{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a05_100.htm","path":"neu/ascp/a05_100.htm","source_url":"https://sacred-texts.com/neu/ascp/a05_100.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Paris Psalter: Psalm 100\n Verse Indeterminate Saxon\n \n - \n Mildheortnesse and dom \u00a0\u00a0\u00a0\u00a0 mihtigan drihtnes \n singe and secge, \u00a0\u00a0\u00a0\u00a0 and so\u00f0 ongyte\n on unwemmum wege, \u00a0\u00a0\u00a0\u00a0 hw\u00e6nne \u00feu me wylle to.\n Ic mid unbealuwe \u00a0\u00a0\u00a0\u00a0 ealre heortan\n- 5\n- \n \u00feurh \u00f0in hus middan \u00a0\u00a0\u00a0\u00a0 halig eode. \n Ne sette ic me fore eagum \u00a0\u00a0\u00a0\u00a0 yfele wisan;\n ealle ic feode \u00a0\u00a0\u00a0\u00a0 facnes wyrcend,\n n\u00e6s me wyngesi\u00f0 \u00a0\u00a0\u00a0\u00a0 wi\u00f0erweard heorte.\n Ic awyrgde fram me \u00a0\u00a0\u00a0\u00a0 wende and cyrde;\n- 10\n- \n nolde ic hiora andgit \u00a0\u00a0\u00a0\u00a0 \u00e6nig habban, \n \u00fee t\u00e6lnessa \u00a0\u00a0\u00a0\u00a0 teonan geneahhige\n wi\u00f0 heora \u00feam nehstan \u00a0\u00a0\u00a0\u00a0 ni\u00f0 ahofan;\n \u00feara ic ehte \u00a0\u00a0\u00a0\u00a0 ealra mid ni\u00f0e.\n Oferhydegum eagum, \u00a0\u00a0\u00a0\u00a0 uns\u00e6dre heortan,\n- 15\n- \n nolde ic mid \u00fe\u00e6m men \u00a0\u00a0\u00a0\u00a0 minne mete \u00f0icgean. \n Ofer geleaffulle \u00a0\u00a0\u00a0\u00a0 eor\u00f0bugende\n eagan mine \u00a0\u00a0\u00a0\u00a0 georne sceawedun,\n hw\u00e6r ic tirf\u00e6ste \u00a0\u00a0\u00a0\u00a0 treowe funde,\n \u00fea me symble mid \u00a0\u00a0\u00a0\u00a0 s\u00e6ton and eodon;\n- 20\n- \n he me holdlice \u00a0\u00a0\u00a0\u00a0 her \u00f0egnade. \n Ne earda\u00f0 on midle \u00a0\u00a0\u00a0\u00a0 mines huses,\n \u00fee oferhygd \u00a0\u00a0\u00a0\u00a0 up ahebbe\n o\u00fe\u00fee unriht cwe\u00fean \u00a0\u00a0\u00a0\u00a0 elne wille.\n Ic on morgenne ofslea \u00a0\u00a0\u00a0\u00a0 manes wyrhtan\n- 25\n- \n ealle \u00fee unriht \u00a0\u00a0\u00a0\u00a0 elne worhtan \n and fyrena fela \u00a0\u00a0\u00a0\u00a0 gefremed habba\u00f0;\n ealle ic \u00fea of drihtnes \u00a0\u00a0\u00a0\u00a0 drife ceastre.","title":"The Paris Psalter: Psalm 100","type":"page"}