{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a05_143.htm","path":"neu/ascp/a05_143.htm","source_url":"https://sacred-texts.com/neu/ascp/a05_143.htm","text":"Drihten is gebletsad, min se deora god,\n\u00fee mine handa to hilde teah\nand mine fingras to gefeohtanne. He is mildheortnes min \u00e6t \u00feearfe,\n5\nfri\u00f0 and fultum, f\u00e6st andfengea\nand alysend is lifes mines.\nMin \u00feu m\u00e6re eart mihtig scyldend;\nic hiht on \u00f0e h\u00e6bbe f\u00e6ste,\n\u00fe\u00e6t \u00feu me folc m\u00e6nig f\u00e6gere under\u00feeoddest.\n10\nHw\u00e6t is se manna, mihtig drihten,\n\u00fee \u00feu him cu\u00f0lice cy\u00fean woldest,\no\u00f0\u00f0e mannes sunu, \u00fe\u00e6t hit gemet w\u00e6re,\n\u00fe\u00e6t \u00feu him aht wi\u00f0 \u00e6fre h\u00e6fdest? Man by\u00f0 merwe gesceaft, mihtum idel;\n15\nbeo\u00f0 his dagas swylce demde gelice,\nswa \u00feu on scimiendre sceade locige.\nAhyld \u00feine heofenas, halig drihten,\nonhrin \u00feissum muntum, and hi hra\u00f0e reoca\u00f0.\n\u00feine ligetta leohta\u00f0 and beorhta\u00f0,\n20\nand \u00feu hi toweorpest wide \u00e6fter;\nsynd \u00feine strele strange swylce,\nand \u00f0u hi gedrefed hafast deope sy\u00fe\u00fean.\nOnsend \u00feine handa of heanessum,\nalys me and genere wi\u00f0 lagustreamum\n25\nmanegum w\u00e6terum and wi\u00f0 manfolmum\nfremdra bearna and frecenra.\n\u00feara mu\u00f0as spreca\u00f0 manidel word,\nbi\u00f0 hyra seo swi\u00f0re symble abysgod,\n\u00fe\u00e6t hi unrihtes elne tiligea\u00f0.\n30\nIc niwlice niwne cantic\n\u00feam godan gode gleawne singe\non psalterio, \u00fee him swynsa\u00f0 oft\nmid tyn strengum getogen hearpe,\non \u00fe\u00e6re \u00fee ic \u00fee singe swi\u00fee geneahhe.\n35\n\u00feu healdest and sylest h\u00e6lu cyningum;\n\u00feu alysdest eac leofne Dauid,\n\u00feinne agenne ombihtm\u00e6cg,\nof \u00feam awyrgedan wra\u00f0an sweorde.\nAlys me and o\u00f0l\u00e6d la\u00feum w\u00e6trum,\n40\nmanegum merestreamum, m\u00e6rum handum,\n\u00fea me fremde bearn f\u00e6cne syndan.\n\u00feara mu\u00f0as spreca\u00f0 manidel word,\nby\u00f0 hyra seo swi\u00f0re symble abysgad,\n\u00fe\u00e6t hi unrihtes awa tiligean.\n45\n\u00feara bearn swylce bogum \u00e6\u00feelum\nsettum beamum samed anlice, standa\u00f0 on sta\u00f0ule sti\u00f0e wi\u00f0 geogu\u00f0e.\nW\u00e6run heora dohtru deore gesette\nand ymb fr\u00e6twum utan gegyrede,\n50\nefne anlicast \u00e6\u00feelum temple.\nHeora frumw\u00e6stme fulle syndon,\n\u00fe\u00e6t hi rumlice roccetta\u00f0 swi\u00f0e,\nof \u00feissan on \u00fe\u00e6t \u00feonne wenda\u00f0.\nHeora sceap w\u00e6run swylce tydred\n55\nand on si\u00f0fatum swi\u00fee genihtsum,\nheora oxan eac ungemete f\u00e6tte.\nNe hreosa\u00f0 hi to hrusan hearde gebiged,\nne \u00fe\u00e6r fernes is folca m\u00e6negum,\nne care micle cleopia\u00f0 on wor\u00f0um.\n60\nEadig bi\u00f0 \u00fe\u00e6t folc, o\u00f0re hata\u00f0,\n\u00fee him swa on foldan f\u00e6gre limpe\u00f0;\neadig bi\u00f0 \u00fe\u00e6t folc \u00fee \u00e6lmihtig wile drihten god dema weor\u00f0an.","title":"The Paris Psalter: Psalm 143","type":"page"}