{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a05_107.htm","path":"neu/ascp/a05_107.htm","source_url":"https://sacred-texts.com/neu/ascp/a05_107.htm","text":"Ys min heorte gearu, halig drihten,\ngearu is min heorte, \u00fe\u00e6t ic gode cweme,\nsealmas singe so\u00feum drihtne.\nAris nu, wuldur min, \u00fe\u00e6t ic wynlice\n5\non psalterio \u00fee singan mote,\nand ic \u00f0e on hleo\u00f0re hearpan swylce\non \u00e6rmergen eac gecweme.\nIc \u00fee andette, ece drihten,\non folca gehwam f\u00e6grum wordum,\n10\nand ic \u00fee on \u00f0eodum on \u00feanc mote\nsealmas singan swy\u00fee geneahhe.\nIs \u00fein mildheort mod mycel o\u00f0 heofenas\nahafen healice ofer h\u00e6le\u00f0a bearn;\nys \u00fein so\u00f0f\u00e6stnes seted o\u00fe wolcen.\n15\nAhafen \u00feu eart ofer heofenas, halig drihten;\nis wuldur \u00f0in wide swylce\nofer \u00feas eor\u00f0an ealle m\u00e6re,\nand \u00feine \u00fea gecorenan wesan cl\u00e6ne and alysde.\nDo me \u00fein swy\u00f0re hand swylce halne\n20\nand me gehyre, h\u00e6lynd drihten,\n\u00fee on halgum sprece\u00f0 her on eor\u00f0an:\n\"And ic blissige, bu ged\u00e6le,\n\u00fea selegesceotu, \u00fea on Sycimam nu\nand on Metibor m\u00e6re standa\u00f0.\n25\nMin is Galaad, gearwe Mannases,\nis Effrem his agen bro\u00f0ur\nefne heah streng\u00f0u heafdes mines.\nIc me to cyninge cenne Iudas,\nsyndan me Moabitingas magas swylce;\n30\nic Idumea ealle cenne\nand min gescy \u00feyder sendan \u00feence;\nsyndan me fremde cynn f\u00e6ste under\u00feeoded.\"\nHwylc gel\u00e6de\u00f0 me on lifes byrig\nf\u00e6ste getrymede, \u00fe\u00e6t ic for\u00f0 \u00feanon\n35\non Idumea wese eft gel\u00e6ded?\nHw\u00e6t, \u00feu eart se sylfa god, \u00fee us synnige iu\nadrife fram dome; ne do \u00feu \u00e6fre swa,\n\u00fe\u00e6t \u00feu of urum m\u00e6gene mod acyrre.\nSyle us on earfo\u00f0um \u00e6\u00feelne fultum;\n40\nfor\u00feon h\u00e6lu by\u00f0 her on eor\u00f0an\nmanna gehwylces m\u00e6gene idel. Us sceal m\u00e6genes gemet mihtig drihten\nso\u00f0f\u00e6st syllan, and he sona m\u00e6g\nure feond gedon fracu\u00fee to nawihte.","title":"The Paris Psalter: Psalm 107","type":"page"}