{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a05_137.htm","path":"neu/ascp/a05_137.htm","source_url":"https://sacred-texts.com/neu/ascp/a05_137.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Paris Psalter: Psalm 137\n Verse Indeterminate Saxon\n \n - \n Ic \u00fee andette, \u00a0\u00a0\u00a0\u00a0 ecne drihten, \n on minre gehygde \u00a0\u00a0\u00a0\u00a0 heortan ealre;\n for\u00f0on \u00feu ealle mine word \u00a0\u00a0\u00a0\u00a0 earum gehyrdest,\n \u00fea ic mid mu\u00f0e \u00a0\u00a0\u00a0\u00a0 and mid mode cwe\u00f0e,\n- 5\n- \n and on \u00feinra engla \u00a0\u00a0\u00a0\u00a0 ealra gesih\u00f0e \n ic \u00fee singe \u00a0\u00a0\u00a0\u00a0 swi\u00f0e geneahhige.\n Eac ic \u00fein tempel \u00a0\u00a0\u00a0\u00a0 tidum weor\u00f0ige,\n \u00fe\u00e6t halige hus, \u00a0\u00a0\u00a0\u00a0 holde mode,\n and \u00fe\u00e6r \u00feinne naman \u00a0\u00a0\u00a0\u00a0 on neod secge.\n- 10\n- \n Ofer \u00feine \u00fea miclan \u00a0\u00a0\u00a0\u00a0 mildheortnesse \n and so\u00f0f\u00e6stnesse \u00a0\u00a0\u00a0\u00a0 samed \u00e6tg\u00e6dere,\n \u00feu \u00feinne \u00feone halgan naman \u00a0\u00a0\u00a0\u00a0 neode gedydest,\n ofer us ealle \u00a0\u00a0\u00a0\u00a0 \u00e6ghw\u00e6r micelne.\n Swa hwylce daga \u00a0\u00a0\u00a0\u00a0 ic \u00fee deorne cige,\n- 15\n- \n gehyr me hw\u00e6tlice, \u00a0\u00a0\u00a0\u00a0 and me hra\u00f0e gedo \n micle mine sawle \u00a0\u00a0\u00a0\u00a0 on \u00feines m\u00e6genes sped.\n Ealle \u00fee andettan \u00a0\u00a0\u00a0\u00a0 eor\u00f0an kyningas,\n for\u00f0on \u00fee hi gehyrdon \u00a0\u00a0\u00a0\u00a0 hlude reorde\n \u00feines mu\u00f0es \u00a0\u00a0\u00a0\u00a0 \u00fea m\u00e6ran word;\n- 20\n- \n \u00fea on sangum \u00a0\u00a0\u00a0\u00a0 singan drihtne. \n For\u00feon \u00fein wuldur is \u00a0\u00a0\u00a0\u00a0 wide geond eor\u00f0an\n micel and m\u00e6re, \u00a0\u00a0\u00a0\u00a0 ofer middaneard\n eart \u00feu healice \u00a0\u00a0\u00a0\u00a0 ahafen, drihten;\n \u00feu eadmodra \u00a0\u00a0\u00a0\u00a0 ealra locast\n- 25\n- \n on heofonhame \u00a0\u00a0\u00a0\u00a0 her on eor\u00f0an. \n \u00feeah \u00fee ic on midle \u00a0\u00a0\u00a0\u00a0 manes gange,\n \u00fe\u00e6r me costunga \u00a0\u00a0\u00a0\u00a0 cnysdan geneahhe,\n a \u00feu me weredest \u00a0\u00a0\u00a0\u00a0 wra\u00feum feondum\n \u00fee me woldan yrre \u00a0\u00a0\u00a0\u00a0 on acy\u00f0an;\n- 30\n- \n \u00feu me ger\u00e6htest \u00a0\u00a0\u00a0\u00a0 recene mid handa \n and me \u00fein swy\u00f0re \u00a0\u00a0\u00a0\u00a0 sneome h\u00e6lde.\n Drihten for me \u00a0\u00a0\u00a0\u00a0 dome gylde,\n is his mildheortnes \u00a0\u00a0\u00a0\u00a0 mycel on worulde;\n ne forseoh \u00e6fre, \u00a0\u00a0\u00a0\u00a0 \u00fe\u00e6t \u00feu sylfa \u00e6r\n- 35\n- \n mid \u00feinum handum \u00a0\u00a0\u00a0\u00a0 her geworhtest.","title":"The Paris Psalter: Psalm 137","type":"page"}