{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a05_55.htm","path":"neu/ascp/a05_55.htm","source_url":"https://sacred-texts.com/neu/ascp/a05_55.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Paris Psalter: Psalm 55\n Verse Indeterminate Saxon\n \n - \n Miltsa me drihten, \u00a0\u00a0\u00a0\u00a0 for\u00f0on me man trede\u00f0, \n and me ealne d\u00e6g \u00a0\u00a0\u00a0\u00a0 mid unrihte\n fynd onfeohta\u00f0 \u00a0\u00a0\u00a0\u00a0 \u00feurh facensearu.\n And me f\u00e6cne treda\u00f0 \u00a0\u00a0\u00a0\u00a0 feondas mine,\n- 5\n- \n do\u00f0 \u00fe\u00e6t ealne d\u00e6g \u00a0\u00a0\u00a0\u00a0 fram \u00e6rmergene. \n For\u00f0on monige synd \u00a0\u00a0\u00a0\u00a0 \u00f0e to me feohta\u00f0;\n wene ic me wra\u00f0e to \u00f0e, \u00a0\u00a0\u00a0\u00a0 wuldres drihten.\n Ic wealdend god \u00a0\u00a0\u00a0\u00a0 wordum herige,\n and on god swylce \u00a0\u00a0\u00a0\u00a0 georne gelyfe,\n- 10\n- \n \u00fe\u00e6t minre spr\u00e6ce \u00a0\u00a0\u00a0\u00a0 sped folgie \n \u00e6ghw\u00e6s ealne d\u00e6g; \u00a0\u00a0\u00a0\u00a0 eac ic swylce\n on god drihten \u00a0\u00a0\u00a0\u00a0 gearewe gewene;\n nis me ege mannes \u00a0\u00a0\u00a0\u00a0 for ahw\u00e6\u00f0er.\n Hw\u00e6t, me ealne d\u00e6g \u00a0\u00a0\u00a0\u00a0 mine agen word\n- 15\n- \n sylfne socon, \u00a0\u00a0\u00a0\u00a0 swy\u00fee oncu\u00f0on, \n and wi\u00f0er me \u00a0\u00a0\u00a0\u00a0 w\u00e6ran georne\n on yfel heora ge\u00f0eaht \u00a0\u00a0\u00a0\u00a0 ealle onwende.\n On eardia\u00f0, \u00a0\u00a0\u00a0\u00a0 \u00fea \u00f0e swa \u00feencea\u00f0\n \u00fe\u00e6t heo gehyden \u00a0\u00a0\u00a0\u00a0 h\u00e6lun mine,\n- 20\n- \n swa min sawl bad \u00a0\u00a0\u00a0\u00a0 \u00fe\u00e6t \u00f0u swylce heo \n for nahw\u00e6\u00f0er \u00a0\u00a0\u00a0\u00a0 nowiht h\u00e6le;\n on yrre \u00feu folc \u00a0\u00a0\u00a0\u00a0 eall ge\u00f0reatast.\n Ic nu leofum gode \u00a0\u00a0\u00a0\u00a0 lif min secge,\n sette on \u00f0inre gesyh\u00f0e \u00a0\u00a0\u00a0\u00a0 sarige tearas,\n- 25\n- \n swa ic \u00f0e on gehate \u00a0\u00a0\u00a0\u00a0 h\u00e6fde geneahhige. \n \u00feonne on hinderling \u00a0\u00a0\u00a0\u00a0 hweorfa\u00f0 mine\n feondas f\u00e6cne, \u00a0\u00a0\u00a0\u00a0 \u00f0onne ic me freo\u00f0u to \u00f0e\n wordum wilnige; \u00a0\u00a0\u00a0\u00a0 ic wat and can,\n \u00fe\u00e6t \u00feu min god \u00a0\u00a0\u00a0\u00a0 gleawe w\u00e6re.\n- 30\n- \n Ic on god min word \u00a0\u00a0\u00a0\u00a0 georne herige, \n and on god swylce \u00a0\u00a0\u00a0\u00a0 georne gelyfe,\n and ic ealne d\u00e6g \u00a0\u00a0\u00a0\u00a0 ecne drihten\n wordum weor\u00f0ige; \u00a0\u00a0\u00a0\u00a0 ne me wiht an site\u00f0\n egesan awiht \u00a0\u00a0\u00a0\u00a0 \u00e6niges mannes.\n- 35\n- \n On me synd, mihtig god, \u00a0\u00a0\u00a0\u00a0 \u00fe\u00e6t ic \u00fee min gehat \n on herenesse \u00a0\u00a0\u00a0\u00a0 hyldo gylde;\n for\u00feon \u00f0u mine sawle \u00a0\u00a0\u00a0\u00a0 of swyltdea\u00f0es\n la\u00feum wi\u00f0l\u00e6ddest, \u00a0\u00a0\u00a0\u00a0 dydest lof stunde,\n aweredest mine eagan \u00a0\u00a0\u00a0\u00a0 wra\u00f0um tearum\n- 40\n- \n and mine fet \u00a0\u00a0\u00a0\u00a0 f\u00e6le beweredest, \n \u00fe\u00e6t ic gearewe \u00a0\u00a0\u00a0\u00a0 gode licode\n on lifigendra \u00a0\u00a0\u00a0\u00a0 leohte eallum.","title":"The Paris Psalter: Psalm 55","type":"page"}