a0 \u00a0 \u00a0 \u00a0 user neosan,\n- 2075\n- \n \u00f0\u00e6r we gesunde \u00a0 \u00a0 \u00a0 \u00a0 s\u00e6l weardodon. \n \u00fe\u00e6r w\u00e6s Hondscio \u00a0 \u00a0 \u00a0 \u00a0 hild ons\u00e6ge,\n feorhbealu f\u00e6gum; \u00a0 \u00a0 \u00a0 \u00a0 he fyrmest l\u00e6g,\n gyrded cempa; \u00a0 \u00a0 \u00a0 \u00a0 him Grendel wear\u00f0,\n m\u00e6rum magu\u00feegne \u00a0 \u00a0 \u00a0 \u00a0 to mu\u00f0bonan,\n- 2080\n- \n leofes mannes \u00a0 \u00a0 \u00a0 \u00a0 lic eall forswealg. \n No \u00f0y \u00e6r ut \u00f0a gen \u00a0 \u00a0 \u00a0 \u00a0 idelhende\n bona blodigto\u00f0, \u00a0 \u00a0 \u00a0 \u00a0 bealewa gemyndig,\n of \u00f0am goldsele \u00a0 \u00a0 \u00a0 \u00a0 gongan wolde,\n ac he m\u00e6gnes rof \u00a0 \u00a0 \u00a0 \u00a0 min costode,\n- 2085\n- \n grapode gearofolm. \u00a0 \u00a0 \u00a0 \u00a0 Glof hangode \n sid ond syllic, \u00a0 \u00a0 \u00a0 \u00a0 searobendum f\u00e6st;\n sio w\u00e6s or\u00f0oncum \u00a0 \u00a0 \u00a0 \u00a0 eall gegyrwed\n deofles cr\u00e6ftum \u00a0 \u00a0 \u00a0 \u00a0 ond dracan fellum.\n He mec \u00fe\u00e6r on innan \u00a0 \u00a0 \u00a0 \u00a0 unsynnigne,\n- 2090\n- \n dior d\u00e6dfruma, \u00a0 \u00a0 \u00a0 \u00a0 gedon wolde \n manigra sumne; \u00a0 \u00a0 \u00a0 \u00a0 hyt ne mihte swa,\n sy\u00f0\u00f0an ic on yrre \u00a0 \u00a0 \u00a0 \u00a0 uppriht astod.\n To lang ys to reccenne \u00a0 \u00a0 \u00a0 \u00a0 hu ic \u00f0am leodscea\u00f0an\n yfla gehwylces \u00a0 \u00a0 \u00a0 \u00a0 ondlean forgeald;\n- 2095\n- \n \u00fe\u00e6r ic, \u00feeoden min, \u00a0 \u00a0 \u00a0 \u00a0 \u00feine leode \n weor\u00f0ode weorcum. \u00a0 \u00a0 \u00a0 \u00a0 He on weg losade,\n lytle hwile \u00a0 \u00a0 \u00a0 \u00a0 lifwynna breac;\n hw\u00e6\u00fere him sio swi\u00f0re \u00a0 \u00a0 \u00a0 \u00a0 swa\u00f0e weardade\n hand on Hiorte, \u00a0 \u00a0 \u00a0 \u00a0 ond he hean \u00f0onan\n- 2100\n- \n modes geomor \u00a0 \u00a0 \u00a0 \u00a0 meregrund gefeoll. \n Me \u00feone w\u00e6lr\u00e6s \u00a0 \u00a0 \u00a0 \u00a0 wine Scildunga\n f\u00e6ttan golde \u00a0 \u00a0 \u00a0 \u00a0 fela leanode,\n manegum ma\u00f0mum, \u00a0 \u00a0 \u00a0 \u00a0 sy\u00f0\u00f0an mergen com\n ond we to symble \u00a0 \u00a0 \u00a0 \u00a0 geseten h\u00e6fdon.\n- 2105\n- \n \u00fe\u00e6r w\u00e6s gidd ond gleo. \u00a0 \u00a0 \u00a0 \u00a0 Gomela Scilding, \n felafricgende, \u00a0 \u00a0 \u00a0 \u00a0 feorran rehte;\n hwilum hildedeor \u00a0 \u00a0 \u00a0 \u00a0 hearpan wynne,\n gomenwudu grette, \u00a0 \u00a0 \u00a0 \u00a0 hwilum gyd awr\u00e6c\n so\u00f0 ond sarlic, \u00a0 \u00a0 \u00a0 \u00a0 hwilum syllic spell\n- 2110\n- \n rehte \u00e6fter rihte \u00a0 \u00a0 \u00a0 \u00a0 rumheort cyning. \n Hwilum eft ongan, \u00a0 \u00a0 \u00a0 \u00a0 eldo gebunden,\n gomel gu\u00f0wiga \u00a0 \u00a0 \u00a0 \u00a0 giogu\u00f0e cwi\u00f0an,\n hildestrengo; \u00a0 \u00a0 \u00a0 \u00a0 hre\u00f0er inne weoll,\n \u00feonne he wintrum frod \u00a0 \u00a0 \u00a0 \u00a0 worn gemunde.\n- 2115\n- \n Swa we \u00fe\u00e6r inne \u00a0 \u00a0 \u00a0 \u00a0 ondlangne d\u00e6g \n niode naman, \u00a0 \u00a0 \u00a0 \u00a0 o\u00f0\u00f0\u00e6t niht becwom\n o\u00f0er to yldum. \u00a0 \u00a0 \u00a0 \u00a0 \u00fea w\u00e6s eft hra\u00f0e\n gearo gyrnwr\u00e6ce \u00a0 \u00a0 \u00a0 \u00a0 Grendeles modor,\n si\u00f0ode sorhfull; \u00a0 \u00a0 \u00a0 \u00a0 sunu dea\u00f0 fornam,\n- 2120\n- \n wighete Wedra. \u00a0 \u00a0 \u00a0 \u00a0 Wif unhyre \n hyre bearn gewr\u00e6c, \u00a0 \u00a0 \u00a0 \u00a0 beorn acwealde\n ellenlice; \u00a0 \u00a0 \u00a0 \u00a0 \u00fe\u00e6r w\u00e6s \u00e6schere,\n frodan fyrnwitan, \u00a0 \u00a0 \u00a0 \u00a0 feorh u\u00f0genge.\n No\u00f0er hy hine ne moston, \u00a0 \u00a0 \u00a0 \u00a0 sy\u00f0\u00f0an mergen cwom,\n- 2125\n- \n dea\u00f0werigne, \u00a0 \u00a0 \u00a0 \u00a0 Denia leode, \n bronde forb\u00e6rnan, \u00a0 \u00a0 \u00a0 \u00a0 ne on b\u00e6l hladan\n leofne mannan; \u00a0 \u00a0 \u00a0 \u00a0 hio \u00fe\u00e6t lic \u00e6tb\u00e6r\n feondes f\u00e6\u00f0mum \u00a0 \u00a0 \u00a0 \u00a0 under firgenstream.\n \u00fe\u00e6t w\u00e6s Hro\u00f0gare \u00a0 \u00a0 \u00a0 \u00a0 hreowa tornost\n- 2130\n- \n \u00feara \u00fee leodfruman \u00a0 \u00a0 \u00a0 \u00a0 lange begeate. \n \u00fea se \u00f0eoden mec \u00a0 \u00a0 \u00a0 \u00a0 \u00f0ine life\n healsode hreohmod, \u00a0 \u00a0 \u00a0 \u00a0 \u00fe\u00e6t ic on holma ge\u00fering\n eorlscipe efnde, \u00a0 \u00a0 \u00a0 \u00a0 ealdre gene\u00f0de,\n m\u00e6r\u00f0o fremede; \u00a0 \u00a0 \u00a0 \u00a0 he me mede gehet.\n- 2135\n- \n Ic \u00f0a \u00f0\u00e6s w\u00e6lmes, \u00a0 \u00a0 \u00a0 \u00a0 \u00fee is wide cu\u00f0, \n grimne gryrelicne \u00a0 \u00a0 \u00a0 \u00a0 grundhyrde fond;\n \u00fe\u00e6r unc hwile w\u00e6s \u00a0 \u00a0 \u00a0 \u00a0 hand gem\u00e6ne,\n holm heolfre weoll, \u00a0 \u00a0 \u00a0 \u00a0 ond ic heafde becearf\n in \u00f0am gu\u00f0sele \u00a0 \u00a0 \u00a0 \u00a0 Grendeles modor\n- 2140\n- \n eacnum ecgum, \u00a0 \u00a0 \u00a0 \u00a0 unsofte \u00feonan \n feorh o\u00f0ferede. \u00a0 \u00a0 \u00a0 \u00a0 N\u00e6s ic f\u00e6ge \u00fea gyt,\n ac me eorla hleo \u00a0 \u00a0 \u00a0 \u00a0 eft gesealde\n ma\u00f0ma menigeo, \u00a0 \u00a0 \u00a0 \u00a0 maga Healfdenes.\n Swa se \u00f0eodkyning \u00a0 \u00a0 \u00a0 \u00a0 \u00feeawum lyfde.\n- 2145\n- \n Nealles ic \u00f0am leanum \u00a0 \u00a0 \u00a0 \u00a0 forloren h\u00e6fde, \n m\u00e6gnes mede, \u00a0 \u00a0 \u00a0 \u00a0 ac he me ma\u00f0mas geaf,\n sunu Healfdenes, \u00a0 \u00a0 \u00a0 \u00a0 on minne sylfes dom;\n \u00f0a ic \u00f0e, beorncyning, \u00a0 \u00a0 \u00a0 \u00a0 bringan wylle,\n estum geywan. \u00a0 \u00a0 \u00a0 \u00a0 Gen is eall \u00e6t \u00f0e\n- 2150\n- \n lissa gelong; \u00a0 \u00a0 \u00a0 \u00a0 ic lyt hafo \n heafodmaga \u00a0 \u00a0 \u00a0 \u00a0 nefne, Hygelac, \u00f0ec.\"\n Het \u00f0a in beran \u00a0 \u00a0 \u00a0 \u00a0 eaforheafodsegn,\n hea\u00f0osteapne helm, \u00a0 \u00a0 \u00a0 \u00a0 hare byrnan,\n gu\u00f0sweord geatolic, \u00a0 \u00a0 \u00a0 \u00a0 gyd \u00e6fter wr\u00e6c:\n- 2155\n- \n \"Me \u00f0is hildesceorp \u00a0 \u00a0 \u00a0 \u00a0 Hro\u00f0gar sealde, \n snotra fengel, \u00a0 \u00a0 \u00a0 \u00a0 sume worde het\n \u00fe\u00e6t ic his \u00e6rest \u00f0e \u00a0 \u00a0 \u00a0 \u00a0 est ges\u00e6gde;\n cw\u00e6\u00f0 \u00fe\u00e6t hyt h\u00e6fde \u00a0 \u00a0 \u00a0 \u00a0 Hiorogar cyning,\n leod Scyldunga \u00a0 \u00a0 \u00a0 \u00a0 lange hwile;\n- 2160\n- \n no \u00f0y \u00e6r suna sinum \u00a0 \u00a0 \u00a0 \u00a0 syllan wolde, \n hwatum Heorowearde, \u00a0 \u00a0 \u00a0 \u00a0 \u00feeah he him hold w\u00e6re,\n breostgew\u00e6du. \u00a0 \u00a0 \u00a0 \u00a0 Bruc ealles well!\"\n Hyrde ic \u00fe\u00e6t \u00feam fr\u00e6twum \u00a0 \u00a0 \u00a0 \u00a0 feower mearas\n lungre, gelice, \u00a0 \u00a0 \u00a0 \u00a0 last weardode,\n- 2165\n- \n \u00e6ppelfealuwe; \u00a0 \u00a0 \u00a0 \u00a0 he him est geteah \n meara ond ma\u00f0ma. \u00a0 \u00a0 \u00a0 \u00a0 Swa sceal m\u00e6g don,\n nealles inwitnet \u00a0 \u00a0 \u00a0 \u00a0 o\u00f0rum bregdon\n dyrnum cr\u00e6fte, \u00a0 \u00a0 \u00a0 \u00a0 dea\u00f0 renian\n hondgesteallan. \u00a0 \u00a0 \u00a0 \u00a0 Hygelace w\u00e6s,\n- 2170\n- \n ni\u00f0a heardum, \u00a0 \u00a0 \u00a0 \u00a0 nefa swy\u00f0e hold, \n ond gehw\u00e6\u00f0er o\u00f0rum \u00a0 \u00a0 \u00a0 \u00a0 hro\u00fera gemyndig.\n Hyrde ic \u00fe\u00e6t he \u00f0one healsbeah \u00a0 \u00a0 \u00a0 \u00a0 Hygde gesealde,\n wr\u00e6tlicne wundurma\u00f0\u00f0um, \u00a0 \u00a0 \u00a0 \u00a0 \u00f0one \u00fee him Wealh\u00f0eo geaf,\n \u00f0eodnes dohtor, \u00a0 \u00a0 \u00a0 \u00a0 \u00ferio wicg somod\n- 2175\n- \n swancor ond sadolbeorht; \u00a0 \u00a0 \u00a0 \u00a0 hyre sy\u00f0\u00f0an w\u00e6s \n \u00e6fter beah\u00f0ege \u00a0 \u00a0 \u00a0 \u00a0 breost geweor\u00f0od.\n Swa bealdode \u00a0 \u00a0 \u00a0 \u00a0 bearn Ecg\u00f0eowes,\n guma gu\u00f0um cu\u00f0, \u00a0 \u00a0 \u00a0 \u00a0 godum d\u00e6dum,\n dreah \u00e6fter dome, \u00a0 \u00a0 \u00a0 \u00a0 nealles druncne slog\n- 2180\n- \n heor\u00f0geneatas; \u00a0 \u00a0 \u00a0 \u00a0 n\u00e6s him hreoh sefa, \n ac he mancynnes \u00a0 \u00a0 \u00a0 \u00a0 m\u00e6ste cr\u00e6fte\n ginf\u00e6stan gife, \u00a0 \u00a0 \u00a0 \u00a0 \u00fee him god sealde,\n heold hildedeor. \u00a0 \u00a0 \u00a0 \u00a0 Hean w\u00e6s lange,\n swa hyne Geata bearn \u00a0 \u00a0 \u00a0 \u00a0 godne ne tealdon,\n- 2185\n- \n ne hyne on medobence \u00a0 \u00a0 \u00a0 \u00a0 micles wyr\u00f0ne \n drihten Wedera \u00a0 \u00a0 \u00a0 \u00a0 gedon wolde;\n swy\u00f0e wendon \u00a0 \u00a0 \u00a0 \u00a0 \u00fe\u00e6t he sleac w\u00e6re,\n \u00e6\u00f0eling unfrom. \u00a0 \u00a0 \u00a0 \u00a0 Edwenden cwom\n tireadigum menn \u00a0 \u00a0 \u00a0 \u00a0 torna gehwylces.\n- 2190\n- \n Het \u00f0a eorla hleo \u00a0 \u00a0 \u00a0 \u00a0 in gefetian, \n hea\u00f0orof cyning, \u00a0 \u00a0 \u00a0 \u00a0 Hre\u00f0les lafe\n golde gegyrede; \u00a0 \u00a0 \u00a0 \u00a0 n\u00e6s mid Geatum \u00f0a\n sincma\u00f0\u00feum selra \u00a0 \u00a0 \u00a0 \u00a0 on sweordes had;\n \u00fe\u00e6t he on Biowulfes \u00a0 \u00a0 \u00a0 \u00a0 bearm alegde\n- 2195\n- \n ond him gesealde \u00a0 \u00a0 \u00a0 \u00a0 seofan \u00feusendo, \n bold ond bregostol. \u00a0 \u00a0 \u00a0 \u00a0 Him w\u00e6s bam samod\n on \u00f0am leodscipe \u00a0 \u00a0 \u00a0 \u00a0 lond gecynde,\n eard, e\u00f0elriht, \u00a0 \u00a0 \u00a0 \u00a0 o\u00f0rum swi\u00f0or\n side rice \u00a0 \u00a0 \u00a0 \u00a0 \u00feam \u00f0\u00e6r selra w\u00e6s.\n- 2200\n- \n Eft \u00fe\u00e6t geiode \u00a0 \u00a0 \u00a0 \u00a0 ufaran dogrum \n hildehl\u00e6mmum, \u00a0 \u00a0 \u00a0 \u00a0 sy\u00f0\u00f0an Hygelac l\u00e6g\n ond Heardrede \u00a0 \u00a0 \u00a0 \u00a0 hildemeceas\n under bordhreo\u00f0an \u00a0 \u00a0 \u00a0 \u00a0 to bonan wurdon,\n \u00f0a hyne gesohtan \u00a0 \u00a0 \u00a0 \u00a0 on sige\u00feeode\n- 2205\n- \n hearde hildefrecan, \u00a0 \u00a0 \u00a0 \u00a0 Hea\u00f0oscilfingas, \n ni\u00f0a gen\u00e6gdan \u00a0 \u00a0 \u00a0 \u00a0 nefan Hererices,\n sy\u00f0\u00f0an Beowulfe \u00a0 \u00a0 \u00a0 \u00a0 brade rice\n on hand gehwearf; \u00a0 \u00a0 \u00a0 \u00a0 he geheold tela\n fiftig wintra \u00a0 \u00a0 \u00a0 \u00a0 (w\u00e6s \u00f0a frod cyning,\n- 2210\n- \n eald e\u00feelweard), \u00a0 \u00a0 \u00a0 \u00a0 o\u00f0\u00f0\u00e6t an ongan \n deorcum nihtum \u00a0 \u00a0 \u00a0 \u00a0 draca ricsian,\n se \u00f0e on heaum hofe \u00a0 \u00a0 \u00a0 \u00a0 hord beweotode,\n stanbeorh steapne; \u00a0 \u00a0 \u00a0 \u00a0 stig under l\u00e6g,\n eldum uncu\u00f0. \u00a0 \u00a0 \u00a0 \u00a0 \u00fe\u00e6r on innan giong\n- 2215\n- \n ni\u00f0a nathwylc, \u00a0 \u00a0 \u00a0 \u00a0 se \u00f0e neh gefeng \n h\u00e6\u00f0num horde, \u00a0 \u00a0 \u00a0 \u00a0 hond ......,\n since fahne. \u00a0 \u00a0 \u00a0 \u00a0 He \u00fe\u00e6t sy\u00f0\u00f0an ......,\n \u00feeah \u00f0e he sl\u00e6pende \u00a0 \u00a0 \u00a0 \u00a0 besyred wurde\n \u00feeofes cr\u00e6fte; \u00a0 \u00a0 \u00a0 \u00a0 \u00fe\u00e6t sie \u00f0iod onfand,\n- 2220\n- \n bufolc beorna, \u00a0 \u00a0 \u00a0 \u00a0 \u00fe\u00e6t he gebolgen w\u00e6s. \n Nealles mid gewealdum \u00a0 \u00a0 \u00a0 \u00a0 wyrmhord abr\u00e6c\n sylfes willum, \u00a0 \u00a0 \u00a0 \u00a0 se \u00f0e him sare gesceod,\n ac for \u00fereanedlan \u00a0 \u00a0 \u00a0 \u00a0 \u00feeow nathwylces\n h\u00e6le\u00f0a bearna \u00a0 \u00a0 \u00a0 \u00a0 heteswengeas fleah,\n- 2225\n- \n \u00e6rnes \u00feearfa, \u00a0 \u00a0 \u00a0 \u00a0 ond \u00f0\u00e6r inne fealh, \n secg synbysig, \u00a0 \u00a0 \u00a0 \u00a0 sona onfunde\n \u00fe\u00e6t \u00fe\u00e6r \u00f0am gyste \u00a0 \u00a0 \u00a0 \u00a0 gryrebroga stod;\n hw\u00e6\u00f0re earmsceapen\n ...sceapen\n- 2230\n- \n \u00a0 \u00a0 \u00a0 \u00a0 \u00fea hyne se f\u00e6r begeat. \n Sincf\u00e6t ......; \u00a0 \u00a0 \u00a0 \u00a0 \u00fe\u00e6r w\u00e6s swylcra fela\n in \u00f0am eor\u00f0huse \u00a0 \u00a0 \u00a0 \u00a0 \u00e6rgestreona,\n swa hy on geardagum \u00a0 \u00a0 \u00a0 \u00a0 gumena nathwylc,\n eormenlafe \u00a0 \u00a0 \u00a0 \u00a0 \u00e6\u00feelan cynnes,\n- 2235\n- \n \u00feanchycgende \u00a0 \u00a0 \u00a0 \u00a0 \u00fe\u00e6r gehydde, \n deore ma\u00f0mas. \u00a0 \u00a0 \u00a0 \u00a0 Ealle hie dea\u00f0 fornam\n \u00e6rran m\u00e6lum, \u00a0 \u00a0 \u00a0 \u00a0 ond se an \u00f0a gen\n leoda dugu\u00f0e, \u00a0 \u00a0 \u00a0 \u00a0 se \u00f0\u00e6r lengest hwearf,\n weard winegeomor, \u00a0 \u00a0 \u00a0 \u00a0 wende \u00fe\u00e6s ylcan,\n- 2240\n- \n \u00fe\u00e6t he lytel f\u00e6c \u00a0 \u00a0 \u00a0 \u00a0 longgestreona \n brucan moste. \u00a0 \u00a0 \u00a0 \u00a0 Beorh eallgearo\n wunode on wonge \u00a0 \u00a0 \u00a0 \u00a0 w\u00e6tery\u00f0um neah,\n niwe be n\u00e6sse, \u00a0 \u00a0 \u00a0 \u00a0 nearocr\u00e6ftum f\u00e6st.\n \u00fe\u00e6r on innan b\u00e6r \u00a0 \u00a0 \u00a0 \u00a0 eorlgestreona\n- 2245\n- \n hringa hyrde \u00a0 \u00a0 \u00a0 \u00a0 hordwyr\u00f0ne d\u00e6l, \n f\u00e6ttan goldes, \u00a0 \u00a0 \u00a0 \u00a0 fea worda cw\u00e6\u00f0:\n \"Heald \u00feu nu, hruse, \u00a0 \u00a0 \u00a0 \u00a0 nu h\u00e6le\u00f0 ne moston,\n eorla \u00e6hte! \u00a0 \u00a0 \u00a0 \u00a0 Hw\u00e6t, hyt \u00e6r on \u00f0e\n gode begeaton. \u00a0 \u00a0 \u00a0 \u00a0 Gu\u00f0dea\u00f0 fornam,\n- 2250\n- \n feorhbealo frecne, \u00a0 \u00a0 \u00a0 \u00a0 fyra gehwylcne \n leoda minra, \u00a0 \u00a0 \u00a0 \u00a0 \u00feara \u00f0e \u00feis lif ofgeaf,\n gesawon seledream. \u00a0 \u00a0 \u00a0 \u00a0 Ic nah hwa sweord wege\n o\u00f0\u00f0e feormie \u00a0 \u00a0 \u00a0 \u00a0 f\u00e6ted w\u00e6ge,\n dryncf\u00e6t deore; \u00a0 \u00a0 \u00a0 \u00a0 dugu\u00f0 ellor sceoc.\n- 2255\n- \n Sceal se hearda helm \u00a0 \u00a0 \u00a0 \u00a0 hyrsted golde \n f\u00e6tum befeallen; \u00a0 \u00a0 \u00a0 \u00a0 feormynd swefa\u00f0,\n \u00fea \u00f0e beadogriman \u00a0 \u00a0 \u00a0 \u00a0 bywan sceoldon,\n ge swylce seo herepad, \u00a0 \u00a0 \u00a0 \u00a0 sio \u00e6t hilde gebad\n ofer borda gebr\u00e6c \u00a0 \u00a0 \u00a0 \u00a0 bite irena,\n- 2260\n- \n brosna\u00f0 \u00e6fter beorne. \u00a0 \u00a0 \u00a0 \u00a0 Ne m\u00e6g byrnan hring \n \u00e6fter wigfruman \u00a0 \u00a0 \u00a0 \u00a0 wide feran,\n h\u00e6le\u00f0um be healfe. \u00a0 \u00a0 \u00a0 \u00a0 N\u00e6s hearpan wyn,\n gomen gleobeames, \u00a0 \u00a0 \u00a0 \u00a0 ne god hafoc\n geond s\u00e6l swinge\u00f0, \u00a0 \u00a0 \u00a0 \u00a0 ne se swifta mearh\n- 2265\n- \n burhstede beate\u00f0. \u00a0 \u00a0 \u00a0 \u00a0 Bealocwealm hafa\u00f0 \n fela feorhcynna \u00a0 \u00a0 \u00a0 \u00a0 for\u00f0 onsended!\"\n Swa giomormod \u00a0 \u00a0 \u00a0 \u00a0 gioh\u00f0o m\u00e6nde\n an \u00e6fter eallum, \u00a0 \u00a0 \u00a0 \u00a0 unbli\u00f0e hwearf\n d\u00e6ges ond nihtes, \u00a0 \u00a0 \u00a0 \u00a0 o\u00f0\u00f0\u00e6t dea\u00f0es wylm\n- 2270\n- \n hran \u00e6t heortan. \u00a0 \u00a0 \u00a0 \u00a0 Hordwynne fond \n eald uhtscea\u00f0a \u00a0 \u00a0 \u00a0 \u00a0 opene standan,\n se \u00f0e byrnende \u00a0 \u00a0 \u00a0 \u00a0 biorgas sece\u00f0,\n nacod ni\u00f0draca, \u00a0 \u00a0 \u00a0 \u00a0 nihtes fleoge\u00f0\n fyre befangen; \u00a0 \u00a0 \u00a0 \u00a0 hyne foldbuend\n- 2275\n- \n swi\u00f0e ondr\u00e6da\u00f0. \u00a0 \u00a0 \u00a0 \u00a0 He gesecean sceall \n hord on hrusan, \u00a0 \u00a0 \u00a0 \u00a0 \u00fe\u00e6r he h\u00e6\u00f0en gold\n wara\u00f0 wintrum frod, \u00a0 \u00a0 \u00a0 \u00a0 ne by\u00f0 him wihte \u00f0y sel.\n Swa se \u00f0eodscea\u00f0a \u00a0 \u00a0 \u00a0 \u00a0 \u00fereo hund wintra\n heold on hrusan \u00a0 \u00a0 \u00a0 \u00a0 hord\u00e6rna sum,\n- 2280\n- \n eacencr\u00e6ftig, \u00a0 \u00a0 \u00a0 \u00a0 o\u00f0\u00f0\u00e6t hyne an abealch \n mon on mode; \u00a0 \u00a0 \u00a0 \u00a0 mandryhtne b\u00e6r\n f\u00e6ted w\u00e6ge, \u00a0 \u00a0 \u00a0 \u00a0 frio\u00f0ow\u00e6re b\u00e6d\n hlaford sinne. \u00a0 \u00a0 \u00a0 \u00a0 \u00f0a w\u00e6s hord rasod,\n onboren beaga hord, \u00a0 \u00a0 \u00a0 \u00a0 bene geti\u00f0ad\n- 2285\n- \n feasceaftum men. \u00a0 \u00a0 \u00a0 \u00a0 Frea sceawode \n fira fyrngeweorc \u00a0 \u00a0 \u00a0 \u00a0 forman si\u00f0e.\n \u00fea se wyrm onwoc, \u00a0 \u00a0 \u00a0 \u00a0 wroht w\u00e6s geniwad;\n stonc \u00f0a \u00e6fter stane, \u00a0 \u00a0 \u00a0 \u00a0 stearcheort onfand\n feondes fotlast; \u00a0 \u00a0 \u00a0 \u00a0 he to for\u00f0 gestop\n- 2290\n- \n dyrnan cr\u00e6fte \u00a0 \u00a0 \u00a0 \u00a0 dracan heafde neah. \n Swa m\u00e6g unf\u00e6ge \u00a0 \u00a0 \u00a0 \u00a0 ea\u00f0e gedigan\n wean ond wr\u00e6csi\u00f0, \u00a0 \u00a0 \u00a0 \u00a0 se \u00f0e waldendes\n hyldo gehealde\u00fe! \u00a0 \u00a0 \u00a0 \u00a0 Hordweard sohte\n georne \u00e6fter grunde, \u00a0 \u00a0 \u00a0 \u00a0 wolde guman findan,\n- 2295\n- \n \u00feone \u00fee him on sweofote \u00a0 \u00a0 \u00a0 \u00a0 sare geteode, \n hat ond hreohmod \u00a0 \u00a0 \u00a0 \u00a0 hl\u00e6w oft ymbehwearf\n ealne utanweardne, \u00a0 \u00a0 \u00a0 \u00a0 ne \u00f0\u00e6r \u00e6nig mon\n on \u00fe\u00e6re westenne; \u00a0 \u00a0 \u00a0 \u00a0 hw\u00e6\u00f0re wiges gefeh,\n beaduwe weorces, \u00a0 \u00a0 \u00a0 \u00a0 hwilum on beorh \u00e6thwearf,\n- 2300\n- \n sincf\u00e6t sohte. \u00a0 \u00a0 \u00a0 \u00a0 He \u00fe\u00e6t sona onfand \n \u00f0\u00e6t h\u00e6fde gumena sum \u00a0 \u00a0 \u00a0 \u00a0 goldes gefandod,\n heahgestreona. \u00a0 \u00a0 \u00a0 \u00a0 Hordweard onbad\n earfo\u00f0lice \u00a0 \u00a0 \u00a0 \u00a0 o\u00f0\u00f0\u00e6t \u00e6fen cwom;\n w\u00e6s \u00f0a gebolgen \u00a0 \u00a0 \u00a0 \u00a0 beorges hyrde,\n- 2305\n- \n wolde se la\u00f0a \u00a0 \u00a0 \u00a0 \u00a0 lige forgyldan \n drincf\u00e6t dyre. \u00a0 \u00a0 \u00a0 \u00a0 \u00fea w\u00e6s d\u00e6g sceacen\n wyrme on willan; \u00a0 \u00a0 \u00a0 \u00a0 no on wealle l\u00e6g,\n bidan wolde, \u00a0 \u00a0 \u00a0 \u00a0 ac mid b\u00e6le for,\n fyre gefysed. \u00a0 \u00a0 \u00a0 \u00a0 W\u00e6s se fruma egeslic\n- 2310\n- \n leodum on lande, \u00a0 \u00a0 \u00a0 \u00a0 swa hyt lungre wear\u00f0 \n on hyra sincgifan \u00a0 \u00a0 \u00a0 \u00a0 sare geendod.\n \u00f0a se g\u00e6st ongan \u00a0 \u00a0 \u00a0 \u00a0 gledum spiwan,\n beorht hofu b\u00e6rnan; \u00a0 \u00a0 \u00a0 \u00a0 bryneleoma stod\n eldum on andan. \u00a0 \u00a0 \u00a0 \u00a0 No \u00f0\u00e6r aht cwices\n- 2315\n- \n la\u00f0 lyftfloga \u00a0 \u00a0 \u00a0 \u00a0 l\u00e6fan wolde. \n W\u00e6s \u00fe\u00e6s wyrmes wig \u00a0 \u00a0 \u00a0 \u00a0 wide gesyne,\n nearofages ni\u00f0 \u00a0 \u00a0 \u00a0 \u00a0 nean ond feorran,\n hu se gu\u00f0scea\u00f0a \u00a0 \u00a0 \u00a0 \u00a0 Geata leode\n hatode ond hynde; \u00a0 \u00a0 \u00a0 \u00a0 hord eft gesceat,\n- 2320\n- \n dryhtsele dyrnne, \u00a0 \u00a0 \u00a0 \u00a0 \u00e6r d\u00e6ges hwile. \n H\u00e6fde landwara \u00a0 \u00a0 \u00a0 \u00a0 lige befangen,\n b\u00e6le ond bronde, \u00a0 \u00a0 \u00a0 \u00a0 beorges getruwode,\n wiges ond wealles; \u00a0 \u00a0 \u00a0 \u00a0 him seo wen geleah.\n \u00fea w\u00e6s Biowulfe \u00a0 \u00a0 \u00a0 \u00a0 broga gecy\u00f0ed\n- 2325\n- \n snude to so\u00f0e, \u00a0 \u00a0 \u00a0 \u00a0 \u00fe\u00e6t his sylfes ham, \n bolda selest, \u00a0 \u00a0 \u00a0 \u00a0 brynewylmum mealt,\n gifstol Geata. \u00a0 \u00a0 \u00a0 \u00a0 \u00fe\u00e6t \u00f0am godan w\u00e6s\n hreow on hre\u00f0re, \u00a0 \u00a0 \u00a0 \u00a0 hygesorga m\u00e6st;\n wende se wisa \u00a0 \u00a0 \u00a0 \u00a0 \u00fe\u00e6t he wealdende\n- 2330\n- \n ofer ealde riht, \u00a0 \u00a0 \u00a0 \u00a0 ecean dryhtne, \n bitre gebulge. \u00a0 \u00a0 \u00a0 \u00a0 Breost innan weoll\n \u00feeostrum ge\u00feoncum, \u00a0 \u00a0 \u00a0 \u00a0 swa him ge\u00feywe ne w\u00e6s.\n H\u00e6fde ligdraca \u00a0 \u00a0 \u00a0 \u00a0 leoda f\u00e6sten,\n ealond utan, \u00a0 \u00a0 \u00a0 \u00a0 eor\u00f0weard \u00f0one\n- 2335\n- \n gledum forgrunden; \u00a0 \u00a0 \u00a0 \u00a0 him \u00f0\u00e6s gu\u00f0kyning, \n Wedera \u00feioden, \u00a0 \u00a0 \u00a0 \u00a0 wr\u00e6ce leornode.\n Heht him \u00fea gewyrcean \u00a0 \u00a0 \u00a0 \u00a0 wigendra hleo\n eallirenne, \u00a0 \u00a0 \u00a0 \u00a0 eorla dryhten,\n wigbord wr\u00e6tlic; \u00a0 \u00a0 \u00a0 \u00a0 wisse he gearwe\n- 2340\n- \n \u00fe\u00e6t him holtwudu \u00a0 \u00a0 \u00a0 \u00a0 helpan ne meahte, \n lind wi\u00f0 lige. \u00a0 \u00a0 \u00a0 \u00a0 Sceolde l\u00e6ndaga\n \u00e6\u00feeling \u00e6rgod \u00a0 \u00a0 \u00a0 \u00a0 ende gebidan,\n worulde lifes, \u00a0 \u00a0 \u00a0 \u00a0 ond se wyrm somod,\n \u00feeah \u00f0e hordwelan \u00a0 \u00a0 \u00a0 \u00a0 heolde lange.\n- 2345\n- \n Oferhogode \u00f0a \u00a0 \u00a0 \u00a0 \u00a0 hringa fengel \n \u00fe\u00e6t he \u00feone widflogan \u00a0 \u00a0 \u00a0 \u00a0 weorode gesohte,\n sidan herge; \u00a0 \u00a0 \u00a0 \u00a0 no he him \u00fea s\u00e6cce ondred,\n ne him \u00fe\u00e6s wyrmes wig \u00a0 \u00a0 \u00a0 \u00a0 for wiht dyde,\n eafo\u00f0 ond ellen, \u00a0 \u00a0 \u00a0 \u00a0 for\u00f0on he \u00e6r fela\n- 2350\n- \n nearo ne\u00f0ende \u00a0 \u00a0 \u00a0 \u00a0 ni\u00f0a gedigde, \n hildehlemma, \u00a0 \u00a0 \u00a0 \u00a0 sy\u00f0\u00f0an he Hro\u00f0gares,\n sigoreadig secg, \u00a0 \u00a0 \u00a0 \u00a0 sele f\u00e6lsode\n ond \u00e6t gu\u00f0e forgrap \u00a0 \u00a0 \u00a0 \u00a0 Grendeles m\u00e6gum\n la\u00f0an cynnes. \u00a0 \u00a0 \u00a0 \u00a0 No \u00fe\u00e6t l\u00e6sest w\u00e6s\n- 2355\n- \n hondgemota, \u00a0 \u00a0 \u00a0 \u00a0 \u00fe\u00e6r mon Hygelac sloh, \n sy\u00f0\u00f0an Geata cyning \u00a0 \u00a0 \u00a0 \u00a0 gu\u00f0e r\u00e6sum,\n freawine folca \u00a0 \u00a0 \u00a0 \u00a0 Freslondum on,\n Hre\u00f0les eafora \u00a0 \u00a0 \u00a0 \u00a0 hiorodryncum swealt,\n bille gebeaten. \u00a0 \u00a0 \u00a0 \u00a0 \u00feonan Biowulf com\n- 2360\n- \n sylfes cr\u00e6fte, \u00a0 \u00a0 \u00a0 \u00a0 sundnytte dreah; \n h\u00e6fde him on earme \u00a0 \u00a0 \u00a0 \u00a0 ana XXX\n hildegeatwa, \u00a0 \u00a0 \u00a0 \u00a0 \u00fea he to holme beag.\n Nealles Hetware \u00a0 \u00a0 \u00a0 \u00a0 hremge \u00feorfton\n fe\u00f0ewiges, \u00a0 \u00a0 \u00a0 \u00a0 \u00fee him foran ongean\n- 2365\n- \n linde b\u00e6ron; \u00a0 \u00a0 \u00a0 \u00a0 lyt eft becwom \n fram \u00feam hildfrecan \u00a0 \u00a0 \u00a0 \u00a0 hames niosan.\n Oferswam \u00f0a siole\u00f0a bigong \u00a0 \u00a0 \u00a0 \u00a0 sunu Ecg\u00f0eowes,\n earm anhaga, \u00a0 \u00a0 \u00a0 \u00a0 eft to leodum;\n \u00fe\u00e6r him Hygd gebead \u00a0 \u00a0 \u00a0 \u00a0 hord ond rice,\n- 2370\n- \n beagas ond bregostol, \u00a0 \u00a0 \u00a0 \u00a0 bearne ne truwode \n \u00fe\u00e6t he wi\u00f0 \u00e6lfylcum \u00a0 \u00a0 \u00a0 \u00a0 e\u00feelstolas\n healdan cu\u00f0e, \u00a0 \u00a0 \u00a0 \u00a0 \u00f0a w\u00e6s Hygelac dead.\n No \u00f0y \u00e6r feasceafte \u00a0 \u00a0 \u00a0 \u00a0 findan meahton\n \u00e6t \u00f0am \u00e6\u00f0elinge \u00a0 \u00a0 \u00a0 \u00a0 \u00e6nige \u00f0inga,\n- 2375\n- \n \u00fe\u00e6t he Heardrede \u00a0 \u00a0 \u00a0 \u00a0 hlaford w\u00e6re \n o\u00f0\u00f0e \u00feone cynedom \u00a0 \u00a0 \u00a0 \u00a0 ciosan wolde;\n hw\u00e6\u00f0re he him on folce \u00a0 \u00a0 \u00a0 \u00a0 freondlarum heold,\n estum mid are, \u00a0 \u00a0 \u00a0 \u00a0 o\u00f0\u00f0\u00e6t he yldra wear\u00f0,\n Wedergeatum weold. \u00a0 \u00a0 \u00a0 \u00a0 Hyne wr\u00e6cm\u00e6cgas\n- 2380\n- \n ofer s\u00e6 sohtan, \u00a0 \u00a0 \u00a0 \u00a0 suna Ohteres; \n h\u00e6fdon hy forhealden \u00a0 \u00a0 \u00a0 \u00a0 helm Scylfinga,\n \u00feone selestan \u00a0 \u00a0 \u00a0 \u00a0 s\u00e6cyninga\n \u00feara \u00f0e in Swiorice \u00a0 \u00a0 \u00a0 \u00a0 sinc brytnade,\n m\u00e6rne \u00feeoden. \u00a0 \u00a0 \u00a0 \u00a0 Him \u00fe\u00e6t to mearce wear\u00f0;\n- 2385\n- \n he \u00fe\u00e6r for feorme \u00a0 \u00a0 \u00a0 \u00a0 feorhwunde hleat \n sweordes swengum, \u00a0 \u00a0 \u00a0 \u00a0 sunu Hygelaces,\n ond him eft gewat \u00a0 \u00a0 \u00a0 \u00a0 Ongen\u00f0ioes bearn\n hames niosan, \u00a0 \u00a0 \u00a0 \u00a0 sy\u00f0\u00f0an Heardred l\u00e6g,\n let \u00f0one bregostol \u00a0 \u00a0 \u00a0 \u00a0 Biowulf healdan,\n- 2390\n- \n Geatum wealdan. \u00a0 \u00a0 \u00a0 \u00a0 \u00fe\u00e6t w\u00e6s god cyning! \n Se \u00f0\u00e6s leodhryres \u00a0 \u00a0 \u00a0 \u00a0 lean gemunde\n uferan dogrum, \u00a0 \u00a0 \u00a0 \u00a0 Eadgilse wear\u00f0\n feasceaftum freond, \u00a0 \u00a0 \u00a0 \u00a0 folce gestepte\n ofer s\u00e6 side \u00a0 \u00a0 \u00a0 \u00a0 sunu Ohteres,\n- 2395\n- \n wigum ond w\u00e6pnum; \u00a0 \u00a0 \u00a0 \u00a0 he gewr\u00e6c sy\u00f0\u00f0an \n cealdum cearsi\u00f0um, \u00a0 \u00a0 \u00a0 \u00a0 cyning ealdre bineat.\n Swa he ni\u00f0a gehwane \u00a0 \u00a0 \u00a0 \u00a0 genesen h\u00e6fde,\n sli\u00f0ra geslyhta, \u00a0 \u00a0 \u00a0 \u00a0 sunu Ecg\u00f0iowes,\n ellenweorca, \u00a0 \u00a0 \u00a0 \u00a0 o\u00f0 \u00f0one anne d\u00e6g\n- 2400\n- \n \u00fee he wi\u00f0 \u00feam wyrme \u00a0 \u00a0 \u00a0 \u00a0 gewegan sceolde. \n Gewat \u00fea XIIa sum \u00a0 \u00a0 \u00a0 \u00a0 torne gebolgen\n dryhten Geata \u00a0 \u00a0 \u00a0 \u00a0 dracan sceawian.\n H\u00e6fde \u00fea gefrunen \u00a0 \u00a0 \u00a0 \u00a0 hwanan sio f\u00e6h\u00f0 aras,\n bealoni\u00f0 biorna; \u00a0 \u00a0 \u00a0 \u00a0 him to bearme cwom\n- 2405\n- \n ma\u00f0\u00feumf\u00e6t m\u00e6re \u00a0 \u00a0 \u00a0 \u00a0 \u00feurh \u00f0\u00e6s meldan hond. \n Se w\u00e6s on \u00f0am \u00f0reate \u00a0 \u00a0 \u00a0 \u00a0 \u00fereotteo\u00f0a secg,\n se \u00f0\u00e6s orleges \u00a0 \u00a0 \u00a0 \u00a0 or onstealde,\n h\u00e6ft hygegiomor, \u00a0 \u00a0 \u00a0 \u00a0 sceolde hean \u00f0onon\n wong wisian. \u00a0 \u00a0 \u00a0 \u00a0 He ofer willan giong\n- 2410\n- \n to \u00f0\u00e6s \u00f0e he eor\u00f0sele \u00a0 \u00a0 \u00a0 \u00a0 anne wisse, \n hl\u00e6w under hrusan \u00a0 \u00a0 \u00a0 \u00a0 holmwylme neh,\n y\u00f0gewinne; \u00a0 \u00a0 \u00a0 \u00a0 se w\u00e6s innan full\n wr\u00e6tta ond wira. \u00a0 \u00a0 \u00a0 \u00a0 Weard unhiore,\n gearo gu\u00f0freca, \u00a0 \u00a0 \u00a0 \u00a0 goldma\u00f0mas heold,\n- 2415\n- \n eald under eor\u00f0an. \u00a0 \u00a0 \u00a0 \u00a0 N\u00e6s \u00fe\u00e6t y\u00f0e ceap \n to gegangenne \u00a0 \u00a0 \u00a0 \u00a0 gumena \u00e6nigum!\n Ges\u00e6t \u00f0a on n\u00e6sse \u00a0 \u00a0 \u00a0 \u00a0 ni\u00f0heard cyning,\n \u00feenden h\u00e6lo abead \u00a0 \u00a0 \u00a0 \u00a0 heor\u00f0geneatum,\n goldwine Geata. \u00a0 \u00a0 \u00a0 \u00a0 Him w\u00e6s geomor sefa,\n- 2420\n- \n w\u00e6fre ond w\u00e6lfus, \u00a0 \u00a0 \u00a0 \u00a0 wyrd ungemete neah, \n se \u00f0one gomelan \u00a0 \u00a0 \u00a0 \u00a0 gretan sceolde,\n secean sawle hord, \u00a0 \u00a0 \u00a0 \u00a0 sundur ged\u00e6lan\n lif wi\u00f0 lice, \u00a0 \u00a0 \u00a0 \u00a0 no \u00feon lange w\u00e6s\n feorh \u00e6\u00feelinges \u00a0 \u00a0 \u00a0 \u00a0 fl\u00e6sce bewunden.\n- 2425\n- \n Biowulf ma\u00feelade, \u00a0 \u00a0 \u00a0 \u00a0 bearn Ecg\u00f0eowes: \n \"Fela ic on giogo\u00f0e \u00a0 \u00a0 \u00a0 \u00a0 gu\u00f0r\u00e6sa gen\u00e6s,\n orleghwila; \u00a0 \u00a0 \u00a0 \u00a0 ic \u00fe\u00e6t eall gemon.\n Ic w\u00e6s syfanwintre, \u00a0 \u00a0 \u00a0 \u00a0 \u00fea mec sinca baldor,\n freawine folca, \u00a0 \u00a0 \u00a0 \u00a0 \u00e6t minum f\u00e6der genam;\n- 2430\n- \n heold mec ond h\u00e6fde \u00a0 \u00a0 \u00a0 \u00a0 Hre\u00f0el cyning, \n geaf me sinc ond symbel, \u00a0 \u00a0 \u00a0 \u00a0 sibbe gemunde.\n N\u00e6s ic him to life \u00a0 \u00a0 \u00a0 \u00a0 la\u00f0ra owihte,\n beorn in burgum, \u00a0 \u00a0 \u00a0 \u00a0 \u00feonne his bearna hwylc,\n Herebeald ond H\u00e6\u00f0cyn \u00a0 \u00a0 \u00a0 \u00a0 o\u00f0\u00f0e Hygelac min.\n- 2435\n- \n W\u00e6s \u00feam yldestan \u00a0 \u00a0 \u00a0 \u00a0 ungedefelice \n m\u00e6ges d\u00e6dum \u00a0 \u00a0 \u00a0 \u00a0 mor\u00feorbed stred,\n sy\u00f0\u00f0an hyne H\u00e6\u00f0cyn \u00a0 \u00a0 \u00a0 \u00a0 of hornbogan,\n his freawine, \u00a0 \u00a0 \u00a0 \u00a0 flane geswencte,\n miste mercelses \u00a0 \u00a0 \u00a0 \u00a0 ond his m\u00e6g ofscet,\n- 2440\n- \n bro\u00f0or o\u00f0erne \u00a0 \u00a0 \u00a0 \u00a0 blodigan gare. \n \u00fe\u00e6t w\u00e6s feohleas gefeoht, \u00a0 \u00a0 \u00a0 \u00a0 fyrenum gesyngad,\n hre\u00f0re hygeme\u00f0e; \u00a0 \u00a0 \u00a0 \u00a0 sceolde hw\u00e6\u00f0re swa \u00feeah\n \u00e6\u00f0eling unwrecen \u00a0 \u00a0 \u00a0 \u00a0 ealdres linnan.\n Swa bi\u00f0 geomorlic \u00a0 \u00a0 \u00a0 \u00a0 gomelum ceorle\n- 2445\n- \n to gebidanne, \u00a0 \u00a0 \u00a0 \u00a0 \u00fe\u00e6t his byre ride \n giong on galgan, \u00a0 \u00a0 \u00a0 \u00a0 \u00feonne he gyd wrece,\n sarigne sang, \u00a0 \u00a0 \u00a0 \u00a0 \u00feonne his sunu hanga\u00f0\n hrefne to hro\u00f0re, \u00a0 \u00a0 \u00a0 \u00a0 ond he him helpe ne m\u00e6g,\n eald ond infrod, \u00a0 \u00a0 \u00a0 \u00a0 \u00e6nige gefremman.\n- 2450\n- \n Symble bi\u00f0 gemyndgad \u00a0 \u00a0 \u00a0 \u00a0 morna gehwylce \n eaforan ellorsi\u00f0; \u00a0 \u00a0 \u00a0 \u00a0 o\u00f0res ne gyme\u00f0\n to gebidanne \u00a0 \u00a0 \u00a0 \u00a0 burgum in innan\n yrfeweardas, \u00a0 \u00a0 \u00a0 \u00a0 \u00feonne se an hafa\u00f0\n \u00feurh dea\u00f0es nyd \u00a0 \u00a0 \u00a0 \u00a0 d\u00e6da gefondad.\n- 2455\n- \n Gesyh\u00f0 sorhcearig \u00a0 \u00a0 \u00a0 \u00a0 on his suna bure \n winsele westne, \u00a0 \u00a0 \u00a0 \u00a0 windge reste\n reote berofene. \u00a0 \u00a0 \u00a0 \u00a0 Ridend swefa\u00f0,\n h\u00e6le\u00f0 in ho\u00f0man; \u00a0 \u00a0 \u00a0 \u00a0 nis \u00fe\u00e6r hearpan sweg,\n gomen in geardum, \u00a0 \u00a0 \u00a0 \u00a0 swylce \u00f0\u00e6r iu w\u00e6ron.\n- 2460\n- \n Gewite\u00f0 \u00feonne on sealman, \u00a0 \u00a0 \u00a0 \u00a0 sorhleo\u00f0 g\u00e6le\u00f0 \n an \u00e6fter anum; \u00a0 \u00a0 \u00a0 \u00a0 \u00feuhte him eall to rum,\n wongas ond wicstede. \u00a0 \u00a0 \u00a0 \u00a0 Swa Wedra helm\n \u00e6fter Herebealde \u00a0 \u00a0 \u00a0 \u00a0 heortan sorge\n weallende w\u00e6g. \u00a0 \u00a0 \u00a0 \u00a0 Wihte ne meahte\n- 2465\n- \n on \u00f0am feorhbonan \u00a0 \u00a0 \u00a0 \u00a0 f\u00e6gh\u00f0e gebetan; \n no \u00f0y \u00e6r he \u00feone hea\u00f0orinc \u00a0 \u00a0 \u00a0 \u00a0 hatian ne meahte\n la\u00f0um d\u00e6dum, \u00a0 \u00a0 \u00a0 \u00a0 \u00feeah him leof ne w\u00e6s.\n He \u00f0a mid \u00fe\u00e6re sorhge, \u00a0 \u00a0 \u00a0 \u00a0 \u00fee him swa sar belamp,\n gumdream ofgeaf, \u00a0 \u00a0 \u00a0 \u00a0 godes leoht geceas,\n- 2470\n- \n eaferum l\u00e6fde, \u00a0 \u00a0 \u00a0 \u00a0 swa de\u00f0 eadig mon, \n lond ond leodbyrig, \u00a0 \u00a0 \u00a0 \u00a0 \u00fea he of life gewat.\n \u00fea w\u00e6s synn ond sacu \u00a0 \u00a0 \u00a0 \u00a0 Sweona ond Geata\n ofer wid w\u00e6ter, \u00a0 \u00a0 \u00a0 \u00a0 wroht gem\u00e6ne,\n hereni\u00f0 hearda, \u00a0 \u00a0 \u00a0 \u00a0 sy\u00f0\u00f0an Hre\u00f0el swealt,\n- 2475\n- \n o\u00f0\u00f0e him Ongen\u00f0eowes \u00a0 \u00a0 \u00a0 \u00a0 eaferan w\u00e6ran \n frome, fyrdhwate, \u00a0 \u00a0 \u00a0 \u00a0 freode ne woldon\n ofer heafo healdan, \u00a0 \u00a0 \u00a0 \u00a0 ac ymb Hreosnabeorh\n eatolne inwitscear \u00a0 \u00a0 \u00a0 \u00a0 oft gefremedon.\n \u00fe\u00e6t m\u00e6gwine \u00a0 \u00a0 \u00a0 \u00a0 mine gewr\u00e6can,\n- 2480\n- \n f\u00e6h\u00f0e ond fyrene, \u00a0 \u00a0 \u00a0 \u00a0 swa hyt gefr\u00e6ge w\u00e6s, \n \u00feeah \u00f0e o\u00f0er his \u00a0 \u00a0 \u00a0 \u00a0 ealdre gebohte,\n heardan ceape; \u00a0 \u00a0 \u00a0 \u00a0 H\u00e6\u00f0cynne wear\u00f0,\n Geata dryhtne, \u00a0 \u00a0 \u00a0 \u00a0 gu\u00f0 ons\u00e6ge.\n \u00fea ic on morgne gefr\u00e6gn \u00a0 \u00a0 \u00a0 \u00a0 m\u00e6g o\u00f0erne\n- 2485\n- \n billes ecgum \u00a0 \u00a0 \u00a0 \u00a0 on bonan st\u00e6lan, \n \u00fe\u00e6r Ongen\u00feeow \u00a0 \u00a0 \u00a0 \u00a0 Eofores niosa\u00f0.\n Gu\u00f0helm toglad, \u00a0 \u00a0 \u00a0 \u00a0 gomela Scylfing\n hreas hildeblac; \u00a0 \u00a0 \u00a0 \u00a0 hond gemunde\n f\u00e6h\u00f0o genoge, \u00a0 \u00a0 \u00a0 \u00a0 feorhsweng ne ofteah.\n- 2490\n- \n Ic him \u00fea ma\u00f0mas, \u00a0 \u00a0 \u00a0 \u00a0 \u00fee he me sealde, \n geald \u00e6t gu\u00f0e, \u00a0 \u00a0 \u00a0 \u00a0 swa me gife\u00f0e w\u00e6s,\n leohtan sweorde; \u00a0 \u00a0 \u00a0 \u00a0 he me lond forgeaf,\n eard, e\u00f0elwyn. \u00a0 \u00a0 \u00a0 \u00a0 N\u00e6s him \u00e6nig \u00feearf\n \u00fe\u00e6t he to Gif\u00f0um \u00a0 \u00a0 \u00a0 \u00a0 o\u00f0\u00f0e to Gardenum\n- 2495\n- \n o\u00f0\u00f0e in Swiorice \u00a0 \u00a0 \u00a0 \u00a0 secean \u00feurfe \n wyrsan wigfrecan, \u00a0 \u00a0 \u00a0 \u00a0 weor\u00f0e gecypan.\n Symle ic him on fe\u00f0an \u00a0 \u00a0 \u00a0 \u00a0 beforan wolde,\n ana on orde, \u00a0 \u00a0 \u00a0 \u00a0 ond swa to aldre sceall\n s\u00e6cce fremman, \u00a0 \u00a0 \u00a0 \u00a0 \u00feenden \u00feis sweord \u00feola\u00f0,\n- 2500\n- \n \u00fe\u00e6t mec \u00e6r ond si\u00f0 \u00a0 \u00a0 \u00a0 \u00a0 oft gel\u00e6ste. \n Sy\u00f0\u00f0an ic for duge\u00f0um \u00a0 \u00a0 \u00a0 \u00a0 D\u00e6ghrefne wear\u00f0\n to handbonan, \u00a0 \u00a0 \u00a0 \u00a0 Huga cempan;\n nalles he \u00f0a fr\u00e6twe \u00a0 \u00a0 \u00a0 \u00a0 Frescyninge,\n breostweor\u00f0unge, \u00a0 \u00a0 \u00a0 \u00a0 bringan moste,\n- 2505\n- \n ac in compe gecrong \u00a0 \u00a0 \u00a0 \u00a0 cumbles hyrde, \n \u00e6\u00feeling on elne; \u00a0 \u00a0 \u00a0 \u00a0 ne w\u00e6s ecg bona,\n ac him hildegrap \u00a0 \u00a0 \u00a0 \u00a0 heortan wylmas,\n banhus gebr\u00e6c. \u00a0 \u00a0 \u00a0 \u00a0 Nu sceall billes ecg,\n hond ond heard sweord, \u00a0 \u00a0 \u00a0 \u00a0 ymb hord wigan.\"\n- 2510\n- \n Beowulf ma\u00f0elode, \u00a0 \u00a0 \u00a0 \u00a0 beotwordum spr\u00e6c \n niehstan si\u00f0e: \u00a0 \u00a0 \u00a0 \u00a0 \"Ic gene\u00f0de fela\n gu\u00f0a on geogo\u00f0e; \u00a0 \u00a0 \u00a0 \u00a0 gyt ic wylle,\n frod folces weard, \u00a0 \u00a0 \u00a0 \u00a0 f\u00e6h\u00f0e secan,\n m\u00e6r\u00f0u fremman, \u00a0 \u00a0 \u00a0 \u00a0 gif mec se manscea\u00f0a\n- 2515\n- \n of eor\u00f0sele \u00a0 \u00a0 \u00a0 \u00a0 ut gesece\u00f0.\" \n Gegrette \u00f0a \u00a0 \u00a0 \u00a0 \u00a0 gumena gehwylcne,\n hwate helmberend, \u00a0 \u00a0 \u00a0 \u00a0 hindeman si\u00f0e,\n sw\u00e6se gesi\u00f0as: \u00a0 \u00a0 \u00a0 \u00a0 \"Nolde ic sweord beran,\n w\u00e6pen to wyrme, \u00a0 \u00a0 \u00a0 \u00a0 gif ic wiste hu\n- 2520\n- \n wi\u00f0 \u00f0am agl\u00e6cean \u00a0 \u00a0 \u00a0 \u00a0 elles meahte \n gylpe wi\u00f0gripan, \u00a0 \u00a0 \u00a0 \u00a0 swa ic gio wi\u00f0 Grendle dyde.\n Ac ic \u00f0\u00e6r hea\u00f0ufyres \u00a0 \u00a0 \u00a0 \u00a0 hates wene,\n ore\u00f0es ond attres; \u00a0 \u00a0 \u00a0 \u00a0 for\u00f0on ic me on hafu\n bord ond byrnan. \u00a0 \u00a0 \u00a0 \u00a0 Nelle ic beorges weard\n- 2525\n- \n forfleon fotes trem, \u00a0 \u00a0 \u00a0 \u00a0 ac unc fur\u00f0ur sceal \n weor\u00f0an \u00e6t wealle, \u00a0 \u00a0 \u00a0 \u00a0 swa unc wyrd geteo\u00f0,\n metod manna gehw\u00e6s. \u00a0 \u00a0 \u00a0 \u00a0 Ic eom on mode from\n \u00fe\u00e6t ic wi\u00f0 \u00feone gu\u00f0flogan \u00a0 \u00a0 \u00a0 \u00a0 gylp ofersitte.\n Gebide ge on beorge \u00a0 \u00a0 \u00a0 \u00a0 byrnum werede,\n- 2530\n- \n secgas on searwum, \u00a0 \u00a0 \u00a0 \u00a0 hw\u00e6\u00f0er sel m\u00e6ge \n \u00e6fter w\u00e6lr\u00e6se \u00a0 \u00a0 \u00a0 \u00a0 wunde gedygan\n uncer twega. \u00a0 \u00a0 \u00a0 \u00a0 Nis \u00fe\u00e6t eower si\u00f0\n ne gemet mannes, \u00a0 \u00a0 \u00a0 \u00a0 nefne min anes,\n \u00fe\u00e6t he wi\u00f0 agl\u00e6cean \u00a0 \u00a0 \u00a0 \u00a0 eofo\u00f0o d\u00e6le,\n- 2535\n- \n eorlscype efne. \u00a0 \u00a0 \u00a0 \u00a0 Ic mid elne sceall \n gold gegangan, \u00a0 \u00a0 \u00a0 \u00a0 o\u00f0\u00f0e gu\u00f0 nime\u00f0,\n feorhbealu frecne, \u00a0 \u00a0 \u00a0 \u00a0 frean eowerne!\"\n Aras \u00f0a bi ronde \u00a0 \u00a0 \u00a0 \u00a0 rof oretta,\n heard under helme, \u00a0 \u00a0 \u00a0 \u00a0 hiorosercean b\u00e6r\n- 2540\n- \n under stancleofu, \u00a0 \u00a0 \u00a0 \u00a0 strengo getruwode \n anes mannes. \u00a0 \u00a0 \u00a0 \u00a0 Ne bi\u00f0 swylc earges si\u00f0!\n Geseah \u00f0a be wealle \u00a0 \u00a0 \u00a0 \u00a0 se \u00f0e worna fela,\n gumcystum god, \u00a0 \u00a0 \u00a0 \u00a0 gu\u00f0a gedigde,\n hildehlemma, \u00a0 \u00a0 \u00a0 \u00a0 \u00feonne hnitan fe\u00f0an,\n- 2545\n- \n stondan stanbogan, \u00a0 \u00a0 \u00a0 \u00a0 stream ut \u00feonan \n brecan of beorge. \u00a0 \u00a0 \u00a0 \u00a0 W\u00e6s \u00fe\u00e6re burnan w\u00e6lm\n hea\u00f0ofyrum hat; \u00a0 \u00a0 \u00a0 \u00a0 ne meahte horde neah\n unbyrnende \u00a0 \u00a0 \u00a0 \u00a0 \u00e6nige hwile\n deop gedygan \u00a0 \u00a0 \u00a0 \u00a0 for dracan lege.\n- 2550\n- \n Let \u00f0a of breostum, \u00a0 \u00a0 \u00a0 \u00a0 \u00f0a he gebolgen w\u00e6s, \n Wedergeata leod \u00a0 \u00a0 \u00a0 \u00a0 word ut faran,\n stearcheort styrmde; \u00a0 \u00a0 \u00a0 \u00a0 stefn in becom\n hea\u00f0otorht hlynnan \u00a0 \u00a0 \u00a0 \u00a0 under harne stan.\n Hete w\u00e6s onhrered, \u00a0 \u00a0 \u00a0 \u00a0 hordweard oncniow\n- 2555\n- \n mannes reorde; \u00a0 \u00a0 \u00a0 \u00a0 n\u00e6s \u00f0\u00e6r mara fyrst \n freode to friclan. \u00a0 \u00a0 \u00a0 \u00a0 From \u00e6rest cwom\n oru\u00f0 agl\u00e6cean \u00a0 \u00a0 \u00a0 \u00a0 ut of stane,\n hat hildeswat. \u00a0 \u00a0 \u00a0 \u00a0 Hruse dynede.\n Biorn under beorge \u00a0 \u00a0 \u00a0 \u00a0 bordrand onswaf\n- 2560\n- \n wi\u00f0 \u00f0am gryregieste, \u00a0 \u00a0 \u00a0 \u00a0 Geata dryhten; \n \u00f0a w\u00e6s hringbogan \u00a0 \u00a0 \u00a0 \u00a0 heorte gefysed\n s\u00e6cce to seceanne. \u00a0 \u00a0 \u00a0 \u00a0 Sweord \u00e6r gebr\u00e6d\n god gu\u00f0cyning, \u00a0 \u00a0 \u00a0 \u00a0 gomele lafe,\n ecgum unslaw; \u00a0 \u00a0 \u00a0 \u00a0 \u00e6ghw\u00e6\u00f0rum w\u00e6s\n- 2565\n- \n bealohycgendra \u00a0 \u00a0 \u00a0 \u00a0 broga fram o\u00f0rum. \n Sti\u00f0mod gestod \u00a0 \u00a0 \u00a0 \u00a0 wi\u00f0 steapne rond\n winia bealdor, \u00a0 \u00a0 \u00a0 \u00a0 \u00f0a se wyrm gebeah\n snude tosomne; \u00a0 \u00a0 \u00a0 \u00a0 he on searwum bad.\n Gewat \u00f0a byrnende \u00a0 \u00a0 \u00a0 \u00a0 gebogen scri\u00f0an,\n- 2570\n- \n to gescipe scyndan. \u00a0 \u00a0 \u00a0 \u00a0 Scyld wel gebearg \n life ond lice \u00a0 \u00a0 \u00a0 \u00a0 l\u00e6ssan hwile\n m\u00e6rum \u00feeodne \u00a0 \u00a0 \u00a0 \u00a0 \u00feonne his myne sohte,\n \u00f0\u00e6r he \u00fey fyrste, \u00a0 \u00a0 \u00a0 \u00a0 forman dogore\n wealdan moste \u00a0 \u00a0 \u00a0 \u00a0 swa him wyrd ne gescraf\n- 2575\n- \n hre\u00f0 \u00e6t hilde. \u00a0 \u00a0 \u00a0 \u00a0 Hond up abr\u00e6d \n Geata dryhten, \u00a0 \u00a0 \u00a0 \u00a0 gryrefahne sloh\n incgelafe, \u00a0 \u00a0 \u00a0 \u00a0 \u00fe\u00e6t sio ecg gewac\n brun on bane, \u00a0 \u00a0 \u00a0 \u00a0 bat unswi\u00f0or\n \u00feonne his \u00f0iodcyning \u00a0 \u00a0 \u00a0 \u00a0 \u00feearfe h\u00e6fde,\n- 2580\n- \n bysigum geb\u00e6ded. \u00a0 \u00a0 \u00a0 \u00a0 \u00fea w\u00e6s beorges weard \n \u00e6fter hea\u00f0uswenge \u00a0 \u00a0 \u00a0 \u00a0 on hreoum mode,\n wearp w\u00e6lfyre; \u00a0 \u00a0 \u00a0 \u00a0 wide sprungon\n hildeleoman. \u00a0 \u00a0 \u00a0 \u00a0 Hre\u00f0sigora ne gealp\n goldwine Geata; \u00a0 \u00a0 \u00a0 \u00a0 gu\u00f0bill geswac,\n- 2585\n- \n nacod \u00e6t ni\u00f0e, \u00a0 \u00a0 \u00a0 \u00a0 swa hyt no sceolde, \n iren \u00e6rgod. \u00a0 \u00a0 \u00a0 \u00a0 Ne w\u00e6s \u00fe\u00e6t e\u00f0e si\u00f0,\n \u00fe\u00e6t se m\u00e6ra \u00a0 \u00a0 \u00a0 \u00a0 maga Ecg\u00f0eowes\n grundwong \u00feone \u00a0 \u00a0 \u00a0 \u00a0 ofgyfan wolde;\n sceolde ofer willan \u00a0 \u00a0 \u00a0 \u00a0 wic eardian\n- 2590\n- \n elles hwergen, \u00a0 \u00a0 \u00a0 \u00a0 swa sceal \u00e6ghwylc mon \n al\u00e6tan l\u00e6ndagas. \u00a0 \u00a0 \u00a0 \u00a0 N\u00e6s \u00f0a long to \u00f0on\n \u00fe\u00e6t \u00f0a agl\u00e6cean hy \u00a0 \u00a0 \u00a0 \u00a0 eft gemetton.\n Hyrte hyne hordweard \u00a0 \u00a0 \u00a0 \u00a0 (hre\u00f0er \u00e6\u00f0me weoll)\n niwan stefne; \u00a0 \u00a0 \u00a0 \u00a0 nearo \u00f0rowode,\n- 2595\n- \n fyre befongen, \u00a0 \u00a0 \u00a0 \u00a0 se \u00f0e \u00e6r folce weold. \n Nealles him on heape \u00a0 \u00a0 \u00a0 \u00a0 handgesteallan,\n \u00e6\u00f0elinga bearn, \u00a0 \u00a0 \u00a0 \u00a0 ymbe gestodon\n hildecystum, \u00a0 \u00a0 \u00a0 \u00a0 ac hy on holt bugon,\n ealdre burgan. \u00a0 \u00a0 \u00a0 \u00a0 Hiora in anum weoll\n- 2600\n- \n sefa wi\u00f0 sorgum; \u00a0 \u00a0 \u00a0 \u00a0 sibb \u00e6fre ne m\u00e6g \n wiht onwendan \u00a0 \u00a0 \u00a0 \u00a0 \u00feam \u00f0e wel \u00feence\u00f0.\n Wiglaf w\u00e6s haten \u00a0 \u00a0 \u00a0 \u00a0 Weoxstanes sunu,\n leoflic lindwiga, \u00a0 \u00a0 \u00a0 \u00a0 leod Scylfinga,\n m\u00e6g \u00e6lfheres; \u00a0 \u00a0 \u00a0 \u00a0 geseah his mondryhten\n- 2605\n- \n under heregriman \u00a0 \u00a0 \u00a0 \u00a0 hat \u00ferowian. \n Gemunde \u00f0a \u00f0a are \u00a0 \u00a0 \u00a0 \u00a0 \u00fee he him \u00e6r forgeaf,\n wicstede weligne \u00a0 \u00a0 \u00a0 \u00a0 W\u00e6gmundinga,\n folcrihta gehwylc, \u00a0 \u00a0 \u00a0 \u00a0 swa his f\u00e6der ahte.\n Ne mihte \u00f0a forhabban; \u00a0 \u00a0 \u00a0 \u00a0 hond rond gefeng,\n- 2610\n- \n geolwe linde, \u00a0 \u00a0 \u00a0 \u00a0 gomel swyrd geteah, \n \u00fe\u00e6t w\u00e6s mid eldum \u00a0 \u00a0 \u00a0 \u00a0 Eanmundes laf,\n suna Ohteres. \u00a0 \u00a0 \u00a0 \u00a0 \u00feam \u00e6t s\u00e6cce wear\u00f0,\n wr\u00e6ccan wineleasum, \u00a0 \u00a0 \u00a0 \u00a0 Weohstan bana\n meces ecgum, \u00a0 \u00a0 \u00a0 \u00a0 ond his magum \u00e6tb\u00e6r\n- 2615\n- \n brunfagne helm, \u00a0 \u00a0 \u00a0 \u00a0 hringde byrnan, \n eald sweord etonisc; \u00a0 \u00a0 \u00a0 \u00a0 \u00fe\u00e6t him Onela forgeaf,\n his g\u00e6delinges \u00a0 \u00a0 \u00a0 \u00a0 gu\u00f0gew\u00e6du,\n fyrdsearo fuslic, \u00a0 \u00a0 \u00a0 \u00a0 no ymbe \u00f0a f\u00e6h\u00f0e spr\u00e6c,\n \u00feeah \u00f0e he his bro\u00f0or bearn \u00a0 \u00a0 \u00a0 \u00a0 abredwade.\n- 2620\n- \n He fr\u00e6twe geheold \u00a0 \u00a0 \u00a0 \u00a0 fela missera, \n bill ond byrnan, \u00a0 \u00a0 \u00a0 \u00a0 o\u00f0\u00f0\u00e6t his byre mihte\n eorlscipe efnan \u00a0 \u00a0 \u00a0 \u00a0 swa his \u00e6rf\u00e6der;\n geaf him \u00f0a mid Geatum \u00a0 \u00a0 \u00a0 \u00a0 gu\u00f0gew\u00e6da,\n \u00e6ghw\u00e6s unrim, \u00a0 \u00a0 \u00a0 \u00a0 \u00fea he of ealdre gewat,\n- 2625\n- \n frod on for\u00f0weg. \u00a0 \u00a0 \u00a0 \u00a0 \u00fea w\u00e6s forma si\u00f0 \n geongan cempan, \u00a0 \u00a0 \u00a0 \u00a0 \u00fe\u00e6t he gu\u00f0e r\u00e6s\n mid his freodryhtne \u00a0 \u00a0 \u00a0 \u00a0 fremman sceolde.\n Ne gemealt him se modsefa, \u00a0 \u00a0 \u00a0 \u00a0 ne his m\u00e6ges laf\n gewac \u00e6t wige; \u00a0 \u00a0 \u00a0 \u00a0 \u00fe\u00e6t se wyrm onfand,\n- 2630\n- \n sy\u00f0\u00f0an hie tog\u00e6dre \u00a0 \u00a0 \u00a0 \u00a0 gegan h\u00e6fdon. \n Wiglaf ma\u00f0elode, \u00a0 \u00a0 \u00a0 \u00a0 wordrihta fela\n s\u00e6gde gesi\u00f0um \u00a0 \u00a0 \u00a0 \u00a0 (him w\u00e6s sefa geomor):\n \"Ic \u00f0\u00e6t m\u00e6l geman, \u00a0 \u00a0 \u00a0 \u00a0 \u00fe\u00e6r we medu \u00feegun,\n \u00feonne we geheton \u00a0 \u00a0 \u00a0 \u00a0 ussum hlaforde\n- 2635\n- \n in biorsele, \u00a0 \u00a0 \u00a0 \u00a0 \u00f0e us \u00f0as beagas geaf, \n \u00fe\u00e6t we him \u00f0a gu\u00f0getawa \u00a0 \u00a0 \u00a0 \u00a0 gyldan woldon\n gif him \u00feyslicu \u00a0 \u00a0 \u00a0 \u00a0 \u00feearf gelumpe,\n helmas ond heard sweord. \u00a0 \u00a0 \u00a0 \u00a0 \u00f0e he usic on herge geceas\n to \u00f0yssum si\u00f0fate \u00a0 \u00a0 \u00a0 \u00a0 sylfes willum,\n- 2640\n- \n onmunde usic m\u00e6r\u00f0a, \u00a0 \u00a0 \u00a0 \u00a0 ond me \u00feas ma\u00f0mas geaf, \n \u00fee he usic garwigend \u00a0 \u00a0 \u00a0 \u00a0 gode tealde,\n hwate helmberend, \u00a0 \u00a0 \u00a0 \u00a0 \u00feeah \u00f0e hlaford us\n \u00feis ellenweorc \u00a0 \u00a0 \u00a0 \u00a0 ana a\u00f0ohte\n to gefremmanne, \u00a0 \u00a0 \u00a0 \u00a0 folces hyrde,\n- 2645\n- \n for \u00f0am he manna m\u00e6st \u00a0 \u00a0 \u00a0 \u00a0 m\u00e6r\u00f0a gefremede, \n d\u00e6da dollicra. \u00a0 \u00a0 \u00a0 \u00a0 Nu is se d\u00e6g cumen\n \u00fe\u00e6t ure mandryhten \u00a0 \u00a0 \u00a0 \u00a0 m\u00e6genes behofa\u00f0,\n godra gu\u00f0rinca; \u00a0 \u00a0 \u00a0 \u00a0 wutun gongan to,\n helpan hildfruman, \u00a0 \u00a0 \u00a0 \u00a0 \u00feenden hyt sy,\n- 2650\n- \n gledegesa grim. \u00a0 \u00a0 \u00a0 \u00a0 God wat on mec \n \u00fe\u00e6t me is micle leofre \u00a0 \u00a0 \u00a0 \u00a0 \u00fe\u00e6t minne lichaman\n mid minne goldgyfan \u00a0 \u00a0 \u00a0 \u00a0 gled f\u00e6\u00f0mie.\n Ne \u00feynce\u00f0 me gerysne \u00a0 \u00a0 \u00a0 \u00a0 \u00fe\u00e6t we rondas beren\n eft to earde, \u00a0 \u00a0 \u00a0 \u00a0 nemne we \u00e6ror m\u00e6gen\n- 2655\n- \n fane gefyllan, \u00a0 \u00a0 \u00a0 \u00a0 feorh ealgian \n Wedra \u00f0eodnes. \u00a0 \u00a0 \u00a0 \u00a0 Ic wat geare\n \u00fe\u00e6t n\u00e6ron ealdgewyrht, \u00a0 \u00a0 \u00a0 \u00a0 \u00fe\u00e6t he ana scyle\n Geata dugu\u00f0e \u00a0 \u00a0 \u00a0 \u00a0 gnorn \u00ferowian,\n gesigan \u00e6t s\u00e6cce; \u00a0 \u00a0 \u00a0 \u00a0 urum sceal sweord ond helm,\n- 2660\n- \n byrne ond beaduscrud, \u00a0 \u00a0 \u00a0 \u00a0 bam gem\u00e6ne.\" \n Wod \u00fea \u00feurh \u00feone w\u00e6lrec, \u00a0 \u00a0 \u00a0 \u00a0 wigheafolan b\u00e6r\n frean on fultum, \u00a0 \u00a0 \u00a0 \u00a0 fea worda cw\u00e6\u00f0:\n \"Leofa Biowulf, \u00a0 \u00a0 \u00a0 \u00a0 l\u00e6st eall tela,\n swa \u00f0u on geogu\u00f0feore \u00a0 \u00a0 \u00a0 \u00a0 geara gecw\u00e6de\n- 2665\n- \n \u00fe\u00e6t \u00f0u ne al\u00e6te \u00a0 \u00a0 \u00a0 \u00a0 be \u00f0e lifigendum \n dom gedreosan. \u00a0 \u00a0 \u00a0 \u00a0 Scealt nu d\u00e6dum rof,\n \u00e6\u00f0eling anhydig, \u00a0 \u00a0 \u00a0 \u00a0 ealle m\u00e6gene\n feorh ealgian; \u00a0 \u00a0 \u00a0 \u00a0 ic \u00f0e full\u00e6stu.\"\n \u00e6fter \u00f0am wordum \u00a0 \u00a0 \u00a0 \u00a0 wyrm yrre cwom,\n- 2670\n- \n atol inwitg\u00e6st, \u00a0 \u00a0 \u00a0 \u00a0 o\u00f0re si\u00f0e \n fyrwylmum fah \u00a0 \u00a0 \u00a0 \u00a0 fionda niosian,\n la\u00f0ra manna; \u00a0 \u00a0 \u00a0 \u00a0 ligy\u00f0um for.\n Born bord wi\u00f0 rond, \u00a0 \u00a0 \u00a0 \u00a0 byrne ne meahte\n geongum garwigan \u00a0 \u00a0 \u00a0 \u00a0 geoce gefremman,\n- 2675\n- \n ac se maga geonga \u00a0 \u00a0 \u00a0 \u00a0 under his m\u00e6ges scyld \n elne geeode, \u00a0 \u00a0 \u00a0 \u00a0 \u00fea his agen w\u00e6s\n gledum forgrunden. \u00a0 \u00a0 \u00a0 \u00a0 \u00fea gen gu\u00f0cyning\n m\u00e6r\u00f0a gemunde, \u00a0 \u00a0 \u00a0 \u00a0 m\u00e6genstrengo sloh\n hildebille, \u00a0 \u00a0 \u00a0 \u00a0 \u00fe\u00e6t hyt on heafolan stod\n- 2680\n- \n ni\u00fee genyded; \u00a0 \u00a0 \u00a0 \u00a0 N\u00e6gling forb\u00e6rst, \n geswac \u00e6t s\u00e6cce \u00a0 \u00a0 \u00a0 \u00a0 sweord Biowulfes,\n gomol ond gr\u00e6gm\u00e6l. \u00a0 \u00a0 \u00a0 \u00a0 Him \u00fe\u00e6t gife\u00f0e ne w\u00e6s\n \u00fe\u00e6t him irenna \u00a0 \u00a0 \u00a0 \u00a0 ecge mihton\n helpan \u00e6t hilde; \u00a0 \u00a0 \u00a0 \u00a0 w\u00e6s sio hond to strong,\n- 2685\n- \n se \u00f0e meca gehwane, \u00a0 \u00a0 \u00a0 \u00a0 mine gefr\u00e6ge, \n swenge ofersohte, \u00a0 \u00a0 \u00a0 \u00a0 \u00feonne he to s\u00e6cce b\u00e6r\n w\u00e6pen wundrum heard; \u00a0 \u00a0 \u00a0 \u00a0 n\u00e6s him wihte \u00f0e sel.\n \u00fea w\u00e6s \u00feeodscea\u00f0a \u00a0 \u00a0 \u00a0 \u00a0 \u00feriddan si\u00f0e,\n frecne fyrdraca, \u00a0 \u00a0 \u00a0 \u00a0 f\u00e6h\u00f0a gemyndig,\n- 2690\n- \n r\u00e6sde on \u00f0one rofan, \u00a0 \u00a0 \u00a0 \u00a0 \u00fea him rum ageald, \n hat ond hea\u00f0ogrim, \u00a0 \u00a0 \u00a0 \u00a0 heals ealne ymbefeng\n biteran banum; \u00a0 \u00a0 \u00a0 \u00a0 he geblodegod wear\u00f0\n sawuldriore, \u00a0 \u00a0 \u00a0 \u00a0 swat y\u00f0um weoll.\n \u00f0a ic \u00e6t \u00feearfe gefr\u00e6gn \u00a0 \u00a0 \u00a0 \u00a0 \u00feeodcyninges\n- 2695\n- \n andlongne eorl \u00a0 \u00a0 \u00a0 \u00a0 ellen cy\u00f0an, \n cr\u00e6ft ond cen\u00f0u, \u00a0 \u00a0 \u00a0 \u00a0 swa him gecynde w\u00e6s.\n Ne hedde he \u00fe\u00e6s heafolan, \u00a0 \u00a0 \u00a0 \u00a0 ac sio hand gebarn\n modiges mannes, \u00a0 \u00a0 \u00a0 \u00a0 \u00fe\u00e6r he his m\u00e6ges healp,\n \u00fe\u00e6t he \u00feone ni\u00f0g\u00e6st \u00a0 \u00a0 \u00a0 \u00a0 nio\u00f0or hwene sloh,\n- 2700\n- \n secg on searwum, \u00a0 \u00a0 \u00a0 \u00a0 \u00fe\u00e6t \u00f0\u00e6t sweord gedeaf, \n fah ond f\u00e6ted, \u00a0 \u00a0 \u00a0 \u00a0 \u00fe\u00e6t \u00f0\u00e6t fyr ongon\n swe\u00f0rian sy\u00f0\u00f0an. \u00a0 \u00a0 \u00a0 \u00a0 \u00fea gen sylf cyning\n geweold his gewitte, \u00a0 \u00a0 \u00a0 \u00a0 w\u00e6llseaxe gebr\u00e6d\n biter ond beaduscearp, \u00a0 \u00a0 \u00a0 \u00a0 \u00fe\u00e6t he on byrnan w\u00e6g;\n- 2705\n- \n forwrat Wedra helm \u00a0 \u00a0 \u00a0 \u00a0 wyrm on middan. \n Feond gefyldan \u00a0 \u00a0 \u00a0 \u00a0 (ferh ellen wr\u00e6c),\n ond hi hyne \u00fea begen \u00a0 \u00a0 \u00a0 \u00a0 abroten h\u00e6fdon,\n sib\u00e6\u00f0elingas. \u00a0 \u00a0 \u00a0 \u00a0 Swylc sceolde secg wesan,\n \u00feegn \u00e6t \u00f0earfe! \u00a0 \u00a0 \u00a0 \u00a0 \u00fe\u00e6t \u00f0am \u00feeodne w\u00e6s\n- 2710\n- \n si\u00f0ast sigehwila \u00a0 \u00a0 \u00a0 \u00a0 sylfes d\u00e6dum, \n worlde geweorces. \u00a0 \u00a0 \u00a0 \u00a0 \u00f0a sio wund ongon,\n \u00fee him se eor\u00f0draca \u00a0 \u00a0 \u00a0 \u00a0 \u00e6r geworhte,\n swelan ond swellan; \u00a0 \u00a0 \u00a0 \u00a0 he \u00fe\u00e6t sona onfand,\n \u00fe\u00e6t him on breostum \u00a0 \u00a0 \u00a0 \u00a0 bealoni\u00f0e weoll\n- 2715\n- \n attor on innan. \u00a0 \u00a0 \u00a0 \u00a0 \u00f0a se \u00e6\u00f0eling giong \n \u00fe\u00e6t he bi wealle \u00a0 \u00a0 \u00a0 \u00a0 wishycgende\n ges\u00e6t on sesse; \u00a0 \u00a0 \u00a0 \u00a0 seah on enta geweorc,\n hu \u00f0a stanbogan \u00a0 \u00a0 \u00a0 \u00a0 stapulum f\u00e6ste\n ece eor\u00f0reced \u00a0 \u00a0 \u00a0 \u00a0 innan healde.\n- 2720\n- \n Hyne \u00fea mid handa \u00a0 \u00a0 \u00a0 \u00a0 heorodreorigne, \n \u00feeoden m\u00e6rne, \u00a0 \u00a0 \u00a0 \u00a0 \u00feegn ungemete till\n winedryhten his \u00a0 \u00a0 \u00a0 \u00a0 w\u00e6tere gelafede,\n hilde s\u00e6dne, \u00a0 \u00a0 \u00a0 \u00a0 ond his helm onspeon.\n Biowulf ma\u00feelode \u00a0 \u00a0 \u00a0 \u00a0 (he ofer benne spr\u00e6c,\n- 2725\n- \n wunde w\u00e6lbleate; \u00a0 \u00a0 \u00a0 \u00a0 wisse he gearwe \n \u00fe\u00e6t he d\u00e6ghwila \u00a0 \u00a0 \u00a0 \u00a0 gedrogen h\u00e6fde,\n eor\u00f0an wynne; \u00a0 \u00a0 \u00a0 \u00a0 \u00f0a w\u00e6s eall sceacen\n dogorgerimes, \u00a0 \u00a0 \u00a0 \u00a0 dea\u00f0 ungemete neah):\n \"Nu ic suna minum \u00a0 \u00a0 \u00a0 \u00a0 syllan wolde\n- 2730\n- \n gu\u00f0gew\u00e6du, \u00a0 \u00a0 \u00a0 \u00a0 \u00fe\u00e6r me gife\u00f0e swa \n \u00e6nig yrfeweard \u00a0 \u00a0 \u00a0 \u00a0 \u00e6fter wurde\n lice gelenge. \u00a0 \u00a0 \u00a0 \u00a0 Ic \u00f0as leode heold\n fiftig wintra; \u00a0 \u00a0 \u00a0 \u00a0 n\u00e6s se folccyning,\n ymbesittendra \u00a0 \u00a0 \u00a0 \u00a0 \u00e6nig \u00f0ara,\n- 2735\n- \n \u00fee mec gu\u00f0winum \u00a0 \u00a0 \u00a0 \u00a0 gretan dorste, \n egesan \u00f0eon. \u00a0 \u00a0 \u00a0 \u00a0 Ic on earde bad\n m\u00e6lgesceafta, \u00a0 \u00a0 \u00a0 \u00a0 heold min tela,\n ne sohte searoni\u00f0as, \u00a0 \u00a0 \u00a0 \u00a0 ne me swor fela\n a\u00f0a on unriht. \u00a0 \u00a0 \u00a0 \u00a0 Ic \u00f0\u00e6s ealles m\u00e6g\n- 2740\n- \n feorhbennum seoc \u00a0 \u00a0 \u00a0 \u00a0 gefean habban; \n for \u00f0am me witan ne \u00f0earf \u00a0 \u00a0 \u00a0 \u00a0 waldend fira\n mor\u00f0orbealo maga, \u00a0 \u00a0 \u00a0 \u00a0 \u00feonne min sceace\u00f0\n lif of lice. \u00a0 \u00a0 \u00a0 \u00a0 Nu \u00f0u lungre geong\n hord sceawian \u00a0 \u00a0 \u00a0 \u00a0 under harne stan,\n- 2745\n- \n Wiglaf leofa, \u00a0 \u00a0 \u00a0 \u00a0 nu se wyrm lige\u00f0, \n swefe\u00f0 sare wund, \u00a0 \u00a0 \u00a0 \u00a0 since bereafod.\n Bio nu on ofoste, \u00a0 \u00a0 \u00a0 \u00a0 \u00fe\u00e6t ic \u00e6rwelan,\n gold\u00e6ht ongite, \u00a0 \u00a0 \u00a0 \u00a0 gearo sceawige\n swegle searogimmas, \u00a0 \u00a0 \u00a0 \u00a0 \u00fe\u00e6t ic \u00f0y seft m\u00e6ge\n- 2750\n- \n \u00e6fter ma\u00f0\u00f0umwelan \u00a0 \u00a0 \u00a0 \u00a0 min al\u00e6tan \n lif ond leodscipe, \u00a0 \u00a0 \u00a0 \u00a0 \u00feone ic longe heold.\"\n \u00f0a ic snude gefr\u00e6gn \u00a0 \u00a0 \u00a0 \u00a0 sunu Wihstanes\n \u00e6fter wordcwydum \u00a0 \u00a0 \u00a0 \u00a0 wundum dryhtne\n hyran hea\u00f0osiocum, \u00a0 \u00a0 \u00a0 \u00a0 hringnet beran,\n- 2755\n- \n brogdne beadusercean \u00a0 \u00a0 \u00a0 \u00a0 under beorges hrof. \n Geseah \u00f0a sigehre\u00f0ig, \u00a0 \u00a0 \u00a0 \u00a0 \u00fea he bi sesse geong,\n mago\u00feegn modig \u00a0 \u00a0 \u00a0 \u00a0 ma\u00f0\u00f0umsigla fealo,\n gold glitinian \u00a0 \u00a0 \u00a0 \u00a0 grunde getenge,\n wundur on wealle, \u00a0 \u00a0 \u00a0 \u00a0 ond \u00fe\u00e6s wyrmes denn,\n- 2760\n- \n ealdes uhtflogan, \u00a0 \u00a0 \u00a0 \u00a0 orcas stondan, \n fyrnmanna fatu \u00a0 \u00a0 \u00a0 \u00a0 feormendlease,\n hyrstum behrorene; \u00a0 \u00a0 \u00a0 \u00a0 \u00fe\u00e6r w\u00e6s helm monig\n eald ond omig, \u00a0 \u00a0 \u00a0 \u00a0 earmbeaga fela\n searwum ges\u00e6led. \u00a0 \u00a0 \u00a0 \u00a0 Sinc ea\u00f0e m\u00e6g,\n- 2765\n- \n gold on grunde, \u00a0 \u00a0 \u00a0 \u00a0 gumcynnes gehwone \n oferhigian, \u00a0 \u00a0 \u00a0 \u00a0 hyde se \u00f0e wylle.\n Swylce he siomian geseah \u00a0 \u00a0 \u00a0 \u00a0 segn eallgylden\n heah ofer horde, \u00a0 \u00a0 \u00a0 \u00a0 hondwundra m\u00e6st,\n gelocen leo\u00f0ocr\u00e6ftum; \u00a0 \u00a0 \u00a0 \u00a0 of \u00f0am leoma stod,\n- 2770\n- \n \u00fe\u00e6t he \u00feone grundwong \u00a0 \u00a0 \u00a0 \u00a0 ongitan meahte, \n wr\u00e6te giondwlitan. \u00a0 \u00a0 \u00a0 \u00a0 N\u00e6s \u00f0\u00e6s wyrmes \u00fe\u00e6r\n onsyn \u00e6nig, \u00a0 \u00a0 \u00a0 \u00a0 ac hyne ecg fornam.\n \u00f0a ic on hl\u00e6we gefr\u00e6gn \u00a0 \u00a0 \u00a0 \u00a0 hord reafian,\n eald enta geweorc, \u00a0 \u00a0 \u00a0 \u00a0 anne mannan,\n- 2775\n- \n him on bearm hladon \u00a0 \u00a0 \u00a0 \u00a0 bunan ond discas \n sylfes dome; \u00a0 \u00a0 \u00a0 \u00a0 segn eac genom,\n beacna beorhtost. \u00a0 \u00a0 \u00a0 \u00a0 Bill \u00e6r gescod\n (ecg w\u00e6s iren) \u00a0 \u00a0 \u00a0 \u00a0 ealdhlafordes\n \u00feam \u00f0ara ma\u00f0ma \u00a0 \u00a0 \u00a0 \u00a0 mundbora w\u00e6s\n- 2780\n- \n longe hwile, \u00a0 \u00a0 \u00a0 \u00a0 ligegesan w\u00e6g \n hatne for horde, \u00a0 \u00a0 \u00a0 \u00a0 hioroweallende\n middelnihtum, \u00a0 \u00a0 \u00a0 \u00a0 o\u00f0\u00fe\u00e6t he mor\u00f0re swealt.\n Ar w\u00e6s on ofoste, \u00a0 \u00a0 \u00a0 \u00a0 eftsi\u00f0es georn,\n fr\u00e6twum gefyr\u00f0red; \u00a0 \u00a0 \u00a0 \u00a0 hyne fyrwet br\u00e6c,\n- 2785\n- \n hw\u00e6\u00f0er collenfer\u00f0 \u00a0 \u00a0 \u00a0 \u00a0 cwicne gemette \n in \u00f0am wongstede \u00a0 \u00a0 \u00a0 \u00a0 Wedra \u00feeoden\n ellensiocne, \u00a0 \u00a0 \u00a0 \u00a0 \u00fe\u00e6r he hine \u00e6r forlet.\n He \u00f0a mid \u00feam ma\u00f0mum \u00a0 \u00a0 \u00a0 \u00a0 m\u00e6rne \u00feioden,\n dryhten sinne, \u00a0 \u00a0 \u00a0 \u00a0 driorigne fand\n- 2790\n- \n ealdres \u00e6t ende; \u00a0 \u00a0 \u00a0 \u00a0 he hine eft ongon \n w\u00e6teres weorpan, \u00a0 \u00a0 \u00a0 \u00a0 o\u00f0\u00fe\u00e6t wordes ord\n breosthord \u00feurhbr\u00e6c.\n gomel on gioh\u00f0e \u00a0 \u00a0 \u00a0 \u00a0 (gold sceawode):\n \"Ic \u00f0ara fr\u00e6twa \u00a0 \u00a0 \u00a0 \u00a0 frean ealles \u00f0anc,\n- 2795\n- \n wuldurcyninge, \u00a0 \u00a0 \u00a0 \u00a0 wordum secge, \n ecum dryhtne, \u00a0 \u00a0 \u00a0 \u00a0 \u00fee ic her on starie,\n \u00fe\u00e6s \u00f0e ic moste \u00a0 \u00a0 \u00a0 \u00a0 minum leodum\n \u00e6r swyltd\u00e6ge \u00a0 \u00a0 \u00a0 \u00a0 swylc gestrynan.\n Nu ic on ma\u00f0ma hord \u00a0 \u00a0 \u00a0 \u00a0 mine bebohte\n- 2800\n- \n frode feorhlege, \u00a0 \u00a0 \u00a0 \u00a0 fremma\u00f0 gena \n leoda \u00feearfe; \u00a0 \u00a0 \u00a0 \u00a0 ne m\u00e6g ic her leng wesan.\n Hata\u00f0 hea\u00f0om\u00e6re \u00a0 \u00a0 \u00a0 \u00a0 hl\u00e6w gewyrcean\n beorhtne \u00e6fter b\u00e6le \u00a0 \u00a0 \u00a0 \u00a0 \u00e6t brimes nosan;\n se scel to gemyndum \u00a0 \u00a0 \u00a0 \u00a0 minum leodum\n- 2805\n- \n heah hlifian \u00a0 \u00a0 \u00a0 \u00a0 on Hronesn\u00e6sse, \n \u00fe\u00e6t hit s\u00e6li\u00f0end \u00a0 \u00a0 \u00a0 \u00a0 sy\u00f0\u00f0an hatan\n Biowulfes biorh, \u00a0 \u00a0 \u00a0 \u00a0 \u00f0a \u00f0e brentingas\n ofer floda genipu \u00a0 \u00a0 \u00a0 \u00a0 feorran drifa\u00f0.\"\n Dyde him of healse \u00a0 \u00a0 \u00a0 \u00a0 hring gyldenne\n- 2810\n- \n \u00feioden \u00feristhydig, \u00a0 \u00a0 \u00a0 \u00a0 \u00feegne gesealde, \n geongum garwigan, \u00a0 \u00a0 \u00a0 \u00a0 goldfahne helm,\n beah ond byrnan, \u00a0 \u00a0 \u00a0 \u00a0 het hyne brucan well:\n \"\u00feu eart endelaf \u00a0 \u00a0 \u00a0 \u00a0 usses cynnes,\n W\u00e6gmundinga. \u00a0 \u00a0 \u00a0 \u00a0 Ealle wyrd forsweop\n- 2815\n- \n mine magas \u00a0 \u00a0 \u00a0 \u00a0 to metodsceafte, \n eorlas on elne; \u00a0 \u00a0 \u00a0 \u00a0 ic him \u00e6fter sceal.\"\n \u00fe\u00e6t w\u00e6s \u00feam gomelan \u00a0 \u00a0 \u00a0 \u00a0 ging\u00e6ste word\n breostgehygdum, \u00a0 \u00a0 \u00a0 \u00a0 \u00e6r he b\u00e6l cure,\n hate hea\u00f0owylmas; \u00a0 \u00a0 \u00a0 \u00a0 him of hre\u00f0re gewat\n- 2820\n- \n sawol secean \u00a0 \u00a0 \u00a0 \u00a0 so\u00f0f\u00e6stra dom. \n \u00f0a w\u00e6s gegongen \u00a0 \u00a0 \u00a0 \u00a0 guman unfrodum\n earfo\u00f0lice, \u00a0 \u00a0 \u00a0 \u00a0 \u00fe\u00e6t he on eor\u00f0an geseah\n \u00feone leofestan \u00a0 \u00a0 \u00a0 \u00a0 lifes \u00e6t ende\n bleate geb\u00e6ran. \u00a0 \u00a0 \u00a0 \u00a0 Bona swylce l\u00e6g,\n- 2825\n- \n egeslic eor\u00f0draca \u00a0 \u00a0 \u00a0 \u00a0 ealdre bereafod, \n bealwe geb\u00e6ded. \u00a0 \u00a0 \u00a0 \u00a0 Beahhordum leng\n wyrm wohbogen \u00a0 \u00a0 \u00a0 \u00a0 wealdan ne moste,\n ac hine irenna \u00a0 \u00a0 \u00a0 \u00a0 ecga fornamon,\n hearde, hea\u00f0oscearde \u00a0 \u00a0 \u00a0 \u00a0 homera lafe,\n- 2830\n- \n \u00fe\u00e6t se widfloga \u00a0 \u00a0 \u00a0 \u00a0 wundum stille \n hreas on hrusan \u00a0 \u00a0 \u00a0 \u00a0 hord\u00e6rne neah.\n Nalles \u00e6fter lyfte \u00a0 \u00a0 \u00a0 \u00a0 lacende hwearf\n middelnihtum, \u00a0 \u00a0 \u00a0 \u00a0 ma\u00f0m\u00e6hta wlonc\n ansyn ywde, \u00a0 \u00a0 \u00a0 \u00a0 ac he eor\u00f0an gefeoll\n- 2835\n- \n for \u00f0\u00e6s hildfruman \u00a0 \u00a0 \u00a0 \u00a0 hondgeweorce. \n Huru \u00fe\u00e6t on lande \u00a0 \u00a0 \u00a0 \u00a0 lyt manna \u00f0ah,\n m\u00e6genagendra, \u00a0 \u00a0 \u00a0 \u00a0 mine gefr\u00e6ge,\n \u00feeah \u00f0e he d\u00e6da gehw\u00e6s \u00a0 \u00a0 \u00a0 \u00a0 dyrstig w\u00e6re,\n \u00fe\u00e6t he wi\u00f0 attorscea\u00f0an \u00a0 \u00a0 \u00a0 \u00a0 ore\u00f0e ger\u00e6sde,\n- 2840\n- \n o\u00f0\u00f0e hringsele \u00a0 \u00a0 \u00a0 \u00a0 hondum styrede, \n gif he w\u00e6ccende \u00a0 \u00a0 \u00a0 \u00a0 weard onfunde\n buon on beorge. \u00a0 \u00a0 \u00a0 \u00a0 Biowulfe wear\u00f0\n dryhtma\u00f0ma d\u00e6l \u00a0 \u00a0 \u00a0 \u00a0 dea\u00f0e forgolden;\n h\u00e6fde \u00e6ghw\u00e6\u00f0er \u00a0 \u00a0 \u00a0 \u00a0 ende gefered\n- 2845\n- \n l\u00e6nan lifes. \u00a0 \u00a0 \u00a0 \u00a0 N\u00e6s \u00f0a lang to \u00f0on \n \u00fe\u00e6t \u00f0a hildlatan \u00a0 \u00a0 \u00a0 \u00a0 holt ofgefan,\n tydre treowlogan \u00a0 \u00a0 \u00a0 \u00a0 tyne \u00e6tsomne.\n \u00f0a ne dorston \u00e6r \u00a0 \u00a0 \u00a0 \u00a0 dare\u00f0um lacan\n on hyra mandryhtnes \u00a0 \u00a0 \u00a0 \u00a0 miclan \u00feearfe,\n- 2850\n- \n ac hy scamiende \u00a0 \u00a0 \u00a0 \u00a0 scyldas b\u00e6ran, \n gu\u00f0gew\u00e6du, \u00a0 \u00a0 \u00a0 \u00a0 \u00fe\u00e6r se gomela l\u00e6g,\n wlitan on Wilaf. \u00a0 \u00a0 \u00a0 \u00a0 He gewergad s\u00e6t,\n fe\u00f0ecempa, \u00a0 \u00a0 \u00a0 \u00a0 frean eaxlum neah,\n wehte hyne w\u00e6tre; \u00a0 \u00a0 \u00a0 \u00a0 him wiht ne speow.\n- 2855\n- \n Ne meahte he on eor\u00f0an, \u00a0 \u00a0 \u00a0 \u00a0 \u00f0eah he u\u00f0e wel, \n on \u00f0am frumgare \u00a0 \u00a0 \u00a0 \u00a0 feorh gehealdan,\n ne \u00f0\u00e6s wealdendes \u00a0 \u00a0 \u00a0 \u00a0 wiht oncirran;\n wolde dom godes \u00a0 \u00a0 \u00a0 \u00a0 d\u00e6dum r\u00e6dan\n gumena gehwylcum, \u00a0 \u00a0 \u00a0 \u00a0 swa he nu gen de\u00f0.\n- 2860\n- \n \u00fea w\u00e6s \u00e6t \u00f0am geongan \u00a0 \u00a0 \u00a0 \u00a0 grim ondswaru \n e\u00f0begete \u00a0 \u00a0 \u00a0 \u00a0 \u00feam \u00f0e \u00e6r his elne forleas.\n Wiglaf ma\u00f0elode, \u00a0 \u00a0 \u00a0 \u00a0 Weohstanes sunu,\n sec, sarigfer\u00f0 \u00a0 \u00a0 \u00a0 \u00a0 (seah on unleofe):\n \"\u00fe\u00e6t, la, m\u00e6g secgan \u00a0 \u00a0 \u00a0 \u00a0 se \u00f0e wyle so\u00f0 specan\n- 2865\n- \n \u00fe\u00e6t se mondryhten \u00a0 \u00a0 \u00a0 \u00a0 se eow \u00f0a ma\u00f0mas geaf, \n eoredgeatwe, \u00a0 \u00a0 \u00a0 \u00a0 \u00fee ge \u00fe\u00e6r on standa\u00f0,\n \u00feonne he on ealubence \u00a0 \u00a0 \u00a0 \u00a0 oft gesealde\n healsittendum \u00a0 \u00a0 \u00a0 \u00a0 helm ond byrnan,\n \u00feeoden his \u00feegnum, \u00a0 \u00a0 \u00a0 \u00a0 swylce he \u00ferydlicost\n- 2870\n- \n ower feor o\u00f0\u00f0e neah \u00a0 \u00a0 \u00a0 \u00a0 findan meahte, \n \u00fe\u00e6t he genunga \u00a0 \u00a0 \u00a0 \u00a0 gu\u00f0gew\u00e6du\n wra\u00f0e forwurpe, \u00a0 \u00a0 \u00a0 \u00a0 \u00f0a hyne wig beget.\n Nealles folccyning \u00a0 \u00a0 \u00a0 \u00a0 fyrdgesteallum\n gylpan \u00feorfte; \u00a0 \u00a0 \u00a0 \u00a0 hw\u00e6\u00f0re him god u\u00f0e,\n- 2875\n- \n sigora waldend, \u00a0 \u00a0 \u00a0 \u00a0 \u00fe\u00e6t he hyne sylfne gewr\u00e6c \n ana mid ecge, \u00a0 \u00a0 \u00a0 \u00a0 \u00fea him w\u00e6s elnes \u00feearf.\n Ic him lifwra\u00f0e \u00a0 \u00a0 \u00a0 \u00a0 lytle meahte\n \u00e6tgifan \u00e6t gu\u00f0e, \u00a0 \u00a0 \u00a0 \u00a0 ond ongan swa \u00feeah\n ofer min gemet \u00a0 \u00a0 \u00a0 \u00a0 m\u00e6ges helpan;\n- 2880\n- \n symle w\u00e6s \u00fey s\u00e6mra, \u00a0 \u00a0 \u00a0 \u00a0 \u00feonne ic sweorde drep \n ferh\u00f0geni\u00f0lan, \u00a0 \u00a0 \u00a0 \u00a0 fyr unswi\u00f0or\n weoll of gewitte. \u00a0 \u00a0 \u00a0 \u00a0 Wergendra to lyt\n \u00ferong ymbe \u00feeoden, \u00a0 \u00a0 \u00a0 \u00a0 \u00fea hyne sio \u00ferag becwom.\n Nu sceal sinc\u00feego \u00a0 \u00a0 \u00a0 \u00a0 ond swyrdgifu,\n- 2885\n- \n eall e\u00f0elwyn \u00a0 \u00a0 \u00a0 \u00a0 eowrum cynne, \n lufen alicgean; \u00a0 \u00a0 \u00a0 \u00a0 londrihtes mot\n \u00fe\u00e6re m\u00e6gburge \u00a0 \u00a0 \u00a0 \u00a0 monna \u00e6ghwylc\n idel hweorfan, \u00a0 \u00a0 \u00a0 \u00a0 sy\u00f0\u00f0an \u00e6\u00f0elingas\n feorran gefricgean \u00a0 \u00a0 \u00a0 \u00a0 fleam eowerne,\n- 2890\n- \n domleasan d\u00e6d. \u00a0 \u00a0 \u00a0 \u00a0 Dea\u00f0 bi\u00f0 sella \n eorla gehwylcum \u00a0 \u00a0 \u00a0 \u00a0 \u00feonne edwitlif!\"\n Heht \u00f0a \u00fe\u00e6t hea\u00f0oweorc \u00a0 \u00a0 \u00a0 \u00a0 to hagan biodan\n up ofer ecgclif, \u00a0 \u00a0 \u00a0 \u00a0 \u00fe\u00e6r \u00fe\u00e6t eorlweorod\n morgenlongne d\u00e6g \u00a0 \u00a0 \u00a0 \u00a0 modgiomor s\u00e6t,\n- 2895\n- \n bordh\u00e6bbende, \u00a0 \u00a0 \u00a0 \u00a0 bega on wenum, \n endedogores \u00a0 \u00a0 \u00a0 \u00a0 ond eftcymes\n leofes monnes. \u00a0 \u00a0 \u00a0 \u00a0 Lyt swigode\n niwra spella \u00a0 \u00a0 \u00a0 \u00a0 se \u00f0e n\u00e6s gerad,\n ac he so\u00f0lice \u00a0 \u00a0 \u00a0 \u00a0 s\u00e6gde ofer ealle:\n- 2900\n- \n \"Nu is wilgeofa \u00a0 \u00a0 \u00a0 \u00a0 Wedra leoda, \n dryhten Geata, \u00a0 \u00a0 \u00a0 \u00a0 dea\u00f0bedde f\u00e6st,\n wuna\u00f0 w\u00e6lreste \u00a0 \u00a0 \u00a0 \u00a0 wyrmes d\u00e6dum.\n Him on efn lige\u00f0 \u00a0 \u00a0 \u00a0 \u00a0 ealdorgewinna\n sexbennum seoc; \u00a0 \u00a0 \u00a0 \u00a0 sweorde ne meahte\n- 2905\n- \n on \u00f0am agl\u00e6cean \u00a0 \u00a0 \u00a0 \u00a0 \u00e6nige \u00feinga \n wunde gewyrcean. \u00a0 \u00a0 \u00a0 \u00a0 Wiglaf site\u00f0\n ofer Biowulfe, \u00a0 \u00a0 \u00a0 \u00a0 byre Wihstanes,\n eorl ofer o\u00f0rum \u00a0 \u00a0 \u00a0 \u00a0 unlifigendum,\n healde\u00f0 higem\u00e6\u00f0um \u00a0 \u00a0 \u00a0 \u00a0 heafodwearde\n- 2910\n- \n leofes ond la\u00f0es. \u00a0 \u00a0 \u00a0 \u00a0 Nu ys leodum wen \n orleghwile, \u00a0 \u00a0 \u00a0 \u00a0 sy\u00f0\u00f0an underne\n Froncum ond Frysum \u00a0 \u00a0 \u00a0 \u00a0 fyll cyninges\n wide weor\u00f0e\u00f0. \u00a0 \u00a0 \u00a0 \u00a0 W\u00e6s sio wroht scepen\n heard wi\u00f0 Hugas, \u00a0 \u00a0 \u00a0 \u00a0 sy\u00f0\u00f0an Higelac cwom\n- 2915\n- \n faran flotherge \u00a0 \u00a0 \u00a0 \u00a0 on Fresna land, \n \u00fe\u00e6r hyne Hetware \u00a0 \u00a0 \u00a0 \u00a0 hilde gen\u00e6gdon,\n elne geeodon \u00a0 \u00a0 \u00a0 \u00a0 mid oferm\u00e6gene,\n \u00fe\u00e6t se byrnwiga \u00a0 \u00a0 \u00a0 \u00a0 bugan sceolde,\n feoll on fe\u00f0an, \u00a0 \u00a0 \u00a0 \u00a0 nalles fr\u00e6twe geaf\n- 2920\n- \n ealdor dugo\u00f0e. \u00a0 \u00a0 \u00a0 \u00a0 Us w\u00e6s a sy\u00f0\u00f0an \n Merewioingas \u00a0 \u00a0 \u00a0 \u00a0 milts ungyfe\u00f0e.\n Ne ic to Sweo\u00f0eode \u00a0 \u00a0 \u00a0 \u00a0 sibbe o\u00f0\u00f0e treowe\n wihte ne wene, \u00a0 \u00a0 \u00a0 \u00a0 ac w\u00e6s wide cu\u00f0\n \u00fe\u00e6tte Ongen\u00f0io \u00a0 \u00a0 \u00a0 \u00a0 ealdre besny\u00f0ede\n- 2925\n- \n H\u00e6\u00f0cen Hre\u00feling \u00a0 \u00a0 \u00a0 \u00a0 wi\u00f0 Hrefnawudu, \n \u00fea for onmedlan \u00a0 \u00a0 \u00a0 \u00a0 \u00e6rest gesohton\n Geata leode \u00a0 \u00a0 \u00a0 \u00a0 Gu\u00f0scilfingas.\n Sona him se froda \u00a0 \u00a0 \u00a0 \u00a0 f\u00e6der Ohtheres,\n eald ond egesfull, \u00a0 \u00a0 \u00a0 \u00a0 ondslyht ageaf,\n- 2930\n- \n abreot brimwisan, \u00a0 \u00a0 \u00a0 \u00a0 bryd ahredde, \n gomela iomeowlan \u00a0 \u00a0 \u00a0 \u00a0 golde berofene,\n Onelan modor \u00a0 \u00a0 \u00a0 \u00a0 ond Ohtheres,\n ond \u00f0a folgode \u00a0 \u00a0 \u00a0 \u00a0 feorhgeni\u00f0lan,\n o\u00f0\u00f0\u00e6t hi o\u00f0eodon \u00a0 \u00a0 \u00a0 \u00a0 earfo\u00f0lice\n- 2935\n- \n in Hrefnesholt \u00a0 \u00a0 \u00a0 \u00a0 hlafordlease. \n Bes\u00e6t \u00f0a sinherge \u00a0 \u00a0 \u00a0 \u00a0 sweorda lafe,\n wundum werge, \u00a0 \u00a0 \u00a0 \u00a0 wean oft gehet\n earmre teohhe \u00a0 \u00a0 \u00a0 \u00a0 ondlonge niht,\n cw\u00e6\u00f0, he on mergenne \u00a0 \u00a0 \u00a0 \u00a0 meces ecgum\n- 2940\n- \n getan wolde, \u00a0 \u00a0 \u00a0 \u00a0 sum on galgtreowum \n fuglum to gamene. \u00a0 \u00a0 \u00a0 \u00a0 Frofor eft gelamp\n sarigmodum \u00a0 \u00a0 \u00a0 \u00a0 somod \u00e6rd\u00e6ge,\n sy\u00f0\u00f0an hie Hygelaces \u00a0 \u00a0 \u00a0 \u00a0 horn ond byman,\n gealdor ongeaton, \u00a0 \u00a0 \u00a0 \u00a0 \u00fea se goda com\n- 2945\n- \n leoda dugo\u00f0e \u00a0 \u00a0 \u00a0 \u00a0 on last faran. \n W\u00e6s sio swatswa\u00f0u \u00a0 \u00a0 \u00a0 \u00a0 Sweona ond Geata,\n w\u00e6lr\u00e6s weora \u00a0 \u00a0 \u00a0 \u00a0 wide gesyne,\n hu \u00f0a folc mid him \u00a0 \u00a0 \u00a0 \u00a0 f\u00e6h\u00f0e towehton.\n Gewat him \u00f0a se goda \u00a0 \u00a0 \u00a0 \u00a0 mid his g\u00e6delingum,\n- 2950\n- \n frod, felageomor, \u00a0 \u00a0 \u00a0 \u00a0 f\u00e6sten secean, \n eorl Ongen\u00feio, \u00a0 \u00a0 \u00a0 \u00a0 ufor oncirde;\n h\u00e6fde Higelaces \u00a0 \u00a0 \u00a0 \u00a0 hilde gefrunen,\n wlonces wigcr\u00e6ft, \u00a0 \u00a0 \u00a0 \u00a0 wi\u00f0res ne truwode,\n \u00fe\u00e6t he s\u00e6mannum \u00a0 \u00a0 \u00a0 \u00a0 onsacan mihte,\n- 2955\n- \n hea\u00f0oli\u00f0endum \u00a0 \u00a0 \u00a0 \u00a0 hord forstandan, \n bearn ond bryde; \u00a0 \u00a0 \u00a0 \u00a0 beah eft \u00feonan\n eald under eor\u00f0weall. \u00a0 \u00a0 \u00a0 \u00a0 \u00fea w\u00e6s \u00e6ht boden\n Sweona leodum, \u00a0 \u00a0 \u00a0 \u00a0 segn Higelaces\n freo\u00f0owong \u00feone \u00a0 \u00a0 \u00a0 \u00a0 for\u00f0 ofereodon,\n- 2960\n- \n sy\u00f0\u00f0an Hre\u00f0lingas \u00a0 \u00a0 \u00a0 \u00a0 to hagan \u00ferungon. \n \u00fe\u00e6r wear\u00f0 Ongen\u00f0iow \u00a0 \u00a0 \u00a0 \u00a0 ecgum sweorda,\n blondenfexa, \u00a0 \u00a0 \u00a0 \u00a0 on bid wrecen,\n \u00fe\u00e6t se \u00feeodcyning \u00a0 \u00a0 \u00a0 \u00a0 \u00f0afian sceolde\n Eafores anne dom. \u00a0 \u00a0 \u00a0 \u00a0 Hyne yrringa\n- 2965\n- \n Wulf Wonreding \u00a0 \u00a0 \u00a0 \u00a0 w\u00e6pne ger\u00e6hte, \n \u00fe\u00e6t him for swenge \u00a0 \u00a0 \u00a0 \u00a0 swat \u00e6drum sprong\n for\u00f0 under fexe. \u00a0 \u00a0 \u00a0 \u00a0 N\u00e6s he forht swa \u00f0eh,\n gomela Scilfing, \u00a0 \u00a0 \u00a0 \u00a0 ac forgeald hra\u00f0e\n wyrsan wrixle \u00a0 \u00a0 \u00a0 \u00a0 w\u00e6lhlem \u00feone,\n- 2970\n- \n sy\u00f0\u00f0an \u00f0eodcyning \u00a0 \u00a0 \u00a0 \u00a0 \u00feyder oncirde. \n Ne meahte se snella \u00a0 \u00a0 \u00a0 \u00a0 sunu Wonredes\n ealdum ceorle \u00a0 \u00a0 \u00a0 \u00a0 ondslyht giofan,\n ac he him on heafde \u00a0 \u00a0 \u00a0 \u00a0 helm \u00e6r gescer,\n \u00fe\u00e6t he blode fah \u00a0 \u00a0 \u00a0 \u00a0 bugan sceolde,\n- 2975\n- \n feoll on foldan; \u00a0 \u00a0 \u00a0 \u00a0 n\u00e6s he f\u00e6ge \u00fea git, \n ac he hyne gewyrpte, \u00a0 \u00a0 \u00a0 \u00a0 \u00feeah \u00f0e him wund hrine.\n Let se hearda \u00a0 \u00a0 \u00a0 \u00a0 Higelaces \u00feegn\n bradne mece, \u00a0 \u00a0 \u00a0 \u00a0 \u00fea his bro\u00f0or l\u00e6g,\n eald sweord eotonisc, \u00a0 \u00a0 \u00a0 \u00a0 entiscne helm\n- 2980\n- \n brecan ofer bordweal; \u00a0 \u00a0 \u00a0 \u00a0 \u00f0a gebeah cyning, \n folces hyrde, \u00a0 \u00a0 \u00a0 \u00a0 w\u00e6s in feorh dropen.\n \u00f0a w\u00e6ron monige \u00a0 \u00a0 \u00a0 \u00a0 \u00fee his m\u00e6g wri\u00f0on,\n ricone ar\u00e6rdon, \u00a0 \u00a0 \u00a0 \u00a0 \u00f0a him gerymed wear\u00f0\n \u00fe\u00e6t hie w\u00e6lstowe \u00a0 \u00a0 \u00a0 \u00a0 wealdan moston.\n- 2985\n- \n \u00feenden reafode \u00a0 \u00a0 \u00a0 \u00a0 rinc o\u00f0erne, \n nam on Ongen\u00f0io \u00a0 \u00a0 \u00a0 \u00a0 irenbyrnan,\n heard swyrd hilted \u00a0 \u00a0 \u00a0 \u00a0 ond his helm somod,\n hares hyrste \u00a0 \u00a0 \u00a0 \u00a0 Higelace b\u00e6r.\n He \u00f0am fr\u00e6twum feng \u00a0 \u00a0 \u00a0 \u00a0 ond him f\u00e6gre gehet\n- 2990\n- \n leana mid leodum, \u00a0 \u00a0 \u00a0 \u00a0 ond gel\u00e6ste swa; \n geald \u00feone gu\u00f0r\u00e6s \u00a0 \u00a0 \u00a0 \u00a0 Geata dryhten,\n Hre\u00f0les eafora, \u00a0 \u00a0 \u00a0 \u00a0 \u00fea he to ham becom,\n Iofore ond Wulfe \u00a0 \u00a0 \u00a0 \u00a0 mid oferma\u00f0mum,\n sealde hiora gehw\u00e6\u00f0rum \u00a0 \u00a0 \u00a0 \u00a0 hund \u00feusenda\n- 2995\n- \n landes ond locenra beaga \u00a0 \u00a0 \u00a0 \u00a0 (ne \u00f0orfte him \u00f0a lean o\u00f0witan \n mon on middangearde), \u00a0 \u00a0 \u00a0 \u00a0 sy\u00f0\u00f0an hie \u00f0a m\u00e6r\u00f0a geslogon,\n ond \u00f0a Iofore forgeaf \u00a0 \u00a0 \u00a0 \u00a0 angan dohtor,\n hamweor\u00f0unge, \u00a0 \u00a0 \u00a0 \u00a0 hyldo to wedde.\n \u00fe\u00e6t ys sio f\u00e6h\u00f0o \u00a0 \u00a0 \u00a0 \u00a0 ond se feondscipe,\n- 3000\n- \n w\u00e6lni\u00f0 wera, \u00a0 \u00a0 \u00a0 \u00a0 \u00f0\u00e6s \u00f0e ic wen hafo, \n \u00fee us secea\u00f0 to \u00a0 \u00a0 \u00a0 \u00a0 Sweona leoda,\n sy\u00f0\u00f0an hie gefricgea\u00f0 \u00a0 \u00a0 \u00a0 \u00a0 frean userne\n ealdorleasne, \u00a0 \u00a0 \u00a0 \u00a0 \u00feone \u00f0e \u00e6r geheold\n wi\u00f0 hettendum \u00a0 \u00a0 \u00a0 \u00a0 hord ond rice\n- 3005\n- \n \u00e6fter h\u00e6le\u00f0a hryre, \u00a0 \u00a0 \u00a0 \u00a0 hwate Scildingas, \n folcred fremede \u00a0 \u00a0 \u00a0 \u00a0 o\u00f0\u00f0e fur\u00f0ur gen\n eorlscipe efnde. \u00a0 \u00a0 \u00a0 \u00a0 Nu is ofost betost\n \u00fe\u00e6t we \u00feeodcyning \u00a0 \u00a0 \u00a0 \u00a0 \u00fe\u00e6r sceawian\n ond \u00feone gebringan, \u00a0 \u00a0 \u00a0 \u00a0 \u00fee us beagas geaf,\n- 3010\n- \n on adf\u00e6re. \u00a0 \u00a0 \u00a0 \u00a0 Ne scel anes hw\u00e6t \n meltan mid \u00feam modigan, \u00a0 \u00a0 \u00a0 \u00a0 ac \u00fe\u00e6r is ma\u00f0ma hord,\n gold unrime \u00a0 \u00a0 \u00a0 \u00a0 grimme geceapod,\n ond nu \u00e6t si\u00f0estan \u00a0 \u00a0 \u00a0 \u00a0 sylfes feore\n beagas gebohte. \u00a0 \u00a0 \u00a0 \u00a0 \u00fea sceall brond fretan,\n- 3015\n- \n \u00e6led \u00feeccean, \u00a0 \u00a0 \u00a0 \u00a0 nalles eorl wegan \n ma\u00f0\u00f0um to gemyndum, \u00a0 \u00a0 \u00a0 \u00a0 ne m\u00e6g\u00f0 scyne\n habban on healse \u00a0 \u00a0 \u00a0 \u00a0 hringweor\u00f0unge,\n ac sceal geomormod, \u00a0 \u00a0 \u00a0 \u00a0 golde bereafod,\n oft nalles \u00e6ne \u00a0 \u00a0 \u00a0 \u00a0 elland tredan,\n- 3020\n- \n nu se herewisa \u00a0 \u00a0 \u00a0 \u00a0 hleahtor alegde, \n gamen ond gleodream. \u00a0 \u00a0 \u00a0 \u00a0 For\u00f0on sceall gar wesan\n monig, morgenceald, \u00a0 \u00a0 \u00a0 \u00a0 mundum bewunden,\n h\u00e6fen on handa, \u00a0 \u00a0 \u00a0 \u00a0 nalles hearpan sweg\n wigend weccean, \u00a0 \u00a0 \u00a0 \u00a0 ac se wonna hrefn\n- 3025\n- \n fus ofer f\u00e6gum \u00a0 \u00a0 \u00a0 \u00a0 fela reordian, \n earne secgan \u00a0 \u00a0 \u00a0 \u00a0 hu him \u00e6t \u00e6te speow,\n \u00feenden he wi\u00f0 wulf \u00a0 \u00a0 \u00a0 \u00a0 w\u00e6l reafode.\"\n Swa se secg hwata \u00a0 \u00a0 \u00a0 \u00a0 secggende w\u00e6s\n la\u00f0ra spella; \u00a0 \u00a0 \u00a0 \u00a0 he ne leag fela\n- 3030\n- \n wyrda ne worda. \u00a0 \u00a0 \u00a0 \u00a0 Weorod eall aras; \n eodon unbli\u00f0e \u00a0 \u00a0 \u00a0 \u00a0 under Earnan\u00e6s,\n wollenteare \u00a0 \u00a0 \u00a0 \u00a0 wundur sceawian.\n Fundon \u00f0a on sande \u00a0 \u00a0 \u00a0 \u00a0 sawulleasne\n hlimbed healdan \u00a0 \u00a0 \u00a0 \u00a0 \u00feone \u00fee him hringas geaf\n- 3035\n- \n \u00e6rran m\u00e6lum; \u00a0 \u00a0 \u00a0 \u00a0 \u00fea w\u00e6s ended\u00e6g \n godum gegongen, \u00a0 \u00a0 \u00a0 \u00a0 \u00fe\u00e6t se gu\u00f0cyning,\n Wedra \u00feeoden, \u00a0 \u00a0 \u00a0 \u00a0 wundordea\u00f0e swealt.\n \u00e6r hi \u00fe\u00e6r gesegan \u00a0 \u00a0 \u00a0 \u00a0 syllicran wiht,\n wyrm on wonge \u00a0 \u00a0 \u00a0 \u00a0 wi\u00f0err\u00e6htes \u00fe\u00e6r\n- 3040\n- \n la\u00f0ne licgean; \u00a0 \u00a0 \u00a0 \u00a0 w\u00e6s se legdraca \n grimlic, gryrefah, \u00a0 \u00a0 \u00a0 \u00a0 gledum besw\u00e6led.\n Se w\u00e6s fiftiges \u00a0 \u00a0 \u00a0 \u00a0 fotgemearces\n lang on legere, \u00a0 \u00a0 \u00a0 \u00a0 lyftwynne heold\n nihtes hwilum, \u00a0 \u00a0 \u00a0 \u00a0 ny\u00f0er eft gewat\n- 3045\n- \n dennes niosian; \u00a0 \u00a0 \u00a0 \u00a0 w\u00e6s \u00f0a dea\u00f0e f\u00e6st, \n h\u00e6fde eor\u00f0scrafa \u00a0 \u00a0 \u00a0 \u00a0 ende genyttod.\n Him big stodan \u00a0 \u00a0 \u00a0 \u00a0 bunan ond orcas,\n discas lagon \u00a0 \u00a0 \u00a0 \u00a0 ond dyre swyrd,\n omige, \u00feurhetone, \u00a0 \u00a0 \u00a0 \u00a0 swa hie wi\u00f0 eor\u00f0an f\u00e6\u00f0m\n- 3050\n- \n \u00feusend wintra \u00a0 \u00a0 \u00a0 \u00a0 \u00fe\u00e6r eardodon. \n \u00feonne w\u00e6s \u00fe\u00e6t yrfe, \u00a0 \u00a0 \u00a0 \u00a0 eacencr\u00e6ftig,\n iumonna gold \u00a0 \u00a0 \u00a0 \u00a0 galdre bewunden,\n \u00fe\u00e6t \u00f0am hringsele \u00a0 \u00a0 \u00a0 \u00a0 hrinan ne moste\n gumena \u00e6nig, \u00a0 \u00a0 \u00a0 \u00a0 nefne god sylfa,\n- 3055\n- \n sigora so\u00f0cyning, \u00a0 \u00a0 \u00a0 \u00a0 sealde \u00feam \u00f0e he wolde \n (he is manna gehyld) \u00a0 \u00a0 \u00a0 \u00a0 hord openian,\n efne swa hwylcum manna \u00a0 \u00a0 \u00a0 \u00a0 swa him gemet \u00f0uhte.\n \u00fea w\u00e6s gesyne \u00a0 \u00a0 \u00a0 \u00a0 \u00fe\u00e6t se si\u00f0 ne \u00f0ah\n \u00feam \u00f0e unrihte \u00a0 \u00a0 \u00a0 \u00a0 inne gehydde\n- 3060\n- \n wr\u00e6te under wealle. \u00a0 \u00a0 \u00a0 \u00a0 Weard \u00e6r ofsloh \n feara sumne; \u00a0 \u00a0 \u00a0 \u00a0 \u00fea sio f\u00e6h\u00f0 gewear\u00f0\n gewrecen wra\u00f0lice. \u00a0 \u00a0 \u00a0 \u00a0 Wundur hwar \u00feonne\n eorl ellenrof \u00a0 \u00a0 \u00a0 \u00a0 ende gefere\n lifgesceafta, \u00a0 \u00a0 \u00a0 \u00a0 \u00feonne leng ne m\u00e6g\n- 3065\n- \n mon mid his magum \u00a0 \u00a0 \u00a0 \u00a0 meduseld buan. \n Swa w\u00e6s Biowulfe, \u00a0 \u00a0 \u00a0 \u00a0 \u00fea he biorges weard\n sohte, searoni\u00f0as; \u00a0 \u00a0 \u00a0 \u00a0 seolfa ne cu\u00f0e\n \u00feurh hw\u00e6t his worulde gedal \u00a0 \u00a0 \u00a0 \u00a0 weor\u00f0an sceolde.\n Swa hit o\u00f0 domes d\u00e6g \u00a0 \u00a0 \u00a0 \u00a0 diope benemdon\n- 3070\n- \n \u00feeodnas m\u00e6re, \u00a0 \u00a0 \u00a0 \u00a0 \u00fea \u00f0\u00e6t \u00fe\u00e6r dydon, \n \u00fe\u00e6t se secg w\u00e6re \u00a0 \u00a0 \u00a0 \u00a0 synnum scildig,\n hergum gehea\u00f0erod, \u00a0 \u00a0 \u00a0 \u00a0 hellbendum f\u00e6st,\n wommum gewitnad, \u00a0 \u00a0 \u00a0 \u00a0 se \u00f0one wong strude,\n n\u00e6s he goldhw\u00e6te \u00a0 \u00a0 \u00a0 \u00a0 gearwor h\u00e6fde\n- 3075\n- \n agendes est \u00a0 \u00a0 \u00a0 \u00a0 \u00e6r gesceawod. \n Wiglaf ma\u00f0elode, \u00a0 \u00a0 \u00a0 \u00a0 Wihstanes sunu:\n \"Oft sceall eorl monig \u00a0 \u00a0 \u00a0 \u00a0 anes willan\n wr\u00e6c adreogan, \u00a0 \u00a0 \u00a0 \u00a0 swa us geworden is.\n Ne meahton we gel\u00e6ran \u00a0 \u00a0 \u00a0 \u00a0 leofne \u00feeoden,\n- 3080\n- \n rices hyrde, \u00a0 \u00a0 \u00a0 \u00a0 r\u00e6d \u00e6nigne, \n \u00fe\u00e6t he ne grette \u00a0 \u00a0 \u00a0 \u00a0 goldweard \u00feone,\n lete hyne licgean \u00a0 \u00a0 \u00a0 \u00a0 \u00fe\u00e6r he longe w\u00e6s,\n wicum wunian \u00a0 \u00a0 \u00a0 \u00a0 o\u00f0 woruldende;\n heold on heahgesceap. \u00a0 \u00a0 \u00a0 \u00a0 Hord ys gesceawod,\n- 3085\n- \n grimme gegongen; \u00a0 \u00a0 \u00a0 \u00a0 w\u00e6s \u00fe\u00e6t gife\u00f0e to swi\u00f0 \n \u00fee \u00f0one \u00feeodcyning \u00a0 \u00a0 \u00a0 \u00a0 \u00feyder ontyhte.\n Ic w\u00e6s \u00fe\u00e6r inne \u00a0 \u00a0 \u00a0 \u00a0 ond \u00fe\u00e6t eall geondseh,\n recedes geatwa, \u00a0 \u00a0 \u00a0 \u00a0 \u00fea me gerymed w\u00e6s,\n nealles sw\u00e6slice \u00a0 \u00a0 \u00a0 \u00a0 si\u00f0 alyfed\n- 3090\n- \n inn under eor\u00f0weall. \u00a0 \u00a0 \u00a0 \u00a0 Ic on ofoste gefeng \n micle mid mundum \u00a0 \u00a0 \u00a0 \u00a0 m\u00e6genbyr\u00f0enne\n hordgestreona, \u00a0 \u00a0 \u00a0 \u00a0 hider ut \u00e6tb\u00e6r\n cyninge minum. \u00a0 \u00a0 \u00a0 \u00a0 Cwico w\u00e6s \u00fea gena,\n wis ond gewittig; \u00a0 \u00a0 \u00a0 \u00a0 worn eall gespr\u00e6c\n- 3095\n- \n gomol on geh\u00f0o \u00a0 \u00a0 \u00a0 \u00a0 ond eowic gretan het, \n b\u00e6d \u00fe\u00e6t ge geworhton \u00a0 \u00a0 \u00a0 \u00a0 \u00e6fter wines d\u00e6dum\n in b\u00e6lstede \u00a0 \u00a0 \u00a0 \u00a0 beorh \u00feone hean,\n micelne ond m\u00e6rne, \u00a0 \u00a0 \u00a0 \u00a0 swa he manna w\u00e6s\n wigend weor\u00f0fullost \u00a0 \u00a0 \u00a0 \u00a0 wide geond eor\u00f0an,\n- 3100\n- \n \u00feenden he burhwelan \u00a0 \u00a0 \u00a0 \u00a0 brucan moste. \n Uton nu efstan \u00a0 \u00a0 \u00a0 \u00a0 o\u00f0re si\u00f0e,\n seon ond secean \u00a0 \u00a0 \u00a0 \u00a0 searogimma ge\u00fer\u00e6c,\n wundur under wealle; \u00a0 \u00a0 \u00a0 \u00a0 ic eow wisige,\n \u00fe\u00e6t ge genoge \u00a0 \u00a0 \u00a0 \u00a0 neon sceawia\u00f0\n- 3105\n- \n beagas ond brad gold. \u00a0 \u00a0 \u00a0 \u00a0 Sie sio b\u00e6r gearo, \n \u00e6dre ge\u00e6fned, \u00a0 \u00a0 \u00a0 \u00a0 \u00feonne we ut cymen,\n ond \u00feonne geferian \u00a0 \u00a0 \u00a0 \u00a0 frean userne,\n leofne mannan, \u00a0 \u00a0 \u00a0 \u00a0 \u00fe\u00e6r he longe sceal\n on \u00f0\u00e6s waldendes \u00a0 \u00a0 \u00a0 \u00a0 w\u00e6re ge\u00feolian.\"\n- 3110\n- \n Het \u00f0a gebeodan \u00a0 \u00a0 \u00a0 \u00a0 byre Wihstanes, \n h\u00e6le hildedior, \u00a0 \u00a0 \u00a0 \u00a0 h\u00e6le\u00f0a monegum,\n boldagendra, \u00a0 \u00a0 \u00a0 \u00a0 \u00fe\u00e6t hie b\u00e6lwudu\n feorran feredon, \u00a0 \u00a0 \u00a0 \u00a0 folcagende,\n godum togenes: \u00a0 \u00a0 \u00a0 \u00a0 \"Nu sceal gled fretan,\n- 3115\n- \n weaxan wonna leg \u00a0 \u00a0 \u00a0 \u00a0 wigena strengel, \n \u00feone \u00f0e oft gebad \u00a0 \u00a0 \u00a0 \u00a0 isernscure,\n \u00feonne str\u00e6la storm \u00a0 \u00a0 \u00a0 \u00a0 strengum geb\u00e6ded\n scoc ofer scildweall, \u00a0 \u00a0 \u00a0 \u00a0 sceft nytte heold,\n fe\u00f0ergearwum fus \u00a0 \u00a0 \u00a0 \u00a0 flane fulleode.\"\n- 3120\n- \n Huru se snotra \u00a0 \u00a0 \u00a0 \u00a0 sunu Wihstanes \n acigde of cor\u00f0re \u00a0 \u00a0 \u00a0 \u00a0 cyninges \u00feegnas\n syfone tosomne, \u00a0 \u00a0 \u00a0 \u00a0 \u00fea selestan,\n eode eahta sum \u00a0 \u00a0 \u00a0 \u00a0 under inwithrof\n hilderinca; \u00a0 \u00a0 \u00a0 \u00a0 sum on handa b\u00e6r\n- 3125\n- \n \u00e6ledleoman, \u00a0 \u00a0 \u00a0 \u00a0 se \u00f0e on orde geong. \n N\u00e6s \u00f0a on hlytme \u00a0 \u00a0 \u00a0 \u00a0 hwa \u00fe\u00e6t hord strude,\n sy\u00f0\u00f0an orwearde \u00a0 \u00a0 \u00a0 \u00a0 \u00e6nigne d\u00e6l\n secgas gesegon \u00a0 \u00a0 \u00a0 \u00a0 on sele wunian,\n l\u00e6ne licgan; \u00a0 \u00a0 \u00a0 \u00a0 lyt \u00e6nig mearn\n- 3130\n- \n \u00fe\u00e6t hi ofostlice \u00a0 \u00a0 \u00a0 \u00a0 ut geferedon \n dyre ma\u00f0mas. \u00a0 \u00a0 \u00a0 \u00a0 Dracan ec scufun,\n wyrm ofer weallclif, \u00a0 \u00a0 \u00a0 \u00a0 leton weg niman,\n flod f\u00e6\u00f0mian \u00a0 \u00a0 \u00a0 \u00a0 fr\u00e6twa hyrde.\n \u00fea w\u00e6s wunden gold \u00a0 \u00a0 \u00a0 \u00a0 on w\u00e6n hladen,\n- 3135\n- \n \u00e6ghw\u00e6s unrim, \u00a0 \u00a0 \u00a0 \u00a0 \u00e6\u00feeling boren, \n har hilderinc \u00a0 \u00a0 \u00a0 \u00a0 to Hronesn\u00e6sse.\n Him \u00f0a gegiredan \u00a0 \u00a0 \u00a0 \u00a0 Geata leode\n ad on eor\u00f0an \u00a0 \u00a0 \u00a0 \u00a0 unwaclicne,\n helmum behongen, \u00a0 \u00a0 \u00a0 \u00a0 hildebordum,\n- 3140\n- \n beorhtum byrnum, \u00a0 \u00a0 \u00a0 \u00a0 swa he bena w\u00e6s; \n alegdon \u00f0a tomiddes \u00a0 \u00a0 \u00a0 \u00a0 m\u00e6rne \u00feeoden\n h\u00e6le\u00f0 hiofende, \u00a0 \u00a0 \u00a0 \u00a0 hlaford leofne.\n Ongunnon \u00fea on beorge \u00a0 \u00a0 \u00a0 \u00a0 b\u00e6lfyra m\u00e6st\n wigend weccan; \u00a0 \u00a0 \u00a0 \u00a0 wudurec astah,\n- 3145\n- \n sweart ofer swio\u00f0ole, \u00a0 \u00a0 \u00a0 \u00a0 swogende leg \n wope bewunden \u00a0 \u00a0 \u00a0 \u00a0 (windblond gel\u00e6g),\n o\u00f0\u00fe\u00e6t he \u00f0a banhus \u00a0 \u00a0 \u00a0 \u00a0 gebrocen h\u00e6fde,\n hat on hre\u00f0re. \u00a0 \u00a0 \u00a0 \u00a0 Higum unrote\n modceare m\u00e6ndon, \u00a0 \u00a0 \u00a0 \u00a0 mondryhtnes cwealm;\n- 3150\n- \n swylce giomorgyd \u00a0 \u00a0 \u00a0 \u00a0 Geatisc meowle \n bundenheorde\n song sorgcearig \u00a0 \u00a0 \u00a0 \u00a0 swi\u00f0e geneahhe\n \u00fe\u00e6t hio hyre heofungdagas \u00a0 \u00a0 \u00a0 \u00a0 hearde ondrede,\n w\u00e6lfylla worn, \u00a0 \u00a0 \u00a0 \u00a0 werudes egesan,\n- 3155\n- \n hyn\u00f0o ond h\u00e6ftnyd. \u00a0 \u00a0 \u00a0 \u00a0 Heofon rece swealg. \n Geworhton \u00f0a \u00a0 \u00a0 \u00a0 \u00a0 Wedra leode\n hleo on hoe, \u00a0 \u00a0 \u00a0 \u00a0 se w\u00e6s heah ond brad,\n w\u00e6gli\u00f0endum \u00a0 \u00a0 \u00a0 \u00a0 wide gesyne,\n ond betimbredon \u00a0 \u00a0 \u00a0 \u00a0 on tyn dagum\n- 3160\n- \n beadurofes becn, \u00a0 \u00a0 \u00a0 \u00a0 bronda lafe \n wealle beworhton, \u00a0 \u00a0 \u00a0 \u00a0 swa hyt weor\u00f0licost\n foresnotre men \u00a0 \u00a0 \u00a0 \u00a0 findan mihton.\n Hi on beorg dydon \u00a0 \u00a0 \u00a0 \u00a0 beg ond siglu,\n eall swylce hyrsta, \u00a0 \u00a0 \u00a0 \u00a0 swylce on horde \u00e6r\n- 3165\n- \n ni\u00f0hedige men \u00a0 \u00a0 \u00a0 \u00a0 genumen h\u00e6fdon, \n forleton eorla gestreon \u00a0 \u00a0 \u00a0 \u00a0 eor\u00f0an healdan,\n gold on greote, \u00a0 \u00a0 \u00a0 \u00a0 \u00fe\u00e6r hit nu gen lifa\u00f0\n eldum swa unnyt \u00a0 \u00a0 \u00a0 \u00a0 swa hit \u00e6ror w\u00e6s.\n \u00fea ymbe hl\u00e6w riodan \u00a0 \u00a0 \u00a0 \u00a0 hildediore,\n- 3170\n- \n \u00e6\u00feelinga bearn, \u00a0 \u00a0 \u00a0 \u00a0 ealra twelfe, \n woldon ceare cwi\u00f0an \u00a0 \u00a0 \u00a0 \u00a0 ond kyning m\u00e6nan,\n wordgyd wrecan \u00a0 \u00a0 \u00a0 \u00a0 ond ymb wer sprecan;\n eahtodan eorlscipe \u00a0 \u00a0 \u00a0 \u00a0 ond his ellenweorc\n dugu\u00f0um demdon, \u00a0 \u00a0 \u00a0 \u00a0 swa hit gedefe bi\u00f0\n- 3175\n- \n \u00fe\u00e6t mon his winedryhten \u00a0 \u00a0 \u00a0 \u00a0 wordum herge, \n ferh\u00f0um freoge, \u00a0 \u00a0 \u00a0 \u00a0 \u00feonne he for\u00f0 scile\n of lichaman \u00a0 \u00a0 \u00a0 \u00a0 l\u00e6ded weor\u00f0an.\n Swa begnornodon \u00a0 \u00a0 \u00a0 \u00a0 Geata leode\n hlafordes hryre, \u00a0 \u00a0 \u00a0 \u00a0 heor\u00f0geneatas,\n- 3180\n- \n cw\u00e6don \u00fe\u00e6t he w\u00e6re \u00a0 \u00a0 \u00a0 \u00a0 wyruldcyninga \n manna mildust \u00a0 \u00a0 \u00a0 \u00a0 ond mon\u00f0w\u00e6rust,\n leodum li\u00f0ost \u00a0 \u00a0 \u00a0 \u00a0 ond lofgeornost.","title":"Beowulf","type":"page"}