{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a05_113.htm","path":"neu/ascp/a05_113.htm","source_url":"https://sacred-texts.com/neu/ascp/a05_113.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Paris Psalter: Psalm 113\n Verse Indeterminate Saxon\n \n - \n \u00fea ut eode \u00a0\u00a0\u00a0\u00a0 Israheles cynn \n and of \u00e6gyptum \u00a0\u00a0\u00a0\u00a0 ealle foran\n Iacobes hus \u00a0\u00a0\u00a0\u00a0 of gramum folce,\n \u00fea elreordige \u00a0\u00a0\u00a0\u00a0 ealle w\u00e6ron.\n- 5\n- \n \u00fea w\u00e6s geworden \u00a0\u00a0\u00a0\u00a0 werude Iudea, \n \u00fe\u00e6t heo h\u00e6l gehlutan \u00a0\u00a0\u00a0\u00a0 haliges sy\u00fe\u00fean;\n h\u00e6fdan ealdurdom \u00a0\u00a0\u00a0\u00a0 ofer Israhelas,\n mihta m\u00e6re \u00a0\u00a0\u00a0\u00a0 and mycel rice.\n Swa heo s\u00e6 geseah, \u00a0\u00a0\u00a0\u00a0 he hio sniome fleah,\n- 10\n- \n for him Iordanen \u00a0\u00a0\u00a0\u00a0 gengde on hinder. \n H\u00e6fdan \u00fe\u00e6r beorgas \u00a0\u00a0\u00a0\u00a0 bli\u00f0e s\u00e6le\n and rammum \u00fea \u00a0\u00a0\u00a0\u00a0 restan gelice;\n w\u00e6ron geswyru \u00a0\u00a0\u00a0\u00a0 swy\u00f0e on blisse,\n swa on sceapum beo\u00f0 \u00a0\u00a0\u00a0\u00a0 sceone lambru.\n- 15\n- \n Hw\u00e6t w\u00e6s \u00fee, s\u00e6 swi\u00fea? \u00a0\u00a0\u00a0\u00a0 Forhwan fluge \u00feu swa? \n O\u00f0\u00f0e \u00feu, Iordanen, \u00a0\u00a0\u00a0\u00a0 for hwi gengdest on b\u00e6cling?\n Beorgas w\u00e6ron bli\u00f0e, \u00a0\u00a0\u00a0\u00a0 geb\u00e6rdon swa rammas;\n wurdan gesweoru \u00a0\u00a0\u00a0\u00a0 on seledreame,\n swa on sceapum beo\u00f0 \u00a0\u00a0\u00a0\u00a0 sceone lambru.\n- 20\n- \n For ansyne \u00a0\u00a0\u00a0\u00a0 ecan dryhtnes \n \u00feeos eor\u00fee sceal \u00a0\u00a0\u00a0\u00a0 eall abifigan\n and for Iacobes gode \u00a0\u00a0\u00a0\u00a0 geara forhtigean.\n He wende\u00f0 stan \u00a0\u00a0\u00a0\u00a0 on widne mere,\n and clifu cyrre\u00f0 \u00a0\u00a0\u00a0\u00a0 on cwicu swylce\n- 25\n- \n w\u00e6teres wellan \u00a0\u00a0\u00a0\u00a0 mid his gewealdendre hand. \n Nal\u00e6s us, nal\u00e6s us, \u00a0\u00a0\u00a0\u00a0 nergend dryhten,\n ac we naman \u00feinum \u00a0\u00a0\u00a0\u00a0 neode secgea\u00f0\n wuldur wide \u00a0\u00a0\u00a0\u00a0 geond woruldricu,\n For \u00f0inre \u00fe\u00e6re myclan \u00a0\u00a0\u00a0\u00a0 mildheortnysse\n- 30\n- \n and for \u00feinre so\u00f0f\u00e6stnysse \u00a0\u00a0\u00a0\u00a0 samed \u00e6tg\u00e6dere, \n \u00fey l\u00e6s \u00fe\u00e6t \u00e6fre cwe\u00f0an \u00a0\u00a0\u00a0\u00a0 o\u00f0re \u00feeode:\n \"Hw\u00e6r is heora agen god \u00a0\u00a0\u00a0\u00a0 ahw\u00e6r nu \u00f0a?\"\n Ys ure se halga god \u00a0\u00a0\u00a0\u00a0 on heofondreame\n uppe mid englum, \u00a0\u00a0\u00a0\u00a0 and he eall gede\u00f0,\n- 35\n- \n swa his willa by\u00f0, \u00a0\u00a0\u00a0\u00a0 on woruldrice. \n \u00fea w\u00e6ron deofulgild \u00a0\u00a0\u00a0\u00a0 deorce h\u00e6\u00feenra\n golde and seolfre, \u00a0\u00a0\u00a0\u00a0 \u00fea her geara menn\n worhtan wigsmi\u00f0as \u00a0\u00a0\u00a0\u00a0 wr\u00e6ste mid folmum.\n \u00fea mu\u00f0 habba\u00f0, \u00a0\u00a0\u00a0\u00a0 and ne magon hw\u00e6\u00feere\n- 40\n- \n wiht hleo\u00f0rian \u00a0\u00a0\u00a0\u00a0 ne word sprecan; \n beo\u00f0 onforan eagan, \u00a0\u00a0\u00a0\u00a0 ne magon feor geseon.\n Earan habba\u00f0 swylce \u00a0\u00a0\u00a0\u00a0 and opene nose,\n ne magon e\u00feian, \u00a0\u00a0\u00a0\u00a0 awyht gehyran.\n Handa hi habba\u00f0, \u00a0\u00a0\u00a0\u00a0 ne hio hw\u00e6\u00f0ere magon\n- 45\n- \n gegrapian \u00a0\u00a0\u00a0\u00a0 godes awiht, \n and fet habba\u00f0, \u00a0\u00a0\u00a0\u00a0 ne magon feala gangan.\n Ne cleopiga\u00f0 hi care, \u00a0\u00a0\u00a0\u00a0 \u00feeah \u00fee hi ceolan habban,\n ne him hluttur gast \u00a0\u00a0\u00a0\u00a0 on hracan earda\u00f0.\n Ac heo w\u00e6ron \u00feam wyrcendum \u00a0\u00a0\u00a0\u00a0 wel gelice\n- 50\n- \n and \u00e6ghwylcum, \u00a0\u00a0\u00a0\u00a0 \u00fee him on treowa\u00f0. \n Israhela hus \u00a0\u00a0\u00a0\u00a0 \u00e6rest on drihten\n helpe gehogedan, \u00a0\u00a0\u00a0\u00a0 holdne begeaton\n f\u00e6lne fultum; \u00a0\u00a0\u00a0\u00a0 he hi wi\u00f0 feondum geheold.\n Aarones hus \u00a0\u00a0\u00a0\u00a0 eac on dryhten\n- 55\n- \n leofne gelyfdan; \u00a0\u00a0\u00a0\u00a0 he him li\u00f0e wear\u00f0 \n and him fultum gestod \u00a0\u00a0\u00a0\u00a0 f\u00e6ste \u00e6t \u00feearfe.\n \u00fea \u00f0e a wegen \u00a0\u00a0\u00a0\u00a0 egsan dryhtnes,\n hio hyht heora \u00a0\u00a0\u00a0\u00a0 habban on drihten,\n he him fultum \u00a0\u00a0\u00a0\u00a0 f\u00e6ste gestande\u00f0\n- 60\n- \n and him scyldend by\u00f0 \u00a0\u00a0\u00a0\u00a0 symble \u00e6t \u00feearfe. \n Weor\u00f0 \u00feu ure gemyndig, \u00a0\u00a0\u00a0\u00a0 mihtig dryhten,\n and \u00feine bletsunge \u00a0\u00a0\u00a0\u00a0 bring ofer us;\n \u00feu gebletsudest \u00a0\u00a0\u00a0\u00a0 bearn Israheles,\n Aarones hus \u00a0\u00a0\u00a0\u00a0 eac gebletsadest;\n- 65\n- \n \u00feu gebletsadest \u00a0\u00a0\u00a0\u00a0 bli\u00f0e mode \n ealle \u00fea \u00fee on \u00f0e \u00a0\u00a0\u00a0\u00a0 egsan h\u00e6fdan,\n mycle and m\u00e6te \u00a0\u00a0\u00a0\u00a0 ofer middangeard.\n Gem\u00e6nigfealdige \u00feis \u00a0\u00a0\u00a0\u00a0 mihtig dryhten\n ofer eow ealle \u00a0\u00a0\u00a0\u00a0 and ofer agene bearn.\n- 70\n- \n Wesa\u00f0 ge fram gode \u00a0\u00a0\u00a0\u00a0 geara gebletsade, \n \u00feam \u00fee heofon worhte, \u00a0\u00a0\u00a0\u00a0 hrusan swylce;\n heofonas healde\u00f0 \u00a0\u00a0\u00a0\u00a0 halig dryhten,\n sealde \u00feas moldan \u00a0\u00a0\u00a0\u00a0 manna bearnum.\n N\u00e6fre \u00fee, dryhten, \u00a0\u00a0\u00a0\u00a0 deade heria\u00f0,\n- 75\n- \n ne ealle \u00fea \u00fee heonan \u00a0\u00a0\u00a0\u00a0 helle secea\u00f0. \n Ac we lifigende \u00a0\u00a0\u00a0\u00a0 leofne dryhten\n balde bletsiga\u00f0, \u00a0\u00a0\u00a0\u00a0 ne \u00fe\u00e6s blinna\u00f0 nu\n of \u00f0yssan for\u00f0 \u00a0\u00a0\u00a0\u00a0 awa to worulde.","title":"The Paris Psalter: Psalm 113","type":"page"}