{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a05_142.htm","path":"neu/ascp/a05_142.htm","source_url":"https://sacred-texts.com/neu/ascp/a05_142.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Paris Psalter: Psalm 142\n Verse Indeterminate Saxon\n \n - \n Drihten, min gebed \u00a0\u00a0\u00a0\u00a0 deore gehyre, \n and mid earum onfoh \u00a0\u00a0\u00a0\u00a0 ungemetum georne\n mine halsunge; \u00a0\u00a0\u00a0\u00a0 heald me sy\u00f0\u00f0an\n on \u00feinre so\u00f0f\u00e6stnesse \u00a0\u00a0\u00a0\u00a0 and me on so\u00f0e gehyr.\n- 5\n- \n Ne ga \u00feu mid \u00feinum esne \u00a0\u00a0\u00a0\u00a0 in to dome, \n for\u00feon on \u00feinre gesih\u00f0e ne bi\u00f0 \u00a0\u00a0\u00a0\u00a0 so\u00f0f\u00e6st \u00e6nig\n \u00fee on \u00f0isse foldan \u00a0\u00a0\u00a0\u00a0 feorhlif bere\u00f0.\n For\u00feon mine sawle \u00a0\u00a0\u00a0\u00a0 swi\u00f0e feondas\n ealle ehtan \u00a0\u00a0\u00a0\u00a0 ungemete strange,\n- 10\n- \n habba\u00f0 me gehn\u00e6ged \u00a0\u00a0\u00a0\u00a0 heanne to eor\u00f0an \n and min lif swylce \u00a0\u00a0\u00a0\u00a0 gelytlad is.\n Hi me on digle \u00a0\u00a0\u00a0\u00a0 deorce stowe\n settan sarlice \u00a0\u00a0\u00a0\u00a0 samed anlice,\n swa \u00feu worulddeade \u00a0\u00a0\u00a0\u00a0 wrige mid foldan;\n- 15\n- \n is me \u00e6nge gast \u00a0\u00a0\u00a0\u00a0 innan hre\u00f0res, \n and me is heorte on \u00a0\u00a0\u00a0\u00a0 hearde gedrefed.\n \u00feonne ic on mode \u00a0\u00a0\u00a0\u00a0 gemyndgade,\n hu me \u00e6rran dagas \u00a0\u00a0\u00a0\u00a0 oft alumpan,\n metegade on mode \u00a0\u00a0\u00a0\u00a0 ealle \u00feine m\u00e6ran weorc\n- 20\n- \n and ymbe \u00feine handgeweorc \u00a0\u00a0\u00a0\u00a0 hogode georne. \n \u00feonne ic mine handa to \u00fee \u00a0\u00a0\u00a0\u00a0 holde \u00feenede\n and mine sawle \u00a0\u00a0\u00a0\u00a0 sette mid mode,\n swa eor\u00f0an bi\u00f0 \u00a0\u00a0\u00a0\u00a0 ansyn w\u00e6teres;\n gehyr me hr\u00e6dlice, \u00a0\u00a0\u00a0\u00a0 h\u00e6l me sy\u00fe\u00fean.\n- 25\n- \n Nu me deope is, \u00a0\u00a0\u00a0\u00a0 drihten leofa, \n min sylfes gast \u00a0\u00a0\u00a0\u00a0 sw\u00e6r geworden,\n ne awend fram me, \u00a0\u00a0\u00a0\u00a0 wuldres ealdur,\n \u00feine ansyne; \u00a0\u00a0\u00a0\u00a0 wese ic earmum gelic\n \u00fee on sweartne grund \u00a0\u00a0\u00a0\u00a0 sy\u00fe\u00fean astiga\u00f0.\n- 30\n- \n Gedo \u00fe\u00e6t ic gehyre \u00a0\u00a0\u00a0\u00a0 holde on morgene \n \u00feine mildheortnesse, \u00a0\u00a0\u00a0\u00a0 mihtig drihten,\n for\u00feon ic hycge to \u00f0e, \u00a0\u00a0\u00a0\u00a0 helpe gelyfe.\n Do me wegas wise, \u00a0\u00a0\u00a0\u00a0 \u00fe\u00e6t ic wite gearwe\n on hwylcne ic gange \u00a0\u00a0\u00a0\u00a0 gleawe mode;\n- 35\n- \n nu ic to drihtnes \u00a0\u00a0\u00a0\u00a0 dome wille \n mine sawle \u00a0\u00a0\u00a0\u00a0 settan geornast.\n Afyrr me, frea drihten, \u00a0\u00a0\u00a0\u00a0 feondum minum;\n nu ic helpe to \u00fee \u00a0\u00a0\u00a0\u00a0 holde gelyfe;\n l\u00e6r me, hu ic \u00feinne willan \u00a0\u00a0\u00a0\u00a0 wyrce and fremme,\n- 40\n- \n for\u00feon \u00feu min god eart, \u00a0\u00a0\u00a0\u00a0 \u00feu me god dydest. \n Me \u00fein se goda gast \u00a0\u00a0\u00a0\u00a0 gleawe l\u00e6dde,\n \u00fe\u00e6t ic on rihtne weg \u00a0\u00a0\u00a0\u00a0 re\u00f0ne ferde;\n for naman \u00feines \u00a0\u00a0\u00a0\u00a0 neodweor\u00f0unge,\n drihten usser, \u00a0\u00a0\u00a0\u00a0 do me halne,\n- 45\n- \n \u00fe\u00e6t ic on \u00f0inum rihte \u00a0\u00a0\u00a0\u00a0 r\u00e6df\u00e6st lifige. \n And \u00feu of costunge \u00a0\u00a0\u00a0\u00a0 cl\u00e6ne al\u00e6ddest\n sawle mine, \u00a0\u00a0\u00a0\u00a0 \u00fe\u00e6r heo sy\u00f0\u00f0an for\u00f0\n on \u00feinre mildheortnesse \u00a0\u00a0\u00a0\u00a0 mote wunian;\n and \u00feu mine feondas \u00a0\u00a0\u00a0\u00a0 f\u00e6cne todrife,\n- 50\n- \n and eac forleose \u00a0\u00a0\u00a0\u00a0 la\u00f0ra gehwylcne \n \u00fee mine sawle \u00a0\u00a0\u00a0\u00a0 synne \u00e6tf\u00e6sten,\n for\u00feon ic \u00fein esne eom \u00a0\u00a0\u00a0\u00a0 agen symble.","title":"The Paris Psalter: Psalm 142","type":"page"}