{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a05_131.htm","path":"neu/ascp/a05_131.htm","source_url":"https://sacred-texts.com/neu/ascp/a05_131.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Paris Psalter: Psalm 131\n Verse Indeterminate Saxon\n \n - \n Gemune \u00feu, drihten, \u00a0\u00a0\u00a0\u00a0 m\u00e6rne Dauid \n and ealle his mann\u00few\u00e6rnesse \u00a0\u00a0\u00a0\u00a0 micle and goode.\n Swa ic \u00e6t frym\u00f0e geswor \u00a0\u00a0\u00a0\u00a0 ferh\u00f0e wi\u00f0 drihten\n and gehat gehet, \u00a0\u00a0\u00a0\u00a0 he geheold teala\n- 5\n- \n wi\u00f0 Iacobes \u00a0\u00a0\u00a0\u00a0 god \u00feone m\u00e6ran. \n \u00feeah \u00fee ic on mines huses \u00a0\u00a0\u00a0\u00a0 hyld gegange\n o\u00fe\u00fee selegesceot \u00a0\u00a0\u00a0\u00a0 \u00fe\u00e6nne sw\u00e6s wese\n o\u00f0\u00f0e on min restbedd \u00a0\u00a0\u00a0\u00a0 ricene gestige,\n Gif ic minum eagum \u00a0\u00a0\u00a0\u00a0 unne sl\u00e6pes,\n- 10\n- \n o\u00fe\u00fee minum breawum \u00a0\u00a0\u00a0\u00a0 beode hnappunga, \n o\u00fe\u00fee ic on \u00feunwange \u00a0\u00a0\u00a0\u00a0 \u00feriste gereste,\n O\u00fe\u00fe\u00e6t ic gemete \u00a0\u00a0\u00a0\u00a0 m\u00e6re stowe\n drihtne gecorene, \u00a0\u00a0\u00a0\u00a0 dyre selegesceot\n Iacobes gode \u00a0\u00a0\u00a0\u00a0 georne gecweme.\n- 15\n- \n Efne we \u00feas eall \u00a0\u00a0\u00a0\u00a0 on Eufraten \n s\u00e6cgean gehyrdon, \u00a0\u00a0\u00a0\u00a0 sy\u00f0\u00f0an gemitton\n forwel manegu \u00a0\u00a0\u00a0\u00a0 on wudufeldum.\n We on his selegesceot \u00a0\u00a0\u00a0\u00a0 swylce ganga\u00f0,\n and \u00fe\u00e6re stowe \u00a0\u00a0\u00a0\u00a0 stede aria\u00f0\n- 20\n- \n \u00fe\u00e6r his fotas \u00e6r \u00a0\u00a0\u00a0\u00a0 f\u00e6ste gestodan. \n Aris on \u00feinre reste \u00a0\u00a0\u00a0\u00a0 recene, drihten;\n \u00feu earce eart \u00a0\u00a0\u00a0\u00a0 eallhaligra.\n Synd \u00feine sacerdas \u00a0\u00a0\u00a0\u00a0 on so\u00f0f\u00e6stnesse\n gode gegierede, \u00a0\u00a0\u00a0\u00a0 and gleawe nu\n- 25\n- \n \u00feine \u00fea halgan \u00a0\u00a0\u00a0\u00a0 her blissia\u00f0. \n For \u00feinum agenum \u00a0\u00a0\u00a0\u00a0 esne swylce,\n deorum Dauide, \u00a0\u00a0\u00a0\u00a0 \u00feu ne do \u00e6fre,\n \u00fe\u00e6t \u00feu andwlitan \u00a0\u00a0\u00a0\u00a0 ut oncyrre\n \u00feines \u00fe\u00e6s halgan \u00a0\u00a0\u00a0\u00a0 her on eor\u00f0an.\n- 30\n- \n \u00fe\u00e6s deopne a\u00f0 \u00a0\u00a0\u00a0\u00a0 drihten aswor \n and \u00feone mid so\u00f0e \u00a0\u00a0\u00a0\u00a0 swylce getrymede,\n \u00fe\u00e6t he hine for hole \u00a0\u00a0\u00a0\u00a0 \u00e6r ne aswore,\n gehet Dauide, \u00a0\u00a0\u00a0\u00a0 swa he him dyde sy\u00fe\u00fean,\n \u00fe\u00e6t he weor\u00f0licne \u00a0\u00a0\u00a0\u00a0 w\u00e6stm gesette\n- 35\n- \n \u00fee of his inna\u00f0e \u00a0\u00a0\u00a0\u00a0 agenum cwome, \n ofer \u00fein heahsetl; \u00a0\u00a0\u00a0\u00a0 gif nu healda\u00f0 well\n \u00feines sylfes bearn \u00a0\u00a0\u00a0\u00a0 so\u00f0e treowa\n and \u00fea gewitnesse, \u00a0\u00a0\u00a0\u00a0 \u00fee ic hig wel l\u00e6re,\n \u00feonne hiora suna \u00a0\u00a0\u00a0\u00a0 swylce motan\n- 40\n- \n a \u00feysse worulde \u00a0\u00a0\u00a0\u00a0 wynnum brucan \n and on \u00feinum setle \u00a0\u00a0\u00a0\u00a0 sittan geneahhe.\n For\u00f0on him Sione geceas \u00a0\u00a0\u00a0\u00a0 sylfa drihten,\n and him to earde geceas \u00a0\u00a0\u00a0\u00a0 \u00e6rest \u00e6t frym\u00f0e.\n \u00feis is min rest, \u00a0\u00a0\u00a0\u00a0 \u00fee ic recene nu\n- 45\n- \n on worulda woruld \u00a0\u00a0\u00a0\u00a0 wunian \u00feence, \n \u00fe\u00e6r ic eard nime, \u00a0\u00a0\u00a0\u00a0 for\u00f0on ic hi \u00e6r geceas.\n His wuduan ic \u00a0\u00a0\u00a0\u00a0 wordum bletsige\n and gesegnade, \u00a0\u00a0\u00a0\u00a0 sylle geneahhe\n heora hungrium \u00a0\u00a0\u00a0\u00a0 hlaf to fylle.\n- 50\n- \n Ec his sacerdas \u00a0\u00a0\u00a0\u00a0 swylce mid h\u00e6lu \n georne gegyrwe, \u00a0\u00a0\u00a0\u00a0 and gode eac\n his \u00fea halgan her \u00a0\u00a0\u00a0\u00a0 habba\u00f0 blisse.\n \u00fe\u00e6r ic Dauides horn \u00a0\u00a0\u00a0\u00a0 deorne bringe,\n for\u00f0 gel\u00e6de, \u00a0\u00a0\u00a0\u00a0 f\u00e6gre gearuwe\n- 55\n- \n byrnende blacern, \u00a0\u00a0\u00a0\u00a0 bere for minum \n criste gecorenum, \u00a0\u00a0\u00a0\u00a0 \u00fee ic hine cu\u00f0ne wat.\n Ic his feondas eac \u00a0\u00a0\u00a0\u00a0 facne gegyrwe\n mid scame swi\u00f0ust; \u00a0\u00a0\u00a0\u00a0 ofer hine scir cyme\u00f0\n minra segnunga \u00a0\u00a0\u00a0\u00a0 so\u00f0f\u00e6st blostma.","title":"The Paris Psalter: Psalm 131","type":"page"}