{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a05_134.htm","path":"neu/ascp/a05_134.htm","source_url":"https://sacred-texts.com/neu/ascp/a05_134.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Paris Psalter: Psalm 134\n Verse Indeterminate Saxon\n \n - \n Heria\u00f0 naman drihtenes, \u00a0\u00a0\u00a0\u00a0 neode swylce \n herigen hine his scealcas \u00a0\u00a0\u00a0\u00a0 swi\u00f0e ealle.\n Ge \u00fee on godes huse \u00a0\u00a0\u00a0\u00a0 gleawe standa\u00f0\n and on cafertunum \u00a0\u00a0\u00a0\u00a0 Cristes huses\n- 5\n- \n \u00fe\u00e6s godan godes \u00a0\u00a0\u00a0\u00a0 gearwe syndan, \n Lofia\u00f0 ge drihten, \u00a0\u00a0\u00a0\u00a0 for\u00feon he lungre is\n f\u00e6str\u00e6d and fremsum \u00a0\u00a0\u00a0\u00a0 fira \u00e6ghwam;\n weor\u00f0ia\u00f0 his naman, \u00a0\u00a0\u00a0\u00a0 for\u00feon he wyr\u00f0e is.\n For\u00f0on him godne geceas \u00a0\u00a0\u00a0\u00a0 Iacob drihten\n- 10\n- \n and on agene \u00e6ht \u00a0\u00a0\u00a0\u00a0 Israeles cynn. \n Ic \u00fe\u00e6t gearwe ongeat, \u00a0\u00a0\u00a0\u00a0 \u00fe\u00e6t is god and mycel\n drihten ure; \u00a0\u00a0\u00a0\u00a0 for\u00feon him dom stande\u00f0\n ofer ealle godu \u00a0\u00a0\u00a0\u00a0 eor\u00f0buendra.\n Ealle \u00fea \u00fee wolde, \u00a0\u00a0\u00a0\u00a0 worhte drihten\n- 15\n- \n on heofonrice \u00a0\u00a0\u00a0\u00a0 and her on eor\u00f0an, \n on sidum s\u00e6 \u00a0\u00a0\u00a0\u00a0 swylce on eallum,\n \u00fe\u00e6r he dyrne wat \u00a0\u00a0\u00a0\u00a0 deorce grundas.\n And he fram \u00feysse eor\u00f0an \u00a0\u00a0\u00a0\u00a0 ende l\u00e6de\u00f0\n wolcen wr\u00e6clicu, \u00a0\u00a0\u00a0\u00a0 wind and liget,\n- 20\n- \n and \u00fea to regne \u00a0\u00a0\u00a0\u00a0 recene wyrce\u00f0, \n \u00fee for\u00f0 l\u00e6de\u00f0 \u00a0\u00a0\u00a0\u00a0 f\u00e6gere windas\n of his goldhordum \u00a0\u00a0\u00a0\u00a0 godra manegum;\n se \u00e6gipta sloh \u00a0\u00a0\u00a0\u00a0 \u00e6\u00f0ele frumbearn\n \u00e6ghwylc ealra \u00a0\u00a0\u00a0\u00a0 o\u00f0 \u00fea nytenu.\n- 25\n- \n He sigetacen \u00a0\u00a0\u00a0\u00a0 sende manegum \n forebeacn f\u00e6le \u00a0\u00a0\u00a0\u00a0 folce \u00e6gipta,\n and \u00fea Pharaones \u00a0\u00a0\u00a0\u00a0 folce gecy\u00f0de\n and his scealcum \u00a0\u00a0\u00a0\u00a0 samed \u00e6tg\u00e6dere.\n Se sloh \u00feeode folc \u00a0\u00a0\u00a0\u00a0 \u00feearle manige,\n- 30\n- \n and eac acwealde \u00a0\u00a0\u00a0\u00a0 cyningas strange. \n W\u00e6s Seon efne \u00a0\u00a0\u00a0\u00a0 sum \u00feara kynincga,\n and Og kyning, \u00a0\u00a0\u00a0\u00a0 se \u00fee \u00e6ror w\u00e6s\n on Basane \u00a0\u00a0\u00a0\u00a0 breme and m\u00e6re.\n Sealde heora eardland \u00a0\u00a0\u00a0\u00a0 eall Israhelum\n- 35\n- \n and heora yrfe \u00a0\u00a0\u00a0\u00a0 eac his folce. \n Ys \u00fein nama, drihten, \u00a0\u00a0\u00a0\u00a0 nemned ece,\n and \u00fein gemynd, \u00a0\u00a0\u00a0\u00a0 mihtig drihten,\n on ealra worulda woruld \u00a0\u00a0\u00a0\u00a0 wynnum stande\u00f0.\n For\u00feon his folc deme\u00f0 \u00a0\u00a0\u00a0\u00a0 f\u00e6gere drihten,\n- 40\n- \n and he bi\u00f0 on his esnum \u00a0\u00a0\u00a0\u00a0 agenum frefriend. \n Beo\u00f0 deofolgyld \u00a0\u00a0\u00a0\u00a0 dysigra \u00feeoda\n gold and seolfur, \u00a0\u00a0\u00a0\u00a0 \u00fee her geota\u00f0 menn,\n and mid heora folmum \u00a0\u00a0\u00a0\u00a0 f\u00e6gere wyrcea\u00f0.\n \u00fea mu\u00f0 habba\u00f0, \u00a0\u00a0\u00a0\u00a0 and ne meldia\u00f0 wiht,\n- 45\n- \n f\u00e6gere eagan, \u00a0\u00a0\u00a0\u00a0 ne magon feor geseon. \n Earan habba\u00f0, \u00a0\u00a0\u00a0\u00a0 ne hi awiht magon\n holdes gehyran, \u00a0\u00a0\u00a0\u00a0 \u00feeah \u00f0e him hleo\u00f0rige,\n and nose habba\u00f0, \u00a0\u00a0\u00a0\u00a0 nawiht gestinca\u00f0.\n Handa hi habba\u00f0, \u00a0\u00a0\u00a0\u00a0 ne hi hw\u00e6\u00f0ere magon\n- 50\n- \n gegrapian \u00a0\u00a0\u00a0\u00a0 godes awiht; \n habba\u00f0 fet swylce, \u00a0\u00a0\u00a0\u00a0 ne magon feala gangan.\n Ne hi on hracan awiht \u00a0\u00a0\u00a0\u00a0 hlude ne cleopia\u00f0,\n ne him gast wara\u00f0 \u00a0\u00a0\u00a0\u00a0 gomum on mu\u00f0e.\n Synt anlice \u00fe\u00e6m \u00a0\u00a0\u00a0\u00a0 \u00fee hi \u00e6r worhtan,\n- 55\n- \n and ealle \u00fea \u00f0e on hi \u00a0\u00a0\u00a0\u00a0 \u00e6fre getreowa\u00f0. \n Hus Israela \u00a0\u00a0\u00a0\u00a0 holdne drihten\n bletsien bealde, \u00a0\u00a0\u00a0\u00a0 biddan swylce\n \u00fe\u00e6t Aarones hus \u00a0\u00a0\u00a0\u00a0 ecne drihten\n bli\u00f0e bletsien; \u00a0\u00a0\u00a0\u00a0 beornas ealle,\n- 60\n- \n \u00fea on lifes hus \u00a0\u00a0\u00a0\u00a0 leof eardia\u00f0, \n bletsien drihten \u00a0\u00a0\u00a0\u00a0 bli\u00f0e mode.\n \u00fea \u00fee him ondr\u00e6den \u00a0\u00a0\u00a0\u00a0 drihtnes egsan,\n bletsien drihten \u00a0\u00a0\u00a0\u00a0 beornas ealle;\n se drihten is \u00a0\u00a0\u00a0\u00a0 deore gebletsad\n- 65\n- \n of Sion sniome, \u00a0\u00a0\u00a0\u00a0 \u00fee so\u00f0f\u00e6st \u00e6r \n on Hierusalem \u00a0\u00a0\u00a0\u00a0 god eardode.\n Ic andette \u00a0\u00a0\u00a0\u00a0 ecum drihtne,\n for\u00f0on he god is, \u00a0\u00a0\u00a0\u00a0 and ic ful gearwe wat,\n \u00fe\u00e6t he to worulde by\u00f0 \u00a0\u00a0\u00a0\u00a0 wis and mildheort.","title":"The Paris Psalter: Psalm 134","type":"page"}