{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a05_108.htm","path":"neu/ascp/a05_108.htm","source_url":"https://sacred-texts.com/neu/ascp/a05_108.htm","text":"Nelle ic lofes \u00feines, lifigende god,\ngeswigian, \u00feeah \u00fee me synfulra\ninwitfulra mu\u00f0as on ganian.\nHio \u00fea innwit feala ywdan on tungan,\n5\nand me wra\u00f0ra wearn worda spr\u00e6con,\nf\u00e6cne firenlicu, and afuhtan me\nealle earwunga ungemete swy\u00f0e.\nHi me wi\u00f0 lufan la\u00feum d\u00e6dum\ntorne telnysse teodan m\u00e6nige;\n10\nic him a geb\u00e6d ungemete georne.\nHi me yfel settan a wi\u00f0 goode\nand feounge for minre lufan.\nGesete him synnfulle symble to ealdrum,\nstande him on \u00fea swy\u00feeran hand swylce deoful.\n15\nGange of dome gehwam deope gehyned,\nand him his gebed hweorfe to fyrenum.\nGewur\u00f0e him weste eall his onwunung\nand on hys eardungstowe n\u00e6fre gewur\u00fee\n\u00fe\u00e6t \u00fe\u00e6r on gewunige awiht lifigendes.\n20\nWesan him dagas deorce and dimme and feawe,\nand his bisceophad brucan feondas.\nWeor\u00f0an his agene bearn ealle steopcild\nand his wif wyr\u00f0e wydewe hreowlic.\nSyn his bearn swylce toboren wide,\n25\nand he ut weorpe earme \u00feearfan,\n\u00feonne hi to his huse hleowes wilnian.\nEalle his \u00e6hta unholde fynd\nrice re\u00f0emann rycene ged\u00e6le,\nand his feoh onfon fremde handa.\n30\nNe him ahw\u00e6r wese \u00e6nig fultum,\nne his steopcildum stande to helpe.\nGangan ealle his bearn on ece forwyrd,\nand on anum cneowe eall gewyr\u00f0e\nhis nama nyhsta nede adilgad.\n35\nEall \u00fe\u00e6t unriht \u00fee his ealdras \u00e6r\nmanes gefremedan, on gemynd cume\nand on ansyne ures drihtnes;\nne adilgode wesan deorce fyrene,\n\u00fea his modur \u00e6r mane fremede.\n40\nWesan hi wi\u00f0 drihtne d\u00e6dum swylce,\nand hine adilgie dome ealne\nof \u00f0ysse eor\u00f0an awa to feore.\nN\u00e6s him milde gemynd on modsefan,\nand he \u00feearfendra \u00f0riste ehte;\n45\nsymble \u00fe\u00e6t on heortan hogode geornust,\nhu he mid searuwe swylce acwealde.\nHe wolde werg\u00f0u wyrcean georne,\nand hine seo ylce on eft gesette;\nnolde he bletsunge biddan ne tilian,\n50\nfor\u00f0on hio him w\u00e6s afyrred of ferh\u00f0cofan.\nHe hine gegyrede mid grame wyrg\u00f0u,\nswa he hine w\u00e6dum wr\u00e6stum geteode,\nand sio his inna\u00f0 ywde swylce\nwan w\u00e6tere gelic and wynele,\n55\nse \u00fee banes byrst bete\u00f0 and h\u00e6le\u00f0.\nWese he hr\u00e6gle gelic \u00fee her hra\u00f0e ealda\u00f0,\nand gyrdelse, \u00f0e hine man gelome gyrt.\n\u00feis is weorc \u00feara \u00fee oft wra\u00f0e me\ntrage t\u00e6ldan; tyne hine dryhten\n60\n\u00feam \u00fee sar sprece sawle minre.\nAnd \u00feu, min drihten god, do me \u00feine nu\nmycle mildheortnesse for \u00feinum \u00feam m\u00e6ran naman,\nswa \u00f0u oft \u00fein milde mod manegum cy\u00f0dest.\nAlys me, lifes weard, for\u00fean ic eom lama \u00feearfa;\n65\nis me heorte on hearde gedrefed.\nIc eom scuan gelic swy\u00fee ahylded,\no\u00f0l\u00e6ded godum swa se g\u00e6rshoppa.\nMe synt cneowu swylce cwicu unhale\nfor f\u00e6stenum; is min fl\u00e6sc swylce\n70\nfor f\u00e6grum ele frecne onwended;\neom ic to edwitst\u00e6fe eallum geworden.\nSwa hi me gesawon, sona hig wegdan,\nhrerdan heora heafod; help min, drihten god,\nand me halne gedo, h\u00e6lynde Crist,\n75\nfor \u00feinre \u00fe\u00e6re myclan mildheortnysse.\n\u00fe\u00e6t hi so\u00f0 witan, \u00fe\u00e6t si \u00fein sylfes hand\nand \u00feu \u00feas gedydest, drihten usser.\nWeor\u00f0an \u00fea awyrgde, wes \u00feu gebletsad;\nand \u00fea \u00fee me mid unryhte \u00e6nige styrian,\n80\nand hi \u00fe\u00e6r sceande sylfe agon;\nwese \u00fein esne on \u00fee ungemete bli\u00f0e.\nSyn \u00f0a butan are ealle gegyrede\n\u00fee me t\u00e6lnysse teonan \u00e6tf\u00e6stan,\nand him si abrogden swa of brechr\u00e6gle\n85\nhiora sylfra sceamu swy\u00feust ealra.\nIc on minum mu\u00f0e mihta drihtnes\nealle andette, and eac swylce\nhine on midle manna herige.\nHe sylfa gestod on \u00f0a swy\u00f0ran hand,\n90\n\u00fe\u00e6r he \u00feearfendra \u00feinga teolode;\nhe mine sawle swylce gehealde\nwi\u00f0 ehtendra egsan griman.","title":"The Paris Psalter: Psalm 108","type":"page"}