{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a05_148.htm","path":"neu/ascp/a05_148.htm","source_url":"https://sacred-texts.com/neu/ascp/a05_148.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Paris Psalter: Psalm 148\n Verse Indeterminate Saxon\n \n - \n Heria\u00f0 ge on heofenum \u00a0\u00a0\u00a0\u00a0 h\u00e6lend drihten, \n heria\u00f0 hlude \u00a0\u00a0\u00a0\u00a0 on heanessum.\n Heria\u00f0 hine ealle \u00a0\u00a0\u00a0\u00a0 engla \u00f0reatas,\n lofige hine swylce \u00a0\u00a0\u00a0\u00a0 eall his leodm\u00e6gen.\n- 5\n- \n Herigen hine swylce \u00a0\u00a0\u00a0\u00a0 sunna and mona, \n \u00e6ghwylc steorra \u00a0\u00a0\u00a0\u00a0 and \u00fe\u00e6t \u00e6\u00f0ele leoht.\n Heofenas hine heofena \u00a0\u00a0\u00a0\u00a0 herian georne,\n and \u00fea w\u00e6ter swylce \u00a0\u00a0\u00a0\u00a0 \u00f0e ofer wolcnum synt\n on heofenhame, \u00a0\u00a0\u00a0\u00a0 herigen drihten.\n- 10\n- \n For\u00f0on he sylfa cw\u00e6\u00f0, \u00a0\u00a0\u00a0\u00a0 sona w\u00e6run \n wr\u00e6clice geworht \u00a0\u00a0\u00a0\u00a0 w\u00e6tera \u00f0ry\u00fee,\n and gesceapene w\u00e6run, \u00a0\u00a0\u00a0\u00a0 \u00fea he sylfa het.\n \u00fea he on ecnesse \u00a0\u00a0\u00a0\u00a0 eall sta\u00f0elade\n and on worulda woruld \u00a0\u00a0\u00a0\u00a0 wolde healdan;\n- 15\n- \n he sette bebod, \u00a0\u00a0\u00a0\u00a0 sy\u00fe\u00fean heo \u00fe\u00e6t heoldon. \n Herigen dracan swylce \u00a0\u00a0\u00a0\u00a0 drihten of eor\u00f0an,\n and ealle neowelnessa \u00a0\u00a0\u00a0\u00a0 herian naman drihtnes.\n Fyr, forst, h\u00e6gel \u00a0\u00a0\u00a0\u00a0 and gefeallen snaw,\n is and yste, \u00a0\u00a0\u00a0\u00a0 ealra gastas\n- 20\n- \n \u00fee his word willa\u00f0 \u00a0\u00a0\u00a0\u00a0 wyrcean georne, \n Muntas and geswyru, \u00a0\u00a0\u00a0\u00a0 micle beamas,\n \u00fea \u00fee m\u00e6st and w\u00e6stm \u00a0\u00a0\u00a0\u00a0 mannum bringa\u00f0,\n and on eallum cedrum \u00a0\u00a0\u00a0\u00a0 cii\u00f0 al\u00e6ded,\n Deor and neat, \u00a0\u00a0\u00a0\u00a0 do \u00fe\u00e6t sniome;\n- 25\n- \n nifle n\u00e6dran cynn \u00a0\u00a0\u00a0\u00a0 be naman ealle, \n and fugla cynn \u00a0\u00a0\u00a0\u00a0 fi\u00f0erum gescyrped,\n Eor\u00f0cyningas eac \u00a0\u00a0\u00a0\u00a0 ealle swylce\n \u00fee folcum her \u00a0\u00a0\u00a0\u00a0 fore wisien\n and ealdormen \u00a0\u00a0\u00a0\u00a0 ahw\u00e6r syndan,\n- 30\n- \n and ealle \u00fee \u00feas eor\u00fean \u00a0\u00a0\u00a0\u00a0 ahw\u00e6r deme\u00f0. \n Beon ge, h\u00e6gestealdas \u00a0\u00a0\u00a0\u00a0 and glade f\u00e6mnan,\n ealde and geonge \u00a0\u00a0\u00a0\u00a0 ealle \u00e6tsamne;\n herian naman drihtnes \u00a0\u00a0\u00a0\u00a0 mid neodlofe.\n For\u00feon his anes nama \u00a0\u00a0\u00a0\u00a0 ofer ealle is\n- 35\n- \n ahafen healice \u00a0\u00a0\u00a0\u00a0 h\u00e6le\u00f0a ealra; \n is upp ahafen \u00a0\u00a0\u00a0\u00a0 his andetness\n heah ofer myclum \u00a0\u00a0\u00a0\u00a0 heofone and eor\u00f0an.\n He horn hefe\u00f0 \u00a0\u00a0\u00a0\u00a0 holdes folces,\n he lofe leohte\u00f0 \u00a0\u00a0\u00a0\u00a0 leofe \u00fea halgan;\n- 40\n- \n wese awa fri\u00f0 \u00a0\u00a0\u00a0\u00a0 on Israhela \n f\u00e6lum folce, \u00a0\u00a0\u00a0\u00a0 and hi for\u00f0 heonan\n on his neaweste \u00a0\u00a0\u00a0\u00a0 neode wunian.","title":"The Paris Psalter: Psalm 148","type":"page"}