{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a05_135.htm","path":"neu/ascp/a05_135.htm","source_url":"https://sacred-texts.com/neu/ascp/a05_135.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Paris Psalter: Psalm 135\n Verse Indeterminate Saxon\n \n - \n Eac ic andette \u00a0\u00a0\u00a0\u00a0 \u00feam \u00fee ece is \n ealra godena god, \u00a0\u00a0\u00a0\u00a0 for\u00f0on ic hine godne wat.\n Andette ic swylce \u00a0\u00a0\u00a0\u00a0 \u00feam \u00fee ealra is\n drihtna drihten \u00a0\u00a0\u00a0\u00a0 d\u00e6dum spedigast,\n- 5\n- \n for\u00f0on he god is, \u00a0\u00a0\u00a0\u00a0 and ic gearwe wat, \n \u00fe\u00e6t his mildheortnes \u00a0\u00a0\u00a0\u00a0 is mycel to worulde.\n He wundur dyde \u00a0\u00a0\u00a0\u00a0 weor\u00felic ana.\n Se heofon worhte, \u00a0\u00a0\u00a0\u00a0 h\u00e6le\u00f0a andgit.\n He eor\u00f0an \u00e6fter w\u00e6ter \u00a0\u00a0\u00a0\u00a0 \u00e6rest sette.\n- 10\n- \n He leohtfatu \u00a0\u00a0\u00a0\u00a0 leodum ana \n micel geworhte \u00a0\u00a0\u00a0\u00a0 manna bearnum,\n Sette on miht d\u00e6ges \u00a0\u00a0\u00a0\u00a0 m\u00e6re sunnan,\n On miht nihte \u00a0\u00a0\u00a0\u00a0 monan and steorran.\n He \u00e6gyptas sloh \u00a0\u00a0\u00a0\u00a0 and eall heora frumbearn,\n- 15\n- \n And he Israhelas \u00a0\u00a0\u00a0\u00a0 ealle o\u00f0l\u00e6dde \n of \u00e6gyptum \u00a0\u00a0\u00a0\u00a0 ealle gesunde,\n On mihtigre \u00a0\u00a0\u00a0\u00a0 m\u00e6re handa\n and on eallmihte \u00a0\u00a0\u00a0\u00a0 earmes swylce.\n He readne s\u00e6 \u00a0\u00a0\u00a0\u00a0 recene tod\u00e6lde,\n- 20\n- \n L\u00e6dde Israhelas \u00a0\u00a0\u00a0\u00a0 ealle \u00feurh midne. \n \u00fe\u00e6r Pharaon gefeol, \u00a0\u00a0\u00a0\u00a0 and his f\u00e6ge werud\n on \u00feam readan s\u00e6 \u00a0\u00a0\u00a0\u00a0 recene forwurdan.\n He gewealdendlice \u00a0\u00a0\u00a0\u00a0 \u00feuruh westen eft\n his \u00fe\u00e6t leofe folc \u00a0\u00a0\u00a0\u00a0 l\u00e6dde swylce.\n- 25\n- \n He of stanclife \u00a0\u00a0\u00a0\u00a0 stearce burnan \n leodum l\u00e6dde \u00a0\u00a0\u00a0\u00a0 on leofne \u00feanc.\n Swylce he acwealde \u00a0\u00a0\u00a0\u00a0 cyningas mycle.\n And he eac ofsloh \u00a0\u00a0\u00a0\u00a0 \u00e6\u00f0ele cyningas,\n weras wr\u00e6clice, \u00a0\u00a0\u00a0\u00a0 \u00fea \u00fee weoruld heoldan.\n- 30\n- \n \u00fe\u00e6r Seon cyning \u00a0\u00a0\u00a0\u00a0 swylt dreorig fornam, \n \u00fee Amorrea \u00a0\u00a0\u00a0\u00a0 anweald h\u00e6fde,\n And Og swylce, \u00a0\u00a0\u00a0\u00a0 \u00fee \u00e6ror w\u00e6s\n swy\u00fee breme cyning \u00a0\u00a0\u00a0\u00a0 on Basane.\n Sealde heora eor\u00fean \u00a0\u00a0\u00a0\u00a0 on yrfeland,\n- 35\n- \n And \u00fe\u00e6t yrfe \u00a0\u00a0\u00a0\u00a0 on Israele, \n \u00fee his esnas \u00a0\u00a0\u00a0\u00a0 agene w\u00e6ron.\n For\u00feon ure ea\u00f0medu \u00a0\u00a0\u00a0\u00a0 ece drihten\n gemyndgade, \u00a0\u00a0\u00a0\u00a0 and us mycel sealde.\n And he us aferede \u00a0\u00a0\u00a0\u00a0 feondum of handa,\n- 40\n- \n \u00fea \u00f0e wra\u00f0e \u00a0\u00a0\u00a0\u00a0 w\u00e6ron ealle. \n He eac afede\u00f0 \u00a0\u00a0\u00a0\u00a0 fl\u00e6scea \u00e6ghwylc.\n Andeta\u00f0 nu ealle \u00a0\u00a0\u00a0\u00a0 \u00feam ecean gode,\n \u00fee on heofonum is \u00a0\u00a0\u00a0\u00a0 heah eardiende.\n And ge ealra godena gode \u00a0\u00a0\u00a0\u00a0 geara andetta\u00f0,\n- 45\n- \n for\u00fean his mildheortnes \u00a0\u00a0\u00a0\u00a0 is mycel to worulde.","title":"The Paris Psalter: Psalm 135","type":"page"}