{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a05_102.htm","path":"neu/ascp/a05_102.htm","source_url":"https://sacred-texts.com/neu/ascp/a05_102.htm","text":"Bletsa, mine sawle, bli\u00f0e drihten,\nand eall min inneran his \u00fe\u00e6ne ecean naman.\nBletsige, mine sawle, bealde dryhten,\nne wylt \u00feu ofergeottul \u00e6fre weor\u00f0an\n5\nealra goda, \u00fee he \u00fee \u00e6r dyde.\nHe \u00feinum mand\u00e6dum miltsade eallum\nand \u00feine adle ealle geh\u00e6lde.\nHe alysde \u00fein lif leof of forwyrde,\nfylde \u00feinne willan f\u00e6gere mid gode.\n10\nHe \u00fee gesigef\u00e6ste so\u00f0re miltse\nand \u00f0e mildheorte mode getrymede;\neart \u00feu edneowe earne gelicast\non geogo\u00f0e nu gleawe geworden.\nHafast \u00feu milde mod, mihta strange,\n15\ndrihten, domas eallum \u00fee deope her\nand ful treaflice teonan \u00feolian.\nHe his wegas dyde wise and cu\u00f0e\nMoyse \u00feam m\u00e6ran on m\u00e6nige tid,\nswylce his willan eac werum Israhela.\n20\nMildheort \u00feu eart and mihtig, mode ge\u00feyldig,\nece drihten, swa \u00feu a w\u00e6re;\nis \u00fein milde mod mannum cy\u00f0ed.\nNelle \u00feu o\u00f0 ende yrre habban,\nne on ecnesse \u00f0e awa belgan.\n25\nNa \u00feu be gewyrhtum, wealdend, urum\nwommum wyrhtum woldest us don,\nne \u00e6fter urum unryhte ahw\u00e6r gyldan.\nFor\u00f0on \u00feu \u00e6fter heahweorce heofenes \u00feines\nmildheortnysse, mihtig drihten,\n30\nlustum cy\u00f0dest, \u00feam \u00fee lufedan \u00fee. Swa \u00feas foldan f\u00e6\u00f0me bewinde\u00f0\n\u00fees eastrodor and \u00e6fter west,\nhe betweonan \u00feam teonan and unriht\nus fram afyrde \u00e6ghw\u00e6r symble.\n35\nSwa f\u00e6der \u00f0ence\u00f0 f\u00e6gere his bearnum\nmilde weor\u00f0an, swa us mihtig god,\n\u00feam \u00fee hine lufia\u00f0, li\u00f0e weor\u00f0e\u00f0,\nfor\u00f0an he ealle can ure \u00feearfe.\nGemune, mihtig god, \u00fe\u00e6t we synt moldan and dust;\n40\nbeo\u00f0 mannes dagas mawenum hege\n\u00e6ghw\u00e6r anlice, eor\u00f0an blostman,\nswa his lifdagas l\u00e6ne syndan.\n\u00feonne he gast ofgife\u00f0, sy\u00fe\u00fean hine g\u00e6rsbedd sceal\nwunian widefyrh, ne him man sy\u00f0\u00f0an wat\nofer \u00feara bearna bearn \u00fee his bebodu healda\u00f0,\nand \u00fe\u00e6s gemynde mycle habba\u00f0,\n\u00fe\u00e6t heo his wisf\u00e6st word wynnum efnan.\nOn heofenhame halig drihten\nhis heahsetl hror timbrade,\n55\n\u00feanon he eor\u00f0ricum eallum wealde\u00f0.\nEalle his englas ecne drihten\nbletsian bealde, heora bli\u00f0ne frean,\nm\u00e6gyn and mihta, \u00fea his m\u00e6re word\nhabba\u00f0 and healda\u00f0 and hyge fremma\u00f0.\n60\nBletsian drihten eall his bearna m\u00e6gen\nand his \u00f0egna \u00f0reat, \u00fee \u00fe\u00e6t \u00feence nu,\n\u00fe\u00e6t hi his willan wyrcean georne.\nEall his agen geweorc ecne drihten\non his agenum stede eac bletsige,\n65\n\u00fe\u00e6r him his egsa, anweald, stande\u00f0;\nbletsige min sawl bli\u00f0e drihten.","title":"The Paris Psalter: Psalm 102","type":"page"}