{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a05_117.htm","path":"neu/ascp/a05_117.htm","source_url":"https://sacred-texts.com/neu/ascp/a05_117.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Paris Psalter: Psalm 117\n Verse Indeterminate Saxon\n \n - \n Ic andette \u00a0\u00a0\u00a0\u00a0 ecum dryhtne \n \u00feam godan gode; \u00a0\u00a0\u00a0\u00a0 ic hine gleawne wat;\n ys his mildheortnys \u00a0\u00a0\u00a0\u00a0 mycel to worulde.\n \u00fe\u00e6t Israela cw\u00e6\u00f0an \u00a0\u00a0\u00a0\u00a0 ealle nu \u00f0a,\n- 5\n- \n \u00fee he is se goda god, \u00a0\u00a0\u00a0\u00a0 and gearu stande\u00f0 \n his mildheortnys \u00a0\u00a0\u00a0\u00a0 m\u00e6re to worulde.\n Cwe\u00f0e Aarones hus \u00a0\u00a0\u00a0\u00a0 eac \u00fe\u00e6t sylfe;\n he ys se goda god, \u00a0\u00a0\u00a0\u00a0 and gearu stande\u00f0\n his mildheortnys \u00a0\u00a0\u00a0\u00a0 m\u00e6re to worulde.\n- 10\n- \n Cwe\u00f0an ealle \u00fe\u00e6t \u00a0\u00a0\u00a0\u00a0 unforcu\u00f0e, \n \u00fee him on stande\u00f0 \u00a0\u00a0\u00a0\u00a0 egsa dryhtnes;\n for\u00f0on he ys se goda god, \u00a0\u00a0\u00a0\u00a0 and gearu stande\u00f0\n his mildheortnys \u00a0\u00a0\u00a0\u00a0 m\u00e6re on worulde.\n Ic on costunge \u00a0\u00a0\u00a0\u00a0 cigde to dryhtne,\n- 15\n- \n and he me gehyrde \u00a0\u00a0\u00a0\u00a0 on heare br\u00e6du. \n Nu me fultum is \u00a0\u00a0\u00a0\u00a0 f\u00e6le dryhten,\n nis me ege mannes \u00a0\u00a0\u00a0\u00a0 for ahw\u00e6\u00f0er.\n Nu me fultum ys \u00a0\u00a0\u00a0\u00a0 f\u00e6le dryhten,\n ic fracu\u00fee forseo \u00a0\u00a0\u00a0\u00a0 feondas mine.\n- 20\n- \n God ys on dryhten \u00a0\u00a0\u00a0\u00a0 georne to \u00feenceanne, \n \u00feonne on mannan wese \u00a0\u00a0\u00a0\u00a0 mod to treowianne.\n God ys on dryhten \u00a0\u00a0\u00a0\u00a0 georne to hyhtanne,\n \u00feonne on ealdormen \u00a0\u00a0\u00a0\u00a0 ahw\u00e6r to treowianne.\n Ealle me ymbsealdon \u00a0\u00a0\u00a0\u00a0 side \u00feeode,\n- 25\n- \n and ic w\u00e6s on dryhtnes naman \u00a0\u00a0\u00a0\u00a0 deorum geh\u00e6led. \n Me ymbstodan \u00a0\u00a0\u00a0\u00a0 strange manige,\n and me godes nama on him \u00a0\u00a0\u00a0\u00a0 georne geh\u00e6lde.\n \u00fea hi me ymbsealdon \u00a0\u00a0\u00a0\u00a0 samod anlice\n swa beon bitere, \u00a0\u00a0\u00a0\u00a0 o\u00f0\u00f0e \u00feu b\u00e6rne eac\n- 30\n- \n \u00feornas \u00feyre \u00a0\u00a0\u00a0\u00a0 \u00feicce fyre, \n \u00fe\u00e6r me nama dryhtnes \u00a0\u00a0\u00a0\u00a0 neode scylde.\n Ic w\u00e6s hearde cnyssed \u00a0\u00a0\u00a0\u00a0 and ic me helpe fand,\n \u00fe\u00e6t ic f\u00e6ste ne feoll, \u00a0\u00a0\u00a0\u00a0 ac ic me frofre begeat,\n \u00fea me dryhten onfeng, \u00a0\u00a0\u00a0\u00a0 swa hit gedefe w\u00e6s.\n- 35\n- \n Me w\u00e6s streng\u00f0u strang \u00a0\u00a0\u00a0\u00a0 sti\u00fe on dryhtne \n and herenes heah, \u00a0\u00a0\u00a0\u00a0 and he me eac\n ys a to worulde \u00a0\u00a0\u00a0\u00a0 worden on h\u00e6lu.\n A by\u00f0 blisse stefn \u00a0\u00a0\u00a0\u00a0 beorht gehyred\n on so\u00f0f\u00e6stra \u00a0\u00a0\u00a0\u00a0 sw\u00e6sum mu\u00f0e.\n- 40\n- \n Dyde gedefe m\u00e6gen \u00a0\u00a0\u00a0\u00a0 dryhtnes swy\u00f0re, \n and me seo swy\u00f0re \u00a0\u00a0\u00a0\u00a0 swylce drihtnes\n ahof hr\u00e6dlice \u00a0\u00a0\u00a0\u00a0 \u00e6t heah\u00feearfe.\n Ne swelte ic mid sare, \u00a0\u00a0\u00a0\u00a0 ac ic gesund lifige\n and weorc godes \u00a0\u00a0\u00a0\u00a0 wide secge.\n- 45\n- \n Se cl\u00e6nsude, \u00a0\u00a0\u00a0\u00a0 se \u00fee him cl\u00e6ne w\u00e6s; \n dryhten \u00e6lmihtig \u00a0\u00a0\u00a0\u00a0 nolde to dea\u00f0e me\n on ecnysse \u00a0\u00a0\u00a0\u00a0 \u00e6fre gesyllan.\n Undo\u00f0 me sniome duru \u00a0\u00a0\u00a0\u00a0 so\u00f0f\u00e6stra eac,\n \u00fe\u00e6r ic gange inn, \u00a0\u00a0\u00a0\u00a0 gode andette;\n- 50\n- \n so\u00f0f\u00e6ste on \u00fea duru \u00a0\u00a0\u00a0\u00a0 secea\u00f0 inngang. \n Ic \u00fee andette, \u00a0\u00a0\u00a0\u00a0 ece dryhten,\n for\u00f0on \u00feu me gehyrdest \u00a0\u00a0\u00a0\u00a0 \u00e6t heah\u00feearfe\n and me \u00fea gewurde \u00a0\u00a0\u00a0\u00a0 wis on h\u00e6lu.\n \u00feone sylfan stan \u00a0\u00a0\u00a0\u00a0 \u00fee hine swy\u00f0e \u00e6r\n- 55\n- \n wyrhtan awurpan, \u00a0\u00a0\u00a0\u00a0 nu se geworden is \n hwommona heagost; \u00a0\u00a0\u00a0\u00a0 halig dryhten\n to wealles wra\u00f0e \u00a0\u00a0\u00a0\u00a0 wis teofrade;\n \u00fe\u00e6t is urum eagum \u00a0\u00a0\u00a0\u00a0 eall wundorlic.\n \u00feis ys se d\u00e6g \u00a0\u00a0\u00a0\u00a0 \u00fee hine drihten us\n- 60\n- \n wisf\u00e6st geworhte \u00a0\u00a0\u00a0\u00a0 wera cneorissum, \n eallum eor\u00f0tudrum \u00a0\u00a0\u00a0\u00a0 eadgum to blisse.\n Eala \u00feu dryhten god, \u00a0\u00a0\u00a0\u00a0 do me halne;\n eala \u00feu dryhten min, \u00a0\u00a0\u00a0\u00a0 do us gesunde.\n Gebletsad is, se \u00fee com \u00a0\u00a0\u00a0\u00a0 ofer bearna gehwylc\n- 65\n- \n on dryhtnes naman \u00a0\u00a0\u00a0\u00a0 d\u00e6dum m\u00e6rum; \n we eow \u00e6t godes huse \u00a0\u00a0\u00a0\u00a0 gearwe bletsia\u00f0,\n nu us drihten god \u00a0\u00a0\u00a0\u00a0 deore onlyhte.\n Wutan us to symbeld\u00e6ge \u00a0\u00a0\u00a0\u00a0 settan georne,\n and \u00f0one gelome \u00a0\u00a0\u00a0\u00a0 lustum healdan\n- 70\n- \n o\u00f0 wigbedes \u00a0\u00a0\u00a0\u00a0 wr\u00e6ste hornas. \n \u00feu eart min dryhten god, \u00a0\u00a0\u00a0\u00a0 and ic d\u00e6dum \u00fee\n ecne andette;\n \u00feu eart min h\u00e6lend god, \u00a0\u00a0\u00a0\u00a0 and ic herige \u00f0e.\n Ic \u00f0e andette \u00a0\u00a0\u00a0\u00a0 ecne dryhten,\n- 75\n- \n for\u00f0on \u00feu me gehyrdest \u00a0\u00a0\u00a0\u00a0 \u00e6t heah\u00feearfe, \n and \u00fea wurde me \u00a0\u00a0\u00a0\u00a0 wis to h\u00e6lu.\n Eac ic andette \u00a0\u00a0\u00a0\u00a0 eceum dryhtne,\n for\u00f0on he ys se goda god, \u00a0\u00a0\u00a0\u00a0 and ic ful geare wat,\n \u00fe\u00e6t \u00fein mildheortnyss \u00a0\u00a0\u00a0\u00a0 ys mycel to worulde.","title":"The Paris Psalter: Psalm 117","type":"page"}