{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a05_140.htm","path":"neu/ascp/a05_140.htm","source_url":"https://sacred-texts.com/neu/ascp/a05_140.htm","text":"Ic \u00fee, drihten, to dyrum clypige;\ngehyr me hr\u00e6dlice holdre stefne,\n\u00feonne ic bene to \u00fee bidde ceare full.\nSy on \u00feinre gesih\u00fee mines sylfes gebed\n5\nful recene gereht, swa ricels by\u00f0,\n\u00feonne hit gifre gleda b\u00e6rna\u00f0.\nSwylce is ahafenes handa minra,\n\u00feonne ic \u00fee \u00e6fenlac estum secge. Sete sw\u00e6se geheald swylce, drihten,\n10\nmu\u00f0e minum, ne l\u00e6t man sprecan,\nand \u00e6\u00feele dor ymbstandende,\n\u00fe\u00e6t on welerum wisdom healde.\nNe hyld \u00feu mine heortan, \u00fe\u00e6t ic hearme word\n\u00feuruh inwitst\u00e6f ut forl\u00e6te,\n15\nand ic l\u00e6dend wese la\u00f0ra firena.\nNe ic \u00e6fre mid mannum manfremmendum\ngem\u00e6nnesse micle h\u00e6bbe,\nne on heora gecorenesse becume \u00e6fre. Ac me so\u00f0f\u00e6st symble gerecce\n20\nand mildheorte mode \u00fereage;\nele synfulra \u00e6fre ne mote\nheafde minum hrinan ahw\u00e6r.\nFor\u00feon min gebed nu gyt becnum stande\u00f0,\n\u00fe\u00e6t him on wisum is wel lycendlice;\n25\nsyndon hi \u00e6t strangum stane forswolgene;\nnoldan heora deman mine gedefe word\nearan gehyran, eft ne mihton.\nSwa unefne is eor\u00fee \u00feicce,\nsyndon \u00feas moras myclum asprotene,\n30\nswa ure ban syndon bitere toworpene\nbe helwarena h\u00e6fteneodum.\nFor\u00feon ic, drihten, on \u00fee d\u00e6dum minum\neagum and mode \u00e6ghw\u00e6r gelyfe;\nne ascuf \u00feu fram me sawle mine.\n35\nGeheald me wi\u00f0 \u00feare gryne \u00fee me grame setton,\n\u00fe\u00e6t me ne beswice synwyrcende,\n\u00fea \u00fee unrihtes \u00e6ghw\u00e6r \u00feencea\u00f0.\nFealla\u00f0 firenfulle on heora fengnettum;\nic me syndrig eom, o\u00fe\u00fe\u00e6t ic swa fere.","title":"The Paris Psalter: Psalm 140","type":"page"}