{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a05_144.htm","path":"neu/ascp/a05_144.htm","source_url":"https://sacred-texts.com/neu/ascp/a05_144.htm","text":"Ic me heahne god h\u00e6bbe to kyninge,\nand ic naman \u00feinne neode herige\non ecnesse awa to worulde.\n\u00feuruh syndrige dagas symble ic \u00f0e bletsige,\n5\nand naman \u00feinne neode herige\non ecnesse awa to worulde.\nMycel is drihten, hine man m\u00e6gene sceal\nholde mode herian swi\u00f0e;\nnis his micelmodes m\u00e6genes ende.\n10\nCneorissa kynn cwidum symble\n\u00fein weorc herigen wordum georne,\nand \u00feine mihte eac micle s\u00e6cgeon.\nMycel mod and strang \u00feines m\u00e6gen\u00f0rymmes\nand \u00feine halignesse holdes modes\n15\nwise wordum spreca\u00f0, weredum secggea\u00f0\neall \u00fein wundur wide m\u00e6re.\nAnd hi m\u00e6gen swylce m\u00e6re and egeslic\n\u00feinra wundra wislic s\u00e6cgen\nand \u00feine m\u00e6genstreng\u00f0u m\u00e6rsien wide.\n20\nGemune \u00feines modes \u00fea miclan geniht,\n\u00feinre we\u00f0nesse wise s\u00e6cgenum\nroccette and r\u00e6d sprece,\nand \u00feine so\u00f0f\u00e6stnesse s\u00e6cge geneahhe.\nMildheort is drihten and mann\u00few\u00e6re\n25\nand ge\u00feyldig eac, \u00feearle mildheort.\nSwylce eallum is ure drihten\nmanna cynne milde and bli\u00f0e; syndan his miltsa ofer us m\u00e6re weorc\neall yldum cu\u00f0 awa to feore.\n30\nAndetten \u00fee, drihten, ealle \u00feine weorc\nand \u00fee \u00feine \u00fea halgan her bletsien.\nAnd hi \u00feine mihte manna bearnum\ncy\u00fean mid cynnum and mid cneorissum,\n\u00feines m\u00e6gen\u00ferymmes m\u00e6re wuldur\n35\nriht and re\u00f0e rices \u00feines.\n\u00fe\u00e6t \u00feu cu\u00f0 gedydest ofer cneorisse,\n\u00fe\u00e6r synd manna bearn manig \u00e6tsomne,\nand \u00fe\u00e6t \u00fein miht is ofer middaneard\nand \u00feines rices r\u00e6df\u00e6st wuldur.\n40\nRice is \u00fein, drihten, r\u00e6de gef\u00e6stnod,\nand \u00feu woruldricum wealdest eallum;\nis \u00fein anweald eac ofer eor\u00f0ware\nof cynne on cynn and on cneorissum.\nDrihten is on wordum d\u00e6dum getreowe\n45\nand on eallum his weorcum wis and halig.\nAhefe\u00f0 halig god \u00fea \u00f0e hreosa\u00f0 \u00e6r,\nand he ealle arece\u00f0 earme gebrocene.\nEagan on \u00fee ealra, drihten,\nwisra gewena\u00f0 wiste to genihte,\n50\nand \u00feu him mete sylest m\u00e6la gehwylce\nand \u00fe\u00e6s tidlice tid gemearcast. Onhlidest \u00f0u \u00feine handa and hi hra\u00f0e fyllest,\nealra wihta gehwam wis bletsunga.\nSo\u00f0f\u00e6st is drihten on his sylfes wegum\n55\neallum on eor\u00f0an, and he \u00e6fter \u00fean\non his weorcum is wis and halig.\nNeah is drihten ni\u00feum eallum\n\u00fee hine mid so\u00f0e hige secea\u00f0 and ciega\u00f0\nand his willan her wyrcea\u00f0 georne\n60\nand his ege swylce elne r\u00e6fna\u00f0;\nhe heora bene bealde gehyre\u00f0\nand hi hr\u00e6dlice gede\u00f0 hale sona.\nEalle gehealde\u00f0 halig drihten\n\u00fee lufan wi\u00f0 hine lustum healde\u00f0,\n65\nand he synfulle swylce todrife\u00f0\ngeond widwegas wearnum ealle.\nSceal lof drihtnes on lust sprecan\nmin mu\u00f0 mannum m\u00e6la gehwylce,\nand fl\u00e6sca gehwylc \u00feurh f\u00e6le word\n70\nhis \u00feone haligan naman her bletsian\non ecnesse awa to feore.","title":"The Paris Psalter: Psalm 144","type":"page"}